ដោយ ប៊ី

ភ្នំពេញៈ សណ្ឋាគារ Hyatt Regency Phnom Penh ដែលមានស្លាកយីហោពីអាមេរិកនឹងបើកដំណើរការនៅចុងខែ កញ្ញា ឆ្នាំនេះ។ នេះបើយោងតាមការចេញផ្សាយរបស់ក្រុមហ៊ុនសណ្ឋាគារអន្តរជាតិនេះ។

សណ្ឋាគារនេះ នឹងបម្រើដល់អ្នកជំនួញ ក៏ដូចជាភ្ញៀវទេសចរជាតិ និងអន្តរជាតិដែលមកទស្សនារាជធានីភ្នំពេញរបស់ប្រទេសកម្ពុជា។

សណ្ឋាគារ Hyatt Regency Phnom Penh នឹងក្លាយជាសណ្ឋាគារលំដាប់ផ្កាយប្រាំដែលមាន២៤៨បន្ទប់ និងរួមបញ្ចូលភោជនីយដ្ឋាន សាលសន្និសីទ ស្ប៉ា និងស្កាយបារ។

សណ្ឋាគារនេះ មានទីតាំងស្ថិតនៅកណ្តាលរាជធានីភ្នំពេញ ក្បែរសារមន្ទីរជាតិ ព្រះបរមរាជវាំង សាកលវិទ្យាល័យវិចិត្រសិល្បៈ ផ្សាររាត្រី និងទល់មុខទន្លេមេគង្គ។ ផ្តល់ទីតាំងល្អសម្រាប់ភ្ញៀវទេសចរទៅកម្សាន្តនៅក្នុងទីក្រុង។

សណ្ឋាគារ Hyatt Regency Phnom Penh បានថែរក្សាស្ថាបត្យកម្មសម័យអាណានិគមបារាំងដើមរបស់ខ្លួន ខណៈពេលដែលបន្ថែមអគារចម្រុះ ជាច្រើនបែបនេះបានធ្វើឱ្យសណ្ឋាគារមួយ សំបូរទៅដោយប្រវត្តិសាស្ត្រ តែក៏អាចផ្តល់នូវប្រណីតភាពទំនើបៗផងដែរ៕

នាព្រឹកថ្ងៃទី១២ ខែមីនា ឆ្នាំ២០២០ ម្សិលមិញនេះ បុរី​ ប៉េង ហួត បានប្រារព្ធពីធីសម្ពោធជាផ្លូវការ គម្រោងអាជីវកម្មថ្មី ដឹស្តាផ្លាទីនីម អេកូ សាន់រ៉ាយ ដែលរៀបចំ ឡើងនៅទីតាំង ការិយាល័យលក់ បុរី ប៉េង ហួត (បឹងស្នោ) ដែលមានចំងាយត្រឹមតែ៥នាទី ប៉ុណ្ណោះពីស្ពានព្រះមុនីវង្ស(ច្បារអំពៅ) ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំ ថ្នាក់គ្រប់គ្រង នៃក្រុមហ៊ុន ប៉េង ហួត គ្រុប និងអតិថិជន យ៉ាងច្រើនកុះករ ។

ក្នុងពិធីបើកសម្ពោធជាផ្លូវការនេះផងដែរ លោក នីកូឡាស វាឡាសូស នាយកផ្នែករចនាស្ថាបត្យកម្មនៃក្រុមហ៊ុន បុរី ប៉េង ហួត បានឡើងធ្វើបទបង្ហាញយ៉ាងលម្អិតនិងក្បោះក្បាយ អំពីសក្តានុពលដ៏សម្បូរបែប នៃគម្រោងអាជីវកម្មថ្មី ដឹស្តាផ្លាទីនីម អេកូ សាន់រ៉ាយ ដែលទទួលបានចាប់អារម្មណ៍ខ្លាំង ពីអតិថិជនផងដែរ។ បន្ទាប់មកលោកស្រី ទេព កន្និថា ប្រធានផ្នែកលក់ជាន់ខ្ពស់ នៃក្រុមហ៊ុន បុរី ប៉េង ហួត បានថ្លែបញ្ជាក់ថា” គម្រោងថ្មីនេះ ដែលជាគម្រោងអភិវឌ្ឍលំនៅឋានអាជីវកម្មបែបហ្សបហោស៍ទំនើប លាតសន្ធឹងលើផ្ទៃដី ប្រមាណជាង ២០ហិកតា ជាមួយនឹងហ្សបហោស៍ទំនើបចម្រុះ រាប់រយខ្នង ដែលមានទីតាំងស្ថិតនៅលើដងវិថី សាន់រ៉ាយ អេវេនញូ តែម្តង ដែលធ្វើអោយគម្រោងនេះនឹងក្លាយជាភូមិសាស្រ្តអាជីវកម្មដ៏រីកចម្រើនយ៉ាងឆាប់រហ័ស ដោយសារតែទីនេះ គឺជាតំបន់ពាណិជ្ជកម្មដ៏សំខាន់សម្រាប់ផ្គត់ផ្គង់តម្រូវការ របស់អ្នករស់នៅក្នុងគម្រោង ហ្គ្រេនស្តា ផ្លាទីនឹម វគ្គពីរ អេកូខលឡិកសិន ជាពិសេស​ និងអ្នកដែលរស់នៅជុំវិញផងដែរ”។ លោកស្រី បានបន្ថែមទៀតថា គម្រោងថ្មីខាងលើនេះ​ អភិវឌ្ឍលំនៅឋានអាជីវកម្មបែបហ្សបហោស៍ទំនើប ចំនួន៣ ប្រភេទដែលមានដូចជា ហ្សបហោស៍ ឌី មានតម្លៃចាប់ពី១២ម៉ឺនដុល្លារជាងឡើងទៅ ហ្សបហោស៍ ស៊ី មានតម្លៃចាប់ពី១៤ម៉ឺនដុល្លារជាងឡើងទៅ និងហ្សបហោស៍ ក្លាសស៊ិក មានតម្លៃចាប់ពី២១ម៉ឺនដុល្លារជាងឡើងទៅ។

ដើម្បីអបអរសាទរការបើកលក់គម្រោងថ្មី ដឹស្តាផ្លាទីនីម អេកូ សាន់រ៉ាយ បុរី ប៉េង ហួត សូមផ្តល់ជូន អតិថិជន នូវការបញ្ចុះតម្លៃចំនួន៧% និង ការបញ្ចុះតម្លៃពិសេសរហូត ១៥% សម្រាប់ការបង់ផ្តាច់ទៅលើការជាវ ប្រភេទហ្សបហោស៍ណាមួយក្នុងគម្រោងខាងលើដែលមានតម្លៃចាប់ពី ១២ម៉ឺនដុល្លារជាងឡើងទៅ។

កម្មវិធីនេះធ្វើឡើងមានរយៈពេលត្រឹមតែ ៤ ថ្ងៃប៉ុណ្ណោះ ចាប់ពីថ្ងៃទី ១២ ដល់ថ្ងៃទី ១៥ ខែ មីនា ឆ្នាំ ២០២០ វេលាម៉ោង ៨ព្រឹក ដល់ ម៉ោង ៧យប់ នាទីតាំងនៅការិយាល័យលក់ បុរី ប៉េង ហួត (បឹងស្នោ) ដែលមានចម្ងាយត្រឹមតែ៥ នាទីប៉ុណ្ណោះ ពីស្ពានព្រះមុនីវង្ស (ច្បារអំពៅ)។ សូមរួសរាន់ឡើងកុំឱកាសដ៏កម្រនេះកន្លងផុតអោយសោះ ព្រោះចំនួន និង ពេលវេលាមានកំណត់។ សូមបញ្ជាក់ផងដែរថា ត្រឹមតែរយៈពេល១ ម៉ោងដំបូងប៉ុណ្ណោះ គម្រោងថ្មី ដឹស្តាផ្លាទីនីម អេកូ សាន់រ៉ាយ ទទួលបានការកក់ពី អតិថិជនយ៉ាងច្រើន លើសពីការរំពឹងទុក។

សម្រាប់ព័ត៌មានបន្ថែម សូមទាក់ទងទូរស័ព្ទលេខ 015 90 67 89, Email: [email protected] ឬចូល ទៅគេហទំព័រ Facebook ៖ www.facebook.com/boreypenghuoth

បុរី ប៉េង ហួត ធ្វើអោយជីវិតលោកអ្នកកាន់តែមានន័យ…!

ដោយ ៖ រ៉ាណេត

ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ បានសេចក្ដីជូនដំណឹងជាសាធារណៈទៅលើម្ចាស់លំនៅដ្ឋានធ្វើអាជីវកម្ម ដែលមិនព្រមអនុវត្តទៅតាមច្បាប់កំណត់ជាកំហិត ។

ក្រសួងសេដ្ឋកិច្ច និងហិរញ្ញវត្ថុ បានតម្រូវឱ្យម្ចាស់អាជីវកម្មទាំងអស់ត្រូវដាក់ពាក្យស្នើសុំអាជ្ញាប័ណ្ណត្រឹមត្រូវទៅតាមច្បាប់ជៀសវាងមានការទទួលរងនូវការផាកពិន័យ។ ជាក់ស្ដែងកាលពីថ្ងៃទី១២ ខែមីនា ឆ្នាំ២០២០ ក្រសួងបានចេញលិខិតជូនដំណឹងមួយច្បាប់ដោយបានព្រមានចាត់វិធានការចំពោះគម្រោងសំណង់ផ្ទះល្វែងមួយ ស្ថិតនៅខណ្ឌពោធិ៍សែនជ័យ រាជធានីភ្នំពេញ បើមិនព្រមបង់ផាកពិន័យ រឿងធ្វើអាជីវកម្មគ្មានអាជ្ញាបណ្ណ។

តាមរយៈសេចក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ឱ្យដឹងថា ក្រសួងសេដ្ឋកិច្ច បានអញ្ជើញម្ចាស់គម្រោងសំណង់ផ្ទះល្វែង LS Signature Home នេះឱ្យទៅដាក់ពាក្យស្នើសុំអាជ្ញាបណ្ណអភិវឌ្ឍលំនៅឋាន តាមរយៈលិខិតអញ្ជើញចំនួនពីរលើកប្រគល់ដល់ទីតាំងការដ្ឋានសំណង់ ប៉ុន្តែម្ចាស់សំណង់មិនបានទៅដាក់ពាក្យសុំអាជ្ញាបណ្ណឡើយ។ ដូច្នេះអនុលោមតាមច្បាប់ ក្រសួងសម្រេចផាកពិន័យចំពោះអាជីវកម្មគ្មានអាជ្ញាបណ្ណនេះ៕

ដោយៈ រ៉ាណេត

ភ្នំពេញៈ អ្នកជំនាញចំនួន៣រូប សុទ្ធតែមានភាពជោគជ័យនៅក្នុងវិស័យអចលនទ្រព្យជាច្រើនឆ្នាំ នឹងចូលរួមធ្វើការចែករំលែកនូវចំណេះដឹង ក៏ដូចជាបទពិសោធន៍របស់ខ្លួន រួមជាមួយនឹងយុទ្ធសាស្ត្រក្នុងការផ្សព្វផ្សាយដ៏ជោគជ័យ តាមរយៈកម្មវិធីសិក្ខាសាលាស្ដីពី “យុទ្ធសាស្ត្រផ្សព្វផ្សាយជោគជ័យក្នុងវិស័យអចលនទ្រព្យ” នៅចុងសប្ដាហ៍ក្រោយនេះ។

នាយកប្រតិបត្តិ សាលាអចលនទ្រព្យកម្ពុជា (Real Estate School of Cambodia) លោក ខាត់ បូរ៉ា ដែលជាវាគ្មិនមួយរូបនៅក្នុងសិក្ខាខាងលើនេះបានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី១៣ ខែមីនា ឆ្នាំ២០២០នេះថា តាមរយៈសិក្ខាសាលាមួយនេះ បណ្តាសិក្ខាកាមដែលចូលរួមទាំងអស់ នឹងទទួលបានចំណេះដឹង និងអត្ថប្រយោជន៍យ៉ាងច្រើន សម្រាប់ជាទុនអនុវត្តន៍ក្នុងវិស័យអចលនទ្រព្យនៅកម្ពុជា។

លោកបានបញ្ជាក់ថា “នៅក្នុងសិក្ខសាលានេះ ខ្ញុំនឹងចែករំលែកនូវចំណេះដឹងដែលផ្ដោតសំខាន់ ទៅលើតួនាទីរបស់ភ្នាក់ងារអចលនទ្រព្យ និងការអនុវត្តតាមគោលនយោ​បាយនៃច្បាប់របស់ក្រសួងសេដ្ឋកិច្ច និងហិរញ្ញវត្ថុ”។លោកបន្ថែមថា “ដោយសារតែការសម្លឹងមើលឃើញពីចន្លោះប្រហោង របស់ភ្នាក់ងារអចលនទ្រព្យមួយចំនួន នៅមិនទាន់អនុវត្តស្របទៅនឹងគោលការណ៍ច្បាប់នៅឡើយ ដែលវាគឺជាបញ្ហានៃភាពប្រឈមរបស់ពួកគាត់នៅថ្ងៃក្រោយ”។

លោកបានបន្តទៀតថា ក្រៅពីការបង្ហាញពីការអនុវត្ត ដោយអនុលោមតាមច្បាប់កំណត់ សិក្ខាកាមទាំងអស់ក៏បានដឹងពីនីតិវិធី ក្នុងការស្មើសុំអជ្ញារប័ណ្ណក្នុងនាមជាភ្នាក់​ងារអចលនទ្រព្យស្របច្បាប់ ជាពិសេសគន្លឹះនៃការទទួលបានភាពជោគជ័យ នៅក្នុងវិស័យអចលនទ្រព្យ ក្នុងនាមជាភ្នាក់ងារដែលកំពុង តែមានការប្រកួតប្រជែងគ្នាយ៉ាងខ្លាំងនៅលើទីផ្សាររួមនាពេលបច្ចុប្បន្ននេះ។

អគ្គនាយកក្រុមហ៊ុន Estate Xchange  លោក រស់ សុវណ្ណថា ដែលអ្នកជំនាញលើការផ្សព្វផ្សាយ Digital Marketing បានមានប្រសាសន៍ថា “ភ្នាក់ងារអចលនទ្រព្យដែលអាចមានឱកាសទទួលបានភាពជោគជ័យ នៅក្នុងអាជីពរបស់ខ្លួន គឺទាមទារឱ្យមានចំនេះ​ដឹងទូលំទូលាយ មានបណ្តាញច្រើន ជាពិសេសមានជំនាញគ្រប់គ្រាន់ក្នុងការស្វែងរកព័ត៌មានអចលនទ្រព្យដែលពាក់ព័ន្ធ យល់ច្បាស់ពីវិធីសាស្ត្រផ្សព្វផ្សាយនៅលើបណ្តាញ Online ក៏ដូចជាការចេះប្រើប្រព័ន្ធផ្សព្វផ្សាយព័ត៌មានធ្វើជាប្រយោជន៍”។

លោកបានបន្តទៀតថា “តាមរយៈសិក្ខាសាលាមួយនេះ ថ្វីត្បិតមានរយៈពេលខ្លី ប៉ុន្តែសិក្ខាកាម ដែលចូលរួមនឹងបានយល់កាន់តែច្បាស់ ពីរបៀបនៃការធ្វើ Digital Marketing សម្រាប់ការផ្សព្វផ្សាយផលិតផលអចលទ្រព្យ របស់ពួកគាត់ទៅឱ្យដល់អតិថិជនគោលដៅ និងទទួលបានប្រយោជន៍ពីការផ្សព្វផ្សាយត្រឡប់មកវិញ”។

លោកបានមានប្រសាសន៍បញ្ជាក់ថា យើងទទួលស្គាល់ថា បណ្តាញ Online គឺជាមធ្យោបាយមួយយ៉ាងសំខាន់ និងចាំបាច់ក្នុងការផ្សព្វផ្សាយពីផលិតផល អចលនទ្រព្យចូលទៅកាន់ទីផ្សារ ប៉ុន្តែត្រឹមតែបណ្តាញ facebook ឬPage facebook  តែមួយមុខនៅមិនទាន់គ្រប់គ្រាន់នោះទេ ដែលវាទាមទារនូវចំណេះដឹង និងវិធីសាស្ត្រផ្សេងទៀត ដើម្បីជំរុញផលិតផលឱ្យទៅដល់អតិថិជនគោលដៅ ដែលវិធីសាស្ត្រទាំងអស់នេះ នឹងត្រូវបានចែករំលែកនៅក្នុងសិក្ខាសាលា នៅព្រឹកថ្ងៃទី២១ ខែមីនា ឆ្នាំ២០២០ខាងមុខនេះ”។

អគ្គនាយកក្រុមហ៊ុនគេហទំព័រអចលនទ្រព្យ និងសេដ្ឋកិច្ចPropertyarea.asiaលោក យិន លាងគង់ ដែលជាវាគ្មិននៅក្នុងកម្មវិធីសិក្ខាសាលាដ៏មានសារសំខាន់មួយនេះបានមានប្រសាសន៍ផងដែរថា នៅពេលនិយាយពីការផ្សព្វផ្សាយមានប្រសិទ្ឋភាព គេត្រូវគិតដល់បច្ចេកវិទ្យា ដែលបាននិងកំពុងដើរតួនាទីសំខាន់ ពិសេសក្នុងបដិវត្តន៍ឧស្សាហកម្មទី៤.0 ព្រោះបច្ចេកវិទ្យាឌីជីថល នឹងជួយលោក អ្នកឲ្យចំណេញប្រាក់លើការផ្សព្វផ្សា​យ តាមរយៈការចំណាយតិច និងមានប្រសិទ្ឋភាពខ្ពស់។

លោកបន្តថា “តាមរយៈសិក្ខាសាលានេះ ខ្ញុំនឹងចែករំលែកពីវិធីសាស្រ្តផ្សព្វផ្សាយ ឲ្យមានប្រសិទ្ឋភាព ចំណាយលុយតិច ចំគោលដៅអតិថិជនចង់បាន ពិសេសខ្ញុំនឹងលើកឡើងពីមូលហេតុអ្វី ដែលសារព៌តមានOnlineដើរតួនាទីសំខាន់ក្នុងអាជីវកម្ម”។លោកបន្តថា “ជាមួយគ្នានេះ ខ្ញុំនឹងចូលរួមចែករំលែក វិភាគនូវបញ្ហាប្រឈមផ្នែកសេដ្ឋកិច្ចនាពេលបច្ចុប្បន្ននេះថា តើម្ចាស់អាជីវកម្មគួរឈរលើមូលដ្ឋានបែបណា ដើម្បីអាជីវកម្មរបស់ខ្លួនមានភាពរីកចម្រើន និងកាត់បន្ថយបញ្ហាប្រឈមនាពេលវិបត្តិសេដ្ឋកិច្ច”។

លោកបន្តថា ការចូលរួមសិក្ខាសាលាបែបនេះ អ្នកចូលរួមពិតជាមានផលចំណេញខ្លាំងណាស់ ព្រោះវាគ្មិនជំនាញៗ សុទ្ឋតែឆ្លងកាត់បទពិសោធន៍១០ទៅ២០ឆ្នាំ ទើបអាចយកមកចែករំលែកចំណេះដឹងរយៈពេល១ម៉ោង ឬ២ម៉ោងបាន ហេតុនេះវាជាការវិនិយោគ ហើយជាការចំណាយប្រាក់ចំគោលដៅ។

ម្ចាស់អាជីវកម្មនានា ឬអ្នកជំនួញ និស្សិត ដែលចាប់អារម្មណ៍អាចទំនាក់ទំនងតាមរយៈលេខទូរស័ព្ទ០១៥ ៨៥៥ ៥៣៨, 077 855 508៕

ដោយវុត្ថា

សៀមរាបៈ អាជ្ញាធរជាតិអប្សរាបានអនុញ្ញាត ឱ្យមានការជួសជុលកែលម្អលំនៅ   ដ្ឋាន និងសាងសង់សំណង់ស្រាល តូចតាចបានចំនួន១៧៩៩គ្រួសារ ក្នុងតំបន់រមណីយដ្ឋានបេតិកភណ្ឌពិភពលោកអង្គរ នៅក្នុងឆ្នាំ២០១៩កន្លងមកនេះ ក្នុងចំណោមអ្នកស្រុកចំនួន២៨៦៧គ្រួសារ។

យោងតាមរបាយការណ៍នៅក្នុងឆ្នាំ២០១៩ ក្រុមការងារលេខាធិការដ្ឋានសហគមន៍ទាំង៥ ក្រុមនៃអាជ្ញាធរជាតិអប្សរាផ្សព្វផ្សាយនៅថ្ងៃទី១៣ ខែមីនា ឆ្នាំ ២០២០ នេះ បានឱ្យដឹងថា ចំណោមអ្នកស្រុក១៧៩៩គ្រួសារ ដែលទទួលបានការអនុញ្ញាតរួមមាន៖ ស្រុកប្រាសាទបាគងចំនួន២៥៩គ្រួសារ ស្រុកអង្គរធំ ចំនួន២០២គ្រួសារ ស្រុកពួកចំនួន៤៣៦ករណី ក្រុងសៀមរាបចំនួន៦៦០គ្រួសារ និងស្រុកបន្ទាយស្រីចំនួន២៤២គ្រួសារផងដែរ។

របាយការណ៍ដដែលបន្តថា ប្រភេទនៃការជួសជុលកែលម្អលំនៅដ្ឋាន និងសាង់សង់សំណង់ស្រាល តូចតាច ដែលទទួលបានការអនុញ្ញាតរួមមាន ជួសជុលឬប្តូរដំបូល ជួសជុលជញ្ជាំង ប្តូរសសរ ប្តូរជណ្តើរ តសំយ៉ាប កឥដ្ឋក្រោមផ្ទះ សាងសង់បង្គន់អនាម័យ ទ្រុងមាន់ ចាក់ដី ក្រោលគោ ទ្រុងជ្រូក ។ល។ និងតម្រូវការផ្សេងៗទៀតដែលចាំបាច់ក្នុងការរស់នៅប្រចាំថ្ងៃ។

អាជ្ញាធរជាតិអប្សរាបញ្ជាក់ថា ការអនុញ្ញាតនេះ ធ្វើឡើងបន្ទាប់ពីក្រុមការងារសហគមន៍ បានចុះពិនិត្យទៅដល់ខ្នងផ្ទះជាក់ស្តែង និងឯកសារចាំបាច់ពាក់ព័ន្ធមួយចំនួនទៀត ដើម្បីជាមូលដ្ឋានបច្ចេកទេស ក្នុងការវាយតម្លៃថាពួកគាត់ គឺជាប្រជាពលដ្ឋរស់នៅក្នុងតំបន់អង្គរពិតប្រាកដតាំងពីយូរយារ មានការបញ្ជាក់យ៉ាងច្បាស់លាស់ពីអាជ្ញាធរមូលដ្ឋានភូមិ-ឃុំ-សង្កាត់ និងមានតម្រូវការជាក់ស្តែង ក្នុងការកែលម្អការរស់នៅឱ្យបានល្អប្រសើរ។

អាជ្ញាធរជាតិអប្សរា មិនត្រឹមតែផ្តល់ការជួសជុលដល់ផ្ទះចាស់ និងសាងសង់សំ​ណង់ស្រាលតូចតាច ក្នុងនោះក៏បានដោះស្រាយបញ្ហាប្រឈមនានា ការជួយសង្គ្រោះពេលប្រជាជនមានទុក្ខលំបាក រួមទាំងផ្សព្វផ្សាយការយល់ដឹងអំពីបេតិកភណ្ឌ ដល់ប្រជាជនគ្រប់ៗគ្នា។

ពិសេសជាងនេះទៀតនោះ សកម្មភាពទាំងនេះ ជាការចូលរួមចំណែករបស់អាជ្ញាធរជាតិអប្សរា ក្នុងការបង្ខិតសេវាសាធារណៈរបស់រដ្ឋ ឱ្យចូលទៅជិតបងប្អូនប្រជាពលរដ្ឋ និងកាត់បន្ថយរាល់ការចំណាយទាំងពេលវេលា និងការធ្វើដំណើរទៅមក។

អាជ្ញាធរជាតិអប្សរា បានបង្កើតក្រុមការងារសហគមន៍នេះឡើង គឺដើម្បីសម្រួលដល់ការរស់នៅរបស់ប្រជាពលរដ្ឋក្នុងតំបន់អង្គរ ដែលគ្របដណ្តប់លើផ្ទៃដី៤០១គីឡូម៉ែ​ត្រការ៉េ ស្ថិតនៅក្នុងក្រុង/ស្រុកចំនួន៥ ឃុំចំនួន២១ និងភូមិចំនួន១១២៕