ធ្វើតាមវិធីសាស្រ្តទាំងនេះ ទើប លក់អចលនទ្រព្យបានដាច់លឿន

November 14, 2017

ដោយ ៖ ដែន ចែងចាំង

ក្នុងពិភពនៃការទិញ-លក់អចលនទ្រព្យ អ្នកជំនាញមានវិធីសាស្រ្តផ្សេងៗគ្នាក្នុងការផ្សព្វផ្សាយ និងចចារជាមួយអតិថិជនរបស់ខ្លួន ដើម្បីឲ្យអចលនទ្រព្យរបស់ខ្លួនលក់ដាច់លឿន។ វាមិនមែនជាការងាយស្រួលដូចត្រឹមការនិយាយនោះទេ តែវិធីសាស្រ្តមួយចំនួនខាងក្រោមនេះទំនងជាមួយលោកអ្នកបាន។

បញ្ជីគុណភាព

យោងតាមការសិក្សាស្រាវជ្រាវមួយដែលធ្វើឡើងដោយសមាគមជាតិភ្នាក់ងារអចលនទ្រព្យ (អាមេរិក) កាលពីពេលថ្មីៗនេះបានរកឃើញថា ការស្រាវជ្រាវដែលទាក់ទងនឹងអចលនទ្រព្យនៅក្នុង Google.com បានកើនឡើង 253 ភាគរយ នៅ 4 ឆ្នាំចុងក្រោយនេះ ហើយនៅពេលនេះប្រមាណ 90 ភាគរយ នៃមានបំណងទិញផ្ទះ បានប្រើប្រាស់អ៊ីនធឺណិត ដើម្បីធ្វើការស្វែងរកទិញផ្ទះរបស់ពួកគេ។

ការស្រាវជ្រាវថ្មីពី We Are Social របស់សិង្ហបុរីក៏បានរកឃើញផងដែរថា ការប្រើប្រាស់អ៊ីនធឺណិតនៅប្រទេសកម្ពុជា បានកើនឡើង 400 ភាគរយនៃចន្លោះឆ្នាំ2015 និង 2016 ។

ដោយសារការកើនឡើងយ៉ាងរហ័ស នៃអ្នកប្រើប្រាស់អ៊ីនធឺណិតនៅប្រទេស កម្ពុជា ដែលបានកើនឡើងដល់ទៅ 6,70 លាននាក់ នៅក្នុងឆ្នាំ 2016កន្លងមកនេះ បញ្ជីរគុណភាពអចលនទ្រព្យ ក៏បានក្លាយទៅជារឿងដែលមានសារៈសំខាន់យ៉ាងខ្លាំង។

ដំបូន្មានដើម្បីទទួលបានបញ្ជីគុណភាពខ្ពស់

ការបង្ហោះរូបភាព

រូបភាពបង្ហោះ គុណភាព និងសោភ័ណភាពនៃរូបភាពមានសារៈសំខាន់ណាស់ ដើម្បីទាក់ទាញទឹកចិត្តអតិថិជន ព្រោះថារូបមួយសន្លឹកមានន័យរាប់មិនអស់ ។ វាមានសារៈសំខាន់ណាស់ ដោយរូបដែលអ្នកបង្ហោះ គឺជារូបនៃអចលនទ្រព្យដែលអ្នកកំពុងលក់ពិតប្រាកដមែន ដោយសាររូបនេះអាចបង្ហាញពីភិនភាគពិតៗ នៃអចនលទ្រព្យទៅកាន់អ្នកទិញ។

សរសេរពិពណ៌នាពីអចលនទ្រព្យរបស់អ្នក

អ្នកលក់អចលនទ្រព្យ អាចផ្តល់ព័ត៌មានលម្អិតឲ្យបានច្រើន តាមដែលអ្នកអាចធ្វើទៅបាន នៅពេលដែលអ្នកសរសេរពិពណ៌នាបញ្ជីគុណភាព។ សាកស្រមៃថាខ្លួនអ្នកជាអ្នកទិញ។ តើអ្នកនឹងចង់បានគុណភាពយ៉ាងណាខ្លះពីអចលនទ្រព្យមួយនេះ។

ផ្តល់ព័ត៌មានទំនាក់ទំនងដែលល្អបំផុត

ការផ្សព្វផ្សាយបស់អ្នកនឹងមិនបានផលប្រយោជន៍អ្វីនោះទេ ប្រសិនបើគេមិនអាចទាក់ទងអ្នកបាន។ ហេតុនេះហើយទើបអ្នកត្រូវធានាថា ព័ត៌មានលម្អិតសម្រាប់ទំនាក់ទំនងជាមួយអ្នកមានភាពល្អ និងផ្តល់ភាពជឿជាក់បំផុត ។ ចុះលេខទូរស័ព្ទពីរខ្សែ និងអាសយដ្ឋានអ៊ីមែល ប្រសិនបើពេលខ្លះអ្នកមិនមានពេលលើកទូរស័ព្ទ។

ត្រូវធានាគុណភាពអចលនទ្រព្យរបស់អ្នកល្អបំផុត

ធម្មតាទេ ការលក់ផលិតផលអ្វីមួយ មិនត្រឹមតែទាមទារផលិតផលនោះមានគុណភាពនោះទេ តែក៏ត្រូវមានការផ្សព្វផ្សាយឲ្យបានល្អផងដែរ។ ហេតុនេះចំណងជើងអចលនទ្រព្យ ជាភាសាខ្មែរ និងអង់គ្លេស ឬភាសាចិន អ្នកត្រូវតែធ្វើវាឲ្យបានល្អ។ ប្រសិនបើវាមានភាពសាមញ្ញ ងាយយល់ នោះគេនឹងរកឃើញអចលនវត្ថុរបស់អ្នកមុនគេ។

ការដាក់តម្លៃអចលទ្រព្យរបស់អ្នក

ការដាក់តំលៃទាមទារឲ្យមានការប្រុងប្រយ័ត្នបំផុត ព្រោះបើអចលនទ្រព្យរបស់អ្នកដាក់តំលៃខ្ពស់ពេក អចលនទ្រព្យរបស់អ្នក នឹងមិនទទួលបានការចាប់អារម្មណ៍នោះទេ។ ប្រសិនបើតម្លៃនោះអាចតថ្លៃបាន អ្នកគួរតែធានាថា គេអាចដឹងតាមរយៈការពិពណ៌នារបស់អ្នក។

ប្រសិនបើលក្ខខណ្ឌនៃការទិញ ឬជួលអាចតថ្លៃបាន អ្នកក៏ត្រូវធ្វើយ៉ាងណាឲ្យគេដឹងតាមរយៈការពិពណ៌នារបស់អ្នកផងដែរ។

ការឆ្លើយតបជាមួយនឹងការសាកសួររកទិញឲ្យបានសមស្រប

ការឆ្លើយតបលឿនមានសារៈសំខាន់ណាស់ នៅពេលដែលអ្នកទទួលបានការចាប់អារម្មណ៍សាកសួរពីអតិថិជនរបស់អ្នក។ អ្នកគួរតែឆ្លើយតបជាមួយនឹងពួកគេឲ្យបានលឿនបំផុត។ ប្រសិនបើអ្នកមិនឆ្លើយតបលឿនទេ នោះពួកគេនឹងរកមើលវត្ថុថ្មីទៀត និងអ្នកលក់ថ្មីទៀតដែលយកចិត្តទុកដាក់នឹងពួកគេ។

ការបង្កើតបញ្ជីរថ្មីមួយនៅក្នុង Realestate.com.kh មានភាពងាយស្រួលយ៉ាងខ្លាំង ទោះបីជាអ្នកលក់ឯកជន ម្ចាស់ដី ឬភ្នាក់ងារអចលនទ្រព្យ។ អ្នកអាចលក់ដោយខ្លួនឯងបាន ហើយពួកយើងមិនយកកម្រៃជើងសារនោះឡើយ។

ការធ្វើឲ្យបញ្ជីរបស់អចលនទ្រព្យរបស់អ្នកកាន់តែប្រសើរ

ដោយសារបច្ចុប្បន្ន អ្នកអាចធ្វើឲ្យបញ្ជីអចនលទ្រព្យសម្រាប់លក់ ឬជួល របស់អ្នកឲ្យប្រសើរឡើង ដោយដាក់វានៅជាមួយវេបសាយអចលនទ្រព្យមួយចំនួនតូច ដែលមាននៅក្នុងប្រទេសកម្ពុជាក៏ដោយ ក៏អ្នកអាចចំណាយត្រឹមតែបន្តិចបន្តួចប៉ុណ្ណោះ ដើម្បីឲ្យអចលនទ្រព្យរបស់អ្នកទទួលបានការចាប់អារម្មណ៍ និងមើលឃើញលឿន៕

ក្រុមហ៊ុនចិនធំៗចំនួនពីរ ប្តេជ្ញាជួយបង្កើនការនាំចេញអង្ករពីកម្ពុជាបន្ថែមទៀត

November 13, 2017

0

ភ្នំពេញ៖ មន្ត្រីជាន់ខ្ពស់នៃប្រទេសកម្ពុជា បានថ្លែឲ្យដឹងនៅថ្ងៃទី នៅថ្ងៃទី១៣ ខែវិច្ឆិកា ឆ្នាំ ២០១៧ នេះថា តំណាងក្រុមហ៊ុនចិនធំៗចំនួនពីរបានប្តេជ្ញាចិតេ្តរបស់ខ្លួក្នុងការជួយជ្រោមជ្រែង ដើម្បីបង្កើនការនាំចេញអង្ករកម្ពុជាទៅប្រទេសចិន បន្ថែមលើកូតា ដែលមានស្រាប់ សំដៅធ្វើយ៉ាងណាជួយដោះស្រាយបញ្ហាប្រឈមនានា ក្នុងវិស័យស្រូវ-អង្កររបស់ប្រទេសកម្ពុជា ។

មន្ត្រីជាន់ខ្ពស់ក្រសួងចំនួនពីរ នៃប្រទេសកម្ពុជា រួមមាន ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឯកឧត្តម ប៉ាន់ សូរសក្តិ រដ្ឋមន្ត្រីក្រសួងពាណិជ្ជកម្ម បានចុះហត្ថលេខាលើអនុស្សរណៈយោគយល់គ្នា ជាមួយក្រុមហ៊ុនវិស័យឯកជន ចិនចំនួនពីរ គឺភាគីចិន មាន ឯកឧត្តម LIU Liange ប្រធានធនាគារនីហរ័ណ-អាហរ័ណចិន និង លោក WANG Jiong ប្រធានក្រុមហ៊ុន CITIC Group នៅលើគម្រោងជំរុញផលិតកម្មស្រូវ និងការនាំចេញអង្ករ។

ចំណែកការចុះអនុស្សរណៈ យោគយល់គ្នាផ្សេងមួយទៀត គឺរវាងរាជរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្មដ៏ដែល ជាមួយភាគីចិន តំណាងដោយក្រុមហ៊ុន CITIC Construction Co., Ltd. និងក្រុមហ៊ុន Henan Yuguang International Economic & Technical Cooperation ដោយមានគោលបំណងកំណត់មូលដ្ឋានសម្រាប់រៀបចំ និងអនុវត្តគម្រោង រួមមានការសាងសង់ ប្រតិបត្តិការ និងការថែទាំហេដ្ឋារចនាសម្ព័ន្ធគម្រោង។

គោលបំណងនៃការចុះអនុស្សរណៈយោគយល់គ្នានេះ គឺដើម្បីកំណត់ចំណុចសំខាន់ៗពាក់ព័ន្ធ នឹងទស្សនាទាន វិសាលភាព រចនាសម្ព័ន្ធអនុវត្ត ប្រភព និងគំរូហិរញ្ញប្បទាន ព្រមទាំងកិច្ចការហិរញ្ញវត្ថុនៃគម្រោង ជាសិសេស នឹងផ្ដល់ជាមូលដ្ឋានច្បាស់លាស់ សម្រាប់ការរៀបចំ និងការអនុវត្តគម្រោងដូចជា ការសិក្សាសមិទ្ធិលទ្ធភាព ការរៀបចំប្លង់ លម្អិត ផែនការហិរញ្ញប្បទាន ការសាងសង់ ប្រតិបត្តិការ និងការថែទាំហេដ្ឋារចនាសម្ព័ន្ធគម្រោង យន្តការប្រើប្រាស់ស្រូវ-អង្ករស្តុកក្នុងឃ្លាំងជាវត្ថុបញ្ចាំ ដើម្បីទទួលបានឥណទានពីធនាគារ និងការបង្កើតទីផ្សារលក់ដូរស្រូវ-អង្ករ។

ពាក់ព័ន្ធការផ្សារភ្ជាប់ជាមួយគម្រោងនេះដែរ ភាគីចិននឹងខិតខំប្រឹងប្រែងជួយជ្រោមជ្រែង ដើម្បីបង្កើនការនាំ ចេញអង្ករកម្ពុជាទៅចិន បន្ថែមពីលើកូតាដែលមានស្រាប់ ហើយសម្រាប់គម្រោងនេះដែរ ត្រូវបានរចនាឡើងសំដៅ ដោះស្រាយបញ្ហាប្រឈមនានា ក្នុងវិស័យស្រូវ-អង្ករនៅកម្ពុជា សម្រាប់រយៈពេលវែង និងប្រកបដោយចីរភាព ពោលគឺ ដំណោះស្រាយជាប្រព័ន្ធ និងគ្រប់ជ្រុងជ្រោយ ហើយក៏ជាការបោះជំហានទៅមុខមួយជំហាន មុននឹងឈានដល់ដំណោះ ស្រាយសម្រាប់ដំណាំ និងផល្លានុផលផ្សេងទៀត។

ដើម្បីអភិវឌ្ឍនូវគម្រោងនេះ រាជរដ្ឋាភិបាលកម្ពុជា នឹងស្នើប្រើប្រាស់ឥណទានសម្បទានពីសាធារណរដ្ឋប្រជា មានិតចិន ដើម្បីអនុវត្តគម្រោង ដោយវិនិយោគលើការសាងសង់ហេដ្ឋារចនាសម្ព័ន្ធ ឃ្លាំងស្តុកស្រូវ-អង្ករ និងឡសម្ងួត នៅទីកន្លែងចាំបាច់ទូទាំងប្រទេស ដើម្បីផ្តល់សេវាស្តុក និងសម្ងួត ជូនប្រជាកសិករ និងធុរជន ក្នុងតម្លៃទាប សមរម្យ ដែលកសិករ និងធុរជនអាចទទួលយកបាន។ សម្រាប់គម្រោងនេះដែរ គឺពុំមានផលប៉ះពាល់ជាអវិជ្ជមាន ដល់យន្តការទីផ្សារសេរី ក្នុងវិស័យស្រូវអង្ករឡើយ ព្រោះមិនមានការសាងសង់រោងម៉ាស៊ីនកិនស្រូវបន្ថែម និងមិនធ្វើការ លក់ដូរស្រូវ-អង្ករដោយផ្ទាល់ ដែលអាចបង្កើតឲ្យមានការប្រកួតប្រជែងជាមួយឈ្មួញ និងអ្នកនាំចេញអង្ករទៅទីផ្សារក្រៅ ប្រទេស របស់ផ្នែកឯកជនផងដែរ ៕

កម្ពុជាចុះហត្ថលេខាលើកិច្ចព្រមព្រៀងពាណិជ្ជកម្មសេរីចំនួន២ រវាងអាស៊ាន-ហុង

November 13, 2017

0

ដោយ៖ វុត្ថា
ហ្វីលីពីន៖ ក្នុងអំឡុងពេលចូលរួមកិច្ចប្រជុំកំពូលអាស៊ានលើកទី៣១ និងកិច្ចប្រជុំពាក់ព័ន្ធ ចាប់ពីថ្ងៃទី១០ ដល់ទី១៤ ខែវិច្ឆិកា ឆ្នាំ២០១៧ នៅទីក្រុងម៉ានីឡា ប្រទេសហ្វីលីពីន ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម រួមជាមួយរដ្ឋមន្ត្រីសេដ្ឋកិច្ចអាស៊ាន និងរដ្ឋលេខាធិការពាណិជ្ជកម្ម និងឧស្សាហកម្ម ចិនហុងកុងកាលពីថ្ងៃទី១២ ខែវិច្ឆិកា ឆ្នាំ២០១៧ បានចុះហត្ថលេខាលើកិច្ចព្រមព្រៀងសំខាន់ចំនួនពីរ៖ កិច្ចព្រមព្រៀងពាណិជ្ជកម្មសេរីរវាងអាស៊ាន-ហុងកុង និងកិច្ចព្រមព្រៀងស្តីពីវិនិយោគ រវាងអាស៊ាន និងហុងកុង។

នេះគឺជាជោគជ័យថ្មីមួយទៀតរបស់ប្រទេសកម្ពុជាដែលទទួលបានក្នុងការធ្វើសមាហរណកម្មសេដ្ឋកិច្ចទៅក្នុងសេដ្ឋកិច្ចតំបន់ និងពិភពលោក បន្ទាប់ពីរដ្ឋសភា និងព្រឹទ្ធសភានៃព្រះរាជាណាចក្រកម្ពុជា បានអនុម័តយល់ព្រមលើសេចក្តីព្រាងច្បាប់ស្តីពីឧបាស្រ័យពាណិជ្ជកម្ម និងអនុម័តយល់ព្រមលើពិធីសារនៃការអនុវត្តកិច្ចព្រមព្រៀងអាស៊ាន សាធារណរដ្ឋប្រជាមានិតចិនកាលពីខែតុលា ឆ្នាំ២០១៧ កន្លងទៅ។

គោលបំណងសំខាន់ៗ នៃកិច្ចព្រមព្រៀងទាំងពីរគឺ៖ (១) កាត់បន្ថយរបាំងចំពោះលំហូរពាណិជ្ជកម្មទំនិញ សេវា និងវិនិយោគ ធើ្វឲ្យកាន់តែស៊ីជម្រៅ និងទូលំទូលាយនូវការផ្សារភ្ជាប់សេដ្ឋកិច្ច កាត់បន្ថយចំណាយសម្រាប់ធុរជន បង្កើនពាណិជ្ជកម្ម ពង្រឹងប្រសិទ្ធភាពសេដ្ឋកិច្ច និងបង្កើតទីផ្សារកាន់តែធំទូលាយជាមួយកាលានុវត្តភាពច្រើនជាងមុន និងសេដ្ឋកិច្ចមាត្រដ្ឋានកាន់តែធំសម្រាប់ធុរកិច្ច (២) ធ្វើពិពិធកម្ម និងជំរុញពាណិជ្ជកម្ម វិនិយោគ និងទំនាក់ទំនងសេដ្ឋកិច្ចរវាងភាគី (៣) ផ្តល់ការអនុគ្រោះពិសេស និងដោយឡែក ចំពោះរដ្ឋជាសមាជិកអាស៊ានថ្មី ដូចជា កម្ពុជា ឡាវ មីយ៉ាន់ម៉ា និងវៀតណាម ដើម្បីបង្កើនការចូលរួមក្នុងសមាហរណកម្មសេដ្ឋកិច្ចកាន់តែខ្លាំងជាងមុន និងពង្រីកការនាំចេញ តាមរយៈការបង្កើនសមត្ថភាព ប្រសិទ្ធភាព និងភាពប្រកួតប្រជែងក្នុងស្រុក (៤) ជួយទ្រទ្រង់ដល់ការធ្វើសមាហរណកម្មសេដ្ឋកិច្ចទៅក្នុងតំបន់ និងពិភពលោក និងទ្រទ្រង់ដល់ការអភិវឌ្ឍសេដ្ឋកិច្ចប្រកបដោយចីរភាព។

នៅពេលកិច្ចព្រមព្រៀងនេះចូលជាធរមាន នឹងធ្វើឲ្យមានភាពល្អប្រសើរឡើងនូវលំហូរវិនិយោគ និងពាណិជ្ជកម្មរវាងភាគីទាំងពីរ ដែលនឹងផ្តល់អត្ថប្រយោជន៍ដល់ប្រជាជនអាស៊ាន រួមមានកម្ពុជាផង ក៏ដូចជា ហុងកុង។ លើសពីនេះទៀត នឹងបង្កើនការតភ្ជាប់សេដ្ឋកិច្ចរវាងអាស៊ានហុងកុង តាមរយៈការធ្វើសេរីភាវូបនីយកម្មពាណិជ្ជកម្មទំនិញ សេវាកម្ម និងវិនិយោគ។ កម្ពុជានឹងទទួលបានផលប្រយោជន៍ច្រើនពីកិច្ចព្រមព្រៀងនេះ ដោយសារហុងកុង ជាទីផ្សារមូលធនដ៏ធំ។

គួររំលឹកថា កិច្ចព្រមព្រៀងសំខាន់ទាំងពីរ ត្រូវបានចាប់ផ្តើមចរចាដំបូងនៅឆ្នាំ២០១៤ និងបានបញ្ចប់នាកិច្ចប្រជុំគណៈកម្មាធិការចរចាពាណិជ្ជកម្មអាស៊ាន-ហុងកុង លើកទី១០ នៅទីក្រុងបាងកក ថៃឡង់ដ៏ កាលពីខែកក្កដា ឆ្នាំ២០១។ ក្រោយនោះ មានការងារបច្ចេកទេសលម្អិតជាច្រើន ត្រូវបានបន្តធ្វើ ដូចជាការងាររៀបចំឲ្យមានការឯកភាពគ្នាក្នុងការប្រើប្រាស់ពាក្យពេចន៍គន្លឹះមួយចំនួន តារាងបញ្ចុះពន្ធគយចុងក្រោយ ទម្រង់រួមនៃតារាងពន្ធគយ។ល។ នៅថ្ងៃទី២៧ ខែតុលា ឆ្នាំ២០១៧ ប្រធានក្រុមចរចាបានឈានដល់ការឯកភាពគ្នាទាំងស្រុងលើអត្ថបទចុងក្រោយនៃកិច្ចព្រមព្រៀង ដែលរួចរាល់សម្រាប់ការចុះហត្ថលេខាដោយរដ្ឋមន្ត្រីសេដ្ឋកិច្ចអាស៊ាន ជាមួយរដ្ឋលេខាធិការនៃចិនហុងកុង៕

ជំនាញស្ថាបត្យកម្ម និងវិស្វកម្មកំពុងមានទីផ្សារការងារច្រើន

November 13, 2017

0

ដោយ៖ ដែន ចែងចាំង

ភ្នំពេញ៖ ខណៈវិស័យសំណង់នៅកម្ពុជា កំពុងមានសន្ទុះរីកចម្រើនយ៉ាងឆាប់រហ័សនោះបានធ្វើឱ្យវិស័យមួយនេះ ត្រូវប្រឈមមុខទៅនឹងបញ្ហាមួយចំនួន ដូចជា តម្រូវការកម្លាំងកម្មករ និងធនធានមនស្សដែលមានចំណេះដឹងច្បាស់លាស់ជាច្រីន។

ឮលោកបណ្ឌិតទួស សាភឿន អគ្គលេខាធិការរងនៃគណៈស្ថាបត្យករកម្ពុជាបានមានប្រសាសន៍ឲ្យដឹងកាលពីពេលថ្មីៗនេះថា ធនធានមនុស្សផ្នែកវិស្វករសំណង់ស៊ីវិល និងស្ថាបត្យកម្ម នៅកម្ពុជានាពេលបច្ចុប្បន្ននេះ នៅមិនទាន់អាចឆ្លើយតបទៅនឹងតម្រូវនៃការរីកចម្រើន ដ៏ឆាប់រហ័សរបស់វិស័យសំណង់នៅកម្ពុជានារយៈពេល១ទសវត្សរ៍ចុងក្រោយនេះបានទេ។ លោកបានប្រាប់ទៀតថា ជារៀងរាល់ឆ្នាំមានក្រុមហ៊ុនជាច្រើន បានមកទាក់ទងសាកលវិទ្យាល័យ ដើម្បីជ្រើសរើសនិស្សិតដែលកំពុងសិក្សាទៅធ្វើការ ប៉ុន្តែពេលខ្លះសាលាមិនអាចរកនិស្សិតបានគ្រប់គ្រាន់សម្រាប់ផ្តល់ឲ្យក្រុមហ៊ុនទាំងអស់នោះបានទេ។

លោកបន្តថា “ការងារក្នុងវិស័យសំណង់មានច្រើន ដូច្នេះនិស្សិតដែលសិក្សាជំនាញស្ថាបត្យកម្ម និងសំណង់ស៊ីវិល មិនខ្វះការងារធ្វើទេ។ ជាក់ស្តែងមាននិស្សិតខ្លះមានការងារធ្វើចាប់តាំងពីឆ្នាំទី១តែម្តង។

បើតាមលោកទួស សាភឿន ក្នុង១ឆ្នាំមាននិស្សិតខ្មែរចន្លោះពី២០០-៣០០នាក់បានបញ្ចប់ការសិក្សាលើផ្នែកស្ថាបត្យកម្ម ខណៈនៅកម្ពុជាបច្ចុប្បន្នមានគ្រឹះស្ថានសិក្សាពី៥-៦ប៉ុណ្ណោះ ដែលទទួលបណ្តុះបណ្តាលធនធានមនុស្សសម្រាប់ផ្នែកនេះ។

ព្រឹទ្ធបុរសនៃមហាវិទ្យាល័យស្ថាបត្យកម្ម និងសំណង់ស៊ីវិល នៃសាកលវិទ្យាល័យន័រតុន លោក លឹម សុខតៃបាននិយាយថា ធនធានមនុស្សដែលមានចំណេះដឹងទាក់ទងទៅនឹងវិស័យសំណង់ កំពុងមានតម្រូវការច្រើននៅក្នុងទីផ្សារប្រទេសកម្ពុជា ដោយនិស្សិតដែលរៀននៅសាកលវិទ្យាល័យន័រតុន ចាប់ពីឆ្នាំទី៣ឡើងទៅស្ទើរតែទាំងអស់ត្រូវបានក្រុមហ៊ុនមកទាក់ទងយកទៅធ្វើការ។លោកបានបន្តថា ការងារទាក់ទងទៅនឹងវិស័យសំណង់នៅកម្ពុជា នឹងត្រូវការធនធានមនុស្សច្រើនបន្ថែមទៀត ជាពិសេសនៅពេលការការធ្វើ សមាហរណកម្មសេដ្ឋកិច្ចអាស៊ានឈានចូលមកដល់។

លោកបានបន្តថា “បច្ចុប្បន្ននេះនិស្សិត ដែលចូលសិក្សាផ្នែកវិស្វករសំណង់ស៊ីវិល និងស្ថាបត្យកម្មនៃសាកលវិទ្យាល័យន័រតុន បានកើនឡើងជាបន្តបន្ទាប់។ ជាក់ស្តែងបច្ចុប្បន្ននេះ និស្សិតដែលកំពុងរៀនផ្នែកវិស្វករសំណង់ស៊ីវិល មានប្រមាណជាង៣០០នាក់ ចំណែកខាងផ្នែកស្ថាបត្យកម្ម និងនគរូបនីយកម្ម មានប្រមាណប្រហែល១០០នាក់។

លោកបន្តថា រហូតមកដល់ពេលនេះនិស្សិត ដែលបានបញ្ចប់ការសិក្សាលើផ្នែកទាំង២របស់សាកលវិទ្យាល័យ មានចំនួនប្រមាណប្រហែល៣៨០០នាក់ហើយ។

វិស័យសំណង់នៅកម្ពុជាត្រូវបានគេចាត់ទុកជាវិស័យ១ នៅក្នុងចំណោមវិស័យសំខាន់ៗចំនួន៤ ដែលបានដើរតួនាទីយ៉ាងសំខាន់ នៅក្នុងរួមចំណែកលើកស្ទួយកំណើនសេដ្ឋកិច្ចជាតិ ជាក់ស្តែងគិតត្រឹមដំណាច់ត្រីមាសទី៣ឆ្នាំនេះ ទុនវិនិយោគក្នុងវិស័យនេះកើនឡើងដល់ទឹកប្រាក់៥៦៣៦លានដុល្លារ កើនឡើង២២ភាគរយធៀបរយៈពេលដូចគ្នាកាលពីឆ្នាំមុន។

លោកម៉េង ចំរើន ប្រធានក្រុមវិស្វករប្រចាំការដ្ឋានសាងសង់ក្នុងគម្រោងទីក្រុង Olympia City បានថ្លែងថា បច្ចុប្បន្ននេះនៅក្នុងការដ្ឋានសាងសង់ទីក្រុងOlympia City មានវិស្វករ និងស្ថាបត្យករកំពុងធ្វើការសរុបប្រហែល100នាក់ ក្នុងនៅវិស្វករមានប្រហែល៧០ភាគរយ។ លោកបានបន្តថា ក្នុងចំណោមនោះមានវិស្វករ និងស្ថាបត្យករបរទេសប្រហែល៥ភាគរយ ដែលពួកគេទាំងនោះសុទ្ធតែជាអ្នកជំនាញ ដែលមានបទពិសោធ និងស្នាដៃលើគម្រោងធំៗជាច្រើន។

លោកបានថ្លែងថា “ខ្ញុំគិតថាវិស្វករ និងស្ថាបត្យករនាពេលបច្ចុប្បន្នសុទ្ធតែមានសមត្ថភាព អាចធ្វើការនៅតាមការដ្ឋានសំណង់ធំៗបាន ដោយយើងគ្រាន់តែយកអ្នកជំនាញ(មកពីបរទេស) មកជួយបណ្តុះបណ្តាលតែបន្តិចបន្តួចប៉ុណ្ណ។

តែទោះបីជាយ៉ាងណាលោកចំរើន ក៏បានបញ្ជាក់ថា “ខ្ញុំគិតថាសមត្ថភាពរបស់វិស្វករកម្ពុជា នឹងមិនសូវមានបញ្ហាសមត្ថភាពគ្រប់គ្រាន់នោះទេ បន្ទាប់ពីសមាហរណកម្មសេដ្ឋកិច្ចអាស៊ានឈានចូលមកដល់នោះទេ តែអ្វីដែលខ្ញុំគិតថាអាចមានបញ្ហានោះគឺខាងផ្នែកស្ថាបត្យកម្ម ព្រោះការ Design របស់អ្នកជំនាញនៅប្រទេសក្នុងតំបន់អាស៊ានមួយចំនួនអាចមានសមត្ថភាពលើសពីស្ថាបត្យករកម្ពុជា”៕

កម្ពុជាគ្រោងសាងសង់អាគារកំពស់៦០០ម៉ែត្រមួយនៅខាងជើងក្រុងភ្នំពេញ

November 13, 2017

0

ភ្នំពេញ៖ ប្រទេសកម្ពុជាគ្រោងនឹងសាងសង់អាគារកំពស់៦០០ម៉ែត្រមួយទៀត ស្ថិតនៅភាគខាងជើងក្រុងភ្នំពេញ ដែលជាគម្រោងដ៏មហស្ចារ្យមួយនៃទីក្រុងនាគរាជសម្តេចតេជោ។

លោកសាស្ត្រាចារ្យ ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់ ដែលជាស្ថាបត្យករផ្តួតផ្តើមរៀបចំគំរោងទីក្រុងនាគរាជសម្តេចតេជោបានថ្លែងឲ្យដឹងកាលពីសប្តាហ៍មុនថា តាមផែនការមេនៃទីក្រុងនាគរាជសម្តេចតេជោ យើងគ្រោងនឹងសាងសង់មជ្ឈមណ្ឌលពាណិជ្ជកម្មកំពស់៦០០ម៉ែត្រមួយ សម្រាប់ប្រើប្រាស់ជាការិយាល័យកណ្តាលរបស់សម្តេចតេជោ ដែលលោកអាចត្រួតពិនិត្យមើលស្ថានភាព និងការអភិវឌ្ឍន៍ប្រទេសចេញពីអាគារនេះបាន ព្រោះកំពស់៦០០ម៉ែត្រអាចមើលឃើញទូទាំងប្រទេសហើយ។

លោកបន្តថា “អាគារនេះនឹងសាងសង់នៅពេលទីក្រុងនេះមាបថវិកាគ្រប់ គ្រាន់សម្រាប់រៀបចំ ហើយបច្ចុប្បន្នមានក្រុមហ៊ុនចិនមួយចំនួនកំពុងចាប់អារម្ម ណ៍ចូលរួមវិនិយោគក្នុងគំរោងនេះហើយ។លោកបន្តថា “ការសាងសង់ទីក្រុងនេះ ដើម្បីរំលឹកនិងដឹងគុណសម្តេចតេជោ ក៏ដូចជាបន្សល់ទុកមរតកសម្រាប់មនុស្សជំនាន់ក្រោយ ព្រោះរយៈពេល៥៨០ឆ្នាំហើយ យើងមិនដែលបានសាងសង់ទីក្រុងថ្មីទេ។

លោកសាស្ត្រាចារ្យ ភឿង សុភ័ណ្ឌ ដែលបានសញ្ញាបត្រស្មើគ្នានឹងសាស្ត្រាចារ្យវីរស្ថាបត្យករកម្ពុជា លោកវណ្ណ ម៉ូលីវណ្ណផងដែរនោះបានថ្លែងឲ្យដឹងទៀតថា ទីក្រុងនាគរាជសម្តេចតេជោ នឹងសាងសង់មជ្ឈមណ្ឌលអាគារពាណិជ្ជកម្ម អាគារស្នាក់នៅ និងមជ្ឈមណ្ឌលកំសាន្តនានាមានរូបរាងដូចនាគរាជ ដែលត្រូវនឹងឆ្នាំរបស់សម្តេច។លោកបន្តថា ទីក្រុងនេះនឹងរៀបចំឲ្យមានកំពង់ផែ ដើម្បីភ្ជាប់សេវាកម្មដឹកជញ្ជូន ពាណិជ្ជកម្មនៅក្នុងមជ្ឈមណ្ឌលជាពាណិជ្ជកម្មអន្តរជាតិសម្តេចតេជោ ដែលនឹងរៀបចំឲ្យមាននៅក្នុងទីក្រុងនេះផងដែរ។

លោកឧកញ៉ានួន រិទ្ឋីអគ្គនាយកក្រុមហ៊ុនអចលនទ្រព្យ KFA បានថ្លែងថា កម្ពុជាមានសក្តានុពលសម្រាប់រយៈពេល២០ឆ្នាំទៀត ក្នុងការវិនិយោគលើវិស័យអចលនទ្រព្យ ដោយសារកំនើនសេដ្ឋកិច្ច ស្ថិរភាពនយោបាយ ស្ថិរភាពសង្គមដែលធ្វើឲ្យប្រាក់ចំណូលរបស់ប្រជាពលរដ្ឋ មានការកើនឡើង ហើយលំហូរទុនវិនិយោគពីបរទេស នឹងបន្តកើនឡើងបន្តទៀត។លោកបន្តថា តាមរយៈគោលនយោបាយផ្លូវសូត្ររបស់ប្រទេសចិន កម្ពុជានឹងទទួលបានអត្ថប្រយោជន៍កាន់តែច្រើនថែមទៀត។

លោកឧកញ៉ាបានបន្តថា ការសាងសង់ទីក្រុងនាគរាជសម្តេចតេជោ នៅប្របនឹងទន្លេមេគង្គ និងទន្លេសាបនេះ ពិតជាមានភាពវិសេសវិសាលណាស់ ព្រោះវានឹងធ្វើឲ្យមុខមាត់កម្ពុជា កាន់តែលេចធ្លោនៅឆាកអន្តរជាតិ ធ្វើឲ្យអ្នកវិនិយោគកាន់តែមានទំនុកចិត្ត និងអ្វីពិសេសនោះជាការឆ្លើយតបនឹងអ្វីជាគុណសម្បត្តិរបស់សម្តេច ដែលបានលះបង់កំលាំងកាយចិត្ត និងរហូតហ៊ានលះបង់ជីវិត ដើម្បីបុព្វហេតុសុខសន្តិភាពនៅកម្ពុជា៕

៥ចំណុចដែលអ្នកគួរដឹងពីសហគមន៍សេដ្ឋកិច្ចអាស៊ាន

November 13, 2017

0

ភ្នំពេញ៖ ទោះបីសមាគមន៍ប្រជាជាតិអាស៊ីអាគ្នេយ៍ ហៅកាត់អាស៊ានបានធ្វើសមាហរណកម្មជាមួយគ្នាកាលពីចុងឆ្នាំ២០១៥ក្តី ប៉ុន្តែប្រជាជននៅក្នុងសហគមន៍នេះ ទំនងមិនទាន់បានយល់ដឹងស៊ីជម្រៅពីសហគមន៍នេះ មានភាពប្រទាក់ក្រឡាគ្នា នៅឡើយទេ។

គេហទំព័រ Propertyarea.asia សូមលើកយកចំណុចសំខាន់ៗចំនួន៥ ដើម្បីចែករំលែកនិងផ្តល់ការយល់ដឹងដល់មិត្តអ្នកអាន បានស្វែងយល់បន្ថែម។

យោងតាមឯកសារផ្លូវការរបស់ក្រសួងការបរទេស និងសហប្រតិបត្តិការអន្តរជាតិបានឲ្យដឹងថា សហគមន៍សេដ្ឋកិច្ចអាស៊ានមានប្រជាពលរដ្ឋចំនួន ៦២២លាននាក់ និងមានទំហំផលិតផលក្នុងស្រុកសរុបចំនួន២.៦ទ្រីលានដុល្លារកាលពីឆ្នាំ២០១៤ និងអត្រាកំណើនផលិតផលក្នុងស្រុកសរុបចំនួន៤.៦ភាគរយ។ នៅក្នុងអាស៊ានបានអនុវត្តន៍វិធានការណ៍នានារបស់ប្រទេសជាសមាជិក ដើម្បីធ្វើសមាហរណកម្មសេដ្ឋកិច្ចកាន់តែស៊ីជម្រៅ និងកែសម្រួលវិធានច្បាប់ឲ្យមានភាពងាយស្រួល ធ្វើសុខដុមនីយកម្មហេដ្ឋារចនាសម្ព័ន្ឋ បទបញ្ញត្តិ សម្រួលចរាចរណ៍ទំនិញឆ្លងកាត់ព្រំដែន កាត់បន្ថយឬលុបបំបាត់របាំងមិនមែនពន្ឋគយ និងធ្វើឲ្យកាន់តែស៊ីជម្រៅបន្ថែម ទៀតនូវទំនាក់ទំនងសេដ្ឋកិច្ចក្នុងតំបន់។

ទី១/ តើគេពិព៌ណនាសង្ខេបពីសហគមន៍សេដ្ឋកិច្ចអាស៊ានយ៉ាងដូចម្តេច?

សហគមន៍អាស៊ាននឹងធ្វើឲ្យប្រទេសជាសមាជិកអាស៊ានទាំង១០ កាន់តែខិតជិតគ្នា ដោយយើងនឹងត្រូវផ្សារភ្ជាប់គ្នាដោយចក្ខុវិស័យរួមនៃតំបន់មួយ ដែលរ៉ឹងមាំយូរអង្វែងប្រកបដោយសន្តិរភាព ស្ថិរភាព និងវិបុលភាព។ ការកសាងសហគមន៍មានសរសរស្តម្ភចំនួនបី គឺវិស័យនយោបាយ សន្តិសុខ វិស័យសេដ្ឋកិច្ច និងវិស័យសង្គម វប្បធ៌ម។ ការបង្កើតសហគមន៍ គឺជាព្រឹត្តិការណ៍ដ៏មានសារៈសំខាន់មួយក្នុងការបន្តការវិវត្តន៍របស់អាស៊ាន ជាអង្គការមួយដែលមានអត្តសញ្ញាណតំបន់រួមមានប្រជាជន៦២០លាននាក់ ដែលប្រាថ្នាចង់បាន “ចក្ខុវិស័យតែមួយ អត្តសញ្ញាណតែមួយ សហគមន៍តែមួយ។

ទី២/ សហគមន៍នេះចាប់ផ្តើមដំណើរការនៅថ្ងៃទី៣១ ធ្នូ ឆ្នាំ ២០១៥ តើយើងរំពឹងថាមានអ្វីផ្លាស់ប្តូរនៅក្នុងឆ្នាំថ្មីនេះ?

ការកសាងសហគមន៍អាស៊ាន គឺជាដំណើរការមួយដែលកំពុងធ្វើបន្ត មិនមែនជាការផ្លាស់ប្តូរភ្លាមៗនោះទេ។ ដើម្បីរៀបចំសម្រាប់ការចាប់ផ្តើមសហគមន៍នេះ ប្រទេសសមាជិកអាស៊ាន បានអនុវត្តន៍គំនិតផ្តួចផ្តើមជាច្រើននៅក្រោមផែនការលំអិតទាំងបីរបស់សហគមន៍អាស៊ាន ក្នុងគោលបំណងធ្វើសមាហរណកម្មកាន់តែស៊ីជម្រៅនិងទូលំទូលាយ។ ថ្នាក់ដឹកនាំអាស៊ានបានអនុម័ត ចក្ខុវស័យសហគមន៍សេដ្ឋកិច្ចអាស៊ានឆ្នាំ២០២៥ ដែលបន្តធ្វើសមាហរណកម្ម និងពង្រឹងភាពរ៉ឹងមាំរបស់យើងសម្រាប់រយៈពេល១០ឆ្នាំខាងមុខ។

ទី៣/ តើសហគមន៍សេដ្ឋកិច្ចអាស៊ាន នឹងប៉ះពាល់ដល់ជីវិតប្រចាំថ្ងៃរបស់យើងយ៉ាងដូចម្តេច?

គោលដៅចំបងនៃសមាហរណកម្មតំបន់ តាមរយៈសហគមន៍អាស៊ាន គឺដើម្បីលើកកំពស់ជីវភាពរស់នៅរបស់ប្រជាជនអាស៊ាន។ សេចក្តីថ្លែងការណ៍កូទ្បាទ្បាំពួរ ឆ្នាំ២០១៥ ស្តីពីការបង្កើតសហគមន៍សេដ្ឋកិច្ចអាស៊ាន ដែលចេញដោយថ្នាក់ដឹកនាំអាស៊ាន ក្នុងឳកាសកិច្ចប្រជុំកំពូលអាស៊ានលើកទី២៧ វិច្ឆិកា ឆ្នាំ២០១៥បានបញ្ជាក់ពីបំណងប្រាថ្នារបស់ថ្នាក់ដឹកនាំអាស៊ានក្នុងការបង្កើត “សហគមន៍មួយដែលផ្អែកលើច្បាប់ ដែលយកចិត្តទុកដាក់លើប្រជាជន និងយកប្រជាជនជាធំ ដែលក្នុងសហគមន៍នោះ ប្រជាជនយើងបន្តធ្វើការចូលរួម និងទទួលបានផលប្រយោជន៍ពេញលេញពីដំណើរការសមាហរណកម្មអាស៊ាន និងសេរីភាព អព្យាក្រិតភាព សន្ឋិសញ្ញាមិត្តភាព និងកិច្ចសហប្រតិបត្តិការឆ្នាំ១៩៧៦ និងពិធីសារសម្រាប់ពង្រឹងយន្តការដោះស្រាយ ជម្លោះឆ្នាំ២០០៤សម្រាប់ដោះស្រាយជម្លោះពាក់ព័ន្ឋនឹងផ្នែកសេដ្ឋកិច្ច។

សេចក្តីថ្លែងការណ៍អាស៊ានស្តីពី សមុទ្រចិនខាងត្បូង (ឆ្នាំ១៩៩២) និងសេចក្តីថ្លែងការណ៍ស្តីពី ការប្រតិបត្តិរបស់បណ្តាភាគីសមុទ្រចិនខាងត្បូងឆ្នាំ២០០២ ក៏បានដើរតួនាទីសំខាន់នៅក្នុងការរក្សាសន្តិភាព សន្តិសុខ និងស្ថិរភាពនៅសមុទ្រចិនខាងត្បូង។កិច្ចព្រមព្រៀងអាស៊ានស្តីពី ភាពកខ្វក់នៃផ្សែងអ័ព្ទឆ្លងព្រំដែនគឺជាឧទាហរណ៍ ទី៣ឆ្លើយតបទៅនឹងសំណួរសួរថា តើអាស៊ានគ្រប់គ្រងបញ្ហាប្រឈមឆ្លងដែនយ៉ាងដូចម្តេច។

ទី៤/ តើយើងអាចធ្វើដំណើរដោយសេរីក្នុងតំបន់ ឬធ្វើការនៅក្នុងប្រទេសអាស៊ានមួយទៀតបានឬទេ?

កិច្ចព្រមព្រៀងនិងគំនិតផ្តួចផ្តើមនៅក្នុងអាស៊ាន បានជួយសម្រួលដល់ការធ្វើដំណើរក្នុងបណ្តាប្រទេសអាស៊ាន និងមានកិច្ចព្រមព្រៀងជាច្រើនទៀតកំពុងត្រូវបានរៀបចំ។ ក្នុងវិស័យការងារ កិច្ចព្រមព្រៀងទទួលស្គាល់ទៅវិញទៅមក នៅក្នុងសហគមន៍អាស៊ាន បានផ្តល់នូវចរាចរណ៍ដោយសេរីនៃអ្នកមានវិជ្ជាជីវៈជំនាញ ដូចជា វិស្វករ គិលានុបដ្ឋាក ស្ថាបត្យករ អ្នកអង្កេតដីធ្លី វេជ្ជបណ្ឌិតនិងទន្តពេទ្យ គណនេយ្យករ និងអ្នកមានវិជ្ជាជីវៈទេសចរណ៍។

ទី៥/ ប្រទេសសមាជិកអាស៊ានមួយចំនួនមានការខ្វែងគំនិតគ្នាខ្លះ តើសហគមន៍សេដ្ឋកិច្ចអាស៊ាននឹងជួយដោះស្រាយបញ្ហានេះដោយរបៀបណា?

ដូចនៅក្នុងគ្រួសារ ប្រទេសសមាជិកអាស៊ានអាចមានទស្សនៈផ្សេងគ្នាលើបញ្ហាមួយចំនួន ហើយប្រទេសមួយចំនួននៅមានបញ្ហាព្រំដែនដែលមិនទាន់ដោះស្រាយ។ ប្រទេសសមាជិកអាស៊ានបានប្តេជ្ញាគោរពធម្មនុញ្ញអាស៊ាន ជាគោលការណ៍ ណែនាំរបស់ពួកគេ ដែលរួមមានការដោះស្រាយជម្លោះដោយសន្តិវិធី។ក្នុងចំណោមនោះតាមរបៀបអាស៊ាន គឺនិយាយពីការកសាងសហគមន៍ និងកុងសង់ស៊ីល(ស្រុះស្រួលគ្នា) និងការមិនប្រើហឹង្សាចំពោះការប្រឈមមុខដាក់គ្នា ប្រកាន់ភាពនិយម កណ្តាលទៅលើភាពជ្រុលនិយម និងការដោះស្រាយជម្លោះដោយសន្តិវិធី។

អាស៊ានមានកិច្ចព្រមព្រៀងជាច្រើន ដើម្បីលើកកំពស់សន្តិភាព កិច្ចសហប្រតិបត្តិការ និងសាមគ្គីភាពតំបន់ រួមមានសេចក្តីថ្លែងការណ៍ឆ្នាំ១៩៧១ស្តីពីសន្តិភាព សាមគ្គីភាព វិបុលភាព និងសុខដុមរមនាក្នុងអាស៊ាន។

គំរោងតភ្ជាប់រូបវ័ន្តគ្របដណ្តប់ទៅលើគំនិតផ្តួចផ្តើមជាច្រើន ដើម្បីជួយសម្រួលដល់លំហូរទំនិញ សេវាកម្ម និងប្រជាជននៅក្នុងតំបន់ដែលរួមមានបណ្តាញ ហាយវេ កំពង់ផែសមុទ្រចំនួន៤៧ ច្រករបៀងខ្សែបញ្ជូនទិន្នន័យល្បឿនលឿនអាស៊ាន និងបណ្តាញចែកចាយថាមពលអាស៊ាន គំរោងហេដ្ឋារចនាសម្ព័ន្ឋធំៗអាទិភាព ដែលនឹងជំរុញការតភ្ជាប់ឆ្លងកាត់ព្រំដែន និងនាំមកនូវផលប្រយោជន៍ជាច្រើនដូចជា ភាពប្រកួតប្រជែងនៃបណ្តាញផលិតកម្មតំបន់ ពាណិជ្ជកម្ម សេវាកម្ម លំហូរវិនិយោគប្រសើរជាងមុន និងការកាត់បន្ថយគម្លាតអភិវឌ្ឍន៍។

កិច្ចព្រមព្រៀងសម្របសម្រួលការដឹកជញ្ជូនចំនួនបី ក៏បានរួមចំណែកដល់ការតភ្ជាប់រូបវ័ន្ត កិច្ចព្រមព្រៀងទាំងបីនេះ គឺកិច្ចព្រមព្រៀងក្របខ័ណ្ឌអាស៊ានស្តីពីការសម្រួលទំនិញឆ្លងកាត់ ការសម្រួលសម្រួលការដឹកជញ្ជូនឆ្លងកាត់រដ្ឋសមាជិក និងការដឹកជញ្ជូនពហុបែប ដែលមានគោលបំណងកាត់បន្ថយចំណាយ និងជួយជំរុញចរាចរណ៍រថយន្តទំនិញសេវាឆ្លងកាត់ព្រំដែន។ឧទាហរណ៍ សាធារណៈរដ្ឋប្រជាធិបតេយ្យប្រជាមានិតទ្បាវ និងវៀតណាម បានដាក់ឲ្យដំណើរការប្រព័ន្ឋត្រួតពិនិត្យតែមួយនៅចំណុចត្រួតពិនិត្យព្រំដែនទ្បាវ បាវដាញ់សាវ៉ាញនៅឆ្នាំ២០១៥ ដើម្បីជួយសម្រូលពាណិជ្ជកម្មរវាងប្រទេសទាំងពីរ និងនៅតាមបណ្តោយច្រករបៀងសេដ្ឋកិច្ចលិច កើត។

ប្រទេសសមាជិកអាស៊ាន ក៏កំពុងតែធ្វើឲ្យកាន់តែងាយស្រួល ដល់ការធ្វើចរាចរណ៍ទំនិញ ទាំងនៅក្នុងប្រទេសនិងតាមព្រំដែនឆ្លងកាត់ប្រទេស រួមទាំងតាមរយៈច្រកចេញចូលតែមួយថ្នាក់ជាតិរបស់ប្រទេសជាសមាជិកនិមួយ។ នៅដើមឆ្នាំ២០១៦ ច្រកចេញចូលតែមួយរបស់អាស៊ាន នឹងត្រូវអនុវត្តន៍ក្នុងចំណោមសមាជិក អាស៊ាន ដែលបានត្រៀមលក្ខណៈរួចរាល់។ អាស៊ានក៏កំពុងតែបន្តអនុវត្តន៍ទីផ្សារអាកាសចរណ៍តែមួយ និងទីផ្សារនាវាចរណ៍តែមួយ ដែលជាផ្នែកមួយក្នុងការសម្រេចឲ្យបាននូវគោលដៅក្លាយជាទីផ្សារតែមួយ និងមូលដ្ឋានផលិតកម្ម និងបើកចំហជាជំហ៊ានៗថែមទៀតដល់ការវិនិយោគនៅក្នុងតំបន់អាស៊ាន និងនៅក្រៅតំបន់អាស៊ាន។

វិធានការណ៍តភ្ជាប់ស្ថាប័នរួមមាន វិធានការណ៍នានាដើម្បីសម្រួលពាណិជ្ជកម្ម ដូចជា កន្លែងផ្ទុកទិន្នន័យពាណិជ្ជកម្មអាស៊ាន និងកន្លែងផ្ទុកទិន្នន័យពាណិជ្ជកម្មថ្នាក់ជាតិ។ អាស៊ានក៏កំពុងដោះស្រាយរបាំងពាណិជ្ជកម្មមិនមែនពន្ឋគយ ដើម្បីជំរុ ញពាណិជ្ជកម្មក្នុងតំបន់អាស៊ាន និងការវិនិយោគ និងធ្វើសុខដុមនីយកម្មស្តង់ដានិង និតិវិធីវាយតំលៃភាពស្របគ្នានូវរាល់ប្រទេសសមាជិក៕

ក្រុងព្រះសីហនុកំពុងជំនួសខេត្តសៀមរាបក្នុងនាមជាប៉ូលសេដ្ឋកិច្ចទី២

November 13, 2017

0

ដោយ៖ គង់ សូរិយា

ភ្នំពេញ៖ ខេត្តព្រះសីហនុកំពុងដើរតួនាទីជាប៉ូលសេដ្ឋកិច្ចទី២ បន្ទាប់ពីរាជធានីភ្នំពេញនៅក្នុងពេលឆាប់ៗខាងមុខនេះ ខណៈសក្តានុពលដែលមិនទាន់ទាញយកមកប្រើប្រាស់កាលពីមុន កំពុងមានសភាពរសរវើកតាមរយៈលំហូរវិនិយោគដោយផ្ទាល់ពីបរទេស និងកំនើនភ្ញៀវទេសចរណ៍កើនឡើងយ៉ាងគំហុក។

អគ្គនាយកក្រុមហ៊ុន Century21 Mekong បានថ្លែងឲ្យដឹងថា ខេត្តព្រះសីហនុពិតជាមានសក្តានុពល ដោយសារមានការភ្ជាប់ជើងហោះហើរពីប្រទេសចិន និងពីខេត្តសៀមរាបមកកាន់ទីនោះកាន់តែច្រើន ពិសេសអ្វីដែលលោកភ្ញាក់ផ្អើលនោះ គឺលោកឃើញវត្តមានជនជាតិចិនកាន់តែច្រើនមកទស្សនា និងវិនិយោគនៅខេត្តជាប់មាត់សមុទ្រមួយនេះ។លោកបន្តថា ខេត្តនេះនៅមានសក្តានុពល សម្រាប់អភិវឌ្ឍន៍ច្រើន ដោយសារមានដីទំនេរច្រើន ដែលផ្តល់ជំរើសដល់អ្នកអភិវឌ្ឍន៍កាន់តែមានភាពងាយស្រួល។

លោកបន្តថា “និយាយពីការសាងសង់ខុនដូនៅខេត្តព្រះសីហនុ យើងត្រូវសួរថា តើអ្នកអភិវឌ្ឍន៍ផ្តោតលើអ្នកណាជាគោលដៅ។ បើអ្នកវិនិយោគផ្តោតលើប្រជា ជនក្នុងស្រុកខ្ញុំមិនសូវមានជំនឿចិត្តនោះទេ។លោកបន្តថា “ប្រជាពលរដ្ឋខេត្តព្រះសីហនុទំនងមិនសូវចាប់អារម្មណ៍ខុនដូច្រើនទេ ពួកគេនៅតែចាប់អារម្មណ៍លំនៅដ្ឋានផ្ទាល់ដី ដោយសារខេត្តនៅសល់ដីទំនេរច្រើន និងមានតំលៃធូរថ្លៃនៅឡើយ។

ខេត្តព្រះសីហនុបច្ចុប្បន្នបានក្លាយជាប៉ូលទី២ ដែលអ្នកវិនិយោគបរទេសបាននិងកំពងសាងសង់ខុនដូនៅតំបន់នេះច្រើន ដូចជា គំរោង Dseaview, Sunshine Bay, Royal Bayview និងគំរោងខុនដូជាច្រើនទៀត ដែលបាននិងកំពុងសាងសង់ជាបន្តបន្ទាប់។

លោក ច្រឹក សុននីម បានបន្តថា ដោយសារខេត្តព្រះសីហនុជាតំបន់ទេសចរណ៍ ហើយរដ្ឋាភិបាលកំពុងរៀបចំតំបន់នេះទៅជាតំបន់ពាណិជ្ជកម្មនាពេលអនាគត អ្នកវិនិយោគដែលមានគោលដៅធ្វើការវិនិយោគរយៈពេលវែងបានងាកទៅកាន់តំបន់នេះ ដោយសារវាជាតំបន់ដែលមានសក្តានុពលសម្រាប់ពេលអនាគត។

លោកបន្តថា “រដ្ឋាភិបាលបាននិងកំពុងផ្តោតការយកចិត្តទុកដាក់នៅតំបន់នេះ តាមរយៈការរៀបចំឆ្នេរឲ្យមានសោភ័ណភាព និងរៀបរៀបរយជាងមុន គម្រោងសាងសង់ផ្លូវហាយវេពីរាជធានីភ្នំពេញ ទៅកាន់ខេត្តនេះ ការមានព្រលានយន្តហោះ លំដាប់អន្តរជាតិ និងកំណើនភ្ញៀវទេសចរណ៍ សុទ្ឋតែជាកត្តាហុចសក្តានុពលដល់អ្នកវិនិយោគសាងសង់ខុនដូនៅខេត្តនេះ។លោកបន្តថា “ពេលបុណ្យទានម្តងៗពិបាករកផ្ទះសំណាក់ និងសណ្ឋាគារសម្រាប់ស្នាក់នៅ ដូច្នេះការទិញខុនដូសម្រាប់លំហែរនឹងជាជំរើសមួយផងដែរ។

អ្នកវិនិយោគខុនដូមួយរូប ដែលបាននិងកំពុងវិនិយោគខុនដូមួយក្នុងចំណោមខុនដូខាងលើបាននិយាយក្នុងលក្ខខ័ណ្ឌមិនបញ្ចេញឈ្មោះថា“ខេត្តព្រះសីហនុជាខេត្តតំបន់ឆ្នេរមួយ ដែលមានភាពស្រស់ស្អាត និងជាប៉ូលទាក់ទាញភ្ញៀវទេសចរណ៍លំដាប់ទី២បន្ទាប់ពីខេត្តសៀមរាប ដូច្នេះខ្ញុំគិតថាអ្វីៗវានឹងប្រសើរឡើងសម្រាប់ខុនដូរបស់ខ្ញុំ ព្រោះទីនោះមិនសូវមានខុនដូ និងអូតែលលំដាប់ប្រណីតនៅឡើយ។

“យើងសាងសង់ខុនដូសម្រាប់ទាក់ទាញជនបរទេស មកប្រទេសរបស់យើង ហើយនៅឆ្នាំ២០១៨ ការចម្រាញ់យកប្រេងកាតពីសមុទ្ររបស់យើង នឹងចាប់ផ្តើមដែលនេះជាផ្នែកមួយដ៏សំខាន់ ក្នុងការទាក់ទាញអ្នកវិនិយោគបន្ថែមមកកាន់ទីនេះ។ អ្នកវិនិយោគរូបនោះបន្ថែម។

លោក ហូ វណ្ឌីអគ្គលេខាធិការសម្ព័ន្ឋទេសចរណ៍ជាតិកម្ពុជាបានថ្លែងថា បច្ចុប្បន្នមានក្រុមហ៊ុនអាកាសចរណ៍ក្នុងស្រុកចំនួនពីរ គឺក្រុមហ៊ុនកម្ពុជាអង្គរអ៊ែរ និងក្រុមហ៊ុនបាយ័នអ៊ែរបានធ្វើការហោះហើររវាងខេត្តសៀមរាប និងរាជធានីភ្នំពេញទៅកាន់ខេត្តព្រះសីហនុជារៀងរាល់ថ្ងៃ និងមានអាកាសចរណ៍មកពីបរទេសធ្វើការហោះហើរលក្ខណៈជួល និងយូរៗម្តងមកកាន់ខេត្តព្រះសីហនុផងដែរ។

លោកបន្តថា “ខេត្តនេះនឹងកាន់តែមានសក្តានុពល និងមានការរីកចំរើនកាន់តែខ្លាំង ប្រសិនជាអាជ្ញាធររក្សាបាននូវហេដ្ឋារចនាសម្ព័ន្ឋ និងបរិស្ថាន ព្រមទាំងសម្បត្តិ ធម្មជាតិទាំងលើគោក និងក្នុងទឹកបានល្អ។លោកបន្តថា “ជោគជ័យឬមិនជោគជ័យលើការសាងសង់ខុនដូ និងអចលនវត្ថុនៅទីនេះ វាអាស្រ័យលើការអភិរក្សធនធានធម្មជាតិ និងការរៀបចំតំបន់នេះឲ្យកាន់តែមានភាពទាក់ទាញ។

លោក យន្ត មីន អភិបាលខេត្តព្រះសីហនុបានថ្លែងថា បច្ចុប្បន្នមានខុនដូចំនួនបីបាន និងកំពុងសាងសង់នៅតាមតំបន់ឆ្នេរក្នុងខេត្ត ដែលជាការវិនិយោគរបស់ក្រុមហ៊ុនក្នុងស្រុក និងបរទេស។លោកបន្តថា ខេត្តព្រះសីហនុចេះតែបន្តអភិវឌ្ឍន៍ទៅមុខ កាន់តែលឿន ដោយសាររដ្ឋាភិបាលបានរៀបចំខេត្តនេះ ឲ្យក្លាយជាតំបន់ពាណិជ្ជកម្មពហុវិស័យ ព្រោះខេត្តនេះមានឆ្នេរស្អាត មានកំពង់ផែទឹកជ្រៅតែមួយគត់នៅកម្ពុ ជា និងមានជើងហោះហើរត្រង់កាន់តែច្រើនឆ្ពោះមកកាន់ខេត្តនេះ។

លោកបន្តថា “ដោយសារសន្តិភាព ទើបមានអ្វីៗទាំងអស់នេះ។លោកបន្តថា “ប្រជាជនក្នុងខេត្តព្រះសីហនុ មានការចាប់អារម្មណ៍លើខុនដូខុនដូច្រើន។

ទីប្រឹក្សារាជរដ្ឋាភិបាលកម្ពុជា លោកបណ្ឌិតសុក ស៊ីផាន់ណាបានថ្លែងថា តាមរយៈគោលនយោបាយអភិវឌ្ឍន៍ វិស័យឧស្សាហកម្មរបស់រដ្ឋាភិបាល ដែលបានដាក់ខេត្តព្រះសីហនុជាតំបន់សេដ្ឋកិច្ច និងឧស្សាហកម្មបានធ្វើឲ្យខេត្តនេះមានសកម្មភាពអភិវឌ្ឍន៍យ៉ាងលឿន ដោយសារហេដ្ឋារចនាសម្ព័ន្ឋអំណោយផលនានា ដូចជា តំបន់សេដ្ឋកិច្ចពិសេស ដែលងាយស្រួលក្នុងការដឹកជញ្ជូន ដោយសារវាជាប់កំពង់ផែទឹកជ្រៅតែមួយគត់របស់កម្ពុជា ការពង្រីកព្រលានយន្តហោះកងកេង ក្លាយជាព្រលានយន្តហោះលំដាប់អន្តរជាតិ ការតភ្ជាប់ផ្លូវគោក និងផ្លូវល្បឿនលឿនជាដើម សុទ្ឋតែជាសក្តានុពលរបស់ខេត្ត។

លោកបន្តថា “ខ្ញុំគិតថារយៈពេល៥ឆ្នាំខាងមុខ ខេត្តព្រះសីហនុនឹងជំនួសខេត្តសៀមរាប ដោយសារខេត្តសៀមរាបពឹងផ្អែកខ្លាំង តែលើវិស័យទេសចរណ៍តែមួយប៉ុណ្ណោះ។

បច្ចុប្បន្នព្រលានយន្តហោះកងកេង ខេត្តព្រះសីហនុមានយន្តហោះចុះចតចំនួន២៤លើកក្នុងមួយថ្ងៃ ខណៈដែលអ្នកនាំពាក្យរដ្ឋលេខាធិការអាកាសចរណ៍ស៊ីវិលលោកស៊ិន ចាន់សិរីវុត្ថាបានលើកឡើងថា លោករំពឹងថាព្រលានយន្តហោះនេះនឹងអាចទទួលភ្ញៀវឆ្លងកាត់៨០ម៉ឺននាក់នាឆ្នាំនេះ៕

ស្វែងយល់ពីកិច្ចប្រជុំ “កិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC)”

November 11, 2017

0

ដោយ ៖ ស៊ីវត្ថា

ភ្នំពេញ ៖ ស្របពេលដែលមានកិច្ចប្រជុំរបស់មេដឹកនាំកំពូលៗលើពិភពភលោក ក្នុងកិច្ចប្រជុំ “កិច្ចសហប្រតិបត្តិការសេដ្ឋកិច្ចអាស៊ី – ប៉ាស៊ីហ្វិក (APEC)” ក្រោម មូលបទ “ ការចូលរួមជាដៃគូដើម្បីថាមភាពថ្មីសម្រាប់សមាហរណកម្ម និងការតភ្ជាប់គ្រប់ជ្រុងជ្រោយនៃតំបន់អាស៊ី-ប៉ាស៊ីហ្វិក” ដែលប្រព្រឹត្តទៅនៅទីក្រុងដាណំាង ប្រទេសវៀតណាមនោះ គេហទំព័រ propertyarea.asia សូមនាំយកនៅចំណេះដឹងខ្លះៗទាក់ទងទៅនឹងការបង្កើតស្ថាប័នមួយនេះក្នុងផលប្រយោជន៍អ្វីខ្លះ។

តើកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកគឺជាអ្វី?

កិច្ចសហប្រតិបត្តិការសេដ្ឋកិច្ចអាស៊ី – ប៉ាស៊ីហ្វិក (APEC) គឺជាវេទិកាសេដ្ឋកិច្ចថ្នាក់តំបន់មួយដែលបានបង្កើតឡើងនៅឆ្នាំ 1989 ដើម្បីជំរុញដល់ការពង្រឹងគ្នាទៅវិញទៅមកដែលកំពុងតែកើនឡើងនៃតំបន់អាស៊ី – ប៉ាស៊ីហ្វិក។ សមាជិក 21 របស់ APEC មានបំណងក្នុងការបង្កើតភាពរុងរឿងអោយកាន់តែច្រើនសម្រាប់ប្រជាជនក្នុងតំបន់តាមរយៈការជំរុញកំណើនមានតុល្យភាព បញ្ចូលគ្នាប្រកបដោយនិរន្តភាព ភាពច្នៃប្រឌិតថ្មី និងសន្តិសុខ ព្រមទាំងការជំរុញអោយមានសមាហរណកម្មសេដ្ឋកិច្ចក្នុងតំបន់ទាំងមូល។

តើ APEC ធ្វើអ្វីខ្លះ? APEC បានធានាថាទំនិញ សេវាកម្ម ការវិនិយោគ និងប្រជាជនធ្វើដំណើរយ៉ាងងាយស្រួលឆ្លងកាត់ព្រំដែន។ សមាជិករបស់ APEC នឹងជួយសម្រួលពាណិជ្ជកម្ម តាមរយៈការសម្រួលនីតិវិធីពន្ធគយអោយបានលឿននៅតាមព្រំដែនដើម្បីធ្វើយ៉ាងណាអោយបរិយាកាសអាជីវកម្មមានអំណោយផលបន្ថែមទៀត និងការចងក្រងបទបញ្ជា និងស្តង់ដារមួយនៅទូទាំងតំបន់។ ឧទាហរណ៍ គំនិតផ្តួចផ្តើមរបស់ APEC ដើម្បីធ្វើអោយមានប្រព័ន្ធនិយតកម្មគឺជាជំហានដ៏សំខាន់មួយក្នុងការរួមបញ្ចូលសេដ្ឋកិច្ចអាស៊ី – ប៉ាស៊ីហ្វិក។ ផលិតផលអាចត្រូវបាននាំចេញយ៉ាងងាយស្រួលដោយគ្រាន់តែបង្កើតស្តង់ដាររួមមួយគ្រប់ប្រព័ន្ធសេដ្ឋកិច្ចទាំងអស់។

អាស៊ី – ប៉ាស៊ីហ្វិកមានការឯកភាពពិសេស និងប្រកបដោយចីរភាព APEC ធ្វើការដើម្បីជួយដល់ប្រជាពលរដ្ឋទាំងអស់នៅតំបន់អាស៊ី – ប៉ាស៊ីហ្វិកចូលរួមក្នុងការធ្វើអោយសេដ្ឋកិច្ចរីកចម្រើន។ ឧទាហរណ៍គម្រោងរបស់ APEC បានផ្តល់ការបណ្តុះបណ្តាលជំនាញឌីជីថលដល់សហគមន៍ជនបទ និងជួយដល់ស្ត្រីជនជាតិដើមភាគតិចក្នុងការនាំផលិតផលរបស់ពួកគេចេញទៅក្រៅប្រទេស។ ដោយទទួលស្គាល់ពីផលប៉ះពាល់នៃការប្រែប្រួលអាកាសធាតុ សមាជិករបស់ APEC ក៏អនុវត្តន៍នូវគំនិតផ្តួចផ្តើមដើម្បីបង្កើនប្រសិទ្ធភាពថាមពល និងលើកកម្ពស់ការគ្រប់គ្រងប្រកបដោយនិរន្តរភាពនូវធនធានព្រៃឈើ និងធនធានទឹក។ វេទិកានេះមានការសមស្របដើម្បីឱ្យសមាជិកខ្លួនអាចដោះស្រាយរាល់បញ្ហាប្រឈមថ្មីសំខាន់ៗចំពោះសុខុមាលភាពសេដ្ឋកិច្ចក្នុងតំបន់។ នេះរួមបញ្ចូលទាំងការធានានូវភាពធន់ទៅនឹងគ្រោះមហន្តរាយ ការរៀបចំផែនការសម្រាប់ជំងឺរាតត្បាត និងការដោះស្រាយភេរវកម្ម។ ប្រទេសជាសមាជិករបស់ APEC មាន 21 ប្រទេសគឺប្រទេសអូស្ត្រាលី ប្រទេសព្រុយណេដារូសាឡឹម កាណាដា ឈីលី សាធារណរដ្ឋប្រជាមានិតចិន ហុងកុងប្រទេសចិន ឥណ្ឌូនេស៊ី ប្រទេសជប៉ុន សាធារណៈរដ្ឋកូរ៉េ ម៉ាឡេស៊ី ម៉ិកស៊ិក នូវែលសេឡង់ ប៉ាពួញូហ្គីណេ ប៉េរូ ប្រទេសហ្វីលីពីន សហព័ន្ធរុស្ស៊ី សិង្ហបុរី ចិនតៃប៉ិ ថៃ សហរដ្ឋអាមេរិក និងវៀតណាម។

ដំណើរការ APEC APEC: កិច្ចសហប្រតិបត្តិការ និងឯកភាពគ្នា APEC ធ្វើជាវេទិកាកិច្ចសហប្រតិបត្តិការសេដ្ឋកិច្ចនិងពហុភាគី។ សេដ្ឋកិច្ចរបស់សមាជិកចូលរួមលើមូលដ្ឋាននៃការសន្ទនាគ្នាដោយបើកចំហរ និងការគោរពចំពោះទស្សនវិស័យទាំងអស់។ នៅក្នុង APEC សមាជិកមានសិទ្ធិនិយាយស្មើៗគ្នា ហើយការសម្រេចចិត្តត្រូវបានសម្រេចដោយមតិឯកច្ឆ័ន្ទ។ មិនមានកាតព្វកិច្ចចង់ ឬកាតព្វកិច្ចសន្ធិសញ្ញាអ្វីឡើយ។ ការប្តេជ្ញាចិត្តត្រូវបានអនុវត្តទៅតាមមូលដ្ឋានស្ម័គ្រចិត្ត ហើយគម្រោងកសាងសមត្ថភាពរបស់សមាជិកអនុវត្តក្នុងការផ្តួចផ្តើមរបស់ APEC ។ រចនាសម្ព័នរបស់ APEC មានមូលដ្ឋានលើវិធីសាស្រ្ត “ពីក្រោមឡើងលើ” និង “ពីលើចុះក្រោម” ។ គណៈកម្មាធិការស្នូលបួននិងក្រុមការងាររៀងៗខ្លួនផ្តល់នូវអនុសាសន៍គោលនយោបាយជាយុទ្ធសាស្ត្រដល់មេដឹកនាំ APEC និងរដ្ឋមន្រ្តីដែលកំណត់ចក្ខុវិស័យជារៀងរាល់ឆ្នាំនូវគោលដៅ និងគំនិតផ្តួចផ្តើមនានា។ បន្ទាប់មកក្រុមការងារត្រូវបានប្រគល់ភារកិច្ចឱ្យអនុវត្តគំនិតផ្តួចផ្តើមទាំងនេះតាមរយៈគម្រោងឧបត្ថម្ភដោយ APEC ។ គម្រោងកសាងសមត្ថភាពរបស់ APEC គម្រោងកសាងសមត្ថភាពដើរតួនាទីយ៉ាងសំខាន់ក្នុងការជួយឱ្យគោលដៅរបស់ APEC ក្លាយជាការពិត។ ដោយលើកកម្ពស់សមត្ថភាពរបស់សមាជិកតាមរយៈការបណ្តុះបណ្តាលជំនាញនិងចំណេះធ្វើបច្ចេកវិជ្ជាគម្រោងដែលឧបត្ថម្ភដោយ APEC ពង្រឹងសមត្ថភាពរបស់សមាជិកដើម្បីអនុម័តគំនិតផ្តួចផ្តើមថ្មីៗពីការកែច្នៃគយអេឡិចត្រូនិចទៅជាកំណែទម្រង់ច្បាប់។ គម្រោង APEC ក៏ផ្តោតគោលដៅលើគោលនយោបាយជាក់លាក់ពីការជំរុញលទ្ធភាពប្រកួតប្រជែងសហគ្រាសខ្នាតតូចនិងមធ្យមដើម្បីជួយសម្រួលដល់ការទទួលយកបច្ចេកវិទ្យាថាមពលកកើតឡើងវិញនៅក្នុងតំបន់។ អង្គភាពគ្រប់គ្រងគម្រោង APEC ត្រួតពិនិត្យគំរោងដែលឧបត្ថម្ភដោយ APEC ដោយសហការជាមួយក្រុមការងារ។ ថវិកាសម្រាប់គម្រោងនានាត្រូវបានបង្កើតឡើងដោយការចូលរួមវិភាគទានពីសមាជិក APEC ។ អង្គភាពគាំទ្រគោលនយោបាយអេភីអេកផ្តល់ការស្រាវជ្រាវការវិភាគ និងការវាយតម្លៃគោលនយោបាយដើម្បីជួយក្នុងការអនុវត្តន៍របៀបវារៈរបស់ APEC ។ ដំណើរការរបស់ APEC ត្រូវបានគាំទ្រដោយលេខាធិការដ្ឋានអចិន្ត្រៃយ៍ដែលមានមូលដ្ឋាននៅសិង្ហបុរី។

ក្រុមហ៊ុនយក្សរបស់ជប៉ុនថ្មីមួយ នឹងវិនិយោគមជ្ឈមណ្ឌលពាណិជ្ជកម្មនៅក្រុងភ្នំពេញ

November 11, 2017

0

ដោយ៖ គង់ សូរីយា

ភ្នំពេញ៖ ក្រុមហ៊ុនអចលនទ្រព្យយក្សមួយមកពីប្រទេសជប៉ុន គ្រោងនឹងសាងសង់មជ្ឈមណ្ឌលពាណិជ្ជកម្មដ៏ធំមួយ នៅទីក្រុងភ្នំពេញដើមឆ្នាំ២០១៨ខាងមុខនេះ។

យោងតាមព៌តមានពីស្ថានទូតជប៉ុន ដែល Propertyarea.asia ទទួលបាននាព្រឹកថ្ងៃទី១១ វិច្ឆិកានេះបានឲ្យដឹងថា ក្រុមហ៊ុន URATA S.E (Cambodia) Co, Ltdដែលជាក្រុមហ៊ុន មានជំនាញលើវិស័យអចលនទ្រព្យជាច្រើនឆ្នាំ នឹងសាងសង់មជ្ឈមណ្ឌលពាណិជ្ជកម្មកំពស់២៣ជាន់មួយ ស្ថិតនៅក្នុងសង្កាត់ទួលទំពូងរាជធានីភ្នំពេញ។ អាគារពាណិជ្ជកម្មនេះ ផ្តោតលើការផ្តល់សេវាកម្មការិយាល័យ អាផាតម៉ិន ខុនដូ និងផ្សារទំនើបផងដែរ។

ទោះជាយ៉ាងណា ក្រុមហ៊ុន ARATA S.E មិនទាន់បញ្ជាក់ឲ្យដឹងពីទំហំទុនវិនិយោគ និងទីតាំងច្បាស់លាស់នៅឡើយទេ។

បច្ចុប្បន្នក្រុមហ៊ុនអចលនទ្រព្យជប៉ុន កាន់តែច្រើនបានចូលមកវិនិយោគនៅកម្ពុជា ដូចជា ក្រុមហ៊ុន CREED Group ដែលបាននិងកំពុងវិនិយោគគំរោងខុនដូ បុរីមហាសែនសុខ បុរី ARATA ក្រុមហ៊ុន TOYOKO INN វិនិយោគសាងសង់ សណ្ឋាគារ និងក្រុមហ៊ុនARAKAWA Co, Ltdដែលបានទិញយកអាគារប៊ូឌីញ ស និងកំពុងវិនិយោគខុនដូតម្លៃសមរម្យ នៅសង្កាត់ទឹកថ្លា ខ័ណ្ឌសែនសុខ រាជធានីភ្នំពេញ។

រហូតមកទល់ពេលនេះមានសហគ្រាស និងក្រុមហ៊ុនជប៉ុនជាង១០០០ហើ យកំពុងវិនិយោគនៅកម្ពុជា។

លោកបណ្ឌិតម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ទំនាក់ទំនងជប៉ុនបានឈានដល់ដំណាក់កាលថ្មីមួយ តាមរយៈទំនាក់ទំនងល្អរវាងរដ្ឋាភិបាលប្រទេសទាំងពីរ និងបន្ទាប់ពីមានជើងហោះហើររបស់ក្រុមហ៊ុនអាកាសចរណ៍ ANA ដែលបានហោះត្រង់មកកម្ពុជាកាលពីចុងឆ្នាំមុន។លោកបន្តថា ការភ្ជាប់ជើងហោះហើរត្រង់នេះ មិនត្រឹមតែជំរុញទំហំពាណិជ្ជកម្ម និងទំនាក់ទំនងរបស់រដ្ឋាភិបាលប្រទេសទាំងពីរទេ តែជាការបង្ហាញនូវប្រវត្តិសាស្ត្រថ្មីមូយ នៃនយោបាយនិងកាទូតរវាងប្រទេសទាំងពីរ។

លោកបន្តថា “ជប៉ុនបានវិនិយោគលើមូលដ្ឋានចាំបាច់ សម្រាប់ការស្នាក់នៅ និងវិនិយោគរយៈពេលវែងនៅកម្ពុជារួចហើយ ព្រោះជប៉ុនមុនទៅវិនិយោគនៅប្រទេសណា ពួកគេបានសិក្សាច្បាស់លាស់ណាស់ មុនសម្រេចចិត្តទៅវិនិយោគនៅប្រទេសទាំងនោះ។លោកបន្តថា “បច្ចុប្បន្នជប៉ុនបានវិនិយោគលើផ្សារ ទំនើប សណ្ឋាគារ ខុនដូ អាផាតម៉ិន ការិយាល័យ មន្ទីរពេទ្យ និងទីលានវាយកូនហ្គោលជាដើម ដែលនេះសុទ្ឋតែជាមូលដ្ឋានសម្រាប់ការស្នាក់នៅ និងវិនិយោគរយៈពេលវែងនៅទីនេះ”៕

ឧកញ៉ា នួន រិទ្ឋី ប្រាប់ពីវិធីសន្សំលុយ និងវិនិយោគដើម្បីក្លាយជាអ្នកមាន

November 11, 2017

0

ដោយ៖ ដួង ចន្ទ្រា

ភ្នំពេញ៖ មនុស្សម្នាក់ៗមានវិធីសាស្ត្រសន្សំលុយ និងយុទ្ឋសាស្ត្រខុសៗគ្នា ដើម្បីក្លាយជាអ្នកមានឬឧកញ៉ា ជាក់ស្តែងថ្ងៃនេះ Propertyarea.asia សូមលើកយកគំរូនៃការសន្សំលុយ និងយុទ្ឋសាស្ត្រវិនិយោគរបស់លោកឧកញ៉ា នួន រិទ្ឋី អគ្គនាយកក្រុមហ៊ុន Khmer Foundation Appraisal។

លោកឧកញ៉ា នួន រិទ្ឋី ដែលជាសេដ្ឋីវ័យក្មេងបានបង្ហើបឲ្យដឹងពីវិធីសាស្ត្រ និងយុទ្ឋសាស្ត្រសន្សំលុយ និងវិនិយោគដើម្បីក្លាយជាអ្នកមានថា វិធីសាស្ត្រសន្សំលុយ និងការរកស៊ីរបស់ខ្ញុំគឺផ្តោតលើកក្តា “រៀនរស់ រៀនរក រៀនសន្សំ។ ពិសេសការសន្សំគឺសន្សំទាំងលុយ សន្សំទាំងញាតិ សន្សំទាំងផៅសន្តាន ព្រោះដើម្បី មុខជំនួញបានទទួលជោគជ័យ ក្រុមគ្រួសារមួយមានភាពថ្កុំថ្កើង និងទទួលបាន ជោគជ័យត្រូវចាប់ផ្តើមដោយការសន្សំសំចៃ។

លោកបន្តថា “ការសន្សំសំចៃរបស់ខ្ញុំ គឺផ្តោតលើចំណូលប្រចាំថ្ងៃ និងចំណែកត្រូវរក្សាទុក៣០ទៅ៤០ភាគរយ ក្រៅពីនោះខ្ញុំយកវាទៅវិនិយោគលើសង្គម វិនិយោគលើចំណេះដឹងផ្សេងៗ និងចូលរួមកម្មវិធីផ្សេង។លោកបន្តថា “ក្រៅពីការសន្សំ៣០ភាគរយនៃថវិកាយើងរកបាន យើងនឹងយកចំណែកខ្លះទៅវិនិយោគ និងត្រូវមានភាពវ័យឆ្លាតដោយទៅខ្ចីធនាគារ ដើម្បីយកមកវិនិយោគ ដោយផ្តោតលើគំរោងវិនិយោគ ដែលបានអាចផ្តល់លុយប្រចាំថ្ងៃ ប្រចាំខែ និងប្រចាំឆ្នាំត្រលប់មកវិញ។

លោកឧកញ៉ា នួន រិទ្ឋី បានបន្តថា ក្រៅពីនេះលោកផ្តោតលើការវិនិយោគលើដីដែលមានសន្តានុពល និងទិញតម្លៃសមរម្យ ដែលរយៈពេល៦ខែទៅ១ឆ្នាំយើងអាចទទួលបានផលចំណេញ ឬទុកបន្តទៀត ព្រោះវិស័យអចលនវត្ថុកម្ពុជានៅមានសក្តានុពលរយៈពេលវែងតទៅទៀត។ លោកបន្តថា ការទិញដីនៅទីតាំងណាមួយ យើងត្រូវពិនិត្យមើលពីយុទ្ឋសាស្ត្រ និងផែនការអភិវឌ្ឍន៍របស់រដ្ឋាភិបាល ព្រោះបើយើងមិនមានព៌តមាន និងមិនអាចវិភាគបានស៊ីជម្រៅ យើងមិនអាចសម្រេចចិត្តវិនិយោគបានទេ។

ឧទាហរណ៍កន្លែងមួយ ជាវាលរហោដ្ឋាន ប៉ុន្តែរដ្ឋាភិបាលមានបំណងចង់ ឲ្យមនុស្សទៅរស់នៅកន្លែងនោះ ដោយវិនិយោគលើហេដ្ឋារចនាសម្ព័ន្ឋដូចជា ផ្លូវ ទឹក ភ្លើងទៅដល់។ យើងអាចទៅទិញជាមុន នៅពេលយើងទទួលបានព៌តមាននោះ។ អ្នកខ្លះទិញដីដែលមិនទាន់មានការកែច្នៃ តែអ្នកខ្លះទៀត គាត់មិនចង់ចំណាយពេលទេ គឺពួកគេទិញដីបានគឺអាចវិនិយោគសាងសង់បានតែម្តង។ អ្នកទាំងពីរនេះដើរបញ្ច្រាសទិសគ្នា តែមានគោលដៅស្រដៀងគ្នា។នេះបើតាមការបញ្ជាក់ឲ្យដឹងពីលោកឧកញ៉ានួន រិទ្ឋី។

លោកឧកញ៉ាបន្តថា “សម្រាប់ខ្ញុំ គឺខ្ញុំធ្វើទាំងពីរទាំងការវិនិយោគទុក និងការអភិវឌ្ឍទន្ទឹមគ្នា ដោយសារយើងជ្រើសរើសតំបន់ណាមួយនោះ ជាតំបន់មានសក្តានុពល គឺយើងអភិវឌ្ឍន៍មុនគម្រោងរបស់រដ្ឋាភិបាល។លោកបន្តថា “ហេតុនេះព៌តមានសំខាន់ណាស់ ពិសេសការជឿជាក់លើរដ្ឋាភិបាលតែម្តង ព្រោះអ្នកមិនមានភាពជោគជ័យ ច្រើនជាអ្នកមិនច្បាស់លាស់ និងមិនជឿជាក់លើរដ្ឋាភិបាល។

លោកឧកញ៉ា នួន រិទ្ឋី បានបន្តទៀតថា អ្វីដែលយើងគួរផ្តោតការសម្លឹងមើល និងពិចារណាមួយទៀត គឺកំនើនសេដ្ឋកិច្ចដែលកម្ពុជាទទួលបាន ពិសេសប្រាក់ចំណូលប្រជាជនកើនឡើង ជីវភាពកាន់តែធូរធារ ការចាយវាយដែលសូម្បីតែកូនក្មេងបច្ចុប្បន្ន គេស្គាល់ផលិតផលប្រេនៗរួចទៅហើយ។ អ្វីគួរពិចារណាមួយទៀត គឺយើងឃើញអ្នកវិនិយោគ ពីបរទេសចូលមកវិនិយោគកាន់តែច្រើន ពួកគេមកចាប់យកឳកាស និងប្រាក់ចំណេញនៅទីនេះ ចុះហេតុអីយើងម្ចាស់ប្រទេសមិនហ៊ានវិនិយោគ? ហេតុនេះយើងត្រូវតែវិនិយោគលើទីតាំងល្អ និងគំរោងល្អៗឲ្យបានមុនគេ ព្រោះបើយើងម្ចាស់ប្រទេសមិនជឿជាក់លើការដឹកនាំ ឬជាឪពុកម្តាយរបស់ពួកយើងផង យើងយើងធ្វើម្តេចអាចមានឳកាស និងឈ្នះគេបាន???៕