បណ្តាញសង្គម Twitter នឹងហាមឃាត់ពាណិជ្ជកម្មនយោបាយ ខណៈ Facebook នៅរក្សាស្ថានភាពដដែល

ដោយ Donald Lee

ភ្នំពេញៈ អង្គការ និងប្រជាជន នឹងមិនអាចជម្រុញការផ្សព្វផ្សាយនយោបាយរបស់ពួកគេនៅលើបណ្តាញសង្គម Twitter។ នេះបើយោងតាមសេចក្តីប្រកាសមួយ ដែលបានបង្កើតឡើងដោយស្ថាបនិក Twitter លោក Jack Dorsey។

លោក Dorsey បាននិយាយក្នុងបណ្តាញសង្គម Twitter ថា “សារនយោបាយអាចរកបានចំនួនអ្នកចូលមើលច្រើន នៅពេលមនុស្សសម្រេចចិត្តតាមដានគណនី។ ការចំណាយ ដើម្បីទទួលបានចំនួន Reach ដកចេញ ដោយធ្វើឱ្យសារនយោបាយ Reach ដល់ ប្រជាជន”។ លោកបន្ថែមថា “យើងជឿជាក់ថា ការសម្រេចចិត្តនេះ មិនគួរត្រូវបានសម្របសម្រួលដោយលុយទេ”។

លោកបានបន្ថែមថា “ខណៈការផ្សាយពាណិជ្ជកម្មតាម Internet មានឥទ្ធិពលខ្លាំង និងមានប្រសិទ្ធភាពបំផុត សម្រាប់អ្នកផ្សាយពាណិជ្ជកម្ម នាំមកនូវហានិភ័យយ៉ាងធំធេងដល់នយោបាយ ដែលវាអាចត្រូវបានប្រើ ដើម្បីជះឥទ្ធិពលលើការបោះឆ្នោតដោយជះឥទ្ធិពលដល់ជីវិតមនុស្សរាប់លាននាក់”។

ការហាមឃាត់ការផ្សាយពាណិជ្ជកម្ម នឹងចូលជាធរមាននៅថ្ងៃទី ២២ ខែ វិច្ឆិកា។

វេទិកាប្រព័ន្ធផ្សព្វផ្សាយសង្គមដែលមានអាយុ១៣ឆ្នាំ មានអ្នកប្រើប្រាស់សកម្មជាង ៣០០លាននាក់ និងមានតម្លៃជាង១០ពាន់លានដុល្លារ ហើយបានក្លាយជាវេទិកាទំនាក់ទំនងព័ត៌មានពិតរបស់ប្រធានាធិបតី Donald Trump។

ការសម្រេចចិត្តរបស់ Twitter ធ្វើឡើងផ្ទុយពីការសំរេចចិត្តរបស់ Facebook ក្នុងការរក្សានូវសមត្ថភាពសម្រាប់អង្គការ ឬប្រជាជន ក្នុងការបង់ប្រាក់សម្រាប់ការផ្សាយពាណិជ្ជកម្មនយោបាយ និងជំរុញដល់ការផ្សព្វផ្សាយ។

និយោជិករាប់រយនាក់ នៃក្រុមហ៊ុនប្រព័ន្ធផ្សព្វផ្សាយសង្គមយក្សមួយនេះ បានចុះហត្ថលេខាលើលិខិតថ្កោលទោស ចំពោះការសម្រេចចិត្តរបស់លោក Mark Zuckerberg ក្នុងការរក្សាស្ថានភាពដដែល នៅលើការផ្សាយពាណិជ្ជកម្មនយោបាយ ទោះបីជាវាត្រូវបានបង្ហាញថា ពួកគេយល់ច្រឡំ និងមិនពិតក៏ដោយ។

បុគ្គលិកទាំងនោះបានសរសេរនៅក្នុងលិខិតបានឆ្លើយតបថា “ការបញ្ចេញមតិដោយសេរី និងសុន្ទរកថា ដោយគិតថ្លៃមិនមែនជារឿងតែមួយទេ។ ព័ត៌មានមិនពិតជះឥទ្ធិពលដល់យើងទាំងអស់គ្នា”។

លិខិតនោះបានបន្ថែមទៀតថា “យើងសូមជំទាស់យ៉ាងខ្លាំង ចំពោះគោលនយោបាយនេះ។ វាមិនការពារសំលេងប្រជាជនទេ ប៉ុន្តែផ្ទុយទៅវិញអនុញ្ញាតឱ្យអ្នកនយោបាយយកវេទិការនេះ ធ្វើអាវុធយុទ្ធនាការណ៍ដោយកំណត់គោលដៅលើប្រជាជន ដែលជឿថា មាតិកា ដែលបានបង្ហាញដោយអ្នកនយោបាយគឺគួរឱ្យទុកចិត្ត”៕

រដ្ឋាភិបាលអនុម័តគម្រោងវិនិយោគចំនួន២ មានតម្លៃជាង ៦ លានដុល្លារនៅភ្នំពេញ និងកំពង់់ស្ពឺ

ដោយ វុត្ថា

ភ្នំពេញ៖ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងបង្កើតរោងចក្រកាត់ដេរចំនួន ២ ដែលមានតម្លៃប្រមាណ ៦,២ លានដុល្លារអាមេរិក នៅទីក្រុងភ្នំពេញ និងខេត្តកំពង់ស្ពឺ។

យោងតាមការផ្សព្វផ្សាយរបស់ក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី ៣១ តុលា ឆ្នាំ ២០១៩ នេះ បានឱ្យដឹងថាតាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១- “SUNRISE FASHION (CAMBODIA) CO., LTD”គម្រោងបង្កើតរោងចក្រកាត់ដេរសម្លៀកបំពាក់ ស្រោមខ្នើយ និងស្រោមពូក ដែលមានទីតាំងវិនិយោគស្ថិតនៅផ្លូវជាតិលេខ៣ ភូមិពោធិ៍អង្គ្រង ស្រុកបរសេដ្ឋ ខេត្តកំពង់ស្ពឺ មានទុនវិនិយោគប្រមាណ ៣,៥លានដុល្លារអាមេរិក និងអាចបង្កើតការងារបានចំនួន ១.២៥៥កន្លែង។

២- “YONG LI HUA DEVELOPMENT CO., LTD” គម្រោងបង្កើតរោងចក្រកាត់ដេរសម្លៀកបំពាក់ ស្រោមដៃ មួក និងកាបូបយួរដៃ ដែលមានទីតាំងវិនិយោគស្ថិតនៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២,៧លានដុល្លារអាមេរិក និងអាចបង្កើតការងារបានចំនួន ៨២៨កន្លែង៕

ធនាគារធំៗពីរសហការគ្នាដើម្បីលើកកម្ពស់អាជីវកម្មនៅកម្ពុជា ម៉ាឡេស៊ី និងចិន

ដោយ ប៊ី

ភ្នំពេញ៖ ធនាគារកម្ពុជាសាធារណៈភីអិលស៊ី (ខេមបូធនាគារ) ដែលជាក្រុមហ៊ុនបុត្រសម្ព័ន្ធរបស់ធនាគារ Public Bank Bhd បានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយធនាគារ China Construction Bank (CCBM) (ម៉ាឡេស៊ី) ដើម្បីរួមគ្នាលើកកម្ពស់ និងអភិវឌ្ឍឱកាសអាជីវកម្មរវាងធនាគារទាំងពីរសម្រាប់អតិថិជនរបស់ពួកគេនៅកម្ពុជា ម៉ាឡេស៊ី និងចិន។

ការចុះហត្ថលេខាលើអនុស្សារណៈយោគយល់នេះតំណាងឱ្យការពង្រីកកិច្ចសហប្រតិបត្តិការអាជីវកម្មរវាងធនាគារសាធារណៈ និងធនាគារ China Construction Bank ដែលបានចាប់ផ្តើមតាំងពីឆ្នាំ ២០១៦ សម្រាប់ការប្រតិបត្តិការហិរញ្ញប្បទានឆ្លងព្រំដែន ការប្រឹក្សាហិរញ្ញវត្ថុការផ្ទេរប្រាក់ និងការវាយតម្លៃឥណទានអតិថិជន។

លោក Tan Sri Tay Ah Lek នាយកគ្រប់គ្រងធនាគារសាធារណៈ បានថ្លែងនៅក្នុងសេចក្តីថ្លែងការណ៍មួយនៅថ្ងៃនេះ ថា “ការចុះហត្ថលេខាលើអនុស្សារណៈនៃការយោគយល់គ្នានេះធ្វើឡើងចំពេលដែលប្រទេសកម្ពុជាកំពុងមានការរីកចម្រើនយ៉ាងឆាប់រហ័សជាមួយនឹងផលិតផលក្នុងស្រុកសរុបថេរ ៧ ភាគរយក្នុងរយៈពេល ៥ ឆ្នាំកន្លងមកនេះជាមួយនឹងការហូរចូលយ៉ាងខ្លាំងនៃវិនិយោគិនមកពីប្រទេសចិន”។

លោក បន្តថា “ធនាគារសាធារណៈ និងធនាគារ CCB អាចផ្តល់អានុភាពលើគ្នាទៅវិញទៅមកដើម្បីជំរុញអាជីវកម្មរបស់យើងឱ្យឈានដល់ចំណុចខ្ពស់”។

ធនាគារ Campu Bank ដែលបង្កើតឡើងក្នុងឆ្នាំ ១៩៩២ បច្ចុប្បន្នមាន ៣១ សាខានៅកម្ពុជា។ធនាគារ CCBM គឺជាក្រុមហ៊ុនបុត្រសម្ព័ន្ធដែលកាន់កាប់ទាំងស្រុងនូវលំដាប់លេខ ១ នៃធនាគារ China Construction Bank Corp ដែលជាធនាគារធំលំដាប់ទី ២ នៅលើពិភពលោកគិតពីទ្រព្យសម្បត្តិសរុប៕ (ប្រភព The Sun Daily)

ឧបនាយករដ្ឋមន្ត្រី ជា សុផារ៉ា ចែកវិញ្ញាបនបត្រសម្គាល់ម្ចាស់អចលនវត្ថុជូនសម្បទានិកចំនួន៤០០គ្រួសារនៅខេត្តកំពង់ស្ពឺ

ដោយ វុត្ថា

កំពង់់ស្ពឺៈ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចុះចែកវិញ្ញាបនបត្រសម្គាល់ម្ចាស់ អចលនវត្ថុជូនសម្បទានិកចំនួន៤០០គ្រួសារ និងសម្ពោធសមិទ្ធផលនានា នៅក្នុងទីតាំងសម្បទានដីសង្គមកិច្ចរបស់គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហ៊ាន២ (LASED II) ដែលស្ថិតនៅក្នុងឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ។

អភិបាលខេត្តកំពង់ស្ពឺលោក វ៉ី សំណាងបានមានប្រសាសន៍ឱ្យដឹងនៅក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុនាថ្ងៃទី៣១ ខែតុលាឆ្នាំ ២០១៩នេះថា គម្រោងបែងចែកដីដើម្បីសង្គមកិច្ច និងការអភិវឌ្ឍជំហាន២ LASED II គឺជាគម្រោងមួយគាំទ្រដល់ការប្រតិបត្តិកម្មវិធីសម្បទានដីសង្គមកិច្ច របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការចែកជូនដីដល់អ្នកគ្មានដី និងអ្នកក្រីក្រតាមរយៈដីសម្បទានសង្គមកិច្ច ដើម្បីលើកកម្ពស់ការចិញ្ចឹមជីវិតរបស់គ្រួសារក្រីក្រ និងជនងាយរងគ្រោះ។

លោកបន្តថា គម្រោងគឺមានគោលបំណង ដើម្បីបែងចែកដីធ្លីរបស់រដ្ឋ ដែលមានលក្ខណៈសមស្រប សម្រាប់ការរស់នៅរបស់ប្រជាពលរដ្ឋ ដើម្បីប្រកបរបកសិកម្ម ការចិញ្ចឹមសត្វ ការទទួលបាននូវសេវាសាធារណ: និងហេដ្ឋារចនាសម្ព័ន្ធក្នុងសហគមន៍ បង្កើនផលិតភាព ជាមួយនឹងការផ្តល់សេវាកម្មគាំទ្រសមស្រប មួយចំនួនដល់គ្រួសារដែលមានដីធ្លីតិចតួច និងគ្មានដីធ្លីសោះ។

លោកអភិបាលខេត្តរូបនេះបន្តទៀតថា គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ បានទទួលហិរញ្ញប្បទានពីធនាគារពិភពលោក ដែលមានរយៈពេល ៥ឆ្នាំ ចាប់ពីខែសីហា ឆ្នាំ២០១៦ ដល់ ខែធ្នូ ឆ្នាំ២០២១ ថវិកាសរុប២៦,៨៦ លានដុល្លារសហរដ្ឋអាមេរិក ក្នុងនោះថវិកាបដិភាគរបស់រាជរដ្ឋាភិបាលកម្ពុជា មានចំនួន១,៨០លានដុល្លារសហរដ្ឋអាមេរិក។

ខេត្តគោលដៅជាអាទិភាពចំនួន៥ ត្រូវបានជ្រើសរើសសម្រាប់អនុវត្តន៍ គម្រោងឡាសិត២ នេះ រួមមាន ខេត្តកំពង់ស្ពឺ, ខេត្តកំពង់ឆ្នាំង, ខេត្តកំពង់ធំ, ខេត្តត្បូងឃ្មុំ និងខេត្តក្រចេះ ហើយខេត្តកំពង់ស្ពឺគឺជាខេត្តគោលដៅមួយ ក្នុងចំណោមខេត្តទាំង៥ ដែលត្រូវបានជ្រើសរើសសម្រាប់អនុវត្តផងដែរ។

ដីសម្បទានសង្គមកិច្ច ដែលត្រូវបានស្នើរសុំធ្វើអនុប្រយោគជាដីឯកជនរបស់រដ្ឋ តាមអនុក្រិតលេខ២០១អនក្រ.បក ចុះថ្ងៃទី៥ ខែកញ្ញា ឆ្នាំ២០១១ ដោយកាត់ចេញពីគម្របព្រៃឈើឆ្នាំ ២០០២ គ្របដណ្តប់លើផ្ទៃដីសរុប ១,១២០ ហត ដែលមានចំនួន ០២ ទីតាំង ក្នុងនោះទីតាំងទី១ ស្ថិតនៅក្នុងឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ មានផ្ទៃដីសរុបចំនួន ៣៣០ ហត សម្រាប់ចែកជូនដល់អតីតកងកម្លាំងប្រដាប់អាវុធ និងគ្រួសារ និងទីតាំងទី ២ ស្ថិតនៅឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ មានផ្ទៃដីសរុបចំនួន៧៩០ ហត សម្រាប់ចែកជូនប្រជាពលរដ្ឋក្រីក្រស៊ីវិលទូទៅចំនួន ៤០០ គ្រួសារ ដែលបច្ចុប្បន្ននេះបាននឹងកំពុងអនុវត្តដោយគម្រោងឡាសិត២។

ឧបនាយករដ្ឋមន្ត្រី ជា សុផារ៉ា បានកោតសរសើរចំពោះអាជ្ញាធរខេត្ត កំពង់ស្ពឺដែលបានខិតខំថែរក្សាដីរបស់រដ្ឋបានត្រឹមត្រូវ ដើម្បីទុកចែកជូនប្រជាពលរដ្ឋក្រីក្រ និងមានតម្រូវការពិតប្រាកដ។ លោកបានកោតសរសើរផងដែរ ចំពោះមន្ត្រីគ្រប់លំដាប់ថ្នាក់ ដែលបានរួមចំណែកអនុវត្តន៍ គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ជំហ៊ាន២ (LASED II) ឱ្យទទួលបានជោគជ័យរហូតមកដល់បច្ចុប្បន្ន ដោយមិនធ្លាប់មានបាតុភាពណាមួយកើតឡើង ដែលបង្ហាញអំពីការរើសអើង បក្សពួក ឬការចោទប្រកាន់ណាមួយពីប្រជាពលរដ្ឋឡើយ។

ទន្ទឹមនឹងនោះលោកជា សុផារ៉ា បានផ្តាំផ្ញើដល់សម្បទានិកដែលទទួលបានវិញ្ញាបនបត្រសម្គាល់ម្ចាស់អចលនវត្ថុនៅពេលនេះថា មិនត្រូវបញ្ចាំ ឬលក់ដូរដីនេះឡើយ ព្រោះវាជាអាយុជីវិតរបស់បងប្អូន ហើយឯកឧត្តមបានលើកទឹកចិត្ត ឱ្យប្រជាពលរដ្ឋព្យាយាមស្វែងរកប្រភពចំណូល និងបង្កបង្កើនផលបន្ថែមទៀត ដើម្បីដោះស្រាយបញ្ហានានាប្រសើរជាងយកដីទៅបញ្ចាំ ឬលក់៕

លោកបណ្ឌិត តាន់ មុនីវណ្ណ : អ្នកជំនួញនានាគួរតែចូលរួមជាមួយសមាគម ដើម្បីជំរុញអាជីវកម្មឱ្យរីកចម្រើន

ដោយៈ រ៉ាណេត

ភ្នំពេញៈ នៅក្នុងការប្រកបមុខជំនួញ កត្តាដែលសំខាន់បំផុត គឺកិច្ចទំនាក់ទំនង និងការទទួលបានព័ត៌មាននានាពាក់ព័ន្ធទៅនឹងតម្រូវការទីផ្សារ ពោលគឺមិនអាចធ្វើឡើងដោយឯកឯងនោះទេ ជាពិសេសទាមទាឱ្យមានការចូលរួមជាក្រុម ឬជាសមាគមអ្នកជំនួញដើម្បីអាចវាសស្ទង់លទ្ធភាព និងផ្លាស់ប្ដូរបទពិសោធន៍។

អនុប្រធានសភាពាណិជ្ជកម្មកម្ពុជា លោកបណ្ឌិត តាន់ មុនីវណ្ណ បានមានប្រសាសន៍ថា គ្រប់សមាគម ឬក្លឹបអាជីវកម្មនានា ដែលត្រូវបានបង្កើតឡើង គឺក្នុងគោលបំណងប្រមូលផ្តុំនូវម្ចាស់អាជីវកម្ម ក៏ដូចជាម្ចាស់ក្រុមហ៊ុននានា ដើម្បីបង្កើនកិច្ចទំនាក់ទំនង ផ្លាស់ប្ដូរបទពិសោធន៍ និងបំពេញនូវចន្លោះខ្វះខាតឱ្យគ្នាទៅវិញទៅមក ប្រយោជន៍អភិវ ; ឌ្ឍអាជីវកម្ម និងក្រុមហ៊ុនឱ្យមានភាពល្អប្រសើរ។

លោកបណ្ឌិតបានបន្តទៀតថា “វិស័យឯកជនត្រូវបានរដ្ឋាភិបាលយកចិត្តទុកដាក់ និងលើកទឹកចិត្តជាខ្លាំង ដោយជារៀងរាល់ឆ្នាំ តែងមានឱកាសចូលជួបពិភាក្សាជាមួយសម្តេចនាយករដ្ឋមន្ត្រី និងមានរដ្ឋមន្ត្រីចំនួន១៣ជាអ្នកសម្របសម្រួល និងជួយដោះស្រាយនូវរាល់បញ្ហានានា ដែលពាក់ព័ន្ធទៅនឹងកិច្ចដំណើរការអាជីវកម្មរបស់ពាណិជ្ជករ”។ លោកបានបន្តទៀតថា “ក្នុងនាមរូបខ្ញុំជាអនុប្រធានសភាពាណិជ្ជកម្មកម្ពុជា សូមជំរុញនិងលើកទឹកចិត្តដល់បណ្តាពាណិជ្ជករ គួរតែចូលរួមជាមួយសភាណិជ្ជកម្ម ដែលមានពាណិជ្ជករសមាជិកជាង៥ពាន់នាក់ ឬសមាគមអាជីវកម្មដទៃទៀត ដែលវាអាចជួយជាប្រយោជន៍យ៉ាងច្រើនដល់ការធ្វើជំនួញ”។

លោកតាន់ មុនីវណ្ណបានបញ្ជាក់ថា “យើងមិនអាចធ្វើអ្វីមួយតែម្នាក់ឯងបាននោះទេ ដូច្នេះការចូលរួមជាក្រុម ជាសមាគម គឺជាជម្រើសមួយដ៏ល្អ ដែលយើងគួរតែចូលរួមទាំងអស់គ្នា”។

ទិសដៅនៃការចូលរួមនៅក្នុងសមាគម មានប្រយោជន៍ធំៗចំនួន២ ទី១ ការធ្វើកិច្ចទំនាក់ទំនង។ ទី២ បានចូលរួមចំណែកនៅក្នុងការទទួលបានចំណេះដឹង ទទួលបានព័ត៌មានថ្មីៗ ជាពិសេសគឺមានឱកាសក្នុងការបញ្ចេញមតិ ដែលអាចជួយឱ្យអាជីវកម្មមានភាពរីកចម្រើន។

លោកបណ្ឌិតបានបន្តថា “ចំណេះដឹងរបស់ពាណិជ្ជករនៅកម្ពុជា បើប្រៀបធៀបជាមួយបណ្តាពាណិជ្ជករនៅក្នុងតំបន់អាស៊ាន គឺនៅមានកម្រិត ដែលមិនទាន់អាចធ្វើការប្រកួតប្រជែងជាមួយគេបាននៅឡើយនោះទេ”។លោកបន្ថែមថា “ដូច្នេះយើងត្រូវតែព្យាយាមស្វែងយល់បន្ថែមច្រើនទៀត ដើម្បីពង្រឹងទៅលើផ្នែកធនធានមនុស្ស មិនថាចំពោះការបណ្តុះបណ្តាលធនធានបុគ្គលិកនៅក្នុងក្រុមហ៊ុន ឬនៅក្រៅក្រុមហ៊ុននោះទេ គឺត្រូវតែពង្រឹងយកចិត្តទុកដាក់”៕

ទិន្នន័យបង្ហាញថា វិស័យផលិតកម្មចិនបានធ្លាក់ចុះចាប់តាំងពីខែឧសភា

ដោយ Donald Lee

ភ្នំពេញៈ ការិយាល័យស្ថិតិជាតិចិនបានចេញផ្សាយទិន្នន័យថ្មី ដែលបង្ហាញពីទិន្នន័យផលិតកម្មចិន បានធ្លាក់ចុះជាបន្តបន្ទាប់ចាប់តាំងពីខែ ឧសភា ឆ្នាំនេះ។

សន្ទស្សន៍អ្នកគ្រប់គ្រងការទិញ (PMI) ដែលជាឧបករណ៍សម្រាប់វាស់ស្ថានភាពសេដ្ឋកិច្ចនៃវិស័យកម្មន្តសាល បានពិន្ទុនៅត្រឹម៤៩,៣ នៅក្នុងខែតុលា។ វាគឺជាការធ្លាក់ចុះបន្ថែមទៀត ពីពិន្ទុ ៤៩,៨ ដែលវិស័យនេះខែ កញ្ញា។

សន្ទស្សន៍ PMI គឺជាសន្ទស្សន៍និន្នាការផលិតកម្មសេដ្ឋកិច្ច ដែលឃ្លាំមើលស្ថានភាពសុខភាពម៉ាក្រូសេដ្ឋកិច្ចរបស់ប្រទេសមួយ។

ការិយាល័យស្ថិតិជាតិចិនបាននិយាយថា “សន្ទស្សន៍ PMI លើសពី៥០ភាគរយឆ្លុះបញ្ចាំងថា សេដ្ឋកិច្ចផលិតកម្មកំពុងរីកលូតលាស់ ប៉ុន្តែតិចជាង៥០ភាគរយបានឆ្លុះបញ្ចាំងពីផលិតកម្មសេដ្ឋកិច្ចកំពុងថមថយ”។

វិស័យផលិតកម្មចិន បានទទួលរងនូវការធ្លាក់ចុះជាច្រើនខែជាប់ៗគ្នា ចាប់តាំងពីខែ ឧសភា អំឡុងពេលសង្គ្រាមពាណិជ្ជកម្មរវាងអាមេរិក និងចិនកើនឡើង៕

សឹង្ហបុរីចាប់អារម្មណ៍វិនិយោគលើវិស័យដែលមានសក្តានុពលចំនួនបីក្នុងខេត្តបាត់ដំបង

ដោយ វុត្ថា

បាត់ដំបងៈ ឯកអគ្គរដ្ឋទូតសិង្ហបុរីបានថ្លែងអះអាងថា វិនិយោគិនសឹង្ហបុរីបាននិងកំពុងស្វែងរកឱកាសធ្វើកិច្ចសហប្រតិបត្តិការវិនិយោគ និងសិក្សាស្វែងយល់ពីសក្តានុពលរបស់ខេត្តបាត់ដំបង លើវិស័យកសិកម្ម ទេសចរណ៍ និងវិស័យសំណង់។

លោក Michael Tan ឯកអគ្គរដ្ឋទូតសិង្ហបុរីប្រចាំនៅកម្ពុជា បានថ្លែងក្នុងជំនួបពិភាក្សាជាមួយលោក ងួន រតនៈ អភិបាលខេត្តបាត់ដំបងកាលពីថ្ងៃទី៣០ ខែតុលាម្សិលមិញនេះថា សិង្ហបុរីមានការចាប់អារម្មណ៍វិនិយោគ លើវិស័យមួយចំនួន រួមមានវិស័យកសិកម្ម ទេសចរណ៍ និងវិស័យសំណង់ជាដើម ខណៈដែលប្រទេសមួយចំនួន ក៏បានចាប់អារម្មណ៍ពីសក្តានុពលរបស់ខេត្តនេះផងដែរ។

លោកបន្តថា “មើលឃើញសក្តានុពលនេះហើយ ទើបលោកបានដឹកនាំគណៈប្រតិភូចុះមកមើលដោយផ្ទាល់ ព្រមទាំងពិនិត្យមើលវិស័យផ្សេងៗទៀត ដើម្បីឈានទៅស្វែងរកកិច្ចសហការវិនិយោគក្នុងខេត្តភូមិភាគពាយ័ព្យនេះ”។

ឯកអគ្គរដ្ឋទូតរូបនេះបន្ថែមថា នៅក្នុងខែធ្នូ ឆ្នាំ២០១៩ខាងមុខនេះ នឹងមានសហការីមកពីប្រទេសសិង្ហបុរី ដែលមានជំនាញផ្នែកនគរូបនីយកម្ម មកកាន់ខេត្តបាត់ដំបង ដែលនេះជាឱកាសល្អមួយសម្រាប់អាជ្ញាធរខេត្ត អាចជួបពិភាក្សាលើការងារនគរូបនីយកម្ម ព្រមទាំងអាចលើកយកបញ្ហាទីក្រុងវៃឆ្លាត អេកូទេសចណ៍ និងវិស័យមួយចំនួនទៀតមកពិភាក្សាក្នុងជំនួបនោះ។

អភិបាលខេត្តបាត់ដំបងលោកងួន រតនៈបានស្វាគមន៍យ៉ាងកក់ក្ដៅ ចំពោះគណៈប្រតិភូសិង្ហបុរី ដែលនឹងមកកាន់ខេត្តបាត់ដំបង នាចុងឆ្នាំ២០១៩នេះ ហើយលោកនឹងជួបពិភាក្សាជាមួយពួកគេ លើបញ្ហាមួយចំនួនរួមមាន បញ្ហាទឹកស្អាត ភាពកក់ខ្វក់នៅក្នុងទីក្រុង និងបញ្ហាផ្សេងៗទៀត និងវិស័យមានសក្ដានុពលមួយចំនួន ដើម្បីឲ្យអ្នកទាំងនោះមានការចាប់អារម្មណ៍ ហើយគៀរគរអ្នកវិនិយោគទុនសិង្ហបុរី មកវិនិយោគនៅខេត្តបាត់ដំបង។

លោកអភិបាលរូបនេះ ក៏បានស្នើឱ្យឯកអគ្គរាជទូតសិង្ហបុរីប្រចាំនៅកម្ពុជា ជួយជំរុញដល់អ្នកវិនិយោគទុនសិង្ហបុរី ឲ្យមកវិនិយោគលើវិស័យ ដែលមានសក្ដានុពលមួយចំនួននៅខេត្តបាត់ដំបង ខណៈពួកគេកំពុងមានការចាប់អារម្មណ៍វិនិយោគ នៅតាមបណ្តាខេត្តមួយចំនួនក្នុងប្រទេសកម្ពុជាផងដែរ។

ខេត្តបាត់ដំបងបច្ចុប្បន្ននេះ ពុំទាន់មានការវិនិយោគលើវិស័យនានា ពីសំណាក់វិនិយោគទុនសិង្ហបុរីនោះទេ ខណៈដែលខេត្តមួយនេះ កំពុងមានការរីកចម្រើនលើវិស័យ កសិកម្ម ទេសចរណ៍ និងវិស័យសំណង់ និងវិស័យផ្សេងៗជាច្រើនទៀត៕

ADB នឹងបន្តកែលម្អ និងលើកកម្ពស់វិស័យហិរញ្ញវត្ថុ សេវាផ្គត់ផ្គង់ទឹក និងអនាម័យនៅកម្ពុជា

ដោយ ប៊ី

ភ្នំពេញ៖ ធនាគារអភិវឌ្ឍន៍អាស៊ី (ADB) នឹងបន្តការកែលម្អ និងលើកកម្ពស់វិស័យហិរញ្ញវត្ថុ សេវាផ្គត់ផ្គង់ទឹក និងអនាម័យនៅកម្ពុជា ស្របពេលមានកិច្ចព្រមព្រៀងចំនួនពីរក្នុងតម្លៃទឹកប្រាក់ចំនួន៨៩លានដុល្លារជាមួយនឹងកម្ពុជាដោយនឹងបង្កើនលទ្ធភាពរបស់តំបន់ជនបទក្នុងការទទួលបានសេវាផ្គត់ផ្គង់ទឹក និងអនាម័យ ព្រមទាំងកែលម្អកិច្ចខិតខំអភិវឌ្ឍ វិស័យហិរញ្ញវត្ថុរបស់កម្ពុជា។

លោកស្រី Sunniya Durrani-Jamal នាយិកា ADB និង ឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោក អូន ព័ន្ធមុនីរ័ត្ន បានចុះហត្ថលេខាលើកិច្ចព្រមព្រៀងកាលពីម្សិលមិញសម្រាប់កម្មវិធីអភិវឌ្ឍវិស័យសេវាផ្គត់ផ្គត់ទឹក និងអនាម័យជនបទដំណាក់កាលទី៣ និងកម្មវិធីអភិវឌ្ឍវិស័យហិរញ្ញវត្ថុ ប្រកបដោយបរិយាប័ន្ន (អនុកម្មវិធីទី២) នៅឯពិធីមួយក្នុងរាជធានីភ្នំពេញ។

លោកស្រី Sunniya Durrani-Jamal បានថ្លែងថា “កម្មវិធីទាំងពីរនេះគាំទ្រដល់វិស័យ អាទិភាពទាំង៤ របស់យុទ្ធសាស្រ្តចតុកោណ រួមមានដូចជា ការអភិវឌ្ឍធនធានមនុស្សតាមរយៈការកែលម្អ ការថែទាំសុខភាព សាធារណៈ និងអាហារូបត្ថម្ភ ពិពិធកម្មសេដ្ឋកិច្ច ដោយការលើកកម្ពស់ការអភិវឌ្ឍវិស័យ ហិរញ្ញវត្ថុ និងធនាគារ ការលើកកម្ពស់ការអភិវឌ្ឍវិស័យឯកជន ការងារ និងមុខរបរ តាមរយៈកិច្ចគាំទ្រ សហគ្រាសធុនតូច និងមធ្យម (SMEs) ព្រមទាំងការអភិវឌ្ឍប្រកបដោយបរិយាប័ន្ន និងចីរភាព តាមរយៈការ លើកកម្ពស់ វិស័យកសិកម្ម និងការអភិវឌ្ឍជនបទ”។

ប្រជាពលរដ្ឋប្រមាណ ៤០០ ០០០នាក់ នឹងទទួលបានប្រយោជន៍ពីកម្មវិធីអភិវឌ្ឍវិស័យសេវាផ្គត់ផ្គត់ទឹក និង អនាម័យជនបទ ដំណាក់កាលទី៣ ដែលធនាគារអភិវឌ្ឍន៍អាស៊ីបានអនុម័តកាលពីខែកញ្ញា ឆ្នាំ២០១៩ តាមរយៈ ការសាងសង់ និងការស្តារហេដ្ឋារចនាសម្ព័ន្ធផ្គត់ផ្គង់ទឹក និងអនាម័យ ចំនួន ២ ៥០០ កន្លែង ព្រមទាំង ការអនុវត្ត យុទ្ធនាការលើកកម្ពស់ការយល់ដឹង យ៉ាងហោចណាស់ក្នុងភូមិចំនួន៤០០ នៃខេត្តចំនួន១០ ក្នុង ប្រទេស កម្ពុជា។

សេវាផ្គត់ផ្គង់ទឹក និងអនាម័យប្រកបដោយចីរភាព និងគួរឱ្យជឿជាក់បាន នៅតែបន្តមានភាពខ្វះខាត នៅ តំបន់ជនបទនៃប្រទេសកម្ពុជា ដែលមានប្រជាជនចំនួន ៧៧ ភាគរយ នៃចំនួនប្រជាជនសរុបក្នុងប្រទេសចំនួន ១៦.៤ លាននាក់រស់នៅ។

ក្នុងឆ្នាំ២០១៧ បើទោះបីជាគ្រួសារជនបទចំនួន៧៣ ភាគរយ មានលទ្ធភាពទទួលបានការផ្គត់ផ្គង់ ទឹកស្អាតក៏ដោយ ប៉ុន្តែ មានតែ ១១ ភាគរយ ប៉ុណ្ណោះ ក្នុងចំណោមគ្រួសារទាំងនេះ ទទួលបានការផ្គត់ផ្គង់ទឹក តាមរយៈការភ្ជាប់បណ្តាញបំពង់ទុយោ។

ស្របគ្នានេះដែរ ប្រជាពលរដ្ឋដែលរស់នៅតំបន់ជនបទចំនួន ៥៦ ភាគរយ មានលទ្ធភាព ទទួលបានអនាម័យប្រសើរជាងមុន ហើយប្រជាពលរដ្ឋជនបទ ប្រមាណ ៤១ ភាគរយ នៅតែបន្តអនុវត្តការបន្ទោបង់ ពាសវាលពាសកាល ដែលអាចបង្កឱ្យមានជំងឺរាគរូស និងបញ្ហាសុខភាពសាធារណៈដទៃទៀត។

អនុកម្មវិធីទី២ នៃកម្មវិធីអភិវឌ្ឍន៍វិស័យហិរញ្ញវត្ថុដែលត្រូវបានអនុម័តដោយធនាគារអភិវឌ្ឍន៍អាស៊ីកាលពីខែ កញ្ញាឆ្នាំ ២០១៩ គាំទ្រដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការអភិវឌ្ឍវិស័យហិរញ្ញវត្ថុប្រកបដោយប្រសិទ្ធភាព និងស្ថេរភាពដែលជំរុញការរួមបញ្ចូលហិរញ្ញវត្ថុ និងការអភិវឌ្ឍប្រកបដោយចីរភាព។

អន្តរាគមន៍សំខាន់ៗ រួមមានការកែលម្អលទ្ធភាពទទួលបានហិរញ្ញវត្ថុ ជាពិសេសសម្រាប់ប្រជាជនក្រីក្រ គ្រួសារនៅជនបទ និងសហគ្រាសធុនតូច និងមធ្យម។ កម្មវិធីនេះក៏នឹងលើកកម្ពស់ស្ថេរភាពនៃវិស័យហិរញ្ញវត្ថុនៅកម្ពុជា និងធ្វើឱ្យប្រសើរឡើងនូវហេដ្ឋារចនាសម្ព័ន្ធហិរញ្ញវត្ថុដើម្បីគាំទ្រដល់ការណែនាំសេវាកម្ម និងផលិតផលហិរញ្ញវត្ថុថ្មីៗ។

វិស័យហិរញ្ញវត្ថុនៅកម្ពុជាកំពុងស្ថិតក្នុងដំណាក់កាលដំបូងនៃការអភិវឌ្ឍន៍ហើយគ្របដណ្តប់ដោយវិស័យធនាគារ និងមីក្រូហិរញ្ញវត្ថុ។ ខណៈកិច្ចជាច្រើនសម្រេច ការទទួលបានហិរញ្ញវត្ថុនៅតែមានកំរិតនៅឡើយ ជាពិសេសនៅតំបន់ជនបទ។

ស្ទើរតែមួយភាគបីនៃប្រជាជនត្រូវបានគេបដិសេធទាំងស្រុងដោយមិនមានលទ្ធភាពប្រើប្រាស់សេវាកម្មហិរញ្ញវត្ថុណាមួយឡើយ។ កិច្ចខិតខំប្រឹងប្រែងដើម្បីធ្វើឱ្យប្រសើរឡើងនូវលទ្ធភាពទទួលបានហិរញ្ញវត្ថុត្រូវបានរារាំងដោយកម្រិតនៃចំណេះដឹងទាបផ្នែកហិរញ្ញវត្ថុ៕

Urban Village ជាគម្រោងខុនដូទីមួយដែលមានផ្ទះគំរូនៅហុងកុង

ដោយកញ្ញា កែវ

ភ្នំពេញៈ ក្រុមហ៊ុន Urban Village បានប្រារព្ធពិធីបើកសម្ពោធផ្ទះគំរូ នៅទីក្រុងហុងកុង ដែលមានទីតាំងស្ថិតនៅអាគារ Siu On ជាន់ទី6 បន្ទប់ 604-6 លើផ្លូវ 482 Jaffe, Causeway Bay។

Urban Village ជាគម្រោងអភិវឌ្ឍន៍ដ៏ធំជាងគេរបស់ហុងកុង នៅប្រទេសកម្ពុជា។ ពួកគេបានពង្រីកទីផ្សាររបស់ខ្លួន ទាំងនៅក្នុងទីផ្សារអាស៊ី និងទីផ្សារអន្តរជាតិ ជាមួយការប្តេជ្ញាចិត្ត ដើម្បីផ្តល់នូវគម្រោងខុនដូធំទូលាយប្រកបដោយផាសុកភាព និងភាពស៊ីវិល័យ ដែលមានទីតាំងស្ថិតនៅចំកណ្ដាលបេះដូង នៃរាជធានីភ្នំពេញ ប្រទេសកម្ពុជា ព្រមទាំងជាចំណែកមួយនៃសង្គម ដើម្បីផ្តល់ជាទីកន្លែងដែលអាចសម្រាកលំហែកាយផងដែរ។

លោក Ben Li ជានាយកប្រតិបត្តិនៃ Urban Village បានឲ្យដឹងក្នុងពិធីសម្ភោធផ្ទះគំរូនៅទីក្រុងហុងកុងនាថ្ងៃទី៣០ តុលាកន្លងមកថា ថ្ងៃបើកសម្ភោធផ្ទះគំរូនៅហុងកុង បានប្រារព្ធឡើង យ៉ាងអធឹកអធម៌ក្រោមវត្តមាន ភ្ញៀវកិតិ្តយស និងអតិថិជនជាច្រើនរូប ដែលបានបង្កបរិយាកាស ឲ្យកាន់តែសប្បាយរីករាយបន្ថែមទៀត។ ក្រៅពីការកាត់ខ្សែបូ យើងមានរៀបចំជ្រូកខ្វៃ ដើម្បីលើកកែវស្រាអបអរក្នុងពិធីបើកសម្ពោធនេះផងដែរ។

លោក Ben Li បានបញ្ជាក់ថា “ដើម្បីបំពេញតម្រូវការយ៉ាងច្រើន នៅទីផ្សារហុងកុង និងប្រទេសចិន យើងសម្រេចចិត្តបើកផ្ទះគំរូ នៅហុងកុងចាប់តាំងពីគម្រោងទី១ បានលក់អស់នៅក្នុងឆ្នាំនេះ”។ លោកបន្តថា “យើងពិតជាសប្បាយរីករាយ នឹងប្ដេជ្ញាចិត្តដើម្បីបង្ហាញបន្ថែមពី Urban Village គម្រោងទី២នេះ។ ខ្ញុំពិតជាមានមោទនភាពយ៉ាងខ្លាំងដែលបានក្លាយជាគម្រោងខុនដូទីមួយ ដែលមានផ្ទះគំរូនៅហុងកុង។ នេះពិតជាព្រឹត្តិការណ៍យ៉ាងសំខាន់បំផុតមួយក្នុងប្រវត្តិសាស្រ្ត នៃ Urban Village។ ដូច្នេះយើងកាន់តែអាចបំពេញតម្រូវការរបស់វិនិយោគិន និងអ្នកទិញផ្ទះនៅអាស៊ី”។

ផ្ទះគំរូរបស់ Urban Village នៅហុងកុង បានទាក់ទាញអតិថិជនជាច្រើន មកកាន់គម្រោងមួយនេះ ដែលមានកម្ពស់៥១ជាន់ ស្មើនឹង១៧០០យូនីត ដែលមានចាប់ពីបន្ទប់ស្ទូឌីយោ រហូតដល់បន្ទប់គេង៣បន្ទប់។

ក្នុងនោះផងដែរ Urban Village ទទួលបានពានរង្វាន់ជាច្រើន ដូចជាគម្រោងអភិវឌ្ឍន៍ខុនដូដ៏ល្អដាច់គេនៅក្នុងប្រទេសកម្ពុជា គម្រោងអភិវឌ្ឍន៍ខុនដូដ៏ល្អដាច់គេនៅក្នុងទីក្រុងភ្នំពេញ គម្រោងខុនដូដែលមានការរចនាស្ថាបត្យកម្មល្អដាច់គេ គម្រោងខុនដូដែលមានការរចនាស្ថាបត្យកម្មល្អដាច់គេ និងការរចនាខាងក្នុងល្អបំផុត នៃ Asia Property Guru portal នៅប្រទេសសិង្ហបុរី។

សូមស្វាគមន៍អ្នកទាំងអស់គ្នា ក្នុងការចូលទៅទស្សនាផ្ទះគំរូថ្មីរបស់យើង ដែលមានទីតាំង Rooms 604-6 6/F Siu On Plaza, 482 Jaffe Road, Causeway Bay, Hong Kong ឬក៏អាចទំនាក់ទំនងមកកាន់លេខទូរស័ព្ទ +85268123234 (Mobile and WhatsApp) ដើម្បីធ្វើការណាត់ជួបជាមួយខាងយើងខ្ញុំ៕

កិច្ចព្រមព្រៀងពាណិជ្ជកម្មរវាងអាមេរិក និងចិននឹងពន្យាពេល ខណៈឈីលីលុបចោលកិច្ចប្រជុំកំពូល APEC

ដោយ Donald Lee

ភ្នំពេញ៖ ប្រធានាធិបតីអាមេរិក Donald Trump និងមេដឹកនាំចិនលោកស៊ី ជីនពីង នឹងមិនអាចជួបគ្នានៅក្នុងប្រទេសឈីលីក្នុងអំឡុងពេលកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដើម្បីចុះហត្ថលេខាលើកិច្ចព្រមព្រៀងពាណិជ្ជកម្មបណ្តោះអាសន្ន ដោយសារតែការតវ៉ាប្រឆាំងនឹងរដ្ឋាភិបាលនៅក្នុងប្រទេសនេះកំពុងបន្តកើតមាន។

ប្រធានាធិបតីឈីលីគឺលោក Sebastián Piñera បានលុបចោលកិច្ចប្រជុំកំពូល APEC ដោយសារតែការតវ៉ាប្រឆាំងនឹងរដ្ឋាភិបាលដែលកំពុងបន្តកើតមានអំពើហឹង្សាដែលបានធ្វើឱ្យរញ្ជួយប្រទេសអាមេរិកខាងត្បូងនេះ។

អ្នកចរចាពាណិជ្ជកម្មអាមេរិក និងចិនមានបំណងចុះហត្ថលេខាលើកិច្ចព្រមព្រៀងពាណិជ្ជកម្មដំណាក់កាលមួយ បណ្តោះអាសន្ន ក្នុងអំឡុងកិច្ចប្រជុំកំពូល APEC នៅប្រទេសឈីលីនៅថ្ងៃទី ១៦ ខែ វិច្ឆិកា ដើម្បីបញ្ចប់សង្គ្រាមពាណិជ្ជកម្មដ៏យូរអង្វែងក្នុងរយៈពេលមួយឆ្នាំ និងបានបង្កឱ្យមានការរអាក់រអួលយ៉ាងខ្លាំងនៅក្នុងសេដ្ឋកិច្ចពិភពលោកដែលកំពុងឆ្ពោះទៅរកការធ្លាក់ចុះសេដ្ឋកិច្ច។

អនុរដ្ឋលេខាធិការរងសេតវិមានលោក Hogan Gidley បានផ្ញើរអេឡិចត្រូនិចទៅកាន់បណ្តាញសារព័ត៌មាននានាជុំវិញពិភពលោកដោយបានថ្លែងថា “ឥឡូវនេះវាលេចឡើងថា APEC នឹងមិនកើតឡើងនៅក្នុងប្រទេសឈីលីទេ ហើយវាជាការយល់ដឹងរបស់យើងដែលថា អង្គការនេះមិនមានការរៀបចំកន្លែងប្រជុំកំពូលទីពីរបានទេ។ យើងកំពុងរង់ចាំព័ត៌មានសក្តានុពលទាក់ទងនឹងទីតាំងមួយផ្សេងទៀត”។

លោកបានបន្ថែមថា “យើងទន្ទឹងរង់ចាំបញ្ចប់ដំណាក់កាលទី ១ នៃកិច្ចព្រមព្រៀងពាណិជ្ជកម្មជាប្រវត្តិសាស្ត្រជាមួយចិនក្នុងពេលតែមួយ ហើយនៅពេលយើងមានសេចក្តីប្រកាស យើងនឹងប្រាប់អ្នកទាំងអស់គ្នា”៕