សម្ដេចតេជោស្នើឱ្យវិនិយោគិនកម្ពុជាដែលមានលទ្ធភាពវិនិយោគនៅក្នុងប្រទេសស្រីលង្ការ

August 7, 2019

ដោយ វុត្ថា

ភ្នំពេញៈ សម្តេចតេជោហ៊ុន សែន នាយករដ្ឋមន្ត្រីនៃប្រទេសកម្ពុជា អំពាវនាវឱ្យវិនិយោគិនកម្ពុជា ពិចារណាពិនិត្យលទ្ធភាពដាក់ទុនវិនិយោគនៅស្រីលង្ការ ឱ្យបានកាន់តែច្រើនថែមទៀត។

សម្តេចតេជោបានថ្លែងនៅក្នុងវេទិកាធុរកិច្ចកម្ពុជា-ស្រីលង្កា នៅសណ្ឋាគារសូហ្វីតែលភ្នំពេញ នៅរសៀលថ្ងៃទី៧ ខែសីហា ឆ្នាំ២០១៩ បានឱ្យដឹងថា កម្ពុជាកាលពី១០ ឆ្នាំមុន គឺបានអំពាវនវឱ្យវិនិយោគិនបរទេស ពីគ្រប់មជ្ឈដ្ឋានមកវិនិយោគនៅកម្ពុជា តែពេលនេះប្រជាជនកម្ពុជានាពេលបច្ចុប្បន្ននេះ មានលទ្ធភាពក្នុងការវិនិយោគនៅក្រៅប្រទេស។

សម្តេចបានថ្លែងថា “ពីមុនកម្ពុជាអំពាវនាវឲ្យបរទេសមកវិនិយោគនៅកម្ពុជា ប៉ុន្តែបច្ចុប្បន្នពលរដ្ឋកម្ពុជាក៏មានលទ្ធភាព វិនិយោគនៅបរទេសផងដែរ ហេតុដូច្នេះបានអំពាវនាវឲ្យធុរកិច្ចជនកម្ពុជា។

សម្តេចតេជោបញ្ជាក់ថា កម្ពុជាបានធ្វើការវិនិយោគ នៅក្នុងប្រទេសមួយចំនួននៅក្នុងតំបន់អាស៊ាន រួមមានប្រទេសភូមា ឡាវ និងទីម័រព្រមទាំងប្រទេសមួយចំនួនទៀតនៅលើពិភពលោក។

ទំហំពាណិជ្ជកម្មរវាងប្រទេសស្រីលង្កា និងកម្ពុជាមានជំនួនតិចតួចបំផុតប្រមាណ ៤លានដុល្លារក្នុងមួយឆ្នាំតែប៉ុណ្ណោះ ខណៈប្រទេសកម្ពុជានាំចេញ និងនាំចូលរបស់ប្រទេសទាំងនៅមានកម្រិតនៅឡើយ។

លោក គិត ម៉េង ប្រធានសភាពាណិជ្ជកម្មកម្ពុជាបានឱ្យដឹងថា វេទិកាធុរកិច្ចកម្ពុជា-ស្រីលង្ការ ដែលត្រូវបានរៀបចំនៅកម្ពុជានាពេលនេះ ពិតជាផ្តល់ឱកាសដល់ភាគីទាំងពីបង្កើនការវិនិយោគឱ្យកើនឡើងថែមទៀត៕

រដ្ឋាភិបាលអនុម័តគម្រោងវិនិយោគមានទឹកប្រាក់ជិត ១៦៨លានដុល្លារ

August 7, 2019

0

ដោយ វុត្ថា

ភ្នំពេញៈ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគ៣ ដែលមានទឹកប្រាក់ចំនួនជិត១៦៨លានដុល្លារអាមេរិក លើការបង្កើតរោងចក្រ និងសណ្ឋាគារ ដែលផ្តល់ឱកាសការងារដល់ពលរដ្ឋកម្ពុជាជាង១ពាន់កន្លែង។

យោងតាមការចុះផ្សាយតាមហ្វេសបុកផ្លូវការ របស់ក្រុមប្រឹក្សាអភិវឌ្ឍន៍កម្ពុជានៅថ្ងៃទី ៧ ខែសីហា ឆ្នាំ ២០១៩នេះថាតាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនចំនួនបី ដូចជាទី១-ក្រុមហ៊ុន “E.G.N EASY CO., LTD.” គម្រោងបង្កើតរោងចក្រកែច្នៃម្ហូបអាហារ ដែលមានទីតាំងវិនិយោគស្ថិតនៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល មានទុនវិនិយោគប្រមាណ ៣,៤លានដុល្លារអាមេរិក និងអាចបង្កើតការងារបានចំនួន ២១០កន្លែង។

ទី២ ក្រុមហ៊ុន“CAMBODIAN DECORATIVE BUILDING MATERIAL CHAKREY TING CO., LTD.” គម្រោងបង្កើតរោងចក្រផលិតសម្ភារៈតុបតែងពិដានជញ្ជាំង…។ល។ ដែលមានទីតាំងវិនិយោគស្ថិតនៅភូមិភ្នំតូច ឃុំកណ្តោល ស្រុកទឹកឈូ ខេត្តកំពត មានទុនវិនិយោគប្រមាណ៣០,៥លានដុល្លារអាមេរិក និងអាចបង្កើតការងារបានចំនួន ២១៧កន្លែង។

និងទី៣-ក្រុមហ៊ុន“ ROYAL FIELD DEVELOPMENT COMPANY CO.,LTD.”គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៣ ដែលមានចំនួន៣០០បន្ទប់ និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅមហាវិថីសហព័ន្ធរុស្សី ភូមិ១០ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ មានទុនវិនិយោគប្រមាណ ១៣៤លានដុល្លារអាមេរិក និងអាចបង្កើតការងារបានចំនួន ៧២៩កន្លែង៕

តំបន់សេដ្ឋកិច្ចពិសេសទាំង ២១កំពុងស្វាគមន៍ការវិនិយោគ

August 7, 2019

0

ដោយ ៖ រ៉ាណេត

ភ្នំពេញ ៖ បច្ចុប្បន្ននេះ កម្ពុជាមានតំបន់សេដ្ឋកិច្ចជាច្រើនកំពុងតែបើកទ្វារចំហ រង់ចាំស្វាគមន៍ការចូលខ្លួញនរបស់បណ្តាធុរជននានាមកធ្វើការវិនិយោគនៅកម្ពុជាបន្ថែមទៀត ខណៈដែលនៅត្រឹមរយៈពេល ៦ខែ ឆ្នាំ២០១៩ កន្លងទៅនេះ ក្រុមប្រឹក្សាអភិវឌ្ឍកម្ពុជា បានសម្រេចផ្តល់អជ្ញាប័ណ្ណចំនួន ៤៣គម្រោង ធ្វើប្រតិបត្តិការនៅក្នុងតំបន់សេដ្ឋកិច្ចពិសេស។

យោងតាមរបាយការណ៍ដែលបង្ហាញដោយក្រុមប្រឹក្សាអភិវឌ្ឍកម្ពុជា CDC បានបង្ហាញថា នៅត្រឹមរយៈពេល៦ខែ នៃឆ្នាំ២០១៩ កន្លងទៅនេះ តាមរយៈគណៈកម្មការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា បានសម្រេចឯកភាពលើគម្រោងថ្មី និងគម្រោងពង្រីកផលិតកម្មសរុបមាន ១៥៣គម្រោង ក្នុងនោះគម្រោងក្រៅតំបន់សេដ្ឋកិច្ចពិសេសមាន ១១០គម្រោង និងគម្រោងក្នុងតំបន់សេដ្ឋកិច្ចពិសេសមាន ៤៣គម្រោង។ នៅក្នុងចំណោមគម្រោងទាំង ១៥៣ខាងលើនេះ មានទំហំទឹកប្រាក់វិនិយោគសរុបប្រមាណ ៥១៨១ លានដុល្លារអាចបង្កើតការងារបានជាង ១៦៧,៣៣០កន្លែង។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ថា ការកើនឡើងនូវចំនួនទុនវិនិយោគសរុបនៅកម្ពុជា ទៅលើគម្រោងទាំងអស់ដូចការលើកឡើងខាងលើនេះ នៅមិនទាន់គ្រប់គ្រាន់តាមតម្រូវការរស់រដ្ឋាភិបាលនៅឡើយនោះទេ។

លោកឧកញ៉ាបានបន្តទៀតថា “ជាការលើកទឹកចិត្តដល់បណ្តាក្រុមហ៊ុននានាឱ្យចូលមកវិនិយោគនៅតំបន់សេដ្ឋកិច្ចពិសេស រាជរដ្ឋាភិបាលបានសម្រេចកែសម្រួលនូវគោលនយោបាយផ្ទៃក្នុងជាច្រើន បន្ថែមពីលើការអនុគ្រោះពន្ធ និងកាត់បន្ថនីតិវិធីក្នុងការនាំចេញផលិតផលសម្រេចចេញទៅកាន់ទីផ្សារលើសាកលលោក។

លោកឧកញ៉ាបានបន្តទៀតថា “គ្រប់បណ្តាក្រុមហ៊ុនដែលចូលខ្លួនមកកាន់តំបន់សេដ្ឋកិច្ចទាំងអស់នៅទូទាំងប្រទេសកម្ពុជា សុទ្ធតែមានសិទ្ធិគ្រប់គ្រងទៅលើភាគហ៊ុន ឬទុនវិនិយោគសរុប។ លោកឧកញ៉ាបញ្ជាក់ថា “អ្វីដែលសំខាន់នោះគឺ ក្រុមហ៊ុនត្រូវបានអនុគ្រោះពន្ធលើប្រាក់ចំណេញ១០០ភាគរយក្នុងរយៈពេលចាប់ពី៣-៩ឆ្នាំ ខណៈដែលការនាំចូលសម្ភារៈ និងវត្ថុធាតុដើមសម្រាប់កែច្នៃធ្វើការនាំចេញក៏មិនត្រូវបានបង់ពន្ធ១០០ភាគរយ ហើយនីតិវិធីក្នុងការបំពេញបែបបទឯកសារត្រូវបានបំបាត់ចោលជាច្រើនដំណាក់កាល” ។

ភាគច្រើន ក្រុមហ៊ុនដែលចូលខ្លួនទៅកាន់តំបន់សេដ្ឋកិច្ចពិសេសរួមមានដូចជារោងចក្រកាត់ដេរ រោងចក្រស្បែកជើង រោងចក្រកាបូប រួមជាមួយនឹងរោងផលិតសម្ភារៈប្រើប្រាស់មួយចំនួនទៀតតម្រូវនាំចេញទៅកាន់ទីផ្សារអាស៊ាន និងទីផ្សារអឺរ៉ុប ត្បិតទីតាំងនៃតំបន់សេដ្ឋកិច្ចពិសេសទាំងអស់សុទ្ធតែស្ថិតនៅជិតតំបន់ច្រកទ្វារព្រំដែន និងកំពង់ផែទឹកជ្រៅ ដែលផ្តល់ភាពងាយស្រួលក្នុងការដឹកជញ្ជូន ៕

តើការទម្លាក់តម្លៃប្រាក់យ័នអាចជួយដល់សេដ្ឋកិច្ចចិនក្នុងសង្គ្រាមពាណិជ្ជកម្មយ៉ាងដូចម្តេច?

August 7, 2019

0

ដោយ Donald Lee

ភ្នំពេញ៖ ជារៀងរាល់ថ្ងៃធនាគារកណ្តាលចិនកំណត់អត្រាប្តូរប្រាក់យ័នដើម្បីដោះដូរជាមួយនឹងប្រាក់ដុល្លារអាមេរិក។

រយៈពេលជាងដប់ឆ្នាំរហូតមកដល់សប្តាហ៍នេះ ធនាគារប្រជាជនចិន (PBOC) បានកំណត់អត្រាខ្ពស់ជាង ៧យ័នឲ្យស្មើនឹង ១ដុល្លារអាមេរិក។

ប៉ុន្តែកាលពីថ្ងៃ ច័ន្ទ ធនាគារ PBOC បានអនុញ្ញាតឱ្យប្រាក់យន់ចុះខ្សោយ និងត្រូវបានផ្លាស់ប្តូរក្នុងតម្លៃទាបជាង ៧ យ័នក្នុងមួយដុល្លារអាមេរិក។

ប្រាក់ ៧ យ័ន ដែលស្មើនឹង ១ដុល្លារអាមេរិកគឺជាខ្សែបន្ទាត់ក្រហមក្រៅផ្លូវការមួយសម្រាប់សហគមន៍ពាណិជ្ជកម្មពិភពលោក ហើយអាមេរិកបានចោទប្រកាន់រដ្ឋាភិបាលចិនពីការកេងបន្លំរូបិយប័ណ្ណ នៅពេលសង្គ្រាមពាណិជ្ជកម្មរវាងអាមេរិក និងចិនដែលនៅតែបន្តកើតឡើងនាពេលមុខទៀត។

ប្រធានាធិបតីអាមេរិកលោក Donald Trump បានសរសេរនៅលើប្រព័ន្ធផ្សព្វផ្សាយសង្គម Twitter ថា “ប្រទេសចិនបានទម្លាក់តម្លៃរូបិយប័ណ្ណរបស់ពួកគេទៅជាកំរិតទាបជាប្រវត្តិសាស្ត្រមួយ។

លោកបានបន្ថែមថា “វាត្រូវបានគេហៅថា ការកេងចំណេញរូបិយវត្ថុ។

ការសម្រេចចិត្តរបស់ចិនក្នុងការធ្វើឱ្យប្រាក់យ័នធ្លាក់ចុះនេះត្រូវបានអ្នកជំនាញមើលឃើញថា ជាការឆ្លើយតបចំពោះកិច្ចចរចាពាណិជ្ជកម្មរបស់លោក Trump ដែលប្រកាសដំឡើងពន្ធ ១០ ភាគរយលើទំនិញចិនដែលមានតម្លៃ ៣០០ ពាន់លានដុល្លារ។

ប៉ុន្តែតើប្រាក់យ័នដែលចុះខ្សោយអាចជួយដល់សេដ្ឋកិច្ចចិនក្នុងសង្គ្រាមពាណិជ្ជកម្មយ៉ាងដូចម្តេច?

ប្រទេសដែលមានសេដ្ឋកិច្ចធំបំផុតទី ២ នៅលើពិភពលោកបានពឹងផ្អែកយ៉ាងខ្លាំងលើការនាំចេញ។ នៅពេលធនាគារកណ្តាលធ្វើឱ្យរូបិយប័ណ្ណធ្លាក់ថ្លៃធៀបនឹងប្រាក់ដុល្លារអាមេរិក ចិនអាចបន្ទាបតម្លៃនៃការនាំចេញរបស់ខ្លួន។

ក្រុមអ្នកជំនាញជឿជាក់ថា ការទម្លាក់ថ្លៃប្រាក់យ័នគឺជាកិច្ចខិតខំប្រឹងប្រែងមួយដើម្បីទូទាត់ការកើនឡើងតម្លៃនាំចេញ ដោយសារតែការដំឡើងពន្ធរបស់លោក Trump ។ លើសពីនេះទៀត នៅពេលដែលប្រាក់យ័នចុះខ្សោយ

អ្នកទិញក្នុងស្រុកចិនចំណាយកាន់តែច្រើនសម្រាប់ការនាំចូល។ នេះជាការលើកទឹកចិត្តដល់ក្រុមហ៊ុនផលិតក្នុងស្រុកដើម្បីជំនួសការនាំចូលដែលមានតំលៃថ្លៃជាមួយនឹងផលិតផលដែលផលិតនៅចិនដែលនឹងត្រូវលក់ក្នុងតម្លៃទាប។

ទីផ្សារនៅអាមេរិក និងនៅជុំវិញពិភពលោកបានប្រតិកម្មភ្លាមៗចំពោះព័ត៌មាននៃការទម្លាក់តម្លៃនេះ ហើយ ថា ជាសញ្ញានៃភាពតានតឹងពាណិជ្ជកម្មកើនឡើងដែលនឹងនាំឱ្យសេដ្ឋកិច្ចពិភពលោកដែលកំពុងធ្លាក់ចុះ។

កាលពីថ្ងៃ ច័ន្ទ ផ្សារហ៊ុនក្រុមហ៊ុន US Dow Jones និងក្រុមហ៊ុន S&P បានធ្លាក់ចុះជិត ៣ ភាគរយ ហើយ ក្រុមហ៊ុន Nasdaq មានការធ្លាក់ចុះគួរឱ្យភ្ញាក់ផ្អើលមួយដល់ ៣.៥ ភាគរយ៕

រដ្ឋាភិបាលគ្រោងបង្កើតក្រុមពិសេសត្រួតពិនិត្យផ្លូវថ្នល់ បន្ទាប់ពីមានការរិះគន់ជុំវិញការធ្វើផ្លូវជាប់រហូត

August 7, 2019

0

ដោយ វុត្ថា

ភ្នំពេញ៖ រដ្ឋាភិបាលកម្ពុជាតាមរយៈក្រសួងសាធារណៈការ និងដឹកជញ្ជូនគ្រោងបង្កើតក្រុមពិសេសចំនួន ២ក្រុម ដែលក្នុងមួយក្រុមមានគ្នា ៥នាក់ ដើម្បីចុះត្រួតនិត្យលក្ខណៈបច្ចេកទេស គុណភាពផ្លូវ សោភណភាព និងសុវត្ថិភាព បន្ទាប់មានការរិះគន់ខ្លាំងៗពីប្រជាពលរដ្ឋជុំវិញការសាងសង់ផ្លូវមិនបានជាប់យូរ និងចំណាយថវិកាជាតិខ្ជះខ្ជាយជាដើម។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូនបានថ្លែងប្រាប់ក្រុមអ្នកសារព័ត៌មាននៅថ្ងៃទី ៧ ខែកក្កដាននេះ ថាកន្លងមកក្រសួងទទួលបានរិះគន់ខ្លាំងលើការការកសាងផ្លូវនេះពីសំណាក់ប្រជាពលរដ្ឋថាធ្វើខាងមុខ ខូចខាងក្រោយជាដើម ដោយចាព់ពីពេលនេះ តទៅក្រសួងលែងឱ្យមានពាក្យរិះគន់ទៀតហើយដោយទទួលយកតែផ្លូវរឹងមាំជាប់បានយូរ។

លោក ស៊ុនចាន់ថុលថា “យើងខ្ញុំតែងតែលឺពាក្យតិទៀនថាការសាងសង់ផ្លូវនេះ ឃើញធ្វើជាប់រហូត ធ្វើមុខ ខូចអាក្រោយ ធ្វើអាក្រោយ ខូចអាមុខ ទាំងការសាងសង់ ទាំងការជួសជុល ជាដើម។

លោករដ្ឋមន្ត្រីបន្ថែមថា ដោយមើលឃើញនៅសកម្មភាពបែបនេះ ក្រសួងបានណែនាំក្រុមហ៊ុនសាងសង់ផ្លូវទាំងអស់ត្រូវធ្វើឱ្យមានបច្ចេកទេសត្រឹមត្រូវ រឹងមាំ ដើម្បីកុំអោយមានការខូចខាតថវិកាជាតិ ខូចខាតពេលវេលា និងបង្កឱ្យមានគ្រោះថ្នាក់ចរាចរណ៍ផងដែរ។ កាលពីកន្លងទៅថ្មីនេះ ក្រសួងបានបញ្ឈប់មនុស្ស ៦នាក់ ដែលជាមន្ត្រីពីគ្រោះយោបល់ (consultant) មកពីក្រុមហ៊ុនឯកជន ដោយសារមន្ត្រីទាំងនោះ ធ្វើការមិនបានដិតដល់លើការត្រួតពិនិត្យផ្លូវ និងស៊ុមគ្រលំជាមួយក្រុមហ៊ុនទទួលគម្រោងសាងសង់។

លោក ស៊ុន ចាន់ថុលបន្ថែថា ដើម្បីឱ្យផ្លូវមានប្រសិទ្ធិភាព ក្រសួងនឹងបង្កើតក្រុមត្រួតពិនិត្យពិសេស ដើម្បីលួច ទៅឆ្មក់មើលក្រុមហ៊ុនត្រួតពិនិត្យបច្ចេកលក្ខណៈទេសបរទេសដោយមិនប្រាប់មុននោះទេ ហើយក្រុមនេះ នឹងត្រួតពិនិត្យមើលក្រុមមន្ត្រីត្រួតពិនិត្យរបស់ក្រសួងថែមទៀត ដើម្បីពិនិត្យមើលថា ការធ្វើការត្រឹមត្រូវឬ មិនត្រឹមត្រូវ។

លោកបន្តថា ក្រុមត្រួតពិនិត្យពិសេសនេះ គឺមានសម្ភារៈគ្រប់គ្រាន់ដើម្បីចុះធ្វើកិច្ចការនេះដោយក្រសួងបានស្នើសុំរួចហើយផងដែរ។ ក្រុមត្រួតពិនិត្យពិសេសនេះ ត្រូវវបានបែងចែកជាពីរកង ក្នុងមួយកងមាន ៥នាក់ ដោយមានរថយន្តត្រឹមត្រូវក្នុងការចុះធ្វើការ មានសម្ភារៈធ្វើការ ក្នុងការខួងផ្លូវមើល។

លោកបញ្ជាក់ថា ថ្នាក់ដឹកនាំរបស់ក្រសួងខិតខំត្រិះរិះរហូតក្នុងការតាមសកម្មភាព ការសាងសង់ផ្លូវ ការជួសជុល និងថែមទាំងផ្លូវឱ្យមានប្រសិទ្ធិភាពខ្ពស់ និងគុណភាព ។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូនណែនាំក្រុមហ៊ុនសាងសង់ឱ្យអនុវត្តកិច្ចសន្យាប្រកបដោយគុណភាព ប្រសិទ្ធិភាព និងបច្ចេកទេសនៃការសាងសង់ផ្លូវថ្នល់នៅកម្ពុជា ។

លោកបញ្ជាក់ថា ចាប់ពីពេលនេះតទៅ បើក្រុមហ៊ុនសាងសង់ណាដែលគ្មានសមត្ថភាព សាងសង់មិនត្រឹមត្រូវតាមកិច្ចសន្យា និងធ្វើផ្លូវមិនបានរឹងមាំ ជាប់លាប់ល្អ ទាំងបរិមាណ គុណភាព សោភ័ណ្ឌភាព សុវត្ថិភាព សុខភាពអនាម័យ បរិស្ថាន និងសុវត្ថិភាពចរាចរណ៏ទេ គឺក្រសួងមិនទទួលយកទេ ត្រូវចាប់អោយធ្វើសងឡើងវិញទាំងអស់ និងឈានដល់ការផ្អាក់មិនអោយដាក់ពាក្យដេញថ្លៃសាងសង់ផ្លូវផងដែរ៕

ឥណ្ឌូនេស៊ីគ្រោងសាងសង់ស្ពានឆ្លងសមុទ្រវែងជាងគេតម្លៃជាង ២៨៤លានដុល្លារ

August 7, 2019

0

ដោយ វុត្ថា

ភ្នំពេញៈ រដ្ឋាភិបាលនៃប្រទេសឥណ្ឌូនេស៊ី គ្រោងនឹងសាងសង់ស្ពានប្រវែង៧ គីឡូម៉ែត្រស្មើ នឹង ៤,៣៥ ម៉ាយ ដើម្បីតភ្ជាប់រវាងកោះBatam និងកោះ Bintan នៅក្បែរនឹងប្រទេសសិង្ហបុរី ដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាល ដើម្បីអភិវឌ្ឍន៍វិស័យឧស្សាហកម្ម និងទេសចរណ៍នៅក្នុងតំបន់នេះ។

យោងតាមសេចក្តីប្រកាសរបស់ការិយាល័យ លេខាធិការគណៈរដ្ឋមន្ត្រីបាននិយាយនៅក្នុងសេចក្តីថ្លែងការណ៍មួយកាលពីពេលថ្មីៗនេះថា ស្ពានដែលតភ្ជាប់កោះទាំងពីរនេះ នឹងត្រូវចំណាយទឹកប្រាក់ប្រមាណជា ៤៤ពាន់ពាន់លានរូពី ស្មើនឹង ២៨៤,៣៥ លានដុល្លារ ហើយស្ពាននេះនឹងក្លាយជាកំពង់ផែសមុទ្រវែងជាងគេនៅប្រទេសឥណ្ឌូនេស៊ី។

សេចក្តីប្រកាសព័ត៌មានដដែលបន្តថា ការសាងសង់ស្ពាននេះ ក្នុងគោលបំណងទាញយកប្រយោជន៍ ពីការពង្រីកអាកាសយានដ្ឋាន Chagi របស់ប្រទេសសិង្ហបុរីជាមួយនឹងការអភិវឌ្ឍស្ថានីយថ្មីចំនួន៥ ដែលនឹងមានការតភ្ជាប់ដឹកជញ្ជូនទៅកាន់ទីក្រុង Bintan របស់ប្រទេសឥណ្ឌូនេស៊ី។

ប្រធានាធិបតីឥណ្ឌូនេស៊ី លោក Joko Widodo បានឱ្យដឹងថា ការកសាងហេដ្ឋារចនាសម្ព័ន្ធនេះ គឺជាមូលដ្ឋានគ្រឹះនៃអាណត្តិដំបូងរបស់លោក ដោយបានសន្យាថានឹងបន្តកាត់បន្ថយឧបសគ្គសេដ្ឋកិច្ច នៅអាស៊ីអាគ្នេយ៍ក្នុងអាណត្តិទី២របស់លោក ដែលនឹងចាប់ផ្តើមនៅខែតុលា។

រដ្ឋបាលរបស់លោកក៏បាននឹងកំពុងស្វះស្វែងរកទីផ្សារ សម្រាប់ដាក់នៅកោះ Batam ដែលជាតំបន់ពាណិជ្ជកម្មសេរីតែមួយគត់របស់ឥណ្ឌូនេស៊ី ដល់វិនិយោគិនដែលចង់ផ្លាស់ប្តូរទីតាំងរោងចក្រចេញពីប្រទេសចិន ចំពេលមានសង្គ្រាមពាណិជ្ជកម្មរវាងទីក្រុងប៉េកាំងនិងទីក្រុងវ៉ាស៊ីនតោន។

សេចក្តីប្រកាសព័ត៌មានរបស់ការិយាល័យរដ្ឋាភិបាល ក៏បានបញ្ជាក់ដែរថា ការសាងសង់ស្ពាននេះ គ្រោងនឹងចាប់ផ្តើមដំណើរជាផ្លូវការនៅឆ្នាំ២០២០ ហើយចំណាយពេលពី៣ទៅ៤ឆ្នាំទើបបញ្ចប់ការសាងសង់ជាផ្លូវការ៕

តើអ្វីនៅពីក្រោយការបិទផ្សារទំនើបចាស់ និងការបង្កើតផ្សារទំនើបថ្មីៗកាន់តែច្រើន

August 7, 2019

0

ដោយ រ៉ាណេត

ភ្នំពេញៈ តាមការព្យាករណ៍របស់អ្នកជំនាញបានឱ្យដឹងថា នៅត្រឹមឆ្នាំ២០៣០ខាងមុខនេះ កំណើនផ្សារទំនើបខ្នាតអន្តរជាតិនានានៅកម្ពុជា នឹងកើនឡើងរហូតដល់ជាងជិត ៤០ទីតាំង ខណៈ ដែលបច្ចុប្បន្ននេះគេសង្កេតឃើញមានបណ្តាផ្សារទំនើប ដែលធ្លាប់ដំណើរការមួយចំនួនបានសម្រេចបិទទ្វារ ហើយមួយចំនួនទៀតកំពុងតែប្រឈម។

នៅក្នុងរបាយការណ៍ដែលសិក្សាឡើង ដោយអ្នកជំនាញផ្នែកស្រាវជ្រាវរបស់ក្រុមហ៊ុនអន្តរជាតិ CBRE បានបង្ហាញថា ការផ្គត់ផ្គង់ផ្សារទំនើបគ្រប់ទ្រង់ទ្រាយធំនៅកម្ពុជាមានការកើនឡើងយ៉ាងខ្លាំង ដើម្បីបំពេញទៅតាមតម្រូវការកម្លាំងបញ្ជាទិញ។ របាយការណ៍ដដែលបានបញ្ជាក់ទៀតថា ផ្សារទំនើបដែលកំពុងតែដំណើរនៅលើទីផ្សារនាពេលបច្ចុប្បន្ននេះត្រូវបានបែងចែកជាចំណាត់ថ្នាក់ផ្សេងគ្នា រួមមាន ប្រភេទ Shopping Center, Retail Podium, Shopping Mall, និងប្រភេទ Community Mall ។

នាយិកាប្រចាំប្រទេសក្រុមហ៊ុនអន្តរជាតិ CBRE Cambodia លោកស្រី អាន សុធីតា បានមានប្រសាសន៍ថា បច្ចុប្បន្នបើនិយាយពីវិស័យផ្សារទំនើប គឺមានភាពរីកចម្រើនខ្លាំង ប៉ុន្តែក្នុងនោះក៏មានផ្សារតំនើបមួយចំនួនតូចបានជួបបញ្ហាប្រឈម ដោយសារតែការប្រែប្រួលនៃភាពទំនើបកម្ម កិច្ចរៀបចំ និងតុបតែងលម្អ។

ផ្អែកតាមគំនូសតាង (Graphic) ដែលចេញផ្សាយដោយក្រុមហ៊ុន CBRE Cambodia បានបង្ហាញថា នៅត្រឹមឆ្នាំ២០១៣ ប្រភេទផ្សារShopping Center មានចំនួន៧កន្លែង។ នៅត្រឹមចុងឆ្នាំ២០១៨ ប្រភេទផ្សារ Retail Podium មានចំនួន៣ ហើយរហូតដល់ឆ្នាំ២០២២ នឹងកើនឡើងដល់១០កន្លែង។ ប្រភេទផ្សារ Shopping Mall នៅដើមឆ្នាំ២០១៩ មានចំនួន៣ ហើយនឹងបន្តកើនដល់ចំនួន១២កន្លែងនៅត្រឹមឆ្នាំ២០២៤ ដោយឡែកចំពោះប្រភេទផ្សារបែបCommunity Mall កាលពីដើមឆ្នាំ២០១៩ មានចំនួនត្រឹម៦កន្លែង ហើយនឹងបន្តកើនឡើងរហូតដល់ចំនួន១៦កន្លែង នៅត្រឹមឆ្នាំ២០២១ ខាងមុខនេះ។

យ៉ាងណាក៏ដោយ ស្របដែលកំណើនផ្សារទំនើបគ្រប់ប្រភេទ បានបន្តកើនឡើង ក្នុងនោះក៏មានផ្សារទំនើបមួយចំនួន ដែលធ្លាប់ដំណើរការកាលពីប្រមាណ៥-១០ឆ្នាំមុនប្រឈមនឹងហានិភ័យខ្ពស់ រហូតឈានដល់បិទ និងផ្អាកដំណើរមួយរយៈ ដើម្បីធ្វើការកែលម្អសាជាថ្មី ជាក់ស្ដែងដូចជាផ្សារទំនើបសូរិយា (ត្រូវបានកែលម្អថ្មី) ផ្សារទំនើប សុវណ្ណា(កំពុងបិទទ្វារ ដើម្បីកែលម្អ) ក៏ដូចជាផ្សារទំនើប ផារ៉ាហ្គន ដែលសុទ្ធតែជាផ្សារធ្លាប់មានកេរ្តិ៍ឈ្មោះល្បីល្បាញកាលពីប៉ុន្មានឆ្នាំមុន។

ភាពប្រឈម និងការបិទទ្វារផ្អាកដំណើរការលក់ ដើម្បីធ្វើការកែលម្អថ្មីនេះ ត្រូវបានលោកស្រី អាន សុធីតា ទទួលស្គាល់ ដោយលោកស្រីបានបញ្ជាក់ថា “ធម្មតា អ្វីដែលថ្មី អ្វីដែលប្លែក និងទាន់សម័យ គឺតែងមានភាពទាក់ទាញ។

លោកស្រីបានបន្តថា កាលពីប៉ុន្មានឆ្នាំ ផ្សារទំនើបសូរិយា ក៏ដូចជាផ្សារទំនើប សុវណ្ណា បានឈរនៅលំដាប់កំពូល ប៉ុន្តែជាក់ស្ដែងនៅពេលបច្ចុប្បន្ននេះ ផ្សារដែលស្ថិតនៅក្នុងចំណាប់អារម្មណ៍ រួមមាន AEON1 , AEON2 និងផ្សារទំនើប Olympia ដែលទើបបើកដំណើរការថ្មីៗនេះ។ លោកស្រីបានបញ្ជាក់ថា ផ្សារដែលដំណើរការយូរឆ្នាំ ត្រូវតែមានការកែលម្អ ដែលយ៉ាងយូរត្រឹម៥ឆ្នាំម្ដង ដើម្បីអាចប្រកួតប្រជែងជាមួយផ្សារដែលទើបបង្កើតឡើងថ្មី មានរចនាបទថ្មី។

អ្នកវិភាគសេដ្ឋកិច្ចឯករាជ្យកម្ពុជា លោក ង៉ែត ជូបានមានប្រសាសន៍ថា បើទោះជាកំណើនផ្សារទំនើប មានការកើនឡើងដូចការលើកឡើងខាងលើ ប៉ុន្តែវាហាក់នៅមិនទាន់បានបំពេញតម្រូវការរបស់មនុស្សទូទៅនោះទេ ។

លោកបានបញ្ជាក់ថា “រសនិយមនៃមុខទំនិញនៅតាមបណ្តាផ្សារទំនើប ភាគជាអ្នករស់នៅក្នុងទីក្រុង និងមានកម្រិតជីវភាពធូរធាតែប៉ុណ្ណោះ។ លោកបន្តទៀតថា “មនុស្សភាគច្រើន ជាពិសេសបងប្អូនមកពីតាមបណ្តាខេត្ត ឬជាយក្រុងជាដើម ពួកគាតចូលទៅផ្សារទំនើប ក្នុងគោលបំណងកម្សាន្តច្រើន ជាងការទិញសម្ភារៈប្រើប្រាស់ និងចំណីអាហារ។

លោកបន្តថា នៅប៉ុន្មានឆ្នាំទៀត ក្រោយពេលដែលកំណើនសេដ្ឋកិច្ច នៅតែមានភាពល្អប្រសើរ កម្រិតជីវភាពប្រជាពលរដ្ឋមានកំណើនល្អ នោះតម្រូវការនៃការប្រើប្រាស់ផ្សារទំនើបនឹងកើនឡើង”៕

ការទម្លាក់តម្លៃប្រាក់យ័នរបស់ចិនជាការទះកំផ្លៀងលោកប្រធានាធិបតី Donald Trump

August 7, 2019

0

ដោយ Donald Lee

ប៉េកាំងៈ អតីតឯកអគ្គរដ្ឋទូតសហរដ្ឋអាមេរិកប្រចាំនៅប្រទេសចិន បាននិយាយថា ការឆ្លើយតបរបស់ចិន ចំពោះការដំឡើងពន្ធរបស់លោកប្រធានាធិបតីអាមេរិក Donald Trump គឺស្មើនឹងការទះកំផ្លៀងមេដឹកនាំអាមេរិក។

ទីក្រុងប៉េកាំងបានទម្លាក់តម្លៃរូបិយប័ណ្ណរបស់ខ្លួន ទៅនឹងប្រាក់ដុល្លារដល់កម្រិតទាបបំផុត ដែលមានធ្លាប់កើតឡើងក្នុងរយៈពេល១១ឆ្នាំ បន្ទាប់ពីការបញ្ចប់នៃកិច្ចពិភាក្សាពាណិជ្ជកម្មកាលពីសប្តាហ៍មុន និងការប្រកាសរបស់លោក Trump ថា លោកនឹងតំឡើងពន្ធលើទំនិញចិន ដែលមានតម្លៃជាទឹកប្រាក់ប្រមាណ៣០០ពាន់លានដុល្លារ។

អតីតឯកអគ្គរដ្ឋទូតអាមេរិកប្រចាំប្រទេសចិន Max Baucus បាននិយាយថា “វាពិតជាការទះកំផ្លៀង ចំពោះលោកប្រធានាធិបតី Trump [សម្រាប់ប្រទេសចិន] ក្នុងការអនុវត្តពន្ធគយទាំងនោះ បន្ទាប់ពីកិច្ចពិភាក្សាក្រុងសៀងហៃ។

អតីតឯកអគ្គរដ្ឋទូត ដែលបានបំពេញភារកិច្ច ក្នុងអំឡុងរដ្ឋបាលប្រធានាធិបតីអាមេរិក Barack Obama បានបន្ថែមថា “ប្រទេសចិនគិតថាការធ្វើរបស់ Trump គឺមិនត្រឹមត្រូវ ដូច្នេះយើងនឹងធ្វើការទម្លាក់តម្លៃរូបិយប័ណ្ណ ដើម្បីឆ្លើយតបនឹងលោក Trump”។

លោកឯកអគ្គរដ្ឋទូត ក៏បានថ្លែងផងដែរថា វិធីសាស្ត្រមិនចេះអត់ធ្មត់របស់លោក Trump មិនឱ្យតម្លៃខ្ពស់ចំពោះការចរចាពាណិជ្ជកម្មរបស់ចិនទេ។

លោក Baucus បាននិយាយថា “គន្លឹះនៅទីនេះ គឺដើម្បីឱ្យយើងទទួលបានស្ថេរភាព និងអាចព្យាករណ៍បានកាន់តែច្រើន និងវិធីធ្វើនោះគឺត្រូវអត់ធ្មត់បន្តិច។

លោកបានពន្យល់ថា “នេះជាវិធីមួយដែលកំពុងបង្កើនល្បឿន រវាងប្រទេសយើងទាំងពីរ។ យើងត្រូវការមនុស្សពេញវ័យទាំងសងខាង ដើម្បីបញ្ឈប់ភាពមិនសមហេតុសមផលនេះ”៕

៦ជំហ៊ានពី Propertyarea.asia ដើម្បីឆ្ពោះទៅមុខកាន់តែឆ្ងាយជាងមុន

August 7, 2019

0

ដោយៈយិន លាងគង់ស្ថាបនិក និងជាអគ្គនាយកគេហទំព័រ Propertyarea.asia

ភ្នំពេញៈ មិត្តអ្នកអានជាទីគោរពស្រលាញ់! បន្ទាប់ពីបានដាក់ឲ្យដំណើរការគេហទំព័រ Propertyarea.asia រយៈពេលជិត២ឆ្នាំមកនេះ យើងបានទទួលការគាំទ្រយ៉ាងច្រើនពីស្រទាប់មហាជន ពិសេសអ្នកវិនិយោគជាតិ អន្តរជាតិនានានៅក្នុង និងក្រៅប្រទេស។

ឈរលើក្រមសីលធម៌ និងមូលដ្ឋានវិជ្ជាជីវៈ តាមរយៈការផ្តល់ព័ត៌មានពិត ឥតលំអៀង យើងបាននិងកំពុងចូលរួមចំណែកជាមួយរដ្ឋាភិបាល ដើម្បីលើកកំពស់កិត្យានុភាពជាតិ ទៅកាន់ឆាកអន្តរជាតិ និងឆ្លុះបញ្ចាំងពីការអភិវឌ្ឍសេដ្ឋកិច្ច សង្គមកម្ពុជា ពិសេសលើវិស័យសំណង់ និងអចលនទ្រព្យ។

“ទឹកឃ្មុំមួយដំណក់់អាចចាប់រ៉ុយបានរាប់រយក្បាល (ព័ត៌មានវិជ្ជមាន) ផ្ទុយទៅវិញថ្នាំពុលមួយពាន់លីត្រ មិនអាចចាប់រុយបាននោះទេ”។

សារខាងលើនេះ “ជាគុណតម្លៃនៃព័ត៌មានរបស់យើង” ព្រោះយើងឈរលើមូលដ្ឋាននៃការវិភាគ ពិចារណាគ្រប់ជ្រុងជ្រោយ និងផ្សារភ្ជាប់ជាមួយមូលដ្ឋានវិជ្ជាជីវៈ ដែលជាតម្លៃស្នូលរបស់យើង។ នេះជាអ្វីដែលយើងកំពុងផ្តោតការយកចិត្តទុកដាក់ ហើយដឹកនាំ និងក្រុមការងារទាំងអស់នៃក្រុមហ៊ុន Propertyarea.asia បាននិងកំពុងផ្តល់ព័ត៌មានលើភាពវិជ្ជមាន ប៉ុន្តែតិទៀនក្នុងន័យស្ថាបនា។

ដោយសារបទពិសោធន៍ គួបផ្សំជាមួយវិជ្ជាជីវៈ និងការរកឃើញនូវគុណតម្លៃស្នូលក្នុងវិស័យសារព័ត៌មាននេះហើយ ទើប Propertyarea.asia បានធ្វើឲ្យមានឥទ្ធិពល ក្នុងវិស័យសារព័ត៌មានបែបឌីជីថលនៅកម្ពុជា។ ជាក់ស្តែងព័ត៌មានរបស់យើងត្រូវបានស្ថាប័នរដ្ឋាភិបាល អ្នកវិនិយោគជាតិ អន្តរជាតិ ប្រជាពលរដ្ឋយកទៅធ្វើជាឯកសារយោងសំរាប់ធ្វើជាមូលដ្ឋាននៃគំរោងវិនិយោគរបស់ពួកគេ។

បច្ចុប្បន្ននេះ មានបណ្តាញសារព៌តមានតាមអនឡាញចន្លោះពី៦០ ទៅ៧០បានកូពីព៌តមានរបស់យើងខ្ញុំ យកទៅចុះផ្សាយនៅលើគេហទំព័ររបស់ពួកគេ។

ជាមួយនឹងការវិវត្តជាវិជ្ជមាននេះ ក្រុមការងាររបស់យើងខ្ញុំបាន និងកំពុងរៀបចំផ្សព្វផ្សាយព័ត៌មានរបស់យើងខ្ញុំ ទៅកាន់បណ្តាញទំនាក់ទំនងសង្គមដទៃទៀត ក្នុងគោលដៅធ្វើយ៉ាងណាឲ្យព័ត៌មានរបស់យើង ទៅដល់មនុស្សជាច្រើនទៀតនៅជុំវិញពិភពលោក ជាមួយព័ត៌មានលឿនជាងមុន កាន់តែមានសុក្រិតភាពជាងមុន និងអាចផ្តល់នូវចំណេះដឹងថ្មីៗជាច្រើនទៀតដល់ស្រទាប់មហាជន ពិសេសអ្នកវិនិយោគជាតិ អន្តរជាតិប្រើប្រាស់ជាទុនចំណេះដឹង ដើម្បីធ្វើជាមូលដ្ឋានពិចារណា និងវិភាគ។

ហេតុនេះទើបក្រុមការងារបច្ចេកទេសរបស់យើង បានបង្កើននូវការផ្សព្វផ្សាយតាមរយៈបណ្តាញទំនាក់ទំនងសង្គមកាន់តែច្រើន ដូចជា Line ដែលលោកអ្នកអាចចូលអានតាមរយៈអាស័យដ្ឋាន [email protected], Instagram តាមរយៈអាស័យដ្ឋាន propertyareaasia, Twitter តាមរយៈអាស័យដ្ឋាន AreaAsia, Linkedin តាមរយៈអាស័យដ្ឋាន [email protected], Telegram តាមរយៈអាស័យដ្ឋានt.me/propertyarea_asia និង Property Tv Cambodia ដែលផ្តោតលើព័ត៌មានថ្មីៗ ទាន់ហេតុការណ៍ ទាំងជាតិ និងអន្តរជាតិ ពិសេសទាក់ទងនឹងចំណេះដឹងថ្មីក្នុងវិស័យអចលនទ្រព្យកម្ពុជា។

យើងខ្ញុំស្វាគមន៍រាល់ការផ្តល់យោបល់ ប្រកបដោយគុណតម្លៃ ហើយយើងរីករាយក្នុងការទទួលយកការរិះគន់ ប្រកបដោយគតិបណ្ឌិតរបស់លោក លោកស្រី គ្រប់ពេលវេលា។

សូមអរគុណដល់បណ្តាក្រុមហ៊ុននានា ដែលតែងតែឧបត្ថម្ភគាំទ្រគេហទំព័ររបស់យើងខ្ញុំតាមរយៈវេបសាយក្តី តាមរយៈ Facebook Page ក្តី សូមគោរពជូនពរ លោក លោកស្រីឲ្យជួបប្រទះតែសេចក្តីសុខ សុភមង្គល និងទទួលជោគជ័យលើគ្រប់មុខជំនួញ ឬអាជីវកម្មនានា៕

រដ្ឋាភិបាលសម្រេចកាត់បន្ថយថ្ងៃឈប់សម្រាកចំនួន ៦ថ្ងៃ នៅឆ្នាំ២០២០ខាងមុខ

August 7, 2019

0

ដោយ នៅ ស៊ីវុត្ថា

ភ្នំពេញៈ រាជរដ្ឋាភិបាលកម្ពុជាបានចេញអនុក្រឹត្យស្ដីពី ប្រតិទិនឈប់សម្រាកការងាររបស់មន្ត្រីរាជការ និយោជិត កម្មករប្រចាំឆ្នាំ២០២០ ដោយបានកាត់បន្ថយថ្ងៃឈប់សម្រាកចំនួន៦ថ្ងៃ នៅឆ្នាំ២០២០ខាងមុខ។

នៅក្នុងអនុក្រឹត្យដែលចុះហត្ថលេខាដោយប្រមុខរាជរដ្ឋាភិបាល នៃព្រះរាជាណាចក្រកម្ពុជា សម្ដេចតេជោហ៊ុន សែន ចុះនៅថ្ងៃទី២ ខែសីហា ឆ្នាំ២០១៩បានឱ្យដឹងថា រាជរដ្ឋាភិបាលកម្ពុជា បានសម្រេចកាត់បន្ថយថ្ងៃឈប់សម្រាក ក្នុងព្រះរាជពិធីបុណ្យចម្រើន ព្រះជន្មព្រះមហាក្សត្រខ្មែរ ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី មកនៅត្រឹមចំនួន១ថ្ងៃ និងបានប្រកាសលែងឱ្យឈប់សម្រាកក្នុងពិធីបុណ្យ និងទិវាចំនួន ៥ គឺ ៖ ១) ពិធីបុណ្យមាឃបូជា ដែលតែងតែប្រារព្ធឡើងនៅថ្ងៃ១៥ កើត ខែមាឃ ជារៀងរាល់ឆ្នាំ ២) ទិវាជាតិនៃការចងចាំ ដែលតែងតែប្រារព្ធឡើងនៅថ្ងៃទី២០ ខែឧសភា ជារៀងរាល់ឆ្នាំ ៣) ទិវាកុមារអន្តរជាតិ ដែលតែងតែប្រារព្ធឡើងនៅថ្ងៃទី២០ ខែឧសភា ជារៀងរាល់ឆ្នាំ ៤) ទិវារំឭកខួប នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា និង៥) ទិវាសិទ្ធិមនុស្ស១០ ធ្នូ។

ចំណែកឯថ្ងៃឈប់សម្រាកសម្រាប់ពិធីបុណ្យចូលឆ្នាំថ្មី ប្រពៃណីជាតិខ្មែរវិញ នៅឆ្នាំ២០២០ ខាងមុខ ប្រជាពលរដ្ឋខ្មែរ មិនថាមន្ត្រីរាជការ និយោជិត ឬកម្មករនោះទេ នឹងត្រូវបានអនុញ្ញាតឱ្យឈប់សម្រាកបន្ថែម មុនពិធីបុណ្យនេះមួយថ្ងៃ គឺនៅថ្ងៃចន្ទទី១៣ ខែមេសា ឆ្នាំ២០២។

រដ្ឋាភិបាលកម្ពុជាធ្លាប់បានឱ្យដឹងថា ការកាត់បន្ថយថ្ងៃឈប់សម្រាកសាធារណៈ នឹងក្លាយទៅជាយុទ្ធសាស្ត្រសំខាន់មួយ ក្នុងចំណោមយុទ្ធសាស្ត្រដ៏មានប្រសិទ្ធភាពដទៃផ្សេងទៀត សម្រាប់ជំរុញ និងលើកទឹកចិត្តដល់វិនិយោគិនជាតិ និងអន្តរជាតិ ក៏ដូចជាសហគ្រិនក្នុងស្រុកទាំងឡាយ ឱ្យមានទស្សនទានប្រកបដោយភាពវិជ្ជមាន សម្រាប់ការរីកចម្រើន និរន្តរភាពនៃដំណើរការអាជីវកម្ម ក៏ដូចជាលទ្ធភាពបង្កើនប្រាក់ចំណេញរបស់ខ្លួននៅកម្ពុជា៕