ភ្ញៀវទេសចរណ៍ចុងក្រោយចំនួន២៣៣រូបនៃនាវាយក្ស Westerdam នឹងធ្វើដំណើររ ទៅកាន់ប្រទេសខ្លួនវិញ

ដោយវុត្ថា

ភ្នំពេញៈ ភ្ញៀវទេសចរណ៍ចំនួន២៣៣រូបចុងក្រោយ ដែលធ្វើដំណើរតាមនាវាMS Westerdam នឹងធ្វើដំណើររទៅកាន់ប្រទេសខ្លួនវិញ តាមជើងហោះហើរពីទីក្រុងភ្នំពេញ។

លោកទេសរដ្ឋមន្ត្រី ស៊ុន ចាន់ ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងពិធីទទួលស្វាគម៍ អ្នកដំណើរចំនួន២៣៣រូបចុងក្រោយ ថ្ងៃទី១៩ ខែកុម្ភៈ ឆ្នាំ២០២០នេះ ឱ្យដឹងថា ការចាកចេញពីនាវារបស់អ្នកដំណើរចម្រុះជាតិសាសន៍នេះ ធ្វើ ឡើងក្នុងគោលបំណងធ្វើដំណើរទៅកាន់ប្រទេសរបស់ខ្លួន តាមរថយន្តក្រុងចំនួន១០គ្រឿង ចេញពីកំពង់ផែស្វយ័តក្រុងព្រះសីហនុ ទៅកាន់រាជធានីភ្នំពេញ រួចទើបបន្តដំណើរតាមជើងហោះហើរពីរាជធានីភ្នំពេញ ទៅកាន់ប្រទេសកំណើតរៀងៗខ្លួនវិញ។

ការទទួលបដិសណ្ឋារកិច្ច និងជូនដំណើរនេះ លោក ទេសរដ្ឋមន្ត្រី ស៊ុន ចាន់ថុល បានផ្តល់ជូនក្រមាធ្វើពីសូត្ររបស់កម្ពុជា ជាកាដូអនុស្សាវរីយ៍ជូនដល់ភ្ញៀវទេសចរណ៍ទាំង២៣៣រូបនោះ។

លោកស៊ុន ចាន់ថុលបានថ្លែងបន្តថា ការជួយសង្គ្រោះភ្ញៀវទេសចរណ៍តាមនាវាទេស ចរណ៍ Westerdam ដែលត្រូវបានបដិសេធការ ចូលចតពីបណ្ដាប្រទេសមួយចំនួនដោយសារភ័យខ្លាចករណីជំងឺរលាកសួតCovid-19 នេះ ធ្វើឡើងក្នុងគោលបំណងមនុស្សធម៌ ទឹកចិត្តសន្តោសប្រណី មិនរើសអើងពូជសាសន៍ ជួយគ្នាក្នុងគ្រាមានអាសន្ន និងផ្ដល់ក្តីស្រឡាញ់ជំនឿទុកចិត្តភាពកក់ក្តៅ ដល់អ្នកធ្វើដំណើរលើនាវា ដែលរួមមានមនុស្សចាស់ ស្ត្រី និងកូនក្មេងផងដែរ។

លោកបញ្ជាក់ថា អ្នកដំណើរទាំងនោះ មុនអនុញ្ញាតឱ្យចាកចេញពីនាវា សុទ្ធតែត្រូវបានឆ្លងកាត់ការវាស់កំដៅ និងតេស្តសុខភាពដោយមន្ត្រីជំនាញក្រសួងសុខាភិបាលកម្ពុជា និងអង្គការសុខភាពពិភពលោក (WHO) និងមជ្ឈមណ្ឌលប្រយុទ្ធនឹងជម្ងឺឆ្លងសហរដ្ឋអាមេរិក UNCDC ដើម្បីធានាថាពិតជាគ្មានវត្តមានមេរោគ COVD-19 ។ មិនតែប៉ុណ្ណោះបុគ្គលិករបស់កប៉ាល់ ក៏នឹងត្រូវពិនិត្យសុខភាពវាស់កម្តៅឡើងវិញ មុនពេលអនុញ្ញាឱ្យនាវាចាកចេញពីកំពង់ផែស្វយ័តក្រុងព្រះសីហនុផងដែរ។

លោកបន្ថែមថា “នេះជាការស្ដែងចេញឲ្យឃើញនូវកាយវិការសប្បុរសធម៌ និងការយកចិត្តទុកដាក់ខ្ពស់របស់ថ្នាក់ដឹកនាំកំពូល នៃរាជរដ្ឋាភិបាលកម្ពុជា ចំពោះជនរងគ្រោះដែលត្រូវបានបោះបង់ចោលនៅលើមហាសាគរដ៏ធំល្វឹងល្វើយ”។

លោក Orlando Ashford ប្រធានក្រុមហ៊ុន Holland American Line ដែលជាម្ចាស់នាវា Westerdam បានថ្លែងអំណរគុណយ៉ាងជ្រាលជ្រៅ ចំពោះសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងប្រជាជនកម្ពុជា ក៏ដូចជាអាជ្ញាធរកម្ពុជា ដែលមានសន្តានចិត្តដ៏ល្អប្រកបដោយភាពកក់ក្តៅ និងជួយថែររក្សាទទួលអ្នកដំណើរ និងពិនិត្យជំងឺជូនដល់អ្នកដំណើរ ជាពិសេសដែលបានអនុញ្ញាតឲ្យកប៉ាល់ចូលចតនៅកំពង់ផែក្រុងព្រះសីហនុ៕

ក្រសួងទេសចរណ៍សហការជាគណៈមេធាវីកម្ពុជាពង្រឹងការអនុវត្តច្បាប់ស្តីពីទេសចរណ៍

ដោយវុត្ថា

ភ្នំពេញៈ ក្រសួងទេសចរណ៍ បានសហការជាមួយគណៈមេធាវីកម្ពុជា ដើម្បីពង្រឹងការគ្រប់គ្រង និងការអនុវត្តច្បាប់ស្តីពីទេសចរណ៍ ដើម្បីធានានូវសង្គតិភាព និងសុខដុមនីយកម្មនៃវិធានច្បាប់ ធានានូវនិត្យានុកូលភាព និងការដោះស្រាយសម្របសម្រួលវិវាទទេសចរណ៍ ការពង្រឹង និងបង្កើនល្បឿនអភិបាលកិច្ចល្អ ក្នុងទិសដៅចូលរួមចំណែកពង្រឹងនីតិរដ្ឋ និងលើកកម្ពស់វប្បធម៌នៃការគោរពច្បាប់ និងជំរុញការអនុវត្តច្បាប់។

លោកថោង ខុន រដ្ឋមន្ត្រីក្រសួងទេសចរណ៍ នៅក្នុងជំនួបពិភាក្សាការងារជាមួយ លោក សួន វិសាល ប្រធានគណៈមេធាវីកម្ពុជានាថ្ងៃទី ១៩ ខែកុម្ភៈ ឆ្នាំ ២០២០ នេះ បានលើកឡើង អំពីស្ថានភាពភាពទេសចរណ៍សកលលោក តំបន់ និងទេសចរណ៍កម្ពុជា ពិសេសក្នុងដំណាក់កាលនៃវិបត្តិជំងឺCovid-19 ដែលទាំងអស់គ្នាត្រូវរួមសាមគ្គីគ្នា (ដោយគ្មានការរើសអើងចំពោះជនជាតិចិន) ដើម្បីទប់ទល់នឹងវិបត្តិ និងចាត់វិធានការបន្ទាន់នានាដើម្បីជម្រុញសកម្មភាពទេសចរណ៍ និងស្រោចស្រង់ឧស្សាហកម្មទេសចរណ៍។

លោករដ្ឋមន្ត្រីក៏បានលើកឡើង ពីការខិតខំរបស់ក្រសួង ក្នុងការពង្រឹងការគ្រប់គ្រង និងអនុវត្តច្បាប់ស្តីពីទេសចរណ៍ ដែលក្នុងនោះក៏សង្កេតឃើញមានបុគ្គលមួយចំនួនបានប្រព្រឹត្តសកម្មភាពល្មើសនឹងច្បាប់ និងលិខិតបទដ្ឋានគតិយុត្តទេសចរណ៍ ដូចជា ការលក់វត្ថុអនុស្សាវរីយ៍ក្លែងក្លាយដល់ទេសចរ និងការផ្សព្វផ្សាយព័តមាន រូបភាព និងខ្លឹមសារអវិជ្ជមានពីទេសចរណ៍កម្ពុជា តាមបណ្តាញផ្សព្វផ្សាយសង្គមនានា ដែលខុសការពិត និងជាហេតុធ្វើឲ្យប៉ះពាល់ដល់កិត្យានុភាពជាតិ និងគោលនយោបាយទេសចរណ៍ជាតិក្នុងការទាក់ទាញទេសចរមកទស្សនាកម្ពុជាឲ្យកាន់តែច្រើនថែមទៀត។

លោករដ្ឋមន្ត្រីបានស្នើសុំឲ្យគណៈមេធាវិកម្ពុជា ជួយដល់ក្រសួងលើការងារសំខាន់មួយចំនួន ដូចជា ទី១ ជួយប្រឹក្សាយោបល់ផ្នែកច្បាប់ ដល់ក្រសួងទេសចរណ៍ក្នុងការដោះស្រាយ និងសម្របសម្រួលវិវាទទេសចរណ៍ ទី២ ជួយរៀបចំបង្កើតច្បាប់ស្តីពីមគ្គុទ្ទេសក៍ទេសចរណ៍ ទី៣ ជួយសិក្សាភាពចន្លោះប្រហោងនៃច្បាប់ស្តីពីទេសចរណ៍ និងលិខិតបទដ្ឋានគតិយុត្តទេសចរណ៍។

លោកសួន វិសាល ប្រធានគណៈមេធាវីកម្ពុជា បានឯកភាពទទួលយកនូវសំណើរបស់លោក រដ្ឋមន្ត្រីក្រសួងទេសចរណ៍ ហើយនឹងបន្តកិច្ចសហការល្អជាមួយក្រសួង ដើម្បីពង្រឹងការគ្រប់គ្រងវិស័យទេសចរណ៍ និងការអនុវត្តច្បាប់ស្តីពីទេសចរណ៍ឲ្យកាន់តែមានប្រសិទ្ធភាព៕

ក្រុមហ៊ុនCentury21ត្រៀមបណ្តុះបណ្តាលធនធានមនុស្ស៣៨០០នាក់ក្នុងវិស័យអចលនទ្រព្យ

ដោយគង់ សូរិយា

ភ្នំពេញៈ ក្រុមហ៊ុន Century 21 Zillion Holding ដែលជាក្រុមហ៊ុនអចលនទ្រព្យមានឯកទេសលើទីផ្សារដីធ្លី បានប្រកាសជ្រើសរើសភ្នាក់ងារអចលនទ្រព្យបន្ថែម៣ ៨០០ នាក់ដើម្បីដំណើរការអាជីវកម្មនៅទូទាំងប្រទេស ហើយបានរៀបចំវគ្គបណ្តុះបណ្តាលចែករំលែកចំណេះដឹងទ្រង់ទ្រាយធំមិនធ្លាប់មាននៅកម្ពុជា។

សិក្ខាសាលា «បណ្តុះភាពជោគជ័យសម្រាប់៣៨០០នាក់ដំបូង ក្នុងវិស័យអចលនទ្រព្យ» បានធ្វើឡើងនៅសណ្ឋាគារភ្នំពេញ (Grand Ballroom) ដោយមានវាគ្មិនជំនាញ ៧រូប ក្នុងគោលដៅតម្រង់ទិស អ្នកចូលរួមឆ្ពោះទៅរកភាពជោគជ័យ ក្នុងអាជីពជាភ្នាក់ងារអចលនទ្រព្យ។

លោកស្រី ហ្គ្រែស រចនីហ្វុង អគ្គនាយិកាក្រុមហ៊ុន Century 21 Cambodia ដែលជាក្រុមហ៊ុនមេគ្រប់គ្រងសិទ្ធ ធ្វើអាជីវកម្មលើម៉ាកយីហោ Century 21 នៅកម្ពុជា (រួមទាំងក្រុមហ៊ុន Century 21 Zillion Holding) បានឲ្យដឹងថា នេះជាឱកាសកម្រសម្រាប់ប្អូនៗនិស្សិតដែលជិតបញ្ចប់ការសិក្សា និងអ្នកកំពុងធ្វើការឯករាជ្យក្នុងវិស័យផ្សេងទៀត ដើម្បីអភិវឌ្ឍន៍ខ្លួន និងកែលម្អជីវភាពរស់នៅ។

លោកស្រីបន្តថា “អាជីពជាភ្នាក់ងារអចលនទ្រព្យ អាចធ្វើឲ្យជីវភាពប្រសើរឡើង ហើយមានឱកាសពង្រីកបណ្តាញទំនាក់ទំនងបានល្អ តាមរយៈការជួបជាមួយម្ចាស់ទ្រព្យនៅកម្ពុជា និងអ្នកវិនិយោគពីក្រៅប្រទេស ដែលជាអ្នកមានធនធានហិរញ្ញវត្ថុ និងចំណេះដឹង”។លោកស្រីថ្លែងថា “នេះជាឱកាសកម្រសម្រាប់បងប្អូន ដែលចង់ទទួលបានប្រយោជន៍ពីការរីកចម្រើន ពីវិស័យអចលនទ្រព្យ ក្នុងការកែប្រែស្ថានភាពជីវភាពរបស់គាត់ និងក្រុមគ្រួសារ និងជួយដល់ម្ចាស់ទ្រព្យនៅកម្ពុជា”។

ភ្នាក់ងារអចលនទ្រព្យ ដែលមានវិជ្ជាជីវៈទាំង៣៨០០នាក់ នឹងជួយបង្កើនទំនុកចិត្តលើវិស័យអចលនទ្រព្យកម្ពុជា សម្រាប់វិនិយោគិន ហើយពួកគាត់អាចមានឱកាសទទួលបានការបណ្តុះបណ្តាលបន្ថែមទាំងកម្រិតជាតិ និងអន្តរជាតិ ឬមានឱកាសទៅទស្សនកិច្ចនៅសាខា Century 21 នៅក្រៅប្រទេសដូចជា អាមេរិក ជប៉ុន ឬចិនជាដើម។

វាគ្មិនជំនាញដែលបានចូលរួមវគ្គ “បណ្តុះភាពជោគជ័យសម្រាប់៣៨០០ នាក់ដំបូងក្នុងវិស័យអចលនទ្រព្យ” បានលើកយកប្រធានបទផ្សេងៗជាច្រើន មកធ្វើការចែករំលែក ដែលសុទ្ធសឹងជាកត្តាគន្លឹះ សម្រាប់អាជីពជាភ្នាក់ងារអចលនទ្រព្យ ដែលរួមមានដូចជា ប្រធានបទទាក់ទងនឹងជំនាញផ្នែកទំនាក់ទំនង ជំនាញផ្នែកលក់ និងប្រធានបទទាក់ទងនឹងឥទ្ធិពលនៃការវិវត្តន៍នៃបច្ចេកវិទ្យាលើវិស័យអចលនទ្រព្យជាដើម។

វាគ្មិនជំនាញទាំង៧រូប រួមមានលោកឃីម សុខហេង ដែលជាស្ថាបនិកវិទ្យាស្ថានសិក្សាដើម្បីជោគជ័យ លោក ឌិន សុមេធារិទ្ធ ស្ថាបនិក និងអគ្គនាយកភូមិផ្កាត្រកួន លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកនាក់ សមសែន សហស្ថាបនិក និងជានាយកប្រតិបត្តិក្រុមហ៊ុន RENT KH លោកព្រាប កុល អគ្គរដ្ឋទូតដើម្បីសន្តិភាព នៃសន្តិភាពសាកល លោកសោម សម្បត្តិ អគ្គនាយកប្រតិបត្តិក្រុមហ៊ុន ខាំ-ផែន (ថ្នាំពណ៌ជាតិ) និង លោក ជី សិលា ស្ថាបនិកក្រុមហ៊ុន Sabay Digital Corporation។

លោកស្រី រចនីហ្វុង បានឲ្យដឹងថា តម្រូវការដីធ្លីកំពុងមានការកើនឡើងខ្លាំងនៅគ្រប់តំបន់នៅកម្ពុជា ដោយសារកំណើនគម្រោងវិនិយោគ ពីអ្នកបណ្តាក់ទុនទាំងក្នុង និងក្រៅប្រទេស។ កំណើននេះ តម្រូវឲ្យក្រុមហ៊ុន Century 21 Zillion Holding ដែលជាម៉ាកយីហោ ក្រុមហ៊ុនអចលនទ្រព្យមានដើមកំណើតពីអាមេរិក បើកសាខាថ្មីបន្ថែម៣៨ (១៤ ខណ្ឌនៅភ្នំពេញ និង២៤ ខេត្ត) ហើយត្រូវការជ្រើសរើសភ្នាក់ងារ៣៨០០នាក់។

លោកស្រីបញ្ជាក់ថា “នេះជាកម្មវិធីល្អ ដែលមានប្រជុំដោយអ្នកជំនាញពីវិស័យផ្សេងៗគ្នារហូតដល់ទៅ៧រូប ដែលពួកគាត់សុទ្ធសឹងមានបទពិសោធកាងារ និងអាជីវកម្មច្រើនជាង៣០ឆ្នាំ ហើយអាចជួយតម្រង់ទិសអ្នកចូលរួម ដើម្បីក្លាយខ្លួនជាភ្នាក់ងារអចលនទ្រព្យប្រកបដោយវិជ្ជាជីវៈបានយ៉ាងពិតប្រាកដ”៕

សម្តេចតេជោៈសក្ដានុពលទេសចរណ៍តាមដងទន្លេកំពុងរួមចំណែកធ្វើឱ្យកម្ពុជាក្លាយ ជាគោលដៅទេសចរណ៍

ដោយវុត្ថា

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងថា ភាពសម្បូរបែបនៃសក្ដានុពលទេសចរណ៍តាមដងទន្លេ បាននិងកំពុងរួមចំណែកធ្វើឱ្យកម្ពុជាក្លាយជាគោលដៅទេសចរណ៍ ប្រកបដោយឧត្តមភាព និងភាពទាក់ទាញខ្ពស់។

ក្នុងសារលិខិតអបអរសាទរពិធីបុណ្យទន្លេលើកទី៦ នៅខេត្តបាត់ដំបង សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានផ្សព្វផ្សាយនៅថ្ងៃទី១៩ ខែកុម្ភៈ ឆ្នាំ ២០២០នេះ បានបញ្ជាក់ថា សក្ដានុពលនេះ ក៏បានចូលរួមចំណែកសម្រេចចក្ខុវិស័យអាស៊ាន ជាគោលដៅទេសចរណ៍លំដាប់ថ្នាក់ពិភពលោក និងប្រកបដោយភាពកក់ក្ដៅ ស្របពេលដែល ទេសចរណ៍តាមដងទន្លេ ជាពិសេសទេសចរណ៍ទន្លេមេគង្គ បានក្លាយជាផលិតផលទេសចរណ៍សំខាន់មួយសម្រាប់កម្ពុជា ក៏ដូចជាតំបន់អាស៊ានផងដែរ។

សម្ដេចតេជោបន្តថា “ទឹកទន្លេជាប្រភពនៃការចិញ្ចឹមជីវិត ជាទីកន្លែងដែលបណ្ដុះបណ្ដាល និងពូនជ្រុំនូវវប្បធម៌ និងអរិយធម៌”។ សម្តេចបន្ថែមថា “ទន្លេជាអំណោយពីធម្មជាតិ បានផ្សារភ្ជាប់ប្រទេសនានាដែលទទួលទានទឹករួមគ្នា ឱ្យក្លាយជាសហគមន៍វាសនារួមគ្នា ប្រកបដោយសមភាព ភាពស្មោះត្រង់ និងស្និទ្ធស្នាលដូចជាមនុស្សក្នុងគ្រួសារតែមួយ”។

ក្នុងបរិការណ៍នេះ រាជរដ្ឋាភិបាលកម្ពុជាបានកំណត់ប្រារព្ធពិធីបុណ្យទន្លេ ដែលបានក្លាយជាព្រឹត្តិការណ៍ទេសចរណ៍ថ្មីមួយទៀត ដែលមិនត្រឹមតែចូលរួមចំណែក ក្នុងការផ្សព្វផ្សាយ ពីសក្ដានុពលទេសចរណ៍ នៃខេត្តជាប់ដងទន្លេរបស់កម្ពុជាប៉ុណ្ណោះទេ ប៉ុន្តែថែមទាំងចូលរួមគាំទ្រ នយោបាយរបស់រាជរដ្ឋាភិបាល ក្នុងការយកចិត្តទុកដាក់អភិវឌ្ឍន៍តំបន់តាមដងទន្លេ ប្រកបដោយនិរន្តរភាព និងការទទួលខុសត្រូវ ជាពិសេសការជំរុញការអភិវឌ្ឍសេដ្ឋកិច្ចមូលដ្ឋាន ការការពារ និងអភិរក្សធនធានធម្មជាតិ ដោយឈរលើការប្ដេជ្ញាចិត្តរួមមួយច្បាស់លាស់ ក្នុងការរក្សាតុល្យភាពរវាងផលប្រយោជន៍សេដ្ឋកិច្ច សង្គម បរិស្ថាន និងវប្បធម៌។

ទន្ទឹមនឹងនេះ ព្រឹត្តិការណ៍បុណ្យទន្លេ ក៏ជាឪកាសមួយដើម្បីពង្រឹងគុណភាពសេវាកម្ម ការបង្តើត និងអភិវឌ្ឍផលិតផលទេសចរណ៍ថ្មីៗ ប្រកបដោយការច្នៃប្រឌិតខ្ពស់ ជាពិសេសទេសចរណ៍ តាមនាវាសហគមន៍ទេសចរណ៍តាមដងទន្លេ ព្រមទាំងរួមចំណែកជំរុញការតភ្ជាប់រឹតចំណងមិត្តភាព សាមគ្គីភាព រវាងបណ្តាប្រទេសក្នុងតំបន់អាស៊ាន និងបានពង្រឹងភាពជាដៃគូ ក្នុងក្របខណ្ឌតំបន់នានា ដូចជា ក្របខណ្ឌCLMV ក្របខណ្ឌមហាអនុតំបន់ទន្លេមេគង្គ មេគង្គ-ជប៉ុន មេគង្គ-ឡានឆាង មេគង្គ-កូរ៉េ និងមេគង្គ-គង្គាជាដើម។

សម្តេចតេជោហ៊ុន សែនបានបញ្ជាក់ទៀតថា ការរៀពិធីបុណ្យទន្លេលើកទី៦ នៅខេត្តបាត់ដំបងនេះនឹងធ្វើឡើងចាប់ពីថ្ងៃ១៣-១៥ ខែមីនា ឆ្នាំ២០២០ខាងមុខនេះ ក្រោមប្រធានបទ «ទន្លេនៃសន្តិសុខ ទន្លេនៃវិបុលភាព” មានលក្ខណៈកាន់តែវិសេសវិសាល ដោយសារខេត្តបាត់ដំបង ត្រូវបានចាត់ទុកជាជម្រុកស្រូវរបស់កម្ពុជា ជាទីក្រុងបេតិកភណ្ឌ ដែលគ្រោងដាក់បញ្ចូលក្នុងបញ្ជីអង្គការ UNESCO មានហេដ្ឋារចនាសម្ព័ន្ធ ទ្រទ្រង់គ្រប់គ្រាន់ ជាំទីក្រងុបណ្តុះទោដោយម្ហូបអាហារឆ្ងាញ់ៗ និងប្លែកៗ មានចម្ការទំពាំងបាយជូរនិងសំបូរ ទៅដោយរមណីយដ្ឋានជាច្រើន ទាំងទេសចរណ៍បេតិកភណ្ឌ សំណង់បុរាណ ផ្ទះបុរាណអាយុកាល១០០ឆ្នាំ សហគមន៍ទេសចរណ៍ និងអេកូទេសចរណ៍ បន្ទាយសត្វស្លាប ព្រែកទាល់ និងគោលដៅកសិ-ទេសចរណ៍ និងទេសចរណ៍ធម្មជាតិជាច្រើនកន្លែងទៀត។

ក្នុងន័យនេះ រាជរដ្ឋាភិបាលនឹងបន្តប្រារព្វនេះ ជារៀងរាល់ឆ្នាំនៅតាមបណ្តាខេត្តជាប់ដងទន្លេនៃប្រទេសកម្ពុជា ដែលទាំងអស់នេះសបញ្ជាក់ឱ្យឃើញថា រាជរដ្ឋាភិបាលបាន និងកំពុងជំរុញការអភិវឌ្ឍវិស័យទេសចរណ៍កម្ពុជា ជាពិសេសការអភិវឌ្ឍផលិតផលទេសចរណ៍តាមដងទន្លេ រួមចំណែកធ្វើឱ្យកម្ពុជាក្លាយជាគោលដៅ ទេសចរណ៍ប្រកដោយគុណភាពទាំងក្នុងតំបន់ និងឆាកអន្តរជាតិ៕

លោកអ៊ិត សំហេងៈប្រជាពលរដ្ឋពេញវ័យធ្វើការស្រូបចំណូលបានទឹកប្រាក់ជាង៦,៥០ពាន់លានដុល្លារក្នុងមួយឆ្នាំ

ដោយៈ រ៉ាណេត

ភ្នំពេញៈ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈលោកអ៊ិត សំហេងបានអះអាងថា ប្រជាជនកម្ពុជាសរុប ដែលកំពុងពេញវ័យបំរើការងារ រកប្រាក់ចំណូលប្រមាណ៦,៥០ពាន់លានដុល្លារអាមេរិកក្នុងមួយឆ្នាំ។

លោកអ៊ិត សំហេង បានមានប្រសាសន៍នៅក្នុងពិធីសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ កាលពីថ្ងៃទី១៩ ខែកុម្ភៈ ឆ្នាំ២០២០ នេះថា ប្រជាពលរដ្ឋកម្ពុជាបានស្រូបទាញទឹកប្រាក់ ក្នុងវិស័យការងារ ក្នុងនិងក្រៅប្រទេសបានទឹកប្រាក់ក្នុងចំនួនខាងលើនេះ ក្នុងនោះរាប់ទាំងផ្នែកសេដ្ឋកិច្ចក្នុងប្រព័ន្ធ និងក្រៅប្រព័ន្ធ វិស័យកសិកម្ម មន្ត្រីសាធារណៈ និងពលករដែលចេញទៅបម្រើការងារនៅក្រៅប្រទេស ក្រោមការគាំទ្រគោលនយោបាយពីរាជរដ្ឋាភិបាល។

លោកបន្តថា “សមិទ្ធផលដែលសម្រេចបានពេញ១ឆ្នាំនេះ បានធ្វើឱ្យវិស័យការងារ និងបណ្តុះបណ្តាលវិជ្ជា កាន់តែដើរតួរនាទីយ៉ាងសំខាន់ ដល់ការគាំទ្រនូវគោលនយោបាយ របស់រាជរដ្ឋាភិបាល ក្នុងបន្តជំរុញកំណើនសេដ្ឋកិច្ច ការបន្តភាពប្រកួតប្រជែងរបស់កម្ពុជា ការបន្តនីរន្តភាពពាណិជ្ជកម្ម អាជីវកម្ម ផលិតកម្ម និងវិនិយោគ”។

លោកបានមានប្រសាសន៍បន្តថា ក្រសួងបានខិតខំបន្តគ្រប់គ្រង ទីផ្សារការងារ និងកម្លាំងពលកម្ម ដែលរាជរដ្ឋាភិបាល ខិតខំបង្កើតការងារជូនបងប្អូនជាពលរដ្ឋ រហូតមានកម្លាំងពលកម្ម សរុបប្រមាណ១០លាននាក់ ក្នុងនោះនៅក្នុងប្រទេសប្រមាណ៣,៦៩លាននាក់ (ផ្នែកសេដ្ឋកិច្ច ក្នុងប្រព័ន្ធមានចំនួនជាង ១,៥០លាននាក់ និងផ្នែកសេដ្ឋកិច្ចក្រៅ ប្រព័ន្ធប្រមាណ ២,២០លាននាក់) វិស័យកសិកម្មប្រមាណ៤លាននាក់ មន្រ្តីសាធារណៈ៥០ម៉ឺននាក់ និងពលករដែលធ្វើការនៅក្រៅប្រទេស មានចំនួនប្រមាណជាង១,២៨លាននាក់” ។

លោកបន្តទៀតថា ប្រជាពលរដ្ឋកម្ពុជារហូតជាង៩៩,៣ភាគរយ មានការងារធ្វើ។ សហគ្រាស គ្រឹះស្ថាន សេដ្ឋកិច្ចក្នុងប្រព័ន្ធ ដែលមានការចុះបញ្ជីនៅ ក្រសួងសរុបចំនួន ១៤,០៦០សហគ្រាស គ្រឹះស្ថាន ដែលមានកម្មករនិយោជិតចំនួន១,៥០ លាននាក់ ដោ យបានទទួលប្រាក់ឈ្នួល ជាមធ្យមជាង៣,៧០ពាន់លានដុល្លារក្នុងមួយឆ្នាំ បើគិតបូកប្រាក់បញ្ញើ ដែលពលករមកពីក្រៅប្រទេស ក្នុង១ឆ្នាំជាង២,៨០ពាន់លានដុល្លារទៀតសរុ បទៅជាង ៦,៥០ពាន់លានដុល្លារក្នុងមួយឆ្នាំ។

តាមរយៈការព្រង្រឹងការអនុវត្តច្បាប់ស្តីពីការងារ មន្រី្តអធិការកិច្ចការងារបានចុះអធិការកិច្ចចំនួន៤៩២២លើក បានដាក់កំហិតចំនួន៩៧៧សហគ្រាស បានចេញលិខិតផាកពិន័យ៥៥សហគ្រាស និងប្តឹងទៅតុលាការ៦សហគ្រាស ជាលទ្ធផលរោងចក្រ សហគ្រាសដែលមិនគោរពច្បាប់ស្តីពី ការងារបានធ្លាក់ចុះគួរកត់សំគាល់។

ទន្ទឹមនឹងនេះការពង្រឹងការអនុវត្តច្បាប់ស្តីពី សហជីពបានធ្វើអោយចំនួនអង្គការវិជ្ជាជីវៈចុះបញ្ជិការកើនឡើងដល់៥២០៩ ក្នុងនោះសហជីពមូលដ្ឋានចំនួន៤៩៤៩, សហព័ន្ធសហជីពចំនួន២១៦, សហភាពសហជីពចំនួន៣៣ និងសមាគម និយោជកចំនួន១១៕

រដ្ឋាភិបាលអនុម័តគំរោងវិនិយោគជាង៥៨លានដុល្លារលើគំរោងវិនិយោគចំនួន៥

ដោយ ៖ រ៉ាណេត

កំពង់ស្ពឺ ៖ គិតត្រឹមតែរយៈពេល១៩ថ្ងៃនៃខែកុម្ភៈ ឆ្នាំ២០២០កន្លងទៅនេះ រដ្ឋាភិបាលកម្ពុជា តាមរយៈគណៈកម្មាធិកាវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា CDC បានសម្រេចចេញវិញ្ញាបនបត្រចុះបញ្ជីរជាស្ថាពរដល់គម្រោងវិនិយោគចំនួន៥ ដែលស្នើសុំដោយក្រុមហ៊ុនផ្សេងគ្នា មានទីតាំងស្ថិតនៅក្នុងខេត្តកំពង់ស្ពឺ ជាមួយទំហំទឹកប្រាក់វិនិយោគសរុបចំនួន ៥៨.៥លានដុល្លារ ដែលផ្តល់ឱកាសការងារបានជាង៣២០០នាក់។

ក្រុមហ៊ុនដែលទទួលបានការអនុញ្ញាតពីរដ្ឋាភិបាលទាំង៥ កាលពីពេលកន្លងទៅថ្មីៗនេះ រួមមានដូចជា ៖

១-គម្រោងបង្កើតរោងចក្រផលិតអំបោះគ្រប់ប្រភេទរបស់ក្រុមហ៊ុន “KANGTAIXIANG TEXTILE CO., LTD” មានទីតាំងស្ថិតនៅភូមិស្លែង ឃុំមហាសាំង ស្រុកភ្នំស្រួច ខេត្តកំពង់ស្ពឺ មានទុនវិនិយោគប្រមាណ ៥,៥លានដុល្លារអាមេរិក និងអាចបង្កើតការងារបានចំនួន ២៥០កន្លែង។

២- គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន “GIVEN CLOTHING GARMENT (CAMBODIA) CO., LTD” មានទីតាំងស្ថិតនៅភូមិត្រពាំងព្រះ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ មានទុនវិនិយោគប្រមាណ ៣,៥លានដុល្លារអាមេរិក និងអាចបង្កើតការងារបានចំនួន ១.០២១កន្លែង។

៣- គម្រោងបង្កើតរោងចក្រផលិតអាគុយស្ងួតរបស់ក្រុមហ៊ុន “Ultraspower Technology Battery Co.,Ltd”:, មានទីតាំងស្ថិតនៅក្នុងតំបន់សេដ្ឋកិច្ចពិសេស អាល់ត្រាផៅវ័រ ថេកណឡជី ខេត្តកំពង់ស្ពឺ,មានទុនវិនិយោគប្រមាណ ២១,៥លានដុល្លារអាមេរិក និងអាចបង្កើតការងារបានចំនួន ៦០០កន្លែង។
៤- គម្រោងបង្កើតរោងចក្រផលិតគ្រឿងបង្គុំអាគុយស្ងួត (បន្ទះលោហ:សំណ និងបន្ទះជ័រ) “Zhong Yongxin (Cambodia) Co.,Ltd” មានទីតាំងស្ថិតនៅក្នុងតំបន់សេដ្ឋកិច្ចពិសេស អាល់ត្រាផៅវ័រ ថេកណឡជី ខេត្តកំពង់ស្ពឺ,មានទុនវិនិយោគប្រមាណ ២៥,១លានដុល្លារអាមេរិក និងអាចបង្កើតការងារបានចំនួន ៣៩០កន្លែង។

៥- គម្រោងបង្កើតរោងចក្រកាត់ដេរសម្ភារៈសម្រាប់សម្អាតរថយន្ត (ក្រណាត់ជូតកញ្ចក់ កន្សែងជូតរថយន្តស្រោមដៃជូតរថយន្ត និងអេប៉ុង) របស់ក្រុមហ៊ុន “TOMKINS CHAMOIS (CAMBODIA) CO., LTD” មានទីតាំងស្ថិតនៅភូមិក្រាំងឃ្នង ឃុំស្រង់ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ១.០២៧កន្លែង៕

កម្ពុជាបានត្រៀមខ្លួនក្នុងការធ្វើដំណើរទៅកាន់សេដ្ឋកិច្ចឌីជីថលនាពេលខាងមុខដ៏ខ្លី

ដោយ ប៊ី

ភ្នំពេញ៖ កម្ពុជាបានត្រៀមខ្លួនក្នុងការធ្វើដំណើរទៅកាន់សេដ្ឋកិច្ចឌីជីថល នាពេលអនាគតដ៏ខ្លីខាងមុខនេះដើម្បីទាញយកប្រយោជន៍ពីទំហំសេដ្ឋកិច្ចឌីជីថល ក្នុងតំបន់អាស៊ាន ត្រូវបានរំពឹងថា កើនឡើងដល់២០០ប៊ីលានដុល្លារ ក្នុងរង្វង់ពេល១០ឆ្នាំខាងមុខនេះ។

លោក សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានលើកឡើងក្នុងពិធីបើកសិក្ខាសាលាស្តីពី ដំណោះស្រាយ នៃភាពស្មុគស្មាញ នៃសន្តិសុខបច្ចេកវិទ្យាគមនាគមន៍ និងព័ត៌មាន នៅក្នុងយុគសម័យនៃការតភ្ជាប់នៅទីស្ដីការក្រសួងប្រៃសណីយ៍ថា សេដ្ឋកិច្ចឌីជីថល គឺជាវិស័យមួយដ៏ចំបងសម្រាប់កម្ពុជា និងអាស៊ានទាំងមូល ហើយតាមការស្រាវជ្រាវថ្មីៗនេះ បានបង្ហាញឲ្យឃើញថា ទំហំសេដ្ឋកិច្ចឌីជីថល ក្នុងតំបន់អាស៊ាន ត្រូវបានរំពឹងថា កើនឡើងដល់២០០ប៊ីលានដុល្លារ ក្នុងរង្វង់ពេល១០ឆ្នាំខាងមុខនេះ។

លោករដ្ឋលេខាធិការ សុខ ពុទ្ធិវុធ បានថ្លែងថា រាជរដ្ឋាភិបាលកម្ពុជា ទទួលស្គាល់នូវការរីកចម្រើនលូតលាស់ យ៉ាងឆាប់រហ័សនៃបច្ចេកវិទ្យា ក៏ដូចជាការទីផ្សារ និងសេដ្ឋកិច្ច នៅក្នុងវិស័យបច្ចេកវិទ្យាគមនាគមន៍ និងព័ត៌មាន។
លោកថា “សេដ្ឋកិច្ចឌីជីថល គឺជាវិស័យមួយដ៏ចំបងសម្រាប់កម្ពុជា និងអាស៊ានទាំងមូល ហើយតាមការស្រាវជ្រាវថ្មីៗនេះ បានបង្ហាញឲ្យឃើញថា ទំហំសេដ្ឋកិច្ចឌីជីថលក្នុងតំបន់អាស៊ាន ត្រូវបានរំពឹងថា កើនឡើងដល់២០០ប៊ីលានដុល្លារ ក្នុងរង្វង់ពេល១០ឆ្នាំខាងមុខនេះ ដែលនៅក្នុងនោះ ពាណិជ្ជកម្មតាមប្រព័ន្ធអេឡិកត្រូនិកមានទំហំទឹកប្រាក់ប្រមាណជា៨៨ប៊ីលានដុល្លារ”។

លោករដ្ឋលេខាធិការ បានបន្ថែមទៀតថា ក្នុងខណៈពេលដែលវិស័យបច្ចេកវិទ្យាគមនាគមន៍ និងព័ត៌មាន បាននាំមកនូវឱកាសថ្មីៗជាច្រើន វាក៏បើកចំហនូវភាពងាយរងគ្រោះជាច្រើន ដល់យើងទាំងអស់គ្នាផងដែរ។ ជាសកល ការគំរាមគំហែងតាមប្រព័ន្ធអ៊ីនធឺណិត និងការវាយប្រហារ គឺកាន់តែមានភាពស្មុគស្មាញឡើងៗ ហើយផលប៉ះពាល់ ក៏មានទំហំធំធេងផងដែរ។ នៅកម្ពុជា ក៏អាចនឹងទទួលរងពីការគំរាមកំហែងនោះដែរ។

លើសពីនេះទៅទៀត បណ្តាញអ៊ីនធឺណិត របស់រដ្ឋាភិបាល ទទួលរងការវាយប្រហារ ជាមួយនឹងមេរោគ ការជ្រៀតចូលលួចទិន្នន័យ និងការកែប្រែព័ត៌មាន នៅក្នុងវេបសាយជាដើម។ ក្នុងនោះផងដែរ យើងក៏ធ្លាប់ទទួលរងគ្រោះ ដោយការវាយប្រហារក្នុងទម្រង់ DDoS ដែលធ្វើឲ្យប្រព័ន្ធអ៊ីនធឺណិតនៅកម្ពុជា មានភាពរអាក់រអួលមិនដំណើរការ។

ជាមួយគ្នានោះ លោក សុខ ពុទ្ធិវុធ បានបញ្ជាក់ទៀតថា កម្ពុជាត្រូវការឆ្លើយតបទៅនឹងបញ្ហាប្រឈម ផ្នែកសន្តិសុខបច្ចេកវិទ្យាគមនាគមន៍ និងព័ត៌មាន ដើម្បីត្រៀមខ្លួនក្នុងការធ្វើដំណើរទៅកាន់សេដ្ឋកិច្ចឌីជីថល នាពេលអនាគតដ៏ខ្លីខាងមុខនេះ។

លោក សុខ ពុទ្ធិវុធ សង្ឃឹមនិងជឿជាក់ថា សិក្ខាសាលានេះ នឹងចូលរួមចំណែក ជាមួយនឹងកិច្ចប្រឹងប្រែងរបស់រាជរដ្ឋាភិបាល ក្នុងការសម្រេចឲ្យបាននូវគោលដៅ ដែលមានចែងនៅក្នុងយុទ្ធសាស្ត្រចតុកោណដំណាក់កាលទី៤ របស់រដ្ឋាភិបាលអណត្តិទី៦ នៃរដ្ឋសភា នៅក្នុងចតុកោណទី២ គឺការធ្វើពិពិធកម្មសេដ្ឋកិច្ច ត្រង់មុំទី៣ បានកំណត់ថា «ការរៀបចំខ្លួនសម្រាប់សេដ្ឋកិច្ចឌីជីថល និង ឆ្លើយតបនឹងបដិវត្តឧស្សាហកម្មជំនាន់ទី៤»៕

សភាពាណិជ្ជកម្មកម្ពុជាសហការជាមួយគណៈមេធាវីកម្ពុជាផ្តល់ជំនួយផ្នែកច្បាប់ដល់វិស័យឯកជន

ដោយវុត្ថា

ភ្នំពេញ៖ សភាពាណិជ្ជកម្មកម្ពុជា សហការជាមួយនឹង គណៈមេធាវីនៃកម្ពុជា ផ្តល់ជំនួយ និងសម្រប់សម្រួលផ្នែកច្បាប់ដល់វិស័យឯកជន ខណៈកាលពីកន្លែងមកនេះវិស័យឯកជនមានបញ្ហាច្រើនក្នុងការដោះស្រាយទំនាស់ពាណិជ្ជកម្ម និងវិនិយោគ។

លោកឧកញ៉ា លឹម ហេង អនុប្រធានសភាណិជ្ជកម្មកម្ពុជា បានប្រាប់គេហទំព័រpropertyarea.asia នៅថ្ងៃទី ១៩ ខែកុម្ភៈឆ្នាំ ២០២០ នេះ ឱ្យដឹងថា កាលពីម្សិលមិញនេះ សភាពណិជ្ជកម្មបានចុះហត្ថលេខាលើអនុស្សារណៈយោគយល់ ជាមួយនឹងគណៈមេធាវី កម្ពុជាក្នុងគោលបំណងនៃពិធីនេះគឺដើម្បីពង្រឹងកិច្ចសហប្រតិបត្តិការរវាងស្ថាប័នទាំងពីរនៅក្នុងវិស័យពាណិជ្ជកម្ម និងសេវាកម្មច្បាប់ ព្រមទាំងការផ្លាស់ប្តូរបទពិសោធន៍ទៅវិញទៅមក។

លោកបន្ថែមថា ជាមួយគ្នានេះផងដែរ អនុស្សរណៈនៃការយោគយល់ (MOU) នេះនឹងរឹតចំណងមិត្តភាព និងកិច្ចសហប្រតិបត្តិការរវាងស្ថាប័នទាំងពីរ ក្នុងគោលដៅផ្សព្វផ្សាយ និងចែករំលែកព័ត៌មានដែលទាក់ទងនឹងការវិវឌ្ឍន៍ផ្នែកពាណិជ្ជកម្ម សេវាកម្មច្បាប់ និង ចំណេះដឹង បទពិសោធន៍ផ្នែកច្បាប់ ជាពិសេសច្បាប់ទាក់ទងនឹងវិស័យពាណិជ្ជកម្ម។

លោកបន្តថា “យើងដឹងហើយវិស័យឯកជនមានការខ្វះខាតលើការយល់ដឹងច្រើងក្នុងវិស័យផ្នែកច្បាប់ ។ ដល់អញ្ចឹងយើងមានគណៈមេវីមកចុះ MOU ជាមួយសភាពាណិជ្ជកម្មកម្ពុជាដើម្បីសហការគ្នាក្នុងការសម្របសម្រួលផ្នែកច្បាប់ “។

លោកបន្តថា “ជាធម្មតា សមាជិកសភាពាណិជ្ជកម្មទាំងអស់នៅពេលរកស៊ីតែងតែជួបបញ្ហាផ្នែកផ្លូវច្បាប់ ហើយស្វែងរកមេធាវី ក្នុងការដោះស្រាយ ។ មិនត្រឹមតែមានប៉ុណ្ណេះនោះទេ យើងមានសហក្រុមការងារចំនួន ១៣ ដែលបានបង្កើតកន្លងមកនេះ មានបញ្ហាពាក់ព័ន្ធផ្លូវច្បាប់ជាមួយស្ថាប័នរដ្ឋ ក៏ត្រូវការសិក្សាបន្ថែមទៀត ក្នុងការចូលរួមកែទម្រង់ស៊ីជម្រៅលើយុទ្ធសាស្ត្ររបស់រដ្ឋាភិបាល”។

ក្នុងកិច្ចសហប្រតិបត្តិការជាមួយគណៈមេធាវីកម្ពុជានេះដែរ បើតាមលោក ឧកញ៉ា លឹម ហេង គ្រោងនឹងស្នើទៅរដ្ឋាភិបាលបង្កើតសហក្រុមការងារចំនួន ២ទៀត ដើម្បីដោះស្រាយបញ្ហាដែលកើតឡើងនៅចំពោះមុខ ដែលកើតចំពោះវិស័យឯកជនបានជួបនូវអំពើអយុត្តិធម៌ច្រើន ជាមួយប្រព័ន្ធតុលាការ និង អជ្ញាធរមូលដ្ឋានជាដើម។

លោកឧកញ៉ា បញ្ជាក់ថា “សហក្រុមការងារនេះ គ្រោងសហការជាមួយក្រសួងយុត្តិធម៌ និងក្រសួងមហាផ្ទៃ តែសម្រេចយ៉ាងណា នោះអាស្រ័យលើសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា” ៕

គម្រោងលំនៅដ្ឋានតម្លៃសមរម្យជំហានទី១ គ្រោងនឹងបញ្ចប់ការសាងសង់ឱ្យបានមុនចូលឆ្នាំខ្មែរ

ដោយ ហ្សូលី

កណ្តាល៖ គម្រោងលំនៅដ្ឋានតម្លៃសមរម្យជំហានទី១ បានននឹងកំពុងសាងសង់ប្រមាណ ៩០%ហើយ និងធ្វើយ៉ាងណាប្រគល់កម្មសិទ្ធជូនប្រជាពលរដ្ឋដែលជាអតិថិជនឱ្យបានមុនឱកាសបុណ្យចូលឆ្នាំខ្មែរនេះ។

ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគររូបនីយកម្មនិងសំណង់ ក៏បានអញ្ជើញចុះពិនិត្យពីដំណើរការគម្រោងអភិវឌ្ឍលំនៅឋានតម្លៃសមរម្យរបស់ក្រុមហ៊ុន worldbridge Homes ស្ថិតក្នុងស្រុកស្អាង ខេត្តកណ្តាល កាលពីថ្ងៃទី ១៧ កុម្ភៈ ឆ្នាំ ២០២០ នេះផងដែរ។

ឆ្លៀតក្នុងឱកាសនោះ ឯកឧត្តមក៏បានមានប្រសាសន៍ថា “នេះជាការចូលរួមយ៉ាងមានឆន្ទះខ្ពស់រវាងក្រុមហ៊ុន និងរាជរដ្ឋាភិបាល ដើម្បីបំពេញសេចក្តីត្រូវការជូនបងប្អូនប្រជាពលរដ្ឋដែលមានប្រាក់ចំណូលទាប និងមធ្យម មានលទ្ធភាពជាវលំនៅឋានតម្លៃសមរម្យដើម្បីរស់នៅ។ “

គម្រោងលំនៅឋានតម្លៃសមរម្យ ជំហានទី ១នេះ មានចំនួន ៦០០ផ្ទះ ដែលសាងសង់ជិតរួចរាល់ហើយ សម្រេចបាន ៩០% នៅសល់ការកែលម្អបន្តិចបន្តួច និងពន្លឿនការងារមួយចំនួនទៀតដូចជា ការតទឹក តភ្លើង ជាដើម។

លោក យក់ សុធីរិទ្ធ នាយកគ្រប់គ្រងទូទៅរបស់ក្រុមហ៊ុនអភិវឌ្ឍលំនៅឋានតម្លៃសមរម្យនេះ បានថ្លែងប្រាប់អ្នកសារព័ត៌មានថា ក្រុមហ៊ុនត្រៀមប្រគល់ជូនអតិថិជនឱ្យបានចូលស្នាក់នៅមុនបុណ្យចូលឆ្នាំខ្មែរខាងមុខនេះ។

ក្រុមហ៊ុន worldbridge homes គឺជាក្រុមហ៊ុនអភិវឌ្ឍន៍លំនៅឋានតម្លៃសមរម្យ ដែលមានទុនវិនិយោគប្រមាណ ៧៣លានដុល្លារ សាងសង់លើផ្ទៃដីប្រមាណ ២៣ ហិកតា។

គួរបញ្ជាក់ថា នៅឆ្នាំ ២០១៧ គោលនយោបាយលំនៅឋានដែលមានតំលៃសមរម្យត្រូវបានរៀបចំឡើងដោយរដ្ឋាភិបាលដែលមានគោលបំណងធ្វើឱ្យប្រសើរឡើងនូវការរស់នៅរបស់អ្នកមានប្រាក់ចំណូលទាបនិងមធ្យមដោយជំរុញឱ្យអ្នកអភិវឌ្ឍន៍ផ្លាស់ប្តូរការផ្តោតអារម្មណ៍របស់ពួកគេទៅរកការអភិវឌ្ឍលំនៅដ្ឋានតម្លៃទាប។ គោលការណ៍នេះផ្តល់នូវការលើកទឹកចិត្តដល់អ្នកអភិវឌ្ឍន៍ដូចជា ការកាត់ពន្ធ រួមទាំងការយល់ព្រមលើការអនុញ្ញាតសាងសង់ និងអាជ្ញាប័ណ្ណអាជីវកម្ម។

បច្ចុប្បន្ននេះ មានគំរោងចំនួន ៥ ដែលមានលិខិតអនុញ្ញាតសាងសង់ពីក្រសួង។ មានទីតាំងនៅភ្នំពេញពីរកន្លែង ខេត្តកណ្តាលពីរកន្លែង និងនៅក្រុងប៉ោយប៉ែត ខេត្តបន្ទាយមានជ័យ៕

ស្ពានថ្មើរជើងផ្សារដើមគរ នឹងបញ្ចប់រួចរាល់នៅត្រឹមដើមខែមីនា ក្រោយនេះ

ដោយ ៖ រ៉ាណេត

ភ្នំពេញ ៖ គម្រោងសាងសង់ស្ពានថ្មើរជើងនៅចំណុចទីប្រជុំ និងផ្លូវបំបែកមុខផ្សារដើមគរ គ្រោងនឹងបញ្ចប់ជាស្ថាពរនៅត្រឹមថ្ងៃទី៥ ខែមីន ឆ្នាំ២០២០ ខាងមុខនេះ ខណៈដែលលទ្ធផលសម្រេចបានប្រមាណ ៨៥ ភាគរយរួចហើយនោះ។

គម្រោងស្ពានថ្មើរជើង១ ក្នុងចំណោម២ (ស្ពានថ្មើរជើងផ្សារដើមគរ) ត្រូវបានរដ្ឋបាលរាជធានីភ្នំពេញកំពុងពន្លឿនការសាងសង់យ៉ាងមមាញឹកទាំងថ្ងៃទាំងយប់ ដើម្បីបញ្ចប់ទៅតាមគម្រោងផែនការដែលបានគ្រោងទុក និងអាចដាក់ឱ្យប្រើប្រាស់នៅមុនពិធីបុណ្យចូលឆ្នាំខ្មែរខាងមុខនេះ។

តាមរយៈមន្ទីរសាធារណៈការ និងដឹកជញ្ជូនរាជធានីភ្នំពេញ បានបញ្ជាក់ថា គិតត្រឹមព្រឹកថ្ងៃទី១៩ ខែកុម្ភៈ ឆ្នាំ២០២០នេះ ការសាងសង់ស្ពានថ្មើរជើងផ្សារដើមគរ បានសម្រេចលទ្ធផល ៨៥ ភាគរយ ដោយតាមផែនការ គ្រោងនឹងបញ្ចប់រួចរាល់នៅត្រឹមថ្ងៃទី៥ ខែមីនា ឆ្នាំ២០២០ខាងមុខនេះ។ ដោយឡែកនៅយប់ថ្ងៃទី១៩ ខែកុម្ភៈ នេះ ក្រុមការងារជំនាញ និងអ្នកបច្ចេកទេស នឹងត្រូវស្ទូចតម្លើងគ្រោងដែកតួស្ពាន ចាប់ពីម៉ោង ២០:០០ ដល់ម៉ោង ៦:០០ព្រឹក ថ្ងៃទី២០ ខែកុម្ភៈ ឆ្នាំ២០២០។ សូមបងប្អូនប្រជាពលរដ្ឋ មេត្តាពង្វាងចរាចរនៅទីតាំងការដ្ឋានតាមពេលវេលាខាងលើនៅស្តុបផ្សារដើមគរ ប្រសព្វរវាងមហាវិថី ម៉ៅសេទុង និងផ្លូវលេខ ៣៣៦ ក្នុងខណ្ឌទួលគោក រាជធានីភ្នំពេញ។

ដោយឡែកសម្រាប់គម្រោងសាងសង់ស្ពានថ្មើរជើងសាលាសន្ធរមុខ គ្រោងនឹងបញ្ចប់នៅត្រឹមពាក់កណ្តាលឆ្នាំ២០២០ខាងមុខនេះ ខណៈដែលបច្ចុប្បន្នក្រុមការងារកំពុងតែសម្រុកសកម្មភាពទាំងយប់ទាំងថ្ងៃដូចគ្នា ក្រោមការទទួលខុសត្រូវដោយក្រុមហ៊ុនជំនាញ Space Media ដែលជាថវិកាចំណាយរបស់រដ្ឋបាលរាជធានីភ្នំពេញ ៕

1...2,5292,5302,531...3,250 Page 2,530 of 3,250