ដោយ គង់ សូរិយា

ភ្នំពេញ៖ ការបង្កើតក្រុមហ៊ុនមួយ ជាការងាយស្រួលទេ ប៉ុន្តែដើម្បីឲ្យក្រុមនោះទទួលបានជោគជ័យប្រកបដោយនិន្តរភាព ​មិនមែនជាការងាយស្រួលនោះទេ ដូច្នេះការមានផែនការច្បាស់លាស់ពិតជាមានសារៈសំខាន់ណាស់។

លោកឧកញ៉ាលី ហួរអគ្គនាយកក្រុមហ៊ុនលី ហួរគ្រុបដែលមានក្រុមហ៊ុនជា​បុត្រសម្ព័ន្ឋចំនួន៨ និងមានបុគ្គលិកបំរើការងារប្រមាណ១៥០០នាក់បានមានប្រ​សាសន៍ឲ្យគេហទំព័រ Propertyarea.asia ដឹងនាព្រឹកថ្ងៃទី២០ មិនានេះថា ការបង្កើ​ត​ក្រុមហ៊ុនមួយ អ្នកវិនិយោគត្រូវគិតលើកត្តាជាច្រើន ដោយទី១ ត្រូវសិក្សាពីទីតាំង នៃអាជីវកម្មរបស់ខ្លួនថា តើសមស្របសម្រាប់អាជីវកម្មរបស់ខ្លួនឬអត់ ទី២ ត្រូវសិក្សាពីទីផ្សារ និងដៃគូប្រកួតប្រជែងរបស់យើងច្រើនឬតិច មានដៃគូខ្លាំងប៉ុន្មានក្រុមហ៊ុន? ទី៣ អ្វីជាផែនការរបស់យើងពិតប្រាកដ ពេលរកឃើញហើ​យត្រូវយកមកប្រៀបធៀបជាមួយដៃគូ ប្រកួតប្រជែងរបស់យើងនៅតំបន់នោះ។

ទី៤ បើសិក្សារួចហើយឃើញថាគំរោងរបស់យើងល្អ មានទីផ្សារល្អ និងអាចប្រកួតជាមួយដៃគូអាជីវកម្មរបស់យើងបាន យើងធ្វើអាជីវកម្មនោះនឹងទទួល​ជោគជ័យហើយ ទី៥ យើងត្រូវសិក្សាពីតម្លៃផលិតផលរបស់យើងផងដែរ បើវាមានតម្លៃសមរម្យ និងអាចប្រកួតប្រជែងបាន យើងអាចាប់ផ្តើមបានហើយ។ លើ​សពីនេះ យើងក៏ត្រូវសិក្សាពីមូលដ្ឋានហិរញ្ញវត្ថុរបស់យើងផងដែរ ដើម្បីធ្វើឲ្យប្រាកដថា គំរោងរបស់​យើងដើរទៅមុខ ដោយគ្មានឧបសគ្គហិរញ្ញវត្ថុ។

លោកឧកញ៉ា លី ហួរ បានបញ្ជាក់ថា “បើយើងមិនបានសិក្សាពីទីផ្សារ ពីផលិតផលរបស់យើង ពីដៃគូប្រកួតប្រជែងរបស់យើង ហើយយើងចេះតែធ្វើតាម​ការនឹកឃើញ គឺយើងពិបាកទទួលបានជោគជ័យណាស់”។

លោកបន្តថា  ការបើ​កក្រុមហ៊ុនមួយៗ ក៏ត្រូវគិតពីលទ្ឋភាពរបស់យើងសិនថា យើងចង់ធ្វើអី បើយើង​ចង់វិនិយោគលើវិស័យអចលនទ្រព្យ បើយើងគិតថាចង់សង់ផ្ទះលក់ យើងត្រូវដឹងថា តំបន់នោះតម្រូវទីផ្សារប្រជាជនក្រុមណា ហើយ​ចង់ផ្ទះលក់ក្នុងតម្លៃប៉ុន្មាន ទើបអាចរកចំណេញបាន ហើយបើសង់ហើយមានអ្នកទិញឬទេ នោះជាចំណុចដ៏សំខាន់ ក្នុងការវិនិយោគលើវិស័យអចលនទ្រព្យ និងទទួលបានជោគជ័យ។

លោកឧកញ៉ាលី ហួរបានបន្តថា “អ្វីដែលយើងធ្វើ គឺត្រូវគិតដល់សុភាសិតខ្មែរយើងមួយ ដែលបានលើកឡើងថា “គិតហើយ សឹមគូរ ព្រោះបើយើងគូរហើយ​ចាំ គិតពិតជាពិបាកជោគជ័យហើយ”៕

ដោយ ដែន ចែងចាំង

ភ្នំពេញ៖ ធនាគារអភិវឌ្ឍន៍អាស៊ី (ADB) នឹងផ្តល់ទឹកប្រាក់៦០លានដុល្លារ ដើម្បីជួយកម្ពុជាឆ្ពោះទៅមុខកាន់តែលឿន តាមរយៈការអភិវឌ្ឍជំនាញសម្រាប់ការប្រកួតប្រជែង ចន្លោះឆ្នាំ២០១៩ ដល់ឆ្នាំ២០២៤ដល់កម្ពុជា។

លោកអ៊ិត សំហេងរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ប្រាប់ដល់អ្នកសារព័តមាន ក្រោយជំនួបពិភាក្សាជាមួ​យលោ​ក Jan Hansen ប្រធានស្តីទីនៃធនាគារអភិវឌ្ឍន៍អាស៊ីប្រចាំកម្ពុជា នាព្រឹកថ្ងៃទី២០ មិនានេះថា គម្រោងអភិវឌ្ឍជំនាញសម្រាប់ការប្រកួតប្រជែងនេះ ធនាគារអភិវឌ្ឍន៍អាស៊ី កំពុងរៀបចំធ្វើយ៉ាងណា នឹងបង្កើនគម្រោងនេះសម្រាប់បរិបទថ្មី នៃការអភិវឌ្ឍន៍ គោលនយោបាយជាតិស្តីពី ការពិពិធកម្មឧស្សាហកម្ម និងគោលនយោបាយស្តីពីការអប់រំបណ្តុះបណ្តាល វិជ្ជាជីវៈ។

លោកបន្តថា “គំរោងនេះ នឹងជំរុញបន្ថែមទៀតនូវប្រសិទ្ធិភាពការ អនុវត្តន៍គោលនយោ​បាយជាតិស្តីពី ការអប់រំបណ្តុះបណ្តាលបច្ចេកទេសវិជ្ជាជីវៈនិងគំរោ ង ដែលនៅសល់រយៈពេលរហូតដល់ឆ្នាំ២០២១”។

លោកអ៊ិត សំហេងបានបន្តថា នៅក្នុងបរិបទសមារណកម្មសហគមសេដ្ឋកិច្ចអាស៊ាន និងសា​ក​​លភាវូបនីយកម្ម តម្រូវការកំលាំងពលកម្ម ដែលមានកម្រិតជំនាញមានកាន់តែច្រើនឡើង។ ហេតុនេះកម្ពុជាចាំបាច់ណាស់ ក្នុងការអភិវឌ្ឍសមត្ថភាពជំនាញវិជ្ជាជីវៈឲ្យកម្លាំងពលកម្ម ដើម្បីឆ្លើយតបទៅនឹងអ្វី ដែលជាទិសដៅនាពេលខាងមុខសម្រាប់ការអភិវឌ្ឍន៍។

តាមរយៈគម្រោងភាពជាដៃគូនេះ នឹងបង្កើតឲ្យជិតស្និទ្ធបន្ថែមទៀតរវាងក្រសួង ស្ថាប័នពាក់ព័ន្ធ រវាងក្រសួង និងដៃគូអភិវឌ្ឍ ជាពិសេសជាមួយផ្នែកឯកជន ដើម្បីទាក់ទាញនូវធនធាន ក៏ដូចជា បច្ចេកទេសឲ្យបានកាន់​តែច្រើនថែម សម្រាប់ជំរុញការអភិវឌ្ឍធនធានមនុស្ស និងមានអត្ថប្រយោ​ជន៍ធំណាស់សម្រា​ប់ប្រទេសជាតិ និងប្រជាពលរដ្ឋ យុវជន យុវនារី ព្រោះបើគិតពីពេលនេះទៅមុខ។

យោងតាមសេចក្តីប្រកាសព័តមាន របស់ធនាគារអភិវឌ្ឍន៍អាស៊ីបានឲ្យដឹ​ង​ថា ដំណើរការនៃការអនុវត្តគម្រោងអប់រំបណ្តុះបណ្តាលវិជ្ជាជីវៈ មានសមាសធា​តុពីរ ដូចជា ទី១ កម្ចីសម្រាប់សកម្មភាពការងារ គោលនយោបាយដែលមានថវិកាចំនួន៧លានដុល្លារអាមេរិក ពីធនាគារអភិវឌ្ឍន៍អាស៊ី និងទី២ កម្ចីសម្រាប់សកម្ម​ភាពការងារគម្រោងចំនួន៣៨លានដុល្លារ និងទឹកប្រាក់១៥លានដុល្លារបាន​មកពីទីភ្នាក់​ងារបារាំងដើម្បីការអភិវឌ្ឍ (AFD)៕

ដោយ គង់ សូរិយា

ភ្នំពេញ៖ ដុល្លាររូបនីយកម្មបានចូលរួមចំណែកជាវិជ្ជមាន ដល់ការរីកចម្រើនសកម្មភាពសេដ្ឋកិច្ចកម្ពុជា ដោយក្នុងរយៈពេល១៥ឆ្នាំចុងក្រោយនេះ រូបិយប័ណ្ណនេះបានរួមចំណែក៨,៥ភាគរយ ក្នុងការជម្រុញកំណើនសេដ្ឋកិច្ចជាតិ។

យោងតាមរបាយការណ៍របស់ធនាគារជាតិនៃកម្ពុជាស្តីពី សារៈសំខាន់នៃប្រាក់រៀលសម្រាប់កម្ពុជាបានបង្ហាញថា មកដល់បច្ចុប្បន្នដុល្លាររូបនីយកម្ម បានចូលរួមចំណែកជាវិជ្ជមានដល់ការរីកចម្រើន សកម្មភាពសេដ្ឋកិច្ចកម្ពុជា ដែលមានកម្រិតមធ្យមប្រមាណ៨,៥ភាគរយ នៅក្នុងរយៈពេល១៥ឆ្នាំចុងក្រោយនេះ ក្នុងនោះល្បឿនកំណើនដែលគួរឲ្យកត់សម្គាល់នេះ ត្រូវបានជម្រុញការវិនិយោគផ្ទាល់ពីបរទេស ការនាំចេញ និងសមាហរណកម្ម យ៉ាងឆាប់រហ័សទៅក្នុងតំបន់ និងពិភពលោក។

របាយការណ៍នេះបានបង្ហាញថា ខណៈកម្ពុជាកំពុងក្លាយទៅជាប្រទេសមានចំណូលមធ្យម កម្រិតដុល្លារូបនីយកម្មខ្ពស់ បានធ្វើឲ្យកម្ពុជារងនូវឥទ្ធិផលពីខាងក្រៅ ហើយប្រឈមនិងហានីភ័យជាចម្បងៗ ដែលអាចធ្វើឲ្យប៉ះពាល់ដល់កំណើន សេដ្ឋកិច្ចកម្ពុជាផងដែរ។

របាយការណ៍ដដែលបានសង្កាត់ធ្ងន់ថា កម្ពុជាចាំបាច់ត្រូវបង្កើនភាពឯករាជ្យ ពីការប្រើប្រាស់រូបិយប័ណ្ណ ដើម្បីធ្វើឲ្យលទ្ធភាពនៃការគ្រប់ គ្រង់គោលនយោបាយម៉ាក្រូសេដ្ឋកិច្ច កាន់តែមានប្រសិទ្ធភាពខ្ពស់ ក្នុងនោះដោយយល់ឃើញពីសារៈសំខាន់ នៃតួនាទី រូបិយប័ណ្ណជាតិក្នុងការជម្រុញសេដ្ឋកិច្ច រាជរដ្ឋាភិបាលកម្ពុជាបានអនុវត្តន៍យុទ្ធសាស្រ្តជម្រុញ ការប្រើប្រាស់ប្រាក់រៀល ដូច បានចែងក្នុងយុទ្ធសាស្រ្តចតុកោណ និងយុទ្ធអភិវឌ្ឍន៍វិស័យហិរញ្ញវត្ថុ ជាក់ស្តែងរាជរដ្ឋាភិបាលបានជម្រុញការបង់ពន្ធ បង់ ថ្លៃទឹកភ្លើង ត្រូវធ្វើឡើងជាប្រាក់រៀល រួមនឹងការរក្សារតម្លៃប្រាក់ររៀល តាមរយៈការធ្វើឲ្យអត្រាប្តូរប្រាក់មានស្ថិរភាពជាដើម។

ទោះជាយ៉ាងណាមានប្រតិកម្មចម្រុះ ទាក់ទងនឹងភាពវិជ្ជមាន និងអវិជ្ជមានលើដុល្លារូបនីយកម្មនៅកម្ពុជា។

លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការប្រើប្រាស់ប្រាក់ដុល្លារនៅកម្ពុជាមានទាំងចំណុចវិជ្ជមាន និងអវិជ្ជមាន ប៉ុន្តែភាពអវិជ្ជមានអាចមានច្រើន ដោយសារកម្ពុជានាំចេញដោយប្រើ​ប្រាស់ប្រាក់ដុល្លារ ហេតុនេះនៅពេលប្រាក់ដុល្លារឡើងថ្លៃ នឹងធ្វើឲ្យទំនិញកម្ពុជា​មានតម្លៃថ្លៃ និងពិបាកក្នុងការប្រកួតប្រជែងជាមួយបណ្តាប្រទេសដទៃទៀត។

លោកបន្តថា “ទោះជាការចចរាចរណ៍ប្រាក់ដុល្លារ នៅកម្ពុជាមានចំនុចវិជ្ជ​មានច្រើនក្តី ប៉ុន្តែខ្ញុំលើកទឹកចិត្តឲ្យមានការធ្វើបដិដុល្លារនីយកម្មបន្តិចម្តងៗ ដើម្បី ប្រាក់របស់ជាតិមានស្ថិរភាព និងជាការលើកកំពស់មោទនភាពជាតិ”។

ទោះជាយ៉ាងណាអ្នកវិនិយោគតៃវ៉ាន់ ដែលបានវិនិយោគគំរោង TK Royal One នៅកម្ពុជាលោក Chenyi Liu បានថ្លែងថា ការប្រើប្រាស់ប្រាក់ដុល្លារយ៉ាងទូលំទូលាយនៅកម្ពុជា ជាចំណូចវិជ្ជមាន ដោយសារយើងមានភាពកក់ក្តៅ និងមានទំនុកចិត្តនូវការចរាចរណ៍ប្រាក់ដុល្លារនៅកម្ពុជា ប៉ុន្តែយ៉ាងណាវាមិនមែនជាផ្នែក​តែមួយ ដែលបានទាក់ទាញអ្នកវិនិយោគបរទេស មកវិនិយោគនៅកម្ពុជានោះទេ?។

លោកបន្តថា “ការចរាចរណ៍ប្រាក់ដុល្លារយ៉ាងសកម្ម និងទូលំទូលាយនៅក្នុងទីផ្សារនៅទីនេះ ពិតជាល្អប្រសើរ ដែលធ្វើឲ្យអ្នកវិនិយោគកាន់តែមានទំនុកចិត្ត”។

អគ្គនាយកក្រុមហ៊ុន WTC Phnom Penh លោក KAZUYA URATA បានយល់ស្របនឹងការវិនិយោគរបស់ជនជាតិតៃវ៉ាន់ ដោយលោកបានថ្លែងថា ការអនុញ្ញាត្តឲ្យមានការចរាចរ ប្រាក់ដុល្លារយ៉ាងទូលំទូលាយនៅកម្ពុជា ពិតជាផ្នែក​មួយយ៉ាងសំខាន់ ក្នុងការផ្តល់ឲ្យអ្នកវិនិយោគមានទំ​នុកចិត្ត និងមានភាពកក់ក្តៅ នៅក្នុងទីផ្សារនេះ ប៉ុន្តែការមានច្បាប់វិនិយោគដ៏ល្អ កំណើនសេដ្ឋកិច្ចល្អ និងការអនុញ្ញាត្តឲ្យជនបរទេស មានសិទ្ឋិបោះទុនវិនិយោគ១០០ភាគរយ ក៏ជាផ្នែកដ៏សំ​ខាន់ ដែលបាននិងកំពុងទាក់ទាញអ្នកវិនិយោគជាច្រើនមកកម្ពុជាផងដែរ៕

ដោយ វុត្ថា

ភ្នំពេញ៖ ជាមួយនឹង​សក្តានុពល និង​ការបើកចំហ​របស់​កម្ពុ​ជា​បានធ្វើ​ឲ្យ​អ្នកវិនិយោគ​ហុងកុង មក​វិនិយោគ​នៅ​កម្ពុជា​ក្នុង​ទំហំ​ទឹកប្រាក់​ជាង១៣៣០លាន​ដុល្លារ​អាមេរិក។

យោងតាម​របាយការណ៍​របស់ ក្រុមប្រឹក្សា​អភិវឌ្ឍន៍​កម្ពុជា​បាន​ឲ្យ​ដឹង​កាល ពី​ម្សិល​ម៉ិ​ញ​នេះ​ថា ការវិនិយោគ​របស់​អ្នកវិនិយោគ​ហុងកុង​នៅ​កម្ពុជា ចាប់ពី​ឆ្នាំ១៩៩៤ ដល់​ឆ្នាំ២០១៧មាន​ចំនួន២៥៧គម្រោង មាន​ទុនវិនិយោគ​ប្រមាណ១៣៣០លាន​ដុល្លារ​អាមេរិក ស្មើ​ជាង២ភាគរយ នៃ​ការវិនិយោគ​បរទេស​សរុប​នៅ​កម្ពុជា។

ក្នុងជំនួប​ពិភាក្សា​ទ្វេភាគី​រវាង​លោក​ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម និង​លោក Edward Yau អគ្គលេខាធិការ​ពាណិជ្ជ​កម្ម និង​អភិវឌ្ឍន៍​សេដ្ឋកិច្ច​នៃ​តំបន់​រដ្ឋបាល​ពិសេស​ហុងកុង​បាន​មានប្រសាសន៍ថា កម្ពុ​ជាមាន​វឌ្ឍនភាព​យ៉ាងខ្លាំង​ក្នុង​មួយ​ទសវត្សរ៍​ចុងក្រោយ​នេះ និង​មាន​បរិយាកាស​វិនិយោគ​ល្អប្រសើរ ដោយ​លោក​នឹង​ខិតខំ​ទាក់ទាញ អ្ន​កវិន​យោគ​មកពី​ទីក្រុង​ហុងកុង​មក​វិនិយោគ​នៅ​កម្ពុជា​កាន់តែច្រើន​ថែមទៀត។

លោក​ប៉ាន សូរ​ស័ក្តិ​បាន​ជម្រាបជូន​គណៈប្រតិភូ​ហុងកុង អំពី​កំណើនសេដ្ឋកិច្ច​ដ៏​រឹងមាំ​របស់​កម្ពុជា និង​ចក្ខុវិស័យ​របស់​រាជរ​ដ្ឋា​ភិ​បាល ក្នុងការ​ប្រែក្លាយ​កម្ពុជា​ឲ្យ​ទៅជា​ប្រទេស ដែលមាន​ចំណូល​មធ្យម​កម្រិត​ខ្ពស់​នៅ​ឆ្នាំ២០៣០ និង​ជា​ប្រទេស​មាន​ចំណូល​ខ្ពស់​នៅត្រឹម​ឆ្នាំ២០៥។ លើសពីនេះ  លោក​រដ្ឋមន្ត្រី ក៏បាន​ជម្រាបជូន​ប្រតិភូ​ហុងកុង អំពី​គោលនយោបាយ​គាំពារ​វិនិយោគិន និង​ការលើកទឹកចិត្តផ្សេងៗរបស់​រាជរដ្ឋាភិបាល​កម្ពុជា ព្រមទាំង​បាន​សំណូមពរ​ឲ្យ​មានការ​រៀបចំ​វេទិកា​ជំរុញ​ពាណិជ្ជកម្ម​ទ្វេភាគី នៅក្នុង​ទីក្រុង​ហុងកុង នាពេលខាងមុខ​ផងដែរ។

រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​អគ្គលេខាធិការ​ក្រុមប្រឹក្សា​អភិវឌ្ឍន៍​កម្ពុជា លោក​សុខ ចិន្តា​សោភា​បាន​ថ្លែងថា កម្ពុជា​ជា​ប្រទេស​មាន​សក្តានុពល​វិនិយោគ ដែល​បាន​ទាក់ទាញ​អ្នកវិនិយោគ​មកពី​ហុងកុង និង​ប្រទេស​ជាច្រើន​ទៀត​មក​វិនិយោគ​នៅ​កម្ពុជា ដោយសារ​បរិយាកាស​វិនិយោគ​ល្អប្រសើរ ច្បាប់​វិនិយោគ ច្បាប់​ព​ន្ឋ​របស់​កម្ពុជា​មិនមាន​ភាព​ស្មុ​គ្រ​ស្មាញ និង​កត្តា​អំណោយផល​ជាច្រើន​ទៀត៕

ដោយ ដែន ចែងចាំង

ភ្នំពេញ៖ មន្រ្តីជាន់ខ្ពស់ក្រុមប្រឹក្សាអភិវឌ្ឍន៍កម្ពុជាបានថ្លែងថា ការសម្រេចចិត្តរបស់អ្នកវិនិយោគហុងកុងនៅកម្ពុជា ដោយសារកម្ពុជាមានគោលដៅវិនិយោ​គដ៏មានសក្តានុពល ក្នុងការចាប់ផ្តើមនិងការពង្រីកអាជីវកម្មរបស់ខ្លួន។

រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេ​ខា​ធិការក្រុមប្រឹក្សាអភិវឌ្ឍន៍កម្ពុជា លោកសុខ ចិន្តាសោភា បានថ្លែងលើកឡើងនៅក្នុងកិច្ចប្រជុំជាមួ​យគណៈប្រតិភូពាណិជ្ជកម្ម និងសេដ្ឋកិច្ច នៃតំបន់រដ្ឋបាលពិសេសហុងកុង នៅថ្ងៃទី១៩ ខែកុម្ភៈឆ្នាំ២០១៨នេះថា កម្ពុជាជាប្រទេសដែលមានលក្ខណៈអំណោយផលនៃការវិនិយោគ ជាពិសេសស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច ដែលផ្តល់លទ្ធភាពឲ្យកម្ពុជា សម្រេចបាននូវកំណើនសេដ្ឋកិច្ចជាមធ្យម៧.៧%ក្នុងជា​ង២ទសវត្សរ៍កន្លងមកនេះ។ ឯកឧត្តមបន្តថា កំណើនសេដ្ឋកិច្ចនេះ បានជម្រុញ  ឲ្យកម្ពុជា ធ្វើដំនើរ​យ៉ាងក្លៀវក្លាក្នុងការអភិវឌ្ឍន៍សេដ្ឋកិច្ច ដោយផ្តល់ទំនុកចិត្តដល់អ្នកវិនិយោគ បរទេសឲ្យមកបណ្តាក់ទុនលើគ្រប់វិស័យ។

លោកបន្តថា “ការសម្រេចចិត្តរបស់អ្នកវិនិយោគទុនហុងកុង ដែលបានជ្រើសរើសយកកម្ពុជា ដោយសារកម្ពុជាបានចាប់ផ្តើម និងការពង្រីកលើមូល​ដ្ឋានអាជីវកម្មរបស់ខ្លួនដ៏មានតម្លាភាព”។

លេខាធិការទទួលបន្ទុកកិច្ចការអភិវឌ្ឍន៍សេដ្ឋកិច្ច និងពាណិជ្ជកម្មហុងកុង លោក អ៊េត វីតយ៉ាវបានទទួលស្គាល់ និងអបអរសាទរចំពោះរាជរដ្ឋាភិបាលកម្ពុជា ក្នុងការដឹកនាំប្រទេសមានការរីកចម្រើន លូតលាស់យ៉ាងខ្លាំង ហើយឯកឧត្តមសន្យា ជួយទាក់ទាញអ្នកវិនិយោគទុនហុងកុង ឲ្យមកបណ្តាក់ទុននៅកម្ពុជា កាន់តែច្រើនថែមទៀត ដើម្បីបន្តរឹងចំណងមិត្តភាព និងទំនាក់ទំនង់សេដ្ឋកិច្ចនៃប្រទេសទាំងពីរ។

យោងតាមរបាយការណ៍របស់ ក្រុមប្រឹក្សាអភិវឌ្ឍន៍កម្ពុជាបានឲ្យដឹងថា ការវិនិ​យោ​គរបស់អ្នកវិនិយោគហុងកុងនៅកម្ពុជា ចាប់ពីឆ្នាំ១៩៩៤ ដល់ឆ្នាំ២០១៧មានចំនួន២៥៧គម្រោង មានទុនវិនិយោគប្រមាណ១៣៣០លានដុល្លារអាមេរិក ស្មើជាង២ភាគរយ នៃការវិនិយោគបរទេសសរុបនៅកម្ពុជា។

ដោយឡែកនៅឆ្នាំ២០១៧កន្លងមក អ្នកវិនិយោគទុនហុងកុងបានវិនិយោ​គនៅកម្ពុជាចំនួន១៣គម្រោង ដែលគម្រោងវិនិយោគនោះរូមមាន វិស័យកាត់ដេរសម្លៀកបំពាក់ ការបូប ស្បែក ជើងនិងឧស្សាហកម្មដ៏ទៃទៀត ដែលមានទឹកប្រាក់វិនិយោគប្រមាណ៨៥លានដុល្លាអាមេរិក ស្មើនឹង១.៦៤ភាគរយ នៃទុនវិនិយោគបរទេសសរុបនៅមកម្ពុជា៕