ប្រតិភូធុរកិច្ចមកពីខេត្តហ្វូជានស្វែងយល់ពីឱកាសវិនិយោគបន្ថែមនៅកម្ពុជា

ដោយរ៉ា ណេត

ភ្នំពេញៈ គណៈប្រតិភូធុរជនមកពីខេត្តហ្វូជាន ប្រទេសចិន មួយក្រុមបានមកសិក្សាស្វែងយល់ពីសក្ដានុពល និងឱកាសវិនិយោគនៅកម្ពុជា ជាមួយនឹងការបង្កើតទំនាក់ទំនងជាមួយក្រុមហ៊ុនក្នុងស្រុកធ្វើជាដៃគូ។

ស្ថិតនៅការិយាល័យនៃក្រុមហ៊ុន Prince Holding Group កាលពីថ្ងៃទី២៨ ខែតុលា ឆ្នាំ២០១៩ ក្រោមអធិបតីភាពរបស់លោកឈួន ដារ៉ា រដ្ឋលេខាធិការក្រសួងពាណិជ្ជកម្ម គណៈប្រតិភូធុរជនចិនដែលមកពីខេត្តហ្វូជាន បានបង្ហាញពីចំណាប់អារម្មណ៍ក្នុងការវិនិយោគនៅកម្ពុជា រួមជាមួយនឹងគោលបំណងស្វែងរកក្រុមហ៊ុន ក្នុងស្រុកធ្វើជាដៃគូផងដែរ។

រដ្ឋលេខាធិការក្រសួងពាណិជ្ជកម្ម លោកឈួន ដារ៉ា បានមានប្រសាសន៍ថារាជរដ្ឋាភិបាលកម្ពុជាបានជំរុញ និងខិតខំប្រឹងប្រែងផ្តល់ជូនពាណិជ្ជករបរទេស ដែលមានបំណងវិនិយោគនៅកម្ពុជា នឹងទទួលកិច្ចសម្រួលបំពេញបែបបទងាយស្រួល ព្រមទាំងផ្តល់ឱកាសវិនិយោគនៅកម្ពុជាលើការលើកលែងពន្ធ និងពន្ធបង់នូវកម្រិតទាបសម្រាប់នាំចេញ-នាំចូលផលិតផលទៅកាន់ប្រទេសមួយចំនួនដូចជា សហភាពអ៊ឺរ៉ុប ជប៉ុន កាណាដា និងអាមេរិកជាដើម។

លោកបានបន្តទៀតថា “កម្ពុជាបានសម្រួលជូនដល់ពាណិជ្ជករបរទេស នូវការវិនិយោគ លើការលើកលែងពន្ធចំនួនពី១-៩ឆ្នាំ ការអនុគ្រោះពន្ធលើការបង់ពន្ធអប្បបរិមា ពន្ធលើប្រាក់ចំណេញមិនលើសពី២០ភាគរយ ដោយអ្នកវិនិយោគអាចបង្វិលទុនមានភាពងាយស្រួល និងមានដើមទុនរបស់ខ្លួន១០០ភាគរយ”។

ប្រធានមន្ទីរពាណិជ្ជកម្ម ខេត្តហ្វូជាន ប្រទេសចិន លោក LIU DEPEI បានសម្តែងនូវភាពរីករាយ សម្រាប់វត្តមានចូលរួមរបស់ថ្នាក់ដឹកនាំក្រសួងពាណិជ្ជកម្មកម្ពុជា ចំពោះកិច្ចស្វាគមន៍យ៉ាងកក់ក្តៅ ដល់គណៈប្រតិភូខេត្តហ្វូនជាន ដែលអញ្ជើញបំពេញទស្សនកិច្ចនៅកម្ពុជា។

លោកបានមានប្រសាសន៍ថា “ខេត្តហ្វូជាន ដែលស្ថិតតាមបណ្តោយឆ្នេរសមុទ្រចិន ក្នុងរយៈពេល ៤០ឆ្នាំកន្លងមក គឺមានការអភិវឌ្ឍ និងរីកចម្រើនច្រើនគួរឱ្យកត់សម្គាល់ ជាពិសេស មានការធ្វើកំណែទម្រង់ស្ទើរគ្រប់វិស័យ និងមានទំនាក់ទំនងល្អក្នុងការនាំចេញ-នាំចូលផលិតផលទៅកាន់ប្រទេសនានា ស្របតាមយុទ្ធសាស្រ្តខ្សែក្រវ៉ាត់ និងផ្លូវមួយ បានជំរុញឱ្យកម្ពុជា-ចិនមានកិច្ចសហប្រតិបត្តិការកាន់តែស៊ីជម្រៅបន្ថែមទៀត”។

ជាមួយគ្នានេះ លោកបានលើកនូវចំណុចសំខាន់៣ នៃកិច្ចសហប្រតិបត្តិការរវាងកម្ពុជា-ខេត្តហ្វូនជាន រួមមាន ទី១ ពង្រីកទំហំពាណិជ្ជកម្ម ដោយវិនិយោគនៅកម្ពុជាលើឧស្សាហកម្មធុនស្រាស កសិកម្ម និងធនធានរ៉ែ ទី២ ពង្រីកកិច្ចសហប្រតិបត្តិការលើការវិនិយោគនៅកម្ពុជា នឹងដឹកនាំសហគ្រាសខេត្តហ្វូជាន ធ្វើពាណិជ្ជកម្មលើវិស័យវាយភណ្ឌ ស្បែកជើង សម្លៀក បំពាក់ និងអាហារ ព្រមទាំងស្វាគមន៍ចំពោះពាណិជ្ជករកម្ពុជាវិនិយោគនៅខេត្តហ្វូជាន និងទី៣ ពង្រីក និងពង្រឹងការផ្លាស់ប្តូរ ការទំនាក់ទំនង និងទស្សនកិច្ចរវាងកម្ពុជា-ខេត្តហ្វូជាន ប្រទេសចិន៕

កម្ពុជាររំពឹងទទួលបានកំនើនទេសចរណ៍៍ពីវៀតណាមតាមរយៈការតភ្ជាប់ជើងហោះហើរត្រង់

ដោយៈ រ៉ាណេត

ភ្នំពេញៈ ជើងហោះហើរត្រង់ពីរាជធានីភ្នំពេញទៅកាន់ទីក្រុងដាណាំង ប្រទេសវៀតណាម របស់ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ ត្រូវបានសម្ពោធជាផ្លូវការ និងចាប់ផ្តើមហោះហើរជាលើកដំបូងបង្អស់ ជាមួយនឹងការរំពឹងទុកថា កម្ពុជានឹងទទួលបានកំណើនទេសចរបន្ថែមទៀត ពីគោលដៅទេសចរណ៍ដ៏ល្បីរបស់វៀតណាមមួយនេះ។

ការសម្ពោធជាផ្លូវការនេះ ធ្វើឡើងនៅព្រលានយន្តហោះអន្តរជាតិដាណាំង កាលពីល្ងាចចុងសប្ដាហ៍កន្លងទៅនេះ ដោយបាននាំយកប្រតិភូកម្ពុជា ដឹកនាំដោយលោកសូ វិសុទ្ធី អនុរដ្ឋលេខាធិការក្រសួងទេសចរណ៍ រួមជាមួយលោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា និងក្រុមហ៊ុនទេសចរណ៍ជាច្រើននាក់ទៀត។

លោកសូ វិសុទ្ធី បានមានប្រសាសន៍ថា “ការបើកជើងហោះហើរត្រង់នេះ បង្ហាញពីការតាំងចិត្តយ៉ាងមុះមុត និងការខិតខំប្រឹងប្រែងរបស់ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ ក្រសួងទេសចរណ៍ និងរដ្ឋលេខាធិការដ្ឋានអាកាសចរស៊ីវិល ព្រមទាំងផ្នែកពាក់ព័ន្ធ ក្នុងការតភ្ជាប់កម្ពុជាទៅកាន់គោលដៅ និងប្រភពទីផ្សារដ៏មានសក្តានុពលក្នុងតំបន់ ដើម្បីទាក់ទាញភ្ញៀវទេសចរអន្តរជាតិ ពីប្រភពទីផ្សារទាំងនោះ និងភ្ញៀវទេសចរពីប្រទេសទី៣”។លោកបានបន្តទៀតថា “តាមរយៈការហោះហើរទាំងនេះ នឹងជួយជំរុញសកម្មភាពពាណិជ្ជកម្ម វិនិយោគ សេដ្ឋកិច្ច កិច្ចសហប្រតិបត្តិការ និងរឹតចំណងមិត្តភាពកម្ពុជា-វៀតណាមឱ្យកាន់តែជិតស្និទ្ធថែមទៀតផង”។

ប្រធានសមាគមន៍ទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីន បានលើកឡើងផងដែរថា ការបើកជើងហោះហើរត្រង់ពីរាជធានីភ្នំពេញ ទៅកាន់ខេត្តដាណាំងនេះ នឹងជួយជំរុញឱ្យមានកំណើនទេសចរ មកកានកម្ពុជាច្រើនបន្ថែមទៀត។ លោកស្រីបានបន្តទៀតថា ពីមុនភ្ញៀវទេសចរដែលចេញពីដាណាំងមកកាន់កម្ពុជា ត្រូវឆ្លងកាត់តាមទីក្រុងហូជីមិញសិន ហើយត្រូវចំណាយពេលវេលា និងថវិកាច្រើន អាចដល់កន្លះថ្ងៃ ឬស្ទើរតែមួយថ្ងៃតែម្ដង ទើបអាចមកដល់រាជធានីភ្នំពេញបាន ប៉ុន្តែចាប់ពីពេលនេះទៅ ភ្ញៀវទេសចរចំណាយពេលតែ១ម៉ោង១០នាទីប៉ុណ្ណោះ។

លោកស្រីបានបន្តថា “ការដឹកជញ្ជូនភ្ញៀវពីវៀតណាម មកកាន់កម្ពុជានឹងមានកាន់ច្រើនឡើង ហើយក៏សង្ឃឹមថានឹងអាចទាក់ទាញភ្ញៀវបរទេសផ្សេងទៀត ដែលឆ្លងកាត់ខេត្តដាណាំងនេះមកកាន់កម្ពុជាផងដែរ ដោយសារតែភ្ញៀវទេសចរមកពីប្រទេសផ្សេងៗភាគច្រើនត្រូវឆ្លងកាត់ខេត្តនេះ”៕

CEO Master Club មានសមាជិកគ្រប់គ្រងអាជីវកម្ម ២០០០ក្រុមហ៊ុន និងប្រតិបត្តិការលើទឹកប្រាក់ជាង ១០០០លានដុល្លារ

ដោយៈ រ៉ាណេត

ភ្នំពេញៈ ក្នុងរយៈពេល១០ឆ្នាំកន្លងទៅនេះ CEO master Club បានបណ្ដុះបណ្ដាលសហគ្រិនកម្ពុជារាប់ម៉ឺននាក់ និងមានសមាជិកម្ចាស់អាជីវកម្មពេញមួយជីវិតជាង ១,០០០នាក់ ដែលគ្រប់គ្រងអាជីវកម្មប្រមាណ ២,០០០ក្រុមហ៊ុន កំពុងប្រតិបត្តិការអាជីវកម្មជាទឹកប្រាក់ប្រមាណជាង ១,០០០លានដុល្លារក្នុងមួយឆ្នាំ និងបង្កើតការងារជូនប្រជាពលរដ្ឋបានប្រមាណ ១០ម៉ឺននាក់។

CEO Master Club ជាស្ថាប័នប្រមូលផ្ដុំ និងបង្វឹកម្ចាស់អាជីវកម្មខ្នាតតូច និងមធ្យមនៅកម្ពុជា ឱ្យក្លាយទៅជាអគ្គនាយកដែលមានលក្ខណៈអាជីព និងមានសមត្ថភាពខ្ពស់ក្នុងការដឹកនាំគ្រប់គ្រង ចាត់ចែងស្ថាប័នអាជីវកម្មរបស់ខ្លួនពីតូចទៅធំ ពីលក្ខណៈគ្រួសារទៅស្តង់ដារ ពង្រីកបណ្តាញការលក់កាន់តែទូលាយ លើកកេរ្តិ៍ឈ្មោះអាជីវកម្មរបស់ខ្លួនបានកាន់តែខ្លាំង ដើម្បីចូលរួមចំណែកអភិវឌ្ឍសេដ្ឋកិច្ចក្នុងស្រុកឱ្យមានភាពរឹងមាំ។

មានប្រសាសន៍នៅក្នុងពិធីប្រារព្វខួប១០ឆ្នាំ នៃកិច្ចដំណើរការរបស់ CEO Master Club នៅសណ្ឋាគារសុខាភ្នំពេញ ក្រោមការចូលរួមពីសំណាក់ម្ចាស់អាជីវកម្មជោគជ័យជាង១៣០០នាក់ កាលពីរាត្រីថ្ងៃទី២៦ ខែតុលា ឆ្នាំ២០១៩ កន្លងទៅលោក អោម សេងបូរ៉ា ស្ថាបនិក CEO Master Club International និងវិទ្យាស្ថាន CEO បានលើកឡើងថា បើយើងទាំងអស់គ្នាចង់ឱ្យកម្ពុជា ក្លាយជាប្រទេសអ្នកមានបានឆាប់រហ័ស ដាច់ខាតត្រូវតែជួយកសាងសមត្ថភាព និងជ្រោមជ្រែងសហគ្រិននៅក្នុងស្រុកឱ្យមានភាពរឹងមាំ។

លោកបានបន្តទៀតថា សហគ្រិនគឺជាសរសរទ្រូងសេដ្ឋកិច្ចដ៏រឹងមាំដូចជា ទី១ បានបង្កើតផលិតផលសេវាកម្ម ឆ្លើយតបតម្រូវការរបស់សង្គមជាតិ ទី២ បង្កើតការងារ និងប្រាក់ចំណូលជូនប្រជាពលរដ្ឋបានច្រើន ទី៣ ចូលរួមចំណែកកសាងគុណភាពធនធានមនុស្សបានច្រើន និងទី៤ ចូលរួមបង្កើនចំណូលពន្ធជូនរដ្ឋបានច្រើន ដែលទាំងនេះបានចូលរួមចំណែកជាមួយរាជរដ្ឋាភិបាល ក្នុងការជម្រុញឱ្យសេដ្ឋកិច្ចជាតិមានការរីកចម្រើនបានឆាប់រហ័ស និងរឹងមាំយូរអង្វែង។

លោកបានបន្តទៀតថា “ជាបទពិសោធន៍ និងលទ្ធផលនៃកិច្ចប្រឹងប្រែងរបស់ CEO Master Clubក្នុងរយៈពេល១០ឆ្នាំកន្លងទៅនេះ ពេលនេះយើងបានបណ្ដុះបណ្ដាលសហគ្រិនកម្ពុជារាប់ម៉ឺននាក់ និងមានសមាជិកម្ចាស់អាជីវកម្មពេញមួយជីវិតជាង១,០០០នាក់ ដែលគ្រប់គ្រងអាជីវកម្មប្រមាណ២,០០០ក្រុមហ៊ុន កំពុងប្រតិបត្តិការអាជីវកម្មជាទឹកប្រាក់ប្រមាណជាង១,០០០លានដុល្លារក្នុងមួយឆ្នាំ និងបង្កើតការងារជូនប្រជាពលរដ្ឋបានប្រមាណ១០ម៉ឺននាក់”។

លោកអោម សេងបូរ៉ាបានបន្តទៀតថា “ជាការកំណត់សម្គាល់ CEO Master Club បានរកឃើញសហគ្រិនឆ្នើមប្រចាំឆ្នាំ២០១៩ចំនួន៧៨រូប ក្នុងចំណោមជាង១០០០នាក់ រួមជាមួយនឹងការប្រគល់ពានរង្វាន់ផងដែរ”។

ពានរង្វាន់ដែលត្រូវបានប្រគល់ជូនសហគ្រិនឆ្នើម (CEO Award) ទាំង៧៨រូបខាងលើនេះត្រូវបានចែកចេញជា៤ប្រភេទ រួមមានដូចជា ទី១ Master CEO Award (ពាន ស៊ីអ៊ីអូ ម៉ាស្ទ័រ) ជាពានជ័យលាភីសម្រាប់ទទួលស្គាល់ និងលើកទឹកចិត្តសហគ្រិនដែលបានតស៊ូខិតខំប្រឹងប្រែងកសាងសមត្ថភាពរបស់ខ្លួនឱ្យក្លាយជាអ្នកដឹកនាំធុរកិច្ចកំពូលជាមួយ CEO Master Club ចាប់ពី ៨ កម្មវិធីឡើងទៅដើម្បីមានសមត្ថភាពក្នុងការដឹកនាំគ្រប់គ្រងអាជីវកម្មរបស់ខ្លួនពីតូចទៅធំ ពីលក្ខណៈគ្រួសារទៅស្តង់ដារ និងចូលរួមចំណែកអភិវឌ្ឍសេដ្ឋកិច្ចក្នុងស្រុកឱ្យកាន់តែមានភាពរឹងមាំ។ ទី២ Outstanding Entrepreneur Medal (មេដាយសហគ្រិនឆ្នើម) ជាមេដាយសម្រាប់ទទួលស្គាល់ស្នាដៃសហគ្រិនលេចធ្លោរបស់CEO Master Club ដែលបង្ហាញពីលទ្ធផលនៃការរីកចម្រើនអាជីវកម្មរបស់ខ្លួនគួរឱ្យកត់សម្គាល់ បន្ទាប់ពីបានអនុវត្តនូវរបៀបរបប ក្នុងការដឹកនាំគ្រប់គ្រងអាជីវកម្មរបស់ខ្លួន ពីលក្ខណៈគ្រួសារទៅស្តង់ដា បន្ទាប់ពីបានចូលរួមជាសមាជិកគ្រួសារ CEO Master Club។

ទី៣ Outstanding Accounting Award (ពានគណនេយ្យឆ្នើម) ជាពានសម្រាប់ទទួលស្គាល់ និងលើកទឹកចិត្តដល់សហគ្រិនឆ្នើមរបស់ CEO Master Club ដែលបានរៀបចំរបៀបរបប និងស្តង់ដារគ្រប់គ្រងគណនេយ្យ និងហិរញ្ញវត្ថុបានល្អ និងរឹងមាំសម្រាប់ក្រុមហ៊ុនរបស់ខ្លួន។ ទី៤ Outstanding CEO Award (ពាន ស៊ីអ៊ីអូ ឆ្នើម) ជាពានជ័យលាភីសម្រាប់ទទួលស្គាល់ស្នាដៃ សហគ្រិនឆ្នើមរបស់សមាជិក CEO Master Club ដែលបានជ្រើសរើសដោយគណៈកម្មការCEO Awardថា ជាបេក្ខភាពដែលបានបង្ហាញលទ្ធផល និងការអនុវត្តនូវរបៀបរបបក្នុងការដឹកនាំ គ្រប់គ្រងអាជីវកម្មរបស់ខ្លួនពីលក្ខណៈគ្រួសារទៅស្តង់ដារ ឱ្យមានការចម្រើនខ្លាំងទាំងលក្ខណៈជាបុគ្គលជាគ្រួសារ ជាស្ថាប័ន និងចូលរួមចំណែកយ៉ាងសកម្មក្នុងកិច្ចការសង្គម បន្ទាប់ពីបានចូលរួមជាសមាជិកគ្រួសារ CEO Master Club៕

ចំណេះដឹង! ហេតុអ្វីកម្ពុជាត្រូវស្ថាបនាផ្លូវល្បឿនលឿន?

ដោយ វុត្ថា

ភ្នំពេញៈ បច្ចុប្បន្ននេះកម្ពុជាបានពង្រឹងសមត្ថភាព នៃបណ្តាញផ្លូវដែលមានស្រាប់ និងសាងសងផ្លូវល្បឿនលឿន ដើម្បីឲ្យស្របទៅតាមកំណើនសេដ្ឋកិច្ច ដ៏ឆាប់រហ័សរបស់ខ្លួន ក៏ដូចជា ជម្រុញកិច្ចសហប្រតិបត្តិការក្នុងតំបន់អាស៊ាន និងបណ្តាប្រទេសមហាអនុតំបន់ទន្លេមេគង្គ។

យោងតាមឯកសាររបស់ក្រសួងសាធារណៈការ និងដឹកជញ្ជូនបានឱ្យដឹងថា ការសាងសង់បណ្តាញផ្លូវល្បឿនលឿន (Expressway) ជាកត្តាដ៏ធំជាងគេសម្រាប់ពង្រឹងសមត្ថភាពបណ្តាញផ្លូវនៅកម្ពុជា ព្រោះផ្លូវល្បឿនលឿន អាចបម្រើសេវាកម្មដឹកជញ្ជូនល្អជាងផ្លូវធម្មតា និងត្រូវបានគេចាត់ទុកជាមូលដ្ឋាន សម្រាប់វិស័យឧស្សាហកម្មទំនើបៗ និងសកម្មភាពដឹកជញ្ជូនធុនធ្ងន់ផងដែរ។

ឯកសារដដែលបន្តថា ផ្លូវល្បឿនលឿន គឺជាផ្លូវសម្រាប់យានយន្តធ្វើចរាចរណ៍ មានបរិក្ខារបែងចែកទ្រូងផ្លូវជាពីរចំណែក ខុសទិសគ្នាឬចែកជាគន្លងផ្លូវ គ្មានកន្លែងផ្លូវប្រសព្វលើផ្ទៃរាបមួយ ឬត្រូវមានផ្លូវប្រសព្វតិចបំផុតក្នុងករណីចាំបាច់ និងបំពាក់គ្រប់គ្រាន់នូវបរិក្ខារផ្លូវថ្នល់ ដើម្បីធានាលំហូរចរាចរណ៍ សុវត្ថិភាព និងដើម្បីបន្ថយពេលវេលាធ្វើដំណើរ និងមានកន្លែងកំណត់សម្រាប់ឲ្យយានយន្តចេញ និងចូលផ្លូវល្បឿនលឿន។

គោលបំណងនៃគម្រោងសាងសង់ ផ្លូវល្បឿនលឿននៅកម្ពុជាមានដូចជាទី១ ដើម្បីធ្វើសមាហរណកម្មក្នុងតំបន់ (ទាំងក្នុងអាស៊ាន និងមហាអនុតំបន់ទន្លេមេគង្គ) ក៏ដូចជាពិភពលោកទាំងមូល ជួយតភា្ជប់បណ្តាញដឹកជញ្ជូនក្នុងតំបន់ ពីប្រទេសមួយទៅប្រទេសមួយទៀត ដើម្បីលើកកម្ពស់សមត្ថភាពដឹកជញ្ជូនកម្ពុជា ឲ្យសមស្របទៅតាមការអភិវឌ្ឍបែបសាកលភាវូបនីយកម្ម។

ទី២ បង្កើនតុល្យភាពនៃការអភិវឌ្ឍដែនដី ដោយផ្សារភ្ជាប់រាជធានីភ្នំពេញជាមួយនឹងទីរួមខេត្តនានា និងជាមាគ៌ាឆ្ពោះទៅកាន់ពិភពលោកៈ បង្កើនសមត្ថភាពដឹកជញ្ជូននិងលើកកម្ពស់ប្រសិទ្ធភាព ផ្នែកភស្តុភារនៅក្នុងប្រទេសពិសេស ពីភ្នំពេញទៅបណ្តាខេត្តនានា ដើម្បីធ្វើឲ្យនៅតាមខេត្តមានភាពរីកចម្រើនបានឆាប់រហ័ស។

ទី៣ ពង្រឹងនិងកែលម្អស្ថានភាពចរាចរណ៍នៅកម្ពុជា៖ផ្លូវល្បឿនលឿនមានសមត្ថភាពខ្ពស់ ក្នុងការទទួលបន្ទុកយានយន្តធ្ងន់ៗ បម្រើសេវាកម្មបានល្អ និងអាចទាក់ទាញយានយន្តនានា ដែលចរាចរតាមផ្លូវជាតិ កត្តានេះនឹងជួយសម្រាលការខូចខាត ហើយកាត់បន្ថយស្ថានភាពមមាញឹកនៅតាមផ្លូវជាតិទៀតផង៕

សេដ្ឋកិច្ចក្រុងហុងកុងបានចាប់ផ្តើមធ្លាក់ចូលក្នុងវិបត្តិ

ដោយ Donald Lee

ហុងកុង៖ ការប្រមូលផ្តុំគ្នាគាំទ្រលទ្ធិប្រជាធិបតេយ្យប្រកបដោយអំពើហិង្សារយៈពេល ២២ សប្តាហ៍បានផ្តួលរំលំប្រទេសដែលមានសេដ្ឋកិច្ចធំជាងគេមួយនៅអាស៊ី ខណៈឥឡូវនេះទីក្រុងហុងកុងប្រឈមមុខនឹងការធ្លាក់ចុះថែមទៀត នៅពេលដែលរដ្ឋាភិបាលបានប្រកាសថាសេដ្ឋកិច្ចកំពុងធ្លាក់ចុះ។

ទិន្នន័យសេដ្ឋកិច្ចត្រីមាសទី ៣ របស់ហុងកុងបានបង្ហាញថា ទឹកដីនេះបានឆ្លងកាត់ការធ្លាក់ចុះ ២ ត្រីមាសជាប់គ្នាដែលបង្ហាញថា ហុងកុងបានធ្លាក់ចូលក្នុងវិបត្តិសេដ្ឋកិច្ចជាផ្លូវការ។

រដ្ឋលេខាធិការហិរញ្ញវត្ថុហុងកុងលោក Paul Chan Mo-po បានសរសេរនៅក្នុង Blog ប្រចាំសប្តាហ៍របស់លោកថា “រដ្ឋាភិបាលនឹងប្រកាសពីការប៉ាន់ស្មានជាមុនរបស់ខ្លួនសម្រាប់ត្រីមាសទី ៣ នៅថ្ងៃព្រហស្បតិ៍ បន្ទាប់ពីបានឃើញកំណើនអវិជ្ជមាននៅក្នុងត្រីមាសទី ២ វាមានន័យថា សេដ្ឋកិច្ចរបស់យើងបានធ្លាក់ចូលក្នុងវិបត្តិសេដ្ឋកិច្ច”។

IMF រំពឹងថា អត្រាកំណើនផលិតផលក្នុងស្រុកសរុបហុងកុងនឹងធ្លាក់ចុះប្រហែល ០.៣ ភាគរយក្នុងឆ្នាំនេះ ហើយបានព្យាករណ៍ថានឹងមានកំណើន ១,៥ ភាគរយនៅឆ្នាំ ២០២០ ដែលជាការធ្លាក់ចុះយ៉ាងខ្លាំងពីការប៉ាន់ស្មានកំណើន ២,៩ ភាគរយរបស់ខ្លួន។

ទោះយ៉ាងណា លេខាធិការហិរញ្ញវត្ថុមានទុទិដ្ឋិនិយមជាចំហនៅក្នុង Blog របស់លោកអំពីការលូតលាស់សម្រាប់ពេលវេលាដែលសល់នៃឆ្នាំ ២០១៩ ដែលអាចទាញសេដ្ឋកិច្ចចេញពីការធ្លាក់ចុះ។

លោក បន្ថែមថា “វាហាក់ដូចជាមានការលំបាកខ្លាំងណាស់សម្រាប់យើងក្នុងការឈានដល់កំណើនសេដ្ឋកិច្ចពេញមួយឆ្នាំពី ០ ទៅ ១ ភាគរយ។ ខ្ញុំនឹងមិនច្រានចោលលទ្ធភាពដែលកំណើនសេដ្ឋកិច្ចពេញមួយឆ្នាំនឹងមានភាពអវិជ្ជមាននោះទេ”។

ក្រុមអ្នកតវ៉ាបានធ្វើឱ្យទីក្រុងនេះមានភាពវឹកវរកាលពីចុងសប្តាហ៍ដោយបិទផ្លូវ និងបើកការវាយប្រហារជាមួយប៉ូលីសនៅក្នុងតំបន់ទេសចរណ៍ដែលមានប្រជាប្រិយភាព Tsim Sha Tsui និង Mong Kok កាលពីម្សិលមិញ៕

ក្រុងព្រះសីហនុដាក់ឱ្យដំណើររថយន្ត Taxi ចំនួន ៣០គ្រឿងជាលើកដំបូង

ដោយ វុត្ថា

ព្រះសីហនុ៖ ក្រុមហ៊ុនហ៊ុន ស៊ីន ភីន អាន ត្រេនស្ពតថេសិន ខេមបូឌា បានដាក់អោយដំណើរការអាជីវកម្មដឹកអ្នកដំណើរ(Taxi) ចំនួន ៣០គ្រឿងក្នុងក្រុងព្រះសីហនុ ជាមួយនឹងបច្ចេកវិទ្យាទំនើប ដើម្បីឆ្លើយតបទៅនឹងការរីកចំរើននៅក្នុងក្រុង ដឹកជញ្ជូនភ្ញៀវទេសចរណ៍។

លោកឧកញ៉ា ហេង វណ្ណា អគ្គនាយកនៃសហភាគហ៊ុន ស៊ីន ភីន អាន ត្រេនស្ពតថេសិន ខេមបូឌា បានអោយដឹងនៅក្នុងពិធីសម្ពោធកាលពីចុងសប្តាហ៍កន្លងមកនេះ ថា ក្នុងជំហ៊ានដំបូង ក្រុមហ៊ុននឹងដាក់អោយដំណើរការរថយន្តចំនួន ៣០គ្រឿង សិន ដោយបានផ្តល់កន្លែងការងារដល់ពលរដ្ឋខ្មែរចំនួន ១០០នាក់ ។

លោកឧញ៉ាបន្តថា ការដាក់ឱ្យដំណើរនូវរថយន្តដឹកអ្នកដំណើរនេះ គឺដើម្បីចូលរួមបំរើដល់វិស័យទេសចរណ៍នៅក្នុងខេត្ត បើទោះបីបច្ចុបប្បន្ននេះផ្លូវនៅក្នុងក្រុងមិនទាន់ត្រូវបានស្ថាបនារួចរាល់ហើយយ៉ាងណាក្តី តែនៅពេលរដ្ឋាភិបាលស្ថាបនាផ្លូវនៅក្នុងនឹងធ្វើឱ្យអាជីវកម្មមួយនេះកាន់តែទទួលបានការគាំទ្រកាន់តច្រើន។

លោកឧកញ៉ា បានបន្តថា ជាទឹសដៅផែនការ ក្រុមហ៊ុននឹងដាក់បន្ថែមរថយន្ត៧០គ្រឿង ទៀត ឬច្រើនជាងនេះ ទៅតាមតំរូវការទីផ្សារជាក់ស្តែង ។

លោក លៀម សុដា អភិបាលរងខេត្តព្រះសីហនុ បានផ្តល់អនុសាសន៏គាំទ្រចំពោះដំណើរការអាជីវកម្មដឹកអ្នកដំណើរក្នុងក្រុងនេះ ។ តែដើម្បីរក្សាសុខសុវត្ថិភាពដល់អ្នកដំណើរ ក៏ដូចជាចូលរួមកាត់បន្ថយគ្រោះថ្នាក់ចរចរណ៏ ក្រុមហ៊ុនត្រូវបំពាក់បំប៉នជំនាញ និងធ្វើការជ្រើសរើសអ្នកបើកបរ អ្នកបច្ចេកទេស ដែលមានសមត្ថភាពច្បាស់លាស់ ព្រមទាំងគោរពច្បាប់ទាំងអស់គ្នា ៕

ប្រធានាធិបតីហុងគ្រីសសើរទីក្រុងភ្នំពេញមានការអភិវឌ្ឍន៍ និងមានអគារខ្ពស់ៗច្រើន

ដោយ វុត្ថា

ភ្នំពេញ៖ លោក Janos Ader ប្រធានាធិបតីសាធារណរដ្ឋហុងគ្រីបានសសើរពីការអភិវឌ្ឍទីក្រុងភ្នំពេញប្រកបដោយវិបុលភាព ដោយមានអគារខ្ពស់ៗ នាពេលបច្ចុប្បន្ននេះ ជាសញ្ញាបង្ហាញពីអនាគតដ៏ល្អរបស់កម្ពុជា។

ក្នុងឱកាសជួបសម្តែងការគួរសមជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា នៅរសៀលថ្ងៃទី២៨ ខែតុលា ឆ្នាំ២០១៩នេះ លោក Janos Ader ប្រធានាធិបតីសាធារណរដ្ឋហុងគ្រី បានសម្តែងការចូលរួមអបអរសាទរជាមួយវឌ្ឍនភាពកម្ពុជា និង ជាប្រទេសមួយដែលមានវប្បធម៌ អរិយធម៌ដ៏រុងរឿង និងយូរលុងមកហើយ ប្រាសាទអង្គរ ជាអច្ឆរិយដ៏ល្អឯកមួយ ដែលពលរដ្ឋហុងគ្រីចង់មកទស្សនា។

សម្តេចអគ្គមហាពញាចក្រី ហេង សំរិន បានឱ្យដឹងដែរថា វត្តមានដ៏ខ្ពង់ខ្ពស់របស់លោកប្រធានាធិបតី និងគណៈប្រតិភូជាន់ខ្ពស់នៅពេលនេះ មានអត្ថន័យជា ប្រវត្តិសាស្រ្ត និងបានផ្តល់កិត្តិយសយ៉ាងធំធេងដល់ប្រជាជាតិកម្ពុជា។ រដ្ឋសភាកម្ពុជា វាយតំលៃខ្ពស់ និងពេញចិត្ត ចំពោះវឌ្ឍនភាព នៃកិច្ចសហប្រតិបត្តិការទ្វេភាគី រវាងរដ្ឋាភិបាល នៃប្រទេសទំាងពីរ រួមទំាងសមិទ្ធិផលនានា ដែលប្រមុខរដ្ឋាភិបាល នៃប្រទេសទំាងពីរខិតខំរួមគ្នាសម្រេចបានមកនេះ។

សម្តេចប្រធានរដ្ឋសភា បានរម្លឹកថា ហុងគ្រី គឺជាមិត្តចាស់របស់កម្ពុជា ដែលធ្លាប់មានគុណបំណាច់ដ៏ធំចំពោះកម្ពុជា កាលពីទសវត្សរ៍ឆ្នាំ១៩៨០ បន្ទាប់ពីកម្ពុជាទើបបានរំដោះពីរបប ប៉ុល ពត មិនត្រឹមតែប៉ុណ្ណោះ ហុងគ្រីក៏បានចូលរួមចំណែកយ៉ាងសកម្ម ក្នុងការស្វែងរកសន្តិភាព ជូនកម្ពុជា ក្នុងក្របខណ្ឌអង្គការសហប្រជាជាតិនៅកម្ពុជាទៀតផង៕

ក្រុមហ៊ុនវិនិយោគផ្សារទំនើប FURI Times Square ប្រាប់ពីហេតុផលនៃការពន្យាពេលបើកដំណើរការ

ដោយ ៖ រ៉ាណេត

ព្រះសីហនុ៖ តាមគម្រោងដែលបានកំណត់ស្ដីពីកាលបរិច្ឆេទនៃដំណើរការផ្សារទំនើប FURI Times Square ដែលជាផ្សារទំនើបដ៏ធំ និងលើកដំបូងគេបង្អស់នៅក្នុងក្រុងព្រះសីហនុ នៅត្រឹមថ្ងៃទី២៥ ខែតុលា ឆ្នាំ២០១៩កន្លងទៅនេះ បច្ចុប្បន្នត្រូវបានសម្រេចធ្វើការពន្យាពេលជាបណ្តោះអាសន្ន ដើម្បីឱ្យក្រុមការងារបច្ចេកទេសរៀបចំឱ្យបានចប់សព្វគ្រប់ និងប្រាកដថា មានភាពល្អឥតខ្ចោះ ដែលអាចចាប់ដំណើរការជាប្រក្រតីនៅត្រឹមអំឡុងខែវិច្ឆិកា ឆាប់ៗខាងមុខនេះ ។

គណៈគ្រប់គ្រងផ្សារទំនើប FURI Times Square សូមជូនដំណឹងដល់សាធារណៈជនទាំងអស់ឱ្យបានជ្រាប់ថា ដោយ សារកំហុសឆ្គងផ្នែកការងារបច្ចេកទេសក្នុងការរៀបចំផ្នែកខាងក្នុងមួយចំនួនតូចនៅមិនទាន់បានបញ្ចប់សព្វគ្រប់ និងធានាបានភាពល្អឥតខ្ចោះ១០០ភាគរយនៅឡើយនោះ គណៈគ្រប់គ្រងបានសម្រេចធ្វើការពន្យាពេលមួយរយៈពេលខ្លី ដើម្បីទុកឱកាសដល់ក្រុមការងារបច្ចេកទេស និងក្រុមជំនាញធ្វើការរៀបចំ និងសំអាតឱ្យបានរួចរាល់។

នាយិកាគ្រប់គ្រងផ្នែកទីផ្សារ និងការលក់ផ្សារទំនើប FURI Times Square កញ្ញា លីម សុខាដាវីន បានប្រាប់ឱ្យដឹងកាលពីព្រឹកថ្ងៃទី២៨ ខែតុលា ឆ្នាំ២០១៩នេះថា តំណាងឱ្យគណៈគ្រប់គ្រងផ្សារទំនើប FURI Times Square សូមការអធ្យាស្រ័យពីសំណាក់អតិថិជន និងសាធារណៈជនទូទៅដែលគាំទ្រផ្សារទំនើប FURI Times Square ពីការពន្យាពេលនៃការបើកដំណើរការជាជំហានដំបូងកាលពីថ្ងៃទី២៥ ខែតុលា ឆ្នាំ២០១៩ កន្លងទៅនេះ។

កញ្ញាបានបន្តទៀត “បើតាមកាលកំណត់ ផ្សារទំនើបមួយនេះ នឹងត្រូវបើកដំណើរការជាជំហានដំបូងនៅត្រឹមថ្ងៃទី២៥ ខែតុលា ឆ្នាំ២០១៩ ប៉ុន្តែដោយសារតែក្រុមការងារជំនាញមិនទាន់បានបញ្ចប់ការរៀបចំ និងសំអាតទាន់ពេល ដូច្នេះគណៈគ្រប់គ្រងបានសម្រេចធ្វើការពន្យាពេលមួយរយៈខ្លី ដើម្បីឱ្យក្រុមការងាររៀបចំ និងប្រាកដថាត្រូវបានបញ្ចប់១០០ភាគរយ”។

កញ្ញា លីម សុខាដាវីន បានបញ្ជាក់ថា “ការពន្យាពេលនេះ គឺមានរយៈពេលខ្លីតែប៉ុណ្ណោះ ពោលគឺនៅត្រឹមអំឡុងខែវិច្ឆិកា ឆ្នាំ២០១៩ ឆាប់ៗខាងមុខ ផ្សារទំនើប FURI Times Square នឹងបើកដំណើរការ ដើម្បីបម្រើដល់សេចក្ដីត្រូវការរបស់អតិថិជន ក៏ដូចជាសាធារណៈជនទូទៅជាក់ជាមិនខាន ហើយសង្ឃឹម និងជឿជាក់ថា សាធារណៈជនទាំងអស់ដែលគាំទ្រផ្សារទំនើប FURI Times Square នឹងយោគយល់អធ្យាស្រ័យចំពោះការខកខានកាលពីពេលកន្លងទៅនេះជាក់ជាមិនខាន”។

ផ្សារទំនើប FURI Times Square មានទីកន្លែងលក់រាយ និងកន្លែងកម្សាន្តចំនួនសរុប ៦,០០០ម៉ែត្រការ៉េ ត្រូវបានជ្រើសរើសនៅក្នុងប្រភេទរចនាស្ថាបត្យកម្មល្អបំផុតនៅក្នុងពិធីពានរង្វាន់អចលនទ្រព្យកម្ពុជា។

ផ្សារទំនើប FURI Times Square មានកម្ពស់ ៥ជាន់ ស្ថិតនៅលើផ្លូវឯករាជ្យ ស្ថិតក្នុងសង្កាត់មិត្តភាព ខ័ណ្ឌមិត្តភាព ក្រុងព្រះសីហនុ។សូមរីករាយទទួលយកនូវបទពិសោធន៍ថ្មី រសជាតិជីវិតថ្មីនៃការរស់នៅតាមបែបទាន់សម័យ ជាមួយនឹងផ្សារទំនើប FURI Times Square ទាំងអស់គ្នា…..

ក្រុមហ៊ុន UTRUST ទទួលបានពានជ័យលាភីសហគ្រិនឆ្នើមឆ្នាំ ២០១៩

ដោយ វុត្ថា

ភ្នំពេញ៖ ក្រុមហ៊ុន UTRUST Investment Co,.Ltd បានទទួលបានពានជ័យលាភីសហគ្រិនឆ្នើមប្រចាំឆ្នាំ២០១៩ (CEO AWARD 2019) ចំនួន ៤ នៅក្នុងព្រឹត្តិការណ៍ប្រារព្វខួប ១០ របស់ វិទ្យាស្ថាន CEO Master Club។

ពានរង្វាន់នេះ ជាពានរង្វាន់សហគ្រិនឆ្នើម ដែលឆ្លងកាត់ការប្រកួតប្រជែងក្នុងចំណោមក្រុមហ៊ុនជាង ១០០០ ក្រុមហ៊ុននៅកម្ពុជា និងមានការវាយតម្លៃ ពីគណៈកម្មការឯករាជ្យ។

លោក ម៉ន សុខា ជា Chairman & CEO ក្រុមហ៊ុន UTRUST Investment Co,.Ltd បានឱ្យដឹងថា ក្រោយការវាយតម្លៃ និងពិនិត្យយ៉ាងល្អិតល្អន់ជាច្រើនដំណាក់កាលពីគណៈកម្មការឯករាជ្យ ដែលមានបេក្ខជនចូលរួមប្រកួតប្រជែងជាច្រើនរយនាក់កន្លងមក គណៈកម្មការបានសម្រេច និងប្រគល់ពានជ័យលាភី ជូនលោក ម៉ន សុខា ដូចជា៖
• Master CEO Award ពានជ័យលាភីសម្រាប់ទទួលស្គាល់និងលើកទឹកចិត្តសហគ្រិន
• Outstanding Entrepreneur Medal មេដៃទទួលស្គាល់សហគ្រិនលេចធ្លោ (Top 20)
• Outstanding CEO Award ពានជ័យលាភីទទួលស្គាល់សហគ្រិនឆ្នើម (Top10)
• Accounting Award ពានជ័យលាភីទទួលស្គាល់សហគ្រិនដែលបានរៀបចំរបៀបរបប និងស្តង់ដារគ្រប់គ្រងហិរញ្ញវត្ថុបានល្អ និងតម្លាភាពសម្រាប់ស្ថាប័ន (Top5) លោកបញ្ជាក់ទៀតថា ដើម្បីក្រុមហ៊ុនរីកចម្រើន និងជោគជ័យ គឺអាស្រ័យទៅលើកត្តា ៤ចំណុចដូចខាងក្រោម៖
• ធ្វើការយកចិត្តទុកដាក់នឹងផ្តល់ប្រយោជន៍ទៅលើ៣ភាគី ទី១ គឺអតិថិជន ទី២ បុគ្គលិកនិង ក្រុមការងារ ទី៣ ក្រុមហ៊ុន
• ធ្វើការទំនាក់ទំនងឲ្យបានល្អក្នុងបណ្ដាញសង្គម គ្រប់កន្លែង គ្រប់ស្ថាប័ន នឹងក្រុមហ៊ុនដែលជាដៃគូ
• ធ្វើការទំនាក់ទំនងឲ្យបានល្អជាមួយនឹងអាជ្ញាធរដែនដីគ្រប់ជាន់ថ្នាក់ និងស្ថាប័នដែលពាក់ព័ន្ធ
• មានផែនការច្បាស់លាស់សម្រាប់ក្រុមហ៊ុន ការអនុវត្តន៍យ៉ាងហ្មត់ចត់ មានទស្សនៈវិស័យពង្រីកភាពល្បីល្បាញរបស់ខ្លួននៅក្នុងប្រទេស និងពិភពលោក ។

ពានរង្វាន់សហគ្រិនឆ្នើមប្រចាំឆ្នាំ២០១៩ (Outstanding CEO AWARD 2019) ជាមហាព្រឹត្តិការដ៏ធំប្រចាំឆ្នាំ ដែលរៀបចំឡើងដោយវិទ្យាស្ថានស៊ីអ៊ីអូ (CEO Master Club) ដែលមានសហគ្រិនឆ្នើមៗ និងម្ចាស់អាជីវកម្មជាង ១០០០នាក់ មកពីគ្រប់ស្ថាប័នទូទាំងប្រទេស ចូលរួមប្រកួតប្រជែង យកពានជាសហគ្រិនឆ្នើមនេះ ដែលបានប្រកាសលទ្ធផលជាផ្លូវការនារាត្រីថ្ងៃសៅរ៍ ទី២៦ ខែតុលា ឆ្នាំ២០១៩ ប្រារព្ធធ្វើនៅសណ្ឋាគារសុខាភ្នំពេញ ក្រោមអធិបតីភាពដ៏ខ្ពង់ខ្ពស់ពីសំណាក់ ឯកឧត្តមឧត្តមសេនីយ៍ឯក ហ៊ុន ម៉ាណែត និងមន្រ្តីមុខការជាន់ខ្ពស់របស់រាជរដ្ឋាភិបាលកម្ពុជា៕

សិក្ខាសាលាស្តីអំពី គម្រោងអភិវឌ្ឍន៍ទីក្រុងរណបនៅក្រុងសៀមរាប

ដោយ វល័ក្ខ

សៀមរាប៖ ក្រុមហ៊ុនភ័ញធើប្រផឹធី ជាក្រុមហ៊ុនឈានមុខក្នុងវិស័យអចលនទ្រព្យក្នុងព្រះរាជាណាចក្រកម្ពុជា បានចូលរួមសហការជាមួយក្រុមហ៊ុន អ៊ីវ្យូរៀលធើ រៀបចំសិក្ខាសាលាស្តីអំពី ‘‘គម្រោងអភិវឌ្ឍន៍អចលនទ្រព្យនៅក្រុងសៀមរាប’’ ក្នុងគោលបំណងចែករំលែកយុទ្ធសាស្ត្រនៃការវិនិយោគ និងឱកាសទិញផ្ទះក្នុងទីក្រុងរណបថ្មីនៅក្រុងសៀមរាប។

កម្មវិធីនេះបានប្រព្រឹត្តទៅនៅសណ្ឋាគារ អង្គរប៉ារ៉ាឌី ដោយមានការចូលរួមគាំទ្រភ្ញៀវកិត្តិយសជាង២០០នាក់ដែលជាវិនិយាគិនម្ចាស់ក្រុមហ៊ុន សណ្ឋាគារ សភាពាណិជ្ជកម្ម សមាជិកនៃសមាគមន៍កម្ពុជានិងភ្ញៀវកិត្តិយសផ្សេងទៀត។ កម្មវិធីសិក្ខាសាលានេះផងដែរ មានការចូលរួមពីលោកឧកញ៉ាបណ្ឌិត ហ៊ុយ ភៀវ ប្រធានសភាពាណិជ្ជកម្មខេត្តសៀមរាប‍-ឧត្តរមានជ័យនិងសំណាក់វាគ្មិនទាំង៧រូប មកពីស្ថាប័នក្រុមប្រឹក្សាផ្នែកច្បាប់ និងផ្នែកហិរញ្ញវត្ថុ ដែលសុទ្ធសឹងតែបុគ្គលដែលមានបទពិសោធន៍ការងារខ្ពស់ និង ជោគជ័យលើវិស័យអចលនទ្រព្យ។ បទបង្ហាញសំខាន់ៗក្នុងសិក្ខាសាលារួមមាន៖ (១) ការបង្ហាញពីគម្រោងភាគខាងកើតនៃក្រុងសៀមរាប និងពង្រីកការអភិវឌ្ឍន៍ទីក្រុងរណបថ្មីជុំវិញតំបន់ផ្លូវ៦០ម៉ែត្រ ក្នុងគោលបំណងបង្កើតតំបន់ទេសចរណ៍បន្ថែមទៀត និង លើកស្ទួយកំណើនធនធានទេសចរណ៍ឡើងវិញ។

(២) សក្តានុពលក្នុងការវិនិយោគលើគម្រោង ‘ភូមិបាគង’ ដែលជាសំណង់គេហដ្ឋានបែបប្រណីតចំនួន ៣៥០ខ្នង លើផ្ទៃដីសរុប ៤.៧ហិកតា និងការរៀបចំបរិវេណដើមឈើបៃតង សួនច្បារជុំវិញ២២កន្លែង ស្មើនឹង៥០ភាគរយនៃផ្ទៃដីសរុប។ ជាការពិតណាស់ គម្រោងភូមិបាគងមិនត្រឹមតែទទួលការចាប់អារម្មណ៍យ៉ាងខ្លាំងពីប្រជាជនក្នុងតំបន់ប៉ុណ្ណោះទេ ប៉ុន្តែមានការទទួលស្គាល់ពីជនបរទេសផងដែរ ដោយបានឲ្យតម្លៃខ្ពស់លើការរៀបចំសហគមន៍រស់នៅបែបថ្មី ជួបជុំគ្នាក្រោមការរស់នៅអមជាមួយបរិយាកាសអំណោយផលពីធម្មជាតិ បណ្តុំនៃសួន សាលារៀន ផ្សារ ចំណតយានយន្តរួម និងស្ពានអាកាសថ្មើរជើងដំបូងគេបង្អស់ក្នុងខេត្តសៀមរាប។

លោក ងួន ឆាយលាង នាយកប្រតិបត្តិនៃក្រុមហ៊ុន ភ័ញធើប្រផឹធី មានប្រសាសន៍ថា ‘‘គោលគំនិតនៃការបង្កើតជាសហគមន៍រស់នៅឲ្យមានភាពរស់រវើកឡើងវិញ ការប្រាស្រ័យទាក់ទងគ្នារវាងអ្នកជិតខាង ការជួបជុំគ្នាក្នុងមជ្ឍដ្ឋានរស់នៅប្រកបដោយផាសុកភាពនិងសន្តិភាពគឺជាអ្វីដែលមនុស្សគ្រប់គ្នាឲ្យតម្លៃ ហើយពួកយើងកំពុងរួមចំណែកកសាងការរស់នៅបែបផែននៃក្តីស្រម៉ៃរបស់ប្រជាជនឲ្យក្លាយជាការពិត’’។

ទន្ទឹមនឹងនេះដែរ លោក Martin Aerne ជាស្ថាបត្យករជនជាតិស្វីសដ៏ល្បីល្បាញ បានរួមចំណែកក្នុងការគូសប្លង់គម្រោងមេ និងផ្តល់សេវាស្ថាបត្យកម្មលើបទដ្ឋានរស់នៅបែបខ្មែរនៃ សំណង់ភូមិបាគងនេះផងដែរ។

លោក Martin Aerne មានទស្សនវិស័យជឿជាក់ថាគម្រោងដែលល្អ មិនត្រឹមតែផ្តោតទៅលើទីតាំង និងការសាងសង់ប៉ុណ្ណោះទេ ប៉ុន្តែគឺការកែច្នៃតំបន់រស់នៅនោះឲ្យមានជីវិតស្របជាមួយធម្មជាតិ កាត់បន្ថយផ្សែងពុលទៅវិញទេដែលជាការរស់នៅពិតប្រាកដ និងសក្តិសមបំផុតសម្រាប់មនុស្សជំនាន់ថ្មី។

ជាកិច្ចបញ្ចប់នៃកម្មវិធីនេះ វាគ្មិនទាំងអស់បានផ្ដល់អនុសាសន៍ថា ដើម្បីទទួលបានភាពគាំទ្រនិងជោគជ័យ ក្រុមហ៊ុនអភិវឌ្ឍលំនៅដ្ឋានគួរតែផ្តោតលើការរៀបចំគម្រោងដែលគាំទ្រឱ្យមាន វប្បធម៌ប្រាស្រ័យទាក់ទងស្និទ្ធស្នាល បរិយាកាសដែលមានដើមឈើសួនច្បារច្រើន និងការរស់នៅដែលប្រាកបដោយផាសុកភាព។ លើសពីនេះទៅទៀតវាគ្មិនទាំងអស់ ក៏បានជឿជាក់ថាគម្រោងអភិវឌ្ឍន៍សៀមរាបខាងកើត ពិតជាមានលទ្ធភាព និងសក្ដានុភាពខ្ពស់ ក្នុងការលើកស្ទួយវិស័យអចលនទ្រព្យ ក៏ដូចជាវិស័យទេសចរណ៍របស់ខេត្តសៀមរាបផងដែរ៕