ក្រុមហ៊ុនចិនដ៏ធំមួយគ្រោងវិនិយោគរោងចក្រតម្លើងរថយន្តនៅកម្ពុជា

ដោយ ៖ រ៉ាណេត

ភ្នំពេញ ៖ ក្រុមហ៊ុនជំនាញដ៏ធំមួយមកពីខេត្តសានតុងប្រទេស នឹងមកបណ្តាក់ទុនវិនិយោគរោងចក្រតម្លើងរថយន្តនៅកម្ពុជា ដែលការសម្រេចចិត្តនេះត្រូវបានធ្វើឡើងបន្ទាប់ពីបានចុះមកសិក្សា និងស្វែងយល់ពីកាលានុវត្តភាព និងឱកាសវិនិយោគនៅកម្ពុជារួមគ្នាជាមួយគណៈប្រតិភូអ្នកវិនិយោគខេត្តសានតុងក្នុងចំណោមក្រុមហ៊ុនទាំង២០។

បន្ទាប់ពីបានធ្វើទស្សនកិច្ចសិក្សាស្វែងយល់ពីសក្ដានុពល និងឱកាសវិនិយោគនៅកម្ពុជាតាមរយៈគណៈប្រតិភូខេត្តសានតុង ដែលដឹកនាំដោយលោក វ៉ាង ស៊ូជាន (WANG SHUJIAN) សមាជិកគណៈកម្មាធិការអចិន្រៃ្តយ៍ នៃគណៈកម្មាធិការបក្សខេត្ត និងជាអភិបាលរងខេត្តសានតុង និងគណៈប្រតិភូអមដំណើរ ដែលរួមមានទាំងអគ្គនាយកនៃក្រុមហ៊ុនធំៗមកពីខេត្តសានតុងផងដែរនោះ ក្រុមហ៊ុន Fu Lai Chun Group ដែលមានជំនាញក្នុងការតម្លើងរថយន្ត នឹងដាក់ទីតាំងរបស់ខ្លួននៅកម្ពុជា។

ការសម្រេចចិត្តខាងលើនេះត្រូវបានធ្វើឡើងនៅក្នុងឱកាសចូលជួបសម្ដែងការគួរសម និងពិភាក្សាការងារជាមួយលោករដ្ឋមន្ត្រីក្រសួងពាណិជ្ជកម្ម ប៉ាន សូរស័ក្ដិ កាលពីរសៀលថ្ងៃទី២១ ខែវិច្ឆិកា ឆ្នាំ២០១៩ម្សិលមិញនេះ ។

លោករដ្ឋមន្ត្រីក្រសួងពាណិជ្ជកម្ម បានលើកឡើងនៅក្នុងកិច្ចសំណេះសំណាលថា កម្ពុជា និងចិន បានបង្កើតទំនាក់ទំនងមិត្តភាពជាប្រវត្តិសាស្ត្រ ក្នុងអំឡុងឆ្នាំ១៩៥៦ ហើយក៏មានការរីកចម្រើនជាបន្តបន្ទាប់ រហូតក្លាយទៅជាកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ នៅថ្ងៃទី១៣ ខែធ្នូ ឆ្នាំ២០១០ ស្របទៅនឹងក្របខណ្ឌតំបន់ ដែលប្រទេសចិន បានដាក់ចេញរួមមាន៖ គំនិតផ្តួចផ្តើម “ខ្សែក្រវាត់មួយ និងផ្លូវមួយ” “មូលនិធិផ្លូវសូត្រ” និង “ធនាគារវិនិយោគហេដ្ឋារចនាសម្ព័ន្ធឤស៊ី” ដើម្បីពង្រឹងភាពជាដៃគូ និងជំរុញការអភិវឌ្ឍបែប “ឈ្នះ-ឈ្នះ” រវាងប្រទេសក្នុងរង្វង់តំបន់ខ្សែក្រវាត់ និងផ្លូវសូត្រ។

លោកបានបន្តទៀតថា “សម្រាប់កិច្ចសហប្រតិបត្តិការសេដ្ឋកិច្ច ប្រទេសចិនជាដៃគូពាណិជ្ជកម្ម និងវិនិយោគិនដ៏ចម្បងរបស់កម្ពុជា។

ទំហំពាណិជ្ជកម្មទ្វេភាគីក្នុងឆ្នាំ ២០១៨ មាន ចំនួន ៦ ០៤០ លានដុល្លារឤមេរិក កើនឡើងជាង ១៣,៨% បើធៀបនឹងឆ្នាំ២០១៧។ ក្នុងឆ្នាំ២០១៧ ទំហំវិនិយោគចិនសរុបនៅកម្ពុជា ឈរលំដាប់លេខ១ ធៀបនឹងទំហំវិនិយោគទុនពីប្រទេសដទៃទៀត ដែលមានទំហំសរុបប្រមាណ ១ ៦៤៤ លានដុល្លារឤមេរិក។

លើសពីនេះ ប្រទេសយើងទាំងពីរ ក៏បានឯកភាពគ្នា ជំរុញទំហំពាណិជ្ជកម្មឱ្យកើនឡើងដល់ ៦០០០ លានដុល្លារឤមេរិក នៅឆ្នាំ២០២០”។ ជាមួយគ្នានេះផងដែរ លោករដ្ឋមន្ត្រីក៏បានលើកបង្ហាញពីសក្ដានុពលចម្បងរបស់កម្ពុជាដែលកំពុងមាននាពេលបច្ចុប្បន្ននេះផងដែរ ដែលសង្កត់ធ្ងន់ទៅលើវិស័យកសិកម្មជាពិសេសលើកសិផលដូចជា ស្វាយ ចេក មៀន ដំឡូងមី និងស្រូវ ប៉ុន្តែកំពុងខ្វះខាតរោងចក្រកែច្នៃ និងវេចខ្ចប់។

ជាការឆ្លើយតប លោក វ៉ាង ស៊ូជាន បានបញ្ជាក់ថា នៅក្នុងដំណើរទស្សនកិច្ចលើកនេះ មានក្រុមហ៊ុនធំៗចំនួនពីរបានសម្រេចចិត្តវិនិយោគនៅកម្ពុជា គឺក្រុមហ៊ុន Guomei Linqor Group ដើម្បីសាងសង់រោងចក្រកែច្នៃកសិកម្មសរីរាង្គមួយ ដោយប្រើប្រាស់កាកសំណល់សំរាមក្នុងការផលិតជីសរីរាង្គ ការវេចខ្ចប់ លក់ជីសរីរាង្គ និងចែកចាយបន្លែសរីរាង្គ និងក្រុមហ៊ុន Fu Lai Chun Group ដើម្បីដំឡើងរថយន្ត។

ដោយឡែក ក្រុមហ៊ុន Guomei Linqor Group ក៏មានគម្រោងវិនិយោគលើរោងចក្រកែច្នៃដំឡូងមីជាម្សៅ ក្នុងលទ្ធភាពផលិត ១០០.០០០ តោន នៅខេត្តក្រចេះផងដែរ។

លោក វ៉ាង ស៊ូជាន ក៏បានតាំងចិត្តថា នឹងបន្តជួយផ្សព្វផ្សាយ និងទាក់ទាញវិនិយោគិនពីខេត្តសានតុង មកវិនិយោគនៅកម្ពុជាឱ្យកាន់តែច្រើនបន្ថែមទៀត ហើយបានធានាទិញផលិតផលទាំងនោះផងដែរ៕

អង្គការ OECD ព្យាករណ៍បង្ហាញថា កំណើនសេដ្ឋកិច្ចពិភពលោកកាន់តែមានភាពយ៉ាប់យ៉ឺន

ដោយ Donald Lee

ភ្នំពេញ៖ កំណើនសេដ្ឋកិច្ចពិភពលោកកំពុងធ្លាក់ចុះ និងកំពុងឈានទៅរកកម្រិតខ្សោយបំផុតដែលមិនធ្លាប់មានចាប់តាំងពីវិបត្តិហិរញ្ញវត្ថុដ៏ធំកាលពី ១០ ឆ្នាំមុន។ នេះបើយោងតាមអង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) ។

លោក Laurence Boone ប្រធានសេដ្ឋវិទូរបស់ OECD បាននិយាយនៅក្នុងរបាយការណ៍ដែលបានចេញផ្សាយកាលពីថ្ងៃព្រហស្បតិ៍ ថា “ក្នុងរយៈពេលពីរឆ្នាំកន្លងមកនេះ លទ្ធផល និងកំណើនសេដ្ឋកិច្ចសកលបានធ្លាក់ចុះជាលំដាប់ ស្របពេលភាពមិនប្រាកដប្រជានៃគោលនយោបាយ និងលំហូរពាណិជ្ជកម្ម និងការវិនិយោគទន់ខ្សោយ”។

របាយការណ៍បានកែប្រែការព្យាករណ៍កំណើនផលិតផលសរុបក្នុងស្រុកឆ្នាំ ២០១៩ របស់ខ្លួនដល់ ២,៩ ភាគរយ និង ៣ ភាគរយសម្រាប់ឆ្នាំក្រោយ។ ការព្យាករណ៍ពីកំណើនសម្រាប់ឆ្នាំ ២០២០ និង២០២១ ឃើញពីចំណុចខ្សោយបំផុតមួយ ចាប់តាំងពីវិបត្តិហិរញ្ញវត្ថុដ៏ធំក្នុងឆ្នាំ ២០០៩ ។ អង្គការ OECD ជឿជាក់ថា សេដ្ឋកិច្ចធំៗនៅជុំវិញពិភពលោកនឹងធ្លាក់ចុះគួរឱ្យកត់សម្គាល់នៅឆ្នាំក្រោយ។

លោក Boone មានបញ្ជាក់ថា “កំណើនផលិតផលសរុបក្នុងស្រុកអាមេរិកត្រូវបានរំពឹងថានឹងធ្លាក់ចុះមកត្រឹម ២ ភាគរយនៅត្រឹមឆ្នាំ ២០២១ ស្របពេលកំណើនសេដ្ឋកិច្ចជប៉ុនត្រូវបានរំពឹងថានឹងមានប្រហែល ០,៧ និងតំបន់អឺរ៉ូមាន ១,២ ភាគរយ។ កំណើនសេដ្ឋកិច្ចចិននឹងបន្តធ្លាក់ចុះមកត្រឹមប្រហែល ៥.៥ ភាគរយនៅឆ្នាំ ២០២១”។

ការព្យាករនេះគឺស្របនឹងរបាយការណ៍សេដ្ឋកិច្ចផ្សេងទៀតដែលចេញដោយដោយធនាគារវិនិយោគជាច្រើន។ធនាគារ Morgan Stanley បានចេញផ្សាយរបាយការណ៍មួយនៅសប្តាហ៍នេះដោយបានព្យាករថា សេដ្ឋកិច្ចពិភពលោកនឹងមានកំណើនតិចតូចនៅចុងឆ្នាំ ២០១៩ និងឈានដល់កំណើនសេដ្ឋកិច្ចពិភពលោកជិត ៣,២ ភាគរយនៅក្នុងត្រីមាសទីមួយនៃឆ្នាំ ២០២០។

របាយការណ៍ធនគារ Morgan Stanley ជឿជាក់ថា ប្រសិនបើកិច្ចព្រមព្រៀងពាណិជ្ជកម្មរវាងអាមេរិក និងចិនអាចនឹងត្រូវបានធ្វើឡើង ហើយធនាគារកណ្តាលនៅជុំវិញពិភពលោកបន្តកាត់បន្ថយអត្រាការប្រាក់ នោះការកើនឡើងនៃកំណើនសេដ្ឋកិច្ចអាចត្រូវបានកើតមាន។

របាយការណ៍ធនាគារ Morgan Stanley បានលើកឡើងថា “តាមទស្សនៈវិស័យធំៗ យើងគិតថា ទស្សនវិស័យសេដ្ឋកិច្ចសកលពឹងផ្អែកលើកម្លាំងសំខាន់ពីរដែលផ្តោតលើការកាត់បន្ថយគោលនយោបាយ និងភាពតានតឹងផ្នែកពាណិជ្ជកម្ម។ ហើយឥឡូវនេះចាប់តាំងពីឆ្នាំ ២០១៨ យើងមានកម្លាំងទាំងពីរកំពុងដើរក្នុងទិសដៅតែមួយដើម្បីជួយដល់ការធ្លាក់ចុះ។ ការបន្ធូរបន្ថយរបស់ធនាគារកណ្តាលកាន់តែខ្លាំងឡើងៗ ហើយជម្លោះពាណិជ្ជកម្មកំពុងធូរស្រាល”៕

លោក ថេង ចាន់ថន ពីកូនអ្នកកសិករធ្វើស្រែក្លាយជាអគ្គនាយកក្រុមហ៊ុនអចលនទ្រព្យ

ដោយ ៖ រ៉ាណេត

ភ្នំពេញ ៖ ផ្តើមចេញពីជីវិតជាកូនអ្នកកសិករធ្វើស្រែចំការនៅខេត្តតាកែវ ក្នុងកម្រិតជីវភាពក្រខ្សត់ ដែលត្រូវពុះពារតស៊ូជំនះរាល់ភាពលំបាកក្នុងនាមជាកូនប្រុសច្បងនៅក្នុងគ្រួសារ ដែលមានបងប្អូនចំនួន៥នាក់ បច្ចុប្បន្ននេះ លោក ថេង ចាន់ថន បានកែប្រែជោគវាសនារបស់ខ្លួនបានយ៉ាងប្រសើរ រហូតក្លាយជាអគ្គនាយកក្រុមហ៊ុនអចលនទ្រព្យដែលកំពុងតែទទួលបានភាពជោគជ័យនៅលើមុខជំនួញ ។

បច្ចុប្បន្ននេះ លោក ថេង ចាន់ថន គឺជាអគ្គនាយកក្រុមហ៊ុនអចលនទ្រព្យ PAPA & MAMA Real Estate Co,.Ltd ដែលកំពុងមានប្រតិបត្តិការយ៉ាងសកម្មក្នុងវិស័យអចលនទ្រព្យនៅកម្ពុជាក្នុងនាមជាភ្នាក់ងារជំនាញ មានបទពិសោធន៍ខ្ពស់ផ្នែកខាងទិញ-លក់គម្រោងអភិវឌ្ឍន៍សំណង់លំនៅដ្ឋាន ជាពិសេស មជ្ឈមណ្ឌលពាណិជ្ជកម្មធំៗ ដែលបានបញ្ចប់ការសាងសង់រួចជាស្ថាពរ និងគម្រោងធំៗមួយចំនួនទៀតដែលកំពុងបន្តសកម្មភាពការសាងសង់នៅពេលបច្ចុប្បន្ននេះផងដែរ។

បង្ហើបប្រាប់ពីរបត់ជីវិត ក៏ដូចជាបទពិសោធន៍ការងារជាច្រើនមុនពេលក្លាយជាអគ្គនាយកក្រុមហ៊ុនអចលនទ្រព្យ PAPA & MAMA Real Estate Co,.Ltd ដែលកំពុងមានកេរ្តិ៍ឈ្មោះបោះសំឡេងសព្វថ្ងៃនេះ លោក ថេង ចាន់ថន បានលើកឡើងថា “ខ្ញុំមានស្រុកកំណើតខេត្តតាកែវ ភូមិវាល ឃុំក្ដាញ់ ស្រុកព្រៃកប្បាស ដោយមានឪពុក-មានជាកសិករធ្វើស្រែចំការបន្តិចបន្តួចតែប៉ុណ្ណោះ”។ លោកបានរំលឹកទៀតថា “បន្ទាប់ពីប្រឡងជាប់សញ្ញាបត្រមធ្យមសិក្សាទុតិយភូមិកាលពីឆ្នាំ២០០៨ ខ្ញុំបានសម្រេចចិត្តសុំគ្រួសារមកបន្តការសិក្សានៅសាលវិទ្យាល័យនៅរាជធានីភ្នំពេញ ដោយគ្រានោះខ្ញុំត្រូវរៀនបណ្តើរ និងឆ្លៀតធ្វើការដើម្បីទទួលបានកម្រៃបណ្ដើរសម្រាប់ផ្គត់ផ្គង់ការសិក្សារបស់ខ្ញុំ”។

លោក ថេង ចាន់ថន បានបន្តទៀតថា “បន្ទាប់ពីបញ្ចប់ថ្នាក់បរិញ្ញាបត្រកាលពីឆ្នាំ២០១២ លើមុខជំនាញទំនាក់ទំនងអន្តរជាតិ ខ្ញុំបានចូលបម្រើការងារនៅក្នុងស្ថានប័នអង្គការមិនមែនរដ្ឋាភិបាលជាច្រើន ក្នុងនាមជាអ្នកសម្របសម្រួល អ្នកគ្រប់គ្រង និងទំនាក់ទំនងកិច្ចការសាធារណៈ និងអន្តរជាតិ រួមជាមួយនឹងការងារនៅក្នុងស្ថាប័នធនាគារផងដែរ។ ក្រោយមកទៀតខ្ញុំក៏បន្តការសិក្សា និងបញ្ចប់ថ្នាក់អនុបណ្ឌិតជំនាញផ្នែកសហគ្រិនភាព និងគ្រប់គ្រងគម្រោង កាលពីឆ្នាំ២០១៦”។

លោកបន្តថា “នៅក្នុងស្ថាការណ៍ដ៏ល្អប្រសើរនៃវិស័យអចលនទ្រព្យកម្ពុជាមានភាពរីកចម្រើន និងអភិវឌ្ឍន៍យ៉ាងខ្លាំង ហើយសម្លឹងឃើញពីឱកាសល្អ ខ្ញុំបានចាប់ផ្តើមសម្រេចចិត្តចូលប្រឡូក ដោយផ្តើមចេញពីការងារជាភ្នាក់ងារឯករាជ្យ សហការជាមួយបណ្តាក្រុមហ៊ុនអចលនទ្រព្យក្នុងស្រុកនានាក្នុងការចេញលក់គម្រោង”។ លោកបន្តថា “ឆ្លងកាត់បទពិសោធន៍ក្នុងនាមជាភ្នាក់ងារជំនាញលើការលក់គម្រោងប្រកបដោយភាពជោគជ័យអស់រយៈពេល៥ឆ្នាំ ខ្ញុំគិតថា សមល្មមដល់ពេលដែលខ្ញុំត្រូវពង្រីកខ្លួននៅក្នុងវិស័យមួយនេះ ហើយក៏សម្រេចចិត្តបង្កើតជាក្រុមហ៊ុនអចលនទ្រព្យស្របច្បាប់ដោយមានការចុះបញ្ជីនៅក្រសួងសេដ្ឋកិច្ច និងហិរញ្ញវត្ថុ ចុះឈ្មោះនៅក្រសួងពាណិជ្ជកម្ម ក៏ដូចជានៅអគ្គនាយកដ្ឋានពន្ធដារផងដែរ ដោយដាក់ឈ្មោះក្រុមហ៊ុនថា PAPA & MAMA Real Estate Co,.Ltd ”។

ជាលទ្ធផលដែលទទួលបានពីការខិតខំប្រឹងប្រែងរបស់លោក ថេង ចាន់ថន បច្ចុប្បន្ននេះ នៅក្រោមកេរ្តិ៍ឈ្មោះរបស់ក្រុមហ៊ុន PAPA & MAMA Real Estate Co,.Ltd មានក្រុមហ៊ុនវិនិយោគ និងម្ចាស់គម្រោងអភិវឌ្ឍជាច្រើនបានផ្តល់ទំនុកចិត្តសម្រាប់ការលក់នៅលើទៅផ្សារដល់ក្រុមហ៊ុនរបស់លោក ដែលនៅក្នុងនោះរួមមានគម្រោង Ur Ban Village,លដែលកំពុងដំណើរការសាងសង់គម្រោងទី២ នៅសង្កាត់ចាក់អង្រែ ផ្លូវ៦០ម៉ែត្រ, គម្រោង Morgan EnMaison, គម្រោង KMH Shop House រួមជាមួយនឹងគម្រោង Embassy Central ផងដែរ។

លោកបានបញ្ជាក់ថា ភាពជោគជ័យទាំងអស់នេះ គឺកើតចេញពីការព្យាយាម តាំងចិត្ត និងសិក្សាស្វែងយល់បន្ថែមពីបរិយាកាសជុំវិញ ដែលជាចំណឹងពាក់ព័ន្ធទៅនឹងអាជីពក្នុងនាមជាភ្នាក់ងារអចលនទ្រព្យ។ អ្វីដែលជាគន្លឹះសំខាន់ គឺភាពច្បាស់លាស់ ពិតប្រាកដ ស្មោះត្រង់ប្រកបដោយវិជ្ជាជីវៈ ដើម្បីអាចទទួលបានទំនុកចិត្តខ្ពស់ពីសំណាក់អតិថិជន ជាពិសេស ក្រុមហ៊ុន ដែលជាដៃគូសហការនៅលើទីផ្សាររួមគ្នា ៕

ខុនដូ 7នាទីពី TK Avenue សម្ពោធភ្លាម ផ្តល់រំលស់ 100% ភ្លាម និងអាចចូលនៅភ្លាម

ដោយ វុត្ថា

ភ្នំពេញ៖ កាលពីថ្ងៃទី20 ខែវិច្ឆិកា ឆ្នាំ2019 ដើម្បីអបអរការសម្ពោធសាកល្បងដាក់អោយប្រើប្រាស់អាងហែលទឹក ខ្លឹបហាត់ប្រាណ ហាងកាហ្វេនៅក្នុង Vista Condo លោក គង់ គឹមហុង នាយកប្រតិបត្តិបានថ្លែងអំណរគុណដល់ការគាំទ្ររបស់អតិថិជនទាំងឡាយដែលបានគាំទ្រគម្រោង Vista និងគម្រោងដ៏ទៃទៀតរបស់ក្រុមហ៊ុនបុរីវីឡាទួលសង្កែក្នុងរយៈពេល 20ឆ្នាំកន្លងមកនេះ។

ក្នុងឱកាសដ៏ពិសេសនេះ លោក ភី នីដូណា នាយកផ្នែកលក់និងទីផ្សារ ក៏បានប្រកាសការផ្តល់ជូនពិសេស ដោយអតិថិជនអាចរំលស់ 100% ជាមួយក្រុមហ៊ុនផ្ទាល់ ហើយថែមទាំងអាចចូលរស់នៅបានភ្លាមៗទៀត។

Vista Condo បានបញ្ចប់ការសាងសង់ថ្មីៗនេះជាមួយទំហំបន្ទប់ធំទូលាយចាប់ពី 53.3ម៉ែត្រការ៉េ ហើយអតិថិជនអាចទទួលបានប្លង់រឹងភ្លាមៗទៀតផង។ វិធីបង់ប្រាក់មានច្រើនជម្រើស រួមមានការរំលស់ជាមួយក្រុមហ៊ុនផ្ទាល់ ឬធនាគារ ដែលការបង់ប្រាក់ងាយស្រួល អាចរំលស់បានចាប់ពី 335ដុល្លារអាមេរិក ក្នុងមួយខែប៉ុណ្ណោះ។

ចំណែកទីតាំង Vista Condo ស្ថិតក្នុងតំបន់សក្តានុពលចុះពីផ្លូវជាសុផារ៉ាតែ 200ម៉ែត្រប៉ុណ្ណោះ ដែលអាចធ្វើដំណើរត្រឹមតែ 7នាទី ពីផ្សារទំនើប TK Avenue ឬ 6នាទីពីផ្សារ AEON Sen Sok។

ភាពជោគជ័យរបស់ក្រុមហ៊ុនក្នុងរយៈពេល 20ឆ្នាំនេះ គឺដោយសារទីតាំងអភិវឌ្ឍគម្រោងនីមួយមានសក្តានុពល តម្លៃអចលនទ្រព្យមានកំនើនលឿន និងផ្តោតលើគុណភាពសំណង់ដែលមានស្តង់ដាខ្ពស់។

សម្រាប់ព័ត៌មានបន្ថែមសូមទំនាក់ទំនងមកយើងខ្ញុំតាមរយៈទូរសព្ទ័លេខ : 085 880 883៕

កម្ពុជាជាប់ចំណាត់ថ្នាក់កំពូលទាំង ១០ នៅលើពិភពលោកក្នុងសន្ទស្សន៍អភិវឌ្ឍន៍មនុស្សក្នុងឆ្នាំ២០១៩

ដោយ ប៊ី

ភ្នំពេញ៖ ការអភិវឌ្ឍយ៉ាងឆាប់រហ័សរបស់កម្ពុជាក្នុងរយៈពេល ៣០ ឆ្នាំកន្លងមកបាននាំឱ្យប្រទេសនេះជាប់ចំណាត់ថ្នាក់កំពូលទាំង ១០ នៅលើពិភពលោក និងទី ២ នៅអាស៊ី និងប៉ាស៊ីហ្វិកស្តីពីអត្រានៃធ្វើឱ្យមានភាពប្រសើរឡើងនៅក្នុងសន្ទស្សន៍អភិវឌ្ឍន៍មនុស្ស។ នេះបើរបាយការណ៍ថ្មីមួយដែលចេញដោយកម្មវិធីអភិវឌ្ឍន៍សហប្រជាជាតិកាលពីម្សិលមិញ។

របាយការណ៍អភិវឌ្ឍន៍មនុស្សឆ្នាំ ២០១៩ របស់កម្ពុជាបានលើកឡើងថា “បច្ចុប្បន្ន ប្រជាជនកម្ពុជាច្រើនជាងមុនៗ ទទួលបានប្រើប្រាស់ផ្លូវ ថាមពល សេវាកម្មសាធារណៈប្រសើរជាងមុន និងឱកាសសេដ្ឋកិច្ច និងការងារថ្មីៗ”។

របាយការណ៍បានលើកឡើងថា “ដើម្បីទ្រទ្រង់ និងបង្កើនកំណើនក្នុងរយៈពេលវែង និរន្តរភាពបរិស្ថានត្រូវតែបញ្ចូលទៅក្នុងសេដ្ឋកិច្ច”។ របាយការណ៍នេះបានបន្ថែមទៀតថា កំណើនប្រជាជន និងនគរូបនីយកម្មយ៉ាងឆាប់រហ័សកំពុងដាក់សម្ពាធកាន់តែខ្លាំងឡើងទៅលើប្រព័ន្ធអេកូឡូស៊ីរបស់កម្ពុជា ដែលបណ្តាលឱ្យមានការរិចរិលបរិស្ថាន និងការបាត់បង់សេវាកម្មប្រព័ន្ធអេកូឡូស៊ី និងជីវចម្រុះ។

ប្រជាជនកម្ពុជាប្រមាណ ៨០ ភាគរយរស់នៅ និងធ្វើការនៅតំបន់ជនបទដោយពឹងផ្អែកលើកសិកម្មដោយបន្ថែមថា ធនធានព្រៃឈើ និងសកម្មភាពផ្សេងៗផ្តល់នូវបណ្តាញសុវត្ថិភាពដ៏សំខាន់សម្រាប់សហគមន៍ជនបទទាំងនេះ ជាពិសេសស្ត្រី និងប្រជាជនក្រីក្រ ខណៈសកម្មភាពទាំងនេះផ្តល់ប្រភពចំណូល។

របាយការណ៍នេះបានឱ្យដឹងថា “ទំនាក់ទំនងយ៉ាងស៊ីជម្រៅរវាងសេដ្ឋកិច្ច និងបរិស្ថានធ្វើឱ្យកម្ពុជាស្ថិតក្នុងជំហរតែមួយដើម្បីបង្ហាញថា ការអភិវឌ្ឍមនុស្សអាចដើរទន្ទឹមគ្នា នឹងនិរន្តរភាពបរិស្ថាន”។

លោកស្រី Valerie Cliff ជំនួយការរដ្ឋបាល និងមន្ត្រីទទួលបន្ទុកការិយាល័យប្រចាំតំបន់អាស៊ី និងប៉ាស៊ីហ្វិកបាននិយាយនៅរបាយការណ៍ថា របាយការណ៍បានចែករំលែកនូវអនុសាសន៍មួយចំនួនសម្រាប់លើកកម្ពស់ការគ្រប់គ្រងធនធានធម្មជាតិឱ្យកាន់តែប្រសើរឡើងនៅទូទាំងប្រទេស។

លោកស្រីបាននិយាយថា វិធានការណ៍សំខាន់ៗរួមមានការបង្កើតភាពជាម្ចាស់ធនធានធម្មជាតិច្បាស់លាស់ និងមានសុវត្ថិភាពការកៀរគរថវិកាដើម្បីការពារប្រព័ន្ធអេកូឡូស៊ីធម្មជាតិផ្តល់សិទ្ធិអំណាចដល់ប្រជាជនក្នុងតំបន់ដើម្បីគ្រប់គ្រងធនធានដែលពួកគេពឹងផ្អែកបានកាន់តែប្រសើរ និងលើកកម្ពស់ផលិតផលធនធានធម្មជាតិប្រកបដោយនិរន្តរភាព និងឱកាសចិញ្ចឹមជីវិតជំនួស។

លោកស្រីបានមានប្រសាសន៍ថា “ការផ្តោតសំខាន់នៃរបាយការណ៍អភិវឌ្ឍន៍មនុស្សនេះគឺដើម្បីបង្ហាញពីសក្តានុពលនៃមាគ៌ាអភិវឌ្ឍន៍នាពេលអនាគតដែលជំរុញការធ្វើសមាហរណកម្មនៃការអភិវឌ្ឍមនុស្ស និងនិរន្តរភាពបរិស្ថានទន្ទឹមនឹងវឌ្ឍនភាពសេដ្ឋកិច្ចយ៉ាងឆាប់រហ័ស”។

របាយការណ៍បញ្ជាក់ពីអត្ថប្រយោជន៍បរិស្ថាន និងការអភិវឌ្ឍរយៈពេលវែងនៃនិរន្តរភាពសម្រាប់ការបន្ស៊ាំ និងការកាត់បន្ថយការប្រែប្រួលអាកាសធាតុដោយបង្ហាញថា នេះអាចបណ្តាលឱ្យមានលទ្ធផលនៃការអភិវឌ្ឍមនុស្សជាតិដ៏សំខាន់កសាងភាពធន់ និងការរីកចម្រើនប្រកបដោយសុវត្ថិភាពនៅទូទាំងកម្ពុជា។

របាយការណ៍នេះបានបញ្ជាក់ទៀតថា សហគមន៍ជនបទគឺជាភ្នាក់ងារដ៏សំខាន់សម្រាប់និរន្តរភាព ហើយពួកគេត្រូវការផ្តល់អំណាចដើម្បីបំពេញសេចក្តីត្រូវការរបស់ពួកគេ និងជួយលើកកម្ពស់ការអភិវឌ្ឍមនុស្សតាមរយៈការចូលរួមក្នុងការគ្រប់គ្រងធនធានធម្មជាតិប្រកបដោយនិរន្តរភាព៕

លោក Donald Trump គោរពអញ្ជើញសម្តេចតេជោ ហ៊ុន សែន ចូលរួមប្រជុំកំពូលពិសេសរវាងអាមេរិក និងអាស៊ាន ២០២០ ខាងមុខនេះ

ដោយ ប៊ី

ភ្នំពេញ៖ លោកប្រធានាធិបតីអាមេរិក Donald Trump គោរពអញ្ជើញសម្តេចតេជោ ហ៊ុន សែន អញ្ជើញចូលរួមប្រជុំកំពូលពិសេសរវាងសហរដ្ធអាមេរិក និងអាស៊ាន នៅលើទឹកដីសហរដ្ធអាមេរិកក្នុងឆមាសទី១ ក្នងឆ្នាំ ២០២០ ខាងមុខនេះ។ នេះបើយោងតាមអង្គភាពព័ត៌មាន និងប្រតិកម្មរហ័សចុះផ្សាយកាលពីម្សិលមិញនេះ។

ការគោរពអញ្ជើញនេះត្រូវបានធ្វើឡើងក្នុងជំនួបពិភាក្សាការងារនៅវិមានសន្តិភាពនៅថ្ងៃ ទី២១ ខែ វិច្ឆិកា ឆ្នាំ២០១៩ នេះ រវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា។

នៅក្នុងជំនួបនេះ លោក Patrick Murphy បាននាំយកនូវលិខិត០២ របស់ លោក Donald Trump ប្រធានាធិបតីសហរដ្ឋអាមេរិក ផ្ញើជូនចំពោះ សម្តេចតេជោនាយករដ្ឋមន្ត្រី ដែលលិខិតទី០១ ស្ដីអំពីទំនាក់ទំនង និងសហប្រតិបត្តិការរវាងសហរដ្ឋអាមេរិក និងកម្ពុជា ដែលសហរដ្ឋអាមេរិកមានបំណងពង្រឹង និងធ្វើឱ្យកាន់តែប្រសើរឡើងនូវទំនាក់ទំនងដែលប្រទេសទាំងពីរមានជាយូរលង់មកហើយ ដែលក្នុងនោះគឺមានកិច្ចសហប្រតិបត្តិការជាមួយគ្នាជាច្រើនវិស័យ។

ក្នុងលិខិតពីសេតវិមានវ៉ាយហៅស៍ ( White House) ដែលចុះហត្ថលេខាដោយលោកប្រធានាធិបតី Donald Trump គឺបានបញ្ជាក់ច្បាស់អំពីជំហរសហរដ្ឋអាមេរិកដោយមានការប្ដេជ្ញាខ្ពស់ក្នុងការគាំទ្រដល់ប្រទេសកម្ពុជា ជាពិសេសគោរពអធិបតេយ្យភាពរបស់ប្រទេសកម្ពុជា និងមិនមានការគាំទ្រឱ្យមានការផ្លាស់ប្តូររបបនៅក្នុងប្រទេសកម្ពុជានោះទេ។

ជាពិសេសទៀតនោះ គឺសហរដ្ធអាមេរិកនឹងជួយការពារអធិបតេយ្យភាពកម្ពុជាផងដែរ ហើយសហរដ្ឋអាមេរិកនឹងបន្តជួយកម្ពុជាឱ្យមានប្រព័ន្ឋគ្រប់គ្រងហិរញ្ញវត្ថុរឹងមាំប្រកបដោយតម្លាភាព ទប់ស្កាត់ការលាងលុយកក្វក់ដែលធ្វើឱ្យប៉ះពាល់ដល់ប្រទេសជាតិ ព្រមទាំងជំនួយបច្ចេកទេសជាច្រើនទៀតដែលកម្ពុជាត្រូវការ គឺសហរដ្ធអាមេរិកនឹងជួយដើម្បីជំរុញមិត្តភាព និងកិច្ចសហការអោយកាន់តែល្អនឹងជឿទុកចិត្តគ្នាទៅវិញទៅមកកាន់តែខ្លាំង។

ចំពោះលិខិតទី ២ គឺលោកប្រធានាធិបតី Donald Trump គោរពអញ្ជើញ សម្តេចតេជោ ហ៊ុន សែន អញ្ជើញចូលរួមប្រជុំកំពូលពិសេសរវាងសហរដ្ធអាមេរិក និងអាស៊ាន នៅលើទឹកដីសហរដ្ធក្នុងឆមាសទី១ ក្នងឆ្នាំ ២០២០ ខាងមុខនេះ។

សម្ដេចតេជោនាយករដ្ឋមន្ត្រី បានគាំទ្រគំនិតផ្ដួចផ្ដើមរបស់លោកប្រធានាធិបតី Donald Trump ហើយ សម្តេចតេជោ បានចាត់ទុកថាជាកិច្ចប្រជុំដ៏សំខាន់ដែលអាស៊ាន និងសហរដ្ឋអាមេរិកមានកិច្ចសហប្រតិបត្តិការលើគ្រប់វិស័យ ដើម្បីផលប្រយោជន៍ទាំងសងខាងរវាងអាមេរិក និងអាស៊ាន។

សម្ដេចតេជោ នឹងពិភាក្សាជាមួយនឹងប្រមុខដឹកនាំប្រទេសអាស៊ានផ្សេងៗទៀតក្នុងការគាំទ្រអាមេរិក និងអាស៊ាន ដើម្បីធ្វើយ៉ាងណាអោយកិច្ចប្រជុំកំពូលនេះអោយបានល្អប្រសើរ។ ហើយសម្តេចគិតថា នេះជាយុទ្ធសាស្ត្រ ធ្វើអោយ អាស៊ាន-សហរដ្ឋអាមេរិក កាន់តែជិតស្និទ្ឋ បន្តមានភាពរីកចម្រើន និងផ្ដល់ផលប្រយោជន៍អោយគ្នាទៅវិញទៅមកកាន់តែច្រើនឡើង។

នៅក្នុងជំនួបនេះផងដែរ ឯកឧត្តមឯកអគ្គរដ្ឋទូតសហរដ្ឋអាមេរិក ក៏បានចូលរួមរំលែកនូវព្រះមរណទុក្ខចំពោះការយាងសោយទីវង្គតរបស់ សម្ដេចរាជបុត្រី ព្រះរៀម នរោត្តម បុប្ផាទីវី ដែលព្រះអង្គបានចូលរួមលើកស្ទួយវិស័យវប្បធម៌ជាច្រើនរបស់ប្រទេសកម្ពុជានោះ ហើយបានយាងសោយទិវង្គតកាលពីថ្ងៃទី១៨ វិច្ឆិកាកន្លងទៅនេះ។

ជាការឆ្លើយតប សម្តេចតេជោ ហ៊ុន សែន បានអរគុណសហរដ្ឋអាមេរិកដែលបានគាំទ្រប្រទេសកម្ពុជាតាំងពីកម្ពុជាមិនទាន់ទទួលបានឯករាជ្យក្នុងឆ្នាំ ១៩៥៣ មកម៉្លេះ។ នេះគឺបង្ហាញពីចំណងមិត្តភាពនិងសហប្រតិបត្តិការល្អជាមួយគ្នាដែលមានរយៈពេលយូរលង់មកហើយ។

ទន្ទឹមនឹងនេះដែរ សម្ដេចតេជោ ហ៊ុន សែន នាយករដ្ឋមន្ត្រី ក៏បានអរគុណដល់ឯកឧត្តមឯកអគ្គរដ្ឋទូតសហរដ្ឋអាមេរិកដែលបាននាំយកលិខិត ២ច្បាប់របស់លោកប្រធានាធិបតី Donald Trump ទាក់ទងទៅនឹងទាក់ទងទៅនឹងការបង្កើនទំនាក់ទំនង និង កិច្ចសហប្រតិបត្តិការរវាងប្រទេសយើងទាំងពីរ និងលិខិតអញ្ជើញចូលរួមកិច្ចប្រជុំកំពុលពិសេសអាមេរិកអាស៊ាន ២០២០ ។

សម្តេចតេជោ បានបញ្ជាក់ពីជំហររបស់កម្ពុជាក្នុងការបង្កើនមិត្តភាពល្អជាមួយសហរដ្ធអាមរិក ហើយរីករាយនឹងចូលរួមកិច្ចប្រជុំពិសេសដែលរៀបចំដោយសហរដ្ធអាមេរិកនៅឆ្នាំក្រោយនេះ។ សម្តេចតេជោ ក៏បានផ្តាំផ្ញើសួរសុខទុក្ខលោកប្រធានាធិបតី Donald Trump ហើយនឹងចាត់មន្រ្តីក្រសួងការបរទេសអោយរៀបចំលិខិតឆ្លើយតបជាផ្លូវការទៅសេតវិមានវិញនៅពេលឆាប់នេះ៕

សភាពាណិជ្ជកម្មកម្ពុជា សហកាជាមួយសមាគមចិនដ៏ធំមួយជំរុញការវិនិយោគនៅកម្ពុជា

ដោយ ៖ រ៉ាណេត

ភ្នំពេញ ៖ តំណាងរាជរដ្ឋាភិបាលកម្ពុជា សភាពាណិជ្ជកម្មកម្ពុជា បានសហការជារដ្ឋាភិបាលចិន ដែលតំណាងដោយសមាគមជំរុញកិច្ចសហប្រតិបត្តិការត្បូង-ត្បូង ដែលស្ថិតនៅក្រោមការគ្រប់គ្រងរបស់ក្រសួងការបរទេសចិន ជំរុញវិស័យពាណិជ្ជកម្ម និងបង្កើនការវិនិយោគបន្ថែមនៅកម្ពុជាបន្ថែមទៀត។

សភាពាណិជ្ជកម្មកម្ពុជា ដែលដឹកនាំដោយអ្នកឧកញ៉ា គិត ម៉េង បានជួបប្រជុំពិភាក្សាជាមួយការងារស៊ីជម្រៅជាមួយលោក Lyu Xinhua ប្រធានសមាគមជំរុញកិច្ចសហប្រតិបត្តិការភាគខាងត្បូងប្រទេសចិន (Council for Promoting South-South Cooperation) ដែលដឹកនាំសហគ្រិនភាព និងក្រុមអ្នកវិនិយោគប្រមាណជិត៦០ កាលពីថ្ងៃទី២១ ខែវិច្ឆិកា ឆ្នាំ២០១៩ នៅទីស្នាក់ការសភាពាណិជ្ជកម្មកម្ពុជា ដើម្បីធ្វើយ៉ាងជំរុញវិស័យពាណិជ្ជកម្ម និងបង្កើនការវិនិយោគនៅកម្ពុជា។

អនុប្រធានសភាពាណិជ្ជកម្ម លោកឧកញ៉ា លឹម ហេង បានមានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី២១ ខែវិច្ឆិកា ឆ្នាំ២០១៩ថា សមាគមជំរុញកិច្ចសហប្រតិបត្តិការភាគខាងត្បូងប្រទេសចិន គាត់មកធ្វើទស្សនកិច្ច និងស្វែងយល់ពីឱកាសវិនិយោគនៅកម្ពុជាស្ថិតនៅក្នុងផ្លូវមួយខ្សែក្រវ៉ាត់មួយ ដែលយើងនឹងជំរុញបន្ថែមទៀតអំពីកិច្ចព្រមព្រៀងសេរីពាណិជ្ជកម្មរវាងកម្ពុជា-ចិន។

លោកឧកញ៉ាបានបន្តទៀតថា “ប្រធានសមាគមចិនខាងលើនេះ បានដឹកនាំតំណាងក្រុមហ៊ុនដែលមានបទពិសោធន៍ចំនួន២៤ក្រុមហ៊ុន និងជាង៣០សហគ្រិន ដើម្បីចាប់ដៃគូជាមួយកម្ពុជា ដោយអមដំណើរដោយអគ្គរដ្ឋទូតចិនប្រចាំនៅកម្ពុជាផងដែរ”។

លោកបានបន្តទៀតថា “ពួកគាត់ភាគច្រើនសុទ្ធតែជាអតីតអនុរដ្ឋមន្ត្រី និងជាសមាសភាពតំណាងក្រុមហ៊ុនដែលចំណុះរដ្ឋជាមួយឯកជន និងជាអតីតមន្ត្រីជាន់ចាស់ដែលមានបទពិសោធន៍ខ្ពស់ក្នុងវិស័យពាណិជ្ជកម្ម”។

អនុប្រធានសភាពាណិជ្ជកម្មកម្ពុជារូបនេះបានបន្តទៀតថា “ តាមរយៈនៃកិច្ចជំនួបដ៏ប្រសើរនេះ ខ្ញុំសង្ឃឹមថានឹងកាន់តែមានភាពល្អប្រសើរនៅក្នុងការពង្រីក និងពង្រឹងវិស័យពាណិជ្ជកម្មកម្ពុជា-ចិន កាន់តែមានភាពល្អប្រសើរ ជាពិសេសទាក់ទាញបានការវិនិយោគពីសំណាក់ប្រទេសចិនបន្ថែមទៀត ខណៈដែសក្ដានុពល និងឱកាសវិនិយោគត្រូវបានពួកគាត់សិក្សាស្វែងយល់យ៉ាងច្បាស់រួចទៅហើយនោះ”។

គំនិតផ្តួចផ្តើម “ខ្សែក្រវាត់ និងផ្លូវ” របស់ចិន បានផ្តល់អត្ថប្រយោជន៍យ៉ាងច្រើនរវាងកម្ពុជា និងចិន ខណៈដែលចិនបានចាត់ទុកកម្ពុជា ជាចំណុចស្នូលរបស់គំនិតផ្តួចផ្តើមនេះ ហើយគំនិតផ្តួចផ្តើមនេះ គឺជារឿងសំខាន់បំផុត ដើម្បីសហការក្នុងការកសាងហេដ្ឋារចនាសម្ព័ន្ធ ដែលកាន់តែផ្តល់នូវអត្ថប្រយោជន៍យ៉ាងច្រើនដល់កម្ពុជា ដែលក្រៅពីកិច្ចពង្រឹងចំណងទំនាក់ទំនងរវាងប្រទេសទាំងពីរ ក៏មានការជំរុញកំណើនពាណិជ្ជកម្ម និងការវិនិយោគនៅកម្ពុជាផងដែរ៕

គម្រោងទឹកស្អាតនៅតាខ្មៅនឹងចាប់ផ្តើមដាក់ការដេញថ្លៃរើសក្រុមហ៊ុនសាងសង់នៅជប៉ុននៅឆ្នាំ២០២០

ដោយ ប៊ី

ភ្នំពេញៈ គម្រោងការពង្រីកប្រព័ន្ធផ្គត់ផ្គង់ទឹកស្អាតនៅទីក្រុងតាខ្មៅ ខេត្តកណ្តាល ក្រោមជំនួយឥតសំណងរបស់រាជរដ្ឋាភិបាលជប៉ុន នឹងដាក់ដេញថ្លៃជ្រើសរើសក្រុមហ៊ុនសាងសង់នៅជប៉ុននៅខែមីនា ឆ្នាំ២០២១ ខណៈការចុះកិច្ចសន្យាជាមួយក្រុមហ៊ុនដែលឈរឈ្មោះការដេញថ្លៃនឹងធ្វើឡើងឡើង នៅពីខែមេសា ឆ្នាំ២០២១ ដល់ខែ កញ្ញា ឆ្នាំ២០២៣ សិក្សាប្លង់លម្អិត និងសាងសង់ឲ្យរួចរាល់។

វឌ្ឍនភាពគម្រោងសាងសង់រោងចក្រប្រព្រឹត្តិកម្មទឹកស្អាត នៅក្រុងតាខ្មៅនេះត្រូវបានឡើង ក្នុងកិច្ចប្រចុះមួយនៅទីស្តីការក្រសួងលោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងអង្គការ JICA ដឹកនាំដោយលោកបណ្ឌិត Shigeyuki MATSUMOTO អគ្គនាយករង និងជានាយកក្រុមទទួលបន្ទុកនាយកដ្ឋានប្រភពធនធានទឹកសកល នៃអង្គការ JICA ជប៉ុន។

គោលបំណងនៃជំនួបពិភាក្សា គឺដើម្បីធ្វើសេចក្តីរាយការពីវឌ្ឍនភាព នៃការអនុវត្តគម្រោងការពង្រីកប្រព័ន្ធផ្គត់ផ្គង់ទឹកស្អាត នៅទីក្រុងតាខ្មៅ ខេត្តកណ្តល ក្រោមជំនួយឥតសំណងរបស់រាជរដ្ឋាភិបាលជប៉ុន។

ប្រព័ន្ធផលិតកម្មថ្មី ស្ថិតនៅទីតាំងរបស់រដ្ឋាករទឹកស្វយ័តក្រុងភ្នំពេញ នៅក្រុងតាខ្មៅ ស្ថានីយបូមទឹកឆៅពីទន្លេបាសាក់ មានសមត្ថភាពផលិត៣៣.០០០ម៉ែត្រត្រីគុណ ក្នុងមួយថ្ងៃ។ ប្រព័ន្ធប្រព្រឹត្តិកម្មសម្អាតទឹកមាន សមត្ថភាព ៣០.០០០ ម៉ែត្រត្រីគុណ ក្នុងមួយថ្ងៃ។ កាលបរិច្ឆេទអនុវត្តគម្រោងនឹងត្រូវបញ្ចប់នៅខែ កញ្ញា ឆ្នាំ២០២៣។

ក្រុមហ៊ុនសាងសង់ នឹងធ្វើការដេញថ្លៃជ្រើសរើសទៅតាមនីតិវិធី ក្រុមហ៊ុនគ្រប់គ្រងនិងដំណើរការ គឺក្រុមហ៊ុន SPC(Special Purpose Company) ជាក្រុមហ៊ុនជប៉ុននឹងត្រូវបង្កើតឡើងសម្រាប់គ្រប់គ្រង និងថែទាំព្រព័ន្ធផលិតកម្ម ក្នុងរយៈពេល១០ឆ្នាំ និងលក់ទឹកដុំជូនរដ្ឋាករទឹកស្វយ័តក្រុងភ្នំពេញ។

លោក Shigeyuki MATSUMOTO បានលើកឡើងពីវឌ្ឍភាព និងគោលដៅនៃការអនុវត្តគម្រោងរួមមានដូចជា បានបញ្ចប់ការសិក្សារៀបចំឯកសារ ស្នើសុំហិរញ្ញប្បទានឥតសំណងពីរាជរដ្ឋាភិបាលជប៉ុន-បានបញ្ចប់ការសិក្សាវាយតម្លៃ ផលប៉ះពាល់បរិស្ថាន ហើយគ្រោង នឹងប្រជុំឆ្លងចុងក្រោយជាមួយ បណ្តាស្ថាប័នពាក់ព័ន្ធនៅដើមខែធ្នូឆ្នាំ២០១៩ ខាងមុខនេះ។

លោកបណ្ឌិតបានបញ្ជាក់ថា នៅខែវិច្ឆិកា ឆ្នាំ២០១៩នេះ បានបញ្ចប់ការសិក្សាស្តីពីរបាយការណ៍រៀបចំគម្រោង-ខែមីនា ឆ្នាំ២០២០ កិច្ចព្រមព្រៀងផ្តល់ហិរញ្ញប្បទានឥតសំណងរបស់រាជរដ្ឋាភិបាលជប៉ុន សម្រាប់អនុវត្តន៍គម្រោង។ នៅខែ មេសា ឆ្នាំ២០២០ រៀបចំឯកសារដេញថ្លៃ។

លោកបន្ថែមថា “នៅខែសីហា ឆ្នាំ២០២០ ដល់ខែកុម្ភៈឆ្នាំ២០២១ ការដេញថ្លៃជ្រើសរើសក្រុមហ៊ុនសាងសង់នៅជប៉ុន។ នៅខែមីនា ឆ្នាំ២០២១ ចុះកិច្ចសន្យាជាមួយក្រុមហ៊ុនដែលឈរឈ្មោះការដេញថ្លៃ។ ពីខែមេសា ឆ្នាំ២០២១ ដល់ខែកញ្ញា ឆ្នាំ២០២៣ សិក្សាប្លង់លម្អិត និងសាងសង់ឲ្យរួចរាល់”៕

ក្រុមហ៊ុនកាហ្វេលំដាប់អន្តរជាតិ Starbucks ចាប់ផ្តើមវាយឡុកទីផ្សារក្រុងព្រះសីហនុ

ដោយៈ រ៉ាណេត

ព្រះសីហនុៈ នៅព្រឹកថ្ងៃទី២២ខែវិច្ឆិកា ឆ្នាំ២០១៩នេះ ក្រុមហ៊ុនកាហ្វេដ៏ល្បីឈ្មោះលំដាប់អន្តរជាតិ Starbucks ចាប់ផ្តើមបើកសម្ពោធលក់បម្រើអតិថិជន នៅក្រុងពាណិជ្ជកម្មព្រះសីហនុជាលើកដំបូងហើយ។

ស្ថិតនៅលើទីតាំងដ៏ល្អនៃផ្សារទំនើបដ៏ធំ និងលើកដំបូងគេបង្អស់នៅក្រុងព្រះសីហនុ FURI Times Square ក្រុមហ៊ុនការហ្វេល្បីឈ្មោះលំដាប់ពិភពលោក Starbucks ចាប់ផ្តើមបើកទ្វារសម្ពោធការលក់របស់ខ្លួន ជាមួយនឹងគម្រោងពង្រីកសាខារបស់ខ្លួន នៅក្នុងក្រុងពាណិជ្ជកម្មមួយនេះថែមទៀតផង។

នៅក្នុងឱកាសនៃការចាប់ផ្តើមលក់ ជាលើកដំបូងនៅពេលនេះ Starbucks ក៏បាននាំមកជូននូវកម្មវិធីពិសេសសម្រាប់អតិថិជនរបស់ខ្លួន ជាមួយនឹងការទិញកាហ្វេគ្រប់រស់ជាតិចំនួនមួយកែវ និងទទួលបានការបន្ថែមជូននូវកែវទឹកដ៏ស្រស់ចំនួនមួយភ្លាមៗ ដែលកម្មវិធីដ៏ពិសេសមួយនេះ នឹងផ្តល់ជូនសម្រាប់តែអតិថិជនចំនួន២០០នាក់ដំបូង តែប៉ុណ្ណោះ។

លោកប៉ោ លីម តំណាងក្រុមហ៊ុនកាហ្វេ Starbucks បានឱ្យដឹងតាមទូរស័ព្ទថា “ការពង្រីកខ្លួនទៅកាន់ក្រុងព្រះសីហនុ ដែលជាគោលដៅទី៣នេះ ដោយសារខេត្តព្រះសីហនុក្នុងរយៈពេល៣ឆ្នាំកន្លងមកនេះ មានសក្តានុពលក្នុងការវិនិយោគ”។ លោកបន្តថា “បន្ថែមពីនេះ វិស័យអចលនទ្រព្យនៅក្នុងខេត្តជាប់សមុទ្រមួយនេះ មានអគារសំណង់មានសន្ទុះរីកចម្រើនយ៉ាងកំហុក ជាពិសេសមានផ្សារទំនើប Furi Times Squares ដែលគ្រោងនឹងបើកដំណើរជាផ្លូវការដំបូងនៅក្នុងខេត្តនេះ គឺជាពេលវេលាដ៏ត្រឹមត្រូវមួយសម្រាប់ Starbucks ក្នុងការបន្តពង្រីកខ្លួនទៅកាន់ទីនោះ”។

លោកបានបន្ថែមទៀតថា ផ្សារទំនើប Furi Times Squares ស្ថិតនៅទីតាំងល្អ និងស្ថិតនៅតាមបណ្តោយផ្លូវដ៏សំខាន់ នៅក្នុងកណ្តាលក្រុងព្រះសីហនុ ដូច្នេះ Starbucks និងទទួលបានជោគជ័យ និងមានការគាំទ្រច្រើន។ លោកបន្តថា ផ្សារនេះមិនត្រឹមតែស្ថិតនៅទីតាំងល្អនោះទេ តែមានការរៀបចំឌីសាញដ៏ទាក់ទាញ មានការរៀបចំប្រព័ន្ឋនៃការលក់យ៉ាងល្អប្រសើរ ដែលផ្តល់នូវអំណាចនៃការទាក់ទាញអតិថិជនយ៉ាងច្រើន នាពេលអនាគត។

នៅចុងឆ្នាំនេះ Starbucks នឹងបន្តពង្រីកខ្លួនបានឱ្យបាន២០ទីតាំង នៅទូទាំងប្រទេស។

ជាមួយនឹងការបង្ហាញវត្តមានរបស់ក្រុមហ៊ុនកាហ្វេ លំដាប់អន្តរជាតិ Starbucks នៅពេលនេះ ក៏មានបណ្តាក្រុមហ៊ុនលក់សម្ភារៈប្រើប្រាស់ ដែលមានម៉ាកសញ្ញាល្បីៗលំដាប់អន្តរជាតិជាច្រើនទៀត ចូលមកបង្ហាញខ្លួននៅក្នុងផ្សារទំនើបមួយនេះផងដែរ ដែលក្នុងនោះរួមមានដូចជាក្រុមហ៊ុន KFC ហាងអាហារBee Chheng Hiang ក្រុមហ៊ុន Amazone Café ក្រុមហ៊ុន KOI ក្រុមហ៊ុន Dakasi Tea, Pizza Company ក្រុមហ៊ុនលក់សម្លៀកបំពាក់ LEVI’s , ក្រុមហ៊ុន NIKE , ក្រុមហ៊ុន Samsonite, ក្រុមហ៊ុននាឡិកាដ៏ល្បីឈ្មោះ G-Shock, ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត។

លោក នង ឌីណារ៉ា ប្រធានការិយាល័យទំនាក់ទំនងសាធារណៈ និងពិធីការនៃរដ្ឋបាលខេត្តព្រះសីហនុ បានបង្ហាញពីក្ដីសាទរ ចំពោះវត្តមានក្រុមហ៊ុនលក់ផលិតផល ចំណីអាហារ និងសម្ភារៈប្រើប្រាស់ ដែលមានម៉ាកល្បីៗលំដាប់អន្តរជាតិ នៅក្នុងផ្សារទំនើប FURI Times Square ដែលទើបតែមានជាលើកដំបូងនៅក្នុងក្រុងព្រះសីហនុ។

លោកបានបញ្ជាក់ថា “វត្តមានក្រុមហ៊ុនអន្តរជាតិ និងផ្សារទំនើបមួយនេះ គឺជាការបង្ហាញពីការអភិវឌ្ឍ និងភាពរីកចម្រើនរបស់ក្រុងព្រះសីហនុ ខណៈដែលកម្រិតជីវភាពប្រជាជនកាន់តែមានភាពធូរធា ដោយចំណូលរបស់មនុស្សម្នាក់ក្នុងមួយឆ្នាំនៅខេត្តនេះមានទឹកប្រាក់ ៣៧២៦ដុល្លារ ហើយកំណើនសេដ្ឋកិច្ចមានប្រមាណ ១០,៣ភាគរយ”។

លោកបានបន្តទៀតថា នៅក្នុងក្រុងព្រះសីហនុកាលពីមុន មានត្រឹមតែជាផ្សារទំនើបខ្នាតតូចដែលវិនិយោគដោយជនជាតិចិន និងលក់ទំនិញតែប៉ុណ្ណោះ ប៉ុន្តែឥឡូវនេះ FURI Times Square បាននាំមកនូវបទពិសោធន៍ថ្មីក្នុងនាមជាផ្សារទំនើប ដែលមានលក់ទំនិញ ចំណីអាហារ សម្ភារៈប្រើប្រាស់គ្រប់ប្រភេទ ជាពិសេសជាតំបន់កម្សាន្ត សម្រាប់ប្រជាពលរដ្ឋក្នុងតំបន់ ដែលកាន់តែជួយលើកមុខមាត់ក្រុងព្រះសីហនុផងដែរ៕

ខណ្ឌថ្មីៗចំនួន៣កំពុងក្លាយជាខណ្ឌពាណិជ្ជកម្មថ្មីនៃទីក្រុងភ្នំពេញ

ដោយ វុត្ថា

ភ្នំពេញៈ ដោយសារកំនើនប្រជាសាស្រ្ត ការវិនិយោគហេដ្ឋារចនាសម្ព័ន្ឋ និងកំនើនសេដ្ឋកិច្ច បានធ្វើឲ្យរាជធានីភ្នំពេញរីកចម្រើនយ៉ាងឆាប់រហ័ស ហើយខណ្ឌថ្មីៗចំនួន៣បាននិងកំពុងក្លាយជាតំបន់អភិវឌ្ឍន៍ពាណិជ្ជកម្មថ្មី (CBD) នៅរាជធានីភ្នំពេញ។

លោក ឃាង ពុទ្ធី ប្រធានសមាគមអ្នកជំនាញអចលនទ្រព្យកម្ពុជាបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី២១ ខែវិច្ឆិកា ឆ្នាំ ២០១៩ នេះ ឱ្យដឹងថា មកដល់ពេលបច្ចុប្បន្ននេះ មានខណ្ឌមួយចំនួនដូចជាខណ្ឌ ចំការមន ខណ្ឌបឹងកេងកង ខណ្ឌទួលគោក និងខណ្ឌដូនពេញ បានក្លាយទៅជាតំបន់ពាណិជ្ជកម្ម ដោយមានទាំងហេដ្ឋារចនាសម្ព័ន្ធ និងអគារខ្ពស់ៗជាច្រើនរីកដុះដាល់កាន់តែច្រើន។

លោកបន្តថា ក្រៅពីនេះក៏មានខណ្ឌមួយចំនួនទៀត នៃទីក្រុងភ្នំពេញក៏បាននិងកំពុងប្រែក្លាយទៅជាតំបន់សេដ្ឋកិច្ចពាណិជ្ជកម្មផងដែរ ដែលរួមមានខណ្ឌមានជ័យ (តំបន់៦០ម៉ែត្រ) ខណ្ឌជ្រោយចង្វា និងសែនសុខជាដើម ព្រោះខណ្ឌទំាងនេះ បាននឹងកំពុងមានការរីកចំរើនយ៉ាងលឿនទាំង ហេដ្ឋារចនាសម្ព័ន្ធ សំណង់អគារ និងមជ្ឈមណ្ឌលពាណិជ្ជកម្មយ៉ាងច្រើន។

លោកឃាង ពុទ្ធី បន្ថែមថា សេដ្ឋកិច្ចរបស់ប្រទេសកម្ពុជាបានរីកចំរើនក្នុងរង្វង់៧ ភាគរយជាច្រើនឆ្នាំមកនេះ បានជំរុញឱ្យទីក្រុងភ្នំពេញ មានហេដ្ឋារចនាសម្ព័ន្ធកាន់តែរីកធំ ដែលទាមទាឱ្យរដ្ឋាភិបាល ឬអាជ្ញាធរពាក់ព័ន្ធបន្តពង្រឹងការកសាងហេដ្ឋារចនាសម្ព័ន្ធឱ្យកាន់តែល្អប្រសើរបន្ថែមទៀត ដើម្បីឆ្លើយតបទៅនឹងកំណើនអគារពាណិជ្ជកម្ម និងសេដ្ឋកិច្ចរបស់ប្រទេស។

លោកបន្តថា “នៅពេលមានអគារពាណិជ្ជកម្ម (Commercial Buildings) រីកដុះដាល់កាន់តែច្រើន នៅក្នុងខណ្ឌដែលមានសេដ្ឋកិច្ចរីកចំរើនទំាងនោះ ក៏ត្រូវការសម្ភារៈបង្កាអគ្គីភ័យផងដែរ និងពិនិត្យមើលគុណភាពសំណង់ ឱ្យបានគ្រប់ ជ្រុងជ្រោយជៀសវាងហានីភ័យណាមួយកើតឡើងជាយថាហេតុ”។

ជាមួយគ្នានេះដែរ តម្លៃអចលនទ្រព្យនៅក្នុងតំបន់សេដ្ឋកិច្ចរីកចំរើនទាំងនេះ ក៏មានតម្លៃខ្ពស់ផងដែរ បើធៀបជាមួយនឹងបណ្តាខណ្ឌផ្សេងទៀត នៅក្នុងរាជធានីភ្នំពេញ ហើយពីមួយឆ្នាំទៅមួយឆ្នាំ តម្លៃអចលនទ្រព្យនៅក្នុងតំបន់ទាំងនេះ បន្តកើនឡើងជាលំដាប់អាស្រ័យទៅលើទំហំ និងទីតាំងជាក់ស្តែង។

នៅក្នុងរាជធានីភ្នំពញមានខណ្ឌសរុប ចំនួន១៤ដែលរួមមាន ខណ្ឌព្រែកព្នៅ ខណ្ឌជ្រោយចង្វារ ខណ្ឌសែនសុខ ខណ្ឌមានជ័យ ខណ្ឌឬស្សីកែវ ខណ្ឌ៧មករា ខណ្ឌច្បារអំពៅ ខណ្ឌទួលគោក ខណ្ឌដូនពេញ ខណ្ឌចំការមន ខណ្ឌពោធិ៍សែនជ័យ ខណ្ឌដង្កោ ខ័ណ្ឌបឹងកេងកង និងខ័ណ្ឌកំបូល។

សម្តេតេជោ ហ៊ុន សែន នាយករដ្ឋមន្ត្រីនៃកម្ពុជាបានឱ្យដឹងក្នុងពិធីសម្ពោធ «អគារឥន្ទ្រទេវី» របស់រាជបណ្ឌិត្យសភាកម្ពុជា នៅក្នុងរាជធានីភ្នំពេញ កាលពីថ្ងៃទី២១ ខែវិច្ឆិកាថា រាជធានីភ្នំពេញនាពេលបច្ចុប្បន្ននេះ មានការរីកចំរើនលើគ្រប់វិស័យទាំងវិស័យហេដ្ឋរចនាសម្ព័ន្ធ សំណង់អគារ សំណង់អគារខ្ពស់ៗ ការពង្រីកផ្ទៃដី ជាដើម មិនដូចកាលពីពេលកន្លងមកនោះទេ។

សម្តេចថា “ចឹងបានជានៅទីក្រុងភ្នំពេញបច្ចុប្បន្ន យើងពិនិត្យមើលអំពីការរីកលូតលាស់នៅទីក្រុងភ្នំពេញ។ ភ្នំពេញកាលពីសម័យមុន ដែលយើងចូលមកគ្រប់គ្រង គឺភ្នំពេញតែជាង៣០០គីឡូម៉ែត្រការ៉េទេ ប៉ុន្តែឥឡូវឡើងទៅដល់ជាង៦០០ គីឡូម៉ែត្រការ៉េ”៕