ដោយវុត្ថា

ភ្នំពេញ៖ មន្រ្តីជាន់ខ្ពស់រដ្ឋសភាជាតិបានថ្លែងថា រាជរដ្ឋាភិបាលកម្ពុជាកំពុងជំរុញឲ្យ​មានឯករាជ្យភាពផ្នែកថាមពលអគ្គិសនី ដើម្បីបង្កើនការគ្របដណ្តប់និងពង្រឹងមូលដ្ឋានផលិតកម្មនៅកម្ពុជា។

លោក ឈាង វុន សមាជិករដ្ឋសភាបានអោយដឹងនាព្រឹកថ្ងៃទី១២ មិថុនានេះថា នាពេលបច្ចុប្បន្ននេះ ការប្រើប្រាស់ថាមពលអគ្គិសនីនៅមានតម្លៃខ្ពស់នៅឡើយ ដោយទាមទាអោយមានការវិនិយោគបន្ថែម ពីក្រុមហ៊ុនឯកជននានា ស្របតាមរាជរដ្ឋាភិបាលកម្ពុជាកំពុងជម្រុញឲ្យមានការផលិតឲ្យលឿន និងមានតម្លៃថោកជូនដល់ប្រជាពលរដ្ឋប្រើប្រាស់។ លោកបន្តថា អគ្គិសនីយ៍នេះ មិនមែនប្រើប្រាស់សម្រាប់ឧស្សាហកម្ម រោងចក្រ នោះទេ គឺត្រូវបានប្រើប្រាស់គ្រប់ប្រជាពលរដ្ឋទាំងអស់ នៅក្នុងប្រទេសបើកតម្លៃអគ្គិសនីមានតម្លៃថ្លៃ និងធ្វើឲ្យប៉ះពាល់ការជីវភាពរស់នៅរបស់ប្រជាពលរដ្ឋ និងក្រុមហ៊ុនវិនិយោគផ្សេងៗទៀត ដូច្នេះបានជារាជរដ្ឋាភិលខិតខធ្វើយ៉ាងណាឲ្យតម្លៃអគ្គិសនី មានតម្លៃថោកនាពេលអនាគត”។

លោកឈាង វ៉ុនបានបន្តថា “យើងមិនអាចគ្រប់គ្រង់លើតម្លៃអគ្គិសនីបានទេ បើនៅតែមានការនាំចូលអគ្គិសនីពីប្រទេសជិតខាង មកប្រើប្រាស់ក្នុងស្រុកនោះ ដូច្នេះ យើង ត្រូវតែគិតគូធ្វើយ៉ាងណាអោយមានអគ្គិសនីខ្លួនយើង”។

លោកបន្តថា ក្រុមហ៊ុនស្នេថេក ខូអិលធីឌី និង ក្រុមហ៊ុន ខេមបូឌា អ៊ិនធើណេសិនណល អ៊ិនវេសមែន ឌីវើឡុបមែន គ្រុប គឺជាក្រុមហ៊ុនវិនិយោគខាងផ្នែកអគ្គិសនី ជាដៃគូសហការល្អជាមួយរាជរដ្ឋាភិបាល ក្នុងការផ្គត់ផ្គង់អគ្គិសនី ដើម្បីឆ្លើយតបនឹងតម្រូវការ នៃការប្រើប្រាស់ ក្នុងការជម្រុញកំណើនសេដ្ឋកិច្ចឲ្យឈានឡើងបន្ថែមទៀត តាមរយៈការពឹងផ្អែកទៅលើផ្នែកថាមពល សម្រាប់ដំណើរការលើវិស័យឧស្សាហកម្ម។

ក្រុមហ៊ុនទាំងពីរនេះ គ្រោងនឹងវិនិយោគក្នុងខេត្តកំពង់ស្ពឺ ផ្នែកសូឡា រយៈពេល ២១ឆ្នាំ និងខេត្តកំពុងសោមផ្នែកឃ្យូងថ្ម ក្នុងគោលបំណងបញ្ចុះតម្លៃអគ្គិសនីជូនប្រជាពល​រដ្ឋ និងការប្រើប្រើសគ្រប់ប្រភេទ។

សំណើសុំអនុម័តសេចក្តីព្រាងច្បាប់ស្តីពី ការយល់ព្រមលើការធានាទូទាត់របស់រាជរដ្ឋាភិបាលកម្ពុជា អោយក្រុមហ៊ុន ស្នេថេក ខូអិលធីឌី និងសំណើសុំអនុម័តសេចក្តីព្រាងច្បាប់ស្តីពី ការអនុម័តយល់ព្រមលើការធានា ទូទាត់របស់រាជរដ្ឋាភិបាលកម្ពុជាឲ្យក្រុមហ៊ុនខេមបូឌា អ៊ិនធើណេសិនណល អ៊ិនវេសមែន ឌីវើឡុបមែនគ្រុប ត្រូវវបានគណៈកម្មាធិការអចិន្ត្រៃយ៍រដ្ឋសភាលើកយកមកពិនិត្យ តាមរយៈកិច្ចប្រជុំក្រោមអធិបតីភាព សម្តេចអគ្គមហាពញាចក្រី ហេង សំរិន ប្រធានរដ្ឋសភា នាព្រឹកថ្ងៃទី១២ មិថុនា នេះ។

អគ្គលេខាធិការរដ្ឋសភា លោកឡេង ប៉េងឡុង ថ្លែងប្រាប់ក្រុមអ្នកសារព័តមានថា សំណើសុំអនុម័តសេចក្តីព្រា​ងច្បាប់ទាំងពីរខាងលើ ត្រូវបានរាជរដ្ឋាភិបាលកម្ពុជាផ្ញើរមករដ្ឋសភាកាលពីសប្តាហ៍មុន និងទុកជាការប្រញាប់ ដែលនាំអោយថ្ងៃនេះគណៈកម្មាធិការអចិន្ត្រៃរដ្ឋសភាយកសេចក្តីព្រាងច្បាប់ ទាំងពីរនេះមកប្រជុំដើម្បីពិនិត្យ និងអនុម័តដោយកិច្ចប្រជុំគណៈកម្មាធិការ អចិន្ត្រៃយ៍រដ្ឋសភានាពេលនេះ បានសម្រេចបញ្ជូនសេចក្តីព្រាងច្បាប់នេះទៅជូនគណៈកម្មការទី២ និងទី៦ ធ្វើការពិនិត្យ សិក្សា និងស្រាវជ្រាវ រួចដាក់ជូនមករដ្ឋសភាវិញដើម្បីប្រជុំ និងអនុម័តនាពេលខាងមុខ។

កាលពីពេលថ្មីៗនេះ លោកស៊ុយ សែមរដ្ឋមន្រ្តីក្រសួងរ៉ែ និងថាមពលបានឲ្យដឹងថា ក្រសួងបានអនុញ្ញាត្តឲ្យក្រុមហ៊ុនចំនួន៤ សិក្សាលទ្ឋភាពសាងសង់រោងចក្រផលិតថាមពលអគ្គិសនីដើរដោយធ្យូងថ្ម ដែលមានថាមពលសរុបចំនួន៥០០០មេហ្កាវ៉ាត់៕

ដោយ ដែន ចែងចាំង

ភ្នំពេញ៖ រដ្ឋមន្ត្រីក្រសួងពាណិជ្ជកម្ម លោកប៉ាន សូរស័ក្តិ បានបង្ហាញសុទិដ្ឋិនិយម ចំពោះទំនាក់ទំនងពាណិជ្ជកម្មទ្វេភាគីរវាងកម្ពុជា និងថៃថា នឹងអាចសម្រេចបានទំហំ ១៥ប៊ីលានដុល្លារ នៅត្រឹមឆ្នាំ២០២០ តាមផែនការដែលគ្រោងទុក ខណៈដែលឆ្នាំ២០១៧ ទំហំពាណិជ្ជកម្មនៃប្រទេសទាំងពីរមានចំនួន ៦ប៊ីលានដុល្លាររួចទៅហើយ។

លោករដ្ឋមន្រ្តីពាណិជ្ជកម្មកម្ពុជា បានថ្លែងក្នុងជំនួបជាមួយលោកប៉ានីយ៉ារ៉ាក់ ពូលធុប ឯកអគ្គរាជទូតថៃប្រចាំនៅកម្ពុជាកាលពីថ្ងៃទី១១ មិថុនាកន្លងមក ដោយបានលើកឡើង អំពីទំនាក់ទំនងស្អិតរមួតរវាងប្រទេសកម្ពុជា និងថៃ ក៏ដូចជាវឌ្ឍនភាពថ្មីៗនៃកិច្ចសហប្រតិការលើវិស័យពាណិជ្ជកម្ម ដូចជាការតភ្ជាប់ហេដ្ឋារចនាសម្ព័ន្ធ និងការបើកច្រកព្រំដែនភ្នំដី ក្នុងខេត្តបាត់ដំបង និងច្រកបានខៅឌីន ក្នុងខេត្តស្រះកែវ ដែលនឹងជួយសម្រួ​លដល់ការដឹកជញ្ជូនទំនិញ ការធ្វើដំណើរចេញ-ចូលរបស់ភ្ញៀវទេសចរអន្តរជាតិ និងការពង្រីកកិច្ចសហការធុរកិច្ចរបស់ពាណិជ្ជករនៃប្រទេសទាំងពីរ។

លោកប៉ាន សូរស័ក្តិ ក៏បានស្នើដល់ភាគីថៃ ចាត់វិធានការណ៍ឲ្យបានម៉ឺងម៉ាត់ចំពោះករណីប្រើប្រាស់និមិត្តសញ្ញាជាតិរបស់កម្ពុជា (ប្រាសាទអង្គរវត្ត) នៅលើបាវអង្កររបស់ថៃ ដែលកំពុងធ្វើចរាចរណ៍លក់នៅតាមទីផ្សារមួយចំនួន ក្នុងទីក្រុងម៉ុងរេអាល់នៃប្រទេសកាណាដា។

ឯកអគ្គរាជទូតថៃប្រចាំកម្ពុជា លោកប៉ានីយ៉ារ៉ាក់ ពូលធុប បានជម្រាបឯកឧត្តមរដ្ឋមន្ត្រី អំពីចំណាត់ការរបស់អាជ្ញាធរថៃ ក្នុងការជូនដំណឹងដល់ភាគីពាក់ព័ន្ធ តាមរយៈកិច្ចសហការជាមួយ តំណាងពាណិជ្ជកម្មនៃប្រទេសកាណាដា ដើម្បីទប់ស្កាត់មិនឲ្យទំនិញអង្ករខាងលើមានវត្តមានតទៅទៀត នៅតាមទីផ្សារក្នុងទីក្រុងម៉ុងរេអាល់។ លើសពីនេះ លោកឯកអគ្គរាជទូត ក៏បានថ្លែងអំណរគុណដល់លោកប៉ាន សូរស័ក្តិ ដែលកន្លងមកបានជួយសម្របសម្រួលពាណិជ្ជករថៃ ក្នុងការធ្វើធុរកិច្ច និងការរៀបចំព្រឹត្តិការណ៍ពិព័រណ៍ពាណិជ្ជកម្មផ្សេងៗ នៅក្នុងប្រទេសកម្ពុជា។

កាលពីកំឡុងខែមីនា កន្លងមកនេះ កម្ពុជា និងថៃ បានរៀបចំកិច្ចប្រជុំគណៈកម្មការចម្រុះផ្នែកពាណិជ្ជកម្មរវាងកម្ពុជា-ថៃឡង់ដ៏ លើកទី៦ (6th JTC) នៅសណ្ឋាគារសូហ្វីតែលភ្នំពេញ ភូគីត្រា ដើម្បីពិភាក្សា និងផ្លាស់ប្តូរយោបល់លើបញ្ហាប្រឈមផ្សេងៗ សំដៅជំរុញទំហំពាណិជ្ជកម្មទ្វេភាគីឲ្យបាន ១៥ប៊ីលានដុល្លារ នៅឆ្នាំ២០២០។ភាគីទាំងពីរបានព្រមព្រៀង ពង្រឹងការអនុវត្តកិច្ចសម្រួលពាណិជ្ជកម្ម ការបើកច្រកព្រំដែនថ្មីៗបន្ថែម និងការរៀបចំឲ្យមានវេទិកាធុរកិច្ច និងវិនិយោគកាន់តែច្រើន។

លើសពីនេះ ភាគីទាំងពីរបានចុះហត្ថលេខាលើឯកសារចំនួនពីរគឺ ទី១ យុទ្ធសាស្ត្រកំណើន នៃកិច្ចសហប្រតិបត្តិការសេដ្ឋកិច្ច តាមបណ្តាខេត្តនៅជាប់ព្រំដែន និងទី២ អនុ  ស្សរណៈស្តីពី កិច្ចសហប្រតិបត្តិការជំរុញពាណិជ្ជកម្មទ្វេភាគីថែមទៀត៕

ដោយ គង់ សូរិយា

ភ្នំពេញ៖ អ្នកវិនិយោគចិនដ៏មានឥទ្ឋិពលមួយរូបបានថ្លែងថា ក្រុមអ្នកវិនិយោគទុនបរទេស ជាពិសេសបណ្តាអ្នកវិនយោគទុនចិន បានវិនិយោគនៅកម្ពុជាជាបន្តបន្ទាប់ ព្រោះ​មានការជឿជាក់ក្រោមការដឹកនាំ ដ៏មានប្រសិទ្ធភាព ស័ក្តិសិទ្ធភាព និងមានការទទួលខុសត្រូវខ្ពស់ពីប្រមុខរដ្ឋាភិបាលកម្ពុជា។

ប្រធានគណៈកម្មាធិការ និងជាអតីតប្រធានគណៈកម្មការច្បាប់ធនាគារចិនលោកសាង ហ៊្វូលីនបានលើកឡើង នៅក្នុងជំនួបពិភាក្សាការងារជាមួយលោកសុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា  នៅទីស្តីការក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១១ ខែមិថុនា ឆ្នាំ២០១៨កន្លងមកថា ដោយមានកិច្ចសហប្រតិបត្តិការល្អ រវាងប្រទេសទាំងពីរកម្ពុជា-ចិន តារយៈការប្រើប្រាស់នូវយន្តការសម្របសម្រួល កិច្ចសន្ទនាទ្វេភាគី និងការផ្លាស់ប្តូរទស្សនកិច្ចសិក្សា ដែលឆ្លើយតបជា វិជ្ជមាន ទៅនឹងក្របខណ្ឌនៃការអនុវត្តគំនិតផ្តួចផ្តើម ខ្សែក្រវ៉ាត់មួយផ្លូវមួយ បានធ្វើឲ្យ​ចំ​ណងមិត្តភាពប្រទេសទាំងពីរមិនអាចកាត់ថ្លៃបាន ក្នុងទិសដៅតែមួយគត់គឺការជម្រុញកិច្ចសហប្រតិបត្តិការនេះទៅរកការរីកចម្រើន។

លោកបានបន្តដោយបានកោតសរសើដល់ប្រទេសកម្ពុជា ដែលទទួលបានការអភិវឌ្ឍន៍រីកចម្រើនយ៉ាងឆាប់រហ័ស នៅគ្រប់ហេដ្ឋារចនាសម្ព័ន្ធ ដោយរាជរដ្ឋាភិបាលកម្ពុជាសម្រេចបាន ក្នុងការទាក់ទាញទុនវិនិយោគយ៉ាងច្រើនសន្ធឹកសន្ធាប់ពីបរទេស ជាពិសេសអ្នកវិនិយោគទុនចិន។ លោកបន្តថា ភាពជោគ​ជ័យទាំងនេះ គឺបានកើតចេញតាមរយៈជំនឿជឿជាក់ ទៅលើការដឹកនាំដ៏មានប្រសិទ្ធភាព ស័ក្តិសិទ្ធភាព និងការទទួល ខុសត្រូវខ្ពស់ របស់សម្តេចតេជោ ហ៊ុន សែន។

រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធការក្រុមប្រឹក្សាអភិវឌ្ឍន៍កម្ពុជាលោកសុខ ចិន្តាសោភាបានជម្រាបជូនគណៈប្រតិភូចិនអំពីវឌ្ឍនភាព និងគោលនយោ​បាយគាំទ្រនានា ដែលរាជរដ្ឋាភិបាលកម្ពុជាបានដាក់ចេញ ក្នុងទិសដៅលើកទឹកចិត្ត និងពង្រឹងនូវ​ទំនុកចិត្តរបស់អ្នកវិនិយោគគ្រប់រូប ក្នុងការធ្វើប្រតិបត្តិការធុរកិច្ច និងវិនិយោគនៅកម្ពុជា រួមបញ្ចូលនូវគោលនយោបាយអភិវ​ឌ្ឍន៍វិស័យឧស្សាហកម្មកម្ពុជា ឆ្នាំ២០១​៥​-២០២៥ ដែលមានចក្ខុវិស័យក្នុងការជម្រុញកែប្រែ និងធ្វើទំនើបកម្ម រចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្ម ឈានទៅឧស្សាហកម្មផ្អែកលើជំនាញត្រឹមឆ្នាំ២០២៥៕

ដោយ គង់ សូរិយា

ភ្នំពេញ៖ ការអភិវឌ្ឍ Smart City ក្នុងប្រទេសកម្ពុជាបាននិងកំពុងចាប់ផ្តើមការយក​ចិត្តទុកដាក់ពីក្រសួងជំនាញ ដើម្បីបញ្ជូននិងបញ្រ្ជាបការយល់ដឹងពីទស្សនទានអភិវឌ្ឍន៍នេះដល់និស្សិត ដែលបាននិងកំពុងសិក្សាស្ថាបត្យកម្ម និងសំណង់មកពីគ្រឹះស្ថានឧត្តមសិក្សានានា។

រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់លោកសាស្រ្តាចារ្យភឿង សុភ័ណ្ឌបានថ្លែងក្នុងពិធីបើក សិក្ខាសាលា“ យុទ្ធសាស្រ្តនៃការអភិវឌ្ឍទីក្រុង ក្នុងវិស័យស្ថាបត្យកម្ម និងសំណង់” ប្រព្រឹត្តទៅនៅរសៀលថ្ងៃទី ១១ខែមិថុនាឆ្នាំ ២០១៨ កន្លងមកថា ការរៀបចំសិក្ខាសាលានេះឡើងពិតជាមានសារៈសំខាន់ណាស់ គឺដើម្បីអភិវឌ្ឍធនធានមនុស្សដោយផ្ដល់ចំណេះដឹងបន្ថែម អោយនិស្សិតស្វែងយល់បានកាន់តែច្រើនពីការរីកចំរើន នៃ Smart City ក្នុងប្រទេសជប៉ុន និងយកចំណេះដឹងនេះដើម្បីអភិវឌ្ឍទីក្រុងកម្ពុជា។

លោកបន្តថា សព្វថ្ងៃវិស័យសំណង់កម្ពុជា កំពុងមានការរីកចំរើនយ៉ាងខ្លាំង ក្រោមដំបូលនៃសន្តិភាព ជាក់ស្តែងទុនវិនិយោគក្នុងវិស័យនេះ បានក្លាយជាផ្នែកសំខាន់ក្នុងការជំរុញកំណើនសេដ្ឋកិច្ចជាតិ ដោយបានបន្តកំណើនក្នុងរង្វង់៧ភាគរយ ចាប់បីឆ្នាំ២០១១ ដល់ឆ្នាំ២០១៧ ហើយកំណើននេះនឹងបន្តក្នុងរង្វង់៧ភាគរយទៀតក្នុងឆ្នាំ ២០១៨។

លោកភឿង សុភ័ណ្ឌបានបន្តថា រាជធានីភ្នំពេញមានអាគារ មានកំពស់ចាប់ពី៥ជាន់ឡើងទៅចំនួនប្រមាណជា ៧៩១អាគារ ហើយក៏មានបុរីលំនៅឋានចំនួន ១៣៤ទីតាំង និងមានការជម្រុញក្នុងការបង្កើតទីក្រុងរណបថ្មីៗ លំនៅឋាន តំបន់សេដ្ឋកិច្ចពិសេស និងអាគារឧស្សាហកម្មជាដើម។

សិក្ខាសាលានេះមានការចូលរួមធ្វើបទបង្ហាញពី លោក Hirotaka Sekido ជាអគ្គនាយករង ក្រុមហ៊ុនស្តាតគ្រុប នៃប្រទេសជប៉ុន ដើម្បីធ្វើបទបង្ហាញពីភាពរីកចំរើន Smart City របស់ប្រទេសជប៉ុន៕