ថៃគ្រោងបើកច្រកទ្វារព្រំដែនចំនួន៤ បន្ថែមទៀតដើម្បីសម្រួលពាណិជ្ជកម្មទ្វេរភាគី

August 22, 2019

ប្រែសម្រួលដោយ ម៉ាណេត

បាងកកៈ លោក Weerasak Wangsuphakijkosol អនុរដ្ឋមន្រ្តីក្រសួងពាណិជ្ជកម្មថៃ បានបង្ហើបឲ្យដឹងថា ក្រសួងគ្រោងនឹងផ្តួចផ្តើមគម្រោងពាណិជ្ជកម្មមួយ ដែលមានឈ្មោះថា ”Nakorn Chaiburin Northeast Gateway to Global Communities” ដើម្បីសហការជាមួយនឹងកម្ពុជា ដើម្បីបើកទ្វារពាណិជ្ជកម្មនៅតាមខេត្តជាប់ព្រំដែនចំនួន៤។

លោកបានថ្លែងដូច្នេះ បន្ទាប់ពីដឹកនាំកិច្ចប្រជុំជាមួយភ្នាក់ងារ បុត្រសម្ព័ន្ធចំនួន៣ ដែលមាននាយកដ្ឋានចរចាពាណិជ្ជកម្ម នាយកដ្ឋានអភិវឌ្ឍន៍ពាណិជ្ជកម្ម និងនាយកដ្ឋានកម្មសិទ្ធិបញ្ញា ព្រមទាំងសហគ្រិនក្នុងស្រុកមកពីខេត្តនគររាជសីមា។ នេះបើយោងតាមកាសែត The Nation ចុះផ្សាយកាលពីពេលថ្មីៗនេះ។

គម្រោងនេះ មានគោលបំណងធ្វើការជាមួយប្រទេសកម្ពុជា ដើម្បីបើកទ្វារពាណិជ្ជកម្មនៅខេត្តចំនួន៤។

លោកបានមានប្រសាសន៍ថា “ខេត្តទាំងនេះ គឺមានខេត្តនគររាជសីមា ខេត្តឆៃយ៉ាភូមិ (Chaiyaphum) ខេត្ត បុរីរាម (Buri Ram) និងខេត្តសូរិន”។

លោក Weerasak បានបន្ថែមថា លោកបានប្រាប់នាយកដ្ឋានចរចាពាណិជ្ជកម្មឱ្យសហការជាមួយគណៈកម្មាធិការពាណិជ្ជកម្មចម្រុះថៃ- កម្ពុជា ដើម្បីរៀបចំគោលនយោបាយ ដែលជំរុញកិច្ចសហប្រតិបត្តិការរវាងប្រទេសទាំងពីរ និងបន្ធូរបន្ថយការរឹតត្បិតលើពាណិជ្ជកម្ម។

លោកបានមានប្រសាសន៍ថា ឧទាហរណ៍ យើងមានគម្រោងធ្វើឱ្យប្រសើរឡើងនូវតំបន់ ដែលត្រូវបានអនុញ្ញាតជាបណ្តោះអាសន្ន នៅតាមព្រំដែនបូរីរាម (Buri Ram) ទៅជាច្រកពាណិជ្ជកម្មអចិន្រ្តៃយ៍ ដែលនឹងមិនត្រឹមតែពង្រីកឱកាស នៅតាមព្រំដែនប៉ុណ្ណោះទេ ប៉ុន្តែថែមទាំងទាក់ទាញភ្ញៀវទេសចរឱ្យមកទស្សនាខេត្ត ដែលនៅក្បែរនោះទៀតផង។

លោកអនុរដ្ឋមន្ត្រីថៃក៏បានបន្ថែមទៀតថា គម្រោងនេះនឹងជួយពង្រីកទីផ្សារសម្រាប់ផលិតផលកសិកម្មសំខាន់ៗ ដូចជា ស្រូវ ស្វាយ ម្នាស់ ពោត និងក្រូចថ្លុង ក៏ដូចជាសិប្បកម្មធ្វើដោយដៃដូចជាសូត្រ Pakthongchai ជាដើម។

លោកបានមានប្រសាសន៍ថា “ខ្ញុំជឿជាក់ថាគម្រោង Nakorn Chaiburin នឹងនាំផលិតផលរបស់យើង ទៅជាតំបន់ពាណិជ្ជកម្មសេរីមួយ ដែលមានជោគជ័យបំផុតនៅលើពិភពលោក ដោយសារតម្លៃពាណិជ្ជកម្មរវាងថៃ និងកម្ពុជា ត្រូវបានប៉ាន់ប្រមាណថានឹងឈានដល់១៥ពាន់លានដុល្លារអាមេរិកនៅត្រឹមឆ្នាំ ២០២០”៕

រដ្ឋាភិបាលបញ្ចុះតម្លៃចុះបញ្ជីលេខរថយន្តគ្រួសារ និងរថយន្តធុនស្រាលថ្មី

August 22, 2019

0

ដោយ វុត្ថា

ភ្នំពេញៈ រដ្ឋាភិបាលតាមរយៈអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណៈការ និងដឹកជញ្ជូនបានឱ្យដឹង តម្លៃនៃលេខចុះបញ្ជីរថយន្តគ្រួសារ និងរថយន្តធុនស្រាលនឹងត្រូវអនុវត្តចាប់ពីថ្ងៃទី២៦ ខែសីហា ឆ្នាំ ២០១៩ ខាងមុខនេះ បន្ទាប់ពីសេចក្តីប្រកាសអន្តរក្រសួងស្ដីពី ការលក់លេខចុះបញ្ជីរថយន្តគ្រួសារ និងរថយន្តធុនស្រាលត្រូវបានសម្រេចថ្មីនៅថ្ងៃ ២២ ខែសីហាឆ្នាំ ២០១៩នេះ។

យោងតាមសេចក្តីជូនដំណឹងរបស់អគ្គនាយកដ្ឋានដឹកជញ្ជូន នៅថ្ងៃទី ២២ ខែសីហា ឆ្នាំ ២០១៩ នេះ ថា លេខចុះបញ្ជីរថយន្តគ្រួសារ និងរថយន្តធុនស្រាល ត្រូវបានដាក់លក់ជាសាធារណៈ តាមប្រព័ន្ធស្វ័យប្រវត្តកម្មចុះបញ្ជីយានជំនិះ ដោយបានកំត់តម្លៃថ្មីដូចជាតម្លៃមូលដ្ឋានក្នុងស៊េរីកំពុងចុះបញ្ជី តម្លៃមូលដ្ឋានក្នុងការផ្លោះស៊េរី និងបានចុះបញ្ជីតម្លៃស៊េរីមួយចំនួនតាមតំបន់នីមួយៗ ដូចបានកំណត់លម្អិតក្នុងប្រកាសនេះ។

សេចក្តីប្រកាសអន្តរក្រសួងស្ដីពី ការលក់លេខចុះបញ្ជីរថយន្តគ្រួសារ និងរថយន្តធុនស្រាល ដែលចុះហត្ថលេខាដោយរដ្ឋមន្ត្រីសេដ្ឋកិច្ច និងហិរញ្ញវត្ថុ និងក្រសួងសាធារណៈការ និងដឹកជញ្ជូនបានឱ្យដឹងថាចាប់ពីថ្ងៃទី២៦ សីហា ឆ្នាំ២០១៩ បងប្អូនប្រជាពលរដ្ឋអាចទិញ ឬជ្រើសរើសយកលេខមួយចំនួន ដែលនឹងធ្វើការបញ្ចុះថ្លៃដូចខាងក្រោម៖

– ថយចាប់ពី១ស៊េរី៖ បញ្ចុះថ្លៃ ៥០%

– ថយចាប់ពី២ស៊េរី៖ បញ្ចុះថ្លៃ ៧៥%

– ថយចាប់ពី៣ស៊េរី៖ បញ្ចុះថ្លៃ ៩០%

– ថយចាប់ពី៤ស៊េរី៖ បញ្ចុះថ្លៃ ៩៥%

– ថយចាប់ពី ៥ស៊េរីទៅ៖ បញ្ចុះថ្លៃ ១០០% (មិនគិតថ្លៃ)។

លោកស្រី កុយ សុដានី រដ្ឋលេខាធិការក្រសួងសាធារណការ និងដឹកជញ្ជូនបានឱ្យដឹងកាលពីម្សិលមិញនេះថា ការកែសម្រួលលើតម្លៃលេខមួយចំនួន និងផ្តល់ជូននូវការបញ្ចុះតម្លៃ ក្រសួងបានចេញនូវប្រកាសអន្តរក្រសួងថ្មីលេខ.៦៨៦ សហវ.ប្រក ស្តីពីការលក់លេខចុះបញ្ជីរថយន្ត គ្រួសារ និងរថយន្តធុនស្រាលចុះថ្ងៃទី២៣ ខែកក្កដា ឆ្នាំ២០១៩ ដែលនឹងត្រូវអនុវត្តនៅថ្ងៃទី២៦ ខែសីហា ឆ្នាំ២០១៩ ដើម្បីប្រមូលចំណូល មិនមែនសារពើពន្ធបង្កើនចំណូលរដ្ឋបន្ថែម និងដើម្បីផ្តល់ជម្រើសកាន់តែសំបូបែបជូនប្រជាពលរដ្ឋ។

រដ្ឋាភិបាលតាមរយៈក្រសួងសាធារណៈការ និងដឹកជញ្ជូន បានប្រមូលចំណូលពីការលក់លេខចុះបញ្ជីររថយន្តគ្រួសារ និងរថយន្តធុនស្រាលកើនឡើងចំនួន ៦១.២៩% គិតត្រឹមខែ កក្កដាឆ្នាំ២០១៩ ធៀបនឹងរយៈពេលដូចគ្នាឆ្នាំ២០១៨៕

អ្នកជំនាញនិយាយពីស្ថានភាពទីផ្សារលំនៅដ្ឋានក្នុងឆ្នាំ២០១៩ ខណៈការលក់ជួបការធ្លាក់ចុះ

August 22, 2019

0

ដោយៈ រ៉ាណេត

ភ្នំពេញៈ តាមទិដ្ឋភាពជាក់ស្ដែងនៅពេលបច្ចុប្បន្ននេះ គេឃើញមានបណ្តុំសំណង់លំនៅដ្ឋានមួយចំនួន បានបង្ហាញពីសភាពទ្រឹងរបស់ខ្លួន ហាក់មិនសូវមានទីផ្សារលើការលក់ដូចកាលពី២ ទៅ៣ឆ្នាំមុននោះឡើយ។ រួបភាពទាំងនេះ ត្រូវបានអ្នកវិភាគមួយចំនួនលើកឡើងថា គឺបណ្តាលមកពីការផ្គត់ផ្គង់សម្រុករួមគ្នាក្នុងពេលតែមួយ ខណៈដែលតម្រូវការហាក់មិនទាន់មានលទ្ធភាពគ្របគ្រាន់សម្រាប់ទទួលយក។

អគ្គនាយកក្រុមហ៊ុនអចលនទ្រព្យ Century 21 Dream Property លោក គាម សៀកឡុង បានមានប្រសាសន៍ប្រាប់តាមទូរស័ព្ទនៅរសៀលថ្ងៃទី២២ ខែសីហា នេះថា ផ្អែកតាមការមើលជាក់ស្ដែងរបស់លោក សម្រាប់ទីផ្សារលំនៅដ្ឋាននៅក្នុងឆ្នាំ២០១៩នេះ ពិតជាមានការធ្លាក់ចុះបន្តិចមែន ប៉ុន្តែវាមិនមែនជាវិបត្តិនៃវិស័យមួយនេះនោះទេ។ លោកបានបន្តថា “តម្រូវការពិតប្រាកដនៅពេលបច្ចុប្បន្ននេះ គឺប្រភេទលំនៅដ្ឋានកម្រិតក្រោមមធ្យម ដែលពលរដ្ឋខ្មែរភាគច្រើនអាចមានលទ្ធភាព ក្នុងការទទួលយកតាមរយៈការទិញដោយបង់ផ្ដាច់ ឬតាមរយៈការបង់រំលោះជាមួយធនាគារជាដើម”។

លោកបានបន្តទៀតថា “តាមការមើលឃើញរបស់ខ្ញុំ ចំពោះលំនៅដ្ឋានដែលនៅទ្រឹងពេលនេះ ជាប្រភេទលំនៅដ្ឋានកម្រិតមធ្យម ដោយសារតែភាគច្រើនត្រូវបានអ្នកមានធនធាន ទិញទុកវិនិយោគបន្តដើម្បីទទួលបានចំណេញ ដែលវាមិនមែនជាតម្រូវការពិតប្រាកដនោះទេ”។ លោកថា “នៅពេលមានការទិញទុកវិនិយោគកាន់តែច្រើន អ្នកចូលរួមនៅក្នុងវិស័យមួយនេះ កើនឡើងច្រើនក្នុងពេលតែមួយ វានឹងរួមចំណែកក្នុងការកាត់ចំណែកទីផ្សារ ខណៈដែលចំនួននៃតម្រូវការមានកម្រិត”។

ជាមួយគ្នានេះ លោក គាម សៀកឡុង បានបង្ហាញពីក្ដីរំពឹងថា បើទោះជានៅត្រឹមមាសទី៣នៃឆ្នាំ២០១៩នេះ សកម្មភាពនៃការទិញ-លក់ សំណង់លំនៅដ្ឋានមានឱនភាពបន្តិច ប៉ុន្តែលោកជឿថា នៅឆ្នាំបន្ទាប់ចំណុចអសកម្មទាំងនេះ នឹងមានភាពល្អប្រសើរឡើងវិញ ស្របពេលដែលក្រុមហ៊ុនអភិវឌ្ឍមួយចំនួន បាននិងកំពុងរកវិធីសាស្ត្រក្នុងការលក់។

អ្នកវិភាគសេដ្ឋកិច្ចឯករាជ្យកម្ពុជា លោក ង៉ែត ជូ បានលើកឡើងថា សម្រាប់វិស័យលំនៅដ្ឋាននៅក្នុងឆ្នាំ២០១៩នេះ គឺមានឱនភាពជាងឆ្នាំកន្លងទៅ។ លោកបានបន្តទៀតថា ការឱនភាពនៃវិស័យលំនៅដ្ឋាននាពេលបច្ចុប្បន្ននេះ មិនមែនបណ្តាលមកពីការទទួលរងនូវឥទ្ធិពលវិបត្តិសេដ្ឋកិច្ចរបស់ប្រទេសចិននោះទេ ប៉ុន្តែគឺបណ្តាលមកពីសកម្មភាពអភិវឌ្ឍផ្ទាល់នៅក្នុងប្រទេស។

លោកបានបន្តទៀតថា “ជាការពិត ប្រជាពលរដ្ឋខ្មែរនៅមានតម្រូវការលំនៅដ្ឋានសម្រាប់ស្នាក់នៅសមរម្យផ្ទាល់ខ្លួនជាច្រើនម៉ឺនខ្នង ប៉ុន្តែដោយសារតែការផ្គត់ផ្គង់កើតមានយ៉ាងគំហុកក្នុងពេលតែមួយ ទើបបង្កឱ្យតម្រូវការមិនមានលទ្ធភាពគ្រប់គ្រាន់ ក្នុងទទួលយក”។

លោកង៉ែត ជូ បានបញ្ជាក់ថា បើទោះជាប្រភេទលំនៅដ្ឋានកម្រិតមធ្យម និងក្រោមមធ្យមគឺជាគោលដៅរបស់ប្រជាពលរដ្ឋខ្មែរ ប៉ុន្តែពួកគេភាគច្រើននៅមិនទាន់មានលទ្ធភាពក្នុងការទិញទាំងស្រុងនៅឡើយ ដោយសារតែបញ្ហាចំណូលរបស់ពួកគាត់នៅមានកម្រិតនៅឡើយ ហើយវាតម្រូវឱ្យចំណាយពេលយូរបន្តិចទៀត ដើម្បីមានលទ្ធភាពគ្រប់គ្រាន់ក្នុងចំណាយទិញលំនៅដ្ឋានទាំងអស់នោះ។ ទោះជាយ៉ាងណា លោកក៏បានបង្ហាញពីក្ដីសាទរចំពោះសមិទ្ធផលនៃវិស័យសំណង់ និងវិស័យលំនៅដ្ឋានដែលមានភាពរីកចម្រើនក្នុងរយៈពេលដ៏ខ្លី។

ទោះជាយ៉ាងណាលោកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបាមសម្តែងសុទិដ្ឋិនិយមថា ទីផ្សារលំនៅដ្ឋាននៅឆ្នាំ២០១៩នេះ មិនមានបញ្ហាចោទអ្វីនោះទេ ដោយសារតម្រូវការនៅតែកើនឡើង ហើយប្រាក់ចំណូលរបស់ប្រជាពលរដ្ឋក៏បាននិងកំពុងកើនឡើង។

លោកបន្តថា “ដោយសារស្ថានភាពនយោបាយ សេដ្ឋកិច្ចបន្តរីកចម្រើន និងកំនើនប្រាក់ចំណូលរបស់ប្រជាពលរដ្ឋ ខ្ញុំគិតថាទីផ្សារលំនៅដ្ឋាននៅតែបន្តមានភាពវិជ្ជមានបន្តទៀត”៕

ជប៉ុនគ្រោងសាងសង់អគារកប់ពពកថ្មីក្នុងតម្លៃ ៧៥០០លានដុល្លារអាមេរិក

August 22, 2019

0

ដោយ វុត្ថា

ភ្នំពេញៈ ក្រុមហ៊ុន Mori Building Co,.Ltd បានប្រកាសចំណាយថវិកាប្រមាណ ៧,៥ពាន់លានដុល្លារ សម្រាប់គម្រោងសាងសង់អគារខ្ពស់កប់ពពក ដើម្បីបង្កើតទីក្រុងមួយនៅក្នុងទីក្រុងទីតូក្យូ ដែលមានអ្វីៗគ្រប់យ៉ាងចាប់ពីការិយាល័យ សណ្ឋាគារប្រណីតសាលារៀន និងសួនបន្លែជាដើម។

ក្រុមហ៊ុនអភិវឌ្ឍន៍របស់ជប៉ុន “Hills” បានឱ្យដឹងនៅថ្ងៃទី២២ សីហាឆ្នាំ ២០១៩ នេះ ថា គម្រោងនេះនឹងត្រូវសាងសង់នៅក្នុងចុងខែនេះ លើគម្រោងអភិវឌ្ឍន៍ចាស់ Toranomon-Azabudai នៅជិតស្រុកRoppongi ដោយចំណាយថវិកាប្រមាណ៥៨០ ពាន់លានយ៉េន ស្មើ៧,៥ ពាន់លានដុល្លារ ហើយនឹងបញ្ចប់នៅខែមីនាឆ្នាំ២០២៣។

គម្រោងដែលមិនទាន់ត្រូវបានគេដាក់ឈ្មោះជាផ្លូវការនេះ នឹងរួមបញ្ចូលនៅអគារចំនួន៣ ដែលអាចទទួលបុគ្គលិកការិយាល័យប្រហែល២០.០០០នាក់ និងអ្នកស្នាក់នៅ ៣.៥០០នាក់។ អគាមួយក្នុងចំណោមនេះ នឹងមានកំពស់៦៤ជាន់ ស្មើនឹង៣៣០ម៉ែត្រ។

មជ្ឈមណ្ឌលពាណិជ្ជកម្មលំដាប់ពិភពលោកនេះ នឹងរៀបចំឱ្យមានសាលាអង់គ្លេសនៅទីក្រុងតូក្យូ ដែលអាចទទួលនិស្សិតបានប្រមាណ៧០០នាក់ ដើម្បីទាក់ទាញក្រុមហ៊ុនមកពីភពលោក និងកម្មករនៅក្រៅប្រទេស។ ជាមួយគ្នានេះ នឹងមានសណ្ឋាគារទំនើប ផ្សារចំណីអាហារដ៏ធំ សារមន្ទីរ និងវិចិត្រសាល និងកន្លែងវេជ្ជសាស្ត្រដើម្បីលើកកម្ពស់សុខភាពផងដែរ។

គម្រោងនេះបង្ហាញពីភាពសុទិដ្ឋិនិយម របស់អ្នកអភិវឌ្ឍន៍នៅក្នុងទីក្រុងតូក្យូហួសពីព្រឹត្តិការណ៍អូឡាំពិកឆ្នាំ២០២០។

ទិន្នន័យពីវិទ្យាស្ថានអចលនទ្រព្យជប៉ុនបានបង្ហាញថា តម្លៃដីធ្លីជាមធ្យមនៅក្នុងតំបន់ទីក្រុង មានតម្លៃខ្ពស់បំផុតចាប់តាំងពីមានវិបត្តិហិរញ្ញវត្ថុឆ្នាំ២០០៨ ដោយសារសេដ្ឋកិច្ចបានងើបឡើងវិញ ហើយគម្រោងសាងសង់ និងហេដ្ឋារចនាសម្ព័ន្ធប្រមូលផ្តុំគ្នានៅក្នុងទីក្រុងតូក្យូនៅឆ្នាំ២០២០៕

ខុនដូដ៏ទាន់សម័យ AXIS Residence ចាប់ផ្តើមស្វាគមន៍អតិថិជនចូលរស់នៅ

August 22, 2019

0

ដោយៈ រ៉ាណេត

ភ្នំពេញៈ បន្ទាប់ពីដំណើរការសាងសង់យ៉ាងសកម្ម អស់រយៈពេលជាង៣ឆ្នាំខុនដូ AXIS Residences ដែលជាខុនដូដ៏ទំនើប និងទាន់សម័យយ៉ាងប្រណីតភាព តាមបែប ស្តង់ដាប្រទេសសិង្ហបុរី លើកដំបូងគេបង្អស់នៅកម្ពុជា បានចាប់ផ្តើមបើកទ្វារស្វាគមន៍វត្តមានរបស់បណ្តាអតិថិជននានា ចូលរស់នៅប្រកបដោយផាសុកភាពខ្ពស់ ជាមួយនឹងតម្លៃសមរម្យជាទីបំផុត។

អ្នកជំនាញនៅក្នុងវិស័យមួយនេះបានអះអាងថា ការសម្រេចចិត្តជ្រើសរើសរស់នៅក្នុងលំនៅដ្ឋានសហកម្មសិទ្ធិ ឬហៅថាខុនដូ គឺជារឿងត្រឹមត្រូវបំផុតសម្រាប់មនុស្សសម័យថ្មី ដែលក្រៅពីបង្ហាញពីភាពស៊ីវិស័យ ថែមទាំងបានផ្តល់ក្ដីសុខ និងសុវត្ថិភាពដល់ខ្លួនឯង និងមនុស្សជាទីស្រលាញ់របស់ខ្លួនផងដែរ។

ប្រធានផ្នែកលក់ប្រចាំនៅក្រុមហ៊ុនអចលនទ្រព្យ ស្លឹកឫទ្ធិ រៀលធី លោក ណុំ សុខរ៉ា បានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី២២ ខែសីហា ឆ្នាំ២០១៩ នេះថា ស្របពេលដែលនិន្នាការនៃការរស់នៅរបស់ប្រជាជនខ្មែរ បានចាប់ផ្តើមងាកមករកលំនៅដ្ឋានបែបសហសម័យ ពេលនេះសំណង់ខុនដូ AXIS Residences បណ្តោយផ្លូវ ២០០៤ សង្កាត់ទឹកថ្លា ខណ្ឌសែនសុខ រាជធានីភ្នំពេញ បានបញ្ចប់ការសាងសង់ហើយ និងកំពុងតែស្វាគមន៍វត្តមានអតិថិជនរបស់ខ្លួនចូលរស់នៅ ប្រកបដោយផាសុកភាពខ្ពស់ និងសុវត្ថិភាពជាទីបំផុត។

លោកបានបន្តទៀតថា បច្ចុប្បន្ននេះខុនដូ AXIS Residences បានបើកយ៉ាងទូលាយសម្រាប់អតិថិជន ដែលចង់ចូលរស់នៅក្នុងសំណង់ខុនដូដ៏ទំនើបមួយនេះ”។ លោកបានបន្តទៀតថា “ក្រៅពីអតិថិជនដែលជាអ្នកទិញ សម្រាប់លំនៅដ្ឋានផ្ទាល់ខ្លួន និងក្រុមគ្រួសារនោះ សម្រាប់អតិថិជនដែលមិនទាន់មានលទ្ធភាពទិញ ក៏អាចចូលមករស់នៅក្នុងខុនដូលំដាប់ស្ដង់ដា របស់ប្រទេសសិង្ហបុរីមួយនេះបានដែរ ដោយការជួលជាប្រចាំខែ និងជាប្រចាំឆ្នាំ ជាមួយនឹងតម្លៃសមរម្យ។

លោកបានបន្តទៀតថា “ខុនដូ AXIS Residences បានផ្តល់ភាពងាយស្រួលជាច្រើនសម្រាប់អតិថិជនដែលស្នាក់នៅដោយការជួល ជាមួយនឹងល័ក្ខខ័ណ្ឌនៃការបង់ប្រាក់ប្រចាំខែនីមួយៗយ៉ាងសាមញ្ញជាទីបំផុត”។

លោកណុំ សុខរ៉ា បានបញ្ជាក់ពីភាពល្អប្រសើរ ដែលទទួលបានពីការរស់នៅក្នុងខុនដូថា “ការរស់នៅខុនដូ គឺជាបែបបទនៃការរស់នៅមួយ ដែលមានភាពស៊ីវិល័យ និងទាន់សម័យ ដោយសារខុនដូអាចមានអ្វីៗសព្វបែបយ៉ាង ដូចជា កន្លែងរស់នៅមួយដែលមានភាពសុខុដុមរមនា ទំនើប និងទាន់សម័យ មានផ្សារទំនើប មានកន្លែងហាត់ប្រាណ ស្ទីម សូណា អាងហែលទឹក សួនច្បារកម្សាន្ត មានប្រព័ន្ធការពារសុវត្ថិភាពខ្ពស់ជាដើម” ។

នៅក្នុងអគារខុនដូ AXIS Residences មានឧបករណ៍ប្រើប្រាស់ជាច្រើនដូចជា កន្លែងអង្គុយលេង កន្លែងសម្រាប់និទានរឿងឱ្យក្មេងស្តាប់ បន្ទប់សម្រាប់ក្មេងលេងនៅក្នុងអគារ បន្ទប់សម្រាប់ក្មេងលេងនៅខាងក្រៅអគារ បន្ទប់បម្រើឱ្យការប្រើប្រាស់ជាច្រើន បន្ទប់សម្រាប់លេងល្បែងកម្សាន្ត ទីធ្លាដែលមានទឹកសម្រាប់ក្មេងលេង អាងហែលទឹកសម្រាប់ក្មេង ផ្ទះតូចក្បែរអាងហែលទឹក។ ក្រៅពីនេះ នៅមានកន្លែងអង្គុយលេងជិតអាងហែលទឹក អាងមុជទឹកធម្មជាតិប្រវែង៥០ម៉ែត្រ អាងហែលទឹកប្រវែង៥០ម៉ែត្រ កន្លែងកម្សាន្ត និងអាំងសាច់ទទួលទានលក្ខណៈគ្រួសារ កន្លែងផ្លាស់សម្លៀកបំពាក់ កន្លែង ហាត់កីឡាទាំងក្នុង និងក្រៅអគារ កន្លែងគេងហាលថ្ងៃ ទីលានលេងកីឡាបាល់បោះ ទីលានកីឡាវាយតែននីស សួនច្បារទេសភាពដ៏ស្អាត រួមជាមួយនឹងទីធ្លាចំណតរថយន្តធំទូលាយរហូតដល់៦ជាន់ថែមទៀតផង។

សំណង់ខុនដូ AXIS Residences ដែលមានរចនាបទបែបទីក្រុងសិង្ហបុរី ទទួលបានវិញ្ញាបនបត្របញ្ជាក់ពីគុណភាព និងកម្រិតសោភ័ណភាពបៃតង មាន៨អគារ ស្មើនឹងជាង៥៦០យូនីត ដែលមានទីតាំងស្ថិតនៅ បណ្តោយផ្លូវ២០០៤ សង្កាត់ទឹកថ្លា ខណ្ឌសែនសុខ រាជធានីភ្នំពេញ បច្ចុប្បន្ននេះបានបញ្ចប់ការសាងសង់រួចរាល់ហើយ។

សម្រាប់ព័ត៌មានបន្ថែមអាចទាក់ទងបាន តាមរយៈទូរស័ព្ទលេខ ៖ ០៩២ ២១ ៦៦ ៥៥៕

ប្រជាជនសឹង្ហបូរីរិះគន់ប្រាក់ខែ ២លានដុល្លារ របស់នាយករដ្ឋមន្ត្រី ខណៈសេដ្ឋកិច្ចកំពុងជួបវិបត្តិ

August 22, 2019

0

ដោយ Donald Lee

សឹង្ហបូរី៖ ប្រជាជនសឹង្ហបូរីមានការចាប់អារម្មណ៍ កាន់តែខ្លាំងឡើងលើប្រធានបទប្រាក់ខែដ៏ច្រើន របស់នាយករដ្ឋមន្រ្តីសឹង្ហបូរីលោកលី សៀនឡុង និងតួនាទីរបស់លោកស្របពេលសេដ្ឋកិច្ចរបស់ប្រទេសនេះកំពុងដាំក្បាលចុះ។

មេដឹកនាំសឹង្ហបូរីរូបនេះ ទទួលបានប្រាក់ខែខ្ពស់ជាងគេគឺជិត២លានដុល្លារ ក្នុងមួយឆ្នាំ បើធៀបជាមួយសមភាគីរបស់លោក នៅតាមបណ្តាប្រទេសនានាជុំវិញពិភពលោក។ បើប្រៀបធៀបប្រធានាធិបតីអាមេរិក លោក Donald Trump គឺទទួលបានប្រហែល ៤០ម៉ឺនដុល្លារក្នុងមួយឆ្នាំប៉ុណ្ណោះ។

សកម្មជនសឹង្ហបូរី លោក Roy Ngerng Yi Ling បានបង្កភាពវឹកវរនៅក្នុងប្រទេសកាលពីខែមុន នៅពេលដែលលោកបានរិះគន់ លើបណ្តាញសង្គមហ្វេសប៊ុករបស់លោកនាយករដ្ឋមន្រ្តី ដែលជំរុញឱ្យលោកលី យល់ពីអារម្មណ៍របស់ប្រជាជនក្រីក្រ។

លោកនាយករដ្ឋមន្រ្តីសឹង្ហបុរី ក៏ធ្លាប់បានអត្ថាធិប្បាយ លើខ្សែភាពយន្ដខ្លីមួយអំពីជីវិតរបស់អ្នកក្រដែលកំពុងធ្វើការ ខណៈលោកកំពុងតែមានប្រាក់ខែដ៏ច្រើន។

លោកនាយករដ្ឋមន្រ្តីលី សៀនឡុង ធ្លាប់បានសរសេរលើបណ្តាញទំនាក់ទំនងសង្គមរបស់លោកផងដែរថា “មុនពេលដែលអ្នកវិនិច្ឆ័យមនុស្សម្នាក់ អ្នកត្រូវដើរមួយម៉ាយក្នុងស្បែកជើងរបស់ពួកគេ។ តើអ្នកអាចចំណាយពេលមួយថ្ងៃ ដើម្បីសំអាតចាននៅកន្លែងធ្វើសក់ ដើម្បីយល់ពីការងាររបស់អ្នកបោសសំអាតឬទេ?”។

សកម្មជនរូបនេះ បានឆ្លើយតបជាមួយនឹងការបង្ហោះដ៏វែងមួយ អំពីគម្លាតប្រាក់ឈ្នួលរបស់ប្រទេសសឹង្ហបូរី និងប្រាក់ឈ្នួលអប្បបរមា ដែលនឹងគ្របដណ្តប់លើការចំណាយរបស់មនុស្សដែលធ្វើការ។

លោកបានសួរថា “តើលោកនាយករដ្ឋមន្រ្តីលី ធុញទ្រាន់នឹងដើរក្នុងស្បែកជើងរបស់យើងឬ”?។

លើសពីនេះទៀត ការបង្ហោះមួយទៀតនៅលើវេទិកាប្រព័ន្ធផ្សព្វផ្សាយ ដែលមានចំណងជើងថា “ហេតុអ្វីបានជាប្រាក់ខែរបស់នាយករដ្ឋមន្រ្តីសឹង្ហបូរីខ្ពស់ដូច្នេះ?” បានចេញផ្សាយកាលពីខែមុន។ ការចេញផ្សាយនេះ បានធ្វើការប្រៀបធៀបប្រាក់ខែរបស់លោកនាយករដ្ឋមន្រ្តី ជាមួយអ្នកដឹកនាំ និងនាយកប្រតិបត្តិពិភពលោកផ្សេងៗទៀត។

អត្ថបទនេះ បានជំរុញឱ្យភរិយារបស់លោកនាយករដ្ឋមន្រ្តីលី សៀនឡុង គឺលោកស្រី Ho Ching ឆ្លើយតបនៅលើគណនីហ្វេសប៊ុករបស់នាង និងការពារប្រាក់ចំណូលប្តីរបស់លោកស្រី។

លោកស្រីបានបញ្ជាក់ថា “មេដឹកនាំផ្សេងទៀតទទួលបានអត្ថប្រយោជន៍ ឥតគិតថ្លៃដូចជាអ្នកបម្រើ និងជាងកាត់សក់ ដែលមេដឹកនាំសឹង្ហបូរីមិនមាននោះទេ”។

លោកស្រីបានសរសេរថា “ភាគច្រើនបើមិនទាំងអស់ទេ ប្រទេសដទៃទៀត [មេដឹកនាំ] នឹងមានឥទិ្ធពលជាច្រើនទៀត ក្នុងអាណត្តិការិយាល័យដូចជា អ្នកបម្រើ និងជាងកាត់សក់ ការហោះហើរដោយឥតគិតថ្លៃ លើក្រុមហ៊ុនអាកាសចរណ៍ជាតិ សូម្បីតែថ្ងៃសម្រាកគ្រួសារជាដើម ហើយមេដឹកនាំមួយចំនួន ដូចជា មេដឹកនាំអាមេរិក ពួកគេក៏នៅតែទទួលបានសិទ្ធិខាងលើ បន្ទាប់ពីបញ្ចប់អាណត្តិរបស់ខ្លួន”។

ការស៊ើបអង្កេតអំពីប្រាក់ខែរបស់លោកនាយករដ្ឋមន្រ្តី បានកើតមានឡើង ខណៈលោកកំពុងត្រូវបានគេរិះគន់កាន់តែខ្លាំងឡើង។

រដ្ឋាភិបាលសឹង្ហបូរីបានព្យាករណ៍ ពីអត្រាកំណើនផលិតផលសរុបក្នុងស្រុករបស់ខ្លួននៅឆ្នាំនេះថា នឹងធ្លាក់ចុះតដល់ជិតសូន្យភាគរយ ហើយមានមតិឯកភាពភាគច្រើនក្នុងចំណោមអ្នកសេដ្ឋកិច្ចថា ប្រទេសតូចមួយនេះកំពុងមានវិបត្តិសេដ្ឋកិច្ចរួចទៅហើយ។

ការរិះគន់របស់លោកនាយករដ្ឋមន្រ្តី បានស្តីបន្ទោសដល់កង្វះខាតលើកំណែទម្រង់សេដ្ឋកិច្ចរបស់លោកនាយករដ្ឋមន្រ្តី ដែលជាបុព្វហេតុចម្បងនៃការធ្លាក់ចុះនៃសេដ្ឋកិច្ច ខណៈសង្គ្រាមពាណិជ្ជកម្មអាមេរិក ចិន បាននិងកំពុងរំខានដល់សង្វាក់ផ្គត់ផ្គង់សាកល និងផលិតកម្មដែលជាកម្លាំងស្នូលនៃសេដ្ឋកិច្ចរបស់សឹង្ហបូរី៕

ក្រុមហ៊ុនយក្សឥណ្ឌា SRAM & MRAM នឹងជួយពង្រឹងប្រព័ន្ធដឹកជញ្ជូនសាធារណៈនៅកម្ពុជា

August 22, 2019

0

ដោយ ប៊ី

ភ្នំពេញៈ ក្រុមហ៊ុនលំដាប់យក្សឥណ្ឌាSRAM & MRAM សហការជាមួយក្រុមហ៊ុន ELPRO Automobiles Pvt. Ltd., India បានផ្តួចផ្តើមពិភាក្សាជាមួយកម្ពុជា ដើម្បីពង្រឹងប្រព័ន្ធដឹកជញ្ជូនសាធារណៈ ដោយណែនាំឡានក្រុងប្រភេទEVថ្មី ចំនួន២០០០គ្រឿងដោយមិនគិតថ្លៃ។ នេះបើយោងតាមការចុះផ្សាយរបស់គេហទំព័រ The Week កាលពីម្សិលមិញ។

ក្រុមហ៊ុន SRAM និង MRAM នឹងផ្តល់ជំនួយហិរញ្ញវត្ថុសម្រាប់គម្រោងទាំងមូលចាប់ពីដំបូង ហើយនឹងចាប់ផ្តើមដាក់ដំណើរការឡានក្រុងចំនួន៥០គ្រឿង ដែលមួយគ្រឿងៗមានកន្លែងអង្គុយ៣៣ដែលត្រៀមរួចជាស្រេច ក្នុងរយៈពេល២ឆ្នាំគិតចាប់ពីថ្ងៃដែលបានព្រមព្រៀងជាមួយរដ្ឋាភិបាលកម្ពុជា។

ក្រុមហ៊ុន ELPRO តាមរយៈក្រុមហ៊ុនបុត្រសម្ព័ន្ធខ្លួន CSEPEL Holding Nyrt ដែលមានមូលដ្ឋាននៅហុងគ្រី នឹងនាំមកនូវការវិនិយោគចាំបាច់ ដែលមានទឹកប្រាក់ចំនួន១ ពាន់លានដុល្លារអាមេរិក ដើម្បីបង្កើតអង្គភាពដំឡើងជាច្រើននៅទូទាំងតំបន់អាស៊ី រួមមានឥណ្ឌា មីយ៉ាន់ម៉ា និងកម្ពុជាក្នុងរយៈពេល៥ឆ្នាំខាងមុខ។

លោកអូស្មាន ហាស្សាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈនៃព្រះរាជាណាចក្រកម្ពុជា បានមានប្រសាសន៍ក្នុងសេចក្តីថ្លែងមួយថា លោកយកចិត្តទុកដាក់ លើការផ្លាស់ប្តូរស្ថានភាពដឹកជញ្ជូននៅកម្ពុជា ហើយកំពុងទន្ទឹងរង់ចាំការចូលរួមឯកជនដើម្បីនាំប្រទេសកម្ពុជាឆ្ពោះទៅមុខ។

លោកក៏បានបន្ថែមទៀតថា គំនិតផ្តួចផ្តើមបែបនេះ ក៏នឹងជួយដល់សេដ្ឋកិច្ចកម្ពុជាឱ្យរីកចម្រើនទៅមុខដែរ។

ជាផ្នែកមួយនៃគម្រោងនេះ ក្រុមហ៊ុន SRAM និង MRAM និងក្រុមហ៊ុន ELPRO នឹងរៀបចំខ្សែបណ្តាញដំឡើងមួយនៅកម្ពុជា ដើម្បីផលិតឡានក្រុងចាំបាច់សម្រាប់ការប្រើប្រាស់ដោយខ្លួនឯង ហើយផលិតផលសម្រេចអាចត្រូវបាននាំចេញ តាមរយៈគំនិតផ្តួចផ្តើមអាជីវកម្មសកលលោក ទាំងក្រុមហ៊ុន SRAM, MRAM និងក្រុមហ៊ុន ELPRO។

គំនិតផ្តួចផ្តើមនេះ នឹងផ្តល់ការងារដល់ការងារដែលមានជំនាញនិងជំនាញមិនមានជំនាញមិនតិចជាង១ម៉ឺននាក់ដល់ប្រជាជនកម្ពុជា ហើយក៏ជួយបង្កើតឥណទានចាំបាច់ដែលរដ្ឋាភិបាលអាចធ្វើពាណិជ្ជកម្ម ក្នុងគណៈកម្មការថាមពលកកើតឡើងវិញ (REC)៕

ក្រុមហ៊ុន U.T.G UTRUST INVESTMENT CO., LTD បើកលក់ដីឡូត៍នៅតំបន់កំពុងមានសក្តានុពល

August 22, 2019

0

ដោយគង់ សូរិយា

ភ្នំពេញៈ ស្របពេលការអភិវឌ្ឍកាន់តែពង្រីកទៅតំបន់ជាយក្រុងភ្នំពេញ តំបន់ភាគខាងលិចឆៀងខាងជើងក្រុងភ្នំពេញ បាននិងកំពុងពង្រីកសក្តានុពលលើការអភិវឌ្ឍលំនៅដ្ឋាននិងដីឡូត៍ ដែលផ្តល់ផលប្រយោជន៍រយៈពេលវែងដល់ប្រជាជនមានជីវភាពមធ្យម។

ជាមួយនឹងកាលានុវត្តន៍ភាពនេះ ក្រុមហ៊ុន UTG UTRUST INVESTMENT Co, Ltd បានពង្រីកគំរោងទី១១របស់ខ្លួន ស្ថិតនៅភូមិក្រាំងទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ។

គំរោងដែលមានទីតាំងនៅតំបន់ ដែលនឹងមានរោងចក្រ សហគ្រាសរាប់រយរើចេញពីតំបន់កណ្តាលក្រុង តាំងនៅនាពេលអនាគត និងកំនើនប្រជាជនកើនឡើងយ៉ាងឆាប់រហ័សនេះ មានទំហំផ្ទៃដីសរុបមានចំនួន 70ហិចតា ដែលបាននិងកំពុងបំបែកជាឡូត៍ទំហំ 5X20m នឹង 10X20m សរុបប្រហែលជិត 4000ឡូត៍។

ទីតាំងដីឡូត៍ ដែលនឹងផ្តល់ផលចំណេញសំរាប់អតិថិជន ដែលអាចសាងសង់ផ្ទះជួល និងប្រកបអាជីវកម្មបាននេះ មានតម្លៃចាប់ពី 3799$ រហូតដល់ 5599$ ក្នុងមួយឡូត៍។

លោកម៉ន សុខាអគ្គនាយកក្រុមហ៊ុន UTG UTRUST INVESTMENT Co, Ltdបានមានប្រសាសន៍ឲ្យដឹង តាមប្រព័ន្ឋបណ្តាញទំនាក់ទំនងសង្គមនាព្រឹកថ្ងៃទី២២ សីហានេះថា គំរោងទី១១នេះ ស្ថិតនៅក្បែគំរោងទី10ដែលមានឈ្មោះថា ឋានសួគ៌ធម្មជាតិដែលមានសួនច្បា Resort សម្រាប់សម្រាកលំហែកាយដែលយើងបាន និងកំពុងធ្វើក្នុងដំណាក់កាលទី១ ហើយវាជាគំរោងដែលមានសក្តានុពល និងផ្តល់ផលចំណេញដល់ប្រជាពលរដ្ឋ ពិសេសអ្នកមានចំណូលទាប និងចំណូលមធ្យមដែលអាចសន្សំបាននូវទុនរបស់ខ្លួន នាពេលអនាគត ដោយសារទីតាំងនៅក្នុងគំរោងនេះ ជាទីតាំងកំពុងមានការរីកចម្រើន និងកាន់តែរីកចម្រើនខ្ពស់នាពេលអនាគត។

លោកបន្តថា ជាមួយនឹងការគិតគូដល់ផលប្រយោជន៍របស់អ្នកទិញ និងឈរលើគោលការណ៍ឈ្នះ ឈ្នះទាំងអស់គ្នា ទើបក្រុមហ៊ុនតែងតែសម្រិតសំរាំងទីតាំង ដែលមានប្រជាពលរដ្ឋរស់នៅច្រើន ជាក់ស្តែងគំរោងទី១១របស់យើង ជាទីតាំងដែលនៅក្បែភូមិនឹងមានប្រជាពលរដ្ឋរស់នៅកុះករនៅជុំវិញគំរោងតែម្តង។ ពិសេសគំរោងនេះស្ថិនៅជាប់ផ្លូវរដ្ឋធំហំ 15m។ លោកបន្តថា ក្រុមហ៊ុននឹងមានធ្វើផ្លូវបេតុងទទឹង 12m ហើយផ្លូវក្នុងគំរោងមានទំហំទទឹង 10m ឡើងទៅ។

ជាមួយនឹងទីតាំងដែលមានការរីកចម្រើន និងផ្តល់ភាពងាយស្រួលដល់អតិថិជន គម្រោងទី១១នេះ មានទីតាំងនៅក្បែផ្សារ សាលារៀន មន្ទីពេទ្យ និងវត្តអារាម។ ដីសមាគមចិននៅជាប់គំរោង ពិសេសមានភ្លើងរដ្ឋរួចជាស្រេច និងមានមានប្រព័ន្ធលូ ។ ល។ប្រកបដោយស្តង់ដាពិតប្រាកដ។

លើសពីនេះដើម្បីអបអរសាទរកាបើកលក់គំរោងថ្មីទី11នេះផងដែរ ក្រុមហ៊ុនក៏មាន Promotion និងលក្ខខ័ណ្ណពិសេសផ្តលជូនអតិថិជនដូចជា – វិនិយោងមុន 25% នៃតម្លៃដីបញ្ចុះតម្លៃ 199ដុល្លារ។ វិនិយោគមុន 50% នៃតម្លៃដី អតិថិជននឹងទទួលបានការបញ្ចុះតម្លៃ 499$ និងវិនិយោគវិនិយោគ 100% នៃតម្លៃដីបញ្ចុះតម្លៃ 15% ពិសេសអតិថិជនអាច- រំលស់រយះពេល 24ខែដោយគ្មានការប្រាក់។

តើអ្វីដែលជាអត្ថប្រយោជន៍របស់អតិថិជន លោកម៉ន សុខាបានបន្តឲ្យដឹងទៀតថា អត្ថប្រយោជន៍ ដែលអតិថិជនទទួលបាននូវផលប្រយោជន៍ជាច្រើន ដូចជា ទទួលបាននូវដីដែលស្របច្បាប់ 100% និង តម្លៃទាបសមរម្យ។ ទទួលបានផលចំនេញយ៉ាងតិច 100% សម្រាប់រយះពេលមួយឆ្នាំក្រោយ។ អតិថិអាចសង់ផ្ទះរស់នៅបាន បន្ទាប់ពីបានវិនិយោគ 50% មុន ។ ល។

អតិថិជនដែលចង់វិនិយោគលើដីឡូត៍ ដែលអាចស្វែងរកផលចំណេញ និងអាចសាងសង់ផ្ទះជួល ឬប្រកបអាជីវកម្មបានអាចទាក់ទងតាមរយៈលេខទូរស័ព្ទ 087 600 999 | 017 669 799 | 017 768 870៕

រដ្ឋាភិបាលគាំទ្រគម្រោងវិនិយោគអគារពហុមុខងារមួយបន្ថែមទៀតក្នុងខណ្ឌទួលគោក

August 22, 2019

0

ដោយ វុត្ថា

ភ្នំពេញ៖ រដ្ឋាភិបាលតាមរយៈអន្តរក្រសួង បានប្រកាសគាំទ្រលើគម្រោងបង្កើតអគារពហុមុខងារមួយមួយបន្ថែមទៀតក្នុងខណ្ឌទួលគោក រាជធានីភ្នំពេញ ខណៈខណ្ឌមួយនេះ កំពុងមានសក្តានុពលខ្ពស់លើវិស័យសំណង់អគារផ្សេងៗ។

យោងតាមកិច្ចប្រជុំ អន្តរក្រសួងពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូងកាលពីថ្ងៃទី ២១ ខែសីហា ឆ្នាំ ២០១៩ កន្លងមកនេះ គម្រោងបង្កើតអគារពហុមុខងារគ្រោងសាងសង់លើផ្ទៃដីទំហំ ២.៦១០ម៉ែត្រការ៉េ ដែលមានទីតាំងស្ថិតក្នុងភូមិសាស្រ្តភូមិទី១ សង្កាត់បឹងកក់ ខណ្ឌទួលគោក រាជធានីភ្នំពេញ របស់ក្រុមហ៊ុន Star Ting International Develompment Co,.Ltd ឯ.ក ដែលបានសិក្សា និងវាយតម្លៃដោយក្រុមហ៊ុនទីប្រឹក្សា សាស្ទីណាត៍ ហ្គ្រីន។

បន្ទាបពីផ្តល់យោបល់ និងពិភាក្សានៅក្នុងកិច្ចប្រជុំនេះ មានលទ្ធផលដូចខាងក្រោម៖

១.អង្គប្រជុំមានការគាំទ្រសម្រាប់គម្រោងវិនិយោគនេះ
២.ក្រុមហ៊ុនភ្ជាប់ប្លង់ប្រព័្ធនការពារអគ្គីភ័យ នៅក្នុងអគារ និងបង្ហាញពីផែនការការពារអគ្គិភ័យ
៣.ក្រុមហ៊ុនត្រូវសិក្សារៀបរាប់បន្ថែមអំពីប្រព័ន្ធប្រព្រឹត្តិកម្មទឹកកខ្វក់ ដោយត្រូវបញ្ជាក់អំពីទំហំ និងមុខងារអាងនីមួយៗ
៤.ក្រុមហ៊ុនត្រូវធ្វើការគ្រប់គ្រង និងបែងចែកសំណល់រឹងឱ្យដាច់ពីគ្នារវាងសំណល់គ្រោះថ្នាក់ និងសំណល់ផ្ទះបាយ
៥. ក្រុមហ៊ុនត្រូវរៀបចំបំពាក់បំពង់បូមទឹកសម្រាប់ឡានពន្លត់អគ្គីភ័យ
៦.ក្រុមហ៊ុនត្រូវបញ្ចូលរាល់មតិយោបល់វិជ្ជមានបស់សមាជិកអង្គប្រជុំទៅក្នុងរបាយការណ៍ IESIA នេះ។

ខណ្ឌទួលគោកគឺជាខណ្ឌមួយដែលកំពុងតែមានសក្តានុពលក្នុងចំណោមខណ្ឌស្ថិតនៅកណ្តាលក្រុងទាំង ៤ខណ្ឌទួលគោកបាននិងកំពុងតែមានការវិនិយោគទៅលើអាគារសហកម្មសិទ្ធិ ឬខុនដូកាន់តែច្រើន និងអគារពហុមុខងារ ដោយសារទីផ្សារនៅក្នុងតំបន់នេះកំពុងតែចាប់ផ្តើមហុចសក្តានុពលពីមួយឆ្នាំទៅមួយឆ្នាំ។

ជាមួយនឹងការពង្រីកសក្តានុពលរបស់ខ្លួន ទួលគោកពិតជាមានការអភិវឌ្ឍន៍យ៉ាងរហ័ស ហើយតំបន់នោះពិតជាមានឱកាសវិនិយោគសម្រាប់ការវិនិយោគ និងសំណង់។

អ្នកនាងអាន សុធីតា នាយិកាក្រុមហ៊ុន CBRE ប្រចាំនៅកម្ពុជា ធ្លាប់បានឲ្យដឹងកន្លងមកនេះថា តំបន់ទួលគោកគឺជាតំបន់ដែលមានសក្តានុពលនិងមានការរីកចម្រើនខ្លាំងក្នុងរយៈពេល ២ឆ្នាំចុងក្រោយនេះហើយតំបន់នេះនៅមិនឆ្ងាយពីកណ្តាលទីក្រុងភ្នំពេញនោះទេ មានទាំងហេដ្ឋារចនាសម្ព័ន្ធល្អ តម្លៃដីក៏នៅមានតម្លៃសមរម្យ និងជាកន្លែងចាប់អារម្មណ៍របស់អ្នកវិនិយោគនានាទៀតផង។

អ្នកនាងបន្តថា “តំបន់នេះមានសក្តានុពលអភវិឌ្ឍន៍លើវិស័យខុនដូ អគារពាណិជ្ជកម្ម ហើយមិនយូមិនឆាប់តំបន់នេះនិងរីកដុះដាលខ្លាំងទៅលើវិស័យនេះដែលអាចធ្វើការប្រកួតប្រជែងជាមួយតំបន់ផ្សេងៗទៀតបាន”៕

អានបន្ត៖ ក្រសួងដែនដីនឹងពង្រាយមន្ត្រីបច្ចេកទេសដើម្បីពន្លឿននិតិវិធីក្នុងការចេញអាជ្ញាប័ណ្ណ

អគ្គនាយកពន្ធដារ ក្រើនរំលឹកជាថ្មី ជំរុញឱ្យប្រជាពលរដ្ឋបង់ពន្ធលើអចលនទ្រព្យនៅឆ្នាំ ២០១៩

August 22, 2019

0

ដោយ វុត្ថា

ភ្នំពេញ៖ អគ្គនាយកពន្ធដារ បានឱ្យដឹងថា អនុលោមតាមប្រកាសលេខ ៤៩៣ សហវ.ប្រក ចុះថ្ងៃទី ១៩ ខែកក្កដា ឆ្នាំ ១០១០ ស្តីពីការប្រមូលពន្ធលើអចលនទ្រព្យ ការបង់ពន្ធលើអចលនទ្រព្យប្រចាំឆ្នាំ ២០១៩ នឹងត្រូវបិទបញ្ចប់នៅថ្ងៃទី ៣០ ខែកញ្ញា ឆ្នាំ ២០១៩ ខាងមុខនេះ។

យោងតាមសេចក្តីជូនដំណឹងរបស់អគ្គនាយកដ្ឋានពន្ធដារចុះថ្ងៃទី ២១ ខែសីហា ឆ្នាំ ២០១៩ កន្លងមកនេះ បានឱ្យដឹងថា បន្ទាប់ពីមានការក្រើនរំលឹកលើកទី ១ កាលពីថ្ងៃទី ៣០ ខែមេសា ឆ្នាំ ២០១៩ កន្លងទៅរហូតមកទល់ពេលនេះ អគ្គនាយកដ្ឋានពន្ធដារសង្កេតឃើញថា ក៏នៅមានម្ចាស់អចលនទ្រព្យមួយចំនួនមិនទាន់បានបំពេញកាតព្វកិច្ចប្រកាសបង់ពន្ធប្រភេទនេះនៅឡើយ។

សេចក្តីជូនដំណឹងដដែលបន្តថា ដូចនេះ ដើម្បីជំរុញការប្រមូលពន្ធលើអចលនទ្រព្យសម្រាប់ឆ្នាំ ២០១៩ នេះ បានអស់លទ្ធភាពប្រកដោយប្រសិទ្ធិភាពខ្ពស់ និងចៀសវាងបាននូវការកកស្ទះ ការប្រជ្រៀតគ្នាមកប្រកាសបង់ពន្ធនៅថ្ងៃជិតផុតកំណត់ដែលអាចនាំឱ្យមានបាតុភាពអសកម្មដោយប្រការណាមួយ អគ្គនាយកដ្ឋានពន្ធដារសូមក្រើនរំលឹកជាថ្មីដល់ម្ចាស់អចនលទ្រព្យទាំងអស់ ដែលមិនទាន់បានបំពេញកាតព្វកិច្ចបង់ពន្ធ មេត្តារួសរាន់អញ្ជើញមកប្រកាសបង់ពន្ធឱ្យបានទាន់ពេលវេលាត្រឹមថ្ងៃទី៣០ ខែកញ្ញា ឆ្នាំ ២០១៩ ។

អគ្គនាយកដ្ឋានពន្ធដារបញ្ជាក់ទៀតថា ចំពោះការខកខានមិនបានដាក់លិខិតប្រកាសបង់ពន្ធទាន់ពេលវេលាកំណត់ខាងលើ ម្ចាស់អលចនទ្រព្យនឹងត្រូវរងទោសទណ្ឌ តាមច្បាប់ជាធរមាន។

អគ្គនាយកដ្ឋានពន្ធដារសង្ឃឹមយ៉ាងមុតមាំថា ម្ចាស់អចលនទ្រព្យទាំងអស់ ពិតជានឹងយកចិត្តទុកដាក់ និងអញ្ជើញមកទៅបំពេញកាតព្វកិច្ចសារពើពន្ធឱ្យបានទាន់ពេលវេលាកំណត់ជាពុំខាន៕