ទីផ្សារខុនដូនៅខេត្តព្រះសីហនុមានសញ្ញាកាន់តែប្រសើរ

December 11, 2017

ដោយ៖ គង់ សូរិយា

ភ្នំពេញ៖ ក្រុមអ្នកជំនាញអចលនទ្រព្យនានាបានលើកឡើងថា ទីផ្សារខុនដូនៅខេត្តព្រះសីហនុមានសញ្ញាល្អប្រសើរ ស្របពេលអ្នកវិនិយោគបានផ្តល់លក្ខខ័ណ្ឌនៃការទិញលក់ល្អប្រសើរ ដើម្បីលើកទឹកចិត្តអតិថិជន។

លោកឧកញ៉ាចេង ខេងប្រធានក្រុមប្រឹក្សាភិបាលនៃក្រុមហ៊ុនអចលនទ្រព្យ Hutton CPLបានថ្លែងឲ្យដឹងតាមទូរស័ព្ទនាព្រឹកថ្ងៃទី១២ ធ្នូនេះថា ទីផ្សារខុនដូមានតម្រូវការល្អប្រសើរ ព្រោះខេត្តព្រះសីហនុ ជាទីតាំងមានសក្តានុពលសម្រាប់វិនិយោគ ស្របពេលអ្នកវិនិយោគអន្តរជាតិ ពិសេសអ្នកវិនិយោគចិនចូលទៅកាន់តែច្រើន ហើយអ្វីកាន់ពិសេសលក្ខខ័ណ្ឌបង់ប្រាក់មានភាពអំណោយផល។

លោកបន្តថា “ស្របពេលដែលតម្លៃស្នាក់នៅតាមសណ្ឋាគារឡើងថ្លៃ បន្ទប់សណ្ឋាគារកំពុងខ្វះខាត ការវិនិយោគខុនដូសម្រាប់ជួលពិតជាល្អប្រសើរ ដោយអ្នកទិញ អាចជួលត្រលប់បានទទួល៨ភាគរយនៃទុនវិនិយោគរបស់ពួកគេ។

លោកឧកញ៉ាចេង ខេងបានបន្តថា អតិថិជនជាវខុនដូនេះ នឹងទទួលបានការផ្តល់ជូននូវសម្ភារៈប្រើប្រាស់ក្នុងផ្ទះមួយឈុត ហើយលំនៅដ្ឋានរបស់ពួកគេប្រើប្រាស់ប្រព័ន្ឋបច្ចេកវិទ្យា Smart Home ដែលអាចបញ្ជាបិទបើកប្រព័ន្ឋអគ្គិសនី ដោយប្រើប្រាស់ត្រឹមទូរស័ព្ទដៃ និងការបញ្ជាពីចម្ងាយ។

បច្ចុប្បន្ននៅខេត្តព្រះសីហនុមានគំរោងខុនដូជាច្រើនកំពុងសាងសង់ដូចជាគំរោង Blue Bay, Sunshine Bay, DSeaview, Royal Bay,និងគំរោងOcean city Condominium ជាដើម។

អ្នកនាង អាន សុធីនា នាយិកាប្រចាំប្រទេសនៃក្រុមហ៊ុន CBRE Cambodiaបានថ្លែងថា ទីផ្សារខុនដូនៅខេត្តព្រះសីហនុ ដែលរំពឹងដាក់ចូលទីផ្សារឆ្នាំនេះ មានប្រមាណ៨០០យូនីត ខណៈគំរោងភាគច្រើនកំពុងសាងសង់ និងទទួលបានការចាប់អារម្មណ៍ច្រើនពីអ្នកវិនិយោគនានា។អ្នកនាងបន្តថា ចំនួនខុនដូនៅខេត្តព្រះសីហនុនៅមានកម្រិតនៅឡើយ ខណៈអ្នកវិនិយោគជាច្រើនកំពុងឆ្ពោះទៅកាន់ខេត្តនេះ ដែលធ្វើឲ្យមានតម្រូវការលំនៅដ្ឋានកើនឡើងយ៉ាងប្រសើរ។

អ្នកនាងបន្តថា “ទោះជាយ៉ាងណាអ្នកខេត្តព្រះសីហនុ មិនទាន់យល់និងចាប់អារម្មណ៍វិនិយោគលើខុនដូទេ អ្នកវិនិយោគភាគច្រើនៗតែអ្នកទៅពីចម្ងាយ និងជនបរទេស។អ្នកនាងបន្តថា “តម្លៃខុនដូនៅទីនោះគិតជាមធ្យមមានតម្លៃចន្លោះពី១០០០ទៅ១៨០០ដុល្លារក្នុងមួយម៉ែត្រការ៉េ ជាតម្លៃដែលខ្ញុំគិតថាមានភាពសមរម្យសម្រាប់ស្ថានភាព និងលក្ខខ័ណ្ឌសេដ្ឋកិច្ចរបស់ខេត្តនេះ។

ទោះជាយ៉ាងណាលោកឡឹប សាលីប្រធានផ្នែកលក់នៃគំរោងខុនដូ Ocean city Condominium ខេត្តព្រះសីហនុបានថ្លែងថា ស្ថានភាពទីផ្សារខុនដូបច្ចុប្បន្នមិនសូវមានភាពល្អប្រសើរនោះទេ ចាប់តាំងពីកំដៅនយោបាយបានកើនឡើង និងការប្រកួតប្រជែងកាន់តែមានភាពតានតឹង នៅក្នុងទីផ្សារខុនដូនិងដីធ្លីក្នុងខេត្តនេះកើនឡើងខ្ពស់៕

ទស្សន៖ ផ្សារទំនើបដុះកាន់តែច្រើន តែមិនសូវស្រូមយកផលិតផលខ្មែរ

December 11, 2017

ដោយ៖ វុត្ថា

ភ្នំពេញ៖ ប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះ ត្រូវបានគេមើលឃើញថា មានការរីកចម្រើនផ្នែកសេដ្ឋកិច្ចគួរឲ្យកត់សំគាល់ តាមរយៈការជំរុញពីវិស័យសំខាន់ គឺវិស័យទេសចរណ៍ វាយនភណ្ឌ កសិកម្ម និងឧស្សាហកម្មសំណង់។ ការនេះបានធ្វើអោយជីវភាពរបស់ប្រជាពលរដ្ឋកម្ពុជា មានជីវភាពធូធាជាង១០មុន ដោយពួកគេបានដើរទិញសម្ភារៈ និងប្រើប្រាស់វត្ថុដែលនាំចូលមកពីក្រៅប្រទេសនៅក្នុងផ្សារទំនើបៗ ឬម៉ាតក្នុងប្រទេសកម្ពុជា។

តាមរយៈនេះ ខ្ញុំមានមោទនភាពយ៉ាងខ្លាំង ដែលបានឃើញប្រជាពលរដ្ឋមានឪកាសប្រើប្រាស់ទំនិញបរទេស ដែលដាក់តាំងលក់ក្នុងផ្សារទំនើបបែបនេះ ហើយ ក៏ខ្ញុំមានមោទនភាពខ្លាំងណាស់ដែរ នៅពេលឃើញមានផ្សារទំនើបដុះកាន់តែច្រើនក្នុងប្រទេសកម្ពុជា តែខ្ញុំគ្មានមោទនភាពឡើយនៅពេលឃើញគ្មានផលិតផលខ្មែរ ដាក់តាំងលក់ច្រើនដើម្បីបង្អួតភ្ញៀវជាតិ និងអន្តរជាតិយកទៅប្រើប្រាស់។

ប្រជាពលរដ្ឋខ្មែរខ្លះបានបង្អួតគ្នា ពីការប្រើប្រាស់ផលិតផលបរទេស ដោយបានទិញមកពីផ្សារទំនើបនេះ ឬផ្សារទំនើបនោះក្នុងទីក្រុងជាដើម ហើយហាក់ដូចជាមានមោទនៈភាពយ៉ាងខ្លាំង នៅពេលដែលខ្លួនបានប្រើប្រាស់ផលិតផលរបស់បរទេស ដោយភ្លេចគិតថាខ្លួនកំពុង ជួយអោយសេដ្ឋកិច្ចបរទេសកាន់តែរីចម្រើនទ្វេដង។

ចំណែកជនបរទេសដែលរស់នៅក្នុងប្រទេសកម្ពុជាឯណេះវិញ ហាក់ស្វែងរកផលិតផលក្នុងស្រុក ជាជាងទិញផលិតផល ដែលខ្លួនធ្លាប់បានប្រើប្រាស់នៅស្រុករបស់ពួកគេ រហូតមានបរទេសមួយចំនួន បានសុំថវិការពីរដ្ឋាភិបាលរបស់គេជួយបង្ហាត់បង្រៀនអោយពលរដ្ឋខ្មែរចេះ បង្កើតមុខរបរឬបង្កើនផលិតផលក្នុងស្រុកអោយបានច្រើន ដើម្បីដាក់លក់ក្នុងផ្សារទំនើបជាជាងនាំចូល។

និន្នាការថ្មីមួយត្រូវបានគេលើកឡើង យកមកជជែកគ្នាស្ទើរគ្រប់ទីកន្លែងនោះគឺថា ប្រជាពលរដ្ឋខ្មែរមិនចូលចិត្ត ប្រើប្រាស់ផលិតផលក្នុងស្រុកឡើយ ពួកគេចូលចិត្តប្រើប្រាស់របស់បរទេស ខ្មែរមិនលើកដំកើងផលិតរបស់ខ្មែរ ផលិតផលខ្មែរគ្មានស្តង់ដារ ផលិតផលខ្មែរមានតម្លៃថ្លៃជាងផលិតផលរបស់បរទេសជាដើមបើប្រៀបធៀបក្នុងតំលៃទីផ្សារ។ ការនេះបានធ្វើអោយកសិករ ឬអ្នកផលិតខ្មែរហាក់សំដែងការអាក់អន់ស្រពន់ចិត្ត ដោយបានបោះបង់អាជីវកម្មរបស់ខ្លួន សុខចិត្តទៅធ្វើការអោយគេ ឬបង្កើតមុខរបរតួចតាចណាមួយ ដែលអាចចឹញ្ចឹមខ្លួនបាន។ ប្រជាពលរដ្ឋខ្មែរមួយចំនួន ដែលធ្លាប់មានបបទពិសោធបើកអាជីវកម្មកែច្នៃផលិតផលសម្រាប់លក់ចែកចាយក្នុងស្រុក ត្រូវបានបោះបង់ចោលវិញ ដោយសារតែការចំណាយច្រើនជាងចំណូល មិនអាចផ្គត់ផ្គង់សម្ភារៈ ឬបុគ្គលិករបស់ខ្លួន។

ប្រទេសមួយដែលមាននិរន្តរភាពសេដ្ឋកិច្ច (Economical Sustainability) និង អំណាចសេដ្ខកិច្ច (Economic Power) គឺមានផលិតផលក្នុងស្រុកប្រើប្រាស់ច្រើនជាងការនាំចូល។ សំនួរសួរថា តើប្រទេសកម្ពុជាអាចរស់រានបានទេ បើគ្មានការនាំចូលផលិតបរទេស? ចំម្លើយ អាចរស់បាន ប៉ុន្តែរស់យ៉ាងត្រដាបត្រដួស។ ដូច្នេះ បង្ខំអោយមានការនាំចូលដើម្បីផ្គត់ផ្គង់ក្នុងទីផ្សារ។ បើយើងក្រឡេងមើលក្នុងទីផ្សារនានា រួមទាំង ផ្សារទំនើបផងនោះស្ទើរ ៩០ ភាករយទៅហើយ ដែលមានសុទ្ធសឹងផលិតផលបរទេសដាក់តាំលក់យ៉ាងព្រោងព្រាត។

ការលើកឡើងនេះ មិនមែនមានន័យមិនអោយប្រជាពលរដ្ឋខ្មែរប្រើប្រាស់ផលិតផលបរទេសនោះទេ តែគ្រាន់តែពញ្ជាក់ស្មារតីអោយប្រជាពលរដ្ឋខ្មែរមានគំនិតបង្កើតផលិតផលក្នុងស្រុក ឬក្រុមហ៊ុនកែឆ្នៃអោយបានច្រើន និងមានស្តង់ដារ ដើម្បីជួយបង្កើតការងារធ្វើជូនពលរដ្ឋផ្សេងទៀត និងជួយសេដ្ឋកិច្ចជាតិអោយកាន់តែរីកចម្រើន និងរឹងមាំដើម្បីបងកួតប្រជែងក្នុងទីផ្សារតំបន់ និងពិភពលោក។

ជាការស្នើរសុំរបស់ខ្ញុំ រដ្ឋាភិបាលគួរតែមានគោលនយោបាយជាក់លាក់ណាមួយ ក្នុងការលើកទឹកចិត្តពលរដ្ឋខ្លួន អោយមានគំនិតបង្កើតអាជីវកម្ម ឬ បង្កើតផលិតផលក្នុងស្រុក អោយបានច្រើនបន្ថែមទៀត មានទាំងផ្តល់ប្រឹក្សាយោបល់ ផ្តល់ប្រាក់កម្ចីក្នុងអត្រាកាប្រាប់ទាប ដើម្បីអោយពួកគេមានដើមទុន និងបង្រៀនបច្ចេទេសដល់ពលរដ្ឋអោយបានត្រឹមត្រូវ ទើបមានផលិតផលក្នុងស្រុកកាន់តែច្រើននៅក្នុងទីផ្សារនានា ពេលនោះទាំងសេដ្ឋកិច្ចជាតិ និងប្រាប់ចំណូលប្រជាពលរដ្ឋកាន់តែធូធាទ្វេរដង៕

គន្លឹះនៃការចាប់ផ្តើមធ្វើអាជីវកម្ម

December 9, 2017

លោក អ្នកប្រហែលជាគិតថាការចាប់ផ្តើមធ្វើអាជីវកម្មគ្រប់ប្រភេទ ពិតជាងាយស្រួល ហើយក៏បានចាប់ផ្តើមធ្វើតៗគ្នាដោយមិនដឹងពីការចាប់ផ្តើមថាត្រូវធ្វើអ្វីខ្លះនោះទេ។ នៅប្រទេសដែលមានការរីកចម្រើនផ្នែកសេដ្ឋកិច្ច ប្រជាជនរបស់គេ មានគំនិតចាប់ផ្តើមបង្កើតអាជីវកម្មដោយខ្លួនឯង និងអាចផ្តល់ការងារធ្វើដល់ប្រជាជនគេថែមទៀត។ ដើម្បីដំណើរអាជីវកម្មមួយទៅបាន គេហទំព័រ properyerea.asia នឹងនាំលោកអ្នកមកស្វែងយល់ពីគន្លឹះសំខាន់ៗខ្លះ ក្នុងការចាប់ផ្តើមអាជីវកម្មដូចខាងក្រោម ៖

១ សុំអាជ្ញាប័ណ្ណអាជីវកម្ម និងការអនុញ្ញាត

អ្នកត្រូវតែសុំអាជ្ញាប័ណ្ណ និងការអនុញ្ញាតពីអាជ្ញាធរពាក់ព័ន្ធជាមុនសិន មុននឹងចាប់ផ្តើមបើកអាជីវកម្មប្រភេទណាមួយ ដើម្បីជៀសផុតពីហានីភ័យដែលកើតឡើងជាយថាហេតុ ។ សូមចាំថា ស្ទើរតែគ្រប់អាជីវកម្មទាំងអស់ត្រូវមានអាជ្ញាប័ណ្ណអាជីវកម្ម។ “អាជ្ញាបណ្ណ និងបណ្ណអនុញ្ញាត” នៅក្នុងផ្នែកជំនួញខ្នាតតូច នឹងជួយចង្អុលបង្ហាញអ្នកក្នុងទិសដៅត្រឹមត្រូវ។

២ ការទិញអាជីវកម្មសហគ្រិនដែលមានសក្តានុពលមានជម្រើសជាច្រើនក្រៅពីការចាប់ផ្តើមអាជីវកម្មពីដំបូងបង្អស់រួមទាំងការទិញអាជីវកម្មដែលមានស្រាប់ ឬសិទ្ធិផ្តាច់មុខ។ ប៉ុន្តែមុនពេលដែលអ្នកទិញ ត្រូវត្រួតពិនិត្យអោយបានត្រឹមត្រូវ ដោយចាប់ផ្តើមធ្វើការស្រាវជ្រាវរបស់អ្នកអោយយល់ច្បាស់ពីអ្វីដែលអ្នកកំពុងទទួល។ ផ្នែកនេះគ្របដណ្តប់គ្រប់ទិដ្ឋភាពទាំងអស់នៃការទិញអាជីវកម្មដូចជាការទិញយីហោជាដើម(Franchise) ។ ប៉ុន្តែអ្នកក៏ត្រូវការយល់ដឹងអំពីតម្លៃ និងអ្វីដែលត្រូវរំពឹងទុកនៅពេលទិញអាជីវកម្ម។

៣ ការជ្រើសរើសឈ្មោះពាណិជ្ជកម្មរបស់អ្នកតើអ្វីទៅជាឈ្មោះអាជីវកម្ម? ជាការពិតណាស់នៅពេលនិយាយអំពីការចាប់តផ្តើមអាជីវកម្ម លោកអ្នកត្រូវដាក់ឈ្មោះអាជីវកម្មរបស់អ្នក ព្រោះវាជារឿងសំខាន់ក្នុងការជ្រើសរើសឈ្មោះដើម្បីអោយមនុស្ស ឬអតិថិជងាយស្រួលចងចាំ និងពិពណ៌នាអំពីមុខជំនួញរបស់អ្នក ប៉ុន្តែត្រូវដាក់ឈ្មោះអាជីវកម្មណាដោយមិនយកឈ្មោះពីគេមកដាក់ដែលមានពីមុនមក ដើម្បីជាការរក្សាសិទ្ធិ។

៤ បង្កើតផែនការពាណិជ្ជកម្មអាជីវកម្មដែលទទួលបានជោគជ័យទាំងអស់ត្រូវមានផែនការអាជីវកម្មមួយដែលបង្ហាញអំពីគោលដៅរបស់ក្រុមហ៊ុននិងផែនការប្រតិបត្តិ។ ផែនការអាជីវកម្មមិនត្រឹមតែជួយរក្សាគ្រប់គ្នានៅក្នុងស្ថាប័ននោះទេ ប៉ុន្តែក៏មានតួនាទីជាប្រវត្តិរូបរបស់ក្រុមហ៊ុន និងអាចជួយដល់ការខិតខំប្រឹងប្រែងផ្តល់មូលនិធិផងដែរ។ ផ្នែកនេះគ្របដណ្តប់លើមូលហេតុនៃការសរសេរផែនការអាជីវកម្មនិងវិធីសរសេរមួយរួមទាំងផែនការគំរូនិងធនធានពាក់ព័ន្ធ។

៥ ជំហានដំបូងដើម្បីចាប់ផ្តើមអាជីវកម្មការចាប់ផ្តើមអាជីវកម្ម គឺមិនងាយស្រួលទេហើយក៏មិនជោគជ័យដែរ។ ការជឿជាក់គឺមានសារៈសំខាន់បំផុត ប៉ុន្តែវាគឺជាការវាយតម្លៃដោយស្មោះត្រង់អំពីផែនការអាជីវកម្មដោយការយល់ដឹងអំពីទិដ្ឋភាពផ្នែកច្បាប់នៃភាពជាសហគ្រិន និងការរំពឹងទុកជាក់ស្តែងពីរបៀបដែលអាជីវកម្មរបស់អ្នកនឹងរកលុយ ។

៦ ការចាប់ផ្តើមផ្តល់ហិរញ្ញប្បទាននៅពេលចាប់ធ្វើអាជីវកម្មថ្មី ការផ្តល់ហិរញ្ញប្បទានទំនងជាស្ថិតក្នុងចំណោមអ្វីដែលសំខាន់បំផុត។ ប៉ុន្តែការចាប់ផ្តើមការផ្តល់ហិរញ្ញប្បទានក៏ជាភារកិច្ចដ៏លំបាកបំផុតមួយសម្រាប់សហគ្រិនដោយផ្តោតលើការដាំដុះនៃការទុកចិត្តក្នុងការប្រឈមមុខនឹងហានិភ័យ។ មិនថាអ្នកកំពុងបន្តការវិនិយោគសាច់ប្រាក់ពីមិត្តភក្ដិ និងគ្រួសារ ការខ្ចីលុយពីធនាគារ ការផ្តល់មូលនិធិសមធម៌ មូលធន ឬប័ណ្ណឥណទាន ការរៃអង្គាសប្រាក់ដែលទទួលបានជោគជ័យ ក៏តម្រូវឱ្យមានវិធីសាស្រ្តជាយុទ្ធសាស្ត្រ និងការអត់ធ្មត់ឱ្យបានច្រើន។

៧ ចាប់ផ្តើមធនធានអាជីវកម្មការចាប់ផ្តើមអាជីវកម្មអាចមើលទៅហាក់ដូចជាភារកិច្ចគួរឱ្យភ័យខ្លាច – ពីការធានានូវដើមទុនចាប់ផ្តើម ការជួលមនុស្សឱ្យបានត្រឹមត្រូវ និងរកអថិជនជាដើម។ ដូច្នេះ លោកអ្នកត្រូវតែមានធនធានគ្រប់គ្រាន់ ដើម្បីដំណើរអាជីវកម្មអោយបានជោគជ័យ ៕

៥ឆ្នាំខាងមុខគួរវិនិយោគលើអចលនទ្រព្យអ្វីខ្លះ ?

December 9, 2017

ដោយ ៖ គង់ សូរិយា

ភ្នំពេញ ៥ឆ្នាំខាងមុខជាពេលវេលាស័ក្តិសមមួយ សម្រាប់ការវិនិយោគលើវិស័យអចលនវត្ថុនានានៅកម្ពុជា ប៉ុន្តែសំណួរសំខាន់ថាតើគួរវិនិយោគលើអចលនទ្រព្យអ្វី ដើម្បីទទួលបានផលចំណេញច្រើន និងបញ្ចៀសហានិភ័យ។

លោកបណ្ឌិត គីម ហ៊ាង ប្រធានសមាគមអ្នកវាយតំលៃ និងភ្នាក់ងារអចលនវត្ថុកម្ពុជាបានថ្លែងឲ្យដឹងនាព្រឹកថ្ងៃទី៩ ខែធ្នូ នេះថា សម្រាប់គំនិតរបស់លោកគិតថា រយៈពេល៥ឆ្នាំក្រោយ គួរតែទិញដីទុកសម្រាប់អ្នកមានលទ្ឋភាព ហើយបើចង់សាងសង់ខុនដូគួរទិញនៅតំបន់ទួលគោក និងភ្នំពេញថ្មី តំបន់ជ្រោយចង្វារជាដើម។ លោកបន្តថា ប៉ុន្តែប្រសិនជាចង់ទិញដីសាងសង់បុរី លោកគិតថាគួរទិញដីដែលមានចម្ងាយ៣០គីឡូម៉ែត្រជុំវិញក្រុងភ្នំពេញ នៅស្របតាមខ្សែក្រវ៉ាត់ក្រុងទី២ ហើយបើគិតដល់រយៈពេល១០ឆ្នាំក្រោយ ទិញដីស្ថិតនៅចម្ងាយ៤០គីឡូម៉ែត្រពីភ្នំពេញ មិនខុសនោះទេ។

លោកបន្តថា “តម្លៃដីធ្លីនៅតំបន់ជុំវិញក្រុងនឹងកើនឡើងខ្លាំង ដោយសារកំនើនប្រជាសាស្រ្ត កំណើនសេដ្ឋកិច្ច និងប្រាក់ចំណូលប្រជាពលរដ្ឋ”។ លោកបន្តថា “តាមការព្យាករណ៍បានរកឃើញថា ប្រជាជនក្រុងភ្នំពេញនឹងកើនឡើងដល់៧លាននាក់នៅឆ្នាំ២០៣០ ហើយខ្ញុំយល់ស្រប”។ លោក គីម ហ៊ាង បានបន្តថា បទពិសោធន៍បែបនេះ បានកើតមានរួចហើយ នៅប្រទេសម៉ាឡេស៊ី ថៃ វៀតណាម ដែលប្រជាជន ពិសេសយុវជនចូលមកកាន់ទីក្រុងរកការងារធ្វើ និងមកសិក្សា ហើយពួកគេនឹងមិនត្រលប់ទៅវិញនោះទេ។

អ្នកនាង Grace Rachny Fong នាយិកាគ្រប់គ្រងទូទៅនៃក្រុមហ៊ុន Century21 Mekong បានថ្លែងឲ្យដឹងផងដែរថា ក្នុងរយៈពេល៥ឆ្នាំខាងមុខ សេវាអាផាតម៉ិននឹងកើនឡើងខ្លាំង ដោយសារការផ្លាស់ប្តូរខុនដូមកកាន់សេវាអាផាតម៉ិន ហើយផ្សារទំនើបៗនឹងកើនឡើងកាន់តែច្រើន ពិសេសខេត្តព្រះសីហនុ និងក្រុងភ្នំពេញ នឹងមានការរីកលូតលាស់នូវសណ្ឋាគារលំដាប់ផ្កាយ៥ ឬផ្កាយ៦ ។

អ្នកនាងបន្តថា ប្រសិនជានិយាយពីឳកាសវិនិយោគវិញ អ្នកមានលទ្ឋភាពគួរទិញដីធ្លីទុកយកចំណេញ ប៉ុន្តែគួររកទីតាំងល្អ ដោយត្រូវពិនិត្យមើលលើតម្រូវការជំវិញ ការអភិវឌ្ឍន៍ហេដ្ឋារចនាសម្ពន្ឋ គំរោងវិនិយោគលើវិស័យម្ហូបអាហារ និងភេសជ្ជៈនានា ដែលសុទ្ឋតែជាសកម្មភាពអភិវឌ្ឍន៍ធ្វើឲ្យតម្លៃដីឡើងថ្លៃ។ អ្នកនាង Grace Rachny Fongban បន្តថា “អ្នកវិនិយោគគួរសម្លឹងមើលដីនៅតាមបណ្តោយផ្លូវជាតិលេខ១ លេខ២ និងទីតាំងមួយចំនួនទៀត ដែលមានសក្តានុពល”៕

ស្វែងយល់ពីអាគារពាណិជ្ជកម្មថ្មីពិភពលោកនៅបុរីNew York

December 9, 2017

ដោយ : វុត្ថា
ភ្នំពេញ : ក្រោយការដួលរំលំនៃការបើកយន្តហោះបុក អាគារមជ្ឈមណ្ឌលពាណិជ្ជកម្មពិភពលោក នៅទីក្រុង New York កាលពីថ្ងៃទី១១ កញ្ញា ឆ្នាំ២០០១ វត្តមានអាគារពាណិជ្ជកម្មពិភពលោកទី១ថ្មីនៅទីក្រុងនេះ បានលេចឡើងក្នុងឧត្តមភាព។
តើអាគារពាណិជ្ជកម្មពិភពលោកថ្មី ដែលមានឈ្មោះថា One World Trade Center មានលក្ខណៈសាងសង់ ពិសេសយ៉ាងដូចម្តេច ? គេហទំព័រPropertyarea.asia សូមនាំលោកអ្នកទៅស្វែងយល់ពីអាគារដ៏អស្ចារ្យមួយនេះដូចតទៅ :
មជ្ឈមណ្ឌលពាណិជ្ជកម្មពិភពលោកទី១, 1 WTC ឬអគារសេរីភាព គឺជាអគារដ៏សំខាន់ បន្ទាប់ពីបានសាងសង់ឡើងវិញ ជំនួសអគារមជ្ឈមណ្ឌលពាណិជ្ជកម្មពិភពលោក (World Trade Center) នៅក្នុងតំបន់Lower Manhattan ក្នុងបុរីញូវយ៉ក សហរដ្ឋអាមេរិក។ វាជាអគារខ្ពស់ជាងគេបំផុតនៅអឌ្ឍគោលខាងលិច និងជាអគារខ្ពស់លំដាប់ទី៦ នៅលើពិភពលោក។

Continue

ចេង ខេង អភិវឌ្ឍនខ្លួនពីលុយ១០ដុល្លារក្លាយជាឧកញ៉ាអចលនទ្រព្យ

December 8, 2017

ដោយ ៖ រ៉ាវី

ភ្នំពេញ ៖ បទយកការណ៏៖ «អតីតកាលកំសត់ បច្ចុប្បន្នអត់ធ្មត់ អនាគតរុងរឿង»………គឺជាសុភាសិតបុរាណខ្មែរបានលើកឡើងចង់ឲ្យមនុស្សចេះតស៊ូ កុំចុះចាញ់នឹងព្រហ្មលិខិត គង់ថ្ងៃណាមួយបានជោគជ័យមិនខាន។ តួយ៉ាងដូចជាលោកឧកញ៉ា ចេង ខេង ធ្លាប់ជួបភាពបរាជ័យលើមុខជំនួញរហូតសល់ប្រាក់ត្រឹមតែ១០ដុល្លារក្នុងហោប៉ៅ ដៃគូភាគហ៊ុនបរទេសក៏រត់ចោល ប៉ុន្តែដោយសារការតស៊ូមិនបោះបង់គោលដៅ បានធ្វើឲ្យលោកអភិវឌ្ឍន៍ក្រុមហ៊ុនដែលធ្លាប់ជួបហានិភ័យ រហូតមានប្រាក់វាល់លានដុល្លារ និងក្លាយជាឧកញ៉ាមានទ្រព្យស្តុក។

នៅពេលផ្តល់កិច្ចសម្ភាសន៍ជាមួយអ្នកព័ត៌មាននៅនឹងការិយាល័យនៃក្រុមហ៊ុនអចលនទ្រព្យ CPL លោកឧកញ៉ា ចេង ខេង បានមានប្រសាសន៍ថា នៅក្នុងឆ្នាំ១៩៩៧ លោកបានជួបវិនិយោគិនសញ្ជាតិអាមេរិកម្នាក់ ដែលជាអ្នកជំនួញដ៏មានសក្តានុពលមួយវិនិយោគផ្នែកអចលនទ្រព្យ ដែលមានសាខានៅប្រទេសថៃ ហុងកុង និងហ្វីលីពីន ហើយក៏ជាអ្នកចាប់អារម្មណ៍ដំបូងបង្អស់មកលើរូបលោកក្នុងការសហការវិនិយោគលើវិស័យនេះនៅក្នុងប្រទេសកម្ពុជា។ ក្រោយមកក៏មានការព្រមព្រៀងគ្នា ដោយលោកត្រូវបានតែងតាំងជាអគ្គនាយកក្រុមហ៊ុនអចនទ្រព្យ (ស៊ីភីអិល ខេមបូឌា) តាំងពីពេលនោះ ដោយបានបោះទុនរួមគ្នាដំបូងចំនួន៣ម៉ឺនដុល្លារ។

ក្រោយពីបានបោះទុនរួច នៅក្នុងឆ្នាំ១៩៩៧នោះ វិស័យអចលនទ្រព្យពុំមានសន្ទុះកើនឡើងទេនៅកម្ពុជា ធ្វើឲ្យក្រុមហ៊ុនដែលទើបបង្កើតថ្មីជាមួយជនជាតិអាមេរិកកាំងរូបនេះ ត្រូវបានខាតបង់ជារឿយដល់ទៅរាប់ម៉ឺនដុល្លារ គឺមិនតិចជាង៧ម៉ឺនដុល្លារនោះទេ ក្នុងអំឡុងឆ្នាំនោះ។ ករណីនេះលោកត្រូវបានបាត់បង់ទំនុកចិត្ត ពីដៃគូវិនិយោគជាច្រើន ហើយក៏មានការថ្នាំងថ្នាក់ខ្លះៗជាមួយក្រុមគ្រួសារផងដែរ រហូតដល់ជនជាតិអាមេរិកកាំងនោះ ចាកចេញពីក្រុមហ៊ុន ដោយមិនបានប្រាប់មួយម៉ាត់ ធ្វើឲ្យលោកក្លាយជាមនុស្សឯការបំផុត ហើយជនជាតិអាមេរិកនោះបានត្រឹមផ្ញើសារអេឡិចត្រូនិក អោយលោកប្រឹងប្រែងតស៊ូបន្តទៀត ហើយប្រាក់ថាបើសិនជាលោកបានជោគជ័យមែននោះ លោកនឹងក្លាយជាមនុស្សពូកែ ស្ទើររកដៃគូប្រកួតប្រជែងមិនបាន ប្រសិនបើអាចស្រោចស្រង់ក្រុមហ៊ុននេះឲ្យឈរងើបឡើងវិញបាន សារអេឡិកត្រូនិកនោះសរសេរថា «ពេលនេះទូកកំពង់លង់នៅកណ្តាលមហាសាគរ គ្មានកោះគ្មានត្រើយ បើសិនជាលោកអាចស្រង់ទូកនោះវិញបាន អ្នកនឹងក្លាយទៅជាមនុស្សដ៏ពូកែអស្ចារ្យ»។

ក្រោយពីទទួលបានសានេះ ភាពអស់សង្ឃឹមក៏បានធ្លាក់មកលើអារម្មណ៏កាន់តែខ្លាំង ធ្វើឲ្យ លោករស់នៅឯការស្ទើរគ្មានអ្នករាប់រក ប្រៀបដូចជាទូកកំពង់លង់ នៅកណ្តាលសមុទ្រនោះមែន ប៉ុន្តែទោះជាមានរឿងកើតឡើងចំពោះខ្លួនដូច្នេះក្តី លោកនៅតែតាំងចិត្តថា ត្រូវដើរទៅមុខឲ្យដល់គោលដៅជានិច្ច ធ្វើយ៉ាងណានឹងស្រោចស្រង់ក្រុមហ៊ុន ឲ្យងើបឈរឡើងវិញបាន ។

យ៉ាងណានោះនៅថ្ងៃមួយខណៈពេលដែលលោក ពិបាកចិត្តក៏ស្រាប់តែមានគ្រូទាយ ជនជាតិឥណ្ឌាម្នាក់ បានទៅដល់ការិយាល័យធ្វើការរបស់លោក ហើយថាលោកគឺជាមនុស្សដែលមានសំណាង មានលុយកាន់ក្នុងដៃច្រើនសឹងចាយមិនអស់ មានឡានទំនើបជិះនៅត្រឹមរយៈ៣ទៅ៤ខែខាងមុខ។ ពាក្យគ្រូទាយនេះបានធ្វើឲ្យលោករឹតតែខកចិត្តខ្លាំង ដោយហេតុថាក្រុមហ៊ុនកំពុងក្ស័យធន មិនមានទុនបម្រុងសូម្បីតែមួយកាក់មួយសេន ចំណែកលុយនៅសល់ក្នុងហោប៉ៅមានតែ១០ដុល្លារគត់ ចំណែកឡានកញ្ចាស់មួយដែលកំពុងប្រើប្រាស់ ពេលនោះស្ទើតែប្រើប្រាស់លែងកើតទៀតផង តើឲ្យសង្ឃឹមអ្វីទៀតទៅលើពាក្យគ្រូទាយ ថាមានលុយចាយមិនអស់នោះ។

យ៉ាងណាក៏ដោយពាក្យថាអាគមន៍ផ្សំអាយុស គឺពិតជាដូចគ្រូទាយឥណ្ឌា ទស្សទាយជើងលេខមើលឃើញជោគវាសនារបស់លោកមែន ស្រាប់តែ៣ខែកន្លងផុតទៅ លោកបានជួបវិនិយោគិនបរទេសមួយទៀត ដែលមានទំនុកចិត្តលើរូបលោក ហើយបានបោះទុនវិនិយោគមក លើក្រុមហ៊ុនស៊ីភីអិលចំនួន៥ម៉ឺនដុល្លារ សម្រាប់ជាទឹកមន្តប្រោស អាចឲ្យលោកមានក្តីសង្ឃឹមឡើងវិញជាថ្មី ដើម្បីបន្តអាជីពលើការដឹកនាំការងារខាងផ្នែកអចលទ្រព្យ នៅកម្ពុជាបន្តទៀត ដោយសារពេលនោះវិស័យអចលនទ្រព្យ ចាប់ផ្តើមងើបឡើងវិញ លោកក៏ទទួលបានជោគជ័យជាបន្តបន្ទាប់ ក្លាយជាក្រុមហ៊ុនផ្តល់សេវាអចលទ្រព្យ ដ៏មានសក្តានុពលមួយក្នុងចំណោមក្រុមហ៊ុនចំនួន៩០ ដែលកំពុងវិនិយោគវិស័យនេះមកទល់បច្ចុប្បន្ន។

និយាយពីការងារវិញបច្ចុប្បន្នលោក គឺជាប្រធានក្រុមហ៊ុនប្រធានក្រុមហ៊ុនស៊ីភីអិល ខេមបូឌា ប្រភើធី លីមីតធីត ដែលជាភ្នាក់ងារផ្តល់សេវាកម្មទិញលក់ និងវាយតម្លៃខាងផ្នែកអចលទ្រព្យ ដូចជាទិញលក់អាគារ ដីធ្លី ផ្ទះល្វែង ខុនដូរ លំដាប់ VIP មួយនៅក្នុងប្រទេសកម្ពុជា ដែលមកទល់ពេលនេះ មានក្រុមហ៊ុននិងបុគ្គលឯកជន មិនតិចជាង៥០០០ទេ ដែលទទួលយកសេវាពីក្រុមហ៊ុនខាងលើ ប្រកបដោយទុកចិត្តនិងមានភាពកក់ក្តៅបំផុត។ ហើយសេវាកម្មនេះបានផ្តល់ការងារដល់ប្រជាជនខ្មែរ ប្រមាណជាជិត១០០នាក់ ហើយថាគ្រោងនឹងបង្កើតការងារសម្រាប់ពលរដ្ឋខ្មែរឲ្យបានរហូតដល់ ៥០០០នាក់ នៅត្រឹមដំណាច់ឆ្នាំ ២០២០ ខាងមុខ។ បុគ្គលិកដែលធ្វើការផ្នែកនេះ មិនចាំបាច់មានសញ្ញាបត្រផ្នែកអចលនទ្រព្យនោះទេ សំខាន់ឲ្យតែមានសញ្ញាបត្រប្រហាក់ប្រហែល មានការអត់ធ្មត់ខ្ពស់ ស្មោះត្រង់ និងចង់បានការរីកចម្រើនទាំងខ្លួនឯង និងក្រុមហ៊ុនប្រកបដោយការស្មោះស្ម័គ្រនោះ គឺគ្រប់គ្រាន់តាមតម្រូវការខាងផ្នែកសេវាកម្មអចលទ្រព្យអ៊ីភីអិលនេះហើយ ៕

ចិន និង UNIDO រូមគ្នាអភិវឌ្ឍន៍ការធ្វើពាណិជ្ជកម្មអេឡិចត្រូនិកនៅកម្ពុជា

December 8, 2017

ដោយ ៖ ដែន ចែងចាំង

ភ្នំពេញ ៖ ក្នុងគោលដៅពង្រីកការធ្វើពាណិជ្ជកម្មអេឡិកត្រូនិកនៅកម្ពុជា ស្របតាមបដិវដ្តន៍វោស័យឧស្សាហកម្ម វិទ្យាស្ថានផ្នែកសេដ្ឋកិច្ចនៃប្រទេសចិន សហការជាមួយអង្គការ UNIDO ក្នុងការចូលរួមអភិវឌ្ឍន៍ការធ្វើពាណិជ្ជកម្ម អេឡិចត្រូនិក សម្រាប់វិស័យសហគ្រាសធុនតូច និងមធ្យមនៅកម្ពុជា ដោយឈរលើគោលនយោបាយ ខ្សែក្រវ៉ាត់មួយ ផ្លូវមួយរបស់រដ្ឋចិន។

នាយកវិទ្យាស្ថានផ្នែកសេដ្ឋកិច្ច នៃប្រទេសចិន លោកស្រី SHEN Kaiyan បានថ្លែងឲ្យដឹងនៅក្នុងជំនួបជាមួយ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មកាលពីម្សិលម៉ិញនេះថា គោលដៅនៃជំនួបពិភាក្សា គឺចង់សិក្សាស្វែងយល់ពីទំនាក់ទំនងរវាងប្រទេសទាំងពីរ លើវិស័យសេដ្ឋកិច្ច និងហេដ្ឋារចនាសម្ពន្ធឧស្សាហកម្មនៅកម្ពុជា ជាពិសេសគឺកិច្ចសហការ ជាមួយអង្គការ UNIDO ក្នុងការចូលរួមអភិវឌ្ឍន៍ការធ្វើពាណិជ្ជកម្មអេឡិចត្រូនិក សម្រាប់វិស័យសហគ្រាសធុនតូច និងមធ្យមនៅកម្ពុជា ( E-Commerce Development for SMEs) ដោយឈរលើគោលនយោបាយ ខ្សែក្រវ៉ាត់មួយ ផ្លូវមួយរបស់រដ្ឋចិន។

កាលពីថ្ងៃទី២៨ ខែវិច្ឆិកា ឆ្នាំ២០១៧ កន្លងទៅ នៅមជ្ឈមណ្ឌលអន្តរជាតិ ទីក្រុងវីយេន ប្រទេសអូទ្រីស ដោយបានទទួលសិទ្ធិប្រទានពីរាជរដ្ឋាភិបាលកម្ពុជា លោកផ្ទាល់ និងលោក លី យ៉ុង អគ្គនាយកអង្គការសហប្រជាជាតិ ដើម្បី អភិវឌ្ឍន៍ឧស្សាហកម្ម (UNIDO) បានចុះហត្ថលេខាលើសេចក្តីប្រកាសរួម សម្រាប់អនុវត្តកម្មវិធីភាពជាដៃគូប្រចាំ ប្រទេស (PCP) ជាមួយកម្ពុជា។

ទាក់ទងនិងស្ថានភាពសេដ្ឋកិច្ច និងរចនាសម្ព័ន្ធឧស្សាហកម្មកម្ពុជាវិញ ឯកឧត្តម ទេសរដ្ឋមន្ត្រី បានលើកឡើងពីទំនាក់ ទំនងដ៏ល្អ នៃការដោះដូរពាណិជ្ជកម្ម និងការវិនិយោគរវាងកម្ពុជា-ចិន ក្នុងនោះវិស័យឧស្សាហកម្មកាត់ដេរសម្លៀក បំពាក់ និងស្បែកជើង មានការរីកចម្រើន ដោយបានដើរតួក្នុងការទាញចំណូលពីការនាំចេញ និងទីផ្សារការងារផងដែរ។

ដោយឡែក ទាក់ទង និងគោលដៅអភិវឌ្ឍន៍ពាណិជ្ជកម្មអេឡិចត្រូនិកសម្រាប់វិស័យ SME លោក ចម ប្រសិទ្ធ បានចាត់ទុកថា មានសារៈខាន់ណាស់សម្រាប់ការធ្វើជំនួញតាមប្រព័ន្ធ Online ដែលកំពុងមាន ការវិវឌ្ឍន៍ខ្លាំងនៅលើសកលលោក ក្នុងនោះឯកឧត្តមបានបញ្ជាក់ថា៖ ច្បាប់ស្តីពីការធ្វើពាណិជ្ជកម្មអេឡិចត្រូនិក (E-Commerce) នៅកម្ពុជា មិនទាន់លេចចេញជារូបរៀងទេ គឺស្ថិតនៅក្នុងសេចក្តីព្រាងច្បាប់នៅឡើយ រីឯវិស័យ SME វិញក៏នៅមានការលំបាកខ្លះដែរ ដូចជាទាក់ទងនិងការចុះបញ្ជី ការកំណត់និយមន័យ និងការរៀបចំគោលនយោបាយ លើកទឹកចិត្តជាដើម ដែលសង្ឃឹមថា ភាគីចិននឹងជួយបានច្រើន នូវចំណុចខ្វះខាតទាំងនេះ៕

ដំណឹងល្អ…ផ្សារទំនើបបោះដុំ MAKRO បើកដំណើរការនៅថ្ងៃទី១៧ ខែធ្នូ ខាងមុខនេះ

December 8, 2017

ដោយ ៖ ដែន ចែងចាំង

ភ្នំពេញ ដំណឹងល្អ ថាបើកគឺបើកមែន នៅទីបំផុតផ្សារទំនើបបោះដុំដ៏ធំរបស់ប្រទេសថៃឈ្មោះ MAKRO នឹងបើកដំណើរការនៅថ្ងៃទី១៧ ខែធ្នូ ខាងមុខនេះហើយ ដើម្បីស្វាគមន៍អតិថិជននានា។

ផ្សារទំនើបដែលមានលក់ទំនិញដ៏សម្បូរបែបជាមួយមុខទំនិញចម្រុះ ១៥,០០០ ប្រភេទនេះ នឹងបើកដោយឧកញ៉ា លី យ៉ុងផាត់ អគ្គនាយកក្រុមហ៊ុនលីយ៉ុងផាត់គ្រុប ដែលមានរហ័សនាមជាស្តេចកោះកុង និងដៃគូរបស់លោក។

ក្រុមហ៊ុន ស៊ី.ភី. គ្រុប ដែលមានលោក ថានីន ជារ៉ាវ៉ានុន (Dhanin Chearavanont) បានកាន់កាប់ភាគហ៊ុនចំនួន៧០ភាគរយ និងក្រុមហ៊ុនលីយ៉ុងផាត់គ្រុបកាន់កាប់ភាគហ៊ុនត្រឹម៣០ភាគរយប៉ុណ្ណោះ។

យោងតាមសេចក្តីប្រកាសព៌តមានរបស់ក្រុមហ៊ុនទាំងពីរនេះ បានឲ្យដឹងនាព្រឹកថ្ងៃទី៨ ខែធ្នូនេះថា ផ្សារទំនើប Makroនេះ សាងសង់លើផ្ទៃដីប្រមាណជាង៥ហិកតា ដែលមានកម្ពស់២ជាន់ នៅក្នុងតំបន់អភិវឌ្ឍន៍ទីក្រុងពោងពាយស្ថិតនៅភាគខាងជើងទីក្រុងភ្នំពេញ។

លោក លាងគង់ យិន អគ្គនាយកគេហទំព័រ Propertyarea.asia ដែលជាគេហទំព័រនាំមុខគេបានលើកឡើងថា ការមកដល់នៃផ្សារទំនើប និងផ្សារបោះដុំនូវមុខទំនិញដ៏ច្រើននេះ ឆ្លុះបញ្ចាំងពីការរីកចម្រើនសង្គម និងសេដ្ឋកិច្ចកម្ពុជា ពិសេសការកើនឡើងនូវក្រុមប្រជាជនវណ្ណៈកណ្តាល ដែលជាអ្វីដែលអ្នកវិនិយោគជាតិ និងអន្តរជាតិមើលឃើញពីកំលាំងទិញនៅក្នុងទីផ្សារនេះ ព្រោះពេលកម្ពុជាក្លាយជាប្រទេសមានប្រាក់ចំណូលមធ្យមកម្រិតទាប និងកំពុងស្ថិតនៅលើផ្លូវក្លាយជាប្រទេសមានប្រាក់ចំណូលមធ្យមកម្រិតខ្ពស់ ជាអ្វីដែលកំលាំងទិញនៅក្នុងទីផ្សារនេះកើនឡើង។

លោកបន្តថា “ទោះជាយ៉ាងណាវត្តមានផ្សារទំនើបនេះ ក៏ធ្វើឲ្យម្ចាស់អាជីវកម្មនានា ដែលតែងតែនាំយកទំនិញពីប្រទេសថៃមួយចំនួន បញ្ហាប្រឈមផងដែរ ប៉ុន្តែវាផ្តល់ប្រយោជន៍ច្រើនដល់អ្នកលក់រាយក្នុងស្រុក ដែលមិនចាំបាច់ធ្វើដំនើរឆ្ងាយ នាំឲ្យខាតបង់ពេលវេលានិងថវិការបស់ខ្លួនផងដែរ”។ លោកបន្តថា “ខ្ញុំស្វាគមន៍ចំពោះវត្តមានផ្សារទំនើប និងផ្សារបោះដុំនូវទំនិញចម្រុះនេះ ព្រោះវានឹងរួមចំណែកធ្វើឲ្យទីផ្សារកម្ពុជាកាន់តែរសរវើកថែមទៀត” ៕

ក្រុមហ៊ុនជីហ្គៀបង្ហាញបច្ចេកវិទ្យានៃការដំឡើងម៉ាស៊ីនត្រជាក់ LGស៊េរីថ្មី

December 8, 2017

ដោយ ៖ ដួង ចន្រ្ទា

ភ្នំពេញ ៖ ក្រុមហ៊ុន LG បានច្នៃប្រឌិតឡើងនូវម៉ាស៊ីនត្រជាក់ស៊េរីថ្មី Dual Inverter ដែលបំពាក់បច្ចេកវិទ្យាថ្មីកាន់តែអស្ចារ្យ ដើម្បីបំពេញនូវតម្រូវការរបស់អតិថិជន ដែលតែងតែចង់បានម៉ាស៊ីនត្រជាក់មានគុណភាពល្អ ជួយសន្សំសំចៃថាមពល នឹងត្រជាក់កាន់តែលឿនរហ័ស គុណភាពខ្ពស់ នឹងប្រើប្រាស់បានយូរ ។ បានបើកសិក្ខាសាលាស្តីពីបច្ចេកវិទ្យានៃការតម្លើងម៉ាស៊ីនត្រជាក់ LG ស៊េរីថ្មី។

លោកឧកញ៉ា សុខ ពិសិដ្ឋ អគ្គនាយកក្រុមហ៊ុន ជីហ្គៀ បានមានប្រសាសន៍ក្នុងពិធីបើកសិក្ខាសាលាបង្ហាញពីផលិតផលប្រណីតនេះ កាលពីពេលថ្មីៗនេះថា គោលបំណងនៃការរៀបចំសិក្ខាសាលានេះ គឺចង់បង្ហាញពីបច្ចេកវិទ្យា ម៉ាស៊ីនត្រជាក់ LG ស៊េរីថ្មី ដ៏ក្រុមអ្នកជំនាញ ចែករំលែកបទពិសោធន៏ រាល់ការជួបប្រទះសព្វថ្ងៃ ជាពិសេសណែនាំនិងបង្ហាត់បង្រៀនបន្ថែម ក្នុងការដំឡើងម៉ាស៊ីនត្រជាក់អោយស្របទៅតាមស្ដង់ដាបច្ចេកទេស និងវិជ្ជាជីវៈ។

ក្នុងកម្មវិធីខាងលើក្រុមហ៊ុន LG Electronics បានបង្ហាញនូវម៉ាស៊ីនត្រជាក់ ស៊េរីថ្មី គឺ LGDual Inverter Compressor របស់ខ្លួនដែលមានរាងស្ដើង សន្សំសំចៃភ្លើងកាន់តែច្រើន កាន់តែឆាប់ត្រជាក់ ងាយស្រួយដំឡើងគ្រប់ទីតាំង។ អ្វីដែលសំខាន់គឺម៉ាស៊ីនត្រជាក់ស៊េរីថ្មីនេះ ត្រូវបានផលិតឡើងដោយផ្ដោតទៅលើបច្ចេកវិទ្យាកុំប្រេសសឺភ្លោះ ( Dual Inverter Compressor ) ដែលធ្វើឲ្យម៉ាស៊ីនត្រជាក់របស់យើងអាចសន្សំសំចៃ ថាមពលខ្ពស់រហូតដល់៧០ភាគរយឆាប់ត្រជាក់ជាមុន រហូតដល់ទៅ៤០ភាគរយដំណើរការម៉ាស៊ីនត្រជាក់ ស្ងាត់បំផុត ធ្វើឲ្យបរិយាកាសនៅក្នុងគេហដ្ឋានពេញដោយផាសុខភាព និងជាម៉ាស៊ីនត្រជាក់ដែលមានការធានានៅលើកុំប្រេសឺ ( Compressor )១០ឆ្នាំដំបូងគេបង្អស់នៅក្នុងប្រទេសកម្ពុជា។

រីឯបច្ចេកវិទ្យា Gold Fin កញ្ច្រែងមាស មានបំពាក់នូវស្រទាប់អាលុយមីញ៉ូមនិងបន្ទះដែកការពារច្រេះ២ជាន់ ជួយឲ្យផ្ទៃខាងមុខរបស់ម៉ាស៊ីនត្រជាក់ទប់ទល់នឹងសំណើម ដែលធ្វើឲ្យច្រេះចាប់បានយ៉ាងល្អនិង ទប់ទល់នូវការប្រែប្រួលនៃកម្តៅផ្សេងៗ ដែលជាកត្តាធ្វើឲ្យម៉ាស៊ីនត្រជាក់នេះ ធន់ប្រើប្រាស់បានយូរ ហើយតាមរយៈមុខងារសំខាន់ៗខាងលើ បានធ្វើឲ្យក្រុមហ៊ុន LG មានទំនុកចិត្តលើផលិតផលម៉ាស៊ីនត្រជាក់របស់ខ្លួនថា អាចបំពេញនូវសេចក្ដីត្រូវការ និងការចង់បានរបស់អតិថិជន ដែលធ្វើអោយការរស់នៅរបស់អតិថិជនទាំងអស់ ពោរពេញដោយផាសុខភាព។

អតិថិជនទាំងអស់អាចរកជាវម៉ាស៊ីនត្រជាក់ស៊េរីថ្មីនេះ នៅគ្រប់ហាង LG Brandshopគ្រប់សាខាខេត្ត ក្រុង និងហាងលក់គ្រឿងអេឡិចត្រូចនិចទូរទាំងប្រទេស៕

ផ្សារទំនើបThe Bridge Commercial នឹងបើកដំនើរការនៅត្រីមាសទី២ឆ្នាំ២០១៨

December 8, 2017

ដោយ ៖ គង់ សូរិយា

ភ្នំពេញ ៖ ផ្សារទំនើបលំដាប់អន្តរជាតិថ្មីមួយ The Bridge Commercial នឹងបើកដំណើរការនៅត្រីមាសទី២ ឆ្នាំ២០១៨ ខាងមុខនេះ ប្រសិនជាគ្មានការប្រែប្រួលទេនោះ។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានថ្លែងឲ្យដឹងតាមទូរស័ព្ទនាព្រឹកថ្ងៃទី៨ ធ្នូនេះថា ក្រុមហ៊ុន CBRE Cambodia បានទទួលសិទ្ឋជាតំណាងជួលផ្តាច់មុខ នៃផ្សារទំនើបដែលមានទីតាំងនៅក្រោមអាគារ The Bridge ក្បែរកោះពេជ្រ។ ផ្សារទំនើបលំដាប់អន្តរជាតិនេះ ចាប់ផ្តើមទទួលការជួលពីអតិថិជនហើយ ដោយយើងរំពឹងថា នឹងសម្រេចបានអត្រាជួលគ្របដណ្តប់៧០ភាគរយ នៃផ្ទៃក្រឡាទំហំ ២ម៉ឺនម៉ែត្រការ៉េ នៅពេលផ្សារបើកដំនើរការនៅពេលខាងមុខ។

អ្នកនាងបន្តថា “អ្វីជាក្តីរំពឹងរបស់យើង ផ្សារនឹងទទួលបានជោគជ័យ ដោយសារអតិថិជនជួលជាអ្នកវិនិយោគថ្មីៗ ហើយអ្វីដែលជាទស្សនទាននៃការរៀបចំផ្សារនេះ ធ្វើយ៉ាងណាឲ្យមានភាពប្លែកពីគេ”។ អ្នកនាងបន្តថា “ផ្សារនេះមានកំពស់៥ជាន់ ដែលអាចចតរថយន្តបានប្រមាណ ១០០០គ្រឿង និងម៉ូតូជាច្រើនរយគ្រឿង”។

ផ្សារនេះក៏ផ្តល់នូវការលក់ទំនិញចម្រុះផងដែរ ដូចជា សេវាកម្មកំសាន្ត រោងភាពយន្តជាលក្ខណៈគ្រួសារ អាហារនិងភេសជ្ជៈ ផ្សារទំនើបលក់ទំនិញរាយៗ និងសេវាកំសាន្តជាច្រើនទៀត។

អ្នកនាង អាន សុធីតា បានបន្តថា តំបន់នេះ ជាទីតាំងមានប្រជាជនមានជីវភាពមធ្យម ដល់ប្រជាជនមានជីវភាពធូរធារខ្លាំងរស់នៅ គួបផ្សំនឹងផ្សារនេះស្ថិតនៅក្នុងមជ្ឈមណ្ឌលពាណិជ្ជកម្មចម្រុះ រួមមាន ការិយាល័យ លំនៅដ្ឋាន មជ្ឈមណ្ឌល ពាណិជ្ជកម្ម ដែលនឹងជំរុញធ្វើឲ្យផ្សារនេះកាន់តែមានភាពទាក់ទាញ។

យោងតាមការសិក្សារបស់ក្រុមហ៊ុន ប៊ុណ្ណារៀលធី គ្រុប បានរកឃើញថា កំនើនផ្សារទំនើបនៅកម្ពុជា បានឆ្លុះបញ្ចាំងពីការកើនឡើងនូវប្រជាជនមានជីវភាព មធ្យម ការកើនឡើងនូវប្រាក់ចំណូលរបស់ប្រជាពលរដ្ឋ និងកំនើននៃកាវិនិយោគពីបរទេស ដែលធ្វើឲ្យទីផ្សារលក់រាយនៅទីក្រុងភ្នំពេញ និងចំនួនផ្សារទំនើបនានាបានកើនឡើងជាបន្តបន្ទាប់៕

លោក ប៉ែន សុខគា នាយកផ្នែកវាយតំលៃនៃក្រុមហ៊ុនប៊ុណ្ណារៀលធីគ្រុបបានថ្លែងថា កំនើនប្រជាសាស្រ្តក្នុងទីក្រុង និងការកើនឡើងនូវវណ្ណៈមធ្យមក្នុងទីក្រុងភ្នំពេញ បានទាក់ទាញអ្នកវិនិយោគអន្តរជាតិជាច្រើន មកវិនិយោគលើផ្សារទំនើបនៅកម្ពុជា ដោយសារកំលាំងទិញមានការកើនឡើង ប៉ុន្តែទោះជាយ៉ាងណាយើងសង្កេតឃើញថា ការលក់ទំនិញល្បីៗ មិនសូវទទួលបានជោគជ័យនោះទេ ផ្ទុយទៅវិញផ្សារទំនើបទាំងនោះលក់ដាច់ជាងគេនូវប្រភេទអាហារ និងភេសជ្ជៈ ដែលជាមុខទំនិញមានការពេញនិយមជាងគេ៕

1...3,1883,1893,190...3,218 Page 3,189 of 3,218