ខេត្តព្រះសីហនុទាក់ទាញទុនវិនិយោគរាប់ពាន់លានដុល្លារលើសណ្ឋាគារលំដាប់ផ្កាយ៥

ដោយ វុត្ថា

ភ្នំពេញៈ ប្រធានមន្ទីរទេសចរណ៍ខេត្តព្រះសីហនុ លោកតាំង សុចិត្រគ្រឹះស្នាបានអះអាងថា រហូតមដល់ពេលនេះ ខេត្តព្រះសីហនុ បាននឹងកំពុងទាក់ការវិនិយោគ លើវិស័យសណ្ឋាគារលំដាប់ផ្កាយ៥ចំនួន៨ ពីសំណាក់វិនិយោគិនចិន ក្នុងតម្លៃទុនរាប់ពាន់លានដុល្លារអាមេរិក ដែលពី៣ឆ្នាំមុនខេត្តនេះ មានសណ្ឋាគារលំដាប់ផ្កាយ៥តែមួយប៉ុណ្ណោះ។

លោកបានប្រាប់គេហទំព័ត៌មាន Propertyarea.asia កាលពីពេលថ្មីៗនេះឱ្យដឹងថា វិនិយោគិនចិនបានឈរនៅលំដាប់ទី១ លើការិវនិយោគវិស័យសណ្ឋាគារ នៅក្នុងខេត្តព្រះសីហនុ ហើយការចូលរួមពីវិស័យឯកជន ជាពិសេសវិនិយោគិនបរទេសពិតជាមានសារៈសំខាន់ណាស់ ក្នុងការអភិវឌ្ឍវិស័យទេសចណ៍នៅក្នុងខេត្តព្រះសីហនុ។

លោកបន្តថា នៅក្នុងអំឡុងឆ្នាំ២០១៦ និងឆ្នាំ២០១៧ ខេត្តមានសណ្ឋាគារលំដាប់ផ្កាយ៥តែមួយទេ តែនៅពេលដែលជនចិនចូលមកវិនិយោគ នៅក្នុងខេត្តព្រះសីហនុ តែក្នុងរយៈពេល៣ឆ្នាំកន្លងមកនេះ យើងមានសណ្ឋាគារលំដាប់ផ្កាយ៥រហូតដល់៨ហើយផ្កាយ៤មានមួយចំនួនទៀត” ។

លោកបានបន្ថែមថា “នេះជាមោទនភាពថ្មីរបស់ខេត្តព្រះសីហនុ ដែលជាគោលដៅទេសចរណ៍អន្តរជាតិ ហើយបាននឹងកំពុងឆ្ពោះទៅរកការអភិវឌ្ឍន៍ ប្រកបដោយនិរន្តភាព និងទាក់ទាញភ្ញៀវអន្តរជាតិ ឱ្យមានការចាយលុយកាន់តែច្រើន” ។

លោកតាំង សុចិត្រគ្រឹះស្នាបានបន្ថែមទៀថា ក្រៅពីនេះ ខេត្តព្រះសីហនុមានការអភិវឌ្ឍ និងការវិនិយោគយ៉ាងលឿន គ្រាន់តែសេវាកម្មកម្សាន្តប្រមាណ៥០ ដែលមានស្តង់ដារអន្តរជាតិ។ ជាមួយគ្នានេះក៏មានភោជនីយដ្ឋានធំៗរបស់ចិន និងមានស្តង់ដាខ្ពស់ដូចនៅក្នុងទីក្រុងភ្នំពេញដូច្នោះដែរ។

លោកបញ្ជាក់ថា “ភ្ញៀវទេសចរចិន រុស្សីជាដើម គេត្រូវការការស្នាក់នៅមួយដែលមានស្តង់ដារ ពោលគឺគេស្នាក់នៅក្នុងសណ្ឋាគារចាប់ពីផ្កាយ៤ឡើង បើយើងមិនសណ្ឋាគារដែលមានស្តង់ដារទទួលគេទេ គេនឹងបង្វែរគោលដៅទេសចរណ៍ ទៅកាន់ប្រទេសផ្សេងវិញហើយ “ ។ លោកបញ្ជាក់ទៀតថា “ការិវនិយោគលើសណ្ឋាគារលំដាប់ផ្កាយ៥ នេះ ក្នុងទំហំទុនរាប់ពាន់ដុល្លារនេះ ជាការចូលរួមអភិវឌ្ឍនសេដ្ឋកិច្ច សង្គមផ្តល់ឱកាសការងារជូលពលរដ្ឋប្រមាណ៥០០ ទៅ៨០០នាក់នៅក្នុងសណ្ឋាគារមួយ” ។

យោងតាមរបាយការណ៍របស់រដ្ឋបាល ខេត្តព្រះសីហនុបានបង្ហាញថា ស្ថិតិអាជីវកម្មក្នុងវិស័យទេសចរណ៍ មានចំនួនសរុប៨៧៧ទីតាំង ក្នុងនោះ៖ សណ្ឋាគារ ១០៧ ស្មើនឹង៧,៥១៥ បន្ទប់ បឹងហ្គាឡូ៣៣ ស្មើនឹង៤៦២បន្ទប់។ ផ្ទះសំណាក់២៣០ស្មើនឹង ២,៧៧៥ បន្ទប់ ភោជនីយដ្ឋាន/អាហារដ្ឋាន៣១២ ស្មើនឹង១៣,៨៩២កៅអី។ ខារ៉ាអូខេ ៣៨ ស្មើនឹង៤៤៨បន្ទប់ ឌីស្កូតែក៩ ចំណុះ៨៩៨នាក់។ បៀរហ្គាឌិន៣ស្មើនឹង៣៩០ កៅអី ទូកដឹកភ្ញៀវទេសចរ៣០ម្ចាស់ ស្មើនឹង៥៤កៅអី កីឡាទេសចរណ៍២០ ទីភ្នាកងារទេសចរណ៍២៣ និងរមណីយដ្ឋានធម្មជាតិ និងកែឆ្នៃ៦(មិនរាប់បញ្ជូលរមណីយដ្ឋានឆ្នេរ)។

ក្នុងរយៈពេល៥ឆ្នាំចុងក្រោយនេះ ខេត្តទទួលបានកំនើនទេសចរណ៍ជាតិ អន្តរជាតិជាមធ្យមពី១០-១៥% ។ ក្នុងឆ្នាំ២០១៩ ខេត្តព្រះសីហនុទទួលភ្ញៀវទេសចរសរុបជាង២.២លាននាក់ កើនឡើង៨,៨៧% ក្នុងនោះភ្ញៀវទេសចរជាតិ១.៣៤៣.៦៩០នាក់ ថយចុះ ៨,៣៧% និងភ្ញៀវទេសចរអន្តរជាតិ៨៨៥.៧៩២ នាក់ កើនឡើង៥២,៤១% ៕

ការនាំចេញទំនិញរបស់កម្ពុជាទៅថៃកើនឡើង ១០៦ភាគរយ រយៈពេល៤ខែដំបូងនៃឆ្នាំនេះ

ដោយ ប៊ី

ភ្នំពេញៈ ពាណិជ្ជកម្មទ្វេភាគីរវាងប្រទេសកម្ពុជា និងថៃមានទំហំទឹកប្រាក់ ៣,១ពាន់លានដុល្លារ ក្នុងរយៈពេល៤ខែដំបូងនៃឆ្នាំនេះ កើនឡើង១៨,៣ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់ស្ថានទូតថៃប្រចាំនៅរាជធានីភ្នំពេញ ដែលបានចេញផ្សាយកាលពីចុងសប្តាហ៍កន្លងមកនេះ។

របាយការណ៍ខាងលើបានឱ្យដឹងថា ចាប់ពីខែមករាដល់ខែមេសាឆ្នាំ ២០២០ ប្រទេសកម្ពុជាបាននាំចេញទំនិញ គិតជាទឹកប្រាក់៦៨៧លានដុល្លារ ទៅកាន់ប្រទេសថៃកើនឡើង ១០៦ភាគរយ។

របាយការណ៍បានចង្អុលបង្ហាញថា ផលិតផលសំខាន់ៗរបស់ប្រទេសកម្ពុជាបាននាំចេញទៅកាន់ប្រទេសថៃ រួមមានត្បូង និងគ្រឿងអលង្ការ៣៤៥លានដុល្លារ ផលិតផលអាលុយមីញ៉ូម៤៥លានដុល្លារ និងផលិតផលកសិកម្ម១៧៣លានដុល្លារ។

ជាមួយគ្នានេះដែរការនាំចូលរបស់កម្ពុជា ពីប្រទេសថៃមានទំហំទឹកប្រាក់២,៤ពាន់លានដុល្លារ បានកើនឡើង៥,៦ ភាគរយ។ ផលិតផលថៃដែលនាំចូលសំខាន់ គឺប្រេងឥន្ធនៈ៤៣០លានដុល្លារ រថយន្ត៣១២លានដុល្លារ និងត្បូង និងគ្រឿងអលង្ការ២២០លានដុល្លារ។

កាលពីឆ្នាំមុន ការដោះដូរពាណិជ្ជកម្មរវាងប្រទេសជិតខាងទាំងពីរ បានកើនឡើងដល់ជាង៩,៤១ ពាន់លានដុល្លារអាមេរិក កើនឡើង១២ភាគរយ ពីមួយឆ្នាំទៅមួយឆ្នាំ ខណៈពេលដែលរដ្ឋាភិបាលប្រទេសទាំងពីរ បានកំណត់គោលដៅដើម្បីបង្កើនបរិមាណដល់១៥ពាន់លានដុល្លារនៅឆ្នាំ ២០២០នេះ។

ពាក់ព័ន្ធការធ្វើពាណិជ្ជកម្មក្រៅប្រទេស កម្ពុជាបាននាំចេញទំនិញ មានទំហំទឹកប្រាក់សរុបជាង៤ ៤៣០ លានដុល្លារ កើនឡើងជាង៧ភាគរយ ខណៈនៃការនាំចូលមានទឹកប្រាក់សរុបប្រមាណ៦៧៣៦លានដុល្លារអាមេរិក ហើយពាណិជ្ជកម្មនៃការនាំចេញ និងនាំចូលរបស់កម្ពុជា នៅតែបន្តកំណើនខ្ពស់។

ជុំវិញនិងការធ្វើពាណិជ្ជកម្មក្រៅប្រទេស ក្រសួងសេដ្ឋកិច្ច និងហិរញ្ញវត្ថុបានបង្ហាញតាមនិន្នាការសេដ្ឋកិច្ចសង្គម ជាក់ស្តែងនៅក្នុងរយៈពេល៤ខែ ដើមឆ្នាំ២០២០ ក្នុងនោះ ការនាំចេញរបស់កម្ពុជា សម្រេចបានក្នុងទំហំទឹកប្រាក់ប្រមាណ៤ ៤៣០ លានដុល្លារអាមេរិក បានកើនឡើង៧,៧ភាគរយ បើធៀបរយៈពេលដូចគ្នាទៅនិងឆ្នាំមុន។

ជារួមទឹកប្រាក់នាំចេញនៅរក្សាបានកំណើនល្អ ទោះបីជាដៃគូពាណិជ្ជកម្មក្រៅប្រទេស និងសកល កំពុងជួបបញ្ហាប្រឈម និងការរីកដុះដាលនៃវីរុសកូវីដ–១៩ នេះក៏ដោយ។

ទាក់ទងនិងការរក្សាបានកំណើនរបស់កម្ពុជានេះ មួយផ្នែកកណ្តាលមកពីសម្រេចបានកំណើនខ្ពស់ នៃទឹកប្រាក់ការនាំចេញ នៅក្នុងខែមករាបានកើនឡើង២៥,៤ភាគរយ និងខែកុម្ភៈ កើនឡើង២២,៨ភាគរយនៅក្នុងដើមឆ្នាំនេះ ក្នុងនោះបើពិនិត្យស្ថានភាពទឹកប្រាក់នៃការនាំពេញក្នុងខែមីនា និងខែមេសា ឆ្នាំ២០២០នេះវិញ កំណើននាំចេញបានថមថយចុះក្នុងអត្រាអវិជ្ជមាន គឺដល់ -១៥,៣ភាគរយ និង –០,៥ភាគរយ រៀងគ្នា។

ចំណែកពាណិជ្ជកម្មនៃការនាំចូលវិញ នៅក្នុងរយៈពេលនេះដែរ ការនាំចូលមកកា ន់ទីផ្សារកម្ពុជា មានទំហំទឹកប្រាក់សរុប៦៧៣៦លានដុល្លារអាមេរិក បានកើនឡើង៦,៧ភាគរយ ខណៈនៅក្នុងឆ្នាំ២០១៩ ក្នុងរយៈពេលដូចគ្នា ចំនួននេះកើនឡើងជាង២៥ភាគរយ ក្នុងនោះការថមថយចំនួនទឹកប្រាក់នៃការនាំចូលនេះ បណ្តាលមកពីការថមថយទឹកប្រាក់ការនាំចូល ក្នុងកំឡុងខែមីនា មកនៅត្រឹម០,៤ភាគរយ បើធៀបរយៈពេលដូចគ្នាទៅឆ្នាំមុន និងការធ្លាក់ចុះក្នុងអត្រាអវិជ្ជមានជិតដក១៤ភាគរយក្នុងខែមេសា ជាពិសេសការនាំចូលទំនិញសំខាន់ៗបានធ្លាក់ចុះ រួមមាន គ្រឿងសំណង់ ផលិតផលវាយនភណ្ឌ (ពិសេសក្រណាត់) និងគ្រឿងយន្តជាដើម៕

ការវិនិយោគអចលនទ្រព្យនៅប្រទេសចិនបានហក់ឡើង ខណៈកំណើននៃការលក់បានហក់ឡើងវិញ

ដោយ ប៊ី

ប៉េកាំងៈ ការវិនិយោគ និងការលក់អចលនទ្រព្យ នៅក្នុងប្រទេសចិនបានកើនឡើងយ៉ាងឆាប់រហ័សកាលពីខែឧសភា ខណៈវិស័យអចលនទ្រព្យបានងើបឡើងវិញ បន្តិចម្តងៗពីផលប៉ះពាល់នៃការផ្ទុះឡើងជំងឺ COVID-19 ។

ទីផ្សារអចលនទ្រព្យ គឺជាកត្តាជំរុញដ៏សំខាន់ សម្រាប់កំណើនសេដ្ឋកិច្ចលំដាប់ទី២របស់ពិភពលោកនេះ ប៉ុន្តែក៏ស្ថិតក្នុងចំណោមផ្នែកជាច្រើននៃសេដ្ឋកិច្ច ដែលរងផលប៉ះពាល់យ៉ាងខ្លាំងពីវិបត្តិជំងឺ COVID-19 និងវិធានការទប់ស្កាត់យ៉ាងតឹងរឹងផងដែរ។

ការវិនិយោគលើអចលនទ្រព្យ នៅខែឧសភាបានកើនឡើង៨,១ ភាគរយ បើធៀបនឹងខែដូចគ្នាកាលពីឆ្នាំមុន ហើយកើនឡើង៧ធៀបកាលពីខែមុន។ នេះបើយោងតាមការគណនារបស់សារព័ត៌មាន Reuters ផ្អែកលើទិន្នន័យពីការិយាល័យស្ថិតិជាតិរបស់ចិននៅថ្ងៃចន្ទនេះ។

សម្រាប់រយៈពេល៥ខែដំបូងនៃឆ្នាំនេះ ការវិនិយោគលើអចលនទ្រព្យបានធ្លាក់ចុះ ០,៣ភាគរយ ធៀបនឹងរយៈពេលដូចគ្នាកាលពីឆ្នាំមុន ខណៈសេដ្ឋកិច្ចចាប់ផ្តើមងើបឡើងបន្តិចម្តងៗពីការបិទទ្វារប្រទេស ដោយសារជំងឺ COVID-19។

ទោះបីជាយ៉ាងណាក៏ដោយ ការប្រើប្រាស់នៅតែទន់ភាពខ្សោយ ខណៈមានការបាត់បង់ការងារ និងការព្រួយបារម្ភអំពីហានិភ័យ នៃរលកនៃការឆ្លងជំងឺផ្លូវដង្ហើមថ្មីនេះ។

ការលក់អចលនៈទ្រព្យ តាមតំបន់ជាច្រើនបានកើនឡើង៩,៧ភាគរយ ក្នុងខែឧសភា ដែលជាល្បឿនលឿនបំផុតចាប់តាំងពីខែកក្កដាឆ្នាំ ២០១៨ ហើយបើប្រៀបធៀបទៅនឹងការធ្លាក់ចុះ ២,១ភាគរយនៅក្នុងខែមេសា។

ការសាងសង់អចលនទ្រព្យថ្មី បានចាប់ផ្តើមកើនឡើង២,៥ ភាគរយ កាលពីខែមុន បើប្រៀបធៀប ទៅនឹងការធ្លាក់ចុះ ១,៣ ភាគរយកាលពីខែមេសា។

ទុនវិនិយោគ ដែលប្រមូលបានដោយក្រុមហ៊ុនអភិវឌ្ឍន៍ អចលនទ្រព្យរបស់ប្រទេសចិន បានធ្លាក់ចុះ ៦,១ភាគរយ នៅក្នុងរយៈពេលពីខែមករាដល់ ខែឧសភា បើប្រៀបធៀបជាមួយនឹងការធ្លាក់ចុះ ១០,៤ភាគរយ សម្រាប់រយៈពេល៤ខែដំបូងនៃឆ្នាំ២០២០ ។

លោក Zhang Dawei អ្នកវិភាគមានមូលដ្ឋាននៅទីក្រុងប៉េកាំង នៃទីភ្នាក់ងារអចលនទ្រព្យ Centaline បាននិយាយថា “ទិន្នន័យខែឧសភាបានបង្ហាញថា ផលប៉ះពាល់ពីវិបត្តិជំងឺ COVID-19 បានរួចផុតទៅហើយ ហើយទីផ្សារអចលនទ្រព្យរបស់ប្រទេសចិន នឹងបន្តកើនឡើង” ៕

ការសាងសង់ស្ពានថ្មើរជើងផ្សារដើមគរសម្រេចបាន៩៥ភាគរយហើយ

ដោយ វុត្ថា

ភ្នំពេញៈ គម្រោងស្ពានថ្មើរជើង១ ក្នុងចំណោម២ (ស្ពានថ្មើរជើងផ្សារដើមគរ) ដែលរដ្ឋបាលរាជធានីភ្នំពេញ កំពុងសាងសង់យ៉ាងមមាញឹក ដែលរហូតមដល់ពេលពនេះ សម្រេចបាន៩៥ភាគរយហើយ ដោយតាមគម្រោងផែនការ នឹងត្រូវដាក់ឱ្យដំណើរការនាពេលខាងមុខឆាប់ៗនេះ។

លោក ឃួង ស្រេង អភិបាលរាជធានីភ្នំពេញនៅព្រឹកថ្ងៃទី១៥ ខែមិថុនា ឆ្នាំ២០២០កន្លងមកបានចុះពិនិត្យដំណើរការសាងសង់ស្ពាថ្មើជើងថ្មីនេះ។

លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញធ្លាប់បានឱ្យដឹងកន្លងមកនេះថា រដ្ឋបាលរាជធានីភ្នំពេញ បានធ្វើពិធីបញ្ចុះបឋមសិលាសាងសង់ស្ពានអាកាសថ្មើរជើងនៅ មុខផ្សារដើមគរនេះកាលពីថ្ងៃទី២៨ ខែធ្នូ ឆ្នាំ២០១៩ កន្លងមកនេះ។

លោកបន្តថា “ការសាងសង់ស្ពានអាកាសថ្មើរជើង នៅតំបន់ផ្សារដើមគរ ដើម្បីជួយសម្រួលដល់ការធ្វើ ដំណើររបស់ប្រជាពលរដ្ឋបានឆ្លងកាត់ផ្លូវ ប្រកបដោយសុវត្ថិភាព មិនប្រឈមទៅ នឹងបញ្ហាគ្រោះ ថ្នាក់ចរាចរណ៍ណាមួយកើតឡើងជាយថាហេតុ” ។

គម្រោងស្ថាបនាស្ពានអាកាសថ្មើរជើង នៅតំបន់មុខផ្សារដើមគរ ត្រូវសាងសង់ ឡើងកាត់ទទឹងផ្លូវម៉ៅសេទុងខាងលិច ជាប់នឹងផ្សារដើមគរ។ ជាមួយគ្នានេះ រដ្ឋបាលរាជធានីភ្នំពេញក៏បាន និងកំពុងសាងសង់ស្ពានអាកាសថ្មើរជើងមួយទៀត នៅត្រង់មុខសាលាបឋមសិក្សាសន្ធរម៉ុក នៅលើចំណុច ផ្លូវប្រសព្វទាំង៤ទិស ដោយកាត់ទទឹងផ្លូវម៉ៅសេទុងចំនួន២ខ្សែ និងកាត់ទទឹងផ្លូវកម្ពុជាក្រោម២ខ្សែ ដើម្បីបង្កលក្ខណៈងាយស្រួល ដល់សិស្សានុសិស្ស បានឆ្លងកាត់ផ្លូវនេះដោយសុវត្ថិភាព។

មកដល់ពេលនេះរាជធានីភ្នំពេញ មានស្ពានអាកាសថ្មើរជើងចំនួន៣កន្លែងហើយ ក្នុងនោះរួមមាន នៅតំបន់ជម្ពូវ័ន្តខណ្ឌពោធិ៍សែនជ័យមានចំនួន២កន្លែង និងនៅតំបន់ភ្លើងស្តុបនាងគង្ហីង មានចំនួន១កន្លែង ហើយបើតាមគម្រោង រដ្ឋបាលរាជធានីភ្នំពេញ និងមានគម្រោងស្ថាបនាអាកាសថ្មើជើងនេះ ឱ្យបានច្រើនកន្លែងបន្ថែមទៀត ដើម្បីឆ្លើយតបទៅ នឹងប្រទេសជាតិមានការអភិវឌ្ឍ និងទីក្រុងមានភាពស៊ីវិល័យ និងបង្ក លក្ខណៈងាយស្រួលដល់ប្រជាពលរដ្ឋឆ្លងកាត់ផ្លូវប្រកបដោយសុវត្ថិភាព៕

ក្រសួងមហាផ្ទៃ សម្រេចបង្កើតនិងដាក់ឱ្យប្រើប្រាស់នូវនិមិត្ដសញ្ញាខេត្តកែប

ដោយរ៉ា ណេត

ភ្នំពេញៈ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានសម្រេចបង្កើត និងដាក់ឱ្យប្រើប្រាស់នូវនិមិត្ដសញ្ញាខេត្តកែប។ នេះបើតាមសេចក្ដីប្រកាសរបស់ សម្ដេចក្រឡាហោមស ខេង ដែលគេហទំព័រ www.propertyarea.asia ទើបទទួលបាននៅល្ងាចថ្ងៃទី១៥ ខែមិថុនា ឆ្នាំ២០២០កន្លងមកនេះ។

តាមរយៈប្រកាសនេះ និមិត្ដសញ្ញាខេត្តកែប បានបង្កប់នូវអត្ថន័យដូចខាងក្រោម ៖

– រូបសេះស ៖ តំណាងឱ្យភាពរហ័សរហួន និងកម្លាំងខ្លាំងក្លា

– រូបកួរស្រូវដែលមានពណ៌បៃតងខ្ចី៖ តំណាងឱ្យការរីកចម្រើនលើវិស័យកសិកម្មរបស់ខេត្តកែប ហើយពណ៌នៃកួវស្រូវនេះ ក៏បានបង្កប់នូវភោគផលដំណាំជាច្រើន រួមមាន ល្ពៅ ដំឡូង អំពៅ ត្រសក់ ត្រឡាច ឪឡឹក ល្មុត ទុរេន និងមាក់ប្រាង។ល។

– រូបក្ដាមសេះ អំបិល ម្រេច និងទុរេន៖ តំណាងឱ្យធនធានធម្មជាតិ និងផលដំណាំដែលប្រជាពលរដ្ឋកំពុងអាស្រ័យផល ក៏ដូចជាដាំដុះនៅលើទឹកដីខេត្តកែប។

– សមុទ្រខៀវស្រងាត់ ឆ្នេរខ្សាច់ និងផ្ទៃមេឃ៖ តំណាងឱ្យទឹកស្អាត ដីស្អាត និងខ្យល់ស្អាត ដែលខេត្តកែបបានទទួលពានរង្វាន់ទីក្រុងស្អាត ក្នុងការប្រឡងប្រណាំងទីក្រុងនិរន្ដរភាពបរិស្ថានអាស៊ាន។

– ផ្ទៃបៃតង៖ តំណាងឱ្យទីក្រុងបៃតង ដែលរដ្ឋបាលខេត្ត បាននិងកំពុងចូលរួមចលនាប្រឡងប្រណាំងទីក្រុងស្អាតអាស៊ាន។

– ខ្សែបូពណ៌ក្រហម និងខៀវ៖ តំណាងឱ្យឯកភាពជាតិ

– ក្បាច់អង្គរ៖ តំណាងឱ្យអរិយធម៌ដ៏ល្បីល្បាញ៕

អ្នកជំនាញ អះអាងថា តម្រូវការទីផ្សារលំនៅដ្ឋាននៅតែរក្សាបានកំនើនខ្ពស់

ដោយៈ រ៉ាណេត

ភ្នំពេញៈ មិនថាទោះជាស្ថិតនៅក្នុងស្ថានភាពសេដ្ឋកិច្ច ពិភពលោកកំពុងតែប្រឈមនៅពេលបច្ចុប្បន្ននេះនោះទេ តម្រូវការទីផ្សារក្នុងវិស័យលំនៅដ្ឋាននៅតែបន្តមាន និងមិនមានការធ្លាក់ចុះនោះទេ។

នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ប្រាប់តាមទូរស័ព្ទ កាលពីល្ងាចថ្ងៃទី១៥ ខែមិថុនា ឆ្នាំ២០២០ថា បច្ចុប្បន្ននេះ អ្នកលក់នៅតែបន្តលក់ ហើយអ្នកទិញក៏នៅតែបន្តការស្វែងរកទិញលំនៅដ្ឋានសម្រាប់ស្នាក់នៅដដែល មិនខុសគ្នាកាលពីឆ្នាំកន្លងទៅនោះទេ ហើយភាគច្រើនគឺនៅតាមតំបន់ជាយក្រុង។

លោកស្រីបានមានប្រសាសន៍ “មូលហេតុដែលលំនៅដ្ឋាន នៅតែមានតម្រូវការដោយសារលំនៅដ្ឋានមួយចំនួនមានការលក់ប្រញាប់ ដូច្នេះហើយអាចមានឱកាសមានតម្លៃសមរម្យច្រើន ឬអាចក្រោមជាងទីផ្សារ” ។ លោកស្រីបន្តថា “វិស័យលំនៅដ្ឋានដែលមានតម្រូវការខ្ពស់ និងមានប្រជាប្រិយភាពជាងគេ គឺប្រភេទលំនៅដ្ឋានសម្រាប់ប្រកបអាជីវកម្ម ដែលក្រៅពីអាចរស់នៅប្រកបដោយសុវត្ថិភាព ថែមទាំងអាចបង្កើតអាជីវកម្មមានយ៉ាងប្រសើរ” ។

លោកស្រីតាំង ហួរបានបន្តថា លំនៅដ្ឋានប្រភេទនេះ មានតម្រូវការច្រើនជាងគេ ដោយសារតែអ្នកទិញ ត្រូវការសម្រាប់យកមកប្រកបអាជីវកម្មផ្សេងៗ ឬក៏ចង់ទិញទុកយកផលចំណេញ នៅពេលក្រោយមានភាពងាយស្រួលលក់។ ម្យ៉ាងវិញទៀត ដោយសារតែអតិថិជន មានបំណងចង់ជាវទុកសម្រាប់ឱ្យកូនក្រែងលោ ត្រូវឡើងពីខេត្តមកសិក្សានៅទីក្រុង ឬក៏គូស្នេហ៍មួយចំនួនដែលទើបរៀបការ ដូច្នេះតម្រូវការមានផ្ទះរស់នៅគឺនៅតែមាន។

អគ្គនាយកក្រុមហ៊ុនអចលនទ្រព្យ Easy Property លោក ម៉ម សិរីបញ្ញា ធ្លាប់បានលើកឡើងពីមូលហេតុនៃតម្រូវការនៃទីផ្សារលំនៅដ្ឋានថា ភាគច្រើនគម្រោងលំនៅដ្ឋានច្រើនតែសាងសង់នៅក្បែរតំបន់ទីប្រជុំជន និងជាទីតាំងល្អ ក្នុងការរកស៊ី និងរស់នៅ។ ចំណុចខ្លាំងទាំងនេះហើយ ដែលអាចធ្វើឱ្យគម្រោងអភិវឌ្ឍន៍លំនៅដ្ឋាន នៅតែទទួលបានជោគជ័យខ្ពស់នៅលើទីផ្សារ ដែលអ្នកអភិវឌ្ឍន៍តែងតែពិចារណាមុនគេ។

លោកបន្តថា “នៅពេលដែលអ្នកទិញ អាចទទួលបានអត្ថប្រយោជន៍បន្ថែមពីលំ ដ្ឋានដែលក្រៅពីការរស់នៅ គឺមានភាពងាយស្រួលបង្កើតជំនួញ ហេតុផលទាំងអស់នេះហើយ ដែលបណ្តាលឱ្យវិស័យលំនៅដ្ឋាន ហាក់បីដូចជាមានតម្រូវការច្រើនជាងគេ” ៕

តើខេត្តនៅតំបន់ឆ្នេរទាំង៤មានលំហូរទុនវិនិយោគវិស័យសំណង់ និងអចលនទ្រព្យដូចម្តេច?

ដោយ ហ្សូលី

ភ្នំពេញៈ ខេត្តដែលជាតំបន់ឆ្នេរចំនួន៤ដូចជា ខេត្តព្រះសីហនុ ខេត្តកោះកុង ខេត្តកំពត និងខេត្តកែប (K4) កំពុងទទួលបានការចាប់អារម្មណ៍ច្រើន ពីសំណាក់វិនិយោគិនទាំងក្នុងស្រុក និងអន្តរជាតិទៅលើការវិនិយោគលើវិស័យសំណង់ និងអចលនទ្រព្យ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្តល់អនុសាសន៍ឲ្យខេត្តទាំងបួនពង្រឹង និងពង្រីកសក្តានុពលរបស់ខ្លួនកាន់តែមានសក្តានុពលសេដ្ឋកិច្ចខ្ពស់ និងរីកចម្រើនកាន់តែឆាប់រហ័សពីមួយឆ្នាំទៅមួយឆ្នាំ។

ខេត្តកំពត

រយៈពេលត្រឹម១ឆ្នាំ ខេត្តកំពតទទួលបានគម្រោងវិនិយោគ សរុបប្រមាណជាង ៣០លានដុល្លារ ដែលអនុវត្តទៅលើវិស័យសំណង់ និងអចលនទ្រព្យនានា។ បើសិនជាប្រៀបធៀបកាលពីឆ្នាំមុនៗ ខេត្តកំពតមានកំណើនដល់ទៅ៨០ភាគរយ ក្នុងសន្ទុះរីកចម្រើនទៅលើវិស័យនេះ។

បើតាមឱ្យដឹងពីអភិបាលខេត្តកំពត លោក ជាវ តាយ ធ្លាប់បានមានប្រសាសន៍ថា វិស័យអចលនទ្រព្យ និងសំណង់មានការរីកចម្រើនខ្លាំងណាស់ នៅទូទាំងខេត្តកំពត ព្រោះមានអ្នកចំណូលថ្មីច្រើន មកវិនិយោគលើគម្រោងសាងសង់ លំនៅដ្ឋានបែបលំហែកាយ និងលំនៅដ្ឋានទេសចរណ៍។

អគ្គនាយកក្រុមហ៊ុនអចលនទ្រព្យនិងអភិវឌ្ឍលំនៅដ្ឋាន លោកឧកញ៉ានួន រិទ្ធី ធ្លាប់លើកឡើងថា ខេត្តកំពតគឺគោលដៅទេសចរណ៍ និងមានសក្តានុពល ខាងផ្នែកឧស្សាហកម្ម និងកសិកម្ម ជាងបណ្តាខេត្តដែលមានព្រំប្រទល់ជាប់គ្នា។ វិស័យលំនៅដ្ឋានក្នុងខេត្តកំពត ច្រើនតែមានតម្រូវការលើលំនៅដ្ឋានលំហែកាយ នៅតំបន់មួយចំនួន ដែលបណ្តាលឱ្យខេត្តនេះកាន់តែមានភាពល្អប្រសើរ និងកំណើនជាបន្តបន្ទាប់។

លោកបន្តថា “សក្តានុពលនៃតំបន់នេះ មានដូចជាគម្រោងផ្លូវរថភ្លើងល្បឿនលឿន គម្រោងកំពង់ផែទេសចរណ៍ គម្រោងស្ថាបនាហេដ្ឋារចនាសម្ព័ន្ធនានាជាដើម” ។

ខេត្តកែប

កាលពីដើមខែមិថុនានេះ ក្រសួងរៀបចំដែនដី នគរូបនីយកម្ម និងសំណង់បាននិងកំពុងសិក្សាកែលម្អឆ្នេរសមុទ្រកែប ទៅជាឆ្នេរខ្សាច់កម្សាន្តសាធារណៈប្រវែងជិត៣០០០ម៉ែត្រ។ មិនតែប៉ុណ្ណោះ ខេត្តកែបត្រូវបានរដ្ឋាភិបាលដាក់ចេញចក្ខុវិស័យជា «គោលដៅទេសចរណ៍ សម្រាកលំហែកម្សាន្តប្រណិតកម្រិតខ្ពស់» ផងដែរ។

អនុប្រធានសមាគមអ្នកជំនាញអចលនវត្ថុកម្ពុជា លោកចក់ ស៊ីណាត បានរៀបរាប់ថា សកម្មភាពទិញ លក់ដីធ្លីនៅខេត្តមួយនេះ ជាពិសេសនៅតាមតំបន់ឆ្នេរ និងតំបន់ជាប់ភ្នំនៅតែមានចរន្ត មិនស្ងប់ស្ងាត់នោះទេ។ ភាគច្រើនការវិនិយោគដីធ្លីក្នុងខេត្តកែប ជាការវិនិយោគរយៈពេលយូរអង្វែង ពោលគឺជាការអភិវឌ្ឍលើមណ្ឌលកម្សាន្ត តំបន់ទេសចរណ៍កែច្នៃ លំនៅដ្ឋានលំហែកាយ សម្រាប់បម្រើប្រយោជន៍ដល់វិស័យទេសចរណ៍ជាដើម។

លោក សន សៀប អគ្គនាយកក្រុមហ៊ុន Key Real Estate ថ្លែងថា កំណើននៃទេសចរនៅខេត្តកែប បានកើនឡើងជាប្រចាំ ព្រោះជះឥទ្ធិពលមកពីខេត្តព្រះសីហនុ ដែលមានការអភិវឌ្ឍលើវិស័យហេដ្ឋារចនាសម្ព័ន្ធ និងអគារនានផងដែរនោះ។ ម្យ៉ាងបច្ចុ ប្បន្ននេះអ្នកវិនិយោគភាគច្រើន បានបណ្តាក់ទុននៅតំបន់មួយចំនួន ឱ្យក្លាយទៅជាតំបន់កម្សាន្តបែបកែច្នៃ និងធម្មជាតិ ជាពិសេសតមបន់ស្ថិតជាប់សមុទ្រ។

ខេត្តព្រះសីហនុ

ខេត្តមួយនេះ មិនត្រឹមតែពឹងផ្អែកលើវិស័យទេសចរណ៍មួយមុខនោះទេ តែបើក្រឡេកទៅមើលលើសំណង់ អគារ ផ្ទះលំហែកាយទៀតសោត កំពុងមានតម្រូវការ និងសន្ទុះនៃដំណើរការសាងសង់ជាខ្លាំង។ ថ្វីត្បិតតែចំនួនប្រជាជនចិន និងវិនិយោគិនចិនធ្លាក់ចុះនៅសល់ប្រហែល១៥,០០០នាក់ក្តី ប៉ុន្តែនៅពេលជំងឺរាតត្បាតបានបញ្ចប់នោះ កំណើននឹងបែរមករកសភាពដើមវិញ។

លោកគួច ចំរើន អភិបាលខេត្តព្រះសិហនុ បានថ្លែងនៅក្នុងសន្និសិទសារព័ត៌មានកាលពីពេលកន្លងទៅថ្មីៗនេះថា ខេត្តព្រះសីហនុ បានការអភិវឌ្ឍលើវិស័យសំណង់ស្ទើរមិនគួរឱ្យជឿ ដោយទាក់ទាញលំហូរទុនវិនិយោគប្រមាណ៧០០០លានដុល្លារ ក្នុងរយៈពេល៤ឆ្នាំចុងក្រោយនេះ។

លោកបន្តថា “ល្បឿននៃការអភិវឌ្ឍលើវិស័យសំណង់ និងអចលនទ្រព្យបានជម្រុញឱ្យខេត្តព្រះសីហនុ កាន់តែមានភាពទាក់ទាញ និងបង្កើនសមត្ថភាពនៃការទ្រទ្រង់សេដ្ឋកិច្ចជាតិបានមួយកម្រិតទៀត” ។

ជាក់ស្តែងគ្រាន់តែតំបន់ឆ្នេររាម នៃខេត្តព្រះសីហនុទទួលបានការគម្រោងវិនិយោគនិងអភិវឌ្ឍទីក្រុងថ្មី រួមមាន វីឡាកម្រិតអភិជន មជ្ឈមណ្ឌលពាណិជ្ជកម្ម ផ្សារទំនើប និងសណ្ឋាគារ មានទុនវិនិយោគសរុបប្រមាណ ១០០០លានដុល្លារ។ នេះជាភស្តុតាងបញ្ជាក់ពិសក្តានុពលសេដ្ឋកិច្ចពិសេសប្រចាំខេត្តព្រះសីហនុ។

ខេត្តកោះកុង

ក្រៅពីការអភិវឌ្ឍហេដ្ឋារចនាសម្ព័ន្ធ ធនធានធម្មជាតិ និងការរិគចម្រើននៃវិស័យទេសចរណ៍ បានបណ្តាលឱ្យខេត្តនេះចាប់ផ្តើមរីកមុខមាត់បន្តិចម្តង។ ការស្ថាបនាព្រលានយន្តហោះចំនួន២ ដូចជា ព្រលានយន្តហោះតារាសាគរ ដែលត្រៀមនឹងដាក់ដំណើរការក្នុងឆ្នាំ២០២១ខាងមុខ បានជម្រុញឱ្យខេត្តនេះកាន់តែមានសក្តានុពល។

មួយវិញទៀតនោះ គឺព្រលានយន្តហោះកោះកុងថ្មី ដែលគ្រោងវិនិយោគដោយក្រុមហ៊ុនលីយ៉ុងផាត់គ្រុប និង Bangkok Airway ស្ថិតនៅក្រុងខេមរភូមិន្ទ មកកាន់ភូមិកោះប៉ា ស្រុកមណ្ឌលសីម៉ា ក៏ជាផ្នែកដ៏សំខាន់នៃការអភិវឌ្ឍខេត្តដាច់ស្រយាលនេះដែរ ។ ទុនវិនិយោគនៅលើគម្រោងព្រលានយន្តហោះនេះ មានចំនួនប្រមាណ៤០លានដុល្លារ។

អភិបាលខេត្តកោះកុង លោកជំទាវភូថង មិថុនា បានថ្លែងក្នុងសន្និសិទសារព័ត៌មានកាលពីម្សិលមិញថា ព្រលានយន្តហោះកោះកុងថ្មីរបស់ឧកញ៉ា លី យ៉ុងផាត់នេះ ឈានចូលដល់ដំនាក់កាលឈូសឆាយ និងសិក្សាពីផលប៉ះពាល់ហើយ៕

ចំណេះដឹង! អ្វីជាប្រព័ន្ធទូទាត់?

ដោយវុត្ថា

ភ្នំពេញៈ ប្រព័ន្ធទូទាត់ ផ្អែកតាមនិយមន័យរបស់ធនាគារទូទាត់អន្តរជាតិ ប្រព័ន្ធទូទាត់រាប់បញ្ចូលនូវឧបករណ៍ នីតិវិធីធនាគារ និងជាពិសេសប្រព័ន្ធផ្ទេរមូលនិធិអន្តរធនាគារ ដែលធានាឲ្យមានចរាចរណ៍សាច់ប្រាក់។

ជាទូទៅប្រព័ន្ធទូទាត់ ត្រូវបានស្គាល់ថាជាមធ្យោបាយមួយ ដែលមូលនិធិត្រូវបានផ្ទេរដោយអ្នកចូលរួមក្នុងប្រព័ន្ធនោះ។

ម្យ៉ាងទៀតសមាសធាតុដែលជាប់ទាក់ទងនឹងប្រព័ន្ធទូទាត់ រួមមាន ១/. ក្របខណ្ឌច្បាប់ និងបទប្បញ្ញត្តិចេញដោយអាជ្ញាធរពាក់ព័ន្ធ ជាពិសេសធនាគារកណ្តាល ២/. គ្រឹះស្ថានចូលរួមក្នុងប្រតិ-បត្ដិការនៃប្រព័ន្ធទូទាត់ រួមមាន ធនាគារ គ្រឹះស្ថានហិរញ្ញវត្ថុមិនមែនធនាគារ អ្នកផ្ដល់សេវាផ្ទេរប្រាក់មិនមែនធនាគារ និងធនាគារកណ្តាល។

៣/. ឧបករណ៍ទូទាត់ និងយន្ដការទូទាត់និងផាត់ទាត់នៅក្នុងប្រព័ន្ធ ដែលត្រូវបានប្រើដើម្បីផ្ទេរមូលនិធិ ក្នុងគោលបំណងលុបចេញនូវកាតព្វកិច្ច ដែលកើតឡើងពីសកម្មភាពសេដ្ឋកិច្ច៕

រដ្ឋាភិបាលកម្ពុជានឹងបង្កើតឧទ្យានដ៏ធំមួយនៅខេត្តព្រះវិហារ ដើម្បីទាក់ទាញភ្ញៀវទេសចរ

ដោយ ៖ រ៉ាណេត

ព្រះវិហារ ៖ នៅត្រឹមពេលដ៏ខ្លីឆាប់ៗខាងមុខនេះ រាជបណ្ឌិត្យសភាកម្ពុជា និងធ្វើការអភិវឌ្ឍប្រែក្លាយឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ទៅជាឧទ្យានទេសចរណ៍វប្បធម៌ ប្រវត្តិសាស្ត្រ និងជាកន្លែងបង្កើតផលិតផលដ៏ធំមួយប្រចាំនៅប្រទេសកម្ពុជា ដែលចូលរួមក្នុងការបង្កើនភាពទាក់ទាញក្នុងវិស័យទេសចរណ៍។

ប្រធានរាជបណ្ឌិត្យសភាកម្ពុជា លោកបណ្ឌិត សុខ ទូច បានមានប្រសាសន៍នៅក្នុងឱកាសចូលរួមពិធីដាំកូនឈើនៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ក្រោមប្រធានបទ «ដាំដើមឈើម្នាក់មួយដើម បន្តដង្ហើមផែនដី» នៅដើមសប្ដាហ៍នេះថា រាជបណ្ឌិត្យសភាកម្ពុជាមិនត្រឹមតែជាទីកន្លែងបណ្តុះបណ្តាលលើទ្រឹស្តីប៉ុណ្ណោះទេ ស្ថាប័ននេះ គឺជាទីកន្លែងសិក្សាស្រាវជ្រាវ និងបង្ហាញសមិទ្ធផលស្នាដៃការងារជាក់ស្តែងដោយចងភ្ជាប់ជាមួយនឹងក្រមសីលធម៌វិជ្ជាជីវៈរបស់ខ្លួន។

លោកបានបញ្ជាក់ថា ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប បាន និងកំពុងអនុវត្តគម្រោងមួយចំនួនក្នុងនោះ រួមមានដូចជា គម្រោងចិញ្ចឹមគោទឹកដោះ, គម្រោងបណ្ដុះ និងដាំកូនឈើក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប, គម្រោងចិញ្ចឹមពពែ និងគម្រោងស្រាវជ្រាវ គាំពារ និងអភិរក្សធនធានធម្មជាតិនៅឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ដើម្បីស្តារគម្របព្រៃឈើរួមចំណែកទប់ស្កាត់បម្រែបម្រួលអាកាសធាតុ។

នៅថ្ងៃអនាគត រាជបណ្ឌិត្យសភាកម្ពុជានឹងអភិរក្ស និងអភិវឌ្ឍប្រែក្លាយឧទ្យានរាជបណ្ឌិត្យសភាកម្ពុជា តេជោសែន ឫស្សី ទៅជាទីកន្លែងចំនួន៤ រួមមាន៖ ១. ជាទីកន្លែងទេសចរណ៍វប្បធម៌ប្រវត្តិសាស្រ្ត និងធម្មជាតិ ២. ជាទីកន្លែងអភិរក្សព្រៃឈើបរិស្ថានធម្មជាតិ ៣. ជាកន្លែងជំរកសត្វគ្រប់ប្រភេទ ៤. ជាកន្លែងផលិតផលិតផលមួយនៅកម្ពុជា និង៥. ជាកន្លែងបណ្តុះបណ្តាលវិជ្ជាជីវៈជូនប្រជាជន ពិសេសគឺប្រជាជនដែលរស់នៅក្នុងស្រុកឆែប ខេត្តព្រះវិហារ។

ឧទ្យានរាជបណ្ឌិត្យសភាបណ្ឌិត្យសភាកម្ពុជា តេជោសែន ឫស្សីត្រឹប ត្រូវបានបង្កើតឡើងដោយព្រះរាជក្រឹត្យលេខ នស/រកត/០៤១៤/៤៣៦ ចុះថ្ងៃទី១៧ ខែមេសា ឆ្នាំ២០១៤ មានផ្ទៃដីសរុបចំនួន ១១៤.៣៥គីឡូម៉ែតការ៉េ មានទីតាំងស្ថិតក្នុង ឃុំឆែប១ និងឃុំឆែប២ ស្រុកឆែប ខេត្តព្រះវិហារ។ ឧទ្យាននេះមានតំបន់ជីវចម្រុះ និងមានសក្តានុពលជាច្រើន រួមមាន៖ ធនធានព្រៃឈើ សត្វព្រៃ កេរដំណែលប្រវត្តិសាស្រ្ត បុរាណវត្ថុ (ឡស្លដែកបុរាណ) និងជាតិពិន្ធុ ដែលអាចបម្រើឱ្យមុខងារក្នុងវិស័យបិស្ថាន ព្រៃឈើ វប្បធម៌ប្រវត្តិសាស្ត្រ និងទេសចរណ៍ច្រើនយ៉ាង៕

តំបន់រាម នឹងក្លាយជាទីក្រុងដ៏ឆើយឆាយ ជាមួយគម្រោងអភិវឌ្ឍន៍ធំៗចំនួន២ ក្នុងតម្លៃជាង ១៧ពាន់លានដុល្លារ

ដោយ ៖ រ៉ាណេត

ព្រះសីហនុ ៖ តំបន់ឆ្នេរសមុទ្ររាម នៃខេត្តព្រះសីហនុ ប្រែក្លាយរូបរាងទៅជាទីក្រុងថ្មីដែលមានភាពទាក់ទាញ ទាន់សម័យ ក្នុងនាមជាទីក្រុងទេសចរណ៍ដ៏អស្ចារ្យនៅក្នុងតំបន់អាស៊ីជាមួយនឹងគម្រោងអភិវឌ្ឍន៍ធំៗចំនួន២ផ្សេងគ្នា ដែលមានទុនវិនិយោគសរុបជាង១៧ពាន់លានដុល្លារ ។

គម្រោងអភិវឌ្ឍន៍ធំៗចំនួន២ ដែលនឹងប្រែក្លាយតំបន់ឆ្នេររាមឱ្យទៅទីក្រុងថ្មីប្រកបដោយភាពទាក់ទាញទាំងការវិនិយោគ និងវិស័យទេសចរណ៍ប្រចាំតំបន់អាស៊ីខាងលើនេះ រួមមានគម្រោងអភិវឌ្ឍន៍ក្រុងរាម CRYSTAL VILLE REAM BEACH ដែលមានទុនវិនិយោគចំនួន១០០០លានដុល្លារ និងគម្រោងអភិវឌ្ឍទីក្រុងរាម និងតំបន់ទេសចរណ៍គំរូពិសិដ្ឋ ដែលមានឈ្មោះថា “តំបន់ទេសចរណ៍ពិសិដ្ឋនាគរាជ” ក្រោមទុនវិនិយោគប្រមាណ១៦ពាន់លានដុល្លារ។

គម្រោងទី១ ៖ CRYSTAL VILLE REAM BEACH ជាគម្រោងអភិវឌ្ឍន៍ក្រុងថ្មី ដោយមានការបែងចែកជាដំណាក់កាលនៃការអភិវឌ្ឍន៍ រួមមានដំណាក់កាលសាងសង់ប្រភេទវីឡាលំហែរកាយចំនួន៣ប្រភេទ សំណង់ខុនដូ សណ្ឋាគារលំដាប់ផ្កាយ៥ អាចទឹក CRYSTAL ដ៏ធំប្រចាំតំបន់អាស៊ី ដែលមានតម្លៃទុនវិនិយោគចំនួន១០០០លានដុល្លារ ក្រោមកិច្ចសហការរវាងក្រុមហ៊ុនមកពីប្រទេសសិង្ហបុរី និងក្រុមហ៊ុន FURI Corporation ។ បច្ចុប្បន្ននេះ គម្រោងនេះបានចាប់ផ្ដើមដំណើរការសាងសង់ក្នុងដំណាក់កាលដំបូង ដោយអភិវឌ្ឍន៍លំនៅដ្ឋានប្រភេទវីឡាលំហែរកាយ។

គម្រោងអភិវឌ្ឍន៍ទីក្រុងរាម CRYSTAL VILLE REAM BEACH ក្នុងដំណាក់ដំបូងនេះ ស្ថិតនៅតំបន់ដែលពោរពេញ ទៅដោយសម្រស់ធម្មជាតោយ៉ាងត្រកាល ដោយនៅពីក្រោយគម្រោងមានជួរភ្នំដ៏ខ្ពស់ និងវែងអន្លាយ នៅពីគម្រោងជាប់ជាមួយនឹងបឹងកោងកាង នៅចំពីមុខគម្រោងជាឆ្នេរសមុទ្រដ៏ស្រស់ស្អាត ភ្ជាប់ជាមួយនឹងមហាវិថីឆ្នេររាម ដែលមានទំហំ៥០ម៉ែត្រ តភ្ជាប់ទៅកាន់ឆ្នេរអូរត្រេះ។

គម្រោងទី២ ៖ គម្រោងអភិវឌ្ឍទីក្រុងរាម និងតំបន់ទេសចរណ៍គំរូពិសិដ្ឋ ដែលមានឈ្មោះថា “តំបន់ទេសចរណ៍ពិសិដ្ឋនាគរាជ” ក្រោមទុនវិនិយោគប្រមាណ១៦ពាន់លានដុល្លារ នៅលើផ្ទៃដី ៨៣៤ហិកតា ស្ថិតនៅឃុំរាម ស្រុកព្រៃនប់ ខេត្តព្រះសីហនុ របស់ក្រុមហ៊ុន CANOPY SANDS DEVELOPMENT Co,.Ltd។

គម្រោងមួយនេះ ចែកជាបីជំហាន ជំហានទី១ បញ្ចប់នៅឆ្នាំ២០២៥ ជំហានទី២ បញ្ចប់ឆ្នាំ២០៣៥ និងជំហានទី៣ បញ្ចប់នៅឆ្នាំ២០៤៥ ក្នុងនោះ រួមមានការរៀបចំហេដ្ឋារចនាសម្ព័ន្ធ និង សំណង់ផ្សេងៗដូចជាសណ្ឋាគារ ភោជនីយដ្ឋាន អាហារដ្ឋាន រមណីយដ្ឋាន អគារស្នាក់នៅសាលប្រជុំ សាលសន្និសិទ អគារស្នាក់នៅរួម មជ្ឈមណ្ឌលពាណិជ្ជកម្ម ហិរញ្ញវត្ថុ មជ្ឈមណ្ឌលកីឡា ក្នុងនោះក៏មានកីឡាវាយកូនគោល និងការរៀបចំឆ្នេរខ្សាច់ស្អាតចំនួន២កន្លែង ដើម្បីប្រើប្រាស់ជាសាធារណៈ ដែលអនុញ្ញាតឱ្យសាធារណៈជនទូទៅចេញចូលប្រើប្រាស់ផងដែរ។

ជាមួយនឹងគម្រោងអភិវឌ្ឍន៍ធំៗចំនួន២ ដែលមានទុនវិនិយោគសរុបរហូតដល់ប្រមាណជាហ១៧ពាន់លានដុល្លារខាងលើនេះ លោក គួច ចំរើន អភិបាលខេត្តព្រះសីហនុ បានស្នើសុំឱ្យក្រុមហ៊ុន សិក្សាបានលឿនឆាប់ចប់កាន់តែល្អ ដើម្បីលើកជាប៉ាណូទីតាំងបង្ហាញសាធារណជន និងស្នើឱ្យក្រុមហ៊ុនរៀបចំសិក្ខាសាលាដាក់បង្ហាញប្លង់មេរបស់ខ្លួនដល់គណៈវិស្វករ ដើម្បីប្រមូលធាតុចូល ក៏ដូចជាមតិយោបល់កែលម្អបន្ថែម ធ្វើគម្រោងប្លង់មេនេះកាន់តែល្អឥតខ្ចោះ ក្នុងការអភិវឌ្ឍទីក្រុងទំនើបស៊ីវិល័យ សម្រាប់ប្រជាពលរដ្ឋ និងទាក់ទាញភ្ញៀវទេសចរកាន់តែច្រើនឡើងមកលេងកម្សាន្តនៅខេត្ដព្រះសីហនុ៕