ដោយ គង់ សូរិយា

ភ្នំពេញ៖ ក្រុមហ៊ុនពហុជាតិចំនួនបី គ្រោងវិនិយោគទឹកប្រាក់ ១០ប៊ីលានដុល្លារអាមេរិក ដើម្បីបង្កើតទីក្រុងរណបចំនួនពីរនៅកម្ពុជា ដែលមានមូលដ្ឋាននៅក្នុងខេត្តកណ្តាល និងខេត្តកំពង់ចាម។

យោងតាមសេចក្តីប្រកាសព៌តមានដែលបានចែកជូនអ្នកសារព៌តមាន ដែលបានចែកជូនបណ្តាញអ្នកសារព៌តមានកាលពីម្សិលម៉ិញបានឲ្យដឹងថា ក្រុមហ៊ុនចំនួនបីនោះរួមមាន ក្រុមហ៊ុនឆៃណា ប៉ៃជីង របស់សាធារណៈរដ្ឋប្រជាមានិតចិន ក្រុមហ៊ុន Zhuhai New Century របស់វៀតណាម និងក្រុមហ៊ុនរដ្ឋសាឌី Development របស់កម្ពុជា។ ក្រុមហ៊ុនទំាង៣ បានចុះកិច្ចព្រមព្រៀមជាមួយគ្នានៅរាជធានីភ្នំពេញ។

លោកឧកញ៉ា ហួត ឌី នាយកក្រុមហ៊ុនរដ្ឋសាឌី Development បានមានប្រសាសន៍ឲ្យដឹងកាលពីម្សិលម៉ិញថា ក្នុងពេលឆាប់ៗខាងមុខនេះ កម្ពុជានឹងបង្កើតទីក្រុងរណបចំនួន២ ដែលមានទីតំាងនៅខេត្តកណ្តាលមួយកន្លែង និងខេត្តកំពង់ចាមមួយកន្លែង លើទំហំផ្ទៃដីនៃទីក្រុងថ្មីទំាងពីរជិត២ម៉ឺនហិកតា។ លោកឧកញ៉ាបន្តទៀតថា ទីក្រុងរណបទំាងពីរនេះ គ្រោងនឹងចំណាយថវិកាប្រមាណជាង១០ប៊ីលានដុល្លារសហរដ្ឋអាមេរិក ដែលគ្រោងចាប់ផ្តើមឆាប់ៗខាងមុខនេះ។

លោកឧកញ៉ា ហួត ឌី បន្តទៀតថា ពេលទីក្រុងរណបទំាងពីរនេះដំណើរការ នឹងផ្តល់ផលប្រយោជន៍ច្រើន ដល់ពលរដ្ឋកម្ពុជា ពិសេសគឺកំណើនសេដ្ឋកិច្ចពលរដ្ឋកម្ពុជាផ្ទាល់តែម្តង ដូចនេះលោកឧកញ៉ាសំណូមពរឱ្យបណ្តាដៃគូរផ្សេងៗទៀត ពិសេសគឺមន្ត្រីរាជរដ្ឋាភិបាលមេត្តា ជួយសហការជាមួយនឹងក្រុមហ៊ុនវិនិយោគទំាង៣ ដែលទទួលសិទ្ធពីរាជរដ្ឋាភិបាល ក្នុងការជួយបង្កលក្ខណៈឱ្យមានភាពរលូន ដើម្បីបង្កើតទីក្រុងរណបទំាងពីរនៅកម្ពុជានេះ ទទួលបានភាពជោគជ័យ។

ប្រធាននាយកដ្ឋានរដ្ឋបាលគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជាលោកសារ សំបូរ បានលើកឡើងថា ការបង្កើតទីក្រុងរណបនេះជាតម្រូវការ និងការចង់បានរបស់ពលរដ្ឋកម្ពុជា ក៏ដូចជាការចង់បានរបស់​រជរដ្ឋាភិបាលកម្ពុជាផងដែរ ដូចនេះឯកឧត្តមស្នើឱ្យក្រុមហ៊ុនទំាង៣ រួមសហការគ្នាបង្កើតទីក្រុងរណបថ្មីនេះឱ្យទទួលបានភាពជោគជ័យ ដើម្បីផលប្រយោជន៍ពលរដ្ឋកម្ពុជាក្នុងសម័យថ្មី។

គម្រោងសាងសង់ទីក្រុងរណបថ្មីទំាងពីរនេះ គ្រោងនឹងបង្កើតក្នុងអំឡុងឆ្នាំ២០១៨ឆាប់ៗខាងមុខនេះ៕

ដោយ : គង់ សូរិយា
ភ្នំពេញ : ប្រទេសកម្ពុជាកំពុងមានដៃគូអភិវឌ្ឍន៍ថ្មីមួយ ដែលមានបំណងជួយដល់ការអភិវឌ្ឍន៍សេដ្ឋកិច្ចសង្គមរបស់ខ្លួន ដើម្បីជំរុញឲ្យប្រទេសនេះកាន់តែ​ឈានទៅមុខមួយកម្រិតទៀត។
លោក យូសូហ្វ អ៊ីប្រាហ៊ីម អាល់ប៉ាស្សាម នាយកប្រតិបត្តិមូលនិធិអារ៉ាប៊ីសាអូឌីតសម្រាប់ការអភិវឌ្ឍ បានលើកនៅក្នុងជំនួបពិភាគ្សាការងារជាមួយលោកទេសរដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ នៅទីស្តីការក្រសួងកាលពីម្សិលម៉ិញនេះថា មូលនិធិអារ៉ាប៊ីសាអូឌីតសម្រាប់ការអភិវឌ្ឍ មានគោលដៅក្នុងការផ្តល់ហិរញ្ញប្បទាន ឥណទានសម្បទាន លើគម្រោងវិនិយោគសាធារណៈក្នុងប្រទេសដៃគូនានា ជាពិសេស គម្រោងវិនិយោគលើវិស័យសំខាន់ៗដូចជា វិស័យអប់រំ និងវិស័យសុខាភិបាលជាដើម។
លោកបន្តថា “បច្ចុប្បន្នមូលនិធិអារ៉ាប៊ីសាអូឌីត សម្រាប់ការអភិវឌ្ឍបានផ្តល់ហិរញ្ញប្បទានដល់ប្រទេសចំនួន៨២ នៅលើពិភ​ពលោករួចហើយ ក្នុងនោះឯកឧត្តមសង្ឃឹមថា សម្រាប់ប្រទេសកម្ពុជានឹងអាចក្លាយជាប្រទេសទី៨៣ ដែលនឹងមានកិច្ចសហប្រតិបត្តិ ការអភិវឌ្ឍន៍ជាមួយមូលនិធិអារ៉ាប៊ីសាអូឌីត សម្រាប់ការអភិវឌ្ឍ នាពេលអនាគតជាមិនខាន”។
ទេសរដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានលើកឡើងជាមួយសមភាគីលោកថា រាជរដ្ឋាភិបាលកម្ពុជាសូមស្វាគមន៍ និងត្រៀ​មខ្លួនជានិច្ច សម្រាប់ការធ្ចើកិច្ចសហប្រតិបត្តិការអភិវឌ្ឍ ជាមួយមូលនិធិអារ៉ាប៊ីសាអូឌីតសម្រាប់ការអភិវឌ្ឍ។ បច្ចុប្បន្នរាជរដ្ឋាភិបាលកម្ពុជាក្រោមការដឹកនាំប្រ​ក​បដោយគតិបណ្ឌិតរបស់សម្តេចអគ្គមហា-សេនាបតីតេជោ ហ៊ុន សែន នាយករដ្ឋមន្រ្តីកម្ពុជា បានយកចិត្តទុកដាក់ និងបានវិនិយោគលើវិស័យសំខាន់ៗដូចជា៖ វិស័យហេដ្ឋារចនាសម្ព័ន្ធជារូបវន្តមាន (ផ្លូវ ទឹក ភ្លើង) និងការកសាងធនធានមនុ​ស្ស ជាពិសេស គឺការបណ្តុះបណ្តាលវិជ្ជាជីវៈជាដើម។
លោកបន្តថា “រាជរដ្ឋាភិបាលកម្ពុជាក៏បានខិតខំផងដែរ ក្នុងការធ្វើឲ្យប្រសើ​រឡើងនូវសេវាសាធារណៈ លើវិស័យសុខាភិបាល និងវិស័យអប់រំ ក្រោមកិច្ចសហប្រតិបត្តិការអភិវឌ្ឍពីដៃគូអភិវ​ឌ្ឍន៍នានា”។
ភាគីទាំងពីរកម្ពុជា-មូលនិធិអារ៉ាប៊ីសាអូឌីតសម្រាប់ការអភិវឌ្ឍ នឹងធ្វើការសិក្សារួមគ្នាជាបន្តទៀត ដើម្បីរកចំណុចរួមមួយ ដែលអាចសហការគ្នាបាន ទាំងលើល័ក្ខខ័ណ្ឌឥណទាន បញ្ជីរ និងគម្រោងអាទិភាពនានា ដែលនឹងរៀបចំឡើងក្រោមក្របខ័ណ្ឌនៃកិច្ចសហប្រតិបត្តិការអភិវឌ្ឍន៍នេះ៕

ដោយ វុត្ថា

ភ្នំពេញ៖ វិស័យអាកាសចរណ៍កម្ពុជាកាន់តែបង្ហាញសញ្ញាវិជ្ជមាន ដោយ​នៅ​ពេលឆាប់ៗខាងមុខនេះ ក្រុមហ៊ុនអាកាសចរណ៍មួយមកពីប្រទេសតួគី នឹងភ្ជាប់ជើងហោះហើរត្រង់មកកាន់កម្ពុជា។

ក្នុងជំនួបជាមួយសម្តេចអគ្គមហាពញ្ញាចក្រីហេង សំរិនប្រធានរដ្ឋសភាជាតិនាព្រឹកថ្ងៃទី២៦ មករានេះ លោក អ៊ីលហាន កេម៉ាល់ តាគ (H.E.Mr. ILHAN Kemal Tug) ឯកអគ្គរដ្ឋទូតសាធារណរដ្ឋតួគី ដែលត្រូវបានចប់អាណត្តិពីកម្ពុជា បានលើកឡើងថា លោកមានការខកចិត្តយ៉ាងខ្លាំង ក្នុងកិច្ចខិតខំប្រែងរបស់លោ​ក ក្នុងបេសករយៈពេល៤ឆ្នាំក្នុងប្រទេសកម្ពុជាកន្លងមកនេះ ដោយមិនបានសម្រេចក្នុងការរៀបចំឲ្យ មានជើងហោះហើរត្រង់ពីប្រទេសតួគីមកកម្ពុជា។

លោកបន្តថា “ការមិនមានជើងហោះហើរត្រង់មកកម្ពុជានេះ ដោយសារតែប្រទេសតួកគីបានជួបប្រទះ នូវវិបត្តិសេដ្ឋកិច្ចយ៉ាងធ្ងន់ធ្ងរ ដែលបានធ្វើឲ្យមានការផ្អាកនូវគម្រោងហោះហើរនេះ”។ ទោះជាយ៉ាងណាក៏ដោយលោករំពឹងថា ក្នុងអាណត្តិឯកអគ្គរដ្ឋទូតថ្មី ដែលមកដល់ប្រទេសកម្ពុជាខាងមុខដ៏ខ្លីនេះ នឹងជំរុញអោយមានជើងហោះហើរ ដឹកអ្នកដំណើរត្រង់ពីតួគីមកកម្ពុជា និងពីកម្ពុជាទៅតួគីវិញ។

លោកឯកអគ្គរដ្ឋទូតបានបញ្ជាក់ថា កន្លងមកនេះ ក៏មានជើងយន្តដឹកទំនិញហោះហើរពីរជើង ក្នុងមួយសប្តាហ៍ពីតួគីមកកម្ពុជា។

សម្តេចអគ្គមហាពញាចក្រី ហេង សំរិន បានគាំទ្រដល់កិច្ចសហប្រតិបត្តិការលើគ្រប់វិស័យ ដែលរដ្ឋាភិបាលនៃប្រទេសទាំងពីរបានធ្វើរួមគ្នា និងបន្តបង្កើននូវកិច្ចសហប្រតិបត្តិការថ្មីៗថែមទៀត ជាពិសេសវិស័យពាណិជ្ជកម្ម និងទេសច​រណ៍ ដើម្បីឧត្តមប្រយោជន៍ប្រជាជាតិទាំងសងខាង ដើម្បីបង្កើនទំហំពាណិជ្ជកម្ម និងសេដ្ឋកិច្ចប្រទេសទាំងពីរ៕

ដោយ ដួង ចន្រ្ទា

ភ្នំពេញ៖ ក្រុមហ៊ុនកូរ៉េ សហការជាមួយក្រុមហ៊ុនក្នុងស្រុក បានបើកការដ្ឋាន​សាងសង់រោងចក្រផលិតនិងកែច្នៃផ្លែឈើស្រស់ជាលើកដំបូងនៅកម្ពុជា ដែលមានទីតាំងក្នុងខេត្តកំពង់ស្ពឺ។

តំណាងក្រុមហ៊ុន ម៉ៅ លីហ្គាស៊ី លោក ម៉ៅ គន្ធពិសី បានថ្លែងឲ្យដឹងកាលពីម្សិលម៉ិញនេះថា ក្រុមហ៊ុនរបស់លោក និងក្រុមហ៊ុនហ៊ីយុនដាយ ខបភើរេសិនគ្រុប នឹងរួមចំណែកជួយរាជរដ្ឋាភិបាលកម្ពុជា ក្នុងការផ្តល់ឱកាសការងារជូនប្រ​ជា​ជនរាប់ពាន់នាក់ ក្នុងការនាំចេញផលិតផលខ្មែរ និងដាំដុះដោយប្រជាជនខ្មែរប្រក​បដោយគុណភាពខ្ពស់ទទួលស្គាល់លើទីផ្សារអន្តរជាតិ។

តំណាងស្ថានទូតសាធារណរដ្ឋកូរ៉េ ប្រចាំនៅកម្ពុជាលោកហាំ ជុងហាន់ បានថ្លែងថា រដ្ឋាភិបាលកូរ៉េនឹងខិតខំប្រឹងប្រែង ដើម្បីរួមចំណែកក្នុងការអភិវឌ្ឍវិស័យកសិកម្មកម្ពុជា។

ឧត្តមឧត្តមសេនីយ៍ឯក ហ៊ុន ម៉ាណែតអគ្គមេបញ្ជាការរងកងទ័ពជើងគោក ដែលអញ្ជើញជាអធិបតីក្នុងពិធី បានមានប្រសាសន៍ថា មានតែរាជរដ្ឋាភិបាល ដឹកនាំដោយសម្តេចតេជោនាយករដ្ឋមន្ត្រី ដែលតែងគិតគូរដល់ជីវភាពប្រជាពលរដ្ឋ និងផលប្រយោជន៍ប្រទេសកម្ពុជា ដែលខុសពីអ្នកធ្វើនយោបាយប្រឆាំងដែលតែងនិយាយអាក្រក់ពីកម្ពុជា និងមិនដែលបាននាំមកនូវជំនួយណាមួយជូយដល់កម្ពុជាវិញនោះឡើយ។

ឯកឧត្តមបន្តថា “ការក្រុមហ៊ុនវិនិយោគបរទេសនៅកម្ពុជា បានបង្ហាញពីភាពជឿជាក់លើរាជរដ្ឋាភិបាល ទើបពួកគេមកបណ្តាក់ទុនវិនិយោគនៅកម្ពុជាដែលបានផ្តល់ឱកាសការងារជាច្រើនដល់ប្រជាពលរដ្ឋកម្ពុជា”៕