ដោយ វុត្ថា
កោះកុងៈ រដ្ឋបាលខេត្តកោះកុងបានឱ្យដឹងថា កន្លងមកការសាងសង់សំណង់មួយចំនួន មិនបានគោរពច្បាប់ និងបទបញ្ញត្តិទាក់ទងការងារនគរូបនីយកម្ម និងសំណង់ ព្រមទាំងបានសាងសង់បំពានលើតំបន់ហាមឃាត់ទៀតផង បណ្តាលឱ្យមានអនាធិបតេយ្យ បាត់បង់សោភ័ណភាពទីប្រជុំជនទូទាំងខេត្ត។
យោងតាមសេចក្តីជូនដំណឹងស្តីពីការសុំច្បាប់សាងសង់ ចុះហត្ថលេខាដោយលោកស្រី មិថុនា ភូថង អភិបាលខេត្តកោះកុងដែលគេហទំព័រ propertyarea.asia ទទួលបាននៅថ្ងៃទី២៣ ខែតុលាឆ្នាំ ២០១៩ នេះ បានឱ្យដឹងថា ដើម្បីអនុវត្តតាមខ្លឹមសារនៃអនុក្រឹត្យ និងលិខិតយោងខាងលើ រដ្ឋបាលខេត្តតកោះកុង បានដំណឹងដល់សារធារណៈជន ព្រមទាំងមន្ទីរ អង្គភាព ស្ថាប័ន និងភ្នាក់ងារហិរញ្ញវត្ថុ ដែលមានបំណងសាងសង់ ជួសជុល និងសង់បន្ថែមនូវសំណង់ ជួសជុល និសង់បន្ថែមនូវសំណង់របស់ខ្លួន ត្រូវអនុវត្តតាមចំណុចដូចជា
ទី១ រាល់សំណង់ ទោះបីជាសំណង់ឯកជន សំណង់រដ្ឋ ឬសំណង់អង្គការមិនមែនរដ្ឋាភិបាលក្តី ដាច់ខាតត្រូវសុំលិខិត អនុញ្ញាតសាងសង់ជាមុនសិន ពីសមត្ថកិច្ចជំនាញគ្រប់លំដាប់ថ្នាក់ ទើបអាចដំណើរការសាងសង់បាន ក្នុងន័យនេះម្ចាស់សំណង់ ពុំមានសិទ្ធិសាងសង់បណ្តើរ ស្នើសុំលិខិតអនុញ្ញាតសាងសង់បណ្តើរនោះឡើយ។
ទី២ ចំពោះសំណង់ដែលទទួលបានលិខិតអនុញ្ញាតសាងសង់រួចហើយ ក្នុងរយៈពេលមួយសប្តាហ៍យ៉ាងយូរ ម្ចាស់សំណង់ត្រូវមកបំពេញបែបបទ ស្នើសុំលិខិតអនុញ្ញាតបើកការដ្ឋានសាងសង់ ពីមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត ទើប អាចដំណើរការសាងសង់បាន(លើកលែងតែសំណង់ដែលស្ថិតនៅក្នុងក្រុង ស្រុក ដែលមានការិយាល័យច្រកចេញចូលតែមួយ គឺត្រូវសុំច្បាប់បើកការដ្ឋានពីរដ្ឋបាលក្រុង ស្រុកនោះ) ។ ប្រសិនបើ ពុំមានលិខិត អនុញ្ញាតបើកការដ្ឋានសាងសង់ទេ សំណង់នោះមិនអាចដំណើរការសាងសង់បានឡើយ។
ទី៣ សំណង់ដែលមានលិខិតអនុញ្ញាសាងសង់ ត្រូវសាងសង់ឱ្យបានត្រឹមត្រូវតាមគម្រោងប្លង់ដែលបានអនុញ្ញាត។ ករណីការសាងសង់មិនត្រឹមត្រូវតាមគម្រោងប្លង់ មន្ទីររៀបចំដែនដីនរូបនីយកម្មសំណង់ និងសុរិយោដីខេត្ត មានសិទ្ធិផ្អាកការដ្ឋានសំណង់នោះជាបណ្តោះអាសន្ន ហើយតម្រូវឱ្យម្ចាស់សំណង់កែតម្រូវសំណង់របស់ខ្លួនអោយបានត្រឹមត្រូវឡើងវិញតាមគម្រោង។
ទី៤ ចំពោះសំណង់ដែលបានផ្អាកការដ្ឋានសាងសង់ ដើម្បីធ្វើការកែតម្រូវ ត្រូវមកសុំលិខិតអនុញ្ញាតបើកការដ្ឋាន បន្តពីមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត ទើបអាចសាងសង់បាន។ ទី៥សំណង់ដែលជួសជូល ឬសាងសង់បន្ថែម ម្ចាស់សំណង់ត្រូវសុំលិខិតអនុញ្ញាត ពីសមត្ថកិច្ចជំនាញជាមុនសិន ទើបអាចសាងសង់ និងជួសជុលបាន។ ទី៦ គ្រប់ការដ្ឋានសំណង់ត្រូវធ្វើការហ៊ុព័ទ្ធការដ្ឋាន និងទុកដាក់គ្រឿងសំណង់ឱ្យបានត្រឹមត្រូវ ជៀសវាងការទុកដាក់លើចិញ្ចើមផ្លូវសាធារណៈ ដែលនឹងបង្កគ្រោះថ្នាក់ជាយថាហេតុ។
ទី៧ ក្រុមជាងសាងសង់សំណង់ ត្រូវមានវិញ្ញាបនបត្រប្រកបអាជីវកម្មសាងសង់ ចេញដោយក្រសួងរៀបចំដែនដីនគរូបនីយកម្ម និងសំណង់ ឬមន្ទីររៀបចំដែនដែនដីគរូបនីយកម្ម សំណង់ និងសុរិយោដីខេត្តនៅមានសុពលភាពតាមផ្លូវច្បាប់។ ទី៨ ហាមដាច់ខាតមិនឱ្យសាងសង់លើដី ដែលមានលក្ខណៈជាដីសាធារណៈរបស់រដ្ឋ និងដីតំបន់ហាមឃាត់ដូចជា៖ ដីបម្រុងជីករ៉ែ ដីតំបន់ព្រៃឈើ ទំនប់ទឹកបុរាណវិទ្យាសាស្ត្រ ដីបម្រុងធ្វើសួន ឧទ្យានសាធារណៈ ដីបម្រុងទុកធ្វើផ្លូវ ដីចំណីផ្លូវ ដីទីធ្លា គល់ស្ពាន ដីព្រែក ដីបឹង ត្រពាំង អូរ ស្ទឹង ដីឆ្នេរច្រាំងមាត់សមុទ្រ។ល។
ទី៩ សំណង់សត្វឃាត សំណង់ចិញ្ចឹមសត្វសម្រាប់ធ្វើអាជីវកម្មគ្រប់ប្រភេទ ដែលបង្ករប៉ះពាល់ ដល់បរិស្ថាន និងប្រជាពលរដ្ឋត្រូវសាងសង់ឆ្ងាយពីទីប្រជុំជនយ៉ាងតិច ២ គីឡូម៉ែត្រ។ ទី១០ រាល់សំណង់ត្រូវបំពាក់អាងប្រព្រឹត្តិកម្មទឹកកខ្វក់។ ប្រព័ន្ធអាងប្រព្រឹត្តកម្មទឹកកខ្វក់ មិនអាចតភ្ជាប់ដោយផ្ទាល់ ជាមួយនឹងប្រព័ន្ធលូបង្ហូរទឹកសាធារណៈ បានឡើយ។ ទី១១ រាល់សំណង់ទាំងឡាយណា ដែលបំពានលើសេចក្តីជូនដំណឹងនេះ រដ្ឋបាលឃុំ សង្កាត់ ក្រុង ស្រុក ខេត្តព្រមទាំងសមត្ថកិច្ចជំនាញ នឹងអនុវត្តតាមនីតិវិធីច្បាប់ជាធរមាន៕
សម្តេចតេជោបានបញ្ជាក់ផងដែរថា ចំណូលបានទទួលពីប្រេងនឹងត្រូវយកទៅប្រើសម្រាប់កសាងហេដ្ឋារចនាសម្ព័ន្ធ ដូចជាផ្លូវថ្នល់ ស្ពាន់ជាដើម”៕
