ដោយស៊ីវ ម៉េង +លាងគង់

       ភ្នំពេញ៖ ការវាយតម្លៃអចលនទ្រព្យអាចមានភាពស្មុគ្រស្មាញមួយ ប៉ុន្តែបើ​សិនជាយើងដឹងវិធីសាស្រ្តវាយតម្លៃ និងយល់ពីរូបមន្តវាយតម្លៃសាមញ្ញ គឺវាហាក់ងា​យស្រួលដូចបកចេកអញ្ចឹង។

គេមានវិធីសាស្រ្តវាយតម្លៃអចលនវត្ថុចំនួនបីប្រភេទ ប៉ុន្តែថ្ងៃនេះគេហទំព័រ Propertyarea.asia ដែលល្បីល្បាញផ្នែកព៌តមានអចលនទ្រព្យ និងសេដ្ឋកិច្ចសូម លើកយកករណីវាយតម្លៃមួយ ដែលមានភាពងាយយល់ និងសាមញ្ញៗ។

ក្នុងបទបង្ហាញពិសេសមួយ លោកបណ្ឌិតគីម ហ៊ាងប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងឲ្យដឹងក្នុងវគ្គបណ្តុះបណ្តាលមួ យ​ នៅក្នុងបរិវេណសាកលវិទ្យាល័យភូមិន្ទភ្នំពេញកាលពីពេលថ្មីៗនេះថា ការវាយតម្លៃអចលនវត្ថុមានភាពស្មុគ្រស្មាញច្រើន និងមានភាពងាយស្រួល ប៉ុន្តែការ​វាយតម្លៃបែបសាមញ្ញ គឺងាយស្រួលយល់នោះទេ។

លោកបន្តថា មានវិធីសាស្រ្តមួយចំនួន ដែលយើងអាចដឹង និងវាយតម្លៃអចលនទ្រព្យអ្នកដទៃឬខ្លួនឯងបាន ដូចជា ទី១ ត្រូវរកព៌តមានពីតម្លៃអចលនទ្រព្យ នៅទីតាំងជុំវិញទីតាំងដែលអ្នកចង់ដឹងឬចង់ទិញ ឬចង់លក់អចលនទ្រព្យ​របស់ខ្លូន ទី២ រកឲ្យបានព៌តមានពីរឬបី ពីតម្លៃអចលនទ្រព្យនៅជុំវិញតំបន់នោះ ដើម្បីយកមកធ្វើការប្រៀបធៀបគ្នា។

ទី៣ ដើម្បីទទួលបានព៌តមានងាយស្រួល និងជាក់លាក់ លោក អ្នកអាច​សាកសួរមេភូមិ ដើម្បីអាចទទួលព៌តមានអំពីតម្លៃដី ឬផ្ទះនៅតំបន់នោះ។ ទី៤ ពេ​លទទួលបានព៌តមានគ្រប់គ្រាន់ហើយ លោកអ្នកអាចយកតម្លៃអចលនទ្រព្យនៅជុំវិញតំបន់អចលនទ្រព្យ ដែលយើងចង់ដឹងនោះ យកមកគុណចែកជាមធ្យម​

ភាគ យើងនឹងអាចដឹងពីតម្លៃអចលទ្រព្យ ដែលយើងចង់ដឹង ឬចង់ទិញនៅ​តំបន់នោះហើយ។

ទោះជាយ៉ាងណាការវាយតម្លៃអចលនទ្រព្យប្រភេទទៀត មានភាពស្មុគ្រស្មាញខ្លាំង ទាក់ទងនឹងការវាយតម្លៃអាគារ មជ្ឈមណ្ឌលពាណិជ្ជកម្ម ទាក់ទងនឹងការវាយតម្លៃទ្រព្យសកម្មរបស់ក្រុមហ៊ុនណាមួយនោះជាដើម។ គេហទំព័ររបស់យើង គឺwww.propertyarea.asia នឹងលើកយកមកជូនប្រិយមិត្ត និងមិត្តអ្នកអានជាទីគោរពស្រលាញ់នាពេលខាងមុខទៀត៕

ដោយគង់ សូរិយា

ភ្នំពេញ៖ ការវិនិយោគលើអចលនទ្រព្យមិនសុទ្ឋតែទទួលបានផលចំណេញនោះទេ ហេតុនេះមុនសម្រេចចិត្តវិនិយោគលើវិស័យនេះ គួរសិក្សាពីហានិភ័យទាំង៥ចំណុចនេះជាមុនសិន។

វិភាគសេដ្ឋកិច្ច និងអចលនទ្រព្យ លោកង៉ែត ជូ បានលើកឡើងក្នុងទំព័របណ្តាញទំនាក់ទំនងរបស់លោកកាលពីពេលថ្មីៗនេះថា ការវិនិយោគអចលនទ្រព្យមិនទទួលបានជោគជ័យ ដោយសារកត្តាសំខាន់ៗចំនួន៥ ដូចជា ទី១ មិនបានដឹងថាដីធ្លីជាទ្រព្យសកម្មរយៈពេលវែង (Long Term Asset) ហើយយល់ថាទិញ១រយៈពេលខ្លី រួចលក់យកចំណេញ។ តាមពិតទ្រព្យសកម្មរយៈពេលវែង មិនអាច (ឬពិបាក) លក់យកជាសាច់ប្រាក់ក្នុងរយៈពេលខ្លី (តិចជាង១ឆ្នាំ)ណាស់។

ទី២ វិនិយោគនៅពេលទីផ្សារពុះកញ្ជោលខ្លាំង: ចេះតែតាមគេតាមឯង គ្មានគោលដៅច្បាស់លាស់។ ខណៈបែបហ្នឹងងាយនឹងបរាជ័យណាស់។ សំរាប់ខ្ញុំ ខ្ញុំចូលចិត្តស្ទូចត្រីនៅកន្លែងដែលគ្មានអ្នកស្ទូច។ ទី៣ ទៅសំកុកចាំយូរពេក: កុំដាំដើមត្នោតយកផ្លែ គួរទិញដើមត្នោតដែលជិតផ្លែ ទើបងាយបានផល។ កុំវិនិយោគឆ្ងាយពេក នាំកប់យូរ។ ត្រឹម ៣០-៤០គម ពីក្រុងជាការល្អ។

ទី៤ ក្តាប់ពត៌មានមិនជុំដោយខ្វះបណ្តាញទំនាក់ទំនង: ដោយសារដីធ្លីជាទ្រព្យសកម្មរយៈពេលវែង មិនងាយលក់ ការក្តាប់បានពត៌មានសំខាន់ណាស់។ ទី៥ មិនយល់ពីសក្តានុពលរបស់ដី និងតំរូវការ អាចសមនឹងយកទៅអភិវឌ្ឍជាអ្វី? អ្នកណាជាអ្នកនឹងទិញបន្តរ? គេមានលទ្ធភាពផ្នែកហិរញ្ញវត្ថុបែបណា៕

ដោយវុត្ថា

       ភ្នំពេញ៖ ក្រសួងមហាផ្ទៃបានស្នើសម្ដេចតេជោ ហ៊ុន សែន នាយករដ្ឋមន្ត្រីនៃប្រទេ​សកម្ពុជាអោយមានលទ្ធិភាពបង្កើតខេត្តថ្មីចំនួន២ គឺទី១ស្នើរសុំបំបែកចេញពីខេត្តកណ្ដា​ល ខេត្តថ្មីទី២ ដោយពិនិត្យលើកត្ដាភូមិសាស្រ្ត និងប្រជាសាស្រ្ដរបស់ស្រុកកោះញែក នៃខេត្តមណ្ឌលគិរី និងស្រុកលំផាត់ នៃខេត្តរតនគិរី។

នៅក្នុងលិខិតដែលចុះហត្ថលេខាដោយសម្តេច ស ខេងរដ្ឋមន្ត្រីក្រសួងមហាផ្ទៃផ្ញើរជូនសម្តេចតេជោ ហ៊ុន សែន នាយក្រដ្ឋមន្ត្រីនៃកម្ពុជាបានឲ្យដឹង រាជដ្ឋាភិបាលបានដាក់ចេញនូវសេចក្តីសម្រេចស្តីពី ការបង្កើតគណកម្មការស្រាវជ្រាវកែសម្រួលព្រំប្រទល់រដ្ឋបាលថ្នាក់ក្រោមជាតិ ដែលគណៈកម្មការនេះ ដឹកនាំដោយសម្តេច សរ ខេង ដោយផ្ទាល់។ គណៈកម្មការនេះ ជាសេនាធិការជូនរាជរដ្ឋាភិបាលក្នុងការកំណត់ និងកែសម្រូលព្រំប្រទ​ល់រដ្ឋបាលថ្នាក់ក្រោមជាតិ និងរៀបចំបង្កើតរដ្ឋាបាលថ្នាក់ក្រោមជាតិ។

លិខិតដដែលបន្តថា នៅចំពោះមុខនេះ ផ្អែកតាមការពិនិត្យជាទូទៅលើស្ថានភាពភូមិសាស្ត្រ  និងស្ថានភាព ប្រជាសាស្ត្រ គួតែអោយមានការសិក្សាលទ្ធភាព ក្នុងការរៀបចំបង្កើតខេត្តថ្មីចំនួន២ ដើម្បីជួយលើកកម្ពស់ប្រសិទ្ធិភាព នៃការគ្រប់គ្រងរដ្ឋបាល ការរក្សាសន្តិសុខ សណ្តាប់ធ្នាប់សាធារណៈ ការជំរុញការអភិវឌ្ឍ នៅក្នុងមូលដ្ឋាន និងការផ្តល់សេវាសាធារណៈជូនដល់ប្រជាពលរដ្ឋ ក្រសួងមហាផ្ទៃបានបញ្ជាក់ថា ការសិក្សាលទ្ធផលបង្កើតខេត្តថ្មីចំនួន ២នេះ គឺដើម្បីជួយលើកកម្ពស់ប្រសិទ្ធភាពនៃការគ្រប់គ្រងរដ្ឋបាល ការថែរក្សាសន្ដិសុខសណ្ដាប់ធ្នាប់សាធារណៈ ការជំរុញអភិវឌ្ឍនៅមូលដ្ឋាន និងការផ្ដល់សេវាសាធារណៈជូនប្រជាពលរដ្ឋ។

ជាលទ្ឋផលនៅថ្ងៃនេះ សម្តេចតេជោហ៊ុន សែននាយករដ្ឋមន្រ្តីកម្ពុជាបានឯកភាពឲ្យសិក្សាបង្កើតខេត្តថ្មីពីរនេះហើយ ដោយកាត់ចេញពីខេត្តកណ្តាល រតនគិរី និងមណ្ឌលគិរី៕

ដោយគង់ សូរិយា

ភ្នំពេញ៖ ក្នុងគោលដៅពង្រឹងគុណភាព និងបទដ្ឋានសំណង់នៅកម្ពុជា ដែលកំពុងមានការរីកចម្រើនយ៉ាងឆាប់រហ័សនេះ អគ្គលេខាធិការគណៈស្ថាបត្យករកម្ពុជា ប្រកាសបើកជាចំហរក្នុងគោលបំណងជួយពង្រឹងជំនាញ និងបច្ចេកទេសផ្នែកស្ថាបត្យកម្ម និងសំណង់។

លោកបណ្ឌិតភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការគណៈស្ថាបត្យករកម្ពុជា បានមានប្រសាសន៍ឲ្យដឹងក្នុង សន្និសីទសារព័ត៌មានស្តីពីការរៀបចំពិរព័ណ៍ បង្ហាញទស្សនៈវិស័យក្នុងការសាងសង់ ទីក្រុងវៃឆ្លាតរបស់កម្ពុជា នៅថ្ងៃទី៣០ ខែសីហា ឆ្នាំ២០១៨កន្លងមកថា នៅក្នុងរយៈពេលប៉ុន្មានឆ្នាំមកនេះ វិស័យស្ថាបត្យកម្ម និងសំណង់នៅកម្ពុជា មានការរីកចម្រើនយ៉ាងខ្លាំង ដោយយើងសង្កេតឃើញថា មានអគារខ្ពស់ៗជាច្រើនដែលបានរីកដុះដាលឡើង រួមជាមួ​យការរចនាម៉ូតយ៉ាងល្អប្រណីតទាន់សម័យ ក្នុងនោះវិស័យសម្ភារៈសំណង់ ក៏ត្រូវដើរតួរយ៉ាងសំខាន់ផងដែរ ព្រោះអគាររឹងមាំគឺអាស្រ័យទៅលើសម្ភារៈ សំណង់ទាំងនោះ ជាសម្ភារៈសំណង់ដែលមានគុណភាព និងផ្តល់សុវត្ថិភាពពិតប្រាកដ។

លោកបន្តថា “សាលកវិទ្យាល័យ ឬក្រុមនិស្សិតដែលចង់ស្វែងយលអំពីជំនាញ និងបច្ចេកទេសបន្ថែមខ្ញុំស្វាគមន៍ជួយជានិច្ច ខណៈដែលប្រទេសកម្ពុជា កំពុងមានការអភិវឌ្ឍលើវិស័យសំណង់ ដូច្នេះកម្ពុជាពិតជាត្រូវការទាមទារនូវគុណភាព និងសុវត្ថិភាព ក្នុងការសាងសង់សំណង់ប្រកបដោយស្តង់ដារ”។

ក្រៅពីវិស័យឧស្សាហកម្មកាត់ដេរ និងវិស័យទេសចរណ៍ វិស័យសំណង់ គឺជាផ្នែកមួយជម្រុញដល់កំណើនសេដ្ឋកិច្ចកម្ពុជាយ៉ាងខ្លាំងក្លា ជាក់ស្តែងគិតត្រឹមខែកក្កដា ឆ្នាំ២០១៨នេះ កំណើនប្រាក់ចំណូលលើវិស័យស្ថាបត្យកម្មសំណង់ បានឡើងដល់ជាង១៣១ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន។ នេះបើតាមការឲ្យដឹងពីលោកបណ្ឌិតភឿង សុភ័ណ្ឌ៕

ដោយ : ដែន ចែងចាំង

ភ្នំពេញ៖ ក្រុមហ៊ុនភ្នាក់អចលនទ្រព្យជាតិ អន្តរជាតិនិងអ្នកវិនិយោគក្នុងវិស័យនេះបានជួបជុំគ្នា ដើម្បីជជែកនិងផ្លាស់ប្តូរបទពិសោធន៍គ្នា ក្នុងគោលដៅជំរុញការអភិវឌ្ឍក្នុង​វិស័យនេះ។

ការរៀបចំនេះធ្វើឡើងដោយក្រុមហ៊ុនលីងណាន គ្រុប (LingNan Group) នាល្ងាចថ្ងៃទី៣០ សីហា ឆ្នាំ២០១៨កន្លងទៅនេះ។ នៅក្នុងព្រឹត្តិការណ៍នោះក្រុមហ៊ុន លីងណាន ហ្គាឌិន ក៏បានបង្ហាញនូវសក្តានុភាពរបស់ទីក្រុងភ្នំពេញ និងអះអាងថា អនាគតទីក្រុងរបស់កម្ពុជា នឹងធ្វើឲ្យភ្នាក់ងារអចលនទ្រព្យទាំងអស់ពេញចិត្ត ចំពោះរាល់គម្រោងដែលកើតមានឡើង។

កញ្ញា Guo Min ប្រធានផ្នែកអភិវឌ្ឍ និងជានាយកផ្នែកទីផ្សារក្រុមហ៊ុន លីងណាន បានពន្យល់អំពីសក្តានុពល គំរោងរបស់ក្រុមហ៊ុនផងដែរ ក្នុងទីតាំងស្ថិតនៅកណ្តាលក្រុងភ្នំពេញ ដែលមានអាគារកំពស់រហូតដល់៣៣ជាន់។

កញ្ញាបញ្ជាក់ទៀតថា កត្តាដែលធ្វើឲ្យក្រុមហ៊ុនជឿជាក់ និងដាក់ទុនវិនិយោគលើវិស័យនេះនៅកម្ពុជា ដោយសារមើលឃើញពីភាពរីកចម្រើន និងតម្រូវការខ្ពស់របស់ប្រជាជនកម្ពុជាក្នុងការរស់នៅបែបទាន់សម័យ និងផាសុខភាពជាដើម ពិសេសដោយសារប្រទេសកម្ពុជាមានសុខសន្តិភាព និងស្ថានភាពនយោបាយកាន់តែល្អប្រសើរ។

វិស័យអចលនទ្រព្យនៅកម្ពុជាមានការរីកចម្រើនខ្លាំង ក្នុងរយៈពេល១ទសវត្សរ៍ចុងក្រោយនេះ ដោយសារកត្តាសន្តិភាព ស្ថេរភាពនយោបាយ កំនើនសេដ្ឋកិច្ចជាតិ និងច្បាប់​វិនិយោគដ៏ទាក់ទាញ៕

ដោយវុត្ថា

ភ្នំពេញ៖ រដ្ឋាភិបាលទីក្រុងម៉ូស្ដូ បានផ្តល់អាជ្ញាប័ណជាផ្លូវការក្នុងការសាងសង់អគារខ្ពស់កប់ពពកមួយទៀត នៅក្នុងតីក្រុងនៅក្នុងតំបន់សេដ្ឋកិច្ចរីកចម្រើនៃទីក្រុងម៉ូស្ដូ ជាអ្វីដែលប្រទេសនេះកំពុងពង្រីកឧត្តមភាព និងប្រកួតប្រជែងជាមួយប្រទេសរីក​ចម្រើននានា។

អាគារនេះ ដែលនឹងត្រូវសាងស់នៅឆ្នាំ២០១៩ ខាងមុខនេះ នឹងមានកំពស់រហូតដល់៤០៤ ម៉ែត្រ ហើយវាត្រូវបានគេអោយឈ្មោះអគារនេះថា Moscow City។

ស្ថាបត្យករសំណង់ លោក Sergey Skuratov បានលើកឡើងថា ការគូប្លង់នឹងត្រូវបញ្ចប់នៅក្នុងខែវិច្ឆិកាចុងឆ្នាំនេះ ហើយវានឹងអាចចាប់ផ្តើមសាងសង់នៅក្នុងដើមឆ្នាំ ២០១៩ខាងមុខនេះ។  លោកបន្តថា ការសាងសង់អគារនេះ នឹងត្រូវប្រើពេលចំនួន៦ឆ្នាំ ទើបសាងសង់បញ្ចប់ ពោលគឺនៅក្នុងឆ្នាំ២០១៤ នឹងសម្ពោធដាក់អោយដំណើរការជាផ្លូវការ។ នៅពេលសាងសង់បញ្ចប់អគារនេះ នឹងខ្ពស់ជាងអគារបញ្ចប់ អគារ Federation Tower ដែលមានកម្ពស់ត្រឹមតែ៣៧៣ម៉ែត្រប៉ុណ្ណោះ។

មជ្ឈមណ្ឌលពាណិជ្ជកម្មដ៏អស្ចារ្យនេះ នឹងប្រើប្រាស់មជ្ឈមណ្ឌលផ្សារទំនើប ការិយាល័យធ្វើការ និងការិយាល័យពាណិជ្ជកម្មជាដើម។

បន្ថែមពីនេះទៀត នៅជាន់ខាងលើនៃអាគារនេះគឹសម្រាប់ធ្វើជាលំនៅដ្ឋាន កន្លែងទស្សនាទេសភាពទីក្រុង និងនៅជាន់លើបង្អស់សម្រាប់ចតឧត្ថម្ភភាគចក្រ។ តែយ៉ាងណាក៏ដោយគេមិនបានបង្ហាញពីការប្រើប្រាស់ ចំនួនថវិកាប៉ុន្មាននោះទេ ក្នុងការសាងសង់អគារដ៏ទំនើបមួយនេះ ខណៈគេកំពុងរចនប្លង់សំខាន់ៗនៃអគារទាំងមូល៕

ដោយគង់ សូរិយា

ភ្នំពេញ៖ ក្រុមហ៊ុនជាតិ អន្តរជាតិចំនួន៣៥០នឹងចូលរួមក្នុងព្រឹត្តិការណ៍តាំងពិរព័ណ៌ផ្នែកស្ថាបត្យកម្មអាគារ និងសំណង់អន្តរជាតិធំជាងគេបំផុតនៅកម្ពុជា ដោយបានផ្តោតការយកចិត្តទុកដាក់ពីគំនិតច្នៃប្រឌិត ការរចនា និងការបង្ហាញទស្សនៈវិស័យទីក្រុងវៃឆ្លាត។

នាយកក្រុមហ៊ុន ABM Tarsus Events Group លោក Andrew Siow បានថ្លែងលើកឡើងនៅក្នុងសន្និសីទសារព័ត៌មានស្តីពី ការរៀបចំពិព៌ណស្ថាបត្យកម្ម និងសំណង់នាព្រឹកថ្ងៃទី៣០ខែសីហា ឆ្នាំ២០១៨ នេះថា ស្របពេលដែលរាជរដ្ឋាភិបាលកម្ពុជា បានខិតខំប្រឹងប្រែងក្នុងការអនុវត្តន៍ គោលនយោ​បា​យអភិវឌ្ឍនវិស័យអចលនទ្រព្យ ការរៀប​ចំតាំងពិព័រណ៍ផ្នែកស្ថាបត្យកម្មអាការ និងសំណង់ខ្នាតអន្តរជាតិធំបំផុតនៅកម្ពុជា គឺបានផ្តោតការយកចិត្តទុកដាក់ អំពីគំនិតច្នៃប្រឌិត និងការរចនា និងការបង្ហាញទស្សនៈវិស័យទីក្រុ វៃឆ្លាត ពោលគឺការជម្រុញអភិវឌ្ឍន៍ទីក្រុងស្អាតមានសុវត្ថិភាព ប្រសិទ្ធភាព និងនិរន្តរភាព អមដោយបិរស្ថានល្អ សម្រាប់អ្នករស់នៅទីក្រុងជាដើម។

លោកបន្តថា “នៅក្នុងព្រឹត្តិការណ៍នេះ ស្ថាបត្យករ អ្នករចនា អ្នកអភិវឌ្ឍន៍ វិស្វករ អ្នកម៉ៅការ អ្នកផ្គត់ផ្គង់ នឹងមានឱកាសបានទស្សនាការផ្គត់ផ្គង់ផលិតផលថ្មីៗជាមួយប   ច្ចេកវិទ្យាទទួលបានភាពច្នៃប្រឌិត នៅក្នុងឧស្សាហកម្មសំណង់”។

រដ្ឋលេខាធិការក្រសួងនគរូបនីយកម្ម រៀបចំដែនដី និងសំណង់លោកបណ្ឌិតភឿង សុភ័ណ្ឌបានថ្លែងថា ស្របពេលដែលប្រទេសកម្ពុជាមានស្ថិរភាពនយោបាយ ការបង្រួបបង្រួមជាតិ និងមានសុខសន្តិភាពសណ្តាប់ធ្នាប់ពេញលេ​ញ ការអភិវឌ្ឍន៍លើវិស័យសំណ​ង់ ស្ថាបត្យកម្ម អចលនទ្រព្យ ហេដ្ឋារចនាសម្ព័ន្ធ និងការបង្កើតទីក្រុងថ្មីៗ គឺបានចូលរួមចំណែកកាត់បន្ថយនូវភាពក្រីក្រ និងការកាត់បន្ថយនូវចំណាកស្រុកជាដើម។

លោកបន្តថា “វិស័យសំណង់ ជាវិស័យមួយ ដែលបានជួយដល់កំណើនសេដ្ឋកិច្ចជាតិដ៏សំខាន់ផងដែរ”។

ការរៀបចំព្រឹត្តិការណ៍តាំង ពិពណ៌ផ្នែកស្ថាបត្យកម្មអាគារ និងសំណង់អន្តរជាតិធំជាងគេបំផុតនៅកម្ពុជា គ្រោងប្រព្រឹត្ត ទៅនៅថ្ងៃទី១២ ដល់ថ្ងៃទី១៤ ខែកញ្ញា ឆ្នាំ២០១៨ នៅមជ្ឈមណ្ឌលសន្និបាតពិព៌ណកោះពេជ្រ៕

ដោយដែន ចែងចាំង

ភ្នំពេញ៖ ក្រុមហ៊ុនជីពម៉ុង គ្រុបបានប្រកាសវិនិយោគទឹកប្រាក់២៥២លានដុល្លារអាមេរិកលើគំរោងជាច្រើនរបស់ខ្លួន ដែលភាគច្រើនជាគំរោងលំនៅដ្ឋាន និងជាមជ្ឈមណ្ឌលពាណិជ្ជកម្មលំដាប់អន្តរជាតិ។

លោកឧកញ៉ា លាង ឃុន ប្រធានក្រុមអគ្គនាយកក្រុមហ៊ុន ជីប ម៉ុង បានឲ្យដឹងក្នុង ពិធីបញ្ចុះបឋមសិលាសាងសង់ផ្សារទំនើបលំដាប់អន្តរជាតិរបស់ខ្លួន ជីព ម៉ុងមេហ្កាម៉លនាព្រឹកថ្ងៃទី៣០ សីហានេះថា រហូតមកទល់ពេលនេះ ក្រុមហ៊ុនជីបម៉ុងគ្រុបបានវិនិយោគលើគម្រោងទាំងអស់របស់ខ្លួន គិតជាទឹកបា្រក់ចំនួន២៥២លានដុល្លារអាមេរិក ដែលការវិនិយោគនេះផ្តោតលើគំរោងជាច្រើន ដូចជា ជីពម៉ុងមុន្នីវង្សស៊ុភើម៉ាឃីត ជីពម៉ុងបាក់ទូកម៉ល ជីព ម៉ុងសែនសុខម៉ល ជីព ម៉ុង៥៩៨ម៉ល និងជីបម៉ុង២៧១មេហ្គាម៉ល។

លោកបន្តថា “សម្រាប់គំរោងផ្សារទំនើបជីបម៉ុង២៧១មេហ្គាម៉ល នឹងលេចចេញជារូបរាងឡើងក្នុងឆ្នាំ២០២០ ដើម្បីបម្រើតម្រូវការសាធារណៈជន ក្នុងរាជធានីភ្នំពេញ ជាពិសេសប្រជាពលរដ្ឋដែលរស់នៅជុំវិញតំបន់ ដែលពោរពេញទៅដោយសក្តានុពលសេដ្ឋកិច្ចមួយនេះ”។

ផ្សារទំនើប និងមជ្ឈមណ្ឌលពាណិជ្ជដ៏ធំនេះ នឹងត្រូវបានសាងសង់ក្នុងបរិវេណគម្រោងដឺលែនម៉ាក២៧១ ដែលហ៊ុព័ទ្ធទៅដោយតំបន់លំនៅដ្ឋានប្រណីត រាប់រយខ្នង អាគា​រពាណិជ្ជកម្ម សណ្ឋាគារលំដាប់អន្តរជាតិ ខុនដូទាន់សម័យ និងអគារការិយាល័យដ៏ទំនើបផងដែរ។

ទេសរដ្ឋមន្រ្តី ជា សុផារ៉ា រដ្ឋមន្រី្តក្រសួងរៀបចំដែនដី នគរូបនីយកម្ម និងសំណង់បានថ្លែងថា គម្រោងថ្មីដែលមានទំហំ២០០លានដុល្លារអាមេរិក នៅលើផ្ទៃដី៤១ហិចតា ចាត់ទុកថាជាគម្រោងមួយបានរៀបចំឌីហ្សាញ ក្នុងការធ្វើផ្សារទំនើបនេះមានភាពទាន់សម័យ ហើយចាត់ទុកថាទីតាំងនេះ ជាកន្លែងមកកាន់ទីផ្សារ និងកន្លែងជួបគ្នា ជាមួយនឹងគម្រោងសាងសង់នេះ។

លោកបន្តថា “គម្រោងនេះ បានរួមចំណែកជាមួយនឹងការអភិវឌ្ឍន៍ សេដ្ឋកិច្ចរបស់កម្ពុជា ដែលធ្វើឲ្យវិស័យសំណង់នៅក្នុងព្រះរាជាណាចក្រកម្ពុជាបន្ថែមទៀត”៕