ដោយ ដែន ចែងចាំង

ភ្នំពេញ៖ ដើម្បីឆ្លើយតបតាមតម្រូវការចាំចាច់ នៃការរីកចម្រើនសេដ្ឋកិច្ចជាតិ ក្រសួងនឹងចាប់ផ្តើមសាងសង់មន្ទីរពិសោធន៍ខ្នាតធំលើកតំបូង ដើម្បីជួយឲ្យវិស័យឧស្សាហកម្មនៅកម្ពុជា ឈានឆ្ពោះទៅមុខប្រកបដោ​យប្រសិទ្ធភាព។

លោកទេសរដ្ឋមន្រ្តី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានលើកឡើងកាលពីថ្ងៃទី ៣ ខែកក្កដា ឆ្នាំ២០១៨កន្លងមកថា ក្រសួងឧស្សាហកម្ម និងសិប្បកម្មបានជួបប្រទះការខ្វះខាត ឧបករណ៍ពិសោធន៍ជាច្រើន ក្នុងការបម្រើសេវាលើផ្នែកឧស្សា​ហកម្ម ជូនសហគ្រាស បណ្តារោងចក្រឧស្សាហកម្ម និងសិប្បកម្មនានាជាដើម។ លោកបន្តថា កន្លងមកមានប្រទេសជាដៃគូរ មានបំណងចង់ជួយផ្តល់ឧបករណ៍ពិសោធន៍ជាច្រើន ប៉ុន្តែមន្ទីរពិសោធន៍ដែលកំពុងដំណើរបច្ចុប្បន្នមានទំហំតូច និងមិនអាចដាក់ឧបករណ៍បានច្រើន ដូច្នេះការចាប់ផ្តើមសាងសង់មន្ទីរពិសោធន៍នៅទីតាំងនេះ។

លោកបន្តថា​ “គំរោងបង្កើតមន្ទីរពិសោធន៍ខ្នាតធំ ដើម្បីឆ្លើយតបតាមតម្រូវការចាំចាច់ នៃការរីកចម្រើនសេដ្ឋកិច្ចជាតិយើង និងជាការចាំបាច់របស់សហគ្រាស ក្រុមហ៊ុន ឧស្សាហកម្ម និងសិប្បកម្ម ជាពិសេសដើម្បីជួយឲ្យវិស័យទាំងនោះ ឈានឆ្ពោះទៅមុខប្រកបដោយប្រសិទ្ធភាព”។

តាមព៌តមានដែលpropertyarea.asiaទទួលបានឲ្យដឹងថា គម្រោងសាងសង់មន្ទីរពិសោធន៍ នឹងចាប់ផ្តើមសាងសង់ក្នុងរយៈពេលឆាប់ៗខាងមុខនេះ ដោយគ្រោងសាងសង់អាគារមានទំហំ២០ គុណ នឹង៣០ម៉ែត្រ កម្ពស់៧ជាន់ នៅលើផ្ទៃដីជាង៦ពាន់ម៉ែត្រការរ៉េ។ ក្រៅពីការសាងសង់អាគារក្រសួងឧស្សាហកម្មនិងសិប្បកម្ម ក៏មានគម្រោងសាងសង់អាងប្រព្រឹត្តកម្មទឹកស្អាត សួនច្បារ និងរួមបញ្ចូលចំណតរថយន្តផ្សេងៗផងដែរ៕

ដោយគង់ សូរិយា

ភ្នំពេញ៖ អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម បានអំពាវនាវដល់សាធារណៈជនសូមកុំទិញនិងទទួលទានផលិ​តផល Kellogg’s HoneySmack cereal ដោយក្រុមហ៊ុន Kellogg Company របស់សហរដ្ឋអាមេរិកក្រោយក្រុមហ៊ុនរកឃើញថាមានសារជាតិពុលនិងមេរោគចម្លង។

យោងតាមសេចក្តីជូនដំណឹងរបស់អគ្គនាយកដ្ឋានកម្ពុជា ត្រួតពិនិត្យទំនិញនីហរ័ណ អាហរ័ណ និងបង្រ្កាបការក្លែងបន្លំ (កាំកុងត្រូល) ឲ្យដឹងនៅរសៀលថ្ងៃទី៣ ខែកក្កដា ឆ្នាំ២០១៨នេះ បានធ្វើការជម្រាបជូនដល់សាធារណៈ ពាណិជ្ជករ នាំចូល អាជីវករលក់ដុំ លក់រាយជ្រាបថា រដ្ឋបាលឱសថ និងម្ហូបអាហារសហរដ្ឋអាមេរិក បានជូនដំណឹងអំពីការប្រមូលត្រឡប់មកវិញ ពីទីផ្សារសហរដ្ឋអាមេរិកដោយស្ម័គ្រចិត្ត នូវផលិតផល ខេឡូក ហាន់នី ម៉្មេកហ្សឺរៀល បន្ទាប់ពីរដ្ឋបាលឱសថនិងម្ហូបអាហារ រួមជាមួយមជ្ឈមណ្ឌលត្រួតពិនិត្យនិងការពារជម្ងឺឆ្លងសហរដ្ឋអាមេរិក បានស្រាវជ្រាវរកឃើញប្រភពនៃការពុលម្ហូបអាហារបណ្តាលមកពីការទទួល ទានផលិតផលខាងលើដែលចែកចាយដោយក្រុមហ៊ុនអាមេរិក មានសក្តានុពលចម្លងចូលបាក់តេរីសាម៉ុនណេឡា (Salmonella)។

ការទទួលទានអាហារ ដែលមានការចម្លងចូលបាក់តេរីនេះ បណ្តាលឲ្យមានជម្ងឺប្រព័ន្ធរំលាយអាហារ គ្រុនពោះវៀន។ល។ ស្រ្តីមានផ្ទៃពោះ ទារក កុមារតូច និងមនុស្សចាស់ គឺជាជនរងគ្រោះ។

សេចក្តីជូនដំណឹងដដែលបានបន្តថា ជុំវិញបញ្ហានេះអគ្គនាយកដ្ឋានកាំកុងត្រូលបាននឹងកំពុងចាត់វិធានការ រួមមាន រាំងខ្ទប់មិនឲ្យនាំចូលផលិតផលដូចបានអធិប្បាយ, ផ្តល់ព័តមានដល់ក្រុមហ៊ុននាំចូលដល់អាជីវករលក់ដុំ និងរាយក្នុងករណីមាននាំចូលនិងមានចរាចរលើទីផ្សារ និងត្រួតពិនិត្យនៅតាមទីផ្សារធំ តូច ផ្សារទំនើប ដើម្បីសម្របសម្រួ​ល និងមានវិធានការតាមនីតិវិធីប្រសិនបើមានការដាក់តាំងលក់។

សេចក្តីជូនដំណឹងដដែលបានបន្តព្រមានថា “ដើម្បីទប់ស្កាត់គ្រោះថ្នាក់ ដែលអាចប៉ះពាល់ដល់សុខភាពជាយថា​ហេតុ អគ្គនាយ​កដ្ឋានកាំកុងត្រូល បានអំពាវនាវដល់សាធារណៈជន សូមកុំទិញផលិតផលដូចជម្រាបជូនខាងលើ និងសូមជួយសហការផ្តល់ព័តមាន ដល់មន្រ្តីមានសមត្ថកិច្ចក្នុងករណីបងប្អូនប្រជាពលរដ្ឋបានជួបប្រទះ”៕

ដោយ គង់ សូរិយា

       ភ្នំពេញ៖ តើអ្នកបានត្រៀមខ្លួនសម្រាប់ការធ្វើដំណើរ តាមរថភ្លើងល្បឿនលឿនពីរាជធានីភ្នំពេញទៅកាន់ខេត្តសៀមរាប និងពីខេត្តសៀមរាបទៅកាន់ក្រុងប៉ោយប៉ែតឬ​នៅ? ខណៈបច្ចុប្បន្នក្រុមហ៊ុនចិនបាន និងកំពុងសិក្សាលទ្ឋភាពវិនិយោគសាងសង់ផ្លូវ​រថភ្លើងល្បឿនលឿនទៅមកាន់គោលដៅទាំងនេះ។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ា ស៊ីមសូរិយាបានមាន​ប្រសាសន៍ឲ្យដឹងតាមទូរស័ព្ទកាលពីថ្ងៃទី២ កក្កដា កន្លងមកថា នៅក្នុងផែនការមេរបស់​ទីភ្នាក់ងារសហប្រតិបត្តិការអន្តរជាតិនៃប្រទេសកូរ៉េ (KOICA) បានសិក្សាពីគម្រោងនេះរួច​ហើយ ហើយក្រុមហ៊ុនចិនបាននិងកំពុងសិក្សាលទ្ឋភាព ដើម្បីវិនិយោគសាងសង់ផ្លូវរថភ្លើងល្បឿនលឿនទៅកាន់ខេត្តសៀមរាប និងក្រុងប៉ោយប៉ែតផងដែរ។

លោកបន្តថា “ទោះជាយ៉ាងណាខ្ញុំមិនទាន់អាចបញ្ជាក់បានថា ការសិក្សាបញ្ចប់របស់ក្រុមហ៊ុនចិនទាំងនោះនឹងបញ្ចប់នៅពេលណាទេ ហើយការសាងសង់នឹងចាប់ផ្តើម​នៅពេលណាជាក់លាក់នៅឡើយទេ”។លោកបន្តថា “ប្រទេសរបស់យើងបានឈានដល់​ដំណាក់កាលថ្មីមួយ ក្នុងការអភិវឌ្ឍសេដ្ឋកិច្ចសង្គមរបស់ខ្លួន តាមរយៈការសាងសង់ហេ ដ្ឋារចនាសម្ព័ន្ឋថែមទៀត ដើម្បីជម្រុញកំនើនសេដ្ឋកិច្ចជាតិ”។

លោកសូរិយាបានបន្តថា បើចង់អភិវឌ្ឍន៍សេដ្ឋកិច្ចរបស់យើងទៅកាន់លំដាប់ថ្មី កម្ពុជាត្រូវការវិនិយោគលើហេដ្ឋារចនាសម្ព័ន្ឋទាំងនោះ ប៉ុន្តែវាត្រូវការការវិនិយោគលើទឹក​ប្រាក់ដ៏ច្រើន ដើម្បីដំណើរការហេដ្ឋារចនាសម្ព័ន្ឋចាំបាច់ ក្នុងការធ្វើសមាហរណកម្មផ្ទៃក្នុងប្រទេស និងជាមួយបណ្តាប្រទេសក្នុងតំបន់។

លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្មបានថ្លែងថា ការវិនិយោគ​លើ​​បណ្តាញផ្លូវដែក ឬហេដ្ឋារចនាសម្ព័ន្ឋដទៃទៀត ពិតជារឿងប្រសើរ ដែលជួយសម្រួល​ចរាចរន៍ ការតភ្ជាប់ការដឹកជញ្ជូន ការកាត់បន្ថយពេលវេលាក្នុងការធ្វើដំណើរ ដែលជាការ​ផ្តល់ជម្រើសថ្មីដល់ប្រជាពលរដ្ឋក្នុងការធ្វើដំណើរ ក៏ដូចជាចូលរួមកាត់បន្ថយអត្រាគ្រោះថ្នាក់ចរាចរណ៍ផងដែរ៕

ដោយ វុត្ថា

ភ្នំពេញ៖ ជាថ្មីម្តងទៀតមានការអះអាងថា ការតភ្ជាប់វិស័យដឹកជញ្ជូនផ្លូវអាកាសពី​ឥណ្ឌូនេស៊ីមកកាន់កម្ពុជានឹងចាប់ផ្តើមនៅឆ្នាំ២០១៩ខាងមុខនេះ ដែលនឹងជួយពង្រីកទំហំពាណិជ្ជកម្ម និងទេសចរណ៍រវាងប្រទេសទាំងពីរ។

លោកថោង ខុនរដ្ឋមន្រ្តីក្រសួងទេសចរណ៍បានមានប្រសាសន៍ឲ្យដឹងបន្ទាប់ពីជួប​ជាមួយលោក Sudrirman Haseng ឯកអគ្គរដ្ឋទូតឥណ្ឌូនេស៊ីថ្មីប្រចាំនៅកម្ពុជា នៅរសៀលថ្ងៃទី២ ខែកក្កដា ឆ្នាំ២០១៨នេះកន្លងមកថា ភាគីទាំងពីរបានពិភាក្សាគ្នា ជំរុញ  ឲ្យមានការហោះហើរត្រង់រវាងកម្ពុជា និងឥណ្ឌូនេស៊ី ហើយយើងអាចមានការហោះហើរត្រង់នៅក្នុងឆ្នាំ២០១៩ ដោយក្រុមហ៊ុនអាកាសចរណ៍ឡាយអិនអ៊ែរ។

ទន្ទឹមនឹងការជំរុញឲ្យមានការហោះហើរត្រង់នៅឆ្នាំ២០១៩នេះ កម្ពុជានិងឥណ្ឌូនេស៊ីក៏បានពិភាក្សាគ្នា ដើម្បីរៀបចំពិធីបុណ្យប្រពៃណីបែបពុទ្ធសាសនាផងដែរ។

លោកថោង ខុនបានបន្ថែមថា ការរៀបចំបុណ្យបែបប្រពៃណីពុទ្ធសាសនា យើងធ្លាប់បានរៀបចំនៅសៀមរាប កាលពីឆ្នាំ២០១៧ ហើយខាងឥណ្ឌូនេស៊ីប្រាប់ថា នឹងយកចំណុចនេះ ទៅពិភាក្សាជាមួយក្រសួងទេសចរណ៍ ហើយចំពោះកិច្ចសហប្រតិបត្តិការរវាងការតភ្ជាប់ដោយផ្ទាល់ពីកម្ពុជាទៅឥណ្ឌូនេស៉ី អាចនឹងមានការហោះហើរត្រង់នៅឆ្នាំ២០១៩ ដែលជាឆ្នាំប្រារព្ធខួបលើកទី៦០នៃទំនាក់ទំនងការទូតកម្ពុជា និងឥណ្ឌូនេស៊ី។

អត្ថប្រយោជន៍ដែលទទួលបានពីការរៀបចំបុណ្យប្រពៃណីបែបពុទ្ធសាសនានេះរួមមាន ទី១ បានផ្សព្វផ្សាយគោលដៅទេសចរណ៍កម្ពុជា ទី២ បានជំរុញឲ្យគេស្គាល់យើងបានកាន់តែច្រើន និងទី៣បានជំរុញឲ្យប្រជាពលរដ្ឋទាំងអស់ កាន់តែមានជំនឿលើព្រះពុទ្ធសាសនា ប្រព្រឹត្តទង្វើមួយដែលល្អ។

លោកស៊ិន ចាន់សិរីវុត្ថាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបាន​ថ្លែងថា ក្រុមហ៊ុន Lion Airline របស់ឥណ្ឌូនេស៊ី ពិតជាបានសិក្សាពីលទ្ឋភាពហោះហើរត្រង់មកកម្ពុជា តាមរយៈការហោះហើរត្រង់ពីឥណ្ឌូនេស៊ីមកកាន់កម្ពុជា ឬបង្កើតក្រុមហ៊ុនអាកាសចរណ៍ថ្មីមួយនៅកម្ពុជា ដើម្បីប្រតិបត្តិការហោះហើរ ប៉ុន្តែលទ្ឋផលនៃការសិក្សានិងការបញ្ជាក់ពីកាលបរិច្ឆេតហោះហើរនាពេលណា លោកមិនទាន់អាចបញ្ជាក់បាននៅឡើយទេ៕