ដោយៈ រ៉ាណេត

ភ្នំពេញៈ ភ្ជាប់ទៅនឹងគម្រោងអភិវឌ្ឍន៍ដ៏ធំ របស់ក្រុមហ៊ុនកាណាឌីយ៉ាគ្រុប ដែលគ្រោងបង្កើតតំបន់សេដ្ឋកិច្ចពិសេស នៅតំបន់ផ្លូវជាតិលេខ៥១ នៅលើផ្ទៃដីទំហំ៥០០ហិកតា ត្រូវបានអ្នកជំនាញក្នុងវិស័យអចលនទ្រព្យលើកឡើងថា គឺជាការចូលរួមចំណែកដ៏ធំក្នុងការអភិវឌ្ឍន៍តំបន់នេះ ឱ្យកាន់តែមានសក្ដានុពលខ្ពស់។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍កាលពីព្រឹកថ្ងៃទី១៤ ខែមីនា ឆ្នាំ២០២០ថា តំបន់ផ្លូវជាតិលេខ៥១ គឺមានគម្រោងអភិវឌ្ឍន៍ ដែលស្ថិតនៅក្នុងប្លង់គោលរបស់រាជរដ្ឋាភិបាលជាច្រើន បន្ថែមពីលើគម្រោងអភិវឌ្ឍន៍របស់វិស័យឯកជន។

លោកបានបញ្ជាក់ថា“គម្រោងអភិវឌ្ឍន៍ជាច្រើន នៅក្នុងប្លង់គោលរបស់រដ្ឋាភិបាលនៅផ្លូវជាតិ៥១ នឹងចាប់ផ្ដើមបង្ហាញរូបរាងជាបណ្តើរៗ ជាពិសេសពាក់ព័ន្ធទៅនឹងវិស័យឧស្សាហកម្មរោងចក្រ ស្របទៅនឹងគោលនយោបាយរបស់រដ្ឋាភិបាល ដែលបានដាក់ចេញឱ្យអនុវត្តន៍”។ លោកបន្ថែមថា “តានគោលការណ៍របស់រដ្ឋាភិបាល នឹងបង្វែររោងចក្រចេញពីក្រុងភ្នំពេញ ទៅតាំងនៅតំបន់ជាយក្រុងតាមលទ្ធភាព ដែលអាចធ្វើទៅបាន ដែលក្នុងនោះតំបន់ផ្លូវជាតិលេខ៥១ ស្ថិតនៅក្នុងតំបន់ដែលមានអាទិភាព និងមានសក្ដានុពលក្នុងរយៈពេលយូរ ដោយសារតែកត្តាភូមិសាស្ត្រ មានអំណោ​យផលលើការដឹកជញ្ជូន”។

លោកបន្តថា ពាក់ព័ន្ធទៅនឹងគម្រោងវិនិយោគ បង្កើតតំបន់សេដ្ឋកិច្ចពិសេសដូចបានលើកឡើងខាងលើនេះ គឺជាការវិនិយោគដ៏ត្រឹមត្រូវ និងស្របទៅនឹងគោលនយោ​បា​យរបស់រដ្ឋាភិបាល ហើយវានឹងជួយចូលរួមក្នុងការអភិវឌ្ឍតំបន់នេះ ឱ្យកាន់តែមានសក្ដានុពលខ្ពស់ និងជះឥទ្ធិពលទៅលើវិស័យលំនៅដ្ឋានផងដែរ ជាពិសេសលំនៅដ្ឋានស្នាក់នៅសម្រាប់បណ្តាកម្មករ-កម្មការិនីដែលបម្រើការងារនៅក្នុងវិស័យឧស្សាហកម្ម។

អគ្គនាយកក្រុមហ៊ុន Century21 Fortuna Investment លោក វ៉ា វីរៈ បានមានប្រសាសន៍ថា តំបន់ផ្លូវ៥១ បើប្រៀបធៀបជាមួយតំបន់ជាយក្រុងដទៃទៀត ត្រូវបានអ្នកជំនាញអះអាងថា មានសក្ដានុពលជាងគេ ដោយសារតែតំបន់នេះភាគច្រើនមានការអភិ​វឌ្ឍស្រាប់ និងមានប្រជាជនរស់នៅច្រើន ហើយអ្វីដែលជាភាពទាក់ទាញ និងធ្វើឱ្យបណ្តាអ្នកវិនិយោគចូលទៅអភិវឌ្ឍន៍តំបន់នេះ ដោយសារតែកត្តាភូមិសាស្ត្រ ហេដ្ឋារចនាសម្ព័ន្ធមានភាពល្អប្រសើរ ងាយស្រួលក្នុងការធ្វើចរាចរណ៍ និងដឹកជញ្ជូនភ្ជាប់ទៅកាន់ផ្លូវជាតិលេខ៤ ផ្លូវជាតិលេខ៥ ផ្លូវជាតិលេខ៤១ឆ្ពោះទៅកាន់ផ្លូវជាតិលេខ៣ ដែលសុទ្ធតែជាផ្លូវសំខាន់ៗសម្រាប់សេដ្ឋកិច្ច។

លោកបានបន្តទៀតថា “នៅពេលដែលមានការអភិវឌ្ឍ ជាពិសេសវិស័យឧស្សាហកម្ម វានឹងជម្រុញឱ្យការអភិវឌ្ឍលើវិស័យលំនៅដ្ឋានកើតមានឡើង ដែលជាកត្តាធ្វើឱ្យតម្រូវការនៃការប្រើប្រាស់ដីកើតមាន ហើយតម្លៃដីធ្លីក៏កើនឡើងខ្ពស់ផងដែរ”។ លោកបញ្ជាក់ថា “សម្រាប់ពេលនេះ វានៅតែជាឱកាសសម្រាប់អ្នកវិនិយោគក្នុងវិស័យដីធ្លី និងលំនៅដ្ឋានកម្រិតមធ្យម និងក្រោមមធ្យមនៅឡើយ ដោយសារតែតែតម្លៃដីនៅមានកម្រិតនៅឡើយ”។

ក្នុងកិច្ចសម្ភាសន៍ដល់ទស្សនាវដ្តីអចលនទ្រព្យ​ កាលពីថ្ងៃទី១៣ មិនាកន្លងមកនេះ ប្រធានក្រុមប្រឹក្សាភិបាលនៃកាណាឌីយ៉ាគ្រុប អ្នកឧកញ៉ា ពុង ឃាវសែ បានមានប្រសាសន៍ថា អ្នកឧកញ៉ា នឹងបន្តបណ្តាក់ទុនយ៉ាងសន្ឋឹកសន្ឋាប់បន្ថែមទៀតនាពេលខាងមុខ។

អ្នកឧកញ៉ា ពុង ឃាវសែ ថ្លែងថា “ចំពោះខ្ញុំដែលជាវិនិយោគិនក្នុងស្រុក ខ្ញុំនឹងបន្តបណ្តាក់ទុនយ៉ាងសន្ឋឹកសន្ឋាប់បន្ថែមទៀត ដើម្បីធ្វើការអភិវឌ្ឍគម្រោងជាច្រើនទៀតដែរ។ ដូចជា គម្រោងអាកាសយានដ្ឋានអន្តរជាតិភ្នំពេញថ្មី តំបន់សេដ្ឋកិច្ចពិសេសដែលមានទំហំដីប្រមាណ៥០០ហិកតានៅជាប់ផ្លូវជាតិ៥១ និងគម្រោងអភិវឌ្ឍលំនៅឋាន និងពាណិ​ជ្ជកម្ម នៅកោះនរារិ៍ និងសាលពិព័រណ៍អន្តរជាតិជ្រោយចង្វាជាដើម”។

អ្នកឧកញ៉ាបានបន្តថា ប្រទេសកម្ពុជាក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន បានធ្វើឲ្យសេដ្ឋកិច្ច និងការអភិវឌ្ឍរីកចម្រើនជាពិសេសមានសន្តិភាព និង ស្ថេរភាពនយោបាយ៕

ដោយវុត្ថា

ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសសាងសង់ស្ពានបេឡេ ១ កន្លែងទៀត ឆ្លងកាត់ស្ទឹងសង្កែដែលស្ថិតនៅភូមិសសរពក ឃុំកន្ទឺ១ ស្រុកបាណន់ ខេត្តបាត់ដំបង ដើម្បីសម្រួលដល់ការធ្វើដំណើរ និងដឹកជញ្ជូនផលិផលកសិកម្មរបស់ប្រជាពលរដ្ឋនៅក្នុងតំបន់នេះ។

សម្តេចក្រឡាហោម ស ខេង នៅក្នុងពិពីចុះពិនិត្យអគារសិក្សាវិទ្យាល័យកន្ទឺ២ អគារសាលាមត្តេយ្យសិក្សាស្រុកបាណន់ កសិដ្ឋានចិញ្ចឹមគោយកសាច់ នៅឃុំឈើទាលនៅក្នុងខេត្តបាត់ដំបងកាលពីថ្ងៃទី ១៣ ខែមីនា ម្សិលមិញនេះ បានប្រកាសថានឹងសាងសង់ស្ពានបេឡេនេះនៅពេលឆាប់ៗខាងមុខនេះ។ តែយ៉ាងណាក៏ដោយ សម្តេចមិនបញ្ជាក់ពេលពេលវា និងថវិកាគ្រោងចំណាយលើការសាងស្ពាននេះនៅឡើយទេ។

លោក ម៉ៃ វីរៈ ប្រជាពលរដ្ឋដែលរស់ក្នុងស្រុកបាណន់ បានសម្តែងការត្រេកអរនៅពេលដែលសម្តេចក្រឡាហោម ស ខេងប្រកាសសាងសង់ស្ពានបេឡេឆ្លងកាត់ស្ទឹងសង្កែនេះ ព្រោះតំបន់នេះមានស្ពានដែរតែមានសភាពចាស់ដែលធ្វើឱ្យមានការលំបាក់ធ្វើដំណើរ ដែលអាចបង្កជាយថាហេតុណាមួយកើតឡើងដល់ប្រពលរដ្ឋនៅក្នុងតំបន់នេះ។

លោកបន្តថា តំបន់នេះ មានប្រជាពលរដ្ឋរស់នៅច្រើន និងមានចរាចរណ៍មានភាពមមាញឹកខ្លាំង ដោយសារតែមានការដឹកញ្ជូនទំនិញ និង ផលិផលកសិកម្មផ្សេងៗទៅដាក់នៅក្នុងទីផ្សារនានានៅក្នុងខេត្ត និងក្រៅខេត្ត។នៅពេលដែលមានស្ពាននេះ នេះ កើតឡើងនឹងជួយសម្រួលបន្ថែមទៀតដល់ការដឹកជញ្ជូន និងធ្វើដំណើរ។

បើតាម លោក ម៉ៃ វីរៈ បានប៉ាន់ស្មានថា ចំងាយស្ពានស្ទឹកសង្កែដែលនឹងត្រូវសាងសង់ស្ពានបេឡេនេះ មានប្រវែងប្រមាណជាង ១០០ ម៉ែត្រ ខណៈបច្ចុប្បន្នមានស្ពាន ២ កន្លែងគឺស្ពានយោល១ និងបេឡេ១ ដែលមិនឆ្លើយទៅនឹងតម្រូវការដឹកជញ្ជូនឆ្លងកាត់ និងធ្វើដំណើររបស់ប្រជាពលរដ្ឋនៅក្នុងតំបន់នេះ។

បច្ចុប្បន្ននេះ រដ្ឋបាលខេត្តបាត់ដំបងបាននឹងកំពុងសាងសង់ស្ពានឆ្លងស្ទឹងសង្កែថ្មីមួយទៀតនៅក្នុងក្រុងបាត់ដំបងជំនួយឱ្យស្ពានថ្មចាស់ដែលមានសភាពទ្រុឌទ្រម ស្របតាមការណែនាំរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕

ដោយ ហ្សូលី

អាស៊ីៈ នៅដើមឆ្នាំ២០២០នេះ វិស័យអចនទ្រព្យនៅក្នុងតំបន់អាស៊ី នឹងនៅតែមានភាពរីកចម្រើនដដែល បើទោះបីជាមានឧបសគ្គជាច្រើន បានកើតឡើងមកលើវិស័យនេះ និងជះឥទ្ធិពលមកលើសេដ្ឋកិច្ចអាស៊ីក៏ដោយ។

សម្រាប់ទីផ្សារអចលនទ្រព្យ ការជះឥទ្ធិពលហាក់បីដូចជាមានការឡើងចុះ មិនថាផ្សារលក់រាយ បដិសណ្ឋារកិច្ចនោះទេ នៅឆ្នាំ២០២០ វាបានផ្តល់ជាជាសញ្ញា ព្រមជាមួយនឹងតម្លៃវិជ្ជមានដែលអនុញ្ញាតឱ្យអ្នកវិនិយោគ ព្រមទាំងក្រុមហ៊ុនអចលនទ្រព្យនានាត្រៀមខ្លួនក្នុងការអភិវឌ្ឍវិស័យនេះជាបន្ត។

ជាក់ស្តែង បន្ទាប់ពីប្រធានាធិបតីសិង្ហបុរីបានថ្លែងសុន្ទរកថា កាលពីថ្ងៃទី ១២ មីនា ឆ្នាំ២០២០ អំពីវិធានការទប់ស្កាត់ និងការត្រៀមខ្លួនរួចជាស្រេច ក្នុងការដោះស្រាយវិបត្តិសេដ្ឋកិច្ចមក ស្រាប់តែវិស័យអចលនទ្រព្យក្នុងប្រទេសនេះ កើនឡើងប្រមាណ១០% នេះបើតាមរបាយការណ៍របស់ក្រុមហ៊ុនអន្តរជាតិ Colliers។

ក្រុមហ៊ុនវាយតម្លៃអចលនទ្រព្យ និងអ្នកវិភាគអចលនទ្រព្យ ឬសេដ្ឋកិច្ចក្នុងតំបន់អាស៊ី បានលើកទឹកចិត្តឱ្យក្រុមហ៊ុនអភិវឌ្ឍលំនៅដ្ឋាន ខុនដូ និង ការិយាល័យ ត្រូវពង្រឹងស្មារតីដើម្បីទប់ទល់លំនឹងតម្លៃទីផ្សារ។ នៅពេលខាងមុខអចលនទ្រព្យ នឹងមានកំណើនកាន់តែខ្លាំង ដូច្នេះគួរតែបន្ទាបការប្រាក់ និងបន្តគ្រប់គ្រងលើគុណភាពសំណង់។

មួយវិញទៀត លំនៅដ្ឋានតម្លៃសមរម្យនិងមានតម្លៃទាប ជាផ្នែកមួយនៃចក្ខុវិស័យរួមដែលនៅតំបន់អាស៊ីរួមគ្នា សម្រេចគោលដៅអភិវឌ្ឍអភិវឌ្ឍន៍ប្រកបដោយចីរភាពនៅឆ្នាំ២០៣០៕

ដោយវុត្ថា

ភ្នំពេញៈ ការសិក្សាថ្មីមួយបានបង្ហាញថា តម្រូវការខុនដូនឹងកើនដល់២៩៥,០០០យូនីតនៅឆ្នាំ២០៣០ខាងមុខ ដែលជាការកើនឡើង៥ដងពីចំនួន៦១,៨០០ ធៀបនឹងឆ្នាំ ២០១៨។នេះបើយោងតាមរបាយការណ៍របស់ក្រុមហ៊ុន VTrust Appraisal។

លោកហ៊ឹម សីហា នាយកផ្នែកស្រាវជ្រាវរបស់ក្រុមហ៊ុន VTrust Appraisalបានមានប្រសាសន៍ថា កំណើនប្រជាជន និងជនបរទេសដែលមករស់នៅ និងធ្វើការនៅក្នុងទីក្រុងភ្នំពេញ បានធ្វើឱ្យខុនដូបន្តកើនឡើងជាប្រចាំឆ្នំា ដែលខុនដូភាគច្រើនបានទិញដោ​យ​ជនជាតិចិន និងជនបរទេសមកពីតំបន់អាស៊ី ដែលមករស់នៅ និងធ្វើការនៅក្នុងប្រទេ​សកម្ពុជា ខណៈប្រជាជនខ្មែរបានចាប់អារម្មណ៍រស់នៅក្នុងខុនដូកាន់តែច្រើន។

លោកបន្តថា ក្នុងរយៈពេល២ឬ៣ឆ្នាំចុងក្រោយនេះ ប្រជាពលរដ្ឋនៅក្នុងស្រុកជាពិសេសប្រជាពលរដ្ឋដែលទើបរៀបការ និងវ័យក្មេងជាច្រើនក៏បានទិញខុនដូ សម្រាប់រស់នៅផងដែរ ។ ការសម្រួលឱ្យមានការបង់រំលោះ មានភាពងាយស្រួល បានបង្កើនលទ្ធភាពដល់អ្នកទិញ និងជាកត្តាជំរុញដល់ការបង្កើនទីផ្សារខុនដូ។

លោកសីហាបន្ថែមថា កំណើនសេដ្ឋកិច្ចនៅក្នុងប្រទេស បានជំរុញឱ្យវិស័យដីធ្លីមានការកើនឡើងយ៉ាងខ្លាំង ដែលធ្វើឱ្យទីតាំងសម្រាប់សាងសង់អគារស្នាក់នៅ ក្នុងកំពស់ទាបមានកាន់តែតិច ខណៈដែលការរស់នៅតាមបែបថ្មី (រស់នៅក្នុងខុនដូ)បាននឹងកំពុងទទួលបានការគាំទ្រ និងពេញនិយមក្នុងចំណោមប្រជាពលរដ្ឋ ក្នុងស្រុកវ័យក្មេង និងជនបរទេសបានធ្វើឱ្យគម្រោងខុនបន្តកើនឡើងជាលំដាប់។

អគ្គនាយកក្រុមហ៊ុនភ្នាក់ងារអចលនទ្រព្យ ERA Cambodia លោកខន គង្គា ធ្លាប់បានប្រាប់គេហទំព័រ propertyarea.asia កាលពីពេលថ្មីៗនេះឱ្យដឹងថា នៅក្នុងឆ្នាំ២០២០នេះ តម្រូវការទីផ្សារខុនដូនឹងមានការកើនឡើង ប៉ុន្តែសម្រាប់តែប្រភេទខុនដូដែលមានតម្លៃទាប ឬតម្លៃសមរម្យតែប៉ុណ្ណោះ។

លោកបន្តថា “ចាប់តាំងពីដើមឆ្នាំ២០១៩មក ក្រុមហ៊ុនអភិវឌ្ឍន៍មួយចំនួនធំបានងាកមកចាប់អារម្មណ៍លើទីផ្សារខុនដូ ដែលមានតម្លៃសមរម្យ ដែលផ្តោតសំខាន់លើអតិថិជនក្នុងស្រុកច្រើនជាងអតថិជនក្រៅស្រុក ដែលការផ្លាស់ប្ដូរទាំងនេះ ក៏ព្រោះតែគេបានសិក្សាច្បាស់ពីតម្រូវការទីផ្សារពិតប្រាកដ”។

នាយិកាប្រចាំប្រទេសក្រុមហ៊ុន ភ្នាក់ងារអចលនទ្រព្យអន្តរជាតិ CBRE Cambodia លោកស្រីអាន សុធីតា បានទទួលស្គាល់នូវការលើកឡើងខាងលើនេះ ដោយលោកស្រីបានបញ្ជាក់ថា តម្រូវការទីផ្សារខុនដូប្រភេទតម្លៃសមរម្យ ពិតជាមានអត្រាខ្ពស់ជាងប្រភេ​ទខុនដូតម្លៃមធ្យម និងខុនដូដែលមានតម្លៃខ្ពស់។

លោកស្រីបានបន្តថា “ខុនដូតម្លៃសមរម្យភាគច្រើន មានតម្រូវការខ្ពស់ពីសំណាក់អតិថិជនក្នុងស្រុក ដែលជាជនជាតិខ្មែរ”។ លោកស្រីបន្ថែមថា “ពួកគាត់បានយល់ និងស្គាល់ពីគុណតម្លៃនៃការស្នាក់នៅក្នុងខុនដូ ហើយពួកគាត់ទិញសម្រាប់រស់នៅ ច្រើនជាងទិញសម្រាប់ទុកវិនិយោគបន្ត”។

លោកស្រីបានបន្តទៀតថា ខុនដូដែលត្រូវបានចាត់ទុកថាប្រភេទសមរម្យ គឺមានតម្លៃប្រមាណ១២០០ដុល្លារក្នុងមួយម៉ែត្រ ដោយឡែកខុនដូតម្លៃមធ្យម ឬតម្លៃកណ្តាល គឺមានតម្លៃប្រមាណចាប់ពី១៥០០ដុល្លារឡើងទៅ ហើយចំពោះប្រភេទខុនដូតម្លៃខ្ពស់គឺមានតម្លៃចាប់ពីប្រមាណ២៥០០ដុល្លារ ក្នុងមួយម៉ែត្រការ៉េឡើងទៅ និងស្ថិតនៅជាន់ខ្ពស់ៗ៕