ផ្សារទំនើប FURI TIMES SQURE នៅក្រុងព្រះសីហនុនឹងបើកដំណើរការនៅថ្ងៃ ទី២៥តុលាខាងមុខនេះ

ដោយគង់ សូរិយា

ព្រះសីហនុៈ ផ្សារទំនើប FURI TIMES SQURES ដែលជាផ្សារទំនើបដំបូងគេនៅក្រុងព្រះសីហនុនឹងបើកដំណើរការនៅថ្ងៃទី២៥តុលាខាងមុខនេះហើយជាមួយនឹងផលិតផលនិងហាងល្បីៗលំដាប់អន្តរជាតិជាច្រើន។

ជាមួយគ្នានេះផ្សារទំនើបខ្នាតអន្តរជាតិថ្មីមួយ FURI Times Square នឹងបើកដំណើរការនៅកំឡុងចុងឆ្នាំនេះផងដែរ។ ផ្សារទំនើបនេះវិនិយោគក្នុងទឹកប្រាក់ជាង៩លានដុល្លារអាមេរិកដោយនាំទៅជាមួយនូវផលិតផលល្បីៗជាច្រើនដើម្បីឆ្លើយតបសេចក្តីត្រូវការរបស់ប្រជាពលរដ្ឋ។

នាយកគ្រប់គ្រងផ្នែកទីតាំងជួលផ្សារទំនើប FURI Square លោកកង ដាវីត បានប្រាប់ឱ្យដឹងកាលពីពេលថ្មីៗនេះថាដោយសារតែមានកំណើននៃការវិនិយោគជាច្រើនគម្រោងលើគ្រប់វិស័យបានធ្វើឱ្យខេត្តព្រះសីហនុមានការអភិវឌ្ឍយ៉ាងឆាប់រហ័សលើសការរំពឹងទុក។

លោកបានបន្តទៀតថា “កំណើននៃការវិនិយោគបានធ្វើឱ្យប្រជាជនចូលមករស់នៅ និងប្រកបការងារនៅក្នុងខេត្តមួយនេះកាន់តែច្រើនជាពិសេសកំណើននៃចំនួនភ្ញៀវទេសចរដែលកាន់តែធ្វើឱ្យអំណាចនៃការទិញកាន់តែមានទំហំធំ”។ លោកបន្តទៀតថា“តាមការពិនិត្យឃើញជាក់ស្ដែងបច្ចុប្បន្ននេះនៅក្នុងខេត្តព្រះសីហនុមានមណ្ឌលលក់ទំនិញបែបទំនើបមានចំនួនតិចនៅឡើយខណៈដែលតម្រូវការរបស់អតិថិជនដែលមានជីវភាពកម្រិតមធ្យមមានចំនួនច្រើន”។

ដោយសារតែមើលឃើញសក្ដានុពលលើការផ្គត់ផ្គង់ខាងលើនេះមានក្រុមហ៊ុនធំៗជាច្រើនដែលសុទ្ធតែមានកេរ្តិ៍ឈ្មោះល្បីល្បាញលំដាប់អន្តរជាតិបានបង្ហាញខ្លួនព្រោងព្រាតជាមួយនឹងក្ដីរំពឹងថាអាចទទួលបានចំណែកទីផ្សារប្រកបដោយភាពជោគជ័យ។

លោកកង ដាវីត បានបន្តទៀតថា “តាមរយៈផ្សារទំនើបដ៏ធំដែលទើបតែមានលើកដំបូងគេបង្អស់នៅក្នុងខេត្តព្រះសីហនុ FURI Times Square មានក្រុមហ៊ុនលំដាប់អន្តរជាតិស្ទើរគ្រប់វិស័យបានបង្ហាញវត្តមាននៅក្នុងខេត្តមួយនេះរួមមានដូចជាក្រុមហ៊ុន Starbucks ក្រុមហ៊ុន Amazone Café ក្រុមហ៊ុន KOI ក្រុមហ៊ុន Dakasi Teaក្រុមហ៊ុនលក់សម្លៀកបំពាក់ LEVI’s ក្រុមហ៊ុន NIKE ក្រុមហ៊ុន Samsonite ក្រុមហ៊ុននាឡិកាដ៏ល្បីឈ្មោះ G-Shock ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត”។

ក្រៅពីនោះក៏មានផ្សារទំនើបមួយចំនួនទៀតបាននឹងកំពុងរៀបចំតុបតែងនិងកែលម្អដែលគ្រោងនឹងដាក់ឱ្យដំណើរការឆាប់ៗនាពេលខាងមុខនេះ និងមួយចំនួនទៀតបាននឹងកំពុងបុកគ្រឹះសាងសង់។សម្រាប់ទីផ្សារនៅក្នុងក្រុងព្រះសីហនុដែលមានផ្សារទំនើបច្រើនបែបនេះដែលមានចំនួន៥ទៅ៦កន្លែងបែបនេះគឺមានទំហំធំ។

លោកឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានមានប្រសាសន៍ឲ្យដឹងថាទាំងប្រជាពលរដ្ឋនៅក្នុងក្រុងនិងចំណាកស្រុកបាននឹងកំពុងមានជីវភាពធូធាឆ្ងាយបើធៀបទៅនឹងបណ្តាឆ្នាំមុនៗដែលអាចឆ្លើបតនិងអាចទទួលយកបាននូវការរីកចំរើនលើវិស័យផ្សារទំនើបនៅក្នុងក្រុងទាំងមូល។ លោកបន្តថាផ្អែកទៅលើកត្តារីកចំរើនទាំងនេះបានធ្វើឱ្យលំហូចូលប្រជាពលរដ្ឋមកពីបណ្តាខេត្តផ្សេងៗមកធ្វើការងារនិងប្រកបមុខរបរផ្សេងៗទៅតាមជំនាញរបស់ខ្លួន។

សម្រាប់វិស័យសំណង់នៅក្នុងខេត្តព្រះសីហនុមានសន្ទុះរីកចម្រើនយ៉ាងគំហុកក្នុងរយៈពេលប៉ុន្មានឆ្នាំកន្លងមកនេះដោយគិតចាប់ពីឆ្នាំ២០០៧រហូតដល់ខែកក្កដាឆ្នាំ២០១៩មានសំណង់ដែលទទួលបានលិខិតអនុញ្ញាតសាងសង់ចំនួន៨១៩គម្រោងក្នុងនោះអគាររាប់ពីកំពស់៥ជាន់ឡើងដល់៤០ជាន់មាន២១៨គម្រោង៕

ADB នឹងផ្តល់ហិរញ្ញប្បទានចំនួន ៤៩លានដុល្លារអាមេរិកដើម្បីពង្រីកប្រព័ន្ធទឹកស្អាត និងអនាម័យនៅកម្ពុជា

ដោយ ម៉ាណេត

ភ្នំពេញៈ ធនាគារអភិវឌ្ឍន៍អាស៊ី (ADB) បានអនុម័តហិរញ្ញប្បទានចំនួន៤៩លានដុល្លារអាមេរិកដើម្បីជួយរដ្ឋាភិបាលកម្ពុជា សម្រេចគោលដៅរបស់ខ្លួនក្នុងឆ្នាំ២០២៥ ក្នុងការផ្តល់នូវការទទួលបានជាសកល នូវសេវាកម្មផ្គត់ផ្គង់ទឹកស្អាត និងអនាម័យនៅតាមតំបន់ជនបទនៅក្នុងប្រទេស។

កម្មវិធីអភិវឌ្ឍន៍វិស័យផ្គត់ផ្គង់ទឹកស្អាត និងអនាម័យជនបទទី៣នឹងផ្តល់អត្ថប្រយោជន៍ដល់ប្រជាជនជាង ៤០០,០០០នាក់ ដោយសាងសង់ ឬស្តារកន្លែងទឹកជនបទចំនួន២ ៥០០នាក់ នៅក្នុងភូមិយ៉ាងតិច៤០០ នៅទូទាំងខេត្តចំនួន១០នៅកម្ពុជា។ វាក៏នឹងគាំទ្រដល់ការសាងសង់បង្គន់ថ្មីសម្រាប់គ្រួសារនីមួយៗ និងសាងសង់បង្គន់សាធារណៈនៅតាមសាលារៀន និងមណ្ឌលសុខភាពព្រម ទាំងធ្វើយុទ្ធនាការផ្សព្វផ្សាយអំពីអនាម័យផងដែរ។

លោកស្រី Siti Hasanah អ្នកជំនាញការអភិវឌ្ឍទីក្រុងរបស់ធនាគារអភិវឌ្ឍន៍អាស៊ីប្រចាំតំបន់អាស៊ីអាគ្នេយ៍មានប្រសាសន៍ថា “ការទទួលបានសេវាកម្មមូលដ្ឋាន ដូចជាការផ្គត់ផ្គង់ទឹកស្អាត និងអនាម័យជាសិទ្ធិជាមូលដ្ឋានរបស់មនុស្ស និងជាកត្តាសំខាន់សម្រាប់ការអភិវឌ្ឍដែលមានបរិយាប័ន និងនិរន្តរភាពនៅក្នុងប្រទេសណាមួយ”។

លោកបានបន្តថា “ធនាគារអភិវឌ្ឍន៍អាស៊ីគាំទ្រគោលដៅ របស់រដ្ឋាភិបាលកម្ពុជាក្នុងការផ្តល់នូវការផ្គត់ផ្គង់ទឹកស្អាត និងអនាម័យដែលអាចទុកចិត្តបានសម្រាប់ប្រជាជនកម្ពុជាទាំងអស់ក្នុងរយៈពេល៥ឆ្នាំខាងមុខ ជាពិសេសប្រជាជនដែលរស់នៅតាមជនបទ រួមជាមួយការខិតខំរបស់រដ្ឋាភិបាល ក្នុងការលើកកម្ពស់ការយល់ដឹងអំពីអនាម័យ”។

សេវាផ្គត់ផ្គង់ទឹកស្អាត និងអនាម័យប្រកបដោយចីរភាព និងគួរឱ្យទុកចិត្តនៅតែមានកម្រិតតិចតួចនៅតំបន់ជនបទ នៃប្រទេសកម្ពុជាដែលមានប្រមាណ៧៧% នៃប្រជាជនសរុប១៦,៥លាននាក់រស់នៅក្នុងប្រទេស។ ក្នុងឆ្នាំ២០១៧ ខណៈពេលដែល៧៣% នៃគ្រួសារនៅជនបទទទួលបានការផ្គត់ផ្គង់ទឹក ដែលមានភាពប្រសើរឡើងតែ១១% ទទួបបានការផ្គត់ផ្គង់ទឹក។ ទន្ទឹមនឹងនេះដែរ ប្រជាជននៅតាមជនបទ៥៦ភាគរយបានទទួលបានអនាម័យល្អប្រសើរ ហើយប្រហែល ៤១ភាគរយ នៃប្រជាជននៅតាមជនបទនៅតែអនុវត្តការបន្ទោរបង់ចំហរដែលអាចបណ្តាលឱ្យរាគ និងបញ្ហាសុខភាពសាធារណៈផ្សេងទៀត។

ធនាគារអភិវឌ្ឍន៍អាស៊ីគឺជាអ្នកចូលរួមធំជាងគេ ក្នុងការអភិវឌ្ឍហេដ្ឋារចនាសម្ព័ន្ធក្នុងវិស័យផ្គត់ផ្គង់ទឹកស្អាត និងអនាម័យនៅកម្ពុជា ដោយផ្តល់ប្រហែល២៥ភាគរយ នៃជំនួយខាងក្រៅសរុបសម្រាប់សេវាផ្គត់ផ្គង់ទឹកស្អាត និងអនាម័យរបស់ប្រទេស រួមមានទាំងទីក្រុងនិងជនបទ។ ចាប់តាំងពីឆ្នាំ២០០៥ ប្រជាជនចំនួន១លាននាក់បានទទួលអត្ថប្រយោជន៍ពីការទទួលបានការផ្គត់ផ្គង់ទឹកស្អាត និងប្រជាជនចំនួន៥០០,០០០នាក់ពីសេវាអនាម័យប្រសើរជាងមុន ក្រោមគម្រោងផ្គត់ផ្គង់ទឹកស្អាត និងអនាម័យដែលគាំទ្រដោយធនាគារអភិវឌ្ឍន៍អាស៊ីចំនួន៣នៅក្នុងបឹងទន្លេសាប។

កម្មវិធីអភិវឌ្ឍន៍នេះដែលត្រូវបានអនុម័តថ្មី រួមមាន ប្រាក់កម្ចីផ្អែកលើគោលនយោ បាយ១៥លានដុល្លារ កម្ចីឥណទានគម្រោង២៩,៦១លានដុល្លារ និងជំនួយ៤,៣៩លានដុល្លារពីមូលនិធិអភិវឌ្ឍន៍អាស៊ី។ ប្រាក់កម្ចីផ្អែកលើគោលការណ៍នេះ នឹងផ្តល់ការគាំទ្រផ្នែកគោលនយោបាយ ដើម្បីកែលម្អប្រព័ន្ធផ្គត់ផ្គង់ទឹកស្អាត និងប្រព័ន្ធរៀបចំផែនការអនាម័យតាមជនបទព្រមជាមួយនឹងការផ្តល់សេវាកម្ម ឃ្លាំងស្តុក និងប្រព័ន្ធគ្រប់គ្រង និងការចូលរួមរបស់វិស័យឯកជន។

ធនាគារអភិវឌ្ឍន៍អាស៊ី ក៏នឹងគ្រប់គ្រងហិរញ្ញប្បទានចំនួន១លានដុល្លារ ពីមូលនិធិបច្ចេកវិទ្យាកម្រិតខ្ពស់ (HLTF) ដែលផ្តល់ហិរញ្ញប្បទានដោយរដ្ឋាភិបាលជប៉ុន ដែលនឹងជួយសាកល្បងគម្រោងតំឡើង អង្គភាពផលិតទឹកពីខ្យល់ទៅក្នុងទីតាំងចំនួន៧ដោយមានកម្រិតទទួលបានទឹកស្អាតដែលមានសុវត្ថិភាព ជាពិសេសក្នុងរដូវប្រាំង៕

មហាសេដ្ឋីហុងកុងជាច្រើនបាននិងកំពុងស្វែងរកទីកន្លែងរស់នៅក្នុងប្រទេសអៀរឡង់

ដោយ វុត្ថា

ហុងកុងៈ មហាសេដ្ឋីមួយចំនួននៅក្នុងទីក្រុងហុងកុង កំពុងស្វែងរកកន្លែងរស់នៅក្នុងប្រទេសអៀរឡង់ ដោយសារតែភាពចលាចលផ្នែកនយោបាយនៅក្នុងទីក្រុង។

កាសែត Sunday Times ដែលមានមូលដ្ឋាននៅក្នុងចក្រភពអង់គ្លេសបានរាយការណ៍ថា មាហាសេដ្ឋីហុងកុងប្រមាណ១០០នាក់ បានទាក់ទងទៅក្រុមក្រុមហ៊ុន Bartra Wealth Advisors ដែលផ្សព្វផ្សាយពីកម្មវិធី វិនិយោគជនអន្តោប្រវេសន៍របស់អៀរឡង់ទៅកាន់អ្នកដែលមានលុយ នៅក្នុងតំបន់អាស៊ីកាលពី៨សប្តាហ៍មុន មុនពេលមានការតវ៉ាចាប់ផ្តើមនៅក្នុងខែមិថុនានៅក្នុងទីក្រុងហុងកុង។

កាសែត The Times បាននិយាយថា ដើម្បីមានលក្ខណៈគ្រប់គ្រាន់ សម្រាប់កម្មវិធីដែលផ្តល់សិទ្ធិស្នាក់នៅ អ្នកដាក់ពាក្យសុំត្រូវវិនិយោគ យ៉ាងហោចណាស់១លានអឺរ៉ូ ស្មើនឹង១,១ លានដុល្លារនៅក្នុងប្រទេសអៀរឡង់។

ការធ្វើបាតុកម្មប្រឆាំងនឹងច្បាប់ ដែលត្រូវបានដកចេញនាពេលឥឡូវនេះ បានក្លាយជាវិបត្តិធំបំផុត សម្រាប់ការគ្រប់គ្រងរបស់ទីក្រុងប៉េកាំង លើអតីតអាណានិគមអង់គ្លេសចាប់តាំងពីបានប្រគល់ត្រឡប់ ទៅអោយប្រទេសចិនក្នុងឆ្នាំ១៩៩៧។

ទីក្រុងហុងកុង ស្ទើតែនឹងត្រូវបិទទ្វារកាលពីថ្ងៃសៅរ៍ ធនាគារ និងធុរកិច្ចនានា ត្រូវបានបិទ ហើយសេវាកម្មផ្លូវដែកត្រូវបានផ្អាកជាលើកដំបូង ក្នុងរយៈពេលជាង២០ឆ្នាំបន្ទាប់ពីមានបាតុកម្មហិង្សាកាលពីថ្ងៃសុក្រកន្លងមកនេះ៕

ជប៉ុននឹងអភិវឌ្ឍទីក្រុងឆ្លាតដំណើរការដោយបច្ចេកវិទ្យា5G តម្លៃ ៤000លានដុល្លារនៅជិតទីក្រុងហាណូយ

ដោយ Donald Lee

ភ្នំពេញៈ ក្រុមហ៊ុនសាជីវកម្ម Sumitomo ដែលមានមូលដ្ឋាននៅទីក្រុងតូក្យូនឹងអភិវឌ្ឍទីក្រុងរណបឆ្លាតវៃ ដោយប្រើប្រាស់បច្ចេកវិទ្យា5G ដែលមានតម្លៃ ៤,២ ពាន់លានដុល្លារ ដែលនឹងស្ថិតនៅចន្លោះទីក្រុងហាណូយនិងអាកាសយានដ្ឋានអន្តរជាតិ។

ទីក្រុងឆ្លាតដែលមានទីតាំងនៅស្រុកដុងអាញ ភាគខាងជើងទីក្រុងហាណូយនឹងគ្របដណ្តប់លើផ្ទៃដី២៧២ហិកតា រួមមានអគារលំនៅដ្ឋានចំនួន ៧៣ហិកតា ដែលអាចផ្ទុកមនុស្សបានរហូតដល់ ២៥,០០០នាក់។ លំនៅដ្ឋាននឹងអាចរកទិញបាននៅឆ្នាំ ២០២២។

គម្រោងទីក្រុង នឹងរួមបញ្ចូលទាំងហេដ្ឋារចនាសម្ព័ន្ធជាមូលដ្ឋានទាំងអស់ ដើម្បីទទួលបានប្រជាជនរស់នៅ។

សេចក្តីប្រកាសព័ត៌មានរបស់ក្រុមហ៊ុន Sumitomo ឱ្យដឹងថា “តំបន់គម្រោងនឹងរួមបញ្ចូលនូវមន្ទីរពេទ្យ សាលារៀន កន្លែងបង្ការគ្រោះមហន្តរាយ ប្រព័ន្ធសន្តិសុខ និងកន្លែងពាណិជ្ជកម្ម ក៏ដូចជាតំបន់បៃតងខៀវស្រងាត់ និងផ្លូវធំមួយជួរជាមួយដើមឈើផ្កាឆ័ររី”។

ការអភិវឌ្ឍនេះនឹងក្លាយជាគម្រោងមួយ ក្នុងចំណោមគម្រោងដំបូងបង្អស់នៅប្រទេសវៀតណាមដែលប្រើប្រាស់បច្ចេកវិទ្យា5G និងបច្ចេកវិទ្យាទីក្រុងឆ្លាតថ្មីនៅទូទាំងតំបន់នោះ។

ក្រុមហ៊ុន Sumitomo បានបន្ថែមថា “តាមរយៈការណែនាំប្រព័ន្ធ5G ប្រព័ន្ធស្គាល់មុខ និងបច្ចេកវិទ្យា blockchain តំបន់នេះ នឹងមានសេវាកម្មទីក្រុងឆ្លាតវៃទំនើប ដែលរួមចំណែកដល់ការអភិវឌ្ឍប្រកបដោយចីរភាពនៃទីក្រុងហាណូយ”៕

អានបន្ថែម៖ ក្រុមហ៊ុនទូរគមនាគមន៍វៀតណាមគ្រោងនឹងសាកល្បងបច្ចេកវិទ្យា 5G នៅកម្ពុជាក្នុងខែកក្កដានេះ

ចិនទិញមាសជិត ៦តោនកាលពីខែកញ្ញា ខណៈការចរចាសង្គ្រាមពាណិជ្ជកម្មកំពុងបន្ត

ចិនទិញមាសជិត ៦ លានតោនកាលពីខែកញ្ញា ខណៈការចរចាសង្គ្រាមពាណិជ្ជកម្មកំពុងបន្ត

ដោយ Donald Lee

ភ្នំពេញ៖ ធនាគារប្រជាជនចិន (PBOC) បានប្រកាសថា ខ្លួនបានទិញមាសចំនួន ៥,៩តោននៅក្នុងខែ កញ្ញា ដើម្បីធ្វើពិពិធកម្មប្រាក់បម្រុងរូបិយប័ណ្ណបរទេសរបស់ខ្លួន និងបានពឹងផ្អែកតិចតួចលើប្រាក់ដុល្លារអាមេរិក ខណៈដែលការចរចាសង្គ្រាមពាណិជ្ជកម្មត្រូវបានចាប់ផ្តើមឡើងវិញ។

មុនខែកញ្ញា ធនាគារកណ្តាលចិនបានបន្តការទិញមាស ៩៩ តោនចាប់តាំងពីខែ មករា ឆ្នាំនេះ។

ស្របពេលជាមួយគ្នានេះដែរ ធនាគារកណ្តាលនៅជុំវិញពិភពលោកបានទិញមាសចំនួន ៣៧៤,១ តោនក្នុងរយៈពេល ៦ ខែដំបូងនៃឆ្នាំនេះ។

ការទិញនេះកើតឡើងនៅពេលដែលធនាគារកណ្តាលជាច្រើនបានទិញចំនួន ៦៥១.៥ តោនកាលពីឆ្នាំមុនដែលជាការកើនឡើង ៧៤ ភាគរយ បើធៀបនឹងឆ្នាំមុន។មាសត្រូវបានគេចាត់ទុកថាជាការវិនិយោគដែលមានសុវត្ថិភាព និងរក្សាតម្លៃពិត បើប្រៀបធៀបទៅនឹងរូបិយប័ណ្ណជាតិនៅជុំវិញពិភពលោក។

តម្លៃមាសបានកើនឡើងជាលំដាប់ នៅពេលដែលធនាគារកណ្តាលបានប្រមូលទិញមាសដើម្បីការពារសេដ្ឋកិច្ចជាតិក្នុងករណីមានវិបត្តិសេដ្ឋកិច្ចដែលទំនងជានឹងមានផលប៉ះពាល់ជាសកល។

តម្លៃមាសសព្វថ្ងៃឡើងដល់ ១ ៥១១ ដុល្លារក្នុងមួយអោន (ឬប្រហែល ៣១ ក្រាម) ។ក្រុមអ្នកវិភាគបានព្យាករណ៍ថា តម្លៃមាសនឹងកើនឡើងខ្ពស់រហូតដល់ ២,០០០ ដុល្លារក្នុងមួយអោននៅឆ្នាំក្រោយ ដោយសារសង្គ្រាមពាណិជ្ជកម្មរវាងអាមេរិក និងចិនបានបង្កើតភាពមិនច្បាស់លាស់នៅក្នុងសេដ្ឋកិច្ចពិភពលោក។

តំណាងពាណិជ្ជកម្មអាមេរិក និងចិនគ្រោងនឹងជួបគ្នានៅទីក្រុងវ៉ាស៊ីនតោនសម្រាប់កិច្ចពិភាក្សាពាណិជ្ជកម្មមួយផ្សេងទៀតនៅថ្ងៃ ព្រហស្បតិ៍ខាងមុខនេះ៕

គំរោងអភិវឌ្ឍន៍ចម្រុះ Wealth Mansion តម្លៃ ១២០លានដុល្លារនឹងផ្លាស់ប្តូរមុខមាត់តំបន់ជ្រោយចង្វារ

ដោយគង់ សូរិយា

ភ្នំពេញៈ មជ្ឈមណ្ឌលពាណិជ្ជកម្ម និងលំនៅដ្ឋានបែបសហកម្មសិទ្ធិ Wealth Mansion បាននិងកំពុងសាងសង់ក្រោមទុនវិនិយោគ ប្រមាណ១២០លានដុល្លារអាមេរិក បាននិងកំពុងត្រៀមក្លាយជា Landmark មួយនៅតំបន់ជ្រោយចង្វារ។

គំរោងនេះបាននិងកំពុងសាងសង់យ៉ាងសកម្ម ដែលនឹងបញ្ចប់់នៅឆ្នាំ២០២១ខាងមុខនេះ ជាមួយនឹងអាគារកំពស់ ៤៥ជាន់ ដែលរួមបញ្ចួលនូវផ្សារ កន្លែងហាត់ប្រាណ សណ្ឋាគារ និងលំនៅដ្ឋានបែបសហកម្មសិទ្ឋ។

លោក Alex Liang ប្រធានផ្នែកលក់និងទីផ្សារនៃគំរោង Wealth Mansion ដែលវិនិយោគដោយក្រុមហ៊ុនEverhealth International Investment And Development Co, Ltd បានមានប្រសាសន៍ឲ្យដឹង នៅការិយាល័យរបស់ក្រុមហ៊ុនកាលពីចុងសប្តាហ៍មុនថាតំបន់ជ្រោយចង្វារ ជាទីតាំងមានភូមិសាស្រ្តល្អ ដោយមានទន្លេរព័ទ្ឋជុំវិញ និងមានលក្ខខ័ ណ្ឌអាកាសធាតុល្អប្រសើរ ហើយទីផ្សារអចលនទ្រព្យនៅកម្ពុជាពិសេសក្រុងភ្នំពេញកំពុងមានភាពរីកចម្រើន។

លោកបន្តថា “នេះជាហេតុផលដែលយើងវិនិយោគនៅទីនេះ ដែល Wealth Mansion នឹងក្លាយជា Landmark មួយសំរាប់តំបន់នេះ”។ លោកបន្តថា “វានឹងត្រូវប្រើប្រាស់ចម្រុះ រួមមាន សេវាកម្មអាផាតម៉ិនប្រណីត សណ្ឋាគារ និងសេវាកម្មបំរើឲ្យអ្នករស់នៅក្នុងគំរោងនេះមានផាសុខភាព និងប្រកបដោយទំនុកចិត្ត”។

ដោយគិតគូពីផាសុខភាព ផលចំណេញ និងផលប្រយោជន៍ជាច្រើនទៀតដល់អតិថិជន Wealth Mansion ដែលមានកំពស់៤៥ជាន់ មានផ្ទះចំនួន១១៨៤យូនីត ដោយមានចំណតយានយន្តក្រោមដីចំនួន២ជាន់ និងបន្តរហូតដល់ជាន់ទី៥ ហើយចាប់ពីជាន់ទី៦ដល់ជាន់ទី៨ជាការិយាល័យ និងចាប់ពីជាន់ទី៩ ដល់ជាន់ទី៣៦ជាខុនដូ ហើយចាប់ពីជាន់ទី៣៦ឡើងទៅជាសណ្ឋាគារប្រណីតលំដាប់អន្តរជាតិ។

លោក Alex Liang បានបន្តថា ជាមួយនឹងទស្សនទានវិជ្ជមានចំពោះមុខ យើងបាននិងកំពុងមើលឃើញនូវនិន្នាការ ផ្លាស់ប្តូរបែបផែនជីវិតរបស់ប្រជាជនកម្ពុជា ដូចប្រជាជននៅតាមបណ្តាប្រទេសក្នុងតំបន់ ដែលពួកគេនឹងផ្លាស់ប្តូរមករស់នៅតាមខុនដូកាន់តែច្រើននាពេលអនាគត ដោយសារការរស់នៅខុនដូចំណេញពេលវេលា សេដ្ឋកិច្ច និងបែបផែនជីវិតប្រកបដោយភាពស៊ីវិល័យថ្មីមួយសំរាប់ជីវិត។

គម្រោងនេះបាននិងកំពុងដាក់លក់ក្នុងតម្លៃសមរម្យ ដោយមួយម៉ែត្រការ៉េមានតម្លៃប្រមាណ២០០០ដុល្លារអាមេរិក និងបើគិតជាយូនីតមានតម្លៃជាង១២ម៉ឺនដុល្លារអាមេរិកក្នុងមួយយូនីត។

លោក Alex Liang បានបន្តឲ្យដឹងទៀតថា ជាមួយនឹងការផ្លាស់ប្តូរបែបបទជីវិតរបស់ប្រជាជនកម្ពុជាកាន់តែកើនឡើង ទើបក្រុមហ៊ុនផ្តោតលើការលក់សំរាប់ទីផ្សារក្នុងស្រុកនិងនៅបរទេសជាមួយគ្នា ដើម្បីភាពជោគជ័យរបស់គំរោងនេះ ហើយយើងបាននិងកំពុងមើលឃើញទំនោមួយកំពុងកើតឡើងនៅទីនេះ គឺអ្នកវិនិយោគកាន់តែច្រើនបានងាកមកកាន់ក្រុងភ្នំពេញ ជាជាងបណ្តាខេត្តមួយចំនួន ដោយសារវាជារាជធានីរបស់ប្រទេស។

លោកបន្តថា “នាពេលអនាគតចំនួនខុនដូ ដែលផ្គត់ផ្គង់ចូលទីផ្សារកើនឡើង ដែលធ្វើឲ្យតម្លៃជួលអាចប្រឈមនឹងការធ្លាក់ចុះបន្តិច ប៉ុន្តែសំរាប់គំរោងអភិវឌ្ឍន៍បែបប្រណីតភាពដូចជា Wealth Mansionនឹងមិនជួបបញ្ហាប្រឈមបែបនេះទេ”។ លោកបន្តថា “តំបន់CBDមិនប្រឈមនឹងបញ្ហាលើការជួល និងតម្លៃទេ ហើយនិន្នាការនេះមានជាទូទៅនៅតាមបណ្តាប្រទេសនានា ហើយក្រុងភ្នំពេញកំពុងដើរតាមលំអាននេះ”។

គំរោង Wealth Mansion ស្ថិតនៅលើផ្លូវទន្លេសាប (ផ្លូវភ្លោះចូលទៅសណ្ឋាគារសុខា) ស្ថិតក្នុងសង្កាត់ជ្រោយចង្វារ ខ័ណ្ឌជ្រោយចង្វារ រាជធានីភ្នំពេញ។

សំរាប់អតិថិជនចាប់អារម្មណ៍ទិញ ឬសាកសួរព៌តមានពីគំរោងលំដាប់ផ្កាយ៥នេះ អាចទាក់ទងតាមរយៈលេខទូរស័ព្ទ ០៣១ ៦៦៦៦ ៩៦៦, ០៦០ ២៩៩ ៨៨៨៕

Moodys៖ សេដ្ឋកិច្ចកម្ពុជានៅរក្សាបានកំណើនសេដ្ឋកិច្ចល្អប្រសើរ

ដោយ ម៉ាណេត

ភ្នំពេញៈ ផលិតផលក្នុងស្រុកសរុបកម្ពុជាពិតប្រាកដ បានកើនឡើងជាលំដាប់ប្រមាណ៧ភាគរយ ក្នុងមួយឆ្នាំជាមធ្យមចាប់តាំងពីមានវិបត្តិហិរញ្ញវត្ថុ ពិភពលោកក្នុងឆ្នាំ ២០០៨ និងបន្តធ្វើកំណែទម្រង់ហួសកំរិតអធិបតេយ្យភាព ដែលត្រូវបានគេវាយតម្លៃប្រហាក់ប្រហែលគ្នា។

នេះបើយោងតាមការបញ្ជាក់របស់ស្ថាប័ន Moodys ដែលមានមូលដ្ឋាននៅអាមេរិកកាលពីពេលថ្មីៗនេះ។

កំណើននេះត្រូវបានជំរុញដោយការនាំចេញ ជាពិសេសសម្លៀកបំពាក់ ទេសចរណ៍ និងសំណង់ ដែលមានការចូលរួម
១០,៦ភាគរយ កំនើន១៧,៩ ភាគរយ និងកំនើន១២,៤ ភាគរយ នៃផលិតផលសរុបក្នុងស្រុកនៅឆ្នាំ២០១៨ ។ កំណើនយ៉ាងឆាប់រហ័សមានតុល្យភាពនឹងបញ្ហាប្រឈមទាក់ទង នឹងការប្រកួតប្រជែងសេដ្ឋកិច្ច មូលដ្ឋាននាំចេញតូចចង្អៀត និងប្រាក់ចំណូលទាប ទោះបីជាមានការកើនឡើងប្រាក់ចំណូល ដែលចង្អុលបង្ហាញពីសមត្ថភាពស្រូបយកទាប។

ស្ថាប័ន Moody’s រំពឹងថា កំណើននឹងមានកម្រិតមធ្យម ប្រសិនមានការកាត់បន្ថយ ឬដកចេញនូវអត្ថប្រយោជន៍ពន្ធ ដែលកម្ពុជាទទួលបានក្រោមកិច្ចព្រមព្រៀងអ្វីគ្រប់យ៉ាងលើកលែងតែអាវុធ (EBA) របស់អឺរ៉ុបដែលកំពុងស្ថិតក្នុងការចរចា។ ការកាត់បន្ថយអត្ថប្រយោជន៍នៃពន្ធគយ នឹងជះឥទ្ធិពលអវិជ្ជមានដល់ការនាំចេញវាយនភណ្ឌ សម្លៀកបំពាក់ និងស្បែកជើងទៅកាន់សហភាពអឺរ៉ុប។

ការដកផលប្រយោជន៏បែបនេះ នឹងបន្ថែមទៅលើការដាក់កាតព្វកិច្ចលើអង្ករកម្ពុជាដែលមានប្រសិទ្ធភាពចាប់ពីខែមករាឆ្នាំ ២០១៩ ដោយផ្អែកលើសំណើការពារ។ ការវិវឌ្ឍន៍ទាំងនេះនឹងថ្លឹងថ្លែងលើតុល្យភាពពាណិជ្ជកម្មរបស់កម្ពុជា។

ការតភ្ជាប់ទៅប្រទេសចិនក៏ជួយជំរុញ ដល់សេដ្ឋកិច្ចទូទៅរបស់ប្រទេសកម្ពុជាផងដែរ ដូចជាការបង្ហាញនូវលំហូរពាណិជ្ជកម្ម និងការវិនិយោគ ការមកដល់នៃភ្ញៀវទេសចរ ការវិនិយោគលើវិស័យហិរញ្ញវត្ថុ និងការផ្តល់ហិរញ្ញប្បទានសម្រាប់បំណុលរដ្ឋាភិបាល៕

សម្តេចតេជោដាក់ឱ្យប្រើប្រាស់ក្រដាសប្រាក់រៀលប្រភេទ ១៥.០០០រៀលនៅថ្ងៃនេះ

ដោយ វុត្ថា

ភ្នំពេញ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានចេញអនុក្រឹត្យ សម្រេចអនុញ្ញាតឲ្យចេញផ្សាយ ធ្វើចរាចរ និងប្រើប្រាស់ទូទាំងប្រទេសកម្ពុជានូវក្រដាសប្រាក់រៀលប្រភេទ ១៥.០០០រៀល ដែលទើបចេញថ្មី នៅព្រឹកថ្ងៃទី៧ ខែតុលាឆ្នាំ២០១៩នេះហើយ។

សម្តេចតេជោថា ប្រាក់គំរូថ្មី ១៥.០០០រៀល របស់រាជរដ្ឋាភិបាលកម្ពុជា ធ្វើឡើងដើម្បីអបអរសាទរ ក្នុងឱកាសព្រះរាជពិធីបុណ្យគម្រប់ខួប១៥ព្រះវស្សា នៃការយាងគ្រងព្រះបរមសិរីរាជ្យសម្បត្តិ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។

ដោយឡែក សម្ដេចតេជោ ហ៊ុន សែន នៅថ្ងៃទី ៧ ខែតុលា ឆ្នាំ ២០១៩ នេះ បានផ្ដល់ជូននូវធនប័ត្រអនុស្សាវរីយ៍ប្រភេទ ១៥ ០០០ រៀលនេះ ជូនសិស្សជ័យលាភីសិស្សទទួលបាននិទ្ទេសA ដែលបានប្រឡងជាប់សញ្ញាបត្រមធ្យមសិក្សាទុតិយភូមិឆ្នាំសិក្សា២០១៨-២០១៩ ចំនួន៤៤៣នាក់ ដើម្បីជូនជាអនុស្សាវរីយ៍៕

សម្តេចតេជោ៖ សន្ទុះនៃការរីកចំរើនវិស័យសំណង់ទាមទាឱ្យមានច្បាប់គ្រប់គ្រងឱ្យបានត្រឹមត្រូវ

ដោយ វុត្ថា

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអះអាងថា សន្ទុះនៃការរីកចំរើនរបស់វិស័យសំណង់ ត្រូវការពង្រឹងការគ្រប់គ្រងរាល់ដំណើរការ និងប្រតិបត្តិការក្នុងវិស័យសំណង់ និងអ្នកពាក់ព័ន្ធនឹងការងារសំណង់ កាន់តែមានភាពចំាបាច់ជាសារវន្ត។

សម្តេចតេជោ នៅក្នុងសេចក្តីថ្លែងហេតុសេចក្តីព្រាងច្បាប់ស្តីពីសំណង់ នាសម័យប្រជុំលើកទី៣ នីតិកាលទី៦ នៃដ្ឋសភា នៅព្រឹកថ្ងៃទី៧ ខែតុលា ឆ្នាំ២០១៩ ឱ្យដឹងថា សំណង់កាន់តែធំ កាន់តែខ្ពស់ និងកាន់តែស្មុកស្មាញ កាន់តែទាមទារឱ្យការអនុវត្តបានត្រឹមត្រូវតាមបទដ្ឋានគតិយុត្ត បច្ចេកវិទ្យា ស្តង់ដារ និងបទបញ្ញត្តិបច្ចេកទេស ដើម្បីធានាភាពរឹងមាំ គុណភាព សោភណភាព និងចីរភាពនៃសំណង់រៀបចំខ្លួនសម្រាប់សេដ្ឋកិច្ចឌីជីថលដើម្បីឆ្លើយតប នឹងបដិវត្តន៍ឧស្សាហកម្មទី៤ផង និងដើម្បីលើកតម្កើងអត្តសញ្ញាណជាតិ និងភាពសុខដុមរមនានៅក្នុងសង្គមផង។

សម្តេចបន្តថា ឆ្លើយតបទៅនឹងតម្រូវការនេះ យុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាល ដើម្បីកំណើនការងារ សមធម៌ និងប្រសិទ្ធិភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ និងគោលនយោបាយជាតស្តីពី ការរៀបចំទឹកដីនៃព្រះរាជាណាចក្រកម្ពុជាចុះថ្ងៃទី៨ ខែមេសា ឆ្នាំ២០១១ បានកំណត់ឱ្យរៀបចំច្បាប់ស្តីពីសំណង់។

សម្តេចបន្ថែមថា ស្ថិតនៅក្នុងបរិការណ៍នៃសន្តិភាព និងស្ថិរភាពនយោបាយ វិស័យសំណង់បានដើរតួនាទីជាសសរស្តម្ភមួយ ជាមួយសសរស្តមដែលជំរុញកំណើន៣ ទៀត គឺវិស័យទេសចរណ៍ វិស័យកសិកម្ម និងវិស័យឧស្សាហកម្ម ដោយចូលរួមរៀបចំ និងអភិវឌ្ឍហេដ្ឋារចនាសម្ព័ន្ធទាំងក្នុងវិស័យសាធារណៈ ទាំងក្នុងវិស័យឯកជន ពិសេរចនាសម្ព័ន្ធផលិតកម្មឧស្សាហកម្ម សិប្បកម្ម ពាណិជ្ជកម្ម កសិកម្ម សេវាកម្ម និងទេសចរណ៍ ព្រមទាំងចូលរួមអភិវឌ្ឍលំនៅឋាន និងសំណង់ផ្សេងទៀត សម្រាប់បម្រើឱ្យការរស់នៅរបស់ប្រជាពលរដ្ឋប្រកបដោយសុវត្ថិភាព និងផាកភាព។

រយៈពេលជាមួយទសវត្សរ៍ចុងក្រោយនេះ ទុនវិនិយោគក្នុងវិស័យសំណង់មានកំណើនជាទៀតទាត់ និងនៅតែបន្តរីកចំរើនជាលំដាប់ ជាពិសេសការសាងសំណង់ធំៗខ្ពស់ៗ ដូជាអគារស្នាក់នៅរួម អគារលក់ទំនិញ ផ្សារទំនើប មជ្ឈមណ្ឌលពាណិជ្ជកម្ម អគារការិយាល័យ សណ្ឋាគារ អគារពហុមុខងារ សំណង់ទីក្រុងរណប បុរីលំនៅឋាន ភូមិគ្រឹះ គ្រឹះស្ថានសិក្សា មន្ទីរពេទ្យ ធនាគារ រោងចក្រ ឃ្លាំង ស្ថានីយ ប្រេងឥន្ទនៈ។ល។

សេចក្ដីព្រាងច្បាប់ស្ដីពីសំណង់ ដែលរដ្ឋសភានអនុម័តនៅថ្ងៃនេះ មានគោលបំណង និងសារប្រយោជន៍ដូចជា ទី១ពង្រឹងការគ្រប់គ្រងគ្រប់ភាគីពាក់ព័ន្ធ និងការប្រតិបត្តិការងារទាំងឡាយក្នុងវិស័យសំណង់ ដើម្បីធានាសន្តិសុខ សុវត្ថិភាព និងសណ្ដាប់ធ្នាប់សាធារណៈ ការពារផលប្រយោជន៍ម្ចាស់សំណង់ អ្នកប្រើប្រាស់ និងសាធារណជន។ ទី២ចូលរួមពង្រឹងការគ្រប់គ្រងនគរូបនីយកម្ម ដោយអភិវឌ្ឍទីក្រុងឱ្យមានសោភណភាព និងបរិស្ថានល្អសម្រាប់ការរស់នៅប្រកបដោយចីរភាព សំដៅលើកកម្ពស់សុខមាលភាពសាធារណៈ។

ទី៣ បង្កើនគណនេយ្យភាព និងប្រសិទ្ធភាពក្នុងការប្រកបការងារ និងការប្រកបវិជ្ជាជីវៈក្នុងវិស័យសំណង់ និងទី៤ បង្កើនការជឿទុកចិត្តរបស់វិនិយោគិន នៅក្នុងវិស័យសំណង់ ជំរុញទីផ្សារអចលនទ្រព្យប្រកបដោយប្រសិទ្ធភាពសេដ្ឋកិច្ចសង្គម៕

ADB ផ្តល់កម្ចី ៤០លានដុល្លារដើម្បីអភិវឌ្ឍ និងពង្រឹងវិស័យហិរញ្ញវត្ថុនៅកម្ពុជា

ដោយ ម៉ាណេត

ភ្នំពេញ៖ ធនាគារអភិវឌ្ឍន៍អាស៊ី (ADB) បានយល់ព្រមផ្តល់ប្រាក់កម្ចី ៤០ លានដុល្លារសម្រាប់ដំណាក់កាលទី ២ នៃកម្មវិធីដែលគាំទ្រដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការអភិវឌ្ឍវិស័យហិរញ្ញវត្ថុប្រកបដោយប្រសិទ្ធភាព និងស្ថេរភាពដែលជំរុញបរិយាប័នហិរញ្ញវត្ថុកាន់តែច្រើន និងការអភិវឌ្ឍប្រកបដោយចីរភាព។

នេះបើយោងតាមការចុះផ្សាយរបស់ ADB កាលពីពេលថ្មីៗនេះ។ជំនួយរបស់ធនាគារអភិវឌ្ឍន៍អាស៊ីសម្រាប់កម្មវិធីជំនួយផ្នែកទី ២ នៃកម្មវិធីអភិវឌ្ឍន៍វិស័យហិរញ្ញវត្ថុប្រកបដោយបរិយាប័នដែលត្រូវបានអនុម័តកាលពីខែតុលាឆ្នាំ ២០១៦ កំពុងពង្រឹងលើកិច្ចខិតខំប្រឹងប្រែងក្នុងបរិយាប័នហិរញ្ញវត្ថុ និងកិច្ចខិតខំប្រឹងប្រែងអភិវឌ្ឍន៍របស់រដ្ឋាភិបាល។

គម្រោងនេះនឹងធ្វើឱ្យប្រសើរឡើងនូវការទទួលបានហិរញ្ញវត្ថុ ជាពិសេសសម្រាប់ប្រជាជនក្រីក្រគ្រួសារនៅជនបទ វិស័យកសិកម្ម និងសហគ្រាសធុនតូច និងមធ្យម។ តាមរយៈការគាំទ្រគោលនយោបាយ វាក៏ជួយពង្រឹងស្ថេរភាពនៃវិស័យហិរញ្ញវត្ថុនៅកម្ពុជា និងធ្វើឱ្យប្រសើរឡើងហេដ្ឋារចនាសម្ព័ន្ធហិរញ្ញវត្ថុដើម្បីគាំទ្រដល់ការបង្កើតសេវាកម្ម និងផលិតផលហិរញ្ញវត្ថុថ្មីៗ។

លោកស្រី Benita Ainabe អ្នកឯកទេសផ្នែកហិរញ្ញវត្ថុរបស់ធនាគារអភិវឌ្ឍន៍អាស៊ី បានមានប្រសាសន៍ថា “វិស័យហិរញ្ញវត្ថុមានស្ថេរភាព និងទំនើបគឺមានសារៈសំខាន់សម្រាប់ប្រទេសកំពុងអភិវឌ្ឍន៍ ដូចជាកម្ពុជា ដូច្នេះបុគ្គលម្នាក់ៗអាចមានលទ្ធភាពទទួលបានសេវាកម្មហិរញ្ញវត្ថុ ហើយអាជីវកម្មអាចខ្ចីប្រាក់ដែលអាចទុកចិត្តបានដើម្បីពង្រីកប្រតិបត្តិការរបស់ពួកគេ និងរួមចំណែកដល់ការរីកចម្រើនរបស់ប្រទេស។

លោកស្រីបានបន្តថា “កម្មវិធីនេះតំណាងឱ្យភាពជាដៃគូរយៈពេលវែងរវាងធនាគារអភិវឌ្ឍន៍អាស៊ី និងរដ្ឋាភិបាលកម្ពុជាក្នុងការសម្រេចបាននូវគោលបំណងទាំងនេះ”។ វិស័យហិរញ្ញវត្ថុនៅកម្ពុជាកំពុងស្ថិតក្នុងដំណាក់កាលដំបូងនៃការអភិវឌ្ឍន៍ ហើយគ្របដណ្តប់ដោយវិស័យធនាគារ និងមីក្រូហិរញ្ញវត្ថុ។ ខណៈពេលដែលសម្រេចបានច្រើន លទ្ធភាពទទួលបានហិរញ្ញវត្ថុនៅតែមានកំរិតនៅឡើយជាពិសេសនៅតំបន់ជនបទ។

បរិយាប័នហិរញ្ញវត្ថុមានកម្រិតទាបដោយមានប្រហែល ៥៩% នៃចំនួនប្រជាជនពេញវ័យនៅក្នុងប្រទេសដែលមានលទ្ធភាពទទួលបានសេវាហិរញ្ញវត្ថុក្នុងឆ្នាំ ២០១៥ ។ លើសពីនេះទៅទៀតស្ទើរតែមួយភាគបីនៃចំនួនប្រជាជនត្រូវបានបដិសេធទាំងស្រុងដោយគ្មានលទ្ធភាពប្រើប្រាស់សេវាកម្មហិរញ្ញវត្ថុណាមួយឡើយ។

កិច្ចខិតខំប្រឹងប្រែងដើម្បីធ្វើឱ្យប្រសើរឡើងនូវលទ្ធភាពទទួលបានហិរញ្ញវត្ថុត្រូវបានរារាំងដោយកម្រិតនៃចំណេះដឹងទាបផ្នែកហិរញ្ញវត្ថុ។ គម្រោងដំណាក់ ២ នេះ បានគាំទ្រដល់រដ្ឋាភិបាលក្នុងការពន្លឿនយុទ្ធសាស្ត្រជាតិសម្រាប់បរិយាប័នហិរញ្ញវត្ថុដើម្បីផ្តល់ក្របខ័ណ្ឌដើម្បីពង្រីកលទ្ធភាពទទួលបានសេវាហិរញ្ញវត្ថុរបស់បុគ្គល ជាពិសេសអ្នកខ្ចីស្ត្រី និងសហគ្រាសខ្នាតតូចនិងមធ្យម (MSMEs) ។

ធនាគារអភិវឌ្ឍន៍ជនបទដែលគ្រប់គ្រងដោយរដ្ឋាភិបាលក៏ត្រូវបានរៀបចំរចនាសម្ព័ន្ធឡើងវិញដើម្បីផ្តល់ប្រាក់កម្ចីដល់ក្រុមហ៊ុន MSMEs ក្នុងវិស័យកសិកម្ម ខណៈដែលរដ្ឋាភិបាលកណ្តាលពង្រឹងការការពារអតិថិជនតាមរយៈការបង្កើតមុខងាររបស់អតិថិជននៅក្នុងធនាគារ៕