សម្តេតេជោ ត្រៀមទំលាក់ថវិកាបម្រុងប្រមាណ៦០០ លានដុល្លារទៅឱ្យធនាគារឯកទេស

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គ្រោងពិចារណាទំលាក់ថវិកាបំរ៉ុងរបស់ជាតិប្រមាណ ៥០០ ទៅ៦០០លានដុល្លារអាមេរិកទៅឱ្យធនាគារឯកទេសខ្ចីក្នុងអត្រាការប្រាក់ទាបដើម្បីផ្តល់ទៅឱ្យម្ចាស់អាជីវកម្មនានាក្នុងអត្រាការប្រាក់ទាបដូចគ្នា។

សម្តេចតេជោ ហ៊ុន សែន នាយដ្ឋមន្ត្រីនៃកម្ពុជា នៅក្នុងសន្និសីទសារព័ត៌មាន ស្ដីពីការតែងតាំង និងកែសម្រួលសមាសភាពសមាជិករដ្ឋាភិបាល នាថ្ងៃទី ៣០ ខែមីនា ឆ្នាំ ២០២០ នេះ ឱ្យដឹងថា រដ្ឋាភិបាលបាននឹងកំពុងពិនិត្យមើលលើបញ្ហានេះ តែយ៉ាងណាក៏មិនទាន់ឈានដល់ដំណាក់នេះនៅឡើយទេ។

សម្តេចតេជោ បន្តថា ផែនការនេះ នឹងឈានដល់ជុំទី ២ ឬ ជុំទី ៣ ក្នុងការបញ្ចេញទុនបំរ៉ុងរបស់រដ្ឋ ៥០០ ឬ ៦០០ លានដុល្លារអាមេរិកនេះ ទៅឱ្យធនាគារឯកជនខ្ចី ដោយអត្រាការប្រាក់ទាបហើយប្រើប្រាស់ថវិកានេះ ទៅអោយអ្នកខ្ចីក្នុងអត្រាការប្រាក់ទាបតគ្នា។

សម្តេចតេជោ ហ៊ុន សែន ធ្លាប់បានមានប្រសាសន៍ថា រដ្ឋាភិបាលបានត្រៀមថវិកាបំរ៉ុងប្រមាណ ៨០០ លានដុល្លារអាមេរិក ក្នុងរយៈពេល ៦ខែ ក្នុងជួយសង្គ្រោះសេដ្ឋកិច្ច និងវិស័យឯកជនខណៈដែលប្រទេសកំពុងជួបវិបត្តិនៃការរីករាលដាល់ជំងឺគូវីដ ១៩៕

សម្ដេចតេជោ ហ៊ុន សែន ស្នើឱ្យម្ចាស់អគារមានការយោគយល់លើតម្លៃជួលក្នុងវិស័យឯកជនដូចគ្នា

ដោយ ៖ រ៉ាណេត

ភ្នំពេញ ៖ ស្ថិតនៅក្នុងស្ថានភាពដែលកំពុងតែប្រឈមនឹងឱនភាពសេដ្ឋកិច្ច សម្ដេចតេជោ ហ៊ុន សែន បានអំពាវនាវដល់វិស័យឯកជនដោយស្នើសុំឱ្យមានការយោគយល់ទៅលើផ្នែកឯកជនដូចគ្នា ជាពិសេស លើការជួលទីតាំង និងអគារផ្សេងៗសម្រាប់អាជីវកម្មដែលកំពុងតែប្រឈមនឹងការបាត់បង់ចំណូលនៅក្នុងដំណាក់កាលនេះ។

សម្តេចតេជោ ហ៊ុន សែន បានមានប្រសាសន៍នៅក្នុងពីធីសន្និសីទសារព័ត៌មាន ស្ដីពីការតែងតាំង និងកែសម្រួលសមាសភាពសមាជិករដ្ឋាភិបាល នាថ្ងៃទី ៣០ ខែមីនា ឆ្នាំ ២០២០ នេះ ដោយធ្វើការអំពាវនាវដល់វិស័យឯកជនថា “ខ្ញុំបានស្ដាប់មនុស្សមួយចំនួនដែលបានរកស៊ីជួលអគារជួលទីតាំងគេ ឥឡូវម្ចាស់ដើមជួពេញថ្លៃក្នុងពេលដែលគ្នារកចំណូលអត់បាន ចឹងទេ…សូមកុំកាប់មេមាន់ស្ងោរស៊ី គួរត្រូវរក្សាមេមាន់នេះ ដើម្បីឱ្យថ្ងៃក្រោយមានពង់ មានកូនតទៅទៀត បើកាប់មេមាន់នៅពេលនេះ បានសេចក្ដីថាហាងហ្នឹងគ្នាត្រូវបិត ហើយបិទរហូតគ្មានអ្នកណាជួលទៅថ្ងៃក្រោយ ប៉ុន្តែបើសិនជាអនុគ្រោះឱ្យគ្នា ១ខែ ២ខែ ឬបញ្ចុះថ្លៃឱ្យគ្នា ៥០-៦០ ឬ ៧០ភាគរយ យើងរក្សាអតិថិជននេះឱ្យជួលត្រឡប់មកវិញនៅពេលដែលសភាពការណ៍វាបានរើបំរាស់មកវិញ”។

សម្ដេចតេជោ បានមានប្រសាសន៍បន្តទៀតថា “ការបង់ថ្លៃជួលផ្ទះ ការបង់រំលោះផ្ទះ បង់រំលោះរថយន្ត បង់រំលោះស្អីៗច្រើនណាស់នៅក្នុងប្រទេសយើង គឺគប្បីធ្វើរវាងម្ចាស់ជាមួយនឹងអ្នកបង់រំលោះដោយផ្តល់នូវការយោគយល់ នេះគឺគ្រាន់តែជាការអំពាវនាវទេ”។

សម្ដេចតេជោ ហ៊ុន សែន បានលើកឡើងផងដែរថា រដ្ឋមិនមានសិទ្ធិតម្រូវទៅលើការកំណត់តម្លៃនៃការលក់នៅលើទីផ្សារផ្សេងៗខណៈដែលប្រទេសនៅតែមានស្ថេរភាពល្អ ប៉ុន្តែប្រសិនបើក្នុងស្ថានភាពដែលច្បាប់ត្រូវដាក់ប្រទេសនៅក្នុងភាពប្រកាសអាសន្ន រដ្ឋអាចនឹងកំណត់នូវតម្លៃមុខទំនិញមួយចំនួន ប៉ុន្តែពេលនេះ សេដ្ឋកិច្ចទីផ្សារធម្មតា រដ្ឋអត់មានកំណត់ថ្លៃនោះទេ ត្រឹមតែចរចាថ្លៃឱ្យមានការសម្រសសម្រួលគ្នា ឱ្យមានការយោគយល់គ្នា ៕

សម្តេចតេជោ បញ្ជាឱ្យផ្អាកការនាំអង្ករស និងស្រូវចេញពីកម្ពុជា

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជា បានប្រកាសផ្អាកនាំអង្ករស និងស្រូវចេញទៅក្រៅប្រទេស ដើម្បីសម្រាប់ផ្គត់ ផ្គង់នៅក្នុងស្រុកនៅក្នុងប្រទេសកម្ពុជាក្នុងអំឡុងមានវិបត្តិ និងការផ្ទុះឡើងនូវជំងឺកូវីដ ១៩ ។

សម្តេចតេជោ ហ៊ុន សែន នាយដ្ឋមន្ត្រីនៃកម្ពុជា នៅក្នុងសន្និសីទសារព័ត៌មាន ស្ដីពីការតែងតាំង និងកែសម្រួលសមាសភាពសមាជិករដ្ឋាភិបាល នាថ្ងៃទី ៣០ ខែមីនា ឆ្នាំ ២០២០ នេះ ថា ប្រទេសកម្ពុជាបាននាំអង្ករ និងស្រូវចេញមានតែប្រទេសវៀតណាម និងប្រទេសថៃតែប៉ុណ្ណោះ ។

ជាមួយគ្នានេះ សម្តេតេជោ ហ៊ុន សែន បញ្ជាឱ្យក្រសួងសេដ្ឋកិច្ច និងហិរញ្ញវត្ថុ រៀបចំទំលាក់ថវិកាទៅឱ្យរោងមាស៊ីនកិនស្រូវ ដើម្បីប្រមូលទិញាអង្ករ និងស្រូវពីប្រជាពលរដ្ឋកម្ពុជា និងរក្សាតម្លៃស្រូវ របស់កម្ពុជាផងដែរ។

សម្តេចតេជោបញ្ជាក់ថា បទរបស់សម្តេចតេជោ ហ៊ុន សែន នឹងចាប់ផ្តើមអនុវត្តចាប់ពីវេលាម៉ោង ២៣: ៥៩ ថ្ងៃទី ៥ ខែមេសាឆ្នាំ ២០២០ ខាងមុខនេះ រហូតដល់មានការចេញបទបញ្ជាថ្មី៕

សម្តេចតេជោគ្រោងរៀបចំធ្វើច្បាប់ថ្មីមួយទៀតសម្រាប់ត្រៀមបម្រុងដាក់ប្រទេសក្នុងគ្រាអាសន្ន

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានប្រកាសពីបំណងក្នុងការធ្វើច្បាប់ថ្មីមួយទៀត សម្រាប់ត្រៀមបំរ៉ុង ដើម្បីដាក់ប្រទេសកម្ពុជា ចូលក្នុងគ្រាអាសន្នសម្រាប់ទប់ទល់នឹងការឆ្លងរីករាលដាលនៃជំងឺកូវីដ១៩ដែលកំពុងមានរាតត្បាតជាសកល។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងសន្និសីទសារព័ត៌មាន ស្ដីពីការតែងតាំង និងកែសម្រួលសមាសភាពសមាជិករដ្ឋាភិបាល នាថ្ងៃទី ៣០ ខែមីនា ឆ្នាំ ២០២០ នេះ ថា សេចក្តីព្រាងច្បាប់នេះ នឹងត្រូវប្រកាស នៅថ្ងៃសុក្រ ខាងមុខនេះ ដោយដាក់ឆ្លងគណៈរដ្ឋមន្ត្រី ហើយបញ្ជូនមករដ្ឋសភា ដើម្បីប្រជុំអនុម័តជាការប្រញាប់។

តែយ៉ាងណាក៏ដោយ សម្តេចតេជោថា ការធ្វើច្បាប់ថ្មីនេះ នឹងមិនប្រើប្រាស់ភ្លាមទេ ដោយគ្រាន់តែជាការត្រៀមបម្រុង ក្នុងពេលជំងឺកូវីដ១៩ រីករាលដាលខ្លាំង រហូតដល់យើង មិនអាចគ្រប់គ្រងបាន នៅពេលខាងមុខ។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាធ្លាប់បានមានប្រសាសន៍កាលពីពេលថ្មីៗនេះថា នឹងកំពុងពិចារណា និងសិក្សា មាត្រា ២២នៃច្បាប់រដ្ឋធម្មនុញ ក្នុងការទូលថ្វាយស្នើសុំព្រះរាជានុញ្ញាត ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រកម្ពុជា ដើម្បីដាក់ប្រទេសឱ្យស្ថិតនៅក្នុងគ្រាមានអាសន្ន ខណៈកំណើនជំងឺកូវីដ១៩ កំពុងមានការកើនឡើង។

សម្ដេចតេជោ ថា នៅពេលប្រទេសត្រូវបានដាក់ក្នុងគ្រាអាសន្នហើយ សិទ្ធិស៊ីវិលត្រូវកាត់ផ្តាច់ហើយ។ ម្យ៉ាងទៀត នេះជាវិធានការតឹងរឹង ដើម្បីការពារ កុំឲ្យប្រជាជនកម្ពុជា ឆ្លងជំងឺកូវីដ។

សម្តេចតេជោថ្លែងថា “ខ្ញុំកំពុងឲ្យពិនិត្យនូវលទ្ធភាពប្រើប្រាស់នូវមាត្រា២២នៃរដ្ឋធម្មនុញ្ញ ដើម្បីស្នើសុំព្រះមហាក្សត្រ ដាក់ប្រទេសក្នុងគ្រាមានអាសន្ន។ ខ្ញុំមិនចង់ប្រើទេ ក៏ប៉ុន្តែបើការអំពាវនាវរបស់ខ្ញុំ គ្មានប្រសិទ្ធភាព”។

សម្តេចតេជោបន្ថែមថា “មាត្រា២២ ដែលចែងថា ក្នុងប្រទេសដែលមានមហន្តរាយ ជួបនូវគ្រោះអាសន្ន ព្រះមហាក្សត្រទ្រង់ដាក់ប្រទេសក្នុងគ្រាមានអាសន្ន ដោយមានការឯកភាពពីនាយករដ្ឋមន្ត្រី ពីប្រធានរដ្ឋសភា និងប្រធានព្រឹទ្ធសភា ដូច្នេះខ្ញុំក៏អាចស្នើសុំការឯកភាពពីប្រធានរដ្ឋសភា ពីប្រធានព្រឹទ្ធសភា និងស្នើសុំពីព្រះមហាក្សត្រចេញ ព្រះរាជក្រឹត្យដាក់ប្រទេសក្នុងគ្រាមានអាសន្ន”។

សម្តេចតេជោ ហ៊ុន សែន បានបញ្ជាក់ថា ការដាក់ប្រទេសក្នុងគ្រាមានអាសន្ន ដែលរងផលប៉ះពាល់ដោយជំងឺកូវីដ១៩នេះ មានប្រទេសដទៃបានធ្វើរួចហើយ ដូចជាប្រទេសថៃ ប្រទេសឥណ្ឌាក៏បានប្រកាសរួចហើយ៕

រដ្ឋាភិបាល សម្រេចឱ្យបិទកាស៊ីណូទូទាំងប្រទេស

ដោយ ៖ រ៉ាណេត

ភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានសម្រេចចេញបញ្ជាឱ្យបិទកាស៊ីណូទាំងអស់នៅទូទាំងប្រទេស ដើម្បីជាការទប់ស្កាត់ជំងឺ Covid-19 ដែលកំពុងតែរីករាយដាលនៅពេលបច្ចុប្បន្ន។

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានចេញបញ្ជារបន្ទាន់នៅក្នុងពិធីសន្និសីទសារព័ត៌មានស្ដីពីការតែងតាំង និងកែសម្រួលសមាសភាពសមាជិករដ្ឋាភិបាលកាលពីព្រឹកថ្ងៃទី៣០ ខែមីនា ឆ្នាំ២០២០ នេះថា ដើម្បីទប់ស្កាត់នូវភាពប្រឈមនៃការរីករាលដាលជំងឺ Covid-19 នៅពេលបច្ចុប្បន្ននេះ បានសម្រេចបញ្ជារឱ្យបិទកាស៊ីណូទាំងអស់នៅទាំងប្រទេស។

សម្ដេចតេជោ បានមានប្រសាសន៍ថា “គ្រប់កាស៊ីណូទាំងអស់ នឹងត្រូវបិទនៅត្រឹមថ្ងៃទី១ ខែមេសា ឆ្នាំ២០២០ខាងមុខនេះ ដោយគ្រប់ម្ចាស់កាស៊ីណូត្រូវដោះស្រាយជាមួយបុគ្គលិករបស់ខ្លួន។ ការបិទនេះ គឺគ្រាន់តែជាបិទបណ្តោះអាសន្នតែប៉ុណ្ណោះ ហើយពេលណាមានភាពស្រាកស្រាន្តនឹងអនុញ្ញាតឱ្យមានការធ្វើអាជីវកម្មជាធម្មតាឡើងវិញ”។

នៅក្នុងឱកាសនេះ សម្ដេចតេជោ ក៏បានបញ្ជាក់សាជាថ្មីផងដែរថា រដ្ឋាភិបាលមិនមានគម្រោងបិទប្រទេស បិតទក្រុង បិទផ្សារ ឬហាងកាហ្វេ ដូចពាក្យចចាមអារាម ដែលកំពុងផ្សព្វផ្សាយដោយគ្មានប្រភពច្បាស់លាស់ពីជនបំពុលសង្គមមួយក្រុមនោះទេ៕

រដ្ឋសភាសម្រេចបោះឆ្នោតផ្តល់សេចក្តីទុកចិត្តកែសម្រួលសមាសភាពរាជរដ្ឋាភិបាល

ដោយ វុត្ថា

ភ្នំពេញ៖ រដ្ឋសភាបានបោះឆ្នោតផ្តល់សេចក្តីទុកចិត្តលើការតែងតាំង និងកែសម្រួលសមាសភាពរាជរដ្ឋាភិបាលកម្ពុជា៩ រូប ដែលស្នើតែងតាំង និងកែសម្រួលដោយ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

រដ្ឋសភាបានបោះឆ្នោតផ្តល់សេចក្តីទុកចិត្ត នៅក្នុងសម័យប្រជុំវិសាមញ្ញ នៃរដ្ឋសភា នាព្រឹកថ្ងៃទី៣០ ខែមីនា ឆ្នាំ២០២០នេះបានធ្វើឡើងក្រោមអធិបតីភាព សម្តេច ហេង សំរិន ប្រធានរដ្ឋសភា រួមទាំងតំណាងរាស្ត្រសរុបចំនួន១២១រូប។

សម្រាប់តំណែងរដ្ឋមន្ត្រីដែលរដ្ឋសភាបោះឆ្នោតផ្តល់សេចក្តីទុកចិត្តនេះមាន៖

លោក ចម ប្រសិទ្ធ ជារដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍

លោក កើត រិទ្ធ ជារដ្ឋមន្ត្រីក្រសួងយុត្តិធម៌ ជំនួសលោក អង្គ វង្សវឌ្ឍានា

លោក ជា វ៉ាន់ដេត ជារដ្ឋមន្ត្រីក្រសួងប្រៃសណីយ៍ និងទូរគមនាគមន៍ ជំនួសលោក ត្រាំ អ៉ីវតឹក

លោក ឈិត សុខុន ជារដ្ឋមន្ត្រីក្រសួងធម្មការ និងសាសនា ជំនួសលោក ហ៊ឹម ឆែម

លោក ព្រំ សុខា ជារដ្ឋមន្ត្រីក្រសួងមុខងារសាធារណៈ ជំនួសលោក ពេជ្រ ប៊ុនធិន

* សម្រាប់តំណែងទេសរដ្ឋមន្ត្រីដែលរដ្ឋសភាបោះឆ្នោតផ្តល់សេចក្តីទុកចិត្តនេះមាន

លោក ចម ប្រសិទ្ធ ជាទេសរដ្ឋមន្ត្រី (រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍)

លោក ហ៊ឹម ឆែម ជាទេសរដ្ឋមន្ត្រី ទទួលបន្ទុកបេសកកម្មពិសេស

លោក អង្គ វង្សវឌ្ឍានា ជាទេសរដ្ឋមន្ត្រី ទទួលបន្ទុកបេសកកម្មពិសេស

លោក ត្រាំ អ៉ីវតឹក ជាទេសរដ្ឋមន្ត្រី ទទួលបន្ទុកបេសកកម្មពិសេស

លោក ពេជ្រ ប៊ុនធិន ជាទេសរដ្ឋមន្ត្រី ទទួលបន្ទុកបេសកកម្មពិសេស

គណៈរដ្ឋមន្ត្រីអាណត្តិទី០៦ ដែលដឹកនាំដោយ សម្តេចតេជោ ហ៊ុន សែន ត្រូវបានបង្កើតឡើង កាលពីថ្ងៃទី០៦ ខែកញ្ញា ឆ្នាំ២០១៨ បន្ទាប់ពីគណបក្សប្រជាជនកម្ពុជា បានឈ្នះក្នុងការបោះឆ្នោតជាតិជ្រើសតាំងតំណាងរាស្ត្រ អាណត្តិទី០៦ ដោយទទួលបានអាសនៈទាំងអស់ក្នុងរដ្ឋសភា។ រហូតមកដល់ពេលនេះ គណៈរដ្ឋមន្ត្រីអាណត្តិថ្មីនោះ មានសមាសភាពសរុបចំនួន៤៩រូប ក្នុងនោះមាននាយករដ្ឋមន្ត្រី១រូប ឧបនាយករដ្ឋមន្ត្រី១០រូប ទេសរដ្ឋមន្ត្រី១៩រូប (បូកថ្មី៣) និងរដ្ឋមន្ត្រី ២៩រូបជាដើម៕

រដ្ឋាភិបាលហ្វីលីពីនស្វែងរកជំនួយអង្ករចំនួន ៣០ម៉ឺនតោនបន្ថែមពីសមាជិកអាស៊ាន អំឡុងពេលវិបត្តិ COVID-19

ដោយ ប៊ី

ភ្នំពេញ៖ ប្រទេសហ្វីលីពីនកំពុងស្វែងរកជំនួយ ពីសមាជិកអាស៊ានដទៃទៀតសម្រាប់ការនាំចូលអង្ករចំនួន ៣០០,០០០តោនបន្ថែមទៀត តាមរយៈកិច្ចព្រមព្រៀងរវាងរ ដ្ឋាភិបាល និងរដ្ឋាភិបាល។ នេះបើយោងតាមអ្នកនាំពាក្យនៃក្រុមការងារអន្តរទីភ្នាក់ងារស្តីពីអ្នកប្រយុទ្ធប្រឆាំងនឹង COVID-19 និងលេខាធិការខុទ្ទកាល័យលោក Karlo Nograles កាលពីចុងសប្តាហ៍មុន។

យោងតាមលោក Nograles ក្រុមការងារអន្តរទីភ្នាក់ងារស្តីពី អ្នកប្រយុទ្ធប្រឆាំង បានយល់ព្រមលើសំណើរបស់ក្រសួងកសិកម្ម ក្នុងអំឡុងពេលនៃកិច្ចប្រជុំរបស់ពួកគេកាលពីចុងសប្តាហ៍នេះ ដែលក៏បានអំពាវនាវដល់ដៃគូពាណិជ្ជកម្មអាស៊ាន ឱ្យជៀសវាងពីការដាក់ចេញនូវវិធានការរឹតត្បិតពាណិជ្ជកម្ម។

លោក Nograles មានប្រសាសន៍ថា “ក្រសួងកសិកម្ម រួមទាំងក្រសួងពាក់ព័ន្ធនឹងធ្វើការជាមួយដៃគូពាណិជ្ជកម្មអាស៊ាន និងលើកទឹកចិត្តពួកគេឱ្យជៀសវាងពីការដាក់ចេញនូវវិធានការរឹតត្បិតពាណិជ្ជកម្ម ដើម្បីធានាថាកិច្ចសន្យាផ្គត់ផ្គង់ ដែលមានស្រាប់ត្រូវបានផ្តល់អាទិភាព។

រដ្ឋាភិបាលហ្វីលីពីន បានប្រគល់ភារកិច្ចឱ្យក្រសួងកសិកម្ម និងទីភ្នាក់ងារពាក់ព័ន្ធធ្វើការលើការនាំចូលអង្ករចំនួន៣០ម៉ឺនតោនបន្ថែមទៀត តាមរយៈការរៀបចំរដ្ឋាភិបាល និងរដ្ឋាភិបាល ជាមួយដៃគូពាណិជ្ជកម្មអាស៊ាននិង ឬពីប្រភពទាំងអស់រួមទាំងប្រទេសឥណ្ឌា និងប៉ាគីស្ថានក្នុងអត្រាពន្ធកម្រិតអាស៊ាន។

ដើម្បីធានាបាននូវភាពគ្រប់គ្រាន់ នៃស្បៀងអាហារនៅក្នុងប្រទេស ក្នុងរយៈពេលប៉ុន្មានសប្តាហ៍ខាងមុខនេះ ខណៈពេលដែលប្រទេសនេះ ស្ថិតក្នុងស្ថានភាពគ្រោះមហន្តរាយ។

លោក Nograles បាននិយាយថា ក្រុមការងារបានដឹកនាំក្រុមហ៊ុន LGUs ដើម្បីអនុញ្ញាតឱ្យធ្វើកសិកម្ម និងនេសាទបន្ត និងអនុញ្ញាតឱ្យមានចរាចរ ដោយសេរីនៃការផ្គត់ផ្គង់ទាំងអស់ ដែលត្រូវបានប្រើសម្រាប់វិស័យកសិកម្ម រួមទាំងការវេចខ្ចប់ស្បៀងអាហារ និងសម្ភារៈផលិតកម្ម។

រដ្ឋាភិបាលក៏បានដឹកនាំការធ្វើឱ្យសកម្មឡើងវិញ នៃក្រុមប្រឹក្សាសម្របសម្រួលតម្លៃក្នុងស្រុក និងសម្រាប់ក្រុមហ៊ុន LGUs និងម្ចាស់ផ្សារ ដើម្បីអនុវត្តការបង្កកតម្លៃយ៉ាងតឹងរឹង និងស្នើឱ្យមានការអនុវត្តន៍នូវតម្លៃលក់រាយ (SRP) ដោយផ្អែកលើអនុស្សារណៈសារាចរ៧។

ដើម្បីអនុវត្តន៍ពង្រីក និងបង្កើនភាពគ្រប់គ្រាន់ស្បៀងអាហារ នៅក្នុងប្រទេសរដ្ឋាភិបាលបានត្រៀមថវិកាចំនួន៣១ពាន់លានប៉េសូ (រូបិយវត្ថុហ្វីលីពីន)សម្រាប់ប្រយុទ្ធប្រឆាំងនឹងជំងឺ COVID-19៕

ក្រុមហ៊ុន Huawei គ្រោងបោះទុនវិនិយោគចំនួន ១,៥ពាន់លានដុល្លារសម្រាប់ប្រព័ន្ធអេកូឡូស៊ីកុំព្យូទ័រ

ដោយ វុត្ថា

ប្រទេសចិន៖ ក្រុមហ៊ុនបច្ចេកវិទ្យាយក្សចិន Huawei Technologies គ្រោងបោះទុនវិនិយោគចំនួន១,៥ពាន់លានដុល្លារអាមេរិក ក្នុងរយៈពេល៥ឆ្នាំខាងមុខ ដោយផ្តោតលើអ្នកអភិវឌ្ឍន៍ចំនួន៥លាននាក់ ដើម្បីអភិវឌ្ឍន៍នៅក្នុងប្រព័ន្ធអេកូឡូស៊ីកុំព្យូទ័រ Kunpeng របស់ខ្លួន។

យោងតាមការចុះផ្សាយរបស់សារព័ត៌មាន Xinhou ចុះផ្សាយកាលពីចុងសប្តាហ៍កន្លងមកបានឱ្យដឹងថា ក្រុមហ៊ុននឹងវិនិយោគទឹកប្រាក់២០០លានដុល្លារអាមេរិ កពេញមួយឆ្នាំ២០២០ ដើម្បីគាំទ្រដល់គម្រោងសាកលវិទ្យាល័យ គម្រោងនៃការចាប់ផ្តើមអាជីវកម្ម គម្រោងអ្នកអភិវឌ្ឍន៍បុគ្គល និងដៃគូរបស់ខ្លួននៅក្នុងឧស្សាហកម្មកុំព្យូរទ័រ Kunpeng ។

លោក Hou Jinlong ប្រធានក្រុមអាជីវកម្ម cloud and AI របស់ក្រុមហ៊ុន Huawei បានឱ្យដឹងនៅក្នុងសន្និសីទស្តីពី អ្នកអភិវឌ្ឍន៍ស្មាតហ្វូន Huawei ឆ្នាំ ២០២០ កាលពីចុងសប្តាហ៍កន្លមកនេះ ដែលបានធ្វើឡើងតាមអ៊ីនធើណិត ជាព្រឹត្តិការណ៍ប្រចាំឆ្នាំរបស់ក្រុមហ៊ុន សម្រាប់ក្រុមហ៊ុនអភិវឌ្ឍន៍ពិភពលោក ដែលត្រូវបានពន្យារពេលអស់ជាច្រើនសប្តាហ៍ដោយសារតែការផ្ទុះឡើងនៃ ជំងឺ COVID-19 ។

ក្រុមហ៊ុននេះ ក៏បានប្រកាសពីការសហការជាមួយ ក្រុមហ៊ុនបច្ចេកវិទ្យាយក្សមួយទៀតឈ្មោះថា Tencent ដែលមានមូលដ្ឋាននៅទីក្រុង Shenzhen ដោយប្រើថាមពលកុំព្យូទ័ររបស់ខ្លួន Kunpeng ដើម្បីគាំទ្រដល់វេទិកាហ្គេម Tencent’s GameMatrix។

ក្រុមហ៊ុនទាំងពីរ នឹងបង្កើតមន្ទីរពិសោធន៍ច្នៃប្រឌិតរួមគ្នាមួយ ដែលផ្តោតលើកិច្ចសហប្រតិបត្តិការ នៅក្នុងហ្គេមពពកចល័ត ម៉ាស៊ីនហ្គេម និងបច្ចេកវិទ្យាទំនើប។ នេះបើយោងតាមលោក Ma Xiaoyi អនុប្រធានជាន់ខ្ពស់របស់ក្រុមហ៊ុន Tencent ។

លោក Ma Xiaoyi បាននិយាយថា “នៅក្រុមហ៊ុន Tencent យើងបានបង្កើតវេទិកា GameMatrix ដែលត្រូវបានរចនាឡើងសម្រាប់ហ្គេមពពកចល័ត។ លោកបន្ថែមថា “នៅពេលអនាគត យើងនឹងប្រើប្រាស់ប្រព័ន្ធដំណើរការក្រុមហ៊ុន Huawei Kunpeng ដើម្បីបង្កើតដំណោះស្រាយហ្គេមពពក តាមទូរស័ព្ទចល័ត ដែលមានគុណភាពនិងចំណាយតិច”។

ការសាងសង់ហេដ្ឋារចនាសម្ព័ន្ធថ្មីដូចជា 5G, AI និងអ៊ីនធឺណេតឧស្សាហកម្មបានចាប់ផ្តើមបង្កើនល្បឿន នៅក្នុងប្រទេសចិនដោយមានក្រុមហ៊ុនធំៗ ដូចជា ក្រុមហ៊ុន Huawei, Alibaba, Tencent និង Suning.com ធ្វើប្លង់មុនដើម្បីចាប់យកទីផ្សារ៕

ក្រុមហ៊ុន Alibaba ផ្តល់ប្រអប់សារធាតុតេស្តរកជម្ងឺវីរុស COVID-19 ចំនួន ២០,០០០សម្រាប់ដល់កម្ពុជា

ដោយ វុត្ថា

ភ្នំពេញ៖ ក្រុមហ៊ុន Alibaba បានប្រគល់ប្រអប់សារធាតុតេស្ត រកជម្ងឺវីរុស COVID-19(Detection Reagent)ចំនួន ២០,០០០សម្រាប់ ដែលផ្តល់ដោយមូលនិធិ Jack Ma និងមូលនិធិ Alibaba ដល់ក្រសួងសុខាភិបាលកម្ពុជា ដើម្បីប្រយុទ្ធប្រឆាំងជំងឺកូវីដ ១៩ ដែលកំពុងរាតត្បាតជាសកល ដោយក្នុងនោះកម្ពុជាក៏កំពុងឈមផងដែរ។

លោក Wang Wentian ឯកអគ្គរដ្ឋទូតចិនប្រចាំកម្ពុជា បានឱ្យដឹងនៅក្នុងពិធីប្រគ ល់-ទទួលកាលពីចុងសប្តាយ៍កន្លងមកនេះថា ចិន និងកម្ពុជាជាសហគមន៍ជោគវាសនារួមដែលរួមសុខរួមទុក្ខជាមួយគ្នា ក៏ជាបងប្អូនល្អដែលប្រៀបដូចដៃនិងជើង ហើយភាគីចិនបច្ចុប្បន្ននេះក៏មានអារម្មណ៍ដូចភាគីកម្ពុជាដែរ។

លោកបន្តថា “ដើម្បីជួយបង្កើនសមត្ថភាពពិនិត្យរកជម្ងឺវីរុស COVID-19 ស្ថានទូតចិនប្រចាំកម្ពុជា បានសម្របសម្រួលជាមួយមូលនិធិ Jack Ma និងមូលនិធិ Alibaba ជាបន្ទាន់ ដើម្បីធ្វើការផ្តល់នូវសារធាតុតេស្តរកជម្ងឺវីរុស មួយចំនួនជូនដល់ភាគីកម្ពុជា។លោកបន្តថា “យើងសង្ឃឹមថា វាអាចជួយជាកម្លាំងគាំទ្រជូនដល់ភាគីកម្ពុជា ក្នុងការប្រយុទ្ធប្រឆាំងនឹងជម្ងឺវីរុសប្រភេទថ្មីមួយនេះ។

លោកទូតបន្ថែមថា ភាគីចិននឹងបន្តផ្តល់រាល់ជំនួយ ទៅតាមលទ្ធភាពជូនដល់ភាគីកម្ពុជា ជួយជាកម្លាំងទាំងស្រុងដល់ភាគីកម្ពុជា ក្នុងការប្រយុទ្ធប្រឆាំងយកជម្នះជាមួយនឹងជម្ងឺវីរុសប្រភេទថ្មីនេះ។

លោកវេជ្ជបណ្ឌិតម៉ម ប៊ុន ហេង រដ្ឋមន្ត្រីក្រសួងសុខាភិបាលកម្ពុជាបានឱ្យដឹងថា ក្រោយពីកម្ពុជា មានការផ្ទុះឡើងនូវជម្ងឺវីរុស COVID-19 ភាគីចិនបានជំនួយសម្ភារៈប្រយុទ្ធប្រឆាំងនឹងជម្ងឺវីរុសជាច្រើន និងបានចាត់ក្រុមអ្នកជំនាញវេជ្ជសាស្ត្រចិន នេះបានជួយបង្កើនជំនឿចិត្ត ក្នុងការប្រយុទ្ធប្រឆាំងនឹងជម្ងឺវីរុសជូនដល់កម្ពុជា។

លោកបន្តថា “ភាគីកម្ពុជានឹងចងចាំរាល់ការជួយរបស់ភាគីចិន ក្នុងក្រអៅបេះដូង នឹងសហការទំនាក់ទំនងជាមួយភាគីចិនយ៉ាងស្អិតរមួត ដើម្បីយកជម្នះលើកិច្ចប្រយុទ្ធប្រឆាំងនឹងជម្ងឺវីរុសក្នុងពេលឆាប់ៗនេះ។

គិតត្រឹមថ្ងៃទី២៩ ខែមីនា ឆ្នាំ ២០២០នេះ កម្ពុជា បានរកឃើញអ្នកឆ្លងមេរោគកូវីដ១៩ (COVID-19) ថ្មីចំនួនតែ១នាក់បន្ថែមទៀត ធ្វើឱ្យអ្នកឆ្លងជំងឺកូវីដ១៩ នៅក្នុងប្រទេសកម្ពុជាបានឡើងដល់១០៣នាក់ហើយ ខណៈមានអ្នកជាសះស្បើយពីជំងឺកូវីដ១៩ថ្មីរហូតដល់ចំនួន៨នាក់ ធ្វើឲ្យចំនួនសរុបកើនដល់២១នាក់ និងកំពុងសម្រាកព្យាបាល៨២នាក់ នៃអ្នកឆ្លងសរុប១០៣នាក់៕

ADB ព្យាករណ៍ថាកម្ពុជាអាចប្រឈមការបាត់បង់សេដ្ឋកិច្ចជិត ៤០០លានដុល្លារ

ដោយ ហ្សូលី

ភ្នំពេញ៖ ធនាគារអភិវឌ្ឍអាស៊ី (ADB) បានព្យាករណ៍ថា កម្ពុជាអាចប្រឈមនឹងការខាតបង់សេដ្ឋកិច្ចធ្ងន់ធ្ងរ បើគិតជាទឹកប្រាក់ដល់ទៅជិត ៤០០លានដុល្លារ ដោយសារតែផលប៉ះពាល់នៃកូវីដ១៩ នៅដើមឆ្នាំ២០២០នេះ។

កម្ពុជាបានរងឥទ្ធិពលសេដ្ឋកិច្ច ដែលបណ្តាលមកពីមេរោគរាតត្បាត ដែលធនាគារអភិវឌ្ឍអាស៊ីបានព្យាករណ៍កាលពីសប្តាហ៍មុននេះថា កម្ពុជាអាចក្លាយជាប្រទេសមួយក្នុងចំណោមបណ្តារប្រទេសនៅតំបន់អាស៊ាន ដែលរងគ្រោះការខាតបង់សេដ្ឋកិច្ចប្រមាណជា៣៩០លានដុល្លារ។

រដ្ឋាភិបាលកម្ពុជាបានទម្លាក់ការព្យាករណ៍របស់ខ្លួនដែលថា កំណើនសេដ្ឋកិច្ចកម្ពុជាក្នុងឆ្នាំ២០២០ មកនៅត្រឹមកម្រិត៦.១%ប៉ុណ្ណោះ ដែលកាលពីមុនបានព្យាករណ៍ថា ៦.៥%។ បញ្ហានេះគឺបណ្តាលមកពីកត្តាអាកាសធាតុ ភូមិសាស្ត្រនយោបាយនិងជំងឺរាតត្បាត។

លោកច័ន្ទ សុផល នាយកមជ្ឈមណ្ឌលសិក្សាគោលនយោបាយ បានថ្លែងឱ្យដឹងថា សេដ្ឋកិច្ចកម្ពុជាធ្លាក់ចុះព្រោះតែជំងឺកូវីដ១៩ ហើយស្ថានភាពអាចប្រែប្រួលដែលអាចខាតបង់ច្រើនជាងអ្វីដែល ADB ព្យាករណ៍ទៅទៀត។

លោកនាយករូបនេះបានប្រមើលថា ទំហំនៃផលប៉ះពាល់នៃជំងឺកូវីដ១៩នេះ អាចធ្វើឱ្យកម្ពុជាខាតបង់ប្រហែល១ពាន់លានដុល្លារ។

ធនាគារអភិវឌ្ឍអាស៊ី ADB មិនមែនព្យាករណ៍សេដ្ឋកិច្ចរបស់ប្រទេសកម្ពុជា តែមួយមុខនោះទេ តែក៏បានព្យាករណ៍បណ្តារប្រទេសទាំងអស់នៅតំបន់អាស៊ាន អំពីទំហំទឹកប្រាក់ដែលខាតបង់។ ទិន្នផលសរុបប្រទេសថៃ អាចបាត់បង់ជាង៥ពាន់លានដុល្លារ ឬទិន្នផលសរុបធ្លាក់ចុះសល់ត្រឹម១.១១%។ រីឯសិង្ហបុរីវិញរងផលប៉ះពាល់ ជាង១ពាន់លានដុល្លារ និងវៀតណាមវិញក៏ជាង១ពាន់លានដុល្លារផងដែរ។

ទោះបីជាយ៉ាងណា រដ្ឋាភិបាលកម្ពុជាដែលមានសម្តេចតេជាហ៊ុន សែន ជាប្រមុខដឹកនាំប្រទេស បានរៀបចំខ្លួនរួចជាស្រេចអំពីការខាតបង់សេដ្ឋកិច្ច ដោយសម្តេចបានចាត់វិធានការឱ្យរដ្ឋាភិបាល ត្រៀមទឹកប្រាក់ប្រមាណពី៨០០លានដុល្លារ ដល់២ពាន់លានដុល្លារ សម្រាប់ទប់ទល់នូវផលប៉ះពាល់សេដ្ឋកិច្ច ដែលក្នុងនោះថវិកា៣០លានដុល្លារត្រូវឧបត្ថម្ភដល់វិស័យសុខាភិបាល ដើម្បីទប់ទល់ការរាតត្បាតនៃជំងឺកូវីដ១៩ ៕

(VNA)