ការលក់ខុនដូកើនឡើងនៅរាជធានីភ្នំពេញ

October 19, 2017

ភ្នំពេញ៖ ការលក់ខុនដូនៅទីក្រុងភ្នំពេញ បានងើបឡើងវិញនៅក្នុងឆ្នាំនេះ ដែលធ្វើឲ្យបរិយាកាសក្នុងទីផ្សារចាប់ផ្តើមមានសញ្ញាល្អប្រសើរ ខណៈការសិក្សាថ្មីមួយបានរកឃើញថា ចំនួនខុនដូបានកើនជិតដល់ ៥០,០០០យូនីត។

យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុប ដែលទើបបង្ហាញរបាយការណ៍កាលពីពេលថ្មីៗនេះបានរកឃើញថា ការលក់ខុនដូបានកើនពី៦០ភាគរយ មកដល់៦១ភាគរយនៅដំណាច់ឆមាសទី១ឆ្នាំនេះ ស្របពេលចំនួនខុនដូបានកើនពី១២១ និងមានផ្ទះសរុបចំនួន៤៣,៦០៤យូនីត ដល់១២៥គំរោង និងមានផ្ទះចំនួន៤៧, ៧០៤យូនីតក្នុងឆមាសទី១ឆ្នាំនេះ ធៀបរយៈពេលដូចគ្នាកាលពីឆ្នាំមុន។ មានន័យថាក្នុងរយៈពេល៦ខែដើមឆ្នាំនេះ ចំនួនខុនដូបានកើនឡើងតែ៤គំរោងប៉ុ ណ្ណោះ ក្នុងនោះបីគំរោងស្ថិតនៅខេត្តព្រះសីហនុ និងមួយគំរោងនៅទីក្រុងភ្នំពេញ។

ការសិក្សាដដែលបានរកឃើញផងដែរថា ទន្ទឹមនឹងនោះតំលៃខុនដូក៏បានកើនឡើងផងដែរ ដោយឆមាសទី១កាលពីឆ្នាំមុន តំលៃខុនដូគិតជាមធ្យមក្នុងមួយម៉ែត្រការ៉េមានតំលៃចន្លោះពី១៩៣៩ ទៅ២២៩១ដុល្លារ ដល់២០៨៥ទៅ២៥៥០ដុល្លារក្នុងមួយម៉ែត្រការ៉េ។

ការសិក្សានេះបានរកឃើញថា គំរោងដែលបញ្ចប់ការសាងសង់ឆ្នាំនេះមានប្រមាណ១៧ភាគរយ កើនឡើង១ភាគរយធៀបរយៈពេលដូចគ្នាកាលពីឆ្នាំមុន ហើយខុនដូ ដែលបញ្ចប់ការសាងសង់ភាគច្រើននៅឆ្នាំ២០១៩ និងឆ្នាំ២០២០ខាងមុខនេះ។

យោងតាមការសិក្សារបស់ក្រុមហ៊ុន Urban living solutions ដែលបានបញ្ចប់នាពេលថ្មីៗនេះបានរកឃើញថា កំនើនប្រជាសាស្ត្រនៅក្នុងទីក្រុងនឹងកើនឡើងដល់៤លាននាក់នៅឆ្នាំ២០៣០ ការកកស្ទះចរាចរណ៍ ការកើនឡើងនូវបច្ចេកវិទ្យាសម្រាប់ជីវិតមនុស្សសម័យថ្មី និងចរន្តនៃយុវជនវ័យក្មេងកាន់តែច្រើន ពួកគេនឹងសម្រេចចិត្តរស់នៅតាមខុនដូកាន់តែច្រើននាពេលនោះ។

លោកឧកញ៉ា សៀ រិទ្ឋី ប្រធានក្រុមប្រឹក្សាភិបាលនៃក្រុមហ៊ុន World Bridge Group បានថ្លែងថា នៅពេលបច្ចុប្បន្នប្រជាពលរដ្ឋរស់នៅក្រុងភ្នំពេញ បូកទាំងអ្នករស់នៅតាមបណ្តាខេត្ត ដែលចេញចូលរាជធានីរាល់ថ្ងៃមានប្រមាណ៣លាននាក់ ហេតុនេះនៅឆ្នាំ២០៣០លោកគិតថា ចំនួនប្រជាពលរដ្ឋនឹងកើនដល់៥លាននាក់នៅក្រុងភ្នំពេញ។ លោកបន្តថា ការវិនិយោគខុនដូរបស់លោក ដោយសារលោកសម្លឹងឃើញចរន្តនៃការអភិវឌ្ឍសេដ្ឋកិច្ច សង្គម ព្រោះនៅពេលប្រទេសរីកចំរើនដីឡើងថ្លៃ ប្រជាពលរដ្ឋនឹងសម្រេចចិត្តរស់នៅតាមខុនដូ ដោយសារការកកស្ទះចរាចរ ការកើនឡើងនូវតំលៃដីធ្លី និងលំនៅដ្ឋាន។

លោកបន្តថា “ខ្ញុំមិនព្រួយបារម្ភពីការផ្គត់ផ្គង់ទេ ព្រោះពេលនិយាយពីខុនដូត្រូវនិយាយពីទីតាំង និង lifestyle ព្រោះខុនដូរបស់ខ្ញុំគឺលក់ lifestyle មិនមែនលក់តែបន្ទប់គេងទេ។លោកបន្តថា “ដោយនាំមកនូវអ្នកវិនិយោគដែលមានជំនាញ និងបទពិសោធន៍ខ្ពស់ ខុនដូ The Bridge ជាខុនដូគំរូមួយ ដែលលក់បានជោគជ័យក្នុងរយៈពេលតែបីបួនខែប៉ុណ្ណោះ។

លោក សន សៀប អគ្គនាយកក្រុមហ៊ុន Key Real Estate បានថ្លែងថា កន្លងមកមានការព្រួយបារម្ភថា ទីផ្សារខុនដូលើសតម្រូវការ ប៉ុន្តែបើមើលពីនិន្នានិងតម្រូវការជាក់ស្តែងក្នុងទីផ្សារ និងការផ្គត់ផ្គង់ខុនដូជាក់ស្តែង ចំនួនខុនដូដែលបានដាក់ចូលទីផ្សារមិនលើសតម្រូវការនោះទេ៕

NAKI GROUP បោះទុន ១០លានដុល្លារវិនិយោគគំរោងលំនៅដ្ឋានតម្លៃទាប

October 19, 2017

0

ដោយ៖ គង់ សូរិយា

ភ្នំពេញ៖ ក្រុមហ៊ុន NAKI GROUP បានសម្រេចបោះទុនវិនិយោគ ១០លានដុល្លារអាមេរិក ដើម្បីសាងសង់លំនៅដ្ឋាន សម្រាប់ប្រជាជនមានប្រាក់ចំណូលមធ្យម ស្ថិតនៅភាគខាងត្បូងរាជធានីភ្នំពេញ។

អគ្គនាយកក្រុមហ៊ុន NAKI GROUP លោក មាស ង៉ែតវាសនា បានថ្លែងឲ្យដឹងនៅព្រឹកថ្ងៃទី១៩ តុលានេះថា ដោយសារមើលឃើញកំនើនសេដ្ឋកិច្ច និងកំណើនប្រាក់ចំណូលរបស់ប្រជាពលរដ្ឋ ពិសេសប្រជាជនមានជីវភាពថ្នាក់មធ្យម និងមធ្យមកម្រិតទាបកើនឡើងខ្លាំង ទើបលោកសម្រេចចិត្តវិនិយោគលំនៅ ដ្ឋានមានលក្ខណៈជាបុរី RAVANA នេះឡើង ដើម្បីឆ្លើយតបនឹងតម្រូវការរបស់ប្រជាពលរដ្ឋ។លោកបន្តថា បុរីនេះស្ថិតនៅលើផ្ទៃដីប្រមាណជាង៣ហិកតា និងលក់ក្នុងតម្លៃចន្លោះពី៣៥,០០០ ទៅ៦០,០០០ដុល្លារ អាមេរិកអាស្រ័យលើទីតាំង និងទំហំផ្ទះ។

លោកបន្តថា “ខ្ញុំគិតថាគម្រោងនេះនឹងទទួលបានជោគជ័យ ដោយសារហេតុផលខាងលើ ហើយខ្ញុំគិតថាគូស្វាមីវ័យក្មេង ដែលមានប្រាក់ខែបូកចូលគ្នាចន្លោះពី៥០០ទៅ៦០០ដុល្លារក៏អាចសន្សំទិញបាន។លោកបន្តថា“យើងនឹងជួយពួកគេអាចទទួលបានឥណទានពីធនាគារ ដើម្បីសម្រេចបានលំនៅដ្ឋានក្នុងក្តីសុបិនរបស់ពួកគេ។

បុរី RAVANA ស្ថិតនៅចុងផ្លូវ៦០ម៉ែត្រ ស្របតាមបណ្តោយផ្លូវជាតិលេខ២ (អតីតដីរបស់ស្ថានីយ៍ទូរទស្សន៍ CTN) ស្ថិតក្នុងសង្កាត់ព្រែកកំពឹស ខ័ណ្ឌដង្កោ រាជធានីភ្នំពេញ។

លោក មាស ង៉ែតវាសនា បានបន្តថា លោកគិតថាការវិនិយោគលំនៅដ្ឋានដែលមានតម្លៃសមរម្យបែបនេះ ជាការវិនិយោគស្របតាមស្ថានភាពសេដ្ឋកិច្ចសង្គមរបស់កម្ពុជា ដោយសារប្រទេសយើងមានសុខសន្តិភាព សេដ្ឋកិច្ចកើនរាល់ឆ្នាំ ហើយប្រជាជនមានជីវភាពមធ្យមក៏កំពុងមានកំនើនខ្ពស់ផងដែរ។

អគ្គនាយកក្រុមហ៊ុន Century21 Mekong លោក ច្រឹក សុខនីម បានថ្លែងថា ការទិញលក់លំនៅដ្ឋាន នៅតែមានភាពល្អប្រសើរសម្រាប់ឆ្នាំនេះ ដោយសារកំនើនប្រជាសាស្ត្រ កំនើនប្រាក់ចំណូលរបស់ប្រជាពលរដ្ឋ និងលក្ខខ័ណ្ឌទទួលបានឥណទានពីធនាគារនានាកាន់តែមានភាពងាយស្រួល។លោកបន្តថា អ្វីដែលលោកមើលឃើញការទិញលំនៅដ្ឋានទី២ នៅតាមបុរីនានាបានកើនឡើង ប៉ុន្តែប្រសិនជាមើលនិន្នាការទីផ្សារ លោកបានមើលឃើញថា អ្នកវិនិយោគបានចាប់ ផ្តើមចាប់យកទីផ្សារប្រជាជនមានចំណូលទាប និងចំណូលមមធ្យម ព្រោះប្រជាជនក្នុងក្រុមនេះមានចំនួនច្រើន និងកំពុងកើនឡើង។

អ្នកនាង អាន សុធីតា នាយិកាក្រុមហ៊ុនអចលនទ្រព្យ CBRE Cambodia បានថ្លែងថា ទីផ្សារអចលនទ្រព្យ ពិសេសលំនៅដ្ឋានសម្រាប់ប្រជាពលរដ្ឋមានប្រាក់ចំណូលទាប និងប្រាក់ចំណួលមធ្យមកំពុងមានតម្រូវការខ្ពស់ ដោយសារប្រជាជនស្ថិតក្នុងក្រុមនេះមានចំនួនច្រើន ហើយជាមូលដ្ឋានទីផ្សារពិតប្រាកដ ដែលអ្នកវិនិយោគនានាគួរសម្លឹងឳកាស ដើម្បីចាប់យកទីផ្សារនេះ។

អ្នកនាងបន្តថា “ពេលជួបពិភាក្សាប្រឹក្សាយោបល់នានា ខ្ញុំតែងតែប្រាប់ពួកគេគួរផ្តោតការវិនិយោគលើលំនៅដ្ឋានដែលមានជីវភាពមធ្យម ព្រោះនេះជាទីផ្សារធំ និងជាមូលដ្ឋាននៃភាពជោគជ័យរបស់ពួកគេ”៕

កម្ពុជាមានគម្រោងនាំចេកពងមាន់ទៅកាន់ទីផ្សារបរទេស

October 19, 2017

0

[:en]ភ្នំពេញ៖ កម្ពុជាគ្រោងនឹងនាំចេញចេកពងមាន់ ទៅកាន់ទីផ្សារបរទេស បន្ទាប់ពីប្រទេសនេះបាននាំចេញចេកអំបូងលឿងដើម្បីប្រកួតប្រជែង និងដណ្ដើមទីផ្សារជាមួយប្រទេសហ្វីលីពីន ថៃ វៀតណាម និងប្រទេសឡាវ និងម្យ៉ាងវិញទៀតគឺលើកតម្កើនផលិតកសិកម្មរបស់ខ្មែរ។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានលើកឡើងកាលពីម្សិលម៉ិញនេះថា កម្ពុជាមានគម្រោងនាំចេញចេកពងមាន់ ទៅកាន់ទីផ្សារបរទេស ដើម្បីប្រកួតប្រជែងនិងដណ្ដើមទីផ្សារជាមួយចេកអំបូរលឿង ពីប្រទេសមួយចំនួន និងលើកតម្កើនផលិតផលកសិកម្មកម្ពុជា។លោកបន្ថែមថា ចេកពងមាន់ជារបស់ដែលដូនតាខ្មែរ បានបន្សល់ទុក វាមានលក្ខណៈពិសេសជាងចេកអំបូងលឿង ប៉ុន្តែក្រសួងត្រូវការកិច្ចសហប្រតិបត្តិការជាមួយសាលាភូមិន្ទកសិកម្ម ដើម្បីធ្វើការសិក្សាស្រាវជ្រាវធ្វើយ៉ាងណារក្សាសំបកចេកឲ្យបានមួយសប្ដាហ៍ រឺជាងមួយសប្ដាហ៍កុំឲ្យឡើងជាំខ្មៅ ព្រោះការឡើងខ្មៅសំបកនេះ អាចជាការរាំងស្ទះដល់តម្រូវការទិញ។

លោកបន្តថា “ការជ្រើសរើសសាលាភូមិន្ទជាដៃគូរស្រាវជ្រាវ ការថែទាំសំបកចេកឲ្យលឿងល្អបានរយៈពេលយូរនេះ ដោយសារតែសាលាភូមិន្ទមានមន្ទីរពិសោធន៍ច្រើន និងអ្នកជំនាញផ្នែកកសិកម្មជាច្រើន។

បច្ចុប្បន្ននេះកម្ពុជាក៏ដាំចេកអំបូងលឿង ដើម្បីប្រកួតប្រជែងទីផ្សារជាមួយប្រទេសដទៃទៀតផងដែរ ដោយក្នុងនោះលោក វេង សុខុនបញ្ជាក់ថា ចេកអំបូងលឿងមានដាំក្នុងខេត្តមណ្ឌលគីរី ដោយក្នុងមួយសប្ដាហ៍អាចនាំចេញច្រើនជាង៣០០ទៅ៤០០តោន។ ចេកអំបូងលឿងរបស់ខ្មែរទាំងនេះ ត្រូវបាននាំចេញតាមច្រកវៀតណាម បន្តទៅចិន ជប៉ុន និងអូស្ត្រាលីមួយចំនួន៕[:]

តើប្រទេសសឹង្ហបុរីមានអាគារមួយណាខ្ពស់ជាងគេ និងមានភាពអស្ចារ្យបែបណា?

October 18, 2017

0

ដោយ៖ បុរស វុត្ថា

ភ្នំពេញ៖ ប្រទេសនីមួយៗតែងតែចង់បង្ហាញនូវអ្វី ដែលអស្ចារ្យសម្រាប់ទីក្រុងឬរាជធានីរបស់ខ្លួន តាមរយៈការសាងសង់អាគារខ្ពស់ៗ ដើម្បីធ្វើជា Landmark របស់ពួកគេ ក៏ដូចជាដើម្បីផលប្រយោជន៍ពាណិជ្ជកម្មរបស់ខ្លួនផងដែរ។

ថ្ងៃនេះគេហទំព័រ propertyarea.asia សូមបង្ហាញពីព៌តមាននៃអាគារខ្ពស់ជាងគេនៅប្រទេសសឹង្ហបុរី ខណៈរដ្ឋមន្ត្រីក្រសួងការបរទេសប្រទេសនេះ ទើបបានទស្សនកិច្ចនៅកម្ពុជាកាលពីថ្ងៃទី១៧ តុលាកន្លងមកនេះ។

នៅក្នុងប្រទេសសឹង្ហបូរីមានអាគារខ្ពស់ប្រមាណជា៤៣០០ ដែលបានសាងសង់រួចជាស្ថាពរ ហើយចំនួនអាគារភាគច្រើនគឺស្ថិតនៅក្នុងទីប្រជុំជន។ បច្ចុប្បន្នមានអាគារខ្ពស់ប្រមាណជា៧៨ ដែលមានកំពស់ប្រមាណជា១៤០ម៉ែត្រ ប៉ុន្តែក្នុងចំណោមអាគារខ្ពស់ទាំងនោះ គឺអាគារមជ្ឈមណ្ឌល Tanjong Pagar Center បច្ចុប្បន្នជាអាគារដែលខ្ពស់ជាងគេផុតនៅក្នុងប្រទេសសិង្ហបុរី។ វាមានកម្ពស់ប្រមាណជា ២៩០ ម៉ែត្រ ដែលហួសពីការកំណត់កម្ពស់សាងសង់ត្រឹម២៨០ ម៉ែត្រនៅក្នុងសង្កាត់ពាណិជ្ជកម្មកណ្តាល ( Central Business District)។

អាគារ Tanjong Pagar Centre ជាអាគារខ្ពស់ជាងគេលំដាប់លេខ១ ក្នុងប្រទេសសឹង្ហបុរីដែលមានកម្ពស់ ២៩០ ម៉ែត្រ (ដែលលើសពីច្បាប់អនុញ្ញាត្តិ ២៨០ម៉ែត្រ) និង ៦៤ជាន់ ដែលបានកសាងឡើងនៅក្នុងឆ្នាំ ២០១។

ប្រវត្ដិសាស្ដ្រនៃការសាងសង់អាគារខ្ពស់ៗ របស់ប្រទេសសិង្ហបុរីបានចាប់ផ្តើមឆ្នាំ១៩៣៩ ដែលផ្តើមឡើងដោយអាគារ Cathay Building មានកម្ពស់ត្រឹមតែ ១៧ជាន់ប៉ុណ្ណោះ។ រចនាសម្ព័នរបស់វាមាន ៧០ម៉ែត្រ គឺជាអគារដែលខ្ពស់ជាងគេនៅតំបន់អាស៊ីអាគ្នេយ៍នាពេលនោះ។ អាគារមួយនេះត្រូវបានជំនួសដោយអាគាររបស់កក្រុមហ៊ុនធានារ៉ាប់រងអាស៊ី (Asia Insurance Building) មានកម្ពស់៨៧ ម៉ែត្រដែលកសាងឡើងនៅក្នុងឆ្នាំ១៩៥៤ ហើយខ្ពស់ជាងគេនៅប្រទេសសិង្ហបុរី រហូតដល់មានអាគារថ្មីមួយទៀតឈ្មោះ Shaw Center មានកំពស់១០០ ម៉ែត្រត្រូវបានបញ្ចប់នៅក្នុងឆ្នាំ១៩៥។

ប្រទេសសិង្ហបុរី បានឆ្លងកាត់ការរីកលូតលាស់អគារសំខាន់ៗនៅទសវត្សឆ្នាំ១៩៧០ និង១៩៨០ ដែលធ្វើអោយទីក្រុងទាំងមូលមានការរីកចម្រើនយ៉ាងឆាប់រហ័ស។ ក្នុងអំឡុងពេលនោះដែរ មជ្ឈមណ្ឌលធនាគារក្រៅប្រទេស (Overseas Union Bank Centre) បានក្លាយទៅជាអគារខ្ពស់ជាងគេនៅក្នុងទីក្រុងតែម្តង។ សំណង់ដែលមានកំពស់២៨០ម៉ែត្រ ក៏ជាអាគារដែលខ្ពស់ជាងគេនៅលើពិភពលោក ដែលស្ថិតនៅអាមេរិកខាងជើងដែលបានសាងសង់ចាប់ពីឆ្នាំ ១៩៨៦ រហូតដល់ឆ្នាំ ១៩៨៩ទើបានត្រូវបានគេបបញ្ចប់ ខណៈដែលមមានអាគារ Bank of China Tower នៅទីក្រុងហុងកុងបានបញ្ចប់ផងដែរនោះ។ ការរីកចម្រើនអគារកប់ពពកបានបន្តក្នុងកំឡុងទសវត្សឆ្នាំ១៩៩០ និងឆ្នាំ២០០០ ដោយមានអាគារ៣០ អាគារដែលយ៉ាងហោចណាស់កម្ពស់របស់១៤០ម៉ែត្រឡើង ដែលភាគច្រើនជាប៉មលំនៅដ្ឋានសាងសង់ចាប់ពីឆ្នាំ១៩៩០ ដល់ឆ្នាំ ២០០៨ ។

ចាប់តាំងពីឆ្នាំ២០០០មកមានចំនួនអគារខ្ពស់ៗ កំពុងស្ថិតនៅក្រោមការសាងសង់នៅក្នុងតំបន់ទីក្រុងជាពិសេសនៅសង្កាត់ Marina Bay។ គម្រោងមួយដែលបានបញ្ចប់រួចរាល់ជាស្ថាពរដែលស្ថិតនៅក្នុង មជ្ឈមណ្ឌលម៉ារីណា (Marina Bay Sand គឺជាមជ្ឈមណ្ឌលហិរញ្ញវត្ថុ Marina Bay ដែលមានអគារការិយាល័យចំនួន3 ដែលផ្តល់នូវការិយាល័យលំដាប់A មានទំហំសរុប២៨០,០០០ ម៉ែត្រការ៉េ និងមានអគារស្នាក់នៅចំនួន២ដែលផ្តល់ជូននូវផ្ទះល្វែងប្រណីតចំនួន៦៤០ មានទំហំ១៦.៤០០ ម៉ែត្រការ៉េ និងមានផ្សារលក់ដូរទំហំ១៧៦.០០០ ម៉ែត្រការ៉េ ឈ្មោះ Marina Bay Link Mall ។

មានការអភិវឌ្ឍថ្មីៗជាច្រើនផងដែរ នៅក្នុងមជ្ឈមណ្ឌលទិញទំនិញក្នុងទីក្រុងអូកឆាតផងដែរ។ អគារ Orchard Residences គឺជាអគារដែលមានកំពស់២១៨ ម៉ែត្រដែលកំពុងសាងសង់ស្របគ្នានឹង ION Orchard ដែលជាមជ្ឈមណ្ឌលផ្សារទំនើបមួយនៅជិតស្ថានីយ៍អ័រឃាត។

លើសពីនេះមជ្ឈមណ្ឌលហិរញ្ញវត្ថុមហាសមុទ្រ ( Ocean Financial Centre )ដែលមានកំពស់២៤៥ ម៉ែត្រដែលមានកំពស់៤៣ជាន់ត្រូវបានសាងសង់ឡើងនៅ Raffles Place៕

ឥណទានក្នុងវិស័យមីក្រូហិរញ្ញវត្ថុនៅរក្សាបានកំណើនល្អប្រសើរ

October 18, 2017

0

ដោយ៖ គង់ សូរិយា

ភ្នំពេញ៖ ការផ្តល់ឥណទានរបស់ស្ថាប័នមីក្រូហិរញ្ញវត្ថុនានា សម្រេចបានកំណើនល្អប្រសើរក្នុងដំណាច់ត្រីមាសទី៣ឆ្នាំនេះ ធៀបរយៈពេលដូចគ្នាកាលពីឆ្នាំមុន។

លោក សាយ សូនី នាយកប្រតិបត្តិផ្នែកទីផ្សារនៃគ្រឹះស្ថានមីក្រូហិរញ្ញវត្ថុប្រាសាក់ បានថ្លែងឲ្យដឹងតាមទូរស័ព្ទនាថ្ងៃទី១៨ តុលានេះថា ការផ្តល់ឥណទានពីសំណាក់គ្រឹះស្ថានមីក្រូហិរញ្ញវត្ថុប្រាសាក់ សម្រេចបានកំនើនល្អប្រសើរ ដោយទំហំទឹកប្រាក់បានកើនពី១០៣០លានដុល្លារកាលពីដំណាច់ឆ្នាំមុន ដល់១៤៧៩លានដុល្លារអាមេរិក នៅដំណាច់ត្រីមាសទី៣ឆ្នាំនេះ ស្មើនឹងកំនើន៤៣,៥ភាគរយ។លោកបន្តថា រីឯការដាក់ប្រាក់បញ្ញើររបស់អតិថិជមានកំនើនខ្ពស់ផងដែរ ធៀបរយៈពេលដូចគ្នាកាលពីឆ្នាំមុនមានកំនើន៥៥ភាគរយ ដោយទំហំទឹកប្រាក់បានកើនពី៥៦៩លានដុល្លារ ដល់៨៨៥លានដុល្លារអាមេរិក។

លោកបន្តថា “កំណើនល្អប្រសើរក្នុងការផ្តល់ឥណទាន ដោយសារអតិថិជនរបស់ប្រាសាក់បានពង្រីកជំនួញរបស់ពួកគេ ដែលធ្វើឲ្យតម្រូវការឥណទានកើនឡើង ហើយទំហំឥណទានរបស់ប្រាសាក់បានពង្រីកដល់៥០ម៉ឺនដុល្លារ សម្រាប់ផ្តល់ដល់អតិថិជន។លោកបន្តថា “ចំណែកការដាក់ប្រាក់បញ្ញើរកើនឡើង ក៏ជាសញ្ញាល្អផងដែរ ព្រោះវាបង្ហាញពីទំនុកចិត្តរបស់អតិថិជនកើនឡើងនៅស្ថាប័នរបស់យើង។

លោក ជា ផល្លារិន អគ្គនាយកគ្រឹះស្ថានមីក្រូហិរញ្ញវត្ថុអម្រិត បានថ្លែងឲ្យដឹងផងដែរថា ក្នុងដំណាច់ត្រីមាសទី៣ឆ្នាំនេះ ការផ្តល់ឥណទានរបស់អម្រិតបានកើនឡើង១៧ភាគរយ ដោយទំហំទឹកប្រាក់បានកើនពី៥៥៩លានដុល្លារកាលពីដំណាច់ឆ្នាំមុន ដល់៦៦៥លានដុល្លារនៅដំណាច់ត្រីមាសទី៣ឆ្នាំនេះ។លោកបន្តថា កំនើននៃឥណទាននេះ មួយផ្នែកដោយសារការរីកចំរើននៃសេដ្ឋកិច្ចកម្ពុជា ប្រកបដោយលំនឹង ដែលតាមការព្យាករណ៍របស់ធនាគារអភិវឌ្ឍន៍អាស៊ីថា កម្ពុជានឹងសម្រេចបានកំនើនសេដ្ឋកិច្ច៧,១ភាគរយ នៅឆ្នាំ២០១៧នេះ។

លោកបន្តថា អ្នកខ្ចីឥណទានឆ្នាំនេះ ភាគច្រើនយកទៅពង្រីកមុខជំនួញ និងពង្រីកការដាំដុះដំណាំកសិកម្ម ប៉ុន្តែយើងក៏ជួយអតិថិជនដើម្បីធ្វើឲ្យប្រាកដថា ឥណទានរបស់ពួកគាត់មានភាពសមស្រប និងអាចពង្រីកមុខរបរបាន។លោកបន្តថា ជាមួយគ្នានេះ ការដាក់ប្រាក់បញ្ញើរនៅអម្រិតក៏មានកំនើនប្រមា ណ១៧ភាគរយផងដែរ ដោយទំហំទឹកប្រាក់បានកើនពី២៨៤លានដុល្លារកាលពីដំណាច់ឆ្នាំមុន ដល់៣៣០លានដុល្លារនៅដំណាច់ត្រីមាសទី៣ឆ្នាំនេះ។

ជាមួយនឹងកំណើននៃឥណទាននេះ វិស័យមីក្រូហិរញ្ញវត្ថុទាំងមូលកំពុងប្រឈមនឹងបញ្ហាបំណុលដែលសងត្រលប់យឺតយ៉ាវកើនឡើង។

ទោះជាយ៉ាងណាលោកឧកញ៉ា ហួត អៀងតុង ប្រធានសមាគមមីក្រូហិរញ្ញវត្ថុកម្ពុជាបានថ្លែងថា សុខភាពក្នុងវិស័យមីក្រូហិរញ្ញវត្ថុនៅតែមានភាពល្អប្រសើរ ទោះជាមានកំនើននៃការសងត្រលប់យឺតបន្តិចក្តី ប៉ុន្តែការផ្តល់ឥណទានក្នុងវិស័យនេះនៅតែមានភាពល្អប្រសើរ មិនមានបញ្ហាអ្វីគួរឲ្យព្រួយបារម្ភនោះទេ។

លោកបន្តថា “កំណើននៃការសងត្រលប់យឺត មិនមានហានិភ័យខ្ពស់នោះទេ ព្រោះកម្រិតបំណុលស្ថិតក្នុងការគ្រប់គ្រងបាន”៕

បុរីប្រណីតថ្មីមួយតម្លៃ ១០០លានដុល្លារ នឹងលេចឡើងនៅតាមផ្លូវជាតិលេខ១

October 18, 2017

0

ដោយ៖ គង់ សូរិយា

ភ្នំពេញ៖ បុរីប្រណីតថ្មីមួយ ដែលបោះទុនវិនិយោគតម្លៃ១០០លានដុល្លារ នឹងលេចឡើងនៅតាមបណ្តោយផ្លូវជាតិលេខ១ ស្របពេលទីផ្សារបុរីកំពុងដែលមានដំណើរការល្អប្រសើរ។

អគ្គនាយកក្រុមហ៊ុន World Bridge Land លោកឧកញ៉ាសៀ រិទ្ឋីបានថ្លែងឲ្យដឹងកាលពីពេលថ្មីៗនេះថា គំរោងថ្មីនេះនឹងចាប់ផ្តើមសាងសង់ និងប្រកាសលក់នៅចុងខែកក្កដានេះ នៅលើផ្ទៃដី៣,៦ហិកតា មានផ្ទះសរុបចំនួន២០៤ផ្ទះ និងដាក់លក់ក្នុងតំលៃចាប់ពីជាង៣០ម៉ឺនដុល្លារអាមេរិក។ គំរោង The Palm សហការវិនិយោគរវាងក្រុមហ៊ុន World Bridge Land ជាមួយក្រុមហ៊ុន Oxley Holding ដែលមានមូលដ្ឋាននៅប្រទេសសឹង្ហបុរី។លោកបន្តថា គំរោងនេះជាគំរោងដែលមានទស្សនទាន នៃការអភិវឌ្ឍប្លែកពីគេ ដែលមានអាងទឹក មានកន្លែងជិះអូប័រកំសាន្ត និងមាន Man Make Beach និងសេវាកម្មជាច្រើនទៀត។

លោកបន្តថា “អ្នកដឹងចិត្តខ្ញុំហើយ បើធ្វើអ្វីមួយ បើមិនជោគជ័យ ខ្ញុំមិនធ្វើនោះទេ។លោកបន្តថា “តំបន់ស្ថិតនៅតាមបណ្តោយផ្លូវជាតិលេខ១ ជាតំបន់ល្អប្រសើរណាស់សម្រាប់រស់នៅ បន្ទាប់ពីផ្លូវនេះបានបញ្ចប់ការសាងសង់។

លោកឧកញ៉ា សៀ រិទ្ឋី បានបន្តថា “ប្រសិនជាអតិថិជនចង់ទិញលំនៅដ្ឋានបែប resort សូមរង់ចាំមើលគំរោងនេះ ព្រោះវាជាគំរោងដែលមានទស្សនទាននៃការអភិវឌ្ឍន៍បែបថ្មី និងខុសប្លែកពីគេ។

ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ាលី ហួរបានថ្លែងថា ស្ថានភាពនៃការលក់បុរីចាប់ផ្តើមប្រសើរឡើងហើយ ដោយបុរីជាច្រើនបានលក់យ៉ាងជោគជ័យក្នុងរយៈពេលខ្លីចុងក្រោយនេះ ហើយតំបន់ផ្លូវជាតិលេខ១ ក៏ជាតំបន់ល្អសម្រាប់អភិវឌ្ឍន៍។លោកបន្តថា ការវិនិយោគបុរីសម្រាប់ប្រជាជនមានជីវភាពមធ្យម និងក្រោមមធ្យមលក់ដាច់ល្អ ប៉ុន្តែបើផ្ទះមានតំលៃថ្លៃសម្រាប់អ្នកមានជីវភាពធូរធារលក់បាន ប៉ុន្តែក្នុងល្បឿនយឺត។

លោកបន្តថា “ការលក់លំនៅដ្ឋានល្អឡើងវិញ ដោយសារប្រជាពលរដ្ឋមានការយល់ដឹងច្រើនជាងមុន ពួកគេមិនបារម្ភពីការបោះឆ្នោតទៀតទេ គាត់ចាស់ទុំហើយ លែងឈ្លោះគ្នា លែងវ៉ៃគ្នាពេលហែរបក្ស នេះជារឿងល្អសម្រាប់ទាំងអស់គ្នា។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងថា ទីផ្សារបុរីនៅតែទទួលបានជោគជ័យ ដោយសារតម្រូវការបន្តកើនឡើង ព្រោះសេដ្ឋកិច្ចកម្ពុជាបន្តសម្រេចបានកំនើនខ្ពស់ លក្ខខ័ណ្ឌនៃការផ្តល់ឥ ណទានកាន់តែមានភាពងាយស្រួល និងកំនើនប្រជាសាស្ត្រនៅទីក្រុងភ្នំពេញ។លោកបន្តថា ទោះជាយ៉ាងណាគម្រោងបុរីលំនៅដ្ឋានប្រណីត ហាក់មានភាពយឺតយ៉ាវបន្តិចក្នុងការលក់ ប៉ុន្តែសម្រាប់គម្រោងអភិវឌ្ឍន៍ដែលមានអ្នកវិនិយោគមានកេរ្ត៍ឈ្មោះបែបនេះ នឹងនៅតែទទួលបានជោគជ័យ ព្រោះអ្វីសំខាន់គឺទំនុកចិត្ត៕

សម្តេចតេជោថា កម្ពុជានឹងទទួលបានទេសចរណ៍អន្តរជាតិ ៥,៧លាននាក់នៅឆ្នាំនេះ

October 18, 2017

0

ដោយ៖ គង់ សូរិយា

ភ្នំពេញ៖ សម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីកម្ពុជាបានថ្លែងថា កម្ពុជានឹងទទួលបានភ្ញៀវទេសចរណ៍បរទេស ប្រមាណ៥,៧លាននាក់នៅឆ្នាំ២០១៧នេះ ខណៈដែលវិស័យឯកជនបានយល់ស្រប ដោយសារលំហូរភ្ញៀវទេសចរណ៍ចិនបានកើនឡើងយ៉ាងគំហុក។

ថ្លែងក្នុងពិធីសំណេះសំណាលជាមួយកម្មករ និយោជិតជាង១ម៉ឺននាក់នៅតំបន់កំបូលនាព្រឹកថ្ងៃទី១៨ តុលានេះ សម្តេចតេជោបានថ្លែងថា នៅឆ្នាំ២០១៧នេះកម្ពុជារំពឹងថានឹងទទួលបានភ្ញៀវទេសចរណ៍បរទេស៥,៧លាននាក់។

រដ្ឋលេខាធិការក្រសួងទេសចរណ៍លោកទិត្យ ចាន់ថាបានយល់ស្របនឹងការលើកឡើងរបស់សម្តេចតេជោ ដោយឯកឧត្តមបានថ្លែងថា ប្រសិនជាយើងមើលពីកំនើនភ្ញៀវទេសចរណ៍ឆ្នាំនេះ យើងអាចសម្រេចបានតាមអ្វីដែលសម្តេចបានលើកឡើង ដោយសាររយៈពេល៧ខែឆ្នាំនេះ កម្ពុជាទទួលបានភ្ញៀវទេសចរណ៍អន្តរជាតិជាង៣លាននាក់ ស្មើនឹងកំនើនប្រមាណ១៣ភាគរយធៀបរយៈពេលដូចគ្នាកាលពីឆ្នាំមុន។

លោកបន្តថា “ឆ្នាំនេះកម្ពុជាទទួលបានកំនើនភ្ញៀវច្រើន ពិសេសក្នុងរដូវសម្បូរភ្ញៀវទេសចរណ៍ ក្រសួងបានសង្កេតឃើញភ្ញៀវទេសចរណ៍អន្តរជាតិកើន ឡើងខ្ពស់ ហេតុនេះយើងសង្ឃឹមថានឹងសម្រេចបាននូវគោលដៅ។

ក្រសួងទេសចរណ៍បានពន្យាករណ៍កាលពីដើមឆ្នាំនេះថា កម្ពុជារំពឹងទទួលបានភ្ញៀវទេសចរណ៍អន្តរជាយិ៥,៤លាននាក់ ខណៈកាលពីឆ្នាំ២០១៦កម្ពុជាទទួលបានភ្ញៀវទេសចរណ៍អន្តរជាតិ៥លាននាក់។

ប្រធានសហព័ន្ឋទេសចរណ៍កម្ពុជាលោក ធួន ស៊ីណាន បានថ្លែងថា ផ្អែកតាមអ្វីដែលសម្តេចលើកឡើង និងតួលេខជាក់ស្តែង លោកយល់ស្របនឹងការលើកឡើងរបស់សម្តេច ដោយសារភ្ញៀវទេសចរណ៍ចិន បានកើនឡើងយ៉ាងគំហុកនៅខេត្តព្រះសីហនុ ដែលពិបាករកបន្ទប់សម្រាកជារៀងរាល់ពេល ហើយគោលដៅទេសចរណ៍ដទៃទៀត ក៏ភ្ញៀវទេសចរណ៍ចិន និងភ្ញៀវអន្តរជាតិដទៃទៀតកើនឡើងផងដែរ។

អ្នកជំនាញទេសចរណ៍មួយរូបបាននិយាយ ក្នុងលក្ខខ័ណ្ឌមិនបញ្ចេញឈ្មោះថា កម្ពុជាពិតជាសម្រេចបានកំនើនភ្ញៀវទេសចរណ៍អន្តរជាតិ តែតួលេខនៃកំនើនគួរសិក្សាឡើងវិញ ដោយសារមានការត្អូញត្អែរពីម្ចាស់សណ្ឋាគារ ក្រុមហ៊ុនដឹកជញ្ជូននានានៅខេត្តសៀមរាប ពីភាពស្ងប់ស្ងាត់របស់ភ្ញៀវទេសចរណ៍អន្តរជាតិនានា ក្នុងពេលដែលរដូវសម្បូរភ្ញៀវបានមកដល់ ប៉ុន្តែការមកដល់ចំនួនភ្ញៀវទេសចរណ៍ជាក់ស្តែងបានថយចុះ ធៀបនឹងឆ្នាំមុន។

លោកបន្តថា “វិស័យឯកជនចង់ឲ្យមានការអង្គុយចុះរួមគ្នា ពិនិត្យមើលទាំងអស់គ្នាជាមួយមន្ត្រីស្ថាប័នពាក់ព័ន្ឋ ដើម្បីពិនិត្យបញ្ហាជាក់ស្តែង និងរកដំណោះស្រាយរួមគ្នា”៕

ស្ថាប័នចំនួនបីផ្តល់ហិរញ្ញប្បទាន ១៥លានដុល្លារសម្រាប់វិស័យកសិកម្ម

October 18, 2017

0

ដោយ៖ គង់ សូរិយា
ភ្នំពេញ៖ ស្ថាប័នចំនួនបីបានរួមគ្នាផ្តល់ហិរញ្ញប្បទាន១៥លានដុល្លារអាមេរិក ដើម្បីជួយវិស័យកសិកម្មនៅខេត្តចំនួនបួន តាមរយៈការសម្របសម្រូលពីទីភ្នាក់ងារសហរដ្ឋអាមេរិក សម្រាប់កិច្ចអភិវឌ្ឍន៍អន្តរជាតិ (USAID)។

ស្ថាប័នចំនួនបីនោះរួមមាន មីក្រូហិរញ្ញវត្ថុចំនួនពីរនៅកម្ពុជាគឺ AMK និងគ្រឹះស្ថានមីក្រូហិរញ្ញវត្ថុ LOLC ព្រមទាំងក្រុមហ៊ុន RMA សម្រាប់មូលនិធិអភិវឌ្ឍន៍វិស័យកសិកម្មនៅក្នុងខេត្តសៀមរាប បាត់ដំបង កំពង់ធំ និងខេត្តពោធិសាត់។

យោងតាមសេចក្តីប្រកាសព៌តមានបានឲ្យដឹងនាព្រឹកថ្ងៃទី១៨ តុលានេះថា ការប្រកាសពីភាពជាដៃគូនេះ ឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាលសហរដ្ឋអាមេរិក ក្នុងការបង្កើនភាពដែលអាចទទួលបាននូវហិរញ្ញវត្ថុក្នុងប្រទេសកម្ពុជា ដែលជាផ្នែកមួយដ៏សំខាន់ ក្នុងការធ្វើឲ្យប្រសើរឡើងនូវផលិតភាព លើកកម្ពស់កំណើនសេដ្ឋកិច្ច ដែលដឹកមុខដោយវិស័យកសិកម្ម។ ចាប់តាំងពីឆ្នាំ២០១១ ទីភ្នាក់ងារ USAID តាមរយៈកម្មវិធីសន្តិសុខស្បៀងសម្រាប់អនាគត (Feed the Future Initiative) បានគាំទ្រដល់វិស័យកសិកម្ម និងសន្តិសុខស្បៀងនៅតាមបណ្តាខេត្តចំនួន បួនជុំវិញបឹងទន្លេសាបតាមរយៈកម្មវិធីផ្សេងៗជាច្រើន ដោយផ្តោតលើគ្រួសារក្រីក្រ និងកសិករតូច តាច។ ដើម្បីបំពេញបន្ថែមលើគម្រោងសន្តិសុខស្បៀងសម្រាប់អនាគត ថ្ងៃនេះទីភ្នាក់ងារ USAID បានចាប់ដៃគូជាមួយវិទ្យាស្ថានមីក្រូហិរញ្ញវត្ថុចំនួនពីរគឺ វិទ្យាស្ថានមីក្រូហិរញ្ញវត្ថុ AMK វិទ្យាស្ថានមីក្រូ ហិរញ្ញវត្ថុ LOLC និងក្រុមហ៊ុន RMA ដើម្បីប្រមូលប្រាក់កម្ចីរហូតដល់១៥លានដុល្លារសហរដ្ឋអាមេរិក សម្រាប់វិស័យកសិវប្បកម្ម។

កម្ចីទាំងនេះ នឹងពង្រីកការវិនិយោគលើវិស័យកសិវប្បកម្មក្នុងគោលដៅ ជម្រុញកំណើនសេដ្ឋកិច្ច បង្កើតការងារ និងការលក់វត្ថុធាតុដើមកសិកម្មក្នុងរយៈពេល៧ឆ្នាំនៅតាមបណ្តាខេត្តខាងលើ។

លោកស្រីផលី ដាន់ហ្វ៊ត (Polly Dunford) នាយិកាបេសកកម្មនៃទីភ្នាក់ងារ USAID ប្រចាំកម្ពុជា មានប្រសាសន៍ថា “យើងមានមោទនភាពក្នុងការផ្តល់ឥណទានដល់វិស័យឯកជន ដែលកំពុងបម្រើការលើវិស័យកសិកម្មនៅកម្ពុជា ដែលមានប្រជាជន៧០%នៃប្រជាជនសរុបរស់នៅ ពឹងផ្អែកលើវិស័យ នេះ។ លោកស្រីបន្ថែមថា៖ “យើងមានការជឿជាក់ថាការ បង្កើនឥណទានក្នុងវិស័យកសិកម្ម នឹងគាំទ្រយ៉ាងសម្បើម ដល់កំណើនសេដ្ឋកិច្ចរបស់ប្រទេសកម្ពុជា ព្រមទាំងផ្តល់ផលវិជ្ជមានដល់ប្រជាជនកម្ពុជាទាំងមូល មិនថានៅតាមទីជនបទ ឬទីប្រជុំជននោះទេ”៕

ផ្សាររាត្រីកុងទីណ័រមួយទៀតបើក ដំណើរការនៅពេលឆាប់ៗនេះ

October 17, 2017

0

ដោយ៖ ដែន ចែងចាំង

ភ្នំពេញ៖ ផ្សាររាត្រីកុងទីណ័រថ្មីមួយទៀត នឹងបើកដំណើរការនៅពេលខាងមុខនេះ ស្របពេលនិន្នាការផ្សារប្រកបដោយភាពច្នៃប្រឌិតបែបនេះ កំពុងទទួលបានជោគជ័យនៅទីក្រុងភ្នំពេញ។

ផ្សាររាត្រីថ្មីនេះ ស្ថិតនៅតាមបណ្តោយផ្លូវសុធារស (នៅខាងមុខអាគារ ROSE Condo ឬខាងត្បូងផ្សារ AEON Mall) ស្ថិតក្នុងសង្កាត់ទន្លេបាសាក់ រាជធានីភ្នំពេញ។

តាមព័ត៌មានពីប្រធានផ្នែកទីផ្សារនៃផ្សារទំនើបនេះ បាននិយាយក្នុងលក្ខខ័ណ្ឌមិនបញ្ចេញឈ្មោះបានឲ្យដឹងនារសៀលថ្ងៃទី១៧ តុលានេះថា ផ្សាររាត្រីនេះនឹងបើកដំណើរការនៅពេលឆាប់ៗខាងមុខនេះ ហើយវានឹងជាផ្សារមានទំហំធំជាងគេនៅរាជធានីភ្នំពេញ។ ផ្សារនេះនឹងបើកដំណើរការ ២៤ម៉ោង ដោយមានលក់ទំនិញចម្រុះ មានភោជនីយដ្ឋាន ហាងលក់សម្លៀកបំពាក់ និងតន្ត្រីបែបក្លាសិក។

ការបើកផ្សារទំនើបនៅទីក្រុងភ្នំពេញ បានរីករាលដាលកាន់តែច្រើន បន្ទាប់ពីផ្សារាត្រីទីមួយ ដែលវិនិយោគដោយក្រុមហ៊ុន Jet Group បានបើកដំណើរការនិងទទួលបានជោគជ័យរួចមក។

លោកឧកញ៉ា ស្រី ចាន់ថន អគ្គនាយកក្រុមហ៊ុ Jet Group បានថ្លែងឲ្យដឹងកាលពីពេលថ្មីៗនេះថា Jet Container Night Market មានតែមួយប៉ុណ្ណោះ ហេតុនេះភាពជោគជ័យ ឬបរាជ័យរបស់អ្នកវិនិយោគស្រដៀងគ្នានេះ មិនពាក់ព័ន្ឋជាមួយក្រុមហ៊ុនរបស់លោកឡើយ។

និន្នាការនៃការធ្វើពាណិជ្ជកម្មនៅកម្ពុជា ភាគច្រើនធ្វើឡើងតាមគ្នាដែលអ្នកជំនាញបានព្រមានពីហានិភ័យ ក្នុងការធ្វើជំនួញបែបនេះ ព្រោះការធ្វើជំនួញ បែបនេះ មិនទទួលបានជោគជ័យឡើយ ប្រសិនជាអ្នកវិនិយោគគ្មានជំនាញច្បាស់លាស់ ហើយធ្វើអ្វីតាមគ្នានោះ៕

កម្ពុជាស្នើសុំសឹង្ហបុរីឲ្យនាំចូលផលិតផលកសិកម្មបីមុខ

October 17, 2017

0

ដោយ៖ ដែន ចែងចាំង

ភ្នំពេញ៖ ទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានថ្លែង ក្នុងជំនួបជាមួយរដ្ឋមន្ត្រីក្រសួងការបរទេសសឹង្ហបុរី លោកវីវៀន បាឡាគ្រីស្នាន ដែលបាននិងកំពុងបំពេញទស្សនកិច្ចនៅកម្ពុជារយៈពេលមូយថ្ងៃ គឺថ្ងៃទី១៧ តុលានេះថា លោកសូមឲ្យសឹង្ហបុរីពិចារណានាំចូលផលិតផលកសិកម្មកម្ពុជា ចំនួនបីប្រភេទទៅកាន់ទីផ្សាររបស់ខ្លួន។ ផលិតផលកសិកម្មទាំងនោះរួចមាន ម្រេច អង្ករ និងផ្លែស្វាយ។

ជាការឆ្លើយតបលោ កវីវៀន បាឡាគ្រីស្នាន បានសន្យានឹងលើកសំណើរនេះទៅកាន់រដ្ឋាភិបាលរបស់លោកពិចារណា។ ទំហំពាណិជ្ជកម្មកម្ពុជា សឹង្ហបុរីមានទឹកប្រាក់ប្រមាណ៣លានដុល្លារប៉ុណ្ណោះកាលពីឆ្នាំមុន។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានថ្លែងថា ពាណិជ្ជកម្មកម្ពុជា សឹង្ហបុរីមានទំហំតូចប៉ុណ្ណោះ ដោយសារប្រទេសសឹង្ហបុរីមិនមែនជាប្រទេសផលិតធំ សម្រាប់នាំចេញនោះទេ ព្រោះប្រទេសនេះមានចំនួនប្រជាជនតិច ធៀបជាមួយនឹងកម្ពុជា ហេតុនេះសឹង្ហបុរី គឺអាចគ្រាន់តែជាទីតាំង ស្តុកទំនិញកម្ពុជា សម្រាប់នាំចេញបន្តបាន។

លោកបន្តថា “ប៉ុន្តែអ្វីក៏ដោយឲ្យតែមានដំណើរទស្សនកិច្ចបែបនេះ គឺផ្តល់ផលចំណេញដល់ប្រទេសទាំងពីរ លើវិស័យនយោបាយ និងពាណិជ្ជកម្ម”៕