ដោយ គង់ សូរិយា

ភ្នំពេញ៖ ខេត្តព្រះសីហនុ ក្នុងរយៈពេលបីឆ្នាំចុងក្រោយនេះមានការរីកចម្រើ​នស្ទើរមិនគួរឲ្យជឿ ដោយមានអាគារកប់ពពកជាច្រើនកំពុងសាងសង់ ប៉ុន្តែអាគា រដែលបានរចនាដ៏អស្ចារ្យមិនមានច្រើនប៉ុន្មានទេ។

ថ្ងៃនេះគេហទំព័រ Propertyarea.asia សូមនាំលោក អ្នកទៅទស្សនាប្លង់ស្ថា បត្យកម្ម ដែលច្នៃប្រឌិតដោយស្ថាបត្យករល្បីៗលើគំរោងធំៗ នៅខេត្តព្រះសីហនុ។

១/ គំរោងសណ្ឋាគារThe Meridian

អស្ចារ្យសម្រាប់ខេត្តព្រះសីហនុ ដែលសណ្ឋាគារ The Meridian លំ​ដាប់ពិភពលោក នឹងបង្ហាញខ្លួននៅទីក្រុងនេះ ជាមួយនឹងកំពស់ខ្ពស់ជាងគេនិងមានរចនាបស្ថាបត្យកម្មដ៏ទាក់ទាញ។

យោងតាមសារព៌តមានបរទេសបានឲ្យដឹងថា ក្រុមហ៊ុនសណ្ឋាគារលំដាប់ពិភពលោក Marriott International បានចុះកិច្ចព្រមព្រៀងជាមួយក្រុមហ៊ុន Grand Lion Group ដើម្បីសាងសង់សណ្ឋាគារកំពស់៥៨ជាន់ មានបន្ទប់សរុបចំនួន៣៨៨បន្ទប់ និងគ្រោងចំណាយទឹកប្រាក់វិនិយោគ២០០លានដុល្លារអាមេរិក។ តាមកិច្ចព្រមព្រៀងសណ្ឋាគារនេះ នឹង​បើកការដ្ឋានសាងសង់នៅដើមឆ្នាំក្រោយ និងគ្រោងបញ្ចប់នៅឆ្នាំ២០២២។

Le Meridian ជាផ្នែកមួយនៃគំរោង The Gold Cost ដែលមានទីតាំងនៅក្នុង​ខេត្តព្រះសីហនុដ៏រីកចម្រើននេះ។ គំរោងនេះ រួមបញ្ចូលនូវភោជនីយដ្ឋាន Sky bar កន្លែងហាត់ប្រាណ បន្ទប់ប្រជុំ ក្លឹបរាត្រីជាដើម។

២/ គំរោងThe Blue Bay

គំរោងខុនដូThe Blue Bay,ជាគំរោងខុនដូ និងមជ្ឈមណ្ឌលពាណិជ្ជកម្មចម្រុះនៅខេត្តព្រះសីហនុផងដែរ ដែលបច្ចុប្បន្នគំរោងនេះបានសាងសង់បានប្រ​មាណ៨០ភាករយរួចហើយ។

គំរោងនេះកំពុងសាងសង់នៅក្នុងសង្កាត់បី ខ័ណ្ឌមិត្តភាពខេត្តព្រះសីហនុ។ គំរោងដ៏ប្រណីតនេះ ត្រូវបានអភិវឌ្ឍន៍ដោយក្រុមហ៊ុន Shu Jian Tian Yu Development Co, Ltd។

៣/ គំរោងព្រីនស៍ ខូលីណាន បេ

នេះជាគំរោងដ៏អស្ចារ្យមួយទៀត របស់ក្រុមហ៊ុន Prince Real Estate Groupដែលបាននិងកំពុងវិនិយោគលើគំរោង មួយឈ្មោះ ព្រីនស៍ ខូលីណាន បេ មានទីតាំងស្ថិតនៅចំកណ្តាលទីក្រុងព្រះសីហនុ ដែលមានផ្ទៃសំណង់សរុបជាង ១៦ម៉ឺនម៉ែត្រការ៉េ គឺជាគម្រោងអគារពហុមុខងារខ្នាតធំ តាមបណ្តោយឆ្នេរសមុទ្រដែលបណ្តុំទៅដោយសណ្ឋាគារលំដាប់ផ្កាយ៥ អគារស្នាក់នៅរួម អគារពាណិជ្ជកម្ម ផ្សារទំនើប អាហារដ្ឋាន និងកន្លែងសម្រាកលំហែកាយ។-ល-។

៤/ គំរោង Prince City Center

នេះជាគំរោងដ៏អស្ចារ្យមួយទៀតរបស់ក្រុមហ៊ុន Prince Real Estate Groupដែលបាននិងកំពុងចាប់ផ្តើមនៅខេត្តព្រះសីហនុ ជាមួយគំរោងវិនិយោគសរុប៥០០០លានដុល្លារអាមេរិក។ គំរោងដ៏មហិមានេះ មានសណ្ឋគារ ខុនដូ មជ្ឈមណ្ឌលកំសាន្ត មជ្ឈមណ្ឌលពាណិជ្ជកម្មចម្រុះ ភោជនីយដ្ឋាន ការិយាល័យ ក្លឹបកំសាន្តជាដើម។

៥/ គំរោង CITY VIEW

គំរោងនេះបាននិងកំពុងចាប់ផ្តើមសាងសង់ហើយ ដោយមានអាគារចំនួនពីរ កំពស់២៥ជាន់ ស្ថិតនៅលើភ្នំ ខេត្តព្រះសីហនុ។ នេះជាគំរោងខុនដូតម្លៃទាប​មួយ ដែលបានវិនិយោគតំបូងគេនៅខេត្តព្រះសីហនុ ដោយក្រុមហ៊ុនBS ដែលជា​ក្រុមហ៊ុនវិនិយោគក្នុងស្រុកដ៏ធំមួយ៕

ដោយ គង់ សូរិយា

ភ្នំពេញ៖ ការសាងសង់ផ្លូវក្រវ៉ាត់ក្រុងទី៣ នឹងអាចចាប់ផ្តើមនៅពេលឆាប់ៗ ខាងមុខនេះ ដោយសារបច្ចុប្បន្នក្រុមហ៊ុនចិន ដែលជាអ្នកសិក្សាគំរោងនេះបាន​ចាប់ផ្តើមធ្វើការងាររបស់ខ្លួនយ៉ាងសកម្មហើយ។

លោក សាយ ឡុង ប្រជាពលរដ្ឋរស់នៅភូមិព្រែកស្វាយ ឃុំឈើទាល ស្រុកកៀនស្វាយ ខេត្តកណ្តាលបានមានប្រសាសន៍ឲ្យដឹងនាព្រឹកថ្ងៃទី១៩ មិនានេះថា​ក្រុមវិស្វករចិន កំពុងចាប់ផ្តើមបោះបង្គោលពីតំរ៉ុយ សាងសង់ផ្លូវក្រវ៉ាត់ក្រុងទី៣ នៅក្នុងមូលដ្ឋានខាងលើរួចហើយ ដែលធ្វើឲ្យតម្លៃដីនៅតំបន់នោះបានឡើងថ្លៃទ្វេរដង តែកន្លែងខ្លះឡើងថ្លៃមួយគុណនឹងបី។លោកបន្តថា ប្រជាពលរដ្ឋរីករាយ នឹងដំណឹងពីការសាងសង់ផ្លូវក្រវ៉ាត់ក្រុងទី៣នេះ ដោយសារពួកគេមានអារម្មណ៍​ថាកាន់តែកៀកជិតរាជធានីភ្នំពេញ។

លោកបន្តថា “តាមខ្ញុំដឹងនឹងមានការសាងសង់ស្ពានមួយ កាត់កោះកន្លង់ចិន ឆ្ពោះមកកាន់ឃុំឈើទាល ប៉ុន្តែខ្ញុំមិនដឹងផ្លូវនេះបញ្ចប់នៅកន្លែងណាទេ”។

យោងតាមពង្រាងគំរោងសាងសង់ផ្លូវនេះ ដែលបានបង្ហាញកាលពីសប្តា​ហ៍មុន ដោយអភិបាលរងខេត្តកណ្តាលលោកគង់ សោភ័ណ្ឌបានឲ្យដឹងថា គម្រោ​ងសាងសង់​ផ្លូវក្រវ៉ាត់ក្រុង​ ខ្សែទី៣ (ភ្ជាប់ពីផ្លូវជាតិលេខ៤ ទៅផ្លូវជាតិ២១) លាតសន្ធឹងលើឃុំ-សង្កាត់ចំនួន១៧ នៃស្រុកចំនួន៣ ​ក្នុងខេត្តកណ្តាល និងខ័ណ្ឌចំនួន២របស់រាជធានីភ្នំពេញ។​ គម្រោងនេះ ចាប់ផ្តើមពី​ PK១៦+៨០០ ​ផ្លូវ​កប់​ស្រូវ សង្កា​ត់​ចោមចៅ ខ័ណ្ឌពោសែនជ័យ រាជធានីភ្នំពេញ និងបញ្ជប់គឺចំនុចប្រសព្វPK៦៤+៤០៨ និងផ្លូវជាតិលេខ១ នៅភូមិកណ្តាលលើឃុំបន្ទាយដែក ដីឥដ្ឋ កំពង់ស្វាយ និងឃុំឈើទាល ស្រុកកៀនស្វាយ។

គំរោងនេះក៏ឆ្លងកាត់ស្រុកស្អាងងដែរ រួមមានមាន ឃុំកោះអន្លង់ចិន សិត្បូ រកាខ្ពស់ ស្រុកកណ្តាលស្ទឹង​មានឃុំកណ្តោក ជើងកើប និងឃុំព្រះពុទ្ធ។

នៅរាជធានីគម្រោងនេះ ផ្លូវឆ្លងកាត់ខ័ណ្ឌដង្កោ រួមមាន ​សង្កាត់គងនយ សាក់សំពៅ ពងទឹក ប្រទះឡាង។ ខ័ណ្ឌពោសែនជ័យ មានសង្កាត់ភ្លើងឆេះរទះ កន្ទោក និងចោមចៅ។

គំរោងសាងសង់ផ្លូវក្រវ៉ាត់ក្រុងទី៣នេះ ក៏មានការសាងសង់​ស្ពានអាកាសកាត់​ផ្លូវជាតិ​លេខ៤ លេខ៣ និងលេខ២១ និងសាងសង់ស្ពានឆ្លងទន្លេបាសាក់ចំនួន១០ នៅស្រុកស្អាង និង​ស្រុកកៀនស្វាយ ដែលមានទទឹង២៥ម៉ែត្រ និងក្រាលកៅស៊ូអ៊ុត (ASphaltconcrete) និងមានលូ១០១​កន្លែង​ ដែលមានលូ២ប្រភេ​ទ​គឺប្រភេទលូមូលចំនួន២៨កន្លែង មុខកាត់ជាមធ្យម១,៦០m ប្រភេទលូជ្រុង​ចំនួន៧៣​កន្លែងមុខកាត់ជាមធ្យម៣ម៉ែត្រផងដែរ។

លោកគង់ សោភ័ណ្ឌបានមានប្រសាសន៍ឲ្យដឹងទៀតថា គម្រោងនេះមានផ្លូវប្រវែង៤៧.៦០៨គឺឡូម៉ែត្រ ដែលវាជាគម្រោងមួយ ​ក្នុង​ចំណោមគម្រោងអាទិភាពជាច្រើនរបស់រាជរដ្ឋាភិបាលកម្ពុជា។ លោកបន្តថា តាមរយៈការសិក្សាពីសមិទ្ធិផលលទ្ធផល បានបង្ហាញ​ឲ្យដឹងថា បើគម្រោងនេះត្រូវបានសាងសង់ នឹងធ្វើឲ្យប្រសើរឡើងបណ្តាញ​ផ្លូវ​ជាតិ​នៅ​កម្ពុជា ពង្រឹង និងពន្លឿនការអភិវឌ្ឍន៏ក្រុង និងចូលរួមសំរេចផែនការរួមរបស់រាជធានីភ្នំពេញ ក្នុងការកែ​លំ​អរបណ្តាញ​ផ្លូវក្រវ៉ាត់ក្រុង កាត់បន្ថយការកកស្ទះចររាចរណ៏នៅតំបន់ទីប្រជុំជន និងចូលរួមក្នុង​ការ​អភិវឌ្ឍន៏​សេដ្ឋកិច្ចជាតិ៕

គម្រោង​ថ្មី​ជាងគេ​របស់​ក្រុមហ៊ុន​ភ្នំពេញ​ស៊ី​ធី​សេន​ធ័​រ គឺ Eden Garden បាន​ក្លាយជា​ជ័យលាភី​នៅក្នុង​កម្មវិធី​ពានរង្វាន់​អចលនទ្រព្យ​កម្ពុជា​ឆ្នាំ2018 ដែល​រៀបចំឡើង​ដោយ​ក្រុមហ៊ុន PropertyGuru កាលពី​រាត្រី​ថ្ងៃទី16 ខែមីនា ឆ្នាំ2018 នៅ​សណ្ឋាគារ សូ​ហ្វី​តែ​ល ភូ​គី​ត្រា ភ្នំពេញ ក្រោម​ការចូលរួម​ពី​សំណាក់​បណ្តា​ក្រុមហ៊ុន​អចលនទ្រព្យ និង​អភិវឌ្ឍ​គម្រោង​សាងសង់​ជាច្រើន។

គម្រោង​ហាង​លក់ទំនិញ និង​ភោជនីយដ្ឋាន ដែលមាន​ទំហំ​ជាង 21,000ម៉ែត្រការ៉េ មួយ​នេះ បានឈ្នះ​ពានរង្វាន់​ល្អ​បំផុត​ជា “ គម្រោង​អភិវឌ្ឍន៍​អាជីវកម្ម​ល្អ​បំផុត និង​គម្រោង​អភិវឌ្ឍន៍​ដែល​រចនា​ឡើង​លក្ខណៈ​សកល​ល្អ​បំផុត” (Best Retail Development and Best Universal Design Development) ព្រមទាំង​ទទួលបាន​រង្វាន់ ” Best Retail Landscape Architectural Design និង Best Retail Architectural Design” ក្នុង​ចំណាត់ថ្នាក់ Highly Commended ។

លោ​បាន​បន្ថែមទៀតថា «នៅ Eden Garden ពួកយើង​បានជ្រើសរើស​ហាង​ដោយ​ប្រុងប្រយ័ត្ន​ដើម្បី​បំពេញតម្រូវការ​អតិថិជន​ឱ្យ​គាត់​ទទួលបាន​បទពិសោធន៍ប្លែកៗពី​ភោជនីយដ្ឋាន​ទាំងនោះ ហើយ​អតិថិជន​របស់​យើង គឺ​ផ្តោតទៅលើ​ប្រជាពលរដ្ឋ​ក្នុង​តំបន់ ជនបរទេស និង​អ្នកទេសចរ​ជាតិ និង​អន្តរជាតិ សម្រាប់​ពួគគាត់​មក​លំហែកាយ​ផងដែរ»។

មាន​ហាង​ទំនិញ និង​ភោជនីយដ្ឋានល្បីៗជាច្រើន​ដែល​កំពុង​រៀបចំ​ដំណើរការឆាប់ៗនៅ Eden Garden ក្នុងនោះ​មានដូចជា​ហាង​កាហ្វេ Starbucks ដែល​បើក​ដំណើរការ​កាលពី​ថ្ងៃ​សៅរ៍​សប្តាហ៍​មុន។ ក្រៅពីនេះ​យើង​ក៏មាន​ភោជនីយដ្ឋាន S&P Thai Restaurant & Bakery របស់​ប្រទេស​ថៃ, Steps, Say Chiizu, Kyoka Sushi, ហាង​ផ្កា Rosemary Flowerbar, ហាង​លក់​សម្ភារៈ​កីឡា Fan Sports Store, ឱសថស្ថាន Help, ភោជនីយដ្ឋាន​បបរ​ក​ង្កែ​ប Geylang Frog Porridge និង​ហាង​ផ្សេងទៀត​កំពុង​ចាប់ផ្តើម​ដំណើរការ​ជា​បន្តបន្ទាប់​ផងដែរ។ លើសពីនេះ​ទៀត ផ្សារ​ទំនើប SUPERSTORE, រោងភាពយន្ត LEGEND និង​ក្លឹប​កំសាន្ត EPIC សាខា​ទី​ពីរ ក៏​នឹង​ត្រូវបាន​បើក​ដំណើរការ​ជា​ផ្លូវការ នៅ​អំឡុង​ខែឧសភា ឬ មិថុនា​ខាងមុខនេះ​ផងដែរ។

ឆ័​ត្រ​ដែលមាន​គ្រោង​ខ្ពស់​នៅ Eden Garden ដែល​ទទួលបាន​គំនិត​រចនា​ពី​កន្លែង​កំសាន្ត Clarke Quay របស់​ប្រទេស​សិង្ហ​បុរី បានធ្វើឱ្យ​មានការ​ទាក់ទាញ​យ៉ាង​ពិសេស​នៅពេល​រាត្រី ដោយមាន​ភ្លើង7ពណ៌​ចាំង​ឆ្លាស់គ្នា។ ទីធ្លា​បើកទូលាយ មាន​ផ្លូវ​ថ្មើរជើង និង​កន្លែង​អង្គុយ​សម្រាក​លំហែកាយ ព្រមជាមួយ​ដើមឈើ​ខ្ពស់​បៃតង ស្វាគមន៍​យ៉ាង​កក់ក្តៅ​ដល់​អ្នក​មក​កំសាន្ត​នៅទីនេះ។ ទាំងនេះ​គឺជា​ទិដ្ឋភាព​ដ៏​ថ្មី នៅ​រាជធានី​ភ្នំពេញ។

ភ្នំពេញ​ស៊ី​ធី​សេន​ធ័​រ ដែលមាន​ទីតាំង​ស្ថិតនៅ​ចំ​កណ្តាល​នៃ​រាជធានី​នៃ​ប្រទេស​កម្ពុជា ដែលមាន​ផ្ទៃដី 111.6 ហិកតា មាន​គម្រោង​អភិវឌ្ឍន៍​ជាច្រើន​ដែល​កំពុង​សាងសង់​ជា​បន្តបន្ទាប់។ កាលពី​ឆ្នាំមុន ភ្នំពេញ​ស៊ី​ធី​សេន​ធ័​រ បានទទួល​ជ័យជំនះ​ទៅលើ​គម្រោង​លំនៅដ្ឋាន Residence90 ជា​គម្រោង​លំនៅដ្ឋាន​រចនា​ឡើង​ប្រកបដោយ​ស្ថាបត្យកម្ម​ល្អ​បំផុត, គម្រោង The Edge ជា​អគារ​ពាណិជ្ជកម្ម​ដែលមាន​ហាង​លក់ទំនិញ ដែល​កំពុង​ចាប់ផ្តើម​សាងសង់ និង​ចុងក្រោយ​គឺ​អគារ The Vanguard ដែលជា​ការិយាល័យ​ថ្មី​ដែលមាន​លក្ខណៈ​ទំនើប និង​ទាន់សម័យ​របស់​ក្រុមហ៊ុន​ភ្នំពេញ​ស៊ី​ធី​សេន​ធ័​រ។

លោក Alex Lau នាយក​ក្រុមហ៊ុន ភ្នំពេញ​ស៊ី​ធី​សេន​ធ័​រ បាន​មានប្រសាសន៍ថា៖ “ភ្នំពេញ​ស៊ី​ធី​សេន​ធ័​រ មានបំណង​ចង់​ក្លាយទៅជា​អ្នក​អភិវឌ្ឍន៍​ឈានមុខ​គេ តាមរយៈ​ការបង្កើត​សហគមន៍​មួយ​ប្រកបដោយ​និរន្ត​ភាព, មាន​ភាព​ច្នៃប្រឌិត​ដ៏​សម្បូរបែប​រួមបញ្ចូល​គ្នា​នៅក្នុង​តំបន់។ យើង​មិនមែន​គ្រាន់តែ​ជា​អ្នក​អភិវឌ្ឍន៍​អចលនទ្រព្យ​ប៉ុណ្ណោះ​ទេ ប៉ុន្តែ​យើង​ជា​អ្នករៀបចំ​គម្រោង​ផែនការ​នគរូបនីយកម្ម​ទីក្រុង និង​ជា​អ្នក​អភិវឌ្ឍន៍​មេ​សម្រាប់​ការអភិវឌ្ឍន៍​គម្រោង​ភ្នំពេញ​ស៊ី​ធី​សេន​ធ័​រ​ដ៏​សំខាន់​របស់​យើង។ ” លោក​បាន​បន្ថែមថា “ពួកយើង​បានចាប់ផ្តើម​គម្រោង​នេះ​ឡី​ង នៅពេលដែល​យើង​សម្លឹង​ឃើញ​ឱកាសល្អ​ខាង​ផ្នែក​ភោជនីយដ្ឋាន និង​ហាង​ភេសជ្ជៈ ដែល​កំពុង​តែមាន​សន្ទុះ​កើនឡើង​ក្នុងពេល​បច្ចុប្បន្ននេះ” ។

ភ្នំពេញ ស៊ី​ធី​សេន​ធ័​រ ដែលមាន​ទីតាំង​ស្ថិតនៅ​ចំ​កណ្តាល​នៃ​រាជធានី​ភ្នំពេញ គឺជា​គោលដៅ​ដ៏​ល្អ​សម្រាប់​ប្រជាពលរដ្ឋ​ក្នុងស្រុក និង​ជនបរទេស ហើយក៏​ជា​កន្លែង​ដែលមាន​អគារ​ធ្វើ​អាជីវកម្មទំនើបៗ ប្រកប​ដោយមាន​ភាព​ច្នៃប្រឌិត និង​ទាន់សម័យ។ លើសពីនេះ​ទៀត ហេ​ដ្ឋា​រចនា​សម្ពន្ធ និង​ប្រព័ន្ធ​ចរាចរណ៍​គឺ​ត្រូវបាន​សាងសង់ និង​រៀបចំ​យ៉ាង​យកចិត្តទុកដាក់ ដើម្បី​ការរស់នៅ និង​ការធ្វើដំណើរ​មាន​សុវត្ថិភាព​ខ្ពស់។ វត្តមាន​របស់​កន្លែង​កម្សាន្ត​ដែល​បើក​ដំណើរការ 24ម៉ោង Eden Garden នឹង​បន្ថែម​នូវ​គុណ​តម្លៃ​ដ៏​វិសេស​នៅក្នុង​ទីក្រុង​អភិវឌ្ឍន៍​ថ្មី  ភ្នំពេញ​ស៊ី​ធី​សេន​ធ័​រ ដ៏​ធំ​មួយ​នេះ ៕

ភ្នំពេញ៖ ជាមួយនឹងការយកចិត្តទុកដាក់លើគុណភាពសំណង់ សោភ័ណភាព ហេដ្ឋារចនា​សម្ព័ន្ឋ បានធ្វើឲ្យបុរី The Mekong Royalបានទទួលពានរង្វាន់ចំនួន៣ ស័ក្តិសមនឹងការខិតខំប្រឹងប្រែងរបស់ខ្លួន។

ក្នុងពិធីប្រគល់ពានរង្វាន់អចលទ្រព្យប្រចាំឆ្នាំ ដែលរៀបចំឡើងដោយគណៈកម្មការប្រចាំតំបន់អាស៊ី អាគ្មេយ៍ Propertyguru កាលពីរាត្រីថ្ងៃទី១៦ មិនាកន្លងមកនេះ ក្រុមហ៊ុនអភិវឌ្ឍ​បុរីThe Mekong Royalបានក្លាយជាអ្នកទទួលជ័យលាភីឆ្នើមមួយ ក្នុងចំណោម​ក្រុមហ៊ុនអភិវឌ្ឍវិស័យលំនៅដ្ឋានជាច្រើននៅកម្ពុជា។ ពានរង្វាន់ដែលបុរី ឌឹមេគង្គរ៉ូយ៉ាល់ទទួ​លបានមានចំនួនបី ទី១ ពានរង្វាន់អភិវឌ្ឍ លំនៅដ្ឋានស្អាតនិងល្អដាច់គេ(Best Housing Development​ Award) ទី២ ពានរង្វាន់ស្ថាបត្យកម្មរចនាទេសភាពលំនៅដ្ឋានបានស្អាតនិងល្អដាច់គេ (Best Housing Landscape architectural Design​ Award) និងទី៣ ប័ណ្ណសរសើរស្ថាបត្យកម្មរចនាម៉ូតផ្ទះបានស្អាតនិងល្អដាច់គេ(Best housing architectural design (Highly Commended))។

ការរៀបចំប្រគល់ពានរង្វាន់ Property award 2018 ធ្វើឡើងដោយអ្នកជំនា​ញ​ជាតិ​ និង អន្តរជាតិវាយតម្លៃយ៉ាងហ្មត់ចត់ និងមានការវិនិច្ឆ័យយ៉ាងលម្អិត ទៅលើផ្នែកនីមួយៗ នៃគំរោងអភិវឌ្ឍលំនៅដ្ឋាននានា ដែលបានដាក់បញ្ចូលក្នុងការរៀបចំវាយតម្លៃ ដើម្បីទទួលបានពានរង្វាន់ដ៏មានកិត្យានុភាពនេះ។

បុរី The Mekong Royal ស្ថិតនៅតាមបណ្តោយផ្លូវជាតិលេខ៦អា ដែលជាបុរីវិនិយោគលើផ្ទៃដី៣០ហិកតា និងបានចាប់ផ្តើមអភិវឌ្ឍន៍ចាប់តាំងពីឆ្នាំ២០១៤ ដែលរហូតមកទល់ពេលនេះលំនៅដ្ឋានក្នុងបុរី ឌឹមេគង្គរ៉ូយ៉ាល់ លក់បានជោគជ័យជាង៩០ភាគរយរួចហើយ។

អគ្គនាយក បុរី ឌឹមេគង្គ រ៉ូយ៉ាល់ លោកឧកញ៉ា ជាម ឃុនណាត បានថ្លែងថា «ខ្ញុំមានមោទនភាពយ៉ាងក្រៃលែង ដែលឈ្នះរង្វាន់ទាំងបី ក្នុងកម្មវិធីអចលនទ្រព្យកម្ពុជាប្រចាំឆ្នាំ២០១៨ បុរីយើង នឹងប្តេជ្ញាចិត្តថា នឹងនាំមកនូវផលិផលផ្ទះបែបប្រណិត និងថ្មីទំនើប ជាមួយនឹងការរចនាដ៏ល្អឥតខ្ចោះ មកដល់កម្ពុជាយើង​» ។

បុរី ឌឹមេគង្គ រ៉ូយ៉ាល់ ​ប្រកបដោយគុណភាពសំណង់ និងការច្នៃប្រឌិតខ្ពស់ ក្នុងការផ្តល់នូវភាពឥតខ្ចោះ និងផាសុកភាពដល់ការរស់នៅរបស់អតិថិជន ៕

ដោយ គង់ សូរិយា

ភ្នំពេញ៖ ក្រុមហ៊ុនអចលនទ្រព្យយក្ស មានមូលដ្ឋាននៅប្រទេសចិនបានបង្ហាញគំរោងអភិវឌ្ឍន៍ដ៏សម្បើមជាច្រើនទៀត ដែលមានទុនវិនិយោគរហូតដល់​៥០០០លានដុល្លារអាមេរិក។

យោងតាមសេចក្តីប្រកាសព៌តមាន សម្រាប់អបអរខួប៣ឆ្នាំរបស់ខ្លួនដែលបានវិនិយោគនៅកម្ពុជា ជាមួយនឹងសមិទ្ធផលដ៏អស្ចារ្យ ក្រុមហ៊ុនអចលនទ្រព្យយក្សមកពីប្រទេសចិននេះ បាននិងកំពុងបង្ហាញគំរោងជាច្រើនទៀត រួមមានផ្សារទំនើបព្រីនស៍ ស៊ូភើ ម៉ាឃីត សណ្ឋាគារព្រីនស៍ ថាម ហូថេល រមណីយដ្ឋាន ព្រីនស៍ ម៉ាណ័រ នឹងបើកដំណើរនៅឆ្នាំ២០១៨នេះ។ រីឯគម្រោងព្រីនស៍ អ៊ីនធើណាសិនណល ផ្លាហ្សា គម្រោងព្រីនស៍ ស៊ីធី សិនធើ និងគម្រោងខូលីណឹន បេ ក៏នឹងចាប់ផ្តើមសាងសង់នៅឆ្នាំ២០១៨នេះដែរ។

សេចក្តីប្រកាសដដែលបានឲ្យដឹងទៀតថា ចំណែកឯគម្រោងព្រីនស៍ កោះតាកៀវ គម្រោងព្រីនស ស្មាត ស៊ីធី គម្រោងព្រីនស៍ ថាម ផ្លាហ្សា និងគម្រោង ហេបភី ផ្លាហ្សា។ល។ ក៏កំពុងស្ថិតក្នុងដំណាក់កាលសិក្សា និងវាយតម្លៃផងដែរ។ ក្នុងកំទ្បុងពេល ១០ឆ្នាំខាងមុខ ក្រុមហ៊ុនគ្រោងនឹងបណ្តាក់ទុនសរុបរហូតដល់៥ពាន់លានដុល្លារអាមេរិកសម្រាប់អភិវឌ្ឍគម្រោងខាងលើនេះ។

ក្រុមហ៊ុន Prince Real Estate Group បាននិងកំពុងវិនិយោគគំរោងជាច្រើនរួចមកហើយនៅទីក្រុងភ្នំពេញ ដូចជា Diamond Oneនៅទីក្រុងកោះពេជ្រ គំរោងPrince Plaza ស្ថិតនៅតាមបណ្តោយមហាវិថីព្រះនរោត្តម និងគំរោងជាច្រើនទៀតនៅខេត្តព្រះសីហនុ។

នាយកប្រតិបត្តិក្រុមហ៊ុន Prince Real Estate Group បានថ្លែងថាការវិនិយោគនៅកម្ពុជា ដោយសារទំនាក់ទំនងល្អរវាងរដ្ឋាភិបាលប្រទេសកម្ពុជាចិន ដែលបានឈានដល់ការដាក់ចេញ នូវយុទ្ឋសាស្រ្តគ្រប់ជ្រុងជ្រោយកាលពីឆ្នាំ២០១០និងគោលនយោបាយផ្លូវសូត្រ ខ្សែក្រវ៉ាត់មួយផ្លូវមួយសុទ្ឋតែជាផ្នែកដ៏សំខាន់នៃ ការវិនិយោគរបស់ខ្លួននៅប្រទេសកម្ពុជា។លោកបន្តថា លោកជឿជាក់ថាទីផ្សារ​កម្ពុជាមានភាពរីកចម្រើន ហើយយើងនឹងចូលរួមអភិវឌ្ឍន៍កម្ពុជាឲ្យឈានឡើង​មូយកម្រិតទៀត៕