តម្រូវការសម្ភារៈសំណង់បានហក់ឡើងយ៉ាងគំហុកស្របពេលការរីកចម្រើនវិស័យអចលនទ្រព្យ

ដោយ ម៉ាណេត

ភ្នំពេញ៖ ការរីកចម្រើនវិស័យអចលនទ្រព្យបាននិងកំពុងជំរុញឱ្យមានកំណើនតម្រូវការសម្ភារៈសំណង់ ស្របពេលវិស័យសំណង់នៅបន្តសកម្មភាពគគ្រឹកគគ្រេង ដែលឆ្លុះបញ្ចាំងឱ្យឃើញថាមិនទាន់មានភាពនឿយណាយនៃការវិនិយោគលើវិស័យនេះនៅឡើយ។

របាយការណ៍បច្ចុប្បន្នភាពសេដ្ឋកិច្ចកម្ពុជាចុងក្រោយដែលចេញផ្សាយដោយធនាគារពិភពលោកកាលពីម្សិលមិញ បានឱ្យដឹងថា កំណើនជាក់ស្តែងរបស់សេដ្ឋកិច្ចត្រូវបានរំពឹងទុកថានឹងរក្សាបាន ៧ភាគរយ ក្នុងឆ្នាំ២០១៩។

កំណើនសេដ្ឋកិច្ចនេះមានការរួមចំណែកយ៉ាងខ្លាំងពីវិស័យសំណង់ដែលទាញស្រូបទាញយកការវិនិយោគពីក្នុងការស្រុក និងបរទេស។

របាយការណ៍ បានឱ្យដឹងថា “វិស័យសំណង់នៅបន្តសកម្មភាពគគ្រឹកគគ្រេង ដែលឆ្លុះបញ្ចាំងឱ្យឃើញថាមិនទាន់មានភាពនឿយណាយនៃការវិនិយោគលើវិស័យនេះនៅឡើយទេ”។ របាយការណ៍បានបន្តថា “ជាលទ្ធផល ការនាំចូលដែកសំណង់បានស្ទុះឡើងយ៉ាងគំហុក ដល់ទៅ៦៣,៥ភាគរយ គិតត្រឹមខែមិថុនា ឆ្នាំ២០១៩ ពី ២៧,៧ភាគរយ ក្នុងឆ្នាំ២០១៨”។

តម្រូវការស៊ីម៉ងត៍ត្រូវបានរំពឹងថានឹងកើនឡើងរហូតដល់៩លានតោននៅឆ្នាំនេះ កើនឡើងជិត៩០ភាគរយ បើប្រៀបធៀបទៅនឹងឆ្នាំមុន។ តម្លៃសម្ភារៈសំណង់បានកើនឡើង១០ភាគរយ ធៀបរយៈពេលដូចគ្នាកាលពីឆ្នាំមុន។ នេះបើយោងតាមក្រុមហ៊ុនស៊ីម៉ងត៍ជីបម៉ុង (Chip Mong Insee Cement Corporation)។

វិស័យសំណង់នៅកម្ពុជាមានការកើនឡើងនៅទូទាំងប្រទេស ដោយបានបង្កើនទំហំទឹកប្រាក់វិនិយោគរហូតដល់ជាង ៧០០០លានដុល្លារសហរដ្ឋអាមេរិកក្នុងរយៈពេល ១០ ខែ ក្នុង ឆ្នាំ២០១៩នេះ នៅលើគម្រោងជិត ៤០០០ ដែលគ្រោងសាងសង់នៅលើផ្ទៃក្រឡាដីជាង ១៥លានម៉ែត្រការ៉េ។

វិស័យសំណង់ដែលកំពុងរីកចម្រើននៅកម្ពុជា ក៏កំពុងបង្កើនការនាំចូលវត្ថុធាតុដែកសំណង់ពីបណ្តាប្រទេសនានាដូចជា ប្រទេសវៀតណាម។

ក្រុមហ៊ុនផលិតដែក Hoa Phat Group ដែលមានមូលដ្ឋាននៅវៀតណាមបានរាយការណ៍ថា ការលក់ដែកបានកើនឡើង ២៨,៦៨ភាគរយ ដោយកម្ពុជាជាអ្នកទិញភាគច្រើន។ ការនាំចេញរបស់ក្រុមហ៊ុនផលិតដែកថែប ប្រទេសវៀតណាមបានកើនឡើងដល់ ២៤៦ភាគរយពីឆ្នាំមុន។ ប្រទេសកម្ពុជាបានទិញដែកថែបជិត ៤៥,៤៣០តោន ពីក្រុមហ៊ុននេះនៅក្នុងរយៈពេលបីខែដំបូងនៃឆ្នាំនេះ៕

កម្ពុជា-វៀតណាមដាក់ចេញផែនការពង្រឹងការលើកកម្ពស់សេដ្ឋកិច្ចនៅបណ្តោយព្រំដែន

ដោយ វុត្ថា

ភ្នំពេញ៖ រដ្ឋាភិបាលកម្ពុជា-វៀតណាម បានរៀបចំសេចក្តីព្រាងផែនការមេតភ្ជាប់សេដ្ឋកិច្ចកម្ពុជា-វៀតណាម និងខេត្តជាប់ព្រំដែនឆ្នាំ២០២១-២០៣០។

យោងតាមកិច្ចប្រជុំបច្ចេកទេសរវាង លោក ហ៊ូ តាំងអេង រដ្ឋលេខាធិការក្រសួងផែនការ និងលោកស្រី ផាន់ ង៉ុកម៉ាយភឿង អនុប្រធានវិទ្យាស្ថានអភិវឌ្ឍន៍យុទ្ធសាស្រ្ត នៃក្រសួងផែនការសារធារណរដ្ឋវៀតណាមកាលពីថ្ងៃទី ២៧ ខែវិច្ឆិកាម្សិលមិញនៅខេត្តកំពតនេះ បានពិភាក្សាផ្តោតលើវិស័យសំខាន់ៗចំនួន០៩ រួមមាន វិស័យគមនាគមន៍ វិស័យវិនិយោគ វិស័យហិរញ្ញវត្ថុ វិស័យកសិកម្ម វិស័យទេសចរណ៍ វិស័យរ៉ែ និងថាមពល វិស័យបរិស្ថាន វិស័យសុខាភិបាល ព្រមទាំងខឿនសេដ្ឋកិច្ចជាប់ព្រំដែន។

លោក ជាវ តាយ អភិបាលខេត្តកំពតបានមានប្រសាសន៍ថា ខេត្តកំពតដែលជាខេត្តជាប់នឹងខេត្តគៀនយ៉ាងនៃប្រទេសវៀណាម មានសក្តានុពលគ្រប់វិស័យទាំង៩នេះខាងលើ។

ខេត្តកំពតបានរៀបចំកិច្ចសហប្រត្តិបត្តការដោយគ្រោងបង្កើតផ្សារតាមព្រំដែន សាងសង់កំពង់ផែចំនួន៥ ដែលក្នុងនោះមាន កំពង់ផែអន្តរជាតិ០១។

លោកបន្តថា ជាមួយនេះ ខេត្តកំពតបាន និងកំពុងសាងសង់កំពង់ផែទេសចរណ៍អន្តរជាតិសម្រាប់ទាក់ទាញភ្ញៀវទេសចរពីគ្រប់មជ្ឈដ្ឋានឲ្យមកទស្សនាកម្សាន្ត ហើយក៏កំពុងរៀបចំហេដ្ឋារចនាសម្ព័ន្ធនានា ពិសេសស្ថាបនាផ្លូវទៅកាន់ប្រទេសវៀតណាមជាដើម។

លោកបន្ថែមថា ដោយឡែក រាល់បញ្ហាប្រឈមក្នុងកិច្ចសហប្រតិបត្តិការរវាងខេត្តកំពត និងខេត្តគៀនយ៉ាង ក៍ដូចជាប្រទេសវៀតណាម រដ្ឋបាលខេត្តកំពតនឹងខិតខំប្រឹងប្រែងឲ្យនៅកម្រិតអប្បបរមាតាមដែលអាចធ្វើបាន៕

អជ្ញាធរខេត្តកំពង់ស្ពឺ ប្រកាសសផ្អាកចរាចរណ៍លើកំណាត់ផ្លូវជាតិលេខ៤ ត្រង់ចំណុចគម្រោងសាងសង់ស្ពានអាកាសថ្មើរជើង

ដោយ ៖ រ៉ាណេត

កំពង់ស្ពឺ ៖ នៅព្រឹកថ្ងៃទី២៨ ខែវិច្ឆិកា ឆ្នាំ២០១៩ នេះ រដ្ឋបាលខេត្តកំពង់ស្ពឺ បានចេញសេចក្ដីប្រកាស និងជូនដំណឹងដល់សាធារណៈជនទូទៅអំពីការផ្អាកចរាចរណ៍ចំនួន១ថ្ងៃពេញ ដើម្បីរៀបចំតម្លើង និងបំពាក់ផ្នឹមសាងសង់ស្ពានអាកាសថ្មើរជាលើកដំបូងក្នុងប្រវត្តិសាស្ត្រនៃខេត្តកំពង់ស្ពឺ។

នៅក្នុងសេចក្ដីជូនដំណឹងបានបញ្ជាក់ថា ចាប់តាំងពីព្រឹកវេលាម៉ោង ១០ព្រឹក រហូតដល់ម៉ោង ៥ល្ងាច ផ្លូវជាតិលេខ៤ ត្រង់ចំណុចចំណុចរថយន្តផ្សារកំពង់ស្ពឺ ដែលជាគោលដៅសាងសង់ស្ពានថ្មើរជើងអាកាសលើកដំបូងប្រចាំខេត្ត ស្ថិតនៅក្នុងភូមិក្រាំងពពេល និងភូមិពាណិជ្ជកម្ម សង្កាត់រកាធំ ក្រុងច្បារមន នឹងបិទផ្លូវផ្អាកការធ្វើចរាចរណ៍ពេញមួយថ្ងៃ ដើម្បីបញ្ចៀសបញ្ហាកកស្ទះចរាចរណ៍ និងរក្សាសុវត្ថិភាពជូនអ្នកធ្វើដំណើរ។

១- ចំពោះរថយន្តដឹកទំនិញគ្រប់ប្រភេទ ដែលធ្វើដំណើរពីរាជធានីភ្នំពេញ ឆ្ពោះទៅខេត្តព្រះសីហនុ តាមបណ្តោយផ្លូវជាតិលេខ៤ សូមបញ្ចៀសទៅកាន់ផ្លូវជាតិលេខ៣

២- ចំពោះរថយន្តទេសចរណ៍គ្រប់ប្រភេទ សូមបញ្ចៀសទៅតាមផ្លូវកណ្តោលជ្រុំ (ផ្លូវលេខ១០៤ និង១០៥) និងតាមផ្លូវបំបែកតាមចំណុចភ្លើងស្តុបមន្ទីរសាធារណៈការ និងដឹកជញ្ជូនខេត្ត និងត្រង់ចំណុចភ្លើងស្តុបបំបែកច្បារមន ។

ស្ពានអាកាសថ្មើរជើងត្រង់ចំណុចបេនឡាន ផ្សារកំពង់ស្ពឺក្នុងតម្លៃសាងសង់៣៤ម៉ឺនដុល្លារអាមេរិក នឹងលេចរូបរាងឡើងនៅក្នុងខែធ្នូ ឆ្នាំ២០១៩នេះហើយ ។

លោក វ៉ី សំណាង អភិបាលនៃគណៈអភិបាលខេត្តកំពង់ស្ពឺ បានមានប្រសាសន៍ប្រាប់តាមទូរស័ព្ទថា “ស្ពានអាកាសថ្មើរជើងនេះ សាងសង់បានជាង ៧០ភាគរយហើយ ដោយអនុវត្តន៍ទៅតាមលក្ខណៈបច្ចេកទេសស្តង់ដាអន្តរជាតិ ដែលមានប្រវែង៣០ម៉ែត្រ កម្ពស់៥,២ម៉ែត្រ នឹងទទឹង៣ម៉ែត្រ ដែលធ្វើពីបេតុងអាមេ”។

លោកបន្តថា “រដ្ឋបាលខេត្តកំពង់ស្ពឺ នឹងគ្រោងរៀបចំពិធីដាក់សម្ពោធឲ្យប្រើប្រាស់ជាផ្លូវការនូវស្ពានអាកាសថ្មើរជើងនេះ នៅចុងខែធ្នូ ឆ្នាំ២០១៩ខាងមុខនេះ ដែលជាសមិទ្ធផលថ្មីជាប្រវត្តិសាស្ត្រ ដែលបងប្អូនប្រជាពលរដ្ឋក្នុងខេត្តកំពង់ស្ពឺ ទន្ទឹងរង់ចាំមើល”។

វត្តមានស្ពានអាកាសថ្មើរជើងលើកដំបូង នៅក្នុងខេត្តកំពង់ស្ពឺមួយនេះ ត្រូវបានសាងសង់កាលពីខែឧសភា ឆ្នាំ ២០១៩ កន្លងមកនេះ។ វាជាផ្នែកមួយក្នុងការអភិវឌ្ឍលើវិស័យហេដ្ឋារចនាសម្ព័ន្ធ ក៏ដូចជាការផ្តល់ភាពងាយស្រួលដល់ប្រជាពលរដ្ឋ និងកាត់បន្ថយគ្រោះថ្នាក់ចរាចរណ៍ផងដែរនោះ៕

អ្នកជំនាញ៖ តម្រូវការជួលទីតាំងលក់រាយនៅតាមបណ្តាផ្សារទំនើបអាចនឹងមានការធ្លាក់ចុះនៅឆ្នាំ២០២០

ដោយៈ រ៉ាណេត

ភ្នំពេញៈ ស្របទៅនឹងកំណើននៃការផ្គត់ផ្គង់ផ្សារទំនើប នៅពេលបច្ចុប្បន្ន រួមជាមួយនឹងគម្រោងដាក់បញ្ចូល នូវទីតាំងលក់រាយនៅតាមផ្សារទំនើបថ្មី បន្ថែមទៀតនា អំឡុងឆ្នាំ២០២០ខាងមុខនេះ អ្នកជំនាញបានធ្វើការព្យាករណ៍ថា ទីផ្សារនេះអាចប្រឈមនឹងវិបត្តិ ព្រោះថាការផ្គត់ផ្គង់មានចំនួនច្រើនលើសតម្រូវការ និងមានការប្រកួតប្រជែងខ្ពស់។

បច្ចុប្បន្ននេះ ការផ្គត់ផ្គង់ផ្សារទំនើបគ្រប់ប្រភេទនៅកម្ពុជា មានការកើនឡើងយ៉ាងច្រើន ដោយគិតត្រឹមចុងខែវិច្ឆិកា ឆ្នាំ២០១៩ នេះ មានផ្សារទំនើបចំនួន២៨កំពុងដំណើរការ រាប់ទាំងផ្សារដែលទើបតែចាប់ដំណើរការសាកល្បងផងដែរ ហើយផ្សារទំនើបថ្មីៗបន្ថែមទៀត នឹងដាក់ដំណើរការនៅចុងឆ្នាំនេះ។

ស្របទៅនឹងភាពជាក់ស្ដែង នៃការកើនឡើងនូវចំនួនផ្សារទំនើបទាំងអស់នេះ នាយិកាប្រចាំប្រទេសក្រុមហ៊ុនអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍ថា ការកើនឡើងនូវចំនួនផ្សារទំនើបគ្រប់ប្រភេទ នៅកម្ពុជាក្នុងពេលបច្ចុប្បន្ននេះ គឺជាសញ្ញាវិជ្ជមានដែលបង្ហាញពីកំណើនសេដ្ឋកិច្ច ក៏ដូចជាការអភិវឌ្ឍនៅក្នុងប្រទេស ខណៈដែលកម្រិតជីវភាព និងការយល់ដឹងរបស់ប្រជាពលរដ្ឋក៏មានការកើនឡើងផងដែរ។

លោកស្រីបន្តថា “នៅពេលបច្ចុប្បន្ននេះ មានផ្សារទំនើបជាច្រើនកំពុងតែដំណើរការ និងបំពេញតម្រូវការរបស់អតិថិជន ដែលរួមមានទាំងប្រភេទ Shopping Mall ប្រភេទ Retail Podium និងប្រភេទ Community Mall ផងដែរ ប៉ុន្តែក្នុងចំណោមផ្សារទាំងអស់នេះ ភាគច្រើនជាប្រភេទ Community Mall ដែលជាផ្សារទំនើបខ្នាតតូចបែបសហគមន៍ និងងាយស្រួលបង្កើត និងមានតម្រូវច្រើន”។

លោកស្រីបានបន្តទៀតថា “នៅពេលមានការផ្គត់ផ្គង់ច្រើន នៅក្នុងវិស័យតែមួយ គឺតម្រូវមានការប្រកួតប្រជែងគ្នាខ្លាំង ទាំងគុណភាព ទាំងសោភ័ណភាព ជាពិសេសទៅលើតម្លៃនៃការជួល ដែលត្រូវតែមានការធ្លាក់ចុះដោយស្វ័យប្រវត្តិ”។

លោកស្រីបន្ថែមថា “អត្រាជួលធ្លាក់ចុះ ដោយសារតែតម្រូវការជួលទីតាំងលក់រាយត្រូវបានបែងចែក ប៉ុន្តែទោះជាយ៉ាងណាក៏ដោយ អ្នកអភិវឌ្ឍចាំបាច់ត្រូវតែមានការត្រៀមទុក នូវផែនការយុទ្ធសាស្ត្រក្នុងការប្រកួតប្រជែង ដើម្បីជៀសវាងហានិភ័យ”។

តាមរបាយការណ៍ដែលសិក្សា ដោយក្រុមអ្នកជំនាញស្រាវជ្រាវក្រុមហ៊ុន CBRE Cambodia បានឱ្យដឹងថា ព្រមគ្នាជាមួយនឹងវត្តមានផ្សារទំនើបនានា ដែលកំពុងមានដំណើរនៅពេលបច្ចុប្បន្ននេះ នៅត្រឹមឆ្នាំ២០២០ខាងមុខនេះ នឹងមានផ្សារទំនើបគ្រប់ប្រភេទប្រមាណ១៩គម្រោងទៀត ដែលគ្រោងនឹងដាក់ចូលទីផ្សារនៅកម្ពុជា ដែលកាន់តែជំរុញឱ្យមានការប្រកួតប្រជែងកាន់តែខ្លាំង៕

អាគារលំនៅដ្ឋាន MESONG កម្ពស់ ៧១ជាន់ ចាប់ផ្តើមប្រកាសពីវត្តមានរបស់ខ្លួននៅកម្ពុជា

ដោយ ប៊ី

ភ្នំពេញ៖ មជ្ឈមណ្ឌលលំនៅដ្ឋានលំដាប់ពិភពលោក MESONG ដែលបានបោះទុនវិនិយោគរាប់រយលានដុល្លារនៅទីក្រុងកោះពេជ្រចាប់ផ្តើមសម្ភោធផ្លូវការនៅថ្ងៃនេះ។

គម្រោង MESONG មាន កំពស់៧១ជាន់ ស្មើនឹងកំពស់២៥២ម៉ែត្រ បាននិងកំពុងវិនិយោគដោយក្រុមហ៊ុន Wonder Prime One ដែលមានមូលដ្ឋាននៅទីក្រុងហុងកុង។

អាគារកប់ពពកនេះ ជាគំរោងអភិវឌ្ឍន៍ចម្រុះរួមមាន ផ្សារទំនើប ភោជនីយដ្ឋាន និង លំនៅដ្ឋានបែបសហកម្មសិទ្ឋសរុប១២៧០យូនីត។

គំរោងនេះ ស្ថិតនៅក្បែរនឹងស្ពាននាគទីក្រុងកោះពេជ្រ និងគ្រោងបញ្ចប់នៅចុងឆ្នាំ២០២២។ គម្រោងអភិវឌ្ឍន៍អចលនទ្រព្យដែលចុះហត្ថលេខាដំបូងបង្អស់ ដោយក្រុមហ៊ុន WONDER DEVELOPMENT តំណាងឱ្យយុគសម័យថ្មីនៃការរស់នៅនិងជីវភាពរស់នៅប្រកបដោយកិត្យានុភាពបានកត់សម្គាល់នូវព្រឹត្តិការណ៍ថ្មីមួយ ។

លោក Jovi Wong នាយកប្រតិបត្តិនៃក្រុមហ៊ុនបានមានប្រសាសន៍ថា “កម្ពុជាគឺជាកន្លែងដែលពោរពេញទៅដោយឱកាសវិនិយោគយើងមានទំនុកចិត្តថា ក្រុមហ៊ុន MESONG នឹងបញ្ឆេះការយកចិត្តទុកដាក់ទីផ្សារចំពោះប្រទេសនេះ ហើយយើងទន្ទឹងរងចាំធ្វើឱ្យគម្រោងអភិវឌ្ឍន៍កាន់តែច្រើននាពេលអនាគត”។

ក្រុមហ៊ុន WONDER DEVELOPMENT គឺជាក្រុមហ៊ុនបុត្រសម្ព័ន្ធដែលគ្រប់គ្រងដោយមូលធនទាំងស្រុងនៃមូលនិធិដែលគ្រប់គ្រងដោយ WONDER CAPITAL GROUP ។ វិនិយោគិនរបស់មូលនិធិរួមមាន អ្នកជំនាញវិជ្ជាជីវៈហុងកុង ដូចជាវិនិយោគិនស្ថាប័នក្រុមហ៊ុនចុះបញ្ជីហុងកុង និងបុគ្គលដែលមានទ្រព្យសម្បត្តិច្រើន។

ក្រុមហ៊ុន WONDER CAPITAL GROUP ជាអ្នកកាន់អាជ្ញាប័ណ្ណគ្រប់គ្រងទ្រព្យសកម្មប្រភេទ ៩ ដែលផ្តល់ដោយគណៈកម្មការមូលប័ត្រនិងអនាគតនៃទីក្រុងហុងកុង។

គណៈគ្រប់គ្រងមានបទពិសោធន៍វិនិយោគអចលនទ្រព្យជាង ២០ ឆ្នាំហើយបានកាន់តួនាទីប្រតិបត្តិអាស៊ី – ប៉ាស៊ីហ្វិកសម្រាប់អ្នកគ្រប់គ្រងទ្រព្យសម្បត្តិអន្តរជាតិដែលមានទ្រព្យសម្បត្តិរាប់រយពាន់លានដុល្លារស្ថិតក្រោមការគ្រប់គ្រង៕

ចំណេះដឹង! និតិវិធីសំរាប់ដាក់ពាក្យ និងការស្នើសុំសម្បទានដីសេដ្ឋកិច្ចត្រូវធ្វើដូចម្តេច?

ដោយ វុត្ថា

ភ្នំពេញៈ រដ្ឋផ្តោតការយកចិត្តទុកដាក់ ក្នុងការទាក់ទាញការវិនិយោគលើដីឯកជនរបស់រដ្ឋ ដែលបានធ្វើអត្តសញ្ញាណកម្មរួចហើយ សំរាប់គោលដៅសម្បទាន ដែលមានផលិតភាព បង្កើតមានការងរធ្វើ និងបំពេញមុខងារជាដៃគូរបស់រដ្ឋ ឱ្យមកវិនិយោគលើដីរដ្ឋ។

យោងតាមមឯកសាររបស់ក្រសួងរៀបចំដែនដី នគរូបនីយកម្ម និងសំណង់ស្តីពីគោលនយោបាយសម្បទានដីសេដ្ឋកិច្ចបានឱ្យដឹងថា រដ្ឋស្វះស្វែងរកការវិនិនិយោគណាដែលមានលទ្ធភាពផ្នែកហិរញ្ញវត្ថុ និងបច្ចេកទេសក្នុងការវិនិយោគ និងអ្នកដែលយកចិត្តទុកដាក់ជួយដល់រដ្ឋ ក្នុងការសម្រេចគោលដៅការពារបរិស្ថាន សង្គមកិច្ច និងសេដ្ឋកិច្ច ។ រដ្ឋនឹងយកចិត្តទុកដាក់ សំរិតសំរាំងយកអ្នកដាក់ពាក្យសុំត្រឹមត្រូវ ដើម្បីធានាថាអ្នកនោះនឹងបំពេញភារកិច្ចរបស់ខ្លួនតាមកិច្ចសន្យា។

រដ្ឋអាចផ្តល់សម្បទានដីសេដ្ឋកិច្ចនៅគ្រប់ពេល ដោយហៅរកសំណើដែលជាកម្មវត្ថុសំរាប់ការដេញថ្លៃ ទៅតាមលក្ខខណ្ឌដូចបានចែងក្នងអនុក្រឹត្យស្តីពី សម្បទានស្របតាមច្បាប់ និងនីតិវិធីស្តីពីសម្បទាន។

នីតិវិធីសំរាប់ការផ្តួចផ្តើមគំនិតសម្បទានដីសេដ្ឋកិច្ច គប្បីបញ្ចូលឱ្យមាននីតិវិធីនៃការដាក់ពាក្យសុំ នីតិវិធីនៃការវាយតម្លៃ និងការពិនិត្យឡើងវិញ ហើយនីតិវិធីទាំងនេះ ត្រូវដាក់ឱ្យស្ថិតក្រោមសកម្មភាពដូចជា គ្រប់សំណើសម្បទានដីសេដ្ឋកិច្ច ត្រូវបានផ្តួចផ្តើមឡើង ដោយផ្អែកលើមូលដ្ឋាននៃទំរង់បែបបទស្តង់ដារ នៃការដាក់ពាក្យស្នើសុំដោយលំអិតពីឈ្មោះ។

អាស័យដ្ឋានរបស់អ្នកស្នើសុំ ភាពស្របច្បាប់នៃក្រុមហ៊ុន ការផ្តល់ទិន្ន័យផ្នែកសាជីវកម្ម និងហិរញ្ញវត្ថុ ការពិព័ណ៌នាអំពីគម្រោងដែលបានស្នើឡើង និងទិសដៅនៃការប្រើប្រាស់ទីតាំង បច្ចេកទេសនៃការដាំដុះ ការកែច្នៃ ការវាយតម្លៃបឋមពីផលប៉ះពាល់បរិស្ថាន និងសង្គម។

គម្រោងអាចស្នើឡើងនូវទីតាំងជាក់លាក់ណាមួយ ឬលើសំណើរសុំទីតំាងសំរាប់គម្រោងដែលបានស្នើឡើង ដោយមានភា្ជប់គំនូសផែនទីទីតាំងដែលបានស្នើ។

ពាក្យស្នើសុំអាចដាក់នៅច្រកចេញចូលតែមួយ នៃក្រុមប្រឹក្សាអភិវឌ្ឍន៍កម្ពុជា ឬនៅគណៈកម្មាធិការប្រើប្រាស់ និងបែងចែកដីថ្នាក់ខេត្តក្រុង ប្រសិនតម្លៃវិនិយោគសរុបរបស់គម្រោមានទឹកប្រាក់ជាង២លានដុល្លារអាមេរិក។ ក្រោយពីលេខាធិការដ្ឋានបច្ចេកទេសនឹងធ្វើការកំណត់ ប្រសិនបើការស្នើសុំនេះ ឆ្លើយតបទៅនឹងដែនយុទ្ធសាស្ត្រ ដែលបានកំណត់ដោយលេខាធិការដ្ឋានបច្ចេកទេស និងប្រសិនបើមានទីតាំងណាអាចទទួលយកពាក្យស្នើសុំនេះបាន ដោយផ្អែកលើផែនការប្រើប្រាស់ និងបែងចែកដីដែលបានបង្កើតឡើងដោយខេត្តក្រុងនីមួយៗ ។

ប្រសិនបើពាក្យសុំនេះ ត្រូវបានបញ្ជាក់ថាសមស្រប លេខាធិការដ្ឋានបច្ចេកទេសនឹងតម្រូវឱ្យអ្នកដាក់ពាក្យសុំលើកសំណើរជាផ្លូវការ៕

រុស្ស៊ី និងចិនបង្ហាញគំរោងវិនិយោគរួមគ្នាចំនួន៧០ មានតម្លៃមហាសាល

ដោយ Donald Lee

ភ្នំពេញៈ មូលនិធិវិនិយោគរុស្ស៊ី និងចិន (RCIF) បានបង្ហាញថា ក្រុមវិនិយោគចិន និងរុស្ស៊ីមានគម្រោងជាច្រើន ដែកគ្រិងវិនិយោគរួមគ្នាមានតម្លៃទឹកប្រាក់១១២ ពាន់លានដុល្លារកំពុងស្ថិតក្នុងការគ្រោងទុកសម្រាប់ការអភិវឌ្ឍ។

ការប្រកាសនេះ ត្រូវបានធ្វើឡើងនៅទីក្រុងប៉េកាំង កាលពីថ្ងៃអង្គារ នៅឯគណៈកម្មការវិនិយោគរុស្ស៊ី និងចិន។

ការចេញផ្សាយដោយមូលនិធិវិនិយោគផ្ទាល់របស់រុស្ស៊ី (RDIF) បានឱ្យដឹងថា “មកដល់ពេលនេះ គណៈកម្មាធិការប្រឹក្សាអាជីវកម្មរុស្ស៊ី និងចិនកំពុងពិចារណាលើគម្រោងចំនួន៧០ សម្រាប់ទឹកប្រាក់សរុបចំនួន១១២ពាន់លានដុល្លារ។ គណៈកម្មាធិការបានជួយអនុវត្តគម្រោងឆ្លងកាត់ព្រំដែន ដែលមានតម្លៃជាង១០ពាន់លានដុល្លារអាមេរិករួចហើយ”។

ភាគីទាំងពីរក៏បានយល់ព្រមធ្វើជាដៃគូ លើវេទិកាពាណិជ្ជកម្មអេឡិចត្រូនិចរបស់រុស្ស៊ីដូចជា Amazon ឬ Alibaba។ ក្រុមហ៊ុន RDIF ក្រុមហ៊ុន Alibaba Group ក្រុមហ៊ុន Mail.ru Group និងក្រុមហ៊ុនMegafon គ្រោងនឹងក្លាយជាផ្នែកមួយ នៃគំរោងភាពជាដៃគូរួមគ្នានេះ។

ចិនបានខិតទៅជិតប្រទេសរុស្ស៊ី នៅពេលដែលសង្រ្គាមពាណិជ្ជកម្មរវាងអាមេរិក និងចិនបានឈានដល់ខែទី១៧ ហើយ។ សង្រ្គាមពាណិជ្ជកម្មបានធ្វើឱ្យរំខានដល់សង្វាក់ផ្គត់ផ្គង់ និងពាណិជ្ជកម្មនៅជុំវិញពិភពលោក និងគំរាមកំហែងទម្លាក់សណ្តាប់ធ្នាប់សេដ្ឋកិច្ចដែលមានស្រាប់។

ក្រុមអ្នកវិភាគបានអះអាងថា សង្គ្រាមពាណិជ្ជកម្ម គឺជាការឈានមុខគេនៅក្នុងសង្គ្រាមត្រជាក់ថ្មីមួយនេះ ដែលពាក់ព័ន្ធនឹងអាមេរិកនិងចិន។

ចិនបានក្លាយជាដៃគូពាណិជ្ជកម្មដ៏ធំបំផុតរបស់រុស្ស៊ី ក្នុងរយៈពេល៩ឆ្នាំកន្លងមកនេះ។ ពាណិជ្ជកម្មទ្វេភាគីរវាងប្រទេសទាំងពីរ បានកើនឡើងជិត៣០ភាគរយកាលពីឆ្នាំ មុន។ ទំហំពាណិជ្ជកម្មរវាងប្រទេសទាំងពីរ បានកើនឡើងពីជាង១០០ពាន់លានដុល្លារទៅ២០០ពាន់លានដុល្លារនៅឆ្នាំ២០២៤។

នាយករដ្ឋមន្រ្តីរុស្ស៊ីលោកឌីមីទ្រី មេដវេដេវ (Dmitry Medvedev) បានថ្លែងប្រាប់អ្នកសារព័ត៌មាននៅប្រទេសរុស្ស៊ីកាលពីដើមឆ្នាំនេះថា “ផែនការនេះ គឺដើម្បីសម្រេចបាននូវគម្រោងទាំងនោះ តាមរយៈគម្រោងរួមគ្នាក្នុងវិស័យថាមពល ឧស្សាហកម្ម បច្ចេកវិទ្យា និងកសិកម្ម”។

លោកមេដ វេដេវបានបន្ថែមថា “យើងកំពុងធ្វើការយ៉ាងខ្ជាប់ខ្ជួន ដើម្បីដករបាំងដែលរារាំងការអភិវឌ្ឍពាណិជ្ជកម្មកសិកម្ម។ វាទាក់ទងនឹងការផ្គត់ផ្គង់សណ្តែកសៀង ស្រូវសាលី និងដំណាំមួយចំនួនទៀតទៅចិន”។

ចំណុចសំខាន់មួយ នៃកិច្ចព្រមព្រៀងពាណិជ្ជកម្មរវាងអាមេរិក និងចិនគឺការទិញផលិតផលកសិកម្មរបស់អាមេរិក ដូចជា សណ្តែកសៀងពីចិន។ ប្រធានាធិបតីអាមេរិក Donald Trump បាននិយាយថា លោកចង់ឱ្យចិនព្រមទិញទំនិញកសិកម្ម មានតម្លៃ៥០ ពាន់លានដុល្លារអាមេរិក ដែលជាផ្នែកមួយនៃកិច្ចព្រមព្រៀងពាណិជ្ជកម្ម៕

ក្រុមហ៊ុនចិនធំៗ ចំនួន៣៥ ចាប់អារម្មណ៍លើការវិនិយោគក្នុងទឹកដីខេត្តកំពង់ស្ពឺ

ដោយ វុត្ថា

កំពង់ស្ពឺ៖ ក្រុមហ៊ុនធំៗ ចំនួន៣៥ មកពីសាធារណរដ្ឋប្រជាមានិតចិនបានចុះមកសិក្សាស្វែងយល់ពីឱកាសសម្រាប់វិនិយោគ និងបណ្តាក់ទុនវិនិយោគនៅក្នុងខេត្តកំពង់ស្ពឺ ។

លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ នៅក្នុងជំនួបជាមួយគណៈប្រតិភូមកពីសាធារណរដ្ឋប្រជាមានិតចិននៅថ្ងៃទី២៧ ខែវិច្ឆិកា ឆ្នាំ២០១៩ បានឱ្យដឹងអំពើស្ថានភាពរួមរបស់រដ្ឋបាលខេត្ត សក្កានុពលនានា និងក្រុមហ៊ុននានាដែលកំពុងធ្វើការវិនិយោគនៅក្នុងខេត្ត ដែលមានការទទួលស្គាល់ និងបានច្បាប់អនុញ្ញាតដោយក្រុមប្រឹក្សាអភិវឌ្ឍកម្ពុជា (CDC)។

លោកបន្តថា ខេត្តកំពង់ស្ពឺកំពុងត្រូវការអ្នកវិនិយោគិនបន្ថែមទៀត ដើម្បីអភិវឌ្ឍន៍ខេត្ត ហើយផ្តល់ទីផ្សារការរងារនៅនឹងកន្លែងជាច្រើនដល់ប្រជាជនកម្ពុជា មានការងារធ្វើ មានជីវភាពធូធារ កាត់បន្ថយការចំណាកស្រុក បង្កើនជីវភាពរស់នៅជួបជុំគ្រួសារ ឱ្យកាន់តែប្រសើឡើង ស្របពេលដែលខេត្តកំពង់ស្ពឺកំពុងក្លាយជាជង្រុករបស់អ្នកវិនិយោគផងដែរ ។

លោកអភិបាលខេត្តបានសំណូមពរដល់គណៈប្រតិភូចិន ជួយដល់ភាគីកម្ពុជាក្នុងការវិនិយោគលើវិស័យកសិកម្ម វិស័យឧស្សាហកម្ម ពាណិជ្ជកម្ម ប្រកបដោយគុណភាពនិងប្រសិទ្ធិភាព ដើម្បីលើកស្ទួយជីវភាពប្រជាជនក្នុងខេត្តមានជីវភាពកាន់តែរីកចំរើនឡើង។

គណៈប្រតិភូបានរីករាយនិងទទួលសំណូមពររបស់ឯកឧត្តមអភិបាលខេត្ត យកទៅសិក្សាបន្ថែម និងណែនាំកៀងគរអ្នកវិនិយោគលើគ្រប់វិស័យមកអភិវឌ្ឍន៍នៅលើទឹកដីខេត្តកំពង់ស្ពឺឲ្យមានការរីកចំរើនបន្ថែមទៀតនិងបន្តកិច្ចសហប្រតិបត្តិការជាមួយគ្នាជាដៃគូល្អនាពេលអនាគត់។

លោកអភិបាលខេត្តបានថ្លែងអំណរគុណដល់ក្រុមហ៊ុនចិនមួយចំនួនដែលបានវិនិយោគនៅខេត្តកំពង់ស្ពឺកន្លងមកនិងបន្តសហការគ្នារកស៊ីជាមួយគ្នាធ្វើឲ្យខេត្តកំពង់ស្ពឺមានការអភិវឌ្ឍន៍កាន់តែរីចំរើនតទៅ៕

គម្រោងអភិវឌ្ឍន៍ផ្សារទំនើបសិនជូរីផ្លាហ្សាថ្មីកម្ពស់ ៧ជាន់ ចាប់ផ្តើមបុកគ្រឹះសាងសង់នៅថ្ងៃនេះ

ដោយ វុត្ថា

ភ្នំពេញ៖ គម្រោងអភិវឌ្ឍន៍ផ្សារទំនើបសេនជូរីផ្លាហ្សា ដែលកំពស់ ៧ជាន់ ផ្នែកខាងលើ ៥ជាន់ និងក្រោមដី ២ជាន់ បានចាប់ផ្តើមសម្ពោធបើករដ្ឋានសាងសង់នៅថ្ងៃនេះ ដោយគ្រោងចំណាយពេលព ២៤ខែ នឹងបញ្ចប់។

លោកស្រីឧកញ៉ា ចាន់ សុទ្ធា អគ្គនាយិកាក្រុមហ៊ុនសេនជូរីគ្រុប បានថ្លែងឱ្យដឹងនៅក្នុងពិធីសម្ពោធបើកការដ្ឋានៅថ្ងៃទី ២៧ ខែវិច្ឆិកានេះ ថា ផ្សារទំនើបសេនជូរីផ្លាហ្សា នឹងក្លាយទៅជាមជ្ឈមណ្ឌល ពាណិជ្ជកម្ម ឧស្សាហកម្ម សេវាកម្ម និងទេសចរណ៍ដ៏ធំបំផុត នៅក្នុងរាជធានីភ្នំពេញ ហើយតំបន់នេះក៏នឹងក្លាយទៅជាទីចាប់អារម្មណ៍ខ្លាំងបំផុតរបស់ភ្ញៀវទេសចរជាតិ-អន្តរជាតិ បន្ទាប់ពីផ្សារទំនើបមួយនេះលេចចេញរូបរាងឡើង។

លោក ឃួង ស្រេង អភិវឌ្ឍរាជធានីភ្នំពេញបានបានឱ្យដឹងដែរថា គម្រោងអភិវឌ្ឍផ្សារទំនើបនេះ ក្នុងគោល ដៅរៀបចំសណ្តាប់ធ្នាប់នៅតំបន់នេះឲ្យបានរៀបរយនិងការបង្អួតភ្ញៀវទេសចរបរទេស ខណៈបច្ចុប្បតំបន់នេះមានស្ថានភាពអាក្រក់ខ្លំាងរងការលិចលង់ជាប្រចាំនៅពេលមានភ្លៀងធ្លាក់ម្តង ហើយការលក់ដូរគ្មានសណ្តាប់ធ្នាប់ប៉ៈពាល់ដល់ការធ្វើចរាចរណ៍របស់ប្រជាពលរដ្ឋនិងភ្ញៀវទេសចរ។

លោកថា “សរសើរហើយសរសើរទៀតចំពោះអាជីវករទំាងផ្សាររដ្ឋនិងផ្សារឯកជន ដែលបានទុក ចិត្តមកដល់រដ្ឋបាលរាជធានីភ្នំពេញ ប្រគល់តួនាទីនេះមកអោយរដ្ឋបាលរាជធានីភ្នំពេញ ហើយផ្តល់ការវិនិយោគជូនក្រុមហ៊ុនផ្សារសិនជូរីគ្រុប ដើម្បីធ្វើការអភិវឌ្ឍជាផ្សារទំនើប ចឹងអាជីវករទំាងអស់ត្រូវទុកចិត្តមានកិច្ចការបញ្ហាអ្វីត្រូវតេមកខ្ញុំ។ ហើយក្រុមហ៊ុនត្រូវធ្វើអ្វីតាម កិច្ចសន្យាដើម្បីសុខដុមទំាងអស់គ្នា”។

លោក អភិបាលរាជធានីភ្នំពេញបានណែនាំដល់ម្ចាស់វិនិយោគគម្រោងអភិវឌ្ឍន៍ ផ្សារសិនជូរីផ្លាហ្សា មិនត្រូវធ្វើអ្វីខុសពីគម្រោងដែលបានព្រមព្រៀងឡើយ ដើម្បីកុំអោយមានការ ឆ្គាំឆ្គងជាមួយក្រុមអាជីវករ។

លោកស្រីចាន់ សុធាអគ្គនាយិកាក្រុមហ៊ុនសិនជូរីគ្រុប បានឲ្យដឹងបន្តថា គម្រោងអភិវឌ្ឍន៍ផ្សារទំនើបនេះមានកំពស់៥ជាន់ ហើយនៅពេលក្រុមហ៊ុនសាងសង់រួច នឹងប្រគល់តូបជូនអាជីវករវិញដែលបច្ចុប្បន្នពួកគេមានតូបកំពុងលក់ នៅផ្សាររដ្ឋ និងផ្សារឯកជន។

លោកស្រីបានអៈអាងថា ក្រុមហ៊ុននឹងពន្លឿនការសាងសង់ផ្សារទំនើបនេះឲ្យហើយតាម ផែនការដែលបានកំណត់ក្នុងរយៈពេល២៤ខែ ពោលនឹងត្រូវហើយរួចរាល់នៅចុងឆ្នាំ២០២១ ខាងមុខ។ បច្ចុប្បន្នអាជីវករលក់នៅទីតាំងផ្សារសិនជូរីទាំងរដ្ឋនិងឯកជនចំនួន៦៧០តូប ដោយត្រូវរើទៅលក់ជាបណ្តោះអាសន្នទីតំាងសួនកុមារពោធិសែនជ័យ មុខផ្សារសិនជូរីផ្លាហ្សា៕

លោក Donald Trump បានបញ្ជាក់ពីការវិវត្តន៍ចុងក្រោយនៃការចរចាពាណិជ្ជកម្មដំណាក់កាលទី១

ដោយ Donald Lee

ភ្នំពេញ៖ ប្រធានាធិបតីអាមេរិក Donald Trump បានថ្លែងថា អ្នកចរចាពាណិជ្ជកម្មទាំងសងខាងកំពុងស្ថិតក្នុងដំណាក់កាលចុងក្រោយនៃការបញ្ចប់កិច្ចព្រមព្រៀងពាណិជ្ជកម្មដំណាក់កាលទី ១ នៅថ្ងៃ អង្គារនេះ។

លោក Trump បានថ្លែងទៅកាន់អ្នកសារព័ត៌មាននៅឯសេតវិមាននៅថ្ងៃ អង្គារនេះថា “យើងស្ថិតក្នុងដំណាក់កាលចុងក្រោយនៃកិច្ចព្រមព្រៀងដ៏សំខាន់មួយ។ ខ្ញុំគិតថា អ្នកអាចនិយាយថា កិច្ចព្រមព្រៀងដ៏សំខាន់បំផុតមួយនៅក្នុងពាណិជ្ជកម្ម។ វានឹងដំណើរការល្អ ប៉ុន្តែនៅពេលជាមួយគ្នានេះ យើងចង់ឃើញដំណើរការល្អនៅក្នុងទីក្រុងហុងកុង”។

លោកបានបន្ថែមថា “ខ្ញុំគិតថា ប្រធានាធិបតីស៊ីអាចធ្វើឱ្យរឿងនោះកើតឡើង។ ខ្ញុំស្គាល់គាត់ ហើយខ្ញុំដឹងថា លោកចង់ធ្វើឱ្យវាកើតឡើង”។ អ្នកដឹកនាំចរចារបស់ចិនលោក Liu បាននិយាយទៅកាន់តំណាងពាណិជ្ជកម្មអាមេរិកលោក Robert Lighthizer និងរដ្ឋមន្រ្តីក្រសួងរតនាគារអាមេរិកលោក Steven Mnuchin បានបញ្ចប់ការទាក់ទងគ្នាតាមទូរស័ព្ទនៅព្រឹកថ្ងៃ អង្គារនេះស្តីពីកិច្ចព្រមព្រៀងពាណិជ្ជកម្មដំណាក់កាលមួយ។

សង្រ្គាមពាណិជ្ជកម្ម ១៦ ខែបានធ្វើឱ្យរំខានដល់សង្វាក់ពាណិជ្ជកម្មពិភពលោក និងខ្សែសង្វាក់តម្លៃនៅជុំវិញពិភពលោក។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏ធំកាលពី ១០ ឆ្នាំមុន។

លើសពីនេះទៀត ធនាគារ New York Federal Reserve បានរកឃើញថា ក្រុមហ៊ុន និងអ្នកប្រើប្រាស់អាមេរិកកំពុងទទួលរងផលប៉ះពាល់ពីពន្ធគយខ្ពស់នៃទំនិញចិន។ពន្ធគយគឺជាទម្រង់នៃការយកពន្ធ និងជាវិធីមួយដែលប្រទេសនានារកប្រាក់ចំណូលបាន។ កាលពីមុន ពន្ធគយគឺជាប្រភពធំបំផុតនៃការផ្តល់មូលនិធិសម្រាប់រដ្ឋាភិបាល។ ពន្ធគយគឺជាទម្រង់នៃពន្ធលក់ដែលត្រូវបានគិតដោយអាជ្ញាធរគយរបស់ប្រទេស។

ពន្ធទាំងនេះត្រូវបានទូទាត់នៅឯកំពង់ផែនៃការចូលទំនិញដោយអាជ្ញាធរពន្ធគយរបស់ប្រទេសមួយ ហើយត្រូវបានទូទាត់ដោយអ្នកទិញទំនិញក្នុងស្រុក។

ការសិក្សាស្រាវជ្រាវមួយដោយធនាគារ New York Federal Reserve បានឱ្យដឹងថា “អាជីវកម្ម និងអ្នកប្រើប្រាស់អាមេរិកត្រូវបានការពារពីពន្ធគយខ្ពស់ដល់កម្រិតដែលក្រុមហ៊ុនចិនបញ្ចុះថ្លៃដុល្លារដែលពួកគេទូទាត់”។

របាយការណ៍ដដែលបានបង្ហាញទៀតថា “ទិន្នន័យតម្លៃនាំចូលរបស់អាមេរិកបានបង្ហាញថា តម្លៃទំនិញចិនមកដល់ពេលនេះមិនបានធ្លាក់ចុះទេ។ ជាលទ្ធផល អ្នកលក់ដុំអ្នកលក់រាយ អ្នកលក់រាយ និងអ្នកប្រើប្រាស់នៅអាមេរិកជាអ្នកបង់ពន្ធ”។

ការិយាល័យជំរឿន និងទិន្នន័យរបស់ក្រសួងកសិកម្មអាមេរិកបានបង្ហាញពីផលប៉ះពាល់នៃពន្ធគយដែលបានចូលជាធរមានកាលពីថ្ងៃទី ១ ខែ កញ្ញា លើទំនិញចិនដែលមានតម្លៃ ១១២ ពាន់លានដុល្លារ។ ចំពោះការដំឡើងពន្ធតែមួយ ជនជាតិអាមេរិកបានចំណាយ ៩០៥ លានដុល្លារបន្ថែម។

នៅក្នុងខែ កញ្ញា តែមួយ ជនជាតិអាមេរិកបានបង់ពន្ធសរុបចំនួន ៧,១ ពាន់លានដុល្លារអាមេរិកដែលច្រើនជាងចំនួនផ្សេងទៀតនៅក្នុងប្រវតិ្តសាស្រ្តអាមេរិក កើនឡើង ៥៩ ភាគរយ បើប្រៀបធៀបនឹងខែដូចគ្នាកាលពីឆ្នាំមុន និងការកើនឡើងចំនួន ៦០០ លានដុល្លារកាលពីខែមុន។

សេចក្តីថ្លែងការណ៍ពីអង្គការដែលមានមូលដ្ឋាននៅអាមេរិកឈ្មោះថា Tariffs Hurt the Heartland។អង្គការ UNCTAD ដែលជាស្ថាប័នសំខាន់របស់អង្គការសហប្រជាជាតិទាក់ទងនឹងបញ្ហាពាណិជ្ជកម្ម និងការអភិវឌ្ឍបានចេញផ្សាយរបាយការណ៍ដែលរកឃើញការសន្និដ្ឋានដូចគ្នាទៅលើផលប៉ះពាល់នៃសង្គ្រាមពាណិជ្ជកម្មអាមេរិក និងចិន។

លោក Alessandro Nicita សេដ្ឋវិទូបានថ្លែងនៅក្នុងរបាយការណ៍របស់អង្គការសហប្រជាជាតិថា “អ្នកប្រើប្រាស់អាមេរិកកំពុងបង់ពន្ធក្នុងតម្លៃខ្ពស់ ហើយមិនត្រឹមតែអ្នកប្រើប្រាស់ចុងក្រោយដូចជាយើងប៉ុណ្ណោះទេ ប៉ុន្តែអ្នកនាំចូលផលិតផលមធ្យម ; និងក្រុមហ៊ុនដែលនាំចូលគ្រឿងបន្លាស់ពីចិនផងដែរ”៕