ដោយៈ រ៉ាណេត
ភ្នំពេញ៖ ជាអ្នកប្រឡូកក្នុងវិស័យអចលនទ្រព្យ ដោយចាប់ផ្តើមអាជីពក្នុងនាមជាភ្នាក់ងារអចលនទ្រព្យសាមញ្ញមួយរូប លោកឧកញ៉ា នួន រិទ្ធីបានពង្រឹងសមត្ថភាពរបស់ខ្លួន និងប្រែក្លាយពីភ្នាក់ងារធម្មតា មកជាថ្នាក់ដឹកនាំក្រុមហ៊ុន ហើយបច្ចុប្បន្នលោកត្រូវបានសាធារណៈជនមួយចំនួនធំ ទទួលស្គាល់ជាអ្នកជំនួញ និងអភិវឌ្ឍន៍ក្នុងវិស័យអចលនទ្រព្យជោគជ័យមួយរូប។
ក្នុងកិច្ចសម្ភាសន៍ពិសេសជាមួយ Propertyarea.asia នាព្រឹកថ្ងៃទី១៦ ធ្នូនេះ អគ្គនាយកក្រុមហ៊ុនអចលនទ្រព្យ KFA (Khmer Foundation Appraisal) រូបនេះបានបង្ហើបពីវិធីសាស្រ្តមួយចំនួន ដើម្បីទទួលបានជោគជ័យក្នុងវិស័យនេះ និងទទួលបានការទទួលលស្គាល់ពីរហូតទទួលបានពានរង្វាន់កម្រិតជាតិ និងអន្តរជាតិជាច្រើនដែលកាន់តែបញ្ជាក់ពីគុណភាព និងកិត្យានុភាពរបស់ក្រុមហ៊ុននៅក្នុងវិស័យមួយនេះ។
កាលពីសប្តាហ៍មុនអគ្គនាយកក្រុមហ៊ុនអចលនទ្រព្យ KFA (Khmer Foundation Appraisal) លោកឧកញ៉ា នួន រិទ្ធី ទទួលបានពានរង្វាន់ក្រុមហ៊ុនអចលនទ្រព្យឆ្នើមប្រចាំឆ្នាំ២០១៩ ចំនួនបីក្នុងពេលតែមួយ។
ជាមួយនឹងភាពម៉ឺងម៉ាត់ ម៉ត់ចត់នឹងការងារ លោកឧកញ៉ាបានលើកឡើងថា “ការធ្វើជំនួញនៅក្នុងវិស័យអចលនទ្រព្យ ដែលអាចទទួលបានភាពជោគជ័យ មិនមែនមានលុយច្រើនតែមួយមុខនោះទេ ប៉ុន្តែចាំបាច់ត្រូវទាមទារឱ្យមានធនធានជាច្រើនទៀតយកមកគួបផ្សំ”។
លោកឧកញ៉ាបានមានប្រសាសន៍ថា “ធនធានសំខាន់ៗដែលចាំបាច់បំផុតនៅក្នុងកិច្ចប្រតិបត្តិការលើមុខជំនួញ ក្នុងវិស័យអចលនទ្រព្យ រួមមានដូចជា ជំនាញ និងភាពវៃឆ្លាត ចំណេះដឹងទូទៅទូលាយ ឆន្ទៈនឹងការងារ ការបង្កើតបណ្តាញ និងទំនាក់ទំនង ការកសាងទំនុកចិត្ត ភាពស្មោះត្រង់ ដើមទុន យុទ្ធសាស្ត្រ រួមជាមួយនឹងដើមទុនបម្រុង”។
ភាពជោគជ័យ ពិតជាមិនអាចកើតឡើងដោយចៃដន្យនោះទេ ប៉ុន្តែទំនាក់ទំនងល្អ មានចំណេះដឹងទូលំទូលាយ និងមានជំនាញពិតប្រាកដ ពិតជាមិនខុសពីពាក្យចាស់លោកបានពោលនោះទេ “គឺចេះប្រាកដ ប្រាក់រត់តាមហៅ”។
លោកឧកញ៉ានួន រិទ្ឋីបានបញ្ជាក់ថា “លទ្ធផលដែលខ្ញុំអាចទទួលបាននៅពេលនេះ មិនមែនកើតឡើងដោយចៃដន្យនោះទេ ប៉ុន្តែវាបានប្រសូត្រចេញពីសកម្មភាពដ៏មមាញឹក និងឆន្ទៈស្របទៅតាមចក្ខុវិស័យ ដែលបានកំណត់ទុកមុនពេលចាប់បោះជំហ៊ានដំណើរការក្រុមហ៊ុន”។ លោកបានបញ្ជាក់ថា “ក្រុមហ៊ុនKFA បានបង្កើតឡើងកាលពីថ្ងៃទី២០ ខែមីនា ឆ្នាំ២០១៥ បន្ទាប់ពីខ្ញុំបានចូលប្រឡូកការងារ នៅក្នុងវិស័យអចលនទ្រព្យអស់ពេល១០ឆ្នាំនៅក្នុងក្រុមហ៊ុនប៊ុណ្ណា រៀលធី គ្រុប”។
ជាមួយនឹងភាពជោគជ័យក្នុងវិស័យជំនួញជាច្រើនក្តី ប៉ុន្តែលោកឧកញ៉ារូបនេះតែងតែប្រកាន់នូវឥរិយាបទសាមញ្ញ ទន់ភ្លន់ និងតែងតែចែករំលែកចំណេះដឹង និងធនធានដល់សង្គម និងមនុស្សជុំវិញខ្លួន។
ទាក់ទងនឹងជីវប្រវត្តិរបស់លោក លោកឧកញ៉ានួន រិទ្ឋីបានរំលឹកថា លោកបានចាប់កំណើតនៅសង្កាត់លេខ៥ នៅក្នុងក្រុមគ្រួសារមួយដែលមានជីវភាពខ្សត់ខ្សោយ ដោយលោកឪពុកជាមន្ត្រីបម្រើការងារ នៅក្នុងមន្ទីររៀបចំដែនដី នគរូបនីយកម្ម និងសំណង់ ហើយម្ដាយជាអ្នកលក់ដូរបន្តិចបន្តួច នៅផ្សារអូឡាំពិក និងមានបងប្អូនបង្កើត៣នាក់ ប្រុសម្នាក់ ស្រី២នាក់ ដោយរូបលោកគឺជាកូនទី២នៅក្នុងគ្រួសារ។
ជាមួយគ្នានេះ ដោយសារតែជីវភាពខ្សត់ខ្សោយ ហើយឪពុកម្ដាយមានវ័យកាន់តែចាស់ ដូច្នេះលោកត្រូវទទួលបន្ទុក និងស៊ូទ្រាំនឹងភាពហត់នឿយ រាប់មិនអស់តាំងពីតូចមកម៉្លេះ។
លោកបានសិក្សានៅសាលាបឋមសិក្សាទួលស្លែង និងអនុវិទ្យាល័យទួលស្វាយព្រៃ ហើយបន្តទៅវិទ្យាល័យព្រះយុគន្ធ មុនពេលចូលរៀនថ្នាក់មហាវិទ្យាល័យន័រតុន ដោយជ្រើសរើសសិក្សាជំនាញវិស្វករ សំណង់ស៊ីវិល ហើយក្រោយមកទៀតបន្តបញ្ចប់ថ្នាក់បរិញ្ញាបត្រជាន់ខ្ពស់ ជំនាញគ្រប់គ្រងជំនួញអន្តរជាតិ នៅសាកលវិទ្យាល័យបៀលប្រាយ។
នៅក្នុងវ័យសិក្សាតាំងពីថ្នាក់ទី៣ រហូតដល់អនុវិទ្យាល័យ លោកធ្លាប់បានឆ្លងកាត់ជីវិតជាក្មេងដើរលក់កាសែតនៅតាមទីប្រជុំជន ភោជនីយដ្ឋាន ហាងកាហ្វេ ជាដើម រួមជាមួយនឹងការបេះផ្លែឈើ ដែលខ្លួនបានដាំយកទៅលក់ ដើម្បីបានចំណូលគ្រាន់សម្រាលបន្ទុកគ្រួសារ។
ភាពលំបាកក្រខ្សត់ទាំងនេះ បានបន្តរហូតដល់លោកចូលរៀននៅថ្នាក់មហាវិទ្យាល័យឆ្នាំទី២ ដែលជាពេលលោកចាប់ផ្តើមទទួលបានការងារលើកដំបូង នៅក្នុងក្រុមហ៊ុនអចលនទ្រព្យ ប៊ុណ្ណា រៀលធី គ្រុប ក្នុងផ្នែកទីផ្សារក្នុងនាមជាអ្នករត់សំបុត្រ។
ក្រោយមក ដោយសារតែអត្តចរឹតភាពម៉ឺងម៉ាត់ និងភាពវៃឆ្លាត លោកត្រូវបានថ្នាក់ដឹកនាំផ្លាស់មកផ្នែកវាយតម្លៃអចលនទ្រព្យទូទាំងប្រទេស ដែលជាការផ្តល់ឱកាសដ៏ល្អសម្រាប់រូបលោក។ បន្ទាប់ពីបានផ្លាស់មកផ្នែកវាយតម្លៃ ផ្អែកតាមលទ្ធផលនៃការងារ លោកត្រូវបានថ្នាក់ដឹកនាំក្រុមហ៊ុន ផ្តល់តួនាទីជាបន្តបន្ទាប់ រហូតដល់ផ្តល់តំណែង ជានាយកប្រតិបត្តិនៅក្នុងក្រុមហ៊ុនអចលនទ្រព្យដ៏ធំមួយនេះ។
លោកឧកញ៉ា នួន រិទ្ធី បានមានប្រសាសន៍បន្តទៀតថា បន្ទាប់ពីបានសិក្សា និងអនុវត្តន៍ជាជំហ៊ានស្របតាមក្ដីប្រាថ្នា និងការរៀបចំគោលទុកតាំងពីវ័យសិក្សានៅថ្នាក់មហាវិទ្យាល័យ នៅត្រឹមថ្ងៃទី២០ខែមីនា ឆ្នាំ២០១៥ លោកក៏បានបង្កើតក្រុមហ៊ុនអចលនទ្រព្យផ្ទាល់ខ្លួនដែលមានឈ្មោះ Khmer Foundation Appraisal ដោយផ្តោតសំខាន់ចំនួន៣ គឺការផ្តល់សេវាវាយតម្លៃ ការវិនិយោគ និងការអភិវឌ្ឍ។
ផ្អែកតាមបទពិសោធន៍ ភាពជាអ្នកជំនាញពិតប្រាកដ ជាពិសេសភាពស្មោះត្រង់ទៅលើការផ្តល់សេវាកម្ម នៅក្នុងរយៈពេលជិត៥ឆ្នាំ ក្រុមហ៊ុន KFA ទទួលបានលទ្ធផលគួជាទីមោទនៈ ដែលក្រៅពីទទួលបានការទទួលស្គាល់ពីបណ្តាអតិថិជន ក្រុមហ៊ុនជាដៃគូជាតិ និងអន្តរជាតិ ក៏ដូចជារដ្ឋាភិបាល បច្ចុប្បន្នក្រុមហ៊ុនអចនទ្រព្យមួយនេះបានសាយភាយកេរ្តិ៍ឈ្មោះរហូតដល់ស្ថាប័នអន្តរជាតិ រួមមានចក្រភពអង់គ្លេស និងសហរដ្ឋអាមេរិក ដែលសម្រេចប្រគល់ពានរង្វាន់ភាពជាអ្នកដឹកនាំឆ្នើម និពានរង្វាន់ក្រុមហ៊ុនអចលនទ្រព្យឆ្នើមឈានមុខគេក្នុងការចូលរួមជួយដល់សង្គមជាតិ កាលពីពេលកន្លងទៅនេះ។
លោកឧកញ៉ា នួន រិទ្ធី បានបញ្ជាក់ទៀតថា ទាំងអស់នេះគឺគ្រាន់តែជាបទពិសោធន៍មួយចំនួនក្នុងនាមជាអ្នកជំនួញ និងជាថ្នាក់ដឹកក្រុមហ៊ុន ក្នុងវិស័យវិស័យអចលនទ្រព្យតែប៉ុណ្ណោះ។
លោកបន្តថា “អ្នកដែលចង់ទទួលបានភាពជោគជ័យ នៅក្នុងវិស័យមួយនេះ មិនចំពោះតែជាភាពជាសហគ្រិន ឬជាបុគ្គលដែលចង់ចូលខ្លួនប្រឡូក នៅក្នុងវិស័យអចលនទ្រព្យចាំបាច់ត្រូវតែមានគោលដៅ ឆន្ទៈ និងចំណេះដឹងជាគោលសំខាន់”។ លោកបន្ថែមថា “បន្ថែមពីនេះអ្នកប្រឡូកក្នុងវិស័យនេះ ត្រូវចេះកសាងបណ្តាញ បង្កើតទំនាក់ទំនង ដើម្បីអាចទទួលបានទំនុកចិត្តពីអ្នកជិតខាង ក៏ដូចជាអតិថិជន ទើបអាចសម្រេចក្ដីប្រាថ្នាបាន”៕
