ដោយ ដែន ចែងចាំង
ភ្នំពេញ៖ សាខាគយ និងរដ្ឋាករកំពង់ផែអន្តរជាតិព្រះសីហនុ ប្រមូលចំណូលបាន ប្រមាណ១៩៩លានដុល្លាអាមេរិក កើនឡើងប្រមាណ៤២ភាគរយ ក្នុងរយៈពេល៤ខែដើមឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។
ប្រធានសាខាគយ និងរដ្ឋាករកំពង់ផែរអន្តរជាតិ ក្រុងព្រះសីហនុ លោកយឿក យូ បានថ្លែងក្នុងពិធីសម្ពោធអគាររដ្ឋបាលថ្មីរបស់សាខាគយ និងរដ្ឋាករកំពង់ផែអន្តរជាតិព្រះសីហនុ កាលពីម្សិលម៉ិញនេះថា កំពង់ផែអន្តរជាតិក្រុងព្រះសីហុន គឺជាកំពង់ផែធំជាងគេ ដោយមានក្រុមហ៊ុននាំចេញនាំចូល និងបានបំពេញបែបបទនៅទីនោះជាច្រើន ជាពិសេសមានធុរជនល្អបំផុត១៧ក្រុមហ៊ុន ដែលភាគច្រើននាំចូលស្រាបៀរ សំបកកំប៉ុង ស្រូវសាលី ទឹក ដោះគោ ខោទឹកនោម ស្ករស និងប្រេងរំអិលជាដើម។
លោកបន្តថា កាលពីឆ្នាំមុនសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ប្រមូលចំណូលប្រមាណជាង៤៦៩លានដុល្លាអាមេរិកផងដែរ។ ចំណែកការប្រមូលចំណូលនៅក្នុងរយៈពេល៤ខែ ដើមឆ្នាំ២០១៨នេះវិញភាគច្រើនជាចំណូល បានមកពីការនាំចូលរថយន្ត បារី ជាពិសេសពីក្រុមហ៊ុនធុរជនដែលល្អបំផុតទាំង១៧ក្រុមហ៊ុន។
ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោកបណ្ឌិតសភាចារ្យ អូន ព័ន្ធមុន្នីរ័ត្នបានមានប្រសាសន៍ថា មន្រ្តីក្រសួងទាំងអស់ ត្រូវបង្កើនកិច្ចសហការឲ្យកាន់តែជិតស្និតថែមទៀត ដើម្បីធានាប្រសិទ្ធក្នុងការបំពេញការងារ ការសហការជាមួយអង្គភាពពាក់ព័ន្ធ និងអាជ្ញាធរមានសមត្ថកិច្ច គ្រប់លំដាប់ថ្នាក់នៅមូលដ្ឋាន ត្រូវជម្រុញលើកកម្ពស់អភិបាលកិច្ចល្អ ដើម្បីសម្រួលដល់ការធ្វើពាណិជ្ជកម្ម អាជីវកម្ម ការផ្តោតយកចិត្តទុកដាក់លើការអនុវត្តន៍ថវិកាកម្មវិធី និងត្រូវបន្តរៀបចំផែនការបណ្តុះបណ្តាលថែមទៀត ដើម្បីជម្រុញការគ្រប់គ្រង់ការងារឲ្យមានប្រសិទ្ធភាព និងមានតម្លាភាព៕
