ដោយ វុត្ថា
ភ្នំពេញៈ យោងតាមឯកសារគោលនយោបាយ របស់ក្រសួងរៀបចំដែនដី គរូបនីយកម្ម និងសំណង់បានបង្ហាញថា ដើម្បីឱ្យផែនការរៀបចំដែនដីអនុវត្តឱ្យបានដោយរលូន និងអាចកាត់បន្ថយនូវរាល់ហានិភ័យ ដែលបណ្តាលមកពីគម្រោងផែនការអភិវឌ្ឍផ្សេងៗ ការធ្វើផែនការរៀបចំដែនដី និងផែនការប្រើប្រាស់ដី ព្រមទាំងការអភិវឌ្ឍលំនៅឋានត្រូវផ្សារភ្ជាប់នឹងការអភិវឌ្ឍតំបន់សេដ្ឋកិច្ច ជាពិសេសតំបន់ឧស្សាហកម្ម ដើម្បីរួមចំណែកដល់ការធ្វើឱ្យមានតុល្យភាព នៃរបាយប្រជាជនទូទាំងប្រទេស និងសមធម៌នៃការទទួលបានផលពីការអនុវត្តសេដ្ឋកិច្ច។
ជាមួយគ្នានេះ ក៏ត្រូវគិតគូរដល់រចនាសម្ព័ន្ធសេដ្ឋកិច្ចមួយ ប្រកបដោយតុល្យភាព ដែលអាចធានាដល់ការអភិវឌ្ឍរយៈពេលវែអក្នុងបរិបទ នៃសកលភាវូនីយកម្ម និងផ្តល់កាលានុវត្តភាពដល់ការបណ្តុះបណ្តាល និងការងារ ឬការស្វែងរកការងារដែលនៅឆ្ងាយពីលំនៅឋាន។
ដូច្នេះ ការកសាងផែនការអភិវឌ្ឍសេដ្ឋកិច្ចត្រូវគិតគូ ដល់ពាក្យស្លោក “បញ្ជូនការងារទៅដល់ប្រជាជន” និងការផ្សារភ្ជាប់ទៅនឹងការអភិវឌ្ឍលំនៅឋាន ដើម្បីអាចកាត់បន្ថយការចំណាយលើការធ្វើដំណើរ ឬបង្កើតការងារធ្វើនៅនឹងមូលដ្ឋាន ដែលរួមចំណែកកាត់បន្ថយគម្លាត នៃបរិយាកាសរស់នៅពីតំបន់មួយទៅតំបន់មួយទៀត។
វិធានការសំខាន់ផ្នែកសេដ្ឋកិច្ច គឺការប្រើប្រាស់ឱ្យបានសមស្របនូវសក្តានុពលនៃប្រភេទធនធានធម្មជាតិ ដើម្បីបម្រើដល់ការអភិវឌ្ឍវិស័យកសិកម្ម រ៉ែ ឧស្សាហកម្ម ថាមពល ពាណិជ្ជកម្ម ធុរកិច្ច សេដ្ឋកិច្ចជាតិ និងទេសចរណ៍ស្របទៅនឹងទីតាំងនីមួយៗ។
លក្ខខណ្ឌសមស្រប និងការធ្វើអាជីវកម្មលើធនធានប្រេង ឧស្ម័នធម្មជាតិ និងធនធានរ៉ែផ្សេងទៀត ត្រូវធានាឱ្យមានផលប៉ះពាល់បរិស្ថានតិចបំផុត និងគ្រប់គ្រងឱ្យមាននិរន្តរភាព។
ប្រឈមនឹងសភាពការណ៍ប្រែប្រួលអាកាសធាតុ នាពេលបច្ចុប្បន្ន ការរៀបចំដែនដីនិងការគ្រប់គ្រងការប្រើប្រាស់ធនធានធម្មជាតិ ជាបញ្ហាសំខាន់ចំពោះមុខ ក្នុងការអនុវត្តផែនការ ដែលស្ថាប័នពាក់ព័ន្ធបានសិក្សា និងមានយោបល់ស្របគ្នាលើផែនការយុទ្ធសាស្ត្រនៃការគ្រប់គ្រង និងការតម្រង់ទិសដល់ការអភិវឌ្ឍសេដ្ឋកិច្ច សង្គម៕
