រដ្ឋាភិបាលគ្រោងរៀបចំតំបន់ជួរភ្នំក្រវាញជាតំបន់អេកូទេសចរណ៍ដ៏ទាក់ទាញ

ដោយ ៖ វុត្ថា

ភ្នំពេញៈ រដ្ឋាភិបាលបាននិងកំពុងរៀបចំតំបន់ជួរភ្នំក្រវាញ ដែលគ្របដណ្តប់លើផ្ទៃដីជាង៣,៨លានហិកតា ជាតំបន់អេកូទេសចរណ៍ នឹងក្លាយជាផលិតផលថ្មីក្នុងវិស័យទេសចរណ៍ដ៏ទាក់បំផុត។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឱ្យដឹងនៅរសៀលថ្ងៃទី៥ ខែសីហា ឆ្នាំ២០២០នេះ ថា ការប្រែក្លាយតំបន់ជួរភ្នំងក្រវាញ ឱ្យទៅជាតំបន់អេកូទេសចរណ៍នាពេលនេះ គឺជាពេលដែលសមរម្យបំផុត ក្នុងការអភិវឌ្ឍវាឱ្យក្លាយជាផលិតផលថ្មី និងទាក់ទាញបំផុតសម្រាប់ភ្ញៀវទេសចរក្នុងស្រុក និងក្រៅស្រុក។

លោកស្រីបន្តថា “ប្រទេសកម្ពុជានាពេលបច្ចុប្បន្ននេះ មានសក្តានុពលខ្ពស់ចំពោះវិស័យអេកូទេសចរណ៍ ដែលមិនទាន់បានរៀងចំឱ្យបានត្រឹមត្រូវ និងស្តង់ដារសម្រាប់ទាក់ទាញភ្ញៀវទេសចរនៅឡើយ ខណៈដែលភាគច្រើនភ្ញៀវទៅលេង តែប្រាង្គប្រាសាទដែលជាទេសចរណ៍វប្បធម៌ ដូចជាប្រាសាទអង្គរវត្ត ”។លោកស្រីបន្ថែមថា “ការរៀងចំឱ្យតំបន់ជួរភ្នំក្រវាញនេះ នឹងទាក់ទាញភ្ញៀវទេសចរឱ្យមកលេងកំសាន្ត កាន់តែច្រើនបន្ថែមទៀត ជាពិសេសភ្ញៀវទេសចរបរទេស បើទោះបីគាត់មកលេងហើយម្តងក៏ដោយ នៅពេលដែលយើងមានផលិតថ្មីគាត់នឹងមកម្តងទៀត”។

លោកស្រីបញ្ជាក់ថា ការររៀបចំតំបន់ជួរភ្នំនេះ កាន់តែឆាប់កាន់តែល្អសម្រាប់ឱ្យក្រុមហ៊ុនភ្នាក់ងារទេសចរណ៍ ចូលរួមផ្សព្វផ្សាយទៅកាន់ភ្ញៀវ ទាំងនៅក្នុងស្រុក និងក្រៅស្រុក ។

រដ្ឋលេខាធិការក្រសួងបរិស្ថាន លោក សៅ សុភាព បានមានប្រសាសន៍ឱ្យដឹងកាលពីដើមសប្ដាហ៍នេះថា រាជរដ្ឋាភិបាល បានឱ្យក្រសួងបរិស្ថាន និងក្រសួងទេសចរណ៍រៀបចំយុទ្ធសាស្ត្រ ពង្រីកតំបន់អេកូទេសចរណ៍ទាំងនេះ ដោយអនុញ្ញាតឱ្យមានការចូលរួមពីវិស័យឯកជន ដើម្បីទាក់ទាញទេសចរជាតិ និងអន្តរជាតិចូលទៅកម្សាន្តតំបន់នោះឱ្យបានច្រើន។

លោកបានបញ្ជាក់ថា “ក្រសួងបរិស្ថានកំពុង បង្កើតលក្ខខណ្ឌឱ្យមានភាពកាន់តែប្រសើរ ដែលជំរុញដល់ការវិនិយោគផ្នែកទេសចរណ៍ធម្មជាតិ ឱ្យមានភាពទាក់ទាញ ដោយរៀបចំ ឱ្យមានការវិនិយោគលើហេដ្ឋារចនាសម្ព័ន្ធសំខាន់ៗ ដូចជា ការតភ្ជាប់ផ្លូវ មជ្ឈមណ្ឌលភ្ញៀវទេសចរ និងសកម្មភាពពាក់ព័ន្ធនានាជាច្រើនទៀត”។ លោកបន្តថា “ពេលនេះរាជរដ្ឋាភិបាល បានបង្កើតគោលនយោបាយសម្រាប់អេកូទេសចរណ៍ ដោយអនុញ្ញាតឱ្យមានការចូលរួមទាំងប្រតិបត្តិករ អេកូទេសចរណ៍ខ្នាតធំ និងតូច និងការចូលរួមរបស់វិស័យឯកជនក្នុងសកម្មភាពអេកូទេសចរណ៍”។

យោងតាមការស្រាវជ្រាវរបស់ធនាគារពិភពលោកបង្ហាញថា ធនធានធម្មជាតិនៅតំបន់ជួរភ្នំក្រវាញ និងតំបន់បឹងទន្លេសាប ផ្តល់ទុនយ៉ាងសំខាន់ សម្រាប់វិស័យអេកូទេស​ចរណ៍ ខណៈតាមការប៉ាន់ប្រមាណជាសកលបង្ហាញថា ភ្ញៀវផ្នែកអេកូទេសចរណ៍មានកំណើនប្រហែល២០ភាគរយប្រចាំឆ្នាំ។

តំបន់ជួរភ្នំក្រវាញ និងតំបន់បឹងទន្លេសាប គ្របដណ្តប់លើផ្ទៃដីជាង៣,៨លានហិកតា ត្រូវបានធនាគារពិភពលោក ផ្តល់ការគាំទ្រផ្នែកថវិកា និងបច្ចេកទេស សម្រាប់គម្រោង “និរន្តរភាពតំបន់ទេសភាព និងទេសចរណ៍ធម្មជាតិកម្ពុជា” ក្នុងខេត្តគោលដៅមួយចំនួនមានដូចជា៖ ខេត្តពោធិ៍សាត់ កោះកុង បាត់ដំបង កំពង់ស្ពឺ កំពង់ធំ សៀមរាប និងកំពង់ឆ្នាំង តាមរយៈជំរុញសកម្មភាពការពារព្រៃឈើ និងសត្វព្រៃក្នុងតំបន់ប្រើប្រាស់ច្រើនយ៉ាងបឹងទន្លេសាប ដែនជម្រកសត្វព្រៃភ្នំសំកុស ដែនជម្រកសត្វព្រៃភ្នំឱរ៉ាល់ និងដែនជម្រកសត្វព្រៃតាតៃ ឧទ្យានជាតិជួរភ្នំក្រវាញកណ្តាល និងឧទ្យានជាតិជួរភ្នំក្រវាញខាងត្បូង និងរបៀងអភិរក្សជីវៈចម្រុះជួរភ្នំក្រវាញ៕

តៃវ៉ាន់អាចនឹងក្លាយជាចំណុចក្តៅមួយនៃសង្គ្រាមបច្ចេកវិទ្យាសាកល

ដោយៈប៊ី

ភ្នំពេញៈ ពិភពលោកកំពុងពឹងផ្អែកកាន់តែខ្លាំងឡើង លើក្រុមហ៊ុនតៃវ៉ាន់ សម្រាប់ផលិតឧបករណ៍អេឡិចត្រូនិកពាក់ណ្តាលសម្រេច ដែលមានភាពជឿនលឿនបំផុត បន្ទាប់ពីឱនភាពរបស់គូប្រជែងក្រុមហ៊ុន Intel ។

ប៉ុន្តែក្រុមហ៊ុន TSMC របស់តៃវ៉ាន់កំពុងព្យាយាមដកខ្លួនចេញ ដោយធ្វើឱ្យប្រទេសចិននិងសហរដ្ឋអាមេរិករីករាយ នៅពេលមានភាពតានតឹងភូមិសាស្ត្រនយោបាយ កាន់តែកើនឡើង។

បច្ចុប្បន្នមានតែក្រុមហ៊ុនចំនួន៣ប៉ុណ្ណោះ ដែលអាចផលិតបន្ទះឈីបទំនើបនៅលើពិភពលោក គឺក្រុមហ៊ុនសាជីវកម្មអេឡិចត្រូនិកតៃវ៉ាន់ (TSMC), ក្រុមហ៊ុន Intel មានមូលដ្ឋាននៅរដ្ឋកាលីហ្វ័រញ៉ា និងក្រុមហ៊ុនSamsung របស់កូរ៉េខាងត្បូង។ ការផលិតបន្ទះឈីបបែបទំនើបគឺកម្រ និងមានជំនាញណាស់ ព្រោះវាមានតម្លៃថ្លៃមិនគួរឱ្យជឿ ដើម្បីរក្សាការប្រកួតប្រជែងក្នុងកម្រិតខ្ពស់បំផុត។

នៅសប្តាហ៍នេះ ភាគហ៊ុនក្រុមហ៊ុន TSMC (TSM) បានកើនឡើងដល់កម្ពស់ថ្មីនៅតៃវ៉ាន់ បន្ទាប់ពីក្រុមហ៊ុន Intel (INTC) បានព្រមានថា វានឹងមានការផលិតល្បឿនយឺតជាងការគ្រោងទុក លើការផលិតបន្ទះឈីប៧ណាណូម៉ែត្រ។ បន្ទះឈីបកម្រិតខ្ពស់អាចផ្ទុក និងដំណើរការព័ត៌មានបន្ថែម។ ទំហំណាណូម៉ែត្រតូចជាងមានន័យថា ឈីបជឿនលឿនជាងមុន។

ក្រុមហ៊ុន TSMC គឺជាបេក្ខជនមួយ ដែលទំនងជាក្រុមហ៊ុនអាមេរិក អាចស្វែងរកជំនួយ។ សាំស៊ុង (អេសអិលអេហ្វអេហ្វ) កំពុងផលិតបន្ទះឈីប ៧ ណាណូម៉ែត្រ ប៉ុន្តែអាជីវកម្មផលិតរបស់វាគឺទាក់ទងនឹងក្រុមហ៊ុន TSMC ។ ភាគច្រើន ក្រុមហ៊ុនផលិតបន្ទះឈីបមេម៉ូរី ចំណែក Intel ត្រូវការជំនួយក្នុងការផលិតបន្ទះឈីបកែច្នៃទំនើប។

ការថយចុះរបស់Intel ប្រហែលជាមិនធ្វើឱ្យអន្តរាយទេ ព្រោះក្រុមហ៊ុននេះបានដឹកនាំឧស្សា​ហកម្មអេឡិចត្រូនិក អស់រយៈពេលជាច្រើនឆ្នាំមកហើយ ហើយទំនងជានឹងផលិតបាន៧ណាណូម៉ែត្រ ក្នុងកម្រិតពាណិជ្ជកម្ម“តាមការបញ្ជាទិញណាមួយ”។ នេះបើយោងតាមលោក Bret Swanson អ្នកមកទស្សនានៅវិទ្យាស្ថានសហគ្រាសអាមេរិក និងទីប្រឹក្សានៅទីក្រុងវ៉ាស៊ីនតោន។

ប៉ុន្តែភាពជោគជ័យរបស់ក្រុមហ៊ុនTSMC ឥឡូវនេះ – ហើយជំហររបស់ខ្លួនជាអ្នកផ្គត់ផ្គង់ឈីបឈានមុខគេលើពិភពលោក ធ្វើឱ្យវាក្លាយជាក្រុមហ៊ុនដ៏សំខាន់មួយ នៅគ្រាលំបាក។

សហរដ្ឋអាមេរិក និងចិនកំពុងជាប់គាំងនៅក្នុងជម្លោះ ដែលអាចអភិវឌ្ឍបច្ចេកវិទ្យានាពេលអនាគតកាន់តែលឿន ហើយប្រទេសទាំងពីរមានភាពជាដៃគូជាមួយTSMC ដើម្បី​ផ្គត់ផ្គង់ពួកគេជាមួយនឹងបន្ទះឈីប ដែលពួកគេត្រូវការ ដើម្បីផ្តល់នូវបច្ចេកវិទ្យាទំនើប ដូចជាបញ្ញាសិប្បនិម្មិត 5G និងទិន្នន័យលំហរ៕

អ្នកជំនាញៈទីផ្សារអចលនទ្រព្យក្នុងខេត្តកណ្តាលនៅតែមានតម្រូវការខ្ពស់

ដោយរ៉ា ណេត

កណ្តាលៈ ស្ទើរតែគ្រប់តំបន់នៅក្នុងខេត្តកណ្តាល ជាពិសេសនៅតាមតំបន់មួយចំនួនដែលស្ថិតនៅហ៊ុព័ទ្ធជុំវិញរាជធានីភ្នំពេញ កំពុងតែមានសក្ដានុពលក្នុងការវិនិយោគ និងអភិវឌ្ឍក្នុងវិស័យសំណង់គួរឱ្យកត់សម្គាល់ ដែលក្នុងនោះរាប់ទាំងវិស័យលំនៅដ្ឋាន វិស័យឧស្សាហកម្ម បើទោះជាភាពប្រឈមនឹងវិបត្តិសេដ្ឋកិច្ចសាកល កំពុងកើតមានក៏ដោយ។

អគ្គនាយកក្រុមហ៊ុនអចលនទ្រព្យ R Investment Group លោកឧកញ៉ា តេង រិទ្ធី បានមានប្រសាសន៍ប្រាប់តាមទូរស័ព្ទ នៅរសៀលថ្ងៃទី៥ ខែសីហា ឆ្នាំ២០២០ នេះថា បច្ចុប្បន្ននេះ ស្ទើរតែគ្រប់តំបន់ទូទាំងខេត្តកណ្តាល ជាពិសេសស្ថិតនៅជុំវិញរាជធានីភ្នំពេ​ញ និងក្បែរគម្រោងវិនិយោគរបស់រដ្ឋាភិបាល គឺសុទ្ធតែមានសក្ដានុពល ស្របពេលដែលគម្រោងនៃការអភិវឌ្ឍជាច្រើនត្រូវបានចាប់អនុវត្តន៍។

លោកឧកញ៉ាបានបន្តទៀតថា “ក្រៅពីតំបន់កណ្តាលក្រុងតាខ្មៅ ដែលកំពុងតែមានសកម្មភាពអភិវឌ្ឍន៍ ទៅលើហេដ្ឋារចនាសម្ព័ន្ធរបស់រាជរដ្ឋាភិបាល និងគម្រោងអភិ​វឌ្ឍន៍វិស័យសំណង់ រួមមានគម្រោងលំនៅដ្ឋានកម្រិតមធ្យម និងកម្រិតខ្ពស់ ក៏មានគម្រោ​ងសាងសង់អគារពាណិជ្ជកម្មមួយចំនួនផងដែរ”។

ងាកចេញពីតំបន់ក្រុងតាខ្មៅបន្តិច ដូចជានៅតំបន់ព្រែកហូរ ព្រែកកំពឺស តំបន់ជាប់ផ្លូវជាតិលេខ ២១A ផ្លូវលេខ២១B និងតំបន់ផ្លូវជាតិលេខ២ ម្ដុំរង្វង់មូលគួរស្រូវ គឺសុទ្ធតែជាគម្រោងបុរីលំនៅដ្ឋានធំៗ ហើយមិនមែនមានតែតំបន់ខាងលើនេះនោះទេ ដែលមានការអភិវឌ្ឍលំនៅដ្ឋាន ក្នុងនោះនៅតាមផ្លូវជាតិលេខ១ ស្ថិតក្នុងកៀនស្វាយ ផ្លូជាតិលេខ៣ លេខ៤ លេខ៥ លេខ៦ និងលេខ៥១ ក៏មានគម្រោងអភិវឌ្ឍន៍លើវិស័យលំនៅដ្ឋាន និងសហគ្រាសជាច្រើនគម្រោងផងដែរ។

អគ្គនាយកក្រុមហ៊ុន PREMIUM Group លោក ម៉ាន់ ចាន់ឌី បានមានប្រសាសន៍ថា វិសាលភាពខេត្តកណ្តាលគឺលាតសន្ធឹងធំធេង គ្របដណ្ដប់ជុំវិញរាជធានីភ្នំពេញ ហើ​យតំបន់ដែលមានសក្ដានុពលខ្លាំង គឺស្ថិតនៅប៉ែកខាងជើង ខាងលិច និងខាងត្បូង រាជធានីភ្នំពេញ លើកលែងតែតំបន់ប៉ែកខាងកើត ហាក់មានកម្រិតទាបជាងគេបន្តិច ដោយសា​រតែតំបន់ប៉ែកខាងកើត ភាគច្រើនជាតំបន់លិចទឹក។

លោកបន្តថា “ខេត្តកណ្តាកមានកត្តាភូមិសាស្ត្រល្អ ជាពិសេសបណ្តាស្រុកមួយចំនួ​នរបស់ខេត្ត គឺស្ថិតនៅព័ន្ធជុំវិញរាជធានីភ្នំពេញ ហើយនៅពេលបច្ចុប្បន្ននេះ មានតំបន់មួយចំនួនបានកាត់ចូលមកចំណុះរាជធានីភ្នំពេញ”។ លោកបន្តថា “តំបន់នៅសល់ប៉ុន្មានបានក្លាយជាជាតំបន់ជាយក្រុង ដែលមានការអភិវឌ្ឍយ៉ាងឆាប់រហ័ស។ ភាពរីកចម្រើន និងអភិវឌ្ឍន៍របស់ខេត្តកណ្តាល មានលក្ខណៈពិសេសខុសពីខេត្តផ្សេង ហើយតម្លៃក៏មានការកើនឡើងគួរឱ្យកត់សម្គាល់”។

លោកម៉ាន់ ចាន់ឌី បានបញ្ជាក់ថា បច្ចុប្បន្ននេះ គម្រោងវិនិយោគធំជាច្រើនរបស់រាជរដ្ឋាភិបាល បានជំរុញឱ្យសក្ដានុពលនៅតំបន់មួយចំនួន កាន់តែពុះកញ្ជ្រោល ដូចជាគម្រោងសាងសង់ព្រលានយន្ដហោះថ្មី គម្រោងផ្លូវក្រវ៉ាត់ទី៣ គម្រោងស្ថាបនាផ្លូវជាតិលេខ២ ការពង្រីកផ្លូវជាតិលេខ៣ ដែលទាំងអស់នេះ សុទ្ធតែផ្តល់ភាពល្អប្រសើរដល់វិស័យដីធ្លីទាំងអស់។

លោកបានបញ្ជាក់ថា “បើធ្វើការប្រៀបធៀបជាមួយខេត្តកំពង់ស្ពឺ ដែលមានព្រំប្រទ​ល់ជាប់គ្នា និងកំពុងតែមានតម្រូវការប្រើប្រាស់ដី ក្នុងវិស័យឧស្សាហកម្មនោះខេត្តទាំងពីរនេះមានសក្ដានុពលម៉្យាងម្នាក់”។ លោកបញ្ជាក់ថា “សក្ដានុពលរបស់ខេត្តកណ្តាល អាចនឹងកាន់តែមានភាពលេចធ្លោ ក្នុងចន្លោះប្រមាន៣ឆ្នាំខាងមុខ ក្រោយពេលហេដ្ឋារចនាសម្ព័ន្ធសំខាន់ៗ បញ្ចប់ការសាងសង់ ជាពិសេសគម្រោងព្រលានយន្តអន្តរជាតិ-ភ្នំពេញថ្មីត្រូវបានលេចចេញជារូបរាង”៕

បុរីអាប់ថោនជាប់ផ្សារទំនើបជីបម៉ុង50ម៉ែត្រផ្តល់ការបង់ប្រាក់មិនធ្លាប់មាន១ភាគរយ ក្នុងមួយខែឥតការប្រាក់ ក្នុងអំឡុងពេលពិធីបើកការដ្ឋានសាងសង់

        ដោយគីម រី

ភ្នំពេញៈ ក្នុងគោលដៅជួយសម្រួលដល់់អតិថិជន បុរីអាប់ថោនបានផ្តល់លក្ខខ័ណ្ឌបង់ប្រាក់មិនធ្លាប់មាន ដោយបុរីនេះបានផ្តល់ឲ្យអតិថិជនបង់ប្រាក់ត្រឹម១ភាគរយក្នុងមួយខែដល់អតិថិជន ជាមួយនឹងការមិនគិតពីអត្រាការប្រាក់។

ក្នុងថ្ងៃពិធីសម្ភោធបើកការដ្ឋានសាងសង់ បុរីនេះបានលក់ផ្ទះអស់60% ក្នុងរយ:ពេលត្រឹមតែ2ម៉ោង ។ជាមួយគ្នានេះ បុរីអាប់ថោនដែលមានទីតាំង ជាប់នឹងផ្សារទំនើបជីបម៉ុង50ម៉ែត្រ បានប្រកាសបើកលក់ផ្ទះរបស់ខ្លួន ដែលបញ្ចុះតម្លៃ១៣០០០ដុល្លារអាមេរិក ព្រមទាំងការបង់ប្រាក់មិនធ្លាប់មានពីមុនមកត្រឹម១ភាគរយក្នុងមួយខែ ដោយឥតការប្រាក់ជូនដល់អតិថិជន ក្នុងអំឡុងពេលពិធីសម្ភោធបើកការដ្ឋានសាងសង់ជាផ្លូវការ ​កាលពីថ្ងៃសៅរ៍ ទី01 សីហាកន្លងមកនេះ។ បុរីអាប់ថោនជាប្រភេទម៉ូតផ្ទះល្វែងទំនើបជាងគេមួយ ក្នុងតំបន់ចំការដូងទាំងមូល ដែលមានកំពស់ផ្ទះ3ជាន់4បន្ទប់គេង 5បន្ទប់ទឹក តម្លៃចាប់ពី$85,700 តែប៉ុណ្ណោះ។​  ​

ក្រុមការងារ បុរីអាប់ថោនពិតជាមានកិត្តិយស និងភាពសប្បាយរីករាយ ដែលទទួលបានការគាំទ្រខ្លាំងពីអតិថិជន ក៏ដូចជាក្រុមគ្រួសារ និងមិត្តភក្រទាំងអស់។ អ្វីដែលពិសេសនោះគឺ ផ្ទះបុរីអាប់ថោនក្នុងកម្មវិធី លក់ដាច់អស់រហូតទៅដល់ 60% ក្នុងរយ:ពេលត្រឹមតែ2ម៉ោង នៅក្នុងថ្ងៃ «ពិធីសម្ពោធបើកការដ្ឋានសាងសង់គម្រោង បុរីអាប់ថោន»តែម្តង។

           ក្រៅពីបុរីអាប់ថោន ក្រុមម្ចាស់គម្រោងទទួលបានពានជា អ្នកអភិវឌ្ឍន៍ល្អជាងគេប្រចាំឆ្នាំ2018 និងឆ្នាំ2019 ទៅលើស្នាដៃរបស់គាត់លើគម្រោងមុនៗ រួមមាន គម្រោងផ្សារទំនើបណូរ៉ូម៉ល Noromall សណ្ឋាគារ និងរីសតកំសាន្ត ព្រមទាំងអគារការិយាល័យ Rise Building នៅជិតវិមានឯករាជ្យ ។​

              ដើម្បីអោយបុរីអាប់ថោន អោយកាន់តែល្អបន្ថែមទៀតនោះ ម្ចាស់គម្រោង បានចាប់ដៃគូសហការ ជាមួយនឹងក្រុមហ៊ុនឈានមុខគេ ឯកទេសខ្ពស់ខាងបុកគ្រិះ​ ដែលមានបទពិសោធន៍ជាច្រើនឆ្នាំលើសពី 20​​ឆ្នាំនៅលើតែគម្រោងអគារធំៗ រួមមានផ្សារទំនើប AEON Mall អគារខុនដូ The Bridge ជាដើម មកធ្វើគ្រឹះផ្ទះបុរីអាប់ថោន ដើម្បីធានាបានសំណង់ដ៏រឹងមាំ។

មូលហេតុសំខាន់ដែលម្ចាស់គម្រោងបុរីអាប់ថោន សម្រេចចិត្តសាងសង់គម្រោ​ងនេះឡើង គឺដោយសារទីតាំងរបស់គម្រោងអាប់ថោន នឹងផ្ដល់នូវផាសុកភាពក្នុងការរស់នៅយ៉ាងខ្លាំង សម្រាប់អតិថិជន ដែលព័ទ្ធជុំវិញដោយ ផ្សារ និង​សាលារៀនដែល រឹតតែពិសេសទៅទៀត បុរីអាប់ថោនមានទីតាំងជាប់នឹងផ្សារទំនើបជីប ម៉ុង​(Chipmong 50m Mall) ​តែម្តង ងាយស្រួលសម្រាប់អ្នករស់នៅបុរីអាប់ថោនអាចដើរទៅផ្សារទំនើបតែម្តង។

សម្រាប់អតិថិជន ដែលធ្វើការទិញប្រភេទផ្ទះនៅក្នុងឱកាស ពិធីសម្ភោធបើកការដ្ឋានសាងសង់ជាផ្លូវការរបស់បុរីអាប់ថោន ទទួលបាននូវការបញ្ចុះតម្លៃពិ​សេស រហូតដល់១៣០០០ដុល្លារ និងការបង់ប្រាក់ត្រឹមតែ១ភាគរយក្នុងមួយខែ ដើមសុទ្ធ ឥតការប្រាក់​ ដែលកម្មវិធីពិសេសនេះ មានកំណត់ត្រឹមតែអតិថិជន១០នាក់តែប៉ុណ្ណោះ​៕

 

ក្រុមហ៊ុនTwitter ប្រឈមនឹងការផាកពិន័យទឹកប្រាក់២៥០លានដុល្លារ

ដោយវុត្ថា

អាមេរិកៈ ក្រុមហ៊ុនបណ្តាញសង្គមដ៏ល្បីល្បាញ twitter អាចនឹងរងការផាកពិន័យចន្លោះពី១៥០ ទៅ២៥០លានដុល្លារសហរដ្ឋអាមេរិក ដោយសារតែក្រុមហ៊ុនមួយនេះបានលួចយកព័ត៌មានរបស់អ្នកប្រើប្រាស់របស់ខ្លួន ដោយគ្មានការអនុញ្ញាត ហើយបានផ្សព្វផ្សាយពាណិជ្ជកម្ម។

ទីភ្នាក់ងាររបស់គណៈកម្មការសហព័ន្ធពាណិជ្ជកម្ម (FTC) សហរដ្ឋអាមេរិក កាលពីពេលថ្មីៗនេះ  បានពិនិត្យមើលើក្រុមហ៊ុន twitter នេះ ជុំវិញការប្រើប្រាស់ព័ត៌មានរបស់អ្នកប្រើប្រាស់ ដូចជាលេខទូរសព្ទនិងអ៊ីម៉ែល ដោយគ្មានការអនុញ្ញាត ដើម្បីបម្រើដល់ការផ្សព្វផ្សាយពាណិជ្ជកម្មរបស់ខ្លួន ក្នុងអំឡុងពេលពីឆ្នាំ ២០១៣ ដល់ឆ្នាំ ២០១៩។

ទាក់ទងនឹងការស៊ើបអង្កេតរបស់FTCនេះដែរ ក្រុមហ៊ុនទ្វីតធ័រ ក៏បានធ្វើការសុំទោ​សដល់អ្នកប្រើប្រាស់រួចមកហើយ ដែលបានប្រើព័ត៌មានផ្ទាល់ខ្លួន ក្នុងការផ្សព្វផ្សាយពាណិជ្ជកម្មរបស់ពួកគេ ដោយមិនមានការប្រុងប្រយ័ត្ន ដែលនេះក៏ជាការរំលោភលើកិច្ចព្រមព្រៀងឆ្នាំ២០១១ ដែលក្រុមហ៊ុនបានចុះហត្ថលេខាជាមួយFTC លើឯកជនភាពរបស់អតិថិជន និងបានបញ្ជាក់ថា ក្រុមហ៊ុនអាចនឹងរងការផាកពិន័យចន្លោះពី១៥០-២៥០លានដុល្លារផងដែរ។

ក្រុមហ៊ុន twitter បានជំរុញឱ្យអ្នកប្រើប្រាស់ ផ្តល់លេខទូរសព្ទរបស់ពួកគេ ដើម្បីធ្វើការបន្ថែមទៅលើប្រព័ន្ធសុវត្ថិភាព ដែលហៅថា two-factor authentication សម្រាប់ធ្វើការផ្ទៀងផ្ទាត់ ដោយការទទួលបានសារមុនពេល ចូលប្រើប្រាស់គណនីផ្ទាល់ខ្លួនរបស់ពួកគេ។

ថ្មីៗនេះក្រុមហ៊ុន twitter ក៏ទើបតែបានរងការរិះគន់ ទាក់ទងនឹងប្រព័ន្ធសុវត្ថិភាពរបស់ពួកគេ ដែលក្រុមវាយប្រហារ អាចធ្វើការកាន់កាប់គណនីទ្វីតធ័រ របស់បុគ្គលល្បីៗជាច្រើន ហើយក្មេងវ័យជំទង់៣នាក់ដែលជាមេខ្លោង ត្រូវបានចាប់ខ្លួននៅរដ្ឋហ្វ្លរីដា និងប្រទេសអង់គ្លេស កាលពីចុងខែមុននេះ។

ក្រុមហ៊ុន twitter មិនមែនជាក្រុមហ៊ុនតែមួយនោះទេ ដែលរងការចោទប្រកាន់ទាក់ទងនឹងការរំលោភលើឯកជនភាពរបស់អ្នកប្រើប្រាស់ កាលពីឆ្នាំមុនទីភ្នាក់ងារនេះបានធ្វើការផាកពិន័យ ក្រុមហ៊ុម Facebook ប្រមាណ៥ពាន់លានដុល្លារ រួចមកហើយដែរដើម្បីដោះស្រាយបញ្ហា នៃការរំលោភបំពានឯកជនភាពជាច្រើន រួមទាំងការប្រើប្រាស់លេខទូរសព្ទរបស់អ្នកប្រើប្រាស់ ដែលបានផ្តល់ឱ្យសម្រាប់គោលបំណង ពង្រឹងសន្តិសុខ តែយកទៅធ្វើអាជីវកម្ម ដើម្បីផ្សាយពាណិជ្ជកម្មរបស់ខ្លួនទៅវិញ។

ជាមួយគ្នានេះ ក្រុមហ៊ុន Facebook ក៏បានយល់ព្រមថា ខ្លួននឹងលែងប្រើលេខទូរសព្ទដែលទទួលបាន ក្នុងនាមសន្តិសុខសម្រាប់ការផ្សាយពាណិជ្ជកម្មតទៅទៀតដែរ៕

អាងហែលទឹកCrystalលំដាប់ពិភពលោក នឹងបង្ហាញវត្តមានក្នុងគំរោងតម្លៃ១០០០លានដុល្លារជាលើកដំបូងនៅខេត្តព្រះសីហនុ

ដោយៈ រ៉ាណេត

ព្រះសីហនុៈអាងហែលទឹកគ្រីស្តាលដ៏ធំលំដាប់ពិភពលោក លើកដំបូងនឹងបង្ហាញវត្តមាននៅតំបន់ឆ្នេររាមនៃខេត្តព្រះសីហនុ ដែលជាការលើកសោភ័ណភាពតំបន់ដ៏ទាក់ទាញបំផុតនៃតំបន់ឆ្នេរ នៅគម្រោងអភិវឌ្ឍន៍ដ៏មហិមារថ្មីមួយ ដែលមានឈ្មោះថា Crystalville Ream Beach ក្រោមទុនវិនិយោគសរុបប្រមណ១០០០លានដុល្លារ។

អាងទឹកសិប្បនិម្មិត បែបអច្ឆរិយៈគ្រីស្តាល់លំដាប់ពិភពលោកមួយនេះ មានទំហំ ហិកតា ក្រោមការសាងសង់យ៉ាងវិចិត្រ ពីសំណាក់អ្នកជំនាញមកពីស៊ីងហ្គាពួរ នឹងលេចចេញជារូរាងនៅចំកណ្តាលគម្រោងអភិវឌ្ឍន៍ Crystal Ville Ream Beach នៅតំបន់ឆ្នេររាម ខេត្តព្រះសីហនុ។

នាយិកាគ្រប់គ្រងផ្នែកល នៃក់គម្រោងវីឡាបែបលំហែរកាយ និងប្រណីតភាពលើកដំបូងនៅតំបន់ឆ្នេរសមុទ្ររាម ដែលស្ថិតនៅក្នុងគម្រោង Crystalville Ream Beach អ្នកនាងលីម សុខាដាវីន បានបង្ហើបប្រាប់ឱ្យដឹងកាលពីពេលថ្មីៗនេះថា អាងទឹកដ៏អស្ចារ្យនេះ នឹងក្លាយជានិមិត្តរូប នៅក្នុងគម្រោងអភវឌ្ឍន៍រួម ដែលមានតម្លៃវិនិយោគសរុបប្រមាណ ១០០០លានដុល្លារ ដោយត្រូវបានរៀបចំ ជាដំណាក់កាលលើការអភិវឌ្ឍ។

អ្នកនាងបានបន្តថា “នៅក្នុងគម្រោងនេះ មានការអភិវឌ្ឍលំនៅដ្ឋានប្រភេទជាវីឡាបែបលំហែរ និងកម្សាន្តកម្រិតអភិជននេះ ដែលជាការវិនិយោគរួមគ្នារវាងក្រុមហ៊ុន ក្នុងស្រុកFURI Corporation និងក្រុមហ៊ុនវិនិយោគអចនទ្រព្យដ៏ធំមកពីសាំងហ្គាពួរ គឺជាផ្នែកមួយក្នុងគម្រោងCrystalville Ream Beach។ គម្រោងលំនៅដ្ឋានប្រភេទវីឡាលំហែរកាយនេះ ក្នុងដំណាក់ដំបូង គឺមានត្រឹមតែ១០០ខ្នងតែប៉ុណ្ណោះ រួមជាមួយនឹងគម្រោងអភិវឌ្ឍន៍អាងហែលទឹកគ្រីស្តាលដ៏ប្រណីត និងលើកដំបូងប្រចាំតំបន់ (Crystal Swimming Pool) ដែលមានទំហំរហូតដល់៦ហិកតានៅចំកណ្តាល ដែលជាភាពទាក់ទាញពីបណ្តាមនុស្សនានាចម្រុះជាតិសាសន៍ជាច្រើន”។

នៅក្នុងគម្រោង Crystalville Ream Beach ត្រូវបានរៀបចំអភិវឌ្ឍន៍នៅលើផ្ទៃដីតំបន់ឆ្នេរសមុទ្ររាម ខេត្តព្រះសីហនុ ទំហំសរុបប្រមាណ៤៣ហិកតា ដោយត្រូវបានចែកចេញជា ៣ដំណាក់កាលក្នុងការសាងសង់។ ដំណាក់កាលទី១ ក្រុមហ៊ុននឹងសាងសង់លំនៅដ្ឋានបែបលំហែរកាយចំនួន១០០ខ្នង (មាន៣ប្រភេទ វីឡាលំហែរកាយ, វីឡាឆ្នេរខ្សាច់ និងវីឡាកោងកាង) ចំណាយពេលត្រឹម២ឆ្នាំ។

ដំណាក់ទី២ នឹងចាប់ដំណើរការសាងសង់អាងហែលទឹកគ្រីស្ទាល់ (Crystal Swimming Pool) ដែលមានទំហំរហូតដល់៦ហិកតា ក្រោមជំនាញរបស់ក្រុមហ៊ុនមកពីសាំងហ្គាពួរ ហើយក៏ជាលក្ខណៈពិសេស ដែលស្ថិតនៅចំកណ្តាលគម្រោង Crystalville Ream Beachផងដែរ។ ដំណាក់ទី៣ ក្រុមហ៊ុននឹងចាប់ផ្តើមសាងសង់សំណង់អគាមជ្ឈមណ្ឌលពាណិជ្ជកម្ម ដែលរួមមាន ខុនដូ អាផាតមិន សណ្ឋាគារកម្រិតផ្កាយ៥ រួមជាមួយនឹងផ្សារទំនើប ដែលផ្តោតសំខាន់ទៅសេវាចំណីអាហារ និងសម្ភារៈប្រើប្រាស់ប្រចាំគម្រោងផងដែរ៕

ផ្សារទំនើប AEON នឹងវិនិយោគទឹកប្រាក់ ១៨០លានដុល្លារនៅមីយ៉ាន់ម៉ា បន្ទាប់ពីជោគជ័យនៅកម្ពុជា

ដោយ ៖ ប៊ី
ភ្នំពេញ ៖ ក្រុមហ៊ុន AEON បានឱ្យដឹងកាលពីថ្ងៃអង្គារកន្លងមកនេះថា ខ្លួននឹងសាងសង់កន្លែងពាណិជ្ជកម្មដ៏ធំមួយនៅក្នុងទីក្រុងយ៉ាំងហ្គោន ដែលជាទីក្រុងធំបំផុតនៅប្រទេសមីយ៉ាន់ម៉ា ជាមួយនឹងការបោះទុនវិនិយោគចំនួន ១៨០ លានដុល្លារ បន្ទាប់ទទួលបានជោគជ័យខ្លាំងនៅកម្ពុជា។

គម្រោងសាងសង់ផ្សារទំនើប Aeon Mall ដែលទើបតែមានលើកដំបូងនៅក្នុងប្រទេសមីម៉ាន់ម៉ាមួយនេះ ស្ថិតនៅលើផ្ទៃដីទំហំ ៧២ ០០០ ម៉ែត្រការ៉េ គ្រោងចាប់ផ្តើមបើកការដ្ឋាននៅឆមាសទីមួយនៃឆ្នាំ២០២១ ហើយនឹងបើកដំណើរនៅឆ្នាំ២០២៣ ។

ការវិនិយោគខាងលើនេះត្រូវបានអនុម័តដោយរដ្ឋាភិបាលមីយ៉ាន់ម៉ាកាលពីចុងខែកក្កដាកន្លងទៅនេះ ដែលជាការបណ្តាក់ទុនរួមគ្នារវាងក្រុមហ៊ុន AEON ៧០ភាគរយ និងក្រុមហ៊ុន Shwe Taung Group ចំនួន៣០ភាគរយ ដែលជាក្រុមហ៊ុនក្នុងស្រុក។

ផ្សារទំនើប AEON បានក្លាយជាក្រុមហ៊ុនអន្តរជាតិនាំមុខអ្នកលក់រាយធំៗ ផ្សេងទៀតនៅជុំវិញពិភពលោក ជាពិសេសក្នុងការវិនិយោគនៅតំបន់អាស៊ីអាគ្នេយ៍ ក្នុងនោះក៏មានប្រទេសកម្ពុជាផងដែរ។

នាយកប្រតិបត្តិរបស់ក្រុមហ៊ុនបាននិយាយថា ដោយទទួលបានការលើកទឹកចិត្តពីប្រតិបត្តិករដ៏ខ្លាំងនៃសាខារបស់ខ្លួន ផ្សារទំនើប AEONនឹងចាប់ផ្តើមប្រតិបត្តិការនៅក្នុងប្រទេសមីយ៉ាន់ម៉ាដើម្បីដណ្តើមយកទីផ្សារដ៏លេចធ្លោមួយដោយគ្មានគូប្រជែង ។

ដោយឡែក ក្រុមហ៊ុនអចលនទ្រព្យ Shwe Taung ក៏បានចេញសេចក្តីថ្លែងការណ៍របស់នាយកប្រតិបត្តិរបស់ខ្លួនគឺលោក Sandar Htun កាលពីថ្ងៃអង្គារ ដោយបញ្ជាក់ថា “យើងមានក្តីរំភើបណាស់ ដែលបានចូលរួមក្នុងការបណ្តាក់ទុនរួមគ្នារួមគ្នាជាមួយផ្សារទំនើប AEON ដើម្បីនាំមកនូវគំនិតលក់រាយ និងរបៀបរស់នៅបែបថ្មី ប្រកបដោយភាពច្នៃប្រឌិតជាងមុនដល់ប្រទេសមីយ៉ាន់ម៉ា”៕

កម្ពុជាកំពុងសិក្សាពីលទ្ធភាពចរចាកិច្ចព្រមព្រៀងពាណិជ្ជកម្មសេរីជាមួយឥណ្ឌា

ដោយ ៖ រ៉ាណេត
ភ្នំពេញ ៖ រដ្ឋាភិបាលកម្ពុជា តាមរយៈក្រសួងពាណិជ្ជកម្មបានបង្ហាញពីគោលជំហរបស់ខ្លួន និងគម្រោងបង្កើនលទ្ធិភាពនៃការធ្វើពាណិជ្ជកម្ម ជំរុញកំណើនសេដ្ឋកិច្ចកម្ពុជា-ឥណ្ឌា តាមរយៈកិច្ចព្រមព្រៀងពាណិជ្ជកម្មសេរីរួមគ្នា។

នៅក្នុងកិច្ចប្រជុំកំពូលធុរកិច្ច និងពិព័រណ៍ពាណិជ្ជកម្ម ឥណ្ឌូ-អាស៊ាន -អូសិនីក លើកទី១ នាថ្ងៃទី៤ ខែសីហា ឆ្នាំ២០២០ម្សិលមិញនេះ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ស៊ាង ថៃ បានលើកឡើងពីគោលបំណងសំខាន់ៗរបស់រាជរដ្ឋាភិបាលកម្ពុជាចំនួន៥ចំណុច ដែលក្នុងនោះក៏មានការបង្ហាញពីគម្រោងនៃកិច្ចចរចាព្រមព្រៀងពាណិជ្ជកម្មសេរីរវាងកម្ពុជា និងប្រទេសឥណ្ឌាផងដែរ ។

វឌ្ឍនភាពនៃការធ្វើពាណិជ្ជកម្មទ្វេភាគីរវាងប្រទេសទាំង២ មានការកើនឡើងជាលំដាប់គួឱ្យកត់សម្គាល់ ដោយទំហំពាណិជ្ជកម្មទ្វេភាគីនៅក្នុងឆ្នាំ២០១៨ មានចំនួន ១២៨លានដុល្លាអាមេរិក ហើយនៅក្នុងឆ្នាំ២០១៩ បានកើនដល់ ២៧១លានដុល្លាអាមេរិក ។

នៅក្នុងកិច្ចប្រជុំខាងលើនេះ លោក ស៊ាង ថៃ ក៏បានអំពាវនាវឱ្យមានកិច្ចសហប្រតិបត្តិយ៉ាងជិតស្និតរវាងប្រទេសក្នុងតំបន់ ជាពិសេសប្រទេសឥណ្ឌា ដែលជាប្រទេសសមាជិកអាស៊ាន និងប្រទេសនៅតំបន់មហាសមុទ្រ ក្នុងការធ្វើសេរីភាវូបណីយកម្មសេដ្ឋកិច្ច ការលុបបំបាត់វិធានការនិងរបាំងមិនមែនពន្ធគយ ការមិនគាំទ្រប្រព័ន្ធគាំពារនិយមនិងជំនួសមកវិញនូវការគាំទ្រយ៉ាងពេញទំហឹងនូវប្រព័ន្ធពាណិជ្ជកម្មពហុភាគីនិយមជាពិសេសការគាំទ្រវត្តមាននិងតួនាទីរបស់អង្គការពាណិជ្ជកម្មពិភពលោក ជំរុញឲ្យមានវេទិកាធុរកិច្ចជននឹងធុរកិច្ចជន និងជំរុញការចូលរួមពីសំណាក់សហគ្រាសធុនតូចនិងមធ្យម (SMEs)។

កម្ពុជាមានផែនការយុទ្ធសាស្រ្តក្នុងការជំរុញកិច្ចសហប្រតិបត្តិការសំដៅធ្វើសមាហរណកម្ម និងការធ្វើឲ្យប្រសើរឡើងនូវសេដ្ឋកិច្ចតំបន់ ដែលនឹងជួយជំរុញការធ្វើពាណិជ្ជកម្ម វិនិយោគ និងឱកាសការងារ។ ផែនការទាំងនោះរួមមាន ការចរចាកិច្ចព្រមព្រៀងពាណិជ្ចកម្មសេរីទ្វេភាគីជាមួយដៃគូពាណិជ្ជកម្មសក្តានុពល បន្តការចរចាឲ្យប្រសើរឡើងបន្ថែមទៀតនូវកិច្ចព្រមព្រៀងពាណិជ្ជកម្មតំបន់ដែលមានស្រាប់ក្រោមក្របខណ្ឌ អង្គការពាណិជ្ជកម្មពិភពលោក អាស៊ាននិងដៃគូអាស៊ាន និងរៀបចំវេទិកាធុរកិច្ចនិងពិពរណ័ពាណិជ្ជកម្ម ។ល។

បន្ថែមពីនេះ រាជរដ្ឋាភិបាលកម្ពុជា ក៏បានធ្វើកំណែទម្រង់ស៊ីជម្រៅសំដៅបង្កើតបរិយាកាសល្អប្រសើរក្នុងការធ្វើអាជីវកម្ម និងវិនិយោគ កាត់បន្ថយការចំណាយក្នុងការធ្វើអាជីវកម្ម សម្រួលពាណិជ្ជកម្ម បង្កើនលទ្ធភាពប្រកួតប្រជែងក្នុងឆាកអន្តរជាតិ និងដើម្បីចូលរួមក្នុងខ្សែច្រវាក់ផលិតកម្មសកល៕

ខេត្តសៀមរាបនឹងរៀបចំព្រឹត្តិការណ៍ជាច្រើននៅក្នុងថ្ងៃឈប់សំរាកនាពេលខាងមុខនេះ ដើម្បីបង្កើនភ្ញៀវទេសចរឡើងវិញ

ដោយវុត្ថា

សៀមរាប៖ ខេត្តសៀមរាបនឹងរៀបចំព្រឹត្តិការណ៍កម្មវិធីកំសាន្តតាមបែបប្រពៃណី សាសនា ពិព័រណ៍ ជិះកង់ និងកម្មវិធីផ្សេងៗជាច្រើនទៀតនៅថ្ងៃឈប់សំរាកនៅថ្ងៃខាងមុនេះ ដោយអនុវត្តវិធានសុវត្ថិភាពទេសចរណ៍ ដើម្បីបង្កើនភ្ញៀវទេសចរឡើងវិញ។

រដ្ឋបាលខេត្តសៀមរាប បានឱ្យដឹងនៅថ្ងៃទី ៥ ខែសីហា ឆ្នាំ ២០២០ នេះ ឱ្យដឹងថា រដ្ឋបាលខេត្តបានសហការជាមួយសហភាពសហព័ន្ធយុវជនកម្ពុជាខេត្តសៀមរាប បាននឹងកំពុងត្រៀមរៀបចំទទួលភ្ញៀវទេសចរ ក្នុងឱកាសឈប់សម្រាកសងថ្ងៃឈប់សម្រាកសម្រាប់បុណ្យចូលឆ្នាំប្រពៃណីជាតិ ពីថ្ងៃទី១៧ ដល់ ២១ ខែសីហា ឆ្នាំ២០២០។

កម្មវិធីកំសាន្តដែលបានគ្រោងរៀបចំរួមមាន៖ ១.កម្មវិធីសាសនា បួងសួងសុំសេចក្តីសុខ ២.កម្មវិធីពិព័រណ៍ បន្លែផ្លែឈើ កសិផល ផលិតផល ក្រុង-ស្រុកទាំង១២ ៣.កម្មវិធីប្រកួតម្ហូបអាហារ ពានរង្វាន់មាន់អាំង ឆ្ងាញ់ជាងគេនៅខេត្តសៀមរាប ៤.ផ្សារទឹក ៥.ផាប់ស្ទ្រីត ៦.កម្មវិធីជិះកង់ ៧.កម្មវិធីកីឡាវាយកូនហ្គោល ៨.កម្មវិធីដើរព្រៃ ចង្ក្រានរយ ភ្នំគូលែន និង ៩.ផ្ទាំងទស្សនីយភាពសិល្បៈ។

ស្ថិតក្នុងវិបត្តិជំងឺកូវីដ១៩ ខេត្តបានគិតគូរ និងទទូចដល់ប្រតិបត្តិករទេសចរណ៍ និងភ្ញៀវទេសចរណ៍ ចូលរួមអនុវត្តវិធានការការពារជំងឺកូវីដ១៩ តាមការណែនាំរបស់ក្រសួងសុខាភិបាល ដូចខាងក្រោម៖ ១.កុំភ្លេចត្រៀមយកពាក់ម៉ាស់ ឬក្រម៉ា
២.កុំភ្លេចជែល ឬអាល់កុលលាងដៃ (យើងបានត្រៀម សាប៊ូលាងដៃជូននៅតាមទីសាធារណផងដែរ) ៣.កុំភ្លេចរក្សាគម្លាតសុវត្ថិភាព។

លោក ទៀ សីហា អភិបាលខេត្តសៀមរាបកាលពីកន្លងមកនេះ ឱ្យដឹងថា គម្រោងរៀបចំព្រឹត្តិការណ៍កំសាន្ត ក្នុងថ្ងៃសងឈប់សំរាក គឺដើម្បីធ្វើការផ្សព្វផ្សាយសក្តានុពលទេសចរណ៍សុវត្ថិភាព និងជាឱកាស បង្ហើបឲ្យមានការវិនិយោគរួមគ្នារវាងវិស័យសុខាភិបាលនិងវិស័យសេដ្ឋកិច្ច ក្នុងស្ថានភាពនៃវិបត្តិកូវីដ១៩។

លោកបន្តថា រយៈពេលជាងកន្លះឆ្នាំកន្លងមកនេះដែលស្ថិតនៅក្នុងវិបត្តិកូវីដ១៩ ខេត្តសៀមរាបបានប្រើប្រាស់អំឡុងពេលនោ ជាឱកាសនៃរៀបចំត្រៀម លក្ខណសម្បត្តិ ធ្វើឲ្យវិស័យទេសចរណ៍រស់ឡើងវិញ និងប្រសើរជាងមុន ក្រោយពេលដែលវិបត្តិកូវីដ១៩ ស្ងប់ស្ងាត់ទៅវិញ។

លោកបន្ថែមថា មកដល់ពេលនេះ វាគឺជាកាលៈទេសៈដែលត្រូវបានគិតគូរ អំពីការបង្ហើបឲ្យមានដង្ហើមសេដ្ឋកិច្ចជាបណ្តើរៗឡើងវិញ តាមរយៈនៃវិស័យទេសចរណ៍ តែវាមិនត្រូវបានឃ្លាតឆ្ងាយអំពីការពង្រឹងវិធានការប្រឆាំងកូវីដ១៩ ដើម្បីសុខភាពប្រជាជន និងដើម្បីសុវត្ថិភាពសហគមន៍នោះឡើយ។

លោកបន្ថែមថា ព្រឹត្តិការណ៍កំសាន្ត ក្នុងថ្ងៃឈប់សម្រាកខាងមុខនេះ វាស្មើនឹងការផលិតស្បតផ្សព្វផ្សាយមួយ ជាមួយនឹងការអះអាងថា សៀមរាប-អង្គរ គឺជាគោលដៅទេសចរណ៍សុវត្ថិភាពរបស់កម្ពុជា ហើយក៏ជាការអំពាវនាវជម្រុញឲ្យមានដំណើរការចរន្តទេសចរណ៍ក្នុងស្រុកផងដែរ និងជាឱកាស បង្ហើបឲ្យមានការវិនិយោគរួមគ្នា រវាងវិស័យសុខាភិបាលនិងវិស័យសេដ្ឋកិច្ច ក្នុងស្ថានភាពនៃវិបត្តិកូវីដ១៩ ។

លោករំពឺងថា ក្នុងព្រឹត្តិការណ៍ថ្ងៃឈប់សម្រាកនេះ នឹងធ្វើឲ្យបងប្អូនប្រជាពលរដ្ឋខេត្តសៀមរាប នឹងទទួលបានចំណូលមួយផ្នែក ក្រៅពីអាជីពប្រចាំថ្ងៃ និង ធ្វើឲ្យជីវភាពបងប្អូនបានធូរស្រាល ក្នុងពេលដែលនៅលើពិភពលោកកំពុងជួបវិបត្តិជម្ងឺកូវិដ១៩នេះ ៕

រដ្ឋាភិបាលកែសម្រួលវិធានការសុខាភិបាល ចំពោះមន្ត្រីទូត និងអង្គការអន្តរជាតិ ដែលចូលកម្ពុជា

ដោយ ៖ រ៉ាណេត

ភ្នំពេញ ៖ រាជរដ្ឋាភិបាល កម្ពុជា បានសម្រេច ធ្វើសេចក្ដីកែសម្រួលទៅលើវិធានការសុខាភិបាលចំពោះមន្ត្រីការទូត និងអង្គការអន្តរជាតិកាន់ទិដ្ឋាការការទូតប្រភេទ A និងទិដ្ឋាការផ្លូវការប្រភេទ B ដែលចូលមកកាន់កម្ពុជា។

គណៈកម្មការអន្តរក្រសួង ដើម្បីប្រយុទ្ធនឹងជំងឺកូរីដ១៩ នៅថ្ងៃទី៥ ខែសីហា ឆ្នាំ២០២០នេះ បានចេញសេចក្ដីប្រកាសព័ត៌មាន សម្រេចការកែសម្រួលវិធានការសុខាភិបាល សម្រាប់អនុវត្តចំពោះមន្ត្រីការទូត និង អង្គការអន្តរជាតិដែលកាន់ទិដ្ឋាការការទូតប្រភេទ A និងទិដ្ឋាការផ្លូវការប្រភេទ B ដែលចូលមកប្រទេសកម្ពុជា។

បើតាមសេចក្តីប្រកាសព័ត៌មានរបស់ក្រសួងសុខាភិបាលនៅព្រឹកថ្ងៃទី៥ ខែសីហាឆ្នាំ២០២០នេះ បានបញ្ជាក់ ពីការកែសម្រួលវិធានការសុខាភិបាលមួយចំនួន ដោយមានយល់ព្រមពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។

សម្រាប់អនុវត្តចំពោះមន្ត្រីការទូត និងអង្គការអន្តរជាតិ ដែលកាន់ទិដ្ឋាការការទូតប្រភេទ A និងទិដ្ឋាការប្រភេទ B ចង់ចូលមកកម្ពុជា ត្រូវអនុវត្តតាមគោលការណ៍ខាងក្រោម៖

១៖ មន្ត្រីការទូត និងអង្គការអន្តរជាតិ តម្រូវឱ្យមានវិញ្ញាបនបត្របញ្ជាក់សុខភាព (Health Certificate) ចេញដោយអាជ្ញាធរសុខាភិបាល ដែលទទួលស្គាល់ដោយប្រទេសសាមីបញ្ជាក់ ថាគ្មានជំងឺកូវីដ-១៩ ក្នុងរយៈពេល ៧២ម៉ោង មុនពេលចេញដំណើរ។

២៖ តម្រូវឱ្យមន្ត្រីការទូត និងអង្គការអន្តរជាតិ ដែលទទួលបានទិដ្ឋាការការទូតប្រភេទ A និងទិដ្ឋាការផ្លូវការប្រភេទ B ត្រូវធ្វើតេស្តទាំងអស់ ពេលមកដល់កម្ពុជា ហើយសំណាកត្រូវយកនៅទីតាំងពិសេស ក្នុងស្ថានីយមកដល់របស់អ្នកដំណើរតែម្ដង។

៣៖ ត្រូវរង់ចាំលទ្ធផលតេស្តរយៈពេលយ៉ាងតិច២៤ម៉ោង នៅទីតាំងសណ្ឋាគារ ឬកន្លែងស្នាក់នៅណាមួយ ដោយគោរពតាមគោលការណ៍ប្រតិបត្តិស្ដង់ដារ (SOPs) ដែលបានឯកភាពដោយគណៈកម្មការអន្តរក្រសួង និងការធ្វើចត្តាឡីស័ក១៤ថ្ងៃ នៅទីតាំងទាំងនោះបើមាន តម្រូវការចាំបាច់នៃវិធានការសុខាភិបាលសាធារណៈ។

៤៖ សំណាកដែលបានធ្វើពេលមកដល់ នឹងត្រូវបញ្ជូនទៅធ្វើតេស្តនៅវិទ្យាស្ថានប៉ាស្ទ័រកម្ពុជា និងការធ្វើតេស្តលើកទី២ នៅថ្ងៃទី១៣ ក៏ត្រូវធ្វើនៅវិទ្យាស្ថានប៉ាស្ទ័រកម្ពុជា តាមការកំណត់របស់ក្រសួងសុខាភិបាល។

៥៖ ក្នុងករណីមានការរកឃើញវីរុសកូវីដ-១៩ វិជ្ជមាន បញ្ជាក់ដោយមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា អ្នកជំងឺត្រូវបញ្ជូនទៅកាន់មន្ទីរពេទ្យរ៉ូយ៉ាល់ភ្នំពេញ ឬមន្ទីរពេទ្យណាផ្សេង ដែលស្ថានទូតសំណូមពរ ហើយដែលក្រសួងសុខាភិបាលឯកភាពដើម្បីធ្វើការព្យាបាល។ ការសម្រាកព្យាបាល នៅមន្ទីរពេទ្យរ៉ូយ៉ាល់ភ្នំពេញ ឬមន្ទីរពេទ្យណាផ្សេង រាល់ការចំណាយ និង តម្លៃសេវាព្យាបាលជាបន្ទុករបស់មន្ត្រីទូត ឬស្ថានទូត និងអង្គការអន្តរជាតិផ្ទាល់។

៦៖ ស្ថានបេសកកម្មបរទេសទាំងអស់ នឹងតម្រូវឱ្យចុះអនុស្សរណៈនៃការយោគយល់គ្នា (MOU) ជាមួយក្រសួងសុខាភិបាល ពាក់ព័ន្ធនឹងគោលការណ៍ប្រតិបត្តិស្ដង់ដារ (SOPs) ដើម្បីបង្ការ ការចម្លងជំងឺកូវីដ-១៩ នៅកម្ពុជា។

ដោយឈរលើគោលការណ៍មនុស្សធម៌ ការលើកកម្ពស់កិច្ចសហប្រតិបត្តិការ និងទំនាក់ទំនងល្អ ជាមួយបណ្ដាប្រទេសជាមិត្ត និងផ្អែកលើកត្តាសត្យានុម័ត ដែលចំនួនអ្នកកាន់ទិដ្ឋាការការទូតប្រភេទ A និង ទិដ្ឋាការផ្លូវការប្រភេទ B ពុំមានចំនួនច្រើនលើសលប់នោះ រាជរដ្ឋាភិបាលកម្ពុជា បានសម្រេចលើកលែងការបង់ថ្លៃ ធ្វើតេស្តរកវីរុសកូដ-១៩ លើកទី១ និងលើកទី២៕