ដោយ ប៊ី
ព្រះសីហនុៈ សណ្ឋាគារ និង មណ្ឌលកំសាន្តឌុនហ័ង បានបើកឱ្យដំណើរការជាផ្លូវការនៅខេត្តព្រះសីហនុ ខណៈចំនួនភ្ញៀវទេសចរមានកំណើនជិត១១ភាគរយ ក្នុងរយៈពេល១០ខែឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។
ពិធីសម្ពោធសណ្ឋាគារ និងមណ្ឌលកំសាន្ត ឌុនហ័ងត្រូវបានធ្វើឡើងក្រោមអធិបតីភាព លោកជំទាវម៉ែន សំអន ឧបនាយករដ្ឋមន្រ្ដី រដ្ឋមន្រ្ដីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចនៅ ក្រុងព្រះសីហនុ ខេត្ដព្រះសីហនុនៅថ្ងៃទី១៧ ខែវិច្ឆិកា ឆ្នាំ២០១៩កន្លងមកនេះ។
ថ្លែងក្នុងឱកាសនោះ លោកជំទាវបានមានប្រសាសន៍ថា សណ្ឋាគារ និងមណ្ឌលកំសាន្ត ដ៏ល្អប្រណិតនេះ ពិតជាសមិទ្ធផលថ្មីមួយទៀត របស់ខេត្តព្រះសីហនុ ដែលជាខេត្ដភាគនីរតី នៃប្រទេសកម្ពុជា ពោរពេញទៅដោយសក្តានុពលយ៉ាងខ្លាំង ផ្នែកពាណិជ្ជកម្ម ឧស្សាហកម្ម និងទេសចរណ៍។
លោកជំទាវបានបន្តទៀតថា ក្រោមការដឹកនាំប្រកបដោយកត្ដិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បច្ចុប្បន្ននេះប្រទេសកម្ពុជាទទួលបាននូវស្ថិរភាពនយោបាយ សន្ដិសុខ និងសន្តិភាព និងការអភិវឌ្ឍន៍លើគ្រប់វិស័យ។ សមិទ្ធិផលថ្មីថ្ងៃនេះ បានចូលរួមចំណែកយ៉ាងសំខាន់ ក្នុងការអភិវឌ្ឍន៍ខេត្ត ស្របពេលដែលខេត្តព្រះសីហនុ បានសម្ពោធបើកការដ្ឋានសាងសង់ផ្លូវ៣៤ខ្សែ ក្រោមអធិបតីភាពសម្តេចតេជោ ដែលជាការចាប់ផ្តើមបើកនូវទំព័រសករាជថ្មីនៃ វិស័យហេដ្ឋារចនាសម្ព័ន្ធនៅកម្ពុជា ហើយក្រុងព្រះសីហនុនឹងប្រែមុខមាត់ថ្មី ក្លាយទៅជាទីក្រុងពហុបំណងមានសុវត្ថិភាព ដែលទាក់ទាញភ្ញៀវទេសចរ និងអ្នកវិនិយោគ តាមរយៈផ្លូវថ្នល់ធំ ស្អាតទូលាយ រួមជាមួយនឹងអាគារខ្ពស់ៗរាប់ពាន់ ដែលបានកើតឡើងព្រមៗគ្នាផងដែរ។
លោកគួច ចំរើន អភិបាលនៃគណៈអភិបាលខេត្តព្រះសីហនុបានថ្លែងថា ខេត្តព្រះសីហនុជាតំបន់ប៉ូលអភិវឌ្ឍជាតិមួយដ៏សំខាន់ នៅតំបន់ឆ្នេរសមុទ្រកម្ពុជា និងជាខេត្តដែលមានសក្តានុពល សេដ្ឋកិច្ចខ្ពស់ក្នុងការទាក់ទាញវិនិយោគិន និងភ្ញៀវទេសចរណ៍ជាមួយនឹងការកំសាន្តតាមឆ្នេរសមុទ្រ និងកោះដ៏ស្រស់ស្អាត កំពង់ផែអន្តជាតិ អាកាសយានដ្ឋានអន្តជាតិ និងធនធានធម្មជាតិដ៏សំបូរបែប និងត្រូវបានប្រសិទ្ធនាមជា “តារារៈនាទិសនិរតី” ជាមួយនឹងសន្ទុះនៃការអភិវឌ្ឍដ៏ខ្លាំងក្លា និងប្រកបដោយចីរភាព ជាពិសេសការវិនិយោគលើវិស័យអចលនទ្រព្យ រួមមានមជ្ឈមណ្ឌលពាណិជ្ជកម្ម អគារស្នាក់នៅរួម សណ្ឋាគារ មណ្ឌលកំសាន្ត ។ល។ ដែលបង្ហាញអំពីវប្បធម៌ និងបំរើដល់វិស័យទេសចរណ៍ និងធុរកិច្ច។
លោកបានថ្លែងថា ក្នុងរយៈពេល១០ខែ ឆ្នាំ២០១៩ ខេត្តទទួលបានភ្ញៀវទេសចរណ៍សរុបចំនួន ១,៩៤០,១៩៩នាក់ កើនឡើង១០.៦២ភាគរយ ក្នុងនោះភ្ញៀវជាតិជាង១,២លាននាក់ និងភ្ញៀវអន្តរជាតិ ៧៣១,៦៧៥នាក់។ មូលដ្ឋានអាជីវកម្ម សេវាកម្មទេសចរណ៍ គិតត្រឹមខែតុលា ឆ្នាំ២០១៩ មានចំនួនសរុប ៨៨០កន្លែង ក្នុងនោះសណ្ឋាគារ១០៨កន្លែង ស្មើនឹង៧,១៦២បន្ទប់ ផ្ទះសំណាក់២៣៧កន្លែង ស្មើនឹង២,៩៣៦បន្ទប់ បឹងហ្គាឡូចំនួន៣១កន្លែង ស្មើនឹង៤៣១បន្ទប់ ភោជនីយដ្ឋាន៣១៣កន្លែង ស្មើនឹង១៣,៨៣៣តុ និងសេវាកម្មផ្សេងៗជាច្រើនទៀត។
ចំណែកវិស័យសំណង់ ក៏មានការអភិវឌ្ឍរីកចម្រើនយ៉ាងគំហុកគួរឱ្យកត់សំគាល់ ក្នុងនោះទិន្នន័យសំណង់ គិតចាប់ពីឆ្នាំ២០១៧ ដល់ខែវិចិ្ឆកា ឆ្នាំ២០១៩ មានចំនួន ១,០៧៦គម្រោង អគារកម្ពស់ចាប់ពី៥ជាន់ ដល់៤៥ជាន់ មានចំនួន៨០១គម្រោង៕
