ក្រុមហ៊ុនយក្ស Prince បញ្ចប់ការសាងសង់ការិយាល័យកណ្តាលដ៏ធំមួយនៅកម្ពុជា

May 31, 2019

ដោយ វុត្ថា

ភ្នំពេញៈ អគារទីស្នាក់ការកណ្តាលនៃក្រុមហ៊ុនព្រីនស៍ហូលឌីង គ្រុប ត្រូវបានបញ្ចប់ជាស្ថាពរនូវគម្រោងសាងសង់ ដែលចំណាយទឹកប្រាក់សរុប៧០លានដុល្លារអាមេរិក ដែលទំនងជាការិយាល័យធំជាងគេនៅកម្ពុជា។

នាពេលបច្ចុប្បន្ននេះ ក្រុមហ៊ុនបុត្រសម្ព័ន្ធនានារបស់ក្រុមហ៊ុនព្រីនស៍ ហូលឌីង គ្រុប បានប្រមូលផ្តុំការិយាល័យរបស់ខ្លួន មកកាន់អគារទីស្នាក់ការកណ្តាល នៃក្រុមហ៊ុន ព្រីនស៍ហូលឌីង គ្រុបក្នុងគោលបំណងឲ្យប្រតិបត្ដិការអាជីវកម្ម អនុវត្តប្រកបដោយប្រសិទ្ធភាព និងជាមូលដ្ឋានគ្រឹះដ៏រឹងមាំសម្រាប់ការអភិវឌ្ឍរយៈពេលវែង។អាគារការិយាល័យកណ្តាលមានដែលទីតាំងនៅចុងខាងត្បូងទីក្រុងកោះពេជ្រ មានផ្ទៃក្រឡាសរុប២៤៨០០ ម៉ែត្រការ៉េ។

យោងតាមសេចក្តីប្រកាសព៌តមានរបស់ក្រុមហ៊ុននេះបានឲ្យដឹងថា ក្នុងរយៈពេល ១០ឆ្នាំខាងមុខ ក្រុមហ៊ុននឹងបន្តបណ្តាក់ទុនយ៉ាងតិច ចំនួន១០ពាន់លានដុល្លារអាមេរិកនិងយកប្រទេសកម្ពុជា ជាចំនុចមូលដ្ឋានក្នុងការអភិវឌ្ឍខ្លួន ឲ្យក្លាយជាក្រុមហ៊ុនមួយក្នុងចំណោមក្រុមហ៊ុនខ្នាតអន្តរជាតិ ដែលមានឥទ្ធិពលជាងគេក្នុងតំបន់អាស៊ីអាគ្នេយ៍។

ក្រុមហ៊ុន Prince Real Estate (Cambodia) Group Co.,Ltd. ជាក្រុមហ៊ុនជំនួញឈានមុខគេមួយនៅក្នុងប្រទេសកម្ពុជា ជាមួយនឹងការវិនិយោគយ៉ាងច្រើននៅក្នុងវិស័យអចលនទ្រព្យ វិស័យទូរគមនាគមន៍ និងហិរញ្ញវត្ថុ។

ក្រុមហ៊ុន Prince Real Estate (Cambodia) Group Co.,Ltd. បានបង្កើតឡើងនៅក្នុងឆ្នាំ២០១៥ ដោយបានសាងសាងសង់អគារជាច្រើនប្រភេទ ដូចជាសណ្ឋាគារ អគារស្នាក់នៅ ផ្ទះល្វែង ខុនដូ និងអគារពាណិជ្ជកម្មនៅតាមបណ្តាខេត្ត ក្រុងនានារបស់ប្រទេសកម្ពុជា។ បច្ចុប្បន្នក្រុមហ៊ុននេះ មានសាខាចំនួន១៣ ទីតាំងនៅក្នុងប្រទេសកម្ពុជា។

ក្រុមហ៊ុន Prince Real Estate បានសហការជាដៃគូជាមួយក្រុមហ៊ុនអន្តរជាតិជាច្រើនផងដែរ ដើម្បីអនុវត្តសាងសងគម្រោងជាច្រើននៅក្នុងប្រទេសកម្ពុជា។ គម្រោងទាំងនេះរួមមានDiamond One, Prince Central Plaza និង Prince Modern Plaza ដែលមានទីតាំងនៅរាជធានីភ្នំពេញ។

ក្រុមហ៊ុនបានសាងសង់ នូវគម្រោងអចលនទ្រព្យលើទំហំដីទំហំ១ហិកតា ដែលមានឈ្មោះថាDiamond One ដើម្បីទាក់ទាញប្រជាជនក្នុងស្រុក និងប្រជាជនចិនដោយក្នុងនោះមាន សណ្ឋាគារ Prince Modern Plaza កម្ពស់ ២៧ ជាន់គឺជាគម្រោងលំនៅដ្ឋានមួយ សម្រាប់យុវជននៅតាមទីប្រជុំជន ខណៈដែលអគារកម្ពស់៣៧ជាន់ Prince Central Plaza គឺជាអគារខុនដូដ៏ធំមួយស្ថិតនៅចំកណ្តាលបេះដូងនៃរាជធានីភ្នំពេញ៕

សហព័ន្ធឧស្សាហកម្មចិនថានឹងជំរុញអ្នកវិនិយោគចិនមកវិនិយោគក្នុងខេត្តព្រះសីហនុឱ្យបានកាន់តែច្រើន

May 31, 2019

0

ដោយ វុត្ថា

ភ្នំពេញៈ មន្ត្រីនៃសហព័ន្ឋឧស្សាហកម្ម និងពាណិជ្ជកម្មចិនបានសន្យានឹងជំរុញអ្នកវិនិយោគចិនកាន់តែច្រើន មកវិនិយោគនៅខេត្តព្រះសីហនុ និងសន្យាជជួយផ្សព្វផ្សាយ ណែនាំឱ្យក្រុមហ៊ុនចិន មកកាន់ខេត្តព្រះសីហនុឲ្យបានកាន់ច្រើនថែមទៀត។

លោក XU LEJIANG អនុប្រធានសហពន្ធ័ឧស្សាហកម្ម និងពា ណិជ្ជកម្មប្រទេសចិន បានថ្លែងនៅក្នុងពិធីអាហារសាមគ្គីកាលពីថ្ងៃទី៣០ ខែឧសភា ឆ្នាំ ២០១៩ម្សិលមិញនេះថា ការមកដល់ខេត្តព្រះសីហនុ លោកមានអារម្មណ៍ថា ខេត្តព្រះសីហនុ ដូចប្រទេសចិនក្នុងអំឡុងឆ្នាំ១៩៩០។ លោកបន្តថា ដោយមើលឃើញពីសក្តានុពលឆ្នេរស្អាត តំបន់សេដ្ឋកិច្ចពិសេស កំពង់ផែទឹកជ្រៅ រយៈពេល៥ទៅ១០ឆ្នាំខាងមុខ ខេត្តព្រះសីហនុ នឹងក្លាយ ជាខេត្តមានការអភិវឌ្ឍដ៏រុងរឿង ជឿនលឿននៅពេលខាងមុខ។

លោកបន្ថែមថា “សហព័ន្ធឧស្សាហកម្មចិន បានដើរតួនាទីយ៉ាងសំខាន់បម្រើឲ្យក្រុមហ៊ុនឯកជនរបស់ចិន ក្នុងការអភិវឌ្ឍសេដ្ឋមកិច្ចប្រទេស ដែលមានក្រុមហ៊ុនចិន៥០ភាគរយ ផ្តល់ប្រាក់ចំណូលពន្ធ៦០ភាគរយ ផ្តល់ការងារជូនប្រជាពលរដ្ឋចិន៨០ភាគរយ ក្នុងនោះវិស័យឯកជនបានផ្តល់ការងារជូនប្រជាពលរដ្ឋ៩០ភាគរយ”។

អភិបាលខេត្តព្រះសីហនុលោកយន្ត មីនបានឲ្យដឹងថា ខេត្តព្រះសីហនុមានសក្តានុពលក្នុងវិស័យកសិកម្ម ឧស្សាហកម្ម និងទេសចរណ៍ ជាគោលដៅអភិវឌ្ឍន៍ខឿនសេដ្ឋកិច្ចជាតិ។ ខេត្តព្រះសីហនុមានកំពង់ផែទឹកជ្រៅ មានតំបន់សេដ្ឋកិច្ចពិសេស ព្រលានយន្តហោះអន្តរជាតិ ឆ្នេរ និងកោះដែលជាមរតកធម្មជាតិដ៏មានតម្លៃ។

លោកអភិបាលខេត្តបន្តថា “រដ្ឋាភិបាលចាត់ទុកនឹងប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជា ២០១៥ -២០២៥”។

តាមរយ:កិច្ចសហប្រតិបត្តិការអន្តរជាតិរវាងថ្នាក់ដឹកនាំរដ្ឋាភិបាល នៃប្រទេសទាំងពីរ (កម្ពុជា-ចិន) បង្កើតតំបន់សេដ្ឋកិច្ចពិសេសក្រុងព្រះសីហនុ វិនិយោគដោយក្រុមហ៊ុន “ហូដូគ្រុប” បានដាក់ឲ្យដំណើរការនៅឆ្នាំ២០០៨ ក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរា ជាណាចក្រកម្ពុជា។

លោកអភិបាលខេត្តរូបនេះបន្ថែមថា ទាំងនេះបានផ្ដល់ប្រយោជន៍យ៉ាងច្រើនសន្ធឹកសន្ធាប់ ផ្តល់ការងារធ្វើប្រចាំថ្ងៃ កាត់បន្ថយការធ្វើចំណាកស្រុក និងកាត់បន្ថយភាពក្រីក្ររបស់ប្រជាពលរដ្ឋ។ តំបន់សេដ្ឋកិច្ចពិសេសក្រុងព្រះសីហនុបានដើរតួនាទី ជាអ្នកបើកច្រកពាណិជ្ជកម្ម និងកិច្ចសហប្រតិបត្តិការផ្នែកពាណិជ្ជ កម្មអន្តរជាតិរវាងប្រទេសទាំងពីរ (កម្ពុជា-ចិន)៕

កម្ពុជា និងអាស៊ានជាតំបន់សុវត្ថិភាពសម្រាប់វិនិយោគបើទោះជាមានសង្រ្គាមពាណិជ្ជកម្ម

May 31, 2019

0

ដោយ Donald Lee

ភ្នំពេញៈ ស្ថាបនិកនៃធនាគារធំជាងគេទីពីរ នៅតំបន់អាស៊ីអាគ្នេយ៍បានឱ្យដឹងថា សេដ្ឋកិច្ចអាស៊ាននឹងផ្តល់តំបន់«សុវត្ថិភាព» មួយដល់វិនិយោគិនសម្រាប់ការវិនិយោគ បើទោះបីជាតំបន់អាស៊ីត្រូវបានរំពឹងថា នឹងទទួលរងផលប៉ះពាល់ខ្លាំង ដោយសារក្តីបារម្ភពីវិបត្តិសេដ្ឋកិច្ចពិភពលោក ដែលបង្កឡើងដោយការបន្តកើនឡើង នៃសង្គ្រាមពាណិជ្ជកម្មរវាងអាមេរិក និងចិន។

លោក Wee Ee Cheong អគ្គនាយកក្រុមហ៊ុន United Overseas Bank Ltd (UOB) បាននិយាយនៅក្នុងបទសម្ភាសន៍មួយជាមួយភ្នាក់ងារ Bloomberg ថា “អាស៊ាននឹងក្លាយជាតំបន់សុវត្ថិភាពបំផុតសម្រាប់ការវិនិយោគ”។

ដោយបង្កើតឡើងនៅឆ្នាំ១៩៣៥ UOB គឺជាធនាគារធំជាងគេលំដាប់ទី៣នៅអាស៊ីអាគ្នេយ៍។

លោក Wee បានបន្ថែមទៀតថា UOB មានផែនការពង្រីកទៅតំបន់អាស៊ីអាគ្នេយ៍ដោយមានបច្ចេកវិទ្យាឌីជីថល និងការច្នៃប្រឌិតបច្ចេកវិទ្យា ដើម្បីទាញយកប្រយោជន៍ពីទីផ្សារដែលមានសក្តានុពលខ្ពស់ និងរីកចម្រើន។ ប្រទេសអាស៊ានមានប្រជាជនសរុបជាង ៦០០លាននាក់ និងផលិតផលសរុបក្នុងស្រុក (GDP) សរុបចំនួន២,៤ ពាន់ពាន់ដុល្លារធ្វើឱ្យក្រុមអ្នកវិភាគមួយចំនួនហៅតំបន់នេះថាជា “ប្រទេសចិនថ្មី” ។

អង្គការរូបិយវត្ថុអន្តរជាតិ (IMF) ព្យាករថា អាស៊ាននឹងមានសេដ្ឋកិច្ចធំបំផុតទីបួននៅឆ្នាំ២០៥០។

នៅក្នុងខែឧសភានេះ លោកប្រធានាធិបតី ដូណាល់ ត្រាំ (Donald Trump) បានចេញនូវបញ្ជីឈ្មោះថ្មីលើទំនិញរបស់ចិន ដែលជាប់ពន្ធមានតម្លៃ៣០០ពាន់លានដុល្លារ ដោយការដំឡើងពន្ធចំនួន២៥ភាគរយ។ បញ្ជីរួមបញ្ចូលទាំងផលិតផលស្បែកជើង។

យោងតាមក្រុមអ្នកវិភាគបានឱ្យដឹងថា ; រោងចក្រពីប្រទេសចិន នឹងផ្លាស់ទីតាំងវិនិយោគរបស់ខ្លួនទៅកាន់បណ្តាប្រទេសអាស៊ាន ដោយសារសង្គ្រាមពាណិជ្ជកម្ម។ ទិន្នន័យផ្គត់ផ្គង់ខ្សែចង្វាក់ផលិតកម្មបានបញ្ជាក់ថា ប្រសិនបើពន្ធគយរបស់អាមេរិក ចូលជាធរនឹងមានក្រុមហ៊ុនសម្លៀកបំពាក់នៅចិន នឹងមិនមានជម្រើសទេក្រៅតែពីស្វែងរកទីតាំងផលិតជំនួសនៅកម្ពុជា វៀតណាម និងភូមា។

លោក អាល់ប៊ើត តាន់ (Albert Tan) ជាហេរញ្ញិកនៃសមាគមរោងចក្រកាត់ដេរនៅកម្ពុជា (GMAC) បានប្រាប់កាលពីសប្ដាហ៍មុនថា “ដោយសារតែសង្រ្គាមពាណិជ្ជកម្មកាន់តែរីករាលដាល មានក្រុមហ៊ុនចំនួនពីប្រទេសចិន ចាប់អារម្មណ៍ក្នុងការផ្លាស់មកប្រទេសកម្ពុជា”។

ក្រុមហ៊ុន Steve Madden ផលិតស្បែកជើង និងកាបូបរបស់អាមេរិកនឹងបង្កើនផលិតកម្មនៅក្នុងប្រទេសកម្ពុជា បន្ទាប់ពីដាក់ទុនរបស់ខ្លួន៩០ភាគរយ នៅក្នុងប្រទេសចិនកាលពីឆ្នាំមុន។ ក្រុមហ៊ុន Brooks Running Company ក្រុមហ៊ុន Haier និងក្រុមហ៊ុន Jasan សុទ្ធតែមានគម្រោងបង្កើនប្រភពផ្គត់ផ្គង់នៅវៀតណាម។

លោក Tan បានបន្ថែមថា “ដោយសារតែពន្ធលើការនាំចូលទំនិញចិនកើនឡើងនោះនឹងមានការកើនឡើងនូវក្រុមហ៊ុន ដែលកំពុងស្វែងរកប្រតិបតិ្តការផលិតកម្មនៅកម្ពុជា និងវៀតណាម”។

ទំហំពាណិជ្ជកម្មអាមេរិកជាមួយកម្ពុជា បានកើនឡើងដល់ជាង១ពាន់លានដុល្លារនៅក្នុងត្រីមាសដំបូងនៃឆ្នាំនេះ។

ប្រទេសកម្ពុជាបាននាំចេញទំនិញតម្លៃ១,១២ពាន់លានដុល្លារ ទៅកាន់សហរដ្ឋអាមេរិកចាប់ពីខែមករាដល់ខែមីនា។ ការនាំចេញកម្ពុជាកាលពីឆ្នាំមុនក្នុងអំឡុងពេលដូចគ្នាមានចំនួន៩០៣,៦លានដុល្លារ។ ការនាំចេញរបស់កម្ពុជា ទៅកាន់សហរដ្ឋអាមេរិកមានចំនួនសរុប៣,៨ ពាន់លានដុល្លារកាលពីឆ្នាំ២០១៨៕

បុរីប៉េង ហួត បើកមជ្ឈមណ្ឌលកីឡាផ្លាទីនីមធំមួយនៅតាមបណ្តោយផ្លូវជាតិលេខ១

May 31, 2019

0

ដោយ រតនៈ

ភ្នំពេញៈ ក្រុមហ៊ុនបុរីប៉េង ហួតមនឹងបើកមជ្ឈមណ្ឌលកីឡាធំមួយ នៅទីតាំងបុរីប៉េង ហួតបឹងស្នោ តាមបណ្តោយផ្លូវជាតិលេខ១ ដើម្បីឆ្លើយតបដល់អ្នកចូលចិត្តលេងកីឡាទាំងឡាយ លោកអ្នកអាចជ្រើសរើស វិធីជាច្រើនដើម្បីទទួលបានរាងកាយមាំមួន និងសុខភាពល្អ ។

យោងតាមសេចក្តីប្រកាសព៌តមានរបស់ក្រុមហ៊ុនប៉េង ហួតបានឲ្យដឹងនាព្រឹកថ្ងៃទី៣១ ឧសភានេះថា លោកអ្នកក៏ត្រូវជ្រើសរើសផងដែរនូវ មជ្ឈមណ្ឌលកីឡាដែលអាចផ្តល់នូវ ផាសុកភាព និង ភាពទំនើបទាន់សម័យ។ ជាមួយគ្នាដែរ យើងខ្ញុំសូមធ្វើការណែនាំមជ្ឈមណ្ឌលកីឡាផ្លាទីនីម (ភី អេស ស៊ី) ដែលជាមជ្ឈមណ្ឌលកីឡាចំរុះមួយ ដែលផ្តល់នូវប្រភេទកីឡាជាច្រើន រួមមាន ក្លឹបហាត់វាយកូនហ្គោល តារាងបាល់ទាត់ តារាងវាយសី តារាងបាល់ទះ និង តារាងបាល់បោះ ដែលមានទីតាំងនៅក្នុងគម្រោង បុរី ប៉េងហួត ហ្គ្រេនស្តាផ្លាទីនីម តាមបណ្តោយផ្លូវជាតិលេខ១ ភូមិបឹងស្នោរ សង្កាត់និរោធ ខណ្ឌច្បារអំពៅ រាជធានីភ្នំពេញ។

ក្លឹបហាត់វាយកូនហ្គោល ធី ថែម (Tee Time) របស់មជ្ឈមណ្ឌលកីឡាផ្លាទីនីម មានកន្លែងវាយកូនហ្គោលដ៍ទំនើបចំនួន៥២ ប្លុក និងមានផ្តល់ជូននូវ វគ្គបង្រៀនវាយកូនហ្គោលលំដាប់ វី អាយ ភី ផងដែរ សម្រាប់សមាជិក វី អាយ ភី រយៈពេល ៦ខែ និង ១២ខែ ដែលបង្រៀនដោយ លោកគ្រូដ៏ជំនាញពីប្រទេសជប៉ុន និងមានបទពិសោធន៍យូរឆ្នាំ ។

លើសពីនេះទៅទៀត មជ្ឈមណ្ឌលកីឡាផ្លាទីនីម (ភី អេស ស៊ី) ក៏ផ្តល់ជូននូវតារាងបាល់ទាត់ មានទីតាំងធំទូលាយ ដែលមានតារាងតូចនិងតារាងធំសម្រាប់បំពេញតំរូវការរបស់លោកអ្នក ។ ចំណែកឯក្លឹបកីឡា ផោវវើ ហ៊្សូន (power zone) ដែលមានកីឡាវាយសី បាល់ទះ បាល់បោះ នឹងបើកដំណើរការនៅក្នុងខែកក្កដាខាងមុខនេះ។

សម្រាប់ការបើកដំណើរការសាកល្បង នាថ្ងៃទី១ ខែមិថុនាឆ្នាំ២០១៩ នេះ មជ្ឈមណ្ឌលកីឡាផ្លាទីនីម ក៍មានការបញ្ចុះ ពិសេសរហូតដល់ ៥០ ភាគរយ ដែលមានសុពលភាពចាប់ពីថ្ងៃទី ១ ដល់ ១៥ ខែ មិថុនា និង ការបញ្ចុះតម្លៃរហូតដល់ ៣០ ភាគរយ ដែលមានសុពលភាពចាប់ពីថ្ងៃទី ១៦ ដល់ ៣០ ខែ មិថុនា។

មជ្ឈមណ្ឌលកីឡាផ្លាទីនីមបើកដំណើរការចំនួនប្រាំពីរថ្ងៃក្នុងមួយសប្ដាហ៍ចាប់ពីម៉ោង៨ព្រឹក ដល់៩យប់។

សម្រាប់ព័តមានបន្ថែម សូមទាក់ទងមកលេខ ០១២ ៥៧៨ ៩៣០ / ០៨៦ ៩០៩ ២៥២ នឹងខាងផ្នែកកីឡាចំរុះ សូមទាក់ទងមកលេខ ០១២ ៨២៦ ៧២០/ ០៨៦ ៩០៦ ៦៩៥ ឬចូលទៅកាន់ www.platinumsports-center.com ឬ អ៊ីម៉ែល pscsportscenter@gmail.com ។ សម្រាប់ព័ត៌មានលម្អិត អ្នកក៏អាចចូលទៅកាន់ Facebook: Platinum Sports Center – PSC៕

សេដ្ឋកិច្ចអាមេរិកជួបការដើរថយលក្រោយក្នុងត្រីមានទី១ឆ្នាំនេះ

May 31, 2019

0

ដោយ វុត្ថា

វ៉ាស៊ីនតោន៖ ក្រសួងពាណិជ្ជកម្មអាមេរិកបានឱ្យដឹង ក្នុងការព្យាករណ៍លើកទី២ របស់ខ្លួនកាលពីពេលថ្មីៗនេះថា កំណើនសេដ្ឋកិច្ចរបស់សហរដ្ឋអាមេរិកនៅក្នុងត្រីមាសទី១ នៃឆ្នាំ២០១៩ ត្រូវបានកែសម្រួលដោយអត្រាប្រចាំឆ្នាំ ដោយបានធ្លាក់ចុះពីអត្រា៣,២មកត្រឹម៣,១%នៅឆ្នាំនេះ។

ក្រសួងនេះបានបន្តថា ការធ្វើបច្ចុប្បន្នភាពលើកំណើនផលិតផល ក្នុងស្រុកសរុប (GDP) បានឆ្លុះបញ្ចាំងពីការធ្លាក់ចុះទំនុកចិត្តរបស់វិនិយោគិន និងការធ្វើវិនិយោគទុននិងការពិនិត្យឡើងវិញ នៃការនាំចូលដែលជាការថយចុះនៅក្នុងការគណនា នៃផលិតផលក្នុងស្រុកសរុប (GDP) ។

ក្រសួងបន្ថែមថា ការកែសម្រួលទាំងនេះ ត្រូវបានទូទាត់ដោយបានកែសម្រួលទៅលើការនាំចេញ និងការចំណាយរបស់អតិថិជន។

ក្រសួងបន្តថា ការវិនិយោគក្រៅពីវិស័យលំនៅដ្ឋាននៅក្នុងត្រីមាសទី១ ត្រូវបានកែសម្រួលដោយអត្រាប្រចាំឆ្នាំ២,៣ភាគរយ ខុសពីការប៉ាន់ស្មានពីមុនដែលរំពឹងថានឹងមានកំនើន២,៧ភាគរយ និងបានកើនឡើង៥,៤ភាគរយនៅក្នុងត្រីមាសទី ៤ នៃឆ្នាំ ២០១៨។

ការនាំចូលក្នុងត្រីមាសទី១បានថយចុះ២,៥% បើប្រៀបធៀបទៅនឹងការប៉ាន់ប្រមាណកាលពីមុនចំនួន៣,៧% ។ ការនាំចូលបានកើនឡើង ២,0 ភាគរយនៅត្រីមាសមុន។

កំណើននៃការចំណាយរបស់អ្នកប្រើប្រាស់មានច្រើនជាង២ ភាគ ៣នៃផលិតផលក្នុងស្រុកសរុបរបស់អាមេរិក ដែលត្រូវបានកើនឡើងដល់១,៣ ភាគរយ ខណៈការប៉ាន់ស្មានពីមុនមានត្រឹម១,២ ភាគរយ ។ ការចំណាយរបស់អ្នកប្រើប្រាស់បានកើនឡើង ២,៥ ភាគរយនៅត្រីមាសមុន។

របាយការណ៍ថ្មីនេះក៏បានបង្ហាញផងដែរថា សន្ទស្សន៍តម្លៃសម្រាប់ការចំណាយលើការប្រើប្រាស់ផ្ទាល់ខ្លួន (PCE) ត្រូវបានកែសម្រួលដល់០,៤ ភាគរយពី០,៦ ភាគរយនៅក្នុងការប៉ាន់ប្រមាណពីមុន។ វាបានកើនឡើង១,៥ភាគរយនៅក្នុងត្រីមាសមុន។

នៅក្នុងការព្យាករសេដ្ឋកិច្ចចុងក្រោយរបស់ខ្លួន ដែលបានចេញផ្សាយកាលពីខែមីនា ធនាគារកណ្តាលអាមេរិកបានកាត់បន្ថយការព្យាកររបស់ខ្លួនស្តីពី កំណើនសេដ្ឋកិច្ចអាមេរិកសម្រាប់ឆ្នាំ២០១៩ និងឆ្នាំ ២០២០ ដោយរំពឹងថានឹងមានអត្រាកំណើន២,១ភាគរយ និង១,៩ ភាគរយរៀងៗខ្លួន។

នៅក្នុងការចេញផ្សាយថ្មីនៃទិដ្ឋភាពសេដ្ឋកិច្ចពិភពលោក ដែលបានចេញផ្សាយនៅក្នុងខែមេសា មូលនិធិរូបិយវត្ថុអន្ដរជាតិ ក៏បានទម្លាក់ការព្យាករណ៍កំណើនសេដ្ឋកិច្ចអាមេរិកដោយរំពឹងថា សេដ្ឋកិច្ចរបស់ប្រទេសមហាអំណាចនេះ នឹងធ្លាក់ចុះមកនៅត្រឹម ២.៣% ២០១៩ ធ្លាក់ចុះ០,២ ពិន្ទុធៀបនឹងការប៉ាន់ប្រមាណខែមករា៕

CREA សហការជាមួយសមាគមអចលនទ្រព្យសិង្ហបុរីដើម្បីជំរុញការអភិវឌ្ឍវិស័យនេះ

May 31, 2019

0

ដោយ គង់ សូរិយា

ភ្នំពេញៈ សមាគមអ្នកជំនាញអចលនទ្រព្យកម្ពុជា (CREA) សហការជាមួយសមាគមភ្នាក់ងារអចលនទ្រព្យសិង្ហបុរី (Singapore Estate Egents Association) ដើម្បីពង្រឹងកិច្ចសហការលើវិស័យនេះ។

ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋីបានមានប្រសាសន៍ឲ្យដឹងតាមប្រព័ន្ឋតេឡេកក្រាមកាលពីល្ងាចថ្ងៃទី៣០ ឧសភាពីប្រទេសសិង្ហបុរីមកថា លោកបានចុះហត្ថលេខាជាមួយលោក Thomas Tan ប្រធានសមាគមភ្នាក់ងារអចលនទ្រព្យសឹង្ហបុរី ដើម្បីជំរុញកិច្ចសហប្រតិបត្តិការឈ្នះ ឈ្នះទាំងអស់គ្នា ពិសេសយើងនឹងសហការគ្នា លើកកំពស់ការវិនិយោគក្នុងវិស័យសំណង់ និងអចលនទ្រព្យនៅកម្ពុជា និងនៅសឹង្ហបុរី។

លោកបន្តថា “អ្វីដែលសមាគមផ្តោតសំខាន់ គឺជំរុញការផ្លាស់ប្តូរបទពិសោធន៍ និងកម្មវិធីសិក្សាពីប្រទេសសិង្ហបុរីមកកាន់កម្ពុជា ដោយសារប្រទេសសឹង្ហបុរីជាប្រទេសអភិវឌ្ឈន៍មួយ និងមានបទពិសោធន៍លើវិស័យនេះយូរឆ្នាំជាងកម្ពុជា”។ លោកបន្តថា “យើងអាចរៀនសូត្រពីគេបានច្រើន ដើម្បីយកមកកែលំអរប្រទេសយើង ប៉ុន្តែអ្វីដែលយើងយកពីគេមក នឹងយកមកធ្វើឲម្យស្របតាមបរិបទសេដ្ឋកិច្ច សង្គម វប្បធ៌មរបស់កម្ពុជា”។

លោកឃាង ពុទ្ឋីបានបន្តថា សមាគមអ្នកជំនាញអចលនទ្រព្យកម្ពុជា បានបង្កើតឡើងក្នុងគោលដៅជំរុញការអភិវឌ្ឍធនធានមនុស្សនៅកម្ពុជា ពិសេសធនធានមនុស្សក្នុងវិស័យអចលនទ្រព្យកម្ពុជា និងចូលរួមទាក់ទាញការវិនិយោគ ក៏ដូចជាជំរុញការអភិវឌ្ឍក្នុងវិស័យនេះឲ្យមានសុខភាពល្អ។ លោកបន្តថា ដោយសារវិស័យសំណង់ និងអចលនទ្រព្យនៅកម្ពុជាមានការរីកចម្រើនលឿន ដែលធ្វើឲ្យកម្ពុជាប្រឈមនឹងកង្វះធនធានមនុស្សយ៉ាងខ្លាំង ដែលធ្វើឲ្យក្រុមហ៊ុនបរទេសនានាបានយកធនធានមនុស្សរបស់ពួកគេមកបំពេញការងារនៅកម្ពុជា។

លោកបន្តថា “ទោះជាមានការនាំយកធនធានមនុស្ស ពីក្រៅប្រទេសចូលមកកម្ពុជាក្តី តែកម្ពុនៅតែត្រូវការសហការជាមួយដៃគូបរទេស ដើម្បីបណ្តុះបណ្តាលធនធានមនុស្សបន្ថែមទៀត”៕

ធនាគារជប៉ុនដ៏ធំសហការជាមួយ Royal Group ដើម្បីផ្តល់សេវាហិរញ្ញវត្ថុនៅកម្ពុជា

May 31, 2019

0

ដោយ នៅ វឌ្ឈនា

ភ្នំពេញៈ ធនាគារជប៉ុនដ៏ធំ J TRUST BANK នឹងសហការជាមួយក្រុមហ៊ុន Royal Group របស់អ្នកឧកញ៉ា គិត ម៉េង ដើម្បីផ្តល់សេវាកម្មហិរញ្ញវត្ថុនៅកម្ពុជា។

ក្នុងជំនួបសម្តែងការគួរសមជាមួយសម្តេចតេជោហ៊ុន សែននាយករដ្ឋមន្រ្តីកម្ពុជាកាលពីរសៀលថ្ងៃទី៣០ ខែឧសភានេះកន្លងមកនេះ លោក Nobuyushi Fujisawa បានមានប្រសាសន៍ឲ្យដឹងថា J Trust Bank បានទិញភាគហ៊ុនរបស់ធនាគារ ANZ Royal ។ លោកបន្តថា ដូច្នេះពេលនេះរូបលោក នឹងធ្វើការសហការការងារជាមួយក្រុមហ៊ុន Royal group របស់អ្នកឧកញ៉ា គិត ម៉េង ។

ជាការឆ្លើយតប សម្តេចអគ្គមហាសេនាបតីតេជោ ហ៊ុន សែនបានណែនាំ លោក Nobuyushi Fujisawa ប្រធានធនាគារJ Trust Bank ធ្វើការសហការជាមួយក្រុមហ៊ុនខ្មែរ ពោលគឺជាមួយក្រុមហ៊ុន Royal group របស់អ្នកឧកញ៉ា គិត ម៉េង ។

លោក Nobuyushi Fujisawa ប្រធានធនាគារ J Trust Bank) បានជម្រាបសម្តេចតេជោនាយករដ្ឋមន្រ្តីថា តាមផែនការលោកមានគំរោងប្តូរឈ្មោះធនាគារ ANZ Royal ទៅជា J Trust Royal Bank វិញ ហើយគ្រោងនឹងប្តូរឈ្មោះនៅខែសីហាខាងមុខនេះ។លោក បន្តថា កន្លងទៅខាងធនាគារ ANZ Royal មិនសូវបានផ្តល់ឥណទានទៅក្រុមហ៊ុនខ្មែរនោះទេ ប៉ុន្តែJ TRUST Bank នឹងផ្តល់ប្រាក់កម្ចី រឺឥណទានទៅក្រុមហ៊ុនខ្មែរ។

សម្តេចតេជោនាយករដ្ឋមន្រ្តីហ៊ុន សែនបានមានប្រសាសន៍ថា J Trust Bank គួរជួយដល់ក្រុមហ៊ុនខ្មែរដែលតំរូវការឥណទាន ជាមួយគ្នានេះសម្តេចតេជោនាយករដ្ឋមន្រ្តីបានអបអរសាទរដល់ក្រុមហ៊ុន J TRUST ធ៏ធំរបស់ជប៉ុន ដែលបានទៅបណ្តាក់ទុកនៅកម្ពុជា៕

តើអ្វីជាគម្រោងវិនិយោគរួម? ផលិតផលថ្មីនៃគណកម្មការមូលបត្រ?

May 31, 2019

0

ដោយៈ រ៉ាណេត

ភ្នំពេញៈ ទីផ្សារជួញដូរមូលនិធិឬគម្រោងវិនិយោគរួម គឺជាការប្រមូលនូវសាច់ប្រាក់តាមរយៈការបោះផ្សាយ និងលក់ឯកត្តាមូលនិធី (ភាគហ៊ុន) ដើម្បីបង្កើតជាមូលនិធិដែលនឹងត្រូវបានយកមកប្រើប្រាស់ ចាត់ចែងដោយក្រុមហ៊ុនគ្រប់គ្រងមូលនិធិ ក្នុងគោលបំណងបង្កើតផលកម្រៃហិរញ្ញវត្ថុសម្រាប់សមាជិកនៅក្នុងគម្រោងរួម។

អគ្គនាយកគណៈកម្មការមូលបត្រកម្ពុជា លោក ស៊ូ សុជាតិ បានមានប្រសាសន៍ឱ្យដឹងនាព្រឹកថ្ងៃទី៣០ ឧសភានេះថា គម្រោងវិនិយោគ គឺជាការបោះផ្សាយលក់ទៅកាន់សាធារណៈជន ក្នុងគោលបំនងប្រមូលបាននូវសាច់ប្រាក់ធ្វើជាទុន ដើម្បីយកទៅបន្តវិនិយោគជំនួសឱ្យអតិថិជន ទៅលើគម្រោងណាមួយជាក់លាក់ទៅតាមជំនាញ និងចំណេះដឹងដែលក្រុមហ៊ុនមាន ជាមួយនឹងការបែងចែកនូវភាគចំណេញ ពីការវិនិយោគទៅដល់បណ្តាអតិថិជនវិញ ទៅតាមទំហំនៃសមាមាត្រទុនរបស់មនុស្សម្នាក់ៗ ដែលចូលរួមនៅក្នុងគម្រោង។

លោកបន្តទៀតថា “ គម្រោងដែលត្រូវបានបង្កើតឡើង ដោយក្រុមហ៊ុនជំនាញក្នុងការគ្រប់គ្រងមូលនិធិអាចមានច្រើនរូបភាព”។

ឧទាហរណ៍មានដូចជា ការវិនិយោគទៅលើមូលបត្រកម្មសិទ្ធិ មូលបត្របំណុល ការបង្កើនសាច់ប្រាក់ ដើម្បីវិនិយោគទៅលើវិស័យអចលនទ្រព្យ ក៏ដូចជាការវិនិយោគទៅលើវិស័យផ្សេងៗទៀត។

លោកស៊ូ សុជាតិបានបញ្ជាក់ទៀតថា សមាសភាពដែលមាននៅក្នុងគម្រោងវិនិយោគរួម ឬការជួញដូរមូលនិធិនេះ មានប្រធានក្រុមហ៊ុនជំនាញដែលជាអ្នកបង្កើតគម្រោងដែលគេឱ្យឈ្មោះថា Fund Manager មួយ មានក្រុមហ៊ុនដែលទទួលលក់ចេញ និងប្រមូលទិញឯកត្តា ពីសាធារណៈជនត្រឡប់មកវិញ ដែលគេឱ្យឈ្មោះថា Distributor ព្រមទាំងសមាសភាពរបស់សាធារណៈជន ដែលជាអតិថិជនចូលរួមនៅក្នុងគម្រោង មានក្រុមហ៊ុនថែរក្សាទ្រព្យសម្បត្តិ ដែលគេឱ្យឈ្មោះថា Trusty រួមជាមួយនឹងក្រុមហ៊ុនជំនាញក្នុងការកំណត់តម្លៃឯកត្តាមូលនិធិ ដែលគេឱ្យឈ្មោះថា (Fund Administrator )”។

លោកបន្តថា “ជាយន្តការនៅក្នុងដំណើរការទីផ្សារ ចាប់ផ្តើមឡើងដោយអ្នកគ្រប់គ្រងគម្រោង (Fun Manager) ដោយបន្ទាប់ពីបង្កើតបានគម្រោង គឺត្រូវយកទៅដាក់លក់ឯកត្តាមូលនិធិនៅក្រុមហ៊ុន Distributor ដើម្បីប្រមូលបានសាច់ប្រាក់ពីសាធារណៈជន”។ ដោយឡែកសាច់ប្រាក់ ដែលទទួលបានតម្រូវយកទៅរក្សាទុកនៅក្រុមហ៊ុនថែរក្សាទ្រព្យសម្បត្តិ Trusty ដើម្បីទទួលបានទំនុកចិត្ត និងថែរក្សាសាច់ប្រាក់ជំនួសអតិជន ។

ជាមួយគ្នានេះ Trusty ក៏មានតួនាទីពិនិត្យ តាមដានរាល់សកម្មភាពរបស់ Funder ដោយធានាឱ្យប្រាកដថា Funder បានអនុវត្តទៅតាមគោលដៅនៃគម្រោងប្រកបដោយប្រសិទ្ធភាពខ្ពស់។

លោកស៊ូ សុជាតិបានបន្តថា “ប្រសិនជាអ្នកវិនិយោគយកប្រាក់ខ្លួនឯងទៅវិនិយោគ វាជារឿងបុគ្គល តែគំរោងវិនិយោគរួមជាការខ្ចីលុយពីសាធារណៈជនយកទៅវិនិយោគ វាត្រូវតែស្ថិតក្រោមការគ្រប់គ្រងរបស់គណកម្មការមូលបត្រកម្ពុជា”។

ជាលទ្ធផល នៅពេលដែលគម្រោងនៃការវិនិយោគទទួលបានភាពជោគជ័យនៅលើទីផ្សារ១០០ភាគរយ នោះសាធារណៈជនដែលជាអតិថិជនម្ចាស់នៃឯកត្តាមូលនិធិនឹងទទួលបានភាគចំណេញពីការវិនិយោគរួមរបស់ខ្លួនទៅតាមទំហំ និងចំនួនឯកត្តាមូលនិធិដែលខ្លួនទិញកាលពីដើមទី៕

ចំណេះដឹង! តើសិទ្ធិជួលអចិន្ត្រៃយ៍មានការកំណត់រយៈពេលដូចម្តេច?

May 30, 2019

0

ដោយ វុត្ថា

ភ្នំពេញ៖ សិទ្ធិជួលអចលនវត្ថុ ដែលមានរយៈពេលវែងលើសពី១៥ឆ្នាំឡើង ទៅត្រូវបានក្រមរដ្ឋប្បវេណី នៃព្រះរាជាណាចក្រកម្ពុជាឆ្នាំ២០០៧(មាត្រា២៤៤)ចាត់ទុកជាសិទ្ធិជួលអចិន្ត្រៃយ៍។

តើសិទ្ធិនេះត្រូវបានបង្កើតឡើងបែបណា ហើយប្រើប្រាស់យ៉ាងណាទៅវិញ។មនុស្សមួយចំនួនទំនងជាបានយល់ ; ហើយមួយចំនួនច្រើនទៀត ទំនងជាមិនបានយល់នោះទេ។

ការបង្កើតសិទ្ធិជួលអចិន្ត្រៃយ៍ មែនទែនទៅវាគ្មានការបង្កើតសិទ្ធិឯណា ដោយមិនមានការព្រមព្រៀងឬការសន្មត់របស់ច្បាប់ ឬបញ្ញត្តិនានានោះទេ។ សិទ្ធិជួលអចិន្ត្រៃយ៍គឺបង្កើតឡើងតាមតែមធ្យោបាយតែមួយគត់គឺកិច្ចសន្យាជួល ហើយដែលត្រូវធ្វើឡើងជាលាយល័ក្ខណ៍អក្សរ ដែលមានរយៈពេលលើសពី១៥ឆ្នាំឡើងទៅនេះ បើយោងតាមមាត្រា២៤៤ នៃក្រមរដ្ឋប្បវេណី។

ទម្រង់នៃកិច្ចសន្យាជួលអចិន្ត្រៃយ៍

កិច្ចសន្យាជួលអចិន្ត្រៃយ៍ គឺជាកិច្ចសន្យាដែលត្រូវតែធ្វើជាលាយលក្ខណអក្សរហើយប្រសិនជាមិនបានសរសេរជាលាយល័ក្ខណ៍អក្សរ គឺត្រូវចាត់ទុកថាជាកិច្ចសន្សាមានថេរៈវេលាមិនកំណត់ (ភតិសន្យា)។

អ្វីដែលគួរតែដឹងបន្ថែមទៀត គឺថា បើល្គឹកណាមានកិច្ចសន្សាជាលាយលក្ខណ៍អក្សរហើយក៏ដោយ ថែមទាំងបានកំណត់អំពីពេលវេលាទៀតផងក្តី ក៏កិច្ចសន្យាជួលដែលធ្វើត្រឹមតែភាគីគ្នាឯង មិនអាចតតាំងជាមួយជនទីបីផ្សេងបាននោះទេ។ ពោលគឺជនទី៣ អាចយកកិច្ចន្យា ដែលបានចុះបញ្ជីត្រឹមត្រូវទៅតតាំងបាន។ ពោលគឺត្រូវតែយកកិច្ចសន្យា នេះទៅចុះបញ្ជីនៅការិយាល័យភូមិបាល ស្រុកឬខណ្ឌនានាដែលនៅជិតបំផុត។ ឬក៏អាចចុះបញ្ជឺតាមរយៈមន្ទីរសារការីក៏បាន។ អត្ថប្រយោជន៍នៃការចុះបញ្ជីនេះ វាមានវិសាលភាពធំធេងណាស់ គឺវាអាចតតាំងបានជាមួយតតីយជន វាអាចតតាំងបានជាមួយអនុប្បទានិកនៃកម្មសិទ្ធិដី ដែលជាកម្មវត្ថុនៃសិទ្ធិជួលអចិន្ត្រៃយ៍ បានបើទោះបីជាកម្មសិទ្ធិលើដីនោះត្រូវបាន អនុប្បទានរួចហើយក៏ដោយ។

រយៈពេលនៃកិច្ចសន្យាជួលអចិន្ត្រៃយ៍

ដូចដែលបានសន្មត់ក្នុងមាត្រា២៤៤ថា កិច្ចសន្យាជួលដែលចាប់ពី១៥ឆ្នាំឡើងទៅគឺត្រូវចាត់ទុកថា ជាកិច្ចសន្យាជួលអចលវត្ថុអចិន្ត្រៃយ៍។ ប៉ុន្តែមិនមែនមានន័យថាសិទ្ធិជួលអចិន្ត្រៃយ៍ មិនមែនគ្មានពេលកំណត់នោះទេ។

យោងតាមមាត្រា២៤៧ នៃក្រមរដ្ឋប្បវេណីដដែល គឺមិនអាចឲ្យលើសពី៥០ឆ្នាំឡើយ ហើយក៏បន្តបានត្រឹមតែ៥០ឆ្នាំទៀតដោយមិនអោយលើសទេ។ ក្នុងករណីដែលមានសិទ្ធិជួយអចិន្ត្រៃយ៍ណាដែលលើសពី៥០ឆ្នាំ គឺត្រូវបន្ថយមកត្រឹម៥០ឆ្នាំវិញបាន៕

សម្តេចតេជោអះអាងថាកម្ពុជាមិនធ្លាក់ចូលក្នុងអន្ទាក់បំណុលចិននោះទេ

May 30, 2019

0

61420920_2246039822111169_336124308088684544_n — សម្តេចនាយករដ្ឋមន្ត្រីកំពុងថ្លែងនៅក្នុងសន្និសីទអន្តរជាតិ នៅប្រទេសជប៉ុនលើកទី២៥ស្តីពី «អនាគតរបស់អាស៊ី» នាទីក្រុងតូក្យូ

ដោយ វុត្ថា

តូក្យូៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានឲ្យដឹងថា ការទទួលបានប្រាក់កម្ចីរបស់ចិនមកអភិវឌ្ឍន៍កម្ពុជា មិនមែនមានន័យថាប្រទេសកម្ពុជានឹងបាត់បង់ឯករាជ្យភាពរបស់ខ្លួន ឬធ្លាក់ចូលក្នុងអន្ទាក់បំណុលចិននោះទេ។

សម្តេចនាយករដ្ឋមន្ត្រីបានថ្លែងនៅក្នុងសន្និសីទអន្តរជាតិ នៅប្រទេសជប៉ុនលើកទី២៥ស្តីពី «អនាគតរបស់អាស៊ី» នាទីក្រុងតូក្យូនៅថ្ងៃទី៣០ ខែឧសភា ឆ្នាំ២០១៩នេះ ថា សម្រាប់កម្ពុជាអាចរក្សាអធិបតេយ្យរបស់ខ្លួនបាន នៅពេលខ្ចីប្រាក់ពីប្រទេសចិន ក៏ដូចជាប្រទេសផ្សេងទៀត ស្របតាមគម្រោងដែលកម្ពុជាត្រូវការ។

សម្តេចតេជោបន្តថា “ខ្ញុំបានលឺគេនិយាយរឿងនេះជាច្រើនថា កម្ពុជាអាចនឹងធ្លាក់ក្នុងអន្ទាក់បំណុលរបស់ចិន។ និយាយមួយបែបមិនមែនជាបញ្ហាផ្លូវមួយក្រវ៉ាតមួយនោះទេ ក៏ប៉ុន្តែខ្ញុំអាចបញ្ជាក់ថាមិនដល់ថ្នាក់ហ្នឹងនោះទេ”។ សម្តេចបន្តថា “ប្រទេសខ្លះជំពាក់បំណុលគេរហូតដល់ ២០០ ភាគរយ ទៅ៣០០ភាគរយ ឬ៥០០ភាគរយនៃផលិតផលក្នុងស្រុក (GDP)ប៉ុន្តែមិនបានបានជំពាក់ចិនឯណា វាមិនមែនជាអន្ទាក់ចិនទេ”។

សម្តេចតេជោហ៊ុន សែនបានបន្តថា សម្រាប់កម្ពុជា យើងរក្សាបាននូវអធិបតេយ្យរបស់យើងក្នុងការខ្ចី គឺខ្ចីទៅតាមគម្រោង ដែលកម្ពុជាត្រូវការ ហើយចិនគោរពនូវការសម្រេចរបស់យើង។ ការខ្ចីនេះ កម្ពុជាមានការប្រុងប្រយ័ត្នខ្លាំងណាស់ ដោយមកដល់ពេលនេះ កម្ពុជាទើបនឹងខ្ចីគេស្មើនឹង២១,៥ភាគរយប៉ុណ្ណោះ នៃអនុបាត៤០ភាគរយ ដែលអនុញ្ញត្តិឲ្យខ្ចី។

សម្តេចហ៊ុនសែនបន្តថា “យើងខ្ចីប្រាក់កម្ចីសម្បទានពីប្រទេសចិន ដោយសារមានអត្រាការប្រាក់ទាប និងផ្តល់ប្រាក់សំណងរយៈពេលយូរ”។

រដ្ឋាភិបាលកម្ពុជាបានអនុម័តវិនិយោគផ្ទាល់ ពីបរទេសប្រមាណ៧៧ភាគរយពីប្រទេសចិន។ ប្រទេសចិនមិនត្រឹមតែក្លាយទៅជាដៃគូពាណិជ្ជកម្ម ដ៏ធំបំផុតរបស់កម្ពុជាប៉ុណ្ណោះទេ ថែមទាំងជាអ្នកវិនិយោគបរទេសដ៏ធំបំផុត និងម្ចាស់ជំនួយទ្វេភាគីតាមរយៈការនាំចូលអង្ករកម្ពុជា និងប្រភពដើមនៃភ្ញៀវទេសចរបរទេស។

យោងតាមក្រុមហ៊ុន Knight Frank Cambodia ដែលជាក្រុមហ៊ុនប្រឹក្សាអចលនទ្រព្យឈានមុខគេនៅក្នុងប្រទេសកម្ពុជាបានឲ្យដឹងថា កម្ពុជាទទួលបានការវិយោគពីចិនចំនួន៣.៨ពាន់លានដុល្លារអាមេរិកកាលពីឆ្នាំមុន ក្នុងការអភិវឌ្ឍអចលនទ្រព្យនិងគម្រោងផ្លូវហាយវេ។

គម្រោងថវិការរាប់ពាន់លានដុល្លារសហរដ្ឋអាមេរិក វិនិយោគរបស់ចិននៅក្នុងប្រទេសកម្ពុជា ដែលធ្វើឲ្យប្រទេសនេះជិតថិតនៅកំពូល នៃប្រទេសក្នុងតំបន់អាស៊ាន។ គម្រោងវិនិយោគធំៗរបស់ចិន នាពេលបច្ចុប្បន្នភាគច្រើនវិនិយោគលើគម្រោងហេដ្ឋារចនាសម្ព័ន្ធ ដែលមានទឹកប្រាក់ប្រមាណ ២.០៨ ពាន់លានដុល្លារសហរដ្ឋអាមេរិក លើផ្លូវហាវេពីភ្នំពេញទៅខេត្តព្រះសីហនុ ដែលជាផ្លូវដ៏សំខាន់ក្នុងកដឹកជញ្ជូនទំនិញរបស់កម្ពុជា វិស័យសំណង់ និងអចលនទ្រព្យ វិស័យទេសចរណ៍ ថាមពលអគ្គិសនី និងកសិកម្មជាដើម៕