ដោយ ដែន ចែងចាំង

ភ្នំពេញ៖ ធនាគារពាណិជ្ជ​ភ្នំពេញ PPC Bank បាន​ចុះ​ហត្ថ លេខា​ជាមួយ​ក្រុម ហ៊ុន​Banhji (បញ្ជី) ដែលជា​ដៃគូ​សហការ​លើ​ធុរកិច្ច​សហគ្រាស ធុន​តូច​និង​មធ្យម (SME) និង​គោលដៅ​យុទ្ធសាស្ត្រ បើកទូលាយ​ដល់​អតិថិជន ជាពិសេស​មិន​ទាមទារ​ទ្រព្យ​បញ្ចាំ​ពី​សហគ្រាស​ធុន​តូច​និង​មធ្យម (SME)។

លោក ស៊ឹម ចាន់គិរី​រត្ន នាយក​ប្រតិបត្តិ​ក្រុមហ៊ុន​បញ្ជី បានបញ្ជាក់​ក្នុង​ពិធី​ចុះហត្ថលេខា​ភាពជា​ដៃគូ​ជាមួយ​ធនាគារ PPC Bankកាលពី​ថ្ងៃទី៧ មិនា​កន្លងមក​ថា ក្រុមហ៊ុន​លោក​មាន​ផ្តល់​សូ​ហ្វ​វ៊ែ​រ (software) ដោយ​មិន​គិតថ្លៃ​ទៅដល់​សហគ្រាស​ធន​តូច​និង​មធ្យម  ដោយ​ខាង​ក្រុមហ៊ុន​មាន​ពត៌មាន​ច្រើន ដែល​អាចធ្វើ​ឲ្យ​ខាង​សហគ្រាស​ធុន​តូច និង​មធ្យម​ទទួលបាន​កម្ចី​កាន់តែច្រើន​ពី​ធនាគារ។ លោក​បន្តថា ជាទូទៅ​ប្រសិន​ខ្ចីលុយ​ពី​ធនាគា គឺ​ត្រូវការ​ទ្រព្យ​បញ្ចាំ ប៉ុន្តែ​ជាមួយ​ប្រព័ន្ធ​ប្រតិបត្តិការ​របស់​ក្រុមហ៊ុន​បញ្ជី គឺ​យើង​ពិនិត្យមើល​លើ​ទិន្នន័យ​លំហូរ​សាច់ប្រាក់ និង​ប្រតិបត្តិការ​គណនេយ្យ​រប​ស់​ក្រុមហ៊ុន ដែល​ត្រូវការ​ប្រាក់កម្ចី​ថា តើ​ធនាគារ​អាច​ផ្តល់​កម្ចី​អោយ​គាត់​បាន​ឬ​អត់។

លោក​បន្តថា “ការចុះកិច្ចសន្យា​សហការ​ជាមួយ​ធនាគារ ភីភី​ស៊ី ប៊ែ​ង​នា​ពេល​នេះ គឺ​ការផ្តល់​សេវាកម្ម​ទៅ​ឲ្យ​សហគ្រាស​ធុន​តូច និង​មធ្យម​ខ្លាំងជាងគេ ដោយ​ផ្អែកលើ​សកម្មភាព​ហិរញ្ញវត្ថុ​របស់​ក្រុមហ៊ុន និង​ប្រតិបត្តិការ​របស់​ក្រុមហ៊ុន ហើយ​ផ្តល់​ត្រឡប់​ទៅវិញ ទៅមក​នូវ​ព័ត៌មាន​ដែល​លឿន​ហើយ​ត្រឹមត្រូវ។

នាយក​ប្រតិបត្តិ​ធនាគារ​ភ្នំពេញ​ពាណិជ្ជ លោក Shin Chang Moo បាន​ថ្លែង ថា មុននឹង​ជ្រើស​រើសយក​ក្រុមហ៊ុន​បញ្ជី​ជា​ដៃគូ លោក​បាន​ជួប​ជាមួយ​ក្រុមហ៊ុន​ជាច្រើន​រួចហើយ ដោយ​សង្កេតឃើញថា ក្រុមហ៊ុន​បញ្ជី​មាន​យុទ្ធសាស្ត្រ​ធ្វើការ​ច្បាស់លាស់  ហើយ​ការងារ​មួយ​នេះ ក៏​ស្របទៅនឹង​អ្វីដែល​ធនាគារ​ចង់​ធ្វើ ទន្ទឹមនឹងនេះ​ក្រុមហ៊ុន​បញ្ជី ក៏បានផ្តល់​ទំនុកចិត្ត​បន្ថែមទៀត​មក​ធនាគារ​ផងដែរ។

ធនាគារពាណិជ្ជ​ភ្នំពេញ​ពាណិជ្ជ ភីភី​ស៊ី ប៊ែ​ង បាន​បង្កើត​គ្រឹះ​របស់ខ្លួន​នៅ​ប្រទេស​កម្ពុជា​ក្នុង​ឆ្នាំ២០០។ ក្នុង​ប្រតិបត្តិការ​រយៈពេល៩ឆ្នាំ មកដល់​បច្ចុប្បន្ន នេះ ធនាគា​បាន​ពង្រីក​សាខា​ដល់​បណ្តា​រាជធានី ខេត្ត សំខាន់ៗចំនួន១៨កន្លែង​ហើយ។ទស្សនៈវិស័យ:របស់​ធនាគារ ការបង្កើត​ភាពជោគជ័យ​ផ្អែកលើ​មូលដ្ឋាន នីយកម្ម និង​គំរូ​កម្រិត​ខ្ពស់​នៅ​អាស៊ីអាគ្នេយ៍ គោលដៅ​យុទ្ធសាស្ត្រ​អាស៊ី៕

ដោយ គង់ សូរិយា

ភ្នំពេញ៖ រាជរដ្ឋាភិបាលកម្ពុជាបានអនុញ្ញាត្តឲ្យក្រសួងរ៉ែ និងថាមពលធ្វើការជាមួយក្រុមហ៊ុនមួយ ដើម្បីអភិវឌ្ឍន៍អណ្តូងប្រេងកាតប្លុកតាឌី ដែលជាគំរោងថ្មី មួយ ដើម្បីទាញយកមកប្រើប្រាស់ធនធានរ៉ែ យកមកប្រើប្រាស់សម្រាប់អភិវឌ្ឍន៍​ប្រទេសជាតិ។

រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានថ្លែងឲ្យដឹងក្នុងពិធីបិទ​សន្និបាយបូកសរុបការងារឆ្នាំ២០១៧ និងលើកទិសដៅ ឆ្នាំ២០១៨ កាលពីថ្ងៃម្សិលម៉ិញនេះថា សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានសម្រេចដ៏ខ្ពងខ្ពស់ ក្នុងការអភិវឌ្ឍន៍គម្រោងធំៗចំនួន២ទៀត គឺការឈានទៅចុះកិច្ចព្រមព្រៀងជាមួយដៃគូរអភិវឌ្ឍន៍ អណ្តូងប្រេងកាតប្លុកឌី ។

ទោះជាយ៉ាងណាលោកមិនបញ្ជាក់ឲ្យដឹង ពីការទាញយកប្រេងកាតពីប្លុកតាឌី ជាមួយក្រុមហ៊ុនណានៅឡើយទេ។

លោកស៊ុយ សែមបានបន្តថា ចំពោះវិស័យរ៉ែ និងប្រេងកាតវិញ គឺវិស័យរ៉ែបានដំណើ​រការយ៉ាងជោគជ័យ ក្នុងទ្រង់ទ្រាយដល់វិស័យសំណង់ក្នុងស្រុក ជាពិ​សេសវិស័យឧស្សាហកម្មស៊ីម៉ង់ មានរោងចក្រចំនួន៤កំពុងដំណើរការ ដោយអាចផលិតបានស៊ីម៉ង់ត៍ បានចំនួន៧លានតោនក្នុងមួយឆ្នាំ។ចំណែកវិស័យប្រេងកាត យើងនិងបានត្រៀមលក្ខណៈសម្បត្តិ  ដើម្បីផលិតប្រេងឆៅនៅឆ្នាំ២០១៩ និងការឆ្ពោះទៅបង្កើត នូវខឿនឧស្សាហកម្មគីមីប្រេងកាត និងប្រភពថ្មីនៃថាម​ពល គឺរោងចក្រ​ចម្រាញ់ប្រេងកាត និងគម្រោងបំពង់វិនិយោគបំពង់បង្ហូប្រេង។

កាលពីដើមឆ្នាំនេះ រាជរដ្ឋាភិបាលបានចុះហត្ថលេខា ជាផ្លូវការជាមួយក្រុមហ៊ុន KRISENERGY ដើម្បីចាប់ផ្តើមទាញយកប្រេងពីប្លុកAរបស់កម្ពុជា ដែលរំពឹងថា កម្ពុជានឹងទទួលបានចំណូលពីធនធានប្រេងកាត ប្រមាណ៥០០លានដុល្លារ​ក្នុងមួយឆ្នាំ ហើយតំណក់ប្រេងកម្ពុជាតំបូង នឹងទទួលបាននៅចុងឆ្នាំ២០១៩ខាងមុខនេះ។

លោកស៊ុយ សែមបានបន្តថា រហូតមកទល់ពេលនេះ កម្ពុជាជិតឈានដល់ដំណាក់កាលប្រមូលផល ពីធនធានរ៉ែរបស់កម្ពុជាដ៏សម្បូរបែបហើយ ខណៈទុន​វិនិយោគក្នុងវិស័យនេះ ដែលបានវិនិយោគពីអ្នកវិនិយោគក្នុងស្រុក និងអន្តរជាតិកើនឡើងដល់ជាង១៣០០លានដុល្លារ ហើយរាជរដ្ឋាភិបាលកាលពីឆ្នាំមុនបានទទួលចំណូលពីធនធានរ៉ែប្រមាណ១៨លានដុល្លារអាមេរិក។

លោកង៉ែត ជូទីប្រឹក្សាជាន់ខ្ព់ស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា ធនធានរ៉ែរបស់កម្ពុជាមានភាពសម្បូរ​បែប និងអាចទាញយកមកប្រើប្រាស់ ដើម្បីយកមកអភិវឌ្ឍន៍ប្រទេសជាតិបាន ហើយរាជរដ្ឋាភិបាលបាននិងកំពុងធ្វើការងារយ៉ាងសកម្ម ដើម្បីទាញយកមកប្រើ​ប្រាស់ធនធានទាំងនោះឲ្យមានប្រសិទ្ឋិភាព និងចំគោលដៅ៕

ដោយ គង់ សូរិយា

ភ្នំពេញ៖ រដ្ឋាភិបាលកម្ពុជា កំពុងមានមហិច្ឆតាប្រែក្លាយប្រទេសនេះ ជាមហាអំណាចខ្សែសង្វាក់ផលិតកម្ម ដើម្បីធ្វើពិពិធកម្មសេដ្ឋកិច្ច និងជំរុញកំនើន​សេដ្ឋ​កិច្ចរបស់ខ្លួនបន្ថែមទៀត។

លោកជំទាវម៉ែន សំអន ឧបនាយករដ្ឋមន្រី្ត រដ្ឋមន្រ្តីក្រសួងទំនាក់ទំនងរដ្ឋសភា និងព្រឹទ្ឋសភាបានថ្លែងក្នុងពិធីប្រកាសបើកវេទិកាបណ្តុំ នៃខ្សែសង្វាក់អាស៊ាន ឆ្នាំ២០១៨ ប្រារព្ធនៅរាជធានីភ្នំពេញរសៀលថ្ងៃទី៧ មីនា ២០១៨ កន្លងមក ថា ព្រឹត្តិការណ៍នេះនឹងធ្វើឱ្យគម្រោង Entapay ក្លាយជាគម្រោងខ្សែសង្វាក់ដំបូង ដែលទទួលបានការអនុញ្ញាត ឲ្យផ្សព្វផ្សាយផ្លូវការដោយរដ្ឋាភិបាលកម្ពុជា។លោ​កជំទាវបន្តថា បច្ចេកវិទ្យា​ហិរញ្ញវត្ថុកម្រិតខ្ពស់បំផុ​តក្នុងពិភពលោក រួមជាមួ​យនឹងស្ថានភាពពិតប្រាកដនៃប្រទេសកម្ពុជា​ នឹងអាចជម្រុញដោយប្រសិទ្ធិ​ភាព ដើម្បីជំរុញឧស្សាហកម្មខ្សែសង្វាក់ នៃប្រទេសកម្ពុជាមានការអភិវឌ្ឍឆ្ពោះទៅមុខ និងធ្វើឱ្យសេដ្ឋកិច្ចប្រទេសកម្ពុជាកើន​ឡើង ហើយចំពោះ”ផ្លូវអភិវឌ្ឍន៍”ដ៏ល្អរវាងប្រ​ទេ​សចិន និងកម្ពុជារដ្ឋាភិបាលកម្ពុជា នឹងទទួលស្គាល់ពេញលេញនិងគាំទ្រជានិច្ច។

ការប្រារពវេទិកានេះ ដើម្បីជំរុញឲ្យអ្នកវិនិយោគកម្ពុជា ចិនអាចធ្វើការរូមគ្នា ដើម្បីបង្កើនខ្សែសង្វាក់ផលិតកម្មផលិតនៅកម្ពុជា ដើម្បីប្រែក្លាយកម្ពុជាជាមហាអំអាចខ្សែសង្វាក់ថ្មីមួយនៅក្នុងតំបន់នាពេលអនាគត។

លោក Deng Weibin ប្រធានសមាគមអភិវឌ្ឍន៍ខ្សែសង្វាក់​ឧស្សាហកម្មកម្ពុជា​បានលើកឡើងថា ទស្សនៈវិស័យ នៃការអនុវត្តខ្សែសង្វាក់ជាសក្តានុពល ដ៏ធំទូលាយនេះ មានអ្វីលើសពីការស្រមើលស្រមៃ​ហើយនិន្នាការ​នេះកំពុងកើតឡើង​ពិតជាប្រាកដមែន។ សមាគមអភិវឌ្ឍន៍ ខ្សែសង្វាក់ឧស្សាហកម្មកម្ពុជា ត្រូវបានបង្កើតយ៉ាងឆាប់រហ័សនេះ និងបានបង្ហាញពី​ជំហរ​វិជ្ជមានរបស់រដ្ឋាភិបាលកម្ពុជា ឆ្ពោះទៅរកការអភិវឌ្ឍឧស្សាហកម្មខ្សែសង្វាក់។ លោកបន្តថា សមាគមមាន​គោលបំណង ដើម្បី​ជំរុញ​ការកសាង និងអភិវឌ្ឍនូវបរិស្ថានថ្មី នៅក្នុងខ្សែសង្វាក់កម្ពុជា និងជួយឱ្យសហគ្រាសខ្សែសង្វាក់ផលិតកម្ម ឲ្យមានភាព​រីកចម្រើន​កាន់តែប្រសើរ​និងឆាប់រហ័ស។

លោកបន្តថា សមាគមនឹងស្វែងយល់យ៉ាងសកម្ម ជាមួយរដ្ឋាភិបាលកម្ពុជា​នូវទិសដៅនៃការ​អភិវឌ្ឍ​ធនាគារឌីជីថលហិរញ្ញវត្ថុ និងផ្តល់នូវសេវាហិរញ្ញវត្ថុល្អប្រសើរដល់អ្នកប្រើប្រាស់ជាតិ​ និងអន្តរជាតិនៅកម្ពុជា។​ លើសពីនេះទៅទៀត Entapay គម្រោងទូទាត់រូបិយប័ណ្ណឌីជីថល បានទទួលការចាប់អារម្មណ៍យ៉ាងច្រើននិងចាប់ផ្តើមយ៉ាង​ឱឡារិកនៅឯវេទិកានេះ៕

ដោយ វុត្ថា
ភ្នំពេញ៖ វិស័យឯកជនចាប់ផ្តើមបញ្ចេញសម្លេង តាមរយៈការជំរុញឲ្យរដ្ឋាភិបាលនឹងជួយរៀបចំ និងដាក់ចេញនូវប្លង់មេ ឬហៅថា ប្លង់គោលនៃការអភិវឌ្ឍទីក្រុង ពិសេសប្រព័ន្ធហេដ្ឋារចនាសម្ព័ន្ធឲ្យបានឆាប់ ដើម្បីអាចដើរទាន់នៃកំណើនយ៉ាងឆាប់រហ័សនៃវិស័យសំណង់ និងអចលនទ្រព្យកម្ពុជា។

កង្វះប្លង់មេនៃប្រព័ន្ធហេដ្ឋារចនាសម្ព័ន្ធ ពីសំណាក់រាជរដ្ឋាភិបាលកម្ពុជា ជាកត្តាប្រឈមមួយ ក្នុងការអភិវឌ្ឍលំនៅឋាន ឲ្យស្របទៅតាមស្ដង់ដារខ្ពស់ និងប្រកបដោយចីរភាព។

ប្រធានក្រុមប្រឹក្សាភិបាលក្រុមហ៊ុន World Bridge Group លោកឧកញ៉ា សៀ រិទ្ឋី បានថ្លែងឲ្យដឹងនាព្រឹកថ្ងៃទី៧ មិនានេះថា អ្នកសាងសង់បុរីលំនៅដ្ឋានមួយចំនួនតែងតែប្រឈមនឹងបញ្ហា ក្នុងការដោះស្រាយប្រព័ន្ធលូបង្ហូរទឹក និងភ្លើង ដោយខ្លួនឯង ខណៈដែលការអភិវឌ្ឍ ហាក់មិនទាន់មានបទដ្ឋានច្បាស់លាស់ ដែលធានាបាននូវចីរភាពនៅឡើយ។ឮ

លោកបន្តថា​ “ការអភិវឌ្ឍនៅក្នុងទីក្រុង ពិសេសនៅតាមតំបន់ជាយៗរាជធានីភ្នំពេញ នៅមិនទាន់មានច្បាស់លាស់នៅឡើយទេ ដោយសារកង្វះប្លង់គោ​លអភិវឌ្ឍន៍ក្រុង”។ លោកឧកញ៉ាបន្តថា “សមាគមអ្នកអភិវឌ្ឍន៍លំនៅឋានកម្ពុជា នឹងរៀបចំវេទិកាពិភាក្សាជាមួយ នឹងអាជ្ញាធរពាក់ព័ន្ធបន្ថែមទៀតលើបញ្ហានេះ ខណៈដែលកន្លងមក សមាគម និងរាជរដ្ឋាភិបាលក៏ធ្លាប់បានពិភាក្សា និងដោះស្រា​យបានបញ្ហាខ្លះៗជាបណ្ដើរៗផងដែរ”។

លោកឧកញ៉ា ចេង ខេងប្រធានក្រុមប្រឹក្សាភិបាលនៃក្រុមហ៊ុន Hutton CPL បានថ្លែងថា ការរៀបចំប្លង់មេ ពិតជាមានសារសំខាន់ណាស់ សម្រាប់អ្នកអភិវឌ្ឍន៍ យកជាគំរូឬក្បួនខ្នាតត្រឹមត្រូវមួយក្នុងការអភិវឌ្ឍ ដើម្បីបញ្ជៀសនូវផលប៉ះពាល់អវិជ្ជមាននាពេលអនាគត”។លោកបន្តថា ការមានប្លង់គោល វាមិនត្រឹមតែធ្វើឲ្យការអភិវឌ្ឍកាន់តែមានចីរភាពប៉ុណ្ណោះទេ ប៉ុន្ដែវាក៏ជាផ្នែកមួយលើកកម្ពស់សេចក្ដីថ្លៃថ្នូរនៃការរស់នៅរបស់ប្រជាពលរដ្ឋផងដែរ”។

ឧស្សាហកម្មសំណង់ និងអចលនទ្រព្យ បានចូលរួមចំណែកជាង២០ភាគរយ នៃផលទុនជាតិសរុបក្នុងស្រុក និងបង្កើតការងារដោយផ្ទាល់ និងប្រយោលជាច្រើនដល់ប្រជាពលរដ្ឋ។

លោកជា សុផារ៉ាទេសរដ្ឋមន្រ្តី រដ្ឋមន្រ្តីក្រសូងរៀបចំដែនដី នគរូបនីយកម្ម និងសំណង់ បានថ្លែងឲ្យដឹងកាលពីសប្តាហ៍មុនថា តម្រូវការលំនៅដ្ឋានសម្រាប់អ្នកនៅរស់នៅទីក្រុង និងទីប្រជុំជនមានជាងប្រមាណ១ម៉ឺនខ្នងក្នុងមួយឆ្នាំៗ ខណៈរដ្ឋាភិបាល នឹងមានការរៀបចំទីក្រុងនៅតាមបណ្តាស្រុកនានា ដើម្បីជំរុញការអភិវឌ្ឈនិងលើកកំពស់ជីវភាពប្រជាពលរដ្ឋ ពិសេសធ្វើឲ្យមូលដ្ឋាននោះមាន​ការអភិវឌ្ឍកាន់តែលឿន និងស្របតាមការរីកចម្រើននៃសេដ្ឋកិច្ចសង្គម៕

ដោយ វុត្ថា

ភ្នំពេញ៖ រដ្ឋាភិបាលបានវេទិកាធុរកិច្ច និងវិនិយោគកម្ពុជា-ចិនឆ្នាំ២០១៨ដើម្បីបង្ហាញពីសក្តានុពល និងបង្កើតឱកាសនៃការវិនិយោគ កាន់តែច្រើននៅកម្ពុជា ជាពិសេសទាក់ទាញអ្នកវិនិយោគចិន មកវិនិយោគនៅកម្ពុជាឲ្យកាន់តែច្រើនថែមទៀត។

វេទិកានេះនឹងរៀបចំនៅថ្ងៃទី៧ មិនានេះ ដោយមានការអញ្ជើញចូលរួមពីមន្ត្រីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា ថ្នាក់ដឹកនាំ និងតំណាងក្រសួង ស្ថាប័នកម្ពុជាពាក់ព័ន្ធ តំណាងសមាគមរោងចក្រកាត់ដេរនៅកម្ពុជា ព្រមទាំងថ្នាក់ដឹកនាំ និងមន្ត្រីនៃសភាពាណិជ្ជកម្មអន្តរជាតិចិន ក្រុមប្រឹក្សាជំរុញពាណិជ្ជកម្មអន្តរជាតិចិន តំណាងប្រចាំកម្ពុជានៃអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម (UNIDO) និងតំណាងក្រុមហ៊ុនចិនប្រមាណ៤០ក្រុមហ៊ុន។

លោកនុត អ៊ុនវ័ណរ៉ា អគ្គលេខាធិការរង គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា ភាគីចិនតែងតែផ្តល់ការគាំទ្រដល់ការអភិវឌ្ឍរបស់កម្ពុជាលើគ្រប់វិស័យ តាមរយៈការផ្តល់ហិរញ្ញប្បទានអភិវឌ្ឍន៍ផ្លូវការយ៉ាងច្រើន ក្នុងការកសាង និងពង្រឹងហេដ្ឋារចនាសម្ព័ន្ធសេដ្ឋកិច្ច ជាពិសេស អ្នកវិនិយោគចិន ដែលតែងតែផ្តល់ទំនុកចិត្ត ដល់រាជរដ្ឋាភិបាលកម្ពុជា។ លោកបានថ្លែងអំណរគុណ ចំពោះរាល់ការសម្រេចចិត្តដ៏ឈ្លាសវៃរបស់អ្នកវិនិយោគបរទេសទាំងអស់ ជាពិសេស អ្នកវិនិយោគចិន ដែលបានជ្រើសរើស និងមានបំណងជ្រើសរើសកម្ពុជា ជាគោលដៅវិនិយោគដ៏មានសក្តានុពលខ្ពស់ ក្នុងការចាប់ផ្តើម ឬពង្រីកអាជីវកម្មរបស់ខ្លួននៅកម្ពុជា។

ឯកឧត្តមបន្តថា “វេទិកាធុរកិច្ចនិងវិនិយោគកម្ពុជា-ចិន ឆ្នាំ២០១៨នេះ ពិតជាមានសារៈសំខាន់ ព្រោះបានជំរុញធុរជនចិនមកសិក្សាស្វែងយល់ ដោយផ្ទាល់ពីកាលានុវត្តភាពនិងសក្តានុពលសេដ្ឋកិច្ច និងវិនិយោគនៅកម្ពុជា”។លោកបន្តថា “ក្នុងនាមក្រុមប្រឹក្សាអភិវឌ្ឍន៍កម្ពុជា ដែលជាសេនាធិការរបស់រាជរដ្ឋាភិបាលកម្ពុជានោះ យើងស្វាគមន៍នូវរាល់ការវិនិយោគទាំងអស់ និងធានាផ្តល់កិច្ចសម្រួ​លការវិនិយោគ ដែលមានប្រសិទ្ធភាព តម្លាភាព និងបង្កើតនូវបរិស្ថានអំណោយផល សម្រាប់អ្នកវិនិយោគទាំងអស់”។

វេទិកាធុរកិច្ច និងវិនិយោគកម្ពុជា ចិនឆ្នាំ២០១៨ ដែលត្រូវបានផ្តួចផ្តើមរៀបចំឡើងដោយអង្គការ UNIDO សភាពាណិជ្ជកម្មអន្តរជាតិចិន និងក្រុមប្រឹក្សាជំរុញពាណិជ្ជកម្មអន្តរជាតិចិន ដែលបានរៀបចំធ្វើឡើងនេះ ក្នុងគោលបំណងសំខាន់ផ្តល់ឱកាសសម្រាប់ការពិភាក្សាគ្នា រវាងក្រុមហ៊ុនដែលកំពុងមានសកម្មភា​ពនៅកម្ពុជាជាមួយនឹងក្រុមហ៊ុនចិន ដែលមានចំណាប់អារម្មណ៍ និងកំពុងស្វែ​ង​រ​កលទ្ធភាពធ្វើធុរកិច្ច និងវិនិយោគនៅកម្ពុជា ដោយផ្តោតលើវិស័យអាទិភាពមួយចំនួន ដូចជាវិស័យកសិកម្ម ឧស្សាហកម្ម ទេសចរណ៍ សុខាភិបាល ភស្តុភារកម្ម និងថាមពលជាដើម៕