អ្នកនាំពាក្យអះអាងថា មូលដ្ឋានអាជីវកម្មភាគច្រើននៅខេត្តព្រះសីហនុបើកដំណើរការឡើងវិញ

ដោយ ៖ វុត្ថា

ភ្នំពេញ ៖ អ្នកនាំពាក្យរដ្ឋបាលខេត្តព្រះសីហនុ បានឱ្យដឹងថា ដំណើរអាជីវកម្មនានានៅក្នុងខេត្តនៅពេលបច្ចុប្បន្ននេះ នៅតែដំណើធម្មតា ទាំងវិស័យភោជនីយដ្ឋាន សេវាកម្ម និងសណ្ឋាគារ ខណៈដែលវិនិយោគិនចិននៅតែបន្តវិលត្រឡប់ចូលមកវិញជាបន្តបន្ទាប់។

លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានប្រាប់គេហទំព័រ propertyarea.asia នៅព្រឹកថ្ងៃទី២ ខែកក្កដា ឆ្នាំ២០២០នេះថា ទាំងអាជីវកម្ម ភោជនីយដ្ឋាន សណ្ឋាគារ និងផ្ទះសំណាក់របស់ប្រជាពលរដ្ឋខ្មែរ នៅតែដំណើរធម្មតា ដោយក្នុងនោះ អាជីវកម្មរបស់ជនបរទេសក៏នៅតែដំណើរការធម្មតាផងដែរ។

លោកបន្តថា សម្រាប់អាជីវកម្មទេសចរណ៍មួយចំនួនគឺមានការផ្អាកដំណើរការបណ្តោះអាសន្ន ប៉ុន្តែជារួមសម្រាប់អាជីវកម្មដែលមានម្ចាស់ជាជនជាតិខ្មែរ បានបើកដំណើរការក្នុងចំនួនច្រើន ដែលមិនមានផលប៉ះពាល់នោះទេ។

លោកកបន្ថែមថា សម្រាប់វិនិយោគិនចិន និងប្រជាជនចិនដែលបំរើការជំនាញនៅក្នុងខេត្តព្រះសីហនុកន្លងមកនេះ នៅតែបន្តធ្វើដំណើរមកកាន់ខេត្តព្រះសីហនុជាបន្តបន្ទាប់ ដោយក្នុងមួយសប្តាហ៍មានជើងហោះហើរតាមរយៈព្រលានយន្ដហោះកងកេងចំនួន២ ជើងជារៀងរាល់សប្តាហ៍។

លោក ធី ចន្ធី ម្ចាស់ផ្ទះសំណាក់មួយនៅតំបន់អូត្រេះ បានឱ្យដឹងដែរថា អាជីកម្មផ្ទះសំណាក់ទាំងអស់នៅក្នុងខេត្តព្រះសីហនុនៅតែដំណើរធម្មតា ប៉ុន្តែសម្រាប់អាជីកម្មរបស់ជនជាតិចិនមួយចំនួននៅមិនទាន់បើកដំណើរការនៅឡើយទេ ខណៈដែលពួកគេមិនទាន់ត្រឡប់មមកវិញ។

លោកបន្តថា បើទោះបីអាជីកម្មមានដំណើរការក៏ពិតមែន តែមិនទទួលបានភ្ញៀវច្រើននោះទេ ហើយចំណូលជាប្រចាំអាចបានត្រឹមតែមួយទប់ទល់ចំណាយតែប៉ុណ្ណោះ មិនដូចកាលពីពេលមុនឡើយ ។ លោកបន្ថែមថា សម្រាប់ជនជាតិចិនដែលត្រឡប់មកវិញក្នុងពេលកន្លងមកនេះ គ៏មិនសូវច្រើនដែរ។ ដោយឡែកភ្ញៀវទេសចរក៏មិនទាន់មានច្រើនដែរ ប៉ុន្តែរំពឹងថា កំណើនភ្ញៀវទេសចរជាតិ និងអន្តរជាតិ នឹងកើនឡើងវិញបន្ទាប់ពីការកសាងហេដ្ឋារចនាសម្ព័ន្ធនៅក្នុងក្រុងព្រះសីហនុ ត្រូវបានបញ្ចប់ក្នុងពេលដ៏ខ្លីខាងមុខនេះ៕

យោងតាមរបាយការណ៍របស់រដ្ឋបាលខេត្តព្រះសីហនុបានបង្ហាញថា ស្ថិតិអាជីវកម្មក្នុងវិស័យទេសចរណ៍ មានចំនួនសរុប៨៧៧ទីតាំង ក្នុងនោះ៖ សណ្ឋាគារ ១០៧ ស្មើនឹង៧,៥១៥ បន្ទប់ បឹងហ្គាឡូ៣៣ ស្មើនឹង៤៦២បន្ទប់។ ផ្ទះសំណាក់ ២៣០ស្មើនឹង ២,៧៧៥ បន្ទប់ ភោជនីយដ្ឋាន/អាហារដ្ឋាន៣១២ ស្មើនឹង១៣,៨៩២កៅអី។ ខារ៉ាអូខេ ៣៨ ស្មើនឹង៤៤៨បន្ទប់ ឌីស្កូតែក៩ ចំណុះ៨៩៨នាក់។ បៀរហ្គាឌិន៣ស្មើនឹង៣៩០ កៅអី ទូកដឹកភ្ញៀវទេសចរ ៣០ម្ចាស់ ស្មើនឹង៥៤កៅអី កីឡាទេសចរណ៍២០ ទីភ្នាកងារទេសចរណ៍២៣ និងរមណីយដ្ឋានធម្មជាតិ និងកែឆ្នៃ៦(មិនរាប់បញ្ជូលរមណីយដ្ឋានឆ្នេរ)។

ក្នុងរយៈពេល៥ឆ្នាំចុងក្រោយនេះ ខេត្តទទួលបានកំណើនទេសចរជាតិ អន្តរជាតិជាមធ្យមពី១០-១៥% ។ ក្នុងឆ្នាំ២០១៩ ខេត្តព្រះសីហនុទទួលភ្ញៀវទេសចរសរុបជាង២.២លាននាក់ កើនឡើង៨,៨៧% ក្នុងនោះភ្ញៀវទេសចរជាតិ១.៣៤៣.៦៩០នាក់ ថយចុះ ៨,៣៧% និងភ្ញៀវទេសចរអន្តរជាតិ៨៨៥.៧៩២ នាក់ កើនឡើង៥២,៤១% ៕

អ្នកជំនាញ ៖ ទីផ្សារអចលនទ្រព្យនៅកម្ពុជា បាន និងកំពុងចាប់ផ្តើមងាកចេញពីវិបត្តិ COVID-19

ដោយ ៖ ប៊ី

ភ្នំពេញ ៖ ក្រុមអ្នកជំនាញបានអះអាងថា អ្នកទិញអចលនទ្រព្យជាច្រើនកំពុងស្វែងរកចាប់យកឱកាស ក្នុងការទិញអចលនទ្រព្យស្ទើតែគ្រប់ទីកន្លែង ដែលមានសក្ដានុពលទូទាំងប្រទេសកម្ពុជា ខណៈវិស័យនេះបានចាប់ងាកចេញពីវិបត្តិ COVID-19។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា បានថ្លែងប្រាប់ Propertyarea.asia នៅថ្ងៃទី២ ខែកក្កដា ឆ្នាំ២០២០ ថា ទីផ្សារអចលនទ្រព្យបាន និងកំពុងចាប់ផ្តើមងាកចេញពីវិបត្តិ COVID-19 ខណៈអ្នកវិនិយោគក្នុងវិស័យនេះកំពុងស្វែងរកឱកាសដើម្បីចាប់យកអចលនទ្រព្យនៅទីតាំងដែលមានសក្តានុពលនៅទីតាំងផ្សេងៗស្ទើពេញផ្ទៃប្រទេស។

លោកបានថ្លែងថា “អ្នកទិញអចលនទ្រព្យកាន់តែច្រើនកំពុងស្វែងរកចាប់យកអចលនទ្រព្យស្ទើតែគ្រប់ទីកន្លែងក្នុងប្រទេស”។ លោកបន្តថា “សក្តានុពលនៃទីផ្សារអចលនទ្រព្យនៅកម្ពុជាបានចាប់ផ្តើមកើនឡើងជាលំដាប់។ វិស័យអចលនទ្រព្យនៅកម្ពុជាបច្ចុប្បន្នមានភាពរស់រវើក ហើយខ្ញុំនៅតែមានសុទិដ្ឋិនិយមថា វិស័យនេះនឹងកើនឡើងទ្វេដង នៅពេលដែលជំងឺ Covid-19 បានផុតរលត់ទាំងស្រុង”។

លោក James Hodge នាយករងក្រុមហ៊ុន CBRE Cambodia បានគេទំព័រ Propertyarea.asia ថា ការទិញអចលនទ្រព្យនៅតែមានភាពសកម្ម ប៉ុន្តែអ្នកវិនិយោគមានប្រុងប្រយ័ត្នខ្ពស់ ហើយពួកគេចង់ធ្វើឱ្យប្រាកដថា ពួកគេមានព័ត៌មានគ្រប់គ្រាន់ មុនពេលវិនិយោគ ដែលជារឿយៗបញ្ហាអាចកើតឡើងមើលមិនឃើញ។

ទាក់ទងនឹងប្រជាជនក្នុងស្រុក ចាប់ផ្តើមទិញអចលនទ្រព្យ លោក James បាននិយាយថា កម្រិតសកម្មភាពនៅទូទាំងទីផ្សារ កំពុងផ្លាស់ប្តូរយឺតៗឆ្ពោះទៅរកភាពធម្មតា នៅពេលភាពជឿជាក់ត្រឡប់មកវិញ។ ទោះជាយ៉ាងណា វាគួរតែត្រូវបានព្រមានថា ផលប៉ះពាល់នៃ Covid-19 នៅមានពេលវែងឆ្ងាយទៀត ហើយវានៅតែមានភាពខុសគ្នា នៃភាពមិនប្រាកដប្រជា និងគំរាមកំហែងពីទីផ្សារខាងក្រៅ។

លោក សន សៀប អគ្គនាយកក្រុមហ៊ុនអចលនទ្រព្យ Key Real Estate បានលើកឡើងកាលពីពេលថ្មីៗនេះថា លោកសង្កតឃើញថា អំឡុងពេលកូវីដនេះ អ្នកទិញមានចំនួនច្រើនជាងមុនពេលកូវីដទៀត។ លោកថា “នេះសម្រាប់តែអ្វីដែលខ្ញុំបានឃើញ”។
លោកបានថ្លែងថា “នៅក្នុងគ្រាលំបាកនេះ គឺយើងអាចមានឱកាសច្រើន។ ចំនួនសកម្មភាពជារួមរបស់ភ្នាក់ងារអចលនទ្រព្យមានថមថយចុះ ដូច្នេះនេះជាឱកាសសម្រាប់ភ្នាក់ងារពិតប្រាកដក្នុងការបញ្ចេញស្នាដៃចាប់យកអតិថិជន”។

លោកបានបន្តថា “អំឡុងពេលនេះ អ្នកទិញដែលចុះទៅមើលដីធ្លី គឺអ្នកទិញពិតប្រាកដ ហើយយើង (ភ្នាក់ងារ) ចំណេញពេលជាងមុនទៀត។ បើគាត់មិនទិញទេ គាត់មិនចុះទៅទេ អំឡុងពេលនេះ”។ លោកបានឱ្យដឹងទៀតថា សកម្មភាពរបស់ទិញឃើញមានច្រើនបច្ចុប្បន្ន ព្រោះអ្នកទិញអំឡុងពេលនេះ មានភាពច្បាស់ លាស់ជាងពេលមុនកូវីដនេះទៅទៀត”។

ទុនវិនិយោគក្នុងវិស័យសំណង់នៅទូទាំងប្រទេស មានទំហំទឹកប្រាក់សរុបជាង៣ពាន់លានដុល្លារអាមេរិក ក្នុងរយៈពេល ៤ខែដំបូងដើមឆ្នាំ២០២០នេះ បានកើនឡើងជាង ២០ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យរបស់ក្រសួងសេដ្ឋកិច្ច និងហិរញ្ញវត្ថុ៕

ក្រុមហ៊ុនចិនដ៏ធំមួយស្វែងរកឱកាសវិនិយោគផ្នែកវប្បធម៌ និងទេសចរណ៍នៅខេត្តបាត់ដំបង

ដោយ ៖ វុត្ថា

ភ្នំពេញ ៖ ក្រុមហ៊ុន Angkor Culture Investment and Development Group របស់ខេត្តយូណាន នៃសាធារណៈរដ្ឋប្រជាមានិតចិនបាននឹងកំពុងស្វែងរកឱកាសវិនិយោគ ដើម្បីបណ្តាក់ទុនវិនិយោគបន្ថែម នៅលើវិស័យវប្បធម៌ និងទេសចរណ៍។

លោក Wang yin Phing តំណាងក្រុមហ៊ុនAngkor Culture Investment and Development Group ខេត្តយូណាន នៃប្រទេសចិននៅក្នុងជំនួបជាមួយអភិបាលខេត្តបាត់ដំបងកាលពីថ្ងៃទី១ ខែកក្កដា ឆ្នាំ២០២០ ម្សិលមិញនេះ ឱ្យដឹងថា ក្រុមហ៊ុនបានធ្វើការវិនិយោគផ្នែកវប្បធម៌ និងទេសចរណ៍ នៅក្នុងខេត្តសៀមរាបរួចមកហើយ ប៉ុន្តែបច្ចុប្បន្នក្រុមហ៊ុនចង់ធ្វើការសិក្សាអំពីសក្តានុពលខេត្ត ដើម្បីឈានដល់ការដាក់វិនិយោគនៅលើវិស័យវប្បធម៌ និងទេសចរណ៍នៅខេត្តបាត់ដំបងផងដែរ។

លោក ងួន រតនៈ អភិបាលខេត្តបាត់ដំបងបានគាំទ្រយ៉ាងពេញទំហឹងចំពោះក្រុមហ៊ុន Angkor Culture Investment and Development Group ដែលមានបំណងចង់ដាក់ទុនវិនិយោគក្នុងខេត្តបាត់ដំបង នាពេលនេះ ខណៈខេត្តបាននឹងកំពុងមានការរីកចំរើនលើវិស័យទេសចរណ៍។

លោកថ្លែងថា “ចំពោះខេត្តបាត់ដំបង មានសក្តានុពលសំខាន់ៗចំនួន ៣ រួមមានវិស័យកសិកម្ម វិស័យផ្នែកសេវាកម្ម និងវិស័យទេសចរណ៍ ដែលរមណីយដ្ឋានបែបប្រវត្តិសាស្ត្រ និងរមណីយដ្ឋានធម្មជាតិផងដែរ”។

ក្រុមប្រឹក្សាអភិវឌ្ឍន៍កម្ពុជា ឬហៅកាត់ថា CDC កន្លងមកនេះបានគាំទ្រឱ្យក្រុមហ៊ុន Angkor International Culture Investment & Development (Cambodia) Co.,Ltd របសចិនដ៏ធំមួយនេះ បោះទុនវិនិយោគចំនួន ២៧,៥ លានដុល្លារអាមេរិក សម្រាប់គម្រោងឧទ្យានវប្បធម៌កម្ពុជា-ចិននេះ ដែលបានបង្កើតឱកាសការងារបានប្រមាណ ២១៣ កន្លែងសម្រាប់ប្រជាជនស្ថិតនៅតាមបណ្តោយផ្លូវ៦០ម៉ែត្រ ភូមិទ្រាំង ឃុំស្លក្រាម ក្រុងសៀមរាប ខេត្តសៀមរាប៕

ក្រុមហ៊ុនអចលនទ្រព្យចិនធំៗចំនួន២នឹងបោះទុនវិនិយោគវិស័យសំណង់ក្នុងខេត្តកំពង់ស្ពឺ

ដោយៈ រ៉ាណេត

កំពង់ស្ពឺៈ ក្រុមហ៊ុនអចលនទ្រព្យមកពីប្រទេសចិនធំចំនួន២ បានមកធ្វើការសិក្សា និងស្វែងយល់បន្ថែមពីសក្ដានុពលនៅក្នុងខេត្តកំពង់ស្ពឺ រួមជាមួយនឹងគោលបំណងបណ្តាក់ទុនវិនិយោគនៅក្នុងវិស័យអចលនទ្រព្យ និងវិស័យសំណង់នៅក្នុងខេត្តមួយនេះជាមួយទុនរាប់សិបលានដុល្លារ។

ទោះជាស្ថិតនៅក្នុងស្ថានភាព នៃការរាលដាលឡើងវិញនៃវិបត្តិជំងឺឆ្លង ក្នុងរលកទី២ នៅប្រទេសកាលពីពេលថ្មីៗនេះ ក្រុមហ៊ុនអចលនទ្រព្យធំៗចំនួន២ ដែលមានទីស្នាក់ការនៅប្រទេសចិនបានបង្ហាញពីមហិច្ឆិតា ចង់មកបណ្តាក់វិនិយោគក្នុងវិស័យសំណង់នៅក្នុងខេត្តកំពង់ស្ពឺ ដែលជាខេត្តគោលដៅនៃវិស័យឧស្សាហកម្ម។ នេះបើតាមការឱ្យដឹងពីលោក វ៉ី សំណាង អភិបាលខេត្តកំពង់ស្ពឺ កាលពីល្ងាចថ្ងៃទី១ ខែកក្កដា ឆ្នាំ២០២០ ។

លោកបានមានប្រសាសន៍ប្រាប់ថា “នេះគឺជាមោទនភាពរបស់ខេត្តកំពង់ស្ពឺ ដែលទទួលបានចំណាប់អារម្មណ៍ ពីសំណាក់វិនិយោគិនជាច្រើន ដែលក្នុងរួមមានទាំងក្រុមហ៊ុនក្នុងស្រុក និងក្រៅស្រុក ជាពិសេសក្រុមហ៊ុនមកពីប្រទេសចិន ស្របពេលដែលហេដ្ឋារចនាសម្ព័ន្ធនានានៅទូទាំងខេត្ត ត្រូវបានយកចិត្តទុកដាក់ស្ថាបនាសាងសង់ពីសំណាក់រាជរដ្ឋាភិបាលកម្ពុជា” ។

ក្រុមហ៊ុនអចលនទ្រព្យចិន ដែលបង្ហាញពីចំណាប់អារម្មណ៍វិនិយោគនៅក្នុងខេត្តកំពង់ស្ពឺទាំង២ខាងលើនេះ រួមមាន ក្រុមហ៊ុន China Realm Investment និង Qianxun SL។ ជាមួយនឹងគោលបំណងខាងលើនេះ ក្រុមហ៊ុនទាំង២នឹងនាំមកនូវផលិតផលដែលជាបច្ចេកវិទ្យាចុងក្រោយរបស់ប្រទេសចិន ដោយប្រើប្រាស់ប្រព័ន្ធ 5G ( ALIBABA RESOURCES ) ដែលជាឧបករណ៍បំពាក់លើសំណង់អគារ។

លោកបានបញ្ជាក់ថា ខេត្តកំពង់មានភាពអំណោយផលជាច្រើន ជាពិសេសកត្តាភូមិសាស្ត្រ តែម្ដងដែលមានផ្លូវជាតិសំខាន់ៗក្នុងការដឹកជញ្ជូន ដូចជាផ្លូចជាតិលេខ៣ ផ្លូវជាតិលេខ៤ និងផ្លូវជាតិលេខ។ ភាពរីកចម្រើននិងអភិវឌ្ឍន៍ទាំងនេះ គឺកើតចេញពីការខិតខំរបស់រាជរដ្ឋាភិបាលកម្ពុជា ដែលបានកៀងគរ និងសម្របសម្រួលគ្រប់វិធីសាស្ត្រដើម្បីកៀងគរ ប្រមូលបណ្តាអ្នកវិនិយោគអន្តរជាតិឱ្យមកកាន់កម្ពុជា។ កាលពីសប្ដាហ៍មុនមានតំណាងក្រុមហ៊ុនវិនិយោគចិន មកសិក្សាពីឱកាសវិនិយោគនៅក្នុងខេត្តកំពង់ស្ពឺ ដែលជាក្រុមហ៊ុនអចលនទ្រព្យ។ ពួកគេបង្ហាញពីចំណាប់អារម្មណ៍ ចូលមកវិនិយោគនៅក្នុងខេត្តកំពង់ស្ពឺក្រោយពេលបញ្ហា Covid-19 ត្រូវបានបញ្ចប់ ។

លោកវ៉ី សំណាងបានបញ្ជាក់ទៀតថា មិនមែនមានតែក្រុមហ៊ុនទាំង២នេះទេ គឺមានក្រុមហ៊ុនជាច្រើនរបស់ចិន ដែលបានមកសិក្សាពីឱកាសវិនិយោគ ដូច្នេះខ្ញុំជឿថា ក្រោយពេលបញ្ហាCovid-19 បញ្ចប់ ពួកគេទាំងនោះនឹងចូលមកចាប់ដំណើរគម្រោងរបស់ពួកគេជាមិនខាន ដែលក្នុងនោះក៏មានគម្រោងវិនិយោគ ក្នុងវិស័យទេសចរណ៍ដែលមានទុនជាង៥០០លានដុល្លារផងដែរ៕

គម្រោងបុរីជេ អរ ភី ផ្សារត្រាចផ្លូវជាតិលេខ៥ កក់ត្រឹម៥០០ដុល្លារក៏អាចក្លាយជាម្ចាស់វីឡាកូនកាត់បានដែរ

ដោយៈ រ៉ាណេត

ភ្នំពេញៈ បន្ថែមពីលើគោលការណ៍យ៉ាងពិសេស ដែលអនុញ្ញាតដល់ការបង់រំលស់រហូតដល់រយៈពេល២ឆ្នាំឥតការប្រាក់ លោកអ្នកគ្រាន់តែធ្វើការកក់ត្រឹម៥០០ដុល្លារក៏អាចក្លាយជាម្ចាស់លំនៅឋានដ៏ទំនើប បែបវីឡាកូនកាត់ថៃ ដែលផ្តល់ជូនពីគម្រោងអភិវ ឌ្ឍន៍បុរីលំនៅឋាន ជេ អរ ភី ផ្សារត្រាចផ្លូវជាតិលេខ៥ ។

ស្ថិតនៅក្នុងតំបន់ដែលកំពុងមានការអភិវឌ្ឍន៍វិស័យឧស្សាហកម្ម និងសំណង់លំនៅឋានព្រោងព្រាត រួមជាមួយសកម្មភាព នៃការកសាងហេដ្ឋារចនាសម្ព័ន្ធរបស់រាជរដ្ឋាភិបាលឱ្យកាន់តែប្រសើរ គម្រោងអភិវឌ្ឍន៍បុរីលំនៅឋាន ជេ អរ ភី ផ្សារត្រាច (JRP Premium) ដែលកំពុងសម្រុកការសាងសង់ នៅក្នុងដំណាក់កាលទី២នៃគម្រោងសរុបដែលមានផ្ទះចំនួន២៣០ខ្នង។

គំរោងនេះបាន និងកំពុងទទួលបាននូវការចាប់អារម្មណ៍ យ៉ាងខ្លាំងពីសំណាក់អតិថិជនទាំងក្នុងនិងក្រៅតំបន់ ជាមួយនឹងការលក់ក្នុងតម្លៃទាបជាងទីផ្សារមិនធ្លាប់មាន។

លក្ខណៈពិសេសនៃលំនៅឋាននៅក្នុងគម្រោងមួយនេះ ក្រៅពីមានតម្លៃទាបជាងទីផ្សារត្រឹមជាង៣ម៉ឺនដុល្លារ គ្រប់លំនៅឋានទាំងអស់ សុទ្ធតែត្រូវបានសាងសង់ឡើងបែបទំនើបស្របតាមបច្ចេកទេសសំណង់យ៉ាងត្រឹមត្រូវ ផ្តល់ផាសុកភាពដល់ការរស់នៅយ៉ាងកក់ក្ដៅ ហើយថែមទាំងអាចប្រកបអាជីវកម្មប្រចាំថ្ងៃបានយ៉ាងប្រសើរ។

គម្រោងមួយនេះ ស្ថិតនៅជិតផ្សារត្រាច ជាប់ផ្លូវរដ្ឋទំហំ៣០ម៉ែត្រ តភ្ជាប់រវាងផ្លូវជាតិលេខ៥ និងផ្លូវជាតិលេខ៥២១ ហ៊ុព័ទ្ធជុំវិញដោយរោងចក្រ សហគ្រាសតូចធំច្រើនជាង២០ទីតាំង ដែលកំពុងមានដំណើរការស្រាប់ មានមន្ទីរពេទ្យ វត្តអារាម សាលារៀនរដ្ឋ និងឯកជន រួមជាមួយនឹងផ្ទះស្នាក់របស់កម្មករ-កម្មការិនីរោងចក្រផងដែរ។ ដោយឡែកនៅក្នុងគម្រោង ក៏មានការរៀបចំហេដ្ឋារចនាសម្ព័ន្ធយ៉ាងត្រឹមត្រូវ មានបណ្តាញទឹកស្អាត អគ្គិសនី បណ្តាញបង្ហូរទឹក មានសួនច្បារសម្រាប់ហាត់ប្រាណ សួនកុមារ និងការបង្កើតតំបន់បែតង ដែលជាការយកចិត្តទុកដាក់ខ្ពស់ ក្នុងការចូលរួមចំណែកថែរក្សាបរិស្ថាន និងផ្តល់ភាពងាយស្រួលដល់ការរស់នៅផងដែរ។

លំនៅឋានបែបប្រណីតភាពនៅក្នុងគម្រោងទី២នេះ កាន់តែមានភាពទាក់ទាញ ដោយទំហំផ្ទះ៤,២ X១២ ម៉ែត្រ មានបន្ទប់គេងចំនួន២ បន្ទប់ទឹកចំនួន២ បន្ទប់ទទួលភ្ញៀវដ៏ស្រស់ស្អាត និងធំទូលាយចំនួន១ មានផ្ទះបាយចំនួន និងសល់ទីធ្លាក្រោយផ្ទះជាង៣ម៉ែត្រ ខាងមុខផ្ទះជាង៦ម៉ែត្រ ងាយស្រួលចតយានយន្ត និងទុកដាក់សម្ភារៈផ្សេងៗ ដោយមានការរៀបចំទីកន្លែងទុកដាក់សំរាបយ៉ាងមានរបៀបបំផុត។

ទីតាំងគម្រោង លោកអ្នកធ្វើដំណើរពីរាជធានីភ្នំពេញ ហួសផ្សារឧដុង្គចម្ងាយ៣គីឡូម៉ែត្រ នៅខាងក្រោយផ្សារត្រាចប្រមាណជាង៣០០ម៉ែត្រ ភូមិផ្សារត្រាច ឃុំលង្វែក ស្រុកកំពង់ត្រាច ខេត្តកំពង់ឆ្នាំង។

សម្រាប់ព័តមានលម្អិតសូមទំនាក់ទំនងតាមរយៈទូរស័ព្ទលេខ ៖ ០៩២ ៩២ ២៩ ២៧ ឬ Facebook: JRP Premium ៕

ក្រុមហ៊ុន អាជីវកម្មទេសចរណ៍នៅកម្ពុជាជិត ៣០០០ទីតាំងត្រូវបិទទ្វារ

ដោយៈ វុត្ថា

ភ្នំពេញៈ គិតត្រឹមអំឡុងខែឧសភា ឆ្នាំ២០២០ មានអាជីវកម្មទេសចរណ៍ជាច្រើនប្រភេទ បាននិងបិទបណ្ដោះអាសន្នសរុប ២៩៥៦ទីតាំង និងមានបុគ្គលិកបម្រើការងារផ្ទាល់សរុប ៤៥,៤០៥នាក់ទទួលរងនូវផលប៉ះពាល់ពីវិស័យនេះ។

យោងតាមរបាយការណ៍ក្រសួងទេសចរណ៍ ដែលត្រូវបានផ្សព្វផ្សាយនៅថ្ងៃទី១ ខែកក្កដា ឆ្នាំ២០២០នេះ ឱ្យដឹងថា ការធ្លាក់ចុះនៃចំនួនភ្ញៀវទេសចរ ពិតជាបានបង្កផលប៉ះពាល់ជាច្រើនដល់ប្រតិបត្តិករទេសចរណ៍ តែយ៉ាងណាមិញគេសង្កេតឃើញថា គោលដៅរាជធានីភ្នំពេញ មិនសូវទទួលរងផលប៉ះពាល់ធ្ងន់ធ្ងរខ្លាំង ដូចគោលដៅទេសចរណ៍ធំៗផ្សេងទៀតឡើយ។

របាយការណ៍ដដែលបន្តថា ចំនួនអាជីវកម្មបានបិទ និងផ្អាកបណ្តោះអាសន្នដោយសារបញ្ហាវិបត្តិកូវីដ-១៩ មានតែ១២៤ទីតាំង ស្មើនឹងប្រមាណ១០.៤៣% នៃចំនួនសរុបទូទាំងប្រទេស និងប៉ះពាល់ការងារផ្ទាល់ ក្នុងវិស័យសរុបចំនួន១,៩៦០នាក់ ស្មើនឹង ៩.៣៣% នៃចំនួនបុគ្គលិកក្នុងវិស័យទេសចរណ៍សរុបទូទាំងប្រទេស (តួលេខនេះមិនគិតបញ្ចូលសេវាកម្មកម្សាន្ត ទេសចរណ៍មនុស្សពេញវ័យ និងសេវាកម្មស្ប៉ា និងម៉ាស្សាដែលត្រូវបានសម្រេចឱ្យផ្អាកដោយរាជរដ្ឋាភិបាល)។

របាយការណ៍ដដែលបន្ថែមថា “ការបាត់បង់ការងារនេះ បានធ្វើឱ្យមានការជះឥទ្ធិពលយ៉ាងខ្លាំងទៅដល់វិស័យសេដ្ឋកិច្ច និងសង្គមជារួមតាមរយៈឥទ្ធិពល ដែលលើសពីឥទ្ធិពលអវិជ្ជមាននៅក្នុងវិស័យធ្វើដំណើរ និងទេសចរណ៍ជាសកល” ។

លោក ថោង ខុន រដ្ឋមន្ត្រីក្រសួងទេសចរណ៍បានដឹងដែរថា ជាមួយនឹងការបិទទីតាំងអាជីវកម្មទេសចរណ៍នេះ ចលនាទេសចរណ៍ក្នុងស្រុកនឹងមានកំណើន លឿនជាងការត្រឡប់មកវិញនូវភ្ញៀវទេសចរអន្តរជាតិ ដរាបណាវិធានការរឹតបណ្តឹង ដែលពាក់ព័ន្ធនឹងការធ្វើដំណើរនៅតែបន្ត។

លោកបន្តថា “បច្ចុប្បន្ននេះយើងបានទទួលព័ត៌មាន អំពីគោលបំណងបើកឱ្យមានការធ្វើដំណើរឆ្លងកាត់ឡើងវិញ នៅតាមបណ្តាប្រទេសមួយចំនួន។ រីឯប្រទេសខ្លះក៏បានសម្រេចឱ្យបើករួចទៅហើយ តែក៏បានសម្រេចឱ្យបិទទៅវិញភ្លាមៗ បន្ទាប់ពីមានការចម្លងថ្មីកើតឡើងវិញ” ។

គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ១៩បានកំណត់ថា អ្នកដំណើរជាជនបរទេសទាំងអស់ តម្រូវឲ្យមានវិញ្ញាបនបត្របញ្ជាក់សុខភាព ចេញដោយអាជ្ញាធរសុខាភិបាល ដែលទទួលស្គាល់ដោយរដ្ឋាភិបាល នៃប្រទេសសាម៉ីបញ្ជាក់ថា គ្មានមេរោគកូវីដ១៩ ក្នុងរយៈពេល៧២ម៉ោង។

ជនបរទេសត្រូវមានឯកសារធានារ៉ាប់រងសុខភាព ក្នុងចំនួនទឹកប្រាក់យ៉ាងតិច៥ម៉ឺនដុល្លាអាមេរិក ក្នុងអំឡុងពេលស្នាក់នៅកម្ពុជា និងវិធានផ្សេងៗទៀតដែលកំណត់ដោយរាជរដ្ឋាភិបាលកម្ពុជា (តម្រូវការនេះមិនសម្រាប់មន្ត្រីនៃស្ថានតំណាងបរទេស និងអង្គការអន្តរជាតិ ដែលកាន់ទិដ្ឋាការការទូតប្រភេទA និងទិដ្ឋាការផ្លូវការប្រភេទB របស់កម្ពុជាឡើយ។ អ្នកដំណើរទាំងអស់ ទាំងជនជាតិខ្មែរ និងជនជាតិបរទេស ដែលធ្វើដំណើរចូលមកកម្ពុជា ត្រូវបញ្ជូនទៅមណ្ឌលរង់ចាំ ដើម្បីធ្វើតេស្តបញ្ជាក់រកមេរោគកូវីដ១៩ និងរង់ចាំលទ្ធផលពីមន្ទីរពិសោធន៍ប៉ាស្ទ័រ។

មួយវិញទៀតក្នុងករណីមានអ្នកដំណើរណាម្នាក់ ឬច្រើននាក់ មានកូវីដ១៩ វិជ្ជមាន រាល់អ្នកដំណើររួមជាមួយផ្សេងទៀតទាំងអស់ តម្រូវឱ្យធ្វើចត្តាឡីស័ករយៈពេល១៤ថ្ងៃ នៅទីតាំង ដែលកំណត់ដោយគណៈកម្មការអន្តរក្រសួង ដើម្បប្រយុទ្ធនឹងជំងឺកូវីដ១៩ ជាពិសេក្នុងករណីអ្នកដំណើរទាំងអស់ មានលទ្ធផលបញ្ជាក់ពីមន្ទីរពិសោធន៍ថា កូវីដ១៩ អវិជ្ជមាន នោះពួកគាត់ត្រូវបានអនុញ្ញាតឱ្យធ្វើចត្តាឡីស័ករយៈពេល១៤ថ្ងៃ នៅតាមផ្ទះរៀងៗខ្លួន ក្រោមការត្រួតពិនិត្យពីអាជ្ញាធរមូលដ្ឋាន និងមន្ត្រីសុខាភិបាលដោយតម្រូវឱ្យធ្វើតេស្តបញ្ជាក់ម្តងទៀតនៅថ្ងៃទី១៣ នៃការធ្វើចត្តាឡីស័ក៕

អ្នកជំនាញថាកម្ពុជានៅតែមានសក្តានុពលខ្ពស់ចំពោះវិនិយោគិនចិនលើវិស័យអចលនទ្រព្យ

ដោយ វុត្ថា

ភ្នំពេញៈ កម្ពុជានៅតែមានសក្តានុពលខ្ពស់ ចំពោះវិនិយោគវិនិយោគិនចិនលើវិស័យអចលនទ្រព្យ ជាពិសេសគម្រោងសាងសង់អគារខ្ពស់ៗ និងគម្រោងបុរីមួយចំនួនផងដែរ បើទោះបីពិភពលោកក៏ដូចជាកម្ពុជាបាន និងកំពុងជួបញ្ហាប្រឈមពីការរីករាលដាលជាសកលវិបត្តិជំងឺ Covid-19 ។

លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL នៅក្នុងកិច្ចសន្និនាសមាជិកសមាគមអ្នកវាយតម្លៃ និងភា្នក់ងារអចលនវត្ថុកម្ពុជាតាមវិដូអូ Conference កាលពីពេលថ្មីៗឱ្យថា កម្ពុជានៅតែជាគោលដៅវិនិយោគិនចិន ព្រោះកម្ពុជា-ចិនមានទំនាក់ទំនងល្អជាមួយគ្នា ហើយពេលថ្មីៗនេះ វិនិយោគិនក៏ចាន់បផ្តើមចូលមកកាន់ខេត្តព្រះសីហនុជាបន្តបន្ទាប់។

លោកបន្តថា “យើងឃើញថា ប្រជាជនចិនច្រើនណាស់ ហើយយើងទទួលបានការវិនិយោគភាគច្រើនគឺមកពីប្រទេសចិន នៅតាមបណ្តាខេត្តមួយចំនួន។ ជាមួយគ្នានេះ បើរដ្ឋាភិបាល មានទំនាក់ទំនងល្អជាមួយចិន ដូចសព្វថ្ងៃនេះ ហើយក៏មានការចង់សម្ព័ន្ធផ្សេងៗទៀត ជាមួយខេត្តរបស់កម្ពុជា យើងនឹងនៅតែមានការវិនិយោគពីចិនដដែល” ។

លោកចេង ខេងបានបន្តថា យើងដឹងថាវិនិយោគិនចិន មិនត្រឹមតែវិនិយោគនូវអគារខ្ពស់ៗនោះទេ តែក៏មានគម្រោងលើវិយោគលើបុរីផងដែរ ហើយជាពិសេសនោះ គឺវិស័យឧស្សាហកម្ម និងកសិកម្មក៏ចិនមកវិនិយោគច្រើន បន្ថែមពីនេះ វិនិយោគិនចិននៅតែចាត់ទុកកម្ពុជាជាគោលវិនិយោគរបស់ខ្លួនផងដែរ។

លោកឡុង គឹមសួគ៌ អគ្គនាយកក្រុមហ៊ុន Century21 Advance បានឱ្យដឹងដែរថា ប្រទេសកម្ពុជា គឺមានទីតាំងភូមិសាស្ត្រល្អ ក្នុងការវិយោគលើវិស័យអចលនទ្រព្យ ព្រោះកម្ពុជាមិនមានគ្រោះរញ្ជួលដី ឬ ផ្ទុះភ្នំភ្លើងនោះទេ ។

លោកបន្តថា “ទាំងនេះគឺជាចំណុចល្អសម្រាប់វិនិយោគិនចិន ដែលមកវិនិយោគនៅក្នុងប្រទេសកម្ពុជា លើវិស័យអចលនទ្រព្យ និងសំណង់។ លោកបន្តថា “ម្យ៉ាងទៀត កម្ពុជាមានទីតាំងមួយចំនួនដូចជា ខេត្តកោះកុង ខេត្តព្រះសីហនុ និងកែបជាដើមដែលផ្តល់ឱកាសវិនិយោគដល់ជនជាតិចិន ខណៈដែលប្រទេសមួយចំនួន មិនមានតាំងល្អដូចកម្ពុជានោះទេ” ។

លោកសន សៀប អគ្គនាយកក្រុមហ៊ុន Key Real Estate បានបញ្ចេញទស្សនផងដែរថា ទំនាក់ទំនងរវាងរដ្ឋាភិបាលកម្ពុជា ចិនដែលមានភាពរ៉ឹងមាំង និងស្អិតរមួតដូចបច្ចុប្បន្ននេះ ជាពិសេសមានការជួយគ្នាទៅវិញ ទៅក្នុងដំណាក់កាលនៃវិបត្តិចំពោះការផ្ទុះឡើងនូវជំងឺ Covid-19 នេះ វិនិយោគិនចិនអាចនឹងវិលត្រឡប់មកវិញ។

លោកបន្តថា “វិនិយោគិនចិនភាគច្រើនទៅវិនិយោគ នៅក្នុងប្រទេសណាដែលមានកិច្ចទំល្អជាមួយប្រទេសខ្លួន ព្រោះពួកគេមានភាពងាយស្រួល ក្នុងស្នើសុំកម្ចីពីរដ្ឋាភិបាល យកមកធ្វើការវិនិយោគ។ លោកបន្តថា “កម្ពុជានេះមានទីតាំងល្អ ទំនាក់ទំនងល្អ និងមានគោលនយោបាយគាំទ្រចិន អាចនឹងស្រូបយកនូវិនិយោគិនចិន បន្ថែមទៀតនាពេលខាងមុខនេះ ក្រោយចប់ Covid-19 ” ៕

ចំណេះដឹង! តើមុខសញ្ញាសហគ្រាសធុនតូច និងធម្យមណាខ្លះដែលត្រូវបានលើកទឹកចិត្តផ្នែកគយ?

ដោយ វុត្ថា

ភ្នំពេញៈ សហគ្រាសធុនតូច និងមធ្យមក្នុងវិស័យអាទិភាព អាចទទួលបានការលើកទឹកចិត្តផ្នែកគយចំពោះមុខសញ្ញា ដូចខាងក្រោម៖

សម្ភារបរិក្ខារផលិតកម្ម សំដៅដល់គ្រឿងម៉ាស៊ីន ឧបករណ៍ដែលបានប្រើប្រាស់ជាមូលដ្ឋានក្នុងការបំប្លែងធាតុចូលផលិតកម្ម ហើយដែលវត្ថុទាំងនោះមិនអាចបំប្លែងបាន ដោយខ្លួនឯង ឬមិនត្រូវបានប្រើប្រាស់អស់ក្នុងរយៈពេល ២ឆ្នាំ បន្ទាប់ពីបាននាំចូល។
សម្ភារសាងសង់ សំដៅដល់សម្ភារសំណង់ រួមទាំងឧបករណ៍ បរិក្ខារ ដែលបានបំប្លែង ឬបានប្រើប្រាស់ទាំងស្រុង នៅក្នុងការសាងសង់សំណង់បម្រើឱ្យផលិតកម្ម។

ធាតុចូលផលិតកម្ម សំដៅដល់ទំនិញ រួមទាំងវត្ថុធាតុដើម ផលិតផលពាក់កណ្តាលសម្រេច និងសម្ភារៈ បន្ទាប់បន្សំបម្រើឱ្យផលិតកម្ម ដែលត្រូវបំប្លែង ឬត្រូវបានប្រើប្រាស់យ៉ាងពេញលេញ នៅក្នុងកិច្ចដំណើរ-ការផលិតកម្ម មិនឱ្យហួសរយៈពេល២ឆ្នាំ បន្ទាប់ពីបាននាំចូល។

សម្ភារៈបរិក្ខារផលិតកម្ម សម្ភារៈសាងសង់ និងធាតុចូលផលិតកម្ម មិនគិតបញ្ចូលនូវយានយន្ត គ្រឿងបន្លាស់យានយន្ត ផលិតផលតេលសិលា និងសម្ភារៈបរិក្ខារនិងគ្រឿងសង្ហារឹមសម្រាប់ប្រើប្រាស់ក្នុងការិយាល័យ៕

អាជីវកម្មទេសចរណ៍នៅកម្ពុជាជិត ៣០០០ ទីតាំង ត្រូវបិតទ្វារ

ដោយ ៖ វុត្ថា

ភ្នំពេញ ៖ គិតត្រឹមអំឡុងខែឧសភា ឆ្នាំ២០២០ មានអាជីវកម្មទេសចរណ៍ជាច្រើនប្រភេទ បាន និងបិទបណ្ដោះអាសន្នសរុប ២ ៩៥៦ទីតាំង និងមានបុគ្គលិកបម្រើការងារផ្ទាល់សរុប ៤៥ ៤០៥នាក់ទទួលរងនូវផលប៉ះពាល់ពីវិស័យនេះ ។

របាយការណ៍ក្រសួងទេសចរណ៍ដែលត្រូវបានផ្សព្វផ្សាយនៅថ្ងៃទី១ ខែកក្កដា ឆ្នាំ២០២០នេះ ឱ្យដឹងថា ការធ្លាក់ចុះនៃចំនួនភ្ញៀវទេសចរ ពិតជាបានបង្កផលប៉ះពាល់ជាច្រើនដល់ប្រតិបត្តិករទេសចរណ៍ តែយ៉ាងណាមិញគេសង្កេតឃើញថា គោលដៅរាជធានីភ្នំពេញមិនទទួលរងផលប៉ះពាល់ធ្ងន់ធ្ងរខ្លាំងដូចគោលដៅទេសចរណ៍ធំៗផ្សេងទៀតឡើយ។

របាយការណ៍ដដែលបន្តថា ចំនួនអាជីវកម្មបានបិទ និងផ្អាកបណ្តោះអាសន្នដោយសារបញ្ហាវិបត្តិកូវីដ-១៩ មានតែ ១២៤ទីតាំង ស្មើនឹងប្រមាណ ១០.៤៣% នៃចំនួនសរុបទូទាំងប្រទេស និងប៉ះពាល់ការងារផ្ទាល់ក្នុងវិស័យសរុបចំនួន១,៩៦០នាក់ ស្មើនឹង ៩.៣៣% នៃចំនួនបុគ្គលិកក្នុងវិស័យទេសចរណ៍សរុបទូទាំងប្រទេស (តួលេខនេះមិនគិតបញ្ចូលសេវាកម្មកម្សាន្តទេសចរណ៍មនុស្សពេញវ័យ និងសេវាកម្មស្ប៉ា និងម៉ាស្សាដែលត្រូវបានសម្រេចឱ្យផ្អាកដោយរាជរដ្ឋាភិបាល)។

របាយការណ៍ដដែលបន្ថែមថា ការបាត់បង់ការងារនេះ បានធ្វើឱ្យមានការជះឥទ្ធិពលយ៉ាងខ្លាំងទៅដល់វិស័យសេដ្ឋកិច្ច និងសង្គមជារួមតាមរយៈឥទ្ធិពល ដែលលើសពីឥទ្ធិពលអវិជ្ជមាននៅក្នុងវិស័យធ្វើដំណើរ និងទេសចរណ៍ជាសកល។

លោក ថោង ខុន រដ្ឋមន្ត្រីក្រសួងទេសចរណ៍ បានដឹងដែរថា ជាមួយនឹងការបិទទីតាំងអាជីវកម្មទេសចរណ៍នេះ ចលនាទេសចរណ៍ក្នុងស្រុកនឹងមានកំណើន លឿនជាងការត្រឡប់មកវិញនូវភ្ញៀវទេសចរអន្តរជាតិ ដរាបណាវិធានការរឹតបណ្តឹងដែលពាក់ព័ន្ធនឹងការធ្វើដំណើរនៅតែបន្ត។

លោកបន្តថា បច្ចុប្បន្ននេះ យើងបានទទួលព័ត៌មានអំពីគោលបំណងបើកឱ្យមានការធ្វើដំណើរឆ្លងកាត់ឡើងវិញ នៅតាមបណ្តាប្រទេសមួយចំនួន រីឯប្រទេសខ្លះក៏បានសម្រេចឱ្យបើករួចទៅហើយ តែក៏បានសម្រេចឱ្យបិទទៅវិញភ្លាមៗ បន្ទាប់ពីមានការចម្លងថ្មីកើតឡើងវិញ។

គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ បានកំណត់ថាអ្នកដំណើរជាជនបរទេសទាំងអស់ តម្រូវឲ្យមានវិញ្ញាបនបត្របញ្ជាក់សុខភាព ចេញដោយអាជ្ញាធរសុខាភិបាល ដែលទទួលស្គាល់ដោយរដ្ឋាភិបាលនៃប្រទេសសាម៉ីបញ្ជាក់ថាគ្មានមេរោគកូវីដ១៩ ក្នុងរយៈពេល ៧២ម៉ោង។

ជនបរទេសត្រូវមានឯកសារធានារ៉ាប់រងសុខភាព ក្នុងចំនួនទឹកប្រាក់យ៉ាងតិច ៥ម៉ឺនដុល្លាអាមេរិចក្នុងអំឡុងពេលស្នាក់នៅកម្ពុជា និងវិធានផ្សេងៗទៀតដែលកំណត់ដោយរាជរដ្ឋាភិបាលកម្ពុជា (តម្រូវការនេះមិនសម្រាប់មន្ត្រីនៃស្ថានតំណាងបរទេស និងអង្គការអន្តរជាតិ ដែលកាន់ទិដ្ឋាការការទូតប្រភេទ A និងទិដ្ឋាការផ្លូវការប្រភេទ Bរបស់កម្ពុជាឡើយ។ អ្នកដំណើរទាំងអស់ ទាំងជនជាតិខ្មែរ និងជនជាតិបរទេស ដែលធ្វើដំណើរចូលមកកម្ពុជា ត្រូវបញ្ជូនទៅមណ្ឌលរង់ចាំ ដើម្បីធ្វើតេស្តបញ្ជាក់រកមេរោគកូវីដ១៩ និងរង់ចាំលទ្ធផលពីមន្ទីរពិសោធន៍ប៉ាស្ទ័រ។

មួយវិញទៀតក្នុងករណីមានអ្នកដំណើរណាម្នាក់ ឬច្រើន ដែលមានកូវីដ១៩ វិជ្ជមាន រាល់អ្នកដំណើររួមជាមួយផ្សេងទៀតទាំងអស់តម្រូវឱ្យធ្វើចត្តាឡីស័ក រយៈពេល១៤ថ្ងៃ នៅទីតាំងដែលកំណត់ដោយគណៈកម្មការអន្តរក្រសួងដើម្បប្រយុទ្ធនឹងជំងឺកូវីដ១៩ ជាពិសេក្នុងករណីអ្នក ដំណើរទាំងអស់មានលទ្ធផលបញ្ជាក់ពីមន្ទីរពិសោធន៍ថាកូវីដ១៩ អវិជ្ជមាន នោះពួកគាត់ត្រូវបានអនុញ្ញាតឱ្យធ្វើចត្តាឡីស័ក រយៈពេល១៤ថ្ងៃ នៅតាមផ្ទះរៀងៗខ្លួន ក្រោមការត្រួតពិនិត្យពីអាជ្ញាធរមូលដ្ឋាន និងមន្ត្រីសុខាភិបាលដោយតម្រូវឱ្យធ្វើតេស្តបញ្ជាក់ម្តងទៀតនៅថ្ងៃទី១៣ នៃការធ្វើចត្តាឡីស័ក៕

ក្រដាសប្រាក់ដុល្លារ៣ប្រភេទ វិលមករកការចាយវាយដូចដើមបន្ទាប់ពីមានភាពចលាចលមួយរយៈ

ដោយ ៖ លក្ខិណា
ភ្នំពេញ ៖ ក្រដាសប្រាក់ដុល្លារ៣ប្រភេទ រួមមានក្រដាសប្រាក់១ដុល្លារ ២ដុល្លារ និង៥ដុល្លារ បានវិលមកចាយវាយធម្មតាវិញនៅលើទីផ្សារលក់រាយ និងកន្លែងទូរទាត់ទំនិញ បន្ទាប់ពីក្រដាសប្រាក់ទាំង៣ប្រភេទនេះ ត្រូវបានពលរដ្ឋកម្ពុជាមួយចំនួនរើសអើងកាលពីពេលកន្លងទៅនេះ ។

ជាការកត់សម្គាល់ អាជីវករតាមផ្សារនានាក្នុងរាជធានីភ្នំពេញ បានទទួលយកក្រដាសប្រាក់ដុល្លារ៣ប្រភេទគឺ ១ដុល្លារ ២ដុល្លារ និង៥ដុល្លារ វិញជាធម្មតា ហើយពេលនេះ កន្លែងដូរប្រាក់ក៏ទទួលយកក្រដាសប្រាក់ទាំងនេះវិញ រាប់ទាំងអាជីវករតូចតាចក៏ទទួលយកក្នុងការទូរទាត់ពីអតិថិជនផងដែរ ។

បុគ្គលិកចាក់សាំងនៃស្ថានីយ៍ប្រេងឥន្ធនៈមួយកន្លែងតាមបណ្ដោយផ្លូវជាតិលេខ៤បាននិយាយថា ក្រដាសប្រាក់ដុល្លារគ្រប់ប្រភេទ ត្រូវបានថៅកែអនុញ្ញាតអោយយកពីភ្ញៀវដែលចាក់សាំងទាំងអស់ ដោយមិនបដិសេធមួយណាឡើយ ហើយបច្ចុប្បន្ននេះ ក្រដាសប្រាក់ពេញនិយមនោះគឺ៥ដុល្លារនិង១ដុល្លារ តែសម្រាប់ក្រដាសប្រាក់២ដុល្លារស្ទើរតែមិនដែលជួបទេ គឺកម្រមានភ្ញៀវយកមកចាយនៅក្នុងការ៉ាសសាំងនេះណាស់ ។

ចំណែកអ្នកស្រីមុំ អ្នកលក់សាច់ជ្រូកនៅក្នុងផ្សារកំបូលក៏បាននិយាយដែរថា ពីមុនមិនហ៊ានយកក្រដាសប្រាក់១ដុល្លារ ២ដុល្លារ និង៥ដុល្លារពីភ្ញៀវទេ ព្រោះកាលមុនពេលយកទៅដូរស្រាប់តែគេថាអត់យក ពេលនោះក៏មានការភ្ញាក់ផ្អើលដែរ តែមកដល់ពេលនេះ ឃើញថាកន្លែងដូរលុយក៏ទទួលយក ដូច្នេះអ្នកស្រី ក៏ព្រមទទួលយកក្រដាសប្រាក់ទាំងនោះពីភ្ញៀវធម្មតាឡើងវិញ ។

ដោយឡែកបុគ្គលិកឥណទានម្នាក់ដែលស្នើសុំមិនបញ្ចេញឈ្មោះ និងស្ថាប័នរបស់ខ្លួនក៏បានអោយដឹងថា តាមគ្រឹះស្ថាននៅតែទទួលយកប្រាក់ពីពលរដ្ឋនូវក្រដាសប្រាក់ដុល្លារទាំង៣ប្រភេទដែលពលរដ្ឋបានផ្អើលកាលពីពេលកន្លង ។ ពលរដ្ឋដែលសងប្រាក់ត្រលប់មកគ្រឹះស្ថានវិញក៏នៅតែសងធម្មតា ហើយក៏មិនមែនជាក្រដាសប្រាក់ដុល្លារទាំង៣ប្រភេទនោះច្រើនដែរ ដោយពលរដ្ឋទុកចាយវាយខ្លះ ហើយប្រាក់ដែលត្រូវសងក៏មានជាដុល្លារ និងខ្មែរ ទៅតាមធនធានរបស់ពួកគាត់ដែរ ។

បុគ្គលិករូបនេះនិយាយថា តាមពិតទៅមានការផ្អើលមែន ពីការមិនចាយវាយក្រដាសប្រាក់១ដុល្លារ ២ដុល្លារ និង៥ដុល្លារ ហើយពលរដ្ឋក៏មានការសួរនាំច្រើន តែបន្ទាប់ពីក្រុមបុគ្គលិកបានពន្យល់ច្បាស់ពួកគាត់ក៏រក្សាភាពដដែល តែយ៉ាងណាពួកគាត់ក៏ជួបបញ្ហាមួយចំនួនផងដែរ ក្រោយពេលពួកគាត់យកក្រដាសប្រាក់ទាំងនោះ ទៅចាយវាយនៅតាមផ្សារតែត្រូវបានគេបដិសេធទទួលយកកាលពីពេលកន្លង ។ យ៉ាងណាក្ដីបាតុភាពទាំងនោះ បានត្រឹមតែមួយឆាវហើយរហូតមកដល់ពេលនេះ ស្ថានភាពនៃការចាយវាយក៏បានត្រលប់មកដូចភាពដើមវិញ ។

កាលពីអំឡុងខែឧសភា ឆ្នាំ២០២០ កន្លងទៅនេះ ធនាគារជាតិនៃកម្ពុជា បានចេញលិខិតកោះអញ្ជើញដល់គ្រឹះស្ថានធនាគារ និងមីក្រូហិរញ្ញវត្ថុដើម្បីចូលរួមប្រជុំមួយ ដែលក្នុងលិខិតកោះអញ្ជើញនោះ គឺនិយាយពីការមិនទទួលក្រដាសប្រាក់១ដុល្លារ ២ដុល្លារ និង៥ដុល្លារនៅក្នុងប្រព័ន្ធធនាគារ តែក៏មានបណ្ដាញព័ត៌មានមួយចំនួនបានយកទៅផ្សាយដោយនិយាយពីការមិនចាយវាយក្រដាសប្រាក់ដុល្លារទាំង៣ប្រភេទនោះទៅវិញ ជាហេតុធ្វើអោយសាធារណជនមានការយល់ច្រលំនិងផ្អើលតៗគ្នា ៕

1...2,3432,3442,345...3,255 Page 2,344 of 3,255