ដោយ ដែន ចែងចាំង

ភ្នំពេញ៖ អាគារការិយាល័យជាច្រើនទៀត នឹងដាក់ដំណើរការក្នុងទីផ្សារនៅ​ឆ្នាំនេះ ជាមួយនឹងភាពចម្រុះនៃការិយាល័យធម្មតា និងការិយាល័យបែបសហកម្មសិទ្ឋ។

ក្នុងចំណោមអាគារការិយាល័យធម្មតាចំនួនពីរ អាគារ​ការិយាល័យ Key Stone ទំហំ១៥,០០០ម៉ែត្រការ៉េ និងគំរោង Oral Office Tower ទំហំ៥០០០ម៉ែត្រការ៉េនឹងដាក់ចូលទីផ្សារផងដែរ ដែលជាការបន្ថែមទំហំការិយាល័យមានស្រាប់៣៣៥,០០០ម៉ែត្រការ៉េ។ ក្នុងនោះអាគារការិយាល័យកម្រិតA មានចំនួន១៦ភាគរយ អាគារការិយាល័យកម្រិតB មានទំហំ២០ភាគរយ និងអាគារការិយាល័យកម្រិតCមានទំហំ៦៤ភាគរយ នៅក្នុងទីផ្សារការិយាល័យសរុបនៅកម្ពុជា។នេះបើតាមរបាយការណ៍របស់ CBRE Cambodia។

របាយការណ៍ដដែលបានបង្ហាញថា អាគារការិយាល័យកម្រិតA មានតម្លៃចន្លោះពី២៨ ដល់៣០ដុល្លារ អាគារការិយាល័យកម្រិតB មានតម្លៃចន្លោះ១៨ទៅ​២៥ដុល្លារ និងអាគារការិយាល័យកម្រិតC មានតម្លៃជួលចន្លោះពី១០ ទៅ១៥ដុល្លា​រក្នុងមួយម៉ែត្រការ៉េ។​

យោងតាមរបាយការណ៍ CBRE Cambodia បានរកឃើញផងដែរថា ទីផ្សារ​ការិយាល័យកម្រិតB នៅតែមានភាពពេញនិយមជាងគេនៅក្នុងទីផ្សារកម្ពុជា ដោ​យសារការិយាល័យបែបនេះមានចំនួនច្រើន និងសមស្របសម្រាប់ក្រុមហ៊ុនថ្មី និងក្រុមហ៊ុនខ្នាតមធ្យម ដែលពួកគេមិនចង់ចំណាយច្រើនលើការិយាល័យកម្រិ​ត A ដែលមានតម្លៃថ្លៃ។

លោកគុយ វ៉ាតអគ្គនាយកក្រុមហ៊ុន VTRUST GROUP ដែលគ្រប់គ្រងការិយាល័យកម្រិតB ចំនួនបួននៅទីក្រុងភ្នំពេញបានថ្លែងថា ទីផ្សារការិយាល័យនៅតែមានកំណើនល្អប្រសើរ ដោយសារការកើនឡើងនូវចំនួន ក្រុមហ៊ុនអន្តរជា​តិថ្មីៗ និងក្រុមហ៊ុនក្នុងស្រុកកើនឡើងផងដែរ ជាហេតុជំរុញឲ្យទីផ្សារការិយា​ល័យនៅតែមានភាពជោគជ័យក្នុងទីផ្សារកម្ពុជា។

លោកបន្តថា “ដោយសារភាពសមរម្យផ្នែកតម្លៃ បានធ្វើឲ្យការិយាល័យក ម្រិ​តB នៅតែមានភាពពេញនិយម និងប្រើប្រាស់ច្រើនក្នុងចំណែកទីផ្សារការិ​យាល័យនានានៅកម្ពុជា”៕

ដោយ គង់ សូរិយា

ភ្នំពេញ៖ គំរោងទីក្រុងនាគរាជសម្តេចតេជោហ៊ុន សែននាយករដ្ឋមន្រ្តីកម្ពុជា ដែលស្ថិតក្នុងមន្ទិលពីទីតាំងពិតប្រាកដនៅកន្លែងណា ពេលនេះព៌តមានជាក់លាក់បានបង្ហាញជាផ្លូវការហើយ។

រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់លោក ភឿង សុភ័ណ្ឌបានមានប្រសាសន៍ឲ្យដឹងនាពេលថ្មីៗនេះថា ទីក្រុងនាគរាជសម្តេចតេជោ ដែលគ្រោងចំណាយថវិកាវិនិយោគ៨០ពាន់លានដុល្លារអាមេរិក និងស្ថិត​នៅលើផ្ទៃដីប្រមាណ៣៧,០០០ហិកតា ស្ថិតនៅស្របតាមបណ្តោយផ្លូវជាតិលេខ៦អា និងបន្តរហូតដល់ផ្លូវជាតិលេខ២១ ដែលស្ថិតនៅចំណុចថ្នល់បំបែករវាងផ្លូវជាតិលេខ៦អា ឆ្ពោះមកកាន់ផ្លូវជាតិលេខ៥ ហើយអូសតាមបណ្តោយផ្លូវជាតិលេខ៥ មកកាន់រាជធានីភ្នំពេញ។

លោកបន្តថា “ខ្ញុំមិនចង់បញ្ចេញព៌តមាននេះទេ ដោយសារព្រួយបារម្ភពីដី ឡើងថ្លៃនៅតំបន់នេះ ដែលរារាំងដល់ការអភិវឌ្ឍន៍គំរោងដ៏ធំនេះ”។លោកបន្តថា “តាមប្លង់ ដែលសម្តេចតេជោបានអនុញ្ញាត្តឲ្យធ្វើការសិក្សា គំរោងទីក្រុងនាគរាជ សម្តេចតេជោ មានមជ្ឈមណ្ឌលពាណិជ្ជកម្មសម្តេចតេជោមួយ ដែលជាមជ្ឈមណ្ឌ​លពាណិជ្ជកម្ម ស្ថិតនៅកណ្តាលទីក្រុងនេះ ដែលមានផ្សារទំនើប សាលារៀនអន្តរជាតិ មជ្ឈ​មណ្ឌលពាណិជ្ជកម្មកំពស់៦០០ម៉ែត្រ កំពង់ផែអន្តរជាតិ និងសេវាកម្មជាច្រើនទៀត”។

កម្ពុជាខកខានសាងសង់ទីក្រុង៥៨០ឆ្នាំមកហើយ ហេតុនេះទើបកម្ពុជាត្រូវ​កសាងទីក្រុងនេះឡើង ដើម្បីឆ្លើយតបនឹងកំណើនសេដ្ឋកិច្ច ប្រជាសាស្រ្ត និងជា​ការដឹងគុណដល់សម្តេ​ចតេជោហ៊ុន សែនដែលហ៊ានពលីជីវិត ដើម្បីភាពសុខសាន្តរបស់ប្រជាពលរដ្ឋកម្ពុជា ពិសេស សម្តេចបាននាំមកនូវសុខសន្តិភាព និងការអភិវឌ្ឍន៍ប្រទេសជាតិរហូតមកដល់សព្វថ្ងៃនេះ។ លោកភឿង សុភ័ណ្ឌបញ្ជា​ក់ឲ្យដឹង។

ហេតុអ្វីបានជាលោកសម្រេចជ្រើសរើសទីតាំងនេះ ក្នុងគំរោងកសាងទីក្រុ​ងនាគរាជសម្តេចតេជោ លោកភឿង សុភ័ណ្ឌបានបន្តថា ដោយសារទីតាំងនេះ​បើមើលតាមយន្តហោះ មានរូបរាងនិងសណ្ឋានដី ដូចជារូបនាគ ហើយជាទីតាំង​បើតាមក្បួនចិន ជាទីតាំងមានហុង ស៊ុយល្អបំផុត ព្រោះទីតាំងនេះមានទន្លេព័ន្ឋជុំវិញ ដែលផ្តល់ជាមធ្យោបាយដឹកជញ្ជូន និងផ្តល់លក្ខខ័ណ្ឌអាកាសធាតុល្អប្រសើរ សម្រាប់ភាពសុខដុមរមនា ដល់ប្រជាជននៅក្នុងទីក្រុងនេះនាពេលអនាគត។

លោកបន្តថា មានតែមិត្តចិនតែមួយប៉ុណ្ណោះ ដែលអាចជួយកសាងទីក្រងនេះបានទទួលជោគជ័យ ព្រោះគំរោងនេះធំណាស់ និងចាយលុយច្រើនណាស់ ដូច្នេះ ដើម្បីគាំទ្រសម្តេចនិងទុកជាកេរ្ត៍តំណែល ក៏ដូចជា បង្កើននូវមិត្តភាព និងកិច្ចសហប្រតិបត្តិការរវាងប្រទេសទាំងពីរ ដែលសម្តេចបានគាំទ្រគោលនយោ​បាយចិនតែមួយ រដ្ឋាភិបាលចិនគួរតែជួយកសាងទីក្រុងនេះ ឲ្យលេចរូបរាងឡើង​ ដើម្បីជាការអបអរសាទរនូវសមិទ្ឋិផល នៃកិច្ចសហប្រតិបត្តិការរវាងរដ្ឋាភិបាល​ប្រទេសទាំងពីរ។

តាមប្លង់មេរបស់ទីក្រុងនេះ នឹងត្រូវកសាងហេដ្ឋារចនាសម្ព័ន្ឋលើគោក ក្រោមដី និងលើអាកាសដែលនឹងមិនឲ្យ មានបញ្ហាកកស្ទះចរាចរក្នុងទីក្រុងនេះរយៈពេលរាប់រយឆ្នាំ។

លោកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបានថ្លែងថា លោកមិនទាន់មានជំនឿលើ ផែនការកសាងទីក្រុងនេះនៅឡើយទេ ប៉ុន្តែ​លោករង់ចាំមើលជាក់ស្តែង ប្រសិនជាវាកើតឡើងមែនវាជារឿងអបអរសាទរ ហើយលោកសូមចូលរួមអបអរសាទរផងដែរ។

លោកបន្តថា “បើសិនជាទីក្រុងនេះកើតឡើងមែន វាជាការគួរឲ្យរីករាយ ហើយខ្ញុំពិតជាចូលរួមអបអរសាទរ ព្រោះការអភិវឌ្ឍបែបនេះនឹងជួយជម្រុញការ​អភិវឌ្ឍន៍សេដ្ឋកិច្ចជាតិ”៕

ដោយ ដួង ចន្រ្ទា

ភ្នំពេញ៖ បុរី The Wood ស្ថិតនៅតាមបណ្តាយផ្លូវជាតិលេខ១ ក្នុងសង្កាត់​ព្រែ​ក​ឯង ខ័ណ្ឌ ច្បារអំពៅ​ បាន​ចាប់​ផ្តើមបើកការសាងសង់ ស្របពេលទីផ្សារលំ​នៅដ្ឋាននៅ​កម្ពុ​ជា​នៅតែមាន ភាពល្អប្រសើរ​នាឆ្នាំ២០១៨នេះ។

អ្នកស្រី Kaing Naykouy ជាគណៈគ្រប់គ្រងរបស់ Natha Residences បានឲ្យដឹងក្នុង​ពិធី​សម្ភោធបុរី The Woods កាលពីម្សិលម៉ិញនេះថា បុរី The Wood មានលំនៅដ្ឋានជាច្រើន ប្រភេ​ទ រួមមាន ផ្ទះល្វែងវីឡាកូនកាត់ វីឡាភ្លោះ និងវីឡាឃ្វីនចំនួន១០៨ផ្ទះ ដែលមាន ទំហំផ្ទៃដីសរុប៣,៥ហិកតា ស្ថិតនៅតាមបណ្តោយផ្លូវជាតិលេខ១ ភូមិមិត្តភាព សង្កាត់ព្រែក ឯង ខណ្ឌច្បារអំពៅ រាជធានីភ្នំពេញ។

អ្នកស្រីបន្តថា “ការវិនិយោគបុរីនេះ ជាការឈានជើងដំបូងរបស់ Natha Resident នៅ​លើ​ការអភិវឌ្ឍដ៏អស្ចារ្យ នៅក្នុងប្រទេសកម្ពុជាដែល សាងសង់ស្របតាមស្តង់ដា នៅផែនការ​ថវិ​កា​យ៉ាងរ៉ឹងមាំ ដើម្បីបំពេញតម្រូវការនិងទំនុកចិត្ត ពីអតិថិជនមកលើគេហដ្ឋាននៃបុរី”។  លោកស្រីបន្តថា “ការរចនាគេហដ្ឋាននេះ មិនត្រឹមតែ​ផ្តោតទៅលើភាពរឹ​ងមាំ​ត្រឹម​មួយរយៈ​ពេលនោះទេ តែជាការផ្តោតទៅលើភាពគង់វង្សយូរអ​ង្វែ​ង និងការរចនាម៉ូដទាំងផ្នែកខាងក្នុង និងខាងក្រៅស្របទៅតាមយុគ្គសម័យថ្មី”។

អ្នកស្រី Natha Residint បានបន្តថា ជាមួយនឹងការខិតខំប្រឹងយ៉ាងស្វិតស្វាញ ដើម្បី​ក្លាយ​​ជាអ្នក​អភិ​វឌ្ឍនាំមុខគេជាមួយនឹងគុណភាព គុណតម្លៃនិងមោទនភាពជាតិ។ ក្នុងនាម​ជា​ជនជាតិខ្មែរ យើងមានកិត្តិយសក្នុងការនាំមកនូវបុរី ដែលមានការរៀបចំ និងការរចនា​ប្រក​បដោយភាពច្នៃប្រឌិត ក្នុងការសាងសង់ដោយស្នាដៃកូនខ្មែរផ្ទាល់។

គម្រោងនេះអាចធ្វើបាន​ដោយភាពជោគជ័យ និងបន្តអនុវត្តឆ្ពោះទៅអនាគតជានិច្ច ដែលសបញ្ជាក់អំពីគោលបំណង ជម្រុញដល់កូនខ្មែរ ក្នុងការបណ្តុះស្មារតី និងជម្រុញទឹកចិត្ត អោយមានការវិវត្តនលើផ្នែកសំណង់។

លោក ច្រឹក សុខនីម អគ្គនាយកក្រុមហ៊ុនអចលនទ្រព្យ Century21 Mekongបានថ្លែងថា ទីផ្សារបុរីនៅកម្ពុជានៅតែមានភាពល្អប្រសើរ ទាំងលំនៅដ្ឋានសាងសង់ថ្មី នៅតាមបុរីនានា និង​លំនៅដ្ឋានទី២ ដែលអ្នកវិនិយោគមួយចំនួនទិញទុកលក់យកចំណេញក្តី ក៏ការលក់នៅតែ​ទទួលបានជោគជ័យ ប៉ុន្តែអ្វីសំខាន់នោះគឺ តើអ្នកអភិវឌ្ឍន៍បានគិតគូពីអតិថិជនគោលដៅ​យ៉ាងដូចម្តេច និងគិតគូពីគុណភាព និងសោភ័ណភាពសំណង់យ៉ាងដូចម្តេចផងដែរ មុន​ពេ​លវិនិយោគ ​ដើម្បីកំ​ណត់ភាពជោគជ័យរបស់ពួកគេនាពេលអនាគត។

លោកបន្តថា “បុរីដែលមានកេរ្ត៍ឈ្មោះល្អ មានសំណង់ប្រកបដោយគុណភាព និងសោ​ភ័​ណភាពល្អ តែងតែទទួលបានការគាំទ្រនិងជោគជ័យនៅលើទីផ្សារ”៕

ដោយ គង់ សូរិយា

ភ្នំពេញ៖ ទីផ្សារការិយាល័យថ្មីមួយ ជាការិយាល័យបែបសហកម្មសិទ្ឋបានឈានជើងចូលទីផ្សារកម្ពុជា សម្រាប់ឆ្នាំ២០១៨នេះ។ នេះបើតាមអ្នកជំនាញក្នុង​វិស័យនេះ។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodiaបានថ្លែងឲ្យដឹងតាមទូរស័ព្ទនាព្រឹកថ្ងៃទី១៣ កុម្ភៈនេះថា ការិយាល័យបែបសហ​កម្មសិទ្ឋទំហំ៦០,០០០ម៉ែត្រការ៉េ នឹងដាក់ចូលទីផ្សារនៅឆ្នាំនេះ។ វាជាប្រភេទនៃ​អាគារការិយាល័យបែបសហកម្មសិទ្ឋថ្មីមួយ នៅក្នុងទីផ្សារកម្ពុជា ខណៈការិ​យាល័យប្រភេទនេះ កំពុងដំណើរការយ៉ាងជោគជ័យនៅប្រទេសថៃ ម៉ាឡេស៊ី ហុងកុង និងប្រទេសសាំងហ្កាពួរជាដើម។

អ្នកនាងបន្តថា “វាជាបញ្ហាប្រឈមធំមួយនៅក្នុងទីផ្សារ ព្រោះអ្នកជួលភាគ​ច្រើននៅកម្ពុជា ពួកគេមិនសូវចង់ប្រើប្រាស់ការិយាល័យប្រភេទនេះនោះទេ”។ អ្នកនាងបន្ថែមថា “រហូតមកទល់ពេលនេះ ការិយាល័យទំហំ៣៨៥០,០០០ម៉ែត្រការ៉េរួចហើយ ដែលបាននិងកំពុងដាក់ជួលនៅក្នុងទីផ្សារកម្ពុជា”។

ការិយាល័យបែបសហកម្មសិទ្ឋ មានដូចជា អាគារ TK Royal One និងអាគារការិយាល័យជាច្រើនទៀតនៅទីក្រុងភ្នំពេញ៕

ដោយ ៖ រ៉ាវី

នៅមុននេះ តាមរយៈគណនីមួយដែលស្គាល់ថាជារបស់លោកឧកញ៉ា ម៉ុង រឹទ្ធី ដែលជាកំពូលអ្នកវិនិយោគលើវិស័យកសិកម្មធំជាងគេបង្អស់នៅកម្ពុជា រហូតជាប់រហស្សនាមថាជាស្ដេចកសិកម្មនៅស្រុកខ្មែរ បានសរសេរបង្ហាញពីគោលបំណងវិនិយោគ រួមជាមួយនឹងគម្រោងសាងសង់សំណងផ្ទះបែបប្រណិតសម្រាប់លក់ជូនអតិថិជនដែលមានចំណូលមធ្យម និងលើមធ្យម ដែលស្ថិតចម្ងាយប្រមាណជាង 50គីឡូម៉ែត្រពីរាជធានីភ្នំពេញ ខណៈដែលតំបន់នឹងត្រូវអភិវឌ្ឍជាសំណង់លំនៅដ្ឋានខាងលើនេះ មានទីតាំងស្ថិតនៅជិតតំបន់ធម្មជាតិ ភ្នំសែនដី ស្រុកសំរោងទង ខេត្តកំពង់ស្ពឺ នៅលើផ្ទៃដីសរុបជាង300ហិកតា ដោយផ្ទះមួយខ្នងត្រូវសង់នៅលើផ្ទៃដីទំហំ 1,200 ម៉ែត្រការ៉េ។

ផ្អែកតាមទំព័រគណនីដដែលបានបង្ហាញថែមទៀតថា ៖ «ដើម្បីកែប្រែលំនៅដ្ឋានប្រជាជនដែលរស់នៅតំបន់ទីជនបទឱ្យក្លាយទៅជាលំនៅដ្ឋានប្រកបទៅដោយផាសុកភាព ខ្ញុំបាន និងកំពុងតែរៀបចំផ្ទៃដីទំហំប្រមាណជាង300ហិកតា សម្រាប់សាងសង់លំនៅដ្ឋានលំដាប់មធ្យប់ក្នុងតម្លៃសមរម្យ នៅលើផ្ទៃដី1,200 ម៉ែត្រការ៉េ សម្រាប់ផ្ទះមួយខ្នងៗ រួមជាមួយនឹងសេវា ដាំ ថែទាំ ដើមឈើហូបផ្លែ មានទឹក ភ្លើង ប្រព័ន្ធសុវត្ថិភាព មានផ្លូវប្រវែងជាង40ម៉ែត្រ សម្រាប់ដើរ ឬជិះកង់ហាត់ប្រាណប្រកបដោយសុវត្ថិភាព។ មានភ្នំដែលខ្ញុំបានថែរក្សាទុក ដើមឈើប្លែកៗរាប់លានដើម ជាច្រើនប្រភេទ ដើមឈើមួយចំនួនបានបញ្ចេញផ្កាទៅតាមរដូវកាលគួរជាទីគយគន់។ មានសត្វព្រៃជាច្រើនប្រភេទ សត្វស្លាប សត្វព្រៃតូចធំ ជាច្រើនដែលរស់នៅតំបន់ភ្នំសែនដី ស្រុកសំរោងទង ខេត្តកំពង់ស្ពឺ ដែលមានចម្ងាយប្រមាណ 50គីឡូម៉ែត្រពីរាជធានីភ្នំពេញ ធ្វើដំណើរតាមផ្លូវជាតិលេខ4 ចំណាយពេលមិនដល់មួយម៉ោងផងនោះ » ។

គួរបញ្ជាក់ផងដែរថា សម្រាប់លំនៅដ្ឋានដែលនឹងត្រូវវិនិយោគដោយលោកឧកញ៉ាចិត្តធម៌ ម៉ុង រឹទ្ធី ដែលជាស្ដេចកសិកម្មនៅកម្ពុជាខាងនេះ អាចមានតម្លៃមិនលើសពី10ម៉ឺនដុល្លារនោះទេ ។ នេះបើតាមការបញ្ជាក់ប្រាប់តាមរយៈសំណេរឆ្លើយឆ្លងនៅលើគណនីដដែលនោះ ៕