ដោយ: គង់ លាងហួរ
អន្តរជាតិ: តម្លៃជួលការិយាល័យនៅទីក្រុងហុងកុងនៅក្នុងឆ្នាំ២០២៥នេះត្រូវបានព្យាករណ៍ថា នឹងធ្លាក់ចុះដល់កម្រិតទាបបំផុតមិនធ្លាប់មានតាំងពីឆ្នាំ២០១២។ការណ៍នឹងអាចនាំឱ្យតម្លៃអគារពាណិជ្ជកម្មនានាដាំក្បាលចុះ។

យោងតាមទីភ្នាក់ងារវាយតម្លៃចំណាត់ថ្នាក់ឥណទានសកល S&P Global Ratings បានឱ្យដឹងថា តម្លៃជួលការិយាល័យប្រភេទ Prime នៅទីក្រុងហុងកុងនឹងដាំក្បាលចុះ១០ភាគរយនៅឆ្នាំនេះ បើប្រៀបធៀបនឹងការព្យាករណ៍ពីមុនថា នឹងធ្លាក់ចុះចំនួន៥ភាគរយ។
ទីភ្នាក់ងារ S&P Global Ratings បានអះអាងថា ការបង្កើនការផ្គត់ផ្គង់បន្ទប់ការិយាល័យថ្មីៗពីគម្រោងនានាដែលទើបនឹងបញ្ចប់ការសាងសង់ នឹងដាក់សម្ពាធកាន់តែខ្លាំងទៅលើម្ចាស់អគារការិយាល័យ និងធ្វើឱ្យអ្នកជួលមានប្រៀបក្នុងការចរចាតម្លៃ។

លោក Oscar Chung អ្នកវិភាគឥណទានរបស់ទីភ្នាក់ងារ S&P Global Ratings បានលើកឡើងថា “ម្ចាស់អគារការិយាល័យនៅទីក្រុងហុងកុងកំពុងជួបប្រទះការលំបាក ដោយសារភាពមិនប្រាកដប្រជាផ្នែកសេដ្ឋកិច្ច និងការប្រកួតប្រជែងពីអគារ ដែលទើបសាងសង់រួចរាល់ថ្មីៗបន្ថែមទៀត”។

លោកបានបន្តថា “យើងរំពឹងថា ម្ចាស់អគារការិយាល័យទាំងនោះនឹងប្រើប្រាស់យុទ្ធសាស្ត្រថ្មី ដើម្បីរក្សាអ្នកជួល រួមទាំងការបញ្ចុះតម្លៃជួលជាដើម”។

យ៉ាងណាមិញ ទីភ្នាក់ងារ S&P បានព្រមានថា ការធ្លាក់ចុះនៃតម្លៃជួលអាចជះផលប៉ះពាល់លើម្ចាស់អគារការិយាល័យក្នុងទីក្រុងហុងកុង ស្របពេលមានការកើនឡើងនៃបំណុលអាក្រក់នៅក្នុងទីផ្សារអចលនទ្រព្យពាណិជ្ជកម្ម។

​បំណុល​អាក្រក់​ (Bad ​Debt) ក្នុងទីផ្សារអចលនទ្រព្យ ជាបំណុល​មាន​អត្រា​ការប្រាក់​ខ្ពស់​ដែលត្រូវបានខ្ចី​យកទៅ​ចំណាយ​លើ​​អចលនទ្រព្យដែលធ្លាក់ថ្លៃចុះទៅតាមពេលវេលា។

ជាក់ស្ដែង តម្លៃជួលការិយាល័យជាមធ្យមនៅតំបន់ចំនួន៩ក្នុងទីក្រុងហុងកុង រួមមានតំបន់ Sheung Wan តំបន់ Central តំបន់ Wan Chai-Causeway Bay និងតំបន់ Tsim Sha Tsui ជាដើមបានធ្លាក់ចុះមកនៅត្រឹម៣០៩ដុល្លារហុងកុង (ប្រហែល៣៩,៦៨ដុល្លារអាមេរិក)ទៅ៩១៤ដុល្លារហុងកុង(ប្រហែល១១៧,៣៨ដុល្លារអាមេរិក) ក្នុងមួយម៉ែត្រការ៉េ។តួលេខនេះឈានជិតដល់កម្រិតទាបបំផុតកាលពី១៣ឆ្នាំមុន៕ប្រភព: SCMP៕

ដោយ: គង់ លាងហួរ
អន្តរជាតិ: បណ្តាក្រុមហ៊ុនអភិវឌ្ឍន៍អចលនទ្រព្យថៃបានអំពាវនាវឱ្យរដ្ឋាភិបាលរបស់ខ្លួនដាក់ចេញនូវបទប្បញ្ញត្តិតឹងរ៉ឹងដើម្បីប្រកួតប្រជែងដោយស្មើភាពជាមួយអ្នកអភិវឌ្ឍន៍ និងអ្នកវិនិយោគបរទេស ពិសេសមកពីប្រទេសចិន។

ការ​ស្នើ​នេះ​បានធ្វើ​ឡើង​ ស្រប​ពេល​ដែល​លំហូរវិនិយោគផ្ទាល់ពីបរទេសចូលទីផ្សារ​អចលន​ទ្រព្យ​ថៃ​កំពុង​តែ​មាន​ការ​កើន​ឡើង​ ខណៈបណ្តាក្រុមហ៊ុនចិនជាច្រើនបាន​បង្វែរ​មូលដ្ឋានទីតាំង​ផលិត​កម្មទៅ​កាន់ប្រទេស​ថៃ។

និន្នាការ​នេះ​បាន​កើតឡើង​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​ ដោយ​ស្រប​ទៅនឹង​ការ​ផ្លាស់​ប្តូរ​នៃគោលនយោបាយ​ពាណិជ្ជកម្ម​នៅលើពិភពលោក ដោយសារភាពតានតឹងភូមិសាស្ត្រនយោបាយរវាងចិន និងសហរដ្ឋអាមេរិក។

យោងតាមទិន្នន័យរបស់ក្រុមប្រឹក្សាវិនិយោគថៃ (BOI) បានបង្ហាញថា ក្រុមវិនិយោគិនចិនបានដាក់ពាក្យស្នើសុំបោះទុនចំនួន១៤៦,៣៦ពាន់លានបាតក្នុងរយៈពេល៩ខែឆ្នាំ២០២៤។

ជាមួយគ្នានេះ ចំនួនក្រុមហ៊ុនថៃ ដែលមានម្ចាស់ភាគហ៊ុនជាជនជាតិចិនបានកើនឡើងដល់ចំនួន២៩.៩១៣ស្ថាប័នគិតត្រឹមដំណាច់ ខែតុលា ឆ្នាំមុន ក្រោមទំហំដើមទុនចុះបញ្ជីសរុបចំនួន៤០៩,៣ពាន់លានបាត កើនឡើង៩,២%។

លំហូរវិនិយោគផ្ទាល់ពីប្រទេសចិនបាននាំឱ្យចំនួនជនជាតិចិន ដែលទទួលបានលិខិតអនុញ្ញាតឱ្យធ្វើការងារនៅក្នុងប្រទេសថៃ(Work permit) កើនឡើង។

ជាក់ស្ដែង គិតត្រឹមខែតុលា ឆ្នាំមុន ជនជាតិចិនប្រមាណ៤១.៧៥២នាក់បានកាន់លិខិតអនុញ្ញាតឱ្យធ្វើការនៅប្រទេសថៃ លើសពីជនជាតិផ្សេងទៀតទាំងអស់។ កត្តា​នេះ​បាន​ធ្វើ​ឱ្យ​ជនជាតិចិន​មាន​អំណាចនៃការទិញ​យ៉ាង​ខ្លាំង​នៅក្នុង​ទីផ្សារ​អចលនទ្រព្យ​ថៃ។

ក្រុមហ៊ុន Cushman & Wakefield ប្រចាំប្រទេសថៃបានព្យាករណ៍ថា ការមកដល់របស់ជនជាតិចិននៅឆ្នាំ២០២៥នេះ នឹងមានចំនួនលើសពីឆ្នាំ២០២៤។ ជាពិសេស ពួកគេនឹងទិញខុនដូ និងផ្ទះទោលនៅប្រទេសថៃសម្រាប់ជួលបន្ត ឬលក់បន្តទៅកាន់អតិថិជនដទៃ។

យ៉ាងណាមិញ ក្តីបារម្ភត្រូវបានលើកឡើង ខណៈបណ្តាអ្នកវិនិយោគចិនភាគច្រើន ដែលចូលបោះទុនវិនិយោគនៅក្នុងប្រទេសថៃ បាននាំយកអ្នកអភិវឌ្ឍន៍ អ្នកម៉ៅការ វិស្វករ កម្មករ បច្ចេកវិទ្យាទំនើប និងសម្ភារៈសំណង់ ដែលមានតម្លៃថោក និងអាចរកបានពីប្រទេសចិន។

ម៉្យាងវិញទៀត អង្គភាពរបស់អ្នកវិនិយោគចិនភាគច្រើនបានចុះឈ្មោះជាក្រុមហ៊ុនថៃ ដោយគោរពតាមបទប្បញ្ញត្តិនានារបស់រដ្ឋាភិបាលថៃ។

ប៉ុន្តែ គេសង្កេតឃើញមានតែជនជាតិចិនប៉ុណ្ណោះ ដែលកាន់មុខតំណែងជាន់ខ្ពស់នៅតាមអង្គភាពទាំងនោះ។ការណ៍នេះអាចធ្វើឱ្យបណ្តាក្រុមហ៊ុនថៃក្នុងស្រុកពិបាកប្រកួតប្រជែង។

លោក Sunthorn Sathaporn នាយកគ្រប់គ្រងក្រុមហ៊ុន Sathaporn Estate បានអះអាងថា បណ្តាអ្នកអភិវឌ្ឍន៍ថៃកំពុងប្រឈមមុខនឹងការប្រកួតប្រជែងកាន់តែខ្លាំងពីបណ្តាក្រុមហ៊ុនបរទេស ជាពិសេសក្រុមហ៊ុនមកពីប្រទេសចិន។

លោកបានចង្អុលបង្ហាញថា បណ្តាក្រុមហ៊ុនអភិវឌ្ឍន៍អចលនទ្រព្យចិនកំពុងឈានជើងចូលប្រទេសថៃដើម្បីសាងសង់គម្រោងលំនៅដ្ឋានសម្រាប់លក់ ខណៈបណ្តាក្រុមហ៊ុនចិនធំៗកំពុងចាប់ដៃគូសហការជាមួយអ្នកអភិវឌ្ឍន៍ថៃ។

លោក Pornarit Chounchaisit ប្រធាន​សមាគម​អចលន​ទ្រព្យ​ថៃ បាន​ បាន​កត់​សម្គាល់​ថា ចាប់​តាំង​ពី​មាន​ការ​ផ្លាស់​ប្តូរ​គោល​នយោបាយ​ពាណិជ្ជកម្ម​របស់​សហរដ្ឋ​អាមេរិក លំហូរវិនិយោគផ្ទាល់ពីប្រទេស​ចិន​ចូល​ទៅ​កាន់ប្រទេស​ថៃ​បានកើនឡើងកាន់​តែ​ខ្លាំង។

ក្រៅពីជ្រើសរើសប្រទេសថៃធ្វើជាមូលដ្ឋានផលិតកម្ម និងការនាំចេញ ក្រុមហ៊ុនចិនទាំងនេះក៏កំពុងទិញដីសម្រាប់ការអភិវឌ្ឍន៍អចលនទ្រព្យផងដែរ។

លោក​បាន​បញ្ជាក់​ថា អ្នកធុរកិច្ច​ថៃ និង​រដ្ឋាភិបាល​ថៃត្រូវ​អនុវត្ត​ន៍វិធានការ​ឲ្យ​បាន​មុឺងម៉ាត់ដើម្បី​ដោះស្រាយ​បញ្ហា​នេះ ខណៈមានការកើនឡើងនៃចំនួនរោងចក្រចិនខុសច្បាប់ ដែលក្រសួងឧស្សាហកម្មកំពុងចុះត្រួតពិនិត្យ និងបញ្ជាឱ្យបិទទ្វារ៕ប្រភព: The Nation៕

ដោយ: គង់ លាងហួរ
អន្តរជាតិ: ភាពមិនច្បាស់លាស់នៃទស្សនវិស័យម៉ាក្រូសេដ្ឋកិច្ច អាចជះផលប៉ះពាល់លើទីផ្សារអចលនទ្រព្យរបស់ប្រទេសសិង្ហបុរីក្នុងរយៈពេល១២ខែបន្ទាប់។ នេះបើយោងតាមរបាយការណ៍របស់ក្រុមហ៊ុនប្រឹក្សាអចលនទ្រព្យ ​​CBRE។

ការថយចុះនៃអត្រាអតិផរណា និងការទម្លាក់អត្រាការប្រាក់ត្រូវបានគេរំពឹងថានឹងបន្តផ្តល់នូវសន្ទុះវិជ្ជមានមួយចំនួនដល់ទីផ្សារអចលនទ្រព្យសិង្ហបុរីក្នុងឆ្នាំ២០២៥នេះ។

ទោះជាយ៉ាងណាក្តី លោក Moray Armstrong នាយកគ្រប់គ្រងក្រុមហ៊ុន CBRE Singapore បានមានប្រសាសន៍ឱ្យដឹងថា ការរំពឹងទុកចំពោះការធ្លាក់ចុះនៃកំណើនសេដ្ឋកិច្ចសិង្ហបុរីនៅឆ្នាំ២០២៥អាចជះផលប៉ះពាល់ដល់តម្រូវការអចលនទ្រព្យ។

ជាក់ស្ដែង រដ្ឋាភិបាលនៃប្រទេសសិង្ហបុរីបានព្យាករណ៍ថា កំណើនសេដ្ឋកិច្ចរបស់ខ្លួននឹងកើនឡើងក្នុងចន្លោះពី១ភាគរយ ទៅ៣ភាគរយនៅឆ្នាំនេះ ថយចុះបើធៀបនឹងកំណើនសេដ្ឋកិច្ចក្នុងរង្វង់៤ភាគរយក្នុងឆ្នាំ២០២៤។

លោក Armstrong បានកត់សម្គាល់ថា កត្តាមួយចំនួនផ្សេងទៀត ដូចជាភាពតានតឹងផ្នែកភូមិសាស្ត្រនយោបាយ និងការឡើងកាន់អំណាចជាថ្មីរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ អាចជះឥទ្ធិពលលើទីផ្សារអចលនទ្រព្យសិង្ហបុរីក្នុងរយៈពេលខ្លី។

ប៉ុន្តែ បើទោះបីជាមានភាពមិនប្រាកដប្រជាបែបនេះយ៉ាងណាក្តី ក៏បណ្តាអ្នកវិនិយោគនៅតែមានឱកាសទាញយកផលចំណេញពីនិន្នាការដែលកំពុងរីកចម្រើន។

លោកស្រី Tricia Song ប្រធានផ្នែកស្រាវជ្រាវរបស់ក្រុមហ៊ុន CBRE ប្រចាំប្រទេសសិង្ហបុរី បានសម្តែងនូវសុទិដ្ឋិនិយមថា ជារួម ទីផ្សារអចលនទ្រព្យសិង្ហបុរីនៅតែមានសភាពរឹងមាំ ដោយសារការផ្គត់ផ្គង់ថ្មីនៅមានកម្រិត និងតម្រូវការមានស្ថិរភាព។

លោកស្រីបានព្យាករណ៍ថា ទីផ្សារអចលនទ្រព្យសិង្ហបុរីនឹងបន្តបង្ហាញពីស្ថិរភាព និងភាពធន់ ដែលអាចទាក់ទាញបណ្តាវិនិយោគិនមកពីជុំវិញពិភពលោក។

យោងតាមទិន្នន័យបង្ហាញថា ការលក់លំនៅដ្ឋានរបស់បណ្តាអ្នកអភិវឌ្ឍន៍អចលនទ្រព្យនៅប្រទេសសិង្ហបុរីនៅត្រីមាសទី៤ ឆ្នាំមុន បានកើនឡើង៣ដងដល់ចំនួន៣.៥១១យូនីតធៀបនឹងរយៈពេល៩ខែដំបូងនៃឆ្នាំ២០២៤ ខណៈតម្លៃផ្ទះបានកើនឡើង២,៣% ធៀបនឹងត្រីមាសទី៣។តួលេខនេះជាកំណើនប្រចាំត្រីមាសខ្ពស់បំផុតក្នុងឆ្នាំ២០២៤៕ប្រភព: Edgeprop៕

ដោយ: គង់ លាងហួរ
អន្តរជាតិ: ការសម្រេចរបស់រដ្ឋាភិបាលម៉ាឡេសុីក្នុងការបង្កើតតំបន់ហិរញ្ញវត្ថុពិសេស (SFZ) នៅក្នុងទីក្រុង Forest City ក្នុងរដ្ឋ Johor ជាការបោះជំហានដ៏សំខាន់មួយឆ្ពោះទៅរកការប្រែក្លាយខ្លួនជាមជ្ឈមណ្ឌលហិរញ្ញវត្ថុក្នុងតំបន់។

ដោយសារមានទីតាំងភូមិសាស្ត្រនៅជិតប្រទេសសិង្ហបុរី ដែលជាមជ្ឈមណ្ឌលហិរញ្ញវត្ថុឈានមុខគេទាំងក្នុងតំបន់ និងពិភពលោក ការបង្កើតនូវតំបន់ SFZ របស់ម៉ាឡេសុីបានក្លាយទៅជាការបំពេញបន្ថែមមួយ។

ការណ៍នេះអាចជំរុញឱ្យមានការកើនឡើងនូវតម្រូវការនៃការវិនិយោគ និងសេវាកម្មហិរញ្ញវត្ថុនៅក្នុងតំបន់ SFZ របស់ប្រទេសម៉ាឡេសុី។

លើសពីនេះទៀត ការដាក់ឱ្យដំណើរការតំបន់សេដ្ឋកិច្ចពិសេសរវាងរដ្ឋ Johor និងសិង្ហបុរី(JS-SEZ) បានជួយពង្រឹងសក្តានុពលរបស់តំបន់ SFZ សម្រាប់ការធ្វើសមាហរណកម្មសេដ្ឋកិច្ចក្នុងតំបន់។

លើសពីនេះ តំបន់ហិរញ្ញវត្ថុពិសេសក៏ផ្តល់នូវការលើកទឹកចិត្តផ្នែកពន្ធ និងការយកចិត្ដទុកដាក់លើនិរន្តរភាព ព្រមទាំងជំរុញបរិយាកាសវិនិយោគអំណោយផលសម្រាប់បណ្តាក្រុមហ៊ុនផ្តល់សេវាកម្មហិរញ្ញវត្ថុផ្សេងៗ ដូចជាក្រុមហ៊ុន fintech និងការិយាល័យគ្រួសារ។

ក្រុមអ្នកវិភាគនៅក្រុមហ៊ុន TA Securities អះអាងថា វិធានការទាំងនេះអាចជួយទាក់ទាញបុគ្គលដែលមានទ្រព្យសម្បត្តិស្តុកស្តម្ភចូលទៅកាន់តំបន់ហិរញ្ញវត្ថុពិសេស។

ការអនុគ្រោះពន្ធសម្រាប់ក្រុមអ្នកជំនាញបរទេស អាចជួយប្រមូលផ្តុំនូវធនធានមនុស្សមានទេពកោសល្យក្នុងប្រទេសម៉ាឡេសុី និងកាត់បន្ថយលំហូរធនធានមនុស្សចេញទៅក្រៅប្រទេសដើម្បីពង្រឹងបន្ថែមទៀតនូវប្រព័ន្ធអេកូហិរញ្ញវត្ថុរបស់តំបន់ SFZ។

ទោះជាយ៉ាងណាក្តី ក្រុមហ៊ុន TA Securities បានព្រមានថា បណ្តាធនាគារក្នុងស្រុកនឹងធ្វើការប្រកួតប្រជែងគ្នាកាន់តែខ្លាំងឡើង ខណៈធនាគារបរទេសដូចជាធនាគារសិង្ហបុរី UOB និងធនាគារចិន OCBC បានបើកសាខាចំនួន៧ទីតាំង រួចទៅហើយនៅក្នុងរដ្ឋ Johor៕ប្រភព: New Strait Times ៕