ដោយ ប៊ី

ភ្នំពេញៈ គម្រោងផ្សារទំនើបសរុបចំនួន២០ គ្រោងនឹងបញ្ចប់នៅអំឡុងឆ្នាំ២០២០ ដែលមានទំហំប្រមាណ២៦១,៧៤៦ម៉ែត្រការ៉េ។ នេះបើយោងតាមរបាយការណ៍ចុងក្រោយរបស់ក្រុមហ៊ុនCBRE Cambodia។

របាយការណ៍បានឱ្យដឹងថា ភាគច្រើននៃការផ្គត់ផ្គង់នាពេលខាងមុខ ត្រូវបានចែកជាប្រភេទផ្សារទំនើបដែលមាន៤គម្រោង គ្រោងនឹងចែកចាយទំហំជាង១១៧,០០០ ម៉ែ​ត្រការ៉េនៅឆ្នាំក្រោយ។ ផ្សារសហគមន៍ និងកន្លែងលក់រាយ គ្រោងនឹងចែកចាយទំហំ ១៤៤,៧៤៦ ម៉ែតការ៉េ តាមរយៈសហគមន៍ផ្សារចំនួន១១ និងគំរោងលក់រាយចំនួន៥។

ដោយឡែក គម្រោងចំនួន៣រួមមានផ្សារទំនើប Chip Mong Noro Mall បានបញ្ចប់ក្នុងរយៈពេលត្រីមាសទី៤ ឆ្នាំ២០១៩ ដោយជំរុញទីផ្សារលក់រាយ (សំដៅទៅការជួលតូបនៅក្នុងផ្សារទំនើប) សរុបដល់៣១៤,១៨៧ ម៉ែតការ៉េ កើនឡើង៩,៩% បើធៀបនឹងត្រីមាសមុន។ ផ្នែកផ្សារសហគមន៍Community Mallបានបញ្ចប់ចំនួន២ ហើយពង្រីកបាន ៣៧,៧% ស្របពេលដែលផ្សារលក់រាយបានកើនឡើង១៤៩%។

ក្នុងត្រីមាសទី៤ នៃឆ្នាំ ២០១៩ ការជួលការជួលបានកើនឡើង សម្រាប់ហាងលក់ទំនិញឈានមុខគេមានការកើនឡើង៦ភាគរយ និងហាងលក់រាយមានការកើនឡើង៥ ភាគរយ។ កំណើននៃការជួលនៅក្នុងផ្នែកទាំងនេះ ត្រូវបានគាំទ្រដោយការស្រូបយកចន្លោះធំៗ និងការដំឡើងថ្លៃពីម្ចាស់ដី។

ទន្ទឹមនឹងនេះ បរិមាណនៃការអភិវឌ្ឍសហគមន៍ផ្សារ បានព្យាករណ៍រួមជាមួយនឹងកង្វះសក្តានុពល នៃភាពចម្រុះគ្នាក្នុងចំណោមអ្នកជួល ដែលអាចរកបានបានបន្តដាក់សម្ពាធធ្លាក់ចុះលើថ្លៃជួល ក្នុងផ្នែកដែលអត្រាត្រូវបានកាត់បន្ថយ៣ភាគរយ ក្នុងរយៈពេលនេះ។ ការជួលនៅតាមផ្លូវធំមានស្ថេរភាពក្នុងរយៈពេលនៅក្នុងរយៈពេលនេះ។

អត្រាកន្លែងទំនេរនៃទីផ្សារលក់រាយ បានកើនឡើងបន្តិចនៅចុងឆ្នាំ២០១៩ ដែលកើនឡើង ០,៩% បើប្រៀបធៀបទៅនឹងត្រីមាសនេះដល់១០,៦%៕

ដោយ ៖ រ៉ាណេត

ភ្នំពេញ ៖ គម្រោងនៃការសាងសង់សំណង់អគារទីស្ដីការរបស់ក្រសួងរៀបចំដែនដីរគរូបនីយកម្ម និងសំណង់ ថ្មីមួយទៀតត្រូវបានប្រកាសជាមួយស្ថាបត្យកម្មថ្មីដែលមានវិសាលភាព និងទីធ្លាធំទូលាយជាងអគារទីស្ដីការចាស់ និងអាចធានាក្នុងការជួយសម្រួលដល់ការងារបានយ៉ាងប្រសើរ។

យោងតាមសេចក្តីជូនដំណឹងរបស់ក្រសួងរៀបចំដែនដី ដែលត្រូវបានផុសដោយលោកឧបនាយករដ្ឋមន្រ្តីជា សុផារ៉ា នៅលើបណ្តាញទំនាក់ទំនងរបស់លោកផ្ទាល់កាលពីចុងសប្ដាហ៍កន្លងទៅនេះបានឱ្យដឹងថា ក្រសួងរៀបចំដែនដី នគរូបនីយកម្ម និងសំណង់នឹងរៀបចំពិធីក្រុងពាលី និងចាប់ផ្តើមបើកដំណើរការការដ្ឋានសាងសង់អាគារទីស្តីការថ្មីរបស់ក្រសួងរៀបចំដែនដី នគរូបនីយកម្ម និងសំណង់ចាប់ពីថ្ងៃអង្គារ ៤កើត ខែមាឃ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៨ ខែមករា ឆ្នាំ២០២០ វេលាម៉ោង៧,១៥នាទី ស្ថិតនៅភូមិអន្លង់ក្ងាន សង្កាត់ឃ្មួញ ខ័ណ្ឌសែនសុខ រាជធានីភ្នំពេញ (ខាងកើតក្លោងទ្វារ ហ្គ្រេនភ្នំពេញ ហ្គោលក្លឹប)។

ការសម្រេចសាងសង់សំណង់អគារទីស្ដី ការក្រសួងរៀបចំដែនដីនគរូបនីយកម្ម និងសំណង់ថ្មីនេះ ដោយសារបង្កភាពងាយស្រួល ក្នុងការរៀបចំអង្គពិធីនៃកិច្ចប្រជុំធំៗដែលអាចមានវិសាលភាព សម្រាប់មន្ត្រីក្រសួងបានច្រើននាក់ និងមានទីធ្លាសម្រាប់ចំណតយានយន្តបានច្រើនជាងអគារទីស្ដីការក្រសួងចាស់នាពេលបច្ចុប្បន្ន។

យោងតាមប្រភពព៌តមានពីមន្រ្តីក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា ទីស្តីការក្រសួងរៀបចំដែនដីថ្មី នឹងសាងសង់លើផ្ទៃដី ៣ហិកតា មានកម្ពស់ ៥ជាន់ និងមានផ្ទៃក្រឡាសំណង់ជាង ៥ម៉ឺនម៉ែត្រការ៉េ។ នៅក្នុងគម្រោងអគារនេះ ត្រូវបានបែងចែកចេញជា២ គឺអគារទីស្តីការក្រសួង និងអាគារពិសោធន៍សំណង់៕

ដោយវុត្ថា

ភ្នំពេញ៖ កម្ពុជានាំចេញ ទឹកប្រាក់កើនឡើងចំនួន ២៦៨៨លានដុល្លារអាមេរិក ពីតំបន់សេដ្ឋកិច្ចពិសេសមានទំហំដែលមានកំណើនប្រមាណជា២៧ភាគរយធៀបនឹងឆ្នាំ២០១៨។ នេះ បើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) កាលពីចុងសប្តាហ៍កន្លងមកនេះ។

របាយការណ៍ដដែលបន្តថា គិតត្រឹមឆ្នាំ២០១៩ កន្លងទៅនេះកម្ពុជាមានតំបន់សេដ្ឋកិច្ចពិសេសចំនួន៥៤តំបន់ ក្នុងនោះតំបន់មាន អនុក្រឹត្យចំនួន ៣៥តំបន់ ដែលមានរដ្ឋបាលតំបន់បំពេញការងារជាអចិន្រ្តៃយ៍សរុប១៨តំបន់ មានក្រុមហ៊ុន វិនិយោគចំនួន ៤៦៥ ក្រុមហ៊ុន និងមានកម្មករកំពុងបម្រើការងារចំនួន១២៥,០៩៤នាក់។

ដោយឡែកតំបន់សេដ្ឋកិច្ចពិសេសភ្នំពេញដែលមានទីតាំងក្នុងខណ្ឌកំបូលលើផ្ទៃដី៣៥៣ហិចតា មានក្រុមហ៊ុនវិនិយោគចំនួន១២១ក្រុមហ៊ុន និងប្រើប្រាស់ កម្លាំងពលកម្មប្រមាណជា២១,៧១៧នាក់។

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅក្នុងពិធីចុះពិនិត្យមើលពីស្ថាន ភាពវិនិយោគ និងពាណិជ្ជកម្មនៅតំបន់សេដ្ឋកិច្ចពិសេសភ្នំពេញកាលពេលថ្មីៗនេះដែរបានសម្តែងនូវការអរគុណចំពោះរាល់ដៃគូពាណិជ្ជកម្មសំខាន់ៗនៅក្នុងតំបន់សេដ្ឋកិច្ចពិសេសនេះ ដែលរួមមានក្រុមហ៊ុនមកពីប្រទេសថៃ វៀតណាម ចិន ជប៉ុន ប៊ែលហ្ស៊ិក ហុងកុង ម៉ាឡេស៊ី សិង្ហបុរី សហរដ្ឋអាមេរិក និងហ្វីលីពីនជាដើម។

លោកថា ការដំណើរការរបស់ បណ្តាក្រុមហ៊ុនទាំងនេះ គឺជាការផ្តល់ការងារជូនពលរដ្ឋកម្ពុជាផង និងជាការចូលរួមចំណែកដល់ការអភិវឌ្ឍខាងផ្នែកសេដ្ឋកិច្ចរបស់ប្រទេសកម្ពុជាផង។

រដ្ឋាភិបាលកម្ពុជាបានសម្រេចបង្កើតតំបន់សេដ្ឋកិច្ចជាច្រើន នៅតាមបណ្តាខេត្ត-ក្រុង ដែលមានសក្តាដានុពលសេដ្ឋកិច្ច និងការដឹកជញ្ជូន ក្នុងគោលបំណងលើកទឹកចិត្តពន្ធ និងអាករដល់អ្នកវិនិយោគក្នុងតំបន់នេះ។

បន្ថែមពីនេះ រដ្ឋាភិបាលក៏បានលើកទឹកចិត្តលើការនាំចូល សម្ភារបរិក្ខារផលិតកម្ម សម្ភារសាងសង់ ធាតុចូលផលិតកម្ម ក៏បត្រូវបានសម្រេច ផ្តល់ជូនដល់អ្នកវិនិយោគក្នុងតំបន់តាមសំណូមពរ និងគោលការណ៍នៃច្បាប់ ដោយសាមីអ្នកវិនិយោគ ក្នុងតំបន់នោះ ត្រូវរៀបចំបញ្ជីសម្ភារបរិក្ខារផលិតកម្ម សម្ភារសាងសង់ ធាតុចូលផលិតកម្មដែលត្រូវនាំចូល ទាំងនោះ ដាក់ជូនរដ្ឋបាលតំបន់សេដ្ឋកិច្ចពិសេសពិនិត្យដែលនឹងត្រូវផ្តល់ជូននៅនឹងកន្លែង ហើយរដ្ឋបាល តំបន់សេដ្ឋកិច្ចពិសេសគ្រាន់តែរាយការណ៍ជូនមក គណៈកម្មាធិការតំបន់សេដ្ឋកិច្ចពិសេសកម្ពុជា និងស្ថាប័នគ្រប់គ្រង ដើម្បីជ្រាបជាព័ត៌មានប៉ុណ្ណោះ។

សិទ្ធិដែលត្រូវបានទទួលការលើកទឹកចិត្តផ្នែកសារពើពន្ធនឹងសម្រេចជូនអ្នកវិនិយោគក្នុងតំបន់ នៅក្នុង វិញ្ញាបនបត្រចុះបញ្ជីជាស្ថាពរ ដែលនឹងត្រូវចេញជូនអ្នកវិនិយោគក្នុងតំបន់ ស្របតាមច្បាប់ និងអនុក្រឹត្យ ស្តីពីការអនុវត្តច្បាប់ស្តីពីវិសោធនកម្មនៃច្បាប់វិនិយោគនៃព្រះរាជាណាចក្រកម្ពុជាជាធរមាន៕

ដោយ ៖ រ៉ាណេត

មណ្ឌលគីរី ៖ ជាមួយនឹងគម្រោងផែនការនៃការអភិវឌ្ឍធំៗរបស់រាជរដ្ឋាភិបាលកម្ពុជា ដែលបានប្រកាសកាលពិពេលកន្លងទៅ រួមជាមួយនឹងធនធានដែលមានស្រាប់អំណោយផលដល់វិស័យទេសចរណ៍ផងនោះ បានធ្វើឱ្យខេត្តមណ្ឌលគីរី ទទួលបានការចាប់អារម្មណ៍ពីសំណាក់អ្នកវិនិយោគជាច្រើនរហូតធ្វើឱ្យតម្លៃដីធ្លីមានការកើនឡើងស្ទើរទ្វេដងបើប្រៀបទៅនឹងឆ្នាំកន្លងទៅ។

បច្ចុប្បន្ននេះ សម្រាប់ចរន្តនៃការទិញ-លក់វិស័យដីធ្លីនៅក្នុងខេត្តមណ្ឌលគីរី ត្រូវបានអ្នកជំនាញនៅក្នុងវិស័យមួយនេះអះអាងបញ្ជាក់ថា កំពុងតែមានសកម្មភាពមិនចាញ់ខេត្តមួយចំនួនដែលស្ថិតនៅជាប់តំបន់ភ្នំ និងសមុទ្រនោះទេ ប៉ុន្តែទាស់ត្រង់ថា ការទិញ-លក់ គឺមានទំហំធំ ដែលស្ថិតនៅក្នុងគម្រោងអភិវឌ្ឍន៍លើវិស័យកសិឧស្សាហកម្ម និងតំបន់លំនៅដ្ឋានបែបលំហែរកាយច្រើនជាងតំបន់ពាណិជ្ជកម្ម។

នាយិកាក្រុមហ៊ុនអចលនទ្រព្យអន្តរជាតិ Century21 Cambodia លោកស្រី Grace Rachny Fong បានមានប្រសាសន៍ថា បច្ចុប្បន្ននេះចំពោះការទិញ-លក់អចលនទ្រព្យ ជាពិសេសការវិនិយោគលើវិស័យដីធ្លីគឺមានសកម្មភាពជាងឆ្នាំមុន ហើយតម្លៃក៏មានការកើនឡើងផងដែរ ។ លោកស្រីបានបញ្ជាក់ថា “មណ្ឌលគីរីជាខេត្តមួយដ៏ល្អរបស់កម្ពុជាលើវិស័យទេសចរណ៍ធម្មជាតិខុសពីខេត្តដទៃទៀត ជាពិសេស ក្រោយពេលដែលរដ្ឋាភិបាលមានគម្រោងអភិវឌ្ឍធំៗនៅក្នុងខេត្តមួយនេះ ដូចជាគម្រោងសាងសង់ព្រលានយន្តហោះ រួមជាមនឹងការបង្កើតគណកម្មការអន្តរក្រសួង សិក្សាពីលទ្ធភាពរៀបចំផែនការមេសម្រាប់អភិវឌ្ឍន៍នៅទូទាំងខេត្ត វាកាន់តែធ្វើឱ្យខេត្តមួយនេះមានភាពទាក់ទាញខ្លាំង ហើយក៏ជំរុញឱ្យវិស័យអចលនទ្រព្យចាប់ផ្តើមកម្រើកផងដែរ”។

លោកស្រីបានបន្តទៀតថា “ជាធម្មតានៅពេលដែលមានការអភិវឌ្ឍហេដ្ឋារចនាសម្ព័ន្ធកាន់តែច្រើន កំណើនសេដ្ឋកិច្ចក្នុងតំបន់ក៏កាន់តែល្អប្រសើរ ដែលធ្វើឱ្យប្រជាជនលទ្ធភាពធូរធារ។ ដោយឡែកជាមួយនឹងវត្តមាននៃព្រលានយន្តហោះ រួមនឹងគម្រោងអភិវឌ្ឍតំបន់មួយចំនួនជាទីកម្សាន្តបែបធម្មជាតិ វានឹងធ្វើឱ្យខេត្តមួយនេះមានភាពទាក់ទាញ និងអភិវឌ្ឍន៍លឿន ដែលអាចគៀងគរនូវចំនួនភ្ញៀវទេសចរ ក៏ដូចជាចំនួនអ្នកវិនិយោគទៅកាន់ខេត្តនេះកាន់តែច្រើន។ ដោយឡែកចំពោះតម្លៃដីដែលមានវិសាលភាពសម្រាប់អភិវឌ្ឍជាតំបន់កម្សាន្តកែច្នៃបែបធម្មជាតិ និងបង្កើតជាតំបន់កសិឧ្សាហកម្ម បានកើនឡើងស្ទើរតែគុណនឹង២ដង បើប្រៀបធៀបទៅនឹងឆ្នាំកន្លងទៅ”។ អ្នកស្រីបញ្ជាក់ថា “ចំពោះតម្លៃដី វាមិនដូចគ្នានោះទេ ដែលអាស្រ័យទៅតាមតំបន់ដែមានតម្រូវការ ទំហំ និងស្ថានភាពរបស់ដី ប៉ុន្តែទីតាំងដែលមានសក្ដានុពល គឺស្ថិតនៅតំបន់ភ្នំ តំបន់ជ្រោះ និងមានស្ទឹងតូចធំ ឆ្លងកាត់”។

រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានមានប្រសាសន៍ថាកាលពីចុងសប្ដាហ៍មុននេះថា សម្រាប់ខេត្តមណ្ឌលគីរី ត្រូវបានរាជរដ្ឋាភិបាលកម្ពុជា ចុះហត្ថលេខាដោយសម្ដេចតេជោ ហ៊ុន សែន កាលពីថ្ងៃទី១៥ ខែមករា ឆ្នាំ២០២០ សម្រេចឱ្យបង្កើតគណៈកម្មការអន្តរក្រសួង សិក្សាពីលទ្ធភាពក្នុងការរៀបចំផែនការមេសម្រាប់ធ្វើការអភិវឌ្ឍដែលផ្តោតសំខាន់ទៅលើវិស័យទេសចរណ៍ប្រកបដោយចីយរភាព និងលើកទឹកចិត្តដល់វិស័យឯកជនឱ្យមានការចូលរួមជាមួយរាជរដ្ឋាភិបាល៕

ដោយ ប៊ី

ភ្នំពេញ៖ ក្រុមហ៊ុនថាមពល B Grimm Power Plc 1 ដែលមានមូលដ្ឋាននៅប្រទេសថៃ និងជាក្រុមហ៊ុនបុត្រសម្ព័ន្ធរបស់ B Grimm Solar Power បានសម្រេចបានការទិញយកគម្រោងថាមពលដើរដោយព្រះអាទិត្យរបស់ក្រុមហ៊ុន Ray Power Supply Co Ltd នៅខេត្តបន្ទាយមានជ័យ។

យោងតាមឯកសារដែលក្រុមហ៊ុ B Grimm Solar Power ចុះផ្សាយក្នុងផ្សារហ៊ុននៅប្រទេសថៃកាលពីម្សិលមិញនេះ ក្រុមហ៊ុន Ray Power ចង់ធ្វើបច្ចុប្បន្នភាពវឌ្ឍនភាព [ប្រតិបត្តិការនេះ] ។ ការផ្ទេរភាគហ៊ុននេះបានបញ្ចប់ជាផ្លូវការ ហើយការយល់ព្រមពីអាជ្ញាធរពាក់ព័ន្ធត្រូវបានផ្តល់ឱ្យក្រុមហ៊ុន។

ក្រុមហ៊ុនបានប្រកាសកាលពីចុងឆ្នាំមុនថា ក្រុមហ៊ុន B Grimm Solar Power 1 បានចុះកិច្ចព្រមព្រៀងទិញភាគហ៊ុនដើម្បីទទួលបានភាគហ៊ុនទាំងអស់ក្រុមហ៊ុន Ray Power ដោយគិតជាទឹកប្រាក់សរុបចំនួន ៣០ ម៉ឺនដុល្លារ។

នាយកប្រតិបត្តិរបស់ប្រទេសថៃលោកស្រី Preeyanart Soontornwata បាននិយាយថា ក្រុមហ៊ុន B Grimm Power បានត្រៀមថវិកាជាង ៣៨,៥ ពាន់លានបាត (១,២៦ ពាន់លានដុល្លារ) សម្រាប់ការវិនិយោគនៅក្នុងគម្រោងថាមពលរបស់ខ្លួនដើម្បីសម្រេចបាន ៥,០០០ មេហ្គាវ៉ាត់នៅត្រឹមឆ្នាំ ២០២២។

បច្ចុប្បន្នក្រុមហ៊ុនកំពុងអភិវឌ្ឍថាមពលកកើតឡើងវិញនៅក្នុងប្រទេសថៃ វៀតណាម ឡាវ កម្ពុជា កូរ៉េខាងត្បូង និងហ្វីលីពីន។
លោកស្រីត្រូវបានគេដកស្រង់សម្តីនៅក្នុងកាសែត The Nation ថា “យើងនឹងផ្តោតលើថាមពលបៃតងដូចជាថាមពលពន្លឺព្រះអាទិត្យ ខ្យល់ និងវារីអគ្គិសនីនៅក្នុងប្រទេសថៃ និងប្រទេសដទៃទៀតនៅតំបន់អាស៊ី”៕

ដោយៈ រ៉ាណេត

ភ្នំពេញៈ ជាទូទៅសម្រាប់សង្គមជំនួញនៅកម្ពុជា ត្រូវបានអ្នកជំនាញមើលឃើញថា ភាគច្រើនអ្នកជំនួញ ដែលមានសមត្ថិភាពតែងធ្វើអ្វីមួយតែម្នាក់ ឬធ្វើឡើងដោយលក្ខណៈឯកោ។ ទង្វើនេះត្រូវបានអ្នកជំនាញលើកឡើងថា វាជារឿងដែលគួរតែលុបបំបាត់ចោល ហើយងាកមករួបរួម និងចេះសហការគ្នាធ្វើជំនួញជាក្រុម ដើម្បីជៀសផុតពីហានិភ័យ និងទទួលបានឱកាសជោគជ័យទាំងអស់គ្នា។

លោកង៉ែត ជូ អ្នកជំនាញផ្នែកសេដ្ឋកិច្ចបានលើកឡើងថា ជាការប្រសើរ ដែលអ្នកជំនួញសម័យថ្មីនេះគួរតែចេះសហការគ្នា រួមគំនិតធ្វើជំនួញជាមួយគ្នា ដើម្បីងាយទទួលបានភាពជោគជ័យទាំងអស់គ្នា។

លោកបន្ថែមទៀតថា “មនុស្សមានសមត្ថភាពជាច្រើននៅរប៉ាត់រប៉ាយ ធ្វើការងាររៀងៗខ្លួន មិនសហការគ្នា ប៉ុន្តែពេលមនុស្សចេះធ្វើការរួមគ្នា រឿងសំខាន់ៗ៣យ៉ាងនឹងកើតឡើង”។

រឿងវិជ្ជមានទាំងបីនោះរួមមាន ទី១ ជំនាញ និងសមត្ថភាពផ្សេងៗគ្នានឹងបំពេញអោយគ្នាបានល្អប្រសើរ។ ទី-២ ធនធានហិរញ្ញវត្ថុដែលមនុស្សម្នាក់ៗ មានក៏អាចត្រូវបានយកទៅប្រើប្រកបដោយប្រសិទ្ធិភាព និងទី៣ ទ្វារនៃឱកាសជាច្រើនក៏ចាប់ផ្តើមបើកស្វា​គមន៍អ្នកដែលមិនសូវមានឱកាសពីមុន។

លោកបានពន្យល់ទៀតថា ជាទូទៅគ្រប់អ្នកជំនួញទាំងអស់ សុទ្ធតែមានគោលដៅរបស់ខ្លួនដូចៗគ្នា ប៉ុន្តែចំពោះកម្រិតនៃសមត្ថភាពគឺមានមិនស្មើគ្នានោះទេ ហើយក៏មិនមានជំនាញគ្រប់មុខ គ្រប់វិស័យនោះដែរ។ ការបង្កើតមុខជំនួញ ហើយប្រឹងដើរតែម្នាក់ឯងគឺមានភាពផុយស្រួយ ប្រថុយប្រថាននឹងហានិភ័យខ្ពស់បំផុត។ ប៉ុន្តែប្រសើនបើអ្នកជំនួញទាំងអស់នោះគាត់ចេះសហការគ្នា រួមចិត្ត រួមគំនិត និងចេះបំពេញនូវតម្រូវការឱ្យគ្នាទៅវិញទៅមក ព្រោះវាគឺជាការបើកឱកាសយ៉ាងទូលាយ ក្នុងការចាប់យកភាពជោគជ័យរួមគ្នា។

ឧទាហរណ៍ ការបើកជំនួញហាងកាហ្វេ ឬភោជនីយដ្ឋានមួយ ម្ចាស់ហាង ដែលជាអ្នកបោះទុន មិនអាចធ្វើប្រតិបត្តិការតែម្នាក់ឯងបាននោះឡើយ ដែលចាំបាច់ត្រូវតែស្វែងរកអ្នកជំនាញ គ្រប់ផ្នែកមកបំពេញតម្រូវការរបស់ហាង ដូចជាអ្នកជំនាញផ្នែកគ្រប់គ្រងធនធានមនុស្ស អ្នកជំនាញផ្នែកគ្រប់គ្រងហិរញ្ញវត្ថុ អ្នកជំនាញផ្នែកគ្រប់គ្រងចង្ក្រាន និងអ្នកជំនាញផ្នែកគ្រប់គ្រងផ្នែកសេវាកម្មជាដើម។
ងាកមកអ្នកជំនួញវិញក៏ដូចជាគ្នា នៅពេលដែលធ្វើការជាក្រុម ធ្វើជំនួញជាក្រុម ក្រៅពីអាចជួយបំពេញនូវចន្លោះខ្វះខាត ឱ្យគ្នាទៅវិញទៅមកហើយនោះ វាថែមទាំងជួយសម្រាលនូវវិបត្តិសេដ្ឋកិច្ច ជៀសផុតពីហានិភ័យខ្ពស់ ហើយនឹងមានឱកាសទទួលបានភាពជោគជ័យលើមុខជំនួញយ៉ាងល្អប្រសើរផងដែរ៕