សមាគមអ្នកអភិវឌ្ឍន៍លំនៅដ្ឋានចាប់ផ្តើមសិក្សាពីស្ថានភាពអចលនវត្ថុជូនរដ្ឋាភិបាល

ដោយគង់ សូរិយា

ភ្នំពេញៈ សមាគមអ្នកអភិវឌ្ឍន៍លំនៅដ្ឋានកម្ពុជាបាន និងកំពុងសិក្សាពីស្ថានភាពអចលនវត្ថុ នៅតាមរាជធានី ខេត្តធំៗ ដើម្បីរៀបចំរបាយការណ៍ជូនរដ្ឋាភិបាល។

លោកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៩ តុលានេះថា សមាគមបាននិងកំពុងស្រាវជ្រាវពីស្ថានភាពពិត លើវិស័យអចលនវត្ថុកម្ពុជា ដើម្បីដាក់ជូនក្រសួងសេដ្ឋកិច្ច និងហិរញ្ញវត្ថុ និងក្រសួងរៀបចំដែនដី នគរូបនីយកម្មនិងសំណង់។ លោកបន្តថា របាយការណ៍នេះនឹងបញ្ចប់នៅសប្តាហ៍ក្រោយ ប៉ុន្តែវានឹងមិនត្រូវផ្សព្វផ្សាយជាសាធារណៈនោះទេ។

លោកបន្តថា “យើងទទួលស្គាល់ថាវិស័យអចលនទ្រព្យនៅកម្ពុជា កំពុងមានការធ្លាក់ចុះស្ទើរគ្រប់ផ្នែក ប៉ុន្តែនៅរាជធានីភ្នំពេញមានផលប៉ះពាល់តិចតួច ធៀបនឹងក្រុងព្រះសីហនុ”។ លោកបន្តថា “ស្ថានភាពនយោបាយ និងការគំរាមដកប្រព័ន្ឋអនុគ្រោះពន្ឋលើគ្រប់មុខទំនិញលើកលែងតែអាវុធ (EBA) បាននិងកំពុងធ្វើឲ្យវិស័យនេះស្ថិតក្នុងសភាពទ្រឹង”។

លោកឧកញ៉ាលី ហួរបានបន្តថា ទោះជាយ៉ាងណាស្ថានភាពនេះ មិនគួរមានការព្រួយបារម្ភពេកនោះទេ ហើយប្រជាជនមិនគួរបារម្ភនោះឡើយ អ្វីៗនឹងមានភាពប្រសើរឡើងនាពេលអនាគត៕

លោកឧកញ៉ាលឹម ហេង៖ វិស័យកសិកម្ម មានតួនាទីយ៉ាងសំខាន់ក្នុងការរក្សាស្ថេរភាពស្បៀង និងកំណើនសេដ្ឋកិច្ចជាតិ

ដោយៈ រ៉ាណេត

ភ្នំពេញៈ កម្ពុជាត្រូវបានគេចាត់ទុកថា ជាប្រទេសកសិកម្មដ៏មានសក្ដានុពល ដោយសារតែកត្តាធម្មជាតិ និងសណ្ឋានដីមានអំណោយផល ដែលអាចទាញយកផលប្រយោជន៍បានច្រើនសម្រាប់ទ្រទ្រង់ស្ថេរភាពស្បៀង និងជាផ្នែកមួយយ៉ាងសំខាន់នៅក្នុងការចូលរួមជួយជ្រោមជ្រែងកំណើនសេដ្ឋកិច្ចជាតិ។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ឲ្យដឹងកាលពីថ្ងៃម្សិលម៉ិញថា មិនថាចំពោះតែប្រទេសកម្ពុជានោះទេ វិស័យកសិកម្ម គឺមានសារសំខាន់ខ្លាំងណាស់ ក្នុងថែរក្សានូវស្ថេរភាពស្បៀង និងជួយលើកកម្ពស់កំណើនសេដ្ឋកិច្ចជាតិបានយ៉ាងល្អប្រសើរ ដែលរដ្ឋាភិបាលគួរតែមានការយកចិត្តទុកដាក់ខ្ពស់។

លោកឧកញ៉ាបានបន្តទៀតថា “ថ្វីត្បិតកម្ពុជាត្រូវបានគេចាត់ទុកថា ជាប្រទេសដែលមានភាពអំណោយផលលើវិស័យកសិកម្ម ប៉ុន្តែបច្ចុប្បន្នកម្ពុជានៅតែមិនទាន់អាចទាញ់យកផលប្រយោជន៍ពីវិស័យមួយនេះ បានច្រើននៅឡើយនោះទេ ជាពិសេសមានឧបសគ្គ ក្នុងការនាំចេញទៅកាន់ទីផ្សារអន្តរជាតិ ដែលកំពុងតែមានភាពប្រកួតប្រជែងខ្លាំង”។

លោកឧកញ៉ាលឹម ហេងបានមានប្រសាសន៍បន្តទៀតថា ជាលទ្ធផលនិងបទពិសោធន៍កាលពីពេលកន្លងទៅនេះ ផលិតផលកសិកម្មកម្ពុជា ដែលបានធ្វើការនាំចេញទៅកាន់ទីផ្សារក្រៅស្រុក និងទទួលបានភាពជោគជ័យ គឺឃើញមានតែអង្ករ ដែលទទួលបានការគាំទ្រពីសំណាក់ទីផ្សារសាកលលោក ប៉ុន្តែក្រៅពីនេះដូចជាដំណាំដំឡូងមី គ្រាប់ស្វាយចន្ទី កៅស៊ូ ពោត សណ្តែង ស្វាយ និងកសិផលមួយចំនួនទៀត ចំពោះការនាំចេញហាក់មានកម្រិត ដោយតែកត្តាគុណភាព និងភាពប្រកួតប្រជែងទៅលើតម្លៃ។

ឧបសគ្គនៃការនាំចេញកសិផលកម្ពុជា ទៅកាន់ទីផ្សារអន្តរជាតិគឺមានច្រើន ជាពិសេសពាក់ព័ន្ធទៅនឹងកត្តាគុណភាពជាចម្បង។ ទំនិញកសិផលកម្ពុជានៅមិនទាន់អាចទាញយកទំនុកចិត្តលើគុណភាព និងសុវត្ថិភាពពីទីផ្សារអន្តរជាតិបាននៅឡើយនោះទេ ដែលទាមទារឱ្យកសិករ ក៏ដូចជាក្រុមហ៊ុនឯកជន ដែលជាអ្នកផលិតខិតខំដោយខ្លួនឯងក្នុងការផលិត និងការអភិវឌ្ឍ។

លោកឧកញ៉ាលឹម ហេងបានមានប្រសាសន៍បញ្ជាក់ថា ការដែលអាចប្រកួតប្រជែងនៅលើទីផ្សារអន្តរជាតិបាន សំខាន់គឺត្រូវធាតុផ្សំដូចជាការដឹង និងស្គាល់ច្បាស់ពីប្រភេទកសិផលដែលជាតម្រូវការរបស់ទីផ្សារ កសិផលត្រូវប្រាកដថាមានគុណភាព និងសុវត្ថិភាពខ្ពស់ មានការផ្សព្វផ្សាយដែលធ្វើឡើងដោយរដ្ឋាភិបាល ក្រោមកិច្ចចូលរួមសហការពីសំណាក់វិស័យឯកជន ជាពិសេស ពិចារណាទៅលើថ្លៃដើមនៃការផលិត ដែលអាចទាញយកផលចំណេញត្រឡប់មកវិញបាន។ នៅពេលដែលចំណុចសំខាន់ៗទាំងអស់នេះត្រូវបានដោះស្រាយ នោះវិស័យកសិកម្មនឹងអាចចូលរួមចំណែក នៅក្នុងការពង្រឹងកំណើនសេដ្ឋកិច្ចជាតិបានយ៉ាងល្អ។

តាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទកាលពីពេលកន្លងទៅបានបង្ហាញថា ក្នុងរយៈពេល៨ខែ ឆ្នាំ២០១៩ កម្ពុជាបាននាំចេញកសិផលទៅកាន់ទីផ្សារអន្តរជាតិជិត៣លានតោន។ ទីផ្សារកសិផលរបស់កម្ពុជា រួមមានប្រទេសចិន អឺរ៉ុប វៀតណាម ថៃ កូរ៉េ ឥណ្ឌា អូស្ត្រាលី អារ៉ាប៊ីសាអូឌីត និងប្រទេសមួយចំនួនទៀត។

កសិផលដែលបាននាំចេញរួមមាន អង្ករជាង៣៥ម៉ឺនតោន ដំឡូងមីក្រៀមជិត១លានតោន ដំឡូងមីស្រស់ជិត៩០ម៉ឺនតោន ម្សៅដំឡូងមីជាង៤ម៉ឺនតោន គ្រាប់ស្វាយចន្ទីជាង១៦ម៉ឺនតោន គ្រាប់ពោតជាង១១ម៉ឺនតោន សណ្តែកសៀងជាង៨ពាន់តោន ចេកជាង៩ម៉ឺនតោន ផ្លែស្វាយជាង៣ម៉ឺនតោន ម្រេចជាង៣ពាន់តោន បន្លែជាង១០០តោន និងដាំណាំកសិផលផ្សេងៗទៀតជិត២០ម៉ឺនតោន៕

ក្រុមហ៊ុនចិនដ៏ធំមួយគ្រោងវិនិយោគលើវិស័យសាធារណការ និងដឹកជញ្ជូននៅកម្ពុជា

ដោយ វុត្ថា

ភ្នំពេញ៖ ក្រុមហ៊ុនចិន CMEC គឺជាក្រុមហ៊ុនសំណង់ និងវិស្វកម្ម ដែលជាបុត្រសម្ព័ន្ធនៃក្រុមហ៊ុនសាជីវកម្មឧស្សាហកម្មជាតិរបស់ប្រទេសចិន បានបង្ហាញចំណាប់អារម្មណ៍ក្នុងការចូលរួមវិនិយោគនៅកម្ពុជាលើវិស័យសាធារណការ និងដឹកជញ្ជូន។

លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន ក្នុងជំនួបជាមួយ លោក Zhao Wenka អនុប្រធានគ្រប់គ្រងទូទៅ របស់ក្រុមហ៊ុនចិន CMEC កាលពីម្សិលមិញនេះ បានបង្ហាញពីគម្រោងនានានៅក្នុងប្រទេសកម្ពុជាដែលគ្រោងនឹងចាប់ផ្តើមដំណើរសាងសង់ និងស្ថាបនានាពេលខាងមុខនេះ ដើម្បីឆ្លើយតទៅនឹងការកាត់បន្ថយការកកស្ទះចរាចរណ៍ និការរីកចំរើននៅក្នុងប្រទេស។

លោក បន្តថា គម្រោងដែលគ្រោងអនុវត្តនៅកម្ពុជារួមមាន៖គម្រោងផ្លូវល្បឿនលឿន គម្រោងលើកកម្ពស់គុណភាពនិងការពង្រីកផ្លូវ គម្រោងផ្លូវរថភ្លើងលើអាកាស គម្រោងប្រព័ន្ធដឹកជញ្ជូនសាធារណៈក្នុងទីក្រុង និងគម្រោងផ្សេងៗជាច្រើនទៀត។

ជាមួយគ្នានេះ លោក បានស្នើ និងលើកទឹកចិត្តដល់គណៈប្រតិភូរបស់ក្រុមហ៊ុនដ៏ធំរបស់ចិនមួយនេះ ព្រមទាំងលើកទឹកចូលរួមដេញថ្លៃលើគម្រោងខាងលើជាមួយក្រុមហ៊ុនដទៃទៀតផងដែរ។ ក្រុមហ៊ុនចិន CMEC គឺជាក្រុមហ៊ុនសំណង់ និងវិស្វកម្ម ដែលជាបុត្រសម្ព័ន្ធនៃក្រុមហ៊ុនសាជីវកម្មឧស្សាហកម្មជាតិរបស់ប្រទេសចិន (China National Machinery Industry Corporation Group of Companies) ដែលមានការិយាល័យធំនៅទីក្រុងប៉េកាំង នៃសាធារណរដ្ឋប្រជាមានិតចិន៕

សម្តេចតេជោជំរុញកិច្ចសហប្រតិបត្តិការលើវិស័យហេដ្ឋារចនាសម្ព័ន្ធ និងអគ្គិសនីជាមួយប្រទេសឡាវ

ដោយ វុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកទឹកចិត្តឱ្យភាគីទាំងពីរ កម្ពុជា-ឡាវ បន្តយកចិត្តទុកដាក់ក្នុងកិច្ចសហប្រតិបត្តិការរវាងគ្នានិងគ្នា ជាពិសេសជំរុញការអភិវឌ្ឍហេដ្ឋារចនាសម្ព័ន្ធរួមទាំងវិស័យអគ្គិសនី។

សម្តេចតេជោ ហ៊ុន សែន នៅក្នុងជំនួបជាមួយលោក Khamphanh Phommathat សមាជិកការិយាល័យនយោបាយលេខាមជ្ឈិមបក្សនៃប្រទេសឡាវនៅថ្ងៃទី ២៩ ខែតុលា ឆ្នាំ ២០១៩ នេះ ស្នើឲ្យភាគីឡាវពិនិត្យមើលលទ្ធភាពលើសក្តានុពលផ្សេងទៀតដែលប្រទេសយើងទាំងពីរអាចសហការគ្នាបានក្នុងន័យជំរុញ និងពង្រឹងបន្ថែមទៀតនូវទំនាក់ទំនងរវាងប្រទេសទាំងពីរឲ្យស្របទៅតាមអ្វីដែលថ្នាក់ដឹកនាំបានលើកឡើងក្នុងកម្រិតទំនាក់ទំនងដែលជាដៃគូយុទ្ធសាស្ត្រគ្រប់ជ្រុងជ្រោយនោះ។

លោក Khamphanh Phommathat សមាជិកការិយាល័យនយោបាយលេខាមជ្ឈិមបក្សនៃប្រទេសឡាវបានឱ្យដឹងដែរថាដំណើរទស្សនកិច្ចរបស់លោកមកកាន់ប្រទេសកម្ពុជានាពេលនេះ គឺដើម្បីជំរុញទំនាក់ទំនង ក៏ដូចជាកិច្ចសហប្រតិបត្តិការរវាងប្រទេសទាំងពីរឲ្យកាន់តែស៊ីជម្រៅបន្ថែមទៀត ឲ្យស្របទៅតាមកម្រិតនៃទំនាក់ទំនងជាពិសេសជំរុញការងារដែលបានចុះហត្ថលេខាជាមួយគ្នាកន្លងមកឱ្យមានដំណើរការទៅមុខ និងទទួលបាននូវភាពជោគជ័យផងដែរ។

លោកបន្តថា លើសពីនេះទៅទៀត លោកក៏បានជម្រាបជូនសម្ដេចតេជោនាយករដ្ឋមន្ត្រីដោយសង្ខេបនៃដំណើរវិវត្តន៍របស់ប្រទេសឡាវ ពិសេសលើវិស័យម៉ាក្រូសេដ្ឋកិច្ចដោយឯកឧត្តមក៏បានគោរពសុំការណែនាំក៏ដូចជាអនុសាសន៍ ពីសម្តេចតេជោ ក្នុងការចែករំលែកនូវបទពិសោធន៍របស់ប្រទេសកម្ពុជា៕

ផ្សារទំនើប AEON 3 ផ្លូវ៦០ម៉ែត្រ ត្រៀមបើកការដ្ឋាននៅដើមឆ្នាំក្រោយនេះ

ដោយ ៖ រ៉ាណេត

ភ្នំពេញ ៖ ដូចទៅនឹងការលើកឡើងរបស់រដ្ឋមន្ត្រីក្រសួងពាណិជ្ជកម្មកាលពីសប្ដាហ៍កន្លងទៅថា ផ្សារទំនើប AEON3 ដែលស្ថិតបណ្តាយមហាវិថីសម្ដេចតេជោ គ្រោងនឹងបើកការដ្ឋានសាងសង់នៅក្នុងពេលដ៏ខ្លីឆាប់ៗខាងមុខនេះយ៉ាងប្រាកដ ខណៈពេលដែលបច្ចុប្បន្ន ទីតាំងនៃគម្រោងត្រូវបានគេឃើញមានការឈូសឆាយពង្រាបដីជាបណ្ដើរៗទៅហើយនោះ ។

ផ្អែកតាមប្រភពព័ត៌មានដែលអាចទុកចិត្តបានបង្ហើបប្រាប់ឱ្យដឹងថា តាមផែនការដែលបានគ្រោងទុក គម្រោងបើកការដ្ឋានសាងសង់ផ្សារទំនើប AEON3 ដែលមានទីតាំងនៅតាមបណ្តោយមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ) នឹងចាប់ផ្តើមនៅត្រឹមដើមឆ្នាំ២០២០ ខាងមុខនេះ និងបញ្ចប់ការសាងសង់ត្រឹមរយៈពេលប្រមាណ២៤ខែ។

ប្រភពដដែលបានបន្តឱ្យដឹងថែមទៀតថា បច្ចុប្បន្ននេះ ទាំងច្បាប់សាងសង់ និងអភិវឌ្ឍន៍ ក៏ដូចជាឯកសារក្នុងដឹកជញ្ជូនសម្ភារៈ និងគ្រឿងបរិក្ខាសម្រាប់ដំណើរការសាងសង់ត្រូវបានរៀបចំរួចរាល់ហើយ ពោលគឺរង់ចាំតែពេលវេលាកំណត់មកដល់តែប៉ុណ្ណោះ។

សម្រាប់គម្រោងសាងសង់ផ្សារទំនើបដ៏ធំ AEON3 នឹងត្រូវបានធ្វើឡើងនៅលើផ្ទៃដីទំហំជាង១៧ហិកតា ស្ថិតនៅក្នុងក្បែរស្ពានថ្ម ជិតគម្រោងអភិវឌ្ឍន៍លំនៅដ្ឋានបែបទំនើប និងប្រណីតភាពរបស់បុរីប៉េងហួត ដែលជាមជ្ឈមណ្ឌលពាណិជ្ជកម្មថ្មីនៃរាជធានីភ្នំពេញ ។

បើធ្វើដំណើរចេញពីចំណុចច្រមុះជ្រូកក្បាលថ្នល់ ទីតាំងផ្សារទំនើបលំដាប់អន្តរជាតិមួយនេះ គឺហួសបុរីប៉េងហួតប្រមាណ ១០០០ម៉ែត្រ និងហួសស្ពានថ្មប្រមាណ ១០០ម៉ែត្រ ស្ថិតនៅខាងស្តាំដៃ។ លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានមានប្រសាសន៍ប្រាប់ឱ្យដឹងតាមទូរស័ព្ទកាលពីពេលកន្លងទៅនេះថា “ការមកដល់នៃក្រុមហ៊ុនលំដាប់អន្តរជាតិល្បីៗ ជាពិសេសក្រុមហ៊ុនជប៉ុន ដែលបានមកវិនិយោគនៅកម្ពុជា បានឆ្លុះបញ្ចាំងពីទំនុកចិត្ត និងបរិយាកាសវិនិយោគនៅកម្ពុជាកាន់តែល្អប្រសើរ”។

លោកឧកញ៉ាបានបន្តទៀតថា “អ្នកវិនិយោគជប៉ុនមិនងាយចូលទៅវិនិយោគ នៅប្រទេសណានោះទេ ហេតុនេះនៅពេលពួកគេទៅវិនិយោគមានន័យថា ប្រទេសនោះមានបរិយាកាសនយោបាយល្អ និងស្ថានភាពនៃការវិនិយោគមានភាពប្រសើរ ដែលអាចផ្តល់ភាពកក់ក្តៅដល់ពួកគេ”។

តាមរយៈសេចក្ដីប្រកាសព័ត៌មានរបស់ក្រុមហ៊ុនអភិវឌ្ឍផ្សារទំនើបបានលើកឡើងថា ផ្សារទំនើប AEON 3 នឹងត្រូវដាក់ឱ្យដំណើរការនៅឆ្នាំ២០២៣។

គម្រោងផ្សារទំនើប AEON Mall 3 នឹងមានផ្ទៃក្រឡាសរុបរហូតដល់ទៅ ១៧៤,០០០ ម៉ែត្រការ៉េ ដែលធំជាងផលបូកផ្ទៃក្រឡាផ្សារទំនើប AEON 1 (៦៨០០០ ម៉ែត្រការ៉េ) និងផ្សារទំនើប AEON 2 ខណ្ឌសែនសុខ (១០០០០០ ម៉ែត្រការ៉េ)៕

ហុងគ្រីនឹងបើកស្ថានទូតជាថ្មីនៅកម្ពុជានៅឆ្នាំ២០២១ ខាងមុខនេះ

ដោយ ម៉ាណេត

ភ្នំពេញៈ ហុងគ្រីនឹងបើកស្ថានទូតនៅទីក្រុងភ្នំពេញ ហើយកម្ពុជានឹងបើកស្ថានទូតនៅទីក្រុង Budapest នៅឆ្នាំ ២០២១ ។ នេះបើយោងតាមប្រសាសន៍របស់លោកយ៉ាណូស អាឌ័រ (Janos Ader) ប្រធានាធិបតីនៃប្រទេសហុងគ្រី កាលពីថ្ងៃច័ន្ទ អំឡុងពេលធ្វើទស្សនកិច្ចរយៈពេល៣ថ្ងៃនៅកម្ពុជា។

លោក Ader បានប្រាប់អ្នកសារព័ត៌មានថា ហុងគ្រី និងកម្ពុជា នឹងបើកស្ថានទូតនៅតាមទីក្រុងរបស់គ្នាទៅវិញទៅមកនៅឆ្នាំ២០២១ ដែលជាខួបលើកទី៦៥នៃការបង្កើតទំនាក់ទំនងការទូតរវាងប្រទេសទាំងពីរ។

ការបើកស្ថានទូតនេះត្រូវបានព្រមព្រៀងគ្នា លើកដំបូងនៅឯកិច្ចពិភាក្សាដែលស ម្តេចតេជោនាយករដ្ឋមន្រ្តីហ៊ុន សែន ដែលបានជួបជាមួយសមភាគីហុងគ្រីលោក Viktor Orbán ក្នុងដំណើរទស្សនកិច្ចរបស់លោកទៅកាន់ទីក្រុង Budapest នៅខែមិថុនា ឆ្នាំ ២០១៩។

លោក Ader បាននិយាយថា នៅក្នុងកិច្ចពិភាក្សាជាមួយសម្ដេចតេជោ ហ៊ុន សែន លោកបានផ្តល់ជំនួយហុងគ្រី ដល់រដ្ឋាភិបាលកម្ពុជាក្នុងការដោះស្រាយបញ្ហាប្រឈមទាក់ទងនឹងបញ្ហាចំនួនប្រជាជននៅភ្នំពេញ។ លោកបានបន្ថែមថា ភ្នំពេញមានប្រជាជន ២លាននាក់ កំពុងជួបការលំបាករួមមានហេដ្ឋារចនាសម្ពន្ធ័ ដែលមិនទាន់អភិវឌ្ឍន៍ ការគ្រប់គ្រងសំរាម និងការព្យាបាលទឹកស្អុយ។

សម្តេចតេជោមានប្រសាសន៍នៅវិមានរដ្ឋាភិបាល កាម៉េលីតា ក្នុងទីក្រុងប៊ុយដាប៉េស កាលពីខែមិថុនាថា បើទោះបីជាកន្លងមកប្រទេសទាំងពីរធ្លាប់បើកស្ថានទូត ក្នុងប្រទេសផងខ្លួនក៏ពិតមែន ប៉ុន្តែប្រទេសទាំងពីរបានបិទស្ថានទូតរៀងៗខ្លួន តាមរយៈដំនើរទស្សនកិច្ចផ្លូវការ ទៅកាន់ប្រទេសហុងគ្រីនាពេលនេះ សម្តេចចង់ឃើញប្រទេសទាំងពីរ ធ្វើការបើកស្ថានទូតជាថ្មីឡើងវិញ ដើម្បីជួយគ្នាទៅវិញទៅមក ពិសេសបង្កើនកិច្ចសហប្រតិបត្តិការសម្រាប់ប្រទេសទាំងពីរ។

ប្រទេសហុងគ្រី មានផ្ទៃដីជាង៩៣០៣០គីឡូម៉ែត្រការ៉េ មានប្រជាជនជិត១០លាននាក់ និងផលទុនជាតិសរុបសំរាប់មនុស្សម្នាក់ក្នុងមួយឆ្នាំ មានចំនួន១៦,១៦៩ដុល្លារអាមេរិកកាលឆ្នាំ២០១៨៕

សញ្ញាវិជ្ជមាន៖ កិច្ចចរចាពាណិជ្ជកម្មរវាងអាមេរិក និងចិនមានភាពប្រសើរជាងមុន

ដោយ Donald Lee

ភ្នំពេញៈ ប្រធានាធិបតីអាមេរិកលោក Donald Trump បានថ្លែងថា កិច្ចពិភាក្សាពាណិជ្ជកម្មរវាងអាមេរិក និងចិនកំពុងរីកចម្រើនយ៉ាងល្អ ហើយកិច្ចព្រមព្រៀងមួយនឹងត្រូវចុះហត្ថលេខានៅក្នុងប្រទេសឈីលី ក្នុងអំឡុងកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកដែលនឹងប្រព្រឹត្តទៅនៅថ្ងៃទី១៦ ខែវិច្ឆិកា។

លោក Trump បាននិយាយទៅកាន់អ្នកយកព័ត៌មាន នៅលើកញ្ចក់ទូរទស្សន៍អាមេរិកនៅរដ្ឋម៉ារីលែនកាលពីថ្ងៃម្សិលម៉ិញថា “យើងកំពុងទន្ទឹងរង់ចាំពេលវេលា ដើម្បីចុះហត្ថលេខាលើកិច្ចព្រមព្រៀងដ៏ធំមួយ នៃកិច្ចព្រមព្រៀងជាមួយចិន។ យើងនឹងហៅវាថាដំណាក់កាលទី១ ប៉ុន្តែវាគឺជាចំណែកដ៏ធំមួយ”។

ក្រុមអ្នកវិភាគជឿជាក់ថា រដ្ឋាភិបាលក្រុងប៉េកាំង ចង់ឱ្យអាមេរិកលុបចោលពន្ធគយលើទំនិញចិនមានតម្លៃ១៥៦ពាន់លានដុល្លារ ដែលនឹងចូលជាធរមាននៅថ្ងៃទី១៥ ខែ ធ្នូ និងរួមបញ្ចូលទាំងកុំព្យូទ័រ ទូរស័ព្ទចល័ត និងប្រដាប់ប្រដាក្មេងលេង។

ជាថ្នូរវិញ ចិននឹងចរចានាំចូលទំនិញកសិកម្មអាមេរិក ជាពិសេសសណ្តែកសៀងដែលប្រធានាធិបតីអាមេរិក Donald Trump បាននិយាយថា អាចមានតម្លៃរហូតដល់៥០ពាន់លានដុល្លារ។

លោក Trump បានបញ្ជាក់ថា “ចិនចាំបាច់ត្រូវធ្វើកិច្ចព្រមព្រៀងជាមួយអាមេរិក ខណៈសេដ្ឋកិច្ចចិនជួបប្រទះការធ្លាក់ចុះជាបន្តបន្ទាប់”។

សេដ្ឋកិច្ចចិនបានធ្លាក់ចុះដល់ ៦ ភាគរយនៅក្នុងត្រីមាសទី ៣។ នេះបើយោងតាមរបាយការណ៍របស់ការិយាល័យស្ថិតិជាតិ (NBS) ចេញផ្សាយក្នុងខែនេះ។ ត្រីមាសនេះគឺជារយៈពេលដ៏អាក្រក់បំផុត ក្នុងរយៈពេលជិត៣០ឆ្នាំ ហើយជាសញ្ញាបង្ហាញថាការធ្លាក់ចុះពីកំណើន៦,២ ភាគរយនៅក្នុងត្រីមាសទី២។

ទីក្រុងប៉េកាំងបានអះអាងថា សេដ្ឋកិច្ចកំពុងផ្លាស់ប្តូរទៅដំណាក់កាលចាស់ទុំ ដែលការប្រើប្រាស់ក្នុងស្រុក នឹងដើរតួនាទីធំជាងពាណិជ្ជកម្មអន្តរជាតិ ហើយអត្រាកំណើនផលិតផលក្នុងស្រុកសរុប នៅតែខ្ពស់ជាងសេដ្ឋកិច្ចពិភពលោកដទៃទៀត។

របាយការណ៍របស់កាសែត Global Times ដែលគាំទ្រចិនបានឱ្យដឹងថា “ជាមួយអត្រាកំណើន៦.២ភាគរយ ទោះបីជាទាបជាងមុនបន្តិចក៏ដោយ ក៏នៅតែជាកំណើនខ្ពស់នៅក្នុងបរិបទពិភពលោក។ កំណើនបែបនេះត្រូវបានប៉ាន់ស្មានថា មានល្បឿនលឿនបំផុតក្នុងចំណោមបណ្តាប្រទេស ដែលមានទំហំសេដ្ឋកិច្ច១ទ្រីលានដុល្លារ”។

របាយការណ៍នេះបានបន្ថែមទៀតថា “ខណៈកំណើនសេដ្ឋកិច្ចនៅក្នុងរយៈពេល ៣ ត្រីមាសដំបូងធ្លាក់ចុះដល់៦,២ភាគរយ ប៉ុន្តែលទ្ធផលនេះគឺស្ថិតក្នុងចំណោមប្រទេសដែលល្អបំផុតនៅលើពិភពលោក”៕

បុរី អាម៉ូរី៧មករា បញ្ចុះតម្លៃចន្លោះ ៥ទៅ ១០ភាគរយក្នុងឱកាសពិធីបញ្ចុះបឋមសិលាបើកការដ្ឋានសាងសង់

ដោយៈ រ៉ាណេត

ភ្នំពេញៈ គម្រោងផ្ទះអាជីវកម្ម និងលំនៅឋានប្រណីតថ្មីមួយ ដែលមានទីតាំងស្ថិតនៅលើតំបន់សេដ្ឋកិច្ចថ្មី ស្ថិតនៅតាមបណ្តោយផ្លូវជាតិលេខ៦អា បានចាប់ផ្តើមពិធីបញ្ចុះបឋមសិលា និងបើកការដ្ឋានសាងសង់ជាផ្លូវការហើយ នាព្រឹកថ្ងៃទី២៩ ខែតុលា ឆ្នាំ ២០១៩ ដោយមានផ្ទះពាណិជ្ជកម្មប្រភេទA និងប្រភេទB មានតម្លៃចាប់ពី 65800ដុល្លារឡើងទៅ។

លោកសួន វីរៈតារា អគ្គនាយកក្រុមហ៊ុនអាម៉ូរី បានមានប្រសាសន៍ឱ្យដឹងថា គម្រោង បុរី អាម៉ូរី ៧មករា នឹងត្រូវសាងសង់ឡើងលើផ្ទៃដី៣២ហិកតា ស្ថិតនៅភូមិជ្រៃមួយរយ ឃុំសំបូរមាស ស្រុកមុខកំពូលតាមបណ្តោយផ្លូវរដ្ឋ៧មករា ដែលតភ្ជាប់ពីផ្លូវជាតិលេខ៦អា ទៅកាន់ផ្លូវលោកឧកញ៉ា លី យ៉ុងផាត់ និងភ្ជាប់បន្ថែមទៅកាន់ផ្លូវជាតិលេខ៥ ។ លោកបន្តថា “តំបន់នេះបានវិវឌ្ឍន៍ខ្លួនយ៉ាងលឿន ក្លាយទៅជាតំបន់មានសក្តានុពលលើការអភិវឌ្ឍវិស័យអចលនទ្រព្យ។ អ្វីដែលពិសេសទៀតនោះ តំបន់នេះមានហេដ្ឋារចនាសម្ព័ន្ធល្អ ដូចនៅក្នុងទីក្រុង ដែលវាជាកត្តាទាក់ទាញឲ្យមនុស្សទៅរស់នៅច្រើន និងប្រកបអាជីវកម្ម។

លោកបានបន្តថា “ជាក់ស្តែងតំបន់នេះ បច្ចុប្បន្នត្រូវបានប្រមូលផ្តុំទៅដោយធនាគារ សាលារៀនអន្តរជាតិ និងមានប្រព័ន្ធហេដ្ឋារចនាសម្ព័ន្ធល្អៗជាច្រើន បម្រើឱ្យការរស់នៅកាន់តែប្រសើរ”។ លោកបន្តថា “ហេតុផលទាំងនេះហើយ បានធ្វើឱ្យបុរីអាម៉ូរី៧មករា លេចរូបរាងនៅទីនេះ”។

បុរីអាម៉ូរី៧មករា នឹងដើរតួនាទីយ៉ាងសំខាន់ ក្នុងការជួយដល់ប្រជាពលរដ្ឋទាំងអស់ដែលមានលទ្ធភាព ក្នុងការធ្វើការវិនិយោគទៅលើវិស័យអចលនទ្រព្យខ្នាតតូច និងមធ្យម។ នៅជុំវិញទីតាំងបុរី ពោរពេញដោយសក្តានុពល គឺមានដូចជា សួនសត្វសាហ្វារីវើល វិមានឈ្នះ ឈ្នះ ពហុកីឡាដ្ឋានជាតិមរតកតេជោ និងសួនទឹក ហ្គោលឌិនស៊ីធីធំជាងគេនៅអាស៊ី និងគម្រោងបុរីល្បីៗជាច្រើនទៀត។

ដើម្បីអបអរដល់ពិធីបញ្ចុះបឋមសិលា បើកការដ្ឋានសាងសង់នេះ អតិថិជនទាំងអស់ នឹងទទួលបានការបញ្ចុះតម្លៃពិសេសចន្លោះពី៥ ទៅ១០ភាគរយ និងប័ណ្ណលាភសំណាង ២,៩៩៩ដុល្លារ ព្រមទាំងទទួលបានឱកាសបានសន្លឹកឆ្នោតផ្សងសំណាង ដើម្បីឈ្នះរង្វាន់ដល់ច្រើនសន្ធឹកសន្ធាប់។ ហើយនឹងទទួលបានបន្ថែមជាមួយ នឹងប័ណ្ណបញ្ចុះតម្លៃ
៣,០០០ដុល្លារ សម្រាប់ការទិញផ្ទះពាណិជ្ជកម្ម ប្រភេទA និងប្រភេទB ដែលនឹងដាក់លក់ក្នុងកម្មវិធីបញ្ចុះបឋមសិលាបើកការដ្ឋានសាងសង់នេះ។

ប្រភេទដីឡូតិ៍នៅក្នុង បុរី អាម៉ូរី ៧មករា មានប្រភេទដីដូចជា ជម្រើសទី១ ដីទំហំ ៥ម X ២០ម។ ជម្រើសទី២ ដីទំហំ ១០ម x ២០ម។ ជម្រើសទី៣ ដីទំហំ ២០ម X ៣០ម។ ចំណែកប្រភេទផ្ទះនៅក្នុង បុរីអាម៉ូរី៧មករា មានប្រភេទដីដូចជា ផ្ទះពាណិជ្ជកម្មប្រភេទA E0+E1+E2។ ផ្ទះពាណិជ្ជកម្មប្រភេទB E0+E1 និងវីឡាកូនកាត់ E0+E1+E2។

បុរី អាម៉ូរី ៧មករា គឺជាគម្រោងដែលផ្តល់ប្រាក់ចំណេញ និងមានភាពទទួលខុសត្រូវខ្ពស់ ក្នុងការអភិវឌ្ឍន៍គម្រោងរបស់ខ្លួនឱ្យបានល្អប្រសើរ និងតាមផែនការច្បាស់លាស់។ សម្រាប់ព័ត៌មានបន្ថែម សូមទាក់ទង លោកស្រី ស៊ី មែនឌី ប្រធានគ្រប់គ្រងទូរស័ព្ទ 089 999 996៕

វិនិយោគិនអចលនទ្រព្យចិនត្អូញត្អែពីតម្លៃជួលផ្ទះ និងដីនៅក្នុងខេត្តព្រះសីហនុមានតម្លៃខ្ពស់

ដោយ វុត្ថា

ព្រះសីហនុៈ វិនិយោគិនអចលនទ្រព្យចិន ដែលបាននិងកំពុងរកស៊ីក្នុងខេត្តព្រះសីហនុអស់រយៈពេល ២ឆ្នាំកន្លងមកនេះ បានត្អូញត្អែពីតម្លៃដី និងជួលបន្ទប់ស្នាក់នៅមានតម្លៃខ្ពស់នៅក្នុងខេត្តមួយនេះ និងស្នើឱ្យអាជ្ញាធរជួយពាក់ព័ន្ធនឹងបញ្ហានេះ។

លោកស្រី Lin Huilan ប្រធានក្រុមហ៊ុនឡាយ មី អន្តរជាតិ នៅក្នុងជំនួបពិភាក្សាទាក់ទងបញ្ហាប្រឈមជាមួយលោក គួច ចំរើនអភិបាលខេត្តព្រះសីហនុកាលពីម្សិលមិញនេះថា ក្រុមហ៊ុនលោកស្រី ជាក្រុមហ៊ុនអចលនទ្រព្យ ប្រកបអាជីវកម្មស្របច្បាប់នៅខេត្ដព្រះសីហនុរយៈពេល ២ឆ្នាំកន្លងមក ដែលបានទាក់ទាញអ្នកវិនិយោគចិនជាច្រើន មកវិនិយោគនៅខេត្តព្រះសីហនុ លើវិស័យសំណង់។

លោកស្រីបន្តថា “បច្ចុប្បន្នប្រជាពលរដ្ឋខ្មែរ មកធ្វើការនៅខេត្តព្រះសីហនុគ្មានកន្លែងស្នាក់នៅសមរម្យ ពួកគាត់អាចមកជួលបន្ទប់អគារវិនិយោគចិន ស្នាក់នៅដោយតម្លៃសមរម្យ ដើម្បីលើកកម្ពស់ដល់អ្នកវិនិយោគចិនផងដែរ។ ព្រមទាំងបានស្នើសុំឱ្យអាជ្ញាធរខេត្ត ក៏ដូចជារាជរដ្ឋាភិបាលជួយបញ្ចុះតម្លៃឈ្នួលផ្ទះ និងដីព្រោះវាមានតម្លៃខ្ពស់”។

លោកគួច ចំរើន អភិបាលខេត្តព្រះសីហនុបានឱ្យដឹងថា កម្ពុជាប្រកាន់ភ្ជាប់ទីផ្សារសេរី ប្រសិនបើអ្នកវិនិយោគចិន សល់បន្ទប់ត្រូវសិក្សាពីតម្លៃ និងធ្វើតារាងតម្លៃជួលបន្ទប់ និងទំហំបន្ទប់មករដ្ឋបាលខេត្ត ហើយរដ្ឋបាលខេត្តនិងជួយផ្សព្វផ្សាយជាសាធារណៈដល់ប្រជាពលរដ្ឋ ហើយនៅពេលខាងមុខ រាជរដ្ឋាភិបាលនឹងសាងសង់ហេដ្ឋារចនាសម្ព័ន្ធពង្រីកផ្លូវ ៣៤ខ្សែ ក្នុងក្រុងព្រះសីហនុ ដើម្បីធ្វើការទាក់ទាញវិនិយោគមកកម្ពុជា ពិសេសមកខេត្តព្រះសីហនុ ។

លោកអភិបាលខេត្តរូបនេះបញ្ជាក់ថា “រាជរដ្ឋាភិបាលចាត់ទុកខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង បាននឹងកំពុងអភិវឌ្ឍន៍បន្ថែមមានដូចជា ភ្លើង ទឹកស្អាត កំពង់ផែទឹកជ្រៅ បំរើការដឹកជញ្ជូនទំនិញចេញចូលយ៉ាងមមាញឹក ព្រលានយន្តហោះអន្តរជាតិ និងផ្លូវគមនាគមន៍”។

ជាមួយគ្នានេះ លោកអភិបាលខេត្តសង្ឃឹមថា ក្រុមហ៊ុន ឡាយ មី អន្តរជាតិ និងទាក់ទាញអ្នកវិនិយោគគិនលើវិស័យផ្សេងៗបន្ថែមទៀតនៅខេត្តព្រះសីហនុ មានដូចជាវិស័យទេសចរណ៍ កសិកម្ម ឧស្សាហកម្មជាដើម។

ប្រធានការិយាល័យទំនាក់ទំនងសាធារណៈនិងពិធីការ នៃរដ្ឋបាលខេត្តព្រះសីហនុ លោកនងឌី ណារ៉ា បានឱ្យដឹងនៅថ្ងៃទី២៩ ខែតុលានេះថា សម្រាប់តម្លៃជួលនៅក្នុងមួយបន្ទប់មានតម្លៃប្រមាណជិត ១០០០ដុល្លារអាមេរិក ទៅតាមប្រភេទទីតាំង និងនៅតាមផ្លូវតាមបណ្តោយតូចៗ មានតម្លៃប្រមាណ ៥០០ដុល្លារអាមេរិក ហើយមកដល់បច្ចុប្បន្នេះ មានតម្លៃប្រមាណជា ៣០០ដុល្លារអាមេរិក។

លោកបន្ថែមថា អ្វីដែលវិនិយោគិនចិន ស្នើសុំឱ្យមានការបញ្ចុះតម្លៃដី ឬជួលបន្ទប់ទៅកាន់រដ្ឋបាលខេត្តនេះ គឺមិនសមហេតុផលនោះទេ ព្រោះប្រទេសកម្ពុជាប្រកាន់យកសេដ្ឋកិច្ចទីផ្សាសេរី បើមិនពេញចិត្តអាចទៅរកន្លែងផ្សេងបាន ដែលស័ក្តិសមទៅនឹងធនធានរបស់ខ្លួន៕

ហុងគ្រីនឹងជួយកម្ពុជាក្នុងការសិក្សាលើបញ្ហាទឹកស្អាត និងសំរាម

ដោយ វុត្ថា

ភ្នំពេញ៖ ប្រធានាធិបតីនៃប្រទេស ហុង គ្រី លោក Janos Ader បានអះអាងថា នឹងបញ្ជូន អ្នកជំនាញការរបស់ហុងគ្រី ដើម្បីមកជួយកម្ពុជាក្នុងការសិក្សាលើបញ្ហាទឹកស្អាត លើបញ្ហាសំរាម ទាំងសំរាមសំណល់រឹង និងសំណល់រាវ និងបញ្ហាផ្សេងៗទៀតពាក់ព័ន្ធនឹងការអភិវឌ្ឍទីក្រុង។

ក្នុងជំនួបជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា លោកប្រធានាធិបតីនៃប្រទេស ហុង គ្រី លោក Janos Ader បានឱ្យដឹងកាលពីល្ងាចថ្ងៃទី ២៨ ខែតុលា ឆ្នាំ ២០១៩ ម្សិលមិញនេះថា បន្ទាប់ពីការសិក្សាហើយក្រុមអ្នកជំនាញរបស់ហុងគ្រី នឹងផ្ដល់ជូននិងណែនាំនូវបច្ចេកវិទ្យា និងដំណោះស្រាយដើម្បីដោះស្រាយបញ្ហាទឹកស្អាត បញ្ហាសំណល់រឹង សំណល់រាវនៅកម្ពុជាយើង។

លោកប្រធានាធិបតីបន្ថែមថា លើសពីនេះទៅទៀត ដើម្បីជំរុញការអភិវឌ្ឍន៍កម្ពុជារយៈពេលវែងទាំងសង្គម ទាំងធនធានមនុស្ស ទាំងសុខភាពផងនោះ ។ ជាមួយគ្នានេះ លោកបានលើកឡើងសារជាថ្មីទៀតថា ប្រទេសហុងគ្រីនៅតែបន្តគាំទ្រកម្ពុជា និងស្នើសុំឱ្យមិនឱ្យមានការដកហូត EBA ពីកម្ពុជាផងដែរ។

សម្ដេចតេជោ ហ៊ុន សែន បានថ្លែងអំណរគុណចំពោះលោកប្រធានាធិបតីហុងគ្រី ចំពោះអ្វីដែលបានលើកឡើងពីការជួយដល់ការអភិវឌ្ឍន៍កម្ពុជា ។

សម្តេចថា “ជំនួបរបស់យើងជាលើកទី៣នេះ គឺជាការភ្ជាប់ទំនាក់ទំនង ក៏ដូចជាការកសាងទំនាក់ទំនង និងពង្រឹងទំនាក់ទំនងយើងឡើងវិញ។ ទំនាក់ទងកម្ពុជា និងហុងគ្រីមានអស់រយៈពេលជាង៦០ឆ្នាំមកហើយ។ ពាក់ព័ន្ធនឹងបញ្ហាទឹក និងសំរាម សម្ដេចតេជោបានស្នើសុំឲ្យភាគីហុងគ្រីបញ្ជូនអ្នកជំនាញដើម្បីមកធ្វើការសិក្សា ផ្តល់យោបល់ និងចូលរួមសហការជាមួយកម្ពុជាយើងលើទាំងបញ្ហាទឹកស្អាត បញ្ហាសំណល់រឹង និងសំណល់រាវ។

សម្ដេចថាយើងត្រូវផ្តល់អទិភាពលើកិច្ចសហប្រតិបត្តិការនេះ ទៅលើបញ្ហាសំណល់រឹង និងសំណល់រាវ នៅក្នុងទីក្រុងភ្នំពេញ និងទីក្រុងផ្សេងៗទៀតទៅតាមដងសមុទ្រ និងតាមដងទន្លេមេគង្គ ។ សម្តេចតេជោក៏បានជម្រាបជូនអំពីប្រវត្តិសាស្ត្ររបស់កម្ពុជាយ៉ាងសង្ខេបថា កម្ពុជាកន្លងមកតែងតែមានការបែកបាក់គ្នា ហើយរហូតមកដល់ប៉ុន្មានឆ្នាំក្រោយនេះ កម្ពុជាក៏ទទួលបានសុខសន្តិភាព និងស្ថេរភាពពេញលេញ ថែមទាំងមានកំណើនសេដ្ឋកិច្ចរហូតដល់ជាង៧%។

សម្តេចតេជោក៏បានថ្លែងអំណរគុណជូនចំពោះប្រទេស ហុងគ្រីដែលបានផ្ដល់នូវការគាំទ្រដល់កម្ពុជា ជាពិសេសលើឯកសារដែលបានចុះហត្ថលេខាកន្លងមកនោះគឺទី ១)គម្រោងតេជោភូមិ១០០ ទី២)សកម្មភាពដោះមីន ដើម្បីជំរុញអោយកម្ពុជាក្លាយជាប្រទេសគ្មានមីននៅឆ្នាំ២០២៥ និងទី៣)អាហារូបករណ៍ជូនដល់និស្សិតកម្ពុជាចំនួន១៥ក្នុង១ឆ្នាំ៕