ក្រុមហ៊ុនដឹកជញ្ជួនខ្នាតយក្សរបស់ចិនត្រៀមឈានជើងចូលទីផ្សារកម្ពុជា

ដោយ ប៊ី

ភ្នំពេញ៖ ក្រុមហ៊ុន Best Inc ដែលផ្តល់ដំណោះស្រាយក្នុងវិស័យដឹកជញ្ជួន និងមូលដ្ឋាននៅចិនកំពុងស្វែងរកការពង្រីកទីផ្សារឱ្យកាន់ធំជាងមុននៅអាស៊ីអាគ្នេយ៍ ខណៈកម្ពុជា ម៉ាឡេស៊ី និងឥណ្ឌូនេស៊ីបាននិងកំពុងស្ថិតក្នុងទិសដៅទីផ្សាររបស់ខ្លួន។

បន្ទាប់ពីទទួលបានលទ្ធផលប្រចាំត្រីដ៏ល្អនៅវៀតណាម លោក George Chow ប្រធានយុទ្ធសាស្ត្រ និងជាមន្រ្តីវិនិយោគនៃក្រុមហ៊ុនចិននេះ បាននិយាយថា ក្រុមហ៊ុន Best កំពុងពង្រីកសេវាកម្មដឹកជញ្ជូនរបស់ខ្លួន ហើយមានគោលបំណងផ្តល់ការដឹកជញ្ជូនឆ្លងកាត់ព្រំដែននៅម៉ាឡេស៊ី កម្ពុជា និងឥណ្ឌូនេស៊ី។

លោក Chow បានថ្លែងថា “យើងមើលឃើញអាស៊ីអាគ្នេយ៍ជាតំបន់មានយុទ្ធសាស្ត្រជាយុទ្ធសាស្ត្រសម្រាប់ការពង្រីករបស់យើង ព្រោះតំបន់មានប្រជាជនវ័យក្មេង និងសេដ្ឋកិច្ចរីកលូតលាស់យ៉ាងឆាប់រហ័ស”។

លោក បន្តថា ការជ្រៀតចូលទីផ្សារពាណិជ្ជកម្មតាមប្រព័ន្ធអេឡិចត្រូនិកនៅអាស៊ីអាគ្នេយ៍ក៏បាននិងកំពុងរីកចម្រើនយ៉ាងឆាប់រហ័សដែលទាមទារខ្សែសង្វាក់ផ្គត់ផ្គង់រួមបញ្ចូលគ្នា។ ដំណោះស្រាយក៏ដូចជាសេវាកម្មចែកចាយដែលមានគុណភាពផងដែរ”។

កាលពីខែមុន ក្រុមហ៊ុន Best បានពង្រីកសេវាកម្មដឹកជញ្ជូនទំនិញលឿនរបស់ខ្លួនទៅកាន់វៀតណាមដែលបានកត់សម្គាល់ពីការបណ្តាក់ទុនទី ១៩ របស់ក្រុមហ៊ុននៅក្រៅប្រទេស។ ដោយដកស្រង់ការស្រាវជ្រាវពីធនាគារពិភពលោក លោក Chow បាននិយាយថា ការចំណាយលើភ័ស្តុភារមានប្រហែល ២១ភាគរយនៃផលិតផលក្នុងស្រុកសរុបរបស់វៀតណាមដែលស្ថិតក្នុងចំណោមអត្រាខ្ពស់បំផុតនៅក្នុងតំបន់អាស៊ាន។

ដោយឡែក លោក Chow ឱ្យដឹងថា ក្រុមហ៊ុនក៏ផ្តល់សេវាកម្មគ្រប់គ្រងខ្សែសង្វាក់ផ្គត់ផ្គង់ដល់ក្រុមហ៊ុន Alibaba ក្នុងចំណោមអតិថិជនសាជីវកម្មចំនួន ៦០០នាក់។

លោក បាននិយាយថា ក្រុមហ៊ុនបង្កើតបានត្រឹមតែ ១ ភាគរយនៃប្រាក់ចំណូលរបស់ខ្លួនដោយផ្ទាល់ពីក្រុមហ៊ុន Alibaba ប៉ុន្តែវាទាក់ទងជាមួយពាណិជ្ជករ និងម៉ាកដែលលក់ទំនិញនៅលើវេទិកាលក់រាយតាម Alibaba ។

លោក Chow បានសរសេរថា “ឈ្មួញទាំងនេះធ្វើការសម្រេចចិត្តជាលក្ខណៈបុគ្គល និងឯករាជ្យលើក្រុមហ៊ុនដែលផ្តល់សេវាកម្មដឹកទំនិញ។ ជាមធ្យម ក្រុមហ៊ុន BEST Express ដឹកជាង ២០លានកញ្ចប់ជារៀងរាល់ថ្ងៃសម្រាប់ពាណិជ្ជករទាំងនេះ”៕

អានបន្ថែម៖ ក្រុមហ៊ុនដឹកជញ្ជួនម៉ាឡេស៊ីចាប់អារម្មណ៍ក្នុងការវិនិយោគនៅកម្ពុជា

ក្រុមហ៊ុនចិន-កូរ៉េសហការគ្នាបង្កើតរោងចក្រតម្លើងរថយន្តនៅកម្ពុជាដើម្បីនាំចេញទៅបណ្តាប្រទេសសមាជិកអាស៊ាន

ដោយ វុត្ថា

ភ្នំពេញៈ វិនិយោគិនមកប្រទេសចិន និងកូរ៉េ បានសម្រេចចិត្តចុះអនុស្សារណៈយោគជយល់គ្នា (MOU) បង្កើតរោងចក្រតម្លើងរថយន្តនៅកម្ពុជា សម្រាប់នាំចេញទៅកាន់បណ្តាប្រទេសនៅក្នុងតំបន់អាស៊ាន ។

យោងតាមសេចក្តីប្រកាសព័ត៌មាន ក្នុងពិធីចុះហត្ថលេខាដែលបានធ្វើនៅថ្ងៃទី២៥ វិច្ឆិកា ២០១៩កន្លងមកនេះបានឲ្យដឹងថា ក្រុមហ៊ុនអន្តរជាតិ២ ដែលកំពុងមានវត្តមាននៅក្នុងកម្ពុជា រួមមាន ក្រុមហ៊ុន DAEHAN Group មកពីប្រទេសកូរ៉េ និងក្រុមហ៊ុន SINO TRUK មកពីប្រទេសចិនបានចុះអនុស្សារណៈយោគយល់គ្នា ក្រោមការធ្វើជាសាក្សីពី លោក សុខចិន្តា សោភា រដ្ឋមន្រ្តីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) និងលោក WANG SHUJIAN សមាជិកគណៈកម្មាធិការអចិន្ត្រៃយ៍នៃគណៈកម្មាធិការបក្សខេត្ត Shandong និងជាអភិបាលរងខេត្តរបស់ប្រទេសចិន។

លោកLEE JAEHOO តំណាងមកពីក្រុមហ៊ុន DAEHAN Group បានឲ្យដឹងថា កម្ពុជា បានរក្សាកំណើនសេដ្ឋកិច្ចកម្រិតខ្ពស់ប្រចាំឆ្នាំ ដែលធ្វើឲ្យវិនិយោគិនមកពីគ្រប់តំបន់ចង់បណ្ដាក់ទុនវិនិយោគក្នុងប្រទេសនេះ។ អ្វីដែលសំខាន់នោះ គឺកម្ពុជាបានលើកទឹកចិត្តដល់វិស័យឧស្សាហកម្ម ខណៈកម្ពុជាបានក្លាយជាប្រទេសគំរូ និងនាំមុខគេក្នុងចំណោមប្រទេសកំពុងអភិវឌ្ឍន៍ទាំងអស់។

លោករំពឹងថា តាមរយៈកិច្ចសហការគ្នានេះ នឹងអាចទទួលបានរថយន្តដ៏ល្អ និងមានការគាំទ្រពីបណ្ដាប្រទេសក្នុងតំបន់អាស៊ាន បន្ទាប់ពីក្រុមហ៊ុនទាំងពីរមានផែនការ និងយុទ្ធសាស្ត្រធ្វើយ៉ាងណា ដើម្បីឲ្យក្លាយជាក្រុមហ៊ុននាំមុខគេក្នុងតំបន់អាស៊ាន។

លោក YUAN ZHONGBO តំណាងក្រុមហ៊ុន Sinotruk បានឲ្យដឹងថា ក្រុមហ៊ុនលោក ជាក្រុមហ៊ុនមានបទពិសោធន៍យូរឆ្នាំ ក្នុងការផលិតរថយន្តសម្រាប់នាំចេញ និងផ្គត់ផ្គង់នៅក្នុងប្រទេសចិន។ ក្រុមហ៊ុននេះ ក៏មានកិច្ចសហប្រតិបត្តិការជាមួយបណ្ដាប្រទេសធំៗ លើពិភពលោកជំនាញផលិតរថយន្តផងដែរ មុននឹងចុះហត្ថលេខាសហការជាមួយក្រុមហ៊ុនដៃគូនៅក្នុងប្រទេសកម្ពុជា។

យោងតាមខ្លឹមសារគោលបំណង នៃអនុស្សារណៈយោគយល់គ្នារវាងក្រុមហ៊ុន Daehan និងក្រុមហ៊ុន Sinotruk International មានដូចជា ទី១ ដើម្បីបង្កើតការផ្ទេរបច្ចេកទេសរថយន្តដឹកទំនិញធុនធ្ងន់ និងម៉ាស៊ីន ដើម្បីបង្កើតការងារបន្ថែមទៀត ហើយក៏ជាផ្នែកមួយនៃការអភិវឌ្ឍឧស្សាហកម្មរថយន្តនៅកម្ពុជាផងដែរ។

ទី២-កិច្ចសហប្រតិបត្តិការឧស្សាហកម្ម ក្នុងចំណោមប្រទេសកម្ពុជា កូរ៉េ និងចិន នឹងអាចធ្វើឱ្យយុគសម័យថ្មីនៃការអភិវឌ្ឍ ដែលអាចពង្រឹងដើម្បីឈានដល់គោលដៅរបស់ភាគីទាំងពីរ និងបច្ចុប្បន្ននេះ ជាយុគសម័យនៃទីផ្សារអាស៊ានតែមួយ ហើយចក្ខុវិស័យរបស់យើង គឺចង់អោយប្រទេសកម្ពុជាក្លាយជាប្រទេសផលិតរថយន្តធំៗ៕

អានអត្ថបទ៖ ក្រុមហ៊ុនចិនដ៏ធំមួយគ្រោងវិនិយោគរោងចក្រតម្លើងរថយន្តនៅកម្ពុជា

រដ្ឋាភិបាលត្រៀមចំណាយថវិកាជាតិជាង ៨០០០លានដុល្លារនៅឆ្នាំ២០២០ខាងមុខនេះ

ដោយៈ រ៉ាណេត

ភ្នំពេញៈ រដ្ឋសភាបានអនុម័តទាំងស្រុង ទៅសេចក្ដីព្រាងច្បាប់ស្ដីពីហិរញ្ញវត្ថុ សម្រាប់ការគ្រប់គ្រងឆ្នាំ២០២០ខាងមុខ ដែលគ្រោងចំណាយរហូតដល់ជាង៨០០០លានដុល្លារសហរដ្ឋអាមេរិក។

តាមផែនការនៅក្នុងឆ្នាំ២០២០ខាងមុខនេះ រាជរដ្ឋាភិបាលកម្ពុជាគ្រោងនឹងចំណាយសរុបប្រមាណ ៣៣,៣៣៩,៦៣៣ លានរៀល ដែលស្មើនឹងប្រមាណ៨២២៣លានដុល្លារសហរដ្ឋអាមេរិកសម្រាប់ការគ្រប់គ្រងរដ្ឋ។ គម្រោងចំណាយនេះ មានប្រមាណ២៨.០១ភាគរយ នៃផលទុនជាតិសរុប (ផសស) និងកើនឡើង២២.៧ភាគរយ បើធៀបនឹងឆ្នាំ២០១៩។

ក្នុងចំណោមគម្រោងចំណាយថវិកាជាតិ ជាង៨ពាន់លានដុល្លារសហរដ្ឋអាមេរិករបស់កម្ពុជាសម្រាប់ឆ្នាំ២០២០នេះ រាជរដ្ឋាភិបាលមានទិសដៅជាយុទ្ធសាស្រ្ត កំណត់ចំណាយថវិកាថ្នាក់ជាតិ ឲ្យស្ថិតក្នុងកម្រិតចំនួន៣១,០៩៥,៨៥៥លានរៀល ដែលស្មើនឹងប្រមាណជាង៧៦០០លានដុល្លារ ត្រូវជា២៦,១២ភាគរយនៃផសស កើនឡើង២០,៧ ភាគរយ បើធៀបនឹងច្បាប់ឆ្នាំ២០១៩ ដែលក្នុងនោះចំណាយចរន្តថ្នាក់ជាតិ មានចំនួន ១៨,០៣៦,៨៨៤លានរៀល (ប្រមាណ ៤៤៥៩ លានដុល្លារ) និងចំណាយមូលធនថ្នាក់ជាតិ មានចំនួន១៣,០៥៨,៩៧១លានរៀល (៣២០០លានដុល្លារ)។

នៅក្នុងឆ្នាំ២០១៩ ដែលជិតបញ្ចប់នេះ រាជរដ្ឋាភិបាលកម្ពុជាបានចំណាយអស់ថវិកាប្រមាណ២៧,១៦៤, ៩៩៦លានរៀល ដែលប្រហាក់ប្រហែលនឹង៦៧០០លានដុល្លារសហរដ្ឋអាមេរិក សម្រាប់ការចំណាយទូទៅរបស់រដ្ឋក្នុងឆ្នាំ២០១៩។ ការចំណាយនេះបានកើនឡើង១១.៤ ភាគរយ បៀបនឹងគម្រោងចំណាយថវិការដ្ឋឆ្នាំ២០១៨ ដែលមានចំនួនសរុបចំនួន ២៤,៣៧៥,១០២លានរៀល៕

អានបន្ថែម៖ ការចំណាយថវិកាជាតិឆ្នាំ២០២០ ផ្តោតលើវិស័យចំនួន៤

អ្នកចរចាសង្គ្រាមពាណិជ្ជកម្មអាមេរិក និងចិនត្រៀមចុះហត្ថលេខាកិច្ចព្រមព្រៀងដំណាក់កាលទី១

ដោយ ៖ Donald Lee

ភ្នំពេញ៖ អ្នកចរចាពាណិជ្ជកម្មអាមេរិក និងចិន ជិតឈានដល់កិច្ចព្រមព្រៀងពាណិជ្ជកម្មដំណាក់កាល១ បន្ទាប់ពីមានការហៅតាមទូរស័ព្ទកម្រិតថ្នាក់ជាតិរវាងប្រទេសទាំងពីរនៅព្រឹកថ្ងៃអង្គារនេះ។

មេដឹកនាំចរចារបស់ប្រទេសចិន លោក Liu បាននិយាយទៅកាន់តំណាងពាណិជ្ជកម្មអាមេរិកលោក Robert Lighthizer និងរដ្មន្ត្រីក្រសួងរតនាគារអាមេរិកលោក Steven Mnuchin បានបញ្ចប់ការពិភាក្សានៅព្រឹកថ្ងៃអង្គារនេះស្តីពីកិច្ចព្រមព្រៀងពាណិជ្ជកម្ម ដំណាក់កាល១។

សេចក្ដីជូនដំណឹងរបស់ក្រសួងពាណិជ្ជកម្មចិនកាលពីថ្ងៃអង្គារ បានឱ្យដឹងថា “ភាគីទាំងពីរបានពិភាក្សាគ្នាដោះស្រាយបញ្ហាសំខាន់ៗដែលជាកង្វល់រួមបានឈានដល់ការឯកភាពគ្នាអំពីវិធីដោះស្រាយបញ្ហាដែលពាក់ព័ន្ធ និងបានព្រមព្រៀងគ្នាទាក់ទងបញ្ហាដែលនៅសេសសល់សម្រាប់កិច្ចព្រមព្រៀងដំណាក់កាលទី ១”។

ប្រធានាធិបតីអាមេរិកលោក Donald Trump បានបញ្ជាក់ជាបន្តថា អាមេរិកនឹងមិនប្រញាប់ប្រញាល់ចំពោះកិច្ចព្រមព្រៀងទេ ហើយប្រធានាធិបតីចិន លោក ស៊ី ជិនពីង បាននិយាយថា ចិននឹងមិនស្ទាក់ស្ទើរក្នុងការប្រយុទ្ធប្រឆាំងនឹងការទាមទារខាងពាណិជ្ជកម្មអយុត្តិធម៌នោះទេ។ ការចេញប័ណ្ណស្នូលនៅតែត្រូវបានដោះស្រាយ ជាពិសេសការទម្លាក់ពន្ធរបស់អាមេរិកលើទំនិញចិន និងការលក់កសិផលអាមេរិកទៅចិន។

របាយការណ៍របស់កាសែត Global Times ឱ្យដឹងថា យោងតាមអ្នកជំនាញដែលកំពុងតាមដានយ៉ាងដិតដល់ពីការចរចាពាណិជ្ជកម្ម “បញ្ហាពាក់ព័ន្ធដែលត្រូវបានពិភាក្សាតាមទូរស័ព្ទកាលពីថ្ងៃអង្គារ អាចរួមមានការដកហូតពន្ធ ការទិញកសិកម្ម និងយន្តការពិនិត្យឡើងវិញសម្រាប់ការអនុវត្តកិច្ចព្រមព្រៀងសក្តានុពលមួយ។

សង្គ្រាមពាណិជ្ជកម្មរយៈពេល ១៦ខែ បានធ្វើឱ្យរំខានដល់សង្វាក់ពាណិជ្ជកម្ម និងការផ្គត់ផ្គង់ពិភពលោកនៅជុំវិញពិភពលោក និងគំរាមកំហែងដល់សណ្តាប់ធ្នាប់សេដ្ឋកិច្ចដែលមានស្រាប់។ក្រុមអ្នកវិភាគបានអះអាងថា សង្គ្រាមពាណិជ្ជកម្មគឺជាការឈានមុខគេនៅក្នុងសង្គ្រាមត្រជាក់ថ្មីមួយដែលពាក់ព័ន្ធនឹងអាមេរិក និងចិន។

លោក Su Ge ប្រធានគណៈកម្មាធិការជាតិសម្រាប់កិច្ចសហប្រតិបត្តិការសេដ្ឋកិច្ចប៉ាស៊ីហ្វិករបស់ចិន បានមានប្រសាសន៍ថា “ចិន និងអាមេរិក កំពុងប្រកួតប្រជែងគ្នាលើកម្លាំង និងយុទ្ធសាស្ត្រជាតិដ៏ទូលំទូលាយ។ ដោយសារតែការកើនឡើងនៃបណ្តាប្រទេសកំពុងអភិវឌ្ឍន៍ ជាពិសេស ចិន ឥទ្ធិពលរបស់លោកខាងលិចកំពុងធ្លាក់ចុះ”។

លោក Su បានបន្ថែមទៀតថា “ទន្ទឹមនឹងនេះដែរ ចិនកំពុងឈានទៅរកគោលដៅនៃការស្តារឡើងវិញរបស់ជាតិកំពុងខិតទៅជិតកណ្តាលនៃឆាកពិភពលោកដូចពេលមុនៗ ហើយទំនាក់ទំនងរបស់ប្រទេសជាមួយពិភពលោកកំពុងទទួលបានការផ្លាស់ប្តូរដែលមិនធ្លាប់មាន។

លោក បានបន្តថា “នេះបានបង្កើនការព្រួយបារម្ភជាយុទ្ធសាស្ត្រដល់អាមេរិក។ ទីក្រុងវ៉ាស៊ីនតោនហៅថាការគំរាមកំហែងពីចិន កំណត់ចិនថាជាដៃគូប្រកួតប្រជែងជាយុទ្ធសាស្រ្ត ហើយមានកិច្ចខិតខំប្រឹងប្រែងណាមួយក្នុងការបង្ក្រាប និងទប់ចិនលើផ្នែកយុទ្ធសាស្ត្រ”៕

គម្រោងអាគារសហកម្មសិទ្ធិ The Peninsula Private Residences ផ្តល់ជូនជម្រើសបង់ប្រាក់យ៉ាងពិសេស ៤ ប្រភេទ

ដោយ ប៊ី

ភ្នំពេញ៖ នៅពេលទិញផ្ទះ អ្នកទិញភាគច្រើនតែងតែស្វែងរកមុនគេនូវទីតាំង បន្ទាប់មកតម្លៃ និងចំណុចបន្ទាប់មកទៀតគឺលក្ខខណ្ឌបង់ប្រាក់ រួមជាមួយនឹងភាពងាយស្រួល និងសេវាកម្មផ្សេងៗទាំងនៅក្នុងគម្រោង និងក្រៅគម្រោង។

សម្រាប់អ្នកចង់បានលំនៅដ្ឋានល្អប្រណិត ថែមទាំងបានឆ្លើយតបនឹងចំណុចមួយចំនួនខាងលើនេះ នោះពួកគេនឹងពេញចិត្តជាមួយគម្រោងមួយគឺ គម្រោង The Peninsula Private Residences។

គម្រោងនេះស្ថិតនៅក្នុងតំបន់ ក្បែររង្វង់មូលជ្រោយចង្វារ ដែលជាតំបន់ដ៏ពេញនិយមខ្លាំងបំផុតមួយ សម្រាប់អ្នកដែលប្រាថ្នាចង់រស់នៅក្នុងកន្លែងមានលក្ខណៈធម្មជាតិ និងនៅក្បែរក្រុងបំផុត។ អ្វីដែលសំខាន់បំផុតមួយទៀត គឺលក្ខខណ្ឌបង់ប្រាក់ដ៏ងាយស្រួលនិងជម្រើសជាច្រើនដែលគម្រោង The Peninsula Private Residences កំពុងផ្តល់ជូន។

លោក កាំ ជិន សេង ប្រធានគ្រប់គ្រងគម្រោង The Peninsula Private Residences បានប្រាប់ Realestate.com.kh ថា The Peninsula Private Residences មិនត្រឹមតែមានទីតាំងល្អ និងនៅជិតក្រុងជាងគេប៉ុណ្ណោះទេ ប៉ុន្តែគម្រោងក៏ផ្តល់ជម្រើសបត់បែនជាមួយការទូទាត់ប្រាក់ដ៏ងាយស្រួលសម្រាប់អតិថិជនដែលមានរហូតទៅដល់៤ជម្រើស ដូចជាជាមួយនឹងជម្រើសបង់រំលោះជាមួយធនាគារដៃគូររបស់យើង RHB ដែលផ្តល់កម្ចីជូនអតិថិជនទាំងក្នុងនិងក្រៅស្រុក។

លោកកាំ ជិន សេង ជឿថាការផ្តល់ជម្រើសផ្សេងៗគ្នាបែបនេះនឹងអាចផ្តល់លទ្ធភាពឲ្យអតិថិជនបានទូលំទូលាយបំផុត។ ពាក់ព័ន្ធនឹងនិន្នាការនៃការរស់នៅខុនដូ លោកមើលឃើញថា បច្ចុប្បន្ន ទាំងអ្នកអភិវឌ្ឍន៍ និងអតិថិជនកាន់តែមានភាពចាស់ទុំ។

លោកបានបន្ថែមថា អ្នកអភិវឌ្ឍន៍ត្រូវតែផ្តល់នូវផលិតផល [លំនៅដ្ឋាន] មានលក្ខណៈត្រឹមត្រូវ ដែលត្រូវនឹងទីផ្សារ លក់និងជួលប្រកបដោយភាពឥតខ្ចោះ។ ចំណែកអតិថិជន មានជម្រើសកាន់តែច្រើន និងដឹងពីអ្វីដែលជាជម្រើសនៃការវិនិយោគល្អបំផុតដែលពួកគេចូលចិត្ត។

“បច្ចុប្បន្ន មានតែគម្រោងដែលមានបទពិសោធន៍នៅក្រៅប្រទេស និងស្គាល់ច្បាស់ពីវប្បធម៌ក្នុងស្រុកប៉ុណ្ណោះ ដែលននឹងអាចប្រកួតប្រជែងនៅក្នុងទីផ្សារកម្ពុជាបាន”។ នេះជាការអះអាងរបស់លោក កាំ ជិន សេង។

ប្រធានគ្រប់គ្រងគម្រោង The Peninsula Private Residences ប្រាប់ ៣ ចំណុច ប្រសិនចង់ទិញខុនដូបានចំនេញជាមួយបទពិសោធន៍គ្រប់គ្រងដ៏យូរឆ្នាំក្នុងវិស័យខុនដូនៅក្រៅប្រទេស និងនៅកម្ពុជាផង លោក កាំ ជិន សេង បច្ចុប្បន្នកំពុងគ្រប់គ្រងគម្រោងអចលនទ្រព្យដ៏ធំមួយ គឺគម្រោង The Peninsula Private Residences នៅតំបន់ជ្រោយចង្វារ។ លោកបានចែករំលែកពីបទពិសោធន៍ និងលក្ខណៈវិនិច្ឆ័យ មួយចំនួន ដើម្បីធានាថា ការវិនិយោគលើខុនដូនឹងអាចទទួលបានផលចំណេញ ឆាប់រហ័សក្នុងពេលអនាគត។

ក្នុងបទម្ភាសន៍ជាមួយ Realestate.com.kh លោក កាំ ជិន សេង បានលើកឡើង ៣ ចំណុចជាគន្លឹះ ដើម្បីឲ្យអ្នកទិញខុនដូ យកមកពិចារណា។ ទី១ ទីតាំងល្អសម្រាប់ទីប្រជុំជន ដែលផ្តល់ភាពងាយស្រួល និងការកើនឡើងតម្លៃ ទី២ រចនាបថទាក់ទាញ មានពន្លឺធម្មជាតិ លំហូរខ្យល់ចេញចូលល្អ និងទិដ្ឋភាពស្រស់ស្អាត ដែលជួយបង្កើនភាពស្រស់ស្រាយ ផ្តល់នូវអារម្មណ៍ល្អបំផុតសម្រាប់ការរស់នៅ។

លោក បានបន្តថា ទី៣ សេវាកម្មនៅក្នុងគម្រោង រាប់ចាប់ពីការផ្តល់ជូនសេវាកម្ម បរិក្ខារទូទៅ ចំណតរថយន្ត រហូត់ដល់តំបន់សហគមន៍ដែលអាចផ្តល់ជូនកន្លែងកម្សាន្ត និងការទំនាក់ទំនងជាមួយអ្នករស់នៅក្នុងសហគមន៍ជាមួយគ្នា។ល។

ចំណុចទាំងនេះត្រូវតែត្រូវបានគ្រប់គ្រងយ៉ាងល្អ ដើម្បីធានាបាននូវភាពងាយស្រួល និងភាពឯកជននៅក្នុងខុនដូ។

នៅពេលនិយាយពីទីតាំង លោកបានចាប់អារម្មណ៍តំបន់ជ្រោយចង្វារជាងគេ ដោយលោកមើលឃើញថាទីនេះជាទីតាំងមានសក្តានុពលសម្រាប់ការរស់នៅ និងពាណិជ្ជកម្ម។

លោកបន្ថែមថាជ្រោយចង្វារមានលក្ខណៈធម្មជាតិដែលស្ទើរតែគ្មានតំបន់ណាផ្សេងទៀតនៅក្នុងរាជធានីភ្នំពេញប្រៀបានឡើយដោយទីនេះអាចមើលឃើញជុំវិញបាន ៣៦០ ដឺក្រេ និងអាចមើលឃើញទន្លេ ព្រមទាំងតំបន់កណ្តាល ក្រុង ប្រសិន បើគេឈរនៅលើអគារខ្ពស់ ដូចជាអគារ The Peninsula Private Residences។

លោកជឿថា នៅពេលអនាគត ទាំងអ្នកក្នុងស្រុក និងជនបរទេសនឹងកាន់តែពេញចិត្តជាមួយទីក្រុងលំនៅដ្ឋានបែបធម្មជាតិ ដែលមានសេវាកម្មគ្រប់បែបយ៉ាង ដូចជាតំបន់ជ្រោយចង្វារនេះ។

បើតាមអ្នកជំនាញផ្សេងៗទៀត នៅពេលនិយាយពីការនិយោគលំនៅដ្ឋាន ពួកគេតែងតែបានលើកឡើងពីកត្តាផ្លូវច្បាប់ ដែលនេះមានន័យថារាល់ពេលមានការពិចារណាទិញលំនៅដ្ឋានពីគម្រោងណាមួយ ដើម្បីធានាបានផលចំណេញ អ្នកទិញត្រូវស្វែងយល់ពីភាពស្របច្បាប់នៃគម្រោងជាមុនសិន៕

ក្រុមហ៊ុនអចលនទ្រព្យលំដាប់ពិភពលោក នឹងចូលខ្លួនមកកាន់ទីផ្សារកម្ពុជានៅដើមឆ្នាំ២០២០

ដោយ ៖ រ៉ាណេត

ភ្នំពេញ ៖ ក្រុមហ៊ុនអចលនទ្រព្យលំដាប់ពិភពលោកមួយទៀតនឹងឈានចូលមកកាន់ទីផ្សារកម្ពុជានៅដើមឆ្នាំ២០២០ខាងមុខនេះបន្ទាប់ពីក្រុមហ៊ុននេះបានសិក្សាទៅលើសក្ដានុពលនៃភាពរីកចម្រើនលើវិស័យសេដ្ឋកិច្ច សង្គម ជាពិសេសវិស័យអចលនទ្រព្យនៅកម្ពុជា ។

ក្រុមហ៊ុនអចលនទ្រព្យដ៏ធំ និងល្បីឈ្មោះលំដាប់ពិភពលោក ដែលនឹងចូលខ្លួនមកកាន់ទីផ្សារអចលនទ្រព្យកម្ពុជានៅត្រឹមដើមឆ្នាំ២០២០ឆាប់ៗខាងមុខនេះ មានឈ្មោះថា Coldwell Banker Cambodia ។ ក្រុមហ៊ុនមួយនេះ ត្រូវបានពិភពអចលនទ្រព្យនៅទូទាំងពិភពលោកទទួលស្គាល់ថាជាក្រុមហ៊ុនជំនាញ និងមានកិត្តិស័ព្ទល្បីល្បាញយ៉ាងទូលាយ ជាមួយនឹងការបង្កើតការិយាល័យតំណាងក្រុមហ៊ុននៅ៤៥ប្រទេស ដែលក្នុងនោះក៏មានប្រទេសកម្ពុជាផងដែរ។

នាយិកាក្រុមហ៊ុនអចលនទ្រព្យអន្តរជាតិ Century21 Cambodia លោកស្រី Grace Rachny Fong បានមានប្រសាសន៍ថា គិតមកដល់ពេលនេះ ក្រុមហ៊ុនអចលនទ្រព្យអន្តរជាតិ Coldwell Banker មានអាយុកាល ១១៣ឆ្នាំហើយ ដោយមានទីស្នាក់កណ្តាលនៅសហរដ្ឋអាមេរិក និងជាប់លំដាប់លេខរៀងទី៣នៅលើពិភពលោក បន្ទាប់ពីក្រុមហ៊ុន Century21 ។

លោកស្រីបានបន្តទៀតថា “ការបង្ហាញវត្តមានរបស់ក្រុមហ៊ុនលំដាប់ពិភពលោកមួយនេះ គឺជាដៃគូសហការយ៉ាងជិតស្និទ្ធជាមួយក្រុមហ៊ុន Century21 Cambodia ប្រចាំនៅកម្ពុជា ដើម្បីធានាការទទួលបានចំណែកទីផ្សារដែលកំពុងតែមានតម្រូវការខ្ពស់ផ្នែកគ្រប់គ្រងអគារ និងមជ្ឈមណ្ឌលពាណិជ្ជកម្មនានានៅក្នុងប្រទេសមួយនេះ”។

លោកបានបញ្ជាក់ពីហេតុផលសំខាន់ដែលក្រុមហ៊ុនអចលនទ្រព្យអាមេរិកមួយនេះសម្រេចចិត្តចូលមកកាន់ទីផ្សារកម្ពុជាថា “ កត្តាសុខសន្តិភាពបានធ្វើអោយកម្ពុជា មានអំណោយផលយ៉ាងល្អក្នុងការវិនោយោគ ជាពិសេសទៅលើ វិស័យអចលនទ្រព្យ។ជាក់ស្តែងសំណង់អាគារទាំងរដ្ឋ និងឯកជនបាននិងកំពុងរីកចម្រើនកាន់តែខ្លាំង មិនចាញ់គ្នានោះទេ។ លោកស្រីបន្តថា ជាមួយនឹងកំនើននៃការវិនិយោគពីអន្តរជាតិ បានធ្វើឲ្យទីផ្សារនេះកាន់តែមានទំនុកចិត្ត ហើយយើងបាននិងកំពុងពង្រីកទីផ្សារទៅកាន់អន្តរជាតិផងដែរ។ ទាំងអស់នេះហើយដែលជាទំនុកចិត្តខ្ពស់សម្រាប់ការសម្រេចចិត្តរបស់ក្រុមហ៊ុនអន្តរជាតិចូលមកបង្ហាញខ្លួន”។

លោកស្រីបានបញ្ជាក់ថា “ក្រុមហ៊ុន Century21 Cambodia ពិតជាមានមោទនភាពខ្ពស់ដែលបានចាប់ដៃសហការយ៉ាងជិតស្និទ្ធជាមួយក្រុមហ៊ុន Coldwell Banker ហើយយើងជឿជាក់ថា ក្រោមកិច្ចសហការគ្នាជាដៃគូនៅពេលខាងមុខនេះ ពិតជានឹងទទួលបានភាពល្អប្រសើរ និងជោគជ័យនៅលើវិស័យអចលនទ្រព្យនៅកម្ពុជា”។

បច្ចុប្បន្ននេះ នៅក្នុងតំបន់អាស៊ាន វត្តមានរបស់ក្រុមហ៊ុនអចលនទ្រព្យអន្តរជាតិលំដាប់ពិភពលោក Coldwell Banker បានដាក់ការិយាល័យនៅក្នុងប្រទេសថៃ ជប៉ុន សាំងហ្គាពួរ ចិន ឥណ្ឌូនេស៊ី និងប្រទេសកម្ពុជា ជាប្រទេសទី៤៥ ។

នាយិកាប្រចាំប្រទេសក្រុមហ៊ុនអចលនទ្រព្យអន្តរជាតិ CBRE លោកស្រី អាន សុធីតា បានបង្ហាញពីក្ដីសាទរចំពោះវត្តមានថ្មីនៃក្រុមហ៊ុនអចលនទ្រព្យលំដាប់ពិភពលោកមកកាន់ទីផ្សារអចលនទ្រព្យកម្ពុជា ដែលកាន់តែជួយជំរុញ និងបង្កើនទំនុកចិត្តកាន់តែខ្ពស់។

លោកស្រីបានបន្តទៀតថា “ការមកដល់នៃក្រុមហ៊ុនអន្តរជាតិធំៗ គឺជាសញ្ញាដែលបង្ហាញពីភាពរឹងមាំនៃវិស័យអចលនទ្រព្យនៅកម្ពុជា ហើយអាចចូលរួមជួយពង្រឹងវិស័យមួយនេះកាន់តែរឹងមាំតាមរយៈការប្រកួតប្រជែងគ្នា បង្កើនគុណភាព ទំនុកចិត្ត រួមជាមួយនឹងការបង្កើនជំនាញក្នុងវិស័យមួយនេះកាន់តែល្អ”៕

ខេត្តសៀមរាបចងសម្ព័ន្ធមេត្រីជាមួយបណ្តាខេត្ត-ក្រុងនៃប្រទេសចិនចំនួន២៨

ដោយ វុត្ថា

សៀមរាប៖ រហូតមកដល់ពេលនេះ ខេត្តសៀមរាបបានធ្វើការចងសម្ព័ន្ធមេត្រីភាពជាមួយបណ្តាខេត្ត-ក្រុង នៃសាធារណរដ្ឋប្រជាមានិតចិន បានចំនួន ២៨ខេត្ត-ក្រុង ស្របតាមរយ:ការដាក់ចេញនូវគោលនយោបាយគំនិតផ្តួចផ្តើមផ្លូវមួយ ខ្សែក្រវាត់មួយរបស់សាធារណរដ្ឋប្រជាមានិតចិន។

លោក អ៊ាន ឃុន ប្រធានក្រុមប្រឹក្សាខេត្តស្តីទីនៃខេត្តសៀមរាប នៅក្នុងជំនួបពិភាក្សាការងារមួយចំនួនជាមួយគណប្រតិភូខេត្តជាំងស៊ី កាលពីថ្ងៃទី ២៥ ខែវិច្ឆិកា ម្សិលមិញនេះ បានឱ្យដឹងថាតាមរយ:ការចងសម្ព័ន្ធមេត្រីភាពនេះ បានធ្វើឲ្យខេត្តសៀមរាបទទួលបាននូវការជួយឧបត្ថម្ភគាំទ្រនានា ក៏ដូចជា អត្ថប្រយោជន៍ផ្សេងៗ ទៀត មានដូចជា ការសាងសង់ព្រលានយន្តហោះអន្តរជាតិថ្មី ការជួសជុលស្ថាបនាឡើងវិញនូវផ្លូវជាតិលេខ៦ ដែលតភ្ជាប់ខេត្តសៀមរាប ទៅកាន់រាជធានីភ្នំពេញ ការជួសជុលកែលម្អផ្លូវក្នុងខេត្ត ការជួយពិនិត្យព្យាបាលជំងឺដោយឥតគិតថ្លៃចំពោះប្រជាជនក្រីក្រក្នុងខេត្ត ការបង្កើតកសិដ្ឋានកសិកម្ម និងបណ្តុះបណ្តាល ជំនាញ ការផ្តល់អាហារូបករណ៍ ដល់សិស្ស-និស្សិតនៅក្នុងខេត្តសៀមរាបឲ្យទៅ សិក្សាបន្តនៅប្រទេសចិន និងការជំរុញភ្ញៀវទេសចរ ចិនឲ្យចូលមកទស្សនាខេត្តសៀមរាប។

លោកបន្តទៀតថា តាមរយ:ការដាក់ចេញនូវគំនិតផ្តួចផ្តើមផ្លូវមួយ ខ្សែក្រវាត់មួយ របស់សាធារណរដ្ឋប្រជាមានិតចិននេះផងដែរ គឺបានរួមចំណែកយ៉ាងសកម្ម ដល់ការជំរុញកិច្ចអភិវឌ្ឍតំបន់ និងសកល ហើយគំនិតផ្តួចផ្តើមនេះ គឺជាក្របខ័ណ្ឌនៃកិច្ចសហប្រតិបត្តិការសេដ្ឋកិច្ច និងការអភិវឌ្ឍនៅក្នុងតំបន់ ក៏ដូចជា នៅក្នុងសកលលោក ហើយក៏ជាយន្តការមួយដែលផ្តល់នូវធនធាន ដល់ប្រទេស នានាលើសកលលោក ពិសេសប្រទេសកំពុងអភិវឌ្ឍសម្រាប់បំពេញគម្លាតតម្រូវការ ហិរញ្ញប្បទាន ដើម្បីបង្កើនការតភ្ជាប់សេដ្ឋកិច្ចរបស់ខ្លួន។

លោកបញ្ជាក់ទៀតថា ជាក់ស្តែងប្រទេសកម្ពុជា គឺបានទទួលនូវអត្ថប្រយោជន៍យ៉ាងច្រើន តាមរយ: ការអនុវត្តនូវគំនិតផ្តួចផ្តើមខ្សែក្រវាត់មួយ ផ្លូវមួយនេះ ដែលក្នុងនោះរួមមាន ការកសាង ការស្តារ និងជួសជុលឡើងវិញនូវហេដ្ឋារចនាសម្ព័ន្ធផ្លូវថ្នល់ ស្ពាន ព្រលានយន្តហោះ ផ្លូវល្បឿនលឿន កំពង់ផែទឹកជ្រៅ ការវិនិយោគលើតំបន់សេដ្ឋកិច្ចពិសេស ការវិនិយោគលើវិស័យសំណង់ និងការវិនិយោគលើវិស័យផ្សេងៗទៀត ពីសំណាក់វិនិយោគិនចិន រួមជាមួយនឹងការជំរុញអ្នកទេសចរចិនឲ្យចូលទៅទស្សនាក្នុងប្រទេសកម្ពុជា៕

IMF ការព្យាករណ៍ថា សេដ្ឋកិច្ចជប៉ុនស្ថិតក្នុងសភាពទ្រឹងនៅឆ្នាំ ២០២០ ខាងមុខ

ដោយ Donald Lee

ភ្នំពេញ៖ មូលនិធិរូបិយវត្ថុអន្តរជាតិ (IMF) បានឱ្យដឹងថា សេដ្ឋកិច្ចជប៉ុននឹងត្រូវបានជាប់គាំងនៅក្នុងឆ្នាំ ២០២០ ខណៈខ្លួននៅតែបន្តមានកំណើនយឺតនៅចុងឆ្នាំនេះ។

IMF បានទម្លាក់ការព្យាករណ៍កំណើនសេដ្ឋកិច្ចជប៉ុនម្តងទៀតនៅឆ្នាំនេះពី ០,៩ ភាគរយដល់ ០,៨ ភាគរយ។

របាយការណ៍របស់ IMF បានចេញផ្សាយកាលពីថ្ងៃចន្ទថា “កំណើនផលិតផលក្នុងស្រុកសរុបពិតប្រាកដត្រូវបានគេព្យាករណ៍ថា នឹងមានសក្តានុពលខ្ពស់ជាង ០,៨ ភាគរយក្នុងឆ្នាំ ២០១៩”។

IMF ក៏បានណែនាំដល់ធនាគារជប៉ុនឱ្យធ្វើការកែសម្រួលអត្រាការប្រាក់ឱ្យស្របទៅនឹងធនាគារកណ្តាលអាស៊ីផ្សេងទៀតដែលកំពុងមានប្រតិកម្មទៅនឹងការធ្លាក់ចុះនៃសេដ្ឋកិច្ចពិភពលោក និងផលប៉ះពាល់នៃសង្គ្រាមពាណិជ្ជកម្មអាមេរិក និងចិនដែលធ្វើឱ្យប៉ះពាល់ដល់តំបន់អាស៊ី។

របាយការណ៍របស់ IMF បានឱ្យដឹងថា “ជំហរគោលនយោបាយរូបិយវត្ថុមិនមានការផ្លាស់ប្តូរច្រើនទេ ចាប់តាំងពីឆ្នាំ ២០១៦ ប៉ុន្តែសម្ពាធកំពុងកើនឡើងដើម្បីផ្តល់នូវសកម្មភាពជំរុញបន្ថែមទៀតស្របតាមធនាគារកណ្តាលធំៗ ដទៃទៀត”។

លោក Kristalina Georgieva នាយកគ្រប់គ្រងមូលនិធិរូបិយវត្ថុអន្តរជាតិ បានថ្លែងនៅក្នុងសន្និសីទសារព័ត៌មាននៅទីក្រុងតូក្យូនៅថ្ងៃនេះថា “គោលនយោបាយសារពើពន្ធគួរតែគាំទ្រដើម្បីការពារកំណើនសេដ្ឋកិច្ចក្នុងរយៈពេលខ្លី និងជំរុញសន្ទុះអតិផរណា”។

យោងតាមទិន្នន័យរបស់រដ្ឋាភិបាលជប៉ុន សេដ្ឋកិច្ចដ៏ធំបំផុតទីបីនៅលើពិភពលោកបានចាប់ផ្តើមធ្លាក់ចុះនៅក្នុងត្រីមាសទី ៣ ដោយមានអត្រាកំណើនផលិតផលក្នុងស្រុកសរុប ០,២ ភាគរយ។

លើសពីនេះទៀត សង្គ្រាមពាណិជ្ជកម្មជាមួយកូរ៉េខាងត្បូងមានប្រជាជនកូរ៉េភាគច្រើនធ្វើពហិការមិនប្រើប្រាស់ទំនិញ និងសេវាកម្មរបស់ជប៉ុនទាំងអស់។ ទំនាក់ទំនងសេដ្ឋកិច្ច នយោបាយ និងវប្បធម៌រវាងប្រទេសយក្សសេដ្ឋកិច្ចអាស៊ីទាំងពីរបានឈានដល់កម្រិតទាបជាប្រវត្តិសាស្ត្រ។

ប្រជាជនកូរ៉េខាងត្បូងបានធ្វើពហិការរាល់អ្វីៗទាំងអស់ដែលផលិតនៅជប៉ុន ចាប់តាំងពីជប៉ុនបានដាក់កម្រិតលើការនាំចេញវត្ថុធាតុដើមដែលចាំបាច់នៅក្នុងខ្សែសង្វាក់ផ្គត់ផ្គង់ផលិតកម្មបច្ចេកវិទ្យារបស់កូរ៉េខាងត្បូង។

IMF បានណែនាំជប៉ុនឱ្យកាត់បន្ថយភាពតានតឹងពាណិជ្ជកម្មបច្ចុប្បន្នដើម្បីកាត់បន្ថយផលប៉ះពាល់អវិជ្ជមានដល់សេដ្ឋកិច្ចជប៉ុនដែលធ្វើឱ្យប៉ះពាល់ដល់សង្វាក់តម្លៃសកលថែមទៀត។

IMF បានណែនាំថា “ភាពតានតឹងពាណិជ្ជកម្មសកលដែលកំពុងបន្ត និងការកើនឡើងបន្ថែមទៀតអាចកាត់បន្ថយការនាំចេញការវិនិយោគ និងការលូតលាស់សុទ្ធរបស់ជប៉ុន រួមទាំងផលប៉ះពាល់ដោយផ្ទាល់ និងប្រយោលតាមរយៈខ្សែសង្វាក់តម្លៃពិភពលោក និងការជះឥទ្ធិពលមិនល្អដល់វិស័យហិរញ្ញវត្ថុរបស់ជប៉ុន”៕

ក្រុមវិនិយោគិនអាមេរិកកំពុងស្វែងរកឱកាសវិនិយោគលើវិស័យជាច្រើននៅកម្ពុជា

ដោយៈ រ៉ាណេត

ភ្នំពេញៈ ប្រតិភូវិនិយោគមួយក្រុម ដែលមកទីក្រុងឡូសអេនជេលេស រដ្ឋកាលីហ្វ័រញ៉ា សហរដ្ឋអាមេរិក បានបង្ហាញពីចំណាប់អារម្មណ៍ និងស្វែងរកឱកាសវិនិយោគលើវិស័យនានាជាច្រើននៅកម្ពុជា ដែលក្នុងនោះរួមមានដូចជាវិស័យទេសចរណ៍ វិស័យថាមពលជាដើម។

គណៈប្រតិភូវិនិយោគ និងទេសចរណ៍ ដែលមានចំណាប់អារម្មណ៍ជាមួយកម្ពុជានៅពេលនេះ បានដឹកនាំដោយលោក ហួត គីមឆា កុងស៊ុលកិត្តិយសរបស់កម្ពុជាប្រចាំរដ្ឋកាលីហ្វ័រញ៉ា និងលោក Norman Arikawa តំណាងកំពង់ផែ LA Port ដើម្បីជំរុញវិស័យទេសចរណ៍ ពាណិជ្ជកម្ម និងវិនិយោគរវាងកម្ពុជា និងរដ្ឋកាលីហ្វ័រញ៉ា សហរដ្ឋអាមេរិក។

លោកសូ វិសុទ្ធី អនុរដ្ឋលេខាធិការក្រសួងទេសចរណ៍បានលើកឡើងថា ក្នុងកិច្ចពិភាក្សាកាលការងារ និងស្វែងយល់ពីសក្ដានុពល នៃការវិនិយោគជាមួយប្រតិភូមកពីអាមេរិកកាលពីព្រឹកថ្ងៃទី២៥ ខែវិច្ឆិកា ឆ្នាំ២០១៩នេះ ថ្នាក់ដឹកនាំក្រសួងទេសចរណ៍ បានបង្ហាញពីវឌ្ឍនភាពលើវិស័យទេសចរណ៍ ក៏ដូចជាគោលនយោបាយ និងចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា និងក្រសួងទេសចរណ៍ ក្នុងការអភិវឌ្ឍវិស័យអាទិភាពមួយនេះ ឱ្យរីកចម្រើនឈានឡើង សំដៅធ្វើយ៉ាងណាប្រែក្លាយកម្ពុជា ទៅជាគោលដៅទេសចរណ៍លំដាប់អន្តរជាតិ ប្រកបដោយភាពទាក់ទាញខ្ពស់។

លោកបានបន្តថា ថ្នាក់ដឹកនាំក្រសួងទេសចរណ៍ បានលើកបង្ហាញពីបរិយាកាស និងគោលនយោបាលលើកទឹកចិត្ត ដល់ការវិនិយោគក្នុងវិស័យទេសចរណ៍ ដូចជាការដាក់ចេញគោលនយោបាយ និងលើកចិត្តឱ្យមានការបង្កើតតំបន់ទេសចរណ៍ពិសិដ្ឋ គេហដ្ឋានទីពីរ (Second Home) និងគោលនយោបាយអភិវឌ្ឍន៍ទេសចរណ៍ ប្រកបដោយចីរភាព ស្របតាមទស្សនទាន «ស្អាត និងបៃតង»។

ឆ្លងកាត់កិច្ចជំនួបពិភាក្សាការងាររួច ក្រុមហ៊ុនវិនិយោគធំៗរបស់អាមេរិក បានបង្ហាញចំណាប់អារម្មណ៍ខ្លាំង មកលើសក្តានុពលទេសចរណ៍កម្ពុជា ការអភិវឌ្ឍយ៉ាងឆាប់រហ័ស ព្រមជាមួយចក្ខុវិស័យវែងឆ្ងាយរបស់កម្ពុជា ក្នុងការសម្រេចកំណើនទេសចរឱ្យបានប្រមាណ៧លាននាក់ក្នុងឆ្នាំ២០២០ និងប្រមាណ១៥លាននាក់ក្នុងឆ្នាំ២០៣០ ដែលត្រូវការការវិនិយោគលើវិស័យហេដ្ឋារចនាសម្ពន្ធ ផលិតផលទេសចរណ៍ ក៏ដូចជាធនធានមនុស្សក្នុងវិស័យទេសចរណ៍ជាដើម។

ក្រសួងទេសចរណ៍ បានបង្ហាញពីសក្ដានុពលទាក់ទាញខ្ពស់ នៅតាមប៉ូលទេសចរណ៍សំខាន់ៗរបស់កម្ពុជា មានដូចជារាជធានីភ្នំពេញ សៀមរាប-អង្គរ តំបន់ឆ្នេរសមុទ្រ-ភូមិភាគនិរតី និងតំបន់ភូមិភាគឦសាន ដែលកំពុងត្រូវការការវិនិយោគបង្កើតផលិតផលទេសចរណ៍ថ្មីបន្ថែមទៀត។ ជាមួយគ្នានោះ ក្រុមអ្នកវិនិយោគមកពីអាមេរិកនេះ ក៏បានបង្ហាញពីគោលបំណងចង់បណ្ដាក់ទុនវិនិយោគ លើផ្នែកសណ្ឋាគារលំដាប់ខ្ពស់ ការវិនិយោគលើវិស័យថាមពល ពិសេសថាមពលដែលមិនប៉ះពាល់ដល់បរិស្ថាន ដូចជាថាមពលព្រះអាទិត្យ និងយានជំនិះប្រើប្រាស់អ៉ីដ្រូហ្សែនជាដើម។

រយៈពេល៩ខែ នៃឆ្នាំ២០១៩នេះ ភ្ញៀវទេសចរមកពីអាមេរិកមានប្រមាណជាង ១៧ម៉ឺននាក់ ស្ថិតក្នុងចំណាត់ថ្នាក់ទី៦នៅកម្ពុជា៕

ស្នាដៃនិពន្ធសៀវភៅបួនក្បាលរបស់លោក អេង លាភានិយាយពីបទពិសោធន៍ជាក់ស្តែងដែលលោកបានឆ្លងកាត់កន្លងមក

ដោយ វិស្សុទ្ឋ

ភ្នំពេញៈ លោកអេង លាភាបាននិពន្ធសៀវភៅបួនក្បាលរួមមាន “ក្បាច់គួកជេដីធ្លីបានលាភ” , “ជោគជ័យមិនធ្លាក់ពីលើមេឃ!ហេតុអ្វី?” “អភិវឌ្ឍគំនិតលើ ៣(ដ) ” និង “ជំនួញខ្ញុំឆ្លងកាត់” ដើម្បីផ្តល់បទពិសោធន៍ជាក់ស្តែង អាចអនុវត្តកើតក្នុងទីលានជំនួញជាពិសេសវិស័យអចលនទ្រព្យតែម្តង។

បើចង់ក្លាយជាអ្នកគួកជេ ឬភ្នាក់ងារទទួលអចលនទ្រព្យ គេមកលក់យកកម្រៃជើងសារ ត្រូវអាននិងអនុវត្តន៍តាមសៀវភៅ ក្បាច់គួកជេដីធ្លីបានលាភ ព្រោះបញ្ជាក់ពីក្បួន ក្បាច់ និងមានឯកសារបញ្ជាក់ភ្ជាប់សម្រាប់ប្រើប្រាស់តាមភាពជាក់ស្តែងផងដែរ។

តែបើចង់កាន់គម្រោងធំៗសៀវភៅ “ជោគជ័យមិនធ្លាក់ពីលើមេឃ!ហេតុអ្វី?” ល្អបំផុត ព្រោះនិយាយពីវិធីសាស្រ្តជាក់ស្តែង ក្នុងការគ្រប់គ្រងគម្រោង មិនថាគម្រោងដីឡូត៍ ផ្ទះល្វែង ឬខុនដូនោះទេ។

បើចង់បញ្ជាក់ពីសមត្ថភាពរបស់ខ្លួន ក្នុងការយកគម្រោងគេមកលក់ ឬក៏យកទៅរៀបចំផែនការយុទ្ធសាស្រ្តរបស់ខ្លួនវិញ សៀវភៅ “អភិវឌ្ឍគំនិតលើ ៣(ដ) ” គឺល្អបំផុត។ ព្រោះសៀវភៅនេះ និយាយពីបទពិសោធន៍សរសេរផែនការយុទ្ធសាស្រ្ត។

សៀវភៅចុងក្រោយនោះគឺ “ជំនួញខ្ញុំឆ្លងកាត់” ដែលនិយាយពីការបើកក្រុម ការប្រតិបត្តិការក្រុមហ៊ុន ការបង់ពន្ធ ការបិទទៅវិញដោយស្ថាបពរ និងឧបសគ្គជាច្រើនដែលជួបប្រទះ។

ជាសរុបស្នាដៃទំាំងបួនក្បាលរបស់លោកអេង លាភា ពិតជាផ្តល់បទពិសោធន៍ជាក់ស្តែង ជំនាញគ្រប់គ្រងគម្រោង ជំនាញលក់គម្រោង និងឯកសារលិខិតស្នាមផ្សេងៗ ដល់ភ្នាក់ងារកំពុងអនុវត្តវិស័យដីធ្លី និងមានបំណងប្រែក្លាយខ្លួនទៅជាម្ចាស់គម្រោង និងម្ចាស់ក្រុមហ៊ុនតែម្តង។

សូមអញ្ចើញទាក់ទង ជាវសៀវភៅទាំងបួនក្បាលរបស់លោកពេលនេះ 012 783 197 / 010783197៕