ចំណេះដឹង! ស្វែងយល់ពីអាជីវកម្មគម្រោងវិនិយោគរួម

ដោយ វុត្ថា

ភ្នំពេញៈ អាជីវកម្មគម្រោងវិនិយោគរួម Collective Investment Scheme គឺជាប្រភេទអាជីវកម្មមួយ ដែលអនុញ្ញាតឱ្យក្រុមហ៊ុនត្រប់ត្រងមូលនិធិ បង្កើតតម្រោងវិនិយោគដើម្បីប្រមូលមូលនិធិ ឬសាច់ប្រាក់ពីវិនិយោគិនយទៅវិនិយោគក្នុងគម្រោង ដែលបានកំណត់និងបែងចែកប្រាក់ចំណេញ ឬអត្ថប្រយោជន៍ត្រលប់មកវិនិយោគិនវិញ។

ដើម្បីអាចដំណើរការអាជីវកម្មតម្រោងវិនិយោគរួម ចាំបាច់ត្រូវមានការចូលរួមពីតួអង្គសំខាន់ៗមួយចំនួនដែលរួមមានជាអាទ៍

• ក្រុមហ៊ុនគ្រប់គ្រងមូលនិធិ (Fund Management)

• ក្រុមហ៊ុនថែរក្សាទ្រព្យសម្បត្តិជំនួស (Trustee)

•ក្រុមហ៊ុនចែកចាយលក់ ទិញត្រលប់មកវិញឬទូទាត់សង (Distribution Company)

• ក្រុមហ៊ុនអភិបាលមូលនិធិ (Fund Administrator)

ក្រុមហ៊ុនគ្រប់គ្រងមូលនិធិ ជាតួអង្គចម្បង ដែលមានតួនាទីក្នុងការបង្កើត គ្រប់គ្រង និងចាត់ចែងគម្រោងវិនិយោគណាមួយ ដែលខ្លួនយល់ថាមានសក្តានុពល មានកាលានុវត្តភាព និងអាចរកប្រាក់ចំណេញបានច្រើនក្នុងការវិនិយោត។ ក្រុមហ៊ុនគ្រប់គ្រងមូលនិធិអាចបោះផ្សាយលក់ឯកតាមូលនិធិរបស់ខ្លួន ទៅកាន់វិនិយោគិន ដែលជាសាធារណជនដើម្បីធ្វើការប្រមួលសាច់ប្រាក់ មកធ្វើការវិនិយោគលើគម្រោង ដែលបានទទួលការអនុ ញ្ញាត។

ការលក់ឯកតាមូលនិធិទៅកាន់វិនិយោគិន អាចធ្វើឡើងដោយក្រុមហ៊ុនគ្រប់គ្រងមូលនិធិផ្ទាល់ ឬធ្វើឡើងដោយក្រុមហ៊ុនចែកចាយលក់ ទិញត្រលប់មកវិញឬទូទាត់សង។ ក្រៅពីតួនាទីជាអ្នកជួយលឯកតាមូលនិធិ ក្រុមហ៊ុនចែកចាយលក់ ទិញត្រលប់មកវិញឬទូទាត់សង ក៏មានតួនាទីក្នុងការទទួលទិញត្រឡប់មកវិញ នូវឯកតាមូលនិធិ ដែលអ្នកវិនិយោគចង់លក់ត្រឡប់ទៅឱ្យក្រុមហ៊ុនវិញផងដែរ។

តម្លៃឯកតាមូលនិធិ អាចមានការប្រែប្រួលពីមួយថ្ងៃទៅមួយថ្ងៃ ដោយសារតម្លៃនៃទ្រព្យសម្បត្តិបរធនវិនិយោគ ដោយសារតម្លៃនៃទ្រព្យសម្បត្តិបរធនវិនិយោគ (Investment Trust Property) អាចមានការប្រែប្រួល។

រាល់សាច់ប្រាក់ដែលក្រុមហ៊ុនគ្រប់គ្រង មូលនិធិប្រមូលបានពីវិនិយោគិនតាមរយៈការបោះផ្សាយលក់ឯកតាមូលនិធិនេះ នឹងមិនត្រូវបានរក្សាទុក ដោយក្រុមហ៊ុនគ្រប់គ្រងមូលនិធិផ្ទាល់នោះទេ ពោលគឺសាច់ប្រាក់ទាំងនោះនឹងត្រូវរក្សាទុក ដោយក្រុមហ៊ុនថែរក្សាទ្រព្យសម្បត្តិជំនួស ដែលជាអ្នកតំណាងនៃភាពជាម្ចាស់កម្មសិទ្ធិស្របច្បាប់ លើទ្រព្យសម្បត្តិទាំងអស់ នៃគម្រោងវិនិយោគ ដោយអនុលោមតាមច្បាប់ និងបទប្បញ្ញត្តិជាធរមានរបស់គណៈកម្មការមូលបត្រកម្ពុជា (គ.ម.ក.)។

ក្រុមហ៊ុនថែរក្សាទ្រព្យសម្បត្តិជំនួស ត្រូវតែជាក្រុមហ៊ុនឯករាជ្យពីក្រុមហ៊ុនគ្រប់គ្រងមូលនិធិ និងត្រូវមានតួនាទីសំខាន់ក្នុងការត្រួតពិនិត្យ និងតាមដានយ៉ាងសកម្ម ព្រមទាំងធានាថាប្រតិបត្តិការ និងការគ្រប់គ្រងគម្រោងវិនិយោគរួម របស់ក្រុមហ៊ុនគ្រប់គ្រងមូលនិធិ ត្រូវធ្វើឡើងដោយអនុលោមតាមច្បាប់ និងបទប្បញ្ញត្តិជាធរមាន៕

អ្នកជំនាញ៖ ខណ្ឌដូនពេញនៅតែជាតំបន់ដែលមានតម្លៃអចលនទ្រព្យខ្ពស់ជាងគេ

ដោយៈរ៉ាណេត

ភ្នំពេញៈ ពីមួយឆ្នាំទៅមួយឆ្នាំ ដោយសារតែកំណើននៃវិស័យអចលនទ្រព្យដូចជាសំណង់លំនៅដ្ឋាន និងមជ្ឈមណ្ឌលពាណិជ្ជកម្មជាដើម បានជម្រុញឱ្យតម្លៃដីមានកំណើនខ្ពស់ ជាពិសេសនៅក្នុងខណ្ឌដូនពេញ ត្រូវបានក្រុមអ្នកជំនាញបញ្ជាក់ប្រាប់ថា មានកម្រិតខ្ពស់ជាងគេ បើប្រៀបធៀបជាមួយបណ្តាខណ្ឌមួយចំនួនដែលស្ថិតជាប់គ្នា។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ឲ្យដឹងកាលពីពេលថ្មីៗនេះថា តម្លៃអចលនទ្រព្យនៅក្នុងខណ្ឌដូនពេញ គឺមានកម្រិតខ្ពស់ ប៉ុន្តែមិនមែនស្មើគ្នាគ្រប់តំបន់នោះទេ ដែលវាក៏អាស្រ័យទៅលើទីតាំងពាណិជ្ជកម្មពិសេស ទំហំ និងស្ថានភាពផ្លូវផងដែរថា។លោកថា ចំពោះតម្លៃដីដែលស្ថិតនៅតាមបណ្តាផ្លូវ និងមហាវិថីសំខាន់ៗក្នុងរាជធានីភ្នំពេញ គឺមានតម្លៃខុសៗពីគ្នា ហើយក៏មិនសូវមានការទិញលក់យ៉ាងគគ្រឹកគគ្រេង ដូចដីនៅតំបន់ផ្សេងទៀតនោះដែរ រហូតត្រូវបានអ្នកជំនួញលើវិស័យមួយនេះចាត់ទុកថា ជាតំបន់ដីកម្រ។

ជាក់ស្ដែងដូចជាតាមបណ្តោយផ្លូវព្រះមុនីវង្ស ដោយរាប់គិតត្រឹមតែពីម្ដុំផ្សារថ្មីមកដល់តំបន់ពេទ្យចិន អាចមានតម្លៃចន្លោះពី៥,០០០ ទៅ៦,០០០ដុល្លារក្នុងមួយម៉ែត្រការ៉េ ហើយប្រសិនបើនៅកាន់កៀគនឹងតំបន់ផ្សារធំថ្មី ឬជុំវិញផ្សារថ្មីកាន់តែមានតម្លៃថ្លៃជាងនេះ។

ដោយឡែកសម្រាប់ដីនៅក្នុងខណ្ឌដូនពេញរួមគ្នា ប៉ុន្តែស្ថិតនៅតាមបណ្តោយផ្លូវព្រះនរោត្តមវិញ ត្រូវបានលោក ស៊ា ឆៃលីន នាយកក្រុមហ៊ុនឆៃលីន ស៊ា រៀលធី ខូអីលធីឌីប្រាប់ឱ្យដឹងថា ខ័ណ្ឌដូនពេញតម្លៃដីហាក់មានភាពខ្ពស់ជាង នៅតាមបណ្តាផ្លូវធំមួយចំនួនទៀត។ លោកបានបញ្ជាក់ថាដីដែលស្ថិតនៅតាមបណ្តោយផ្លូវព្រះនរោត្តម ចាប់ពីវិមានឯករាជ្យ ឆ្ពោះមកកាន់តំបន់វត្តភ្នំពេញ គឺមិនមានដីទំនេរនោះទេ ដែលសូម្បីដីសម្រាប់ធ្វើការអភិវឌ្ឍន៍ជាអគារពាណិជ្ជកម្មត្រឹមទំហំ១ហិកតា ក៏ស្ទើរតែរកមិនបានផង។ តម្លៃដីនៅតាមបណ្តោយផ្លូវមួយនេះ មានកម្រិតខ្ពស់ជាក់ស្ដែងត្រឹមដីទំហំ ២,០០០ ម៉ែត្រការ៉េចុះក្រោម អាចមានតម្លៃរហូតដល់៨០០០ដុល្លារ ឬអាចឈានដល់១០,០០០ ដុល្លារក្នុងមួយម៉ែត្រការ៉េ។ តម្លៃដីធ្លីខ្ពស់ឬទាប វាអាស្រ័យទៅលើទីតាំង ដែលអាចមានភាពអំណោយផលដល់ការធ្វើពាណិជ្ជកម្ម។

ចំណែកលោកសន សៀប នាយកក្រុមហ៊ុន Key Real Estate Co,.Ltd ក៏បានប្រាប់ឱ្យដឹងផងដែរថា ចំពោះដីដែលស្ថិតនៅតាម រុក្ខវិថិក្រមួនស ដែលជាតំបន់ប្រមូលផ្តុំដោយស្ថាប័នធនាគារឯកទេស ធនាគារពាណិជ្ជ ក៏ដូចជាស្ថាប័នមីក្រូហិរញ្ញវត្ថុជាដើម។លោកបន្តថា ចាប់គិតពីចំណុចស្តុបធនាគារកាណាឌីយ៉ា រហូតដល់ស្តុបមន្ទីរពេទ្យអង្គឌួង បច្ចុប្បន្ន ក៏មានតម្លៃខ្ពស់ផងដែរ ពោលគឺគិតជាមធ្យមមានចន្លោះចាប់ពី៦,០០០ ទៅ ៧,០០០ដុល្លារក្នុងមួយម៉ែត្រការ៉េ៕

រដ្ឋាភិបាលសម្រេចអនុម័តលើគម្រោងអាជីវកម្មថ្មសំណង់ថ្មីមួយទៀតនៅខេត្តកំពត

ដោយ ៖ រ៉ាណេត

ភ្នំពេញ ៖ គម្រោងអាជីវកម្មថ្មសំណង់ថ្មីមួយទៀតក្រោមការវិនិយោគពីសំណាក់ក្រុមហ៊ុនក្នុងស្រុក នៅលើផ្ទៃដីទំហំជិត១៦ហិកតា ស្ថិតនៅក្នុងខេត្តកំពត ត្រូវបានរដ្ឋាភិបាលសម្រេចអនុម័ត និងគាំទ្រឱ្យចាប់ដំណើរការទៅតាមការស្មើសុំបន្ទាប់ពីឆ្លងកាត់កិច្ចប្រជុំអន្តរក្រសួងដែលពាក់ព័ន្ធ។

នៅទីស្តីការក្រសួងបរិស្ថាននាថ្ងៃទី១២ ខែធ្នូ ឆ្នាំ២០១៩ នេះ ក្រោមការដឹកនាំប្រជុំអន្តរក្រសួង ដោយលោក នេត ភក្ត្រា រដ្ឋលេខាធិកាក្រសួងបរិស្ថាន ស្តីពីការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA) សម្រាប់គម្រោងអាជីវកម្មថ្មសំណង់ លើផ្ទៃដីទំហំ ១៥,៩០ហិកតា នៅក្នុងខេត្តកំពត ត្រូវបានសម្រេចគាំទ្រ និងអនុម័តឱ្យដំណើរការ ប៉ុន្តែត្រូវស្ថិតក្រោមការគ្រប់គ្រង និងអនុវត្តទៅតាមច្បាប់។

ទីតាំងគម្រោងអាជីវកម្មថ្មសំណង់មួយនេះ មានទីតាំងស្ថិតនៅតំបន់ភ្នំស្យា ក្នុងភូមិសាស្រ្តភូមិត្រពាំងរាំង ឃុំតានី ស្រុកអង្គរជ័យ ខេត្តកំពត ក្រោមការវិនិយោគរបស់ក្រុមហ៊ុន CHH INVESTMENT CO,. LTD (ម្ចាស់គម្រោង) សិក្សា និងរៀបចំរបាយការណ៍វាយតម្លៃដោយក្រុមហ៊ុនទីប្រឹក្សា អ ធី អិម ហ្រ្គីន ខនសាល់ធេនស៊ី ឯ.ក ។

កិច្ចប្រជុំនេះ មានសមាសភាពចូលរួមពីតំណាងអគ្គនាយកដ្ឋានពាក់ព័ន្ធ នៃក្រសួងបរិស្ថាន អគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍ដោយចីរភាព តំណាងអន្តរក្រសួងពាក់ព័ន្ធក្រុមប្រឹក្សាអភិវឌ្ឍន៍កម្ពុជា រដ្ឋបាលខេត្តកំពត មន្ទីរបរិស្ថានខេត្តកំពត អង្គការ DPA នាយកដ្ឋានវាយតម្លៃហេតុប៉ះពាល់បរិស្ថាននៃក្រសួងបរិស្ថាន តំណាងម្ចាស់គម្រោង និងក្រុមហ៊ុនទីប្រឹក្សា សរុបប្រមាណ ៣៦នាក់។

បន្ទាប់ពីឆ្លងកាត់កិច្ចប្រជុំ បានសម្រេចគាំទ្រក្រុមហ៊ុនឱ្យចាប់ដំណើរការអាជីវកម្ម ប៉ុន្តែត្រូវស្ថិតនៅក្រោមការគ្រប់គ្រង និងអនុវត្តទៅតាមច្បាប់កំណត់ ជាពិសេស ផ្នែកបរិស្ថាន និងសុខសុវត្ថិភាពរបស់បុគ្គលិក កម្មករ ក៏ដូចជាអ្នកដែលពាក់ព័ន្ធជាមួយនឹងគម្រោងអាជីវកម្មផងដែរ៕

មន្ត្រីជាន់ខ្ពស់ក្រសួងសេដ្ឋកិច្ច៖ ការរៀបចំ និងការអភិវឌ្ឍទីក្រុងត្រូវតែឈរលើគោលការណ៍ចំនួន៤

ដោយ វុត្ថា

ភ្នំពេញៈ មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ការអភិវឌ្ឍទីក្រុង ត្រូវបានចាត់ទុកជាវិស័យអាទិភាពមួយ ហើយនឹងក្លាយជាកម្លាំងចលចរ សម្រាប់ទ្រទ្រង់កំណើនសេដ្ឋកិច្ចនៅក្នុងរយៈពេលវែង។

លោកវង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុនៅក្នុង វេទិកាស្តីពី ការអភិវឌ្ឍហេដ្ឋារចនាសម្ព័ន្ធទីក្រុង (Forum on Urban Infrastructure Development) កាលពីថ្ងៃទី១១ ខែធ្នូឆ្នាំ ២០១៩ ម្សលមិញនេះឱ្យដឹងថា ការគិតគូរជាយុទ្ធសាស្រ្ត ក្នុងការរៀបចំ និងការអភិវឌ្ឍទីក្រុង ត្រូវតែឈរលើគោលការណ៍ចំនួន៤រួមមាន ទី១៖ ការតភ្ជាប់ និងច្រករបៀងសេដ្ឋកិច្ចទីក្រុង ដោយផ្អែកលើខ្សែសង្វាក់តម្លៃ នៃផលិតកម្ម និងសេវាកម្ម។

ទី២ ការបង្កើតការងារ ទី៣ ការធ្វើសមាហរណកម្មសង្គម និងបរិយាប័ន្ន (Social Integration and Inclusiveness) និងទី៤ ការគ្រប់គ្រងបរិស្ថាន និងការទប់ទល់បានទៅនឹងគ្រោះមហន្តរាយធម្មជាតិ និងទី៥ ការប្រើប្រាស់បច្ចេកវិទ្យាវៃឆ្លាត ក្នុងការគ្រប់គ្រងទីក្រុង។

លោកវង្សី វិស្សុតបានបន្តថា “ជានិន្នាការនៅក្នុងរយៈពេលវែង ការតភ្ជាប់រវាងទីក្រុងនឹងទីក្រុងនឹងក្លាយជាកម្លំាង ចលករអូសកំណើនសេដ្ឋកិច្ចដ៏សំខាន់ ហើយនៅពេលដែលប្រទេសកាន់តែរីកចម្រើនថែមទៀត”។ លោកបន្តថា“យើងអាចនិបាយបានថា ទីក្រុងគឺជាកម្លាំងសេដ្ឋកិច្ចជាតិ”។

តាមការសិក្សាថ្មីៗនេះ បានបង្ហាញឱ្យឃើញថា កម្ពុជាកំពុងប្រឈមនូវបញ្ហាចំនួន៤ក្នុងការអភិវឌ្ឍហេដ្ឋារចនាសម្ព័ន្ធទីក្រុងគឺ ១) បញ្ហាធនធានមនុស្ស និងសមត្ថភាពស្ថាប័ន ដែលនៅមិនទាន់អាចឆ្លើយតបនឹងទៅនឹងកំណើន ដ៏ឆាប់រហ័សនៃការអភិវឌ្ឍទីក្រុង។ ២) ការខ្វះខាតនូវហេដ្ឋារចនាសម្ព័ន្ធចាំបាច់មួយចំនួន សម្រាប់បម្រើឱ្យសេចក្តីត្រូវការរបស់ប្រជាពលរដ្ឋនៅក្នុងទីក្រុង និងតម្រូវការធនធានវិនិយោគដ៏ធំធេង ខណៈដែលប្រភពចំណូលនៅមូលដ្ឋានមានភាពតិចតួចនៅឡើយ។ ៣) ការកើនឡើងនៃការតាំងទីលំនៅថ្មីនៅក្នុងទីក្រុងយ៉ាងគំហុក អាចនឹងបង្កឱ្យមានបញ្ហាវិសមភាពផងដែរ ទាំងនៅក្នុងទីក្រុង និងទាំងរវាងទីក្រុង និងទីជនបទ និង៤) បញ្ហាភាពធន់របស់ហេដ្ឋារចនាសម្ព័ន្ធក្រុងនឹងទៅគ្រោះមហន្តរាយផ្សេងៗ ដូចជាការជន់លិចទឹកក្នុងក្រុងជាដើម។

លោកវង្សី វិស្សុតបានបន្តទៀតថា «ការកសាងទីក្រុងគួរចង់រស់នៅ» ជានិន្នាការមួយដែលបាន និងកំពុងរៀបចំ ហើយមានការអនុវត្តពាសពេញពិភពលោក ដើម្បីជំរុញកំណើនសេដ្ឋកិច្ច ដែលមានភាពធន់ និងប្រកបដោយចីរភាព។

លោកបានសង្កត់ធ្ងន់ថា «ដើម្បីអាចសម្រេចបាននូវការកសាងទីក្រុង ដែលចង់រស់នៅ ប្រកបដោយជោគជ័យ យើងចាំបាច់ត្រូវមានការផ្លាស់ប្តូរផ្នត់គំនិតរបៀបចាស់ ទាំងប្រជាពលរដ្ឋទូទៅ និងទាំងអ្នកដឹកនាំ ក្នុងវិស័យសាធារណៈ និងវិស័យឯកជន ហើយសម្របខ្លួនទៅនឹងបម្រែបម្រួលថ្មី ដើម្បីធ្វើឱ្យការរស់នៅកាន់តែប្រសើរឡើង”។ លោកបន្តថា “យើងត្រូវចាប់ផ្តើមផ្លាស់ប្តូរផ្នត់គំនិតនេះ ទាំងតាមរយៈការអប់រំនៅក្នុងថ្នាក់រៀន និងនៅក្នុងគ្រួសារ ក៏ដូចជាតាមរយៈការផ្សព្វផ្សាយតាមប្រព័ន្ធបណ្តាញសង្គមផងដែរ ដើម្បីសម្លឹងមើលការរស់នៅរបស់យើង នៅក្នុងរយៈពេលពី១០ ទៅ២០ឆ្នាំខាងមុខ នៅក្នុងបរិការណ៍នៃនវានុវត្តន៍ផ្នែកបច្ចេកវិទ្យា ការប្រែប្រួលអាកាសធាតុ ការលេចឡើងនូវប្រភពកំណើនថ្មី និងបញ្ហាជំនាញ និងការងារជាដើម»។ល។”។

លោករដ្ឋលេខាធិការប្រចាំការ បានគូសរំលេចនូវមូលដ្ឋានជាយុទ្ធសាស្ត្រចំនួន៣ សម្រាប់ត្រីវិស័យបង្ហាញផ្លូវពាក់ព័ន្ធ ក្នុងការអភិវឌ្ឍទីក្រុង ដែលរួមមាន ទី១ ត្រូវតែរៀបចំផែនការមេអភិវឌ្ឍន៍ទីក្រុង ហើយផ្អែកលើផែនការមេនេះ ត្រូវរៀបចំផែនការវិនិយោគហេដ្ឋារចនាសម្ព័ន្ធទីក្រុងប្រទាក់ក្រឡា និងមានលក្ខណៈជាប្រព័ន្ធ ដោយរួមបញ្ចូលទាំងការអភិវឌ្ឍហេដ្ឋារចនាសម្ព័ន្ធផ្លូវ អគ្គិសនី ទឹកស្អាត ប្រព័ន្ធបណ្តាញឌីជីថល និងការគ្រប់គ្រងកាកសំណល់រឹង និងទឹកកខ្វក់ជាដើម។ល។

ទី២ ត្រូវមានការរៀបចំស្ថាប័ន ដើម្បីកំណត់តួនាទីភារកិច្ចរបស់ស្ថាប័ននីមួយៗ ឱ្យបានច្បាស់លាស់ ក្នុងគោលដៅគ្រប់គ្រង ប្រតិបត្តិការ និងថែទាំ សមិទ្ធផលទទួលបានពីការវិនិយោគ ព្រមទាំងការកសាងសមត្ថភាពមន្ត្រីទទួលបន្ទុកផងដែរ។ ទី៣ ការរៀបចំយន្តការប្រមូលចំណូល (cost recovery) ប្រកបដោយសមធម៌និងនិរន្តរភាព សម្រាប់ទូទាត់លើចំណាយវិនិយោគ។

លោកបានបន្តថា រាជរដ្ឋាភិបាលកំពុងគិគូរ រៀបចំយន្តការហិញ្ញប្បទាន វិស័យហេដ្ឋារចនាសម្ព័ន្ធ ដោយរួមបញ្ចូលទាំងហេដ្ឋារចនាសម្ព័ន្ធទីក្រុងផងដែរ ដើម្បីធានាដល់និរន្តភាព នៃប្រភពហិរញ្ញប្បទានផង ហើយធានាបាននូវយុត្តិធម៌សង្គមផង។ ជាទស្សនទានរួម នៃការអភិវឌ្ឍទីក្រុង គឺទីក្រុងត្រូវតែរ៉ាប់រង ការចំណាយអភិវឌ្ឍន៍នេះដោយខ្លួនឯង ហើយយើងមិនចង់ឃើញប្រជាពលរដ្ឋ នៅទីជនបទត្រូវរែកពន់នូវអំរែក នៃការចំណាយនេះដែរឡើយ។

ក្នុងន័យនេះ ទីក្រុងគួរខិតខំធ្វើស្វ័យហិរញ្ញប្បទានដោយខ្លួនឯង តាមរយៈការស្វែងរកប្រភពចំណូលពីការគ្រប់គ្រង និងការអភិវឌ្ឍទីផ្សារដីធ្លីនៅក្នុងតំបន់របស់ខ្លួន ការយកពន្ធនៅតាមមូលដ្ឋាន ពិសេសពន្ធលើអចលនទ្រព្យ និងការបង់ថ្លៃពីអ្នកប្រើប្រាស់ ព្រមទាំងការផ្ទេរធនធានពីថ្នាក់ជាតិ ក្នុងករណីចាំបាច់។

លោករដ្ឋលេខាធិការប្រចាំការបានស្នើដល់ ADB ឱ្យពន្លាតការចូលរួម នៅក្នុងការអភិវឌ្ឍទីក្រុងរបស់ខ្លួន ឱ្យបានទៅដល់ទីក្រុងផ្សេងៗទៀត ដោយពុំគួរផ្តោតតែទៅលើទីក្រុងធំៗ ឬទីក្រុងថ្នាក់ទី១ (Metropolitan or First Tier City)ទេ ពោលគឺត្រូវផ្តោតទៅលើទីក្រុងថ្នាក់ទី២ (Second Tier City) និង ថ្នាក់ទី៣ (Third Tier City) ផងដែរ។ ការធ្វើដូចនេះ គឺដើម្បីចូលរួមចំណែកកាត់បន្ថយអត្រាតាំងទីលំនៅថ្មី នៅក្នុងទីក្រុងភ្នំពេញ ហើយបង្វែរទិសដៅឱ្យទៅកាន់តំបន់ ឬទីក្រុងផ្សេងៗទៀត តាមរយៈយុទ្ធសាស្ត្របង្កើតការងារ និងការបង្កើតលំនៅឋានគួរឱ្យចង់រស់នៅ៕

សម្ដេចតេជោ ហ៊ុន សែន៖ ផ្លូវល្បឿនលឿនភ្នំពេញ-ព្រះសីហនុនឹងសាងសង់បញ្ចប់នៅឆ្នាំ២០២២

ដោយ ប៊ី

ភ្នំពេញៈ សម្ដេចតេជោហ៊ុន សែន បានបញ្ជាក់ថា ល្បឿនលឿនភ្នំពេញ-ព្រះសីហនុកំពុងដំណើរការយ៉ោងសកម្ម ដែលមកទល់ខែធ្នូ២០១៩នេះ ដែលបច្ចុប្បន្នសម្រេចបានជាង៧% ហើយ ហើយផ្លូវនេះគ្រោងសាងសង់អោយរួចជាស្ថាពរនៅឆ្នាំ ២០២២ មុនប្រារព្ឋបើកកីឡាស៊ីហ្គេម (Sea Games) ជាប្រវត្តិសាស្រ្តនៅកម្ពុជាក្នុងឆ្នាំ ២០២៣។

ចាប់តាំងពីកម្ពុជាមានសុខសន្តិភាពពេញលេញមក ល្បឿននៃការកសាងប្រទេសជាតិក៏កាន់តែដើរលឿនទៅមុខ។ ក្នុងមួយរយៈពេលដ៏ខ្លីចុងក្រោយនេះ គឺកម្ពុជាបានសាងសង់ហេដ្ធារចនាសម្ព័ន្ឋជាច្រើនមានផ្លូវ ថ្នល់តូចធំ និងស្ពានកាត់ទន្លេ និងស្ពានអាកាសជាច្រើន ដើម្បីសម្រួលដល់ការធ្វើដំណើរ និងការប្រកបអាជីវកម្មតូចធំនៅពាសពេញប្រទេសកម្ពុជា។

សម្ដេចតេជោហ៊ុន សែន បានសរសេរបណ្តាញសង្គម Facebook ផ្លូវការថា “ទន្ទឹមនឹងនេះដែរ ការសាងសង់ “ផ្លូវល្បឿនលឿនភ្នំពេញ-ព្រះសីហនុ” គឺកំពុងដំណើរការយ៉ោងសកម្ម ដែលមកទល់ខែធ្នូ២០១៩នេះ”។

សម្តេចបានបន្តថា “ការសាងសង់បណ្តាញផ្លូវល្បឿនលឿន (Expressway) នេះគឺនឹងជួយពង្រឹងសមត្ថភាពបណ្តាញផ្លូវនៅកម្ពុជា ព្រោះផ្លូវល្បឿនលឿនអាចបម្រើសេវាកម្មដឹកជញ្ជូនបានល្អលឿនរហ័សទាន់ពេល និងចំណេញពេលវេលាដឹកជញ្ជូន ជាងផ្លូវធម្មតា ដែលជាមូលដ្ឋានដ៏សំខាន់បំផុត សម្រាប់បម្រើអោយវិស័យឧស្សាហកម្មទំនើបៗ និងសកម្មភាពដឹកជញ្ជូនធន់ធ្ងន់ក្នុងកម្រិតអន្តរជាតិផងដែរ”។

ការសាងសង់ផ្លូវល្បឿនលឿននៅកម្ពុជា (Expressway) គឺស្របទៅនឹងសមាហរណកម្មក្នុងតំបន់ទាំងក្នុងអាស៊ាន និងមហាអនុតំបន់ទន្លេមេគង្គ នឹងពិភពលោកទាំងមូល ដែលនឹងជួយតភា្ជប់បណ្តាញដឹកជញ្ជូន ក្នុងតំបន់ពីប្រទេសមួយទៅប្រទេសមួយទៀត និងជាការលើកកម្ពស់សមត្ថភាពដឹកជញ្ជូនកម្ពុជា ឲ្យសមស្របទៅតាមការអភិវឌ្ឍបែបសាកលភាវូបនីយកម្ម ព្រមទាំងជួយបង្កើននូវតុល្យភាព នៃការអភិវឌ្ឍដែនដី ដោយផ្សារភ្ជាប់រាជធានីភ្នំពេញជាមួយនឹងទីរួមខេត្តនានា និងជាមាគ៌ាដ៏សំខាន់ឆ្ពោះទៅកាន់ពិភពលោកទៀតផង។

ព្រះរាជាណាចក្រកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចតេជោហ៊ុន សែន នាយករដ្ធមន្រ្តី នឹងកាន់តែរីកចម្រើនលឿនទៅមុខ ដែលផ្តល់នូវផលប្រយោជន៍កាន់តែច្រើនឡើងដល់បងប្អូនប្រជាពលរដ្ធនៅទូទាំងប្រទេស៕

បុរីប៉េង ហួតបើកសម្ភោធគំរោងថ្មីជាមួយផ្ទៃដីទំហំធំជាង ១០០ហិកតា

ដោយ រតនៈ

ភ្នំពេញៈ បុរីប៉េង ហួតបានប្រកាសបើកសម្ភោធគំរោងថ្មី ដែលមានទំហំធំជាង១០០ហិកតា បន្ទាប់ពីទទួលបានជោគជ័យ និងទទួលបានការគាំទ្រពីអតិថិជន ពីគម្រោងធំហ្គ្រេនស្តាផ្លាទីនីម ដំណាក់កាលទី១ នាពេលកន្លងមក។

គំរោងដ៏ធំនេះ បានបើកសម្ភោធនាព្រឹកថ្ងៃទី១២ ខែធ្នូ ឆ្នាំ២០១៩ បុរី ប៉េង ហួត បានប្រារព្ធពិធីបើកសម្ពោធជាផ្លូវការគម្រោងហ្គ្រេន ស្តាផ្លាទីនីម ដំណាក់កាលទី២ “អេកូ ខលឡិកសិន” ក្នុងមហាព្រឹត្តិការណ៍ “ភាពឥតខ្ចោះនៃជីវិតរស់នៅក្នុងដែនបៃតង” ដើម្បីផ្តល់ជូនអតិថិជននូវការរស់នៅក្នុងបរិយាកាសធម្មជាតិពិតៗ និងទំនើបទាន់សម័យ។ មហាព្រឹត្តិការណ៍នេះ ប្រារព្ធឡើងនៅទីតាំងទល់មុខផ្ទះគំរូវីឡា King A ថ្មីស្ថិតនៅលើរុក្ខវិថី រ៉ូសាតូ ក្នុងគម្រោង បុរី ប៉េង ហួត ហ្គ្រេនស្តាផ្លាទីនីម (បឹងស្នោ) ចម្ងាយត្រឹមតែ៥នាទី ប៉ុណ្ណោះពីស្ពានព្រះមុនីវង្ស (ច្បារអំពៅ) ចាប់ពីថ្ងៃទី១២ ដល់ថ្ងៃទី១៥ ខែធ្នូ ឆ្នាំ២០១៩ វេលាម៉ោង៩:០០ នាទីព្រឹក ដល់ម៉ោង៩:០០ នាទីយប់។

ថ្លែងក្នុងពិធីបើកសម្ពោធជាផ្លូវការនេះ លោកជំទាវហុង ដានី អគ្គនាយិកា ក្រុមហ៊ុន បុរី ប៉េង ហួត បានមានប្រសាសន៍បញ្ជាក់ថា ”ក្រុមហ៊ុន បុរី ប៉េង ហួត មានមោទនភាពក្រៃលែង ដែលបាននាំមកជូនលោកអ្នកនូវគម្រោងថ្មីទាំងពីរនេះ គឺជាគម្រោងអភិវឌ្ឍលំនៅឋានទំនើបចម្រុះ ក្នុងចំណោមគម្រោងទាំង៦ នៃគម្រោងធំហ្រ្គេនស្តា ផ្លាទីនីម ដំណាក់កាលទី២“អេកូ ខលឡិកសិន” និងលាតសន្ធឹងលើផ្ទៃដីជាង១០០ហិកតា។ ជាមួយគម្រោងដឹស្តា ផ្លាទីនីម អេកូមេឡូឌី និងដឹស្តា ផ្លាទីនីមអេកូឌែលតា អតិថិជនទាំងអស់នឹងទទួលបាននូវបទពិសោធន៍រស់នៅបែបទំនើប អមជាមួយធម្មជាតិចំរុះដ៏ស្រស់បំព្រង និងកន្លែងកម្សាន្តដ៏សម្បូរបែបជាច្រើន។

លោកជំទាវបានបន្តទៀតថា “គម្រោងថ្មីទាំងពីរនេះ ជាគម្រោងចុងក្រោយបំផុតសម្រាប់ឆ្នាំ២០១៩ ដែលក្រុមហ៊ុនបុរី ប៉េង ហួត បានអភិវឌ្ឍឡើងដើម្បីស្វាគមន៍ឆ្នាំថ្មី ២០២០ ក៏ដូចជាចូលរួមចំណែកដល់ការអភិវឌ្ឍសេដ្ឋកិច្ចជាតិ តាមរយៈវិស័យអចលនទ្រព្យ ដែលផ្តល់ជូននូវភាពសម្បូរបែបនៃការរស់នៅបែបថ្មី កាន់តែទំនើប និងឲ្យស្របទៅនឹងពាក្យស្លោករបស់ក្រុមហ៊ុនយើងខ្ញុំ “ប៉េងហួត ធ្វើឲ្យជីវិតលោកអ្នកកាន់តែមានន័យ ”។

ក្នុងមហាព្រឹត្តិការណ៍ដ៏ពិសេសនេះផងដែរ អតិថិជនគ្រាន់តែជាវផ្ទះពីគម្រោងហ្គ្រេន ស្តាផ្លាទីនីម វគ្គ២ “អេកូ ខលឡិកសិន” រឺ គម្រោងណាមួយរបស់បុរី ប៉េង ហួត លោកអ្នកនឹងទទួលបានសំណាងយ៉ាងសន្ធឹកសន្ធាប់ ដូចជា: សំណាងទី១ ពីស្លឹកបព្ចាលាភ នោះគឺ ការបញ្ចុះតម្លៃរហូតដល់២០ម៉ឺនដុល្លារ នេះជាការផ្តល់ជូនដ៏អស្ចារ្យដែលលោកអ្នក នឹកស្មានមិនដល់។

សំណាងទី២ ពីស្លឹកបព្ចាលាភ គឺគ្រាន់តែចូលរួមក្នុងកម្មវិធី នឹងមានឱកាសឈ្នះរង្វាន់ធំ ទូរសព្ទដៃ iPhone 11 Pro Max និង រង្វាន់ជាច្រើនទៀត។ លោក អ្នកនឹងអាចទទួលបាននៅ សំណាងពីស្លឹកបព្ចាលាភ៣ផ្សេងទៀត នៅក្នុងមហាព្រឹត្តការណ៍នេះផ្ទាល់ផងដែរ។ សូមរួសរាន់ឡើង ការផ្តល់ជូនពិសេសនេះ មានកំណត់ត្រឹមតែថ្ងៃតែប៉ុណ្ណោះ គឺចាប់ពីថ្ងៃទី១២ ដល់ថ្ងៃទី១៥ ខែធ្នូ ឆ្នាំ២០១៩ខាងមុខនេះ។

មហាព្រឹត្តិការណ៍ខាងលើនេះ បើកជូនសាធារណជន ចូលរួមដោយសេរី។

ស្របពេលជាមួយគ្នាផងដែរ លោកអ្នកនឹងទទួលបាន សេវាកម្មប្រាក់កម្ចី លំនៅឋានពីធនាគារ ជាច្រើនជម្រើសជាមួយនឹងអត្រាការប្រាក់ដ៏សមរម្យ ក្នុងមហាព្រឹត្តិការណ៍ ដ៏អស្ចារ្យនេះផ្ទាល់តែម្តង។

សម្រាប់ព័ត៌មានបន្ថែម សូមទាក់ទងទូរសព្ទលេខ 015 90 6789 Email: sale@penghuoth.comឬចូលទៅកាន់គេហទំព័រ Facebook: www.facebook.com/boreypenghuoth៕

រដ្ឋាភិបាលកម្ពុជាឆ្លើយតបទៅកាន់សហភាពអឺរ៉ុបពាក់ព័ន្ធនឹងបញ្ហា EBA

ដោយ វុត្ថា

ភ្នំពេញៈ រដ្ឋាភិបាលតាមរយៈក្រសួងការបរទេស និងសហប្រតិបត្តិការអន្តរជាតិ បានចេញសេចក្តីថ្លែងការណ៍មួយបានឱ្យដឹងថា អនុលោមតាមនីតិវិធីរបស់សហភាពអឺរ៉ុប រាជរដ្ឋាភិបាលកម្ពុជា មានភារកិច្ចប្រគល់ជូនគណៈកម្មការអឺរ៉ុប នៅថ្ងៃទី១២ខែធ្នូ ឆ្នាំ២០១៩ ជាការឆ្លើយតបចុងក្រោយរបស់ខ្លួន ចំពោះរបាយការណ៍របស់គណៈកម្មការអឺរ៉ុបអំពីការរកឃើញ និងសន្និដ្ឋានពាក់ព័ន្ធនិងនីតិវិធីដកប្រព័ន្ធអនុគ្រោះពន្ធ ជាបណ្តោះអាសន្ន ដែលបានផ្តល់ឲ្យកម្ពុជា ក្រោមកម្មវិធី “គ្រប់មុខទំនិញលើកលែងសព្វាវុធ-EBA”។

សេចក្តីថ្លែងការណ៍នេះបានបញ្ជាក់ថា សេចក្តីឆ្លើយតបចុងក្រោយនេះ គឺជារបាយការណ៍គ្រប់ជ្រុងជ្រោយអំពីសកម្មភាព និងវិធានការណ៍នានាដែលរាជរដ្ឋាភិបាល បានអនុវត្តឆ្លើយតប ទៅនឹងបញ្ហាទាំងឡាយដែលជាការព្រួយបារម្ភ របស់គណៈកម្មការអឺរ៉ុប ជាអាទី៍ រួមមាន ការគោរពសិទ្ធិក្នុងការចូលរួមនយោបាយ សិទ្ធិដីធ្លី សេរីភាពបញ្ចេញមតិនិងសេរីភាពបង្កើតសមាគមជាដើម។

សេចក្តីថ្លែងការណ៍នេះបញ្ជាក់ថា ក្នុងចន្លោះពេលដែលគណៈកម្មការអឺរ៉ុប ចេញសេចក្តីសម្រេចចុងក្រោយរបស់ខ្លួន នៅខែកុម្ភៈ ឆ្នាំ២០២០ខាងមុខនេះ រាជរដ្ឋាភិបាលសង្ឃឹមថា គណៈកម្មការអឺរ៉ុប នឹងធ្វើការពិចារណាលើកិច្ចខិតខំប្រឹងប្រែង ប្រកបដោយសុឆន្ទៈរបស់រាជរដ្ឋាភិបាល ក្នុងការអនុវត្តរាល់អនុសញ្ញាអន្តរជាតិទាំងអស់ ក្រោមលក្ខខណ្ឌអនុគ្រោះពន្ធ គ្រប់មុខទំនិញលើកលែងសព្វាវុធ-EBA” ដែលអាចផ្តល់ផលប៉ះពាល់សង្គមដល់កម្មការីនីប្រមាណជិតមួយលាននាក់ និងផលប៉ះពាល់ដោយប្រយោលដល់ក្រុមគ្រួសារសាច់ញាតិ ដែលរស់នៅពឹងផ្អែកលើប្រាក់ឈ្នួលរបស់ពួកគេ រួមទាំងការគោរពនូវគោលការណ៍អធិបតេយ្យភាព និងការមិនជ្រៀតជ្រែកចូលកិច្ចការផ្ទៃក្នុងកម្ពុជា៕

រដ្ឋាភិបាលចាប់ផ្តើមសិក្សាគម្រោងស្ថាបនាផ្លូវអមសងខាងផ្លូវរថភ្លើងកណ្តាលក្រុងភ្នំពេញ

ដោយ វុត្ថា

ភ្នំពេញៈ រដ្ឋាភិបាលបានចាប់ផ្តើមសិក្សា គម្រោងស្ថាបនាផ្លូវអមសងខាងផ្លូវរថភ្លើង កណ្តាលរាជធានីភ្នំពេញ ដើម្បីជួយសម្រួលការធ្វើចរាចរណ៍ និងបញ្ចៀសការកកស្ទះនៅលើមហាវិថីសហព័ន្ធរុស្ស៊ី។

លោកទេសរដ្ឋមន្ដ្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន និងលោក ឃួង ស្រេង អភិបាលរាជធានីភ្នំពេញ កាលពីថ្ងៃទី១១ ខែធ្នូ ម្សិលមិញនេះ បានចុះពិនិត្យមើលស្ថានភាពផ្លូវរថភ្លើង ចាប់ពីស្ថានីយរាជាយស្ម័យយាន ឆ្ពោះទៅស្ថានីយពោធិ៍ចិនតុង ដោយមានការចូលរួមពីថ្នាក់ដឹកនាំក្រសួង លោកឃួង ស្រេង អភិបាលរាជធានីភ្នំពេញ និងភាគីពាក់ព័ន្ធផងដែរ។

លោកទេសរដ្ឋមន្រ្តី ស៊ុន ចាន់ថុលនបានមានប្រសាសន៍ថា ការចុះពិនិត្យនេះធ្វើឡើង ដើម្បីពិនិត្យលទ្ធភាពក្នុងការ សាងសង់ផ្លូវបេតុងអាមេ អមសងខាងផ្លូវរថភ្លើង ចាប់ពីចំណុចមហាវិថីគឹមអ៊ីលសុង ដល់វិថីឈ្នះឈ្នះ (ហៅផ្លូវទំនប់កប់ស្រូវ) តភ្ជាប់ទៅផ្លូវល្បឿនលឿនរាជធានីភ្នំពេញ-ខេត្តព្រះសីហនុ ដើម្បីរំដោះការកកស្ទះចរាចរណ៍នាពេលបច្ចុប្បន្ននៅលើផ្លូវសហព័ន្ធរុស្សី ក៏ដូចជា ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋក្នុងរាជធានីភ្នំពេញ និងសម្រួលដល់ការដឹកទំនិញឆ្លងកាត់ចូល ក្នុងរាជធានីភ្នំពេញផងដែរ។

លោកបន្តថា “ក្រសួងសាធារណការ និងដឹកជញ្ជូន នឹងសហការជាមួយសាលារាជធានីភ្នំពេញ និងក្រុមហ៊ុនរាជាយស្ម័យយានកម្ពុជា ធ្វើការសិក្សាលទ្ធភាព និងផលប៉ះពាល់កំណាត់ផ្លូវនេះ ដើម្បើលើកសំណើដាក់ជូនរាជរដ្ឋាភិបាលពិនិត្យសម្រេច និងស្វែងរកថវិកាសាងសង់ផងដែរ”។

លោកឃួង ស្រេង អភិបាលរាជធានីភ្នំពេញបានឱ្យដឹងដែរថា គម្រោងស្ថាបនាផ្លូវនេះ គឺមានសារៈសំខាន់ណាស់ ក្នុងការជួយរំដោះការធ្វើចរាចរណ៍ នៅតាមបណ្តោយផ្លូវវសហព័ន្ធរុស្សីយ៉ាងមានប្រសិទ្ធិភាព ខណៈផ្លូវសហព័ន្ធរុស្សីបច្ចុប្បន្ន កំពុងប្រឈមការកកស្ទះយ៉ាងខ្លាំងស្ទើតែរៀងរាល់ថ្ងៃ៕

ភោជនីយដ្ឋានដ៏ល្បីឈ្មោះមួយរបស់អាមេរិកគ្រោងនឹងឈានជើងចូលទីផ្សារកម្ពុជា

ដោយ ប៊ី

ភ្នំពេញៈ ក្រុមហ៊ុនសៀម Taco Co ដែលជាដៃគូអាជីវកម្មផ្តាច់មុខរបស់ភោជនីយដ្ឋាន Taco Bell ដែលជាភោជនីយដ្ឋានអាហាររហ័សរបស់អាមេរិក កំពុងពិភាក្សាជាមួយក្រុមហ៊ុនម្ចាស់សិទ្ធិអាជីវកម្ម ក្នុងការពង្រីកខ្សែសង្វាក់អាជីវកម្មនៅក្នុងតំបន់។

លោក Chalermchai Mahagitsiri នាយកក្រុមហ៊ុនត្រូវបានរាយការណ៍ ក្នុងកាសែតបាងកកប៉ុស្តិ៍ថា ក្រុមហ៊ុនចង់បើកភោជនីយដ្ឋាន Taco Bell នៅក្នុងតំបន់ CLMV ដែលរួមមានប្រទេសកម្ពុជា ឡាវ មីយ៉ាន់ម៉ា វៀតណាម ដែលជាតំបន់មានសក្តានុពលទីផ្សារខ្លាំង។ ក្រុមហ៊ុន Siam Taco គឺជាការបណ្តាក់ទុនរួមគ្នានៃទីភ្នាក់ងារថៃ Thoresen Thai Agencies និងស៊ី CM Capital ដែលកាន់កាប់ដោយគ្រួសារ Mahagitsiri។

ក្រុមហ៊ុននេះកាលពីឆ្នាំមុន បានទទួលបានសិទ្ធិក្នុងការដំណើរការភោជនីយដ្ឋាន Taco Bell នៅថៃដោយបើកហាងដំបូង នៅខែមករានៅជាន់ទី១ នៃផ្សារ Mercury Ville ទល់មុខនឹងមជ្ឈមណ្ឌលកម្សាន្ តCentral Chidlom។

ថៃគឺជាប្រទេសទី ២ នៅអាស៊ានដែលបើកភោជនីយដ្ឋាន Taco Bell បន្ទាប់ពីប្រទេសហ្វីលីពីន។

លោក Ankush Tuli នាយកគ្រប់គ្រងក្រុមហ៊ុន Taco Bell អាស៊ី និងប៉ាស៊ីហ្វិក និងមជ្ឈឹមបូព៌ាបាននិយាយថា កិច្ចពិភាក្សាអំពីការពង្រីកកំពុងដំណើរការ ហើយមិនទាន់មានការសន្និដ្ឋាននៅឡើយទេ។

លោក Tuli បាននិយាយថា “វាអាចទៅរួចនាពេលអនាគត ប៉ុន្តែបច្ចុប្បន្នយើងគ្រាន់តែចង់ផ្តោតការយកចិត្តទុកដាក់បន្ថែមទៀត លើប្រទេសថៃដែលជាទីផ្សារមួយក្នុងចំណោមទីផ្សារ ដែលទទួលបានជោគជ័យបំផុតរបស់យើង”។ លោកបន្តថា “ថៃ និងអាស៊ីប៉ាស៊ីហ្វិក នឹងក្លាយជាអ្នកចូលរួមចំណែក ក្នុងការលក់សំខាន់ដល់ Taco Bell ទូទាំងពិភពលោកនាពេលអនាគត ហើយ Taco Bell ក៏នឹងក្លាយជាយីហោដ៏សំខាន់”។

Taco Bell រួមចំណែក១៥ភាគរយ នៃការលក់របស់ក្រុមហ៊ុន Yum។ ការលក់ខ្សែសង្វាក់នេះ បានឈានដល់ទឹកប្រាក់១១ពាន់លានដុល្លារអាមេរិកក្នុងឆ្នាំ ២០១៨ ។

ក្រុម Taco Bell មានភោជនីយដ្ឋាន Taco Bell ជាង៧០០០ កន្លែងនៅអាមេរិក និង ៥៨០កន្លែងនៅ៣០ ប្រទេសផ្សេងទៀត ក្នុងនោះមាន១១ ប្រទេសនៅអាស៊ីប៉ាស៊ីហ្វិក៕

ADB ផ្តល់កម្ចីចំនួនជាង ៣០០០ លានដុល្លារដើម្បីអភិឌ្ឍន៍កម្ពុជា

ដោយ វុត្ថា

ភ្នំពេញ៖ គិតចាប់ពីឆ្នាំ១៩៩២ រហូតដល់បច្ចុប្បន្ន ធនាគារអភិវឌ្ឍន៍អាស៊ី (ADB) បានផ្តល់ហិរញ្ញប្បទានសហប្រតិបត្តិ ការដល់ប្រទេសកម្ពុជា សម្រាប់ហិរញ្ញប្បទាន គម្រោងអភិវឌ្ឍន៍នានា មានទឹកប្រាក់សរុបចំនួនប្រមាណ ៣,៣៦៤ លានដុល្លារ ក្នុងនោះឥណទានសម្បទានចំនួនប្រមាណ ២,៨៦៦លានដុល្លារ និងហិរញ្ញប្បទានឥតសំណងចំនួនប្រមាណ ៤៩៨ លានដុល្លារអាមេរិក។

លោក វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុនៅក្នុង វេទិកា ស្តីពីការអភិវឌ្ឍហេដ្ឋារចនាសម្ព័ន្ធទីក្រុង (Forum on Urban Infrastructure Development) កាលពីថ្ងៃទី ១១ ខែធ្នូឆ្នាំ ២០១៩ ម្សលមិញនេះ ឱ្យដឹងថា បច្ចុប្បន្នគម្រោងហិរញ្ញប្បទានដោយ ADB លើការអភិវឌ្ឍក្រុង មានគម្រោងចំនួន ១១ កំពុងដំណើរការ និងមានទឹកប្រាក់សរុបចំនួនប្រមាណ ៤៨៥ លានដុល្លារអាមេរិក។

លោករដ្ឋលេខាធិការប្រចាំការ វង្សី វិស្សុត បានន្លែងថា វេទិកានេះពិតជា មានសារៈសំខាន់ណាស់ ក្នុងការផ្តល់ជាធាតុចូល ដល់កិច្ចអភិវឌ្ឍកម្ពុជា ហើយក្របខ័ណ្ឌយុទ្ធសាស្ត្រភាពជាដៃគូ សម្រាប់អភិវឌ្ឍន៍កម្ពុជា ២០១៩-២០២៣ (CPS) រវាង ADB និងកម្ពុជា ដែលទើបត្រូវបានអនុម័តថ្មីៗនេះ ក៏នឹងផ្តោតទៅលើការងារ «ការកសាងទីក្រុងគួរឱ្យចង់រស់នៅ» (Building livable cities) ដែលស្របគ្នាទៅនឹងគោលដៅជាយុទ្ធសាស្រ្ត ក្នុងការពង្រឹងការរៀបចំដែនដី និងនគររូបនីយកម្ម ដែលជាវិស័យអាទិភាពមួយ ដូចមានកំណត់ក្នុងយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាលផងដែរ។

លោកបានបន្តថា ក្របខ័ណ្ឌភាពជាដៃគូថ្មីនេះ នឹងចូលរួមចំណែកជួយកម្ពុជា ឱ្យអាចសម្រេចបាននូវចក្ខុវិស័យរបស់ខ្លួន ជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០៕