ដោយៈ រ៉ាណេត
កោះកុងៈ ក្រសួងរៀបចំដែនដី នគរូបនីយកម្ម និងសំណង់ កាលពីល្ងាចថ្ងៃទី១១ ខែកុម្ភៈ ឆ្នាំ២០២០ម្សិលមិញនេះ បានសម្រេចចេញសេចក្ដីប្រកាសជាផ្លូវការ ដោយបញ្ជាក់ពីការមិនទទួលយកសំណើរ ដែលស្នើសុំដោយប្រជាពលរដ្ឋចំនួន៧៧គ្រួសារ ស្ថិតនៅឃុំតានួន ស្រុកបទុមសាគរ ខេត្តកោះកុងនោះទេ។
ជាការឆ្លើយតបទៅនឹងសំណើស្នើសុំ របស់ប្រជាពលរដ្ឋចំនួន៧៧គ្រួសារ ដែលបានឡើងមកធ្វើការតវ៉ានៅស្ដីការក្រសួងរៀបចំដែនដី នគរូបនីយកម្ម និងសំណង់ ដោយស្នើឱ្យសួងជួយសម្រួល និងដោះស្រាយបញ្ហាដីធ្លីសម្រាប់អាស្រ័យផល និងស្នាក់នៅស្ថិតនៅក្នុងតំបន់គម្រោងអភិវឌ្ឍន៍របស់ក្រុមហ៊ុន UNION DEVELOPMENT GROUP Co.,Ltd ដោយសុំបន្ថែមដីស្រែចំនួន១ហិកតា ក្នុងមួយគ្រួសារនោះ ក្រសួងរៀបចំដែនដី នគរូបនីយកម្ម និងសំណង់ បានសម្រេចចេញសេចក្ដីប្រកាស មិនទទួលយកយកសំណើរនោះទេ។
-->
ការសម្រេចចេញសេចក្ដីប្រកាសបដិសេធ មិនទទួលយកសំណើរ និងដោះស្រាយខាងលើនេះ ដោយសារតែក្រសួងបានអះអាងថា រាល់ប្រជាពលរដ្ឋដែលរស់នៅ និងអាស្រ័យផលដំណាំ ស្ថិតនៅក្នុងតំបន់គម្រោងអភិវឌ្ឍន៍ខាងលើនេះ ធ្លាប់ទទួលបានដំណោះស្រាយពីគណៈកម្មការអន្តរក្រសួងរួចរាល់ហើយ។
នៅក្នុងសេចក្ដីប្រកាសដដែលនេះ ក្រសួងរៀបចំដែនដី នគរូបនីយកម្ម និងសំណង់ បានលើកយកដំណោះស្រាយចំនួន៤ចំណុច ដែលគណៈកម្មការអន្តរក្រសួងធ្លាប់បានធ្វើកាលពីពេលកន្លងទៅផងដែរ ដោយក្នុងមួយគ្រួសារទទួលបាន ដីលំនៅដ្ឋានទំហំ៥០ម៉ែត្រគុណ១០០ម៉ែត្រ ដីចម្ការទំហំចាប់ពី១ហិកតាដល់៦ហិកតា ទៅតាមទំហំដីធំ ឬតូច ដែលពួកគាត់ធ្លាប់បានកាន់កាប់ ផ្ទះឈើមួយខ្នង រួមជាមួយនឹងថវិកាចាប់ពី ៣៥០ដុល្លារ ដល់ ១០ ០០០ដុល្លារ ទៅតាមទំហំដីធំ ឬតូច ដែលពួកគាត់ធ្លាប់បានកាន់កាប់។
ក្រុមហ៊ុនចិន UNION Development Group Co., Ltd. កាលពីកកន្លងមកនេះបានប្រកាសបោះទុនវិនិយោគទឹកប្រាក់១,២០០លានដុល្លារ នៅស្រុកគិរីសាគរ និងស្រុកបទុមសាគរ ខេត្តកោះកុង ដើម្បីបើកការដ្ឋានសាងសង់ «ក្រុងវិស្សមកាលទេសចរណ៍» ដើម្បីរួមចំណែកលើកកម្ពស់វិស័យទេសចរណ៍ សេដ្ឋកិច្ច និងពាណិជ្ជកម្ម នៅក្នុងប្រទេសកម្ពុជា។
ក្រុមហ៊ុន ក៏បានចុះកិច្ចសន្យាជាមួយរាជរដ្ឋាភិបាលកម្ពុជា នៅថ្ងៃទី៩ ខែឧសភា ឆ្នាំ២០០៨ ដើម្បីធ្វើការអភិវឌ្ឍគម្រោងតារាសាគរ លើផ្ទៃដីសរុបទំហំ៣៦,០០០ហិចតា។ គិតមកទល់បច្ចុប្បន្ន ក្រុមហ៊ុនបានកំពុងសម្រុកអនុវត្តន៍ គម្រោងទៅតាមផែនការ ដោយបានបណ្តាក់ទុនវិនិយោគជាង១,៥០០លានដុល្លារ លើការសាងសង់អគារ និងហេដ្ឋារចនាសម្ព័ន្ធចាំបាច់មួយចំនួនដូចជា ប្រព័ន្ធគមនាគមន៍ ក្លឹបវាយកូនហ្គោល ព្រលានយន្តហោះ កំពង់ផែទឹកជ្រៅអន្តរជាតិ សួនលម្អ បណ្តាញទឹកស្អាត និងប្រព័ន្ធអគ្គិសនីជាដើម៕
