ដោយៈ គង់ សូរិយា

    ភ្នំពេញៈ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា កម្ពុជាបាននិងកំពុងវិនិយោគជាយុទ្ធសាស្រ្តលើបណ្តាញហេដ្ឋារចនា​ សម្ព័ន្ធរូបវន្ត ប្រកបដោយភាពគ្រប់ជ្រុងជ្រោយ។

គំរោងហេដ្ឋារចនាសម្ព័ន្ឋទាំងនោះ​ រួមបញ្ចូលទាំងផ្លូវល្បឿនលឿន កំពង់ផែទឹកជ្រៅ អាកាសយានដ្ឋានអន្តរជាតិ និងមជ្ឈមណ្ឌលភស្តុភារកម្ម ដើម្បីធានាបាននូវការតភ្ជាប់ដោយរលូន ជាមួយរដ្ឋសមា​ជិកអាស៊ាន និងតំបន់ផ្សេងទៀត។ ​

សម្ដេចមហាបវរធិបតី ហ៊ុន ម៉ាណែត ថ្លែងបែបនេះ​ ក្នុងឱកាសដែលសម្តេចអញ្ជើញ បើកកិច្ចប្រជុំកំពូលធុរកិច្ចអាស៊ាន-កម្ពុជា​ នៅសណ្ឋាគារសូហ្វីតែល នាព្រឹកថ្ងៃទី៦ ខែមីនា ឆ្នាំ២០២៥នេះ។

សម្តេចបានគូសបញ្ជាក់ថា មួយនឹងការទទួលស្គាល់ពីតួនាទីដ៏សំខាន់របស់កម្ពុជា ក្នុងការជំរុញវិបុលភាពតំបន់​ រាជរដ្ឋាភិបាលកម្ពុជា បានជំរុញយ៉ាងសកម្ម នូវបរិយាកាសអំណោយផល ដល់ការវិនិយោគ តាមរយៈការកែលម្អជាបន្តបន្ទាប់។ ដើម្បីធានាបាននូវការតភ្ជាប់ដោយរលូន ជាមួយរដ្ឋសមាជិកអាស៊ាន និងតំបន់ផ្សេងទៀត ស្របតាមមូល​បទក្នុងថ្ងៃនេះ​ កម្ពុជា បាន និងកំពុងវិនិយោគជាយុទ្ធសាស្រ្តលើបណ្តាញហេដ្ឋារចនា​សម្ព័ន្ធរូបវន្ត ប្រកបដោយភាពគ្រប់ជ្រុងជ្រោយ ដែលរួមបញ្ចូលទាំង ផ្លូវល្បឿនលឿន កំពង់ផែទឹកជ្រៅ អាកាសយានដ្ឋានអន្តរជាតិ និងមជ្ឈមណ្ឌលភស្តុភារកម្ម។

សម្តេចបវរធិបតីបញ្ជាក់បន្ថែមថា  “យើងជឿជាក់លើថាមពលនៃវឌ្ឍនភាពនៃកិច្ចសហការ ដោយប្រើប្រាស់ក្របខ័ណ្ឌអាស៊ាន ដើម្បីបង្កើតវិបុលភាព និងភាពស្អិតរមួតក្នុងតំបន់។ ការយកចិត្តទុកដាក់របស់យើង ត្រូវបានបង្ហាញឱ្យឃើញ តាមរយៈ ការចូលរួមយ៉ាងសកម្ម នៅក្នុងការពង្រឹងសន្តិសុខ និងកំណើនសេដ្ឋកិច្ចក្នុងតំបន់”។

ទន្ទឹមគ្នានេះ សម្តេចបានលើកឡើងទៀតថា ក្នុងនាមជាសមាជិកនៃអង្គការពាណិជ្ជកម្មពិភពលោក(WTO)​ កម្ពុជាបានបង្ហាញពីការប្ដេជ្ញាចិត្តយ៉ាងមុតមាំ ចំពោះការធ្វើពាណិជ្ជកម្ម ដោយស្មើភាព និងតម្លាភាព។ កម្ពុជា ផ្តោតលើការសម្រេចបាន នូវសហគមន៍សេដ្ឋកិច្ច ប្រកបដោយជវភាព និងសមាហរណកម្ម តាមរយៈ សេរីភាវូបនីយកម្មពាណិជ្ជកម្មដ៏រឹងមាំ និងកិច្ចសម្រួលពាណិជ្ជកម្ម។

សម្តេចបវរធិបតីបន្តថា ក្នុងភាពជា​ដៃគូជិតស្និទ្ធជាមួយប្រទេសជិតខាងអាស៊ាន​ កម្ពុជា បាននិងកំពុងធ្វើការយ៉ាងយកចិត្តទុកដាក់ ដើម្បីរុះរើ និងកាត់បន្ថយរបាំងពាណិជ្ជកម្ម សម្រួលនីតិវិធីគយ សម្រួ​លនីតិវិធីចុះបញ្ជីអាជីវកម្ម និងបង្កើតបរិយាកាសគតិយុត្ត ប្រកបដោយភាពច្បាស់លាស់ និងតម្លា​ភាព។

លើសពីនេះទៅទៀតកម្ពុជា ក៏ផ្តោតលើការបើកចំហទីផ្សារ តាមរយៈកិច្ចព្រមព្រៀង ពាណិជ្ជកម្មសេរីជាយុទ្ធសាស្ត្រ ដើម្បីផ្តល់លទ្ធភាពចូលទៅកាន់ទីផ្សារអាស៊ាន ក៏ដូចជា ទីផ្សារសេដ្ឋកិច្ចពិភពលោកសំខាន់ៗ រួមមាន សហភាពអឺរ៉ុប សហរដ្ឋអាម៉េរិក ចិន កូរ៉េ និងអាមីរ៉ាត-អារ៉ាប់រួម ប្រកបដោយការអនុគ្រោះ​៕

ដោយ: គង់ លាងហួរ
អន្តរជាតិ: ប្រទេសកូរ៉េខាងត្បូងគ្រោងនឹងបង្កើតមូលនិធិគោលនយោបាយមួយក្នុងទំហំទឹកប្រាក់ចំនួន៣៤ពាន់លានដុល្លារ ដើម្បីផ្តល់ការគាំទ្រផ្នែកហិរញ្ញវត្ថុដល់បណ្តាក្រុមហ៊ុនបច្ចេកវិទ្យាក្នុងស្រុក ស្របពេលមានការប្រកួតប្រជែងជាសកល និងលទ្ធិគាំពារនិយម។

រដ្ឋាភិបាលកូរ៉េខាងត្បូងបានអះអាងថា “ការប្រកួតប្រជែងនៅក្នុងឧស្សាហកម្មយុទ្ធសាស្រ្តបានក្លាយជាចំណុចស្នូលនៃសន្តិសុខសេដ្ឋកិច្ចជាតិ ស្របពេលមានការកើនឡើងនៃភាពមិនច្បាស់លាស់ពីកត្តាខាងក្រៅ ក្រោមរដ្ឋបាលថ្មីរបស់សហរដ្ឋអាមេរិក។នេះជាសង្គ្រាមដែលគ្មានផ្សែងគ្រាប់កាំភ្លើង”។

ចាប់តាំងពីការវិលចូលកាន់តំណែងក្នុងសេតវិមានកាលពីខែមករា លោកប្រធានាធិបតីអាមេរិក ដូណាល់ ត្រាំ បានគំរាមកំហែងដំឡើងពន្ធគយជាបន្តបន្ទាប់លើបណ្តាដៃគូពាណិជ្ជកម្មសំខាន់ៗ និងឧស្សាហកម្មផ្សេងៗដូចជា បន្ទះឈីប យានយន្ត និងជីវឱសថ។

មូលនិធិតម្លៃ៣៤,៣៧ពាន់លានដុល្លារនេះនឹងត្រូវបានវិភាជន៍ដល់បណ្តាក្រុមហ៊ុនបច្ចេកវិទ្យាសំខាន់ៗ ដូចជាបន្ទះឈីប និងយានយន្ត ក្នុងទម្រង់ជាប្រាក់កម្ចីដែលមានអត្រាការប្រាក់ទាប និងទម្រង់នៃការវិនិយោគផ្សេងទៀតក្នុងរយៈពេល៥ឆ្នាំខាងមុខ។

ក្នុងរយៈពេលប៉ុន្មានឆ្នាំថ្មីៗនេះ រដ្ឋាភិបាលកូរ៉េខាងត្បូងបានចាត់ទុកឧស្សាហកម្មចំនួន១២ប្រភេទ ជា“បច្ចេកវិទ្យាយុទ្ធសាស្ត្រជាតិ” ក្នុងគោលដៅផ្តល់ការគាំទ្រផ្នែកហិរញ្ញវត្ថុ និងការការពារ ដើម្បីឆ្លើយតបទៅនឹងការកើនឡើងនៃការប្រកួតប្រជែងជាសកល។

ឧស្សាហកម្មបច្ចេកវិទ្យាយុទ្ធសាស្ត្រជាតិទាំងនោះរួមមានដូចជា បន្ទះឈីប មធ្យោបាយធ្វើដំណើរនាពេលអនាគត ថ្មអាគុយ ជីវឱសថ អវកាស និងបញ្ញាសិប្បនិម្មិត(AI) ជាដើម៕ប្រភព: Reuters៕

ដោយៈ ម៉ាណា

    ព្រះសីហនុៈ ប្រតិភូអ្នកធុរកិច្ចជប៉ុន បានអញ្ជើញទៅកាន់ខេត្តព្រះសីហនុ ដើម្បីសិក្សាពីលទ្ឋភាព និងឱកាសវិនិយោគនៅខេត្តជាប់តំបន់ឆ្នេរ ដែលកំពុងមានាការរីកចម្រើននេះ។

លោកម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូជប៉ុនដឹកនាំដោយលោក តូស៊ីយ៉ា អូនីស៊ី (Toshiya Onishi) ទីប្រឹក្សាជាន់ខ្ពស់ នៃអង្គការពាណិជ្ជកម្មក្រៅប្រទេសជប៉ុន (JETRO) ដើម្បីឈ្វេងយល់ ពីសក្តានុពលវិនិយោគនៅខេត្ត និងស្តាប់ពីបរិយា​កាសវិនិយោគក្នុងខេត្តព្រះសីហនុ។

ក្នុងឱកាសនោះ លោកម៉ាង ស៊ីណេត អភិបាលខេត្តព្រះសីហនុ ក្នុងនាមរដ្ឋបាលខេត្ត និងប្រជាពលរដ្ឋខេត្តព្រះសីហនុ បានស្វាគមន៍គណៈប្រតិភូធុរកិច្ចជប៉ុន មកកាន់ខេត្តព្រះសីហនុ កម្ពុជា ជប៉ុន មានទំនាក់ទំនង កិច្ចសហប្រតិបត្តការល្អ និងអបអរសាទរ ខួបអនុស្សាវរីយ៍លើកទី៧២ នៃទំនាក់ទំនងការទូតនៃប្រទេសទាំងពីរ។

លោកអភិបាលខេត្តបាន ធ្វើការណែនាំកត្តាភូមិសាស្ត្រ វិទ្យាសាស្ត្ររបស់ខេត្តព្រះសីហនុ ស្ថិតនៅភាគនារតី នៃប្រទេសកម្ពុជា ចែកចេញ ៦ក្រុង ស្រុក ២៩ឃុំ សង្កាត់ ១១១ភូមិ ខេត្តសម្បុរទៅដោយធនធានធម្មជាតិមានកោះតូច ធំ៣២ ឆ្មេរសមុទ្រស្រស់ស្អាត ប្រវែង ១៧៥គីឡូម៉ែត្រ មានឧទ្យានលើគោក និងបាតសមុទ្រ ជាសក្តានុពល និងជាមូលដ្ឋានគ្រឹះ។

ខេត្តព្រះសីហនុ ត្រូវបានរាជរដ្ឋាភិបាល ប្រសិទ្ធនាមថា ជាតារារះនាទិសនារតី ជាខេត្តស្នូលនៃតំបន់ខេត្តឆ្នេរទាំង៤ របស់កម្ពុជា មានដូចជាខេត្តកោះកុង ខេត្តព្រះសីហនុ ខេត្តកំពត និងខេត្តកែប យើងមានផ្លូវគមនាគមន៍ដូចជា ផ្លូវទឹក ផ្លូវគោក និងផ្លូវអាកាស ផ្លូវគោក មានផ្លូវជាតិលេខ៣ លេខ៤ ផ្លូវល្បឿនលឿន និងផ្លូវដែក ផ្លូវអាកាស មានអាកាសយានដ្ឋានអន្តរជាតិ មានផ្លូវរត់៣៣០០ម៉ែត្រ ផ្លូវទឹកមានកំពង់ផែស្វយ័តក្រុងព្រះសីហនុ ស្ទឹងហាវ និងកែវផុស រាជរដ្ឋាភិបាលកំពុងអភិវឌ្ឍកំពង់ផែស្វយ័តក្រុងព្រះសីហនុ ជាបីដំណាក់កាល ចាប់ពីឆ្នាំ២០២៤ ដល់២០២៩ ឱ្យមានជំរៅទឹកចាប់ពី១៤,៥០ម៉ែត្រ រហូតដល់ ១៧,៥០ម៉ែត្រ អាចឱ្យនាវាមានចំណុះ១៦ម៉ឺនតោនចូលចតបាន។ ខេ

ត្តមានតំបន់សេដ្ឋកិច្ចពិសេសចំនួន៥ កំពុងដំណើរការ រាជរដ្ឋាភិបាលរៀបចំផែនការមេ រុញខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ចែកជា៤ប្លុកធំៗ ទី១.តំបន់ដឹកជញ្ជូន និងឧស្សាហកម្ម ២.តំបន់ទីក្រុងសមាហរណកម្ម មានវិស័យពាណិជ្ជកម្ម ទេសចរណ៍ ៣.បណ្តាកោះក្នុងខេត្ត ជាតំបន់ទេសចរណ៍ ៤.តំបន់ព្រៃនប់ និងកំពង់សីលា ជាតំបន់កសិកម្ម កសិឧស្សាហកម្ម និងវារីវប្បកម្ម។

លោកម៉ាង ស៊ីណេតបានបញ្ជាក់ថា “រាជរដ្ឋាភិបាលបានធ្វើការ  វិនិយោគខេត្តព្រះសីហនុ លើហេដ្ឋារចនាសម្ព័ន្ធមានផ្លូវ ឆ្នេរ បន្ទប់ទឹកសាធារណៈតាមបណ្តោយឆ្នេរ រូបសំណាក អាងប្រពិត្តកម្មទឹកកខ្វក់ជាដើម”។ លោកបន្តថា “ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញកម្មវិធីពិសេសជំរុញការវិនិយោគ នៅខេត្តព្រះសីហនុឆ្នាំ២០២៤ និងបន្ត២០២៥ ១.ជួយសម្រួលដល់អ្នកវិនិយោគ ២.លើកទឹកចិត្តផ្នែកពន្ធ។

លោកសង្ឃឹមថា ប្រតិភូនឹងមកធ្វើការវិនិយោគ នៅខេត្តព្រះសីហនុសម្រាប់ឆ្នាំ២០២៥ មានការលើកទឹកចិត្ត។

លោក តូស៊ីយ៉ា អូនីស៊ី (Toshiya Onishi) ទីប្រឹក្សាជាន់ខ្ពស់ នៃអង្គការពាណិជ្ជកម្មក្រៅប្រទេសជប៉ុន (JETRO) បានមានប្រសាសន៍ថា ដំណើរទស្សនកិច្ច របស់គណៈប្រតិភូជប៉ុនមកកម្ពុជា ជាពិសេសខេត្តព្រះសីហនុ ដែលមានក្រុមហ៊ុនធុរកិច្ច មកពីប្រទេសវៀតណាម ថៃ និងចិន ក្នុងគោលបំណងឈ្វេងយល់ពីបរិយាកាសវិនិយោគ និងគោលនយោបាយផ្សេងៗ ក្នុងការទាក់ទាញវិនិយោគិនមកកាន់កម្ពុជា ពួកគាត់ជាអ្នកវិនិយោគ ដែលមានចំណេះដឹង ជំនាញ និងទស្សនវិទ្យា ហើយទស្សនកិច្ចលើកនេះ ជួយបង្កើនឱកាសធុរកិច្ច នៃទំនាក់ទំនងរវាងប្រទេសទាំងពីរជប៉ុន កម្ពុជា និងបានឈ្វេងយល់ពីទំនាក់ទំទងខេត្តព្រះសីហនុ មានការអភិវឌ្ឍរីកចម្រើន៕

ដោយៈ គង់ សូរិយា

    ភ្នំពេញៈ ក្រុមមន្រ្តីក្រសួងសាធារណៈការ បានបើកកិច្ចប្រជុំលើកទី១ ក្រុមការងាររៀបចំ និងអនុវត្តគម្រោងសិក្សាបឋមបណ្តាញរថភ្លើងក្រោមដី (METRO) នៅរាជធានីភ្នំពេញ ជាមួយក្រុមជំនាញការធនា​គារវិនិយោគហេដ្ឋារចនាសម្ព័ន្ធអាស៊ី (AIIB)។

កិច្ចប្រជុំនេះដឹកនាំដោយលោកឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន ជាមួយក្រុមការងារអនុវត្តគម្រោង ដែលមានសមាសភាពចូលរួម ពីក្រុមជំនាញការធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដឹកនាំដោយ លោកស្រីJIN Wang ( Project Team Leader ) ព្រមទាំងមានការចូលរួមពីមន្រ្តីមកពីស្ថាប័នពាក់ព័ន្ឋ។

កិច្ចប្រជុំនេះ ធ្វើឡើងដើម្បីពិនិត្យមើលវឌ្ឍនភាព នៃដំណើរការសិក្សាគម្រោង ព្រមទាំងធ្វើការពិភាក្សា និងប្រមូលធាតុចូលលើរបាយការណ៍ចាប់ផ្តើម ពីសំណាក់អ្នកជំនាញការទីប្រឹក្សា និងភាគីពាក់ព័ន្ធ។ ក្រោយកិច្ចពិភាក្សាក្រុមការងារអនុវត្តគម្រោង និងអ្នកជំនាញការនៃធនាគារវិនិយោគហេដ្ឋារចនាសម្ព័ន្ធអាស៊ី (AIIB) នឹងធ្វើការចុះទស្សនកិច្ចសិក្សាបន្ថែម ក្នុងការប្រមូលធាតុចូលទៅតាមទីតាំង ដែលបានកំណត់ ក្នុងបណ្តារផ្លូវរបៀងធំៗក្នុងរាជធានីភ្នំពេញ​ ព្រមទាំងចុះពិនិត្យស្ថានីយចំណតឡានក្រុង​ ​ស្ថានីយរថភ្លើងរាជធានីភ្នំពេញ​ អាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិតេជោ​  តំបន់អភិវឌ្ឍថ្មី ក្រុងរណបថ្មី និងទីតាំងផ្សេងៗទៀត ដើម្បីកំណត់ខ្សែផ្លូវ សំរាំង និងខ្សែផ្លូវអាទិភាព សម្រាប់សិក្សាសមិទ្ធិលទ្ធភាព និងពិនិត្យលទ្ធភាពក្នុងការសាងសង់ បណ្តាញដឹកជញ្ជូនសាធារណៈក្រុង ក្នុងរាជធានីភ្នំពេញនាពេលអនាគត។

គម្រោងសិក្សាបឋមបណ្តាញរថភ្លើងក្រោមដី (METRO) នៅរាជធានីភ្នំពេញ បានចុះអនុស្សរណៈនៃការយោគយល់គ្នា រវាងក្រសួងសាធារណការ និងដឹកជញ្ជូន និងធនាគារវិនិយោគហេដ្ឋារចនាសម្ព័ន្ធអាស៊ី (AIIB) នៅថ្ងៃទី២៦ ខែកញ្ញា ឆ្នាំ២០២៤ ទីក្រុងប៉េកាំង នៃសាធារណរដ្ឋប្រជាមានិតចិន៕