ដោយ វុត្ថា
ភ្នំពេញ៖ រដ្ឋមន្ត្រីក្រសួងសាធារណៈការការ និងដឹកជញ្ជូនលោកស៊ុន ចាន់ថុលបានមានប្រសាសន៍ឲ្យដឹងថា ក្បាលរថភ្លើងបីគ្រឿង ត្រូវបានដឹកមកដល់កំពង់ផែស្វយ័តព្រះសីហនុ ហើយបានស្ទូចដាក់លើផ្លូវរថភ្លើងទាំងបីគ្រឿង រួចរាល់នៅព្រឹកថ្ងៃទី៩ ខែមករា ឆ្នាំ២០១៩នេះ។
លោកស៊ុន ចាន់ថុលទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូនបានថ្លែងឲ្យដឹងបែបនេះ ក្រោយពីធីបើកសន្និបាទបូកសរុបការងារសាធារណការ និងដឹកជញ្ជូន ឆ្នាំ២០១៨ និងទិសដៅការងារឆ្នាំ២០១៩ នៅថ្ងៃទី ៩ ខែមករា ឆ្នាំ ២០១៩នេះ។លោកបន្តថា យើងបានរង់ចាំរថភ្លើង៣គ្រឿងនេះ រាប់ខែហើយ តែឥឡូវបានមកដល់កំពង់ផែក្រុងព្រះសីហនុហើយ ដូច្នេះយើងខ្ញុំនឹងសុំការអនុញ្ញាតពីសម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា អញ្ជើញចូលរួមសម្ភោធដាក់ឲ្យដំណើរការជាផ្លូវការនាពេលខាងមុខនេះ។
ទាក់ទងផ្លូវដែកនេះ ដែរកម្ពុជាកំពុងជម្រុញការចចារ នូវកិច្ចព្រមព្រៀងសម្បទាន ជាមួយរដ្ឋាភិបាល និងក្រុមហ៊ុន Royal Railway Cambodia ក្នុងការគ្រប់គ្រងផ្លូវដែកនៅកម្ពុជា។
រថភ្លើងធុនស្រាល សេរីទំនើប ដែលក្រុមហ៊ុន Royal Railway Cambodia ទិញពីប្រទេសម៉ិកស៊ីកូ បានមកដល់កម្ពុជាកាលពីរសៀលថ្ងៃទី៨ ខែមករា ឆ្នាំ២០១៩ម្សិលមិញនេះ។ រភ្លើងសេរីទំនើបនេះ នឹងយកមកប្រើប្រាស់សម្រាប់ដឹកអ្នកដំណើរពីស្ថានីយ ឆ្ពោះទៅកាន់អាកាសយានដ្ឋានអន្តរជាតិភ្នំពេញ វាទំនើបជាងរថភ្លើងដែលកំពុងប្រើប្រាស់នាពេលបច្ចុប្បន្ន ដោយរត់បានល្បឿនលឿនពោលចំណាយពេលត្រឹមតែ២៥នាទីប៉ុណ្ណោះពីស្ថានីយ ទៅព្រលានយន្តហោះ ។
រថភ្លើងនេះមានក្បាលម៉ាស៊ីនចំនួនពីរ មុខមួយ និងក្រោយមួយ ជាបច្ចេកវិទ្យាចុងក្រោយ ប្រកបដោយសុវត្ថិភាពខ្ពស់ មានកៅអីដូចកៅអីក្នុងយន្តហោះ ដែលអាចបត់បែន និងកែតម្រូវទៅតាមចិត្ត មានបន្ទប់ទឹក ម៉ាស៊ីនត្រជាក់ ទ្វារស្វ័យប្រវត្តិ និងកន្លែងដាក់ឥវ៉ាន់នៅខាងលើអ្នកដំណើរ និងមាន Wifi ទូរទស្សន៍ និងប្រព័ន្ធផ្ដល់ព័ត៌មានតាមវីដេអូ៕
