ឥណ្ឌូនេស៊ីចុះហត្ថលេខាលើកិច្ចព្រមព្រៀងរោងចក្រផលិតរថយន្តតម្លៃជាង១៥០០លានដុល្លារ

ដោយ Donald Lee

ភ្នំពេញៈ រោងចក្រផលិតរថយន្តដំបូងបង្អស់របស់កូរ៉េខាងត្បូង នឹងដាក់ទីតាំងនៅតំបន់ Bekasi ឥណ្ឌូនេស៊ី។ នេះបើយោងតាមក្រុមហ៊ុន Hyundai Motor។

ក្រុមហ៊ុនផលិតរថយន្តរបស់កូរ៉េខាងត្បូងមួយនេះ នឹងវិនិយោគទឹកប្រាក់ជាង១,៥០០លានដុល្លារនៅក្នុងរោងចក្រនេះ និងសម្រាប់ថ្លៃដើមប្រតិបត្តិការ។

សេចក្តីប្រកាសរបស់ក្រុមហ៊ុន Hyundai បានឱ្យដឹងថា “រោងចក្រនៅឥណ្ឌូនេស៊ីនឹងតំណាងឱ្យការវិនិយោគ លើទឹកប្រាក់ប្រមាណ១,៥៥ពាន់លានដុល្លារ រហូតដល់ឆ្នាំ២០៣០ រួមទាំងការអភិវឌ្ឍផលិតផល និងថ្លៃដើមប្រតិបត្តិការ”។

រោងចក្រនេះនឹងបើកការដ្ឋាននៅខែក្រោយ ហើយរំពឹងថានឹងចាប់ផ្តើមផលិតកម្មពាណិជ្ជកម្មនៅឆ្នាំ២០២១។ ក្រុមហ៊ុនHyundaiស្មានថា រថយន្តចំនួន១៥០,០០០គ្រឿងនឹងអាចផលិតជារៀងរាល់ឆ្នាំ នៅរោងចក្រផលិតរថយន្តនេះ។

សេចក្តីប្រកាសបានបន្ថែមទៀតថា “ក្រុមហ៊ុន Hyundai មានផែនការផលិតរថយន្តប្រភេទ SUV ខ្នាតតូចប្រភេទ MPV និងរថយន្តម៉ូដែល Sedan ដែលត្រូវបានរចនាឡើងយ៉ាងពិសេសសម្រាប់អតិថិជន នៅក្នុងទីផ្សារអាស៊ីអាគ្នេយ៍ នៅឯរោងចក្រឥណ្ឌូនេស៊ីថ្មីដែលនឹងរួមបញ្ចូលនូវសម្ភារៈសម្រាប់បោះត្រា ការផ្សារ ការគូរ និងការដំឡើង”។

រោងចក្រផលិតរថយន្តនេះ ត្រូវបានរំពឹងថា នឹងបង្កើតការងារជាង២ម៉ឺនកន្លែង និងផ្តល់ចំណូល២០ពាន់លានដុល្លារ ដល់សេដ្ឋកិច្ចឥណ្ឌូនេស៊ី ក្នុងរយៈពេល១០ឆ្នាំខាងមុខ។

សង្គ្រាមពាណិជ្ជកម្មរវាងអាមេរិក និងចិន បានធ្វើឱ្យរំខានដល់បណ្តាញផ្គត់ផ្គង់និងទីផ្សារសំខាន់ៗ ហើយបានបង្ខំប្រទេស ដែលពឹងផ្អែកលើពាណិជ្ជកម្ម ដូចជា កូរ៉េខាងត្បូងប្តូរផលិតកម្ម និងការលក់ទៅតំបន់អាស៊ីអាគ្នេយ៍។

ក្រុមហ៊ុន Hyundai បានឱ្យដឹងថា “ដោយមានគោលបំណងបង្កើនល្បឿនបង្កើតវេទិកា សម្រាប់ការអភិវឌ្ឍផលិតផលមានស្ថេរភាព ផលិតកម្ម និងការលក់នៅឥណ្ឌូនេស៊ី និងទីផ្សារអាស៊ានធំទូលាយ។ ក្រុមហ៊ុន Hyundai នឹងបន្តយុទ្ធសាស្រ្តប្រកបដោយភាពច្នៃប្រឌិតថ្មី ដើម្បីទទួលបាននូវការប្រកួតប្រជែងលើដៃគូប្រកួតប្រជែង”។

ឥណ្ឌូនេស៊ីគឺជាទីផ្សាររថយន្តធំជាងគេ ក្នុងចំណោមបណ្តាអាស៊ានទាំងអស់ ដែលមានចំនួនរថយន្តជាង១លានគ្រឿងត្រូវបានលក់កាលពីឆ្នាំមុន។

ក្រុមហ៊ុន Hyundai បានបញ្ជាក់ថា “បណ្តាប្រទេសអាស៊ានសំខាន់ៗ រួមមាន ឥណ្ឌូណេស៊ី ថៃ ម៉ាឡេស៊ី វៀតណាម និងសឹង្ហបូរីត្រូវបានរំពឹងថា នឹងបង្កើតទីផ្សាររថយន្តប្រមាណ ៤,៤៩លានគ្រឿងនៅឆ្នាំ២០២៦ ដែលកើនឡើងពី៣,១៦លានគ្រឿង នៅឆ្នាំ ២០១៧”។

សង្រ្គាមពាណិជ្ជកម្មអាមេរិក និងចិនកំពុងបន្តបានរំខានដល់ចង្វាក់ផ្គត់ផ្គង់ផលិតកម្មពិភពលោកដោយកូរ៉េខាងត្បូងជាប្រទេសមួយដែលរងការវាយប្រហារខ្លាំងជាងគេ ហើយកំពុងជំរុញឱ្យក្រុមហ៊ុនផលិតកម្មអន្តរជាតិផ្លាស់ប្តូរទីលំនៅចេញពីចិន។

លោក Ko Hyoung-kwon ឯកអគ្គរដ្ឋទូត និងជាតំណាងអចិន្ត្រៃយ៍របស់កូរ៉េខាងត្បូងប្រចាំនៅ OECD បានមានប្រសាសន៍ថា “អាស៊ានគឺជាដៃគូធំទី ២ របស់កូរ៉េក្នុងការធ្វើពាណិជ្ជកម្ម វិនិយោគ និងការផ្លាស់ប្តូរប្រជាជន និងប្រជាជន”។

លោកបានបន្ថែមថា “តំបន់នេះ គឺជាដៃគូសហប្រតិបត្តិការអភិវឌ្ឍន៍ដ៏សំខាន់ របស់កូរ៉េ។ រដ្ឋាភិបាលកូរ៉េបានចែករំលែកបទពិសោធន៍ អភិវឌ្ឍន៍របស់ខ្លួនយ៉ាងសកម្មជាមួយអាស៊ានដោយលើកឡើងថា “បង្រៀនចាប់ត្រីគឺប្រសើរជាងការឱ្យត្រី”៕

ប្រទេសក្នុងតំបន់ទន្លេមេគង្គ-កូរ៉េបង្កើតក្រុមប្រឹក្សាធុរកិច្ចមេគង្គ-កូរ៉េដើម្បីបង្កើតឱកាសពាណិជ្ជកម្ម និងវិនិយោគ

ដោយ វុត្ថា

កូរ៉េៈ ទេសក្នុងតំបន់ទន្លេមេគង្គ- កូរ៉េបង្កើតក្រុមប្រឹក្សាធុរកិច្ចមេគង្គ-កូរ៉េ បានឯកភាពរួមគ្នា ចុះហត្ថលេខាលើអនុស្សារណៈយោគយល់ស្តីពី ការបង្កើតក្រុមប្រឹក្សាធុរកិច្ចមេគង្គ-កូរ៉េដើម្បីបង្កើតឱកាសពាណិជ្ជកម្ម និងវិនិយោគបន្ថែមទៀត។

យោងតាមការផ្សព្វផ្សាយរបស់សភាពាណិជ្ជកម្មកម្ពុជា នៅថ្ងៃទី២៦ ខែវិច្ឆិកា ឆ្នាំ ២០១៩នេះបានឱ្យដឹងថា ក្នុងគោល បំណងពង្រឹងកិច្ចសហប្រតិបត្តិការ និងទំនាក់ទំនងរវាងសារធារណរដ្ឋកូរ៉េ និងប្រទេសក្នុងតំបន់ទន្លេមេគង្គទាំងប្រាំ បង្កើតឱកាសពាណិជ្ជកម្ម និងវិនិយោគបន្ថែមសម្រាប់សហគមន៍ធុរកិច្ច និងលើកកម្ពស់ការអភិវឌ្ឍសេដ្ឋកិច្ច និងសុខុមាលភាពប្រជាជន។

ប្រទេសក្នុងតំបន់ទន្លេមេគង្គ ដូចជា កម្ពុជា ឡាវ មីយ៉ាន់ម៉ា ថៃ វៀតណាម។ តំបន់មេគង្គនេះ គឺជាតំបន់សេដ្ឋកិច្ចធម្មជាតិមួយ ដែលចងភ្ជាប់ដោយទន្លេមេគង្គ ដែលគ្របដណ្តប់លើផ្ទៃដី ២,៦លានគីឡូម៉ែត្រការ៉េ និងមានប្រជាជនប្រមាណ ៣២២៦លាននាក់។

នៅឆ្នាំ១៩៩២ ដោយមានជំនួយពីធនាគារអភិវឌ្ឍន៍អាស៊ី ប្រទេសទាំង៥បានបញ្ចូលកម្មវិធី នៃកិច្ចសហប្រតិបត្តិការសេដ្ឋកិច្ច ជាអនុតំបន់ដែលត្រូវបានបង្កើតឡើង ដើម្បីលើកកម្ពស់ទំនាក់ទំនងសេដ្ឋកិច្ចក្នុងចំណោមប្រទេស។

ដោយមានការគាំទ្រពី ADB និងម្ចាស់ជំនួយដទៃទៀតកម្មវិធី GMS ជួយដល់ការអនុវត្ដគំរោងអនុតំបន់ ដែលមានអាទិភាពខ្ពស់ ក្នុងវិស័យដឹកជញ្ជូនថាមពលទូរគមនាគមន៍ បរិស្ថាន ការអភិវឌ្ឍធនធានមនុស្សវិស័យទេសចរណ៍ពាណិជ្ជកម្ម ការវិនិយោគវិស័យឯកជននិងកសិកម្ម។

គម្រោងអភិវឌ្ឍន៍ហេដ្ឋារចនាសម្ព័ន្ធអាទិភាព ដែលមានតម្លៃប្រហែល១១ពាន់លានដុល្លារ ត្រូវបានបញ្ចប់ឬកំពុងតែត្រូវបានអនុវត្តន៍ រួមមានការធ្វើឱ្យប្រសើរឡើងនូវផ្លូវហាយវេ ពីរាជធានីភ្នំពេញ (កម្ពុជា) ហូជីមីញ (វៀតណាម) និងច្រករបៀងសេដ្ឋកិច្ចបូព៌ាបស្ចិម ដែលនឹងពង្រីកពីសមុទ្រអាល់ម៉ានទៅដាណាង ប្រទេសវៀតណាម។

អនុតំបន់នេះ គ្របដណ្តប់លើរុក្ខជាតិ និងសត្វ ដែលបានពង្រីកទៅភាគខាងជើង តាមបណ្តោយឧបទ្វីបម៉ាឡេស៊ី ចូលទៅក្នុងប្រទេសថៃ បានហ៊ុមព័ទ្ធលើភ្នំខ្ពស់ៗពីភ្នំហិម៉ាឡៃ និងបានរីកចម្រើនតាមបណ្តោយជ្រលងទន្លេដ៏ទូលំទូលាយ ជាព្រៃស្ងួតស្ងួតស្រដៀងគ្នានឹងប្រទេសឥណ្ឌា។

ទន្ទឹមនឹងនេះ ទំនាក់ទំនងពាណិជ្ជកម្ម ដែលកំពុងរីកចម្រើន ក្នុងចំណោមបណ្តាប្រទេសនៅតាមទន្លេមេគង្គ បានផ្តល់ជាប្រយោជន៍ ដល់ការធ្វើពាណិជ្ជកម្មឆ្លងកាត់ព្រំដែនការវិនិយោគ និងការចល័តពលកម្ម។ លើសពីនេះទៀតធនធានធម្មជាតិជាពិសេស គឺវារីអគ្គីសនីកំពុងចាប់ផ្តើមបង្កើត និងប្រើប្រាស់នៅតាមមូលដ្ឋាន។

ធនធានមនុស្ស និងធនធានធម្មជាតិដ៏សម្បូរបែបនៃតំបន់មេគង្គ បានធ្វើឱ្យវាក្លាយជាព្រំដែនថ្មី នៃកំណើនសេដ្ឋកិច្ចអាស៊ី។ ជាការពិតណាស់តំបន់មេគង្គមានសក្តានុពល ក្នុងការក្លាយជាតំបន់រីកលូតលាស់លឿន បំផុតរបស់ពិភពលោក៕

ចំណេះដឹង! តើវិសាលភាពនៃសម្បទានដីសេដ្ឋកិច្ច និងច្បាប់ព្រៃឈើពាក់ព័ន្ធគ្នាដូចម្តេច

ដោយ វុត្ថា

ភ្នំពេញៈ សម្បទាដីសេដ្ឋកិច្ចមិនអាចធ្វើនៅលើដី ដែលបានធ្វើចំណាច់ថ្នាក់ថាជាចំណែកដីសាធារណៈរបស់រដ្ឋ ឬជាចំណែកនៃដីព្រៃបំរុងទុកជាអចិន្ត្រៃយ៍ឡើយ។ ព្រៃសម្បទានដែលបានលុបចោល ឬបានបោះបង់ដោយសម្បទានិក មិនអាចប្តូរឱ្យទៅជាសម្បទានដីសេដ្ឋកិច្ចបានទេ លុះត្រាតែដីនោះត្រូវបានធ្វើចំណាត់ថ្នាក់ឡើងវិញថា ជាដីឯកជនរបស់រដ្ឋ ហើយការផ្តល់សម្បទានជាថ្មី ត្រូវអនុវត្តទៅតាមនីតិវិធីនៃការផ្តល់សម្បទានដីសេដ្ឋកិច្ច។

យោងតាមឯកសាររបស់ក្រសួងរៀបចំដែនដី នគរូបនីយកម្ម និងសំណង់ស្តីពីសម្បទានដីសេដ្ឋកិច្ចបានឱ្យដឹងថា ជាទូទៅ សម្បទានដីសេដ្ឋកិច្ចជាការផ្តល់សម្បទានដីឯកជនរបស់រដ្ឋ សំរាប់ការធ្វើអាជីវកម្មកសិឧស្សាហកម្ម មានដំណាំស្បៀង ឬដំណំាក្រៅពីស្បៀង ដូចជាដំណាំផ្តល់ផ្លែ ឬផ្តល់មើមសម្រាប់សិប្បកម្ម ឬឧស្សាហកម្មកែច្នៃក្នុងស្រុក និងសំរាប់ការនាំចេញ និងការចិញ្ចឹមសត្វផ្សារភ្ជាប់នឹងការកែច្នៃ ឬការនាំចេញ។

ប៉ុន្តែការដាំដើមឈើឡើងវិញ បង្កើតជាព្រៃ មិនស្ថិតនៅក្រោមវិសាលភាពនៃអនុក្រឹត្យស្តីពីសម្បទាំនដីសេដ្ឋកិច្ចទេ។ ការដាំដើមឈើសំរាប់ឧស្សាហកម្មផលិតឈើហ៊ុប ឬផលិតសរសៃអំពីឈើ ឬផលិក្រដាស ត្រូវបានដាក់ឱ្យស្ថិតនៅក្នុងការដែនសមត្ថកិច្ច នៃរដ្ឋបាលព្រៃឈើ។

ម្យ៉ាងទៀតវិសាលភាពនៃអនុក្រឹត្យស្តីពី សម្បទានដីសេដ្ឋកិច្ច ក៏មិនគ្របដណ្តប់លើផ្នែកវារីវប្បកម្ម ដែលជាទូទៅធ្វើឡើងនៅក្នុងដែនទឹក ជាទ្រព្យសាធារណៈរបស់រដ្ឋ លើកលែងតែវារីវប្បកម្ម ដែលធ្វើនៅក្នុងស្រះទឹក ឬអាងទឹកជាដីឯកជនរបបស់រដ្ឋ។

ការកាប់រានព្រៃឈើ ក្នុងដែនដីសម្បទានដីសេដ្ឋកិច្ច ត្រូវផ្អែកលើផែនការគ្រប់គ្រងព្រៃឆើដែលត្រូវកាប់ និងព្រៃឈើដែលត្រូវរក្សា។ ការកាប់រានព្រៃនេះអាចធ្វើបាន បន្ទាប់ពីបានធ្វើផែនការ និងបានពិគ្រោះយោបល់ សម្រាប់នីតិវិធីក្នងុការផ្តល់សម្បទានថ្មី។

រាល់កិច្ចសន្យាសម្បទានដី ក្នុងទីតាំងដែលមានផ្ទៃដីគ្រប់ដណ្តប់ជាអន្លើ ដោយព្រះឈើ ត្រូវបង្កើតលក្ខខណ្ឌ សំរាប់ការធ្វើអាជីវកម្មផលិតផលព្រៃឈើ ក្នុងតំបន់សម្បទាន ដោយរាប់បញ្ចូលនូវលក្ខខណ្ឌចាំបាច់ សំរាប់បង់ថ្លៃសួយសារ និងលក្ខខណ្ឌសំរាប់ប្រមូលផលផ្សេងៗពីព្រៃឈើ ក្រៅពីអាជីវកម្មឈើហ៊ុប។

រដ្ឋបាលព្រៃឈើគឺជាដៃគូគន្លឹះ ក្នុងការការបង្កើតសម្បទានដីសេដ្ឋកិច្ច និងត្រូវមានជាតំណាងក្នុងការជ្រើសរើទីតាំងនីមួយៗ និងក្នុងដំណើរការធ្វើផែនការ ជាមួយនឹងអាជ្ញាធរផ្សេងៗទៀត ដែលទទួលខុសត្រូវលើប្រភេទនានានៃដីសាធារណៈរបស់រដ្ឋ៕

តំបន់ព្រែកព្នៅកំពុងមានកំនើន និងទាក់ទាញការវិនិយោគលើវិស័យលំនៅដ្ឋាន

ដោយៈ រ៉ាណេត

ភ្នំពេញៈ ដូចគ្នាទៅនឹងតំបន់ជាយក្រុងដទៃទៀត ដែលកំពុងតែមានកំសួលលើតម្រូវការផ្នែកលំនៅដ្ឋាននោះ សម្រាប់តំបន់ព្រែកព្នៅ ដែលស្ថិតនៅទិសខាងជើងរាជធានីភ្នំពេញ ត្រូវបានមើលឃើញថា មានសកម្មភាពទិញ -លក់យ៉ាងសកម្ម រួមជាមួយនឹងការអភិវឌ្ឍលើវិស័យលំនៅដ្ឋានផងដែរ។

ជាមួយនឹងគម្រោងអភិវឌ្ឍន៍ លើវិស័យហេដ្ឋារចនាសម្ព័ន្ធជាច្រើន ដែលស្ថិតនៅក្នុងប្លងមេរបស់រាជរដ្ឋាភិបាលកម្ពុជា ខណ្ឌព្រែកព្នៅ បានក្លាយជាតំបន់ដ៏ទាក់ទាញមួយក្នុងក្រសែភ្នែកអ្នកវិនិយគ ក៏ដូចជាអ្នកអភិវឌ្ឍលើវិស័យលំនៅដ្ឋានផងដែរ។

អគ្គនាយកក្រុមហ៊ុនអចលនទ្រព្យ Century21 Fortuna Investment លោកវ៉ា វីរៈ បានទទួលស្គាល់នូវសក្ដានុពល នៃវិស័យដីធ្លីនៅតំបន់ផ្លូវជាតិលេខ៥ ជាពិសេសតំបន់ព្រែកព្នៅ ដែលកំពុងតែមានសកម្មភាពអភិវឌ្ឍន៍ខ្លាំង លើវិស័យហេដ្ឋារចនាសម្ព័ន្ធ ដោយលោកបានមានប្រសាសនថា “តម្រូវការប្រើប្រាស់ដីធ្លីនៅតំបន់ខាងលើនេះ គឺបន្តមានកំណើន ស្របពេលដែលតម្លៃដីធ្លីក៏មានការកើនឡើងផងដែរ”។

លោកបានបន្តទៀតថា “ជាទូទៅនៅពេលដែលមានការអភិវឌ្ឍ លើផ្នែកហេដ្ឋារចនាសម្ព័ន្ធ គឺតែងមានតម្រូវការប្រើប្រាស់ដី ដែលជម្រុញឱ្យតម្លៃឡើងថ្លៃ”។ លោកបានបន្តទៀតថា “បច្ចុប្បន្ននេះ មានគម្រោងអភិវឌ្ឍលំនៅដ្ឋានខ្នាតមធ្យម និងក្រោមមធ្យមជាច្រើនកំពុងតែបង្ហាញខ្លួននៅក្នុងតំបន់ខាងលើនេះ ដែលការចូលខ្លួនទៅអភិវឌ្ឍគម្រោងលំនៅដ្ឋានទាំងនេះ ដោយសារតែគេសម្លឹងឃើញថា តំបន់មានសក្ដានុពល ទាំងការរស់នៅ និងការប្រកបអាជីវកម្មលក្ខណៈគ្រួសារបាន”។

ស្រដៀងគ្នានឹងការលើកឡើងខាងលើនេះ លោកស្រីតាំង ហួរ អគ្គនាយិកាក្រុមហ៊ុនអចលនទ្រព្យ AMATAK Property Service បានមានប្រសាសន៍ប្រាប់តាមទូរស័ព្ទនៅរសៀលថ្ងៃជាមួយគ្នាផងដែរថា “តំបន់ដីដែលមានចម្ងាយត្រឹម២០-៣០ គីឡូម៉ែត្រ ពីកណ្តាលរាជធានីភ្នំពេញ គឺសុទ្ធតែមានសក្ដានុពល និងមានតម្រូវការលើវិស័យលំនៅដ្ឋានទាំងអស់ ដោយសារតែស្ថិតមិនឆ្ងាយពីក្រុង ហើយតម្លៃនៅទាបនៅឡើយ”។

លោកស្រីបានបន្តទៀតថា គ្រប់តំបន់ជាយក្រុង គឺសុទ្ធតែមានតម្រូវការលើវិស័យលំនៅដ្ឋានទាំងអស់។ ដោយឡែកនៅតំបន់ព្រែកព្នៅក៏មានសក្ដានុពលល្អដែរ ជាពិសេសនៅតាមផ្លូវធំៗមួយចំនួន។ នៅតំបន់នេះមានលក្ខណៈល្អប្រសើរច្រើន ដែលក្រៅពីនៅជិតក្រុង នៅមានគម្រោងអភិវឌ្ឍជាច្រើនដែលបន្តមកពីផ្លូវ៥១ និងតំបន់បឹងតាម៉ោក។

លោកបានបញ្ជាក់ថា “បច្ចុប្បន្ននេះតម្លៃដីនៅជាយក្រុង បានឡើងរួចទៅហើយ ហើយនឹងបន្តឡើងទៀតនៅថ្ងៃខាងមុខនេះ”។

អនុប្រធានសមាគមអ្នកជំនាញអចលនទ្រព្យកម្ពុជា លោក ចក់ ស៊ីណាត បានមានប្រសាសន៍ផងដែរថា ព្រែកព្នៅ ជាខណ្ឌដែលទើបបង្កើតថ្មី ប៉ុន្តែបើប្រៀបធៀបជាមួយខណ្ឌដទៃទៀត ដូចជាខណ្ឌកំបូល សក្ដានុពល និងតម្លៃដីធ្លីគឺមានភាពប្រហាក់ប្រហែលគ្នា។ លោកបន្តទៀតថា ដោយសារតែជាខណ្ឌដែលទើបតែបង្កើតថ្មី ដូច្នេះតម្លៃនៅមានភាពល្អប្រសើរ សម្រាប់បណ្តាអ្នកវិនិយោគក្នុងការទិញអភិវឌ្ឍ ឬទិញទុកលក់បន្តនៅត្រឹម ២-៣ឆ្នាំខាងមុខទៀត អាចនឹងមានភាពល្អប្រសើច្រើន។

ស្របទៅនឹងសក្ដានុពលនៅក្នុងតំបន់នេះ បច្ចុប្បន្នមានគម្រោងសំណង់លំនៅដ្ឋានជាច្រើន បាន និងកំពុងតែធ្វើសកម្មភាពអភិវឌ្ឍ ជាក់ស្ដែងដូចជាគម្រោងបុរី លំនៅដ្ឋានបែបទំនើប និងទាន់សម័យ KC ដែលមានទីតាំងនៅជិតផ្សារព្រែកព្នៅ ក៏កំពុងតែសម្រុកកម្មភាពអភិវឌ្ឍរបស់ខ្លួន ដើម្បីឆ្លើយតបតាមតម្រូវទីផ្សារ។

ជាមួយនឹងការអភិវឌ្ឍគម្រោងលំនៅដ្ឋានយ៉ាងប្រណីតភាពនេះ ក៏ជាការផ្តល់ឱកាសសម្រាប់អ្នក ដែលមានបំណងចង់បានលំនៅដ្ឋានស្នាក់នៅកម្មសិទ្ធិ ជាពិសេសអ្នកដែលមានបំណងចង់វិនិយោគបន្តយកចំណេញនៅថ្ងៃអនាគតផងដែរ៕

ក្រុមហ៊ុនអចលនទ្រព្យធំមួយកំពុងស្នើសុំរដ្ឋាភិបាលអភិវឌ្ឍលំនៅដ្ឋានបែបលំហែរកាយនៅស្រុកទឹកឈូខេត្តកំពត

ដោយៈ រ៉ាណេត

កំពតៈ ក្រុមហ៊ុនអចលនទ្រព្យដ៏ធំ ដែលកំពុងតែមានដំណើរការនៅលើទីផ្សារកម្ពុជា បាននិងកំពុងស្នើសុំរដ្ឋាភិបាល ក្នុងការអភិវឌ្ឍគម្រោងលំនៅដ្ឋានបែបលំហែរកាយ នៅទីតាំងចំនួន៦ ស្ថិតនៅក្នុងស្រុកទឹកឈូ ខេត្តកំពត។

គម្រោងអភិវឌ្ឍលំនៅដ្ឋានបែបកម្សាន្ត លំហែរកាយ និងទេសចរណ៍ខាងលើនេះ ត្រូវបានលើកគម្រោងស្នើសុំអភិវឌ្ឍន៍ ដោយក្រុមហ៊ុនអចលនទ្រព្យ និងអភិវឌ្ឍន៍ TARGET ESTATE and ASSET MANAGEMENT ដោយមានទីតាំងស្ថិតនៅតំបន់ពយក្បាលរមាស ឃុំត្រពាំងសង្កែ និងកោះតូចទាំងពីរ ឃុំកំពង់សំរោង និងឃុំជុំគ្រៀល ស្រុកទឹកឈូ ខេត្តកំពត។

យោងតាមរបាយការណ៍រដ្ឋបាលខេត្តកំពត ដែលគេហទំព័រ Propertyarea.asia ទើបទទួលបាន កាលពីពេលកន្លងទៅថ្មីៗនេះបានបង្ហាញថា បន្ទាប់ពីទទួលបានការស្នើសុំធ្វើការអភិវឌ្ឍទៅលើគម្រោងខាងលើនេះ រដ្ឋបាលខេត្ត ក្រោមវត្តមានរបស់លោកជាវ តាយ អភិបាលនៃគណៈអភិបាលខេត្តកំពត បានកោះប្រជុំក្រុមការងារ ដែលជាមន្ត្រីជំនាញ និងពាក់ព័ន្ធ រួមមាបដូចជាអភិបាលស្រុកទឹកឈូ នាយកទីចាត់ការអន្តរវិស័យ ក៏ដូចជាមន្រ្តីពាក់ព័ន្ធជាច្រើនរូបទៀត ធ្វើការពិគ្រោះយោបល់ ដើម្បីពិចារណាទៅលើការស្នើសុំរបស់ក្រុមហ៊ុន។

អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត លោកដាញ់ សារី បានមានប្រសាសន៍ឲ្យដឹងថា ក្រុមហ៊ុន TARGET ESTATE and ASSET MANAGEMENTបានស្នើសុំ៦ទីតាំង ស្ថិតនៅឃុំចំនួន៣ ដោយក្រុមហ៊ុនបានទិញពីប្រជាពលរដ្ឋ ហើយមានតែ១ ទីតាំងតែប៉ុណ្ណោះដែលកំពុងដំណើរការ។

ជាមួយគ្នានេះ អភិបាលនៃគណៈអភិបាលខេត្តកំពត លោកជាវ តាយ បានតម្រូវឱ្យក្រុមការងារថ្នាក់ខេត្ត សហការជាមួយរដ្ឋបាលស្រុកទឹកឈូ បន្តដោះស្រាយធ្វើយ៉ាងណាប្រកបដោយតម្លាភាព និងយុត្តិធម៌ ជាពិសេសបន្តដោះស្រាយវិវាទនានា រវាងក្រុមហ៊ុនជាមួយប្រជាពលរដ្ឋ៕

រដ្ឋាភិបាលកូរ៉េបង្កើនលទ្ធភាពផ្តល់កម្ចីដល់កម្ពុជារហូតដល់ ៧០០លានដុល្លារ

ដោយៈ រ៉ាណេត

ភ្នំពេញៈ រដ្ឋាភិបាលរបស់កូរ៉េបានសម្រេចបន្ត និងបង្កើនលទ្ធភាពកម្ចីដល់កម្ពុជារហូត ៧០០លានដុល្លារ ខណៈដែលការសម្រេចនេះ ត្រូវបានធ្វើឡើងរវាងប្រមុខការទូតកម្ពុជា និងសាធារណរដ្ឋកូរ៉េ។

ប្រមុខការទូតរបស់ប្រទេសទាំង២ បានគូសបញ្ជាក់ពីការជំរុញកិច្ចសហប្រតិបត្តិកាឱ្យកាន់តែប្រសើរ ដោយលោកឧបនាយករដ្ឋមន្រ្តី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានថ្លែងអំណរគុណដល់សាធារណរដ្ឋកូរ៉េ ដែលជាការរួមចំណែកដល់ការអភិវឌ្ឍនៅក្នុងវិស័យហេដ្ឋារចនាសម្ព័ន្ធ តាមរយៈការបង្កើនកម្ចីសម្បទានពី៣៥០លានដុល្លារអាមេរិក ដល់៧០០លានដុល្លារអាម៉េរិកសម្រាប់ឆ្នាំ២០១៩-២០២៣។

នេះបើតាមការឱ្យដឹងក្នុងជំនួបរវាង លោក ប្រាក់ សុខុន បានជួបពិភាក្សាទ្វេភាគីជាមួយលោកស្រី កាង ឃ្យុង-វ៉ា (Kang Kyung-wha) រដ្ឋមន្រ្តីការបរទេសនៃសាធារណរដ្ឋកូរ៉េ កាលពីល្ងាចថ្ងៃទី២៥ ខែវិច្ឆិកា ឆ្នាំ២០១៩។ នៅចុងបញ្ចប់នៃជំនួបនេះ រដ្ឋមន្រ្តីការបរទេសទាំងពីរបាន ចុះហត្ថលេខាលើឯកសារចំនួន ៥ផងដែរ។

ឯកសារសំខាន់ៗទាំង៥ ដើម្បីពង្រឹងកិច្ចសហប្រតិបត្តិការទៅវិញទៅមកនោះ រួមមាន ទី ១. កិច្ចព្រមព្រៀងស្តីពីការលុបបំបាត់ការយកពន្ធត្រួតគ្នា និងពន្ធលើប្រាក់ចំណូល និងការបង្ការការគេច វេសពន្ធ និងការចៀសវាងពន្ធ ទី២ សន្ធិសញ្ញាស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ។ ទី៣ អនុស្សរណៈយោគយល់គ្នាស្តីពី កិច្ចសហប្រតិបត្តិការក្នុងវិស័យកសិកម្ម។

ទី៤. អនុស្សរណៈយោគយល់គ្នា ស្តីពីកិច្ចសហប្រតិបត្តិការលើ វិស័យបច្ចេកវិទ្យាគមនាគមន៍ និងព័ត៌មាន និងទី៥. សេចក្តីថ្លែងការណ៍រួមស្តីពីការ ចាប់ផ្តើមការសិក្សារួមគ្នាលើ លទ្ធភាព បង្កើត កិច្ច ព្រម ពាណិជ្ជកម្មសេរី កម្ពុជា-សាធារណរដ្ឋកូរ៉េ។

លោកប្រាក់ សុខុន បានដឹកនាំគណៈប្រតិភូជាន់ខ្ពស់អញ្ជើញទៅចូលរួមកិច្ចប្រជុំកំពូល រំលឹកខួបអនុស្សាវរីយ៍អាស៊ាន-សាធារណរដ្ឋកូរ៉េ និងកិច្ចប្រជុំកំពូលមេគង្គ-សាធារណរដ្ឋ កូរ៉េលើកទី១ ដែលប្រព្រឹត្តទៅពីថ្ងៃទី ២៤-២៧ ខែវិច្ឆិកា ឆ្នាំ២០១៩ នៅទីក្រុងប៊ូសាន សាធារណរដ្ឋកូរ៉េ៕

តើកម្ពុជាមានប័ណ្ណកម្មសិទ្ធិអចលនទ្រព្យប៉ុន្មានប្រភេទ និងមានសុពលភាពផ្លូវច្បាប់ដូចម្តេច?

ដោយគង់ សូរិយា

ភ្នំពេញ៖ ដោយសារកម្ពុជាមានការផ្លាស់ប្តូររបបដឹកនាំញឹកញាប់ បានធ្វើឲ្យការចេញប័ណ្ណកម្មសិទ្ឋគ្រប់គ្រងអចលនទ្រព្យ ឬវិញ្ញាបនបត្រសម្គាល់អចលនទ្រព្យមានច្រើនប្រភេទ ទៅតាមរបបនីមួយៗ ប៉ុន្តែតើប័ណ្ណទាំងនោះមានសុពលភាពផ្លូវច្បាប់បែបណា? គេហទំព័រ Propertyarea.asia បានជួបសម្ភាសន៍ជាមួយអ្នកជំនាញ និងអ្នកប្រឡូកក្នុងវិស័យនេះជាច្រើនឆ្នាំ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ឲ្យដឹងកាលពីពេលថ្មីៗនេះថា ការគ្រប់គ្រងតាមរយៈប័ណ្ណសម្គាល់ ឬវិញ្ញាបនបត្រគ្រប់គ្រងអចលនទ្រព្យនៅកម្ពុជា ពិតជាមានច្រើនប្រភេទនៅកម្ពុជា ដែលប័ណ្ណឬវិញ្ញាបនបត្រទាំងនោះមាន ដូចជា ទី១ ចន្លោះឆ្នាំ១៩៧៩ ដល់ឆ្នាំ១៩៨៥ កម្ពុជាមានប័ណ្ណសម្គាល់អចលនទ្រព្យ ដែលគេហៅថា “ប័ណ្ណសាធារណៈរដ្ឋប្រជាមានិតកម្ពុជា”។ ប័ណ្ណប្រភេទនេះនៅបន្សល់ទុកតិតចតួចប៉ុណ្ណោះ ក្នុងករណីម្ចាស់ដីមិនផ្លាស់ប្តូរប័ណ្ណ និងភាគច្រើនស្ថិតនៅតំបន់ជនបទដាច់ស្រយាល។

ទី២ គិតចាប់ពីកំឡុងឆ្នាំ១៩៨៥ ដល់ដើមទសវត្សរ៍១៩៩០ កម្ពុជាបានផ្លាស់ប្តូរប័ណ្ណកម្មសិទ្ឋអចលនទ្រព្យថ្មីមួយទៀត ដែលគេនិយមហៅថា “ប័ណ្ណស្លាបមាន់” ដែលប័ណ្ណប្រភេទនេះ នៅតែមានការប្រើប្រាស់រហូតដល់បច្ចុប្បន្ននេះផងដែរ។ ទី៣ ប្លង់កាន់កាប់ឬគ្រប់គ្រងអចលនទ្រព្យ ដែលមានការចេញឲ្យប្រើប្រាស់កំឡុងឆ្នាំ១៩៩៣ មកដល់បច្ចុប្បន្ន (ហៅថាប្លង់ទន់) ដែលប័ណ្ណប្រភេទនេះមានការពេញនិយម ប្រើប្រាស់ច្រើនជាងគេនាពេលបច្ចុប្បន្ននេះ។

ប័ណ្ណប្រភេទនេះ មានការទទួលស្គាល់ត្រឹមអាជ្ញាធរមូលដ្ឋានឃុំ សង្កាត់ និងតាមបណ្តាស្រុកនានា។

ទី៤ បច្ចុប្បន្នមានប័ណ្ណមួយទៀត ដែលហៅថាប្លង់រ៉ឹង ឬវិញ្ញាបនបត្រដែលមានការទទួលស្គាល់ពីមន្រ្តីជំនាញនៃក្រសួងរៀបចំដែនដី នគរូបនីយកម្ម និងសំណង់រាជធានី ខេត្ត។ប័ណ្ណនេះមានពីរយ៉ាង ដែលខ្លះគេហៅថា L MAP និងខ្លះទៀតហៅប័ណ្ណបំបែកក្បាលដី។

លោកច្រឹក សុខនីមបានបន្តថា រហូតមកទល់ពេលនេះ ដើម្បីទប់ស្កាត់ទំនាស់ដីធ្លី និងប័ណ្ណនិមួយៗមានសុពលភាពផ្លូវច្បាប់ គឺពេលចុះវាស់វែងដីធ្លី តែងតែមានមន្រ្តីជំនាញក្រសួងរៀបចំដែនដីចូលរួម ទោះជាធ្វើប្លង់ឬប្លង់រ៉ឹងក៏ដោយ។

លោកបន្តថា “ប័ណ្ណទាំង៥ប្រភេទខាងលើនេះ សុទ្ឋតែមានសុពលភាពផ្លូវច្បាប់ ប៉ុន្តែដើម្បីបញ្ចៀសហានិភ័យពីការរំលោភបំពានដីធ្លី អ្នកកាន់កាប់អចលនទ្រព្យដែលមានប្លង់របបសាធារណៈរដ្ឋ ប័ណ្ណស្លាបមាន់ និងប្លង់ទន់គួរតែរៀបចំឯកសាររបស់ខ្លួន ដើម្បីស្នើសុំធ្វើប្លង់រ៉ឹង ដែលមានការទទួលស្គាល់ពីមន្ទីរ និងក្រសួងជំនាញជាក់លាក់”។លោកបន្តថា ការកាន់កាប់អចលនវត្ថុអ្វីមួយ ដែលមានវិញ្ញាបនបត្រទទួលស្គាល់ច្បាស់លាស់ពីសំណាក់អាជ្ញាធរជំនាញ ពិតជាមានសារៈសំខាន់ណាស់ ដើម្បីបញ្ចៀសហានិភ័យនាពេលអនាគត”។

ទោះជាយ៉ាងណាបច្ចុប្បន្ននេះ ក្រសួងរៀបចំដែនដី នគរូបនីយកម្មនិងសំណង់បាននិងកំពុងបញ្ជូនមន្រ្តីជំនាញរបស់ខ្លួន ចុះធ្វើប័ណ្ណកម្មសិទ្ឋដីធ្លីថ្មី ជូនប្រជាពលរដ្ឋនៅគ្រប់ភូមិ ឃុំនៃបណ្តារាជធានី ខេត្តទាំង២៥បណ្តើរៗហើយ៕

កូរ៉េសន្យាបង្កើនការបើកផ្តល់ហិរញ្ញប្បទានសហប្រតិបត្តិការដល់កម្ពុជា និងប្រទេស៤ ផ្សេងទៀតក្នុងតំបន់

ដោយ វុត្ថា

ទីក្រុងប៊ូសានៈ រដ្ឋាភិបាលកូរ៉េខាងត្បូង បានចុះហត្ថលេខាលើអនុស្សរណៈយោគយល់ស្ដីពី កិច្ចសហប្រតិបត្តិការអភិវឌ្ឍន៍រវាងសាធារណរដ្ឋកូរ៉េ និងបណ្ដាប្រទេសអាស៊ានចំនួន៥ រួមមានកម្ពុជា ឡាវ មីយ៉ាន់ម៉ា វៀតណាម និងហ្វីលីពីន។

លោកឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី នៅក្នុងពិធីចុះហត្ថលេខាលើកិច្ចសហប្រតិបត្តិការនេះ នាថ្ងៃទី ២៥ ខែវិច្ឆិកា ឆ្នាំ ២០១៩កន្លងមកបានឱ្យដឹងថា ផ្អែកលើក្របខណ្ឌអនុស្សារណៈនេះ រដ្ឋាភិបាលសាធារណៈកូរ៉េ បានសន្យាបង្កើនការបើកផ្តល់ហិរញ្ញប្បទានសហប្រតិបត្តិការ ឱ្យបានទ្វេរដងដល់បណ្តាប្រទេអាស៊ានទាំង៥ ដើម្បីអនុវត្តគោលនយោបាយភាគខាងត្បូងថ្មី ។

លោកបន្តថា អនុស្សារណៈនៃកិច្ចសហប្រតិបត្តិការនេះ ផ្តោតសំខាន់លើវិស័យអាទិភាពចំនួន ៥រួមមាន ទី១ ភាពជាដៃគូលើវិស័យឌីជីថល សម្រាប់កិច្ចអភិវឌ្ឍន៍ប្រកបដោយចីរភាព ទី២ ការលើកម្ពស់គុណភាពអប់រំថ្នាក់ឧត្តមសិក្សា ដើម្បីអនាគតប្រកដោយវិបុលភាព ទី៣ អនាគតសហគមសន្តិភាព មេគង្គ-សាធារណៈរដ្ឋកូរ៉េ ទី៤ ការកសាងទីក្រុងវៃឆ្លាត ដើម្បីប្រជាជន និងភពផែនដី និងទី៥ ការសាងសង់ហេដ្ឋារចនាសម្ព័ន្ធប្រកបដោយបរិយាប័ន្ន ដើម្បីធានាកំណើនប្រកបដោយតុល្យភាព។

លោកឈៀង យ៉ាណារ៉ាបានបន្តថា ក្នុងន័យនេះ គណៈកម្មាធិការនីតិកម្ម និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា នឹងខិតខំប្រឹងប្រែងបន្តកិច្ចសហប្រតិបត្តិការជាមួយភាគីមិត្ត ដើម្បីធានាឱ្យកម្ពុជាទទួលបានផលប្រយោជន៍ជាអតិប្បរមា ពីការអនុវត្តអនុស្សារណៈយោគយល់នេះ៕

ប្រទេសកូរ៉េខាងត្បូង និងអាស៊ានប្តេជ្ញានឹងបន្ថយរបាំងពាណិជ្ជកម្ម

ដោយ Donald Lee

ភ្នំពេញៈ រដ្ឋាភិបាលកូរ៉េខាងត្បូង និងបណ្តាប្រទេសអាស៊ាន បានព្រមព្រៀងគ្នាក្នុងការទម្លាក់របាំងពាណិជ្ជកម្ម ដើម្បីបង្កើតទំនាក់ទំនងកាន់តែជិតស្និទ្ធជាមួយគ្នា។

លោកប្រធានាធិបតី Moon Jae-in បានធ្វើជាម្ចាស់ផ្ទះនៃមេដឹកនាំមកពីបណ្តាប្រទេសអាស៊ាននៅសប្តាហ៍នេះ និងបានធ្វើការលើការកាត់បន្ថយការរឹតត្បិតពាណិជ្ជកម្ម និងបង្កើនចំណងមិត្តភាពនៅទូទាំងតំបន់។

យោងតាមសេចក្តីថ្លែងការណ៍រួមពីកិច្ចប្រជុំកំពូលអាស៊ាន និងសាធារណរដ្ឋកូរ៉េដែលធ្វើឡើង នៅទីក្រុងប៊ូសាន នៅសប្តាហ៍នេះបានឱ្យដឹងថា “យើងសូមបញ្ជាក់ម្តងទៀតនូវការប្តេជ្ញាចិត្តរបស់យើង ដើម្បីគាំទ្រដល់ការធ្វើឱ្យប្រសើរឡើងនៃពាណិជ្ជកម្ម និងការវិនិយោគ និងការតស៊ូចំពោះគ្រប់ទម្រង់នៃការគាំពារនិយម ដើម្បីធ្វើឱ្យប្រសើរឡើងនូវការអភិវឌ្ឍ និងវិបុលភាពក្នុងតំបន់ ខណៈពេលដែលបន្តសហប្រតិបត្តិការ ដើម្បីបង្រួមគម្លាតអភិវឌ្ឍន៍នៅក្នុងតំបន់”។

កូរ៉េខាងត្បូង និងអាស៊ាន បានអបអរសាទរទំនាក់ទំនងរយៈពេល ៣០ឆ្នាំរបស់ខ្លួននៅសប្តាហ៍នេះ។

យោងតាមឯកអគ្គរដ្ឋទូតកូរ៉េខាងត្បូង ប្រចាំនៅអង្គការសហប្រតិបត្តិការ និងអភិវ ឌ្ឍន៍សេដ្ឋកិច្ច (OECD) បានឱ្យដឹងថា រដ្ឋាភិបាលកូរ៉េខាងត្បូង ផ្តោតលើការបង្កើតភាពជាដៃគូសេដ្ឋកិច្ចនៅអាស៊ីអាគ្នេយ៍។

សង្រ្គាមពាណិជ្ជកម្មអាមេរិក និងចិន ដែលកំពុងបន្តបានធ្វើឱ្យរំខានដល់សង្វាក់ផ្គត់ផ្គង់ផលិតកម្មពិភពលោក ដោយកូរ៉េខាងត្បូងជាប្រទេសមួយ ដែលរងការវាយប្រហារខ្លាំងជាងគេ ហើយកំពុងជំរុញឱ្យក្រុមហ៊ុនផលិតកម្មអន្តរជាតិ ផ្លាស់ប្តូរទីលំនៅចេញពីចិនដើម្បីចៀសវាងពន្ធគយរបស់អាមេរិក។

លោក Ko Hyoung-kwon ឯកអគ្គរដ្ឋទូត និងជាតំណាងអចិន្ត្រៃយ៍របស់កូរ៉េខាងត្បូងប្រចាំនៅ OECD បាននិយាយថា “សង្គ្រាមពាណិជ្ជកម្មរវាងអាមេរិក និងចិនកំពុងរៀបចំរចនាសម្ព័ន្ធខ្សែសង្វាក់តម្លៃពិភពលោកឡើងវិញ ហើយជាលទ្ធផលបណ្តាប្រទេសនៅអាស៊ីអាគ្នេយ៍ ត្រូវបានយកចិត្តទុកដាក់ជាមូលដ្ឋានផលិតកម្ម”។

ផលប៉ះពាល់នៃពាណិជ្ជកម្មអាមេរិក និងចិនបានផ្លាស់ប្តូរមូលដ្ឋានផលិតកម្មខ្សែសង្វាក់ផ្គត់ផ្គង់ទៅកាន់តំបន់អាស៊ាន ក្នុងរយៈពេលនៃសង្គ្រាមពាណិជ្ជកម្ម១៦ខែ។

ពាណិជ្ជកម្មទ្វេភាគីកូរ៉េខាងត្បូង និងអាស៊ាន នឹងឈានដល់ទំហំទឹកប្រាក់២០០ ពាន់លានដុល្លារនៅឆ្នាំ២០២០។ គោលដៅដើមនៃការឈានដល់២០០ពាន់លានដុល្លារនៅក្នុងពាណិជ្ជកម្មទ្វេភាគី ត្រូវបានផ្តួចផ្តើមឡើងក្នុងឆ្នាំ២០១៤។ ការនាំចេញភាគច្រើនទៅកាន់អាស៊ីអាគ្នេយ៍រួមមានគ្រឿងកុំព្យូទ័រ និងវាយនភ័ណ្ឌ។

ទំហំពាណិជ្ជកម្មសរុបរវាងកូរ៉េ និងតំបន់អាស៊ាន បានកើនឡើងដល់១៦០ពាន់លានដុល្លារក្នុងឆ្នាំ២០១៧ កើនឡើងទ្វេដង បើប្រៀបធៀបនឹងឆ្នាំមុន ហើយគ្រោងនឹងឈានដល់ទំហំទឹកប្រាក់២០០ពាន់លានដុល្លារនៅចុងឆ្នាំ ២០២០។

លើសពីនេះ រដ្ឋមន្រ្តីរដ្ឋសមាជិកកូរ៉េខាងត្បូង និងអាស៊ានរួមទាំងកម្ពុជាផងដែរបានចាប់ផ្តើមពិភាក្សាយ៉ាងខ្លាំងកាលពីខែមុនស្តីពី របៀបជំរុញសក្តានុពលទេសចរណ៍រវាងប្រទេសមួយ ក្នុងចំណោមប្រទេសមានសេដ្ឋកិច្ចធំជាងគេនៅអាស៊ី និងតំបន់ដែលមានប្រជាជនជិត៧០០លាននាក់ និងផលិតផលក្នុងស្រុកសរុប កើនឡើងដល់៣ទ្រីលានដុល្លារ។

ក្រសួងវប្បធម៌កីឡានិងទេសចរណ៍កូរ៉េខាងត្បូង បានថ្លែងនៅក្នុងសេចក្តីប្រកាសព័ត៌មានមួយថា “តាមរយៈកិច្ចប្រជុំរដ្ឋមន្ត្រីវប្បធម៌នេះ យើងរំពឹងថានឹងបង្កើតសន្ទុះមួយសម្រាប់ការអភិវឌ្ឍយ៉ាងខ្លាំង នៅក្នុងកិច្ចសហប្រតិបត្តិការនិងផ្លាស់ប្តូរវប្បធម៌កូរ៉េ និងអាស៊ាន”។

គោលនយោបាយថ្មីខាងត្បូង របស់លោកប្រធានាធិបតីMoon មានគោលបំណងជំរុញទំនាក់ទំនងរវាងកូរ៉េខាងត្បូង និងបណ្តាប្រទេសអាស៊ាន និងបង្កើនទំនាក់ទំនងពាណិជ្ជកម្ម និងវិនិយោគ។

កូរ៉េខាងត្បូងបានផ្តោតការយកចិត្តទុកដាក់ភាគច្រើន នៃគំនិតផ្តួចផ្តើមរបស់ខ្លួននៅកម្ពុជា។

ទំហំពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូងបានឈានដល់៨៥លានដុល្លារក្នុងរយៈពេល៤ខែដំបូង នៃឆ្នាំ២០១៩តែមួយ។ ការនាំចេញរបស់កម្ពុជាទៅកូរ៉េខាងត្បូងមានតម្លៃ២១,៦ លានដុល្លារ កើន៤,៣៨ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

កូរ៉េខាងត្បូងឈរនៅលំដាប់ទី២ ក្នុងការវិនិយោគផ្ទាល់ពីបរទេសនៅកម្ពុជា។ រហូតមកដល់ពេលនេះ រដ្ឋាភិបាលកម្ពុជាបានអនុម័ត គម្រោងវិនិយោគរបស់កូរ៉េចំនួន២១២ គម្រោងដែលមានទឹកប្រាក់ចំនួន ៤,៥៦ពាន់លានដុល្លារ។

ក្រុមហ៊ុនកូរ៉េខាងត្បូងជិត ៣០០ បានធ្វើប្រតិបត្តិការនៅកម្ពុជា ដោយផ្តល់ការងារដល់ប្រជាជនរាប់ពាន់នាក់៕

តំបន់ផ្សារបែកចាន ស្រុកអង្គស្នួល កំពុងទាក់ទាញគម្រោងវិនិយោគលំនៅឋាន និងដីឡូត៍ជាច្រើន

ដោយ វុត្ថា

ភ្នំពេញៈ តំបន់ជុំវិញបែកចាននៃខាងលិច និងនៅមិនឆ្ងាយពីទីក្រុងភ្នំពេញបាន និងកំពុងទាក់ទាញលើគម្រោងវិនិយោគលំនៅឋាន និងដីឡូត៍ជាច្រើន ដើម្បីឆ្លើយតបទៅនឹងការពង្រីកក្រុង និងការកើនឡើងមនុស្សពីមួយខែទៅមួយខែ។

អគ្គនាយកក្រុមហ៊ុន គន្ធាមអចលនទ្រព្យ លោកហែម គន្ធាម ដែលបាននឹងកំពុងវិនិយោគលើលើគម្រោងពុះដីឡូតិ៍ នៅក្នុងតំបន់នេះ បានមានប្រសាសន៍ប្រាប់គេហទំព័រ properyarea.asia នៅថ្ងៃទី២៦ ខែវិច្ឆិកាឆ្នាំ ២០១៩នេះឱ្យដឹងថា បច្ចុប្បន្ននេះក្រុមហ៊ុនរបស់លោក បាននិងកំពុងវិនិយោគ លើគម្រោងពុះដីឡូត៍សម្រាប់គម្រោងទី៤ នៅក្នុងតំបន់នេះ ដោយសារតែតំបន់នេះមានភាពទាក់ទាញ និងល្អប្រសើរបំផុតសម្រាប់អ្នកដែលចង់ទិញសាងសង់លំនៅដ្ឋានកម្មសិទ្ធិ ជាពិសេសផ្តល់ឱកាសសម្រាប់អ្នកទិញទុកលក់បន្តយកចំណេញ”។

លោកបានបន្តទៀតថា “គម្រោងទី៤នេះ ស្ថិតនៅក្នុងតំបន់ទីប្រជុំជន បណ្តុំលំនៅដ្ឋាន និងជាតំបន់ដែលកំពុងតែមានការអភិវឌ្ឍ ស្ថិតនៅក្នុងគម្រោងប្លង់មេរបស់រាជរដ្ឋាភិបាលកម្ពុជានាពេលបច្ចុប្បន្ន និងទៅថ្ងៃអនាគត”។

សម្រាប់ព័ត៌មានលម្អិតនៃការទិញ-លក់ដីឡូតិ៍ គម្រោងទី៤ខាងលើនេះ អាចទាក់ទងបានតាមរយៈទូរស័ព្ទលេខ ៖ ០១២ ៤០៧ ៤០៣ / ០៦៩ ៤៨០ ០០៩ / ០១៦ ៩៩២ ០០៨ / ០៩៦ ៤២២ ២២២២/ ០៨៦ ៥០០០ ៩៦ /០៧៨ ៨៨៨ ៥០៥។

អ្នកជំនាញផ្នែកអចលនទ្រព្យលំដាប់អន្តរជាតិ ក៏បាននិងកំពុងមានសុទិដ្ឋិនិយមពីល្បឿននៃការអភិវឌ្ឍនៅតំបន់នេះផងដែរ។

លោកស្រីអាន សុធីតានាយិកាប្រចាំទេសនៃក្រុមហ៊ុនអន្តរជាតិ CBRE Cambodia បានឱ្យដឹងដែរថា តំបន់បែកចាន គឺជាតំបន់ដែលមានសក្តានុពលខ្ពស់ លើវិស័លំនៅឋាន ដោយសារតំបន់នេះ មានហេដ្ឋារចនាសម្ព័ន្ធល្អប្រកបដោយគុណភាព និងសក្តាពលខ្ពស់ចំពោះការវិនិយោគ។

លោកស្រីបន្តថា ដោយឡែក សម្រាប់វិស័យឧស្សាហកម្ម និងរោចក្រ ហាក់មិនមានភាពទាក់ទាញនោះទេ ដោយសារតម្លៃដីធ្លីនៅតំបន់នេះឡើងថ្លៃរួចទៅហើយ ដែលពិបាកក្នុងអភិវឌ្ឍន៍នៅក្នុងវិស័យមួយនេះ។

ប្រធានការិយាល័យរៀបចំដែនដីនគរូបនីយកម្មសំណង់ និងភូមិបាល ស្រុកអង្គស្នួល ខេត្តកណ្តាល លោកលី វឌ្ឍនា បានមានប្រសាសន៍ប្រាប់តាមទូរស័ព្ទកាលពីពេលកន្លងថា ពេលនេះក្រុមមន្ត្រី ជំនាញពាក់ព័ន្ធថ្នាក់ ស្រុក និង មូលដ្ឋាន កំពុងតែ ធ្វើការ ផ្ទៀងផ្ទាត់ លម្អិត ដើម្បី កែសម្រួល ផែនទី ហេដ្ឋារចនាសម្ព័ន្ធ សាធារណៈសម្រាប់អនុវត្តពេលអនាគតភ្ជាប់ទៅនឹងការចុះបញ្ជីមុនពេលដាក់សំណើរទៅថ្នាក់ខេត្ត។

លោកបន្តថា “នៅក្នុងគម្រោងអភិវឌ្ឍមូលដ្ឋាននៃស្រុកអង្គស្នួល រួមមានដូចជាការជួសជុល និងកែលម្អផ្លូវជាតិការស្ថាបនាផ្លូវនៅក្នុងឃុំនិមួយៗឱ្យមានភាពល្អប្រសើរ ដូចជាផ្លូវលំឃុំ ផ្លូវលំភូមិជាដើម និងមានការរំដោះប្រឡាយជាដើម”។ លោកបន្តថា មុនពេលអនុវត្តផែនការតាមប្លង់មេនេះបានក៏ត្រូវមានការបង្ហាញ និងពន្យល់ដល់ប្រជាពលរដ្ឋឱ្យបានយល់ដឹងពីច្បាប់ភូមិបាលជាមុនផងដែរ។

បច្ចុប្បន្ននេះនៅក្នុងស្រុកអង្គស្នួលខេត្តកណ្តាលមានឃុំចំនួន១០ និង២០០ភូមិ និងមានប្រជាពលរដ្ឋរស់នៅជាង៨ម៉ឺននាក់។ នៅក្នុងស្រុកមួយនេះមានរោងចក្រសហគ្រាសខ្នាតមធ្យម និងខ្នាតធំ ដែលកំពុងដំណើរការមានសរុបចំនួន៧៧ និងមានបុរីលំនៅដ្ឋានចំនួន២ទីតាំងស្ថិតនៅក្នុងឃុំបែកចាន ហើយក្រៅពីនេះមានគម្រោងអភិវឌ្ឍដោយវិនិយោគលើការពុះដីឡូតិ៍ជាច្រើនទីតាំង៕