ដោយ : ស៊ីវ ម៉េង

       ភ្នំពេញ៖ នៅពេលនិយាយពីការវិនិយោគលើវិស័យដីធ្លី មានឳកាសចំណេ​ញ​ខ្ពស់និងក៏មានហានិភ័យផងដែរ ហេតុនេះសំណួរគឺថាតើគួរខ្ចីប្រាក់ពីធនាគារ ដើម្បីយកមកវិនិយោគលើដីធ្លីឬទេ?។

គេហទំព័រ Propertyarea.asia សូមលើកយកនូវប្រសាសន៍របស់អ្នកជំនាញក្នុង វិស័យនេះពីររូបយកមកចែករំលែក ដើម្បីទុកជាការពិចារណា និងធ្វើជាមូលដ្ឋានសម្រេច​ចិត្ត។

អគ្គនាយកក្រុមហ៊ុន Century21 Mekong លោក ច្រឹក សុខនីម បានថ្លែងឲ្យដឹងកាលពីពេលថ្មីៗនេះថា  មុនសម្រេចចិត្តថាគួរឬមិនគួរខ្ចីឥណទាន ដើម្បីយកមកវិនិយោគ មានសំណួរពីរ ដែលត្រូវសិក្សាជាមុន ដូចជា ទី១ ប្រសិនជាអ្នកខ្ចីប្រាក់មានសាច់ប្រាក់សម្រាប់បង្វិល និងសងថ្លៃដើមនៃឥណទានរបស់ខ្លួន ការខ្ចីឥណទានយកមកទិញអចល​នទ្រព្យមិនមានបញ្ហានោះទេ និងទី២ ប្រសិនជាអ្នកខ្ចីឥណទាន យកមកទិញដីទុកលក់យកចំណេញ មិនគួរខ្ចីឥណ​ទានយកមកទិញដីនោះទេ ព្រោះការទិញដីអាចកប់ដើមទុនទៅក្នុងនោះ។

លោកបន្តថា “ការវិនិយោគលើដីធ្លីមានឳកាសចំណេញខ្ពស់ ឬអត់ វាអាស្រ័យ​លើអ្នកវិនិយោគមានភាពឆ្លាតវៃកម្រិតណាប៉ុណ្ណោះ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក គីម ហ៊ាង បានលើកឡើងផងដែរថា ការប្រើប្រាស់ឥណទានធនាគារ យកមកទិញដីទុកចំណេញមានករណីគួរខ្ចី និងមិនគួរខ្ចី។ ហេតុនេះអ្នកចង់ខ្ចីគួរសិក្សាលក្ខខ័ណ្ឌចំនួន៤នេះជាមុនសិន ដូ ចជា ទី១ ប្រសិនជាអ្នកមានបំណងចង់ខ្ចី ហើយមានសាច់ប្រាក់ឬប្រាក់ខែសមរម្យ សម្រា​ប់​បង្វិលបាន គួរខ្ចីឥណទានដើម្បីវិនិយោគដីធ្លី ទី២ សម្រាប់អ្នកមិនទាន់មានលំនៅដ្ឋានរស់នៅខ្លួនឯង មិនគួរខ្ចីឥណទានទិញដីទេ។

ទី៣ អ្នកដែលមានផ្ទះខ្លួនឯងហើ​យ តែនៅជំពាក់បំណុលគេ ក៏មិនគួរខ្ចីឥណទានទិញដីដែរ និងទី៤ អ្នកមាន​ផ្ទះ មានការងារសមរម្យហើយ បើខ្ចីឥណទានពីធនាគារ ដើម្បីទិញដីក៏មិនត្រូវខ្ចីលើសពី៥០ភាគរយ នៃតម្លៃដីរបស់ខ្លួនដែលបានទិញដែរ៕

ដោយ លាងគង់ ស៊ីវម៉េង

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានអនុម័តគំរោងវិនិយោគមជ្ឈមណ្ឌលពាណិ​ជ្ជកម្ម និងរផហចក្រ សហគ្រាសចំនួន១៣ និងមានទុនវិនិយោគ៧០០លានដុល្លារអាមេរិកនៅក្នុងខែសីហាកន្លងមកនេះ។

គំរោងនេះគឺអនុម័តតែក្នុងសីហា ឆ្នាំ២០១៨ប៉ុណ្ណោះ ដែលគំរោងទាំងនោះរួមមាន ទី១ ក្រុមហ៊ុន MAKRO (CAMBODIA) COMPANY LIMITED. គម្រោងបង្កើតមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅភូមិគោកត្នោត ឃុំសណ្តែក ស្រុកប្រាសាទបាគង ខេត្តសៀមរាប មានទុនវិនិយោគ ១៨,៧៦៥,២៣៧ដុល្លារអាមេរិក និងអាចបង្កើតការងារបាន ១៧៩កន្លែង។ ទី២ ក្រុមហ៊ុន BOONMA HENG CO.,LTD. គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៤ចំនួន៣៩២បន្ទប់ និងមជ្ឈ​មណ្ឌល ពាណិជ្ជកម្ម«ផ្សារទំនើប» ដែលមានទីតាំងវិនិយោគ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានទុនវិនិយោគ៦៨,២៩៧,៥៣៥ដុល្លារអាមេរិក និងអាចបង្កើតការងារបាន ៨៣៦កន្លែង។

ទី៣ ក្រុមហ៊ុន RONG WIN GARMENT CO.,LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅអគារ J សួនឧស្សាហកម្មវឌ្ឍនៈ១ ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ មានទុនវិនិយោគ៩,៤៥៣,៩៩៥ដុល្លារអាមេរិក និងអាចបង្កើតការងារបាន២,១២១កន្លែង ទី៤ក្រុមហ៊ុន E 1 RENEWABLE ENERGY CO.,LTD. គម្រោងបង្កើតរោងចក្រផលិតប្រេងម៉ាស៊ូតពីសំណល់ប្លាស្ទិក និងសំណល់ប្រេងម៉ាស៊ីន (ប្រមូលទិញក្នុងស្រុក) ដែលមានទីតាំងវិនិយោគស្ថិតភូមិអន្លង់គងចាស់ សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគ ៣,៦២២,៥០០ដុល្លារ អាមេរិក និងអាចបង្កើតការងារបាន ២,១២១កន្លែង។

ទី៥ ក្រុមហ៊ុន G.W GREENWAYS TEXTILE CO.,LTD. គម្រោងបង្កើតរោងចក្រកាត់ដេរ និងប៉ាក់សម្លៀកបំពាក់ ដែលមានទីតាំងវិនិយោគស្ថិតនៅភូមិបន្លាស្អិត សង្កាត់ឃ្មួញ ខណ្ឌសែនសុខ (អតីតខណ្ឌឫស្សីកែវ) រាជធានីភ្នំពេញ មានទុនវិនិយោគប្រមាណ៥.២៧លានដុល្លារអាមេរិក និងអាចបង្កើតការងារបាន១,៩២៨ន្លែង ទី៦ ក្រុមហ៊ុន QIHANG NEW (CAMBODIA) CO.,LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ៥.៦៩លានដុល្លារអាមេរិក និងអាចបង្កើតការងារបាន ៣,៣២៥កន្លែង។

ទី៧ ក្រុមហ៊ុន HENG MEILING (CAMBODIA) TEXTILE CO.,LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិ១ សង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ មានទុនវិនិយោគប្រមាណ ២.៥១លានដុល្លារអាមេរិក និងអាចបង្កើតការងារបាន៦៤៩កន្លែង។ ទី៨ ក្រុមហ៊ុន EAR CHHUNG HONG INVESTMENT CO.,LTD.” គម្រោងបង្កើតរោងចក្រផលិតក្រដាសខ្ចប់ពី អាលុយមីញ៉ូម (ALUMINUM FOILS) ដែលមានទីតាំងវិនិយោគស្ថិតនៅភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ មានទុនវិនិយោគប្រមាណ ២.៣៥លានដុល្លារអាមេរិក និងអាចបង្កើតការងារបាន ៩៣កន្លែង។

ទី៩ ក្រុមហ៊ុន CHEAN CHHOENG THAI GROUP CO.,LTD.” គម្រោងអភិវឌ្ឍន៍មជ្ឈមណ្ឌលពាណិជ្ជកម្មចម្រុះ ដែលមានទីតាំងវិនិយោគស្ថិតនៅកំពង់ផែស្វយ័​តភ្នំពេញ សង្កាត់ស្រះចក ខណ្ឌដូនពេញ រាជធានីភ្នំពេញ មានទុនវិនិយោគប្រមាណ ៥៣១.៦លានដុល្លារអាមេរិក និងអាចបង្កើតការងារបាន២១,៦៨៤ន្លែង។ទី១០ក្រុមហ៊ុន GGU (CAMBODIA) CLOTHING CO.,LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២.៤លានដុល្លារអាមេរិក និងអាចបង្កើតការងារបាន ៨៥៩កន្លែង។

ទី១១ ក្រុមហ៊ុន TING SHEN INDUSTRIAL CO.,LTD”: គម្រោងបង្កើតរោងចក្រផលិតអំពូលភ្លើងលម្អ ខ្សែភ្លើងអគ្គិសនីគ្រប់ប្រភេទ និងឧបករណ៍តចរន្ត មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស្វាយរៀងហ្គីហ្គា រីសស៍ ខេត្តស្វាយរៀង មានទុនវិនិយោគប្រមាណ ៥.៩២លានដុល្លារអាមេរិក និងអាចបង្កើតការងារបានចំនួន ៣៤៨កន្លែង។ ទី១២ ក្រុមហ៊ុន GREEN LEADERS STARCH FOOD FIRST FACTORY CO.,LTD”:គម្រោងបង្កើតរោងចក្រកែច្នៃកសិផលដំឡូងមី មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល ខេត្តក្រចេះ មានទុនវិនិយោគប្រមាណ ២៩.៥៣លានដុល្លារអាមេរិក និងអាចបង្កើតការងារបានចំនួន៣៧កន្លែង។

១៣៖ ក្រុមហ៊ុន LONGMATE AGRICULTURE CO.,LTD​ គម្រោងបង្កើតកសិដ្ឋានដាំដំណាំចេក និងវេចខ្ចប់កសិផលនាំចេញ ដែលមានទីតាំងវិនិយោគស្ថិតនៅភូមិដុំផ្តៅ ឃុំត្រពាំងភ្លាំង ស្រុកឈូក ខេត្តកំពត មានទុនវិនិយោគ ៣២,០២១,៥៧០ដុល្លារអាមេរិក និងអាចបង្កើតការងារបាន ៥៧២កន្លែង៕

ដោយស៊ីវ ម៉េង

ភ្នំពេញ៖ ក្រុមហ៊ុនកំពុងវិនិយោគផ្សារទំនើប MAKRO នៅក្រុងភ្នំពេញបាននិងកំពុងបោះទុនវិនិយោគចំនួនជិត ១៩លានដុល្លារអាមេរិក ដើម្បីសាងសង់មជ្ឈមណ្ឌលពាណិជ្ជកម្មនិងផ្សារទំនើបនៅទីក្រុងសៀមរាប។

យោងតាមសេចក្តីប្រកាសព៌តមានរបស់ក្រុមប្រឹក្សាអភិវឌ្ឍន៍កម្ពុជា (CDC)បានឲ្យដឹងនៅដើមសប្តាហ៍នេះថា គណកម្មាធិការវិនិយោគនៃ CDC បានអនុម័តឲ្យក្រុមហ៊ុន MAKRO (CAMBODIA) COMPANY LIMITED. គម្រោងបង្កើតមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅភូមិគោកត្នោត ឃុំសណ្តែក ស្រុកប្រាសាទបាគង ខេត្តសៀមរាប មានទុនវិនិយោគ១៨,៧៦៥,២៣៧ដុល្លារអាមេរិក និងអាចបង្កើតការងារបាន១៧៩កន្លែង។

ការបង្កើតផ្សារទំនើបនៅខេត្តសៀមរាប ជាការឆ្លើយតបនឹងកំនើនសេដ្ឋកិច្ច និងជីវ​ភាពប្រជាពលរដ្ឋ ដែលរស់នៅក្នុងខេត្តនេះកាន់តែមានភាពប្រសើរឡើង ពិសេសកំនើនភ្ញៀវទេសចរណ៍ជាតិ និងអន្តរជាតិ។

អគ្គនាយកក្រុមហ៊ុន Goal Property Service ដែលមានមូលដ្ឋាននៅខេត្តសៀម​រាប លោក ចៅ សេងថៃ បានមានប្រសា​សន៍ថា ខេត្តសៀមរាបកំពុងចាប់ផ្តើមរកចម្រើនកាន់តែខ្លាំងហើយ ដោយសារការចាប់ផ្តើមហូរចូលនូវអ្នកវិនិយោគចិន និងគំរោងព្រលានយន្តហោះថ្មីកំពុងសាងសង់ កំនើនភ្ញៀវទេសចរណ៍បានកើនឡើងជាប្រចាំ។លោកបន្តថា ការមកដល់នៃផ្សារ MAKRO ដែលស្ថិតនៅលើផ្លូវជាតិលេខ៦ នឹងធ្វើឲ្យខេត្តនេះកាន់តែ​មានភាពទាក់ទាញនិងរសរវើក ព្រោះកំនើនទេសចរណ៍ កំណើនប្រាក់ចំណូលប្រជាពល​រដ្ឋ នឹងធ្វើឲ្យផ្សារដែលផ្តោតលើសេវាកម្មលក់ទំនិញចម្រុះនេះទទួលបានជោគជ័យ។

លោកបន្តថា “ការមកដល់នៃផ្សារទំនើប MAKRO ជាការជ្រើសរើសទីតាំងត្រឹមត្រូវ ពេលវេលាត្រឹមត្រូវ និងសមត្ថភាពអភិវឌ្ឍន៍របស់ក្រុមហ៊ុននេះអាចធ្វើឲ្យគំរោងនេះទទួលបានភាពជោគជ័យ”។លោកបន្តថា “បើផ្សារនេះមកកាលពី២ទៅ៣ឆ្នាំមុន មិនទាន់ដល់ពេលទេ តែពេលនេះជាពេលវេលាស័ក្តិសមហើយ”។

ប្រធានសមាគមទេសចរណ៍អាស៊ីប៉ាស៊ីហ្វិកលោកធួន ស៊ីណានបានមានប្រសាស​ន៍ឲ្យដឹងផងដែរថា គ្រប់ផ្សារទំនើបធំៗ គួរដល់ពេលមានវត្តមាននៅក្រុងសៀមរាបហើយ ដោយសារកំនើនទេសចរណ៍ និងតម្រូវការរបស់ភ្ញៀវទេសចរណ៍។ ដើម្បីឲ្យភ្ញៀវទេសចរ ណ៍ស្នាក់នៅកាន់តែយូរ គួរមានផ្សារទំនើបៗធំៗនិងមានស្តង់ដាច្រើន ព្រោះShopping Mallជាចំណីរបស់ទេសចរណ៍។

លោកបន្តថា “ផ្សារទំនើប AEON MALL និងផ្សារទំនើបសូរិយា គួរមានវត្តមាននៅខេត្តនេះហើយ ដើម្បីឆ្លើយតបនិងបំពេញតម្រូវការរបស់ភ្ញៀវទេសចរណ៍”។លោកបន្តថា “ផ្សា​រទំនើបឬផ្សារនានានៅក្រុងសៀមរាប មានលក្ខណៈចាប់ឆាយ មិនទាន់មានស្តង់ដាអន្តរជាតិ ដែលអាចទាក់ទាញអារម្មណ៍ភ្ញៀវអន្តរជាតិទេ”៕

ដោយវុត្ថា

       ភ្នំពេញ៖ សារព័ត៌មាន Taiwan News បានចុះផ្សាយឲ្យដឹងកាលពីពេលថ្មីៗនេះថា ការផ្គត់ផ្គង់អចលនទ្រព្យលំនៅដ្ឋានថ្មី បានកើនឡើងយ៉ាងខ្លាំងនៅកោះតៃវ៉ាន់ ហើយតំលៃលំនៅដ្ឋានក៏បានកើនស្របគ្នាផងដែរ។

យោងតាមទិន្នន័យពីទីប្រឹក្សារបស់តៃវ៉ាន់ My Housing បានបង្ហាញថា បរិមាណនៃលំនៅដ្ឋាន ដែលទើបនឹងសាងសង់ និងលក់បន្តបានកើនឡើងនិងមានតម្លៃរហូតដល់ ២៤,៥ពាន់លានដុល្លារកាលពីខែមករាដល់ខែសីហាឆ្នាំនេះ។

តួលេខនេះត្រូវបានគេកំណត់ថា នឹងកើនឡើងដល់១,១៥ពាន់ពាន់លាន (លុយតៃវាន់) សម្រាប់ឆ្នាំ២០១៨ ពោលគឺកើនឡើង៣៤ភាគរយ ពី៨៣៧,៣ពាន់លាន(លុយតៃវាន់) នៅឆ្នាំ២០១៧។

អ្នកស្រី Ho Shih-chan អ្នកគ្រប់គ្រងស្រាវជ្រាវទីផ្សារលំនៅដ្ឋាន My Housing បានកត់សម្គាល់ថា ការលក់ផ្ទះថ្មីនៅមានកម្រិត ខណៈពេលដែលការផ្គត់ផ្គង់បានកើនឡើងនៅឆមាសទីមួយនៃឆ្នាំនេះ។ ការងើបឡើងវិញនៃសេដ្ឋកិច្ចរបស់តៃវ៉ាន់ បូករួមជា​មួ​យគោលនយោបាយទីផ្សារ បានជំរុញឱ្យមានការរីកចម្រើនយ៉ាងឆាប់រហ័ស លើការវិនិយោគសាងសង់លំនៅដ្ឋានថ្មី។

នៅភាគខាងជើងនៃកោះតៃវ៉ាន់តម្លៃផ្ទះថ្មី បានកើនឡើងដល់៧៥ពាន់លានដុល្លារសម្រាប់គំរោងវិនិយោគសរុប ក្នុងរយៈពេល៨ខែដំបូងនៃឆ្នាំនេះ ហើយគ្រាន់តែទីក្រុងTaoyuan តម្លៃលំនៅដ្ឋានដែលបានវិនិយោគថ្មីៗ តម្លៃជាង១៨០លាន(លុយតៃវ៉ាន់) នៅលើទីផ្សារសម្រាប់ឆ្នាំ២០១៨៕

ដោយ រតនៈ

ភ្នំពេញ៖ ស្របពេលតំបន់ស្ថិតនៅតាមបណ្តោយផ្លូវ៦០ម៉ែត្រ កំពុងរីកចម្រើនឥតឈប់ឈរលើផ្នែកលំនៅដ្ឋាន​ និងមជ្ឈមណ្ឌលពាណិជ្ជកម្មលំដាប់អន្តរជាតិជាច្រើនតំបន់នេះ កំពុងទាក់ទាញការចាប់អារម្មណ៍ កាន់តែខ្លាំងពីអ្នកវិនិយោគជាតិ និងអន្តរជាតិនានា។

ជាមួយនឹងកាលានុត្តន៍ភាពនេះ ការវិនិយោគលើលំនៅដ្ឋានតំបន់នេះនឹងមានឳកា​សចំណេញច្រើននាពេលអនាគត ពិសេសអ្នកទិញលំនៅដ្ឋានក្នុងគំរោង Shop House Classic នៃបុរីប៉េង ហួតដែលស្ថិតនៅតាមបណ្តោយផ្លូវ៦០ម៉ែត្រ នឹងមានឳកាសចំណេញរហូតដល់៥៥,០០០ ដុល្លារអាមេរិក។

តំបន់ចាក់អង្រែក្រោម ក្នុងខណ្ឌមានជ័យនេះ ពិតជាកំពុងមាន​សន្ទុះ​អភិវឌ្ឍន៍​ខ្លាំង ​ទាំង​ផ្នែក​សំណង់​លំនៅដ្ឋាន និង​ វិស័យ​ពាណិជ្ជកម្ម ជាមួយនឹងការរៀបចំហេដ្ឋារចនាសម្ព័ន្ធផ្លូវថ្នល់ធំខ្វាត់ខ្វែង ខណៈពេលដែល​មហាវិថី​សម្តេច​ហ៊ុនសែន (ផ្លូវ៦០ ម៉ែត្រ) ដែលទើបតែ​ស្ថាបនា​រួច នឹងក្លាយទៅជាមហាវិថីពាណិជ្ជកម្ម ដោយ​រត់កាត់​តាម​តំបន់​ដែល​កំពុ​ងមាន​ការអភិវឌ្ឍ​យ៉ាង​គគ្រឹកគគ្រេង​នេះ។ គម្រោង​សំណង់​លំនៅឋាន​បាន​លេចចេញ​ឡើង​យ៉ាង​ឆាប់រហ័ស នឹងបង្កើតបានជាទីក្រុងរណប នាពេលអនាគតដ៏ខ្លីខាងមុននេះ។

គម្រោងអភិវឌ្ឍចម្រុះរបស់បុរី ប៉េង ហួត ដឹស្តា ដាយមិន ក៏បានបង្ហាញវត្តមាន និងរួមចំណែកក្នុងគម្រោងអភិវឌ្ឍដ៏ធំសម្បើមនេះផងដែរ។ ក្នុងគម្រោងនេះទាំងមូល មានវិសាលភាពលើផ្ទៃដីប្រមាណជា៤០ហិចតា នៅជាប់មហាវិថីសម្តេចតេជោ ហ៊ុន សែន (៦០ម៉ែត្រ)និងជាគម្រោងមួយ ដែលបែងចែកជាតំបន់សម្រាប់ធ្វើពាណិជ្ជកម្ម និងសម្រា​ប់ស្នាក់នៅផងដែរ។

សម្រាប់តំបន់ពាណិជ្ជកម្ម ក្នុងគម្រោងដ៏ធំនេះ ក៏នឹងក្លាយជាទីប្រជុំជនពាណិជ្ជកម្មដ៏ធំមួយក្នុងតំបន់ចាក់អង្រែក្រោម ដែលរួមមានទាំងផ្សារទំនើប ភីអេច ដាយមិនផ្លេស (PH Diamond Place) សាលសន្នីសីទ និងអគារពាណិជ្ជកម្មតែមួយគត់ នឹងផ្តល់ជូនលោកអ្នក នូវការកំសាន្ត និងជម្រើសហាងទំនិញ សេវាកម្មរាប់រយប្រភេទ ពីហ្សបហោស៏ ដែលជាគេហដ្ឋានសម្រាប់អាជីវកម្មផងដែរ។

ហ្សបហោស៍ក្លាស៊ិក បានរចនាឡើងយ៉ាងល្អឥតខ្ចោះ ឈរលើគុណភាព និងសោភណ្ឌភាព ដែលមានការរួមបញ្ចូលរចនាបថបែបខ្មែរ និងអឺរ៉ុប ដែលមានបន្ទប់គេង៤ បន្ទប់ទឹក៥ ព្រមទាំងបរិវេណទទួលភ្ញៀវ ដែលមានបរិយាកាសស្រស់ស្រាយ កន្លែងទទួលទានអាហារ បន្ទប់ចម្អិនអាហារ និងកន្លែងចតរថយន្តធំទូលាយ ដែលស័ក្តិសមបំផុត សម្រាប់ការរស់នៅ និងប្រកបអាជីវកម្មរបស់លោកអ្នក ដែលមានទីតាំងទល់មុខផ្សារទំនើប ភីអេច ដាយមិនផ្លេស (PH Diamond Place) ផ្ទាល់តែម្តង ។

ហ្សបហោស៍ ក្លាស៊ិក ក្នុងគម្រោង​បុរី ប៉េង ហួត ដឹស្តា ដាយមិន ចាប់ផ្តើមបើកលក់

ពីថ្ងៃ​នេះតទៅហើយ ជាមួយនឹងការបញ្ចុះតម្លៃពិសេសរហូតដល់៥៥,០០០ដុល្លារ ដែលមានសុពលភាពត្រឹមដំណាច់ខែកញ្ញា ឆ្នាំ២០១៨ នេះ តែប៉ុណ្ណោះ។

ព័ត៌មានបន្ថែមសូមទាក់ទងទូរសព្ទលេខ015,906,789 ​Emai​l: [email protected] ឬចូលទៅកាន់គេហទំព័រ Facebook: www.facebook.com/ boreypenghuothgroup ឬអាចអញ្ជើញមកសាកសួរព័ត៌មាន ពីគ្រប់ការិយាល័យលក់ ដែលមានទីតាំងក្បែរលោកអ្នក រៀងរាល់ម៉ោងធ្វើការ៕

សំរាប់ព័ត៌មានបន្ថែមសូមទំនាក់ទំនងលេខទូរស័ព្ទ៖ 016/098/017 59 67 89
#Boreypenghuothgroup
ធ្វើអោយជីវិតលោកអ្នកកាន់តែមានន័យ!

ដោយស៊ីវ ម៉េង

       ភ្នំពេញ៖ ការក្លាយជាភ្នាក់ងារអចលនទ្រព្យមានគុណតម្លៃ និងទទួលបានជោគជ័យ មិនមែនជារឿងសាមញ្ញពេកនោះទេ ខណៈអាជីពនេះកំពុងទទួលបាន​ជោគជ័យ និងមានតម្លៃកាន់តែខ្ពស់នៅក្នុងសង្គម។

នាយិកាក្រុមហ៊ុន Century21 Cambodia អ្នកនាង Grace Rachny Fongបាន​មានប្រសាសន៍ថា ការធ្វើជាភ្នាក់ងារអចលនទ្រព្យ ដែលទទួលបានជោគជ័យ ភ្នាក់ងារនោះ ត្រូវមានគុណសម្បត្តិចំនួន៦ចំណុច ដូចជា សុច្ចរឹតភាព ភាពស្មោះ​ត្រង់ ចំណេះដឹង ជំនាញជាក់លាក់ ការប្តេជ្ញាចិត្ត និងការខិតខំប្រឹងប្រែងធ្វើការ​ដោយឆ្លាតវៃ។លោកបន្តថា អ្វីសំខាន់បន្ថែមទៀត គឺអ្នកចង់ក្លាយជាភ្នាក់ងារអចល​ន​ទ្រព្យ ត្រូវខិតខំបង្វឹកខ្លួនឯង ប៉ុន្តែសំខាន់បំផុតគឺមានសុច្ចរឹតភាព និងភាពស្មោះ​ត្រង់ ទើបទទួលបាននូវគុណតម្លៃ និងទទួលជោគជ័យក្នុងអាជីពនេះ។

អ្នកនាងបន្តថា “អតិថិជននឹងជឿជាក់លើគាត់ ប្រសិនជាគាត់មានសុច្ចរឹតភាព និងភាពស្មោះត្រង់ ប៉ុន្តែអ្នកមានចំណុចពីរនេះ ពិបាករកណាស់ ហេតុនេះខ្ញុំលើកទឹកចិត្តឲ្យអ្នកចង់ប្រឡូកក្នុងវិស័យនេះ ត្រូវគិតពីផលរយៈពេលវែង”។អ្នក​នាងបន្តថា “ក្រៅពីចំណុចទាំងពីរខាងលើ ចំណេះដឹងផ្សេងទៀត គឺយើងអាចប ង្វឹកបាន ប៉ុន្តែសុច្ចរឹតភា ព និងភាពស្មោះត្រង់ត្រូវចេញពីខ្លួនរបស់គាត់”។

ការមានចំណេះដឹងជាតិ អន្តរជាតិ យល់ដឹងទាក់ទងពីទីផ្សារ ច្បាប់ ប្លង់អចលនទ្រព្យច្បាស់លាស់ នឹងធ្វើឲ្យអតិថិជនជឿជាក់លើគាត់ ព្រោះនៅពេលអតិថិជនជឿជាក់លើគាត់ ពួកគេនឹងមានទំនុកចិត្ត និងមានទំនាក់ទំនងល្អ ហើយ​ពេលណាម្ចាស់អចលនទ្រព្យជឿជាក់លើគាត់ ពួកគេនឹងទទួលបានជោគជ័យក្នុ​ងអាជីពនេះ។ អ្នកនាង Grace Rachny Fongបញ្ជាក់ឲ្យដឹង។

អ្នកនាងបន្ថែមថា “អាជីពនេះនឹងមានអនាគតល្អ នឹងមានគុណតម្លៃដូចជា​អាជីពមេធាវី និងអាជីពជាវេជ្ជបណ្ឌិត ព្រោះអ្នកនៅក្នុងអាជីពនេះត្រូវធ្វើការជាមួ​យទាំងអ្នកទិញ និងអ្នកលក់ ហើយអ្នកណាក៏ត្រូវការលំនៅដ្ឋានដែរ”។អ្នកនាងបន្តថា “អាជីពនេះមិនត្រឹមតែធ្វើឲ្យគាត់មានលុយទេ ប៉ុន្តែក៏មានគុណតម្លៃខ្ពស់នៅក្នុងសង្គមផងដែរ”។

នៅប្រទេសជប៉ុន ពួកគេផ្តោតលើធនធានមនុស្ស ដែលមានសុច្ចរឹតភាព ដើម្បីកសាងទំនុកចិត្តក្នុងទីផ្សារ និងមានការផ្តល់សេវាកម្មលើសការរំពឹងទុក។

អ្នកនាង Grace Rachny Fong បានទទូចថា “ប្រសិនជាចង់ចាប់អាជីពនេះឲ្យមានអនាគតល្អ និងមានជោគជ័យ អ្នកចង់ចាប់អាជីពនេះត្រូវគិតគូរវែងឆ្ងាយ ជា​ជាងគិតបែបឆក់កណ្តៀត”៕