កាស៊ីណូនៅខេត្តព្រះសីហនុកើនឡើងដល់ ៣០កន្លែងហើយ

March 7, 2018

ដោយគង់ សូរិយា

ភ្នំពេញ៖ ចំនួនកាស៊ីណូក្នុងខេត្តព្រះសីហនុ បានកើនឡើងឥតឈប់ឈរ ដោយរហូតមកទល់ពេលនេះ ទីក្រុងនេះមានកាស៊ីណូប្រមាណ៣០កន្លែងហើយ ខណៈវត្តមានជនជាតិចិន កាន់តែច្រើនបានចូលមកធ្វើការ និងវិនិយោគក្នុងខេត្តនេះ។

ស្នងការនគរបាលខេត្តព្រះសីហនុ លោកជួន ណារិនបានមានប្រសាសន៍ ឲ្យដឹងតាមទូរស័ព្ទនាព្រឹកថ្ងៃទី៧ មិនានេះថា ចំនួនកាស៊ីណូបាននិងកំពុងកើនឡើងជាបន្តបន្ទាប់ ដោយរហូតមកទល់ពេលនេះ មានកាស៊ីណូកំពុងដំណើរការ និងត្រៀមដំណើរការចំនួន៣០កន្លែងហើយ នៅក្នុងទីក្រុងជាប់មាត់សមុទ្រនេះ។លោកបន្តថា វត្តមានកាស៊ីណូបានធ្វើឲ្យចំនួនទេសចរណ៍កើនឡើង ខណៈជនជាតិចិនរស់នៅក្នុងខេត្តនេះមានចំនួនប្រមាណ៥០០០នាក់។

លោកបន្តថា “សន្តិសុខ សណ្តាប់ធ្នាប់ក្នុងខេត្ត ត្រូវបានពង្រឹងជាបន្តបន្ទាប់ ដើម្បីផ្តល់ភាពកក់ក្តៅដល់អ្នកវិនិយោគ និងភ្ញៀវទេសចរណ៍ជាតិ អន្តរជាតិនានា”។

ខេត្តព្រះសីហនុកំពុងមានការរីកចម្រើន លើវិស័យបដិសណ្ឋារកិច្ចជាច្រើន ដោយរហូតមកទល់ពេលនេះ មានសណ្ឋាគារនិងផ្ទះសំណាក់ចំនួនជិត១ម៉ឺនបន្ទប់។

លោកតាំង សុចិត្រគ្រឹះស្នាប្រធានមន្ទីរទេសចរណ៍ខេត្តព្រះសីហនុបានឲ្យដឹងនៅថ្ងៃដដែលនេះថា ខេត្តព្រះសីហនុមានសណ្ឋាគារប្រមាណ៨៨នាពេលបច្ចុប្បន្ននេះ និងមានបន្ទប់ជិត៤០០០បន្ទប់ និងផ្ទះសំណាក់ បឹងហ្កាឡូនានាជាង៣០០កន្លែង និងមានបន្ទប់សរុបចំនួនជាង៤០០០បន្ទប់ ដែលបាននិងកំពុងដំនើរការ ហើយនៅចុងឆ្នាំនេះសណ្ឋាគារចំនួន១០ទៀត និងមានបន្ទប់សរុបប្រមាណ១០០០បន្ទប់ នឹងបើកដំណើរការផងដែរ ដើម្បីឆ្លើយតបនឹងកំនើនទេសចរណ៍ និងអ្នកវិនិយោគនានា។

លោកបន្តថា “ដោយសារសណ្ឋាគារភាគច្រើន ត្រូវបានជួលដោយជនជាតិចិនធ្វើកាស៊ីណូ បានធ្វើឲ្យចំនួនបន្ទប់តែងមានភាពខ្វះខាតនៅចុងសប្តាហ៍ ប៉ុន្តែនៅឆ្នាំ២០១៨ និង២០១៩ខាងមុខនេះ សណ្ឋាគារលំដាប់ផ្កាយប្រាំបីទៅបួនទៀតនឹងបើកដំណើរការ ដែលអាចជួយសម្រាលកង្វះខាតបន្ទប់ស្នាក់នៅ”។

ជាមួយគ្នានេះដែរ រដ្ឋមន្រ្តីក្រសួងទេសចរណ៍លោកថោង ខុនក៏បានស្នើឲ្យអ្នកវិនិយោគជាតិ និងអន្តរជាតិបន្តវិនិយោគលើវិស័យបដិសណ្ឋារកិច្ច បន្ថែមទៀតនៅខេត្តព្រះសីហនុ ដើម្បីឆ្លើយតបនឹងតម្រូវការ៕

អ្នកជំនាញពន្យល់ពីផលប៉ះពាល់ និងអត្ថប្រយោជន៍នៃការទិញផ្ទះដោយការបង់រំលស់

March 7, 2018

0

ដោយ រ៉ាវី
ភ្នំពេញ៖ បច្ចុប្បន្ននេះសម្រាប់ការទិញផ្ទះ ដោយការអនុវត្តវិធីសាស្រ្តបង់រំលស់ គឺកំពុងតែមានភាពពុះកញ្ជ្រោលយ៉ាងខ្លាំង ក្នុងនោះរាប់ទាំងប្រភេទលំនៅដ្ឋានធម្មតា សម្រាប់អ្នកដែលមានចំណូលមធ្យម និងក្រោមមធ្យមក៏ដូចជាប្រភេទលំនៅដ្ឋានបែបប្រណីត ស្ថិតនៅក្នុងបុរី ដែលផ្តោតសំខាន់លើអ្នកមានចំណូលខ្ពស់។

តើការទិញផ្ទះលំនៅដ្ឋានដោយការបង់រំលស់នេះ មានចំណុចល្អប្រសើរ និងប៉ះពាល់អ្វីខ្លះ ចំពោះអតិថិជនដែលជាអ្នកទិញ ? ចម្ងល់មួយនេះត្រូវបានបំភ្លឺដោយលោកឧកញ៉ា នួន រឹទ្ធី អគ្គនាយកក្រុមហ៊ុន Khmer Foundation Appraisals ដូចខាងក្រោម។

លោកឧកញ៉ា នួន រឹទ្ធី បានមានប្រសាសន៍បញ្ជាក់ថា ការបង់រំលស់ថ្លៃផ្ទះនេះ គឺត្រូវធ្វើឡើងដោយអមជាមួយគ្នារវាងថ្លៃដើម និងការប្រាក់ ។ ប៉ុន្តែបើសម្លឹងមើលពីចំនួនថ្លៃដើម គឺដំបូងបានរំលស់តិចណាស់ ដែលវាត្រូវចំណាយលើការប្រាក់ច្រើនក្នុងមួយខែ។ បើយើងរំលស់ក្នុងរយៈពេលយូរ យើងបង់ខាតកាន់តែច្រើន ដូច្នេះសម្រាប់អ្នកដែលចង់ទិញផ្ទះដោយការបង់រំលស់នេះ ចាំបាច់ត្រូវពិចារណាទៅលើស្ថានភាព នៃចំណូលរបស់ខ្លួនជាមុនសិនថា តើចំណូលដែលបានមកស័ក្តិសមនឹងការទិញផ្ទះដែរឬទេ។

មួយវិញទៀត សម្រាប់អ្នកដែលមានចំណូលមានកម្រិត ក៏គួរពិចារណាថា តើការជួលផ្ទះ និងការទិញផ្ទះដោយការរំលស់នេះ មួយណាប្រសើរជាងសម្រាប់ជីវភាពជាក់ស្ដែងរបស់យើង ។

លោកឧកញ៉ានួន រិទ្ឋីបានលើកជាឧទាហរណ៍ថា យើងស្នាក់នៅក្នុងផ្ទះជួលដោយចំណាយ200ដុល្លារក្នុងមួយខែ ប៉ុន្តែនៅពេលមានគេសង់ផ្ទះលក់ដោយការបងរំលស់ត្រឹម200ដុល្លារ ក្នុងមួយខែដូចគ្នា សួរថាតើយើងត្រូវនៅផ្ទះជួយបន្តទៀត ឬត្រូវទិញផ្ទះ ? ជាការពិត បើយើងបូកសរុបចំនួននៃការចំណាយលើការបង់សរុបនៃថ្លៃផ្ទះ គឺមានចំនួនច្រើនលើសថ្លៃដើម ប៉ុន្តែវិធីសាស្រ្តនៃការបង់រំលស់នេះ គឺបានបន្ធូរបន្ថយដល់អ្នកមានលទ្ធភាពមធ្យម និងក្រោមមធ្យមទទួលបានផ្ទះស្នាក់នៅ។

លោកឧកញ៉ាបន្តថា និយាយរួមការទិញផ្ទះដោយការបង់រំលស់ មានចំណុចល្អ និងចំណុចអវិជ្ជមាន។ ចំណុចល្អត្រង់ថា យើងអាចមានផ្ទះស្នាក់នៅ និងជាកម្មសិទ្ធិតាំងពីយើងមិនទាន់មានលុយទិញផ្ទះគ្រប់ ដោយឡែកចំណុចអវិជ្ជមាន គឺត្រូវចំណាយថ្លៃបង់ការប្រាក់ប្រចាំខែច្រើន៕

ស្វែងយល់ពីអាស៊ី៖ ទីផ្សារអចលនទ្រព្យនៅកោះតៃវ៉ាន់កំពុងកើនឡើង

March 6, 2018

0

ដោយ វុត្ថា

ភ្នំពេញ៖ ទីផ្សារអចនលទ្រព្យនៅកោះតៃវាន់ ក៏បានបង្ហាញសញ្ញាវិជ្ជមានផងដែរនៅឆ្នាំនេះ ដោយអចលនទ្រព្យក្នុងប្រទេសនេះ កំពុងបង្ហាញពីកំណើនលូតលាស់គួរឱ្យកត់សម្គាល់។

យោងតាមការស្ថិតិផ្លូវការ ចេញផ្សាយដោយរដ្ឋាភិបាលនៃកោះនេះ កាលពីសប្តាហ៍មុននេះបានឱ្យដឹងថា ទីក្រុងធំៗចំនួន៦នៃកោះនេះ មានការកើនឡើងនូវតម្រូវការផ្ទះ ការិយាល័យធ្វើការ និងហាងលក់ដូរ ចាប់តាំងពីខែមករាដល់ខែកុម្ភៈនេះកើនឡើងរហូតដល់៩,៧៦ ភាគរយ។

របាយការណ៍ដដែលបានឲ្យដឹងទៀតថា មានខុនដូចំនួន៣០.៦៤០យូនីតត្រូវបានគេដាក់លក់ក្នុងទីក្រុងតៃប៉ិ ទីក្រុងតៃប៉ិថ្មី តាយវ៉ាយ តៃឈុន តានអ៊ីន និងទីក្រុងកាវសុង។ ទីក្រុងតៃប៉ិបានចុះបញ្ជីរកើនឡើងនូវអចលនទ្រព្យ ប្រមាណជា ១៥,១% ក្នុងមួយឆ្នាំ គឺកើនឡើងដល់៣,៦៨៧ Units ខណៈក្រុមហ៊ុន Tainan បានបង្ហាញពីកំណើន៣២,២% សម្រាប់ការលក់អចលនទ្រព្យផ្នែកលំនៅដ្ឋាន និងអគារពាណិជ្ជកម្មចំនួន៣,៣៤៥ យូនីត។

លោក Hsu Chih-yao អ្នកគ្រប់គ្រងនៅក្រុមហ៊ុនប្រឹក្សាអចលនទ្រព្យ National Realty បានឱ្យដឹងថា ទីក្រុងចំនួន៦បានរាយការណ៍ពីការកើនឡើងនៃការធ្វើអាជីវកម្មផ្ទះ ប៉ុន្តែទីផ្សារក្នុងក្រុងតៃប៉ិ បានទទួលប្រយោជន៍ពីការកើនឡើងតម្រូវការនៅតាមស្រុកដូចជា ស្រុក Neihu Zhongshan និង Da’an ។

ក្រុមអ្នកវិភាគនៅក្នុងក្រុមហ៊ុនពិគ្រោះយោបល់ Eastern Realty បាននិយាយថា កំណើននៅក្នុងទីក្រុងតាណាន និងកាវសុងស្ថិតក្នុងរង្វង់៧,៥ភាគរយប្រចាំឆ្នាំ នៅក្នុងប្រតិបត្តិការចំនួន៤,៩៩៦យូនីត ។ តួលេខនេះបានឆ្លុះបញ្ចាំងពីនិន្នាការនៃការកើនឡើងផ្ទះខ្នាតតូចបន្ថែមទៀត។

ប៉ុន្តែមានតែផ្ទះចំនួន១១.៣០០យូនីតប៉ុណ្ណោះ ត្រូវបានកត់ត្រានៅក្នុងប្រតិបត្តិការលំនៅដ្ឋានសម្រាប់ខែកុម្ភៈ ឆ្នាំ ២០១៨ នេះ ដោយមានការធ្លាក់ចុះ៧,៩ ភាគរយកាលពីឆ្នាំមុន។

ទោះជាយ៉ាងណាអ្វីៗនៅមានសញ្ញាវិជ្ជមាន ការអភិវឌ្ឍលំនៅឋាននៅក្នុងទីក្រុងនានា បានបង្ហាញពីកំណើនប្រចាំឆ្នាំប្រមាណ១១,៨៥ភាគរយ កាលពីឆ្នាំមុន ដែលជាការកើនឡើងជាលើកដំបូងសម្រាប់ទីផ្សារអចលនទ្រព្យ ក្នុងកោះតៃវ៉ាន់ក្នុងរយៈពេល៤ឆ្នាំមកនេះ៕

ស្វែងយល់ពីអាស៊ាន៖ ការផ្គត់ផ្គង់លំនៅដ្ឋាននឹងកើនឡើងវិញក្នុងប្រទេសសឹង្ហបុរី

March 6, 2018

0

ដោយ វុត្ថា

ភ្នំពេញ៖ ការផ្គត់ផ្គង់លំនៅដ្ឋាននៅក្នុងប្រទេសសឹង្ហបុរី នឹងងើបឡើងវិញក្នុងឆ្នាំ២០១៨នេះ ដោយសារតែមានមានក្រុមហអចនលព្រទ្យជាច្រើន បានសម្ភោធគម្រោងសាងសង់ជាច្រើន ដើម្បីស្តារតម្រូវការទីផ្សារឡើងវិញ បន្ទាប់ពីការផ្គត់ផ្គង់ធ្លាក់ចុះកាលពីឆ្នាំមុន។

យោងតាមគេហទំព័រ ProperyGuru បានឲ្យដឹងកាលពីពេលថ្មីៗនេះថា មានគម្រោងសាងសង់ចំនួន១៦ ទៅ២២គម្រោង នឹងធ្វើការសម្ភោធជាផ្លូវការ នៅក្នុងទីក្រុងទាំងមូលក្នុងឆ្នាំ២០១៨នេះ។ តួលេខនេះមានភាពដូចគ្នា ទៅនឹងទិន្ន័យរបស់ក្រសួងអភិវឌ្ឍន៍របស់សឹង្ហបុរីបានបង្ហាញថា មានផ្ទះឯកជនចំនួន១០,០០០ខ្នង នឹងសាងសង់បញ្ច ប់នៅក្នុងឆ្នាំ២០១៨នេះ។

ការពង្រីកការផ្គត់ផ្គង់នេះ វាស្របទៅនឹងការចង់បានរបស់រដ្ឋមួយនេះកាលពីឆ្នាំ២០១។ ក្រុមហ៊ុនសាងសង់បានទិញ គម្រោងសាងសង់លំនៅឋានចំនួន ៤.៥លានដុល្លារអាមេរិក កាលពីឆ្នាំ២០១៧នេះគឺជាតួលេខដ៏ធំ ខណៈដែលការលក់ចេញ បានជាប់គាំងតាមការទស្សន៍ទាយ ដោយសារការបន្ថែមចំនួន២ម៉ឺនUnits ទៅក្នុងទីផ្សារ។

បើតាមគេហទំព័រដដែលនេះបានបង្ហាញថា ក្នុងរយៈពេលត្រឹមតែ៣ខែ ការលក់ផ្ទះក្នុងទីក្រុង បានធ្លាក់ចុះចំនួន៤.៥ភាគរយ។ ការបង្កើនការផ្គត់ផ្គង់អាចរួមចំណែកដល់អត្រាកំណើនការងារខ្ពស់ ដែលជាការជួយដល់អ្នកជួលផ្ទះ។ របាយការណ៍នេះបានឱ្យដឹងថា ការកើនឡើងនៃការផ្គត់ផ្គង់ នៅពេលសាងសង់ចប់នឹងផ្តល់ជម្រើសផ្ទះបន្ថែមទៀត សម្រាប់អ្នកជួលហើយដាក់សម្ពាធលើតម្លៃជួល។

ទន្ទឹមនឹងនេះក្រុមអ្នកវិភាគមានការព្រួយបារម្ភថា ការកើនឡើងនូវការផ្គត់ផ្គង់អាចនាំឱ្យមានការធ្លាក់ចុះតម្លៃអចលនទ្រព្យ ។

អ្នកស្រាវជ្រាវក្នុងប្រទេសនេះបានលើកឡើងថា ដោយសារតែកំណើនប្រជាជនរបស់ប្រទេសសិង្ហបុរី បានធ្លាក់ចុះពី៣,០ភាគរយក្នុងចន្លោះឆ្នាំ ២០០៧ និង ២០១២ និងបន្តធ្លាក់ចុះរហូតដល់ឆ្នាំ២០១៧ ក៏មានភាពមិនច្បាស់លាស់អំពីថា តើការផ្គត់ផ្គង់លំនៅដ្ឋាននេះ អាចត្រូវបានស្រូបយកបានពេញលេញ ដោយទីផ្សារនេះឬយ៉ាងណា៕

ទឹកប្រាក់ជាង ១៣០០លានដុល្លារបានចាក់ចូលក្នុងវិស័យរ៉ែ

March 6, 2018

0

ដោយ គង់ សូរិយា

ភ្នំពេញ៖ មន្រ្តីជាន់ខ្ពស់ក្រសួងរ៉ែ និងថាមពលបានថ្លែងឲ្យដឹងថា គិតមកដល់ពេលនេះទឹកប្រាក់ជាង១៣០០លានដុល្លារ បានវិនិយោគលើវិស័យរ៉ែ និងប្រេងកាតនៅកម្ពុជា ដែលបានអនុម័តដោយរដ្ឋាភិបាល។

លោក ស៊ុយ សែម រដ្ឋមន្រ្តីក្រសួងរ៉ែ និងថាមពលបានលើកឡើងក្នុងសន្និបាតបូកសរុបសមិទ្ធផលនៃការគ្រប់គ្រង និងការអភិវឌ្ឍវិស័យរ៉ែ និងថាមពលឆ្នាំ២០១៤-២០១៧ និងទិសដៅការងារសម្រាប់ឆ្នាំ២០១៨នាព្រឹកថ្ងៃទី៦ មិនានេះថា ការវិនិយោគរបស់អ្នកវិនិយោគបរទេសលើវិស័យរ៉ែ និងប្រេងកាត ដែលរដ្ឋាភិបាលបានអនុម័តរួចរាល់ រឺត្រៀមអនុម័តក្នុងឆ្នាំ២០១៨នេះ មានទំហំទឹកប្រាក់ជាង១៣០០លានដុល្លារអាមេរិក។ លោកបន្តថា ទំហំវិនិយោគដ៏ធំក្នុងវិស័យរ៉ែ និងប្រេងកាតនេះ នឹងក្លាយជាប្រភពទុនវិនិយោគដោយផ្ទាល់ពីក្រៅប្រទេសដ៏ធំសម្រាប់ឆ្នាំ ២០១៨ -២០១៩ខាងមុខ។

លោកបន្តថា “សម្រាប់ឆ្នាំ២០១៨ និងឆ្នាំបន្ទាប់ៗទៀត គឺជាពេលវេលាដែលរដ្ឋាភិបាល អាចចាប់ផ្ដើមប្រមូលផលពេញលេញ ពីរាល់ការវិនិយោគរបស់ខ្លួនហើយ”។

យោងតាមរបាយការណ៍របស់ក្រសួងរ៉ែ និងថាមពលបានបង្ហាញថា ការប្រមូលចំណូលពីធនធានវិស័យរ៉ែ និងប្រេងកាត ជាចំណូលមិនមែនសារពើពន្ធ បានកើនឡើងលើសពី១០ដង ដែលកាលពីឆ្នាំ២០១៣មានទំហំត្រឹមតែ២-៣លានដុល្លារអាមេរិកប៉ុណ្ណោះ ប៉ុន្តែទំហំចំណូលមិនមែនសារពើពន្ធបានពីវិស័យ រ៉ែនិងប្រេងកាត បានកើនឡើងដល់១៧ ទៅ១៨លានដុល្លារអាមេរិក ក្នុងចន្លោះឆ្នាំ២០១៦-២០១៧។

ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consultingលោកង៉ែត ជូបានថ្លែងថា ធនធានរ៉ែ និងចំណូលបានមកពីវិស័យនេះ ជាផ្នែកដ៏សំខាន់មួយទៀតរបស់រដ្ឋាភិបាល ដើម្បីយកមកប្រើប្រាស់ក្នុងអភិវឌ្ឍន៍ប្រទេស ប៉ុន្តែយ៉ាងណាវាជាវិស័យថ្មីមួយ ដែលទាមទារឲ្យមានការគ្រប់គ្រងប្រកបដោយប្រសិទ្ឋភាព និងតម្លាភាព ដើម្បីជៀសវាងពីបណ្តាសារពីធនធានធម្មជាតិ។

លោកបន្តថា “ទោះជាយ៉ាងណាលោកមើលឃើញថា រដ្ឋាភិបាលបាននិងកំពុងខិតខំប្រឹងប្រែងគ្រប់គ្រង និងប្រើប្រាស់ធនធានធម្មជាតិបានកាន់តែល្អប្រសើរ សម្រាប់អភិវឌ្ឍន៍ប្រទេសជាតិ”៕

តើគួររៀបចំផ្ទះដូចម្តេចដើម្បីទាក់ទាញអតិថិជនអឺរ៉ុប?

March 6, 2018

0

ដោយ ដែន ចែងចាំង

ភ្នំពេញ៖ នៅពេលនិយាយពីទីផ្សារអចលនវត្ថុ យើងហាក់ភ្លេចពីក្រុមអ្នកវិនិយោគអឺរ៉ុប ដោយសារកំនើននៃការវិនិយោគរបស់ចិននៅកម្ពុជា មានលក្ខណៈគំហុកខ្លាំងពេក។

ប៉ុន្តែពេលនេះ Propertyarea.asia សូមទាញលោក អ្នកមកចាប់អារម្មណ៍ពីទីផ្សារអឺរ៉ុបនៅកម្ពុជា ដែលភាគច្រើនជនជាតិអឺរ៉ុបចូលមកកម្ពុជា មិនសូវចូលមកវិនិយោគគំរោងធំៗឡើយ ពួកគេវិនិយោគភាគច្រើនលើគំរោងតូចៗ និងមកធ្វើការនៅកម្ពុជាច្រើនទៅវិញ។

ដូច្នេះតើម្ចាស់លំនៅដ្ឋាននានាគួររៀបចំលំនៅដ្ឋានដូចម្តេច ដើម្បីទាក់ទាញក្រុមភ្ញៀវច្រមុះស្រួចនេះ? លោកវ៉ន ចាន់ថនអគ្គនាយកក្រុមហ៊ុនអចលនទ្រព្យTOWN CITY Real Estateបានថ្លែងឲ្យដឹងថា បើនិយាយពីភាពទាន់សម័យ ប្រទេសរបស់ពួកគេទាន់សម័យដល់កំពូលរួចទៅហើយ ហេតុនេះចំណូលចិត្តរបស់ពួកគេ គឺចូលចិត្តរបស់ចាស់ៗ ជាផ្ទះបែបបុរាណ។

លោកបន្តថា បើម្ចាស់លំនៅដ្ឋានចង់ទាក់ទាញពួកអឺរ៉ុប ត្រូវធ្វើរឿងទាំងនេះ ដូចជា ទី១ រៀបចំលំនៅដ្ឋានបែបបុរាណ ហើយបើបុរាណចំបុរាណ សម័យចំសម័យ ទី២ ពួកគេមានរសនិយម លើលំនៅដ្ឋានបែបសម័យអាណានិគម និងទី៣ ពួកគេចូលចិត្តផ្ទះមានទ្វារ និងបង្អួចធំៗ និងមានរានហាល ព្រោះពួកគេមិនចូលចិត្តផ្ទះដែលចូលទៅដូចចូលក្នុងប្រអប់នោះទេ។

លោកបន្តថា “ជនជាតិអឺរ៉ុបនៅកម្ពុជា ពួកគេភាគច្រើនមកធ្វើការ និងវិនិយោគគំរោងតូចៗ ដូចជា អូតែលខ្នាតតូច ផ្តល់សេវាកម្ម និងក្រុមហ៊ុនប្រឹក្សាយោបល់។លោកបន្តថា “ពួកគេមិនមែនជាអ្នកធ្វើឲ្យអចលនទ្រព្យ រីកចម្រើនខ្លាំងទេ ពួកគេប្រៀបដូចជាត្រីតូច តែច្រើន”៕

តំបន់ស្ថិតនៅតាមបណ្តោយផ្លូវជាតិលេខ១ កាន់តែមានសក្តានុពល

March 6, 2018

0

ដោយគង់ សូរិយា

ភ្នំពេញ៖ បន្ទាប់ពីផ្លូវជាតិលេខ១បានបញ្ចប់ការស្ថាបនា តំបន់នេះបានប្រែក្លាយមុខមាត់អភិវឌ្ឍយ៉ាងលឿន ដោយបច្ចុប្បន្នមានហាងល្បីៗជាច្រើន បានមកបោះទីតាំងនៅតំបន់នេះ។

បច្ចុប្បន្នហាងល្បីៗជាច្រើនបានមកកាន់តំបន់នេះ បន្ទាប់ពីហាងកាហ្វេ Amazon ដ៏ល្បីបានមកកាន់តំបន់នេះមុនគេ ហើយហាងជាបន្តបន្ទាប់ដូចជា ភោជនីយដ្ឋាន Park Cafe, Pizza Company, Bread Talk និងហាងល្បីៗជាច្រើនទៀតបាននិងកំពុងត្រៀមចូលមកកាន់តំបន់នេះ ដូចជា ហាងកាហ្វេ Brown ជាម៉ាកសញ្ញាដ៏ល្បីក្នុងស្រុក ក៏នឹងបើកសាខារបស់ខ្លួននៅតាមបណ្តោយផ្លូវជាតិដ៏វែងនេះផងដែរ។

ជាមួយគំរោងអភិវឌ្ឍន៍ឥតឈប់ឈរ ក្រុមហ៊ុនបុរីប៉េង ហួតគ្រុបក៏គ្រោងបើកសួនកម្សាន្តតម្លៃ៦០លានដុល្លារនៅតំបន់នេះ នៅចុងឆ្នាំនេះ ខណៈផ្សារទំនើបដ៏ធំរបស់ខ្លួនក៏បាននិងកំពុងសាងសង់ផងដែរ។ អ្វីកាន់តែពិសេសផ្សារបែបសហគមន៍ ដែលផ្សារភ្ជាប់ជាមួយធម្មជាតិ នៅច្រកចូលស្ថានីយ៍វិទ្យុ និងទូរទស្សន៍បាយ័ន ក៏គ្រោងនឹងបើកទ្វារនៅចុងឆ្នាំនេះ ឬដើមឆ្នាំ២០១៩ខាងមុខផងដែរ។

លោកស្រី សោម ស្រីណាជ្រាជាជនរស់នៅរាជធានីភ្នំពេញលើកឡើងប្រាប់ថា តាមដងផ្លូវជាតិលេខ១ ពិតជាមានការអភិវឌ្ឍច្រើនជាងកាលពីមុន ដោយលលោកស្រីសង្កេតឃើញថា ការធ្វើចរាចរណ៍ល្អប្រសើរ ហើយមានហាងទំនើប”ជាច្រើនទៀតផង។

ចំណែកលោកសាមឌី និងលោកស្រីណាវី ដែលទើបត្រលប់មកពីប្រទេសកូរ៉េ ក៏បង្ហាញជាការភ្ញាក់ផ្អើល ចំពោះការអភិវឌ្ឍរបស់ប្រទេសកម្ពុជា និងតាមដងផ្លូវជាតិលេខ១ផងដែរ ដោយពួកគាត់ទាំងពីរបញ្ជាក់ថា ការអភិវឌ្ឍនៅកម្ពុជានាពេលនេះ មិនចាញ់ការអភិវឌ្ឍនៅប្រទេសកូរ៉េនោះទេ។

ស្ថាបនិកនិងជាអគ្គនាយកគេហទំព័រ Propertyarea.asia លោកលាងគង់ យិនដែលមានការិយាល័យនៅតំបន់នេះបានថ្លែងថា ផ្លួវជាតិលេខ១កាន់តែមានសក្តានុពល បន្ទាប់ពីផ្លូវជាតិនេះបានស្ថាបនារួច ហើយតំបន់នេះដែលពីមុនគេមិនសូវនឹកនាដល់ ពេលនេះបាននិងកំពុងក្លាយជាទីតាំងមួយ ដែលក្រុមអ្នកមានប្រាក់ចាប់អារម្មណ៍ច្រើន ដោយសារបុរីប៉េង ហួតបានវិនិយោគនៅទីនេះ ដែលបានទាក់ទាញក្រុមអភិជនមករស់នៅតំបន់នេះច្រើន ដែលបានធ្វើឲ្យម្ចាស់អាជីវកម្មនានា បានចាប់អារម្មណ៍មកកាន់តំបន់នេះ ដើម្បីពង្រីកមូលដ្ឋានជំនួញរបស់ខ្លួន។

លោកបន្តថា “ខ្ញុំគិតថារយៈពេលពី៣ទៅ៥ឆ្នាំខាងមុខ តំបន់នេះនឹងកាន់តែមានភាពរសរវើក ដោយសារកំនើនប្រជាសាស្ត្រ និងសកម្មភាពពាណិជ្ជកម្មជាច្រើនទៀតនឹងបង្កើតឡើង ពិសេសផ្សារទំនើបនិងសួនកម្សាន្តស្តង់ដាអន្តរជាតិរបស់បុរីប៉េង ហួតបើកដំណើរការ។លោកបន្តថា “តំបន់នេះក្រៅពីមានសក្តានុពលផ្នែកលំនៅដ្ឋាន ក៏ជាតំបន់ឧស្សាហកម្ម ដែលយ៉ាងយូររយៈពេល១០ឆ្នាំទៀត ការអភិវឌ្ឍន៍ឧស្សាហកម្មនិងលំនៅដ្ឋាន នឹងរីកទៅតំបន់ស្ពានអ្នកលឿងក្នុងខេត្តព្រៃវែង។

ផ្លូវជាតិលេខ១ ជាផ្លូវយុទ្ឋសាស្ត្រមួយ សម្រាប់ការអភិវឌ្ឍន៍នៅច្រករបៀងភាគខាងត្បូងនៃមហាអនុតំបន់ទន្លេមេគង្គ និងអាស៊ាន ដែលភ្ជាប់រវាងប្រទេសថៃ កម្ពុជា និងវៀតណាម៕

ក្រុមហ៊ុនអចលនទ្រព្យយក្សអាមេរិកស្វែងរកដៃគូសហការនៅខេត្តចំនួន17

March 5, 2018

0

ដោយ ៖ គង់ សូរិយា

ភ្នំពេញ ៖ ក្រុមហ៊ុនអចលនទ្រព្យលំដាប់ពិភពលោក Century21 Cambodia កំពុងស្វែងរកដៃគូសហការ ដើម្បីផ្តល់សេវាកម្មទិញលក់ ជួលអចលនទ្រព្យនៅខេត្តចំនួន១៧ ក្នុងចំណោមរាជធានី ខេត្តចំនួន 25 ។

អ្នកនាង Grace Rachny Fong នាយិកាក្រុមហ៊ុន Century21 Cambodia បានថ្លែងឲ្យដឹងតាមទូរស័ព្ទនាថ្ងៃទី5 មីនានេះថា ក្នុងចំណោមរាជធានី ខេត្តចំនួន25 ក្រុមហ៊ុនរកបានដៃគូសហការនៅរាជធានី ខេត្តចំនួន 8 រួចហើយ នៅសល់តែខេត្តចំនួន17 ដែលយើងត្រូវការស្វែងរកដៃគូសហការ ដើម្បីផ្តល់សេវាកម្មទិញលក់ ជួល វាយតម្លៃអចលនវត្ថុកម្ពុជា។ អ្នកនាងបន្តថា អ្នកមានបំណងជាដៃគូសហការជាមួយក្រុមហ៊ុន Century21 Cambodia នឹងទទួលបានការបណ្តុះបណ្តាល និងការៀរបចំការិយាល័យជូនដោយឥតគិតថ្លៃ នៅតាមបណ្តាខេត្តដែលពួកគេរស់នៅ។

អ្នកនាងបន្តថា “អ្វីសំខាន់យើងស្វែងរកអ្នក ដែលមានចំណូលចិត្តធ្វើការងារផ្នែកនេះ ជាមនុស្សមានភាពអត់ធ្មត់ និងជាមនុស្សដែលមានភាពស្មោះត្រង់ ដើម្បីធ្វើការងារក្នុងវិស័យនេះឲ្យបានជោគជ័យ”។ អ្នកនាងបន្តថា “បណ្តាខេត្តទាំងនោះសុទ្ឋតែមានសក្តានុពល លើវិស័យអចលនវត្ថុ ប៉ុន្តែដោយសារខេត្តមិនទាន់មានអ្នកជំនាញផ្នែកនេះ ដែលមានការបណ្តុះបណ្តាលត្រឹមត្រូវ និងប្រកបដោយវិជ្ជាជីវៈ ទើបការទាញយកសក្តានុពលរបស់ខេត្តនៅមានកម្រិត”។

អ្នកនាង Grace Rachny Fong បានបន្តថា បណ្តាខេត្តដែលមិនទាន់មានភ្នាក់ងារអចលនវត្ថុ ដែលសហការជាមួយក្រុមហ៊ុន Century21 Cambodia មានដូចជា ខេត្តរតនគិរី មណ្ឌលគិរី ក្រចេះ ស្ទឹងត្រែង កំពង់ឆ្នាំង ពោធិសាត់ បន្ទាយមានជ័យ កំពង់ស្ពឺ ព្រៃវែង ស្វាយរៀង ត្បូងឃ្មុំ ឧត្តរមានជ័យ សៀមរាប ព្រះវិហារ ប៉ៃលិន កែប កោះកុង ។

អ្នកនាងបន្តថា សម្រាប់អ្នកមានបំណងចង់ក្លាយជាភ្នាក់ងារ អចលនទ្រព្យ និងធ្វើការងារដៃគូជាមួយក្រុមហ៊ុន អាចទំនាក់ទំនងជាមួយក្រុមហ៊ុនបានតាមរយៈលេខទូរស័ព្ទ ០៩៥ ៦៦៦ ២៩៨ ៕

រយៈពេល 2ខែ ដើមឆ្នាំ2018 កម្ពុជាសម្រេចការនាំចេញអង្ករបានជាង11ម៉ឺនតោន

March 5, 2018

0

ដោយ ៖ រ៉ាវី

ភ្នំពេញ ៖ នៅត្រឹមរយៈពេល2ខែដើមឆ្នាំ2018 ពោលគឺខែមករា និងខែកុម្ភៈ កន្លងទៅនេះ កម្ពុជាបានសម្រេចធ្វើការនាំអង្ករចេញទៅទីផ្សារក្រៅប្រទេសបាន ជាង11ម៉ឺនតោន ដែលចំនួនទាំងនេះបានកើនឡើងប្រមាណជាង 0.8 % បើប្រៀបធៀបទៅនឹងរយៈពេលដូចគ្នាកាលពីឆ្នាំ2017 ។ នេះបើយោងតាមរបាយការណ៍របស់លេខាធិការដ្ឋានច្រកចេញចូលតែមួយកាលពីពេលកន្លងទៅនេះ ។

ជាមួយនឹងការបង្ហាញពីចំនួនទិន្នន័យនៃការនាំចេញអង្ករកម្ពុជាទៅកាន់ទីផ្សារអន្តរជាតិខាងលើនេះ ត្រូវបានអ្នកជំនួញខាងការនាំចេញអង្ករបញ្ជាក់ប្រាប់ថា វាជាសញ្ញាបង្ហាញពីចំណុចវិជ្ជមានសម្រាប់ឆ្នាំ2018 ។ ដោយឡែកសម្រាប់គោលដៅទីផ្សារធំៗនៃការនាំចេញអង្ករកម្ពុជាក្នុងរយៈរយៈ2ខែកន្លងទៅនេះ រួមមាន ដូចជា ៖ 1. ប្រទេសចិន ចំនួន 29501 តោន, ប្រទេសបារាំង ចំនួន 14743 តោន, ប្រទេសម៉ាឡេស៊ី ចំនួន 9279 តោន, ប្រទេសហ្គាប៊ុន ចំនួន 7267 តោន, ប្រទេសហូឡង់ ចំនួន 5419 តោន , ប្រទេសប៉ូឡូញ ចំនួន 4934 តោន , ប្រទេសឆេក ចំនួន 3868 តោន, ប្រទេសប៊ែលហ្សិក ចំនួន 3495 តោន, ប្រទេសហុងកុង ចំនួន 3399 តោន , និងចក្រភពអង់គ្លេស ចំនួន 3381 តោន ជាដើម ហើយក្រៅពីនោះនៅមានបណ្តាប្រទេសជិតខាង ដែលស្ថិតនៅក្នុងតំបន់អាស៊ី និងនៅក្នុតំបន់អឺរ៉ុបមួយចំនួនទៀត ។

គួរកត់សម្គាល់ផងដែរថា ចំពោះការនាំចេញអង្ករសរុបក្នុងរយៈពេល 7ឆ្នាំ កន្លងទៅនោះ ដោយចាប់គិតពីឆ្នាំ 2011 រហូតដល់ឆ្នាំ 2017 កម្ពុជាសម្រេចបានត្រឹម 2,88 លានតោន។ ការនាំចេញនៅក្នុងឆ្នាំ2011 មានប្រមាណ 201.899 តោន, នៅឆ្នាំ2012 មានប្រមាណ 205.717 តោន, នៅឆ្នាំ2013 មានប្រមាណ 378.856 តោន, នៅឆ្នាំ2014 មានប្រមាណ 387.061 តោន, នៅឆ្នាំ2015 មានប្រមាណ 538.396 តោន, នៅឆ្នាំ2016 មានប្រមាណ 542.144 តោន និងនៅឆ្នាំ2017 មានប្រមាណ 635.679តោន ។ របាយការណ៍បានបង្ហាញទៀតថា ទិសដៅធំៗទាំង 5 នៃការនាំចេញអង្ករកម្ពុជា ពីឆ្នាំ 2011 ដល់ឆ្នាំ2017 ប្រទេសចិន បានឈរនៅលំដាប់កំពូលតារាង បន្ទាប់មកលេខរៀងទី2 គឺប្រទេសបារាំង , លេខរៀងទី3 ប្រទេសប៉ូឡូញ និងប្រទេសម៉ាឡេស៊ី ស្ថិតនៅ លេខរៀងទី 4 ខណៈដែលប្រទេស ហូឡង់ ឈរនៅលំដាប់លេខរៀងទី 5 ៕

ហាងកាហ្វេល្បីមួយទៀតឈានជើងចូលទីផ្សារកម្ពុជា

March 5, 2018

0

ដោយ ដែន ចែងចាំង

ភ្នំពេញ៖ Plantoza Café & Bistro ហាងកាហ្វេលំដាប់ពិភពលោកមួយទៀត បានឈានជើងចូលទីផ្សារកម្ពុជា ស្របពេលទីផ្សារហាងកាហ្វេនៅកម្ពុជា កាន់តែមានប្រជាប្រិយភាព និងកំពុងជោគជ័យក្នុងអាជីវកម្មរបស់ពួកគេ។

អគ្គនាយកក្រុមហ៊ុនអេសធីអាយ អ៊ិនវេសមេនគ្រុប លោកយឹម សារ៉ាត់ បានថ្លែងក្នុងវេទិកាយល់ដឹងពីការប្រកបអាជីវកម្មដោយអាជ្ញាប័ណ្ណ និងលក្ខណៈកម្មសិទ្ធបញ្ញាកាលពីចុងសប្តាហ៍មុននេះថា Plantoza Café & Bistro ដែលមានFranchiseជាលក្ខណៈអន្តរជាតិ និងល្បីល្បាញនៅលើពិភពលោកបានឈានជើងមកដល់ទីផ្សារកម្ពុជាហើយ។ លោកបន្តថា Plantoza Café & Bistro នឹងផ្តល់ជូនអ្នកចាប់អារម្មណ៍មានសិទ្ធលក់បន្ត នឹងផ្តល់ឱកាសឱ្យពលរដ្ឋខ្មែរ ដែលចង់បើកហាងកាហ្វេអាចទិញសិទ្ឋអាជីវកម្មបាន ដោយគ្រាន់តែចំណាយហ្វ្រេនឆាយដំបូងត្រឹមតែ១ម៉ឺនដុល្លារ និងមានអ្នកជំនាញទៅរៀបចំជូន តាំងពីដំបូងរហូតដល់ថ្ងៃសម្ពោធហាង។

លោកបន្តថា “ការធ្វើពាណិជ្ជកម្មមានកម្មសិទ្ធបញ្ញា គឺផ្តល់ការជឿជាក់ដល់អតិថិជនកាន់តែខ្លាំង ពិសេសទៅលើគុណភាព អនាម័យ និងតម្លៃសមរម្យ។ លោកបន្តថា “ការមានស្តង់ដា មានរចនាបថ មានគំរូរ និងងាយស្រួលក្នុងការពង្រីកវិសាលភាព ដែលមិនសូវមានហានិភ័យ ដូចការធ្វើពាណិជ្ជកម្មដែលគ្មាន Franchise នោះទេ។

លោកយឹម សារ៉ាន់បានបន្តថា អ្នកដែលចង់ទិញសិទ្ធលក់បន្តនូវហាងកាហ្វេនេះ ត្រូវមានដើមទុនចន្លោះពី៤ទៅ១០ម៉ឺនដុល្លារ ហើយត្រូវមានទំនុកចិត្តទៅលើអ្នកបំរើការឱ្យខ្លួន ព្រោះថាយីហោមួយនេះមានភាពលេចធ្លោខ្លាំង ពិបាកនឹងរកដៃគូប្រកួតប្រជែងនៅកម្ពុជា និងនៅអាស៊ី៕