ដោយ វុត្ថា

ភ្នំពេញ៖ ប្រទេសវៀតណាមមានសេដ្ឋកិច្ចលូតលាស់យ៉ាងលឿន និងត្រូវបានស្ថាប័នអន្តរជាតិវាយតម្លៃថា ប្រទេសដែលមានប្រជាជនជាង៩០លាននាក់នេះ នឹងក្លាយជា​មហាអំណាចសេដ្ឋកិច្ចមួយនៅក្នុងពិភពលោកត្រឹមឆ្នាំ២០៣០ខាងមុខ។

ប្រទេសនេះកំពុងបង្អួតនូវកិត្យានុភាពរបស់ខ្លួន តាមរយៈការសាងសង់អាគារខ្ពស់ៗជាច្រើន ក្នុងទសវត្សរ៍ចុងក្រោយនេះ ជាក់ស្តែងថ្ងៃនេះ www.propertyarea.asia សូមនាំលោក អ្នកទៅស្វែងយល់ពីអាគារដ៏ខ្ពស់មួយនៅទីក្រុងហូជីម៉ិញ ដែលជាទីក្រុងសេដ្ឋកិច្ច និងពាណិជ្ជកម្មដ៏ធំរបស់ប្រទេសនេះ។

អគារ Bitexco Financial Tower គឺជាអគារខ្ពស់កប់ពពកមួយស្ថិតនៅក្នុងទីក្រុងហូជីមិញ ប្រទេសវៀតណាម បានសាងបញ្ចប់នៅក្នុងឆ្នាំ២០១០ ដែលក្លាយជាអគារខ្ពស់ជាងគេ ក្នុងប្រទេសវៀតណាមនៅពេលនោះ រហូតដល់ឆ្នាំ២០១១។អគារនេះមានកំពស់​២៦២.៥ ម៉ែត្រស្មើនឹង៦៨ ជាន់ដោយរាប់ពីជាន់ផ្ទាល់ដីឡើងទៅ ដែលធ្វើអោយអគារនេះខ្ពស់លំដាប់ទី៤នៅក្នុងក្រុង និងខ្ពស់លំដាប់ទី២៦៣ នៅលើពិភពលោកនៅក្នុងឆ្នាំ ២០១៨នេះ។

អគារនេះ គ្រប់គ្រងដោយក្រុមហ៊ុន Bitexco Group ដោយផ្តោតលើការអភិវឌ្ឍន៍លើអចលនទ្រព្យ និងជាក្រុមហ៊ុនសហការឧស្សាហកម្មចម្រុះរបស់វៀតណាម។ អគារនេះ អាចនិយាយបានថា ជាមូលដ្ឋានការិយាល័យ នៅកណ្តាលទីក្រុងហុជីមិញរបស់ក្រុមហ៊ុន Bitexco Group ខណៈដែលមានការិយាល័កណ្តាលមួយផ្សេងទៀត ស្ថិតនៅក្នុងទីក្រុងហាន់ណូយ។

អគារខ្ពស់កប់ពពកនេះ រចនាគូប្លង់ដោយ លោក Carloz Zapata ជាប្រធានក្រុមអ្នកគូប្លង់ និងជាស្ថាបនិកក្រុមហ៊ុន Carlos Zapata Studio ដោយសហការជាមួយក្រុមហ៊ុនបារំាង AREP ជាក្រុមហ៊ុនដែលបានជាប់កំណត់ត្រាផ្នែកស្ថាបត្យកម្ម។ វិចិត្រករ Zapata  កើតក្នុងប្រទេសវេណេស៊ូអីឡា ប៉ុន្តែបានមករស់នៅក្នុងទីក្រុង បូរីញូវយ៉ក។

អគារនេះត្រូវបានសារព័ត៌មាន CNN ប្រសិទ្ធនាមថា ជាសំណង់អគារអស្ចារ្យបំផុតក្នុងចំណោមសំណង់អគារខ្ពស់កប់ពពកទាំង២៥នៅលើពិភពលោក។ នៅឆ្នាំ២០១៥ អគារនេះ ត្រូវបានគេហទំព័រព័ត៌មាន ប្រសិទ្ធិនាមទៀត អគារ Bitexco Financial Tower គឺជាស្ថាបត្យកម្មកំពូលក្នុងពិភលោក។ បន្ថែមពីនេះ អគារខ្ពស់កប់ពពកដ៏អស្ចារ្យនេះទទួ​លបានពានរង្វាន់ Excellence in structure engineering Awards 2011។

អគារ Bitexco Financial Tower ជាមជ្ឈមណ្ឌលពាណិជ្ជកម្ម ដែលប្រើប្រាស់រួមខ្នាតអន្តរជាតិ រួមមាន ការិយាល័យជួល លក់ និងកន្លែងសំដែងសិល្បៈផ្សេងៗ ព្រមទាំងមានកន្លែងមើលទេសភាពទីក្រុងផងដែរ៕

ដោយ គង់ សូរិយា

ភ្នំពេញ៖ ការវិនិយោគពីអ្នកវិនិយោគជាតិ អន្តរជាតិបានធ្វើឲ្យទំហំផ្សារទំនើបនៅកម្ពុជាកើនដល់៣៧ម៉ឺនម៉ែត្រការ៉េនៅដំណាច់ឆ្នាំនេះ ខណៈចំនួនផ្សារទំនើបថ្មីៗចំនួន១៣បាននិងដាក់ចូលនិងត្រៀមចូលទីផ្សារនេះនៅឆ្នាំនេះ។

គិតត្រឹមដំណាច់ឆ្នាំមុនផ្សារទំនើប២២ម៉ឺនម៉ែត្រការ៉េបានបញ្ចប់ ហើយទំហំផ្សារចំនួន១៤៧,៧៧៨ម៉ែត្រការ៉េរំពឹងនឹងដាក់ចូលទីផ្សារនៅឆ្នាំនេះ។

នាយិកា​ប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតា បាន​មានប្រសាសន៍ឲ្យដឹងកាលពីថ្ងៃទី៨ មិថុនានេះថា បច្ចុប្បន្ន​នេះ​ការវិនិយោគ​ទៅ​លើ​ទីតាំង ​លក់​រាយ​នៅ​កម្ពុជា ​បាន​កើនឡើង​ជា​បន្តបន្ទាប់​ដោយ​ក្នុង​ឆ្នាំ​នេះ ​និង​មាន​ទីតាំង​លក់រាយ​ប្រហែល​១១​នឹង​បើក​ដំណើរការ ក្នុងចំណោមផ្សារទំនើបចំនួន១៣ទីតាំង​។

អ្នកនាងបន្តថា “ ការកើនឡើង​ដ៏ឆាប់​រហ័ស​នាពេល​នេះ ​គឺ​ដោយសារ​ប្រាក់​ចំណូល​របស់​ប្រជាជន​ ខ្មែរ​កើនឡើង​ស្រប​ពេល​ដែល​តម្រូវការ​កន្លែង​កម្សាន្ត និង​សម្ភារ​ប្រើប្រាស់​ទំនើបៗ​កើនឡើង​ផង​ដែរ​”។

ទីតាំង​ផ្សារទំនើប ​ដែល​គ្រោង​នឹង​បើក​ដំណើរការ​នៅ​ក្នុង​ឆ្នាំ​នេះ រួម​មាន​ ដូចជា Midtown Community Mall, The Bridge Commercial, Downtown 93, The Park, Noro Mall, Prince Central Plaza, ជាដើម​។

យោងតាមរបាយការណ៍​របស់ CBRE Cambodia ដែល​បាន​ផ្សព្វផ្សាយ​កាលពី​ពេលថ្មីៗនេះបានលើកឡើងថា គិត​ត្រឹម​ដំណាច់​ឆ្នាំ​នេះ នៅកម្ពុជានឹង​មាន​ទីតាំង​លក់រាយ​ប្រហែល​២៩ ​ភាគរយ​ស្ថិត​ក្នុង​ខណ្ឌ​សែនសុខ​។ ២៦​ភាគរយ ក្នុង​ខណ្ឌ​ចំការមន​ ១៩ ​ភាគរយ​ក្នុង​ខណ្ឌ​ទួលគោក​។ ១៣​ភាគរយ​ក្នុង​ខណ្ឌ​ច្បារអំពៅ​៦​ភាគរយ ​ក្នុង​ខណ្ឌ​ដូនពេញ និង​ខណ្ឌ​មានជ័យ និង​១​ភាគរយ​ក្នុង​ខណ្ឌ​៧​មករា​។

បច្ចុប្បន្ន​នេះ ​មាន​គម្រោង​សាងសង់ ទីតាំង​លក់រាយ​ជាច្រើន​កំពុង​ស្ថិត​ក្នុង​ដំណាក់កាល​សាងសង់​ដែល​មាន​ដូចជា PH Eco Mall និង Diamond Peng Hourt Mall ដែល​វិនិយោគដោយ​ក្រុមហ៊ុន​អភិវឌ្ឍន៍​បុរី​ប៉េងហួតគ្រុប។

ទោះជាវិនិយោគលើគំរោងផ្សារទំនើប The Bridge Commercialខ្លួនឯងក្តី ក៏លោ​កឧកញ៉ាសៀ រិទ្ឋីអគ្គនាយកក្រុមហ៊ុន World Bridge Land Group បានថ្លែងថា វត្តមានផ្សារទំនើបកាន់តែច្រើននៅរាជធានីភ្នំពេញ ជារឿងល្អ ប៉ុន្តែផលិតផលដែលមានស្លាកសញ្ញាឬប្រេនល្បីៗ មិនទាន់ជោគជ័យទេនៅកម្ពុជា វាត្រូវការរយៈពេល៥ទៅ១០ឆ្នាំទៀត ប៉ុន្តែដោយសារវាជាម៉ាកសញ្ញាធំៗ ក្រុមហ៊ុនទាំងនោះមិនខ្វល់ពីប្រាក់ចំណេញទេ អ្វីសំ​ខាន់គឺពួកគេពង្រីកេរ្ត៍ឈ្មោះ ឬម៉ាកសញ្ញារបស់ខ្លួន។

លោកបន្តថា “អ្នកមានជីវភាពធូរធារក្នុងស្រុក នៅតែធ្វើដំណើរទៅបរទេស ដើម្បីទិញទំនិញម៉ាកល្បីៗ ដូចគ្នានឹងប្រទេសវៀតណាម ដែលមានម៉ាកទំនិញល្បីៗតែមិនទាន់មានការគាំទ្រពីអ្នកមានក្នុងស្រុកនៅឡើយ”៕

ដោយ : វុត្ថា
ភ្នំពេញ : រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ជាថ្មីម្តងទៀតបានអំពាវនា
វប្រជាពលរដ្ឋខ្មែរទូទាំងប្រទេសឲ្យជួយគាំទ្រផលិតផលខ្មែរ កាត់បន្ថយការប្រើប្រាស់ផលិ​តផលនាំចូលពីបរទេស ដើម្បីទ្រទ្រង់និរន្តរភាពរបស់ផលិតកម្មក្នុងស្រុក សំដៅជំរុញកំណើនសេដ្ឋកិច្ច និងកាត់បន្ថយភាពក្រីក្រ តាមរយៈការបង្កើតឱកាសការងារ និងប្រាក់ចំណូលកាន់តែច្រើនជូនប្រជាជន។

លោករដ្ឋមន្ត្រីអំពាវនាវបែបនេះ ក្នុងឱកាសអញ្ជើញជាអធិបតីភាពនៅក្នុងពិធីបើកព្រឹត្តិការណ៍ពិព័រណ៍ផលិតផលខ្មែរ ក្នុងយុទ្ធនាការទិញផលិតផលខ្មែរ រដូវកាលទី៣ ដែលរៀបចំឡើងដោយអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម កាលពីរសៀ​លថ្ងៃទី៧ ខែមិថុនា ឆ្នាំ២០១៨ នៅបរិវេណខាងមុខមន្ទីរពាណិជ្ជកម្មខេត្ត ក្រុងសិរីសោភ័ណ ខេត្តបន្ទាយមានជ័យ។
នៅក្នុងឱកាសនោះ លោក ប៉ាន សូរស័ក្តិ បានជម្រាបជូនអង្គពិធី អំពីកិច្ចប្រឹងប្រែងរបស់ក្រសួងពាណិជ្ជកម្ម ក្នុងការបើកទីផ្សារថ្មីៗទាំងក្នុង និងក្រៅប្រទេស ព្រមទាំងការដាក់ចេញនូវព្រឹត្តិការណ៍ “ពិព័រណ៍ពាណិជ្ជកម្មផលិតផលខ្មែរ ក្នុងឱកាសយុទ្ធនាការទិញផលិតផលខ្មែរ”សំដៅអនុវត្តន៍គោលនយោបាយជំរុញការនាំចេញនៅនឹងកន្លែង។

ទន្ទឹមគ្នានេះ ដើម្បីទាក់ទាញទំនុកចិត្ត និងការគាំទ្រកាន់តែច្រើនពីប្រជាជនខ្មែរ ក៏ដូចជាភ្ញៀវទេសចរបរទេស មកលើផលិតផលក្នុងស្រុក លោករដ្ឋមន្ត្រីក៏បានសំណូមពរដល់ផលិតករ និងសហគ្រិនក្នុងស្រុក ត្រូវខិតខំប្រឹងប្រែងពង្រឹងគុណភាពផលិតផលរបស់ខ្លួន ស្របតាមបទដ្ឋានស្តង់ដារអន្តរជាតិ ទាំងការវេចខ្ចប់ ការដាក់ម៉ាក និងការធ្វើយុទ្ធសាស្ត្រទីផ្សារ ជាដើម។
លោកបន្តថា «ផលិតករ និងសហគ្រិនទាំងអស់ ចាំបាច់ត្រូវចេះអភិវឌ្ឍន៍ផលិតផ​លឬសេវាកម្មរបស់ខ្លួនឲ្យមានគុណភាពខ្ពស់ និងមានតម្លៃសមរម្យ ទើបអាចប្រកួតប្រជែ​ងជាមួយទំនិញនាំចូលពីបរទេស»។លោកបន្តថា «ខ្ញុំមានជំនឿថា ប្រជាពលរដ្ឋខ្មែរនឹងនាំគ្នាគាំទ្រផលិតផលក្នុងស្រុកច្រើនឡើងៗ បើសិនជាផលិតករ និងសហគ្រិនយើងអាចធ្វើបាន ព្រោះនេះគឺជាកត្តាសត្យានុម័ត នៃការប្រកួតប្រជែងទីផ្សារសេរី ដែលយើងទាំងអស់គ្នាត្រូវតែទទួលស្គាល់»។
នៅក្នុងរយៈពេលជាងពីរឆ្នាំកន្លងមកនេះ ក្រសួងពាណិជ្ជកម្ម បានរៀបចំព្រឹត្តិ​ការ​ណ៍យុទ្ធនាការទិញផលិតផលខ្មែរ ដោយជោគជ័យចំនួនពីររដូវកាលរួចមកហើយ គឺរដូវកាលទី១ នៅក្នុងរាជធានី-ខេត្តចំនួន ៤ រួមមាន ខេត្តសៀមរាប កំពង់ចាម ខេត្តព្រះសីហនុ និងរាជធានីភ្នំពេញ ហើយរដូវកាលទី២ នៅក្នុងរាជធានី-ខេត្តចំនួន ៥ រួមមាន ខេត្តស្ទឹងត្រែង បាត់ដំបង ស្វាយរៀង រាជធានីភ្នំពេញ និងខេត្តកែប។ សម្រាប់យុទ្ធនាការទិញផលិតផលខ្មែរ រដូវកាលទី៣ ឆ្នាំ២០១៨នេះ ក្រសួងពាណិជ្ជកម្ម បានជ្រើសរើសយករាជធានី-ខេត្តចំនួន៦មានដូចជា ខេត្តបន្ទាយមានជ័យ កណ្តាល កំពង់ឆ្នាំង ព្រៃវែង កោះកុង និងរាជធានីភ្នំពេញ ដើម្បីធ្វើជាកន្លែងរៀបចំព្រឹត្តិការណ៍ពិព័រណ៍ពាណិជ្ជកម្មផលិតផលខ្មែរ។
លោកឧកញ៉ា តែ តាំងប៉ ប្រធានសម្ព័ន្ឋសមាគមសហគ្រាសធុនតូច និងមធ្យមបានថ្លែងថា សហគ្រាសផលិតក្នុងស្រុកបានបង្កើនគុណភាព ផលិតផលរបស់ពួកគេកាន់តែ​ប្រសើរឡើងក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែក៏មានផលិតផលមួយចំនួនមិនបានផលិតបានល្អ និងតាមស្តង់ដាអាចទទួលយកបាននៅឡើយ។ លោកបន្តថា ទោះជា​យ៉ាងណាលោកស្នើឲ្យក្រសួងពាណិជ្ជកម្ម គួរមានវិធានការ ឬយន្តការសមស្របណា​មួយ ដើម្បីទប់ស្កាត់ការនាំចូលផលិតផលរបស់ថៃ ដែលបច្ចុប្បន្នក្រុមហ៊ុនថៃបានដឹកជញ្ជូន​ផលិតផលរបស់ពួកគេដល់តំបន់ជនបទ និងបានធ្វើឲ្យអ្នកលក់ដូរនៅតាមបណ្តាទី​ផ្សានានាតាមបណ្តាខេត្តជួបប្រទះបញ្ហាប្រឈមជាខ្លាំង៕

ដោយ : ដែន ចែងចាំង
ភ្នំពេញ : មន្រ្តីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈបានអះអាងថា ក្នុងមួយឆ្នាំនៅកម្ពុជាមានយុវជនចំនួន៣០ម៉ឺននាក់ ដល់អា​យុ​ចូលធ្វើការងារ ហើយនិន្នា​ការបែបនេះនឹងបន្តក្នុងរង្វង់៣ទសវត្សរ៍ទៀត។
លោកបណ្ឌិតអ៊ិត សំហេងរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ក្នុងពិធីផ្សព្វផ្សាយរបាយការណ៍ស្តីពី តម្រូវការជំនាញរបស់និយោ​ជិតឆ្នាំ២០១៧ និងរបាយការណ៍ស្តីពីទស្សនវិស័យការងារកម្ពុជាឆ្នាំ២០១៨ នារសៀលថ្ងៃទី៧ ខែមិថុនាម្សិលម៉ិញនេះថា នៅកម្ពុជាសម្រាប់ប្រជាពលរដ្ឋភាគច្រើន កម្លាំងពលកម្មគឺជាទ្រព្យ ដែលបង្កើតចំណូលដ៏ចម្បងបំផុត។ លោកបន្តថា ចំណែកផ្នែកម្ខាងទៀតនៃសេដ្ឋកិច្ចជាតិ កម្លាំងពលកម្ម គឺជាកត្តាផលិតកម្មដ៏សំខាន់នៅក្នុងគ្រប់វិស័យ។

លោកបន្តថា “ទីផ្សារការងារដើរតួនាទីសម្របសម្រួល ទាំងការវិភោជន៍នៃចំណូល និងទាំងការវិភាគជន៍នៃកម្លាំងពលកម្មជាធនធានផលិតកម្ម”។
យោងតាមរបាយការណ៍របស់ក្រសួងការងារបានបង្ហាញថា ក្នុងរយៈពេល២ទស​វ​ ត្សរ៍កន្លងមកនេះ កម្ពុជាអាចរក្សាបាននូវការងារដែលមានស្រាប់ និងបង្កើតការងារបន្ថែមសរុបចំនួន៣,៦លាន នៅក្នុងវិស័យឧស្សាហកម្ម និងសេវាកម្ម និងចំនួន៧០ម៉ឺននាក់នៅក្នុងវិស័យកសិកម្ម។ កត្តានេះ នាំឲ្យកម្ពុជាក្នុងពេលបច្ចុប្បន្ននេះ មានអត្រាមានការងារធ្វើខ្ពស់រហូតដល់កម្រិត៩៩.៣ភាគរយ ស្មើនឹងប្រមាណជិត១០លាននាក់ ហើយអត្រាគ្មានការងារធ្វើត្រូវបានកាត់បន្ថ​យ​មកត្រឹមកម្រិតទាប០.៧ភាគរយ។

ឯកអគ្គរាជទូតស៊ុយអែតប្រចាំនៅកម្ពុជា លោកជំទាវMaria Sargrenបានមានប្រសាសន៍ថា ទីផ្សារកម្ពុជានៅពិតជាមានកំណើន និងមានការវិវឌ្ឍយ៉ាងឆាប់រហ័សក្នុងរយៈពេលជាង២ទស្សវត្សរ៍កន្លងមកនេះ។ យុវជនវ័យក្មេងគ្រប់អាយុ ដែលស្វែងរកការងារធ្វើ កំពុងតែធ្វើការជ្រើសរើសជំនាញ ក៏ដូចជាដើម្បីក្លាយជាអាជីពការងារ និងជាគ្រូបង្រៀន ក៏ដូចជាធ្វើការប្រកួតប្រជែង ដើម្បីចាប់យកឱកាសការងារផ្សេងៗទៀត។
លោកជំទាវបន្ថែមថា “កម្លាំងការងារ ក៏ដូចជាអប់រំល្អប្រសើរ អាចជួយឲ្យប្រទេសអាចចល័​តពីប្រទេសមួយទៅប្រទេសមួយ និងពីជនបទទៅទីក្រុង ដើម្បីស្វែងរកការងារជ្រើសរើសចាប់យកអាជីពការងារ ជាពិសេសអាចជួយឲ្យយុវជនស្វែងរកការងារកាន់តែល្អប្រសើរ”។
របាយការណ៍ដដែលបានបង្ហាញថា ក្នុងចំណោមអ្នកមានការងារធ្វើសរុបទាំងអស់ មានចំនួនជិត១,៥លាននាក់ ធ្វើការនៅក្នុងសេដ្ឋកិច្ចក្នុងប្រព័ន្ធចំនួនជាង២.៤លាននាក់។ ធ្វើការនៅក្នុងសេដ្ឋកិច្ចក្រៅប្រព័ន្ធចំនូនជាង៤លាននាក់ នៅក្នុងវិស័យកសិកម្មចំនួន១,២លាននាក់ ធ្វើការក្រៅប្រទេស និងចំនួនជាង៥សែននាក់ជាមន្រ្តីសាធារណៈ៕

ដោយ : គង់ សូរិយា
ភ្នំពេញ : រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានហៅដំណើរការកសាង និងអភិវឌ្ឍន៍សេដ្ឋកិច្ចកម្ពុជា ថាា ហ៊ុន សែន NOMIC ដែលសំដៅដល់សេដ្ឋកិច្ចទីផ្សារប្រជាជនជារបៀបនៃការដឹកនាំឆ្លងកាត់ដំណាក់កាលជាច្រើន នៅក្នុងរយៈពេលវែង សំដៅកសាងខឿនសេដ្ឋកិច្ចទំនើបមួយរបស់កម្ពុជា គឺការឈរលើគោលការណ៍និងយន្តការសេដ្ឋកិច្ចទីផ្សារបើកចំហរ។
ទេសរដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលើកឡើងក្នុងសិក្ខាសាលាស្តីពីបុព្វហេតុសមិទ្ធផល និងទស្សនវិស័យនៃការងារកែទម្រ​ង់​របស់រាជរដ្ឋាភិបាលកម្ពុជា កាលពីម្សិលម៉ិញនេះថា សេដ្ឋកិច្ចទីផ្សារប្រជាជននៅក្នុងបរិការណ៍កម្ពុជា គឺជាសំណុំនៃល្បាយគោលនយោបាយ និងការដឹក​នាំគោលនយោបាយខឿនសេដ្ឋកិច្ចមួយប្រកបដោយបិរយាប័ន្ន មានលក្ខណៈបើកចំហរ សមាហរណកម្មជាមួយសេដ្ឋ​តំបន់ និងសកលលោកឆ្លើយតបយ៉ាងរស់រវើក ទៅនឹងនិន្នា​ការនានាទាំងក្នុង និងក្រៅប្រទេស ដោយឈរលើគោលការណ៍ និងយន្តការទីផ្សារពិសេ​សការគោរព និងការការពារឯកសិទ្ធិឯកជន ព្រមទាំងការប្រកួតប្រជែងដោយយុត្តិធម៌។

លោកបន្តថា “វិស័យឯកជនដើរតួនាទីជាកំលាំងចលករនៃកំណើនសេដ្ឋកិច្ច ដោយរដ្ឋមានតួនាទីជាទស្សនៈវិទូ ជាយុទ្ធសាស្រ្តវិទូ និងជាអ្នកគ្រប់​គ្រងកិច្ចអភិវឌ្ឍន៍ គឺតាមរយៈនៃការផ្គត់ផ្គង់ហេដ្ឋារចនាសម្ព័ន្ធ និងការសម្របសម្រួលចំបាច់នានា ព្រមទាំងបង្កើតនូវបរិយាកាសអនុគ្រោះអំណោយផល ដល់សេដ្ឋកិច្ចទីផ្សារក៏ដូចជា ការធ្វើអន្តរគមន៍នៅពេលចាំបាច់ ដើម្បីតម្រង់ទិសយន្តការទីផ្សារសំដៅធានា ឲ្យប្រជាជនគ្រប់ស្រទាប់ជនថ្នាក់ គ្រប់រូបអាចចូលរួមយ៉ាងសកម្ម ក្នុងសកម្មភាពអភិវឌ្ឍន៍សង្គមសេដ្ឋកិច្ចជាតិ ជាមួយការចែករំលែកប្រកបដោយសមធម៌ និងផលផ្លៃផ្កានៃការអភិ​វឌ្ឍន៍ ដោយមិនបោះបង់ចោលអ្នកណាម្នាក់នោះឡើយ”។
លោករដ្ឋមន្រ្តីបានបន្តថា សេដ្ឋកិច្ចទីផ្សារប្រជាជន ឬហ៊ុន សែន Nomic គឺជារបៀបនៃការដឹកនាំឆ្លងកាត់ ដំណាក់កាលជាច្រើន ពោលគឺរបៀបដឹកនាំរបស់សម្តេច តេជោ ហ៊ុន សែន ផ្ទាល់ ដោយបានឆ្លងកាត់ដំណាក់់កាលជាច្រើន ជាលទ្ធផលនៃការដឹក​នាំ ដែលបានឆ្លងកាត់គ្រប់ដំណាក់កាលដ៏លំបាកស្មុគ្រស្មាញជាបន្តបន្ទាប់ គឺបានធ្វើឲ្យកម្ពុជា សម្រេចបានការផ្លាស់ប្តូរមុខមាត់ថ្មីគួរជាទីមោនៈបំផុត។
សេដ្ឋកិច្ចកម្ពុជាមានការរីកចម្រើនយ៉ាងឆាប់រហ័ស ដោយក្នុងរយៈពេលពីរទសវត្ស​រ៍កន្លងមកនេះ ប្រទេសនេះបានជាប់ជាប្រទេសមួយ ក្នុងចំណោមប្រទេសដែលមានសេដ្ឋកិច្ចរីកលូតលាស់លឿនជាងគេទាំង១០ក្នុងពិភពលោក។
ធនាគារអភិវឌ្ឈន៍អាស៊ីកាលពីឆ្នាំ២០១៦ បានហៅកម្ពុជា “ជាខ្លាសេដ្ឋកិច្ចថ្មីមួយនៅអាស៊ី” ដោយសារប្រទេសនេះសម្រេចបានកំណើនសេដ្ឋកិច្ចជាង៧ភាគរយ ក្នុងរយៈ ពេលជាងពីរទសវត្សរ៍៕

ដោយ គង់ សូរិយា

ភ្នំពេញ៖ លោកទេសរដ្ឋមន្រ្តីស៊ុន ចាន់ថុន រដ្ឋមន្រ្តីក្រសួងសាធារណៈការ និងដឹកជញ្ជូនបានអះអាងជាថ្មីថា ប្រជាជនកម្ពុជានឹងអាចធ្វើដំណើរ ទៅកាន់ប្រទេសសិង្ហបុរីតាមផ្លូវរថភ្លើងបាននាពេលខាងមុខ។

លោកទេសរដ្ឋមន្រ្តីបញ្ជាក់បែបនេះ ក្នុងពេលចូលរួមជាអធិបតីក្នុងពិធីចុះហត្ថលេ​ខាលើកិច្ចព្រមព្រៀងសហប្រតិបត្តិការ ដើម្បីផ្តល់សេវាទូទាត់ប្រាក់ឌីជីថល ជាមួយក្រុមហ៊ុន ផាយ ផេនាព្រឹកថ្ងៃទី៧ មិថុនានេះ។ លោកបន្តថា ប្រជាពលរដ្ឋកម្ពុជា នឹងអាចធ្វើដំណើរតាមរថភ្លើងទៅកាន់ប្រទេសសិង្ហបុរីនាពេលខាងមុខ។ ឯកឧត្តមបន្តថា សព្វថ្ងៃកម្ពុជារង់ចាំតែកិច្ចព្រមព្រៀងផ្លូវរថភ្លើងជាមួយភាគីថៃប៉ុណ្ណោះ ស្របពេលដែលប្រទេសថៃ និងប្រទេសសិង្ហបុរីមានកតភ្ជាប់ផ្លូវរថភ្លើងទៅហើយ។

លោកស៊ុន ចាន់ថុលបានបញ្ជាក់ឲ្យដឹងផងដែរថា កម្ពុជាកំពុងធ្វើកិច្ចចចារលើកិច្ចព្រមព្រៀងផ្លូវរថភ្លើងជាមួយប្រទេសថៃ ហើយនៅមានពាក្យពេជន៍ និងឃ្លាមួយចំនួនមិនទាន់មានភាពឯកភាពគ្នានៅឡើយ។ ឯកឧត្តមបញ្ជាក់ថា កិច្ចព្រមព្រៀងរវាងប្រទេសនីមួយៗ ត្រូវធ្វើការត្រួតពិនិត្យសិក្សាយ៉ាងច្បាស់លាស់ ដើម្បីការពារមិនអោយខាតបង់ប្រយោជន៍ រឺប៉ះពាល់ដល់បូរណភាពទឹកដីជុំវិញការធ្វើដំណើរតាមផ្លូវរថភ្លើងពីកម្ពុជា ទៅកាន់ប្រទេសសិង្ហបុរីនេះ អ្នកជំនាញធ្វើការលើវិស័យទេសចរណ៍លើកឡើងថា វាជារឿងប្រពៃសម្រាប់កម្ពុជា។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជា និងជាទីប្រឹក្សាសភាពាណិជ្ជកម្មកម្ពុជាបានលើកឡើងថា ការតភ្ជាប់បណ្តាញផ្លូវដែកនេះ វានឹងបង្កើនមិត្តភាព ជាពិសេសជំរុញកំណើនទេសចរណ៍រវាងបណ្តាប្រទេសក្នុងតំបន់ ហើយភ្ញៀវ​ទេសចរណ៍នឹងមានជម្រើសកាន់តែច្រើន ក្នុងការធ្វើដំណើរកំសាន្តរបស់ពួកគេ ដែលចំណាយអស់ទឹកប្រាក់តិច និងចំណេញបានច្រើន។

លោកបន្តថា “ការតភ្ជាប់នេះនឹងជួយជំរុញការផ្លាស់ប្តូរពាណិជ្ជកម្ម ជំរុញការវិនិ​យោ​គរវាងបណ្តាប្រទេសនៅក្នុងតំបន់ និងកាត់បន្ថយតម្លៃនៃការដឹកជញ្ជូនផងដែរ”៕

ដោយ រ៉ាវី

ភ្នំពេញ៖  ខេត្តកំពង់ស្ពឺ បានក្លាយជាតំបន់ឧស្សាហកម្មយ៉ាងឆាប់រហ័ស ដោយមាន​វត្តមានរោងចក្រ សហគ្រាសយ៉ាងច្រើនបានបើកដំណើរការនៅខេត្តមួយនេះ ដែលថ្នាក់​ដឹកនាំខេត្តបានសម្តែងក្តីរីករាយ និងបានបង្ហើបថា ឧស្សាហកម្មក្នុងខេត្តនេះបានផ្តល់ចំណូល២០លានដុល្លារក្នុងមួយខែ ដល់ប្រជាពលរដ្ឋនៅក្នុងខេត្ត។

អភិបាលខេត្ត​កំពង់ស្ពឺ​លោក វ៉ី សំណាង​ បាន​ថ្លែង​ឲ្យ​ដឹង​កាលពីដើមសប្តាហ៍នេះថា នៅពេល​បច្ចុប្បន្ននេះ ​បើ​គេ​និយាយ​ពី​តំបន់​សេដ្ឋកិច្ច​ពិសេស ត្រូវបាន​គេ​ស​ម្លឹ​ក​ឆ្ពោះទៅកាន់​ទឹកដី​ខេត្តកំពង់ស្ពឺ តាម​បណ្តោយ​ផ្លូវជាតិ​លេខ៤ ដែលមាន​ទីតាំងនៅ​មិន​ឆ្ងាយ​ពី​តំបន់​មជ្ឈមណ្ឌល​ពាណិជ្ជកម្ម​រាជធានី​ភ្នំពេញ ដ្បិត​ទីនេះ​ក្រៅពី​មាន​ភូមិសាស្ត្រ​ល្អ​និង​អំណោយផល​លើ​ការដឹកជញ្ជូន វា​នៅមាន​ភាពល្អប្រសើរ​ជាច្រើន​ទៀត វិសាស​ល​ភាព​ទីតាំង​មាន​ភាព​ធំ​ទូលាយ តម្លៃ​អចលនទ្រព្យ​នៅមានកម្រិត​ទាប ជាពិសេស​ភាពសម្បូរ​បែប​នៃ​កម្លាំង​ពលកម្ម ដែល​ភាគច្រើន​ជា​ប្រជាជន​ដែល​កំពុង​រស់នៅក្នុង​តំបន់​ស្រាប់។

លោក​បន្តថា ​បច្ចុប្បន្ននេះ ខេត្តបាននិងកំពុង​ពង្រីក​វិសាលភាព​ផ្នែក​សេដ្ឋកិច្ច បាន​កាន់តែ​ប្រសើរ​ជាង​មុន តាមរយៈលំហូរនៃអ្នកវិនិយោគ​ជាច្រើន ដែលបានសាងងស់រោងចក្រ សហគ្រាសធំៗ ដែល​សរុប​មាន​ចំនួន១៣០ទីតាំង (រោងចក្រ​ស្បែកជើង និង​រោងចក្រ​កាត់ដេរ​សំលៀកបំពាក់)។ ដោយឡែក​សម្រាប់​សិប្បកម្ម​ខ្នាត​មធ្យម និង​ក្រោម​មធ្យ ម ​នៅតាម​មូលដ្ឋាន​ជា​លក្ខណៈ​គ្រួសារផ្សេងៗ មាន​រហូតដល់​ប្រមាណ៤៦០០មូលដ្ឋានដែល​អាច​អនុគ្រោះ និង​ផ្តល់​ការងារ​ជូន​ប្រជា​កម្មករ​ក្របខណ្ឌ ​បាន​ប្រមាណ៩១,០០០នាក់ និង​ក្រៅ​ក្របខណ្ឌ​បាន​ប្រមាណ​ជិត៤០,០០០នាក់។

លោកបន្តថា ជាមួយនឹង​កំណើន​នៃ​ចំនួន​រោងចក្រ សហគ្រាស ក៏ដូចជា​សិប្បកម្ម​នានា ដែល​កំពុងមាន​សកម្ម​ភាព​នាពេល​ប​ច្ចុ ប្បន្ន​នេះ វា​ពិត​ជាមាន​សារសំខាន់​បំផុត ក្នុងការ​ចូលរួមចំណែក​លើកកម្ពស់​សេដ្ឋកិច្ចជាតិ ក៏ដូចជា​ផ្តល់​ចំណូល​ដល់​ប្រជាពលរដ្ឋ​ក្នុង​តំបន់ និង​អ្នក​ចំណាកស្រុក​មកពី​តាម​បណ្តា​ខេត្តផ្សេងៗផងដែរ ដែល​យ៉ាង​ហោ​យ​ណាស់​សម្រាប់​កម្មករ​ក្របខណ្ឌ យ៉ាងហោចណាស់​អាច​ទទួល​បាន​ចំណូល​ប្រចាំខែ មិន​ក្រោម១៧០ដុល្លារ​នោះទេ ខណៈដែល​កម្មករ​ជំនាញ​មួយចំនួន ដែល​កំពុង​បម្រើ​ការងារ​នៅក្នុង​រោងចក្រ​មួយចំនួន​ស្ថិតក្នុង​ក្រុង​ច្បារមន អាចមាន​លទ្ធភាព​ទទួល​បាន​ចំណូល​ចាប់ពី៦០០ទៅ៧០០ដុល្លារ​ក្នុង​មួយខែ។

ដោយឡែក​ចំពោះ​កម្មករ​ក្រៅ​ក្របខណ្ឌ​វិញ អាច​ទទួលបាន​ចំណូល​អាស្រ័យ​ទៅតាម​លទ្ធភាព និង​សកម្មភាព​ព្យាយាម​របស់ខ្លួន ដែល​បម្រើ​ការងារ​នៅតាម​បណ្តា​សិប្បកម្ម​នានា ហើយ​ក៏មាន​អ្នកខ្លះ អាច​រកចំណូលបាន​តា​មរយៈ​ការដោះដូរ​កម្លាំងកាយ​ដោយ​ការ​បេះ​ផ្លែស្វាយ និង​ធ្វើការ​នៅក្នុង​សិប្បកម្ម​ស្ករអំពៅ​ជាដើម។

លោក វ៉ី សំណាងបានថ្លែងឲ្យដឹងផងដែរ​ថា ក្នុងនាម​លោក​ជា​អជ្ញាធរ និង​ជា​អភិ​បាល​នៅក្នុង​ខេត្ត លោក​បានបង្ហាញ​ពី​កិច្ច​ស្វាគមន៍​យ៉ាង​កក់ក្ដៅ ចំពោះ​បណ្តា​អ្នកវិនិយោគ​គ្រប់​ជាតិ​សាសន៍​ទាំងអស់ ដែលមាន​បំណង​មក​បណ្តាក់ទុន ដោយ​ដាក់​ទីតាំង​នៅក្នុង​ខេត្តកំពង់ស្ពឺ យ៉ាង​រីករាយជាមួយនឹង​ការយកចិត្តទុកដាក់ ក្នុងការ​ចូលរួមចំណែក​សម្រួល ផ្តល់​សេវាសាធារណៈ​ងាយស្រួល​ផងដែរ។

ខេត្តកំពង់ស្ពឺ​បច្ចុប្បន្ន ​បាន​ត​ភ្ជាប់​គ្នា​ជាមួយ​រាជធានី​ភ្នំពេញ​រួចហើយ នៅតាម​បណ្តោយ​ផ្លូវជាតិ​លេខ។ រាជរដ្ឋាភិបាល​បានរៀបចំ តំបន់​តាមផ្លូវ​ជាតិ​លេខ៤ពី​រាជធានី​ភ្នំពេញ ទៅកាន់​ខេត្ត​ព្រះសីហនុ ជា​តំបន់ឧស្សាហកម្ម​នៅ​ឆ្នាំ២០២៥ខាងមុខនេះ៕