ក្រុមហ៊ុនយក្សចិនចំនួន៣ គ្រោងបោះទុនរាប់ពាន់លានដុល្លារដើម្បីផ្លាស់ប្តូរមុខមាត់កម្ពុជា
ដោយ៖ ដួង ចន្ទ្រា
ភ្នំពេញ៖ ក្រុមហ៊ុនយក្សចំនួន៣គ្រោងវិនិយោគ ទឹកប្រាក់រាប់ពាន់លានដុល្លារ ក្នុងវិស័យអចលនទ្រព្យនិងទេសចរណ៍នៅកម្ពុជា ដើម្បីជំរុញកំនើនសេដ្ឋកិច្ចកម្ពុជា ស្របពេលទំនាក់ទំនងរបស់រដ្ឋាភិបាលប្រទេសទាំងពីរកាន់តែស្អិតរមួត។
ក្រុមហ៊ុនយក្សចំនួនបីនោះរួមមាន Greenland Holding Group, Henan transport Investment Group និងក្រុមហ៊ុនសាជីវកម្មអភិវឌ្ឍន៍សំណង់ចិនប្រចាំតំបន់អាស៊ីប៉ាស៊ីងហ្វិកខាងត្បូង។
អគ្គនាយកក្រុមហ៊ុន GREENLAND Holding Group លោកហ្សាង យូលាងដែលបាននិងកំពុងវិនិយោគនៅកម្ពុជា ក្នុងទឹកប្រាក់៤០០០លានដុល្លារ និងគ្រោងបោះទុន៧០០០លានដុល្លារនៅកម្ពុជាបន្ថែមទៀត បានថ្លែងក្នុងជំនួបជាមួយសម្តេចតេជោហ៊ុន សែននាយករដ្ឋមន្ត្រីកម្ពុជា ក្នុងដំណើរទស្សនកិច្ចរបស់ប្រមុខរដ្ឋាភិបាលកាលពីដើមសប្តាហ៍នេះថា លោកមានគំរោងវិនិយោគសាងសង់អាគារខ្ពស់ៗនៅទីក្រុងរណបកោះពេជ្រ កំពង់ផែទេសចរណ៍អន្តរជាតិ រថភ្លើងអាកាស និងគំរោងទេសចរណ៍នៅកម្ពុជា ដោយសារកម្ពុជាកំពុងមានការរីកចំរើនយ៉ាងឆាប់រហ័ស កំនើនទេសចរណ៍អន្តរជាតិ និងសន្តិភាព ស្ថិរភាពនយោបាយដែលកម្ពុជាកំពុងសម្រេចបាន។
ក្រុមហ៊ុនទាំងនេះនឹងរៀបចំ ចុះហត្ថលេខាលើកិច្ចព្រមព្រៀងនានាក្នុងដំនើរទស្សនកិច្ចរបស់លោកលី កឺឈាងនាយករដ្ឋមន្ត្រីចិន ដែលនឹងអញ្ជើញមកទស្សនកិច្ចនិងចូលរួមកិច្ចប្រជុំមេគង្គ ឡានឆាងនាខែមករា ឆ្នាំ២០១៨ខាងមុខនេះ។
ក្នុងជំនួបជាមួយរដ្ឋមន្ត្រីក្រសួងទេសចរណ៍ លោកថោង ខុន លោក Gu Shan តំណាងក្រុមហ៊ុនសាជីវកម្មអភិវឌ្ឍន៍សំណង់ចិន ប្រចាំតំបន់អាស៊ីប៉ាស៊ី ហ្វិកខាងត្បូងបានថ្លែងឲ្យដឹងថា កំនើនទេសចរណ៍អន្តរជាតិ កំនើនសេដ្ឋកិច្ច និងភាពជាដៃគូគ្រប់ជ្រុងជ្រោយរវាងរដ្ឋាភិបាលកម្ពុជា ចិនលោកគ្រោងនឹងវិនិយោគលើវុស័យហេដ្ឋារចនាសម្ព័ន្ឋ និងវិស័យបដិសណ្ឋារកិច្ចទេសចរណ៍នៅកម្ពុជា។
អ្វីជាតម្រូវការរបស់កម្ពុជា លោកថោង ខុនបានមានប្រសាសន៍ថា កម្ពុជាកំ ពុងមានតម្រូវការប្រព័ន្ឋហេដ្ឋារចនាសម្ព័ន្ឋ តភ្ជាប់ទៅកាន់គោលដៅទេសចរណ៍នានា ពិសេសតំបន់ឆ្នេរកំពុងសាងសង់ព្រលានយន្តហោះអន្តរជាតិថ្មីៗ ព្រោះកម្ពុជាកំពុងទទួលបានកំនើនទេសចរណ៍អន្តរជាតិខ្ពស់ និងរំពឹងទទួលបានភ្ញៀវទេសចរណ៍អន្តរជាតិ៧លាននាក់នៅឆ្នាំ២០២។
បច្ចុប្បន្នក្រុមហ៊ុនចិនបានជាប់ចំណាត់ថ្នាក់លេខ១ ក្នុងការវិនិយោគលើវិស័យសំណង់ និងអចលនទ្រព្យនៅកម្ពុជា។
លោកគីម ហ៊ាងប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងថា ប្រទេសណាក៏ត្រូវការអ្នកវិនិយោគដែរ ហើយពីមុនសហរដ្ឋអាមេរិក និងអឺរ៉ុបជាអ្នកចេញមកវិនិយោគនៅបរទេស ប៉ុន្តែបច្ចុប្បន្នពួកគេក៏កំពុងទាក់ទាញអ្នកវិនិយោគចិនដែរ ហេតុនេះចិនមកវិនិយោគនៅកម្ពុជាច្រើនកាលណាកាន់តែល្អ ព្រោះវានឹងជួយជំរុញកំនើនសេដ្ឋកិច្ចនិងសង្គមកម្ពុជា។
លោកបន្តថា “មិនមែនចិនផ្លាស់ប្តូរកម្ពុជាទេ តែកម្ពុជានឹងដើរក្នុងលក្ខខ័ណ្ឌសេដ្ឋកិច្ច និងនយោបាយ ព្រោះចិនជាអ្នកធ្វើឲ្យសេដ្ឋកិច្ចកម្ពុជាមានលំនឹង”៕
ដំណឹងល្អៈ រថភ្លើងពីកណ្តាលក្រុងទៅព្រលានយន្តហោះនៅឆ្នាំក្រោយ
ដោយ៖ ដែន ចែងចាំង
ភ្នំពេញ៖ ដំណឹងល្អមួយបានមកដល់ទៀតហើយ សម្រាប់អ្នកធ្វើដំណើរទៅកាន់ព្រលានយន្តហោះអន្តរជាតិភ្នំពេញ មិនចាំបាច់បារម្ភពីការកកស្ទះចរាចរណ៍ទេ ដោយក្រុមហ៊ុន Royal Railway នឹងដាក់ដំណើរការថយថភ្លើងធុនស្រាលពីស្ថានីយ៍រថភ្លើងកណ្តាលក្រុង ទៅកាន់ព្រលានយន្តហោះអន្តរជាតិភ្នំពេញនាដើមឆ្នាំ២០១៨ខាងមុខនេះ។
ប្រធានផ្នែកពាណិជ្ជកម្មនៃក្រុមហ៊ុន Royal Railway បានមានប្រសាសន៍ឲ្យដឹងកាលពីព្រលប់ថ្ងៃម្សិលម៉ិញនេះថា រថភ្លើងធុនស្រាលនេះ នឹងបើកដំណើរការដឹកភ្ញៀវក្នុងខែមេសាឆ្នាំ២០១៨ ដោយដឹកអ្នកដំណើរទៅមករវាងព្រលានយន្តហោះភ្នំពេញអន្តរជាតិ មកកាន់ស្ថានីយ៍រថភ្លើងភ្នំពេញ។
លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្មបានថ្លែងថា ការមានបណ្តាញរថភ្លើងថ្មីបែបនេះ នឹងជួយលើកកំពស់សោភ័ណភាពទីក្រុង ជួយសម្រួលដល់ការធ្វើដំណើរ កាត់បន្ថយការកកស្ទះចរាចរណ៍ និងផ្តល់ជម្រើសកាន់តែច្រើនដល់អ្នកធ្វើដំណើរនៅក្នុងទីក្រុង ដែលបញ្ហាកកស្ទះចរាចរណ៍កំពុងក្លាយជាបញ្ហាប្រឈមថ្មីមួយសម្រាប់ទីក្រុងនេះ។
លោកបន្តថា “ការមានបណ្តាញដឹកជញ្ជូនច្រើន មិនត្រឹមតែផ្តល់ជម្រើសច្រើនដល់ប្រជាពលរដ្ឋទេ ប៉ុន្តែជាការរំលែកនូវការធ្វើដំណើរទៅកាន់ជម្រើសថ្មី មិនឲ្យមានការប្រមូលផ្តុំតែមួយកន្លែង ដែលបង្កផលប៉ះពាល់បរិស្ថានផង និងកាត់បន្ថយការកកស្ទះចរាចរណ៍ផង។
អ្នកឧកញ៉ាគិត ម៉េងប្រធានសភាពាណិជ្ជកម្មកម្ពុជា និងជាប្រធានអគ្គនាយកនៃក្រុមហ៊ុន Royal Group តែងតែជាអ្នកវិនិយោគនាំមុខគេ ក្នុងការវិនិយោគលើ វិស័យថ្មីៗដែលតែងតែស្ថិតក្នុងយុទ្ឋសាស្ត្រ នៃការធ្វើជំនួញរបស់លោកនៅកម្ពុជា៕
ក្រុមហ៊ុនយក្សSCGសម្រេចបានកំណើននូវការលក់សម្ភារៈសំណង់នៅកម្ពុជា
ដោយដែន ចែងចាំង
ភ្នំពេញ ក្រុមហ៊ុនSCGជាក្រុមហ៊ុនលំដាប់យក្សមកពីប្រទេសថៃ បានសម្រេចជោគជ័យក្នុងការចែកចាយសម្ភារៈសំណង់របស់ខ្លួននៅកម្ពុជា ដោយសម្រេចបានកំនើនប្រមាណ៧ភាគរយនៅឆ្នាំនេះ និងបានពង្រីកយុទ្ឋសាស្រ្តទីផ្សារនៅឆ្នាំ២០១៨បន្ថែមទៀត។
លោកParamate Nisagornsen អនុប្រធានផ្នែកស៊ីម៉ងត៍ និងសម្ភារៈសំណង់នៃក្រុមហ៊ុនSCGបានឲ្យដឹងកាលពីម្សិលម៉ិញនេះថា ទីផ្សារស៊ីម៉ងត៍នៅកម្ពុជាបានកើនឡើងជិត៧ភាគរយ នៅឆ្នាំ២០១៧នេះ។ ក្នុងនាមជាក្រុមហ៊ុននាំមុខគេនៅក្នុងទីផ្សារ អាជីវកម្មរបស់អេសស៊ីជីនៅកម្ពុជាត្រូវបានរំពឹងថា នឹងបន្តមានកំណើនបន្ថែមទៀតនៅឆ្នាំ២០១៨ ថ្វីដ្បិតតែការប្រកួតប្រជែងលើទីផ្សារអាចមានការកើនឡើងក្តី។
លោកបន្តថា “ផែនការរបស់ក្រុមហ៊ុនអេសស៊ីជី សម្រាប់ឆ្នាំ២០១៨ត្រូវបានពង្រឹងបន្ថែមលើស ពីបណ្ដាឆ្នាំមុនៗ ហើយក្រុមហ៊ុនអេសស៊ីជី មានការប្ដេជ្ញាចិត្តរួមចំណែកដល់កំណើនសេដ្ឋកិច្ចរបស់ប្រទេសកម្ពុជា តាមរយៈការជួយគាំទ្រដល់វិស័យសំណង់”។
លោកAree Chavalitcheewingul ប្រធានផ្នែកស៊ីម៉ងត៍និងសម្ភារៈសំណង់នក្រុមហ៊ុន SCG មានប្រសាសន៍ឲ្យដឹងផងដែរថា តំណាងចែកចាយគឺជាស្នូលនៃភាពជោគជ័យរបស់ក្រុមហ៊ុន អេសស៊ីជីនៅក្នុងប្រទេសកម្ពុជា ហើយដើម្បីជួយពង្រឹងដល់សមត្ថភាពប្រកួតប្រជែង របស់តំណាងចែកចាយ ក្រុមហ៊ុន SCG បានបង្កើតដោយជោគជ័យនូវទម្រង់ចែកចាយជា“តំណាងទទួលសិទ្ធិចែកចាយរបស់ SCG’ និងបង្កើតប្រព័ន្ធព័ត៌មានវិទ្យា ‘បញ្ជាទិញតាមអេឡិកត្រូនិក’ ដើម្បីសម្រួលដល់អាជីវកម្ម។
លោកបានបន្ថែមទៀតថា “ផលិតផលសម្ភារៈសំណង់របស់ក្រុមហ៊ុនអេសស៊ីជី រាប់បញ្ចូលទាំងស៊ីម៉ងត៍ ខេ-ស៊ីមេនផង គឺមានឈ្មោះល្បីល្បាញ និងមានការទទួលស្គាល់ទូទាំងប្រទេសកម្ពុជា។ នេះក៏ដោយសារតែគុណភាពរបស់ផលិតផលក្រុមហ៊ុន ក៏ដូចជាឧត្តមភាពផ្នែកប្រកួតប្រជែង ដែលទទួលបានតាមរយៈកិច្ចខិតខំប្រឹងប្រែងផ្នែកទីផ្សារ”៕
GMAC ការប្រែប្រួលនយោបាយមិនគួរប៉ះពាល់មនុស្ស២,៧លាននាក់
ដោយ៖ គង់ សូរិយា
ភ្នំពេញ៖ សមាគមរោងចក្រកាត់ដេរកម្ពុជា (GMAC) បានអះអាងថា ស្ថានភា ពនយោបាយបច្ចុប្បន្ន មិនគួរត្រូវបកស្រាយឲ្យក្លាយ ទៅជាសកម្មភាពណាមួយ ដែលមានផលប៉ះពាល់អវិជ្ជមាន មកលើផលិតកម្មប្រចាំថ្ងៃ និងសង្វាក់ផលិតកម្ម ដែលផ្តល់ប្រយោជន៍ ដល់មនុស្ស ២,៧លាននាក់ក្នុងឧស្សាហកម្មនេះទេ។
សេចក្តីថ្លែងការណ៍របស់សមាគមរោងចក្រកាត់ដេរកម្ពុជា ដែលចេញផ្សាយនៅថ្ងៃទី១ ធ្នូនេះបានឲ្យដឹងថា សមាគមរោងចក្រកាត់ដេរ ដែលតំណាងឲ្យឧស្សាហកម្មកាត់ដេរសម្លៀកបំពាក់ ស្បែកជើង និងឧស្សាហកម្មផលិតកាបូបធ្វើដំនើរទៅសហរដ្ឋអាមេរិក សូមជម្រាបជូនអង្គការសហប្រជាជាតិ ស្ថានទូតបរទេសនានា សហភាពអឺរ៉ុប សហរដ្ឋអាមេរិក អ្នកបញ្ជាទិញ និងភាគីពាក់ព័ន្ឋនានាថា សមាគមចង់ឲ្យមានប្រតិបត្តិការដោយរលូន សម្រាប់រោងចក្រសមាជិកចំនួន៦០០របស់សមាគម ដែលទ្រទ្រង់សេដ្ឋកិច្ចដល់កម្មករជាង ៧០ម៉ឺននាក់ ដែលភាគច្រើនជាស្ត្រី និងប្រជាពលរដ្ឋប្រមាណ២លាននាក់ ព្រមទាំងសមាជិកគ្រួសាររបស់ពួកគេផងដែរ។
សេចក្តីថ្លែងការណ៍ដដែលបានបញ្ជាក់ថា “និយោជក និងកម្មករ និយោជិតទាំងអស់ ព្រមទាំងសហជីពបាននិងកំពុងធ្វើការងារដូចធម្មតា និងដោយសន្តិភាព ដើម្បីផ្គត់ផ្គង់សេដ្ឋកិច្ចខ្លួនឯងដោយផ្ទាល់ និងសេដ្ឋកិច្ចកម្ពុជា។សេចក្តីថ្លែងការណ៍បានបន្តថា “ការអភិវឌ្ឍឧស្សាហកម្មរបស់យើងមកដល់ពេលនេះ បានយកប្រជាពលរដ្ឋរាប់លាននាក់ចេញពីភាពក្រីក្រ ការអភិវឌ្ឍបន្ថែមទៀតចាំបាច់ត្រូវឲ្យមាន ដើម្បីជួយប្រជាពលរដ្ឋផ្សេងៗទៀតដែលនៅក្រីក្រនៅឡើយ។
កម្មករបច្ចុប្បន្ននេះមានសេចក្តីរីករាយ ចំពោះការទទួលបានការគាំពារយ៉ាងរឹងមាំ និងអត្ថប្រយោជន៍បន្ថែមផ្សេងៗពី រដ្ឋាភិបាល និងនិយោជក រួមមានដូចជា ការគាំពារសុខភាព ការគាំពារវេជ្ជសាស្ត្រ ការគាំពារមាតុភាពសម្រាប់ស្ត្រីមានផ្ទៃពោះ និងក្រោយការឆ្លងទន្លេ ការដឹកជញ្ជូនដោយមិនគិតថ្លៃ ជាមួយសេវារថយន្តក្រុងសាធារណៈ គម្រោងសោធននិវត្តថ្មី ថ្លៃជួលផ្ទះ ថ្លៃអគ្គិសនី និងថ្លៃទឹកសមរម្យសម្រាប់លទ្ឋភាពកម្មករ និងការដំឡើងប្រាក់ឈ្នួលអប្បបរិមាថ្មីចំនួន១៧០ដុល្លារអាមេរិក ដែលចូលជាធរមាននៅខែមករា ឆ្នាំ២០១៨តទៅ។
សេចក្តីថ្លែងការណ៍ដដែលបានបញ្ជាក់ថា “រដ្ឋាភិបាល និងនិយោជកនៅតែប្តេជ្ញាភ្ជាប់ឧស្សាហកម្មរបស់យើង ទៅនឹងលក្ខខ័ណ្ឌការងារប្រសើរឡើងតាមរយៈការគោរពទៅតាមច្បាប់ជាតិ និងស្តង់ដាការងារអន្តរជាតិ។ ការចូលរួមជាមួយគម្រោងរោងចក្រកាន់តែប្រសើរនៅកម្ពុជា ក្នុងរយៈពេល១៦ឆ្នាំចុងក្រោយនេះបា
នបង្ហាញពីការប្តេជ្ញាចិត្តមួយ។ នៅក្នុងន័យនេះ កម្ពុជាគួរត្រូវបានទទួលស្គាល់ និងផ្តល់ឲ្យនូវរង្វាន់សម្រាប់សមិទ្ឋិផលរបស់ខ្លួន។
លោកង៉ែត ជូទីប្រឹក្សាជាន់ខ្ពស់ផ្នែកសេដ្ឋកិច្ចនិងអភិវឌ្ឈន៍នៃក្រុមហ៊ុនEmerging Market Consultingបានថ្លែងថា ស្ថានភាពនយោបាយបច្ចុប្បន្នជាអ្វីដែលលោកមានការព្រួយបារម្ភ ដោយខ្លាចមានការដាក់ទណ្ឌកម្មណាមួយ ប៉ុន្តែប្រសិនជាកម្ពុជាឆ្លងផុតឧបសគ្គនេះ កម្ពុជានឹងអាចឆ្ពោះទៅកាន់ប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ខាងមុខ ដោយសារសេដ្ឋកិច្ចកម្ពុជាសម្រេចបានកំនើនជាវិជ្ជមានច្រើន៕
អ្នកជំនាញថា ការផ្គត់ផ្គង់សេវាស្នាក់នៅរបស់សណ្ឋាគារទំនើបនៅមានកម្រិត
ដោយ៖ រ៉ាវី
ភ្នំពេញ៖ ទោះជាមានការរីកចម្រើនខ្លះក្តី ប៉ុន្តែការធ្វើបដិសណ្ឋារកិច្ចនៅកម្ពុជា ក្នុងវិស័យទេសចរណ៍ដែលជាផ្នែកមួយយ៉ាងសំខាន់ ក្នុងការជំរុញកំនើនទេសចរណ៍ស្ថិតនៅមានកម្រិតនៅឡើយ ប៉ុន្តែមានការទទួលស្គាល់ថាកម្ពុជាក៏មានភាពត្រដំត្រសងនឹងបណ្តាប្រទេសក្នុងតំបន់អាស៊ានផងដែរ។
រដ្ឋមន្ត្រីក្រសួងទេសចរណ៍លោកថោង ខុនកាលពីម្សិលម៉ិញបានប្រកាសដាក់ចុះនូវផែនការយុទ្ធសាស្ត្រជំរុញ និងបំផុសចលនាប្រឡងប្រណាំងរមណីយដ្ឋានទេសចរណ៍គំរូនៅទូទាំងប្រទេស ក្នុងគោលដៅស្រូបយកកំណើនទេសចរបន្ថែមប្រកបដោយទំនុកចិត្តខ្ពស់។ យ៉ាងណាក៏ដោយ អ្នកជំនាញបានសម្ដែងពីការព្រួយបារម្ភផងដែរ ខណៈដែលកម្ពុជាទទួលបានភ្ញៀវទេសចរកាន់ច្រើន ដូចការព្រៀងទុក ប៉ុន្តែសម្រាប់វិស័យផ្គត់ផ្គង់សេវាស្នាក់នៅ តាមបណ្តាសណ្ឋាគារទំនើប នៅក្នុងប្រទេសមួយនេះហាក់នៅមានកម្រិត។
ផ្អែកតាមរបាយការណ៍ ដែលចេញដោយក្រសួងទេសចរណ៍បានបង្ហាញថា ឆ្នាំ2016កន្លងទៅ កម្ពុជាសម្រេចបានកំណើនក្នុងអត្រា 5% ជាមួយនឹងការមកដល់នៃភ្ញៀវទេសចរអន្តរជាតិ5លាននាក់ និងផ្តល់ចំណូលប្រមាណ3,400លានដុល្លារចាក់បញ្ចូលក្នុងសេដ្ឋកិច្ចជាតិ។ ដោយឡែកសម្រាប់រយៈពេល9ខែឆ្នាំ2017 នេះ កម្ពុជាទទួលបានភ្ញៀវទេសចរអន្តរជាតិប្រមាណ3.9លាននាក់ កើនឡើងក្នុងអត្រា 11.5 % ។ តាមការព្យាករណ៍នៅឆ្នាំ2017 ការមកដល់នៃភ្ញៀវទេសចរអន្តរជាតិនឹងមានប្រមាណ5.6លាននាក់ និង7លាននាក់នៅឆ្នាំ2020 និងនាំមកនូវចំណូលសរុបប្រមាណ5,000លានដុល្លារ បង្កើតនូវឱកាសការងារបានប្រមាណ 1លាននាក់។ តាមរយៈទិន្នន័យ និងការព្យាករណ៍ដែលអាចទទួលបានកំណើនភ្ញៀវទេសចរអន្តរជាតិ ជាប្រភពចំណូលជាតិទាំងនេះជាភាពវិជ្ជមាន ប៉ុន្តែចំនួនទាំងនេះ ហាក់នៅមិនទាន់ឆ្អែតនៅឡើយ ដោយក្រសួងទេសចរណ៍ក៏បានប្រឹងប្រែងដាក់ចុះនូវយុទ្ធសាស្ត្រចម្បងមួយចំនួនទៀត ដើម្បីពង្រឹង និងពង្រីកវិសាលភាពឱ្យកាន់តែខ្លាំង។
ដោយឡែកងាកមកផ្នែកផ្គត់ផ្គង់សេវាស្នាក់ រួមជាមួយចំណីអាហារនៅតាមបណ្តាសណ្ឋាគារធំៗ លំដាប់កំពូលៗនៅក្នុងប្រទេសកម្ពុជា ដែលជាផ្នែកមួយយ៉ាងសំខាន់ក្នុងវិស័យទេសចរណ៍នេះ អ្នកជំនាញមកពីស្ថាប័នកំពូលផ្នែកគ្រប់គ្រង និងប្រតិបត្តិបដិសណ្ឋារកិច្ចលំដាប់ពីភពលោក Accor Hotel Group បង្ហាញពីការបារម្ភ ខណៈដែលគុណភាពសេវាកម្មក្នុងវិស័យនេះ នៅមានកម្រិត ឬដើរយឺតជាងបណ្តាប្រទេសជិតខាងនៅឡើយ។
លោក Patrick Basset តំណាងស្ថាប័ន Accor Hotels Group ប្រតិបត្តិការរបស់ AccorHotels Group នៅតំបន់អាស៊ីអាគ្នេយ៍ តំបន់អាស៊ីភាគឦសាន តំបន់ម៉ាល់ឌីវ និងក្នុងនាមជាប្រធានក្រុមនៃភាពចម្រុះ ក្នុងការដាក់បញ្ចូលសមាជិកនៅក្នុងតំបន់អាស៊ីប៉ាស៊ីហ្វិច បានលើកឡើងថា កម្ពុជាជាគោលដៅសំខាន់មួយរបស់AccorHotels ព្រោះតែកម្ពុជាប្រៀបបានទៅនឹងវត្ថុមានតម្លៃ ដែលមិនទាន់ច្នៃ។ មិនថាកំណើនសេដ្ឋកិច្ច វប្បធម៌ អរិយធម៌ ធនធានធម្មជាតិ ក៏ដូចជាសកម្មភាពដែលកំពុងរីកចម្រើននាពេលបច្ចុប្បន្ន សុទ្ធតែជាគោលដៅរបស់បណ្តាអ្នកវិនិយោគ ជាពិសេសផ្តល់ប្រយោជន៍ច្រើនដល់វិស័យទេសចរណ៍ ខណៈដែលផ្នែកសណ្ឋាគារ និងបដិសណ្ឋារកិច្ចអាចទទួលបានផលល្អច្រើន។
យ៉ាងណាក៏ដោយ លោកក៏បានបញ្ជាក់ផងដែរថា បើទោះបីជាកម្ពុជាមានភាពល្អប្រសើរដូចការលើកឡើងខាងលើនេះ ប៉ុន្តែបើនិយាយពីវិស័យសណ្ឋាគារ និងបដិសណ្ឋារកិច្ច គឺកម្ពុជាហាក់ដើរយឺត ជាងបណ្តាប្រទេសជិតខាងមួយចំនួនប្រមាណជា1ឬ 2 ជំហានទៅហើយ ជាក់ស្ដែងជាប្រទេសវៀតណាម និងប្រទេសថៃជាដើម។
លោកឌិន សុមេធារិទ្ធិ ប្រធានសមាគមសណ្ឋាគារកម្ពុជាបានឱ្យដឹងថា វាជារឿងដ៏ប្រសើរ ចំពោះយុទ្ធសាស្ត្ររបស់ក្រសួងដែលបានដាក់ចុះ ដើម្បីគៀងគរ និងបង្កើនចំនួនអ្នកទេសចរមកកាន់កម្ពុជា។ ដោយឡែកពាក់ព័ន្ធទៅនឹងគុណភាពសេវាកម្មលើផ្នែកបដិសណ្ឋារកិច្ច នៅតាមបណ្តាសណ្ឋាគារមួយចំនួននៅកម្ពុជាយើងទទួលស្គាល់ថា ពិតជានៅមានចន្លោះប្រហោងពិតមែន ដែលវាពាក់ព័ន្ធទៅនឹងការបណ្តុះបណ្តាលជំនាញ។
លោកបន្តថា “យើងនៅមិនទាន់មានសាលាបណ្តុះបណ្តាលជំនាញនេះគ្រប់គ្រាន់នៅឡើយ ហើយបច្ចុប្បន្ននេះ គឺមានដូចជាសាលា PSE សាលា ដុនបូស្កូ និងសាលាប៉ុន្មានទៀត ដែលជាការបណ្តុះបណ្តាលបែបលក្ខណៈឯកជន និងអង្គការ ប៉ុន្តែវានៅមិនទាន់គ្រប់គ្រាន់នៅឡើយ ដែលទាមទារឱ្យមានច្រើនជាងនេះ។លោកបន្តថា “ភាគច្រើនបុគ្គលិកដែលបម្រើការ នៅតាមបណ្តាសណ្ឋាគារមួយចំនួន គឺមិនមានជំនាញច្បាស់លាស់ ហើយខាងសណ្ឋាគារក៏បង្ខំចិត្តទទួលយក ដោយសារតែកង្វះខាតបុគ្គលិកប្រើប្រាស់ ដោយព្យាយាមបណ្តុះបណ្តាលតាមតែជំនាញដែលខ្លួនមានតែប៉ុណ្ណោះ។
លោកឌិន សុមេធារិទ្ឋបានបន្តថា ចំណុចទាំងនេះ ដែលជាកក្តាប្រឈមខ្លាំងនៅពេលបច្ចុប្បន្ននេះ ហើយក៏មានភាពលំបាកក្នុងការប្រកួតប្រជែងជាមួយសណ្ឋាគារដែលមានកម្រិតស្ដងដារត្រឹមត្រូវនោះដែរ៕
បច្ចេកវិទ្យាជំរុញឲ្យការទូទាត់ដោយពុំប្រើសាច់ប្រាក់កំពុងមានសន្ទុះខ្លាំង
ដោយ៖ ដួង ចន្ទ្រា
ភ្នំពេញ៖ យុគសម័យប្រើប្រាស់បច្ចេកវិទ្យា បាននិងកំពុងផ្លាស់ប្តូរនិន្នាការជាច្រើនក្នុងពិភពលោក ក្នុងនោះក៏មានការផ្លាស់ប្តូរប្រព័ន្ឋទូទាត់សាច់ប្រាក់ផងដែរ ខណៈដែលប្រជាជនក្នុងពិភពលោកកាន់តែច្រើនឡើងៗ ភ្ជាប់បច្ចេកវិទ្យាទៅនឹងជីវិតរស់នៅរបស់ខ្លួន។
ទូរសព្ទដៃគ្រប់ដណ្ដប់លើជីវិតរស់នៅក្នុងប្រទេសចិន ហើយប្រជាជនចិនរាប់រយលាននាក់ ប្រើប្រាស់ទូរសព្ទដៃសម្រាប់និយាយជាមួយមិត្តភ័ក្ត តាមដានព័ត៌មាន និងបង់ថៃ្លរាល់មុខទំនិញទាំងអស់ រាប់ចាប់ពីទំនិញប្រើប្រាស់សម្រាប់តម្រូវការមូលដ្ឋានរហូតដល់ទំនិញប្រណីតៗ នៅតាមហាងជាក់ស្ដែង និងតាម Online ជាក់ស្តែងក្នុងថ្ងៃបញ្ចុះថ្លៃពិសេសនៅប្រទេសចិន កាលពីថ្ងៃទី 11 ខែវិច្ឆិកា កន្លងទៅនេះ ការទិញទំនិញមានទំហំទឹកប្រាក់រហូតដល់ទៅជាង២៥ ពាន់លានដុល្លារក្នុងមួយថ្ងៃ ហើយក្នុងនោះជាងពាក់កណ្ដាល ត្រូវបានធ្វើឡើងតាមរយៈទូរសព្ទដៃ។
នេះជាលើកដំបូងហើយ ដែលទូរសព្ទដៃបានឈានមុខកុំព្យូទ័រក្នុងការទិញទំនិញតាម Online ក្នុងពិធីបុណ្យលក់ទំនិញ ។
ក្នុងសង្គមមួយដែលសាច់ប្រាក់ កំពុងបាត់បង់ប្រជាប្រិយភាព នៅពេលនេះ សូម្បីការផ្ដល់ប្រាក់ទឹកតែឲ្យទៅបុគ្គលិក ឬការផ្ដល់ប្រាក់កាសដល់អ្នកខ្វះខាត អាចធ្វើទៅបានតាមរយៈប្រព័ន្ធឌីជីថលថែទៀតផង។ ខណៈដែលមានមនុស្សជាច្រើនទូទាត់ទំនិញ ឬសេវាដោយប្រើប្រាស់កំពូលកម្មវិធី ដូចជា កម្មវិធី Alipay ដែលមានអ្នកប្រើប្រាស់ជាង៧០០លាននាក់ ឬកម្មវិធី WeChat នៅពេលនេះចំនួនមនុស្ស ដែលព្រមទទួលយកការទូទាត់តាមកម្មវិធីបែបនេះ តាមរយៈការប្រើប្រាស់កូដ QR ក៏មានការកើនឡើងផងដែរ។
កម្មវិធីបែបនេះអនុញ្ញាតឲ្យបុគ្គលគ្រប់រូប ដែលមានទូរសព្ទដៃមួយ និងកូដQRមួយ ទទួលបានថ្លៃទូទាត់ ទំនិញ ឬក៏សេវានានា ដែលមានន័យថា បុគ្គលគ្រប់រូបអាចក្លាយជាពាណិជ្ជករម្នាក់បាន ប្រសិនបើពួកគេមានរបស់សម្រាប់លក់។អត្ថប្រយោជន៍ពីបច្ចេកវិទ្យានេះ កំពុងមានប្រជាប្រិយភាពខ្លាំងឡើង នៅបណ្តាប្រទេសផ្សេងៗទៀត ក្រៅពីប្រទេសចិនផងដែរ។
នៅក្នុងទីក្រុង ញ៉ូវ យ៉ក ដែលជាមជ្ឈមណ្ឌលហិរញ្ញវត្ថុរបស់សហរដ្ធអាមេរិក ការទូទាត់ប្រាក់ តាមរយៈ កម្មវិធី WeChat របស់ប្រទេសចិន បច្ចុប្បន្ននេះត្រូវបានប្រើប្រាស់ក្នុងការជិះតាក់ស៊ី និងនៅតាមហាងទំនិញនានាទូទាំងក្រុង។ ទីក្រុងធំៗដទៃទៀតដូចជា Las Vegas ក៏កំពុងចាប់ផ្ដើមប្រើប្រាស់បចេ្ចកវិទ្យានេះដែរ។ សម្រាប់ប្រទេសឥណ្ឌា ជាប្រទេសដែលមានប្រជាជនច្រើនជាងគេបំផុតលំដាប់ទីពីរក្នុងពិភពលោក បន្ទាប់ពីប្រទេសចិន ការទូទាត់ដោយមិនប្រើសាច់ប្រាក់ក៏កំពុងចាប់ផ្ដើមពេញនិយមផងដែរ។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ជាធនាគារធំជាងគេទី១នៅកម្ពុជា និងកំពុងបោះទុនវិនិយោគលើប្រព័ន្ឋបច្ចេកវិទ្យា ដើម្បីទូទាត់សាច់ប្រាក់ដល់អតិថិជនបានថ្លែងថា បច្ចេកវិទ្យាកំពុងចូលមកក្នុងវិស័យហិរញ្ញវត្ថុ និងជីវិតរបស់យើង ហេតុនេះទើបយើងវិនិយោគលើប្រព័ន្ឋនេះ ដើម្បីសម្រួល និងផ្តល់ភាពងាយស្រួលដល់អតិថិជនរបស់យើង ក៏ដូចជា សម្រួលដល់ដំណើរការធនាគាររបស់យើង។
លោកបន្តថា “ប្រព័ន្ឋបច្ចេកវិទ្យាបាន និងកំពុងធ្វើឲ្យនិន្នាការទូទាត់សាច់ប្រាក់កាន់តែមានភាពផ្លាស់ប្តូរជាវិជ្ជមាន ព្រោះប្រជាពលរដ្ឋមិនចាំបាច់កាន់សាច់ប្រាក់ទេ ពួកគេអាចប្រើប្រាស់បច្ចេកវិទ្យានានា ដើម្បីទូទាត់សាច់ប្រាក់របស់ពួកគេ។
លោកឆារស៍ វ៉ាន់ប្រធានស្តីទីសមាគមធនាគារកម្ពុជាបានថ្លែងថា បច្ចេកវិទ្យាកំពុងផ្លាស់ប្តូរនិន្នាការទូទាត់សាច់ប្រាក់តាមបែបប្រពៃណី ទៅជាការទូទាត់សាច់ប្រាក់តាមរយៈបច្ចេកវិទ្យា ដែលនិន្នាការនេះកំពុងរីកចម្រើននៅប្រទេសនានាក្នុងពិភពលោក ពិសេសប្រទេសចិន ដែលពួកគេអាចប្រើប្រាស់ប្រព័ន្ឋបច្ចេកវិទ្យាកាន់តែច្រើន ហើយកម្ពុជាកំពុងចាប់ផ្តើមទទួលយកនិន្នាការថ្មីនេះ ដែលផ្តល់ផលប្រយោជន៍យ៉ាងច្រើនដល់ប្រជាពលរដ្ឋ និងវិស័យហិរញ្ញវត្ថុ។
លោកបន្តថា “ប្រជាជនមិនចាំបាច់កាន់លុយតាមខ្លួនទេ ពួកគេអាចប្រើប្រាស់ការទូទាត់តាមរយៈកម្មវិធីទូរស័ព្ទ ដើម្បីទូទាត់លើការទិញទំនិញរបស់ខ្លួននៅតាមទីផ្សារនានានិងប្រព័ន្ឋទូទាត់ដទៃទៀត”៕
ប្រជាជនកម្ពុជា ជាង១,៨លាននាក់កំពុងសកម្មក្នុងការជំរុញកំនើនសេដ្ឋកិច្ច
ដោយ៖ គង់ សូរិយា
ភ្នំពេញ៖ ប្រជាពលរដ្ឋកម្ពុជាជាង១,៨លាននាក់បាននិងកំពុងធ្វើសកម្មភាពយ៉ាងសកម្ម ក្នុងការជំរុញកំនើនសេដ្ឋកិច្ច ខណៈក្នុងដៃពួកគេមានសាច់ប្រាក់ជាង៤ប៊ឺលានដុល្លារអាមេរិក នៅក្នុងដៃដែលផ្តល់ពីវិស័យហិរញ្ញវត្ថុនានា។
លោក ជា ចាន់តូ ទេសាភិបាលធនាគារជាតិនៃកម្ពុជាបានថ្លែងឲ្យដឹងក្នុងសិក្ខាសាលាមួយកាលពីម្សិលម៉ិញនេះថា គិតត្រឹមបំណាច់ខែកញ្ញាឆ្នាំ២០១៧នេះ កម្ពុជាមានគ្រឹះស្ថានហិរញ្ញវត្ថុចំនួន៧៦ និងប្រតិបត្តិករឥណទានជនបទចំនួន៣១៣ និងមានបណ្ដាញប្រតិបត្តិការនៅទូទាំងប្រទេស និងក៏មានរហូតដល់ថ្នាក់មូលដ្ឋានឃុំសង្កាត់ផងដែរ។ រីឯប្រាក់បញ្ញើវិញ មានប្រមាណ៨ទ្រីលានរៀប្រហាក់ប្រហែល១,៩៥ប៊ីលានដុល្លារអាមេរិក ដែលទទួលបានពីអ្នកផ្ញើមានជាង១,៧លាននាក់។
លោកបន្តថា “ការរីកចម្រើននេះ គឺជាការឆ្លុះបញ្ចាំងឲ្យឃើញច្បាស់ពីកិច្ចខិតខំនិងសមិទ្ឋផល ដែលសម្រេចបានកន្លងមករបស់រាជរដ្ឋាភិបាល។ លោកបន្ថែមថា “លទ្ធផលនេះ គឺជាការកត់សម្គាល់មួយដែលមិនធ្លាប់មាននៅ ក្នុងប្រវត្តិសាស្ត្រនៃការអភិវឌ្ឃវិស័យមីក្រូហិញ្ញវត្ថុកម្ពុជា។
លោកជា ចាន់តូបានបន្តថា ការរីកចម្រើននៃវិស័យមីក្រូហិរញ្ញវត្ថុនេះ ក៏បានឆ្លុះបញ្ចាំងឲ្យឃើញពីកំណើននៃអាត្រាទទួលបាន និងប្រើប្រាស់សេវាហិរញ្ញវត្ថុផ្លូវការផងដែរ។ ជាក់ស្ដែងកន្លងមកនេះ មានប្រជាពលរដ្ឋពេញវ័យ ដែលប្រើប្រាស់សេវាហិរញ្ញវត្ថុផ្លូវការបានកើនពីប្រមាណ៨,៧នៅឆ្នាំ20១៦ កើនដល់៥១ភាគរយនៅឆ្នាំ២០១។ ទន្ទឹមនឹងនេះដែរវិស័យមីក្រូហិរញ្ញវត្ថុបាន និងកំពុងផ្ដល់សេវារបស់ខ្លួនយ៉ាងទូលំទូលាយ ទូទាំងផ្ទៃប្រទេសរហូតដល់ថ្នាក់ឃុំ និងភូមិផងដែរ។
ទោះបីជាវិស័យមីក្រូហិរញ្ញវត្ថុ មានការរីកចម្រើនយ៉ាងណាក៏ដោយ ក៏វិស័យមួយនេះក៏មានបញ្ហាប្រឈមមួយចំនួនផងដែរ។ ដូចជាការខ្ចីរបស់ប្រជាពលរដ្ឋក្រីក្រ កាន់តែជំពាក់បំណុលវ័ន្តកដោយសារការប្រើប្រាស់មិនចំទិសដៅ។
លោកបណ្ឌិតម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការកើនឡើងនូវឥណទានមានសារៈសំខាន់ណាស់ ក្នុងការបង្កើតមុខរបរ និងការងារដល់ប្រជាពលរដ្ឋ ដែលជាផ្នែកមួយយ៉ាងសំខាន់ក្នុងការជំរុញនិងធ្វើឲ្យមានសកម្មភាពសេដ្ឋកិច្ចរសរវើក ប៉ុន្តែឥណទានក៏មិនអាចមានទំហំច្រើនពេកដែរ ព្រោះបើច្រើនពេកលើសពីផលទុន ជាតិសរុប វានឹងធ្វើឲ្យមានវិបត្តិសង្គម ប្រសិនជាការគ្រប់គ្រងលំហូរឥណទានមិនបានត្រឹមត្រូវ។
លោកបន្តថា “ឥណទានដូចខ្លាញ់ក្នុងខ្លួនមនុស្ស មនុស្សត្រូវការខ្លាញ់ក្នុងខ្លួន ដើម្បីរាងកាយដំណើរការបាន ប៉ុន្តែរាងកាយក៏មិនត្រូវការខ្លាញ់ច្រើនពេកដែរ”៕
រដ្ឋមន្ត្រីសេដ្ឋកិច្ច៖ កម្ពុជាកំពុងខិតខំប្រឹងប្រែងដើម្បីសម្រេចគោលដៅថ្មីមួយ
ដោយ៖ ដែន ចែងចាំង
ភ្នំពេញ៖ បន្ទាប់ពីកម្ពុជាទទួលបានភាពជោគជ័យ ក្នុងចំណោមប្រទេសល្អដាច់គេទាំង១០នៅទូទាំងសកលោក ក្នុងការសម្រេចបាននូវគោលដៅអភិវឌ្ឍន៍សហស្សវត្សរ៍ បច្ចុប្បន្នកម្ពុជាកំពុងខិតខំប្រឹង ប្រែង ដើម្បីសម្រេចតាមគោលដៅអភិវឌ្ឍន៍ប្រកបដោយនិរន្តរភាព។
លោកបណ្ឌិត អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងលើកឡើងនៅ ក្នុងជំនួបពិភាគ្សាការងារជាមួយ លោកបណ្ឌិត Graeme Buckley នាយកប្រចាំតំបន់នៃអង្គការអន្តរជាតិការងារ (ILO) នៅទីស្តីការក្រសួងកាលពីថ្ងៃទី២៩ វិច្ឆិកាកន្លងមកថា សមិទ្ធិផលនៃការអភិវឌ្ឍរបស់កម្ពុជានាពេលកន្លងមក ក្រៅពីទទួលបានកំណើនសេដ្ឋកិច្ចខ្ពស់ កម្ពុជាក៏ទទួលបាននូវភាពជោគជ័យក្នុងចំណោមប្រទេសល្អដាច់គេទាំង១០ទូទាំងសកលោក ក្នុងការសម្រេចបាននូវគោលដៅអភិវឌ្ឍន៍សហស្សវត្សរ៍ (MDGs) និងត្រូវការចាត់ចូលជាប្រទេសមានចំណូលមធ្យមកម្រិតទាបផងដែរ ។
លោកបន្តថា “ទោះបីកម្ពុជាទទួលបានកំណើនយ៉ាងណាក៏ដោយ ក៏កម្ពុជាបានប្រមើលឃើញពីបញ្ហាប្រឈមថ្មីៗ នៃការប្រែប្រួលរចនាសម្ព័ន្ធសេដ្ឋកិច្ច ក៏ដូចជាកិច្ចខិតខំប្រឹងប្រែងនាពេលអនាគត ដើម្បីសម្រេចតាមគោលដៅអភិវឌ្ឍន៍ប្រកបដោយនិរន្តរភាព (SDGs) ដែលទាមទារឱ្យកម្ពុជាត្រូវរិះរកនូវគោលនយោបាយយុទ្ធសាស្ត្រ និងវិធានការថ្មីៗបន្ថែមទៀតផងដែរ។
លោកបណ្ឌិត Graeme Buckley បានសម្តែងនូវការអបអរសាទរចំពោះការអភិវឌ្ឍដ៏លឿនរបស់កម្ពុជា បើប្រៀបធៀបរយៈពេល១០ ទៅ១៥ឆ្នាំមុន ដោយលោកបានយល់ស្របចំពោះភាពចាំបាច់នៃយុទ្ធសាស្ត្រ និងគោលនយោបាយបាយថ្មី ដែលរាជ-រដ្ឋាភិបាលកម្ពុជាទើបនឹងគ្រោងអនុម័ត ពាក់ព័ន្ធនឹងការអភិវឌ្ឍវិស័យ កាត់ដេរ ក៏ដូចជាការលើកកម្ពស់សុខុមាលភាពរបស់កម្មករនិយោជិតកម្ពុជា ។
លោកបានអះអាងថា “អង្គការអន្តរជាតិខាងការងារ ជាពិសេសការិយាល័យប្រចាំតំបន់ក្នុងទីក្រុងបាងកក ដែលទើបបានបង្កើនសមត្ថភាព និងជំនាញពាក់ព័ន្ធបន្ថែម បានត្រៀមខ្លួនរួចជាស្រេច ដើម្បីពង្រីកកិច្ចសហប្រតិបត្តិការជាមួយរាជរដ្ឋាភិបាលកម្ពុជា ជាពិសេសជាមួយក្រសួងសេដ្ឋកិច្ច និងហិរញ្ញវត្ថុផ្ទាល់តែម្តង”៕
ទុនវិនិយោគក្នុងវិស័យសំណង់មានទំហំទឹកប្រាក់ជាង ៦២០០លានដុល្លារក្នុងរយៈពេល ១០ខែ
ដោយ៖ គង់ សូរិយា
ភ្នំពេញ៖ ទំហំវិនិយោគក្នុងវិស័យសំណង់ និងអចលនវត្ថុនៅកម្ពុជា មិនមានសញ្ញាថមថយណាមួយឡើយក្នុងរយៈពេល១០ខែនេះ ដោយទំហំទឹកប្រាក់បានកើនឡើងដល់ ៦២៦៧លានដុល្លារអាមេរិក កើនឡើង២៧ភាគរយធៀបរយៈពេលដូចគ្នាកាលពីឆ្នាំមុន។
ទេសរដ្ឋមន្ត្រីជា សុផារ៉ារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់បានថ្លែងក្នុងពិធីបើកពិពណ៌ឧស្សាហកម្មសំណង់ រយៈពេល៣ថ្ងៃចាប់ពីថ្ងៃទី៣០ខែវិច្ឆិកា ដល់ថ្ងៃទី២ ខែធ្នូ ឆ្នាំ២០១៧នេះថា នៅក្នុងរយៈពេល១០ខែឆ្នាំ២០១៧នេះ ការវិនិយោគក្នុងវិស័យសំណង់មានប្រមាណជាង៦២៦៧លានដុល្លាអាមេរិក កើនឡើង២៧ភាគរយ បើធៀបនឹងរយៈពេលដូចគ្នាឆ្នាំមុន ហើយគិតមកដល់ពេលនេះ ក្រសួងរៀបចំដែនដី មានក្រុមហ៊ុនសំណង់ទាំងជាតិ និងអន្តរជាតិបានមកចុះបញ្ជីទទួលយកអាជ្ញាបណ្ណ និងក្រុមហ៊ុនសំណង់កំពុងមានសុពលភាព បន្តធ្វើការងារគឺមានចំនួន១០៣៨ក្រុមហ៊ុន ក្នុងនោះក្រុមហ៊ុនមកពីក្រៅប្រទេសមានចំនួន៣២៤ក្រុមហ៊ុន ហើយបច្ចុប្បន្នក្រុមហ៊ុនសំណង់បរទេស ដែលមានទុនវិនិយោគខ្ពស់ជាគេ គឺក្រុមហ៊ុនមកពីប្រទេសចិន បន្ទាប់មកប្រទេសកូរ៉េខាងត្បូង វៀតណាម ជប៉ុននិងប្រទេសថៃ។
លោកបន្តថា “បើកការតាំងពិពណ៌ឧស្សាហកម្មសំណង់លើកទី៦នេះថា តាមរយៈពេលវត្តមានស្តង់តាំងបង្ហាញសមិទ្ធិផល និងផលិតផលក្រុមហ៊ុនសំណង់ជាតិអន្តរជាតិ ប្រមាណជាង១៦៨ក្រុមហ៊ុន គឺបានបង្ហាញសញ្ញារីកលូតលាស់ នៃវិស័យសំណង់សំណង់ និងអចលនទ្រព្យនៅក្នុងប្រទេសកម្ពុជា ខណៈ នៅមានក្រុមហ៊ុនសំណង់ជាច្រើនទៀត មិនចូលរួមបង្ហាញស្នាដៃរបស់ខ្លួន។
អ្នកឧកញ៉ាពុង ឃាវសែ ប្រធានសមាគមអ្នកសាងសង់កម្ពុជាបានថ្លែងថា ព្រឹត្តិការណ៍តាំងពិពណ៌ ឧស្សាហកម្មសំណង់នៅឆ្នាំ២០១៧នេះ មានផលិតផលនិងសេវាកម្មសំណង់ប្រមាណជាង៦០០ផលិតផល ត្រូវបានបណ្តាក្រុមហ៊ុនជាជិត១៧០ក្រុមហ៊ុន យកដាក់តាំងបង្ហាញ ក្នុងនោះផលិតផលមួយភាគធំជាផលិតផលសំភារៈបន្ទប់ទឹក គ្រឿងអគ្គីសនី ឧបករណ៍គ្រឿងយន្តសំណង់ គ្រឿងចក្រគ្រប់ប្រភេទ និងមានការតាំងបង្ហាញលក់ផ្ទះសំបែងផងដែរ៕
