រដ្ឋាភិបាលកំពុងរៀបចំផែនការមេកសាងស្ថានីយប្រព្រឹត្តិកម្មទឹកកខ្វក់ និងប្រព័ន្ធរំដោះទឹកនៅទូទាំងប្រទេស

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលកម្ពុជា បាន និងកំពុងតែធ្វើការសិក្សាលម្អិតទៅលើគម្រោងនៃការកសាងស្ថានីយប្រព្រឹត្តិកម្មទឹកកខ្វក់ រួមជាមួយប្រព័ន្ធរំដោះទឹកនៅតាមបណ្តាខេត្ត ក្រុងនានា នៅទូទាំងប្រទេសកម្ពុជា ដើម្បីបញ្ចៀសបញ្ហាខូចខាតដែលបណ្តាលមកពីជំនន់ទឹកទន្លេ និងទឹកកកភ្លៀង ដោយយកបញ្ហាប្រឈមរបស់ខេត្តព្រះសីហនុធ្វើជាគំរូ។

ក្រៅពីខេត្តព្រះសីហនុដែលកំពុងតែមានសភាពសកម្មទៅលើការកសាងស្ថានីយប្រព្រឹត្តិកម្មទឹកកខ្វក់ កសាងបណ្តាញរំដោះទឹកនៅទូទាំងខេត្ត ដែលគ្រោងចំណាយថវិកាយ៉ាងសន្ធឹកសន្ធាប់រហូតដល់ប្រមាណ៥០០លានដុល្លារ ក្រោមការផ្តល់សម្បទានពីរដ្ឋាភិបាលចំនួន១០០លានដុល្លារនោះ នៅក្នុងរាជធានីភ្នំពេញ និងខេត្តសៀមរាប ក៏កំពុងតែដំណើរការសាងសង់ក្រោមជំនួយមួយចំណែកធំពីរាជរដ្ឋាភិបាលជប៉ុនផងដែរ។

ទេសរដ្ឋមន្ត្រី និងជារដ្ឋមន្ត្រីក្រសួងសាធារណៈការ និងដឹកជញ្ជូន លោក ស៊ុន ចាន់ថុល បានមានប្រសាសន៍កាលពីចុងសប្ដាហ៍កន្លងទៅនេះថា រដ្ឋាភិបាលបាន និងកំពុងតែសិក្សាលម្អិតទៅលើគម្រោងសាងសង់ប្រព័ន្ធរំដោះទឹក និងស្ថានីយប្រព្រឹត្តិកម្មខ្វក់ និងខ្ទង់ចំណាយ ដោយយកបញ្ហាដែលធ្លាប់កើតមាននៅក្នុងខេត្តព្រះសីហនុធ្វើជាគំរូ។

លោក ស៊ុន ចាន់ថុល បានមានប្រសាសន៍ថា “ បញ្ហាដែលកើតមាននៅក្នុងខេត្តព្រះសីហនុ វាគឺជាមេរៀន ដែលយើងយកធ្វើជាគំរូ។ បច្ចុប្បន្ននេះ បច្ចុប្បន្ននេះ រដ្ឋាភិបាល បានឱ្យខាងមន្ត្រី រួមជាមួយនឹងក្រុមហ៊ុនជំនាញធ្វើការសិក្សាលម្អិតពីវិធីសាស្ត្រក្នុងការសាងសង់ រួមជាមួយនឹងការចំណាយផងដែរ”។

លោកបានមានប្រសាសន៍ទៀតថា “ឥឡូវនេះ ក្រសួងបាន និងកំពុងបន្តការសាងសង់ និងថែទាំផ្លូវថ្នល់ឱ្យមានលក្ខណៈល្អប្រសើរសម្រាប់ប្រជាពលរដ្ឋឱ្យបានល្អប្រសើរជាងមុននៅទូទាំងរាជធានី ខេត្ត ដែលក្រៅពីស្ថាបនាផ្លូវថ្មី ពង្រីក និងជួសជុលផ្លូវចាស់ដែលមានស្រាប់ លុបបំបាត់ផ្លូវខូច និងជង្ហុកសំបុកមាន់តាមដងផ្លូវនានាក្នុងរាជធានី-ខេត្ត ព្រមទាំងបង្កើនសុវត្ថិភាពចរាចរណ៍ជូនអ្នកប្រើប្រាស់ផ្លូវថ្នល់ និងអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនក្នុងប្រទេសកម្ពុជា”។ លោកបានបញ្ជាក់ថា តាមរយៈគម្រោង និងផែនការមេរបស់រដ្ឋាភិបាល អាចជួយបញ្ចៀសបញ្ហាដែលធ្លាប់កើតមានកន្លងទៅបានមួយចំណែកធំ។

សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានអនុញ្ញាតឱ្យប្រើប្រាស់ថវិកាសន្សំរបស់រាជរដ្ឋាភិបាលចំនួន ១០០លានដុល្លារអាមេរិក សម្រាប់ចំណាយទៅលើការស្តារ និងកសាងប្រព័ន្ធរំដោះទឹក ក៏ដូចជាជួសជុលផ្លូវថ្នល់ទាំង២២ខ្សែនៅក្នុងខេត្តព្រះសីហនុ ដោយណែនាំឱ្យអនុវត្តគោលការណ៍ «យកស្លឹកត្នោតខ្ចប់ស្ករត្នោត» ចំពោះការស្ថាបនា ជួសជុល កសាងផ្លូវក្នុងក្រុង ផ្លូវវាងក្រុង ប្រព័ន្ធរំដោះទឹកភ្លៀង និងប្រព័ន្ធទឹកកង្វក់ក្នុងខេត្តព្រះសីហនុនេះ។

មន្ត្រីជាន់ខ្ពស់នៃរាជរដ្ខាភិបាលកម្ពុជាធ្លាប់បានឱ្យដឹងថា ការចំណាយថវិការបស់រដ្ឋាភិបាលទៅលើខេត្តព្រះស៊ីហនុនេះ គឺដើម្បីឆ្លើយតបឲ្យកាន់តែមានប្រសិទ្ធភាពខ្ពស់ តាមសេចក្តីត្រូវការចាំបាច់ជាក់ស្តែងនៅខេត្តព្រះសីហនុ និងយន្តការនៃការអនុវត្តការងារឱ្យបានច្បាស់លាស់ ចំពោះការជួសជុល កសាងផ្លូវក្នុងក្រុង ផ្លូវវាងក្រុង ប្រព័ន្ធរំដោះទឹកភ្លៀង និងប្រព័ន្ធទឹកកង្វក់ ក្នុងខេត្តព្រះសីហនុ ដើម្បី ធានាបាននូវប្រសិទ្ធភាពការងារសំណង់ប្រកបដោយគុណភាព ទាន់ពេលវេលាក៏ដូចជាតម្លៃនៃថវិកា៕

ទេសចរចិនចំណាយលុយប្រមាណជាង ១២៧ ពាន់លានដុល្លារដើរលេងនៅក្រៅប្រទេស

ដោយ វុត្ថា

ភ្នំពេញ៖ ទេសចរចិនបានចំណាយលុយប្រមាណ ១២៧,៥ ពាន់លានដុល្លារអាមេរិក ដើរលេងកម្សាន្តនៅក្រៅប្រទេសនៅបំណាច់ឆមាសទី១ ឆ្នាំ ២០១៩ កន្លងមកនេះ ។ នេះបើយោងតាមរបាយការណ៍ដែលចេញផ្សាយដោយរដ្ឋភិបាលចិននៃការដោះដូររូបិយប័ណ្ណបរទេស (SAFE) ។

តំបន់អាស៊ីទទួលភ្ញៀវទេសចរចិនបានចំនួន ៥៤ ភាគរយនៃចំនួនភ្ញៀវទេសចរសរុប។ របាយការណ៍បានបង្ហាញថា អាមេរិកស្ថិតនៅលំដាប់ទី ២ ដោយមានចំនួន ២៤ ភាគរយបន្ទាប់មកគឺអឺរ៉ុប ១៣ ភាគរយ។

យោងតាមរបាយការណ៍ បានបន្តថា ដោយសារពាណិជ្ជកម្ម និងការវិនិយោគមានភាពរឹងមាំជាមួយបណ្តាប្រទេសនៅតាមបណ្តោយខ្សែក្រវាត់ និងផ្លូវ ប្រជាជនចិនកំពុងចំណាយកាន់តែច្រើននៅក្នុងទីផ្សារដែលកំពុងរីកចម្រើនបែបនេះ។

ទិន្នន័យរបស់ SAFE បានបង្ហាញទៀតថា នៅក្នុងឆមាសទីមួយនៃឆ្នាំ ២០១៩ ប្រជាជនចិនបានចំណាយប្រាក់សរុបចំនួន ១៤,៩ ពាន់លានដុល្លារនៅក្នុងបណ្តាប្រទេសដែលបានអនុវត្តគោលនយោបាយខ្សែក្រវាត់ និងផ្លូវរបស់ប្រទេសចិន។

ទាក់ទងនឹងវិធីសាស្រ្តនៃការទូទាត់ការទូទាត់តាមទូរស័ព្ទឃើញថា ទំហំទេសចរណ៍ក្នុងឆមាសទី១ កើនឡើងទ្វេដងបើប្រៀបធៀបនឹងរយៈពេលដូចគ្នាកាលពីឆ្នាំមុន ខណៈពេលដែលកាតធនាគារនៅតែជាទម្រង់ទូទាត់ដំបូង។ការដើរទិញឥវ៉ាន់នៅតែជាសមាសធាតុចម្បងនៃការប្រើប្រាស់របស់ភ្ញៀវទេសចរចិន។

នៅឆមាសទី ១ នេះ ការចំណាយក្រៅស្រុករបស់ប្រជាជនចិនក្នុងការទិញទំនិញនៅតែដដែល បើប្រៀបធៀបនឹងឆ្នាំ ២០១៨ ។ របាយការណ៍នេះឆ្លុះបញ្ចាំងពីភាពប្រសើរឡើងនៃបរិយាកាសទិញទំនិញក្រៅស្រុក។

យោងតាមអង្គការទេសចរណ៍ពិភពលោករបស់អង្គការសហប្រជាជាតិចំនួនអ្នកដំណើរទូទាំងពិភពលោកនឹងកើនលើស ១,៨ ពាន់លាននាក់នៅឆ្នាំ ២០៣០ ៕

ក្រសួងការងារអនុញ្ញាតឱ្យជនបរទេសអាចប្រកបអាជីវកម្មគ្រប់ប្រភេទនៅកម្ពុជាឡើងវិញ

ដោយ ៖ រ៉ាណេត

ភ្នំពេញ ៖ បន្ទាប់ពីបានចេញសេចក្ដីប្រកាសហាមមិនឱ្យជនបរទេសប្រកបអាជីវកម្មខ្នាតតូច និងមធ្យមចំនួន ១០ ប្រភេទកាលពីមួយខែមុន ពេលនេះក្រសួងការងារ និងបណ្តុះបណ្តាលវិជ្ជាជីវៈ បានសម្រេចចេញសេចក្ដីប្រកាសសាជាថ្មីដោយលុបចោលការហាមប្រាមទាំងនោះ និងអនុញ្ញាតឱ្យជនបរទេសទាំងអស់មានសិទ្ធិប្រកបអាជីវកម្មគ្រប់ប្រភេទដែលស្របច្បាប់។

បន្ទាប់ពីចេញប្រកាសហាមមិនអនុញ្ញាតឱ្យជនបរទេសរកស៊ី ប្រកបអាជីវកម្មនៅកម្ពុជា ពេលនេះក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងថ្មីមួយ អនុញ្ញាតឲ្យជនបរទេសទាំងអស់ អាចរកស៊ីនៅកម្ពុជាបានឡើងវិញ។

សេចក្តីជូនដំណឹងបានចុះកាលពីថ្ងៃទី០៥ ខែតុលា ឆ្នាំ២០១៩ របស់ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា យោងតម្រូវការកម្លាំងពលកម្មជំនាញ របស់ជនបរទេសក្នុងវិស័យសេវាកម្មផ្សេងៗ និងដើម្បីលើកទឹកចិត្តដល់ការវិនិយោគក្នុងប្រទេសកម្ពុជា រដ្ឋាភិបាលកម្ពុជា បានអនុញ្ញាតឡើងវិញនូវគ្រប់សកម្មភាពស្វ័យនិយោជន៍ដោយជនបរទេស។

កាលពីថ្ងៃទី២៨ ខែសីហា ឆ្នាំ២០១៩កន្លងទៅនេះ ក្រសួងការងារ និងបណ្តុះបណ្តាលវិជ្ជាជីវៈ ធ្លាប់បានចេញសេចក្តីប្រកាសមួយ ដោយធ្វើការហាមឃាត់សកម្មភាពរកស៊ីរបស់ជនបរទេសនូវមុខរបរ និងអាជីវកម្មចំនួន១០ប្រភេទ រួមមាន៖

១.អ្នកបើកបរយានជំនិះគ្រប់ប្រភេទ ជាលក្ខណៈអាជីវកម្មជាអាទិ៍ អ្នកបើកទោចក្រយានយន្ត អ្នកបើកត្រីចក្រយានយន្ត អ្នកបើកទោចក្រយានយន្តសណ្តោងរ៉ឺម៉ក អ្នកបើកម៉ូតូកង់ អ្នកបើករថយន្តដឹកអ្នកដំណើរ និងដឹកទំនិញ

២.អ្នកលក់ដូរដោយមធ្យោបាយថ្មើជើង ឬយានជំនិះគ្រប់ប្រភេទនៅទីសាធារណៈ

៣.អ្នកម៉ាស្សាចាប់សរសៃតាមទីសាធារណៈ

៤.អ្នកកាត់សក់ អ៊ុតសក់ និងថែរក្សាសម្ផស្ស

ទី៥ អ្នកផ្តល់សេវាកម្មដេរ និងសម្អាតស្បែកជើង

ទី៦ អ្នកកាត់ដេរ

ទី៧ អ្នកប៉ះកង់ និងជាងជួសជុលយានយន្ត

ទី៨ អ្នកផលិតវត្ថុអនុស្សាវរីយ៍ខ្មែរ បាត្រលោក ព្រះពុទ្ធរូប

និងទី១០ ជាងទង និងជាងច្នៃត្បូងពេជ្រ ៕

ចំណេះដឹង! យល់ដឹងពីនីតិវិធីនៃការនាំចេញទំនិញទៅក្រៅប្រទេស

ដោយ វុត្ថា

ភ្នំពេញ ៖ ការនាំទំនិញចេញពីប្រទេសកម្ពុជា ឆ្ពោះទៅកាន់ទីផ្សារអន្តរជាតិនានានៅទូទាំងសាកល ត្រូវបានកំណត់ និងមានឯកសារជាច្រើនសម្រាប់បំពេញ ដែលជានីតិវិធីមួយតម្រូវឱ្យអនុវត្តជាដាច់ខាត ដើម្បីធានាថាជាប្រភេទទំនិញស្របច្បាប់ មានគុណភាព ដែលទទួលស្គាល់ពីស្ថាប័នជំនាញ ។

នៅក្នុងនីតិវិធីនៃការនាំចេញនេះ ក៏ត្រូវបានបែងចែកជាប្រភេទនៃមធ្យោបាយដឹកជញ្ជូនផងដែរ ដូចជា ការដឹកជញ្ជូនតាមផ្លូវគោគ ផ្លូវអាកាស និងតាមផ្លូវទឹក (សមុទ្រ / ទន្លេ) ។

– ផ្លូវសមុទ្រ/ផ្លូវទន្លេ

នីតិវិធីនៃការនាំចេញទំនិញដោយបំពេញបែបបទនៅមាត់ច្រកផ្លូវសមុទ្រ/ផ្លូវទន្លេ ៖ អ្នកនាំចេញ ឬ តំណាងត្រូវធ្វើលិខិតស្នើសុំនាំចេញទំនិញទៅប្រធានអង្គភាពគយនិងរដ្ឋាករ មាត់ច្រកដោយភ្ជាប់មកជាមួយនូវឯកសារពាក់ព័ន្ធប្រធានអង្គភាពគយនិងរដ្ឋាករមាត់ច្រក ពិនិត្យលើពាក្យស្នើសុំនិងឯកសារ ភ្ជាប់ ព្រមទាំងចុះ ហត្ថលេខាអនុញ្ញាតឱ្យនាំចេញតាមសំណើ ប្រសិនបើពុំមានភាពមិនប្រក្រតីក្រោយពេលទទួលបានការអនុញ្ញាតឱ្យនាំចេញ អ្នកនាំចេញ ឬ តំណាងត្រូវបំពេញនីតិវិធី នៃការបំពេញប្រតិវេទន៍គយ ដូចមានក្នុងនីតិវិធីប្រតិវេទន៍គយ ។

-ការងារស្កែន

រាល់ទំនិញនាំចេញតាមកុងតឺន័រទាំងអស់ត្រូវស្កែន លើកលែងតែ៖ទំនិញនាំចេញដែលជាផលិតផលសម្រេចរបស់វិនិយោគិនវិស័យកាត់ដេរ ដែលបានបំពេញ បែបបទនៅសាខាគយនិងរដ្ឋាករនាំចេញទំនិញនាំចេញ ដែលត្រូវបានត្រួតពិនិត្យរួបវ័ន្តដោយមន្ត្រីគយនៃអង្គភាពគយ និងរដ្ឋាករមាត់ច្រករួច នាពេល ផ្ទុកចូលកុងតឺន័រទំនិញនាំចូលសម្រាប់អង្គទូត ឬ អង្គការមានអភ័យឯកសិទ្ធិការទូត អង្គការអន្តរជាតិ អង្គការក្រៅ រដ្ឋាភិបាល នានា ដែលត្រូវបានទទួលស្គាល់ជាផ្លូវការពីរាជរដ្ឋាភិបាលទំនិញដែលទទួលការអនុញ្ញាតដោយឡែកឲ្យរួចពីកាតព្វកិច្ចនេះពីក្រសួងសេដ្ឋកិច្ចនិងហិរញវត្ថុកុងតឺន័រទទេ។

– ផ្លូវអាកាស

ទំនិញនាំចេញទាំងអស់ ត្រូវរាយការណ៍នៅការិយាល័យគយ ឬ ទីកន្លែងផ្សេងទៀត ទៅតាមការកំណត់ របស់អគ្គនាយកគយនិងរដ្ឋាករកម្ពុជា ។ ទំនិញទាំងនោះ នឹងត្រូវរក្សាទុកបណ្តោះអាសន្ននៅទីកន្លែងដែល គ្រប់គ្រងដោយ រដ្ឋបាលគយ ; (សន្និធិគយបណ្តោះអាសន្ន) រង់ចាំ បំពេញបែបបទបញ្ចេញទំនិញពីគយមុន នឹងអនុញ្ញាតយកទំនិញចេញ ។ នីតិវិធីបំពេញបែបបទបញ្ចេញទំនិញពីគយអ្នកនាំចេញទំនិញទាំងអស់ត្រូវភ្ជាប់ឯកសារពាក់ព័ន្ធដើម្បីបំពេញបែបបទបញ្ចេញទំនិញពីគយដូចមានក្នុងនីតិវិធីប្រតិវេទន៍គយ ។

– ផ្លូវគោក

នីតិវិធីនៃការនាំចេញទំនិញដោយបំពេញបែបបទនៅមាត់ច្រកផ្លូវគោក អ្នកនាំចេញ ឬ តំណាងត្រូវធ្វើលិខិតស្នើសុំនាំចេញទំនិញទៅប្រធានអង្គភាពគយនិងរដ្ឋាករ មាត់ច្រកដោយភ្ជាប់មកជាមួយនូវឯកសារពាក់ព័ន្ធប្រធានអង្គភាពគយនិងរដ្ឋាករមាត់ច្រក ពិនិត្យលើពាក្យស្នើសុំ និងឯកសារ ភ្ជាប់ ព្រមទាំងចុះ ហត្ថលេខាអនុញ្ញាតឱ្យនាំចេញតាមសំណើ ប្រសិនបើពុំមានភាពមិនប្រក្រតីក្រោយពេលទទួលបានការអនុញ្ញាតឱ្យនាំចេញ អ្នកនាំចេញ ឬ តំណាងត្រូវបំពេញនីតិវិធីនៃការបំពេញ ប្រតិវេទន៍គយ ដូចមានក្នុងនីតិវិធីប្រតិវេទន៍គយ ៕

ពលរដ្ឋហុងកុងផ្ទុះកំហឹងប្រឆាំងទៅនឹងលោកស្រី Lam ដែលចាប់ផ្តើមប្រើច្បាប់អាជ្ញាសឹក

ការវិវត្តន៍នៃភាពវឹកវរចុងក្រោយបានធ្វើឱ្យសេដ្ឋកិច្ចហុងកុងដាំក្បាលចុះ

ដោយ Donald Lee

ហុងកុងៈ ពលរដ្ឋហុងកុងបានផ្ទុះកំហឹងយ៉ាងខ្លំាង ដែលបង្កឱ្យមានអំពើហឹង្សាកាលពីរាត្រីយប់មិញ ប្រតិកម្មតបទៅមេដឹកនាំហុងកុង លោកស្រី Carrie Lam ដែលប្រកាសថាទីក្រុងហុងកុងទាំងមូល នឹងស្ថិតនៅក្រោមច្បាប់អាជ្ញាសឹក ដែលចាប់ផ្តើមពីថ្ងៃសៅរ៍នេះ។

ក្រុមបាតុករប្រឆាំងនឹងរដ្ឋាភិបាល បានពុះកញ្ជ្រោលពាសពេញទីក្រុង នៅយប់ថ្ងៃសុក្រម្សិលម៉ិញនេះ ដោយបានបង្កជាអគ្គិភ័យដល់អាជីវកម្ម ដែលគាំទ្រក្រុងប៉េកាំងដោយបានគ្រវីស្រាក្រឡុក Molotov ដាក់ប៉ូលិស និងដុតទង់ជាតិចិន។

យោងតាមការរាយការណ៍របស់ប្រព័ន្ធផ្សព្វផ្សាយ នៅក្នុងទីក្រុងហុងកុងបានឱ្យដឹងថា ក្មេងប្រុសអាយុ១៤ឆ្នាំម្នាក់ត្រូវបានគេបាញ់សម្លាប់ទាំងយប់។

សេចក្តីប្រកាសព័ត៌មានរបស់ប្រតិបត្តិករ ដឹកជញ្ជូនសាធារណៈរបស់ក្រុមហ៊ុន MTR Corporation បានឱ្យដឹងនៅថ្ងៃសៅរ៍នេះថា ក្រុមអ្នកតវ៉ាបានដុតស្ថានីយនានា នៅទូទាំងទីក្រុង ហើយបានដុតបំផ្លាញរថភ្លើងនៅចំណុច ដែលក្រុមអ្នកតវ៉ាប្រមូលផ្តុំ។ សាជីវកម្មគ្មានជំរើសអ្វី ក្រៅពីធ្វើការសម្រេចចិត្តផ្អាកសេវាកម្មបណ្តាញទាំងមូល រួមទាំងរថយន្តធុនធ្ងន់ ធុនស្រាល និងរថយន្ដក្រុង MTR ។

លោកស្រី Lam បានប្រកាសថា ទីក្រុងនេះ នឹងស្ថិតនៅក្រោមច្បាប់គ្រាអាសន្នដែលចាប់ផ្តើមពីថ្ងៃសៅរ៍នេះ ដែលនឹងផ្តល់សិទ្ធិអំណាចដល់ច្បាប់អាជ្ញាសឹក របស់រដ្ឋាភិបាលនៅទូទាំងទឹកទីក្រុង ដើម្បីរក្សាឱ្យបាននូវមានសណ្តាប់ធ្លាប់ល្អឡើងវិញ។

អំណាចច្បាប់ដែលដាក់ចេញនូវភាពបន្ទាន់នេះ បានផ្តល់ដល់លោកស្រី Lam ដើម្បីធ្វើបទបញ្ជាទាំងឡាយណាដែលលោកស្រីគិតថា ក្នុងន័យផលប្រយោជន៍សាធារណៈ ស្របតាមបទបញ្ញត្តិរបស់ទីក្រុងហុងកុង ដែលបញ្ញត្តិតាំងពីឆ្នាំ១៩២២កន្លងមកនេះ៕

អ្នកប្រើប្រាស់ទូរស័ព្ទចល័តនៅកម្ពុជាមានចំនួនជិត ២១លានគ្រឿង

ដោយ វុត្ថា

ភ្នំពេញៈ របាយការណ៍ពីនិយ័តករទូរគមនាគមន៍កម្ពុជា ក្នុងខែសីហា ឆ្នាំ២០១៩ កន្លងទៅនេះបានបង្ហាញថា អ្នកប្រើប្រាស់ទូរស័ព្ទចល័តមានចំនួន ២០,៨លាននាក់ ដែលស្មើនឹង ១២០ភាគរយ ជាមួយនឹងអ្នកប្រើប្រាស់អ៊ិនធឺណិតចល័ត មានចំនួន ១៥,៦លាននាក់ ដែលស្មើនឹង ៩៦,១ភាគរយ។

បើតាមរបាយការណ៍ដដែលបន្តថា បណ្តាញព័ត៌មានសង្គមហ្វេសប៊ុក គឺជាប្រព័ន្ធមួយដែលត្រូវ បានប្រើប្រាស់យ៉ាងទូលំទូលាយជាងគេនៅកម្ពុជា ក្នុងចំណោមប្រព័ន្ធបណ្តាញសង្គមផ្សេងទៀត ដែលមានអត្រាអ្នកប្រើប្រាស់រហូតដល់
៨,៨លាននាក់ ស្មើនឹង ៥៤,០២ភាគរយក្នុងខែសីហា ឆ្នាំ២០១៩។

លោកនាង ម៉ៅ អគ្គនាយករង នៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាននៃក្រសួងប្រៃសណីយ៍ និងទូរគមនាគមន៍បានមានប្រសាសន៍ឲ្យដឹងនៅក្នុងសិក្ខាសាលាស្តីពី “សន្តិសុខក្នុងការប្រើប្រាស់បណ្តាញសង្គម (Social Media Security)” កាលពីថ្ងៃទី៤ ខែតុលា ឆ្នាំ២០១៩ ម្សិលមិញនេះឱ្យដឹងថា ការប្រើប្រាស់បណ្តាញសង្គមនៅក្នុងកម្ពុជាបន្តកើនឡើងគួរឱ្យកត់សម្គាល់ បណ្តាញសង្គមហ្វេសប៊ុកបានក្លាយជាមធ្យោបាយទំនាក់ទំនងមួយសម្រាប់ប្រជាជនកម្ពុជា។

លោកបន្តថា “សព្វថ្ងៃនេះ ទាំងរាជរដ្ឋាភិបាលវិស័យឯកជន និងបុគ្គលសាធារណៈនានា បានប្រើ់ប្រាស់ហ្វេសប៊ុក ក្នុងការប្រាស្រ័យទាក់ទងជាមួយនឹងប្រជាពលរដ្ឋ និងអតិថិជនរបស់ខ្លួនដើម្បីផ្តល់ព័ត៌មានថ្មីៗ ក៏ដូចជាទទួលបាន មតិយោបល់ត្រល់បមកវិញផងដែរ”។

លោកបន្ថែមថា សហគ្រាសមីក្រូ ធុនតូចនិងមធ្យម បានប្រើប្រាស់ហ្វេសប៊ុកក្នុងការលក់ទំនិញ និងផលិតផលរបស់ខ្លួនដោយផ្ទាល់ទៅកាន់អ្នកប្រើប្រាស់ ឬក៏ប្រើប្រាស់ដើម្បីធ្វើការបញ្ជូនព័ត៌មានអំពីការផ្ទេរលុយកាក់ជាដើម។ ទោះជាយ៉ាងណាក៏ដោយ ការដែលអ្នកប្រើប្រាស់ មិនបានស្វែងយល់អំពីមុខងាររបស់ហ្វេសប៊ុក ឱ្យបានលំអិតនោះទេ អ្នកប្រើប្រាស់នឹងអាចក្លាយខ្លួនទៅជាជនរងគ្រោះ ដោយការប្រើប្រាស់បច្ចេកវិទ្យាជាក់ជាមិនខាន។

លោកបញ្ជាក់ទៀតថា តួយ៉ាងជាឧទាហរណ៍កន្លងនេះ ទាំងរាជរដ្ឋាភិបាល និងវិស័យឯកជន បានក្លាយខ្លួនទៅជាជនរងគ្រោះ ដោយសារចោរបច្ចេកវិទ្យាធ្វើការជ្រៀតចូលលួចកាន់កាប់គណនីហ្វេសប៊ុកផ្លូវការរបស់ខ្លួន ហើយដែលមានខ្លះអាចធ្វើការស្រោចស្រង់មកវិញ និងមួយចំនួនទៀតគឺមិនអាចសង្គ្រោះមកវិញឡើយ។ ចោរបច្ចេកវិទ្យាអាចធ្វើការ ប្រើប្រាស់គណនីដែលលួចបាន ដើម្បីបន្លំបោកប្រាស់អ្នកដទៃក្នុងគោលបំណងទុច្ចរិតណាមួយដែលមិនអាចប៉ាន់ស្មានបាន។

លោកបន្ថែមទៀតថា ព័ត៌មានក្លែងក្លាយឬហៅថា Fake News គឺជាប្រធានបទមួយទៀត ដែលបាននឹងកំពុងវាយលុក នៅក្នុងហ្វេសប៊ុកនៅកម្ពុជាផងដែរ។ វាបានធ្វើឱ្យអ្នកប្រើប្រាស់ ពិបាកបែងចែកថាតើព័ត៌មានណាពិត ឬមិនពិត បើសិនជាមិនបានធ្វើការផ្ទៀងផ្ទាត់ប្រព័ន្ធឱ្យបានច្បាស់លាស់នោះទេ ហើយបន្ទាប់មកធ្វើការ ចែករំលែកបន្តព័ត៌មានទាំងនោះ៕

អាមេរិក និងចិននឹងចុះកិច្ចព្រមព្រៀងពាណិជ្ជកម្មដ៏ធំបំផុតមិនធ្លាប់មាន

ដោយ Donald Lee

វ៉ាស៊ីនតោនៈ ប្រធានាធិបតីអាមេរិក លោក Donald Trump បានអះអាងថា មន្រ្តីពាណិជ្ជកម្មអាមេរិក និងចិនកំពុងស្ថិតក្នុងដំណាក់កាលចរចាដ៏សំខាន់ ដែលអាចឱ្យមានកិច្ចព្រមព្រៀងពាណិជ្ជកម្មដែលមិនធ្លាប់មាន។

លោក Trump បានថ្លែងនៅក្នុងសន្និសីទកាសែត កាលពីថ្ងៃសុក្រម្សិលមិនេះថា “ឥឡូវនេះ យើងស្ថិតនៅក្នុងដំណាក់កាលដ៏សំខាន់មួយ ទាក់ទងនឹងការធ្វើកិច្ចព្រមព្រៀង។ប្រសិនបើយើងធ្វើ នោះវានឹងក្លាយជាកិច្ចព្រមព្រៀងពាណិជ្ជកម្ម ដ៏ធំបំផុតដែលមិនធ្លាប់មានពីមុនមក”។

តំណាងពាណិជ្ជកម្មមកពីប្រទេសចិន អាមេរិក ដែលមានសេដ្ឋកិច្ចធំជាងគេ និងធំទី២នៅលើពិភពលោក គ្រោងនឹងជួបគ្នានៅទីក្រុងវ៉ាស៊ីនតោន ដើម្បីពិភាក្សាពាណិជ្ជកម្មមួយទៀតនៅថ្ងៃព្រហស្បតិ៍សប្តាហ៍ក្រោយនេះ។

លោក Trump បានបន្តថា “ខ្ញុំចាត់ទុកចិន ជាប្រទេសដែលយើងកំពុងព្យាយាមដោះស្រាយជាមួយ។ យើងមានឱកាសល្អក្នុងការដោះស្រាយជាមួយ”។

ទោះបីជាមានសញ្ញានៃកំណើន GDP សកលធ្លាក់ចុះក៏ដោយ ទិន្នន័យសេដ្ឋកិច្ចចុងក្រោយបានបង្ហាញថា សហរដ្ឋអាមេរិកបានបន្ថែមការងារចំនួន ១៣៦,០០០កន្លែង និងកាត់បន្ថយអត្រាគ្មានការងារធ្វើ ឱ្យមានកម្រិតទាបនៅក្នុងប្រវត្តិសាស្រ្ត។

លោក Trump បានលើកឡើងភ្លាមៗនៅក្នុងបណ្តាញសង្គម ពីការកើនឡើងនៃការងារសម្រាប់ពលរដ្ឋអាមេរិក និងការប៉ុនប៉ងរបស់គណបក្សប្រឆាំងអាមេរិក ដើម្បីទំលាក់គាត់ចេញពីតំណែង។

លោក Trump បានសរសេរថា “ព័ត៌មានទាន់ហេតុការណ៍ អត្រាគ្មានការងារធ្វើមានចំនួន ៣,៥% ធ្លាក់ចុះដល់៥០ឆ្នាំយ៉ាងទាប” ។ អីយ៉ាស់! អាមេរិច ! តោះចោទប្រកាន់ប្រធានាធិបតីរបស់អ្នក (ទោះបីជាគាត់មិនបានធ្វើអ្វីខុសក៏ដោយ)៕

ក្រុមហ៊ុនចិនធំមួយបោះទុន ១៥០លានដុល្លារសាងសង់រោងចក្រកែច្នៃផ្លែស្វាយនៅកម្ពុជា

ដោយៈ រ៉ាណេត

ព្រះសីហនុៈ ក្រុមហ៊ុនចិនដ៏ធំមួយគ្រោងវិនិយោគ ទឹកប្រាក់១៥០លានដុល្លារ ដើម្បីកែច្នៃផ្លែស្វាយ នៅខេត្តព្រះសីហនុ ដែលរោងចក្រនេះនឹងដំណើរការនៅឆ្នាំ២០២០ខាងមុខនេះ។

កាលពីដើមឆ្នាំ២០១៩ ក្រុមហ៊ុន Cam MJ Agricultural Park Co.,Ltd បានទទួលគោលការណ៍វិនិយោគពីក្រុមប្រឹក្សាអភិវឌ្ឍកម្ពុជា (CDC) ដើម្បីកសាង ” Cam MJ Agricultural Park Special Economic Zone ” លាតសន្ធឹងលើផ្ទៃដីជាង៩៩ហត ស្ថិតនៅភូមិតានៃ ឃុំជើងគោ ស្រុកព្រៃនប់ ខេត្តព្រះសីហនុ ដែលត្រូវចំណាយថវិកាប្រមាណ ១៥០លានដុល្លារ មានរយ:ពេល៥ ឆ្ នាំ(២០២០-២០២៥)។

លោក Ung Kim នាយកគ្រប់គ្រងទូទៅនៃក្រុមហ៊ុន Cam MJ Agricultural Park Co.,Ltd បានលើកឡើងថា ជាការឆ្លើយតបទៅនឹងយុទ្ធសាស្រ្តចតុកោណ ដំណាក់កាលទី៤ របស់រាជរដ្ឋាភិបាល ក្រុមហ៊ុនបានបង្កើតឡើងនៅឆ្នាំ២០១៧ ក្នុងបំណងបង្កើនផលិតភាពផលិតកម្មកសិកម្ម ការការពារផលប្រយោជន៍របស់កសិករ តាមរយ:ការធ្វើឱ្យប្រសើរឡើងនូវគុណភាពកសិផល បង្កើនតម្លៃបន្ថែម និងធ្វើការប្រកួតប្រជែងទីផ្សារក្នុង និងក្រៅប្រទេស។ ការលើកឡើងនេះ ធ្វើឡើងក្នុងឱកាសចូលជួបសម្ដែងការគួរសមរបស់លោក Ung Kim ជាមួយលោក វេង សុខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី៤ ខែតុលា ឆ្នាំ២០១៩។

លោកបានបន្តទៀតថា តំបន់ឧស្សាហកម្មនេះ នឹងប្រើជាប្រយោជន៍សម្រាប់ធ្វើកន្លែងតាំងពិព័រណ៍កសិផល ការប្រមូលទិញ ការកែច្នៃផ្លែឈើត្រូពិច បន្លែ ការធ្វើជំនួញកសិផលជាមួយដៃគូឈានមុខអន្តរជាតិ ព្រមទាំងជាកន្លែងអនុវត្តបច្ចេកទេសកសិកម្ម ការប្រមូលផ្តុំក្រុមផលិតពូជ និងការកែច្នៃជីសរីរាង្គ។ល។ និយាយជារួមគឺជាតំបន់ពហុប្រយោជន៍បម្រើឱ្យវិស័យកសិ-ឧស្សាហកម្មកម្ពុជា។ ប្រសិនបើតំបន់នេះដំណើរការល្អតាមផែនការដែលបានគ្រោងទុក នោះកម្ពុជាត្រូវបានគេទទួលស្គាល់លើឆាកអន្តរជាតិកាន់តែច្រើនឡើងតាមរយ:ផលិត ផលកសិផលកែច្នៃនេះ។

រដ្ឋមន្រ្តីក្រសួងកសិកកម្ម រុក្ខាប្រមាញ់ និងនេសាទ លោកវេង សាខុនបានសម្តែងការស្វាគមន៍រីករាយ និងគាំទ្រចំពោះឆន្ទ:វិនិយោគរយ:ពេលវែង លើវិស័យកសិកម្មកម្ពុជា ស្របពេលដែលរាជរដ្ឋាភិបាលកម្ពុជាបានដាក់ចេញ នូវគោលនយោបាយយកចិត្តទុកដាក់ បង្កើនតម្លៃបន្ថែមលើការផលិត ការកែច្នៃកសិផលឱ្យបាន១២ភាគរយ នៅត្រឹមឆ្នាំ២០២៥។ លោកក៏បានបន្ថែមទៀតថា រដ្ឋាភិបាលបានលើកទឹកចិត្តដល់វិនិយោគិនក្នុងវិស័យកសិ-ឧស្សាហកម្ម ដែលមានអាទិភាពចម្បងដូចបានកំណត់ក្នុងគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥។ ក្រសួងកំពុងទន្ទឹងរង់ចាំ និងស្វាគមន៍ជានិច្ច រាល់គម្រោងវិនិយោគគ្រប់ខ្សែច្រវាក់ផលិតកម្មពី A-Z (ផលិត កែច្នៃ និងទីផ្សារ) ដែលមានលក្ខណ:បំពេញឱ្យដំណើរការកែច្នៃកសិផលបានគ្រប់ជ្រុងជ្រោយ។

លោករដ្ឋមន្រ្តីបានបន្ថែមថា “ប្រសិនបើយើងបញ្ចូលបច្ចេកទេសសមស្របមួយឱ្យអ្នកផលិត រួមទាំងមានសួនកែច្នៃនេះទៀត យើងសង្ឃឹមថាផលិតផលស្វាយនឹងមានតម្លៃបន្ថែមខ្ពស់មួយ ហើយនេះគឺអ្វីដែលកសិករយើងរំពឹងទុក”។លោកបន្តថា “ក្រសួងនឹងផ្តល់កិច្ចសហការតាមគ្រប់រូបភាព ដើម្បីជួយសម្រួលគ្រប់បែបយ៉ាង ទាំងឯកសាររដ្ឋបាល ច្បាប់ និងបច្ចេកទេស ធ្វើយ៉ាងណាឱ្យគម្រោងសម្រេចទទួលបានជោគជ័យ ដើម្បីលើកកម្ពស់សមត្ថភាពផ្គត់ផ្គង់កសិផលកែច្នៃលើទីផ្សារក្នុង និងក្រៅប្រទេស ធ្វើការប្រកួតប្រជែង ជំរុញការប្រើប្រាស់ និងកាត់បន្ថយការនាំចេញវត្ថុធាតុដើម ស្វាយ បង្កើនតម្លៃបន្ថែម បង្កើតការងារ បង្កើនចំណូល និងនិរន្តរភាពសេដ្ឋកិច្ចជាតិ”។

ក្រៅពីផលិតផលស្វាយ លោកក៏បានប្រាប់ឱ្យក្រុមហ៊ុនចាប់អារម្មណ៍ លើផលិតផលដំឡូងមី ម្រេច ស្វាយចន្ទី និងត្រីទឹកសាបផងដែរ ដែលសុទ្ធតែជាវត្ថុធាតុដើមមានសក្តានុពលសម្រាប់ធ្វើការកែច្នៃ និងនាំចេញ៕

កម្ពុជាអនុម័ត្រគម្រោងវិនិយោគវៀតណាមចំនួន ៨៤គម្រោង មានទឹកប្រាក់ជាង ២,៥ពាន់លានដុល្លារ

ដោយ វុត្ថា

វៀតណាម៖ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានឱ្យដឹងថា គិតចាប់ពីឆ្នាំ ១៩៩៤ រហូតដល់ខែសីហាឆ្នាំ២០១៩ ពោលគឺមានរយៈពេល ២៥ ឆ្នាំ កម្ពុជាតាមរយៈក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគរបស់ក្រុមហ៊ុនវៀតណាមចំនួន៨៤គម្រោង ក្នុងទុនវិនិយោគសរុបចំនួនប្រមាណជាង ២,៥ ពាន់លានដុល្លារអាមេរិក ក្នុងនោះវិស័យកសិកម្មមានចំនួនប្រមាណ២ភាគ៣ នៃគម្រោងវិនិយោគទាំងអស់។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាថ្លែងនៅក្នុងសន្និសីទ កម្ពុជា-វៀតណាម ស្ដីពីការជម្រុញវិនិយោគ និងពាណិជ្ជកម្មកាលពីថ្ងៃទី ៤ ខែតុលា ឆ្នាំ ២០១៩ ម្សិលមិញនេះថាក្រៅពីគម្រោងវិនិយោគដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា ក៏មានវត្តមាននៃការវិនិយោគក្រុមហ៊ុនវៀតណាមក្នុងវិស័យនានាដូចជា វិស័យធនាគារ ធានារ៉ាប់រង សេវាកម្ម និងការលក់ដុំ លក់រាយជាដើម។

សម្តេចតេជោបន្តថា ក្នុងវិស័យពាណិជ្ជកម្ម សម្តេចពិតជាមានក្តីមោទនភាព ចំពោះការកើនឡើងនូវទំហំពាណិជ្ជកម្មទ្វេភាគីដែលកាលពីឆ្នាំ២០១៨ ទំហំពាណិជ្ជកម្មសរុបរវាងកម្ពុជា និងវៀតណាមសម្រេចបានចំនួនប្រមាណជាង៤,៧ពាន់លានដុល្លារអាមេរិកគឺកើនឡើងប្រមាណជា២៤% ធៀបនឹងឆ្នាំ២០១៧។

ដោយឡែកក្នុងរយៈពេល ៦ខែដើមឆ្នាំ២០១៩ ទំហំពាណិជ្ជកម្មសរុបរវាងប្រទេសទាំងពីរសម្រេចបានចំនួន២,៧២ពាន់លានដុល្លារអាមេរិក ដែលយើងរំពឹងថានឹងសម្រេចដល់ប្រមាណជា៥ពាន់លានដុល្លារអាមេរិក នៅដំណាច់ឆ្នាំនេះ។ ចំពោះវិស័យទេសចរណ៍វិញ វៀតណាមឈរនៅលំដាប់លេខរៀងទី២នៅឆ្នាំ២០១៧ និង២០១៨។

ក្នុងរយៈពេល៧ខែ នៃឆ្នាំ២០១៩នេះ ចំនួនភ្ញៀវទេសចរវៀតណាមមកកម្ពុជា មានចំនួនប្រមាណជាង៤៧ម៉ឺននាក់ ដែលតួលេខនេះមានការកើនឡើងប្រមាណជា៤,៦% បើប្រៀបធៀបរយៈពេលដូចគ្នាក្នុងឆ្នាំ២០១៨កន្លងទៅ។

ចំនួនភ្ញៀវទេសចរប្រទេសទាំងពីរ រំពឹងថានឹងមានកំណើនបន្ថែមទៀតតាមរយៈការពន្លឿនសកម្មភាពផ្សព្វផ្សាយ និងការបង្កើនការតភ្ជាប់ក្នុងចំណោមគោលដៅនិងផលិតផលទេសចរណ៍ ជាក់ស្ដែងជើងហោះហើរត្រង់ ភ្នំពេញ-ដាណាំង និងចាប់ផ្ដើមដំណើរការនាពេលឆាប់ៗខាងមុខនេះបន្ថែមលើជើងហោះហើរកម្ពុជាវៀតណាមដែលមានស្រាប់ចំនួន១១២ជើងក្នុងមួយសប្តាហ៍។

ក្នុងក្របខណ្ឌនៃកិច្ចសម្រួលការដឹកជញ្ជូនផ្លូវគោកនិងឡូជីស្ទិកប្រទេសទាំងពីរបានឯកភាពអនុញ្ញាតឲ្យយានយន្តចំនួន៥០០គ្រឿងឆ្លងកាត់តាមច្រកព្រំដែនចំនួន៩ ហើយប្រទេសទាំងពីរបាន និងកំពុងពិភាក្សាលើការបន្ថែមចំនួនយានយន្តនិងជំនួញច្រកឆ្លងកាត់ដែរ។

សម្ដេចតេជោ ក៏សូមណែនាំដល់ស្ថាប័នពាក់ព័ន្ធរបស់កម្ពុជាធ្វើការសិក្សានិងពិនិត្យលទ្ធភាពជាក់ស្ដែងដាក់ចេញនូវយន្តការពិសេសដើម្បីបង្កើនការសម្រួលពាណិជ្ជកម្ម និងផ្នែកឡូជីស្ទីកនៅតាមជាយដែនជាពិសេសដើម្បីត្រៀមលក្ខណៈឆ្លើយតបទៅនឹងកំណើនយ៉ាកំហុសនៃការដឹកជញ្ជូនឆ្លងកាត់ព្រំដែនបន្ទាប់ពីគម្រោងផ្លូវល្បឿនភ្នំពេញ និងទីក្រុងហូជីមិញ មកប្រសព្វគ្នានៅច្រកព្រំដែនអន្តរជាតិបាវិត ដែលជាចំណុចប្រមូលផ្ដុំដ៏សំខាន់មួយនៅក្នុងរបៀងសេដ្ឋកិច្ចភាគខាងត្បូងក្នុងក្របខ័ណ្ឌមហាអនុតំបន់មេគង្គ។

សម្តេចតេជោក៏បានស្នើរអ្នកវិនិយោគវៀតណាមមកបណ្ដាក់ទុនវិនិយោគបន្ថែមទៀតលើវិស័យកសិកម្ម វិស័យទេសចរណ៍ វិស័យដឹកជញ្ជូន និងឡូជីស្ទីក វិស័យសំណង់ ផលិតសម្ភារៈបរិក្ខាសំណង់ និងវិស័យអប់រំបណ្ដុះបណ្ដាលបច្ចេកទេសវិជ្ជាជីវៈ ដែលសុទ្ធសឹងជាវិស័យសក្កានុពលរបស់កម្ពុជា ក្នុងគោលដៅប្រែក្លាយកម្ពុជាឱ្យក្លាយទៅជាផ្នែកមួយសំខាន់នៃខ្សែចង្វាក់ផ្គត់ផ្គង់តំបន់ និងសកលព្រមទាំងពង្រឹងភាពប្រកួតប្រជែងនិងធ្វើឲ្យបរិយាកាសធុរកិច្ច និងវិនិយោគនៅកម្ពុជាកាន់តែល្អប្រសើរ។

សម្តេចតេជោក៏បានមានប្រសាសន៍អំពីការធ្វើកំណែទម្រង់ផ្ទៃក្នុងនៃការវិនិយោគក្នុងប្រទេសកម្ពុជាដែលសម្ដេចបានដឹកនាំកិច្ចប្រជុំពីរថ្ងៃ ទី២៩ ខែមីនាឆ្នាំ២០១៩ កន្លងទៅ ដែលបានផ្ដល់ដល់ផ្នែកវិស័យឯកជនក្នុងការដោះស្រាយបញ្ហាប្រឈមនិងសំណូមពរជូនដល់រដ្ឋាភិបាលដើម្បីពិនិត្យនិងមានវិធានការសមស្របដើម្បីដោះស្រាយ និងដើម្បីធ្វើឲ្យវិនិយោគិនដែលមកវិនិយោគក្នុងប្រទេសកម្ពុជា កាន់តែមានភាពងាយស្រួល។

សម្ដេចតេជោ បានស្វាគមន៍រាល់ការសម្រេចចិត្តរបស់អ្នកវិនិយោគទាំងអស់ជាពិសេសអ្នកវិនិយោគវៀតណាម ដែលបានជ្រើសរើស នឹងមានបំណងមកវិនិយោគនៅក្នុងប្រទេសកម្ពុជា ហើយសម្ដេចក៏បានអំពាវនាវដល់ធុរជន និងអ្នកវិនិយោគវៀតណាមដែលបានមកធ្វើទស្សនកិច្ចនៅកម្ពុជាសូមអញ្ជើញមកសិក្សាស្វែងយល់បន្ថែមពីសក្តានុពល និងកាលានុវត្តភាពវិនិយោគនៅកម្ពុជាព្រមទាំងសម្រេចចិត្តបណ្ដាក់ទុនវិនិយោគឬសហការវិនិយោគរួមគ្នាជាមួយអ្នកវិនិយោគកម្ពុជាដើម្បីទាញយកផលប្រយោជន៍ជាអតិបរមាពីកិច្ចសហប្រតិបត្តិការទ្វេភាគីរវាងកម្ពុជានិងវៀតណាម។

សម្ដេចក៏សូមធានាជូនដល់អ្នកវិនិយោគគ្រប់រូបនូវបរិស្ថានប្រកបដោយអំណោយផលជាពិសេសគឺសន្តិភាពសន្តិសុខនិងស្ថិរភាពនយោបាយក៏ដូចជាស្ថិរភាពម៉ាក្រូសេដ្ឋកិច្ចក្របខណ្ឌច្បាប់ និងស្ថាប័នដែលប្រកបដោយប្រសិទ្ធភាពតម្លាភាព គណនេយ្យភាព និងភាពអាចប៉ាន់ប្រមាណបាន។

នៅចុងបញ្ចប់នៃសន្និសីទនេះផងដែរ ក៏មានពិធីចុះហត្ថលេខាមួយលើអនុស្សារណៈនៃការយោគយល់គ្នារវាងក្រុមប្រឹក្សាអភិវឌ្ឍន៍កម្ពុជា ជាមួយក្រសួងផែនការ និងវិនិយោគវៀតណាម ស្ដីពីកិច្ចសហប្រតិបត្តិការវិនិយោគនៃប្រទេសទាំងពីរផងដែរ៕

ការសិក្សា៖ ការលក់រថយន្តជប៉ុននៅកូរ៉េខាងត្បូងធ្លាក់ចុះយ៉ាងខ្លំាង ដោយសារសង្គ្រាមពាណិជ្ជកម្មនៃប្រទេសទាំងពីរ

ដោយ Donald Lee

សេអ៊ូល៖ ប្រទេសកូរ៉េខាងត្បូងបន្តធ្វើពហិការមិនទិញទំនិញជប៉ុន និងបានធ្វើឱ្យការលក់រថយន្តនៅក្នុងប្រទេសជប៉ុនធ្លាក់ចុះយ៉ាងខ្លាំង។ នេះបើយោងតាមទិន្នន័យដែលចេញផ្សាយដោយសមាគមរថយន្តកូរ៉េកាលពីពេលថ្មីៗនេះ។

របាយការណ៍ចេញផ្សាយដោយសមាគមអ្នកនាំចូល និងចែកចាយរថយន្តកូរ៉េ (KAIDA) កាលពីថ្ងៃសុក្របានបញ្ជាក់ថា ការលក់រថយន្តរបស់ជប៉ុនបានធ្លាក់ចុះនៅក្នុងប្រទេសកូរ៉េខាងត្បូងក្នុងរយៈពេល ៣ ខែកន្លងមកនេះ។

នៅខែកញ្ញា គឺជាខែអាក្រក់បំផុតសម្រាប់ការលក់រថយន្តរបស់ជប៉ុនចាប់តាំងពីសង្គ្រាមពាណិជ្ជកម្មកូរ៉េខាងត្បូង – ជប៉ុនកើនឡើង។

យោងតាម KAIDA បានឱ្យដឹងថា រថយន្តជប៉ុនដែលបានចុះបញ្ជីនៅក្នុងប្រទេសកូរ៉េខាងត្បូងកាលពីខែកញ្ញាកន្លងមកនេះបានធ្លាក់ចុះ ៥៩,៨ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ ការលក់រថយន្តរបស់ជប៉ុនបានបន្តកាន់តែអាក្រក់ទៅ ៗ ដោយសារសង្គ្រាមពាណិជ្ជកម្មកូរ៉េ – ជប៉ុនបានកើនឡើងនៅឆ្នាំនេះ។

ការលក់រថយន្តរបស់ជប៉ុនបានធ្លាក់ចុះ ១៧,២ ភាគរយដែលចាប់ផ្តើមនៅក្នុងខែកក្កដា និង ៥៦,៩ ភាគរយនៅក្នុងខែសីហា។ ការលក់រថយន្តបានជះឥទ្ធិពលដល់ក្រុមហ៊ុនផលិតរថយន្តជប៉ុនយ៉ាងខ្លាំងដោយសារតែការលក់រថយន្តបានពង្រីកអស់រយៈពេល ៥ ឆ្នាំនៅប្រទេសកូរ៉េខាងត្បូងរហូតដល់ឆ្នាំ ២០១៨ ។

ទន្ទឹមនឹងនេះ ការលក់ នៃការនាំចូលរថយន្តប្រណីតបាន ២០.២០៤ គ្រឿងកាលពីខែមុនដែលជាការកើនឡើង ១៧.៣ ភាគរយបើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ នេះបើយោងតាម KAIDA ។ ក្រសួងពាណិជ្ជកម្មកូរ៉េខាងត្បូង និងជប៉ុនបានប្រកាសកាលពី ២ ខែមុនថា ប្រទេសទាំងពីរកំពុងធ្វើកូដកម្មគ្នាទៅវិញទៅមកលើការដកចេញពីបញ្ជីនៃដៃគូពាណិជ្ជកម្ម។

បណ្តាប្រទេសជាសមាជិកនៃការចុះបញ្ជីរបស់ប្រទេសទាំងពីរទទួលបានអត្ថប្រយោជន៍ពីការធ្វើពាណិជ្ជកម្មពាណិជ្ជកម្មយ៉ាងឆាប់រហ័ស និងឆ្លងកាត់ការរឹតត្បិតតិចតួចនៅពេលនាំចេញទំនិញទៅប្រទេសនីមួយៗ។

ប្រទេសកូរ៉េខាងត្បូង និងជប៉ុនត្រូវបានជាប់គាំងនៅក្នុងជម្លោះពាណិជ្ជកម្មអស់រយៈពេលជាច្រើនខែជុំវិញបញ្ហាមិនគ្រប់គ្រាន់សម្រាប់ឧក្រិដ្ឋកម្មសម័យសង្គ្រាមលោកលើកទី ២ ដែលបានប្រព្រឹត្តក្រោមការបញ្ជារបស់អធិរាជជប៉ុន។សេដ្ឋកិច្ចរបស់អាស៊ីកំពុងធ្លាក់ចុះយ៉ាងខ្លាំងដោយមានប្រទេសជាច្រើនចាត់វិធានការគោលនយោបាយរូបិយវត្ថុបឋមដើម្បីការពារការធ្លាក់ចុះសេដ្ឋកិច្ច។

សង្គ្រាមពាណិជ្ជកម្មរវាងសហរដ្ឋអាមេរិក និងចិនកំពុងតែធ្វើឱ្យមានការឈឺចាប់កាន់តែខ្លាំងឡើងនៅក្នុងវិស័យផលិតកម្មរថយន្តនៅអាស៊ីតាមរយៈការរំខានដល់ហេដ្ឋារចនាសម្ព័ន្ធខ្សែសង្វាក់ផ្គត់ផ្គង់។

របាយការណ៍ឧស្សាហកម្មយានយន្តចេញផ្សាយដោយមជ្ឈមណ្ឌលស្រាវជ្រាវយានយន្តបានប៉ាន់ប្រមាណថាសង្គ្រាមពាណិជ្ជកម្មរវាងសហរដ្ឋអាមេរិកឆ្នាំ ២០១៨ ដល់ ២០២៤ នឹងបណ្តាលឱ្យបាត់បង់ការលក់រថយន្តចំនួន ៣៥ លានគ្រឿងដែលមានតម្លៃ ៧៦៥ ពាន់លានដុល្លារដែលភាគច្រើនដោយសារតែភាពមិនប្រាកដប្រជាផ្នែកសេដ្ឋកិច្ចធ្វើឱ្យប៉ះពាល់ដល់ការលក់រថយន្តរបស់ប្រទេសអាល្លឺម៉ង់នៅចិន៕