អាល្លឺម៉ង់ផ្តល់ហិរញ្ញប្បទានឥតសំណង់អភិវឌ្ឍកម្ពុជាចំនួន ៦៤០លានដុល្លារ

ដោយ វុត្ថា

ភ្នំពេញៈ គិតពីដើមរហូតដល់ឆ្នាំ២០១៩នេះ សាធារណៈរដ្ឋសហព័ន្ធអាល្លឺម៉ង់បានផ្តល់ហិរញ្ញប្បទានឥតសំណងប្រមាណជាង៦៤០ លានដុល្លារអាមេរិក ស្មើនឹងប្រមាណ ៣% នៃទំហំហិរញ្ញប្បទានទាំងអស់ ដល់ការអភិវឌ្ឍសេដ្ឋកិច្ចសង្គមកម្ពុជា។ នេះបើយោងតាមសេចក្តីសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា។

លទ្ឋផលនេះ ត្រូវបានប្រកាសក្នុងជំនួបពិភាក្សាការងាររវាងលោក ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការគណ:កម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា (គ.ជ.នា/ក.អ.ក) និង លោក Christian Berger ឯកអគ្គរដ្ឋទូតថ្មីនៃសាធារណរដ្ឋសហព័ន្ធអាល្លឺម៉ង់ប្រចាំកម្ពុជា នៅថ្ងៃទី២៨ ខែ តុលា ឆ្នាំ២០១៩។

សេចក្តីប្រកាសព័ត៌មាននេះបានបញ្ជាក់ថា ទំហំហិរញ្ញប្បទាននេះ មិនរាប់បញ្ចូលទាំងហិរញ្ញប្បទាន ដែលភាគីអាល្លឺម៉ង់បានផ្តល់ឱ្យកម្ពុជា តាមរយៈគម្រោងថ្នាក់តំបន់ និងសកល ឬតាមរយៈស្ថាប័នហិរញ្ញវត្ថុអន្តរជាតិ បណ្តាញអង្គការសហប្រជាជាតិ និងសហគមន៍អឺរ៉ុប។

ដោយឡែកក្នុងឆ្នាំ ២០១៨ -២០១៩ ហិរញ្ញប្បទានឥតសំណងទ្វេភាគីរបស់អាល្លឺម៉ង់មានប្រមាណ៣០លានដុល្លារអាមេរិកក្នុងមួយឆ្នាំ ដោយផ្តោតលើកិច្ចសហប្រតិបត្តិការលើវិស័យអាទិភាពចំនួន ៣ រួមមាន ១ វិស័យអភិវឌ្ឍន៍ជនបទ ២ វិស័យសុខាភិបាល និង៣ វិស័យអភិបាលកិច្ច។

ផ្អែកតាមលទ្ធផលនៃកិច្ចចចារ រវាងរដ្ឋាភិបាលកម្ពុជា និងរដ្ឋាភិបាលអាល្លឺម៉ង់កាលពីថ្ងៃទី ១៤-១៥ ខែឧសភា ឆ្នាំ ២០១៩ នៅទីក្រុងប៊ែកឡាំង ភាគីទាំងពីរបានវាយតម្លៃខ្ពស់វឌ្ឍនភាពកន្លងមក ហើយឯកភាពបន្តកិច្ចសហការ លើវិស័យអាទិភាពចំនួន៣ ដោយគ្រោងផ្តល់ជំនួយហិរញ្ញប្បទានចំនួន៥៤,៤០ លានដុល្លារអាមេរិកសម្រាប់ឆ្នាំ ២០១៩-២០២០។

ភាគីអាល្លឺម៉ង់ ក៏បានរួមចំណែកអភិវឌ្ឍធនធានមនុស្សនៅកម្ពុជា តាមរយៈការផ្តល់អាហារូបករណ៍ថ្នាក់ឧត្តមសិក្សា និងថ្នាក់ក្រោយឧត្តមសិក្សា ដល់មន្ត្រីរាជការ និងនិស្សិតកម្ពុជា ការផ្តល់អ្នកជំនាញការ អ្នកស្ម័ក្រចិត្ត និងជំនួយបច្ចេកទេសនានាដល់ក្រសួង និងស្ថាប័រាជរដ្ឋាភិបាល។

ទន្ទឹមនេះ ភាគីអាល្លឺម៉ង់បាន និងកំពុងចូលរួមគាំទ្រការអនុវត្ត គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥-២០២៥ តាមរយៈការការគាំទ្រវិស័យឯកជន ការអភិវឌ្ឍន៍សហគ្រាសធុនតូច និងមធ្យម និងការបណ្តុះបណ្តាលវិជ្ជាជីវៈ ការជំរុញវិស័យពាណិជ្ជកម្ម រវាងប្រទេសទាំងពីរ និងការកៀរគរវិនិយោគិនអាល្លឺម៉ង់មកកម្ពុជា៕

គម្រោងផ្លូវល្បឿនលឿនតម្លៃ ៥០០លានដុល្លារតភ្ជាប់ពីហូជីម៉ិញមកភ្នំពេញត្រូវបានចុះហត្ថលេខា

ដោយ Donald Lee

វៀតណាមៈ អាជ្ញាធរវៀតណាម បានរៀបចំពិធីចុះហត្ថលេខាសម្រាប់ផ្លូវល្បឿននឿនទីក្រុងហូជីមិញ-ផ្លូវម៉ុកបៃ ដែលនឹងតភ្ជាប់ពីទីក្រុងហូជីមិញ មកកាន់រាជធានីភ្នំពេញនៅថ្ងៃសៅរ៍។

អនុប្រធានអាជ្ញាធរវៀតណាម ប្រចាំទីក្រុងហូជីមិញ លោក Vo Van Hoan បានមានប្រសាសន៍នៅក្នុងពិធីចុះហត្ថលេខានេះថា គម្រោង៥០០លានដុល្លារនេះ នឹងចាប់ ផ្តើមសាងសង់នៅឆ្នាំ២០២១ ហើយរំពឹងថានឹងបញ្ចប់នៅឆ្នាំ២០២៥ខាងមុខនេះ។

ដំណាក់កាលដំបូង នៃគម្រោងផ្លូវល្បឿនលឿនហូជីមិញ- ម៉ុកបៃ នឹងផ្តោតលើផ្លូវ ៣៣គីឡូម៉ែត្រ ពីទីក្រុងហូជីម៉ិញ ទៅខេត្តតាយនិញ ប្រទេសវៀតណាម។ ដំណាក់កាលទី២ នឹងត្រូវលាតសន្ធឹងផ្លូវ២០.៥គីឡូម៉ែត្រពីតាយនិញ ទៅម៉ុកបៃ ដែលល្បឿនរហូតដល់ ៨០គីឡូម៉ែត្រក្នុងមួយម៉ោង នឹងត្រូវបានអនុញ្ញាតឱ្យតភ្ជាប់ពីក្រុងបាវិត នៃប្រទេសកម្ពុជា។

គម្រោងផ្លូវល្បឿនលឿនរបស់វៀតណាម បានដំណើរការអស់រយៈពេលជាច្រើនឆ្នាំមកហើយ ដោយសារតែការកកស្ទះចរាចរណ៍នៅលើផ្លូវហាយវ៉េលេខ២២ ដែលជាចរាចរណ៍សេវាកម្មផ្លូវតែមួយ ពីហូជីមិញមកកម្ពុជា តាមរយៈច្រកព្រំដែនម៉ុកបៃ។

ផ្លូវល្បឿនលឿនរបស់វៀតណាម នឹងតភ្ជាប់ទៅភ្នំពេញ នឹងបណ្តាញផ្លូវល្បឿនលឿនបាវិតទៅប្រទេសកម្ពុជា។

គម្រោងពង្រីកហេដ្ឋារចនាសម្ព័ន្ធកម្ពុជា ទៅផ្លូវជាតិលេខ១ សម្រាប់គម្រោងផ្លូវល្បឿនលឿនភ្នំពេញ បាវិត នឹងពង្រីកផ្លូវចាប់ពី១៥៩គីឡូម៉ែត្រទៅ១៦៤ និងពង្រីកផ្លូវដើម្បីសម្រួលដល់រថយន្តកុងតឺន័រពីភ្នំពេញ ទៅហូជីមិញតាមរយៈក្រុងបាវិត។

បាវិតដែលជាទីក្រុងព្រំដែនរវាងកម្ពុជា និងវៀតណាម នឹងក្លាយជាមជ្ឈមណ្ឌលពាណិជ្ជកម្ម និងពាណិជ្ជកម្មឆ្លងកាត់ដ៏សំខាន់មួយ បន្ទាប់ពីបញ្ចប់គម្រោងហេដ្ឋារចនាសម្ព័ន្ធកម្ពុជា និងវៀតណាម៕

កូរ៉េខាងត្បូង និងអាស៊ានពង្រីកកិច្ចសហប្រតិបត្តិការ 5G ដើម្បីទាញយកអត្ថប្រយោជន៍ពីបច្ចេកវិទ្យា

ដោយ ប៊ី

ភ្នំពេញៈ រដ្ឋាភិបាលកូរ៉េខាងត្បូង បានឱ្យដឹងកាលពីថ្ងៃអាទិត្យថា កូរ៉េខាងត្បូង និងអាស៊ាន បានយល់ព្រមពង្រីកកិច្ចសហប្រតិបត្តិការ នៅក្នុងបណ្តាញទំនាក់ទំនង 5G និងបញ្ញាសិប្បនិម្មិត (AI) ដើម្បីបង្កើនអត្ថប្រយោជន៍ពីបច្ចេកវិទ្យាដែលកំពុងរីកចម្រើននេះ។

សេចក្តីប្រកាសរួមដែលធ្វើឡើង នៅក្នុងកិច្ចប្រជុំរដ្ឋមន្ត្រីក្រសួងទូរគមនាគមន៍ និងព័ត៌មានវិទ្យា (TELMIN) ដែលបានធ្វើឡើងនៅរដ្ឋធានីឡាវ កាលពីសប្តាហ៍មុនបានបង្ហាញពីការប្តេជ្ញាចិត្តទៅវិញទៅមក ក្នុងការលើកកម្ពស់ប្រព័ន្ធអេកូឡូស៊ីឌីជីថល ជឿនលឿនរវាងអាស៊ានទាំង១០ និងកូរ៉េខាងត្បូង។

ទីក្រុងសេអ៊ូលបាន និងកំពុងផ្លាស់ប្តូរការចែករំលែកចំណេះដឹងរបស់ខ្លួន នៅក្នុងបច្ចេកវិទ្យា 5G AI និងបច្ចេកវិទ្យាព័ត៌មាន និងគមនាគមន៍ (អាយធី) ជាមួយដៃគូអាស៊ាន។ កូរ៉េគឺជាប្រទេសដំបូងគេដែលបង្កើត Internet ជំនាន់ក្រោយនៅក្នុងខែ មេសា ឆ្នាំនេះ និងជាអ្នកនាំមុខគេក្នុងវិស័យទូរគមនាគមន៍។

ការយោគយល់គ្នានេះ នឹងជួយសម្រួលដល់ការអនុវត្ត ប្រកបដោយប្រសិទ្ធភាពនៃផែនការមេស្តីពីការតភ្ជាប់អាស៊ាន ក៏ដូចជា របៀបវារៈពិភពលោកផ្តោតលើការអភិវឌ្ឍប្រកបដោយចីរភាព។

រដ្ឋមន្រ្តីវិទ្យាសាស្រ្ត និងបច្ចេកវិទ្យាព័ត៌មានលោក Choi Ki-young ដែលតំណាងឱ្យទីក្រុងសេអ៊ូលនៅក្នុងកិច្ចពិភាក្សាកាលពីថ្ងៃ ព្រហស្បតិ៍ និងថ្ងៃសុក្រ បានសង្កត់ធ្ងន់ថា ការបន្តកិច្ចសហប្រតិបត្តិការ អាចជួយបង្កើតប្រព័ន្ធអេកូឡូស៊ីឌីជីថល ដ៏ទូលំទូលាយមួយដែលល្អសម្រាប់ភាគីទាំងអស់។

ផែនការមេនេះ គឺជាផែនទីបង្ហាញផ្លូវរយៈពេលច្រើនឆ្នាំ ដែលមានគោលបំណងសម្រាប់ការតភ្ជាប់ និងសមាហរណកម្មអាស៊ានឱ្យកាន់តែរលូន និងទូលំទូលាយ។

កិច្ចពិភាក្សា TELMIN ចុងក្រោយបានបញ្ជាក់ជាថ្មី នូវចំណងមិត្តភាពជិតស្និទ្ធរវាងកូរ៉េខាងត្បូង និងអាស៊ានមុនពេលកិច្ចប្រជុំកំពូលអាស៊ាន-កូរ៉េឆ្នាំ ២០១៩ គ្រោងនឹងធ្វើនៅទីក្រុងប៊ូសាននាចុងខែ វិច្ឆិកា៕

KIT បើកបវេសនកាលឆ្នាំសិក្សាថ្មីជាមួយនឹងអាហារូបករណ៍ ១០០ភាគរយសំរាប់និស្សិតកម្ពុជា

ដោយ គង់ សូរិយា

ភ្នំពេញៈ វិទ្យាស្ថានបច្ចេកវិទ្យាគិរីរម្យ (KIT) បានបើកបវេសនកាលឆ្នាំសិក្សា ២០១៩ – ២០២០ ជាមួយនឹងវត្តមាននិស្សិតអាហាររូបករណ៍ជាតិ និងអន្តរជាតិកាន់តែច្រើន ពិសេសស្តង់ដានៃការអប់រំ ដែលផ្តោតលើនវានុវត្តន៍នៃពេលអនាគត។

លោក TAKESHI Izuka អគ្គនាយកនៃក្រុមហ៊ុន A2A Town Cambodia ដែលបានបើកវិទ្យាស្ថាន KIT ក្នុងគោលដៅផ្តល់ការអប់រំប្រកបដោយគុណភាព ដល់និស្សិតកម្ពុជា និងអន្តរជាតិបានមានប្រសាសន៍ឲ្យដឹងកាលពីចុងសប្តាហ៍មុនថា វិទ្យាស្ថានបច្ចេកវិទ្យាគិរីរម្យបានបង្កើតឡើង ដើម្បីជួយដល់និស្សិតកម្ពុជាឆ្លើយតបនឹងការរីកចម្រើននៃវិស័យបច្ចេកវិទ្យា និងការអភិវឌ្ឍកម្ពុជា។ និស្សិតសិក្សានៅទីនេះ ទទួលបានអាហារូបករណ៍១០០ភាគរយ ជាមួយអាហារប្រចាំថ្ងៃ អន្តេវាសិកដ្ឋានសំរាប់ស្នាក់នៅ ការបោកគក់សម្លៀកបំពាក់ និងសម្ភារៈសិក្សាជាដើម។

កម្មវិធីសិក្សានៅវិទ្យាស្ថានបច្ចេកវិទ្យាគិរីរម្យមានចំនួនពីរ ទី១ វិស្វកម្មកុំព្យូទ័រ និងបដិសណ្ឋារកិច្ច ជាមួយគ្រូបរទេសនិងសិក្សាជាភាសាអង់គ្លេស។ លើសពីនេះពួកគេត្រូវសិក្សាមួយថ្ងៃ៨ម៉ោង ដោយ៤ម៉ោងសិក្សាក្នុងថ្នាក់ និង៤ម៉ោងអនុវត្តន៍ផ្ទាល់លើកម្មវិធីសក្សារបស់ពួកគេ។

លោក Takeshi Izuka បានមានប្រសាសន៍ថា គិតចាប់ពីពេលបើកដំណើរការចាប់តាំងពីឆ្នាំ២០០៤ រហូតមកទល់ពេលនេះ KIT បានទទួលនិស្សិតអាហារូបករណ៍ជាង៣០០នាក់់ ដែលមាននិស្សិតជនជាតិខ្មែរភាគច្រើន និងនិស្សិតជប៉ុនជាដើម។

លោកម៉ក់ ងយ អគ្គនាយកនៃនាយកដ្ឋានឧត្តមសិក្សាក្រសួងអប់រំយុវជន និងកីឡាបានថ្លែងថា វិទ្យាស្ថានបច្ចេកវិទ្យាគិរីរម្យ បានបង្កើតកម្មវិធីសិក្សាស្របតាមគោលនយោបាយរបស់រដ្ឋាភិបាល គឺគោលនយោបាយអភិវឌ្ឍន៍វិស័យស្សាហកម្មឆ្នាំ២០១៥ ២០២៥ និងគោលនយោបាយរបស់ក្រសួងអប់រំយុវជន និងកីឡាក្រោយឆ្នាំ២០៣០។ ការពង្រឹងធនធានមនុស្សជំនាញ ជាអ្វីដែលដើរស្របគ្នា នឹងគោលនយោបាយរបស់រដ្ឋាភិបាល ដើម្បីរុញកម្ពុជាឲ្យឈានឡើងក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។

លោកបន្តថា និស្សិតសិក្សានៅទីនេះ ពួកគេស្នាក់នៅរួមគ្នា ហូបចុករួមគ្នា ចែករំលែកសុខទុក្ខរួមគ្នា ជាអ្វីដែលស្របនឹងគោលនយោបាយរបស់ក្រសួង ក្នុងការបណ្តុះបណ្តាលធនធានមនុស្សឲ្យមានចំណេះដឹង មានជំនាញ ចេះរស់នៅជាមួយគ្នា ដើម្បីកសាងសហគមន៍ និងសង្គមមួយប្រកបដោយភាពសុខសាន្ត។

កញ្ញា Yumi Nakahara និស្សិតមកពីប្រទេសជប៉ុន ដែលបានមកសិក្សានៅវិទ្យាស្ថានបច្ចេកវិទ្យាគិរីរម្យបានមានប្រសាសន៍ថា ដោយបានសិក្សាស្វែងយល់ពីវិទ្យាស្ថាននេះ កញ្ញាបានសម្រេចចិត្តមកសិក្សានៅទីនេះ លើជំនាញវិស្វកម្មកុំព្យូទ័រ ដែលជាជំនាញមួយកញ្ញាចូលចិត្ត ព្រោះពេលបញ្ចប់ការសិក្សាកញ្ញា អាចត្រលប់ទៅបំពេញការងារនៅប្រទេសជប៉ុនវិញបាន។កញ្ញាបន្តថា កម្មវិធីសិក្សា និងទីតាំងរបស់វិទ្យាស្ថាននេះមានភាពអំណោយផលដល់ការសិក្សា ហើយយើងរីករាយក្នុងការសិក្សានៅទីនេះ ជាមួយនិស្សិតកម្ពុជា និងនិស្សិតជប៉ុនជាច្រើនដែលបានសិក្សានៅទីនេះ។

ចំណែកកញ្ញាហ៊ុយ វីរីយ៉ានិស្សិតអាហារូបករណ៍ ដែលបានចាប់ផ្តើមចូលរៀននៅក្នុងវិទ្យាស្ថាននេះ សម្រាប់ឆ្នាំសិក្សា២០១៩ ២០២០បានមានប្រសាសន៍ថា កញ្ញារីករាយដែលបានប្រលងជាប់អាហារូបករណ៍នៅទីនេះ ហើយកញ្ញាមានអារម្មណ៍នឹកផ្ទះពេលមកស្នាក់នៅវិទ្យាស្ថាននេះតំបូងៗ ប៉ុន្តែមួយរយៈក្រោយមក យើងមានមិត្តភ័ក្តិ យើងសិក្សារួមគ្នា ធ្វើឲ្យយើងមានភាពរីករាយជាមួយបរិយាកាសនៅទីនេះ នឹងបរិយាកាសធម្មជាតិនៅទីនេះ ដែលជាតំបន់ទេសចរណ៍ដ៏ស្រស់ស្អាតរបស់យើង។

កញ្ញាបន្តថា ការប្រលងជាប់ជានិស្សិតអាហារូបករណ៍នៅទីនេះ មិនងាយស្រួលនោះទេ វាទាមទារនូវការខិតខំប្រឹងប្រែងរៀនសូត្រ ត្រូវមានអត្តចរិកល្អ និងការប្តេជ្ញាចិត្តខ្ពស់ក្នុងការសិក្សារៀនសូត្រ។

លោកបណ្ឌិតឆែម គាតរិទ្ឋី រដ្ឋមន្រ្តីប្រតិភូអមនាយករដ្ឋមន្រ្តីដែលអញ្ជើញជាអធិបតី ក្នុងពិធីបើកបវេសនកាលនៅ KIT បានមានប្រសាសន៍អបអរសាទរ និងកោតសរសើរដល់ KIT ពិសេសលោក Takeshi Izuka ដែលបានបង្កើតវិទ្យាស្ថាននេះឡើង ដើម្បីបណ្តុះបណ្តាលធនធានមនុស្ស ពិសេសការរៀបចំកម្មវិធីសិក្សា ប្រកបដោយគុណភាពកម្រិតអន្តរជាតិ។

លោកបន្តថា និស្សិតសិក្សានៅទីនេះ ពួកគេប្រឈមបញ្ហាមួយចំនួន ដូចជាការបែកចេញពីគ្រួសារ ដែលនេះជាការប្រឈមមួយសំរាប់ប្រពៃណីទំនៀមទំលាប់ខ្មែរ ប៉ុន្តែពួកគេត្រូវតែចេះសម្របខ្លួនដែលបែកពីគ្រួសារ ដូច្នេះប្អូនៗត្រូវតែចេះរៀនរស់ដោយខ្លួនឯង រៀនរស់នៅជាមួយមិត្តភ័ក្តិ និងរៀនរស់បែបជាសហគមន៍មួយ ដែលផ្តល់សារៈប្រយោជន៍ និងគុណតម្លៃសំរាប់ជីវិតរបស់ពួកគេ៕

កំណើនក្នុងវិស័យឧស្សាហកម្មកម្ពុជានឹងថមថយក្នុងរង្វង់អត្រា ៨,៩ភាគរយនៅឆ្នាំ ២០២០

ដោយ វុត្ថា

ភ្នំពេញ៖ កំណើនក្នុងវិស័យឧស្សាហកម្ម ត្រូវបានព្យាករណ៍ថា នឹងមានការថមថយមក្នុងរង្វង់អត្រា ៨,៩%ក្នុងឆ្នាំ ២០២០ ធៀបនឹង ១០,៧ % នៅក្នុងឆ្នាំ ២០១៩ ។ នេះបើយោងតាមខ្លឹមសារសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២០។

ខ្លឹមសារសេចក្តីព្រាងច្បាប់ដដែលពន្យល់ថា ដោសារការំពឹងទុកនូវកំណើនយឺតនៃវិស័យកាត់ដេ និងកមណើនយឺតបន្តិចនៃអនុវិស័យសំណង់ ទោះបីជាអនុវិស័យឧស្សាហកម្មមិនមែនកាត់ដេរ ទាំំងសម្រាប់បំរើឱ្យការនាំចេញ និងទីផ្សារក្នុងស្រុកអាចសម្រេចបានកំណើនល្អប្រសើរជាងឆ្នាំ ២០១៩បន្តិចក្តី។

អនុវិស័យកាត់ដេរ ត្រូវបានព្យាករថា នឹងមានកំណើនទាប ដោយសារការថមថយកំណើននៃសេដ្ឋកិច្ចពិភពលោក និងការរំពឹងទុកនូវផលប៉ះពាល់ដែលអាចបណ្តាលមកពីភាពមិនច្បាស់លាស់នៃប្រព័ន្ធអនុគ្រោះពាណិជ្ជកម្មជាមួយដៃគូមួយចំនួន។

ជាមួយគ្នានេះដែរ បើតយោងតាមនិន្នាការក្នុងពេលថ្មីៗនេះ អនុវិស័យសំណង់អាចប្រឈមនឹងការកែតម្រូវផ្នែកទីផ្សារដែលអាចនឹងធ្វើឱ្យកំណើននៃវិស័យនេះ មានការថមថយខ្លះ។

យ៉ាងណាមិញអនុវិស័យមិនមែនកាត់ដេរ ដូចជាម្ហូបអាហារ និងភេសជ្ជៈ ឧស្សាហកម្មដំឡើងយាន្តយន្ត គ្រឿងបង្គុំអេឡិកត្រូនិក គ្រឿងបន្លាស់ គ្រឿងសង្ហារិម និងស៊ីមង់ត៍ជាដើម ទាំងសម្រាប់បំរើឱ្យការនាំចេញ និងតម្រូវការទីផ្សារក្នុងស្រុកនឹងមានសន្ទុះកំណើនខ្ពស់ទាំងក្នុងទិដ្ឋភាពនៃការពង្រីកការវិនិយោគ ដែលមានស្រាប់ និងទាំងក្នុងទិដ្ឋភាពនៃវិយោគថ្មី៕

វិស័យអចលនទ្រព្យនៅខេត្តសៀមរាបនៅតែមានសក្តានុពល ទោះជាចំនួនភ្ញៀវទេសចរធ្លាក់ចុះ

ដោយ ប៊ី

សៀមរាបៈ ក្រុមអ្នកជំនាញអចលនទ្រព្យបានលើកឡើងថា វិស័យអចលនទ្រព្យខេត្តសៀមរាប នៅតែទទួលបានការចាប់យ៉ាងខ្លាំងពីសំណាក់អ្នកក្នុងស្រុក និងអន្តរជាតិ ខណៈសេដ្ឋកិច្ចក្នុងខេត្តនេះ នៅតែមានសក្តានុពលសម្រាប់ការវិនោគ។

លោកងួន ឆាយលាង នាយកប្រតិបត្តិក្រុមហ៊ុន Pointer Property បានប្រាប់ Propertyarea.asia នៅថ្ងៃ ២៦ ខែតុលាកន្លងមកថា ដោយមើលទីផ្សារបច្ចុប្បន្ននៅខេត្តសៀមរាប ដែលនៅតែរំពឹងតែលើវិស័យទេសចរណ៍ ការកើនឡើងក្នុងវិស័យអចលនទ្រព្យបានផ្សារភ្ជាប់ជាមួយវិស័យទេសចរណ៍ ហើយលំនៅឋានបែបទេសចរណ៍នៅតែមានតម្រូវការក្នុងវិស័យក្នុងខេត្តសៀមរាប។

លោកបន្តថា “នៅពេលខាងមុខសៀមរាប នឹងមានទីក្រុងរណប ទីក្រុងសៀមរាបនឹងកាន់តែមានការអភិវឌ្ឍសម្បូរបែប ដែលផ្តល់ឳកាសច្រើន ក្នុងការវិនិយោគនៅក្នុងវិស័យអចលនទ្រព្យនៅទីនេះ”។

លោកងួន ឆាយលាងបានឱ្យដឹងទៀតថា ក្រៅពីមានព្រលានយន្តហោះថ្មីមួយទៀត ដែលនឹងចូលរួមចំណែកយ៉ាងសំខាន់ ក្នុងជំរុញសេដ្ឋកិច្ចក្នុងខេត្តនេះ ខេត្តមានគំរោងវិនិយោគជាច្រើនទៀត ដូចជាគម្រោងអាងចិញ្ចឹមត្រីដែលតម្លៃ៧០ លានដុល្លារនឹងចូលរួមចំណែកការក្នុងការធ្វើពិពិធកម្មវិស័យទេសចរណ៍ គម្រោងសាងសង់ផ្សារបណ្តែតទឹក កន្រ្តកវិលដ៏ធំដែលវិនិយោគដោយក្រុមហ៊ុនជប៉ុនជាដើម។

នាពេលខាងមុខ ខេត្តសៀមរាប នឹងមានក្រុងរណបទាំងមូលមានផ្ទៃដីរហូតទៅដល់២១៥ ហិកតា និងមានគម្រោងអភិវឌ្ឍន៍ផ្សេងៗ ទាក់ទងវិស័យទេសចរណ៍ វិស័យធុរកិច្ច វិស័យអប់រំ និងការរស់នៅលក្ខណៈប៉ៃតង។ នេះជាផែនការមួយដែលសិក្សាដោយក្រុមហ៊ុន ULS សហការជាមួយនឹងក្រុមហ៊ុន Belt Road Capital Management (BRCM) ហើយមានអ្នកគូសប្លង់មេជាជនជាតិដាណឺម៉ាក់ ដែលមានបទពិសោធន៍ជាង ២០ ឆ្នាំ។

បើទោះបីជួបប្រទះ នឹងការធ្លាក់ចុះចំនួនភ្ញៀវទេសចរក៏ដោយ លោកឆាយលាងនៅតែមានសុទិដ្ឋិនិយមថា “នៅពេល អនាគត អ្វីនឹងត្រឡប់មកល្អប្រសើរឡើង ហើយគម្រោងអភិវឌ្ឍន៍ច្រើន នឹងចូលរួមចំណែកក្នុងការអភិវឌ្ឍន៍ និងជំរុញសេដ្ឋកិច្ចក្នុងតំបន់នេះកាន់ប្រសើរផងដែរ”។

ប្រធានសភាពាណិជ្ជកម្មខេត្តសៀមរាប លោកហ៊ុយ ភៀវបានថ្លែងក្នុងសិក្ខាសាលាស្វែងយល់ពីគម្រោងអភិវឌ្ឍន៍ នៅខេត្តសៀមរាបនៅថ្ងៃទី ២៦ ខែ តុលាថា វិស័អចលនទ្រព្យនៅខេត្តនេះ កំពុងមានសន្ទុះគួរឱ្យកត់សម្គាល់ ខណៈឃើញមានគម្រោងអភិវឌ្ឍន៍ជាច្រើនកំពុងហូរចូលក្នុងខេត្តមួយនេះ។

លោកមានប្រសាសន៍ “គម្រោងអភិវឌ្ឍន៍អចលនទ្រព្យជាច្រើន បានបាញ់ឆ្ពោះទៅកាន់ទិសខាងកើតនៃខេត្តសៀមរាប ដូច្នេះធ្វើឱ្យមានកំណើនអចលនទ្រព្យនៅទិសខាងកើត”។

ទោះបីជាយ៉ាងក៏ដោយ ក៏លោក ភៀវ បានក្រើនរំលឹកដល់វិនិយោគិនក្នុងវិស័យអចលនទ្រព្យក្នុងខេត្តសៀមរាប ឱ្យប្រុងប្រយ័ត្នក្នុងការទិញ និងវិនិយោគអចលនទ្រព្យ ពិសេសដីធ្លី ដោយលោកបានថ្លែងថា អ្នកវិនិយោគគួរមើលតំបន់ ឬទីតាំងដីធ្លីឱ្យបានច្បាសលាស់ មុននឹងទិញ ឬវិនិយោគ ដោយសារតំបន់ និងទីតាំងមួយចំនួនជាប់នឹងតំបន់អប្សរា និងតំបន់អភិរក្សដែលមិនអនុញាតឱ្យធ្វើការសាងសង់ឡើយ។

លោកក៏បានលើកឡើងដែរថា ការទិញគម្រោងណាមួយ ឬដីឡូត៍ណាមួយ អ្នកទិញ ត្រូវពិនិត្យមើលអាជ្ញាប័ណអភិវឌ្ឍន៍ឱ្យបានច្បាស់លាស់៕

លោកស៊ុន ចាន់ថុលបន្តត្រួតពិនិត្យស្ថានភាពកំណាត់ផ្លូវជាតិលេខ៣ ដើម្បីធានាបានគុណភាពរឹងមាំយូរអង្វែង

ដោយៈ រ៉ាណេត

កំពតៈ ទេសរដ្ឋមន្រ្តី រដ្ឋមន្ត្រីក្រសួងសាធារណៈការ និងដឹកជញ្ជូន លោក ស៊ុន ចាន់ថុល បានចុះពិនិត្យការដ្ឋានសាងសង់ផ្លូវជាតិលេខ៣ ដើម្បីប្រាកដថា ក្រុមហ៊ុនធានាការសាងសង់ត្រូវបានធ្វើឡើងស្រប ទៅតាមការកំណត់នៃបទដ្ឋានយ៉ាងពិតប្រាកដ និងអាចធានាគុណភាពប្រើប្រាស់បានយូរអង្វែងទៅថ្ងៃអនាគត។

កំណាត់ផ្លូវជាតិលេខ៣ (ភ្នំពេញ-កំពត) មួយខ្សែនេះ មានប្រវែងសរុបជាង១៣៤គីឡូម៉ែត្រ ក្នុងនោះប្រវែង៦៩គីឡូម៉ែត្រចាប់ពីចោមចៅ ដល់ចំណុចផ្លូវបំបែកបាយគូស ត្រូវសាងសង់ជាផ្លូវ៤គន្លង និងចាប់ពីបែកគុស ដល់ទីរួមខេត្តកំពតប្រវែង៦៥,៧៩៦គីឡូម៉ែត្រ ត្រូវសាងសង់ជាផ្លូវ២គន្លង។

គម្រោងនេះ គ្រោងចំណាយថវិកាប្រមាណ២១៩,៩១១លានដុល្លារអាមេរិក ជាហិរញ្ញប្បទានសម្បទាន ពីសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សាងសង់ដោយក្រុមហ៊ុនសាជីវកម្មស្ពាន ថ្នល់ចិន ត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេសសំណង់ក្វាងចូវ វ៉ានអាន និងប្រើរយៈពេល៤៨ខែ។

មានប្រសាសន៍នាក្នុងឱកាស ចុះពិនិត្យស្ថានភាពស្ថាបនាជួសជុលផ្លូវលោក ស៊ុន ចាន់ថុលបានគូសបញ្ជាក់ថា “ផ្លូវមានការខូចខាតដោយសារកត្តាអាកាសធាតុ ដោយសារមានភ្លៀងធ្លាក់ជោគជាំ តំបន់ខ្លះមានប្រភេទដីទន់ (ដីស្អុយ) ការដឹកទំនិញលើសទម្ងន់កម្រិតកំណត់ បានធ្វើឱ្យផ្លូវឆាប់ទទួលរងការខូចខាត”។

លោកបានបន្តទៀតថា “ឈានចូលដល់ផុតរដូវភ្លៀង យើងនឹងសម្រុកធ្វើផ្លូវជាតិលេខ៣ នេះជាប្រភេទបេតុងកៅស៊ូ (AC) ដែលមានគុណភាពប្រើប្រាស់រហូតដល់១២ឆ្នាំ ហើយបច្ចុប្បន្ន យើងធ្វើការជួសជុលបណ្តោះអាសន្ន ដើម្បីជួយសម្រួលបងប្អូនធ្វើចរាចរណ៍”។

លោកទេសរដ្ឋមន្ត្រី បានបញ្ជាក់ផងដែរថា ផ្លូវថ្នល់មួយចំនួននៅកម្ពុជាកំពុងត្រូវបានបន្តអភិវឌ្ឍជាបន្តបន្ទាប់ពីកៅស៊ូ២ស្រទាប់ (DBST) ទៅជាបេតុងកៅស៊ូ (AC) និងផ្លូវមួយចំនួនទៅជាបេតុងស៊ីម៉ងត៍ ដូចជា ផ្លូវកោះកុង- ស្រែអំបិល កំពង់ធ្វើជា AC ២គន្លង និងមាន៤កន្លែង ពង្រីកទៅជា៤គន្លងផងដែរ។

លោកទេសរដ្ឋមន្ដ្រី ក៏បានបញ្ជាក់ពីគម្រោង បើកការដ្ឋានសាងសង់ផ្លូវជាតិលេខ២ ផ្លូវជាតិលេខ១០ (សំឡូត-កោះកុង) និងគម្រោងសម្ពោធដាក់ឱ្យប្រើប្រាស់ជាផ្លូវការផ្លូវជាតិលេខ២១ ផ្លូវជាតិ៥៥ ដែលជាផ្លូវស្រស់ស្អាតឡើងចុះភ្នំ ភ្ជាប់ទៅទល់ដែនថៃ នាពេលឆាប់ៗនេះផងដែរ។

សម្រាប់តែផ្លូវជាតិលេខ៣ នឹងត្រូវធ្វើការជួសជុលឱ្យបានរួចរាល់ នៅក្នុងខែធ្នូចុងឆ្នាំ២០១៩នេះ ដើម្បីរៀបចំព្រឹត្តិការណ៍ធំៗចំនួន២ គឺពិធីបុណ្យសមុទ្រជុំទី៣ នៅខេត្តកំពត ចាប់ពីថ្ងៃទី២៧ ដល់ថ្ងៃទី២៩ ខែធ្នូ ឆ្នាំ២០១៩ និងពិធីប្រណាំងកង់អន្តរជាតិ ចាប់ពីខេត្តកោះកុង ឆ្ពោះមកខេត្តកែប ដែលប្រទេសកម្ពុជាធ្វើជាម្ចាស់ផ្ទះ នៅខែមករា ឆ្នាំ២០២០ ខាងមុខនេះ៕

ការស្ថាបនាហេដ្ឋារចនាសម្ព័ន្ធទ្រង់ទ្រាយធំនឹងប្រែក្លាយក្រុងព្រះសីហនុជាទីក្រុងទំនើប និងកាន់តែទាក់ទាញអ្នកធុរកិច្ច

ដោយៈ រ៉ាណេត

ព្រះសីហនុៈ មិនយូរប៉ុន្មានទៀតទេ ក្រុងព្រះសីហនុ នឹងក្លាយទៅជាទីក្រុងដ៏ទំនើប និងមានសោភ័ណភាព បរិស្ថានល្អសម្រាប់ការរស់នៅ ទេសចរណ៍ និងធុរកិច្ច ខណៈគម្រោងអភិវឌ្ឍន៍ហេដ្ឋារចនាសម្ព័ន្ធ ទូទាំងខេត្តព្រះសីហនុ នឹងរៀបចំឡើងដោយក្រុមការងារបច្ចេកទេសជំនាញចំនួន៣ស្ថាប័នរួមគ្នាក្នុងពេលតែមួយ។

ការកសាងហេដ្ឋារចនាសម្ព័ន្ឋឡើងវិញ នៅទីទាំងខេត្ត ក្រុងព្រះសីហនុនាពេលនេះ ធ្វើឡើងក្រោមការដឹកនាំ និងចង្អុលបង្ហាញផ្ទាល់ពីលោកឧបនាយករដ្ឋមន្រ្តីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ហើយគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ; បានសហការជាមួយក្រសួងសាធារណការ និងដឹកជញ្ជូន រួមជាមួយនឹងរដ្ឋបាលសាលាខេត្តព្រះសីហនុ កំពុងអនុវត្តគម្រោងជាបណ្តើរៗព្រមៗគ្នា ហើយទៅលើគម្រោងស្ថាបនាបណ្តាញហេដ្ឋារចនាសម្ព័ន្ធនានានៅទូទាំងខេត្ត ក្រុងព្រះសីហនុ។

យោងតាមមន្ត្រីនៃគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជាបានបញ្ជាក់ថា ផ្លូវសរុប៣៤ខ្សែក្នុងក្រុងព្រះសីហនុ ប្រវែងសរុបជាង៨៤គីឡូម៉ែត្រ នឹងត្រូវបានស្ថាបនាជាថ្មីឡើងវិញ ដោយចំណាយទឹកប្រាក់សរុបប្រមាណជាង២០០លានដុល្លារអាមេរិក ស្របតាមបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីសំដៅ ប្រែក្លាយក្រុងព្រះសីហនុជាទីក្រុងទំនើប និងជាតំបន់សេដ្ឋកិច្ចពហុប៉ូលរបស់កម្ពុជា។

បច្ចុប្បន្ននេះផ្លូវចំនួន២៤ ខ្សែ ក្នុងខេត្តព្រះសីហនុ បាន និងកំពុងចាប់ផ្ដើមស្ថាបនាជាបណ្ដើរៗហើយក្នុងនោះរួមមាន ១) កងវិស្វកម្ម សម្តេចតេជោ ហ៊ុន សែន សៀមរាប ស្ថាបនាផ្លូវមហាវិថីជំទាវម៉ៅ ប្រវែង ៩.៣៦៥ម ចំនួន ០១ ខ្សែ។ ២)កងវិស្វកម្ម លេខ ១៧៨ ស្ពានថ្នល់ ស្ថាបនាវិថីឯករាជ្យ ប្រវែង ៥.៣៦៥ម ចំនួន ០១ខ្សែ។ ៣) ក្រុមហ៊ុន ហេង សម្បត្តិ ស្ថាបនាមហាវិថីឆ្នេររាម, វិថីអូរត្រេះ, វិថីពូទ្បូវៃ, វិថី២ធ្នូ, វិថី២៨ មិថុនា ប្រវែងសរុប ២៣.៣៦០ម ចំនួន ០៥ខ្សែ។ ៤) ក្រុមហ៊ុន រ៉ូយ៉ាល់មេគង្គ ស្ថាបនាមហាវិថីរាមលេខ ៤៥ និងវិថីមិត្តភាពកម្ពុជា-រុស្សី លេខ ៧០៥ ប្រវែងសរុប ១១.៦០៣ម ចំនួន ០២ខ្សែ ។

៥) ក្រុមហ៊ុន សារជីវកម្ម ពិស្ណុការ ស្ថាបនាខ្សែផ្លូវលេខ ៤, ៦, ១២, ៧.១៧, ១៨. ១៩, ២០, ១១ ប្រវែងសរុប ១២.៥៧២ម. ចំនួន ០៩ខ្សែ ។ ៦) ក្រុមហ៊ុន SCE ស្ថាបនាវិថីចំណោតអូរត្រាវ លេខ ៤៩ ប្រវែងសរុប ៦.៥០៦ម ចំនួន ១ខ្សែ និង ៧) ក្រុមហ៊ុន VT ស្ថាបនាផ្លូវលេខ ១១៥, ១៣៥, ១០២, ១២៦, ៥០២ ប្រវែងសរុប ៥.៥៦២ម ចំនួន ០៥ ខ្សែ។

នៅអំឡុងពេលចុះត្រួតពិនិត្យការដ្ឋានស្ថាបនាផ្លូវ «មហាវិថីជំទាវម៉ៅ» នាពេលថ្មីៗនេះ លោកគួច ចំរើនអភិបាលខេត្តព្រះសីហនុ បានលើកឡើងថា “ប្រជាពលរដ្ឋកម្ពុជាទាំងអស់នឹងភ្ញាក់ផ្អើលជាមួយសមិទ្ធផលថ្មី ក្នុងទឹកដីខេត្តព្រះសីហនុ ដែលកើតមាននៅពេលខាងមុខនេះ”។ លោកបន្តថា “ដើម្បីសម្រេចបានតាមផែនការ គឺមិនមែនត្រឹមអាជ្ញាធរខេត្តទេ គឺប្រជាពលរដ្ឋក្នុងខេត្តទាំងមូលត្រូវរួមគ្នា ប្រឹងប្រែងឱ្យអស់លទ្ធភាព ដើម្បីប្រែក្លាយទីក្រុងមួយនេះ ឱ្យទៅជាទីក្រុងបៃតង និងជាទីក្រុងទេសចរណ៏ដ៏ទំនើប សម្រាប់បងប្អូនកម្ពុជា មកកម្សាន្តនៅឆ្នាំ ២០២០ ខាងមុខនេះ”។

តាមផែនការគ្រោងទុក «មហាវិថីជំទាវម៉ៅ» គឺជាខ្សែផ្លូវយុទ្ធសាស្រ្តថ្មីមួយសម្រាប់ដោះស្រាយបញ្ហាចរាចរណ៍ ក្នុងការធ្វើដំណើររបស់បងប្អូនប្រជាពលរដ្ឋ ពីផ្លូវបំបែករាម មកកាន់ក្រុងព្រះសីហនុ ដោយចំណាយរយៈពេលក្រោម៣០នាទី។ ជាមួយគ្នានេះ លោកអភិបាលខេត្តព្រះសីហនុ ក៏បានសំណូមពរដល់បងប្អូនប្រជាពលរដ្ឋទាំងអស់ ចូលរួមជាមួយអាជ្ញាធរគ្រប់លំដាប់ថ្នាក់ និងស្ថាប័នពាក់ព័ន្ធ ដើម្បីជំរុញការកសាង និងរៀបចំហេដ្ឋារចនាសម្ព័ន្ធនានា ក្នុងខេត្តព្រះសីហនុ ប្រកបដោយប្រសិទ្ធភាពខ្ពស់ ជាពិសេសគឺដើម្បីស្វាគម៍ភ្ញៀវជាតិអន្ដរជាតិ អ្នកវិនិយោគ និងស្ដារស្ថានភាពសេដ្ឋកិច្ចខេត្តក៏ដូចជារបស់បងប្អូន បានដោយរីកចម្រើន និងមានស្ថេរភាពជារៀងរហូត៕

ការវិនិយោគលើវិស័យអចលទ្រព្យចិននៅមានស្ថេរភាពល្អប្រសើរ

ដោយ វុត្ថា

ប៉េកាំងៈ កំណើននៃការវិនិយោគក្នុងវិស័យអចលនទ្រព្យ នៅក្នុងប្រទេសចិននៅតែមានស្ថេរភាពក្នុងរយៈពេល៩ខែ នៃឆ្នាំ ២០១៩នេះ ។ នេះបើយោងរបាយការណ៍របស់ការិយាល័យស្ថិតិជាតិ (NBS) របស់ប្រទេសចិន បានបានចេញផ្សាយកាលពីចុងសប្តាហ៍កន្លងមកនេះ។

NBS បានបន្តថា ការវិនិយោគរបស់ចិន ក្នុងការអភិវឌ្ឍអចលនទ្រព្យបានកើនឡើង ១០.៥ភាគរយ ពីមួយឆ្នាំទៅមួយឆ្នាំ ហើយក្នុងរយៈពេល៩ខែឆ្នាំ២០១៩ ដែលមិនមានការផ្លាស់ប្តូរពីរយៈពេល៨ខែដំបូងឡើយ។

ទិន្នន័យនេះក៏បានបង្ហាញផងដែរ នូវការលក់លំនៅឋានពាណិជ្ជកម្ម បានកើនឡើងសរុប១,១៩ពាន់លានម៉ែត្រក្រឡា ចាប់ពីខែមករាដល់ខែកញ្ញា ពោលគឺធ្លាក់ចុះ ០,១ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលមានការធ្លាក់ចុះ០,៦ ភាគរយក្នុងរយៈពេល៨ខែដំបូង។

ដោយឡែក តម្លៃលំនៅឋាននៅក្នុងទីក្រុងសំខាន់ៗចំនួន៧០របស់ចិន ក៏នៅតែមានស្ថេរភាពល្អដដែល ជាមួយនឹងការកើនឡើងបន្តិចបន្តួច កាលពីខែកញ្ញាកន្លងមកនេះ ក្នុងនោះ តម្លៃផ្ទះថ្មីនៅក្នុងទីក្រុងធំៗចំនួន៤រួមមាន ទីក្រុងប៉េកាំង ទីក្រុងសៀងហៃ ទីក្រុងសេនជេន និងទីក្រុងក្វាងចូវបានកើនឡើង០,៤ ភាគរយក្នុងខែកញ្ញា បើធៀបនឹងខែមុនគឺ ០,១ ភាគរយខ្ពស់ជាងខែមុន។

មន្ត្រីស្ថិតិជាន់ខ្ពស់របស់ NBS លោក Kong Peng បាននិយាយថា ទីផ្សារអចលនទ្រព្យ នៅក្នុងប្រទេសចិន នៅតែបន្តមានស្ថិរភាពល្អប្រសើរ ចាប់តាំងពីដើមឆ្នាំរហូតដល់មកនេះ បើទោះបីមានសង្គ្រាមពាណិជ្ជកម្មយ៉ាងណាក្តី និងអំពាវនាវដល់ភាគីពាក់ព័ន្ធឱ្យមានការអនុវត្តន៍ យន្តការគ្រប់គ្រងរយៈពេលវែង សម្រាប់ទីផ្សារអចលនទ្រព្យមួយនេះ៕

មជ្ឈមណ្ឌលពាណិជ្ជកម្មកំពស់កប់ពពកជាលើកដំបូងក្នុងខេត្តកំពតបានចាប់ផ្តើមសាងសង់ហើយ

ដោយគង់ សូរិយា

ភ្នំពេញៈ មជ្ឈមណ្ឌលពាណិជ្ជកម្មចម្រុះភ្លោះកំពស់៤៥ជាន់ ដែលជាអាគារខ្ពស់ជាងគេនៅក្នុងខេត្តកំពត បានចាប់ផ្តើមបើកការដ្ឋានសាងសង់ហើយ បន្ទាប់ពីគំរោងនេះត្រូវបានសិក្សាអស់រយៈពេលជាយូរ។

ពិធីបើកការដ្ឋានសាងសង់នេះ បានធ្វើឡើងក្រោមអធបិតីភាពលោកទេព ធន់រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់់ និងអភិបាលខេត្តកំពតលោកជាវ តាយនិងមន្រ្តីពាក់ព័ន្ឋជាច្រើនទៀត។

គំរោងនេះនឹងរួមមានផ្សារទំនើប អាគារការិយាល័យ សណ្ឋាគារ ភោជនីយដ្ឋាន អាផាតម៉ិនជាដើម។

មន្រ្តីជាន់ខ្ពស់របស់ក្រុមហ៊ុនថៃ ប៊ុនរ៉ុងបានមានប្រសាសន៍ក្នុងលក្ខខ័ណ្ឌមិនបញ្ចេ ញឈ្មោះថា គំរោងនេះ វាជាមជ្ឈមណ្ឌលពាណិជ្ជកម្មធំជាងគេនៅខេត្តកំពត និងជាលើកដំបូងក្នុងប្រវត្តិសាស្រ្តរបស់ខេត្តនេះ ហេតុនេះការសាងសង់ត្រូវគិតគូពីបញ្ហាបរិស្ថាន បទដ្ឋានបច្ចេកទេសជាច្រើន ដែលត្រូវការរយៈពេលមួយ ដើម្បីបញ្ចប់។

កំពតជាខេត្តទេសចរណ៍ជាប់មាត់សមុទ្រ ក្នុងភាគនិរិតីនៃប្រទេសកម្ពុជាដ៏មានប្រជាប្រិយភាព ដោយសារតែអំណោយផលពីធម្មជាតិ។ ខេត្តនេះ មានតំបន់ទេសចរណ៍ ចំនួន១៧កន្លែងសំខាន់ៗ ដែលស្រូបយកភ្ញៀវទេសចរណ៍ជាតិ អន្តរជាតិជិតពីរលាននាក់ ក្នុងមួយឆ្នាំ២០១៨។ ប៉ុន្តែខេត្តជាប់សមុទ្រមួយនេះ នៅមិនទាន់មានឆ្នេខ្សាច់សម្រាប់ងូតទឹកកម្សាន្តនៅឡើយទេ ទើបតែដើមឆ្នាំ២០១៩នេះរដ្ឋបាលខេត្ត ដោយមានការគាំទ្រពីក្រសួងទេសចរណ៍ បានចាប់ផ្តើមរៀបចំអភិវឌ្ឍតំបន់ឆ្នេរខ្សាច់ កម្សាន្តដ៏ស្រស់ស្អាតមួយ ដែលមានទាំងផ្សារទំនើប និងសណ្ឋាគារផ្កាយប្រាំផង។

អភិបាលខេត្តកំពតលោកជាវ តាយបានមានប្រសាសន៍ឱ្យដឹងថា វិស័យសំណង់ និងអចលនទ្រព្យ កំពុងមានការរីកចម្រើនខ្លាំង ដោយសារគំរោងដ៏ធំនេះនឹងផ្តល់ទំនុកចិត្តបន្ថែមទៀត ដល់អ្នកវិនិយោគបរទេសដែលគ្រោង ចូលមកវិនិយោគលើគំរោងជាច្រើននៅក្នុងខេត្តនេះ៕