វិស័យសំណង់កើនឡើងយ៉ាងគំហុកបានធ្វើឲ្យការផ្គង់ផ្គង់ទឹកមិនឆ្លើយតបបានគ្រប់គ្រាន់

ដោយវុត្ថា

ភ្នំពេញៈ មន្ត្រីជាន់ខ្ពស់នៃក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្ដន៍ បានឱ្យដឹងថា វិស័យសំណង់បានកើនឡើងយ៉ាងកំហុក ក្នុងរយៈពេលប៉ុន្មានឆ្នាំកន្លងមកនេះ ជាពិសេសការកើតឡើងនៃអគារខ្ពស់ៗនៅក្នុងទីក្រុងភ្នំពេញ បានជំរុញឱ្យមានការប្រើប្រាស់ទឹកខ្វះខាត និងសម្ពាធទឹកចុះខ្សោយ។

លោក ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្ដន៍ នៅក្នុងសន្និសីទសារព័ត៌មាននាថ្ងៃទី ២៣ ខែមេសា ឆ្នាំ ២០២០ នេះ ឱ្យដឹងថា កំណើននៃសំណង់នៅក្នុងប្រទេសកម្ពុជា ជាពិសេសនៅក្នុងទីក្រុងភ្នំពេញ បានធ្វើឱ្យសម្ពាតទឹកចុះខ្សោយ ជាពិសេសការកើនឡើងនៃអគារខ្ពស់ៗ។

លោកពន្យល់ថា “កាលណាមានអគារខ្ពស់ គាត់ត្រូវការបូមឡើង គាត់ត្រូវការមានម៉ាស៊ីនបូមឡើង ដែលធ្វើឱ្យអ្នកនៅចុងទុយោមានសម្ពាធទឹកខ្សោយបន្តិច ។ មិនត្រឹមតែប៉ុណ្ណោះ ផ្ទះរបស់បងប្អូនមួយចំនួន ផ្ទះល្វែង១ជាន់ ឬ២ជាន់ ក៏គាត់មានម៉ាស៊ីនបូមដែរ នៅពេលហ្នឹងហើយដែលធ្វើឱ្យសម្ពាតកាន់តែខ្សោយ”។

លោកបន្តថា “ដូច្នេះយើងទាំងអស់គ្នាត្រូវសហការគ្នា ព្រោះបើមានអ្នកបូមមុន តើអ្នកនៅខាងចុងទុយោបានទឹកអីប្រើប្រាស់។ ហេតុនេះរដ្ឋាករស្វ័យភ្នំពេញ កំពុងតែគិត និងរិះរកវិធានការ ដើម្បីបង្កើនសម្ពាត ទឹកបន្ថែមដល់បងប្អូនប្រជាពលរដ្ឋរបស់យើង”។

បើតាមដឹងពីអ្នកនាំពាក្យរូបនេះ រហូតមកដល់ពេលនេះ កម្ពុជាមានរោងចក្រផលិតទឹកស្អាតចំនួនជិត៣០០នៅទូទាំងប្រទេស ខណៈកម្ពុជារំពឹងថា នឹងមានទឹកស្អាតប្រើប្រាស់គ្រប់គ្រាន់នៅគ្រប់ទីប្រជុំជន នៅទូទាំងប្រទេសកម្ពុជានៅក្នុងឆ្នាំ២០២៥។

លោកហេង សុខគង់បានបន្តថា រោងចក្រផលិតទឹកស្អាត នៅក្នុងប្រទេសកម្ពុជាមានរួមមាន៖ រដ្ឋករទឹកស្វយ័តមានចំនួន២ នៅក្នុងរាជធានីភ្នំពេញ និងសៀបរាប រដ្ឋាករទឹករបស់រដ្ឋមានចំនួន១១ បូកជាមួយរដ្ឋាករទឹករបស់ឯកជន និងរបស់អង្គការWorld Bank មានចំនួនសរុបទាំងជាង២៩០ក្រុមហ៊ុន ដែលផ្តល់សេវាផ្គត់ផ្គង់ទឹកស្អាតនៅទូទាំងប្រទេស៕

ប្រាសាក់ ផ្តល់កម្ចីសហហិរញ្ញប្បទានដល់សហគ្រាសធុនតូច និងមធ្យម

ភ្នំពេញ៖ ប្រាសាក់ ដែលជាគ្រឹះស្ថានហិរញ្ញវត្ថុធំជាងគេនៅកម្ពុជា បានចូលរួមក្នុង «គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម» ដែលជាគំនិតផ្ដួចផ្ដើមរបស់រាជរដ្ឋាភិបាលកម្ពុជា ក្នុងគោលបំណងផ្ដល់កម្ចីដែលមានអត្រាការប្រាក់ទាប ដើម្បីជំរុញការអភិវឌ្ឍសហគ្រាសធុនតូច និងមធ្យមនៅកម្ពុជា។

គម្រោងឥណទាននេះនឹងធ្វើឱ្យប្រាសាក់អាចផ្ដល់កម្ចីដល់សហគ្រាសធុនតូច និងមធ្យម ដែលត្រូវការទុនវិនិយោគរហូតដល់ 1,26 ប៊ីលានរៀល (ឬ 30 ម៉ឺនដុល្លារ) ឬ ទុនបង្វិលរហូតដល់ 840 លានរៀល (ឬ 20 ម៉ឺនដុល្លារ) នៅក្នុងមុខរបរអាជីវកម្មរបស់ខ្លួន ជាមួយអត្រាការប្រាក់ពិសេសទាបបំផុត 7% ក្នុងមួយឆ្នាំ និងរយៈពេលកម្ចីរហូតដល់ 4 ឆ្នាំ។

លោក សាយ សូនី អនុប្រធាននាយកប្រតិបត្តិរបស់ប្រាសាក់ បានមានប្រសាសន៍ថា ឥណទានសហហិរញ្ញប្បទានទ្រទ្រង់សហគ្រាសធុនតូចនិងមធ្យមនេះ ជាប្រភេទកម្ចីដែលប្រាសាក់ និង ធនាគារសហគ្រាសធុនតូច និងមធ្យម កម្ពុជា (SME Bank) ដែលជាតំណាងរាជរដ្ឋាភិបាលកម្ពុជា បានសហការគ្នាក្នុងការផ្តល់សហហិរញ្ញប្បទានបដិភាគស្មើគ្នាដល់អតិថិជនដែលជាសហគ្រាសធុនតូច និងមធ្យម ជាមួយអត្រាការប្រាក់ទាប ដើម្បីជំរុញការអភិវឌ្ឍសហគ្រាសធុនតូច និងមធ្យម ក្នុងវិស័យអាទិភាព ដូចជាផ្នែកកម្មន្តសាល និងសិប្បកម្ម សម្រាប់ជំនួសឱ្យការនាំចូល បម្រើសេចក្ដីត្រូវការក្នុងស្រុក ឬ បម្រើជាធាតុចូលនៅក្នុងការផលិតរបស់ក្រុមហ៊ុនធំៗជាដើម និងដើម្បីបង្កើតឱកាសការងារ។

ចំពោះសហគ្រាសធុនតូច និងមធ្យម ដែលមានតម្រូវការដើមទុន អាចដាក់ពាក្យស្នើសុំកម្ចីក្រោមគម្រោងសហហិរញ្ញប្បទាននេះ ពីសាខាប្រាសាក់ដែលនៅជិតលោកអ្នកបំផុត ឬ ទូរស័ព្ទមកលេខ 023 999 911 ឬ 086 999 911 ឬ 096 999 9911 ដើម្បីទទួលបានព័ត៌មានបន្ថែម។

លោកបន្តថា «ក្នុងរយៈកាលនៃការរាតត្បាតជំងឺកូវីដ 19 នេះ ប្រាសាក់ នៅតែបន្តផ្ដល់សេវាហិរញ្ញវត្ថុជូនអតិថិជនជាធម្មតា។ តាងនាមថ្នាក់គ្រប់គ្រងនិងបុគ្គលិកទាំងអស់របស់ប្រាសាក់ ខ្ញុំបាទសូមថ្លែងអំណរគុណយ៉ាងជ្រាលជ្រៅចំពោះអតិថិជនដែលបានគាំទ្រនិងប្រើប្រាស់សេវាឥណទានប្រាសាក់ និងសូមគោរពជូនពរចំពោះអតិថិជនទាំងអស់ សូមមានសុខភាពល្អ និងមានសុវត្ថិភាពគ្រប់ៗគ្នា ក្នុងពេលវេលាដ៏លំបាកនេះ។ សូមចូលរួមសកម្មភាពការពារខ្លួនអ្នកផ្ទាល់ ក្រុមគ្រួសារ សហគមន៍ និងសង្គមជាតិយើង។ យើងរួមគ្នាដើម្បីបង្ការការឆ្លងជំងឺកូវីដ19 និងរក្សាសុវត្ថិភាពកាន់តែខ្ពស់»៕

ការព្យាករណ៍ពីការងើបឡើងវិញនៃសេដ្ឋកិច្ចចិនផ្តល់អត្ថប្រយោជន៍ដល់វិស័យអចលនទ្រព្យ និងឧស្សាហកម្មនៅកម្ពុជា

ដោយ ប៊ី

ភ្នំពេញ៖ ការងើបឡើងវិញសេដ្ឋកិច្ចចិននៅខាងមុខក្នុងឆ្នាំនេះ នឹងធ្វើឱ្យមានធ្វើឱ្យអចលនទ្រព្យ និងឧស្សាកម្មរបស់កម្ពុជាប្រសើរឡើងវិញ ខណៈចិនជាទីផ្សារធំមួយរបស់កម្ពុជា។

សេដ្ឋកិច្ចរបស់ប្រទេសចិនត្រូវបានគេរំពឹងថា នឹងងើបឡើងវិញនៅក្នុងត្រីមាសទី ២ បន្ទាប់ពីបានធ្លាក់ចុះនៅក្នុងត្រីមាសទី ១ ចំពេលដែលការរីករាលដាលនៃជំងឺ Covid-19។ នេះបើតាមការព្យាករណ៍របស់សេដ្ឋវិទូ កាលពីថ្ងៃអង្គារ ទី ២២ ខែមេសា ឆ្នាំ២០២០នេះ។

រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ លោក ហេង សុខគង់ បានមានប្រសាសន៍នៅក្នុងពិធីសន្និសីទសារព័ត៌មានស្ដីពីវឌ្ឍនភាព និងបន្តទិសដៅការងារ នៅទីស្ដីការគណរដ្ឋមន្ត្រី កាលពីព្រឹកថ្ងៃទី២៣ ខែមេសា ឆ្នាំ២០២០នេះ ការងើបឡើងវិញសេដ្ឋកិច្ចរបស់ប្រទេសចិនធ្វើឱ្យកម្ពុជាមានឱកាសច្រើននាំចេញទៅចិន និងដូចជា ឱកាសច្រើនទាក់ទាញរោងចក្រពីចិន។

លោក បានថ្លែងថា “កម្ពុជានឹងមានសន្ទុះងើបឡើងវិញ ដោយសារកម្ពុជា និងចិនកំពុងចរចាធ្វើពាណិជ្ជកម្មសេរីរវាងប្រទេសទាំងពីរ ហើយយើងដឹងហើយថា ចិនជាមិត្តល្អរបស់កម្ពុជា”។

លោក បានបន្តថា “បន្ទាប់ពីសេដ្ឋកិច្ចចិនងើបឡើងវិញ មិនត្រឹមវិស័យឧស្សាហកម្មទេ ប៉ុន្តែវិស័យផ្សេងៗនេះទៀតរបស់កម្ពុជានឹងទទួលបានប្រយោជន៍ច្រើន ព្រោះចិនជាទីផ្សារធំមួយរបស់កម្ពុជា”។

លោក Piao Renjin អ្នកវិភាគប្រចាំក្រុមហ៊ុន NH Investment & Securities នៅទីក្រុងសេអ៊ូល បាននិយាយថា ប្រទេសចិនបានឆ្លើយតបយ៉ាងឆាប់រហ័សចំពោះការរីករាលដាលនៃការគ្របដណ្តប់លើជំងឺ Covid-19 ដោយមានកញ្ចប់ថវិកាជំរុញសេដ្ឋកិច្ចនិងហិរញ្ញវត្ថុនាំឱ្យមានការស្ទុះងើបឡើងវិញយ៉ាងឆាប់រហ័សនៅក្នុងទីផ្សារហិរញ្ញវត្ថុ។

អ្នកវិភាគរូបនេះបាននិយាយថា “រដ្ឋាភិបាលចិនត្រូវបានគេព្យាករណ៍ថា នឹងពង្រីកវិធានការជំរុញសារពើពន្ធនិងរូបិយវត្ថុ ហើយអ្នកអាចមើលឃើញការងើបឡើងវិញនៅក្នុងប្រទេសចិនក្នុងត្រីមាសទី ២” ។

នេះបើយោងតាមទិន្នន័យដែលចេញផ្សាយដោយការិយាល័យស្ថិតិជាតិរបស់ចិនបានឱ្យដឹងថា ផលិតផលក្នុងស្រុកសរុបរបស់ប្រទេសចិនបានធ្លាក់ចុះ ៦,៨ ភាគរយ នៅក្នុងត្រីមាស ខែមករា – មីនា ចំពេលមានការថយចុះសេដ្ឋកិច្ចពីការរាតត្បាតវីរុសនេះ។ ទោះបីជាមានការធ្លាក់ចុះក៏ដោយក៏ប្រទេសចិនត្រូវបានគេរំពឹងថា នឹងក្លាយជាប្រទេសមួយក្នុងចំណោមប្រទេសមានសេដ្ឋកិច្ចធំ ៗ មួយចំនួន ដែលមានកំណើនសេដ្ឋកិច្ចនៅឆ្នាំនេះ។

តាមការព្យាករណ៍ទុករបស់ធនាគារពិភពលោក សេដ្ឋកិច្ចកម្ពុជានឹងស្តារឡើងវិញមកនៅ៥,៩ភាគរយ ក្នុងឆ្នាំ២០២១ ក្នុងសេណារីយោខ្សែបន្ទាត់គោល។ ការស្ទុះងើបឡើងវិញនៃសកម្មភាពសេដ្ឋកិច្ចនៅប្រទេសចិន និងនៅទីផ្សារធំៗផ្សេងទៀតក្នុងឆ្នាំ២០២១ នឹងធ្វើឱ្យចក្ខុវិស័យសេដ្ឋកិច្ចរបស់កម្ពុជា មានភាពប្រសើរឡើងវិញ នៅឆ្នាំក្រោយ។

វិស័យសំណង់ និងអចលនទ្រព្យ ដែលជាផ្នែកសំខាន់ៗនាំមកនូវកំណើនសេដ្ឋកិច្ចរបស់កម្ពុជា នឹងមានប្រសើរឡើងវិញ៕

អ្នកជំនាញ៖ ចរន្តទិញ-លក់អចលនវត្ថុនៅកម្ពុជាចាប់ផ្តើមកក្រើកឡើងវិញនៅពាក់កណ្តាលនិងចុងខែមេសានេះ

ដោយ ហ្សូលី

ភ្នំពេញ៖ អ្នកជំនាញអចលនទ្រព្យនៅកម្ពុជាបង្ហើបឱ្យដឹងថា ការទិញ-លក់អចលនទ្រព្យនៅក្នុងប្រទេសកម្ពុជាចាប់ផ្តើមមានការងើបឡើងវិញនូវចរាចរណ៍ទិញ-លក់ ក្នុងចុងខែមេសានេះ បើទោះបីជាកម្ពុជាកំពុងប្រឈមទៅនឹងវិបត្តិសកលលោកគឺ ជំងឺកូរ៉ូណា ឬ Covid-19 ក៏ដោយ។

លោក ម៉ន សុខា អគ្គនាយកក្រុមហ៊ុនអចលនទ្រព្យ UTrust បានថ្លែងប្រាប់គេហទំព័រ Property Area Asia នៅថ្ងៃទី ២៣ ខែមេសា ឆ្នាំ២០២០នេះថា «អចលនទ្រព្យនៅកម្ពុជាបើគិតនៅចុងខែមេសានេះ សង្កេតឃើញថាចរន្តទិញ-លក់របស់ប្រជាជនកម្ពុជាហាក់បីដូចជាមានភាពកក្រើកឡើងវិញដែលខុសកាលពីខែមីនា និងដើមខែមេសា។»

លោកបន្តថា ការងើបឡើងវិញនេះគឺមកពីកត្តាមួយចំនួន ទី១ ដោយសារតែអត្រានៃអ្នកជំងឺកូវីដ១៩ បានជាសះស្បើយច្រើន ព្រោះរដ្ឋាភិបាលកម្ពុជាបានដាក់បម្រាមជាច្រើនដោយប្រជាជនខ្មែរមិនបានទៅស្រុកនោះឡើយ។ ទី ២ នៅពេលដែលប្រជាពលរដ្ឋមិនបានទៅស្រុកបែបនេះ លុយរបស់គាត់ត្រូវបានសល់ អញ្ចឹងនៅពេលសល់បែបនេះ គាត់អាចយកលុយមកវិនិយោគនៅអចលនទ្រព្យនេះវិញ ដូច្នេះទើបចរន្តទិញ-លក់ ចាប់មានភាពប្រសើរឡើងវិញ។

បន្ថែមពីនេះ អគ្គនាយកក្រុមហ៊ុន Utrust រូបនេះបានរៀបរាប់ថា បើតាមការសង្កេតឃើញរបស់លោកឃើញថា ការទិញលក់បុរី ផ្ទះ វីឡា និងដីឡូតិ៍ មានចរន្តកើនឡើងឡើងវិញ មានអតិថិជនចេញចូលជាហូរហែទៅតាមទីស្នាក់ការក្រុមហ៊ុននិមួយៗ មានការចុះកិច្ចសន្យាជាហូរហែ។

ចំណែកឯលោក ខន គង្គារ អគ្គនាយកក្រុមហ៊ុនអចលនទ្រព្យ ERA ធ្លាប់បានមានប្រសាសន៍ថា «ជាធម្មតាភ្ញៀវមួយចំនួនរង់ចាំឱ្យស្ថានភាពប្រសើរឡើង ភ្ញៀវក៏គាត់ចាប់ផ្តើមឆ្លៀតមើលឱកាសវិនិយោគដូចគ្នាដែរ។ ចរន្តទិញ-លក់នៅតែមានជាបន្តបន្ទាប់ ប៉ុន្តែអាស្រ័យលើគម្រោងដែរ ជាក់ស្តែងដូចខ្ញុំដែលកាន់ខាងខុនដូគឺនៅតែមានលក់ជារៀងរាល់ថ្ងៃ។»

ជាមួយការលើកឡើងស្រដៀងគ្នានេះ លោកស្រី តាំង ហ៊ួរ នាយិកាក្រុមហ៊ុនអចលនទ្រព្យ Amatak Property បានឱ្យដឹងថា យើងមានដំណឹងល្អហើយ ព្រោះថាមានសញ្ញាល្អហើយ ព្រោះ Covid-19 នេះគ្រាន់តែជាសេដ្ឋកិច្ចធ្លាក់ចុះ មិនមែនជាបញ្ហាធ្វើឱ្យមានសំណង់បាក់បែក ដែលតម្រូវឱ្យប្រើពេលយូរក្នុងការសាងសង់ឡើងវិញនោះទេ ដូច្នេះអ្វីៗវានឹងត្រឡប់មកវិញធម្មតា នឹងមានដំណើរការដូចដើម។

យ៉ាងណាមិញ អ្នកជំនាញមិនបានបង្ហាញពីការព្យាករណ៍ពីពេលវេលាជាក់លាក់នៃការដំណើរការអចលនទ្រព្យ ១០០ភាគរយ ឬការត្រឡប់មករកសភាពដើមទាំងស្រុងវិញនោះឡើយ ប៉ុន្តែអ្នកជំនាញសង្កេតឃើញថា អចលនទ្រព្យនៅកម្ពុជាមានភាពប្រសើរឡើងក្នុងមួយរយៈចុងក្រោយនៃចុងខែមេសានេះ៕

ដើមឆ្នាំ២០២០ វិស័យ SME ផ្នែកកម្មន្ដសាល មានកំណើនជាង ៥២ ០០០ ទីតាំង កំពុងដំណើរការនៅកម្ពុជា

ដោយ ៖ រ៉ាណេត

ភ្នំពេញ ៖ ជាមួយនឹងការយកចិត្តទុកដាក់លើកកម្ពស់ពីសំណាក់រាជរដ្ឋាភិបាល គិតត្រឹមដើមឆ្នាំ២០២០ វិស័យសហគ្រាសធុនតូច និងមធ្យម SME (ផ្នែកកម្មន្តសាល) នៅកម្ពុជា បានបន្តពង្រីកវិសាលភាពយ៉ាងខ្លាំងក្លា និងមានការកើនឡើងរហូតដល់ចំនួន ៥២ ១៥៤ ទីតាំងមូលដ្ឋាននៅទូទាំងប្រទេស ដែលផ្តល់ឱកាសការងារបានប្រមាណ៨២៤ ២៤៥កន្លែង ។

រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ លោក ហេង សុខគង់ បានមានប្រសាសន៍នៅក្នុងពិធីសន្និសីទសារព័ត៌មានស្ដីពីវឌ្ឍនភាព និងបន្តទិសដៅការងារ នៅទីស្ដីការគណរដ្ឋមន្ត្រី កាលពីព្រឹកថ្ងៃទី២៣ ខែមេសា ឆ្នាំ២០២០នេះថា គិតត្រឹមចុងឆ្នាំ២០១៩ ដើមឆ្នាំ២០២០ វិស័យសហគ្រាសធុនតូច និងមធ្យម នៅទូទាំងប្រទេសមានកំណើនរហូតដល់ចំនួន ៥២ ១៥៤ ទីតាំង កំពុងដំណើរការ ដែលជាសញ្ញាវិជ្ជមាន និងភាពល្អប្រសើរនៃវិស័យមួយនេះ។

លោក ហេង សុខគង់ បានមានប្រសាសន៍ថា “នៅទូទាំងពិភពលោក វិស័យសហគ្រាសធុនតូច និងមធ្យម គឺមានអត្រាខ្ពស់ និងមានតួនាទីយ៉ាងសំខាន់នៅក្នុងនាមជាចំណែកនៃឆ្អឹងខ្នង ដែលមានសារសំខាន់សម្រាប់ប្រទេសនីមួយៗ។ ដោយឡែក នៅកម្ពុជានាពេលបច្ចុប្បន្ននេះ សហគ្រាសធុនតូច និងមធ្យម មានរហូតដល់ជាង៥២ម៉ឺនសហគ្រាស ស្មើនឹងប្រមាណ ៩៩,៨ ភាគរយ ដែលផ្តល់ការងារបានជាង៨២ម៉ឺនកន្លែង ស្មើនឹងប្រមាណ ៧០ភាគរយ”។

លោកបានបន្តទៀតថា “វិសាលភាពនៃវិស័យ SME ឬ សហគ្រាសធុនតូច និងមធ្យម គឺមានភាពទូលំទូលាយ ដែលរាប់គិតពីសេវាលក់ដូរតូចតាចរហូតដល់ សហគ្រាសដែលមានដើមទុនក្រោម៥០ម៉ឺនដុល្លារ ក្នុងការផលិតសម្រាប់បំពេញតម្រូវការទីផ្សារក្នុងស្រុកប្រមាណ៥៨ភាគរយ និងការនាំចេញទៅកាន់ទីផ្សារក្រៅប្រទេស”។

គុណសម្បត្តិនៃវិស័យ SME គឺមានភាពទូលំទូលាយនៅក្នុងការជួយជ្រោមជ្រែងសេដ្ឋកិច្ចប្រទេសនីមួយៗ ជាក់ស្ដែង សូម្បីសហរដ្ឋអាមេរិកដែលជាប្រទេសមហាអំណាចលើពិភពលោក វិស័យមួយនេះបានចូលរួចចំណែករហូតដល់ប្រមាណ ៥៣ភាគរយនៅក្នុងការជំរុញ និងលើកម្ពស់កំណើន GDP របស់ប្រជាពលរដ្ឋនៅទូទាំងប្រទេស៕

រោងចក្រថ្មីចំនួន ៧៧ ត្រូវបានបង្កើតឡើងនៅកម្ពុជាក្នុងដើមឆ្នាំនេះ

ដោយ ៖ រ៉ាណេត

ភ្នំពេញ ៖ នៅក្នុងរយៈ៣ខែ នៃត្រីមាសទី១ឆ្នាំ២០២០ កន្លងទៅ វត្តមានរោងចក្រថ្មីៗដែលស្ថិតនៅក្នុងវិស័យឧស្សាហកម្មចំនួន ៧៧ ត្រូវបានរាជរដ្ឋាភិបាលអនុញ្ញាត និងគាំទ្រឱ្យមានដំណើរនៅកម្ពុជា និងបានផ្តល់ឱកាសការងារប្រមាណ ២៧ ៩០៩នាក់ ស្រពេលដែលរោងចក្រចំនួន៦ ត្រូវបានសម្រេចបិទទ្វាឈប់ដំណើរការទាំងស្រុង។

តាមរយៈរបាយការណ៍ដែលចេញដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅក្នុងសន្និសីទសារព័ត៌មានស្ដីពីវឌ្ឍនភាព និងបន្តទិសដៅការងារ កាលព្រឹកថ្ងៃទី២៣ ខែមេសា ឆ្នាំ២០២០នេះ បានបង្ហាញថា នៅក្នុងរយៈពេល៣ខែ ឆ្នាំ២០២០កន្លងទៅនេះ ស្របពេលដែលកម្ពុជាមានភាពប្រឈមជាមួយនឹងវិបត្តិជំងឺឆ្លង Covid-19 គម្រោងវិនិយោគ និងបង្កើតរោងចក្រថ្មីចំនួន៧៧ ត្រូវបានរាជរដ្ឋាភិបាលសម្រេចគាំទ្រ និងអនុញ្ញាតឱ្យចាប់ដំណើរការនៅតាមបណ្តាខេត្ត ក្រុង និងតំបន់សេដ្ឋកិច្ចពិសេសនៅទូទាំងប្រទេស។

តាមរយៈរបាយការណ៍ដដែលនេះបានបញ្ជាក់ថា នៅក្នុងចំណោមរោងចក្រថ្មីៗដែលត្រូវបានអនុញ្ញាតឱ្យមានដំណើរការទាំង៧៧នេះ ក្នុងនោះក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ ចំនួន៧៤ សេចក្ដីសម្រេចចេញដោយសាលារាជធានីភ្នំពេញចំនួន១ និងរោងចក្រដំណើរការឡើងវិញចំនួន២ ដោយបានបង្កើតឱកាសការងារ ២៧ ៩០៩នាក់។
គិតត្រឹមដើមត្រីមាសទី២ ឆ្នាំ២០២០ រោងចក្រដែលស្ថិតនៅក្រោមការគ្រប់គ្រងរបស់ក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ មានចំនួន១ ៨០១ រោងចក្រ ដែលក្នុងនោះផ្តល់ឱកាសការងារដល់កម្មករ-កម្មការិនី ប្រមាណ ១ ០៦៣ ០៣១ នាក់ ៕

ក្រុមហ៊ុនចិនគ្រោងចូលរួមវិនិយោគចំណតរថយន្តខ្នាតធំនៅលើទំហំដីរាប់ហិកតាក្នុងទីក្រុងភ្នំពេញ

ដោយ វុត្ថា

ភ្នំពេញៈ ក្រុមហ៊ុន China Good Car Holding (Cambodia) Co.,Ltd ដែលជាក្រុមហ៊ុនរបស់ចិន គ្រោងចូលរួមវិនិយោគសាងសង់ស្ថានីយ៍ ចំណតយានយន្តធុនធំនៅរាជធានីភ្នំពេញលើទំហំដីរាប់ហិកតា និងគម្រោងវិនិយោគដ៏ទៃទៀត ខណៈនាពេលបច្ចុប្បន្ននេះ ទីក្រុងភ្នំពេញកំពុងមមាញឹកចរាចរណ៍យ៉ាងខ្លាំង។

លោកឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណៈ និងដឹកជញ្ជូនបានប្រាប់គេហទំព័រ propertyarea.asia នៅថ្ងៃទី២២ ខែមេសា ឆ្នាំ ២០២០កន្លងមកថា ក្រុមហ៊ុនចិនមួយនេះ បានចុះជាមួយក្រុមការងាររបស់ក្រសួងចុះទៅមើលទីតាំងរួចហើយ តែស្នើសុំគោលការជាមុននឹងចាប់ផ្តើមវិនិយោគ។

លោកបន្តថា “ខ្ញុំមិនទាន់ហ៊ានប្រាប់ទីតាំងនៅឡើយទេ ព្រោះវាមិនទាន់ច្បាស់ ហើយទំហំទឹកប្រាក់ ក្នុងការវិនិយោគវិញក៏មិនទាន់បានដឹងនៅឡើយ តែខាងក្រោមហ៊ុន មានគម្រោងរួចរាល់អស់ហើយ ជាមួយគ្នានេះក្រុមហ៊ុនបាន និងកំពុងដំណើរការលើឯកសារពាក់ព័ន្ធ ដើម្បីចាប់ផ្តើមវិនិយោគនាពេលខាងមុខនេះ។

ក្រុមហ៊ុន China Good Car Holding (Cambodia) Co.,Ltd កាលពីថ្ងៃទី ២០ ខែមេសា កន្លងមកនេះ បានជួបប្រជុំពិភាក្សាជាមួយ លោកឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក អំពីគម្រោងវិនិយោគសាងសង់ស្ថានីយ ចំណតយានយន្តធុនធំនៅរាជធានីភ្នំពេញ និងគម្រោងវិនិយោគដ៏ទៃទៀត។ កិច្ចប្រជុំនេះក៏មានការចូលរួមពីសំណាក់លោកអគ្គនាយករង លោកប្រធាននាយកដ្ឋាន និងតំណាងក្រុមហ៊ុនផងដែរ។

លោកម៉េត មាសភក្តី អ្នកនាំពាក្យរដ្ឋបាលរាជរដ្ឋបានលរាជធានីភ្នំពេញ បានមានប្រសាសន៍ប្រាប់គេហទំព័រ Propertyarea.asia តាមរយៈទូរស័ព្ទឱ្យដឹងថា រហូតមកដល់ពេលនេះ លោកមិនទាន់បានទទួលបានដំណឹងពី គម្រោងវិនិយោគសាងសង់ស្ថានីយចំណតយានយន្តធុនធំនៅរាជធានីភ្នំពេញនេះនៅឡើយទេ ដោយលោកសុំមិនធ្វើអត្ថាធិប្បាយជុំវិញបញ្ហានេះ។

លោកបន្តថា “នៅពេលដែលខ្ញុំបានទទួលបានដំណឹងនេះច្បាស់លាស់ ទើបអាចនិយាយបាន។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីកន្លងមកនេះ ក៏បានមានប្រសាសន៍ជំរុញឱ្យរដ្ឋបាលរាជធានីភ្នំពេញ សាងសង់នូវចំណតយានយន្ត ឱ្យបានកាន់តែច្រើនថែមទៀត ជាពិសេសចំណតយានយន្តក្រោមដី គឺត្រូវការបន្ថែមទៀត ស្របពេលដែលរាជធានីភ្នំពេញ មានការអភិវឌ្ឍន៍ទីក្រុងយ៉ាងឆាប់រហ័ស និងការកើនឡើងនូវចំនួនយានយន្តនៅក្នុងទីក្រុង។

សម្តេចតេជោថ្លែងថា “បើយើងនិយាយអំពីទីក្រុងភ្នំពេញសព្វថ្ងៃ មានរឿងសំខាន់ពីរ។ ទី១ គឺខ្វះកន្លែងចតរថយន្ត ហើយទី២ គឺសំរាម១ ថ្ងៃសំរាមដល់ទៅ៣០០តោន។ ប្រសិនបើ៥០ភាគរយ នៃយានយន្តសរុបធ្វើដំណើរលើដងផ្លូវ ក្នុងពេលតែមួយ នោះរាជធានីភ្នំពេញ នឹងមានការកកស្ទះនិងជាប់គាំងនៅមួយកន្លែង”៕

វិស័យរ៉ែនៅកម្ពុជាបានទាក់ទាញទុនវិនិយោគរហូតដល់ជាង ១១៥៧លានដុល្លារ

ដោយ វុត្ថា

ភ្នំពេញៈ ក្រសួងរ៉ែ និងថាមពល បានទាក់ទាញទុនវិនិយោគក្នុងវិស័យរ៉ែ ដែលបានចុះបញ្ជីទាំងក្រុមហ៊ុនវិនិយោគក្នុងស្រុក និងបរទេសមានចំនួន១១៥៧,៧៣លានដុល្លារអាមេរិក ខណៈវិស័យមួយបាននឹងជួយជំរុញ លើកិច្ចអភិវឌ្ឍន៍សេដ្ឋកិច្ច និងសង្គមរបស់កម្ពុជា។

យោងតាមរបាយការណ៍របស់ក្រសួងរ៉ែ និងថាមពល ដែលបានចែកជូនអ្នកសារព័ត៌មាននៅក្នុងសន្និសីទសារព័ត៌មាស្តីពី វឌ្ឍនភាពក្រសួងរ៉ែ និងថាមពលនិងទិសដៅបន្តកាលពីថ្ងៃទី ២១ ខែមេសាកន្លងមកបានឱ្យដឹងថា ក្នុងចំណោមទុនវិនិយោគទាំងនោះ មានទុនវិនិយោគផ្នែក ស្វែងរុករ៉ែមាសចំនួន១០៧,១៦លានដុល្លារអាមេរិក ។ ទុនវិនិយោគផ្នែករ៉ែ សំណង់មានទឹកប្រាក់៧៥,២៨ លានដុល្លារអាមេរិក។ ទុនវិនិយោគផ្នែករ៉ែលោហៈ មានចំនួន១៥៨,៦លានដុល្លារអាមេរិក និងទុនវិនិយោគផ្នែកលោកហៈមានចំនួន ៨១៦,៩៣លានដុល្លារអាមេរិក ។

របាយការណ៍ដដែលបន្តថា ក្រៅពីចំណូលសារពើពន្ធ ដែលអគ្គនាយកដ្ឋានពន្ធដារប្រមូលពីក្រុមហ៊ុនប្រកបអាជីវកម្មធនធានរ៉ែ ចំណូលមិនមែនសារពើពន្ធពីវិស័យរ៉ែ ដែលក្រសួងរ៉ែ និងថាមពលប្រមូលបានចាំឆ្នាំ២០១៩ មានចំនួន៨៥,៩៨៣លានរៀល ដែលមានកំណើនស្មើនឹងប្រមាណ១៨ ភាគរយធៀបនឹងឆ្នាំ ២០១៨ ។

លោកយស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ និងជាអ្នកនាំពាក្យក្រសួងរ៉ែ និងថាមពលបានឱ្យដឹងថា ដោយមានការយកចិត្តទុកដាក់ និងការគាំទ្រយ៉ាងមុតមាំ របស់រាជរដ្ឋាភិបាល វិស័យរ៉ែ បានបើកចំហរនិងទាក់ទាញវិនិយោគឯកជន ឱ្យចូលរួមមកសិក្សាស្រាវជ្រាវ និងធ្វើអាជីវកម្ម ឧស្សាហកម្មរ៉ែ នៅកម្ពុជាយ៉ាងផុលផុស។

លោកបន្តថា “វិស័យរ៉ែបានចូលរួមចំណែក ក្នុងកិច្ចអភិវឌ្ឍន៍ហេដ្ឋារចនាសម្ព័ន្ធ និងកំណើនសេដ្ឋកិច្ចជាតិកាន់តែធំឡើង ដោយរយៈកាលថ្មីៗនេះរាជរដ្ឋាភិបាលក៏ដូចជាក្រសួងរ៉ែ និងថាមពល បានកែសម្រួល និងកសាងលិខិតបឬដ្ឋានគតិយុត្តិសំខាន់ៗ ដើម្បីគាំទ្រ និងទាក់ទាញវិនិយោគិនក្នុងវិស័យរ៉ែប្រកបដោយប្រសិទ្ធិភាពខ្ពស់”៕

ចិនសាងសង់កីឡដ្ឋានធំជាងគេលើពិភពលោកដែលមានទុនវិនិយោគទំហំ ១៧០០លានដុល្លារ

ដោយ ហ្សូលី

ក្វាងចូវៈ ក្រុមហ៊ុនអចលនទ្រព្យអន្តរជាតិ EverGrande បានប្រកាសថា កីឡដ្ឋានបាល់ទាត់ធំជាងគេបំផុតនៅលើពិភពលោក ដែលមានទំហំវិនិយោគប្រមាណជា ១,៧ ពាន់លានដុល្លារ បានចាប់ផ្តើមដំណើរការសាងសង់ហើយ។

កីឡដ្ឋាននេះមានអាចផ្ទុកកន្លែងអង្គុយទស្សនា បានសរុបចំនួន ១០០,០០០កន្លែង ដែលនឹងក្លាយជាកីឡដ្ឋានបាល់ទាត់ ធំជាងគេបំផុតនៅលើពិភពលោក។ កីឡាដ្ឋានយក្សនេះ នឹងត្រូវបានរចនាឡើងជារូបរាងផ្កាឈូក ហើយគ្រោងនឹងបញ្ចប់ការសាងសង់នៅចុងឆ្នាំ២០២២។

ការរចនានៃពហុកីឡាដ្ឋាននេះ គឺជាស្នាដៃរបស់អ្នករចនាជនជាតិអាមេរិក ដែលមានឈ្មោះថា Hasan Syed ដែលមានមូលដ្ឋាននៅសៀងហៃ ដោយធ្វើតាមគំនិតដំបូងពីប្រធានក្រុមហ៊ុន Evergrande Group Xu Jiayin ។ ការរចនាផ្កាឈូកមានប្រភពចេញពីទីក្រុងក្វាងចូវ ដែលត្រូវបានគេស្គាល់ថាជាទីក្រុងផ្កា។

ពហុកីឡាដ្ឋាននេះរួមមានបន្ទប់ឯកជន VIP ចំនួន១៦ បន្ទប់ឯកជន VIP ចំនួន១៥២ តំបន់ FIFA តំបន់អត្តពលកម្មតំបន់ប្រព័ន្ធផ្សព្វផ្សាយ និងបន្ទប់សារព័ត៌មាន។

យោងតាមសារព័ត៌មាន ESPN បានឱ្យដឹងទៀតថា ក្រុមហ៊ុន Evergrande គ្រោងសាងសង់ពហុកីឡាដ្ឋានចន្លោះពី៣ ទៅ៥ទៀត ដែលមានសមត្ថភាពផ្ទុកដល់៨០ ០០០ ទៅ១០០,០០០ នៅជុំវិញប្រទេសចិន។

ប្រធានក្រុមហ៊ុនអចលនទ្រព្យអន្តរជាតិ EverGrande លោក Xia HaiJun បានមានប្រសាសន៍ថា ការងារសាងសង់បានចាប់ផ្តើមដំណើរការកាលពីសប្តាហ៍មុន ដោយមានគោលដៅ ដើម្បីក្លាយជា“និមិត្តសញ្ញាថ្មីលំដាប់ពិភពលោក ដែលអាចប្រៀបធៀបបានទៅនឹងអគារ Sydney Opera House និង អគារ Burj Khalifa នៅឌូបៃ។

សមត្ថភាពនៃកីឡដ្ឋាននេះ នឹងបំបែកឯកទគ្គកម្មរបស់កីឡដ្ឋាន Camp Nou នៅទីក្រុង Barcelona ប្រទេសអេស្ប៉ាញ ដែលអាចផ្ទុកបានចំនួន ៩៩,៣៥៤ កន្លែង៕

ប្រភព (CNN)

អចលនទ្រព្យតម្លៃមធ្យមនៅតែមានតម្រូវការខ្ពស់ទាំងផ្នែកលំនៅដ្ឋានជាប់ដី និងខុនដូ

ដោយគង់ សូរិយា

ភ្នំពេញៈ ទីផ្សារលំនៅដ្ឋាន និងអាគារបែបសហកម្មសិទ្ធិ ដែលមានតម្លៃមធ្យមនៅតែមានតម្រូវការខ្ពស់នៅលើទីផ្សារ។ នេះបើតាមការសិក្សាមួយ។

យោងតាមការស្ទង់មតិអចលនទ្រព្យឆ្នាំ២០១៩ របស់ Realestate.com.kh ក្នុងចំណោមអ្នកផ្តល់ចម្លើយជាង ២០០០នាក់បានបង្ហាញថា ប្រហែល ៤០ភាគរយ នៃអ្នកផ្ដល់ចម្លើយទាំងអស់ ចាប់អារម្មណ៍ចង់ទិញផ្ទះតម្លៃក្រោម ៥ម៉ឺនដុល្លារ និងមាន ២៦% ចាប់អាម្មណ៍ទិញផ្ទះតម្លៃ ៥០០០០ ទៅ ៧៥០០ដុល្លារ។

លោកស្រីអាន សុធីតានា យិកាក្រុមហ៊ុន CBRE Cambodia បានលើកឡើងថា ខុនដូតម្លៃសមរម្យមានតម្លៃចន្លោះពី១,២០០ ដុល្លារ ទៅ១,៥០០ដុល្លារឡើងទៅ ក្នុងមួយម៉ែត្រការ៉េ និងខុនដូថ្នាក់កណ្តាលមានតម្លៃពី ១,៥០០ ទៅ ២,៥០០ដុល្លារ ជាងក្នុងមួយម៉ែត្រការ៉េ និងខុនដូតម្លៃខ្ពស់មានតម្លៃចាប់ពី ៣,០០០ដុល្លារ/ម៉ែត្រការ៉េ។

យោងតាមរបាយការណ៍របស់ CBRE Cambodia ឆ្នាំ២០២០ នេះវិញ CBRE Cambodia រំពឹងថា ទីផ្សារខុនដូ នឹងកើនឡើង ៥៥ភាគរយ ក្នុងនោះទីផ្សារខុនដូតម្លៃសមរម្យ (affordable) មានភាពទាក់ទាញខ្លាំងជាងគេក្នុងចំណោមអតិថិជនក្នុងស្រុក។

ចំណែកបើនិយាយអំពីតម្លៃផ្ទះទូទៅវិញ មិនថា វីឡា ឬផ្ទះក្នុងបុរីនោះទេ គឺនៅមិនទាន់ឈានដល់កម្រិតខ្ពស់បំផុតនៅឡើយ ស្របពេលដែលតម្រូវការសរុបត្រូវបានគេប៉ាន់ស្មានថាមានប្រមាណជាង៨០ម៉ឺនខ្នង គិតចាប់ពីឆ្នាំ២០១៥ ដល់ឆ្នាំ២០៣០ ពោលគឺប្រមាណជាង៥ម៉ឺនខ្នងក្នុងមួយឆ្នាំៗ នេះបើយោងតាមការសិក្សារបស់ក្រសួងរៀបចំដែនដី នគរូបនីយកម្ម និងសំណង់។

លោកឧកញ៉ាលី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបានទទួលស្គាល់ថា ទីផ្សារលំនៅដ្ឋានតម្លៃសមរម្យនៅតែមានតម្រូវការខ្ពស់ និងងាយលក់ចេញជាងលំនៅដ្ឋានដែលមានតម្លៃថ្លៃ ប៉ុន្តែមិនមែនមានន័យថា លំនៅដ្ឋានមានតម្លៃថ្លៃលក់មិនចេញនោះទេ វាអាស្រ័យលើទីតាំង និងគំរោងនិមួយៗ ដែលអ្នកអភិវឌ្ឍន៍បានសាងសង់ឡើង។

លោកបន្តថា “ការអភិវឌ្ឍលំនៅដ្ឋានតម្លៃសមរម្យ មិនអាចធ្វើបាននៅតំបន់ដែលដីមានតម្លៃខ្ពស់នោះទេ ប៉ុន្តែការរីកចម្រើននិងការពង្រីកក្រុង បានផ្តល់ឳកាសឲ្យអ្នកអភិវឌ្ឍន៍អាចសាងសង់លំនៅដ្ឋានតម្លៃសមរម្យបាន សំរាប់តំបន់ជាយក្រុង”៕