បុរី ឌឹ ផ្លរ៉ា ផ្តល់ចំណងដៃពិសេសសម្រាប់គូស្វាមីភរិយាថ្មី

December 30, 2017

ដោយ រ៉ាវី

ភ្នំពេញ៖ ជាមួយនឹងការធ្វើពិពិធកម្មទីផ្សាររបស់ខ្លូន បុរី ឌឹ ផ្លរ៉ាបានផ្តល់ជូនអតិថិជននូវលក្ខខ័ណ្ឌល្អប្រសើរ ពិសេសផ្តល់ជូនស្វាមី ភរិយាដថ្មីនូវចំណងដៃពិសេសមួយ។

បុរីដឺ ផ្លារ៉ាជាគម្រោងដ៏ធំមួយ ដែលកំពុងសាងសង់ នៅលើផ្ទៃប្រមាណ ២០០ហិកតា ចម្ងាយប្រមាណជាង១០គីឡូម៉ែត្រ ចុះពីស្ពានជ្រោយចង្វារ តាមបណ្តោយផ្លូវជាតិលេខ6A ដែលជាផ្លូវភ្លោះធំបំផុតរបស់កម្ពុជា តភ្ជាប់ពីតំបន់សេដ្ឋកិច្ចពិសេសខេត្តកំពង់ចាម មកកាន់រាជធានីភ្នំពេញ ដោយចំណាយពេលប្រមាណ15នាទីពីគល់ស្ពានជ្រោយចង្វារ។

ជាមួយគ្នានេះ ជាការចូលរួមបង្កើនភាពរីករាយសម្រាប់គ្រួសារថ្មី ដែលជាអតិថិជនរបស់ខ្លួនបុរី The Flora បានកម្មវិធីពិសេសសម្រាប់គូស្វាមីភរិយាថ្មី ដោយការផ្តល់ចំណងដៃពិសេស គឺកម្មវិធីធ្វើដំណើរក្រេបច័ន្ទទឹកឃ្មុំនៅក្រៅប្រទេសទៀត។

កម្មវិធីពិសេសនេះសម្រាប់រដូវកាលអាពាពិពាហ៍ (Wedding Season) ដោយគ្រាន់តែទិញផ្ទះ ក្នុង បុរី ឌឹ ផ្លរ៉ា ចាប់ពីថ្ងៃទី01 ខែមករា រហូតដល់ ថ្ងៃទី31 ខែមីនា ឆ្នាំ2018 ខាងមុខនេះ លោកអ្នកនូវការផ្តល់ជូនជាពិសេសនេះ។ កាដូដែលត្រូវទទួលបាន រួមមានសំបុត្រយន្តហោះ (ជាកញ្ចប់ Tour packed) ដំណើរកំសាន្តទៅ កំសាន្ដក្រេបច័ន្ទទឹកឃ្មំ ទៅ កោះក្រាប៊ី ប្រទេសថៃ កោះបាលី ប្រទេសឥណ្ឌូនេស៊ីនិងប្រទេសសិង្ហបុរី។

សម្រាប់ដំណើរកំសាន្ត គឺមិនមានការចាប់ឆ្នោតនោះឡើយ គឺនឹងទទួលបានដោយស្វ័យប្រវត្តតែម្ដង ដែលកាលបរិច្ឆេទដំណើរកំសាន្ត នឹងធ្វើឡើងនៅថ្ងៃចូលឆ្នាំខ្មែរ ឆ្នាំ2018 ខាងមុខនេះ៕

សារមន្ទីរ Guggenheim Bilbao ស្ថាបត្យកម្មទំនើបបំផុតក្នុងពិភពលោក

December 29, 2017

0

ដោយ វុត្ថា

ភ្នំពេញ៖ ស្ថាបត្យកម្មសហសម័យ និងទំនើបបំផុតត្រូវបានប្រឌិតឡើងជាមួយនឹងគំនិតស្រមើស្រម័យ របស់លោក Frank Gehry បានលេចរូបរាងឡើង ជាមួយនឹងសោភ័ណភាព និងកម្រិតស្ថាបត្យកម្មដល់កំពូលនៃសតវត្សរ៍ទី២។

នេះជាសារមន្ទីរ Guggenheim Bilbao គឺជាសារមន្ទីរសិល្បៈសម័យទំនើប និងដែលរចនាដោយស្ថាបត្យករល្បីឈ្មោះ ជនជាតិកាណាដា លោក Frank Gehry ដែលមានទីតាំងស្ថិតនៅក្នុងទីក្រុង Bilbao ប្រទេស ប្រទេសអេស្ប៉ាញ។

សារមន្ទីរនេះ ត្រូវបានសម្ពោធដាក់ឲ្យដំណើរការជាផ្លូវការ កាលពីថ្ងៃទី ១៨ ខែតុលាឆ្នាំ១៩៩៧ បន្ទាប់ពីបានសាងសង់កាលពីឆ្នាំ១៩៨០។ ពេលសម្ភោធសារៈមន្ទីរនេះ មានការចូលរួមជាអធិបតីអតីតស្តេច Juan Carlos I របស់ទេសអេស្ប៉ាញ។ សារមន្ទីរដ៏ទំនើប និងទាន់សម័យនេះ ត្រូវបានសាងសង់ឡើងតាមដងទន្លេ Nervion ដែលមានទឹកហូរកាត់ទៅកាន់ទីក្រុង Bilbao នៃសមុទ្រ Cantabrian។ ប្រជាជនប្រហែលប្រាំពាន់នាក់ ដែលរស់នៅក្នុងទីក្រុង Bilbao បានចូលរួមពិធីបើកសម្ភោធជាផ្លូវការ និងធ្វើពិធីជប់លៀងមួយនៅខាងក្រៅសារមន្ទីរ ដោយមានការបង្ហាញពន្លឺ និងការប្រគំតន្ត្រីកផងដែរ។

សារមន្ទីរនេះផងដែរ គឺជាកម្មសិទ្ធិរបស់មូលនិធិ Solomon R. Guggenheim ហើយមានលក្ខណៈពិសេស សម្រាប់ប្រើប្រាស់ជាទីតាំងពិព៌ណជាអចិន្ត្រៃយ៍ និងការធ្វើដំណើររបស់វិចិត្រករអេស្ប៉ាញ និងអន្តរជាតិ។ វាគឺជាសារមន្ទីរធំបំផុតមួយនៅក្នុងប្រទេសអេស្ប៉ាញ។

សំណង់មួយក្នុងចំណោមស្នាដៃ ដែលបានកោតសរសើរបំផុតនៃស្ថាបត្យកម្មសម័យថ្មីរបស់អគារនេះ ត្រូវបានគេចាត់ទុកថាជា “និមិត្តសញ្ញានៃវប្បធម៌ស្ថាបត្យកម្ម” ។ សារមន្ទីរនេះ គឺជាអាគារដែលត្រូវបានគេដាក់ឈ្មោះថា ជាស្ថាបត្យកម្មស្នាដៃដ៏អស្ចារ្យបំផុតមួយក្នុងពិភពលោក ដែលបានសាងសង់បញ្ចប់តាំងពីឆ្នាំ១៩៨០។ នេះបើតាមការស្ទង់មតិស្ថាបត្យកម្មពិភពលោកឆ្នាំ២០១១ ក្នុងចំណោមអ្នកជំនាញខាងស្ថាបត្យកម្ម។

សារមន្ទីរនេះ ត្រូវបានកសាងឡើងដោយក្រុមហ៊ុន Ferrovial ក្នុងតម្លៃ៨៩ លានដុល្លារអាមេរិក។

សារមន្ទីរនេះត្រូវបានដាក់ដំណើរការ គឺជាផ្នែកមួយនៃកិច្ចខិតខំប្រឹងប្រែងរស់ឡើងវិញសម្រាប់ទីក្រុង Bilbao។ ក្រោយពីការបើកសម្ពោធភ្លាមៗនោះសារមន្ទីរ Guggenheim Bilbao បានក្លាយជាកន្លែងទេសចរណ៍ដ៏ពេញនិយមដែលទាក់ទាញភ្ញៀវទេសចរមកពីជុំវិញពិភពលោក។

នៅក្នុងរយៈពេល៣ឆ្នាំដំបូង មានភ្ញៀវទេសចរជិត៤លាននាក់បានទៅទ ស្សនាសារមន្ទីរនេះ ដោយបានជួយបង្កើតប្រាក់ប្រមាណ៥០០លានអឺរ៉ូ ពីភ្ញៀវទេសចរណ៍។ ក្រុមប្រឹក្សាប្រចាំតំបន់នេះ បានប៉ាន់ស្មានថាភ្ញៀវទេសចរដែលបានចំណាយលុយលើសណ្ឋាគារ ភោជនីយដ្ឋាន ហាង និងការដឹកជញ្ជូនធ្វើអោយរដ្ឋឱប្រមូលពន្ធបាន១០០លានអឺរ៉ូក្នុងមួយឆ្នាំ។

អាគារសារមន្ទីរដ៏ល្បីល្បាញនេះ ត្រូវបានបង្ហាញនៅក្នុងខ្សែភាពយន្ត James Bond ឆ្នាំ១៩៩៩ ក្នុងរឿង The World Is Not Enough ដែលជាខ្សែភាពយន្តមុនគេ និងនៅឆ្នាំ២០០៧អាគារនេះ ក៏បានស្ថិតនៅក្នុងខ្សែងភាពយន្ត Tamil film ក្រោមចំណងជើងថា Sivaji: The Boss ដោយក្នុងនោះមានដាក់បទចម្រៀង Style ដែលតែងនិពន្ធដោយ លោក A.R. Rahman ក្នុងខ្សែភាពយន្តផងដែរ ។

វីដេអូតន្ត្រីរបស់ Mariah Carey ដែលដឹកនាំដោយលោក Hype Williams បានបង្ហាញតារាចម្រៀងJermaine Dupri និង Carey ក៏បានដាក់បញ្ចូលនៅក្នុងទីកន្លែងផ្សេងៗគ្នានៅឯសារមន្ទីរ Guggenheim Bilbao នេះផងដែរ៕

ក្រសួងពាណិជ្ជកម្មរកបានលុយ ៥៤លានដុល្លារអាមេរិកចូលថវិកាជាតិ

December 29, 2017

0

ដោយ វុត្ថា

ភ្នំពេញ៖ ជាមួយនឹងសកម្មភាពកំណែទម្រង់ជាបន្តបន្ទាប់ ជាលទ្ឋផលក្រសួងពាណិជ្ជកម្មកម្ពុជាបានរកចំណូលចូលថវិកាជាតិចំនួន ៥៤លានដុល្លារអាមេរិក នៅឆ្នាំ២០១៧នេះ។

ថ្លែងក្នុងពិធីបិទសន្និបាតបូកសរុបការងារពាណិជ្ជកម្មឆ្នាំ២០១៧ និងទិសដៅការងារឆ្នាំ២០១៨ រដ្ឋមន្ត្រីក្រសួងពាណិជ្ជកម្មលោក ប៉ាន សូស័ក្តិ បានមានប្រសាសន៍ឲ្យដឹងកាលពីម្សិលម៉ិញនេះថា ក្រសួងពាណិជ្ជកម្មបានធ្វើកំណែទម្រង់លើច្រើនវិស័យ ក្នុងគោលដៅជំរុញការងារគ្រប់គ្រងរដ្ឋបាលហិរញ្ញវត្ថុសាធារណៈ និងយន្តការការងារឲ្យកាន់តែមាន ប្រសិទ្ធភាព និងស៊ីជម្រៅ ដោយបានរៀបចំម៉ាទ្រិចតាមដានសកម្មភាពការងាររបស់មន្ត្រីក្រោមឱវាទ ដើម្បីធ្វើឲ្យប្រាកដថា មន្ត្រីរាជការពិតជាបានអនុវត្តកាតព្វកិច្ច និងផែនការសកម្មភាពច្បាស់លាស់ក្នុងការបំពេញការងារប្រចាំថ្ងៃនេះ។

លោក ប៊ិន ឈិន ឧបនាយករដ្ឋមន្ត្រីប្រចាំការ និងជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រីបានកោតសរសើរចំពោះសមិទ្ធផលសំខាន់ៗដែលសម្រេចបាន ដោយក្រសួងពាណិជ្ជកម្មរបស់មន្ត្រីគ្រប់លំដាប់ថ្នាក់ក្នុងឆ្នាំ២០១៧នេះ ដូចជា កម្ពុជាបានទទួលភាពអនុគ្រោះពន្ធ និងមិនជាប់កូតាពីបណ្តាប្រទេសសមាជិកអង្គការពាណិជ្ជកម្មពិភពលោកជាច្រើន ដែលធ្វើឲ្យផលិតកម្មក្នុងស្រុក និងការនាំចេញមានកំណើនគួរឲ្យកត់សម្គាល់ និងបានចរចាពង្រីកទីផ្សារសម្រាប់ទំនិញចេញក្រោមក្របខ័ណ្ឌអាស៊ាន អាស៊ានបូកជាមួយដៃគូពាណិជ្ជកម្មសំខាន់ៗ ជាពិសេសបានពង្រីកទីផ្សារនាំចេញអង្ករ ទៅកាន់សាធារណរដ្ឋប្រជាមានិតចិន សហគមន៍អឺរ៉ុប និងបង់ក្លាដេស។ល។

លោកឧបនាយករដ្ឋមន្ត្រីបានពិនិត្យឃើញថា ទោះជាយ៉ាងណាក្រសួងនៅមានចំណុចខ្វះខាតត្រូវកែលម្អ កាលានុវត្តភាព និងផែនការការងារពាណិជ្ជកម្មសំខាន់ៗមួយចំនួន ដែលត្រូវធ្វើបន្តក្នុងឆ្នាំ២០១៨ខាងមុខ ហើយដើម្បីជាធាតុចូលសម្រាប់ការងារពាណិជ្ជកម្មឆ្នាំខាងមុខ ក្រសួងគួរពិនិត្យលទ្ធភាព ធ្វើពិពិធកម្មផលិតផលនាំចេញនិងទីផ្សារថ្មីៗបន្ថែមទៀត ដើម្បីចៀសវាងគំនាប មិនសមហេតុផលពីបណ្តាប្រទេសនាំចូលមួយចំនួនមកលើកម្ពុជា ក្នុងបរិបទនយោបាយបច្ចុប្បន្ននិងអនាគតជាដើម។ល៕

ចិនវិនិយោគទឹកប្រាក់ជាង ២០០០លានដុល្លារក្នុងឆ្នាំ២០១៧ លើវិស័យសំណង់

December 29, 2017

0

ដោយ គង់ សូរិយា

ភ្នំពេញ៖ ប្រទេសចិនបានឈរចំណាត់ថ្នាក់លេខ១ជាថ្មី ក្នុងការវិនិយោគ លើវិស័យសំណង់នៅកម្ពុជាធំជាងគេបំផុតក្នុងឆ្នាំ២០១៧ ដោយមានចំនួន១២៨គម្រោង ក្នុងទឹកប្រាក់ប្រមាណជាង២ពាន់លានដុល្លារអាមេរិក។

អនុរដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់លោក ឡៅ ទិព្វសីហា បានថ្លែងឲ្យដឹងកាលពីម្សិលម៉ិញនេះថា ប្រទេសឈលើលំដាប់ទី១ ដែលវិនិយោគក្នុងវិស័យសំណង់នៅកម្ពុជាឆ្នាំ ២០១៧ ហើយឈរលេខរៀងបន្ទាប់ចិន មានដូចជាប្រទេសកូរ៉េ ជប៉ុននិងប្រទេសសិង្ហបុរី។

លោកបន្តថា ប្រភេទគំរោងដែលមានការវិនិយោគច្រើនជាងគេ ក្នុងឆ្នាំនេះ មានដូចជា ប្រភេទអាគារខ្ពស់ៗចាប់ពី៥ជាន់ឡើងទៅ សំណង់អាគារលំនៅឋាន និងលំនៅឋានប្រមូលផ្តុំបែបបុរី ដែលរីកដុះដាលច្រើនក្នុងរាជធានីភ្នំពេញ និងខេត្តព្រះសីហនុ។

លោកអនុរដ្ឋលេខាធិការបានបន្តថា “វិស័យសំណង់នៅកម្ពុជាក្នុងរយៈពេលកន្លងមកនេះ បានផ្ដល់ផលប្រយោជន៍ជាច្រើនដល់ប្រជាជនកម្ពុជា ទាំងកម្មករមានជំនាញ និងកម្មករគ្មានជំនាញ អ្នកបច្ចេកទេស វិស្វករ និងស្ថាបត្យករ ជាងទឹក ជាងភ្លើង។ លោកបន្តថា “អ្នកធ្វើការពាក់ព័ន្ឋក្នុងវិស័យនេះ ទទួលបានប្រាក់បៀវត្ស៍មួយសមរម្យ ទទួលបានចំណេះដឹងបន្ថែម ដោយសារការអនុវត្តិផ្ទាល់នៅការដ្ឋាន និងទទួលបានបច្ចេកទេសថ្មីនៃវិស័យសំណង់ ដែលប្រទេសអភិវឌ្ឍន៍យកមកអនុវត្តនៅប្រទេសកម្ពុជា ហើយវិស័យ នេះផ្ទាល់ក៏បានចូលរួមយ៉ាងសំខាន់ ក្នុងកំណើនសេដ្ឋកិច្ចជាតិប្រមាណជា៧ភាគរយជារៀងរាល់ឆ្នាំផងដែរ។

យោងតាមរបាយការណ៍របស់ក្រសួងបានបង្ហាញថា គំរោងសំណង់ដែលបានអនុម័តនាឆ្នាំនេះមាន៣០៥២គម្រោង លើផ្ទៃក្រឡាជាង១០លានម៉ែត្រការ៉េ ដោយវាកើនឡើងជាង២២ភាគរយធៀប នឹងពេលវេលាដូចគ្នាកាលពីឆ្នាំមុនដែលការិនិយោគលើវិស័យសំណង់ មានទំហំទឹកប្រាក់ត្រឹមតែជាង៥ពាន់២រយ៥០លានដុល្លាអាមេរិក និងមានត្រឹមតែ ២៤០៥គម្រោង លើផ្ទៃក្រឡាជាង១១លានម៉ែត្រការ៉េ។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងថា ការចូលមកវិនិយោគច្រើនរបស់អ្នកវិនិយោគចិន ជារឿងដែលត្រូវអបអរសាទរ ព្រោះការវិនិយោគកាន់តែច្រើន នឹងផ្តល់ផលប្រយោជន៍ដល់កម្ពុជាកាន់តែច្រើន ហើយការវិនិយោគច្រើនរបស់ចិន ដោយសារទំនាក់ទំនងដ៏ល្អរវាងរដ្ឋាភិបាលប្រទេសទាំងពីរ និងកត្តាផ្ទៃក្នុងកម្ពុជាល្អប្រសើរ ដូចជាសុខសន្តិភាព ស្ថិរភាពនយោបាយ និងច្បាប់វិនិយោគដ៏ល្អ។

លោកបន្តថា “ទោះជាយ៉ាងណាកម្ពុជាគួរធ្វើពិពិធកម្មលើការវិនិយោគ ដោយធ្វើយ៉ាងណាឲ្យមានការវិនិយោគពីប្រទេសជាច្រើន កុំពឹងផ្អែកតែប្រទេសមួយ ៗ ព្រោះបើប្រទេសនោះជួបវិបត្តិសេដ្ឋកិច្ចកម្ពុជាក៏មានបញ្ហាផងដែរ”៕

រយៈពេល១៧ឆ្នាំ ទុនវិនិយោគក្នុងវិស័យសំណង់មានទឹកប្រាក់ជិត៤០ពាន់លានដុល្លារ

December 28, 2017

0

ដោយ ដែន ចែងចាំង

ភ្នំពេញ៖ ទុនវិនិយោគក្នុងវិស័យសំណង់ និងអចលនវត្ថុមានទំហំទឹកប្រាក់ ជិត៤០ពាន់លានដុល្លារ ក្នុងរយៈពេល១៧ឆ្នាំ ដោយគិតចាប់ពីឆ្នាំ២០០០ដល់ដំណាច់ឆ្នាំ២០១៧នេះ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំ ណង់ដែលបានបង្ហាញនាថ្ងៃនេះបានឲ្យដឹងថា ក្រសួងបានអនុញ្ញាត្តិផ្តល់លិខិតសាងសង់ វិស័យសំណង់នៅទូទាំងប្រទេសចាប់ពីឆ្នាំ២០០០ ដល់ឆ្នាំ២០១៧ចំនួន៣៩៩០៣គម្រោង មានផ្ទៃក្រឡាសរុបជាង១០២លានម៉ែត្រក្រឡា និងមានទំហំទុនវិនិយោគជាង៣៧,៧៧១លានដុល្លារអាមេរិក។

របាយការណ៍ដដែលបានឲ្យដឹងទៀតថា ដោយឡែកទុនវិនិយោគក្នុងវិស័យសំណង់ ក្នុងដំណាច់ឆ្នាំ២០១៧នេះ មានទឹកប្រាក់៦៤២៨លានដុល្លារ មានគំរោងសរុបចំនួន៣០៥២គម្រោង មានផ្ទៃក្រឡាសំណង់សរុបជាង១០លានម៉ែត្រការ៉េ ខណៈឆ្នាំមុនក្រសួងបានអនុម័តគំរោង២៤០៥ មានផ្ទៃក្រឡាសំណង់ជាង១១លានម៉ែត្រការ៉េ និងទឹកប្រាក់វិនិយោគជាង៥២៤៦លានដុល្លារអាមេរិក។

បច្ចុប្បន្ននេះ វិស័យសំណង់បានផ្តល់ការងារដល់ប្រជាពលរដ្ឋកម្ពុជាចំនួនប្រមាណ២០ម៉ឺននាក់ក្នុងមួយថ្ងៃ ដោយមិនទាន់រាប់បញ្ចូលពលករជំនាញបរទេសនៅឡើយ៕

ការវិនិយោគរបស់ជប៉ុនផ្តោតលើមនុស្ស និងបែបផែនជីវិតសម័យថ្មី

December 28, 2017

0

ដោយ រ៉ាវី

ភ្នំពេញ៖ ចំណេះដឹង បទពិសោធន៍ និងការដើរតាមដំណើរវិវត្តន៍នៃសម័យកាល បានធ្វើឲ្យអ្នកវិនិយោគជប៉ុន ចាប់ផ្តើមវិនិយោគនៅកម្ពុជា ដោយផ្តោតលើបែបផែនជីវិតសម្រាប់មនុស្សសម័យថ្មី។

បើគេសម្លឹងមើលពីឥរិយាបថ និងចំណូលចិត្តក្នុងការរស់នៅរបស់ប្រជាជនកម្ពុជានាពេលបច្ចុប្បន្ន ភាគច្រើនគឺចង់រស់នៅក្នុងលំនៅដ្ឋានតាមទម្លាប់ចាស់ ដូចជាលំនៅដ្ឋានសាងសង់នៅជាប់ដី មានទីធ្លាទូលាយ មានរុក្ខជាតិ ដូចជា ដើមផ្កា ឬដំណាំនៅជុំវិញផ្ទះជាដើម ហើយមិនសូវចាប់អារម្មណ៍នឹងសំណង់ខ្ពស់ៗដូចជា អាផាតមិន និងខុនដូនោះឡើយ ។

ប៉ុន្តែផ្នត់គំនិតទាំងអស់នេះ ត្រូវបានអ្នកជំនាញផ្នែកអភិវឌ្ឍន៍ និងវិនិយោគជប៉ុន ដែលកំពុងបោះទុនវិនិយោគរហូតដល់ជាង60លានដុល្លារ ទៅលើការសាងសងអាគារខុនដូរដ៏ប្រណីតនៅកម្ពុជា Bodaiju Residencesបានអះអាងថា តាមរយៈការវិនិយោគយ៉ាងសន្ធឹកសន្ធាប់រប់ក្រុមហ៊ុនជប៉ុន មិនយូរទៀតនោះទេប្រជាជនកម្ពុជាសម័យថ្មី នឹងបោះបង់ចោលនូវផ្នត់គំនិតចាស់ ហើយងាកមកចាប់អារម្មណ៍ជាមួយនឹងជីវិតរស់នៅក្នុងខុនដូ ដែលបង្ហាញពីភាពទាន់សម័យជាក់ជាមិនខាន។

លោក TAKASHI Eguchi អគ្គនាយកក្រុមហ៊ុនជប៉ុន CREED ASIA (Cambodia) Co, Ltd ដែលជាបុត្រសម្ព័ន្ធរបស់ CREED GROUP បានថ្លែងឱ្យដឹងកាលពីពេលកន្លងទៅថ្មីៗនេះថា ក្រុមហ៊ុនរបស់លោកបានសហការចាប់ដៃគូជាមួយក្រុមហ៊ុនTRIPLE GEM តាំងពីឆ្នាំ2012 និងបានចាប់ផ្តើមវិនិយោគខុនដូ Bodaiju Residencesនៅឆ្នាំ2013 ដែលរហូតមកទល់ពេលនេះ បានវិនិយោគលើគម្រោងខុនដូ និងបុរីមហាសែនសុខ ហើយបន្ទាប់ពីបុរីនេះទទួលបានជោគជ័យ ហើយក្រុមហ៊ុនទាំង2បានចាប់ដៃគូជាមួយក្រុមហ៊ុនHoosiers ដើម្បីចាប់ផ្តើមគម្រោងលំនៅដ្ឋានថ្មីមួយឈ្មោះ ARATA ដែលស្ថិតនៅលើទំហំផ្ទៃដី12ហិកតា។

លោកបន្តថា “គម្រោងទាំង3នេះ បានចំណាយទុនវិនិយោគប្រមាណ60លានដុល្លារអាមេរិក ដើម្បីឆ្លើយតបនឹងតម្រូវការរបស់ប្រជាពលរដ្ឋ ព្រោះប្រជាពលរដ្ឋកម្ពុជាមានការពេញនិយមរស់នៅក្នុងលំនៅដ្ឋានដែលនៅជាប់នឹងដី។ លោកបន្តថា “រយៈពេល10ឆ្នាំខាងមុខ ខ្ញុំគិតថាប្រជាជនកម្ពុជានឹងផ្លាស់ប្តូរការគិត ហើយពួកគេចាប់ផ្តើមរស់នៅខុនដូ ដោយសារតម្លៃដីធ្លីនៅកណ្តាលក្រុងឡើងថ្លៃខ្ពស់។

លោក TAKASHI Eguchi បានបញ្ជាក់យ៉ាងដូច្នេះថា ប្រជាជននៅទីក្រុងបាងកកក៏ដូចគ្នា ពួកគេចង់បានលំនៅដ្ឋានជាប់នឹងដី ប៉ុន្តែដោយសារទីក្រុងរីកចម្រើន តម្លៃដីធ្លីមានការកើនឡើងខ្ពស់ ពួកគេបានចាប់ផ្តើមរស់នៅតាមខុនដូវិញ។ នៅក្នុងទីក្រុងហូជីមីញក៏ដូចគ្នា ប្រជាជនប្រាថ្នារស់នៅផ្ទះជាប់នឹងដីដូចគ្នា ប៉ុន្តែដោយសារដីមានតម្លៃថ្លៃ និងទីក្រុងកាន់តែចង្អៀត ពួកគេសម្រេចចិត្តរស់នៅតាមខុនដូ៕

តើ បុរី ប៉េង ហួត មួយណាកំពុងវិវត្តន៍ខ្លួនជាទីក្រុងរណបអន្តរជាតិ?

December 28, 2017

0

ដោយ ដួង ចន្ទ្រា

ភ្នំពេញ៖ ដំណើរវិវត្តន៍បុរី និងការពង្រីកផ្ទៃដីកាន់តែធំ ជាមួយនឹងបរិស្ថានដ៏អំណោយផលដល់ការរស់នៅ រួមនឹងហេដ្ឋារចនាសម្ព័ន្ឋចាំបាច់ដទៃទៀត បាននិងកំពុងប្រែក្លាយបុរី ប៉េង ហួត ឌីស្រាផ្លាទីណឹម នៅតាមបណ្តោយផ្លូវជាតិលេខ១ ក្លាយជាទីក្រុងរណបថ្មីមួយនាពេលអនាគត។

ដោយផ្ទៃដីប្រមាណ៤៥ភាគរយផ្តោតលើបរិស្ថានបៃតង ជាមួយនឹងការវិនិយោគសួនកម្សាន្តលំដាប់អន្តរជាតិ ដែលបោះទុនវិនិយោគ៦០លានដុល្លារនឹងបើកដំនើរការនៅចុងឆ្នាំ២០១៨ និងសាងសង់ផ្សារទំនើប PH Eco Mall លើផ្ទៃដី ប្រមាណ៦ហិកតា និងគ្រោងបោះទុនវិនិយោគតម្លៃជាង២០០លានដុល្លារ នឹងបញ្ចប់ការសាងសង់នៅឆ្នាំ២០២១ ព្រមទាំងទីលានកីឡា សាលារៀនអន្តរជាតិ និងគំរោងខុនដូនឹងធ្វើឲ្យតំបន់នេះ កាន់តែមានភាពរសរវើកនាពេលអនាគត។

ផ្លូវជាតិលេខ១ បានពង្រីកនិងបានបញ្ចប់កាលពីដើមឆ្នាំ២០១៧នេះ ជាអ្វី ដែលអ្នកជំនាញក្នុងវិស័យនេះបានសាទរ ព្រោះការពង្រីកហេដ្ឋារចនាសម្ព័ន្ឋនៅទីនេះ បានធ្វើឲ្យតម្លៃដីកើនឡើង និងគំរោងអភិវឌ្ឍន៍នានាបាននិងកំពុងពង្រីកជាបន្តបន្ទាប់។

លោកឧកញ៉ា ថៃ ម៉េងលី អគ្គនាយកនៃក្រុមហ៊ុន ប៉េង ហួត គ្រុប បានថ្លែងឲ្យដឹងកាលពីពេលថ្មីៗនេះថា គិតរហូតមកទល់ពេលនេះ បុរី ប៉េង ហួត ដែលស្ថិតនៅតាមបណ្តោយផ្លូវជាតិលេខ១ ជាទីតាំងធំជាងគេដែលមានផ្ទះចន្លោះ៧០០០ ទៅ៨០០០ខ្នងត្រូវបានលក់ចេញ។ លោកបន្តថា ទីតាំងនេះមានទំហំផ្ទៃដីជាង២០0ហិកតា ដែលអាចចាត់ទុកថា ជាទីក្រុងរណបមួយបានហើយ។

លោកបន្តថា “ក្រុមហ៊ុនបុរី ប៉េង ហូត ចង់ធ្វើអ្វីឲ្យប្លែក ធ្វើអ្វីឲ្យល្អសម្រាប់ប្រទេសជាតិ ទើបយើងកសាងបុរីនេះឡើងគិតពីបរិស្ថាន សួនបៃតង និងរចនាផ្ទះដែលស្អាតៗជូនអតិថិជនទាំងអស់។លោកបន្តថា “យើងចង់ឲ្យខ្មែរមានមោទនភាពថា ខ្មែរយើងក៏អាចសាងសង់ផ្ទះបានល្អ ដូចប្រទេសផ្សេងៗបានដែរ។

ទីតាំងបុរី ប៉េង ហួត នៅតាមបណ្តោយផ្លូវជាតិលេខ១ មានទំហំផ្ទៃដីប្រមាណ២០០ហិកតា ជាមួយនឹងហេដ្ឋារចនាសម្ព័ន្ឋដ៏សម្បូរបែប និងសមស្របជាមួយលក្ខខ័ណ្ឌបៃតងដ៏រសរវើក ហើយអ្នករស់នៅក្នុងបុរីនេះត្រូវបានគេស្គាល់ថា “ជាក្រុមអភិជន។

ទីក្រុងរណបមួយ ត្រូវមានលក្ខខ័ណ្ឌអ្វីខ្លះ? ចម្លើយគឺ ការមានសំណង់លំនៅដ្ឋាន ប្រកបដោយរបៀបរៀបរយ មានតំបន់បៃតង មជ្ឈមណ្ឌលពាណិជ្ជកម្ម និងហេដ្ឋារចនាសម្ព័ន្ឋដូចជា សួនច្បារ សាលារៀន ផ្សារទំនើបជាដើម។

លោកឧកញ៉ា នួន រិទ្ឋី អគ្គនាយកក្រុមហ៊ុន Khmer Foundation Appraisal បានថ្លែងថា បុរី ប៉េង ហួត ជោគជ័យដោយសារកត្តាសំខាន់ៗមួយចំនួន ដូចជាទី១ស្ថាបត្យកម្មនៃគម្រោងនេះមានភាពទាក់ទាញ និងមានភាពស៊ីវិល័យ ទី២ គុណភាពសំណង់ និងម៉ូតផ្ទះមានភាពល្អប្រសើរ ទីតាំងមានភាពអំណោយផល ព្រោះនៅកៀកនឹងទីក្រុង ទី៣ ហេដ្ឋារចនាសម្ពន្ឋល្អប្រសើរ និងទី៤ គុណភាពសំណង់ និងតម្លៃមានភាពសមរម្យ។

ប្រធានក្រុមប្រឹក្សាភិបាលនៃក្រុមហ៊ុន Hutton CPL លោកឧកញ៉ា ចេង ខេង បានថ្លែងថា ការរៀបចំហេដ្ឋារចនាសម្ពន្ឋ សួនច្បារ មានផ្លូវថ្មើជើង ការដាំដើមឈើធំៗ បានធ្វើឲ្យបុរីនេះ រោះនៅកៀកនឹងទីក្រុង ទី៣ ហេដ្ឋារចនាសម្ពន្ឋល្អប្រសើរ និងទី៤ គុណការដាំដើមឈើធំៗ បានធ្វើឲ្យអ្នកចូលទៅកាន់បុរីនេះ មានអារម្មណ៍ថា មិនមែននៅស្រុកខ្មែរ គឺប្រៀបដូចជានៅបរទេស។ លោកបន្តថា លក្ខខណ្ឌរស់នៅ និងបែបបទជីវិត ឬ Lifestyle ដែលបុរីនេះផ្តល់ជូន គួរបុរីផ្សេងៗយកគំរូតាម។

នៅពេលនិយាយពីបុរីនេះ អាចចាត់ទុកជាទីក្រុងរណបមួយឬនៅ? លោកឧកញ៉ា ចេង ខេង បានមានប្រសាសន៍ថា “ខ្ញុំគិតថាវាមិនទាន់ស័ក្តសមទេ ព្រោះទីក្រុងរណបមួយ ត្រូវមានហេដ្ឋារចនាសម្ពន្ឋ មជ្ឈមណ្ឌលពាណិជ្ជកម្មជាច្រើន ប៉ុន្តែនៅកម្ពុជា គេចេះតែអាចនិយាយបាន ព្រោះកម្ពុជាមិនទាន់មានការកំណត់ថាទីក្រុងរណបមួយ គួរមានលក្ខណៈសម្បត្តិអ្វីខ្លះនៅឡើយ។

លោកបន្តថា ប៉ុន្តែគុណភាពសំណង់ ភាពទាក់ទាញនៃម៉ូតផ្ទះ និងហេដ្ឋារចនាសម្ព័ន្ឋនានា បានធ្វើឲ្យម៉ូតផ្ទះបានទាក់ទាញមនុស្សច្រើនរស់នៅក្នុងបុរីនេះ។ លោកបន្តថា កាលណាមានមនុស្សទៅរស់នៅច្រើន មានន័យថាពួកគេពេញចិត្តនូវអ្វីដែលបុរីនេះផ្តល់ជូនហើយ៕

ទុនវិនិយោគក្នុងវិស័យសំណង់មានទឹកប្រាក់ជាង ៦៤០០លានដុល្លារ

December 28, 2017

0

ដោយគង់ សូរិយា

ភ្នំពេញ៖ ទុនវិនិយោគក្នុងវិស័យសំណង់ឆ្នាំនេះ នៅតែមានសញ្ញាល្អប្រសើរ ដោយទុនវិនិយោគ បានកើនឡើងដល់ជាង៦៤២៨លានអាមេរិកនៅដំណាច់ឆ្នាំនេះ កើនឡើង២២ភាគរយធៀបរយៈពេលដូចគ្នាកាលពីមុន។

យោងតាមរបាយការណ៍ នៃសន្និបាតបូកសរុបការងារឆ្នាំ២០១៧ និងលើកទិសដៅឆ្នាំ២០១៨ របស់ក្រសួងរៀបចំដែនដី នគរូបនីយកម្មនិងសំណង់នាព្រឹកថ្ងៃទី២៨ ធ្នូនេះបានឲ្យដឹងថា ទុនវិនិយោគក្នុងវិស័យនេះ នៅតែមានសញ្ញាល្អប្រសើរ ដោយសារការចូលមករបស់អ្នកវិនិយោគអន្តរជាតិនានា និងការវិនិយោគពីអ្នកវិនិយោគក្នុងស្រុក ដែលធ្វើឲ្យផ្ទៃក្រឡាសំណង់កើនដល់រាប់លានម៉ែត្រការ៉េ ជាសញ្ញាល្អប្រសើរសម្រាប់វិស័យនេះ ដែលជាវិស័យមួយដើរតួនាទីយ៉ាងសំខាន់ក្នុងសេដ្ឋកិច្ចជាតិ។

លោកជា សុផារ៉ាទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់បានថ្លែងថា នៅក្នុងនិតិកាលទី៥នេះ រាជរដ្ឋាភិបាលនៅតែសម្រេចបានស្ថិរភាពនយោបាយ កំនើនសេដ្ឋកិច្ចតាមរយៈការអនុវត្តនូវរាល់កំណែទម្រង់ទូលំទូលាយ និងស៊ីជម្រៅទាំងឡាយ ដែលកាន់តែពង្រីក បាននូវលក្ខណៈសម្បត្តិអនុគ្រោះថែមទៀត ដល់ការអភិវឌ្ឍគ្រប់វិស័យ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកគីម ហ៊ាងបានថ្លែងថា ការវិនិយោគក្នុងវិស័យសំណង់ និងអចលនវត្ថុឆ្នាំនេះ ជាការបន្តការវិនិយោគកាលពីឆ្នាំមុនភាគច្រើន ព្រោះគំរោងថ្មីៗដែលបានប្រកាសសាងសង់នៅឆ្នាំនេះ មានចំនួនតិចធៀបនឹងឆ្នាំ២០១។ លោកបន្តថា ទោះជាយ៉ាងណាលោកនៅតែមានសុទិដ្ឋិនិយមនឹងវិស័យនេះ ដែលបន្តមានភាពរីកចម្រើន ប៉ុន្តែ កម្ពុជាគួរពឹងផ្អែកប្រផពទុនពីគ្រប់ភាគី ជាជាងពឹងផ្អែកតែប្រទេសចិន។

ទោះជាយ៉ាងណាលោកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបានសម្តែងដុទិដ្ឋិនិយមជាងនេះ ដោយលោកបានថ្លែងថា ការក្សាបាននូវស្ថិរភាពនយោបាយ កំនើនសេដ្ឋកិច្ច និងស្ថិរភាពសង្គម និងច្បាប់វិនិយោគដ៏ល្អរបស់កម្ពុជា លោកគិតថាលើវិស័យនេះ នៅតែមានសញ្ញាល្អប្រសើរសម្រាប់រយៈពេលវែងបន្តទៀត៕

ក្រសួងរៀបចំដែនដីប្រាក់ចូលថវិការរដ្ឋបានជិត ៤ម៉ឺនលានរៀល

December 28, 2017

0

ដោយ វុត្ថា

ភ្នំពេញ៖ ជាមួយកំណើនវិនិយោគក្នុងវិស័យសំណង់ ក្រសួងរៀបចំដែនដីនគររូបនីយកម្ម និងសំណង់រកប្រាក់ចូលថវិការរដ្ឋ បានប្រមាណជិត៤ម៉ឺនលានរៀល ពីសេវាកម្មនានាស្ថិតក្រោមសមត្ថកិច្ចរបស់ក្រសួងនៅឆ្នាំ២០១៧នេះ។

យោងតាមរបាយការណ៍បួកសរុបការងារឆ្នាំ២០១៧ របស់ក្រសួងរៀបចំដែនដី នគររូបនីយកម្ម និងសំណង់ ដែលបានបង្ហាញក្នុងសន្និបាតបូកសរុបការងារឆ្នាំ២០១៧ និងលើកទិសដៅការងារឆ្នាំ២០១៨ នាថ្ងៃ ទី ២៨ ខែធ្នូ ឆ្នាំនេះតាមការបូកសរុបការងារ របស់ក្រសួងក្នុងឆ្នាំ២០១៧នេះ ក្រសួងបានប្រមូលចំណូលចូលថវិការជាតិ សរុបជិត៤ម៉ឺនលានរៀល ដោយគិតទាំងចំណូលពីការផ្ទេរ ទិញលក់ និងជួលអចលនទ្រព្យ។

របាយការណ៍ដដែលបានឲ្យដឹងទៀតថា ក្នុងថវិការជិត៤សែនលានរៀលដែលប្រមូលបានដោយក្រសួងរៀបចំដែនដី នគររូបនីយកម្ម និងសំណង់ឆ្នាំ ២០១៧នេះ ទទួលបានពីសេវាកម្មសុរិយោដី ចំនួនជាង៤ពាន់លានរៀល។ ចំណូលពីសេវាកម្មសំណង់មានចំនួនជាង៤ពាន់លានរៀល។ ចំណូលពីការជួលទីតាំងរោងចក្រ សហគ្រាសមានចំនួនជិត៣រយលានរៀល និងចំណូលបីពន្ធដាលើការផ្ទេរអចលនទ្រព្យ ដែលប្រមូលដោយអង្គភាពពន្ធដារទទួលបានជាង៣សែនលានរៀល។

ទេសរដ្ឋមន្ត្រីជា សុផារ៉ា រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់បានលើកឡើងថា លទ្ធផលការងារឆ្នាំ២០១៧របស់ក្រសួងសម្រេចបានយ៉ាងប្រសើរ ទាំងក្នុងវិស័យដីធ្លី ការរៀបចំដែនដីនគររូបនីយកម្ម ការងារគ្រប់គ្រងនិងអភិវឌ្ឍតំបន់ឆ្នេរ វិស័យសំណង់ និងការងារលំនៅឋានគោលនយោបាយផ្ដល់ដីសប្បទាន និងការសាងសង់ផ្ទះជូនយោធិន និងនគរបាលនៅតាមព្រំដែនជាដើម៕

តោះទៅទស្សនាអគារ 30 St Mary Ax ស្ថាបត្យកម្មដល់កំពូលនៃប្រទេសអង់គ្លេស

December 28, 2017

0

ដោយ វុត្ថា

ភ្នំពេញ៖ ការរីកចម្រើនផ្នែកចំណេះដឹង បានធ្វើឲ្យស្ថាបត្យកម្មនៅលើពិភពលោកកាន់តែរសរវើក ដោយស្ថាបត្យករនានាបានច្នៃប្រឌិតនូវសំណង់អគារ ឬធ្វើវត្ថុប្រើប្រាស់ផ្សេងៗដើម្បីទុកជាមរតកសម្រាប់មនុស្សជាតិ។

ជាក់ស្តែងប្រទេសអង់គ្លេស គឺជាប្រទេសមហាអំណាចពិភពលោកក្នុងចំណោមមហាអំណាចនានា ក៏បានសាងអគខ្ពស់ៗ និងចម្លែកៗសម្រាប់បង្អួតនូវមោទនភាពជាតិរបស់ពួកគេផងដែរ។

គេហទំព័រ propertyarea.asia នឹងបង្ហាញជូននូវ អគារ 30 St Mary Ax ដ៏ចម្លែករបស់ប្រទេសអង់គ្លេសមួយស្ថិតនៅក្នុងទីក្រុងឡុងដ៍។

អគារ 30 St Mary Ax ត្រូវបានគេស្គាល់ជាទូទៅថាជា អគារ Gherkin និង Swiss Re Building) គឺជាអាគារហិរញ្ញវត្ថហិរញ្ញវត្ថុដ៏ខ្ពស់មួយ ដែលស្ថិតនៅក្នុងទីក្រុងឡុងដ៍ប្រទេសអង់គ្លេស។អគារដែលមានរូបរាងដ៏ចំលែក ដែលមានសណ្ឋានដូចគ្រាប់កាំភ្លើងនេះ ត្រូវបានគេសាសង់បញ្ចប់នៅខែធ្នូឆ្នាំ២០០៣ និងបានបើកអោយដំណើរការជាផ្លូវការនៅខែមេសាឆ្នាំ២០០៤។

អគារដែលមានកម្ពស់៤១ជាន់ ស្មើនឹងកម្ពស់180ម៉ែត្រនេះ និងឈរនៅលើទីតាំងអតីតផ្សារ Baltic Exchange និងសភាដឹកជញ្ជូន (Chamber of Shipping) ដែលត្រូវបានបំផ្លិចបំផ្លាញកាលពីអំឡុងឆ្នាំ១៩៩២ ដោយសារការផ្ទុះគ្រាប់បែកនៅតាមបណ្តោយ St Mary Ax។ ដូច្នេះហើយបានគេដាក់ឈ្មោះអាគារនេះថា30 St Mary Ax។

បន្ទាប់ពីគម្រោងសាងសង់អគារ Millennium Tower កម្ពស់៩២ ជាន់ត្រូវបានគេដកចេញនោះ គេក៏បានរចនាអគារ 30St Mary Ax ម្តងវិញនៅឆ្នាំ២០០១ ដោយលោក Skanska និងរចនាដោយលោក Norman Foster និងក្រុមហ៊ុន Arup Group។

អាគារនេះបានក្លាយទៅជាលក្ខណៈពិសេស របស់ទីក្រុងឡុងដ៍ ហើយក៏ជាគំរូមួយ ក្នុងចំណោមគំរូអគារដ៏ល្បីល្បាញបំផុតនៃទីក្រុងមួយនេះ។ ការសាងសង់អាគារ បានប្រើប្រាស់បច្ចេកវិទ្យាទំនើប សម្រាប់ទីតាំងអាគារស្ថិតនៅចំក ណ្តាលតំបន់នៃតំបន់វាលទំនាប ដែលមានសំណង់អាគារប្រវត្ដិសាស្ដ្រជាច្រើន និង ផ្លូវថ្នល់តូចធំ។

រចនាសម្ព័ន្ធរបស់អគារមានហុំព័ទ្ធទៅដោយស៊ុមដែក ដែលមានរាងមូល និងផ្នែកខាងមុខមានកញ្ចក់ជាបន្ទះរាងដូចគ្រាប់ពេជ្រ។ លំនាំឆ្នូតដែលអាចមើលឃើញនៅខាងក្រៅនៃអគារ គឺជាប្រព័ន្ធសន្សំសំចៃថាមពលរបស់អាគារ ដែលអនុញ្ញាតឱ្យខ្យល់ហូរតាមរន្ធនោះបានយ៉ាងល្អ។

នៅលើកំពូលប៉មនៃអគារនេះ ភ្ញៀវទេសចរអាចទស្សនានូវទេសភាពទីក្រុងដ៏អស្ចារ្យចេញពីរនាំងកញ្ចក់។ តែយ៉ាងណាជាអកុសលអាគារមិនបើកអោយសាធារណជនចូលទៅមើលនោះទេ។

រចនាបទប្លែកៗ និងប្រសិទ្ធភាពថាមពលរបស់អគារនេះ បានឈ្នះពានរង្វាន់ជាច្រើនរបស់ Gherkin រួមមានពានរង្វាន់ Stirling ពានរង្វាន់តំបន់ឡុងដ៍ (London Region Award) និងពានរង្វាន់អគារកប់ពពក Emporis (Emporis Skyscraper Award)៕