គង់ សូរិយា

ភ្នំពេញ ឧបករណ៍និស្សន្ទន៍ជាពាក្យថ្មីមួយទៀត ក្នុងវិស័យហិរញ្ញវត្ថុកម្ពុជា ហេតុនេះការស្វែងយល់ពីអត្ថន័យនៃពាក្យនេះ មានសារៈសំខាន់ណាស់មុនធ្វើកា​រសម្រេ​ចចិត្តជួញដូរ។

តើឧបករណ៍និស្សន្ទន៍មានន័យដូចម្តេច លោក ស៊ូ សុជាតិ អគ្គនាយកនៃគណកម្មការមូលបត្រកម្ពុជា ដែលជាស្ថាប័នមួយគ្រប់គ្រងការជួញដូរឧបករណ៍ និស្សន្ទន៍បានថ្លែងឲ្យដឹងថា ការជួញដូរឧបករណ៍និស្សន្ទន៍ សំដៅដល់ការជួញដូរមាស ប្រាក់ រូបិយប័ណ្ណអន្តរជាតិ និងប្រទេសមួយចំនួនមានការជួញដូរប្រេងផងដែរ ប៉ុន្តែនៅកម្ពុជាមានការជួញដូរតែ មាស ប្រាក់ និងរូបិយប័ណ្ណអន្តរជាតិប៉ុណ្ណោះ។

លោកបន្តថា “ការជួញដូរឧបករណ៍ទាំងនេះ មានហានិភ័យខ្ពស់ និងមិនមានហានិភ័យច្រើននោះទេ ប្រសិ​នជាអ្នកជួញដូរបានយល់ច្បាស់និងសម្រេចចិត្តត្រឹមត្រួវ ប៉ុន្តែក្នុងការធ្វើជំនួញអ្វីក៏ដោយ ក៏មានហានិភ័យដែរ”។

ហេតុអ្វីមានហានិភ័យខ្ពស់

បើតាមលោក ស៊ូ សុជាតិ ការជួញដូរឧបករណ៍និស្សន្ទន៍ ត្រូវបានគេមើលឃើញថា មានហានិភ័យខ្ពស់ ដោយសារហាងឆេងមាស ប្រាក់ និងរូបិយប័ណ្ណអន្តរជាតិមានការផ្លាស់ប្តូរលឿនពីទីផ្សារសាកល ហេតុនេះទើបគណកម្មការមូលបត្រកម្ពុជាបាន​ផ្តល់សិទ្ឋធ្វើអាជីវកម្មដល់ក្រុមហ៊ុនចំនួន៤ប៉ុណ្ណោះ។

លោកបន្តថា ដោយសារហាងឆេងឧបករណ៍និស្សន្ទន៍ទាំងនេះ ប្រែប្រួលលឿនពេក ទើបគណកម្មការមួលបត្រកម្ពុជា មិន​អនុញ្ញាត្តឲ្យក្រុមហ៊ុនដើរតួនាទី​ជំនួសអ្នកវិនិយោគ នៅក្នុងការសម្រេចចិត្តទិញឬលក់ផលិតផល ដែលពួកគេទិញនោះឡើយ។

ករណីមិនមានហានិភ័យ

ដោយសារការជួញដូរឧបករណ៍និស្សន្ទន៍នេះ មានហានិភ័យខ្ពស់បែបនេះ​ហើយ ទើបគណកម្មការមូលបត្រកម្ពុជាបានតម្រូវឲ្យក្រុមហ៊ុនផ្តល់សេវាកម្មជួញដូរ ឬវិនិយោគលើវិស័យនេះ បណ្តុះបណ្តាលអតិថិជនរបស់ខ្លួនឲ្យយល់ច្បាស់ពី ការជួញដូរឧបករណ៍និស្សន្ទន៍នេះជាមុនសិន មុនពេលឲ្យពួកគេសម្រេចចិត្តវិនិយោគឬអត់។

លោក ស៊ូ សុជាតិ បានពន្យល់ថា អ្នកជួញដូរឬវិនិយោគលើឧបករណ៍និស្សន្ទន៍ មិនត្រូវពឹងផ្អែកលើក្រុមហ៊ុន ដែលខ្លួនបានវិនិយោគជាមួយធ្វើការសម្រេចចិត្តជំនួសឡើយ ប៉ុន្តែត្រូវធ្វើការជាអ្នកសម្រេចចិត្តដោយខ្លួនឯង ហើយអ្នកវិនិយោគក្នុងវិស័យនេះ ត្រូវមានពេលវេលាជាមួយនឹងការងារនេះ ព្រោះការតាមដាន​មើលការវិវត្តន៍នៃតម្លៃឧបករណ៍និស្សន្ទន៍ទាំងនេះ ធ្វើឡើងតាមប្រព័ន្ឋអនឡាញ ហេតុនេះការតាមដានជាប់ជាប្រចាំ នូវការផ្លាស់ប្តូរហាងឆេងឧបករណ៍ដែ​លខ្លួនជួញដូរមានសារៈសំខាន់ណាស់ ដើម្បីអាចសម្រេចចិត្តលក់ឬរក្សាទុកនូវ​ការវិនិយោគរបស់ខ្លួន ពេលហាងឆេងមាស ប្រាក់ ឬរូបិយប័ណ្ណអ​ន្តរជាតិឡើងឬចុះថ្លៃដោយហានិភ័យពីទីផ្សារសាកលណាមួយ៕

 ដោយដែន ចែងចាំង

ភ្នំពេញ តើអ្នកដឹកអ្វីខ្លះហើយពីធនធានរ៉ែរបស់កម្ពុជា ដែលបានរកឃើញ និងទាញយកមកប្រើប្រាស់ និងរ៉ែមួយចំនួនទៀត មិនទាន់បានទាញយកមកប្រើប្រាស់នៅឡើយនោះ ?

ពាក់ព័ន្ឋនឹងធនធានរ៉ែកម្ពុជា ត្រូវបានរកឃើញ រដ្ឋមន្រ្តីក្រសូងរ៉ែ និងថាមពលលោក ស៊ុយ សែម បានថ្លែងឱ្យដឹងថា វិស័យរ៉ែនៅកម្ពុជាមានច្រើនប្រភេទ ដូចជា រ៉ែលោហៈ រ៉ែមាស រ៉ែអុកស៊ីត រ៉ែដែក សំណរ សង្គ័សី រ៉ែធ្យូងថ្ម រ៉ែកំបោរ និងរ៉ែសំណង់ជាដើម ក្នុងនោះរ៉ែសំណង់កំពុងជួយផ្គត់ផ្គង់ នៅក្នុងវិស័យសំណង់ជាច្រើន គឺស្របពេលដែលកម្ពុជា កំពុងមានការរីកចម្រើនលើផ្នែកវិស័យនេះ ។ លោកបន្តថា ចំណែកប្រភេទរ៉ែសំណង់រួមមាន ថ្ម គ្រួស ខ្សាច់ កម្ពុជាក៏បានបម្រើតាមសេចក្តី ត្រូវការលើវិស័យសាងសង់ដូចជា ការសាងសង់អាគារ ផ្លូវ ស្ពានជាដើម គឺបានបម្រើតាមសេចក្តីត្រូវការគ្រប់គ្រាន់ ពោលគឺពុំមានឧបសគ្គធ្វើឱ្យខ្វះខាតនៅក្នុងវិស័យនេះឡើយ។

យោងតាមរបាយការណ៍របស់ក្រសួងនេះបានឱ្យដឹងថា កម្ពុជារំពឹងទទួល​បានផលចំណូលពីធនធានរ៉ែ ប្រមាណ១៧លានដុល្លារនៅឆ្នាំ២០១៧នេះ។

លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា ការទាញយកធនធានរ៉ែនៅកម្ពុជាមិន​ទាន់បានអស់សក្តានុពល និងប្រើប្រាស់ឱ្យមានប្រសិទ្ឋភាពនៅឡើយទេ ដោយ​សារកម្ពុជាមិនទាន់មានច្បាប់ និងបទដ្ឋានគតិយុត្តិសមស្រប និងគ្រប់គ្រាន់ដើម្បីគ្រប់គ្រងវិស័យនេះនៅឡើយទេ។ លោកបន្តថា “កម្ពុជាត្រូវមានច្បាប់ និងបទដ្ឋានគតិយុត្តិនានា ដើម្បីធ្វើឲ្យប្រាកដថាធនធានរ៉ែ ដែលកម្ពុជាមាន ត្រូវទាញយកមកប្រើប្រាស់ដោយប្រសិទ្ឋ​ភាព និងចំណូលពីវិស័យនេះមានតម្លាភាព”៕

 បុរស វុត្ថា

ភ្នំពេញ កម្ពុជាមិនស្ថិតក្នុងស្ថានភាពបច្ចុប្បន្នទេ ទោះជាសេដ្ឋកិច្ចសម្រេចបានកំនើនល្អប្រសើរខ្លាំងក្តី ប៉ុន្តែប្រទេសនេះត្រូវកសាងហេដ្ឋារចនាសម្ព័ន្ឋតភ្ជាប់ជាច្រើនទៀត ពិសេសប្រទេសនេះ នឹងមានខ្សែរថភ្លើងល្បឿនលឿន ឆ្លងកាត់ក្នុងប្រទេសជាមួយប្រទេសក្នុងតំបន់ និងតភ្ជាប់ទៅកាន់ពិភពលោកក្រោយឆ្នាំ ២០៣០ខាមុខនេះ។

យោងតាមឯកសារទាក់ទងនឹងគោលនយោបាយផ្លូវសូត្ររបស់ប្រទេសចិន ដែលគេហ ទំព័រpropertyarea.asiaទើបទទួលបានក្នុងសប្តាហ៍នេះបានឲ្យដឹងា ប្រទេសមួយក្នុងចំណោមប្រទេសដែលកំពុងរីកចម្រើន និងមានការអភិវឌ្ឍន៍គួរអោយកត់សម្គាល់នោះ គឺប្រទេសកម្ពុជាដែលមានទីតាំងស្ថិតនៅជាប់នៃប្រទេសឡាវ វៀតណាម ​និងប្រទេសថៃ។ ប្រទេសកម្ពុជាកំពុងតែមានសេដ្ឋកិច្ចកំពុងរីកចម្រើន ហើយគម្រោងផ្លូវរថភ្លើងរត់ល្បឿនលឿន នឹងត្រូវគេតភ្ជាប់មកកាន់ប្រទេសមួយនេះនាពេលខាងមុខនេះ។ ផ្លូវរថភ្លើងថ្មីជាចច្រើនខ្សែនឹងជួយពន្លឿនសេដ្ឋ​កិច្ចប្រទេសកម្ពុជាអោយកាន់តែមានការរីកចម្រើនបន្ថែមទៀត។

បើទោះបីប្រទេសកម្ពុជាមានសេដ្ឋកិច្ចលូតលាស់ខ្លាំងយ៉ាងណាក៏ដោយចុះ ក៏ប្រទេសមួយនេះ ត្រូវការកសាងហេដ្ឋារចនាសម្ព័ន្ធនានាដូចផ្លូវថ្នល់​ ផ្លូវរថភ្លើង និងផ្លូវទឹកដើម។ ផ្លូវទឹកនៅតាមដងទន្លេសាប ក៏បានជម្រុញអោយវិស័យសេដ្ឋកិច្ចប្រទេសកម្ពុជា មានការរីកចម្រើនខ្លាំងណាស់ដែរ។

សកម្មភាពការធ្វើពាណិជ្ជកម្មក្នុងទីក្រុងភ្នំពេញក៏កាន់តែមមាញឹក ហើយផ្លូវសំខាន់ៗក៏ត្រូវបានពង្រីក​ ជាពិសេសគឺកជួសជុលឡើងវិញ នៅផ្លូវរថភ្លើងដើម្បីតភ្ជាប់ទៅកាន់ខេត្តនានាក្នុងការជំនួសដល់ការដឹកទំនិញនាំចូលនាំចេញ។ ផែនការមេតភ្ជាប់ផ្លូវរថភ្លើងត្រូវបានគេរៀប​ចំតភ្ជាប់កាន់នៃព្រុំដែនប្រទេសជិតខាង ទិសដៅទី១ ការអភិវឌ្ឍន៍ផ្លូវរថភ្លើងគឺជាគោលនយោ​បាយជាតិ និង ការរីកចម្រើនសេដ្ឋកិច្ច គម្រោងអភិវឌ្ឍផ្លូវរថផ្លូវភ្លើងនេះ សម្រាប់អោយមានការរីកចម្រើនសេដ្ឋកិច្ច និងគោលនយោបាយជាតិ ជាពិសេសគឺសមាហរណកម្មសេដ្ឋកិច្ចជាតិនតាមរយៈផ្លូវរថភ្លើងនឹងត្រូវគេតភា្ជប់ផងដែរទៅកាន់ទីក្រុង និងខេត្តនានាក្នុងប្រទេសកម្ពុជា។

ទិសដៅទី២ ការអភិវឌ្ឍផ្លូវរថភ្លើង បានផ្តល់ការរីកចម្រើនសេដ្ឋកិច្ចក្នុងស្រុក និងកាត់បន្ថយភាពក្រីក្រ តាមរយៈការពង្រឹងសេដ្ឋកិច្ចក្នុងស្រុកអោយមានការកើនឡើង។ ដូច្នេះហើយទើបរដ្ឋាភិបាល មានគម្រោងតភ្ជាប់ផ្លូវរត់ភ្លើងទៅកាន់ខេត្តសំខាន់ៗ និងទៅកាន់ទីជនបទ ទិស

ដៅទី ៣ ការកសាងប្រពន័្ធផ្លូវដឹកជញ្ជូនអន្តរជាតិ សម្រាប់ការរីកចម្រើនសេកិច្ច និងសហប្រតិ​បត្តិការអន្តរជាតិផ្លូវ ក្នុងការកសាងផ្លូវល្បឿនលឿន និងទិសដៅទី៤កសាងផ្លូវរថភ្លើងល្បឿនអោយមានប្រសិទ្ធិភាព និង​ប្រព័ន្ធដឹកជញ្ជូនដែលមានតម្លៃទាបទៅកាន់អន្តរជាតិ។

ឯកសារដដែលបានបង្ហាញថា ប្រទេសកម្ពុជាមានផែនការមេក្នុងការពង្រីផ្លូវរថភ្លើងឆ្លងកាត់ខេត្តក្រុងនានាក្នុងប្រទេស ជាពិសេសបានជួសជួសជុលផ្លូវមួយចំនួនរួចហើយ និងបន្តជួសជុលទៀតថែមទៀត ជាពិសេស ខ្សែរថភ្លើងA និងB បានជួសជុលរួចហើយគឺពីភ្នំពេញទៅកាន់ខេត្តព្រះសីហនុ និងពីភ្នំពេញទៅកាន់ព្រុំដែនប្រទេសថៃ ហើយខ្សែរថ្មីមួយទៀតភ្ជាប់ពីភ្នំពេញទៅកាន់ខេត្តសៀមរាប ព្រមទាំងមានខ្សែររថភ្លើងទៅប្រទេសឡាវ ក៏ស្ថិតនៅក្នុងផែន​ការមេដែរ។ បើនិយាយដោយរួមទៅមានខ្សែរថភ្លើងមានចំនួន៨ អាចនឹងកើតមាននៅក្នុងប្រទេសកម្ពុជា ទៅកាន់បណ្តារខេត្តនានាទៅកាន់ប្រទេសជាប់ព្រុំដែន ដើម្បីអោយសន្ទុះសេដ្ឋកិច្ចមានការរីកចម្រើន។

ខ្សែរថភ្លើងចំនួនពីរ នឹងដាក់អោយដំណើរខ្លះៗមកហើយ​ ក្នុងរយៈពេលដខ្លីចាប់ពីឆ្នាំ ២០១៤ – ២០២០ និងខ្សែរផ្សេងទៀត នឹងនិងបញ្ចប់នៅឆ្នាំ ២០២១-២០៣០ ហើយខ្សែរបន្ទាប់មានរយៈពេលយូរគឺចាប់ពីឆ្នាំ២០៣១៕

ដោយ៖ គង់ សូរិយា

ភ្នំពេញ៖ ជា​មនុស្ស​មាន​ឥ​ទ្ឋិ​ពល​ខ្លាំង​ក្នុង​ពិភព​ជំនួញធំៗនៅ​កម្ពុជា លោក​ឧកញ៉ា ​ពុង ឃាវ​សែ ​ជា​បុគ្គល​ជោគជ័យ​បំផុត ក្នុង​មុខ​ជំនួញ​នៅ​កម្ពុជា ដោយ​លោក​មាន​ក្រុមហ៊ុន និង​គ្រឹះស្ថាន​ហិរញ្ញវត្ថុ​មិនតិចជាង ១០នៅក្នុង​ដៃ​ឡើយ។

តើ​លោក​ក្លាយជា​អ្នកមាន​ដោយ​របៀប​ណា និង​មាន​យុ​ទ្ឋ​សាស្ត្រ​បែបណា ដើម្បី​ក្លាយជា​អ្នកមាន? លោក​ឧកញ៉ា​ ពុង ឃាវ​សែ ​បាន​ថ្លែងថា លោក​តែងតែ​គោរព​គោលការណ៍​បី​ចំណុច​នោះ ក្នុង​មុខ​ជំនួញ​របស់លោក ដើម្បី​សម្រេចបាន​ជោគជ័យ ដូចជា ទី១ ភាពស្មោះត្រង់​ជាមួយនឹង​អតិថិជន ជាមួយ​ដៃគូ​វិនិយោគ​ធ្វើ​ឲ្យ​គេ​ជឿជាក់​លើ​យើង មិន​បោកប្រាស់​គេ ទី២ ភាព​អំណត់​ឧស្សាហ៍​ព្យាយាម​ក្នុង​ការងារ និង​ទី៣ត្រូវ​ចេះ​ច្នៃប្រឌិត​ចាប់យកឱកាសល្អៗដើម្បី​វិនិយោគ។

ទោះជា​យ៉ាងណា​លោក​ឧកញ៉ា ក៏បាន​ត្អូញត្អែរ​ពី​ភាពលំបាក ក្នុង​ភាពជា​អ្នកមាន​ស្តុកស្តម្ភ​របស់លោក​ផងដែរ​ថា “ធ្វើជា​អ្នកមាន​មិនមែន​ស្រួល​ដូច​ការគិត​នោះទេ។ ធ្វើការ​គ្មាន​ពេល​សម្រាក​ទេ កុំថាឡើយ ថ្ងៃ​សៅរ៍ ថ្ងៃអាទិត្យ​នោះ មិន​ថា​យប់ មិន​ថា​ថ្ងៃ។

លោក​បន្តថា សព្វថ្ងៃ​ខ្ញុំ​ប្រឹង​ណាស់ ហត់​ណាស់ ប៉ុន្តែ​កូន​ខ្ញុំគេ​មិន​សរសើរ​ទេ ព្រោះ​ឪ​វា​ធ្វើការ​នឿយ​ពេក។ ធ្វើជា​ថៅកែ​គេ មេដឹកនាំ​គេ ត្រូវតែ​ធ្វើជា​គំរូ​ល្អ​ដល់​ពួកគេ។លោក​បន្តថា “ខ្ញុំ​មាន​សម្ពាយ​របស់ខ្ញុំ​ធ្ងន់​ណាស់ ព្រោះ​ត្រូវ​ចិញ្ចឹម​បុគ្គលិក​ខ្ញុំ​ជាង ១៤.០០០នាក់ និង​សម្រាប់​អភិវឌ្ឍ​ប្រទេសជាតិ​ខ្ញុំ”៕

យ៉ាងយូរបំផុត​នៅត្រឹម​អំឡុង​ខែវិច្ឆិកា ឆ្នាំ2017 ឆាប់ៗខាងមុខនេះ ខេត្ត​មណ្ឌល​គី​រី នឹង​ត្រូវបាន​កែប្រែ​មុខមាត់​ថ្មី ដែល​ពោរពេញ​ទៅដោយ​សោ​ភ័​ណ្ឌ​ភាព និង​ស័ក្ដិ​សមជា​តំបន់​ទេសចរណ៍​គួរ​ជាទី​ទាក់ទាញ​ប្រចាំ​ភូមិភាគ​ឦសាន​នៃ​ប្រទេស ជាមួយនឹង​ការបង្កើត​នូវ​សួន​កម្សាន្ត​ឧទ្យាន​ដ៏​ធំ​លើកដំបូង​បង្អស់​មិន​ធ្លាប់មាន ។ សម្រាប់​ការបង្កើតឱ្យមាន​ឧទ្យាន​កម្សាន្ត​ដ៏​ធំ​ជា​ប្រវត្តិសាស្ត្រ​ប្រចាំខេត្ត​មួយ​នេះ គឺជា​ការចំណាយ​ថវិកា​ពី​សំណាក់​រាជរដ្ឋាភិបាល​ក្នុងការ​សាងសង់ សរុប​ប្រមាណ​ជាង3លាន​ដុល្លារ នៅលើ​ផ្ទៃដី​ប្រមាណ20ហិកតា ដែលជា​ទីតាំង​អតីត​ព្រលានយន្តហោះ​ប្រចាំខេត្ត​នេះ ស្ថិតនៅ​ភូមិ​ដោះ​ក្រមុំ សង្កាត់​សុខដុម ក្រុង​សែន​មនោ​រម្យ ។

ជាមួយនឹង​សេចក្ដីសម្រេច​ពី​សំណាក់​រាជរដ្ឋាភិបាល​ទៅលើ​ការអភិវឌ្ឍ​បង្កើតឱ្យមាន​តំបន់​កម្សាន្ត​ខាងលើនេះ លោក យស់ ឆោម​ណា​រ៉ា​ឌី អនុរដ្ឋលេខាធិការ​នៃ​ក្រសួង​រៀបចំ​ដែនដី​នគរូបនីយកម្ម និង​សំណង ក៏បាន​ធ្វើ​ការស្នើ​ដល់​អជ្ញាធរ​ខេត្ត ក៏ដូចជា​មន្ទីរ និង​អង្គភាព​ពាក់ព័ន្ធ ទាំងអស់​ជួយ​សម្របសម្រួល​ចូលរួម​ព​ន្លឿ​ន​គម្រោង​សាងសង់ ជាមួយនឹង​ការស្វែងរក​កូន​រុក្ខជាតិ ក៏ដូចជា​ដើមឈើ​ដែល​ជាការ​សម្គាល់​ពី​អត្តសញ្ញាណ​របស់​ខេត្ត ក៏ដូចជា​របៀបរបប​នៃ​ការរៀបចំ​ទាំងឡាយណា​ដែល​អាច​បញ្ជាក់​ពី​ប្រពៃណី ទំនៀម ទម្លាប់ របស់​បងប្អូន​ជនជាតិភាគតិច​ផងដែរ ។

សម្រាប់​សួនឧទ្យាន​ដែល​អាចជួយ​លើកមុខ​មាត់​របស់​ខេត្ត​មណ្ឌល​គី​រី​មួយ​នេះ ត្រូវបាន​រៀបចំឡើង​យ៉ាង​ប្រណីតភាព ដោយ​ការ​ក្រាល​ថ្មី​ក្រា​នី​ត មាន​ដាំ​ស្មៅ និង​សួនច្បារ​ពោរពេញ​ទៅដោយ​ផ្កា​ចម្រុះ​ពណ៌ មាន​ប្រពន្ធ​លូ​រំដោះ​ទឹក មាន​ផ្លូវ​ជុំវិញ​ដោយមាន​បង្គោល​ភ្លើង​បំភ្លឺ​ផ្លូវ មាន​កន្លែង​ក្មេង​លេង ទីលាន​សម្រាប់​ហាត់ប្រាណ​សាធារណៈ កន្លែង​អាហារ​ដ្ឋា​ន និង​មាន​បង្គន់​អនាម័យ​ផងដែរ ៕

ដោយ​សម្លឹង​ឃើញ​ពី​ភាព​ប្រឈម​នឹង​បញ្ហា​ជាច្រើន​ដែល​តែង​កើតមានឡើង​ពាក់ព័ន្ធ​ទៅនឹង​ការប្រកួតប្រជែង​លើ​វិស័យ​ពាណិជ្ជ​នៅក្នុង​តំបន់​អាស៊ាន​ទាំងមូល​នោះ កាលពី​ម្សិលមិញ​នេះ មន្ត្រី​ជំនាញ​មកពី​បណ្តា​ប្រទេស​នានា ដែលជា​សមាជិគ​អាស៊ាន​បានមក​ជួបជុំគ្នា ដើម្បី​ធ្វើការ​ពិគ្រោះ​យោបល់​ស្វែងរក​ដំណោះស្រាយ​ដ៏​ល្អប្រសើរ ដោយ​ផ្តើម​ពី​ការរៀបចំ​បង្កើតជា​ស្ថាប័ន​ផ្លូវការ ដែលមាន​តម្លាភាព​ក្នុងការ​គ្រប់គ្រង​ក្រុមហ៊ុន​ពាណិជ្ជកម្ម​នានា លើ​ការប្រកួតប្រជែង​ស្ថិតនៅក្រោម​ច្បាប់ និង​តាម​គោល​ការ​ទីផ្សារសេរី ស្របតាម​ស្ថានភាព​សេដ្ឋកិច្ច ព្រមទាំង​បទបញ្ញត្តិ​នានា​ដែល​បានចែង​ទុក​ផងដែរ ។

លោក គឹម មាស​សុខ​សីហា អគ្គនាយករង​នៃ​អគ្គនាយកដ្ឋាន​កាំកុងត្រូល និង​ជាទី​ប្រឹក្សា​ក្រសួងពាណិជ្ជកម្ម​បានលើកឡើង​ថា ការបង្កើតឱ្យមាន​កិច្ច​ជំនួប​នេះ ក៏​ព្រោះតែ​កន្លងមក​យើង​តែង​សង្កេតឃើញ​កើតមាន​នូវ​បញ្ហា​មួយចំនួន ដែល​អាច​ជះឥទ្ធិពល​ទៅដល់​បណ្តា​ក្រុមហ៊ុន​មួយចំនួន ដែល​ខ្វះ​លទ្ធភាព និង​បទពិសោធន៍។ ប៉ុន្តែ​បន្ទាប់ពី​បាន​ឆ្លងកាត់​កិច្ចពិភាក្សា​គ្នា​យ៉ាង​លម្អិត​ពី​សំណាក់​អ្នកជំនាញ យើង​ទទួលបាន​ចំណេះដឹង និង​បទពិសោធន៍ថ្មីៗ ឈានដល់​ការរៀបចំ​បង្កើត​ស្ថាប័ន និង​តាក់តែង​ច្បាប់​ប្រកួតប្រជែង​របស់ខ្លួន ដើម្បី​អនុវត្ត​ប្រកបទៅដោយ​ប្រសិទ្ធភាព​ខ្ពស់ ជាពិសេស​ប្រទេស​កម្ពុជា ដែល​ស្ថិតនៅក្នុង​តំណាក់កាល​លើកដំបូង។

លោក​បាន​បញ្ជាក់ទៀតថា នៅពេល​កម្ពុ​ជាមាន​ស្ថាប័ន​គ្រប់គ្រង​ការប្រកួតប្រជែង នោះ​វា​នឹង​កាន់​តែមាន​ភាព​សំខាន់​ក្នុង​ការជំរុញឱ្យ​បរិយាកាស​វិនិយោគ​កាន់​តែមាន​ភាពរឹងមាំ ហើយ​វា​ក៏បានផ្តល់​ជា​អត្ថប្រយោជន៍​សម្រាប់​អតិថិជន ដែលជា​អ្នកប្រើប្រាស់​ផ្ទាល់ ទាំង​ប្រភេទ​ទំនិញ ទាំង​ប្រភេទ​ជា​សេវាកម្ម ក៏ដូចជា​គុណភាព​ផលិតផល​ខ្ពស់ តម្លៃថោក ផ្តល់​ជម្រើស​កាន់តែច្រើន​សម្រាប់​អតិថិជន ។ ក្រៅពីនេះ ស្ថាប័ន​មួយ​នេះ​ថែមទាំង​ជួយ​បង្កើន​ផលិតភាព​នៃ​ការច្នៃប្រឌិត​ខ្ពស់ ដែល​វា​ជា​ធាតុ​ផ្សំ​មួយ​យ៉ាងសំខាន់​របស់​សេដ្ឋកិច្ចជាតិ​ឱ្យ​កាន់​តែមាន​ភាពល្អប្រសើរ​ផងដែរ ។

គួរបញ្ជាក់​ផងដែរ​ថា សម្រាប់​ការរៀបចំ​បង្កើត​ស្ថាប័ន និង​ព្រាង​ច្បាប់​លើ​ការប្រកួតប្រជែង​ពាណិជ្ជ​កម្មនេះ គឺជា​បន្ទុក​របស់​អគ្គ​នាយកដ្ឋាន​កាំកុងត្រូល​នៃ​ក្រសួងពាណិជ្ជកម្ម ដោយមាន​ជំនួយ​ផ្នែក​បច្ចេកទេស និង​ជំនាញការ​ច្បាប់​ប្រកួតប្រជែង​មកពី​អូស្ត្រាលី ៕