ដោយ ប៊ី

ភ្នំពេញៈ ក្រុមហ៊ុនផ្តល់សេវាជួលរថយន្តធំបំផុត នៅលើពិភពលោកHertz Asia ដែលមានមូលដ្ឋាននៅសឹង្ហបូរី បានសហការជាមួយក្រុមCity Link Transportation (Cambodia) ដើម្បីបម្រើសេវាកម្មរថយន្ត និងដឹកជិញ្ជួនអ្នកធ្វើដំណើរនៅកម្ពុជា។

ក្រុមហ៊ុនជួលរថយន្តនៅកម្ពុជានេះ នឹងប្រតិបត្តិការម៉ាកHertz ជាច្រើនដូចជា Hertz, Dollar, Thrifty និង Firefly –នៅរាជធានីភ្នំពេញ ដែលមានរថយន្តចាប់ពីរថយន្តតូចរហូតដល់រថយន្តប្រណីត។ នេះបើយោងតាមរបាយការណ៍របសគេហទំព័រ TTGAsia ចុះផ្សាយកាលពីពេលថ្មីៗនេះ។

ក្រុមហ៊ុន City Link ក៏នឹងផ្តល់ជូននូវសេវា Hertz Chauffeur Drive (សេវាដឹកអ្នកដំណើរសម្រាប់អាជីវកម្ម) សម្រាប់ការផ្ទេរព្រលានយន្តហោះ និងអ្នកធ្វើដំណើរអាជីវកម្មផងដែរ។

លោក Eoin Macneill អនុប្រធានប្រចាំអាស៊ីប៉ាស៊ីហ្វិកនៃក្រុមហ៊ុន Hertz បានមានប្រសាសន៍ថា “នេះជាលើកទី១ហើយ ដែលក្រុមហ៊ុនHertz បានប្រគល់ម៉ាកសញ្ញាទាំង៤ដល់យីហោផ្តាច់មុខមួយនៅអាស៊ី ហើយបង្ហាញថាយើងជឿជាក់ថា ក្រុមហ៊ុន City Link មានជំនាញក្នុងការផ្តល់ជូននូវដំណោះស្រាយ ភាពចល័តជាមួយសេវាកម្មដ៏អស្ចារ្យដែលអតិថិជនរបស់យើងបានរំពឹងទុក”។  

នៅក្នុងសេចក្តីថ្លែងការណ៍មួយ ក្រុមហ៊ុនHertz បានឱ្យដឹងថា តម្រូវការជួលនឹងកើនឡើងនាពេលអនាគត ដោយមានភ្ញៀវទេសចរណ៍ជាតិ និងអន្តរជាតិជាង១៥លាននាក់រំពឹងនឹងមកទស្សនាប្រទេសកម្ពុជា ជារៀងរាល់ឆ្នាំនៅឆ្នាំ២០៣០។

លោក Macneill បានថ្លែងថា ខណៈអ្នកដំណើរដឹងកាន់តែច្បាស់ ពីប្រទេសកម្ពុជា និងមានឱកាសបើកបរដោយខ្លួនឯង ក្រុមហ៊ុនHertz អាចជួយអ្នកធ្វើដំណើរឱ្យរកឃើញសោភ័ណភាពរបស់ប្រទេសនេះ តាមរយៈសេវាកម្មជួលរថយន្តជាច្រើន”។  

លោកបានបន្តថា “យើងមានការរំភើបចំពោះភាពជាដៃគូHertzនិងCity Link ហើយជឿជាក់ថា នឹងមានអនាគតដ៏ល្អសម្រាប់យើងនៅទីនេះ ជាមួយដៃគូថ្មីរបស់យើងនៅកម្ពុជា”៕

ដោយៈ រ៉ាណេត

ភ្នំពេញៈ រាល់បញ្ហាប្រឈម និងផលលំបាកផ្សេងៗរបស់វិស័យឯកជនដែលកំពុងតែដំណើរការនៅទូទាំងប្រទេសកម្ពុជា នឹងត្រូវបានលើកយកមកធ្វើការពិភាក្សា ដើម្បីស្វែងរកដំណោះស្រាយជូនក្រោមអធិបតីភាព ដ៏ខ្ពង់ខ្ពស់របស់សម្ដេចតេជោ ហ៊ុន សែន នៅដើមខែមេសា ឆ្នាំ២០២០ ឆាប់ៗខាងមុខនេះ។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី២៦ ខែមករា ឆ្នាំ២០២០ ថា ជារៀងរាល់ឆ្នាំ រាជរដ្ឋាភិបាលកម្ពុជា ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន តែងបើកវេទិកាជួបជាមួយអ្នកតំណាងវិស័យឯកជន ដែលរួមមានក្រុមការងារពិសេសទាំង១៣របស់សភាពាណិជ្ជកម្មកម្ពុជា បណ្តាស្ថាប័ន និងអន្តរក្រសួងនានាដែលពាក់ព័ន្ធ ក៏ដូចជាស្ថាប័ន​តំណាងវិស័យឯកជនផ្សេងទៀត ដើម្បីជួយជជែក និងលើកយកបញ្ហាប្រឈមនានាដែលជាឧបស័គ្គនៅក្នុងកិច្ចដំណើរការនៃមុខជំនួញ។

លោកឧកញ៉ាបន្តទៀតថា “សម្រាប់វេទិកាដែលនឹងប្រព្រឹត្តទៅនៅថ្ងៃទី១ ខែមេសា ឆ្នាំ២០២០ខាងមុខនេះ គឺជាលើកទី១៩ហើយ ដែលរាជរដ្ឋាភិបាលកម្ពុជាចូលរួមដោះស្រាយនូវផលលំបាករបស់បណ្តាពាណិជ្ជករជាតិ និងអន្តរជាតិ ដែលកំពុងតែមានដំណើរការនៅទូទាំងប្រទេសកម្ពុជា”។ លោកឧកញ៉ាបានបញ្ជាក់ថា “វេទិកាមួយនេះមានសារសំខាន់បំផុតសម្រាប់វិស័យឯកជនទូទៅ ហើយក៏ជាផ្នែកមួយជួយសម្របសម្រួល និងជំរុញឱ្យរាល់ការធ្វើជំនួញនានា មានដំណើរការប្រកបដោយរលូន ក្រោមការចូលរួមយកចិត្តទុកដាក់ពីសំណាករាជរដ្ឋាភិបាលកម្ពុជា”។

អនុប្រធានសភាពាណិជ្ជកម្មកម្ពុជារូបនេះ បានមានប្រសាសន៍បន្តទៀតថា រហូតមកដល់ពេលនេះ បញ្ហាចម្បងមួយក្នុងចំណោមបញ្ហាជាច្រើនទៀត របស់វិស័យឯកជន គឺពាក់ព័ន្ធជាមួយនឹងពន្ធដារ ដែលទាមទារឱ្យមានការដំណោះស្រាយ និងសម្របសម្រួលក្នុងភាពជាដៃគូយ៉ាងចាំបាច់។ វិស័យឯកជននៅតែមានការព្រួយបារម្ភទៅលើបញ្ហាសវនកម្មដែលមិនមានសុក្រិត្យភាព។

លោកឧកញ៉ាបានបន្តទៀតថា កាលពីពេលកន្លងទៅ មន្ត្រីជំនាញមិនបានចុះធ្វើសវនកម្មជាប្រចាំឆ្នាំនោះទេ រាប់ទាំងក្រុមហ៊ុន និងសហគ្រិនខ្នាតតូច និងធម្យមផងដែរ លុះពេលចុះធ្វើសវនកម្ម គឺតែងតែខុសពីការប្រកាសពន្ធប្រចាំខែ និងប្រចាំឆ្នាំ ដែលភាគីខាងពាណិជ្ជករមានកំហុស និងត្រូវទទួលការពិន័យជាប្រចាំ។ ដូច្នេះ បញ្ហាមួយនេះក៏អាចនឹងត្រូវលើកយកមកពិភាក្សា និងស្នើសុំដល់រដ្ឋាភិបាលជួយអន្តរាគមន៍។

បច្ចុប្បន្ននេះ គ្រប់បណ្តាពាណិជ្ជករ ដែលជាអ្នកវិនិយោគទាំងជាតិ អន្តរជាតិកាន់តែមានភាពងាយស្រួល និងកក់ក្ដៅជាងមុន ដោយសារតែរដ្ឋាភិបាលបានយកចិត្តទុកដាក់ក្នុងការជួយដោះស្រាយនូវរាល់បញ្ហា និងឧបសគ្គនានា ដើម្បីជំរុញការវិនិយោគប្រកប​ដោយភាពរលូន។

កិច្ចការដែលរដ្ឋាភិបាលព្យាយាម ដោះស្រាយជូនជាចម្បង គឺការធ្វើកំណែទម្រង់ផ្ទៃក្នុងស៊ីជម្រៅ ជាពិសេសទៅលើបញ្ហានីតិវិធីពន្ធគយ និងពន្ធដាមួយចំនួន ក្នុងការរៀប​ចំរត់ការឯកសារជាដើម ៕

ភ្នំពេញ:

ក្រុមហ៊ុនស៊ីភី (CP)​បង្ហាញបំណងវិយោគលេីកាហ្វេសម្រាប់នាំចេញទៅថៃ​ ខណៈកម្ពុជាមានសក្តាខ្ពស់លេីវិស័យនេះ​។

នេះបេីតាមការដឹងនៅក្នុងជំនួបពិភាក្សាការងាររវាងពលោប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បទទួលជួបធុរជនថៃរបសកាលពីថ្ងៃទី២៤ខែមករាម្សិលមិញនេះ។

នៅក្នុងកិច្ចប្រជុំនេះ តំណាងរបស់ក្រុមហ៊ុនស៊ីភី បានជម្រាបជូនពីគោលបំណងក្នុងការពិនិត្យលើការផលិតគ្រាប់កាហ្វេនៅកម្ពុជា ដើម្បីនាំចូលទៅប្រទេសថៃ ដែលបច្ចុប្បន្នតម្រូវការគ្រាប់កាហ្វេ គឺមានកម្រិតខ្ពស់ ដែលទំហំនៃការផលិតនៅប្រទេសថៃ មិនអាចផ្គត់ផ្គង់គ្រប់ចំនួននោះទេ។

លោរដ្ឋមន្ត្រី បានជម្រាបជូនថា ការដាំដុះដំណាំកាហ្វេ គឺមានច្រើននៅខេត្តមណ្ឌលគិរី និងរតនគិរី ហើយលើកទឹកចិត្តឲ្យក្រុមហ៊ុនស៊ីភី ចុះពិនិត្យដោយផ្ទាល់ និងសហការជាមួយសហគមន៍ផលិតគ្រាប់កាហ្វេនៅទីនោះ ដើម្បីពិនិត្យលើលទ្ធភាពជាក់ស្ដែង។

ជាមួយនោះដែរ លោករដ្ឋមន្ត្រី ក៏បានលើកទឹកចិត្តឲ្យក្រុមហ៊ុនស៊ីភី បង្កើនប្រតិបត្តិការរបស់ក្រុមហ៊ុននៅកម្ពុជាឲ្យបានច្រើនលើសពីការវិនិយោគបច្ចុប្បន្នបន្ថែមទៀត ជាពិសេសការកែច្នៃអង្ករ ដំឡូងមី ពោត និងផលិតផលដទៃទៀត ដែលសុទ្ធសឹងតែជាផលិតផលមានសក្ដានុពលសម្រាប់នាំចេញ៕

ដោយ ប៊ី

ភ្នំពេញ៖ ពាណិជ្ជកម្មរវាងកម្ពុជា និងអាមេរិកមានទំហំទឹកប្រាក់ជាង ៥,៤ ពាន់លានដុល្លារ កើនឡើង ៣៨ ភាគរយ បើធៀបនឹងឆ្នាំមុន។

របាយការណ៍ពីការិយាល័យជំរឿនអាមេរិក (US Census Bureau) បានឱ្យដឹងថា ពាណិជ្ជកម្មរវាងប្រទេសទាំងពីរបានឈានដល់ប្រមាណ ៥.៤៤ ពាន់លានដុល្លារ កើនឡើងពី ៣,៩៣៥ ពាន់លានដុល្លារក្នុងរយៈពេលដូចគ្នាក្នុងឆ្នាំ ២០១៨ ។

របាយការណ៍បានកត់សម្គាល់ថា ការនាំចេញពីកម្ពុជាទៅកាន់អាមេរិកបានកើនឡើង ៤០ ភាគរយស្មើនឹង ៤,៩ លានដុល្លារ ខណៈការនាំចេញរបស់អាមេរិកមកកម្ពុជាមានចំនួន ៤៨៤ លានដុល្លារ កើនឡើង ២០ ភាគរយ។

ការធ្វើឱ្យប្រសើរឡើងនៃទំនាក់ទំនងការទូតនាំឱ្យមានការកើនឡើងពាណិជ្ជកម្ម។ ការចូលប្រើប្រព័ន្ធអនុគ្រោះពន្ធទូទៅរបស់អាមេរិកនៅតែជាគន្លឹះសម្រាប់ពាណិជ្ជកម្មរឹងមាំរវាងប្រទេសទាំងពីរ។

ការនាំចេញរបស់កម្ពុជាទៅកាន់អាមេរិកបានបន្តកើនឡើង ក្នុងនោះមានទំនិញធ្វើដំណើរ រួមទាំង កាបូបដៃ កាបូបស្ពាយ និងឥវ៉ាន់ត្រូវបានផ្តល់ជូននូវអាករដោយមិនគិតថ្លៃក្រោមប្រព័ន្ធអនុគ្រោះពន្ធទូទៅនៅក្នុងខែ កក្កដា ឆ្នាំ ២០១៦ ។

យោងតាមធនាគារជាតិនៃកម្ពុជា អាមេរិកគឺជាទីផ្សារធំបំផុតសម្រាប់ការនាំចេញរបស់កម្ពុជា ដោយមានចំនួន ២៩ ភាគរយនៃទំនិញចំនួន ១០,៩ ពាន់លានដុល្លារដែលត្រូវបាននាំចេញក្នុងរយៈពេល ៩ ខែដំបូងនៃឆ្នាំមុន៕

ដោយ Donald Lee

ភ្នំពេញ៖ ខណៈក្រុមហ៊ុនអាមេរិក និងចិន ត្រៀមធ្វើពាណិជ្ជកម្មរាប់ពាន់លានដុល្លារដែលមានចែងក្នុងកិច្ចព្រមព្រៀងពាណិជ្ជកម្មដំណាក់កាលទី ១ អឺរ៉ុបនឹងត្រូវរងផលប៉ះពាល់យ៉ាងខ្លាំង ដោយសារក្រុមហ៊ុនចិននឹងធ្វើជំនួញភាគច្រើននៅលើដឹកដីអាមេរិក។

ឧបនាយករដ្ឋមន្រ្តីចិនលោក Liu He និងប្រធានាធិបតីអាមេរិក Donald Trump បានចុះហត្ថលេខាលើកិច្ចព្រមព្រៀងពាណិជ្ជកម្មអាមេរិក និងចិនដំណាក់កាលទី ១ កាលពីដើមខែនេះ បានបញ្ចប់ការកើនឡើងនូវសង្រ្គាមពាណិជ្ជកម្មជិត ២២ ខែដែលបានគំរាមកំហែងដល់សេដ្ឋកិច្ចពិភពលោក និងរួមទាំងការកើនឡើងយ៉ាងខ្លាំងនៃការទិញទំនិញរបស់អាមេរិកនៅក្នុង ២ ឆ្នាំបន្ទាប់។

ក្រុមហ៊ុនសហភាពអឺរ៉ុបនៅទូទាំងទ្វីបអឺរ៉ុបបានសម្តែងការមិនសប្បាយចិត្តចំពោះការចូលទៅកាន់ទីផ្សារប្រទេសចិននៅមានកំរិតនៅឡើយ នៅពេលដែលអាមេរិកបានចុះហត្ថលេខាលើកិច្ចព្រមព្រៀងពាណិជ្ជកម្មដ៏សំខាន់មួយជាមួយចិនដែលធានាបាននូវទឹកប្រាក់ក្នុងការធ្វើពាណិជ្ជកម្មចំនួន ២០០ ពាន់លានដុល្លារក្នុងរយៈពេលពីរឆ្នាំ។

ក្រុមហ៊ុនអឺរ៉ុបបានត្អូញត្អែរថា កិច្ចព្រមព្រៀងនេះបានធ្វើឱ្យខូចខាតដល់ពាណិជ្ជកម្មសេរី និងការចូលទៅកាន់ទីផ្សារដែលស្មើភាពគ្នាដែលជាការរបាំងនៃសកលភាវូបនីយកម្មអស់រយៈពេលជាច្រើនទសវត្ស។

របាយការណ៍សមាគមអាជីវកម្មអឺរ៉ុបបានឱ្យដឹងថា “សហភាពអឺរ៉ុបត្រូវតែពិចារណាឡើងវិញនូវកម្មវិធីជំនួញរបស់ខ្លួនឆ្ពោះទៅប្រទេសចិន និងផ្តោតការយកចិត្តទុកដាក់បន្ថែមទៀតលើបដិភាព និងលក្ខខណ្ឌ”។ ចិនបានបើកទីផ្សារតូចបំផុតសម្រាប់ដៃគូពាណិជ្ជកម្មអឺរ៉ុបទាំងអស់។

ដើម្បីបន្ថែមការជេរប្រមាថចំពោះការរងរបួស ប្រធានាធិបតីអាមេរិក Donald Trump បានប្រើអាវុធពន្ធគយដើម្បីសម្លុតបណ្តាប្រទេសអឺរ៉ុបដើម្បីផ្តល់ផលប្រយោជន៍ដល់អាមេរិក។ លោក Trump បានរិះគន់យ៉ាងខ្លាំងចំពោះគោលនយោបាយពាណិជ្ជកម្មរបស់សហភាពអឺរ៉ុប នៅពេលដែលជម្លោះពាណិជ្ជកម្មរបស់លោកជាមួយប្រទេសចិនបានកើនឡើងកាលពីឆ្នាំមុន។

លោក Trump បាននិយាយនៅក្នុងសុន្ទរកថាដែលបានធ្វើឡើងនៅទីក្រុងញូវយ៉កកាលពីខែ វិច្ឆិកា ថា “គោលនយោបាយពាណិជ្ជកម្មរបស់សហភាពអឺរ៉ុបប្រឆាំងនឹងអាមេរិកគឺអាក្រក់ជាងប្រទេសចិន”។ 

លោក Trump បាននិយាយថា “ប្រទេសជាច្រើនគិតថ្លៃពន្ធខ្ពស់ខុសពីធម្មតា ឬបង្កើតរបាំងពាណិជ្ជកម្មដែលមិនអាចទៅរួច។ ហើយខ្ញុំនឹងនិយាយដោយស្មោះត្រង់ គឺសហគមន៍អឺរ៉ុបមានការលំបាកខ្លាំងណាស់។ ឧបសគ្គដែលពួកគេមានគឺគួរឱ្យខ្លាចក្នុងវិធីជាច្រើនដែលអាក្រក់ជាងប្រទេសចិន”។

ក្នុងខែនេះរដ្ឋាភិបាលអាមេរិកបានប្រកាសថា ខ្លួនគ្រោងនឹងដាក់ពន្ធ ១០០ ភាគរយលើទំនិញបារាំងដែលមានតម្លៃ ២,៤ ពាន់លានដុល្លារ និងរួមបញ្ចូលស្រាសំប៉ាញ កាបូបដៃ និងឈីស ប្រសិនបើកិច្ចព្រមព្រៀងពាណិជ្ជកម្មមិនបានឈានដល់សប្តាហ៍នេះ។

អាវុធនាំពន្ធគយលើចូលលើការនាំចូលរបស់បារាំងកើតឡើង បន្ទាប់ពីការស៊ើបអង្កេតមួយរបស់រដ្ឋាភិបាលអាមេរិកលើពន្ធថ្មីនៃសេវាកម្មឌីជីថលបារាំងដែលនឹងដាក់ពន្ធ ៣ ភាគរយលើក្រុមហ៊ុនឌីជីថលដែលរកចំណូលបានជាង ២៧,៨៦ លានដុល្លារនៅបារាំង និង ៨៣០ លានដុល្លារនៅទូទាំងពិភពលោក។ ក្រុមអ្នកវិភាគជឿជាក់ថា ការយកពន្ធថ្មីនេះគឺសំដៅដោយផ្ទាល់ទៅលើក្រុមហ៊ុនបច្ចេកវិទ្យាអាមេរិក ដូចជាហ្វេសប៊ុក អេបផល និងអាម៉ាហ្សូន។

លោក Trump បានបង្ខំប្រធានាធិបតីបារាំង Emmanuel Macron ឱ្យលោកយល់ព្រមពន្យារពេលពន្ធឌីជីថលទៅក្រុមហ៊ុនបច្ចេកវិទ្យាអាមេរិករហូតដល់ដំណាច់ឆ្នាំ។

រដ្ឋមន្រ្តីក្រសួងហិរញ្ញវត្ថុបារាំងលោក Bruno Le Maire បានថ្លែងនៅក្នុងកិច្ចប្រជុំសហភាពអឺរ៉ុបនៅទីក្រុងប្រ៊ុចសែលកាលពីថ្ងៃ អង្គារ ថា “លោកMacron និងលោក Trump មានការពិភាក្សាប្រកបដោយលក្ខណៈស្ថាបនា ហើយពួកគេបានយល់ព្រមចៀសវាងរាល់ការកើតឡើងរវាងអាមេរិក និងបារាំងលើបញ្ហាពន្ធឌីជីថល”។

លោក Macron បានបង្ហោះសារនៅលើប្រព័ន្ធផ្សព្វផ្សាយសង្គមធ្វីតធឺថា ភាគីទាំងពីរកំពុងធ្វើការជាមួយគ្នាដើម្បីស្វែងរកដំណោះស្រាយ និងចៀសវាងសង្គ្រាមពាណិជ្ជកម្ម។

លោកបានសរសេរលើបណ្តាញសង្គមថា “មានការពិភាក្សាដ៏អស្ចារ្យជាមួយលោកដូណាល់ត្រាំអំពីពន្ធឌីជីថល។ យើងនឹងធ្វើការរួមគ្នាលើកិច្ចព្រមព្រៀងដ៏ល្អមួយដើម្បីចៀសវាងការដំឡើងពន្ធ”។

លោក Trump បានសរសេរលើទំព័ររបស់លោក Macron ថា “ល្អបំផុត!”៕

ដោយវុត្ថា

ភ្នំពេញ៖ រដ្ឋមន្រ្តីក្រសួងពាណិជ្ជកម្មប្រទេសរ៉ូម៉ានី នឹងដឹកនាំគណៈប្រតិភូធុរកិច្ចរ៉ូម៉ានី មកកាន់ប្រទេសកម្ពុជា ដើម្បីស្វែងរកដៃគូពាណិជ្ជកម្មនិងសហការការវិនិយោគជាមួយធុរជនកម្ពុជា លើវិស័យជាច្រើនដូចជា ការកែច្នៃម្ហូបអាហារ កសិកម្ម ប្រេង និង ឧស្ម័ន ជាដើម។

នេះ បើតាមការឱ្យដឹងពីលោកបណ្ឌិត Emil Ghitulescu ឯកអគ្គរដ្ឋទូតប្រទេសរ៉ូម៉ានីប្រចាំកម្ពុជាដែលមាននិវេសនដ្ឋាននៅទីក្រុងហាណូយប្រទេសវៀតណាម នៅក្នុងជំនួបពិភាក្សាការជាមួយលោក ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជាកាលពីថ្ងៃទី ២៣ ខែមករាម្សិលមិញនេះ នៅសភាពាណិជ្ជកម្មកម្ពុជា។

លោកបណ្ឌិត Emil Ghitulescu ឯកអគ្គរដ្ឋទូតប្រទេសរ៉ូម៉ានីប្រចាំកម្ពុជាដែលមាននិវេសនដ្ឋាននៅទីក្រុងហាណូយប្រទេសវៀតណាមឱ្យដឹងថា គោលបំណងនៃជំនួបនេះធ្វើឡើង ដើម្បីពង្រឹងទំនាក់ទំនង ក៏ដូចជាទំហំពាណិជ្ជកម្មនិងការវិនិយោគរវាងប្រទេសកម្ពុជា និងរ៉ូម៉ានី។

លោកបន្តថា ទន្ទឹមនឹងនេះ នាខែមេសាខាងមុខនេះ ប្រទេសរ៉ូម៉ានី នឹងមានការរៀបចំពិព័ណ៌ពាណិជ្ជកម្មនៅប្រទេសវៀតណាម បន្ទាប់ពីពិព័ណ៌នេះ រដ្ឋមន្រ្តីក្រសួងពាណិជ្ជកម្មប្រទេសរ៉ូម៉ានី នឹងដឹកនាំគណៈប្រតិភូធុរកិច្ចរ៉ូម៉ានី មកកាន់ប្រទេសកម្ពុជា ដើម្បីស្វែងរកដៃគូពាណិជ្ជកម្មជាមួយនឹងសមាជិកសភាពាណិជ្ជកម្មកម្ពុជា។

ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជាបានសម្តែងការស្វាគមន៍យ៉ាងកក់ក្តៅចំពោះលោកបណ្ឌិត Emil Ghitulescu។ ឧកញ៉ា អគ្គនាយក ក៏បានស្នើអោយប្រទេសរ៉ូម៉ានី សហការការវិនិយោគជាមួយធុរជនកម្ពុជា លើវិស័យជាច្រើនដូចជា ការកែច្នៃម្ហូបអាហារ កសិកម្ម ប្រេង និង ឧស្ម័ន ជាដើម។

សភាពាណិជ្ជកម្មកម្ពុជា ធ្លាប់បានចុះអនុស្សារណៈយោគយល់ជាមួយសភាពាណិជ្ជកម្មនិងឧស្សាហកម្មរ៉ូម៉ានី នាថ្ងៃទី១០ ខែកក្កដា ឆ្នាំ២០១៧ នៅសភាពាណិជ្ជកម្មនិងឧស្សាហកម្មរ៉ូម៉ានី នាទីក្រុងប៊ូគូរ៉េស ប្រទេសរ៉ូម៉ានី៕