តើបុគ្គលរូបណាខ្លះជាប់ជាកំពូលមហាសេដ្ឋីអចលនទ្រព្យលំដាប់កំពូលទាំង៥របស់សឹង្ហបុរី?

ដោយៈ ម៉ាណា

សឹង្ហបុរីៈ សឹង្ហបុរីជាប្រទេសមួយ មានមហាសេដ្ឋីច្រើនជាងគេបំផុតនៅក្នុងតំបន់អាស៊ាន ហើយបើគិតពីចំនួនសេដ្ឋីក៏មានចំនួនច្រើនផងដែរ។

តើបុគ្គលរូបណាខ្លះ ជាប់ជាកំពូលមហាសេដ្ឋីអចលនទ្រព្យ ដែលមានទ្រព្យសម្បត្តិច្រើនជាងគេនៅក្នុងឆ្នាំ២០២៦នេះ?

១.លោក Jason Chang

មហាសេដ្ឋីរូបនេះមានទ្រព្យសម្បត្តិសរុប ប្រមាណ១៤,២ ពាន់លានដុល្លារអាមេរិក។ លោកប្រធានផ្នែកវិស្វកម្មសេមីកុងដុកទ័រកម្រិតខ្ពស់ (ASE)ឧស្សាហកម្មសេមីកុងដុកទ័រ។

២.លោក Li Xiting

មហាសេដ្ឋីរូបនេះ មានទ្រព្យសម្បត្តិសរុបប្រហែល១១,២ ពាន់លានដុល្លារអាមេរិក។ លោកជាសហស្ថាបនិកក្រុមហ៊ុន Mindray Medical និងឧបករណ៍ថែទាំសុខភាព។

៣.លោក Philip Ng

មហាសេដ្ឋីរូបនេះ មានទ្រព្យសម្បត្តិសរុបប្រមាណ៧,២ ពាន់លានដុល្លារអាមេរិក។ លោកជាប្រធានក្រុមហ៊ុនFar East អចលនទ្រព្យ។

៤.លោក Robert Ng

មហាសេដ្ឋីរូបនេះ មានទ្រព្យសម្បត្តិសរុបប្រមាណ៧,១ ពាន់លានដុល្លារអាមេរិក។ លោកជាសហស្ថាបនិកក្រុមហ៊ុន Far East អចលនទ្រព្យផងដែរ។

៥.លោក Zhang Yong

មហាសេដ្ឋីរូបនេះ មានទ្រព្យសម្បត្តិសរុបប្រមាណ៤,៩ ពាន់លានដុល្លារអាមេរិក។ ស្ថាបនិកខ្សែសង្វាក់ភោជនីយដ្ឋាន Haidilao hotpot

ការសង្កេតសំខាន់ៗ។ បច្ចេកវិទ្យា និងឧបករណ៍អេឡិចត្រូនិកឥឡូវនេះនាំមុខគេ ក្នុងចំណាត់ថ្នាក់ទ្រព្យសម្បត្តិរបស់ប្រទេសសិង្ហបុរី។

អចលនទ្រព្យនៅតែជាប្រភពទ្រព្យសម្បត្តិ មហាសេដ្ឋីដ៏ធំបំផុតមួយរបស់ប្រទេស តាមរយៈអង្គការចុងបូព៌ារបស់បងប្អូនNg។

ប្រទេសសិង្ហបុរីមានមហាសេដ្ឋីចំនួន៥៥នាក់ ក្នុងឆ្នាំ២០២៦នេះកើនឡើងពី៤៩នាក់ ក្នុងឆ្នាំ២០២៥ ដែលឆ្លុះបញ្ចាំងពីការរីកចម្រើនជាបន្តបន្ទាប់ ក្នុងនាមជាមជ្ឈមណ្ឌលហិរញ្ញវត្ថុ និងអាជីវកម្មសកល៕

តម្លៃខុនដូថ្មីជាមធ្យមនៅក្នុងទីក្រុងតូក្យូហក់ឡើងដល់ជាង ១០០ លានយ៉េន

ដោយ: សហសេវិក
អន្តរជាតិ: តម្លៃខុនដូថ្មីជាមធ្យមនៅក្នុងទីក្រុងតូក្យូ និងខេត្តជុំវិញទាំង៣ បានហក់ឡើងដល់ជាង ១០០ លានយ៉េន (៦១៥.០០០ ដុល្លារ) ជាលើកដំបូងនៅក្នុងឆមាសទីមួយនៃឆ្នាំ ២០២៦ ដោយបំបែកកំណត់ត្រាថ្មីចំនួន១០១,៣៥ លានយ៉េន។

យោងតាមវិទ្យាស្ថានសេដ្ឋកិច្ចអចលនទ្រព្យ តម្លៃខុនដូថ្មីជាមធ្យមនៅទីក្រុងតូក្យូ និងខេត្តជុំវិញដូចជា ឈីបា កាណាហ្គាវ៉ា និងសៃតាម៉ា បានកើនឡើង ១៣,១% ធៀបនឹងឆ្នាំមុន ដោយសារការកើនឡើងនៃថ្លៃដើមនៃការសាងសង់។

បើគិតតាមតំបន់ តម្លៃខុនដូថ្មីជាមធ្យមនៅកណ្តាលទីក្រុងតូក្យូបានកើនឡើង ៩,១% ដល់ ១៤២,៤៩ លានយ៉េនពីខែមករាដល់ខែមិថុនា ដែលជាកម្រិតខ្ពស់បំផុតចាប់តាំងពីទិន្នន័យប្រៀបធៀបមាននៅឆ្នាំ ១៩៧៣។

ជាមួយគ្នានេះ តម្លៃខុនដូជាមធ្យមនៅក្នុងខេត្ត Chiba បានកើនឡើង៥៦,៨ភាគរយដល់៨៩,៩៧លានយ៉េន។ តួលេខនេះបានកើនឡើង២០ភាគរយដល់៨៣,៤៦លានយ៉េននៅក្នុងខេត្ត Kanagawa។

ចំនួនខុនដូថ្មីដែលបានចុះបញ្ជីសម្រាប់លក់នៅទីក្រុងតូក្យូ និងខេត្តទាំងនេះបានធ្លាក់ចុះ ០,៨ភាគរយមកនៅត្រឹមចំនួន៧.៩៨៩ យូនីត ដែលជាការធ្លាក់ចុះលើកទី៥ ជាប់ៗគ្នាក្នុងឆមាសទីមួយ៕

មន្រ្តីជាន់ខ្ពស់ពិភាក្សាលើឧស្សាហកម្មយានយន្តក្នុងស្រុក និងការប្រកួតប្រជែងក្នុងវិស័យយានយន្ត

ដោយៈ ចំណាន

ភ្នំពេញៈ លោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និងជាប្រធានក្រុមការងារ លើកទឹកចិត្តគម្រោងវិនិយោគផ្គុំ និងដំឡើងយានយន្ត ដឹកនាំកិច្ចប្រជុំពិភាក្សា លើឧស្សាហកម្មយានយន្តក្នុងស្រុក និង ការប្រកួតប្រជែងក្នុងវិស័យយានយន្ត។

កិច្ចប្រជុំនេះ មានការចូលរួមពីតំណាង ក្រសួងពាណិជ្ជកម្ម ក្រសួងរ៉ែ និងថាមពល ក្រសួងឧស្សាហកម្ម វិទ្យាសាស្ត្របច្ចេកវិទ្យា និង នវានុវត្តន៍ ក្រសួងសាធារណការ និងដឹកជញ្ជូន ក្រុមប្រឹក្សាអភិវឌ្ឍន៍កម្ពុជា ព្រមទាំងអគ្គនាយកដ្ឋានពាក់ព័ន្ធ នៃក្រសួងសេដ្ឋកិច្ច និងហិរញ្ញវត្ថុ រួមមានអគ្គនាយកដ្ឋានគយ និងរដ្ឋាករកម្ពុជា អគ្គនាយកដ្ឋានពន្ធដារ និង អគ្គនាយកដ្ឋានគោលនយោបាយ។

កិច្ចពិភាក្សាបានផ្តោតលើទិដ្ឋភាពចំនួន ៣ គឺ ១) ការប្រើប្រាស់យានយន្តអគ្គិសនី និងផលិតកម្មយានយន្តក្នុងស្រុក ២) អនុលោមភាពនៃបទប្បញ្ញត្តិក្នុងវិស័យយានយន្ត និង៣) បរិយាកាសប្រកួតប្រជែងក្នុងវិស័យយានយន្តក្នុងព្រះរាជាណាចក្រកម្ពុជា។

លោកបណ្ឌិតសភាចារ្យ ហ៊ាន សាហ៊ីប បានមានប្រសាសន៍ថា រាជរដ្ឋាភិបាល បានដាក់ចេញគោលនយោបាយជាច្រើន ដើម្បីជំរុញឧស្សាហកម្មយានយន្តក្នុងស្រុក និងការប្រើប្រាស់យានយន្តអគ្គិសនី ឆ្លើយតបទៅនឹងតម្រូវការអភិវឌ្ឍសង្គម និងសេដ្ឋកិច្ចជាតិ។

លោកបញ្ជាក់ថា“ការប្រែប្រួលថ្មីៗនេះ ទាំងក្នុងក្របខណ្ឌសកល តំបន់ និងក្នុងប្រទេស តម្រូវឱ្យកម្ពុជាសិក្សា និងពិនិត្យមើលការអនុវត្តគោលនយោបាយ និងវិធានការនានា ដើម្បីឆ្លើយតបទៅនឹងគោលបំណងគោលនយោបាយរបស់រាជរដ្ឋាភិបាល និងបំណងប្រថ្នារបស់ប្រជាជន”។

លោកបណ្ឌិតសភាចារ្យ បានណែនាំឱ្យក្រុមការងារ និង អង្គភាពពាក់ព័ន្ធ បន្តសហការជិតស្និទ្ធក្នុងការសិក្សា និងវាយតម្លៃអំពីឧស្សាហកម្មយានយន្ត ដើម្បីពង្រឹងបរិយាកាសវិនិយោគ លើកកម្ពស់ការផលិត និង ការផ្គុំនិងដំឡើងយានយន្តក្នុងស្រុក សំដៅជំរុញការអភិវឌ្ឍវិស័យយានយន្តកម្ពុជា ប្រកបដោយភាពប្រកួតប្រជែង និងចីរភាព៕

ឯកអគ្គរដ្ឋទូតចិនស្វាគមន៍ដាក់ឲ្យដំណើរការជាផ្លូវការនូវយន្តការសហប្រតិបត្តិការរវាងគយកម្ពុជា និងសមាគមពាណិជ្ជកម្មចិន

ដោយៈ ចំណាន

ភ្នំពេញៈ ឯកអគ្គរដ្ឋទូតចិនបានបង្ហាញការ អបអរសាទរយ៉ាងកក់ក្ដៅ ចំពោះការដាក់ឲ្យដំណើរការជាផ្លូវការនូវ “យន្តការសហប្រតិបត្តិការរវាងគយកម្ពុជា និងសមាគមពាណិជ្ជកម្មចិន”។

លោកវ៉ាង វេនប៊ិន ឯកអគ្គរដ្ឋទូតចិនប្រចាំកម្ពុជាបានសរសេរលើបណ្តាញទំនាក់ទំនងសង្គមផ្លូវការកាលពីថ្ងៃទី២៣ កក្កដាថា នេះគឺជាវិធានការវិជ្ជមានមួយ ក្នុងការអនុវត្តលទ្ធផលនៃដំណើរទស្សនកិច្ចនៅប្រទេសចិនរបស់ សម្តេចតេជោហ៊ុន សែន និងសម្តេចធិបតី ហ៊ុន ម៉ាណែត ព្រមទាំងជួយរឹតចំណងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិន និងកម្ពុជាឱ្យកាន់តែស៊ីជម្រៅ។

លោកបញ្ជាក់ថា “ប្រទេសចិន បានក្លាយជាដៃគូពាណិជ្ជកម្មធំជាងគេ របស់កម្ពុជារយៈពេល១៤ឆ្នាំជាប់ៗគ្នាមកហើយ”។ លោកបន្ថែមថា “នៅក្នុងឆមាសទី១ ឆ្នាំនេះ ទំហំពាណិជ្ជកម្មទ្វេភាគីរវាងចិន និងកម្ពុជា បានកើនឡើង២៥,៤% បើធៀបនឹងរយៈពេលដូចគ្នាកាលពីឆ្នាំមុន”។

លោកបន្តថា ផលិតផលកសិកម្ម និងផលិតផលពិសេសៗដែលមានគុណភាពខ្ពស់របស់កម្ពុជាកាន់តែច្រើនឡើងៗដូចជា ធុរេន មៀនគៀម និងខ្នុរ ជាដើម ត្រូវបាននាំចេញទៅកាន់ទីផ្សារចិន។

លោកឯកអគ្គរដ្ឋទូតបានបន្តថា យើងខ្ញុំជឿជាក់ថា យន្តការសហប្រតិបត្តិការរវាងគយកម្ពុជា និងសមាគមពាណិជ្ជកម្មចិន នឹងដើរតួនាទីយ៉ាងសកម្មក្នុងទំនាក់ទំនងជាប្រចាំ រវាងសហគ្រាសចិន និងគយកម្ពុជា ដែលនឹងជួយលើកកម្ពស់កម្រិតភាពងាយសម្រួល នៃពាណិជ្ជកម្មបន្ថែមទៀត ព្រមទាំងរួមចំណែកជំរុញកិច្ចសហប្រតិបត្តិការ សេដ្ឋកិច្ច និងពាណិជ្ជកម្ម រវាងប្រទេសទាំងពីរឱ្យកាន់តែរីកធំធាត់ និងមានគុណភាពខ្ពស់ឡើង៕

ក្រុមអ្នកជំនាញពិភាក្សាលើយុទ្ធសាស្រ្តឆ្លាតវៃ សម្រាប់អ្នកជំនាញអចលនទ្រព្យ ក្នុងអំឡុងពេលទីផ្សារកំពុងប្រឈម

ដោយៈ គង់ សូរិយា

ភ្នំពេញៈ ខណៈពេលទីផ្សារអចលនទ្រព្យកម្ពុជា កំពុងជួបប្រទះនូវបញ្ហាប្រឈម និងភាពមិនច្បាស់លាស់ ការបំពាក់បំប៉ននូវចំណេះដឹង ទស្សនវិស័យ ព្រមទាំងយុទ្ធសាស្រ្តត្រឹមត្រូវ គឺជាគន្លឹះដ៏សំខាន់បំផុតក្នុងការរក្សាភាពប្រកួតប្រជែង ពង្រឹងសមត្ថភាពវិជ្ជាជីវៈ និងដើរទៅរកភាពជោគជ័យក្នុងអាជីព។

ដើម្បីឆ្លើយតបទៅនឹងតម្រូវការជាក់ស្តែងនេះ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នៅថ្ងៃទី២៣ ខែកក្កដា ឆ្នាំ២០២៦ បានរៀបចំសិក្ខាសាលាពិសេសមួយ ក្រោមប្រធានបទ «យុទ្ធសាស្រ្តឆ្លាតវៃ សម្រាប់អ្នកជំនាញអចលនទ្រព្យ ក្នុងអំឡុងពេលទីផ្សារកំពុងប្រឈម» (Smart Strategies for Real Estate Professionals In a Challenging Market)។

កម្មវិធីសិក្ខាសាលាខាងលើនេះ ត្រូវបានរៀបចំឡើងក្រោមអធិបតីភាពរបស់ លោកឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។

កម្មវិធីនេះក៏មានការចូលរួមពីវាគ្មិនកិត្តិយស និងអ្នកសម្របសម្រួលរួមមាន

១. លោកស្រី អាន សុធីដា នាយិកាប្រតិបត្តិនៃក្រុមហ៊ុន PropNex Cambodia។

២. លោកស្រី គឹម គិនកេសា នាយិកាប្រតិបត្តិនៃក្រុមហ៊ុន Advantage Property Services។

៣. លោក ងួន ឆាយលាង អគ្គនាយកនៃក្រុមហ៊ុន Pointer Property។

៤. លោក សេង សុភ័ក្រ អនុប្រធានសមាគម CVEA និងជាអគ្គនាយកក្រុមហ៊ុន International Real Estate and Appraisal (IRA)។

៥. បណ្ឌិត ឆាក់ លឹមឈាង ប្រធានផ្នែកអចលនទ្រព្យ និងសំណង់ នៃមេធាវី សិទ្ធិស័ក្តិ (Sithisak Law Office) និង

៦. លោក ស៊ា ឆៃលីន អនុប្រធានសមាគម CVEA និងជាប្រធានក្រុមប្រឹក្សាភិបាល Chailin Sear Realty រួមនិងសិក្ខាកាមប្រមាណ៨០នាក់ផងដែរ។

លោកឧកញ៉ាសន សៀបបានមានប្រសាសន៍ថា “អតិថិជននាពេលបច្ចុប្បន្ន មិនមែនទាមទារតែការវិនិយោគ លឿនមុនគេនោះទេ ប៉ុន្តែពួកគាត់សម្លឹងមើលលើភាពជាក់លាក់ ពិតប្រាកដ និងកម្រិតនៃទំនុកចិត្ត ដើម្បីធានាថាការវិនិយោគនោះ មិនមានហានិភ័យទៅថ្ងៃអនាគត”។ លោកបន្ថែមថា “ដូច្នេះអ្នកជំនាញ និងភ្នាក់ងារអចលនទ្រព្យទាំងអស់ ត្រូវតែផ្តល់សេវាកម្មប្រកបដោយសុចរិតភាព គ្មានការលំអៀង មានសមត្ថភាពខ្ពស់ និងរក្សាការសម្ងាត់ជូនអតិថិជនឱ្យបានល្អប្រសើរបំផុត”។

ប្រធានសមាគមរូបនេះ ក៏បានលើកទឹកចិត្តដល់សិក្ខាកាមទាំងអស់ ឱ្យនាំយកនូវចំណេះដឹង និងបទពិសោធន៍ដែលទទួលបានពីសិក្ខាសាលានេះ ទៅច្នៃប្រឌិត និងអនុវត្តជាក់ស្តែងក្នុងអាជីវកម្មរបស់ខ្លួន ដើម្បទទួលបានលទ្ធផលកាន់តែត្រចះត្រចង់។

តាមរយៈសិក្ខាសាលាខាងលើ សិក្ខាកាមដែលបានចូលរួមទាំងអស់ទទួលបាននូវចំណេះដឹង និងបទពិសោធន៍សំខាន់ៗជាច្រើន រួមមាន យុទ្ធសាស្រ្តលក់ និងទីផ្សារ៖ គន្លឹះបង្កើនការលក់ក្នុងទីផ្សារប្រែប្រួល វិធីសាស្ត្រស្វែងរកអតិថិជន និងបិទការលក់ប្រកបដោយប្រសិទ្ធភាព។

ការវិភាគទីផ្សារ៖ ការយល់ដឹងអំពីនិន្នាការ ទិសដៅទីផ្សារបច្ចុប្បន្ន និងអនាគត ព្រមទាំងការចាប់យកឱកាសវិនិយោគ។

ការកសាងទំនាក់ទំនង៖ វិធីសាស្រ្តកសាង និងពង្រឹងទំនាក់ទំនងជាមួយអតិថិជនឱ្យបានយូរអង្វែង។

បណ្តាញទំនាក់ទំនង (Networking)៖ ឱកាសក្នុងការបង្កើតទំនាក់ទំនងជាមួយអ្នកជំនាញ ភ្នាក់ងារ អ្នកវាយតម្លៃ អ្នកអភិវឌ្ឍន៍គម្រោង និងអ្នកវិនិយោគជានាំមុខជាច្រើនរូប។

នៅក្នុងឱកាសនោះផងដែរ លោកឧកញ៉ា សន សៀប បានវាយតម្លៃខ្ពស់ ចំពោះការរៀបចំសិក្ខាសាលានេះ។ ដោយលោកបានគូសបញ្ជាក់ថា “កម្មវិធីនេះ ធាតុពិតទៅយើងចង់បង្កើតទំនុកចិត្ត ទៅដល់ទីផ្សារ។ ដើម្បីបង្កើតទំនុកចិត្តដល់ទីផ្សារបាន លុះត្រាតែអ្នកជំនាញវិជ្ជាជីវៈរបស់យើង អាចផ្តល់ទំនុកចិត្តដល់អតិថិជនបាន”។

ដើម្បីសម្រេចបាននូវចំណុចនេះ យើងត្រូវផ្ដោតលើកត្តាសំខាន់ៗចំនួន៣ រួមមាន

១. កត្តាមនុស្ស៖ ចូលរួមអភិវឌ្ឍ និងបង្កើនសមត្ថភាពខ្លួនឯងជាប្រចាំ។

២. បច្ចេកវិទ្យា៖ ប្រើប្រាស់បច្ចេកវិទ្យាឱ្យបានលឿន និងមានប្រសិទ្ធភាពខ្ពស់។

៣. ក្រមសីលធម៌វិជ្ជាជីវៈ៖ គោរពប្រតិបត្តិក្រមសីលធម៌ ឱ្យបានម៉ឺងម៉ាត់ ដើម្បីឱ្យអតិថិជនជឿទុកចិត្តលើសេវាកម្មរបស់យើង៕

តើអ្វីជាសក្តានុពលជម្រុញភាពវិជ្ជមានក្នុងវិស័យអចលនទ្រព្យ នៅកម្ពុជាក្នុងឆ្នាំ២០២៦នេះ?

ដោយៈ ស៊ីវ ម៉េង

ភ្នំពេញៈ ទោះបីជាទីផ្សារអចលនទ្រព្យ របស់ប្រទេសកម្ពុជាកំពុងប្រឈមមុខនឹងបញ្ហាប្រឈមក៏ដោយ ក៏នៅមានកត្តាវិជ្ជមានជាច្រើនសម្រាប់អចលនទ្រព្យនៅឆ្នាំ២០២៦ ដែលអ្នកវិភាគអាជីពជាច្រើនបានគូសបញ្ជាក់។

១. សេដ្ឋកិច្ចកម្ពុជាបន្តរីកចម្រើន

មូលនិធិរូបិយវត្ថុអន្តរជាតិ(IMF) ធនាគារអភិវឌ្ឍន៍អាស៊ី (ADB) និងធនាគារពិភពលោក (World Bank) រំពឹងថាសេដ្ឋកិច្ចកម្ពុជានឹងបន្តរីកចម្រើននៅឆ្នាំ២០២៦ ទោះបីជាស្ថិតក្នុងល្បឿនមធ្យមក៏ដោយ។ កំណើនសេដ្ឋកិច្ចគាំទ្រដល់តម្រូវការលំនៅដ្ឋាន លក់រាយ ឃ្លាំង និងអចលនទ្រព្យឧស្សាហកម្មក្នុងរយៈពេលមធ្យម។

២. គម្រោងហេដ្ឋារចនាសម្ព័ន្ធសំខាន់ៗកំពុងបង្កើតច្រករបៀងកំណើនថ្មី

គម្រោងហេដ្ឋារចនាសម្ព័ន្ធដែលផ្តល់ផលវិជ្ជមាន ដល់វិស័យនេះរួមមានទី១ អាកាសយានដ្ឋានអន្តរជាតិតេជោ ទី២ ផ្លូវល្បឿនលឿនភ្នំពេញ-ព្រះសីហនុ ទី៣ ផ្លូវក្រវ៉ាត់ និងការធ្វើឱ្យប្រសើរឡើងនូវផ្លូវជាតិ និងទី៤ ការរីកចម្រើនវិស័យតំបន់ភស្តុភារ និងឧស្សាហកម្ម។

គម្រោងទាំងនេះធ្វើអោយប្រសើរឡើង នូវភាពងាយស្រួលចូលប្រើប្រាស់ និងមានទំនោរបង្កើនតម្រូវការរយៈពេលវែង សម្រាប់ដីធ្លី អចលនទ្រព្យពាណិជ្ជកម្ម និងលំនៅដ្ឋាននៅក្បែរនោះ។

៣. វិស័យឧស្សាហកម្ម និងភស្តុភារនៅតែជាវិស័យមួយក្នុងចំណោមវិស័យខ្លាំងបំផុត

ក្រុមហ៊ុន Knight Frank Cambodia កត់សម្គាល់ថា អចលនទ្រព្យឧស្សាហកម្ម និងភស្តុភារ នៅតែបន្តទទួលបានអត្ថប្រយោជន៍ពីការពង្រីកផលិតកម្ម ការនាំចេញ និងការវិនិយោគខ្សែសង្វាក់ផ្គត់ផ្គង់ ដែលធ្វើឱ្យឃ្លាំង និងឧទ្យានឧស្សាហកម្ម ស្ថិតក្នុងចំណោមផ្នែកអចលនទ្រព្យដែលមានសុខភាពល្អជាងមុន។

៤. តម្លៃទាក់ទាញជាងមុនសម្រាប់វិនិយោគិនរយៈពេលវែង

បន្ទាប់ពីការកែតម្រូវទីផ្សារ អស់រយៈពេលជាច្រើនឆ្នាំ ដីធ្លី និងអចលនទ្រព្យលំនៅដ្ឋានមួយចំនួន អាចរកបានក្នុងតម្លៃសមរម្យជាងអំឡុងពេលឆ្នាំកំពូល។ នេះបង្កើតឱកាស សម្រាប់វិនិយោគិនដែលមានទស្សនវិស័យវិនិយោគយូរអង្វែង ដោយផ្តល់ថាពួកគេជ្រើសរើសទីតាំងដោយប្រុងប្រយ័ត្ន។

៥. អារម្មណ៍វិនិយោគនៅអាស៊ីប៉ាស៊ីហ្វិកកំពុងមានភាពប្រសើរឡើង

ទស្សនវិស័យអាស៊ីប៉ាស៊ីហ្វិកឆ្នាំ ២០២៦ របស់CBRE បានព្យាករណ៍ថា បរិមាណវិនិយោគអចលនទ្រព្យពាណិជ្ជកម្ម នៅក្នុងតំបន់អាចកើនឡើង៥-១០% ក្នុងឆ្នាំ ២០២៦ ខណៈសកម្មភាពជួលត្រូវបានគេរំពឹងថានឹងពង្រឹង។

លើសពីនេះវិនិយោគិនកំពុងផ្តោត ការយកចិត្តទុកដាក់បន្ថែមទៀតលើទ្រព្យសកម្ម ដែលមានគុណភាព និងប្រាក់ចំណូលរយៈពេលវែង។ ខណៈពេលដែលនេះជាទស្សនវិស័យ ក្នុងតំបន់ជាជាងជាក់លាក់ចំពោះប្រទេសកម្ពុជា វាផ្តល់នូវបរិយាកាសគាំទ្រកាន់តែច្រើនសម្រាប់ការវិនិយោគអចលនទ្រព្យនៅទូទាំងអាស៊ី។

ក្រុមហ៊ុនCBRE អាស៊ីប៉ាស៊ីហ្វិក (២០២៦)បានលើកឡើងថា
“ទីផ្សារអចលនទ្រព្យពាណិជ្ជកម្ម អាស៊ីប៉ាស៊ីហ្វិកត្រៀមខ្លួនរួចជាស្រេចសម្រាប់ឆ្នាំរឹងមាំមួយទៀតនៅឆ្នាំ ២០២៦ ដោយទាំងសកម្មភាពវិនិយោគ និងជួលត្រូវបានព្យាករណ៍ថានឹងពង្រឹង”។

លោកស្រី Ada Choi ប្រធានផ្នែកស្រាវជ្រាវ CBRE អាស៊ីប៉ាស៊ីហ្វិកបានលើកឡើងថា វិនិយោគិនកំពុងផ្តោតការយកចិត្តទុកដាក់កាន់តែខ្លាំងឡើង លើភាពធន់នៃប្រាក់ចំណូល ទ្រព្យសកម្មដែលមានគុណភាពខ្ពស់ និងវិស័យដែលមានសក្តានុពល កំណើនរយៈពេលវែង ជាជាងការចំណេញពីការស្មានទុកជាមុន។

Knight Frank ប្រចាំកម្ពុជាបានបង្ហាញការស្រាវជ្រាវរបស់ខ្លួន ជាមួយនឹងលទ្ធផលបានបង្ហាញថា ទីផ្សារកម្ពុជាកំពុងវិវត្ត ហើយវិនិយោគិន ដែលមានព័ត៌មានគួរតែផ្តោត លើវិស័យដែលមានតម្រូវការពិតប្រាកដ ដែលគាំទ្រដោយការស្រាវជ្រាវទីផ្សារ និងការអភិវឌ្ឍហេដ្ឋារចនាសម្ព័ន្ធ ជាជាងពឹងផ្អែកលើការកើនឡើង នៃការស្មានទុកជាមុន៕

អ្នកឧកញ៉ាគិត ម៉េងជម្រុញប្រេស៊ីលរៀបចំព្រមព្រៀងពាណិជ្ជកម្មសេរីទ្វេភាគី និងការតភ្ជាប់ជើងហោះហើរត្រង់

ដោយៈ និស្ស័យ

ភ្នំពេញៈ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន សម្រាប់កម្ពុជា ទទួលជួបពិភាក្សាការងារជាមួយ លោកជំទាវ វីវៀន ឡូស សាន់ម៉ាទីន (Vivian Loss Sanmartin) ឯកអគ្គរដ្ឋទូតប្រេស៊ីលប្រចាំព្រះ កម្ពុជា។

ក្នុងជំនួបពិភាក្សានេះ លោកជំទាវVivian Loss Sanmartin ឯកអគ្គរដ្ឋទូតប្រេស៊ីលប្រចាំកម្ពុជា បានបង្ហាញនូវបំណងប្រាថ្នាយ៉ាងមុតមាំ ក្នុងការជំរុញកិច្ចសហប្រតិបត្តិការទ្វេភាគី ឱ្យកាន់តែស៊ីជម្រៅបន្ថែមទៀត តាមរយៈការលើកកម្ពស់ទំនាក់ទំនងសេដ្ឋកិច្ច ពាណិជ្ជកម្ម និងជំរុញគណៈប្រតិភូធុរកិច្ចរវាងប្រទេសទាំងពីរ ដើម្បីពង្រីកឱកាសវិនិយោគថ្មីៗ និងនាំមកនូវប្រយោជន៍ ទៅវិញទៅមកសម្រាប់ប្រជាជាតិទាំងពីរ។

លោកជំទាវ បានវាយតម្លៃខ្ពស់ចំពោះសក្តានុពល សេដ្ឋកិច្ចកម្ពុជាផងដែរ។ ជាកិច្ចឆ្លើយតប អ្នកឧកញ៉ា គិត ម៉េង បានសង្កត់ធ្ងន់ថា រាជរដ្ឋាភិបាលកម្ពុជា បានបង្កើតក្របខ័ណ្ឌធុរកិច្ចដ៏ល្អប្រសើរ ដែលអនុញ្ញាតឱ្យវិនិយោគិនបរទេសមានកម្មសិទ្ធិ១០០% លើស្ទើរគ្រប់វិស័យ ដើម្បីទាក់ទាញ ការវិនិយោគផ្ទាល់ ព្រមទាំងការបង្កើតតំបន់សេដ្ឋកិច្ចពិសេស ក្នុងនោះរដ្ឋាភិបាលកម្ពុជាកំពុងការពារ ការវិនិយោគដែលមានស្រាប់ ទាក់ទាញធុរកិច្ចថ្មីៗ និងអនុវត្តការកែទម្រង់យ៉ាងសកម្មដើម្បីគាំទ្រដល់សហគ្រាសធុនតូច និងមធ្យម (SMEs)។

អ្នកឧកញ៉ា បានស្នើលោកជំទាវឯកអគ្គរដ្ឋទូត ជំរុញដល់រដ្ឋាភិបាលប្រទេសទាំងពីរ៖ ១) ជំរុញកិច្ចព្រមព្រៀងពាណិជ្ជកម្មសេរីទ្វេភាគី (FTA) ២)កិច្ចព្រមព្រៀងជំរុញ និងការពារការវិនិយោគ និង៣) កិច្ចព្រមព្រៀងស្តីពី ការចៀសវាងការយកពន្ធត្រួតគ្នា (DTA)។

ជាងនេះទៅទៀត អ្នកឧកញ៉ា ជំរុញលើកកម្ពស់វិស័យទេសចរណ៍ និងលំហូរភ្ញៀវទេសចរ តាមរយៈការសិក្សាលើការបង្កើតជើងហោះហើរត្រង់ និងការសម្របសម្រួលទិដ្ឋាការទេសចរណ៍។ អ្នកឧកញ៉ាគូសបញ្ជាក់ថា កម្ពុជាមានទីតាំងយុទ្ធសាស្ត្រ នៅចំកណ្តាលអាស៊ាន ដែលផ្តល់នូវច្រកចូលទីផ្សារតំបន់ដ៏ធំ ហើយអាស៊ានគឺជាតំបន់ដែលកំពុងមានកំណើនខ្ពស់ ទោះបីជាមានបញ្ហាប្រឈម និងជម្លោះនៅមជ្ឈិមបូព៌ាក៏ដោយ។

ភាគីទាំងពីរបានឯកភាពជាគោលការណ៍ លើចំណុចដែលបានពិភាក្សា និងត្រៀមខ្លួនក្នុងការស្វាគមន៍ ដំណើរទស្សនកិច្ចរបស់គណៈប្រតិភូធុរកិច្ចប្រេស៊ីលមកកម្ពុជា និងពីកម្ពុជាទៅប្រេស៊ីលនាពេលអនាគត ដើម្បីទាក់ទាញ ការវិនិយោគផ្ទាល់ និងពង្រឹងទំនាក់ទំនងការទូត និងសេដ្ឋកិច្ចនៃ ប្រទេសទាំងពីរ៕

ក្រសួងបើកកិច្ចប្រជុំទាក់ទងការកំណត់ទីតាំងតភ្ជាប់ រវាងផ្លូវល្បឿនលឿនភ្នំពេញ-បាវិត ជាមួយប្រទេសវៀតណាម

ដោយៈ ម៉ាណា

ភ្នំពេញៈ លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញដឹកនាំកិច្ចប្រជុំគណៈកម្មការចម្រុះកំណត់ទីតាំងតភ្ជាប់ រវាងផ្លូវល្បឿនលឿនភ្នំពេញ-បាវិត របស់ប្រទេសកម្ពុជា និងផ្លូវល្បឿនលឿនទីក្រុងហូជីមិញ-ម៉ុកបៃ របស់ប្រទេសវៀតណាម។

កិច្ចប្រជុំនពធ្វើឡើងក្នុងគោលបំណង ពិនិត្យពិភាក្សាផ្តល់បច្ចុប្បន្នភាព ដល់សមាជិកគណៈកម្មការអន្តរក្រសួង លើចំណុចតភ្ជាប់ ក៏ដូចជាការពិភាក្សា ដើម្បីត្រៀមសម្រាប់កិច្ចប្រជុំ ជាមួយភាគីវៀតណាម នាពេលខាងមុខ៕

ដំណឹងល្អៈ ខេត្តព្រះសីហនុស្វាគមន៍គំរោងវិនិយោគថ្មីចំនួន ១០ ជាមួយទុនសរុបប្រមាណ ៧២លានដុល្លារ

ដោយៈ គង់ សូរិយា

ភ្នំពេញៈ ក្រុមការងារជំរុញការវិនិយោគ ក្នុងខេត្តព្រះសីហនុ បានបើកកិច្ចប្រជុំពិនិត្យគម្រោងវិនិយោគ និងធុរកិច្ចចំនួន១០ ក្រោមទុនវិនិយោគជាង៧២លានដុល្លារ និងអាចបង្កើតឱកាសការងារប្រមាណ៨០០កន្លែង។

ព័ត៌មាននេះត្រូវបានបញ្ជាក់ឲ្យដឹង ក្នុងឱកាសលោកបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និង ជាប្រធានក្រុមការងារជំរុញ ការវិនិយោគក្នុងខេត្តព្រះសីហនុ បានដឹកនាំកិច្ចប្រជុំលើកទី២៦ ដើម្បីពិនិត្យគម្រោងវិនិយោគ និងធុរកិច្ចចំនួន១០ ដោយមានការអញ្ជើញ ចូលរួមពីតំណាងក្រសួងស្ថាប័ន និងរដ្ឋបាលខេត្ត ព្រមទាំងមន្ត្រីជំនាញពាក់ព័ន្ធ ។

គម្រោងទាំងនេះ រួមមាន គម្រោងបង្កើតតំបន់ប្រមូលផ្ដុំសហគ្រាសធុនតូច និង មធ្យម (SME Cluster) គម្រោងរោងចក្រកែច្នៃលោហធាតុ គម្រោងរោងចក្រកែច្នៃក្តារបន្ទះ គម្រោងរមណីយដ្ឋាន និង រីសត, គម្រោងសណ្ឋាគារ និងរីសត និងគម្រោងអគារស្នាក់នៅរួម ក្រោមទុនវិនិយោគជាង៧២លានដុល្លារអាម៉េរិក។

លោកបណ្ឌិតសភាចារ្យ បានគូសបញ្ជាក់បន្ថែមថា ក្នុងត្រីមាសទី ១ ឆ្នាំ ២០២៦ ក្រុមការងារជំរុញការវិនិយោគ ក្នុងខេត្តព្រះសីហនុ បានសិក្សាអំពីបរិយាកាសវិនិយោគ បច្ចុប្បន្ននៅខេត្តព្រះសីហនុ ពាក់ព័ន្ធស្ថានភាពពិភពលោក តំបន់ និងក្នុងស្រុក ដោយបានសម្ភាសន៍ជាមួយម្ចាស់គម្រោង និងសង្កេតអំពីស្ថានភាពវិនិយោគនៅក្នុងខេត្ត ។

ជាលទ្ធផលអ្នកឆ្លើយសម្ភាសន៍យល់ថា វិធានការថ្មីៗរបស់រាជរដ្ឋាភិបាល បាននិងកំពុងបង្កើត និងស្តារទំនុកចិត្តវិនិយោគ ដែលតាមនេះ សកម្មភាពវិនិយោគក្នុងវិស័យអចលនទ្រព្យ និងទេសចរណ៍ នៅបន្តមានសកម្មភាព ហើយសកម្មភាពវិនិយោគ ក្នុងវិស័យឧស្សាហកម្ម នៅមានសញ្ញាណល្អប្រសើរ ស្របពេលដែលក្រសួងស្ថាប័ន ក្រុមការងារ និង រដ្ឋបាលខេត្តព្រះសីហនុ បាននិងកំពុងបន្តខិតខំទាក់ទាញវិនិយោគ ។

ទន្ទឹមនេះ វិស័យឧស្សាហកម្មក្នុងខេត្តព្រះសីហនុ មាននិន្នាការប្រើប្រាស់វត្ថុធាតុដើម ពីរោងចក្រសហគ្រាសក្នុងស្រុក ដូចជា ឈើដាំក្នុងស្រុក កម្ទេចឈើ ម្សៅដំឡូងមី កៅស៊ូ និង អំបិល ជាដើម ។ និន្នាការនេះ ជាកាលានុវត្តភាពបន្ថែម សម្រាប់ការវិនិយោគ ដែលទាមទារឱ្យមានការបន្តជំរុញ គាំទ្រ និងសម្របសម្រួល ពីក្រសួងស្ថាប័នពាក់ព័ន្ធ ចូលរួមធ្វើកិច្ចការជាមួយគ្នា ដោះស្រាយបញ្ហាជាមួយគ្នា ឱ្យកាន់តែជិតស្និទ្ធ និង ប្រកបដោយតម្លាភាព និងប្រសិទ្ធភាព ស្របតាមអភិក្រម “ជវភាពនៃប្រព័ន្ធតួអង្គតែមួយ” ។

ជាមួយនេះ លោកបណ្ឌិតសភាចារ្យ បានវាយតម្លៃខ្ពស់ ចំពោះការចូលរួម ការគាំទ្រ ការប្តេជ្ញា និងឆន្ទៈខ្ពស់របស់ក្រុមការងារ និង បានស្នើឱ្យក្រសួងស្ថាប័នពាក់ព័ន្ធ បន្តផ្តល់កិច្ចសហការ និងចូលរួមអនុវត្តវិធានការនានារបស់រាជរដ្ឋាភិបាល ឱ្យបានជោគជ័យ ហើយត្រូវធ្វើការរួមគ្នាដោយភាពស៊ីសង្វាក់ ដើម្បីដោះស្រាយបញ្ហារបស់វិនិយោគិន “ជាកញ្ចប់” និង មានសង្គតិភាព។

រាល់ការសម្របសម្រួលនីតិវិធី ការផ្តល់ការលើកទឹកចិត្ត និង ការឆ្លើយតបទៅ នឹងតម្រូវការជាក់ស្តែងរបស់ធុរជន ត្រូវតែធ្វើឡើងដោយបុរេសកម្ម ឆាប់រហ័ស និង មានតម្លាភាព ដោយតម្កល់ផលប្រយោជន៍ជាតិជាចម្បង ដើម្បីលើកកម្ពស់បរិយាកាសធុរកិច្ច ក្នុងខេត្តព្រះសីហនុ ឱ្យកាន់តែល្អប្រសើរ៕

ក្រុមហ៊ុន Google ពង្រីកការជួលការិយាល័យនៅទីក្រុង Miami បន្ទាប់ពីមហាសេដ្ឋីស្ថាបនិកទិញផ្ទះនៅតំបន់នេះ

ដោយ: សហសេវិក
អន្តរជាតិ: ក្រុមហ៊ុន Alphabet ដែលជាក្រុមហ៊ុនមេរបស់ Google បានពង្រីកការិយាល័យរបស់ខ្លួននៅទីក្រុង Miami ជាង៤ដងនៅឆ្នាំនេះ បន្ទាប់ពីសហស្ថាបនិកលោក Larry Page និងលោក Sergey Brin បានទិញផ្ទះនៅក្នុងតំបន់នោះ។

ក្រុមហ៊ុននេះបានជួលការិយាល័យបន្ថែមទំហំ ៤.១៨០ ម៉ែត្រការ៉េនៅវិថី 1450 Brickell Avenue ដោយពង្រីកពីការិយាល័យដែលមានស្រាប់ទំហំ ៩២៩ ម៉ែត្រការ៉េនៅក្នុងសង្កាត់ហិរញ្ញវត្ថុរបស់ទីក្រុង Miami។

លោក Page និងលោក Brin ដែលមានទ្រព្យសម្បត្តិសរុបបញ្ចូលគ្នាលើសពី៥៧៣ពាន់លានដុល្លារអាមេរិក បានបង្កើនវត្តមាននៅតំបន់ភាគខាងត្បូងរដ្ឋ Florida ខណៈរដ្ឋកាលីហ្វ័រញ៉ាកំពុងពិចារណាលើការធ្វើប្រជាមតិមួយដើម្បីយកពន្ធលើទ្រព្យសម្បត្តិរបស់បុគ្គលដែលមានទ្រព្យសម្បត្តិស្តុកស្តម្ភ។

តំបន់ភាគខាងត្បូងរដ្ឋ Florida បានទាក់ទាញមហាសេដ្ឋីជាច្រើនក្នុងរយៈពេលប៉ុន្មានឆ្នាំចុងក្រោយនេះ ដែលជំរុញឱ្យមានសំណួរថា តើការមកដល់របស់ពួកគេនឹងនាំមកនូវអត្ថប្រយោជន៍សេដ្ឋកិច្ចដែរឬទេ។

ក្នុងរយៈពេលមួយឆ្នាំកន្លងមកនេះ លោក Page បានទិញអចលនទ្រព្យនៅទីក្រុង Miami ដែលមានតម្លៃ ១៨៨ លានដុល្លារអាមេរិក រួមទាំងអចលនទ្រព្យដែលមានតម្លៃ ១០១,៥ លានដុល្លារអាមេរិកនៅតំបន់ Coconut Grove ខណៈលោក Brin បានទិញផ្ទះតម្លៃ ៥១ លានដុល្លារនៅតំបន់ Miami Beach៕

1...262728...3,338 Page 27 of 3,338