ក្រសួងបរិស្ថានគាំទ្រគម្រោងសិក្សាស្វែងរុករករ៉ែលោហៈនៅតំបន់អូរឈូង ខេត្តមណ្ឌលគិរី

December 28, 2018

ដោយ វុត្ថា

ភ្នំពេញ៖ ក្រសួងបរិស្ថានបានប្រកាសគាំទ្រ គម្រោងសិក្សាស្វែងរុករករ៉ែលោហៈ នៅតំបន់អូរឈូង លើផ្ទៃដីទំហំ១៨២គីឡូម៉ែត្រក្រឡា ឬស្នើនឹង១៨,២០០ហិកតា ដែលមានទីតាំង ស្ថិតនៅក្នុងភូមិសាស្ត្រ ឃុំពូជ្រៃ ស្រុកពេជ្រាដា និងឃុំចុងផ្លាស់ ស្រុកកែវសីមា ខេត្តមណ្ឌលគិរី។

តំបន់នេះមួយផ្នែកស្ថិតនៅ តំបន់ប្រើប្រាស់ដោយចីរភាព នៃដែនជម្រកសត្វព្រៃភ្នំព្រេច និងឃុំស្រែជិះ ស្រុកសំបូរ ខេត្តក្រចេះ របស់ ក្រុមហ៊ុន Renaissance Minerals (Cambodia) Limited ដែលជាម្ចាស់គម្រោងក្រោយពីបានសិក្សា និង រៀបចំ របាយការណ៍ វាយ តម្លៃ ដោយក្រុម ហ៊ុន ទីប្រឹក្សា E & A Consultant Co., Ltd.។

លោកសូ ខនឬទ្ធីគុណ រដ្ឋលេខាធិការក្រសួងបរិស្ថាន នៅក្នុងកិច្ចប្រជុំអន្តរក្រសួងស្តីពីការពិនិត្យ និងផ្តល់យោបល់លើរបាយការណ៍វាយតម្លៃ ហេតុប៉ះពាល់បរិស្ថាន និងសង្គមដំបូង (IESIA)កាលពីថ្ងៃទី២៧ ខែធ្នូ ឆ្នាំ២០១៨កន្លងមកបានឲ្យដឹងថា ក្រសួងបានគាំទ្រគម្រោង សិក្សាស្រាវជ្រាវរុករករ៉ែលោហៈនេះ ដើម្បីទទួលបានទិន្នន័យនៃសក្តានុពលធនធានរ៉ែលោហៈ។ លោកក៏ជំរុញខាងក្រុមហ៊ុន ត្រូវប្រើប្រាស់ទិន្នន័យរបស់ជាតិជាគោល ត្រូវស្វែងរកបន្ថែមនូវទិន្នន័យព្រៃឈើ និងសត្វព្រៃនៅក្នុងដែនជម្រកសត្វព្រៃ ភ្នំព្រេច និងផែនទីគម្របព្រៃឈើឆ្នាំ២០០៦-២០១៦ ត្រូវយកចិត្តទុកដាក់លើការគ្រប់គ្រងសំណល់រឹង-រាវចេញពីការខួង និងជំរុំ កម្មករ ដើម្បីកាត់បន្ថយការបំពុលគុណភាពទឹកលើដី-ក្រោមដី។

លោករដ្ឋលេខាធិការ ក៏ជម្រុញបន្ថែមឪ្យក្រុមហ៊ុនត្រូវយកចិត្តទុកដាក់ លើសុខុមាលភាព និងសុវត្ថិភាពកម្មករ ពិសេសការបង្ការ ជម្ងឺគ្រុនចាញ់ និងជម្ងឺផ្សេងៗ ត្រូវរៀបចំផែនការគ្រប់គ្រងបរិស្ថានច្បាស់លាស់ និងមានប្រសិទ្ធិភាព ដើម្បីឆ្លើយតបទៅនឹងហេតុប៉ះពាល់បរិស្ថានដែលអាចនឹងបង្កឡើង ដោយគម្រោង ក្រុមហ៊ុនផ្តល់ថវិកាមូលនិធិបរិស្ថាន និងសង្គមចំនួន១៥.០០០ដុល្លារសហរដ្ឋអាមេរិកក្នុង១ឆ្នាំ សម្រាប់រយៈពេលសិក្សាស្រាវជ្រាវចំនួន៣ឆ្នាំ។

ជាមួយនេះក្រុមហ៊ុនត្រូវសហការជាមួយ អគ្គនាយកដ្ឋានរដ្ឋបាលការពារ និងអភិរក្ស ធម្មជាតិ មន្ទីរ បរិស្ថាន ខេត្តមណ្ឌលគិរី និងឧទ្យានុរក្សដែនជម្រកសត្វព្រៃភ្នំព្រេចក្នុងការទប់ស្កាត់ បទល្មើសធនធានធម្មជាតិ នៅក្នុងតំបន់សិក្សាស្រាវជ្រាវ និងត្រូវកែសម្រួលទៅតាមមតិយោបល់របស់មតិអង្គប្រជុំដែលបានលើកឡើង៕

CBC នឹងចាប់ផ្តើមដាក់ឲ្យប្រើប្រាស់ប្រព័ន្ឋរាយការណ៍ព័ត៌មានឥណទានជាលក្ខណៈក្រុមហ៊ុន

December 28, 2018

0

ដោយ ដែន ចែងចាំង

ភ្នំពេញ៖ ការិយាល័យឥណទានកម្ពុជាហៅកាត់ CBC នឹងចាប់ផ្តើមដាក់ឲ្យប្រើប្រាស់ប្រព័ន្ឋឥណទានរបាយការណ៍ព៌តមានឥណទាន ជាលក្ខណៈនិតិបុគ្គលនៅឆ្នាំ២០១៩ខាងមុខនេះ។

ប្រធាននាយកប្រតិបត្តិរបស់ការិយាល័យឥណទានកម្ពុជាលោក អឿ សុធារ័ត្នបានមានប្រសាសន៍ ក្នុងជំនួបជាមួយក្រុមអ្នកសារព៌តមាននាព្រឹកថ្ងៃទី២៧ ធ្នូកន្លងមកថាអស់រយៈពេលជាង៦ឆ្នាំហើយ ដែលស៊ីប៊ីស៊ីបានដំណើរការក្នុងប្រទេសកម្ពុជា ដែលអនុញ្ញាតអោយស្ថាប័នជាសមាជិកទាំង១៥៨ស្ថាប័ន អាចឆែករបាយការណ៍ឥណទានលក្ខណៈបុគ្គល (Credit Report) តាមរយៈប្រព័ន្ធរបស់ស៊ីប៊ីស៊ី។ តាមរយៈប្រព័ន្ធនេះ វាបានជួយរួមចំណែក ដល់ការគ្រប់គ្រងហានិភ័យឥណទាន និងផ្តល់ព័ត៌មានគ្រប់ជ្រុងជ្រោយដល់ស្ថាប័នជាសមាជិកក្នុងការសម្រេចចិត្ត ជួយដល់អតិថិជនក្នុងការស្វែងរកឥណទាន និង ជួយដល់សេ្ថរភាពវិស័យហិរញ្ញវត្ថុ និង សេដ្ឋកិច្ចទាំងមូល។

លោកបន្តថា ដោយមើលឃើញអត្ថប្រយោជន៍ និងភាពចាំបាច់នៃប្រព័ន្ធ ទើបនៅឆ្នាំ២០១៨នេះ ការិយាល័យឥណទានកម្ពុជា បានសហការជាមួយស្ថាប័នជាសមាជិកនិងស្ថាប័នដៃគូរពាក់ព័ន្ធនានា ក្នុងការបង្កើតប្រព័ន្ធរាយការណ៍ព័ត៌មានឥណទានលក្ខណៈក្រុមហ៊ុន(និតីបុគ្គល)។ លោកបានបន្តថា ជាលទ្ធផល យើងមានមោទនភាពក្នុងការដាក់អោយប្រើប្រាស់ប្រព័ន្ធ រាយការណ៍ព័ត៌មានឥណទានលក្ខណៈក្រុមហ៊ុន (និតីបុគ្គល) ចាប់ពីខែមករា ឆ្នាំ២០១៩តទៅ ដែលអនុញ្ញាតអោយស្ថាប័នជាសមាជិកអាចធ្វើការឆែករបាយការណ៍ឥណទានរបស់ក្រុមហ៊ុនដែលស្នើសុំឥណទានបាន»។

ជាមួយគ្នានេះលោកស្រី ស៊ីសុវត្ថិ រស្មី នាយិកាអភិវឌ្ឍអាជីវកម្ម បានបង្ហាញពីសេវាដំណោះស្រាយអាជីវកម្មនៃCBC ដែលជួយដល់ស្ថាប័នជាសមាជិក ក្នុងការគ្រប់គ្រងហានិភ័យ និងពង្រីកអាជីវកម្មរបស់ខ្លួន។ ជាពិសេសចាប់ពីឆ្នាំ២០១៩តទៅ ការិយាល័យឥណទានកម្ពុជា នឹងដាក់អោយដំណើរការនូវប្រព័ន្ធរបាយការណ៍ឥណទាន ក្រុមហ៊ុនដែលអនុញ្ញាតអោយស្ថាប័នជាសមាជិក អាចធ្វើការឆែករបាយការណ៍ឥណទានរបស់ក្រុមហ៊ុន ដែលស្នើសុំឥណទានអាជីវកម្ម។

ការិយាល័យឥណទានកម្ពុជា គ្រោងនឹងដាក់អោយដំណើរការជាផ្លូវការនូវ «សេវាត្រួតពិនិត្យសុខភាពហិរញ្ញវត្ថុ (Financial Health Check) តាមរយៈការសហការដៃគូរជាមួយ ធនាគារអេស៊ីលីដា ភីអិលស៊ី និងគ្រឹះស្ថានមីក្រូហិរញ្ញវត្ថុអេអឹមខេ ដែលអនុញ្ញាតអោយអតិថជន អាចឆែករបាយការណ៍ឥណទានផ្ទាល់ខ្លួនបាន ចាប់ពីខែមករាឆ្នាំ២០១៩តទៅ នៅតាមសាខាមួយចំនួនរបស់ស្ថាប័នទាំងពីរ។ សេវាកម្មនេះ នឹងពង្រីកបន្ថែមជាមួយស្ថាប័នដៃគូរក្នុងគោលដៅគ្របដណ្តប់ គ្រប់សាខាទូទាំងប្រទេសក្នុងឆ្នាំ២០១៩ ផងដែរ៕

សម្តេចតេជោ៖ វិមានឈ្នះ ឈ្នះ តំណាងឲ្យការរួចផុតពីភាពក្រីក្រ និងរួចផុតពីការអុចអាលដោយបរទេស

December 28, 2018

0

ដោយគង់ សូរិយា

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងអះអាងថា សំណង់វិមាន ឈ្នះឈ្នះគឺបានតំណាងឲ្យកម្ពុជារួចផុតពីភាពក្រីក្រនិងរួច ផុតពីការអុចអាលពីបរទេស ដូច្នេះក្នុងថ្ងៃសម្ពោធជាផ្លូវការរយៈពេលបីថ្ងៃខាងមុខនេះ គប្បីបងប្អូនជនរួមជាតិទៅចូលរួមឲ្យបានកុះករ។

ថ្លែងតាមរយៈសង្គមហ្វេបសុកផ្ទាល់របស់សម្តេចនាព្រឹកថ្ងៃទី២៨ ខែធ្នូ ឆ្នាំ២០១៨នេះ សម្តេចតេជោហ៊ុន សែនបានលើកឡើងថា កម្ពុជាអបអរសាទរចំពោះសមិទ្ឋផលប្រវត្តិសាស្ត្រនៃវិមានឈ្នះឈ្នះ ដែលត្រូវបានកសាងរួចស្រេចជាស្ថាពរ នៅលើទឹកដីសុវណ្ណភូមិ។ វិមានឈ្នះឈ្នះ គឺជាតំណាងនៃការបង្រួបបង្រួមជាតិ ឯករាជ្យជាតិ សាមគ្គីភាព បូរណភាពទឹកដី វឌ្ឍនភាព និងវិបុលភាពនៃកម្ពុជាទាំងមូល។

សម្តេចបានថ្លែងថា “វិមានឈ្នះ ឈ្នះគឺបញ្ជាក់ច្បាស់ថា កម្ពុជាបានរួបរួមគ្នាជាធ្លុងមួយ ឈ្នះរួចផុតពីសង្គ្រាម ឈ្នះរួចផុតពីរបបប្រល័យពូជសាសន៍ ឈ្នះរួចផុតពីការបែងចែកទឹកដីតំបន់ត្រួតត្រា ឈ្នះរួចផុតពីភាពក្រីក្រ និងឈ្នះរួចផុតពីការអុចអាលដោយបរទេស ដែលពេលនេះកម្ពុជាកំពុងដឹកនាំអនាគតវាសនាប្រទេសជាតិ ឆ្ពោះទៅរកភាពរុងរឿងនៅក្នុងសន្តិភាពដ៏យូរអង្វែងនេះតទៅ។

យ៉ាងណាក៏ដោយ ខណៈវិមានឈ្នះឈ្នះនៅសល់តែមួយថ្ងៃទៀត នឹងត្រូវសម្ពោធជាផ្លូវការហើយនោះ សម្តេចក៏បានអំពាវនាវដល់បងប្អូនជនរួមជាតិ និងភ្ញៀវអន្តរជាតិ ចូលរួមឲ្យបានច្រើនកុះករផងដែរ។ ដោយសម្តេចបានថ្លែងថា សូមអញ្ជើញបងប្អូនជនរួមជាតិ និងភ្ញៀវទេសចរអន្តរជាតិចូលរួមសម្ពោធ វិមានឈ្នះ ឈ្នះ ដែលនឹងប្រារព្វធ្វើនៅថ្ងៃទី ២៩ ខែ ធ្នូ ឆ្នាំ ២០១៨ (រយៈពេល៣ថ្ងៃ) នៅ មហាវិថីឈ្នះ ឈ្នះ ទល់មុខពហុកីឡដ្ឋានមរតកតេជោនៅតំបន់អភិវឌ្ឍន៌ លីយ៉ុងផាត់។

វិមានឈ្នះ ឈ្នះ បានចាប់ផ្តើមសាងសង់ឡើងកាលពីខែកុម្ភៈ ឆ្នាំ២០១៦ ដោយទំហំដី៨ហិចតា ស្ថិតនៅសង្កាត់ព្រែកតាសេក ខណ្ឌជ្រោយចង្វាររាជធានីភ្នំពេញ ហើយនឹងត្រូវសម្ពោធជាផ្លូវការចំនួនបីថ្ងៃគឺចាប់ពីថ្ងៃទី២៩ដល់ថ្ងៃទី៣១ខែធ្នូឆ្នាំ២០១៨ខាងមុខនេះ និងចំថ្ងៃដែលរាជរដ្ឋាភិបាលប្រារព្ឋពិធីខួប២០ឆ្នាំនៃនយបាយឈ្នះ ឈ្នះផងដែរ។ដោយកម្មវិធីនេះ ក៏មានថ្នាក់ដឹកនាំក្រសួងការពារជាតិប្រទេសចំនួនបួន ចូលរួមអបអរសារទដែរដោយថ្នាក់ដឹកនាំទាំងនោះមានប្រទេសចិន ថៃ ឡាវ និងវៀតណាម៕

ប្រទេសស្រីលង្កាចាប់ផ្តើមបង្អួតពិភពលោកជាមួយវត្តមានអាគារកប់ពពក

December 28, 2018

0

ដោយ វុត្ថា

ភ្នំពេញ៖ ប្រទេសស្រីលង្ការ ក្រោយពីបញ្ចប់ជាមួយក្រុមឧទ្ទាមខ្លាតាម៉ិល បានចាប់ផ្តើមបើកទ្វារទៅកាន់ពិភពលោកកាន់តែច្រើនជាងមុន ពិសេសបង្ហាញកិត្យានុភាពរបស់ខ្លួនតាមរយៈការសាងសង់អាគារកប់ពពកនៅទីក្រុងកូឡំបូ រដ្ឋធានីរបស់ប្រទេសនេះ។

រដ្ឋាភិបាលប្រទេសនេះ បាននិងកំពុងបង្ហាញមហិច្ឆតានិងបង្ហាញកិត្យានុភាពរបស់ខ្លួនទៅកាន់ពិភពលោក តាមរយៈការអនុញ្ញាត្តឲ្យក្រុមហ៊ុនធំៗចំនួនពីរ សាងសង់អាគារកប់ពពក ដើម្បីទាក់ទាញការវិនិយោគ និងជំរុញកំនើនសេដ្ឋកិច្ចរបស់ខ្លួន។

ក្រុមហ៊ុនយក្សៗចំនួន ២ គឺក្រុមហ៊ុន One Transworks Square (Pvt) Ltd., និងក្រុមហ៊ុន Zhong Tian Ding Hui (ZTDH) Company បានប្រកាសកាលពីពេលថ្មីនេះ ថា នឹងផ្លាសប្តូរមុខមាត់ទីក្រុងColombo ក្នុងប្រទេសស្រីលង្ការ ដោយសាងសង់អគារខ្ពស់អគារខ្ពស់កប់ពពកចំនួន៣ លើផ្ទៃទំហំដី៤.៥លានម៉ែត្រហ្វីត ដែលជាអគារខ្ពស់បំផុតក្នុងប្រទេសតំបន់អាស៊ីខាងត្បូង។

អគារនេះគ្រោងសាងសង់កម្ពស់៣៧៦ម៉ែត្រ ស្មើនឹង៩២ជាន់ ដែលគ្រោងនឹងសាងសង់បញ្ចប់នៅក្នុងឆ្នាំ ២០២។ អគារទាំង៣នេះ ត្រូវបានគេហៅថា THE ONE ស្ថិតនៅក្នុងទីក្រុងកូឡុំបូ នឹងក្លាយជាលំនៅដ្ឋានខុនដូ អាផាតម៉ិន និងភោជនីដ្ឋាន Ritz- Carlton ដ៏ល្បីល្បាញនៅលើពិភពលោក។

មជ្ឈមណ្ឌលពាណិជ្ជកម្មលំដាប់ពិភពលោកមួយនេះ ក៏រួមបញ្ចូលទាំងការិយាល័យ កន្លែងស្នាក់នៅ ផ្សារទំនើប កន្លែងចតរយន្ត ភោជយនីដ្ឋាន ស្កាយបា ការិយាល័យពាណិជ្ជកម្ម និងអាចដាក់យន្តហោះបាននៅលើកំពូលអាគារផងដែរ។

លោក Sam Hu អ្នកគ្រប់គ្រងទូទៅរបស់ក្រុមហ៊ុន ZTDH Investment Company បានថ្លែងប្រាប់អ្នកសារព័ត៌មានក្នុងស្រុកថា អគារ THE ONE កសាងឡើងសម្រាប់ជាកេរ្តិ៍ដំណែលរបស់ទីក្រុងកូឡាំបូ និងជាគារខ្ពស់កប់ពពកដែលខ្ពស់ជាងគេ នៅក្នុងតំបន់អាស៊ីខាងត្បូងនេះ ដែលមានស្ថាបត្យកម្មដ៏ទើបរបស់ប្រទេស្រីលង្កា។

អគារនេះ នឹងផ្លាស់ប្តូរផ្តត់គំនិត និងការរស់នៅរបស់ប្រទេសនេះ ប្រកបដោយស៊ីវីល័យ ដោយមានភោជនីដ្ឋានល្បីៗ និងកន្លែងស្នាក់នៅដ៏ទំនើប សម្រាប់អ្នកដែលមានទ្រព្យធន និងអ្នកកណ្តាល។ អគារនេះ សាងសង់ឡើងប្រកបដោយបច្ចេកវិទ្យាខ្ពស់ មានទាំងជណ្តើរយន្តមានល្បឿនលឿន សម្ភារៈដ៏ទំនើបជាច្រើនផ្សេងទៀត។

អគារ THE ONE នេះត្រូវបានផ្តល់ជូនក្រុមហ៊ុន Zhongtian Construction Group Company Limited ជាអ្នកទទួលបន្ទុកក្នុងការសាងសង់។

អគារដល់អស្ចារ្យនេះ ត្រូវបានគេបោះទុនវិនិយោគ ក្នុងទំហំទឹកប្រាក់ប្រមាណជា ៥០០លានដុល្លារ ដោយប្រើរយៈពេលសាងសង់ចំនួន៥ឆ្នាំ គ្រោងនឹងបញ្ចប់នៅក្នុងឆ្នាំ ២០២១ខាងមុខ។

ប្រទេសស្រីលង្ការមានប្រជាជន២១,៤៤លាននាក់ និងប្រាក់ចំណូលប្រជាពលរដ្ឋម្នាក់មានចំនួន៤,០៦៥ដុល្លារអាមេរិក ហើយមានផ្ទៃដីទំហំ៦៥,៦១០គីឡូម៉ែត្រការ៉េ(តួលេខឆ្នាំ២០១៧)៕

ផ្លូវថ្មើជើងទំនើបទី១នៃទីក្រុងភ្នំពេញនឹងបើកដំណើរការនៅខែមេសាខាងមុខ

December 28, 2018

0

ដោយគង់ សូរិយា

ភ្នំពេញ៖ ផ្លូវថ្មើជើងដ៏ទំនើប ដែលមានបំពាក់ជណ្តើរយន្តលើកទី១នៅក្រុងភ្នំពេញនឹងបើកដំណើរការនៅកំឡុងខែមេសាខាងមុខនេះ ប្រសិនជាគ្មានការប្រែប្រួលទេនោះ។

ប្រធានគ្រប់គ្រងគំរោង Olympia City លោក ម៉េង ចំរើន បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៨ ធ្នូនេះថា គំរោងផ្លូវថ្មើជើងនេះ នឹងសាងងសង់បញ្ចប់នៅដំណាច់ខែមករាខាងមុខ តែការបើកឲ្យដំណើរការនឹងធ្វើ ឡើងនៅកំឡុងខែមេសា ឆ្នាំ២០១៩ខាងមុខនេះ។

លោកបន្តថា គំរោងផ្លូវថ្មើជើងនេះ ជាផ្លូវទំនើបទី១នៅក្រុងភ្នំពេញ និងមានប្រវែងប្រមាណជាង២០០ម៉ែត្រ។

ផ្លូវថ្មើជើងនេះសាងសង់នៅចំណុចផ្លូវប្រសព្វចំនួន៥ គឺចំណុចផ្លូវបំបែកជា៥ ដែលជាអតីតរង្វង់មូលមានអង្ហីងចាស់។

លោក ទូច សំណាង អគ្គនាយករងក្រុមហ៊ុន OCIC បានមានប្រសាសន៍ឲ្យដឹងថា តាមគំរោងស្ពានថ្មើជើងនេះ នឹងបើកនៅកំឡុងខែមេសាខាងមុខ ដំណាលគ្នានឹងការបើកដំណើរការផ្សារទំនើប Olympia Mall ដែលនឹងបើកដំណើរការនៅក្នុងគម្រោងមណ្ឌលមជ្ឈមពាណិជ្ជកម្ម និងលំនៅដ្ឋាន Olympia City ផងដែរ។

លោកទូច សំណាងធ្លាប់បានមានប្រសាសន៍ឲ្យដឹងថា គំរោង Olympia City ចំណាយប្រាក់ផ្នែកសំណង់តែមួយមុខ អស់ទឹកប្រាក់ចន្លោះពី ៤០០ទៅ ៥០០លានដុល្លារអាមេរិក ហើយទំហំទឹកប្រាក់នេះ មិនទាន់គិតបញ្ចូលពីតម្លៃដីនៅតំបន់នេះនៅឡើយទេ៕

ស្វែងយល់ពីអាស៊ាន! ការផ្គត់ផ្គង់ខុនដូក្នុងប្រទេសថៃនឹងថយចុះសម្រាប់ឆ្នាំក្រោយ

December 27, 2018

0

ដោយ វុត្ថា

ប្រទេសថៃ៖ ការផ្គត់ផ្គង់ខុនដូរថ្មី នៅក្នុងទីក្រុងបាងកកនៅឆ្នាំ២០១៨ នឹងធ្លាក់ចុះ ១៣ភាគរយ ស្មើរនឹង៥៣,០០០យូនីត ដែលមានសភាពដូចទៅនឹងទីផ្សារមធ្យមកាលពី៥ឆ្នាំដែរ។

លោកស្រី Nalinrat Chareonsuphong ប្រធានគ្រប់គ្រង់កក្រុមហ៊ុនពិគ្រោះយោបល់អចលនទ្រព្យ Nexus Property Market Coបានឲ្យដឹងកាលពីពេលថ្មីៗនេះថា ការផ្គត់ផ្គង់ខុនដូ នឹងស្ថិតនៅចន្លោះពី ៥០,០០០ ទៅ៥៥,០០០យូនីត ពោលគឺស្មើជិតទៅនឹងចំនួនដែលបានលក់នៅក្នុងឆ្នាំ២០១៨ នេះ ដែលខុនដូចំនួន៥២,០០០យូនីតត្រូវបានលក់ចេញ ។ នេះរាប់បញ្ចូលខុនដូចំនួន៣១,០០០យូនីត ដែលត្រូវសម្ពោធដាក់នៅក្នុងទីផ្សារក្នុងឆ្នាំ២០១៨ និង ចំនួន២០,៨០០ យូនីតត្រូវបានសម្ពោធចូលទៅក្នុងទីផ្សារក្នុងឆ្នាំ២០១៧ កន្លងទៅនេះ។

លោកស្រីបានផ្តល់យោបល់ដល់អ្នកអភិវឌ្ឍន៍ទាំងអស់ គួរផ្តោតទៅលើការសាងសង់ខុនដូដែលមានតម្លៃសមរម្យនៅក្នុងទីក្រុង ព្រោះវាជាតម្រូវការមូលដ្ឋានរបស់អ្នកទិញ។ នេះវាជាផ្នែកមួយប្រកបដោយស្ថេរភាព និងនិរន្តភាពសម្រាប់អ្នកទិញបរទេស ឬ អ្នកទិញសម្រាប់ធ្វើការវិនិយោគបន្ត។

យោងតាមរបាយការណ៍របស់ក្រុមហ៊ុន ពិគ្រោះយោបល់អចលនទ្រព្យ Nexus Property Marketing Co បានបង្ហាញឲ្យដឹងផងដែរថា តម្លៃខុនដូរនៅក្នុងទីក្រុងបាងកកមានតម្លៃ៧៥,០០០បាត ក្នុងមួយម៉ែត្រការ៉េ ឬ ក្រោម២.៥លានបាតក្នុងមួយយូនីតដែលជាខុនដូមានតម្រូវការក្នុងទីផ្សារពិតប្រកដ៕

ក្រុមហ៊ុន KW Cambodia និងដៃគូប្រកាសលក់គម្រោងតម្លៃ ១០០ពាន់លានដុល្លារនៅម៉ាឡេស៊ី

December 27, 2018

0

ដោយ គង់ សូរិយា

ភ្នំពេញ៖ ក្រុមហ៊ុន Keller Williams Cambodia បានសហការជាមួយក្រុមហ៊ុន Country Garden ដើម្បីលក់គម្រោង Forest City ដែលជាគម្រោងអភិវឌ្ឍន៍លំនៅដ្ឋានដែលមានតម្លៃវិនិយោគរហូតដល់ ១០០ពាន់លានដុល្លារអាមេរិក។

គំរោងដ៏ធំនេះស្ថិតនៅទីក្រុង Johor Bahru ប្រទេសម៉ាឡេស៊ី និងមានទីតាំងជាប់ព្រំប្រទល់ប្រទេសសឹង្ហបុរី។

លោកបណ្ឌិតគីម ហ៊ាងអគ្គនាយកក្រុមហ៊ុន KW Cambodia បានមានប្រសាសន៍ឲ្យដឹងបន្ទាប់ពីចុះកិច្ចសន្យាលក់អចលនទ្រព្យ ជាមួយលោក Fuzhi Geng ប្រធានផ្នែកលក់ និងទីផ្សាររបស់គម្រោង Forest City ក៏ដូចសមាជិករបស់ក្រុមហ៊ុន Keller Williams Cambodia ជាង១០០នាក់កាលពីថ្ងៃទី២៦ ធ្នូកន្លងមកថា នេះគឺជាការបោះជំហ៊ានដ៏ធំលើកដំបូង សម្រាប់ដំណើរការអាជីវកម្មរបស់ក្រុមហ៊ុន Keller Williams Cambodia ហើយក៏ជាឱកាសដ៏ល្អសម្រាប់សមាជិករបស់ខ្លួន ក្នុងការចាប់យកឱកាសនេះ ដើម្បីអភិវឌ្ឍន៍សមត្ថភាព រៀនសូត្រ និងការប្រកួតប្រជែងលើទីផ្សារអន្ដរជាតិ ជាមួយនឹងការលក់គម្រោង Forest City ។

គម្រោងអភិវឌ្ឍន៍ដ៏ធំនេះ បានអភិវឌ្ឍន៍លើផ្ទៃដីប្រមាណ៣,០០០ហិចតា ក្បែរព្រំដែនប្រទេសសិង្ហបុរី។

បន្ទាប់ពីពិធីចុះហត្ថលេខានេះ អ្នកជំនាញផ្នែកលក់របស់គម្រោង Forest City ក៏បានធ្វើបទបង្ហាញ និងចែករំលែកនូវចំណេះដឹងជាច្រើន ជុំវិញទីផ្សារអចលនទ្រព្យលើពិភពលោក ក៏ដូចជាគម្រោង Forest City ដល់សមាជិករបស់ក្រុមហ៊ុន Keller Williams Cambodia ដើម្បីទុកជាមូលដ្ឋានគ្រឹះសម្រាប់ណែនាំដល់អតិថិជនរបស់ខ្លួនទៀតផង៕

រដ្ឋមន្ត្រីក្រសួងរ៉ែថា បច្ចុប្បន្នក្រុមហ៊ុនធ្វើអាជីវកម្មរ៉ែមានចំនួន ៥៧គំរោង

December 27, 2018

0

ដោយស៊ីវ ម៉េង

ភ្នំពេញ៖ មន្ត្រីជាន់ខ្ពស់ក្រសួងរ៉ែ និងថាមពលបានមានប្រសាសន៍ឲ្យដឹងថា បច្ចុប្បន្នមានក្រុមហ៊ុនកំពុងធ្វើអាជីវកម្មរ៉ែ មានចំនួន៥៧គំរោងដែលកំពុងធ្វើប្រតិបត្តិការនៅកម្ពុជានាពេលបច្ចុប្បន្ននេះ។

លោក ស៊ុយ សែម រដ្ឋមន្ត្រីក្រសួងរ៉ែ និងថាមពលបានមានប្រសាសន៍ក្នុងជំនួប ពិភាក្សាការងាររវាងថ្នាក់ដឹកនាំក្រសួងរ៉ែ និងថាមពល និងគណៈកម្មការទី៩ នៃរដ្ឋសភា នៅថ្ងៃទី២៧ ខែធ្នូ ឆ្នាំ២០១៨ នេះថា គោលដៅការអភិវឌ្ឍន៍រ៉ែនេះ អ្នកធ្វើអាជីវកម្មស្វែងរុករក ឬដំណាក់កាលសិក្សារ៉ែ បានចូលក្នុងដំណាក់កាលអភិវឌ្ឍន៍។ ជាក់ស្តែងចាប់ពីឆ្នាំ២០១៤ ដល់២០១៨នេះ អាជ្ញាប័ណ្ណរ៉ែមានកំណើនចាប់ពី១៤ដល់២៧អាជ្ញាប័ណ្ណ ក្នុងនោះក្រសួងបានផ្អាក ឬចប់គម្រោងសមប្បទានស្វែងរុករករ៉ែពីចំនួន១៣១ មកនៅ៥៧គម្រោង កំពុងបន្តប្រតិបត្តិការ។

លោកបន្តថា “ការផ្តល់ធ្វើអាជីវកម្មរ៉ែ កន្លែងដែលក្រសួងបានចេញអាជ្ញាប័ណ្ណឲ្យធ្វើអាជីវកម្ម មូលដ្ឋាននោះនឹងមានការអភិវឌ្ឍន៍រីកចម្រើនផងដែរ ក្រោមគម្រោងមូលនិធិរ៉ែ ទ្រទ្រង់កិច្ចអភិវឌ្ឍន៍សហគមន៍មូលដ្ឋាន។លោកបន្តថា “អាជ្ញាធរមូលដ្ឋានជ្រើសរើសយកគោលដៅតំបន់អភិវឌ្ឍន៍ ហើយរហូតមកដល់បច្ចុប្បន្នមូលនិធិនេះ បានចូលរួមអភិវឌ្ឍន៍ចំនួន៧ខេត្តរួចមកហើយ។

ជាមួយគ្នានេះ លោកជំទាវ និន សាផុន ប្រធានគណៈកម្មការទី៩ នៃរដ្ឋសភាបានកោតសរសើរ ចំពោះការខិតខំប្រឹងប្រែងរបស់មន្ត្រីក្រសួងទាំងអស់ ក្នុងការជម្រុញកែទម្រង់លើវិស័យរបស់ក្រសួង និងបានលុបបំបាត់ការធ្វើអាជីវកម្ម រ៉ែអាណាធិបតេយ្យបានជាអតិបរិមា ជាពិសេសវិស័យអគ្គិសនី ដែលបានកំពុងចូលរួមចំណែកយ៉ាងធំក្នុងការអភិវឌ្ឍន៍ប្រទេសជាតិ។

លោកជំទាវបន្តថា “សូមឲ្យថ្នាក់ដឹកនាំ និងមន្ត្រីក្រសួងទាំងអស់ បន្តការអភិវឌ្ឍន៍វិស័យទាំងនេះឲ្យកាន់តែប្រសើរ និងមានប្រសិទ្ធដើម្បីជម្រុញការអភិវឌ្ឍន៍ប្រទេសជាតិឲ្យកាន់តែរិកចម្រើន”៕

ក្រុមហ៊ុនចិនពីរបោះទុន១០០លានដុល្លារអភិវឌ្ឍគំរោងអចលនទ្រព្យប្រណីត នៅក្រុងភ្នំពេញ

December 27, 2018

0

ដោយស៊ីវ ម៉េង
ភ្នំពេញ: ក្រុមហ៊ុនចិនធំៗចំនួនពីរ បានសហការគ្នាវិនិយោគក្នុងទំហំទឹកប្រាក់សរុបប្រមាណ១០០លានដុល្លារអាមេរិក ក្នុងវិស័យឧស្សាហកម្មសំណង់ និងការអភិវឌ្ឍផ្នែកអចលនទ្រព្យនៅក្នុងប្រទេសកម្ពុជា លើគម្រោងអភិវឌ្ឍន៍មជ្ឈមណ្ឌលពហុមុខងារ និងការរៀបចំសួនអេកូ រចនាបទអាស៊ីអាគ្នេយ៍។

នៅក្នុងពិធីបើកការដ្ឋានសាងសង់គម្រោងទីក្រុងរំដួល និងសម្ពោធការិយាល័យលក់ សង្កាត់ទឹកថ្លា ខ័ណ្ឌសែនសុខ រាជធានីភ្នំពេញ កាលពីថ្ងៃទី២៦ ធ្នូកន្លងមកនេះ លោកLIU FENG អគ្គនាយកក្រុមហ៊ុSRE Groupបានមានប្រសាសន៍ឲ្យដឹងថា ដោយមើលឃើញកម្ពុជា ជាប្រទេសដ៏សំខាន់មួយនៅក្នុងគោលនយោបាយ ខ្សែក្រវ៉ាត់មួយ វិថីមួយទើបសម្រេចដាក់ទុនវិនិយោគនេះ ឡើងលើផ្ទៃដីសរុបទំហំជាង១៦ពាន់ម៉ែត្រក្រឡា។

លោកបន្តថា “គម្រោងទីក្រុងរំដួលនេះ នឹងបង្កប់នូវទ្រឹស្តីសហគមន៍រស់នៅបែបសួនឧទ្យានបៃតងដ៏ធំ និងកម្រមួយនៅក្នុងទីក្រុងភ្នំពេញ ដោយត្រូវបានរចនាឲ្យមានសួនអេកូឡូស៊ី បែបអាស៊ីបូព៌ា និងការច្របាច់បញ្ចូលគ្នាយ៉ាងល្អនូវទេសភាពដើមត្នោត និងទឹកថ្លាឆ្វេង”។ លោកបន្តថា “គំរោងនេះក៏នឹងបង្កើតបានជាសួនឧទ្យានអេកូឡូស៊ី ដ៏ស្រស់សោភាសម្រាប់ជាមោទនភាពនៃទីក្រុងភ្នំពេញ”។

គំរោងនេះវិនិយោគដោយក្រុមហ៊ុនរំដួល អូវើស៊ី និងក្រុមហ៊ុនSRE Group។

អភិបាលរាជធានីភ្នំពេញ លោកឃួង ស្រេងបានមានប្រសាសន៍ថា ព្រឹត្តការណ៍នេះមិនត្រឹមតែជាសក្ខីភាពបញ្ជាក់ឲ្យឃើញ នូវការចូលរួមអបអរសាទរ និងគាំទ្រចំពោះការវិនិយោគរបស់ក្រុមហ៊ុនបរទេសប៉ុណ្ណោះទេ ប៉ុន្តែថែមទាំងបានឆ្លុះបញ្ចាំឲ្យឃើញនូវភាពជោគជ័យថ្មីមួយទៀត នៃការអនុវត្តគោលនយោបាយរបស់រដ្ឋាភិបាលកម្ពុជា ដែលបានខិតខំទាក់ទាញការវិនិយោគទាំងក្នុង និងក្រៅប្រទេស ពិសេសការខិតខំបង្កើនទំនុកចិត្ត និងជំនឿជាក់ជូនដល់វិនិយោគិន ធុរជន ក្នុងវិស័យអចលនទ្រព្យ ដែលកំពុងបោះជំហានទៅមុខយ៉ាងលឿន។

លោកបន្តថា “ការវិនិយោគគំរោងនេះ ធ្វើឡើងសមស្របទៅនឹងការកើនឡើងនូវចំណូលប្រចាំខែរបស់ប្រជាពលរដ្ឋខ្មែរ និងជាការចូលរួមចំណែកឲ្យមានកំណើនសេដ្ឋកិច្ចជាតិ និងការអភិវឌ្ឍរាជធានីភ្នំពេញឲ្យកាន់តែស៊ីវីល័យថែមទៀត”៕

អ្នកវិនិយោគក្នុងស្រុកបោះទុន៣០លានដុល្លារសង់បុរីនិងដីសម្រាប់សាងសង់អាគារពាណិជ្ជកម្មនៅក្រុងប៉ោយប៉ែត

December 27, 2018

0

ដោយគង់ សូរិយា
ក្រុងប៉ោយប៉ែត: អ្នកវិនិយោគក្នុងស្រុកនៃក្រុមហ៊ុនFours Star Plus Four បានសម្រេចចិត្តវិនិយោគទឹកប្រាក់៣០លានដុល្លារ លើគំរោងលំនៅដ្ឋាន និងដីសម្រាប់សាងសង់អាគារពាណិជ្ជកម្មនៅក្រុងប៉ោយប៉ែត ដែលជាទីក្រុងកំពុងរីកចម្រើនយ៉ាងលឿននាពេលបច្ចុប្បន្ននេះ។

ស្ថាបនិកក្រុមហ៊ុនFours Star Plus Fourលោកសួង សុខហ៊ាងបានមានប្រសា សន៍ឲ្យដឹងតាមទូរស័ព្ទ នាព្រឹកថ្ងៃទី២៧ ធ្នូនេះថា ក្រុមហ៊ុនបានសម្រេចចិត្តវិនិយោគគំរោងមួយ ឈ្មោះStar Gold លើផ្ទៃដីជាង៧ហិកតា ដោយបែងចែកជាពីរផ្នែក ដូចជា ទី១ ដី៤ហិកតាជាប្រភេទដីឡូត៍ សម្រាប់សាងសង់អាគារពាណិជ្ជកម្ម និងមានទំហំ២០គុណនឹង៣០ម៉ែត្រ និងទំហំ២០គុណនឹង៦០ម៉ែត្រ ដែលដាក់លក់ក្នុងតម្លៃ៦៣០ដុល្លារក្នុងមួយម៉ែត្រការ៉េ។ ទី២ ចំនែកដី៣,៥ហិកតាទៀត នឹងសាងសង់ជាលំនៅដ្ឋានប្រភេទLink House និងShop Houseដែលលក់ក្នុងតម្លៃចាប់ពី១៨ដល់២៤ម៉ឺនដុល្លារអាមេរិក។

លោកបន្តថា “រហូតមកទល់ពេលនេះ លំនៅដ្ឋានប្រមាណ៥០ភាគរយត្រូវបានលក់អស់ហើយ ខណៈគំរោងនេះនឹងសាងសង់បញ្ចប់នៅឆ្នាំ២០២០ខាងមុខនេះ”។លោកបន្តថា “ជាមួយនឹងការគិតគូពីសុខមាលភាពប្រជាពលរដ្ឋ ក្រុមហ៊ុនបានគិតគូរលើការសាងសង់ហេដ្ឋារចនាសម្ព័ន្ឋប្រកបដោយគុណភាព និងផ្លូវមានទំហំចន្លោះពី១០ទៅ១៨ម៉ែត្រ”។

គំរោងនេះស្ថិតនៅក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ជាតំបន់ស ដែលជនបរទេសអាចចូលមកស្នាក់នៅរយៈពេល២សប្តាហ៍ ដោយមិនចាំបាច់បោះត្រាលើប៉ាស្ព័រ។ វិនិយោគនៅក្នុងតំបន់ពិសេសនេះ ធ្វើឲ្យអ្នកវិនិយោគអាចទទួលបានផលចំណេញច្រើន ដោយសារបន្ទប់ជួលនៅក្នុងតំបន់នេះ អាចជួលបានជាង៣០០ដុល្លារ ខណៈបន្ទប់ជួលខាងក្រៅមានតម្លៃជាង១០០ដុល្លារប៉ុណ្ណោះ។នេះបើតាមការឲ្យដឹងពីលោកសួង សុខហ៊ាង។

លោកបន្តថា “ការសម្រេចចិត្តវិនិយោគគំរោងនេះ ដោយសារក្រុងប៉ោយប៉ែតមានការរីកចម្រើនលឿន និងចំនួនអ្នកវិនិយោគចូលមកកាន់តែច្រើន ដែលធ្វើឲ្យខ្វះកន្លែងស្នាក់នៅ និងការិយាល័យធ្វើការ”។

អ្នកចាប់អារម្មណ៍ទិញដី និងលំនៅដ្ឋានក្នុងគំរោងនេះអាចទាក់ទងតាមរយៈលេខទូរស័ព្ទ០៨៦ ២១៥ ៧៧៧ .០៩៩ ២១៥ ៧៧៧.០៦២ ២៨០ ៩៧៥០។

យោងតាមរបាយការណ៍របស់សាលាក្រុងប៉ោយប៉ែតបានឲ្យដឹងថា ទីក្រុងប៉ោយប៉ែតបច្ចុប្បន្ន មានប្រជាពលរដ្ឋរស់នៅប្រមាណ២០ម៉ឺននាក់ ក្នុងនោះជនបរទេសមានប្រមាណ៥ម៉ឺននាក់ និងមានអាគារកំពស់ចាប់ពី៤ដល់ជាង៣០ជាន់ចំនួន៦០អាគារ។ ក្រុងប៉ោយប៉ែតមានតំបន់សេដ្ឋកិច្ចពិសេសចំនួនបី ដែលផ្តល់ការងារដល់ប្រជាពលរដ្ឋរាប់ពាន់នាក់ និងកំពុងទាក់ទាញអ្នកវិនិយោគបរទេសយ៉ាងច្រើន ពិសេសអ្នកវិនិយោគចិន និងជប៉ុន។

ក្រុងប៉ោយប៉ែត ត្រូវបានរដ្ឋាភិបាលដាក់បញ្ចូលជាតំបន់ឧស្សាហកម្ម ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ដែលគោលនយោបាយនេះបានប្រកាសដាក់ឲ្យប្រើប្រាស់កាលពីខែតុលា ឆ្នាំ២០១៥៕